2015-01-31

Un pausa de du dias

Esta blog va recomensa a lundi.

2015-01-30

Blancos militar es atacada en Misre

A la min 26 persones, xef soldatos, ia es matada en un serie de atacas par ativistes islamiste en la norde de la penisola Sina en Misre.

Un bomba de auto e rocetos ia colpa blancos militar en El-Arish, la capital provinsal. Otra atacas ia aveni en la vila Sheik Zuwayid e en Rafah, prosima a Gaza.

Un grupo combatosa, Provinse Sina, cual ia adota acel nom pos promete se fida a Stato Islamiste, ia dise ce lo ia esecuta esta atacas "estendosa e simultan".

La SUA ia condena la atacas, descrivente se como ancora "firma en se suporta de la laboras de la governa misri contra la menasa de terorisme".

La rebelores en Misre ia intensi se atacas de pos la despone de la presidente islamiste Mohammed Morsi en 2013.

La atacas de ier ia es casos de violentia antigoverna la plu mal en la pais en menses resente.

Prima, rocetos ia es xutada a ofisias de polisia, un base militar, e un otel militar en El-Arish. Alora un bomba de auto ia esplode a la porton retro de la base.

La jornal al-Ahram ia reporta ce se ofisia en El-Arish, fasante la otel e base, ia es completa destruida.

Cuatro soldatos ia es ferida en un ataca a un posto de controla estra El-Arish, e un major de armada ia es matada par fusil a un posto de controla en Rafah.

Plu ca 50 persones ia es ferida en la atacas. La esecuta sujesta un grado de colabora cual on no ia vide a ante.

Misre es ance tensa en esta semana par causa de protestas onorante la aniversario de la revolta de 2011 cual ia despone Hosni Mubarak.

2015-01-29

La jua la plu peti de xace en computador

Un programor franses ia crea lo cual pare la program la plu peti de xace.

BootChess, capas de opera en computadores de Windows, Mac OS X, e Linux, ave mera 487 baites de codigo. Lo es plu peti ca un jua de xace per la computador ZX81 cual ia conteni 672 baites de codigo e ia manteni la recordo tra 33 anios.

La creor, Olivier Poudade, ia comenta ce el espera ce se ateni va inspira otra programores a atenta crea programes de petia simil estrema.

"Lo mostra perce la lingua de asembla es ancora la lingua prefereda per los ci vole esele en programi."

El ia dise ce el ia desira ance onora la talento de David Horne, la creor de 1K ZX Chess per la computador ZX81. Acel macina ia posese mera 1024 baites de memoria, cual ia restrinje forte la taxes cual lo ia pote fa.

La computadores de oji ave normal memorias capas de teni plu ca acel cuantia a miliones de veses.

Per compara, an du tuitas sin pitur ocupa plu o min la mesma cuantia de memoria como la program intera de xace de Poudade.

Per ateni se gol, el ia debe simpli la aspeta de se jua, an plu ca se presedor de 1982. La table e pesos es representada par leteras e sinias de puntua. Per esemplo, P representa un peon, Q representa un dama, e puntos indica la cuadros vacua. La colores de la pesos es mostrada par leteras minor e major.

Alga criticistes ia cexa ce esta program de xace no es "completa", car lo no permete ce on roca (pd: intercambia la locas de un re e un tore).

Ma Poudade ia responde ce 1K ZX Chess ia ave la mesma restrinje, e ia asentua ce se program permete ce peones deveni reas cuando los ateni la otra lado de la table – cual no ia es posible en la program de Horne.

2015-01-28

La aniversario 70 de la libri de Auschwitz

Survivores de Auschwitz ia urje ce la mundo ne permete un reaveni de la crimines de la Olocausto, en cuando los ia onora la aniversario 70 de la libri de la campa.

300 survivores ia reveni per un rituo su un tenda jigante. On previde ce esta va es la aniversario major final a cual survivores de Auschwitz pote es presente en cuantia grande.

Sirca 1,1 milion persones, xef iudis, ia es matada ala entre 1940 e 1945.

La presidente polsce, Bronisław Komorowski, ia dise a la rituo ce la deutxes ia muta Polsca a "un semetero per iudis".

Prisonidas pasada ia descrive como la gardores nazi ia separa familias par forsa, organizante la arivores nova en du clases: los ci va labora con manos, e los ci va vade direta a la cameras de gas.

Pos la parlas, on ia dise preas iudi e cristian per la mores, ante cuando candelas ia es ensendeda ante la monumento per la vitimes de Birkenau.

Auschwitz ia es librida par soldatos soviet a 27 janero 1945. Lo ia deveni un museo ja en 1947.

Ier, la ministreria rusce de defende ia publici documentos arcival (en rusce) sur la libri. La soldatos e reportores prima ci ia entra a la campa ia descrive folas de prisonidas fatigada e magrida, e ia trova montones de corpos mor.

Vladimir Putin, la presidente de Rusia, no ia es presente a la rituo par causa de un disputa con Polsca sur lo, liada con la interveni resente de Rusia en Ucraina.

En loca, la gidor rusce ia vade a un rituo a la Museo Iudi de Moscva con Berel Lazar, la rabi xef de Rusia.

La Cremlin ia acusa Polsca de "isteria" antirusce pos cuando Grzegorz Schetyna, la ministro polsce de esternas, ia atribui la libri de Auschwitz a soldatos ucrainsce.

Ante parti de Paris per vade a Polsca, la presidente franses, François Hollande, ia condena la problem "nontolerable" de antisemitisme contempora. A un otra rituo recordante la Olocausto, el ia dise a iudis: "Frans es vos pais propre."

Plu temprana, Angela Merkel, la canselor de Deutxland, ia dise ce lo es "desonorosa" ce iudis fronti insultas, menasas, e violentia.

2015-01-27

Un tempesta de neva clui New York

La Site de New York e otra areas en la norde-este de la SUA ia desativi, car meteorolojistes averti abitores contra la previde de un cuantia estrema de neva.

On dise ce Tempesta Juno pote pone asta 76 sentimetres de neva sur alga partes de New Jersey, Maine, e New Hampshire.

