2015-07-24

Un pausa peti

Esta blog vacanse, ma va reveni en agosto.

2015-07-23

Bombas mata en Nijeria norde

A la min du bombas ia esplode en du stasiones de bus en Gombe, un site en la norde de Nijeria, matante 29 persones, cisa plu.

Plu temprana en la dia, bombas umana ia mata a la min 11 persones en Camerun, la pais direta a este.

49 persones ia es matada en esplodes a un mercato en Gombe en la semana pasada. On ia culpa estremistes de Boko Haram per acel ataca.

La grupo islamiste, cual ataca frecuente en Nijeria norde, ia aumenta se atacas de pos cuando Muhammadu Buhari ia deveni presidente en maio.

Asta aora, no grupo ia dise ce lo ia esecuta la atacas a la sera de ier, ma Boko Haram ia ataca stasiones de bus en la site a ante.

On teme ce la cuantia de mores en Gombe va crese, entre reportas ce desuples de persones ia es ferida. Un atestor ia dise ce el ia conta 30 corpos mor a un de la stasiones.

En la anio pasada, Boko Haram ia saisi un area grande de Nijeria norde-este e ia declara un califia – un stato governada par lege muslim.

La armada nijerian, suportada par soldatos de paises visina (incluinte Camerun), ia recatura la plu de la teritorio, ma en semanas resente on ia esperia un aumenta de atacas par suiside.

A no multe oras ante la ataca en Gombe, bombas umana ia ataca la site Maroua en Camerun norde, lasante a la min 11 persones mor e desuples ferida.

Un atestor local ia dise ce la bombores ia es du xicas joven ci ia desembla se como mendicores. Un de los ia detona la esplodentes a la mercato sentral de la site, en la tal ataca du de la semana pasada.

La autoriosas ia estende aora un proibi de porta burcas afin lo inclui ance Douala, la capital comersial de la pais. A ante, la proibi ia esiste sola en la provinse nomida la Area Estrema Norde, pos du atacas ala par bombas umana a un tempo plu temprana en esta mense.

La armada camerunes usa Maroua como un base per se operas contro Boko Haram, como parte de un forte multinasional cual batalia la estremistes en areas visina de Nijeria.

Paul Biya, la presidente de Camerun, ia descrive la atacas como "coarde e vil".

Seguente Amnestia Internasional, a la min 17 mil persones, de cual la plu ia es nonmilitar, ia es matada de pos la comensa de la revolta par Boko Haram en 2009. La grupo estremiste teni nonlibre ancora multe femes e enfantes, incluinte 219 xicas ci lo ia fura de un scola en Chibok en april de la anio pasada.

2015-07-22

Un conservor xines ia sustitui falsas per pintis mestral

En Xina, un om ia confesa ce el ia fura de un universia plu ca 140 obras mestral de pinti, e ia sustitui se falsas propre per los.

Xiao Yuan, ci ave 57 anios e ia es un conservor a la Academia de Artes Bela en Guangzhou en Xina sude, ia vende 125 de la esibidas per plu ca 34 milion iuanes.

Defendente se, el ia informa la corte ce pintas falsida ia es ja presente en la sala de conserva cuando el ia comensa labora ala.

Xiao ia ave un clave a acel sala en la universia, e tra du anios comensante en 2004, el ia sustitui falsas per obras famosa par mestres como Zhu Da, Qi Baishi, e Zhang Daqian.

El ia dise a la corte ce en acel periodo el ia es surprendeda de trova ce alga de se falsas propre ia es mesma furada e ce otra copias ia es sustituida per los.

"Me ia comprende ce un otra person ia pone se pintis propre en loca de los de me," el ia dise, "car me ia pote persepi clar ce se obras es estrema mal."

El ia ajunta ce el no sabe ci ia fura se falsas, ma ce studiantes e profesores ave la direto de empresta pintis en la mesma modo como libros de biblioteca.

Entre 2004 e 2011, el ia vende 125 pintis, usante la revenu per compra imobilas e plu pintis. On estima ce la 18 otras cual el ia fura ave un valua de plu ca 70 milion iuanes.

