2014-09-30

Protestas per democratia en Hongkong

CY Leung, la gidor de Hongkong, ia recomenda forte ce protestores prodemocrata sesa "direta" se campania, car folas enorme preveni la opera normal de partes de la teritorio.

Desuples de miles de persones ia bloci stradas en alga areas.

La protestores vole ce Beijing permete ce Hongkong vota libre per se gidor seguente. Beijing rejeta esta.

A presente, la stradas es relativa cuieta, ma on previde ce folas va ariva plu tarda, per la Dia Nasional Xines a la prima de otobre – un festa cual selebra la fundi de Xina Comuniste.

A la fini de semana, polisiores antitumulta ia usa gas lacrimojen e airosoles de peper, ma on ia retira esta polisia a pos, e la protestores ia resta calma.

Partes major de la site es blocida, incluinte alga scolas e bancos.

La protestores desira ce Leung, la dirijor xef de Hongkong, resinia. El ia pare rejeta esta, disente ce si on ta despone el, la gidor seguente ta es elejeda par un comite, e no par votores.

En la mense pasada, Beijing ia deside ce la popla de Hongkong pote eleje se gidor seguente en 2017.

Ma la aspirores va es restrinjeda a du o tre persones ci debe es aprobada par la majoria de un comite ci suporta Beijing. En efeto, Beijing pote elimina aspirores ci lo no gusta.

2014-09-29

Ghani es inaugurada como presidente afgani

On ia inaugura Ashraf Ghani como presidente de Afganistan en un rituo a la palasio presidental en Kabul.

Esta segue ses menses de nonprogresa en un disputa sur froda elejal e un reconta de votas.

Su un acorda negosiada par la SUA, Ghani emprende la posto de presidente, en cuando la suvinsor Abdullah Abdullah pote proposa algun per posto de ministro xef.

La taliban ia descrive la acorda como "un finje dirijeda par la SUA", ma Ghani ia bonveni lo como "un vinse grande".

A se rituo inaugural, a cual asta 100 ofisiores alta ia es presente, Ghani ia jura obedi la constitui e otra leges.

El ia loda "la move prima democrata de potia" de la pais, e ia parla amin sur Abdullah, se oposor e aora asosior en governa.

Abdullah, ci emprende un rol nova creada, ia dise ce la du gidores va colabora "per un futur plu bon con fida e onestia".

Parlante a comensa de la rituo, Hamid Karzai, la presidente partinte, ia recomenda ce la popla suporta la governa nova. Karzai ia gida la pais de pos la despone de la governa taliban en 2001.

La ata prima cual on previde par la governa nova es la suscrive de un acorda par cual soldatos SUA va resta en Afganistan pos la fini de esta anio. Karzai ia oposa esta.

Securia en Kabul es forte oji. Poca persones es sur la stradas, e botecas es cluida. Un bomba ia esplode sur la strada a la airoporto, ma nun ia es ferida.

A venerdi, la taliban ia invade un distrito stratejial en Ghazni, un provinse este, asentuante la defias cual Ghani e se fortes va fronti.

2014-09-28

Un volcan japanes mata 30 paseores

Salvores ia trova 30 paseores sin vive, prosima a la apico de Monte Ontake, pos un eruta volcanal ier.

La paseores no ia respira e se cores ia sesa. La confirma final de moria en Japan veni sempre par esamina medical.

Sirca 250 persones ia es trapida sur la inclinas, ma la plu ia desende secur.

La volcan, a ueste de Tocio par sirca 200 cilometres, ia eruta subita a saturdi, ejetante sene e rocas.

Normal, la monte es un loca popular per regarda la folias de autono.

En cuando la labora de xerca ia intensi oji, ofisiores ia dise ce los vole trova la 30 persones ancora mancante.

Plu temprana, elicotores militar ia leva sete persones de sur la monte, e salvores sur pede ia aida ance otras a desende.

An si Japan es un de la nasiones la plu sismica ativa de mundo, nun ia perde se vive par causa de un eruta volcanal de pos 1991, cuando 43 persones ia mori a Monte Unzen en la sude-ueste.

On no ia clari perce la eruta a saturdi ia aveni sin averti. Japan oserva atendosa se volcanes, e si cualce mostra indicas de ativia, lo es direta cluida de paseores. Ma acel no ia aveni a esta ves.

2014-09-27

Un barco inversa se en la Pantanal

Ecipos de salvores brasilera e paraguai ia retrae aora oto corpos de la Rio Paraguai, do un barco ia inversa se en un tempesta a mercurdi.

La barco paraguai, Sonia de la Pantanal, ia porta 11 ecipores paraguai e 16 turistes brasilera.

Des-tre persones ia susede nada a tera. Ses manca ancora, e on suposa ce los ia mori.

La turistes ia fa un viaja de pexa a la Pantanal, un de la pantanes de acua dulse la plu grande de mundo.

La Pantanal es un area de biodiversia stonante cual estende tra partes de Brasil, Paraguai e Bolivia. Lo es popular con ecoturistes.

Multe de la vitimes ia es amis ci ia veni de la mesma vila en la stato Paraná en la sude de Brasil. Los ia lua la barco e ia pasa comun 10 dias en pexa en la Pantanal.

La barco ia inversa se a min ca 48 oras ante la fini intendeda de la viaja. Lo ia deveni caturada en un tempesta forte a la posmedia de mercurdi, e ia afonda entre la vilas Carmelo Peralta en Paraguai norde e Porto Murtinho en Brasil.

Sumerjores de la marinas paraguai e brasilera ia labora en junta per trova la corpos. Los crede ce la corpos restante es trapida en la barco inversada.

2014-09-26

Migrores salvada refusa desembarca a Cipros

Sirca 300 persones, sur ci on crede ce los es refujadas suri, refusa desembarca un barcon de turi cual ia salva los prosima a la costa de Cipros. Los insiste ce on prende los a Italia.

La departe ciprica de defende ia dise ce 52 enfantes ia es sur un barco peti de pexa cual ia envia un sinial de radio per aida.