Tota veculos, estra los de crise, es aora proibida en la Site de New York, e on ia suspende la servi de metro.

Cisa 60 milion persones va es afetada.

On ia declara un crise en multe statos, e la site Boston e Massachusetts ia suspende se transporta publica e ia proibi viajas par auto.

Ma alga meteorolojistes en Pennsylvania e New Jersey ia redui se predises, disente ce min neva ia cade ca on ia previde orijinal.

En New York, la teatros de Broadway ia es sin lus, e la bolevares de neon ia es sin person. La site cual dormi nunca ia pare dormi.

2015-01-26

On va prosede un comandor de rebelores ugandan

Dominic Ongwen, un comandor xef de rebelores ugandan va apare a la Corte Criminal Internasional en Den Haag en Nederland, acusada de crimines de gera e crimines contra umania, incluinte omiside e sclavi.

El es un de la gidores de la Lord's Resistance Army (LRA: "Armada Resistente de la Senior"), un promove cristian estremiste, e se prosede va es la prima contra un membro de acel organiza.

On acusa ce la organiza ia saisi enfantes per usa los como combatores e sclavos sesal.

Cuando Ongwen apare oji, la judor va serti se identia e informa el sur la alegas en un lingua cual el va comprende.

On no previde ce la avocatos prosedente va presenta formal se caso a esta paso.

Ongwen ia es arestada pos sede se en la Republica de Africa Sentral en la mense pasada. Soldatos african e de la SUA ia xerca el de pos 2011.

Uganda ia acorda ce el debe es prosededa par la Corte Criminal Internasional, an si el critica forte acel corte.

On crede ce Ongwen es la suordinada de Joseph Kony, la comandor de la LRA, ci es ancora en evade.

La rebela par la LRA ia comensa a plu ca du desenios ante aora en Uganda norde. On estima ce lo ave entre 200 e 500 soldatos, de ci multe es enfantes. Lo ia terori partes grande de Africa sentral.

Ban Ki-moon, la secretor jeneral de la Nasiones Unida, ia bonveni la move de Ongwen de la Republica de Africa Sentral. Ban, ci mesma ia es un soldato enfante, ia dise ce pos anios de asconde en forestas, la momento ia ariva cuando Ongwen debe fronti la acusas contra el.

2015-01-25

Un sonda spasial va fa un foto de Pluto

Un sonda de NASA – nomida Orizones Nova – va comensa fotografi Pluto, pos viaja tra 5 mil milion cilometres e nove anios per prosimi a la planeta nana.

On presenta esta mision a Pluto como la ultima de la encontras grande en esplora la planetas. Lo es serta un de la oportunes prima per studia un planeta nana de prosima.

La pitures es importante car los va permete ce la sonda posa coreta se per un visita plu prosima en la plu tarda de esta anio.

Ma la sonda es ancora a distantia de 200 milion cilometres. Pluto va es apena distinguable en la imajes – no plu ca un punto de lus entre la stelas.

Cuando Orizones Nova ariva en julio, lo va es movente a cuasi 14 cilometres per secondo, tan rapida ce lo no va es capas de entra a un orbita sirca la mundo. En loca, lo va continua a ante.

Un fator complicante es ce la sete strumentos siensal en la veculo debe opera a distantias diversa per oteni se mesuras, e donce la ecipo ia prepara un program estrema detaliosa per oserva tota de los.

On previde ce la punto la plu prosima a Pluto va es atenida sirca mediadia (de ora universal) a 14 julio. La sonda va pasa supra la surfas a distantia de sirca 13 695 cilometres.

La projetores de la mision vole ce on predise la tempo de tota mesuras con esatia de 100 secondos. La sonda va sabe alora do e cuando lo debe punta se strumentos.

Per los ci ia crese con la crede ce on ave nove planetas, esta es la anio de completi la colie. Sondas robotin ia visita ja tota la otras, an Urano e Netuno.

En 2006, siensistes ia retrosede ofisial Pluto, cual ave 2300 cilometres de largia e es covreda con jelo, a la categoria de "planeta nana".

La nanas es la clase de ojetos planetin la plu comun en la Sistem Solal, e esta sonda es un de la oportunes prima de regarda prosima un tal.

On no sabe cual cosas la pitures va revela. Cisa on va trova plu lunas de Pluto – on conose ja sinco – o cisa an anelos como los videda sirca alga de la planetas plu grande.

Pos visita Pluto, la sonda va continua en dirije a un ojeto an plu distante en la Sintur de Kuiper, la area ultra la planetas. Siensistes crede ce acel zona conteni multe miles de ojetos simil a Pluto, de cual alga ave cisa la grandia de Marte o an de la Tera.

2015-01-24

La dia final de campania ante un vota jeneral en Elas

La ministro xef de Elas, Antonis Samaras, ia fa un apela final a votores ante la vota jeneral doman. Se partito es oposada par la Alia de la Sinistra Radisal, conoseda par se corti elinica SIRIZA.

Samaras ia dise ce, an pos anios de medios sever, la pais no mostra indicas de recovre.

En la entretempo, Alexis Tsipras, gidante SIRIZA, ia dise ce se partito va repone "dinia" a Elas.

El vole renegosia la deta de Elas e fini la medios sever creada par suporta finansial internasional.

Elas ia tolera reduis profonda de spende, liada a esta suporta par la Uni European, la Reserva Monal Internasional, e la Banco Sentral European.

La posible de un vinse par SIRIZA en la vota ia provoca temes ce Elas ta pote fali repaia se deta e ta parti de la zona de euro.

En un asembla final de se campania, Samaras ia informa suportores de se partito conserviste ce el ia labora "tra dia e note" per manteni la pais.

Tsipras ia dise ce el espera trova "un solve mutua asetable" con la creditores de Elas, repetente un promete de fa ce on cansela un dui de la deta internasional de la pais ante la fini de la acorda de suporta esistente en julio.

El ia dise ce un fini de "umili nasional" es prosima.

Angela Merkel, la canselor de Deutxland, ia recomenda ce la pais resta en la zona de euro. "A la cor de nos prinsipes on ave unia," el ia dise. "Me desira ce Elas, an con la difisiles, resta un parte de nos nara."