Xiao ia resinia de la universia en 2010 cuando alegas ia es comunicada a la polisia. El ia presenta se como culpable a la acusa de froda. El ia demanda ce on pardona el, ma ia desacorda con alga detalias indicada par la avocatos prosedente.

En 2012, Xinhua, un ajenteria de novas xines, ia reporta ce falsis artal aveni "sempre plu vasta" en la pais. En acel anio, Xina ia deveni la mercato la plu grande per arte e anticalias, diseda par la Funda European de Arte Bela.

2015-07-21

La dirijor xef de Toshiba resinia en scandal

Hisao Tanaka, la dirijor xef e presidente de Toshiba, va resinia pos un anunsia par la compania japanes ce lo ia esajera se declaras de profitas tra la ses anios pasada. La vis-presidente Norio Sasaki va resinia ance.

Ier, un comite autonom asiniada par Toshiba ia dise ce la compania ia esajera se profita operante par 151,8 mil milion ienes ($1,22 mil milion). La esajera es plu o min la truple de un estima ja fada par la compania mesma.

La ministro de finansia, Taro Aso, ia dise ce la caso risca sumina la fida a la maneja de corporas en Japan. El ia ajunta ce la nonormalias de conta a Toshiba es "multe regretable".

La governa de Japan atenta ja regania la fida de investores global pos cuando on ia descovre ce la compania Olympus ia asconde un perde de $1,7 mil milion en la tarda de 2011. Asta aora, esta ia es la scandal la plu mal de maneja corporal en la pais.

On previde ce, per Toshiba, la reporta de la comite va gida a un reanunsia de revenu, un cambia intera de dirijores, e cisa multas sever.

La comite ia trova ce la malreporta de profitas ia comensa pos la rompe finansial a sete anios ante aora, cuando manejores major ia comensa pone goles nonrealable.

La reporta ia dise: "En Toshiba, on ia ave un cultur corporal en cual on no ia pote ata contra la vole de persones superior. Donce, cuando la dirijores xef ia presenta "defias", la presidentes de areas, manejores de grupos, e empleadas su estas ia esecuta continuante praticas nonconveninte de conta per ateni goles, per segue la desiras de se superiores."

Tanaka e se presedor Sasaki es entre oto dirijores major ci ia resinia aora pos la reporta.

Asiones de Toshiba ia crese par 6% en la asioneria Nikkei en Japan, pos la lejeri ce la reporta conteni poca surprendes nonplasente. Ma los es ancora basida par sirca 23% de pos cuando Toshiba ia revela la casos prima de nonormalias de conta en la temprana de april.

2015-07-20

Mausoleos es reconstruida en Mali

On ia reconstrui des-cuatro mausoleos en la site Timbuctu en Mali norde, a tre anios pos cuando estremistes islamiste ia destrui los.

La reconstrui ia es fada par petrores local, laborante per UNESCO, la organiza cultural de la Nasiones Unida.

En un visita a la site, la xef de UNESCO ia dise ce el vole ce la destruores apare ante la Corte Criminal Internasional.

La intera de la site Timbuctu es listada como un loca de erita mundal.

On ia regarda la site como la sentro de aprende muslim de la sentenios 13 a 17. A un eda pasada, lo ia conteni cuasi 200 scolas e universias cual ia atrae miles de studiantes de tra la mundo muslim.

La mausoleos ia es santerias dedicada a la fundores de Timbuctu, ci ia es respetada como persones santa par la plu de la abitores de la site.

Ma esta pratica es regardada como blasfemosa par fundalistes ci ia ocupa la site e multe otra partes de Mali norde en 2012, asta cuando soldatos franses ia forsa los a via en janero 2013.

En se ocupa, la estremistes ia destrui e fa vandalisme a mascitas e mausoleos, e ia arde deses de miles de manoscritos antica.

Inaugurante la mausoleos reconstruida a saturdi, Irina Bokova, la dirijor jeneral de UNESCO, ia dise ce la destrui de eritas cultural es un crimin de gera su la Acorda de Den Haag fada par la Nasiones Unida en 1954.