De la 345 migrores estraeda de la mar, sirca 65 ia desembarca volente a Lemesos, e on ia prende los par bus a la campa Kokkinotrimithia, prosima a Nicosia.

La barcon Salamis Filoxenia es aora en la porto de Lemesos, e negosias con los ci refusa parti continua oji.

En la entretempo, 300 pasajores rusce ci ia intende continua se turi a Haifa en Israel ia trova ce se viaja es canselada. On ia move los a oteles en Lemesos.

Aidores ia dise ce oto de la salvadas ia desidrata alga, e otras esperia problemes minor de sania.

On ia descovre la barco de pexa en mar turbosa a 100 cilometres a sude de la vila Paphos.

En esta anio, on ia vide un aumenta grande en la cuantia de migrores ci traversa la Mediteraneo en barcos suprafolida – spesial persones ci fuji de la gera en Suria. La majoria ia dirije se a Italia e Malta.

2014-09-25

Brasil relasa moscitos per combate la denge

Rexercores en Rio de Janeiro ia libri miles de moscitos infetada con un bateria cual supresa la maladia denge.

On espera ce los va reprodui se e deveni la majoria de moscitos, tal reduinte casos de la maladia. La bateria interselulal cual on introdui no pote es comunicada a umanas.

La stratejia es un parte de un projeta cual aveni ance en Australia, Vietnam, e Indonesia.

La program ia comensa en 2012. On va relasa 10 mil moscitos a cada mense per cuatro menses. La relasa prima ia aveni en Tubiacanga, en la norde de Rio.

La bateria, Wolbachia, es trovada en 60% de insetos. Lo condui como un vasin per la moscito de denge, preveninte ce la virus multipli en se corpo.

Wolbachia ave ance un efeto a la reprodui. Si un mas contaminada fertili la ovos de un fema ci no ave la bateria, esta ovos no deveni larvas. Si ambos la mas e fema es contaminada, o si sola un fema ave la bateria, tota jeneras futur de moscito va porta la bateria.

En Australia, on ia trova ce la moscitos con Wolbachia ia deveni la majoria pos 10 semanas per promedia, sin ce rexercores nesesa constante relasa plu insetos contaminada.

La rexerca ia comensa a la Universia de Monash en Australia en 2008. La siensistes ia permete ce la moscitos nuri se de se brasos propre tra sinco anios, par causa de temes ce la bateria ta pote infeta umanas e animales de casa.

La denge ia reapare en Brasil en 1981 pos un asentia de plu ca 20 anios. En la 30 anios seguente, on ia reporta 7 milion casos. Brasil ave aora la plu de casos de denge en la mundo: en la 5 anios pasada, 3,2 milion casos e 800 moris ia es reportada.

2014-09-24

Un satelite barati ariva en orbita de Marte

Barat ia susede pone un satelite en orbita sirca Marte, deveninte la pais cuatro cual ia fa esta.

Mangalyaan, un sonda robotal cual es entre la misiones interplanetal la min custosa, va comensa pronto studia la atmosfera de la planeta roja.

Narendra Modi, la ministro xef de Barat, ia dise ce la pais ia ateni "la cuasi nonposible".

Parlante a la sentro de mision en la site Bangalore, el ia comenta: "La probablia no ia favore nos. De 51 misiones atentada en la mundo, sola 21 ia susede. Nos ia vinse."

Sola la SUA, Europa e Rusia ia envia misiones a Marte a ante. Barat es la pais prima cual ia susede a se atenta prima.

La satelite SUA la plu resente, Maven, ia ariva a Marte a lundi. NASA, la departe SUA de spasio, ia loda se corespondente barati, la Organiza Barati de Spasio e Rexerca, sur la susede.

De temprana en la matina, siensistes ia senta ante se monitores, trasante la progresa de Mangalyaan. Multe de los ia es femes, e alga ia es joven.

Scermos jigante supra se testas ia furni un flue constante de datos. La aclamas prima ia es oiada cuando la satelite ia inisia susedosa se motor de propulsante licuida, la prima en un serie de moves importante per serti ce lo va es caturada par la gravita de la planeta.

Pos acel, on ia debe espeta tra 20 minutos longa, en cuando Mangalyaan ia desapare a retro de Marte, ultra contata. Final, cuando los ia vide confirma ce la satelite orbita aora la planeta, tota la siensistes ia sta subita per aclama, abrasa e aplaudi.

"Si nos ecipo de criceta gania un torneo, la nasion selebra," Modi ia dise. "La ateni de nos siensistes es plu grande."

La sonda va fa fotos de la planeta e studia se atmosfera. Un gol major es atenta deteta metano en la aira martan. Si on trova lo, lo pote indica ativia biolojial a la surfas – o, plu probable, prosima su lo.

2014-09-23

Elas es fasinada par la descovre de un tomba enorme antica

Elinicas es zelosa sur la descovre de un tomba enorme en Elas norde, cual veni de la eda de Alesandro la Grande.

En la temprana de agosto, un ecipo de arceolojistes gidada par Katerina Peristeri ia desentera lo cual ofisiores descrive como la loca de entera la plu grande en la pais.

La colineta es en Amfipoli, un site major antica de la rena macedonsce, a 100 cilometres a este de Tessaloniki, la site du de Elas moderna.

La strutur ia es construida en la parte tarda de la sentenio 4 aec. Se mur ensircante ave un perimetre de 500 metres, multe plu grande ca la loca de entera de Filipo 2, la padre de Alesandro, a ueste de Tessaloniki.

En la tomba, arceolojistes ia trova du cariatides merveliosa. Cada de esta figures fema scultada ave un braso estendeda, suposable per descoraji intruores de entra a la camera xef de la tomba.

La corespondentes moderna de la cariatides senta en un auto polisial, a 200 metres de la entra de la tomba. Du polisiores proteje la loca tra la 24 oras de cada dia. Los debe teni a via la multe jornalistes e turistes ci ariva sur un rua serpente de Mesolakkia, un vileta prosima.