2015-01-23

La re de Arabia Saudi mori

La re saudi Abdullah bin Abdulaziz ia mori, a alga semanas pos entra a ospital. El ia ave sirca 90 anios, e ia sufri de un infeta de pulmon.

Un declara temprana a esta matina ia anunsia ce se duifrate Salman, ci ave 79 anios, ia deveni la re nova.

Abdullah ia deveni la re en 2005, ma se sania ia sufri multe en anios resente. Se duifrate ia emprende ja resente la taxes de monarca.

Ante la anunsia, la televisa saudi ia presenta strofes de la Curan, un tecnica comun ante indica la mori de un person reial major.

Re Salman ia recomenda ce la Consilio de Fida de la familia reial reconose un otra duifrate, Muqrin, como eritor legal.

Tota tre es fios de la fundor de Arabia Saudi moderna, Re Abdulaziz, comun conoseda como Ibn Saud, ci ia mori en 1953.

La Re Abdullah 2 de Jordan ia corti un visita a Davos en Suiz per viaja a Arabia Saudi, e la corte reial jordani ia declara 40 dias de lamenta.

Abdullah bin Abdulaziz ia es la numero 13 de la fios 37 de se padre. On crede ce el ia nase en agosto 1924 en Riyadh, an si on no es serta sur se data esata de nase.

En 1962, el ia emprende la rol de comandor de la Garda Nasional Saudi, do el ia gania la respeta e fida de la tribus de deserto.

Cuando el ia deveni la re, el ia segue un otra duifrate, Fahd. Ma ja alora el ia gida par fato tra 10 anios, car se presedor ia es debilida par un ataca serebral.

On ia vide Abdullah como un reformor, an si lenta e gradal. El ia permete criticas minor de se governa par jornalistes, e ia sujesta ce on debe permete ce plu femes labora.

La re nova, Salman, ia pasa 48 anios como governor de la provinse Riyadh ante deveni eritor legal e ministro de defende.

2015-01-22

La NU condena la comentas sesiste de un monce miama

La xef de diretos umana de la Nasiones Unida ia urje ce Miama condena un monce budiste nasionaliste ci ia descrive un ambasador spesial de la NU como "un puta".

Zeid Ra'ad Al Hussein ia dise ce la comentas fada par Ashin Wirathu's ia es en efeto un "provoca de odia", e ia descrive la linguaje usada como "sesiste" e "insultante".

La comentas pertine a Yanghee Lee, un ambasador fema de Corea Sude, ci ia es en Miama en la semana pasada a tema de la mal situa de la minoria muslim de la pais.

La monce Wirathu ia pasa ja cuasi un desenio en prison pos provoca violentia antimuslim.

El es un gidor de la promove 969, cual dise ce Miama debe resta un pais budiste e cual recomenda restrinjes e boicotas contra muslimes.

De pos la fini en 2011 de la rena militar en Miama, ance conoseda como Burma, la nasionalisme budiste ia forti, xef gidada par monces.

En 2012, desuples de persones ia mori e miles ia perde se casas en la stato Rakhine cuando violentia ia esplode entre budistes e muslimes, xef de la minoria rohingia. Violentia antimuslim ia aveni a alga plu veses a pos.

La NU dise ce la rohingias es persegueda. En la semana pasada, la organiza ia aproba un deside de recomenda ce Miama dona sitizania a estas.

Lee, ci ia es en un viaja de 10 dias en esta pais de Asia sude-este, ia dise ce la rohingias fronti prejudis sistemosa. El ia critica un lege proposada, par un alia de monces budiste nasionaliste, cual ta retrinje sposis intercredal e convertis relijial.

A venerdi, Wirathy ia parla a un asembla publica do el ia critica la interfere par la NU, e ia ataca personal Lee. El ia dise: "Nos ia esplica la lege de proteje de raza, ma la puta ia critica la leges sin studia coreta los. No suposa ce tu es un person respetable par causa de tu posto. Per nos, tu es un puta."

En se declara per la NU, Zeid ia dise ce, en loca de foca a individuas, gidores debe trata la contenida de la consernas indicada par la ambasador spesial.

Ier, la governa miama ia dise ce lo investiga la parla de la monce. Ma la monces es un promove political forte, e un vota jeneral va aveni en esta anio. On pote demanda cual de la gidores va risca parla contra la monces.

2015-01-21

On leje un libro antica rolada par raios X

A la ves prima, on ia leje parolas de un libro rolada cual ia deveni ardeda e enterada par Monte Vesuvio en la anio 79 ec.

La roladas de Herculaneo, la sola biblioteca clasica ancora esisente, ia es colpada par gas volcanal con temperatur de plu ca 300°C, e los es estrema frajil.

A la interna profonda de un de la roladas, fisicistes ia susede distingui la inca e la paper, par un tecnica radiografial usada en scanes de seno.

On crede ce otra roladas pote es simil desifrida sin desrola los.

La vila Herculaneo, nomida "la otra Pompei" a veses, ia es enterada su sene par la volcan. En la sentenio 18, on ia escava un biblioteca notable de roladas en un de se casas.

Atentas presedente de leje los, tra multe desenios, ia envolve stratejias spesial per desmarania tan delicata como posible la roladas.

An si on ia susede leje alga fratos desrolada, xef en anios resente con aida de cameras infraroja, on ia abandona final tal atentas de desrola car los destrui tro multe la roladas.

Otra atentas de regarda la internas, par usa de tomografia de computador, ia revela la forma de la stratos antica e enrolada, ma ia desifri nunca se contenidas.

Aora en Italia, un ecipo gidada par dotor Vito Mocella de un instituida de eletronica en Napoli ia identifia un cuantia peti de leteras elinica a interna de un de la roladas a la ves prima.

La radiografia tradisional mesura simple la cuantia de raios X cual permea partes diversa de un ojeto. Ma la metodo nova usa la fato ce raios X pasante tra un ojeto deveni retardada – la fase de se ondas cambia.

An varias pico en la composa de la ojeto afeta acel cambia, donce par mesura esta "contrasta de fase" on pote produi un pitur multe detaliosa, en tre dimensiones, de la strutur interna.