Petrores ia usa metodos tradisional de construi e conoses cultural de la area per recrea la mausoleos. La labora ia ocupa un anio.

Onorante los, Bokova ia dise: "La vos labora es un leson sur tolera, comunica, e pas… Lo es un responde a tota estremistes de ci se eco es oiable an multe ultra la fronteras de Mali."

2015-07-19

Un airoporto abandonada es sobornada en Espania

Un grupo de investores internasional ia gania un soborna bancarotal per un airoporto abandonada en Espania sentral. Los ia ofre €10 000: un sento-mili de la custa orijinal de construi.

La investores ia es la sola ofrores per la airoporto Ciudad Real a sude de Madrid. La airoporto ia es completida en la anios bumante de Espania.

Ma lo no es clar esce la vende va continua, car un otra compror pote ancora presenta se estra la prosede de soborna.

La ofre ganiante ia es fada par un uni de investores gidada par Xina. La grupo, nomida Tzaneen International, dise ce lo vole fa ce la airoporto deveni un loca de entra a Europa per companias xines.

On ia intende ce la airoporto, situada a 235 cilometres a sude de Madrid, va es un alternativa de la airoporto Barajas de Madrid.

On ia spende plu ca mil milion euros per construi lo. Lo ia abri en 2008, ma ia bancaroti e clui en 2012.

Cisa un otra compror va ofre ancora €28 mil euros – la paia minima cual la manejores tempora ia fisa per la susede de la vende — ante la fini de setembre.

La airoporto ave un capasia per 2,5 milion pasajores per anio. Lo es un de alga "airoportos fantasmin", creada en la buma de construi en Espania, cual no ia atrae un cuantia sufisinte de pasajores.

Un malfortuna simil ia aveni a la airoporto de Castellón en la este. Lo ia abri en 2011 ma an no un avion ia atera ala.

2015-07-18

Du trenes colide en Johannesburg

Sirca 300 persones ia es ferida en un colide entre du trenes, prosima a Johannesburg, la site la plu grande de Sudafrica.

La xoca ia aveni prosima a la stasion Booysens, a sude de la site, a sirca 18:30 de ora local.

La plu de la feridas ia es ospitalida, e paramedicistes trata otras a la sena. Un portavose ia dise ce alga de la feris es grave, ma nun ia mori. Alga enfantes ia es ferida.

On ancora no sabe la causa de la colide, ma un de la trenes ia salta partal de la reles. Lo pare ce un tren movente ia colpa un nonmovente.

Pompores xerca ancora pasajores ci es cisa trapida en la vagones.

Imajes compartida en redes sosial mostra pasajores asemblada a lado de la ferovia, espetante cura medical.

2015-07-17

Ursos blanca no ajusta a la Artica fondente

On ia descovre ce ursos blanca no pote ajusta se condui per maneja la perdes de comeda asosiada con estates plu calda en la Artica.

Siensistes ia suspeta ce la animales entra a un spesie de "inverni paseante" cuando privada de preda. Ma un rexerca nova indica ce la ursos mori simple de famia en tal clima.

La autores dise ce esta implica mal per la survive de la spesie en un mundo plu calda.

Ursos blanca vive xef par come focas cual los xasa sur la jelo de mar. Ma la fonde aora aumentada en estates redui la cuantia de focas, e la ursos no trova tan fasil se comedas.

Alga rexercores ia razona ce, simil a la reata de otra spesies de urso a inverno, la ursos blanca entra a un state spesial de ativia basa cuando los no reseta un cuantia sufisinte de calorias.

Per proba esta idea, siensistes ia fa un esperimenta custosa e perilosa: los ia fisa colares satelital e rejistradores sirurjial implantada, per trasa la moves de la ursos e per nota detalias fisiolojial. Los ia studia a la min 25 ursos en la mar a norde de Alasca, e ia conclui ce la ursos mori de famia en la estate.

An si la ursos no pote cambia se condui per comedas, los pare ave un ajusta importante cual aida los a survive nada en acua fria. Esta ia es un surprende grande a la rexercores.

La autor xef de la article ia dise: "Los ave un capasia de permete tempora ce la parte la plu esterna de la tronco de se corpo fri a un grado notable, e esta proteje la organes esensal interna."