La arceolojistes en la ecipo ia fa no declara sur la identia de la ocupor de la tomba. Ma multe otra persones divina.

On acorda ce la gloria de la tomba indica ce lo ia es construida per un person importante, cisa un membro de la familia direta de Alesandro – cisa se madre Olimpias, o se sposa Roxana, o alga otra macedonsce nobil.

Otras sujesta ce la tomba pote es vacua.

Ma sola la ecipo escavante pote furni la responde concluinte, e se progresa ia lenti pos descovre un camera tre cual es a punto de colasa.

La abitores de la viletas prosima crede forte ce la person enterada en la tomba de mures de marmo es nun otra ca Alesandro la Grande.

Arceolojistes e la ministreria elinica de cultur avisa contra tal divinas, car on sabe ja ce Alesandro la Grande ia es enterada en Misre.

An tal, la descovre ia causa un onda de orgulo e patriotisme elinica, aidante la nasion a iniora tempora se mal situa economial.

2014-09-22

Protestores marxa global contra cambia de clima

Ier, protestas demandante un reata rapida contra la cambia de clima ia atrae sentos de miles de marxores en plu ca 2000 locas tra la mundo.

La Marxa de Popla sur Clima campania per reduis de emetes de carbono, ante un confere de la Nasiones Unida sur clima en New York en la semana veninte.

En Manhattan, 310 mil persones ia partisipa en un marxa protestante, do Ban Ki-moon, la Secretor Jeneral de la NU, ia es ance presente.

Ban ia dise: "Esta es la planeta do nos jeneras seguente va vive. Nos ave no otra solve car nos ave no otra planeta."

La marxa en New York ia es la plu grande de la protestas, atraente plu ca un dui de la cuantia estimada de 600 mil marxores sirca la mundo.

Manhattan ia resona con cantas, claxones e tambures en cuando la protesta colorosa ia progresa tra la stradas.

La protesta global ia inclui avenis en 156 paises.

Sirca 40 mil persones ia marxa en London, incluinte la ator Emma Thompson, ci ia descrive la menasa de clima cambiante a un invade martan.

Sirca 30 mil ia marxa en Melbourne, 25 mil en Paris, 15 mil en Berlin, e 5 mil en Rio, do on ia projeta sloganes ambiental e un cor verde sur la sculta famosa de Cristo la Salvor cual sta supra la site.

Protestas min grande, atraente mera sentos o un pico de miles de persones, ia aveni ance en tal sites como Bogota, Barcelona, Jakarta, e Delhi.

A martedi, la Nasiones Unida va ospita un confere sur clima a se xeferia en New York, con 125 gidores de stato. Esta va es la tal colie prima pos un confere nonsusedosa en København en 2009.

Ban Ki-moon espera ce gidores va progresa sur un acorda universal cual tota nasiones va suscrive a la fini de 2015.

2014-09-21

Un australian enebriada evade un crocodil

Un xasor australian ia survive un ataca de crocodil, par colpa la oio de la retil.

Stephen Moreen, ci ave 20 anios, dise ce el ia vada en acua en la Teritorio Norde per retrae un ganso cual el tira a tera, cuando un crocodil ia saisi el e ia tira el a su la acua.

La animal ia es longa de du metres. Cuando la xasor ia puxa a la oio de la bestia, el ia relasa el.

Se cusin ia fusili alora la retil.

Moreen confesa ce el ia es "pico enebriada" a la tempo. El dise ce el ia bevi plu bir per redui la dole de feris minor en cuando el ia espeta un ambulansia.

"Me ave un rasca a me dorso, e un otra feri a me braso. La crocodil ia lasera un pico de pel a via, e ia lasa me con du o tre bucos."

La ataca ia aveni a la sera de venerdi en Peppimenarti, a sirca 320 cilometres a sude-ueste de Darwin.

En la mense pasada, un pexor ia es matada par un crocodil jigante de acua salosa cuando el ia vada en la Rio Adelaide, a sude de Darwin.

La cuantia de crocodiles ia crese pos cuando on ia declara los como spesie protejeda en 1971. Los apare comun en la norde tropical de Australia.

En marto, la governa australian ia rejeta un idea controversa de permete ce on xasa ala crocodiles en safari.

2014-09-20

Ostajes turces en Irac es librida

Desuples de ostajes turces ia es librida e ia reveni a Turcia pos es saisida par Stato Muslim en junio en Mosul, un site en la norde de Irac.

Ahmet Davutoğlu, la ministro xef de Turcia, ia dise ce la departe de securia ia prende la 46 persones a Şanlıurfa, un site sude.

La detalias es ancora nonclar, ma presidente Recep Tayyip Erdoğan ia descrive la opera como "detaliosa e secreta". NTV, un difusor nasional de novas, ia reporta ce Turcia no ia paia un rescate.

La ostajes ia inclui no sola soldatos ma ance diplomatas e se familias.

Turcia ia refusa deveni direta envolveda en la campania militar contra Stato Muslim, partal par causa de temes sur la securia de la ostajes.

Davutoğlu ia dise ce tota la persones es en bon sania. El ia corti un visita a Azerbaijan per encontra los, ci ia es librida a un ora temprana de saturdi.

Plu ca 30 camionores turces ia es ance saisida en Mosul en junio. Los ia es librida pos un mense, ma on no ia publici esta informa.

Stato Muslim ia saisi ja areas grande de Irac e Suria. On estima ce la grupo pote ave asta 30 mil combatores.

La SIA ia fa ja plu ca 170 atacas airal contra la jihadistes en Irac de pos la media de agosto, suportante soldatos iraci e curdi sur la tera.

Ier, jetos franses ia fa se atacas prima, colpante un reserva de Stato Muslim en Irac norde-este.

Ance ier, Turcia ia abri un parte de se frontera sude-este a miles de curdis suri ci ia es fujinte de un avansa par Stato Muslim.

Plu temprana, soldatos turces ia preveni ce los traversa, provocante protestas coler de curdis turces en un vileta fronteral.