2015-01-20

Protestas en un campa de refujadas a Australia

Tony Abbott, la ministro xef de Australia, dise ce on ia "rompe" un protesta par refujadas a un campa costal.

A la campa de refujadas sur la isola Manus en Papua e Gine Nova, gardores ia entra a un compleso do refujadas ia enclui se en un greve de famia.

Cuasi 60 refujadas ia es arestada, ma sentos de otras resta grevente.

Australia envia tota refujadas ci ariva par barco a campas en Papua e Gine Nova e en Nauero, per colie e trata los.

Grupos de diretos umana ia critica la politica de prisoni los a mar – intendeda per preveni ce los ariva an.

Reportas de la campa es difisil per serti. Jornalistes no es permeteda de asede la loca, e on no pote confirma dises de ofisiores e refujadas.

Protestas ia comensa a la campa de Manus en la semana pasada. A du dias ante aora, on ia reporta ce alga prisonidas ia enclui se en un de la complesos.

Gardores, portante vestes antitumulta, ia entra a la compleso en la posmedia ier.

Peter Dutton, la ministro de migra, ia confirma ce on ia usa "un grado de fortia", ma ia dise ce la situa "no ia mali a grado ce la polisia ta presenta se e oposa la persones en la sentro".

On dise ce la gardores ia xerca la gidores alegada de la refujadas, sur ci autoriosas australian ia acusa ce los ia provoca la protesta.

La situa a la otra complesos de la campa no es clar.

La tensa ia crese a la sentro de pos la comensa de la protesta a martedi pasada. On reporta ce alga refujadas ia dana se par cose se labios la un a la otra o par engoli lamas e deterjente.

La sania de los ci fa un greve de famia ia mali. On alega ce la autoriosas ia sesa la furni de acua e comedas a alga prisonidas. Ma la autoriosas ia nega esta, acusante en loca ce la refujadas ia impedi la furnis.

La prisonidas protesta contra un projeta de move los ci on reconose como refujadas ofisial a Lorengau, la capital de la isola. Los teme ce la popla local va ataca los ala.

La campa sur Manus ia es la sena de tumultas en febrero 2014, cuando abitores local ia entra e combate con prisonidas. Un refujada ia es matada, e 70, cisa plu, ia es ferida en la violentia.

Su leges introduida par la governa presedente, la persones tenida en campas costal no pote previde ce on va aseta los en Australia, an si on va judi ce los es vera refujadas.

La governa dise ce se politica sever intende para la flue de barcos portante refujadas, afin no plu persones mori en la viaja perilosa a Australia.

2015-01-19

La 1% la plu rica es a punto de posese plu ca 50% de tota

La ricia de la 1 persento la plu rica de mundo va suprapasa pronto la mone poseseda par tota otra persones, seguente un reporta par la asosia carital Oxfam.

La reporta averti ce un "esplode de nonegalia" impedi la batalia contra povria global.

A la frecuentia presente de crese, la 1 persento la plu rica va posese plu ca 50% de la ricia global en 2016. Ja en la sinco anios pasada, se ricia ia crese de 44% a 48%.

De la 52% restante, cuasi 46% es poseseda par la resta de la sinci la plu rica de la popla de mundo.

La popla restante posese sola 5,5% de la ricia global, e la adultes en esta categoria ia posese $3851 en 2014. En compara, la 1% la plu alta ia ave $2,7 milion.

Oxfam ia dise ce lo va urje un reata rapida per para "la marea altinte de nonegalia", comensante con medios forte contra la evita de impostas par companias.

Doman, Barack Obama va fa la parla anial par presidente de la SUA, "La State de la Uni", e on previde ce el va recomenda aumentas de impostas de persones rica per aida la clase media.

2015-01-18

Protestores en Nijer ensende eglesas cristian

En Nijer, a la min tre persones ia es matada e ses eglesas ia es atacada, en protestas nova contra un cartun de la profeta Muhammad par la revista franses Charlie Hebdo.

La protestas ia comensa estra la mascita xef de la capital Niamey, e ia estende a otra partes de la pais.

Presidente Mahamadou Issoufou, ci ia es presente a la prosegue de unia en Paris a un semana ante oji, ia condena la violentia e ia apela per calmia. La pais ia es un colonia franses en pasada.

En la semana pasada, fusilores islamiste ia mata 12 persones a la ofisias de Charlie Hebdo. La fronte de la numero la plu resente de la revista, publicida pos acel ataca, presenta un imaje de Muhammad larmante e teninte un carton con la parolas "Me es Charlie".

On primi sete milion copias de la numero per sasia un demanda estracomun. Ante la ataca, la cuantia de copias de cada numero ia es 60 mil.

Ma multe muslimes opina ce cualce pitur de se profeta es ofendente.

En Niamey, sentos de protestores ia asembla a la mascita, clamante "Dio es alta" en arabi.

A la min ses eglesas ia es ensendeda o sacada en Niamey e vilas ambiente. On ia ataca ance bares, oteles, e comersias poseseda par nonmuslimes.

Du corpos carbonida ia es reganiada de un eglesa a la borda de la capital, e on ia trova la corpo de un fem en un bar.

Issoufou ia dise: "Los ci saca esta locas de adora, ci viole los e mata se cameradas cristian… ia comprende no parte de Islam."

En un protesta simil en Zinder, la site du de Nijer, protestores ia ataca botecas manejada par cristianes e la sentro cultural franses. Un fola coler de sirca 50 persones ia rompe la porte de la sentro e ia ensende la caferia, biblioteca e ofisias.

Ance a venerdi, protestas contra la cartun de Charlie Hebdo ia aveni en Jazair, Khartoum, e Karachi. En Somalia, on ia protesta simil ier.

2015-01-17

La pape visita un site filipina ruinada par siclon

Pape Fransisco is fa un misa su sielo en la site Tacloban en la Pilipinas, cual ia es ruinada par un siclon a pico plu ca un anio ante aora.

Desuples de miles de persones ia fronti corajosa la pluve e ventas forte, portada par un tempesta tropical, per es presente a la misa.