On ia studia un urso fema ci ia survive un nada tra 650 cilometres e nove dias, entre un costa e un isola de jelo. Cuando on ia recatura el pos sete plu semanas, la urso ia perde 22% de se masa corpal – e ance se enfante.

La studia ia es multe custosa, usante sirca 200 persones, un rompejelo, e elicotores. La rexercores crede ce lo no es probable ce cualcun va repete la esperimenta.

2015-07-16

Reatas pos un acorda nucleal con Iran

Barack Obama, la presidente de la SUA, ia dise ce los ci oposa la acorda nucleal con Iran desacorda con "99% de la mundo e la majoria de espertas nucleal".

El ia defia la oposores a presenta un alternativa plu bon ca la acorda fada a martedi. On regarda esta como un refere velida a se oposores republiciste en la Congresa.

En la semana veninte, la Consilio de Securia de la Nasiones Unida va vota sur un deside per validi la acorda. En intercambia per un sesa de punis economial, Iran va limita se ativias nucleal.

Obama ia dise ce un debate forte va aveni en la Congresa.

Se oposores republiciste, ci espera aboli la acorda en un vota seguente, ia acusa el de sede. John Boehner, la presidente de la Salon basa, ia comenta ce la acorda va fa no plu ca "coraji" Iran e comensa un corsa de armas nucleal tra la globo.

Ma Obama ia dise: "Si 99% de la comunia de mundo e la majoria de espertas nucleal regarda esta e los dise ce lo va preveni ce Iran oteni un bomba nucleal, e vos razona o ce lo no va preveni o ce, an si lo preveni, la efeto va es tempora, alora vos debe ave alga alternativa."

El ia ajunta ce la mundo va risca "an plu gera en Asia sude-ueste" sin la acorda nucleal con Iran.

Mohammad Javad Zarif, la ministro irani de esternas, ia dise ier ce la acorda, fada con ses potiosas global en Wien en Austria, va comensa es realida en o ante novembre. La presidente de Iran, Hassan Rouhani, ia dise ce la acorda mostra ce "engranas construosa susede".

An tal, Benjamin Netanyahu, la ministro xef de Israel, ia denunsia lo cual el ia descrive como "un era major e stonante".

Obama ia espresa esperas ce la acorda va aida Iran a "condui diferente", sitante "se suporta de terorisme e se usa de representores per destabli partes de Asia sude-ueste".

El ia dise ce la SUA va xerca plu colabora de Tehran per fini la geras en Suria e Iaman. Ma el ia ajunta: "Nos fa no apostas sur esta."

Entre 2006 e 2010, la Consilio de Securia ia aproba ses desides esijente ce Iran para produi uranio ricida, cual pote es usada per intendes nonmilitar ma ance per construi bombas nucleal.

2015-07-15

On descovre un particula suatomal nova

Siensistes a la Colidador Grande de Adrones ("Large Hadron Collider" o LHC) ia anunsia la descovre de un particula nova nomida la pentacuarc.

On ia previde la esiste de esta particula en la desenio de 1960 ma, simil a la boson de Higgs a ante, la pentacuarc ia asconde se asta se deteta par la LHC.

En 1964, du fisicistes – Murray Gell-Mann e George Zweig – ia proposa separada la esiste de la particulas suatomal cual on nomi aora cuarces. Los ia teori ce la esplica la plu bon per la cualias xef de bariones e mesones es ce los es composada de otra particulas plu peti. Zweig ia proba la nom "as" per la composantes ipoteseda, ma la nom "cuarc", sujestada par Gell-Mann, ia gania.

Esta model ia permete ance otra organizas de cuarces, como la pentacuarc. Alora intera teorial, esta particula ia es composada de cuatro cuarces e un anticuarc (un cuarc de antimateria).

En la media de la desenio de 2000, alga ecipos ia declara ce los ia deteta pentacuarces, ma se descovres ia es suminada par otra rexercas a pos.