Paises ueste recomenda ce Turcia forti se fronteras con Suria e Irac, per para la flue de combatores stranjer ci junta se a la violentes.

2014-09-19

Scotland rejeta autonomia

Votores en Scotland ia eleje resta en la Rena Unida e no deveni un pais autonom.

La lado de "no" ia gania pico plu ca 2 milion votas, e la lado de "si" ia reseta 1,6 milion.

Cuasi 85% de la popla ia vota a jovedi, incluinte persones de 16 e 17 anios. Esta referendo ia es la ves prima cuando persones de min ca 18 anios en la Rena Unida ia pote vota sur un tema major political.

La resulta de la referendo ia deveni matematical serta a no longa pos la ora 6 de la matina de venerdi.

Asetante la defeta, Alex Salmond, la ministro xef de Scotland, ia recomenda forte ce la tre partitos unidiste en London obedi aora se prometes de furni plu potia a la parlamento scotes.

David Cameron, la ministro xef de la Rena Unida, ia dise ce el es "deletada" ce la pais va resta unida.

La vinse per la campania "Plu bon unida", par 55% contra 45% de la votas, ia esede par sirca 3% lo cual la sondas final de opina ia previde.

Salmond ia comenta: "An con tota otra cual on pote dise sur esta campania referendal, nos ia stimula partes de la comunia ci ia es nunca stimulada par politica a ante. Esta partes de la comunia ia stimula nos e ia stimula la prosede political."

Cameron ia descrive la resulta como desidosa. El ia dise: "Aora nos ia fini la debate per un jenera o, como Alex Salmond ia dise, 'cisa per un vive intera'. Nun pote disputa: nos ia oia la vole de la popla scotes."

La vota ia es la culmina de un campania cual ia dura tra du anios.

Glasgow, ia area consilial la plu grande de Scotland, e ance la site tre de la plu grandes en Britan, ia vota favorente autonomia par 195 mil votas contra 169 mil.

Ma la capital scotes, Edinburgh, ia rejeta autonomia par 195 mil votas contra 124 mil.

2014-09-18

La Alpes de Osteraic esperia un cambia major de clima

Un esplora major conclui ce Osteraic, con se areas delicata alpal, ia es spesial forte colpada par la clima cambiante.

La Reporta per Evalua la Cambia de Clima Osteraices 2014 dise ce la temperatur promedia en la pais ia alti par cuasi 2°C de pos 1880. Global, en la mesma periodo, la temperatur ia alti par mera 0,85°C.

La documento dise ce la plu de la cambia de temperatur es artifisial, e causada par emetes de gases invernerial.

La reporta ia es preparada par plu ca 200 siensistes e presentada en Wien par la ministro de ambiente.

Un de la siensistes ia esplica: "Nos es un area continental, cual dona un alti plu grande de temperatur. E nos es en un area montaniosa, do la redui de covre con neve intensi la prosede de caldi."

La reporta dise ce, en la 130 anios pasada, la brilia de sol en la Alpes ia crese par sirca 20%. Lo dise ce la neve covrente, spesial a altias media, ia diminui, e ce la area surfasal de la glasias de la pais ia deveni clar min grande.

Lo indica ance ce la altis de temperatur ia aselera de pos 1980. "Notes fria ia deveni plu rara, ma dias calda ia deveni plu comun."

La reporta avisa ce "sin plu atentas de ajusta a la clima cambiante, la risca a Osteraic va crese", spesial en tal areas como la cultiva de campos, la cultiva de forestas, e la turisme invernal.

Organizas nongovernal en la pais ia recomenda un reata rapida.

2014-09-17

La presidente de Xina visita Barat

Xi Jinping, la presidente de Xina, fa se visita ofisial prima a Barat, con foca a boni lias comersial e a solve un disputa de desenios sur areas fronteral.

Xina es un de la asosiores comersial xef de Barat, e la du paises es la plu poplida de mundo.

Los desacorda sur alga fronteras en Himalaia, e ia fa un gera corta sur esta en 1962. La tensa sur la tema es ancora ensendeda de tempo a tempo.

Beijing e Delhi ia fa multe discutes sur la fronteras, ma tota ia fali asta aora.

La relatas entre la du paises ia es aumentada par Narendra Modi, la ministro xef nova de Barat, ci ia promete reforti la economia e profondi lias con Xina en se periodo de posto.

En julio, la du gidores ia consenta a lado de un confere alta en Brasil, e ia asentua la nesesa de boni biladal la relatas.

Ante la visita de Xi, Modi ia tuita: "Cimica unica entre Barat e Xina pote scrive istoria e crea un doman plu bon per la umania intera."

Xi va comensa se visita de tre dias en Gujarat, un stato ueste, do el va vade a un bonveni formal e un program cultural.

Modi ia es la ministro xef de Gujarat tra plu ca un desenio, ante gida se partito a un vinse forte en la vota de maio.

An si la comersia entre Barat e Xina ia prosimi a $70 mil milion, la salda negativa de Barat ia crese de $1 mil milion en 2001–2002 a plu ca $40 mil milion, seguente declaras ofisial barati.

On reporta ce, en la visita de Xi, Xina pote promete miles de miliones de dolares a projetas fabrical e infrastrutural en Barat, incluinte a suporta la ferovias vea.

Plu temprana en esta mense, on ia vide un viaja de sinco dias par Modi a Japan como un atenta par Barat e Japan a ecuilibra la pesa de Xina en Asia.

2014-09-16

Microsoft compra la compania de la jua Minecraft

Microsoft ia compra Mojang, la compania svensce cual crea Minecraft, un jua video popular, per $2500 milion.

La jua ia vende ja plu ca 54 milion copias. Juores construi strutures con blocos simil a los de Lego, esplora un mapa grande, e batalia otras.

La tre fundores de Mojang va parti de la compania, cual ia serti fanes ce "tota va vade bon" an tal.

Alga analistes divina ce la compra es intendeda per atrae plu usores a la aparatos Windows Phone de Microsoft. A un anio ante aora, Microsoft ia compra Nokia, un compania suomi de telefonetas.