La pape ia intende encontra survivores de la siclon a pos, ma la tempesta ia obliga el a avansa la fini de se visita par cuatro oras e revade a Manila.

El ia dise ce el ia deside visita direta cuando el ia vide la desastre causada. El es en la Pilipinas, do 80 milion catolicas abita, como parte de un viaja de ses dias en Asia.

La siclon, nomida Haiyan, es ancora la plu forte rejistrada sur tera. Lo ia crea un onda con altia de 7 metres, e esta ia destrui cuasi tota ante se cuando lo ia ateni la costa a 8 novembre 2013.

Sirca 90% de Tacloban sur la isola Leyte ia es destruida. Plu ca 14,5 milion persones ia es afetada en ses areas e 44 provinses. Sirca milion resta sin casa.

Partinte, la pape ia demanda la pardona de la folas a la catedral xef, disente: "Me es triste sur esta, vera tristida, car me ia prepara alga cosa spesial per vos." Ma el ia clari ce se pilotes ia informa ce la clima va mali. "Nos ave apena la tempo nesesada per ateni la avion."

La tempesta tropical Mekkhala, con ventas de asta 130 cilometres per ora, ia obliga ce on suspende servis de naveta a Leyte, trapinte miles de viajores.

Un fem ia es matada pos la misa, cuando un ponteta tempora ia colasa prosima a la stadio.

La pape ia fa la misa en espaniol, con tradui engles, parlante sur la efeto xocante de la siclon a la popla de Tacloban. En cuando la multe miles ia inclina se testas per prea, la sola cosa nonsilente ia es la pluve salpicante sur la tera fangosa a se pedes.

La aveni xef de la visita de Fransisco va es un otra misa su sielo en Manila, doman. On ia declara un festa nasional en la capital per la periodo.

La securia es multe sever, usante multe miles de soldatos e polisiores, seguente atentas nonsusedosa de mata du papes pasada en la Pilipinas.

2015-01-16

Un ataca beljes contra teroristes

Beljia vijila estrema pos un ataca major antiterorisme en cual du combatosas islamiste suspetada ia es matada.

La suspetadas ia es fusilida en Verviers, un vila este prosima a la borda deutx con sirca 56 mil abitores, pos cuando los ia usa armas automata per xuta a la polisia en la sera ier.

Los ia reveni de Suria e ia scemi atacas prosiminte contra blancos polisial.

Un otra suspetada ia es ferida e arestada.

A pos, on ia descovre cuatro fusiles automata, aparatos per crea bombas, e vestes de polisia.

Multe securiores resta en la area de Verviers.

Alga scolas iudi en Antwerpen e Bruxelles es oji cluida pos es informada ce los es blancos posible.

On ia fa xercas tra la note ance en la area de la capital Bruxelles, incluinte se vilas ambiente.

Plu temprana en la dia, du islamistes suspetada ia es arestada en la suburbe Zaventem.

Ofisiores beljes dise ce plu ca 300 persones ia parti de Beljia per junta se a grupos de islamistes combatosa en Suria e Irac. On crede ce, entre la paises de Europa, Beljia ave la cuantia la plu grande per person de combatores stranjer ci ia partisipa en combate en Suria.

Sur la suspetadas en Verviers, on crede ce los ia scemi un ataca contra un ofisia de polisia per mata un cuantia grande de persones.

Atestores ia reporta oia fusilis intensa tra alga minutos, e tre esplodes a la min. La area sirca la stasion ferovial es ancora cluida.

Charles Michel, la ministro xef de Beljia, ia dise ce la esta opera par la securiores "mostra la ostina de la governa per combate los ci vole sperde la teror".

2015-01-15

La traduador de Google interprete

Google dise ce se program Tradui es aora capas de servi como interpretor, pos la ajunta de un moda de tradui voses en tempo real.

La varia nova de la program reconose automata la lingua parlada e tradui lo.

La refresci, ier lansada, permete ance ce on usa la camera de se telefoneta per tradui pronto mesajes scriveda. Esta no nesesa un lia de rede.

Ma la sistem resta noncapas de comprende la sutiles de comunica, la referes cultural o la umor.

An ante la refresci, la program ia pote tradui frases parlada o tapeda e pronunsia la resultas. Ma lo ia trata un formula pos un otra, no en tempo real, e la pronunsia e ritmo ia es noncoreta a veses.

La cualia nova es disponable per tradui entre engles e cuatro de la sinco linguas de fonte de elefen: franses, espaniol, italian, e portuges. Lo opera ance entre engles e deutx o rusce.

Otra programes simil es ja en la mercato. Skype ia lansa un funsion simil en desembre.

Google dise ce plu ca 500 milion persones usa se traduador en cada mense, fante plu ca mil milion traduis per dia.

2015-01-14

Nonsertia political en Aiti

On ia cansela la parlamento en Aiti pos la fali de la negosias final sur un lege nova de eleje.

La presidente Michel Martelly ia atenta gania suporta per un projeta, aprobada par la SUA, per pospone denova la eleje.

Aora, el rena ancora la pais par comanda de corte, ma se periodo de servi va fini en la anio seguente.

Grupos aitian oposante dise ce los va continua se menses de protestas su sielo per atenta obliga el a resinia.

La nonprogresa political es focada sur un disputa sur un lege nova cual legores oposante ia refusa permete.

A soldi, Martelly ia anunsia ce el e la oposores ia acorda final ce la eleje pote aveni.

Ma Fanmi Lavalas, la partito major sinistra e oposante, cual ia gida la protestas antigoverna, no ia partisipa en la acorda.

Elejes mediaperiodo a la Salon alta ia es orijinal espetada en maio 2012, e elejes local es ja retardada par tre anios.

Ativists aitian ia acusa Martelly de froda e malusa de potia, disente ce el ia desira ruina la acorda per pote rena par comanda de corte. Martelly ia nega esta.

Donores stranjer e la Nasiones Unida ia ofre se suporta a la presidente, descrivente se como "estrema consernada ce la parlamento de Aiti es canselada sin deside sur la aveni de elejes governal longa posponeda".