Esperimentas presedente ia mesura sola la distribui de masa, en cual un apico statistical pote apare contra la "ruido" fondal, indicante cisa la presentia de un particula nova. La LHC ia permete ce rexercores regarda la datos de perspetivas ajuntada, pd la cuatro angulos definida par la dirijes diversa de viaja de particulas en la aselerador.

Un portavose ia dise: "La pentacuarc no es mera un particula nova. Lo representa un modo de agrega cuarces, cual es la composantes fundal de protones e neutrones comun, en un manera cual on ia oserva nunca a ante en plu ca sincodes anios de xercas esperimental."

On ia recomuta la LHC en april, pos un pausa de du anios per reali un program de reparas e renovis.

2015-07-14

Un padron mexican de drogas evade se prison

Mexico ofre un premio de 60 milion pesos ($3,8 milion) per recatura un padron de drogas ci ia evade un prison de securia masima. On xerca aora intensa Joaquín Guzmán, ci ia sorti de se selula a saturdi tra 1,5 cilometres de tunel.

Osorio Chong, la ministro de internas dise ce el crede ce ofisiores a la prison ia aida la evade. On ia desemplea ja tre ofisiores major, incluinte la dirijor de la prison Altiplano.

Guzmán ia fuji an cuando el ia porta un brasaleta de vijila e ia es monitorida per 24 oras de dia.

Ier, Chong ia visita la prison e la area visina, a sirca 90 cilometres a ueste de la Site Mexico. El ia ariva par elicotor, con un grupo de congresores e la comisionor de securia nasional.

Chong es encargada con la opera car Enrique Peña Nieto, la presidente, visita Frans per la selebras ala de la festa nasional oji.

On ia forti la securia tra Mexico. Volas de la airoporto de Toluca es suspendeda e on ia institui postos de controla. Guatemala ia aumenta ance se securia longo se frontera norde con Mexico, car ala on ia catura Guzmán en 1993.

Guzmán ia es enviada a un prison de securia masima en Mexico, ma el ia evade en 2001, parente par asconde en un caro de vestes pos soborna ofisiores. En la anios seguente, el ia largi la estende de se organiza. Analistes averti ce la mesma pote reaveni si se evade nova desacorda con otra carteles ci desira proteje se teritorios.

On interoga desuples de gardores de prison a la prison Altiplano per descovre como Guzmán ia susede evade a esta ves.

Video ia mostra el en entra a la area de dux de se selula a oto minutos ante nova (de ora local) a saturdi. La tunel ia lia esta area a un casa construida en la anio pasada en campos de mais.

La tunel mesura 1,7 metres par 70 sentimetres, permetente ce Guzmán, un om corta, pasea comfortosa sin curvi. (Se nometa es "El Chapo", cual sinifia "La Nana".) Lo ia es ventida e luminada, e gardores ia trova ance un motosicle cual probable on ia usa per transporta la tera en cuando la tunel ia es escavada.

En la casa prosima a la prison, ofisiores ia trova un cosina e un leto, indicante ce la escavores ia spende cisa series de dias ala. Un calcula usante la altia, largia e longia de la tunel estima ce la tera escavada ta pleni 379 camiones.

Presidente Nieto ia descrive la evade de Guzmán como "un scandal per la stato", e ia comanda un investiga completa.

On estima ce Guzmán posese bilion dolares.

2015-07-13

Un clima jelada en Australia sude-este

Australia sude-este ia esperia un clima la plu fria de desenios a saturdi, ma la efetos no ia es tan mal como on ia predise.

Ventas forte e cades de neva ia colpa la statos Victoria e Cimri Sude Nova, en un fenomeno cual jornalistes ia nomi "la vortis antartica".

An la stato Queensland, normal solosa, ia jela en alga partes. On ia reporta ce neva ia cade a cuasi 20 cilometres de la borda con Cimri Sude Nova.

On previde plu clima nonusual fria per esta semana.

La dirijor areal de la Buro de Meteorolojia per Cimri Sude Nova ia dise ce la clima strana es relatada con un serie de frontes fria cual ia pasa tra la statos.

En Victoria e Cimri Sude Nova, on averti sur plu clima sever. La state jelada ia clui alga vias major, incluinte partes de la Autovia Ueste Grande.