Minecraft es un de la programes la plu bon vendeda no sola en la boteca iOS de Apple ma ance en Google Play per Android. Resente, on ia aumenta plu la cuantia de vendes par publici la jua ance per Xbox One e PlayStation 4.

En la mense pasada, lo ia es la numero tre de la juas de consol la plu popular.

La compania Mojang ia es fundida en 2009. Lo emplea sirca 40 persones e ia fa un profita de plu ca $100 milion en 2013.

Microsoft ia dise ce la empleadas de Mojang va membri en se studio propre de juas.

En la pasada, Markus Persson, la fundor prima de Mojang, ia critica Microsoft e ia comenta ce la mercato per telefonetas Windows es tan pico ce lo no merita la labora de developa programes per lo.

Minecraft ave un culto grande e zelosa. Multe de se fanes ia reata coler a lo cual los regarda como un saisi corporal de un compania nondependente e de spirito comunial.

Un fan ia dise: "La jua no va custa sola plu mone: lo va custa ance la empleas de persones. Multe persones jua Minecraft e publici esta en YouTube como se carera, ma si Microsoft rena lo, on va encontra serta problemes de diretos de autor."

Ma alga fanes ia responde ce Microsoft pote dedica recursos plu grande a renovi e crese la jua.

2014-09-15

Merkel dise ce combate antisemitisme es un debe deutx

Angela Merkel, la canselor de Deutxland, ia informa un asembla en Berlin ce combate antisemitisme es la debe de cada person deutx.

La protesta contra antisemitisme ia aveni a 75 anios pos la comensa de la Gera Mundal Du, en cual ses milion iudis ia es matada par Deutxland Nazi.

Reatante a un aumenta de atacas contra persones iudi, Merkel ia dise ce "la tolera" es la mesaje coreta per Deuxtland e la mundo.

La asembla ia aveni a la Porton Brandenburg, su la bandera "Steh auf! Nie wieder Judenhass!" ("Sta! Nunca denova un odia contra iudis!"). Lo ia aveni a la mesma tempo como un confere de la Congresa Iudi Mundal en la capital.

Merkel ia comensa se parla par descrive la sento mil iudis abitante Deutxland como "un tesoro nasinonal". El ia dise a un fola de sirca 5000 persones: "Amis, visinas e colaborores iudi, senti ce vos es a casa asi."

Ma el ia dise ce aora la pais conteni "an no un instituida iudi" cual no nesesa es protejeda par la polisia en la clima presente.

"La critica valida de la atas political de un governa – o lo de nos, o lo de la stato Israel – es bon. Ma si on usa lo sola per capi se odia contra un otra popla, se odia contra persones iudi, alora lo es un malusa de nos diretos fundal de libria de opina e asembla."

La crese de antisemitisme segue la gera en Gaza. A media de la bombarda de Gaza par Israel en julio, la comunia iudi de Deutxland ia condena "un esplode de malvole e odia violente contra iudis" a asemblas profilastini.

En la semana pasada, on ia trova un suastica e la parolas "Iudis" e "Sieg Heil" (un slogan nazi) jetada en pinta sur la construida de un jornal local en Cottbus, un site este.

2014-09-14

Un conspira teroriste es impedida en Uganda

La autoriosas en Uganda ia descovre un selula teroriste sur cual los crede ce lo ia intende fa un ataca pos un tempo corta.

La ambasada SUA ia dise ce la selula ia parteni a al-Shabab, un grupo islamiste somali, ma la polisia ugandan ancora no ia confirma esta.

Plu temprana, la ambasada ia avisa se sitizanes en la capital, Kampala, a resta en se casas tra la dura de la opera polisial per trova la selula.

La polisia ia forti la securia en locas publica tra la capital, incluinte la airoporto internasional. Los ia fa ance alga arestas e ia saisi ance materias esplodente.

Al-Shabab ia promete retalia contra la mata de se gidor, Ahmed Abdi Godane, par un ataca airal SUA a 2 setembre.

La grupo, cual vole suverti la governa suportada par la Nasiones Unida en Somalia, ia nomi Ahmad Umar como se gidor nova.

Al-Shabab ia causa du esplodes a un campo de rugbi e un restorante itiopian en Kampala en julio 2010. Acel esplodes ia mata 76 fanes de futbal ci ia es regardante la max final de la Copa Mundal.

A acel tempo, Godane ia dise ce la ataca ia es un venja contra Uganada per se contribui de soldatos a un forte juntada african cual ia aida Somalia en se batalia contra al-Shabab.

2014-09-13

La maior de Toronto retira se de la eleje

En Canada, Rob Ford, la maior de Toronto, ia retira se de la eleje maioral a 27 otobre, car on ia diagnose el con tumor adomenal.

La maior, ci ave 45 anios, ia defia recomendas ce el resinia pos cuando el ia confesa en la anio pasada ce el ia usa cocaina en se periodo maioral.

El ia es ospitalida a mercurdi pos sufri menses de dole adomenal.

Documentos ofisial mostra ce se frate, Doug Ford, ia sustitui per el en la vota.

Se retira segue cuatro anios como maior en cuando on ia acusa el de ebria publica, peri de recursos ofisial, e usa de drogas.

En 2013, jornalistes ia reporta ce los ia regarda videos de Ford en cual el pare fumi crac. En novembre, Ford ia confesa compra e usa la droga en lo cual el ia descrive como un stupor ebra.

An si la comite de la site de Toronto ia sutrae de el la plu de se diretos maioral, Ford ia refusa resinia, e ia anunsia el como aspiror per es reelejeda.

El ia spende un mense en resani, e ia revade a se posto en junio.

Se retira de la eleje lasa aora Olivia Chow, un parlamentor pasada de la Partito Democrata Nova, e John Tory, un comersior e membro conserviste pasada de la parlamento de Ontario, como la vinsores la plu probable de la eleje.

2014-09-12

Corea Sude projeta dupli la custa de sigaretas

La governa de Corea Sude ia proposa un dupli cuasi de la custa de sigaretas, per atenta redui la cuantia de fumores en la pais.