2015-01-13

Mal alcol ospitali plu ca sento persones en Barat

En Barat, a la min 14 persones ia mori pos bevi alcol nosiva en la stato Uttar Pradex.

On trata plu ca 100 persones en ospital, temente ce la cuantia de mores pote crese.

Moris par alcol nosiva aveni frecuente en Barat, do on bevi comun distiladas barata. (La similia de la parolas es un coaveni.)

On ia move rapida la vitimes a ospitales diversa pos reportas de la casos prima de veneni en la vileta Kharta, prosima a Lacnau, la capital de la stato.

La ofisior xef medical ia comenta ce 123 persones ia es ospitalida.

Autoriosas ia comensa un investiga, ma on ia aresta nun.

Un portavose per la governa ia esplica ce on ia suspende la labora de des-du ofisiores de departes local diversa, par causa de se descura. "On no va desculpa la culpables," el ia dise.

2015-01-12

Corvatsca ave se presidente fema prima

Kolinda Grabar-Kitarović ia deveni la presidente fema prima de Corvatsca, vinsente par marjin minima.

Pos la conta de 99% de la votas, el ia gania 50,5% de los. Se presedente en la posto, Ivo Josipović, ia gania 49,5%. Josipović ia aseta se defeta e ia loda se oposor.

La esta vinse oposante indica ce la politica en Corvatsca move cisa a destra, pos cuando la alia governante, a sinistra de sentro, ia fali fini ses anios de diminui economial.

On ia regarda la eleje como un proba major per la partitos xef ante elejes parlamental prevideda per la parte final de 2015.

La distantia de votas entre la du aspirores ia resta a sirca un persento tra multe de la ronda du.

58.9% de persones ia vota, un cuantia plu grande par 12% ca en la ronda prima, aveninte a du semanas a ante e con resulta simil prosima.

Grabar-Kitarović, ci ave 46 anios, ia servi ja como ministro de esternas e como aidor a la secretor jeneral de OTAN. El es un membro conserviste de la Uni Democrata Corvatsce, cual ia autonomi la pais de Iugoslavia en 1991.

A suportores joiosa en la capital Zagreb, el ia recomenda un unia nasional per fronti la crise economial. El ia comenta: "Me no va permete ce algun dise a me ce Corvatsca no va es rica."

Josipović, un esperta de lege e composor clasica, ia es presidente de pos 2010. El ave 57 anios. Se problem ia es se suporta par la alia governante cual no ia susede estrae la pais de un retrosede de ses anios.

Corvatsca ia deveni la membro la plu nova de la Uni European en julio 2013. 20% de se laborores posible es nonempleada.

La presidente es la xef de la armada e pote influe la politica esterna, ma la maneja de la pais es xef la taxe de la governa. Josipović ia proposa cambias constitual per atenta solve la crise, incluinte plu potia per la presidente.

2015-01-11

Un prosegue de unia en Paris

Gidores internasional asembla en Paris per un prosegue grande, per mostra se unia pos tre dias de terorisme en la capital franses cual ia mata 17 persones.

On previde ce 40 gidores va es presente a la asembla, cual va es plu grande ca los de ier en cual 700 000 persones ia apare sur la stradas.

Sirca 2000 polisiores e 1350 soldatos va proteje la prosegue. Lo es probable ce plu ca milion persones va partisipa.

La polisia xerca aidores de la fusilores ci ia ataca un revista satira e un supramercato.

A la matina de oji, Bernard Cazeneuve, la ministro franses de internas, va ospita un consenta de otra ministros de internas de tra Europa. Los va discute la menasa presentada par ativistes violente.

Cazeneuve ia promete "medios spesial" per la prosegue oji, incluinte la posa de xutores sur tetos. La prosegue va comensa en la Plaza de la Republica a 15:00 de ora local.

La presidente François Hollande va parla ance con gidores de la comunia iudi. Acel comunia es ancora xocada pos cuando un fusilor ia mata cuatro persones a un supramercato caxer en Paris este a venerdi.

On crede ce la fusilor, Amedy Coulibaly, ia mata ance un polisior fema a la dia presedente.

El, e la frates Kouachi, ci ia mata 12 persones en se ataca contra la revista Charlie Hebdo a mercurdi, ia es matada par la polisia a fini de du asejas separada.

La polisia xerca ancora aidores de la tre, incluinte Hayat Boumeddiene, la acompanior de Coulibaly. Ofisiores en Turcia crede ce cisa Boumeddiene ia viaja tra acel pais en via a Suria, plu temprana en la semana pasada.

En la entretempo, la polisia en Deutxland ia reporta un ensende criminal a la ofisias de un jornal cual ia reprimi la cartunes par Charlie Hebdo de la Profeta Muhammad. Nun ia es ferida en esta ataca contra Hamburger Morgenpost.

La frate de Ahmed Merabet, un de la polisiores matada a mercurdi, ia dise ce Merabet ia es "muslim, e multe orgulosa de es un polisior defendente la valuas de la Republica".

Ance la familia de Coulibaly ia condena la atacas, ofrente compatia a la familias de la vitimes, e comentante: "Nos asoluta no comparti esta ideas estrema. No espera ce no confusa va aveni entre esta atas odiable e la relijio muslim."

2015-01-10

Un blogor saudi es publica flajelida

On ia flajeli publica un blogor saudi ci on ia condena per sibercrimin e per insulta Islam.

Raif Badawi ia reseta un condena de 1000 flajelis e 10 anios en prison. Se puni va es semanal esecutada: on ia flajeli el a 50 veses ier.

Badawi es la cofundor de un loca de rede, aora proibida, nomida la Rede Saudi Liberal. On ia aresta el en 2012.

Grupos de diretos ia cexa contra se condena, e la SUA ia apela per un pardona. A jovedi, Jen Psaki, la portavose per la departe SUA de esternas, ia recomenda forte ce la autoriosas saudi "cansela esta puni savaje" e revista la caso.

En ajunta a se condena, on ia comanda ce Badawi paia un multa de milion riales ($266 mil).

En 2013, on ia desculpa el de disenti de se relijio, cual ta furni un condena de mori.

En la anio pasada, la avocato de Badawi ia es condenada a 15 anios en prison pos cuando un corte antiterorisme ia judi ce el es culpable de ofendes diversa.