La frontes basa ia es causada par un sistem de presa basa, e on predise ce esta sistem va dura tra multe de la semana veninte.

Areas alpal e vacanserias de sci ia esperia bon cades de neva a la fini de semana. La area nomida Central Tablelands (Plano Alta Sentral) en Cimri Sude Nova ia reseta ance un neveta.

2015-07-12

Bosnia condena un ataca contra la ministro xef de Serbia

La governa de Bosnia e Hersegovina ia condena un ataca contra Aleksandar Vučić, la ministro xef de Serbia, a un rituo per onora la aniversario 20 de la masacra a Srebrenica.

Lo ia dise ce Vučić ia visita la vila "en spirito de reconsilia, intendente mostra respeta". Vučić ia es obligada a fuji de la rituo pos es desaclamada, interompeda, e an colpada con petras.

Sirca 8000 muslimes ia es matada en Srebrenica par soldatos serbsce bosance en la gera de Bosnia.

Parlante en Beograd, la capital de Serbia, pos la ataca, Vučić ia dise ce se oculo ia deveni rompeda en la aveni ma ce el mesma no ia es ferida. El ia dise ce la atacores ia es organizada, ma ia asentua ce el va continua se politica de rearmoni.

"Me regrete ce alga persones no ia comprende me desira sinsera de construi amia entre serbsces e muslimes bosance," el ia dise. "Me mano resta estendeda a la popla bosansce."

En la pasada, Vučić ia es un nasionaliste revoluiste serbsce ci ia labora su Slobodan Milošević, la xef serbsce, en la tarda de la desenio de 1990.

Aora, el es un politiciste proueste ci vole gida Serbia a entra a la Uni European. Se governa ia susede gania suporta de Rusia, se aliada, a mercurdi per rejeta un deside par la Nasiones Unida cual ta nomi la avenis en Srebenica un jenoside.

Desuples de miles de persones ia asembla per la rituo ier en la vila en Bosnia este.

Atestores dise ce Vučić ia veni de pone un flor a un monumento cuando partes de la fola ia comensa cria "Dio es alta" en arabi e lansa petras. Scermida par parapluves, el e se gardacorpos ia core a via.

En se declara, la governa de Bosnia – cual conteni membros de cada de la tre comunias xef de la pais: corvatsce, serbsce, e muslime bosance – ia ofre se regretes a "tota delegas stranjer" per la aveni.

La maior de Srebrenica ia descrive la ataca como "la labora de mentes malada ci ia malusa esta aveni formal".

Serbia ia condena la ataca como "un atenta de asasina", e se ministro de esternas ia dise ce lo ia es un ataca "contra tota Serbia e se politica de pas e colabora areal".

Ance ier, on ia fa un rituo funeral per plu ca sento vitimes de ci on ia identifia resente se restas par analise de ADN.

Presente a ambos rituos, Bill Clinton, la presidente SUA a tempo de la masacra, ia regrete ce tan multe tempo ia es usada per fini la gera. El ia ajunta: "Me vole nunca vide un otra campo de mata como esta."

2015-07-11

Un imaje plu clar de la surfas de Pluto

La veculo spasial Orizones Nova prosimi a Pluto, traente imajes sempre plu clar.

La pitur la plu resente comensa ofre indicas vera sur la jeolojia sur la planeta nana. La imaje blanca-negra revela un banda vasta de tereno distinguida, cual estende sirca la globo tra plu o min 1500 cilometres.

La veculo va pasa la miniplaneta distante a martedi. A acel momento, lo va es a mera 12 500 cilometres supra la surfas, e se camera telescopial va reseta imajes a densia plu bon ca 100 metres per pixel.

A presente, an tal, la cualias videda ave ancora un aspeta alga neblosa.

La foto la plu resente publicida ia es fada a jovedi cuando Orizones Nova ia es ancora a 5,4 milion cilometres de se gol. A esta distantia, la densia es 27 cilometres per pixel, ma jeolojistes deveni ja multe stimulada.