Lo intende alti la custa promedia per paceta a 4500 uon ($4,35), no plu tarda ca la comensa de la anio veninte. La custa presente es 2500 uon.

Ma la proposa es forte oposada, e va es cisa cambiada en parlamento.

Sirca 41% de omes fumi en Corea Sude. Esta es entre la proportios la plu alta en la mundo developada. La proportio intera de fumores en la pais es 23%.

La custa de sigaretas no ia alti de pos 2004, cuando lo ia crese par 500 uon. Acel ia redui la cuantia de fumores par 15%.

Ance su la proposa, fabricores de sigaretas ta debe primi avertis pitural sur se produidas, e alga spesies de anunsia tabaco ta es proibida.

La governa espera ance ce la cambia va jenera 2,8 milion milion uon par impostas.

La oposores descrive la cambia como "enganosa". Los dise ce persones de revenu basa ta paia final plu, car plu de los fumi ca en otra grupos.

2014-09-11

La gidores de Tai es acusada de represa

Amnestia Internasional dise ce la governa militar de Tai ia viole diretos umana a grado vasta de pos se colpa de stato en maio.

Como esemplos, lo lista arestas acaso, restrinjes sever de parla libre, alegas de bates, e prosedes nonjusta.

En un reporta, la organiza de promove diretos umana ia recomenda ce la junta "fini esta abitua disturbante de represa".

La militaria ia saisi la potia a 22 maio pos menses de protestas contra la governa. Lo ia promete restabli la pais.

A la min 27 persones ia mori en la campania protestante de ses menses per despone la gidor Yingluck Shinawatra.

La junta ia descrive se atas como nesesada e proportial a la esije de manteni la securia.

La reporta ia dise ce 665 tais ia es arestada o comandada a presenta formal se par la autoriosas de pos la colpa de stato.

Estas ia inclui politicistes, profesores, ativistes, e jornalistes. On ia prisoni alga de los tra asta un semana sin acusa o prosede, e en acel tempo on no ia permete ce los contata un avocato o se familia.

Amnestia Internasional dise ce on ia teni la persones con "razonas neblosa e debil", per esemplo afin los pote "descoleri" o "ajusta se disposa".

La organiza ia oia reportas de alga de la prisonidas ce on ia tortura los. Kritsuda Khunasen, un ativiste political, dise ce on ia bate el e asfixia el con un saco plastica si el no ia responde sasiante a la demandas de se interogores.

Amnestia ia dise ce la junta militar ia impedi plu ca 200 locas de rede, ia clui alga stasiones de televide e radio, e ia sesa tolera protestas pasosa.

La organiza ia ajunta ce alga persones nonmilitar ia es prosededa en cortes militar, sin direto de apela.

Respondente a la reporta, la governa tai ia dise ce Amnestia ia "fali reconose la esijes urjente de renormali la state de crise a acel tempo", e ce la plu de tais ia senti plu secur de pos la colpa de stato.

2014-09-10

Du reatadores nucleal en Japan es aprobada per reinisia

La organiza autoriosa japanes sur potia nucleal ia permete formal la reinisia de du reatadores a un sentro nucleal en la sude de Japan.

En junio, la sentro a Sendai ia oteni un aproba dependente per la reinisia. Aora lo ia fini un periodo de consulta publica.

La autoriosa dise ce la reatadores sasia la normas nova cual on ia introdui pos la desastre de Fukushima. Los es la du reatadores prima cual ia reseta esta permete.

Aora la reinisia de la sentro, en la sude de la isola Kyushu, debe es aprobada par autoriosas local. On previde ce los va suporta lo.

Lo debe ance susede en esaminas funsional sur loca. Lo no es probable ce la reatadores va comensa opera ante desembre.

Tota 48 reatadores de Japan es presente nonfunsionante, ma la ministro xef, Shinzo Abe, ia recomenda reinisias do estas es posible.

La popla japanes ia adota un opina contra la potia nucleal pos la fondes a la planta a Fukushima en 2011.

Ante acel aveni, causada par un tsunami cual ia segue un trematera grande, sentros nucleal ia furni sirca 30% de la eletrica de Japan. Ma pos alora, on ia clui la sentros, o per manteni normal los o temente sur se securia.

La reatador a Ohi en Japan ueste, ia es la final cual on ia desativi, en setembre de 2013.

A presente, Japan depende de importas ajuntada de carbon e gas per jenera se eletrica.

2014-09-09

La gases invernerial crese la plu rapida de pos 1984

La cuantia de gases invernerial en la atmosfera ia ateni un nivel recordo en 2013, par causa de un aumenta de CO2 (diosido de carbono).

La cuantia atmosferal de CO2 ia crese la plu rapida de pos 1984. La Organiza Meteorolojial Mundal dise ce esta asentua ce on nesesa un trata global de clima.

La informas anial publicida par la organiza no mesura emetes de ximines de sentros eletrical. En loca, los rejistra la cuantia de gases caldinte cual resta en la atmosfera pos la interatas complicada cual aveni entre la aira, la tera, e la mar.

Sirca un dui de tota emetes es asorbeda par mares, arbores, e viventes.

Seguente la informas nova, la cuantia global promedia de CO2 en la atmosfera ia ateni 396 partes per milion en 2013, un crese de cuasi 3 partes per milion de pos la anio presedente.

La atmosfera conteni aora 142% de la cuantia de CO2 cual lo ia conteni en 1750, ante la comensa de la revolui industrial.

An tal, car la temperatur global promedia no ia crese paralel a la aumenta de CO2, alga persones sujesta ce la caldi global ia pausa.

La informas nova sujesta ce en 2013, la aumenta de CO2 ia es causada no sola par plu emetes, ma ance par un redui de la cuantia de carbono asorbeda par la biosfera de la Tera.

La siensistes a la Organiza Meteorolojial Mundal es confondeda par esta. La tal redui la plu resente de la capasia de asorbe carbono ia aveni en 1998, cuando multe biomasa ia es ardeda tra la mundo, e cuando la clima ia esperia la state El Niño de mares plu calda.