La flajelis ia aveni estra un mascita en la site Jiddah a la Mar Roja, pos la preas de venerdi. Badawi ia ariva en un auto de polisia, e on ia leje la acusas a el ante un fola. Alora, on ia obliga el a sta con dorso a la fola, e ia flajeli el.

Amnestia Internasional ia comenta: "La flajeli de Raif Badawi es un ata vil de cruelia cual es proibida par lege internasional. Par iniora clamas internasional per cansela la flajeli, la autoriosas de Arabia Saudi ia fa un nonoserva repulsante de la prinsipes la plu fundal de diretos umana."

Arabia Saudi enforsa un varia sever de lege muslim, e no tolera la disenti political.

Lo ave un de la usas la plu alta de redes sosial en la area, e ia reata forte contra criticas interna enlinia, donante punis sever.

2015-01-09

Un presidente nova en Srilanca

Mahinda Rajapaksa, la gidor durante de Srilanca, ia deveni vinseda en un eleje presidental.

Resultas ofisial ia mostra ca Maithripala Sirisena, un aliada pasada de Rajapaksa, ia gania 51,3% de votas.

Rajapaksa, ci gida la pais de pos 2005, ia dise en Twitter ce el va serti ce la potia move pasosa.

Se suportores atribui a el la fini de la gera interna e la aumenta de la economia, ma oposores cexa ce el ia deveni sempre plu autoritar e frodante.

Sirisena ia reseta ja prometes suportante de gidores tamil e muslim ante la eleje. Ma la resulta indica ce el ia gania ance un parte notable de la votas de la majoria sinala, de ci la plu ia suporta forte Rajapaksa en elejes pasada.

Sirisena ia es ensircada par suportores e fotografistes cuando el ia parti de se ofisias. Plu tarda, on va indui el como presidente.

Rajapaksa ia xerca un periodo tre de governa pos cambia la constitui per sutrae un limita de du periodos.

Ambos Rajapaksa e Sirisena es sinalas, membros de la etnico xef en Srilanca.

Los ia es aliadas asta novembre, cuando Sirisena, la ministro de sania en la governa de Rajapaksa, ia anunsia subita se como aspiror.

En multe areas, plu ca 70% de persones ia vota, prosima como en elejes pasada, sin reportas de disturbas major en la prosede.

La periodo ante un eleje srilanca es usual malida par desuples de moris, ma en esta anio on ia reporta sola un mori relatada con la eleje.

2015-01-08

Un ataca matante contra la libria jornaliste en Frans

Frans lamenta des-du persones matada cuando la revista satira Charlie Hebdo ia es ier atacada par fusilores clamante sloganes islamiste.

La polisia franses ia aresta ja sete persones e xerca aora du suspetadas nomida. La sete, liada a la du suspetadas xef, ia es arestada en la vilas Reims e Charleville-Mézières, e ance en la area de Paris.

On ia publici fotos de du frates, Chérif e Saïd Kouachi, sur ci la polisia suspeta ce los ia es envolveda en la ataca, con averti ce los es "enarmada e perilosa".

Chérif Kouachi ia es condenada a tre anios en prison en 2008 per parteni a un grupo en Paris cual ia envia combatores jihadiste a Irac.

Un suspetada tre, Hamyd Mourad, ci ave 18 anios, ia sede se a la polisia en Charleville-Mézières pos oia se nom en la novas.

La pais va fa un minuto de silentia a mediadia, e la campanas de Notre Dame en la capital va sona.

Paris vijila aora a la grado la plu alta contra terorisme. On ia envia plu soldatos per garda ofisias jornaliste, locas relijial, transporta publica, e otra areas perilida.

A esta matina on reporta un fusili nova a un stasion de metro en la sude de Paris, do a la min un polisior es ferida. On no sabe esce esta es relatada con la ataca a Charlie Hebdo.

Ier, alga pos la ora des-un, oto jornalistes – incluinte la editor de la revista – ia mori, como ance un mantenor e un visitor, cuando omes mascida con fusiles de ataca ia invade la ofisias de Charlie Hebdo a media de un consenta edital.

Des-un otra persones ia es ferida, grave en alga casos.

Du polisiores ia es matada sur la strada a estra cuando la atacores ia fuji par auto a Paris norde. Alora la atacores ia abandona se auto e ia saisi un otra.

La ofisia de la jornal ia es atacada con un bomba ensendente en 2011. Lo ia coleri alga muslimes par primi cartunes de la profeta Muhammad, como parte de se disposa nonrespetosa a novas e avenis corente.

On ia fa vijilas tra la note en Paris e sites tra la mundo como tribui a la mores. Multe persones ia teni cartones con la testo "Je suis Charlie" (= me es Charlie) per onora la vitimes.

Candelas e montones de penes simbolinte la libria de espresa ia es poneda sur la Plaza de la Republica en Paris, do miles de persones ia asembla. Tribuis de cartun sirculi en redes sosial, enviante un mesaje de libria jornaliste.

La presidente François Hollande ia dise ce on ia ataca la tradision de parla libre en Frans.

La Universia Al-Azhar en Cairo, la sentro xef de eruditia de islam suni, ia descrive la ataca como "criminal", asentuante ce la relijio muslim denunsia "tota violentia". Ance la Lia Arabi ia condena forte la ataca.

2015-01-07

Un atestor en la prosede de Ruto es matada en Cenia

La avocato de un om mor, ci on ia trova en Cenia a la fini de semana, ia dise ce la om ia es un atestor major per Vispresidente William Ruto a se prosede en Den Haag.

On ia descovre la corpo descomposada de Meshack Yebei en Cenia ueste pos reportas ce el ia es saisida a 28 desembre.

La Corte Criminal Internasional ia dise ce Yebei ia refusa partisipa en se program de proteje atestores.

Ruto nega acusas de crimines contra umanas sur violentia cual ia esplode pos la eleje de 2007.

El es la governor la plu alta ci la corte en Den Haag ia prosede de pos se formi a plu ca un desenio ante aora.