Oksana Tarasova, la xef de la departe de rexerca atmosferal a la organiza, ia dise: "En 2013, on ia vide no danas evidente a la biosfera. Nos no comprende esce la esta mesura es tempora o un state permanente, e nos es alga ansiosa sur lo. Cisa la biosfera ia ateni se limita, ma nos no pote sabe acel a esta momento."

A la ves prima, la publici par la organiza meteorolojial inclui datos sur la asidi de la mares, causada par diosido de carbono.

A cada dia, la mares asorbe sirca cuatro cilogrames de CO2 per person. On crede ce la rapidia presente de asidi ave no presedente en la 300 milion anios pasada.

2014-09-08

Un asteroide pasa la Tera

Un asteroide peti, con sirca la grandia de un casa, ia pasa la Tera.

A se punto la plu prosima, 2014 RC ia traversa supra Zeland Nova a 18:18 de ora universal a soldi.

Lo ave un largia de sirca 18 metres, e un distantia de sirca 40 000 cilometres de la Tera.

Lo no menasa nos. Ma espertas dise ce lo es posible ce un meteorite cual ia atera prosima a Managua, la capital de Nicaragua, a soldi ia veni de la asteroide.

La ojeto ia causa un esplode e un trematera peti, e ia lasa un crater – con diametre de 12 metres e profondia de 5 metres – prosima a la airoporto.

La asteroide ia es prima descovreda a sola 31 agosto. Cuando lo ia pasa tra se loca la plu prosima a nos, lo ia es situada a sirca un desi de la distantia entre la sentro de la Tera e la Luna.

On previde ce lo va reveni a nos visinia en la futur.

En febrero 2013, un meteorite de grandia simil ia esplode supra Chelyabinsk en Rusia sentral. Lo ia feri plu ca mil persones.

NASA, la departe SUA de aironautica e spasio, segue la cursos de plu ca 11 mil asteroides cual pasa relativa prosima a nos planeta.

2014-09-07

Plu ca 200 persones mori en inondas en Pacistan e Barat

Plu ca 200 persones ia mori en inondas causada par pluves forte tra areas grande de Barat e Pacistan. La inondas ia sumerji multe de la site Lahore.

A la min 110 ia es matada par deluvias en partes pacistani de Caxmir e Pandjab. Sirca 100 ia mori ance en la parte barati de Caxmir.

La inondas ia destrui casas e ia causa liscas de tera.

A jovedi, un bus portante sirca 50 membros de un rituo de sposi ia es puxada en un canion en Caxmir barati, matante desuples. On teme ce la sposa e sposo futur ia mori.

La cuantia completa de moris es ancora no clar. La pluve ia diminui aora, donce on espera ce la acua va comensa deveni min profonda.

Plu ca 2000 persones ia deveni isolida par la inondas, e la armada aida en la labora de salva los.

Pacistan esperia comun inondas estrema en la saison de monsones, ma la loca esperia aora se inondas la plu de mal de du desenios.

2014-09-06

La sesafusili dura en Ucraina

Lo pare ce on obedi un sesafusili acordada par la governa ucrainsce e rebelores prorusce.

Pos la acorda a venerdi en Minsk, la capital de Bielarus, on ia confirma no reportas de combate en la note. Alga ia reporta bombardas de locas militar ucrainsce prosima a la airoporto de Donetsk, ma estas no ia es confirmada.

Petro Poroshenko, la presidente de Ucraina, recomenda aora ce on discute un solve permanente de la gera, cual ia mata sirca 2600 persones.

An tal, la rebelores ia comenta ce la sesafusili no ia cambia se politica de vole separa de Ucraina.

La discutes ia es arbitrada par la Organiza per Securia e Colabora en Europa (OSCE). Los ia envolve Leonid Kuchma (un presidente pasada de Ucraina), gidores de la rebelores prorusce, e Mikhail Zurabov (la ambasador rusce a Ucraina).

Ambos lados ia promete retira tan pronto como posible se armas pesosa de la campos de batalia. Rusia ia acorda ce lo va recomensa aidas umaniste a la este de Ucraina. OSCE dise ce lo va monitori la sesafusili.

Poroshenko ia esplica ce la acorda es fundida sur un lista de 12 puntos cual inclui un libri de ostajes, probable oji.

La rebela prorusce ia comensa en april en Donetsk e Luhansk, du sites de Ucraina este, provocada par la saisi par Rusia de Crim, un penisola ucrainsce, a alga semanas ante alora. Soldatos ucrainsce ia pare es ganiante contra la rebelores, ma la prorusces ia fa avansas nova de pos la parte tarda de agosto.

La sesafusili ia validi ier a 15:00 (de ora universal). La batalias ia continua asta acel momento.

Atestores estra Mariupol, un site sude, ia dise ce los ia vide la reveni de tances ucrainsce de la batalia.

La Ueste acusa ce Rusia envia armas e soldatos per suporta la rebelores, e Rusia nega esta alegas.

Ma an cuando la sesafusili ia es comensante, ambasadores de la Uni European ia ajunta plu nomes a un lista de individuas rusce e prorusce ci lo intende puni par comandas legal. La lista inclui aora la gidores nova en Ucraina este, la governa crimsce, e alga desidores e oligarcas rusce.

La punis va es formal adotada a lundi. Ma alga diplomatas ia comenta ce on va suspende cisa los si la sesafusili continua bon e si Rusia retira se soldatos de Ucraina.

La crise en Ucraina ia es resente la tema de un confere alta de OTAN, do la statos membros ia acorda formi un corpo multinasional e rapida reatante.

2014-09-05

Veterinares trova plu ca 40 calsetas en un can

En la SUA, sirurjistes veterinar ci ia opera sur un can malada ia es surprendeda en descovre la causa de la descomforta de se pasiente: 43 calsetas e un dui en se stomaco.

La can, de la spesie mastin deutx, ia gusta mastica calsetas. Ma nun ia sabe ce el engoli los como interas.