La corte ia abandona acusas simil contra Presidente Uhuru Kenyatta en la mense pasada, alegante ce on ia menasa atestores acusante afin los cambia se atestas. Kenyatta ia insiste ce el es nonculpable.

La Dirijor de Prosedes Publica en Cenia ia comanda ce la polisia fa "un investiga rapida e completa" sur la omiside de Yebei.

Se familia ia dise resente ce el ia es matada per preveni ce el apare a Den Haag, ma on no ia confirma ofisial ce el ia es envolveda en la prosede de la vispresidente.

La corpo de Yebei ia es trovada a saturdi, prosima a un ponte sur la via entre Eldoret e Kisumu. La autopsia ia mostra ce on ia colpa el a la testa con un ojeto pesosa e nonagu.

Ruto e Kenyatta ia es a lados oposante en la eleje de 2007, ma los ia alia se per la eleje de 2013 cual ia propulsa los a la governa.

Sirca 1200 persones ia mori e 600 mil ia fuji en la gera, cual ia es la plu mal en la pais de pos cuando lo ia deveni autonom.

2015-01-06

Curdis saisi un distrito major de Kobani

Combatores curdi ci batalia contra la Stato Islamiste en Kobani en Suria norde ia saisi un distrito major, e controla aora 80% de la vila.

Curdis suportada par soldatos iraci ia catura la distrito de securia, incluinte la xeferia de polisia.

La Stato Islamiste ia avansa contra Kobani en setembre e ia invade multe de lo. Ma pos alora, los ia deveni gradal forsada a via par combatores curdi, aidada par atacas airal gidada par la SUA.

La Oserveria Suri per Diretos Umana ia clari ce curdis ia saisi la area de securia pos combates ferose cual ia comensa a la note de soldi.

Soldatos de la Stato Islamiste controla ancora Maqtala e Kani Kordan, distritos en la este de la vila.

Un ofisior en la vila ia dise ce la avansa curdi ia rapidi e la atacas airal ia intensi.

La invade de Kobani ia fa ce miles de refujadas fuji a ultra la frontera turces, cual es prosima.

On crede ce sentos de persones ia mori en la batalia per la vila.

2015-01-05

La polisia desrespeta la maior de New York a un funera

Sentos de polisiores ia dirije se dorsos a la maior de New York a la funera de la numero du de du polisiores matada par fusili en la mense pasada.

Wenjian Liu, un fio de migrores xines, ia es matada con se asosior Rafael Ramos a 20 desembre par un fusilor ci ia senti un oposa contra la polisia.

Parlores ia fa un filo per dise tribuis a la rituo, cual ia aveni en un casa funeral en Brooklyn.

En la strada a estra, polisiores uniformida ia dorsi un scermo video cuando Maior Bill de Blasio ia parla.

En menses resente, multe membros comun de la Departe de Polisia de New York ia deveni ofendeda per espresas, fada par la maior, de compatia per protestores antipolisia.

La omiside duple ia es fada par un fusilor american african ci ia declara ce el venja omes negra matada par polisiores blanca, e lo ia aturdi la site.

Bill Bratton, la xef de polisia en New York, ia recomenda forte ce polisiores asteni de plu "atas de desrepeta", disente en un nota scriveda: "La funera de un eroe es un caso de lamenta, no de tormenta."

En la rituo, Maior de Blasio ia dise: "Nos site intera es oji angusada."

Liu, ci ia ave 32 anios, ia perde se vive en combate per "tota cual es brava e bon", la maior ia dise. El ia fa un tribui a "un om joven ci ia veni asi de Xina con 12 anios, xercante la sonia american".

La du polisiores ia es fusilida pos un onda de protestas sur la matas par polisiores blanca de omes negra nonenarmada, comensante en la vila Ferguson en Missouri en la estate pasada.

2015-01-04

Contrabandores profita de un barcon a Italia

La polisia en Italia crede ce contrabandores ia gania sirca tre milion dolares de migrores nonlegal ci los ia abandona en un barcon de carga en la Mediteraneo.

La barcon Ezadeen ia es tirada a la porto Corigliano Calabro pos cuando gardacostas ia trova lo a venerdi.

La plu de la pasajores pare es suris.

Esta es la aveni du de un tal caso con barcon de carga en esta semana. Ambos barcones ia comensa se viaja en Turcia, evitante la curso libi cual ganges favore usual.

La xef de polisia de la provinse Cosenza ia dise ce cada migror ia paia entre $4000 e $8000 per entra a la barcon.

La contrabandores ia porta capetas e ia enclui la migrores en la cala, ante parti en un barco de salva.

En la caso prima, a martedi, gardacostas italian ia embarca la barcon Blue Sky M cual ia porta 796 migrores. Los ia trova ce la ecipo manca, e ia move la barcon a la porto Gallipoli en Italia sude.

La tatica nova de la contrabandores pare simple e produosa: on dirije un barcon de carga a Italia e lasa ce la gardacostas reseta lo.

Migras nonlegal a la Uni European deveni aumentada par migrores economial e par la gera interna en Suria, cual obliga persones a xerca un refuja en Europa.

On estima ce en 2014 cuasi 3500 refujadas ia mori en atenta traversa la Mediteraneo. Ma 200 mil ia es salvada.

2015-01-03

Ojetos es trovada en la xerca per la avion QZ8501

En la Mar de Djava, ecipos ci xerca la ruinas de la avion QZ8501 de AirAsia ia trova du ojetos grande. Los basi aora un veculo telecomandada per fa fotos su la mar.

Un mal clima e un mar tempestosa continua impedi la progresa.

La jeto ia desapare con 162 persones a soldi de la semana pasada, en vola de Surabaya en Indonesia a Singapor.

Asta aora, on ia regania 30 corpos. No survivores es trovada, e on no ia reprende la partes xef de la avion. On crede ce la plu de la corpos es trapida en la tronco.

Nun sabe perce la avion ia cade. Xercores ia reseta ancora no siniales de la caxas negra rejistrante.

Plu, on ia revela ce la airolinia AirAsia no ia es ofisial permeteda de vola longo acel curso en soldis.

Ante esta, AirAsia ia esperia nunca un asidente matante con se aviones.