La sirurjistes ia opera sur la can en febrero. Los ia dise ce los ia estrae nunca tan multe calsetas de un animal.

La can ia recovre bon, e ia gania aora un premio per se abituas strana de come.

El ocupa la loca tre en un concurso nomida "Los ia come cual cosa?!", organizada par un jornal veterinar.

La premio xef ia es donada a un rana ci ia come plu ca 30 rocas ornal de se caje.

La judores ia comenta favorente ance sur un gateta ci ia come un jueta de figur estrateran, e sur un retraor oro ci ia engoli un bulbo de lus.

2014-09-04

Australia negosia vende uranio a Barat

Tony Abbott, la ministro xef de Australia, ia ariva en Barat per un visita de du dias. El vole negosia sur la vende de uranio.

Abbott va pausa prima en Mumbai ante encontra Narendra Modi, la ministro xef nova elejeda de Barat, a venerdi.

El dise ce el "espera suscrive" un acorda cual va permete la esporta de uranio australian a Barat.

Australia posese sirca 40% de la uranio en la mundo, e esporta ja lo a Xina, Japan, Taiuan e la SUA.

La pais no ia vende uranio a Barat en la pasada car lo no ia suscrive la Trata Contra Crese Nucleal.

Ma la du nasiones ia comensa discutes en 2012 pos cuando la governa presedente ia cansela se proibi longa.

Plu temprana en esta semana, Andrew Robb, la ministro de comersia, ia comenta ce Australia crede ce medios sufisinte esiste ja per serti ce on va usa la uranio sola per goles nonmilitar.

India depende forte de carbon per enerjia. Ma lo ave ance un campo peti de enerjia nucleal, per cual lo projeta un crese grande en la futur.

Ante la ariva de Abbott, Sanjay Bhattacharya, la ministro juntada de esternas barati, ia dise: "Per nos, Australia es un furnor major de recursos, spesial de la enerjia nesesada per nos developa."

2014-09-03

La jenitores de Ashya King es librida en Espania

On ia libri la jenitores de Ashya King de prison en Espania pos cuando avocatos prosedente ia retira un comanda european de aresta.

Brett e Naghemeh King ia es tenida pos prende se fio de sinco anios, ci ave un tumor de serebro, de un ospital en Southampton, England contra la consela de dotores.

La avocatos ia dise ce los ia deveni sasiada ce la risca a la vive de Ashya "no es tan grande o direta" como los ia crede orijinal.

An si on ia libri los, la jenitores ancora no ia parti de prison.

Ashya es aora tratada en un ospital en Malaga. Se desapare a jovedi ia causa xercas en Frans e Espania.

Se frate Danny ia comenta ce se jenitores es xocada par se esperias, ma multe felis ce los pote aora visita Ashya.

Los no ia comprende perce tan multe reportores espeta a estra, car pos se aresta los no ia pote regarda la novas televisada.

La avocatos ia reconsidera la caso e ia deside ce la atesta no sufisi per reali un condena per cualce crimin.

2014-09-02

On acusa ISIS de limpi etnical

Amnestia Internasional dise ce lo ave indicas nova ce militiores de ISIS fa "un onda de limpi etnical" contra minorias en Irac norde.

Plu temprana, militias xia iraci e soldatos curdi ia fini un asjea de du menses par combatores de ISIS en la vila Amerli.

ISIS e rebelores suni aliada ia saisi areas vasta de Irac e Suria. Los ia mata miles de persones, de cual la plu ia es enfantes, e ia obliga ce plu ca milion fuji de se casas en menses resente.

On ia colie un demostra ce alga matas coletiva ia aveni en Sinjar, un area norde, en agosto. Du de la plu males ia aveni a 3 agosto e 15 agosto, cuando ISIS ia ataca viletas e ia mata sentos.

Amnestia Internasional, un organiza promovente la diretos umana, ia dise:

"Grupos de omes e xicos, incluinte enfantes tan joven como 12, ia es saisida de ambos viletas par militiores ISIS, prendeda a via, e fusilida. ISIS esecuta crimines odiable, e ia cambia areas campanial de Sinjar a campos de mata sanguosa en se batalia savaje per elimina tota trasas de nonarabis e muslimes nonsuni."

Ier, la Nasiones Unida ia anunsia ce lo envia un ecipo a Irac per investiga "atas de nonumania a grado nonimajinable".

La soldatos iraci e curdi ia saisi Amerli e Suleiman Beg, un fortres militial prosima, a lundi. La militiores ia dise ce Iran ia fa un rol en la operas resente, furninte armas e aidante con scemis militar.

Sirca 15 mil turcmenes xia ia es asejada en Amerli. La NU ia espresa se teme de un masacra si ISIS ta catura la vila.

2014-09-01

Protestores ataca la televisa nasional de Pacistan

En Pacistan, la canal nasional de televisa ia sesa difusa cuando se construida en Islamabad ia es atacada par protestores antigoverna.

La canal ia veni de mostra, con imajes direta, folas entrante par forsa tra la portones e fluente tra la ofisias.

Seguente reportas la plu resente, soldatos ia sutrae la protestores de la loca.

La protestores desira la resinia de Nawaz Sharif, la ministro xef. El nega acusas de froda political e votal.

Plu temprana, en la note de soldi, otra scaramuxas ia aveni entre protestores e la polisia.

On reporta ce alga polisiores ia es ferida cuando miles de protestores ia avansa contra un construida cual conteni la burocratia federal de la pais e la casa de la ministro xef.

Polisiores de tumulta ia es obligada a retira de la strada xef ante la parlamento.

Alga de la protestores ia porta bastones e ia lansa petras. Los ia ataca veculos e ia ensende contenadores transportal cual on ia pone sur la strada per bloci la via.

Protestores ia usa camiones per rompe la serca esterna de la construida parlamental, an si la loca ia es gardada par soldatos.

Protestores, fidosa a Imran Khan, un politiciste oposante, e Tahirul Qadr, un eglesor, senta ja en la sentro de la capital tra du semanas.