Basa, on pote vide un tereno multe oscur cual siensistes ia nomi "la balena" per se forma. La area multe luminada con forma de un cor cual ia es vidable en imajes plu temprana es ascondeda par la jira de Pluto en la pitur nova. Ma lo va es a la fas vidable de la mundo a la prosimi masima.

Alan Stern, la investigor xef de Orizones Nova, ia dise: "Entre la strutures esitosa identifiada en esta imaje nova es alga cualias parente poligon; un banda complicada de tereno traversante la planeta a este-norde-este, con longia de sirca 1600 cilometres; e un area complicada do terenos briliante encontra la terenos oscur de la balena."

La veculo ia es lansada de la Tera en 2006. On intende ce lo va colie sentos de fotos e otra spesies de datos rexercal en cuando lo pasa Pluto e se lunas: Caron, Stije, Nix, Cerbero, e Idra.

La taxe difisil de la veculo es envia tota esta informas a la Tera. Lo es situada a un distantia enorme de nos – plu ca 4,7 mil milion cilometres – e esta no permete la transmete rapida de datos.

La ecipo de la mision previde ce Orizones Nova va spende 16 menses en envia tota la informas cual lo va colie en la semana veninte.

2015-07-10

Un volcan clui airoportos indonesian

On ia clui sinco airoportos en Indonesia, incluinte sur Bali, un isola de turisme, par causa de un eruta volcanal.

Monte Raung en Java Este jeta ja sene en la aira tra cuasi un semana, reduinte la capasia de vide a la airoporto de Denpasa sur Bali.

A la dia du en segue, on ia cansela multe volas entre Bali e Australia, encaliante viajores. La isola es un destina major de vacanse per australianes.

Un portavose de la ministreria indonesian de transporta ia dise ce la reabri de la airoportos va depende de la ativia de la monte.

La cuatro otra airoportos afetada es la Internasional e lo de Selaparang en Lombok, la airoporto de Blimbingsari en Banyuwangi, e lo de Notohadinegoro en Jember.

A venerdi, e Jetstar e Virgin Australia ia cansela tota aviones a e de la airoporto de Denpasar, la capital de Bali.

Jetstar ia es ance obligada a cansela volas entre Australia e Bali en la semana pasada. Lo ia declara ce lo va monitori atendente la nube de sene, e va ajunta plu volas per pasajores.

La volcan eruta ja tra sirca un semana, jetante constante sene. La eruta no es esplodente – lo es mera un jeta nonsesante.

La apico de la monte es tan alta ce sola un pico de sene pote disturba la funsiona de aviones.

La aspeta la plu perilosa es ce motores moderna de jeto suca multe aira. La sene consentra alora en la motor e deveni un spesie de vitro fondeda, cual covre la interna de la motor e afeta la flue de carburante. En la situa la plu mal, lo pote causa ce la motores descomuta.

2015-07-09

Combates mata plu ca dudes persones en un site jazairi

A la min 22 persones ia mori en scaramuxas entre comunias arabi e berber sirca Ghardaia, un site de oasis en Jazair.

La site ia esperia combates tra la du anios pasada, par causa de compete entre la comunias per emplea, casas, e tera. Ma la du dias resente de scaramuxas en Ghardaia – e Guerrara e Berianne, du sites prosima – es la plu violentes asta aora.

Presidente Abdelaziz Bouteflika ia fa un consenta de crise a mercurdi, e ia recomenda forte ce la popla en Ghardaia "aida restora calmia e conserva la lias antica de fratia cual ia cuali sempre la area".

Plu temprana en la dia, Noureddine Bedoui, la ministro de internas, ia ariva en Ghardaia. La site es un de la locas de erita mundal de UNESCO.

Membros de la comunia mozabita berber local ia fa un protesta en la capital, a 600 cilometres a norde, per solicita un proteje plu bon.

"La situa es multe grave," un xef de la mozabitas ia dise. "Esta no es aora mera un caso de combates, lo es terorisme."

La ajenteria ofisial de novas en Jazair ia reporta ce la plu de la moris ia resulta de "misiles". On no sabe a cual grupos la mores ia aparteni.

Un semetero de mozabitas ia es violeda en desembro 2013, provocante batalias entre comunias. A la min 12 persones ia es matada ante la recomensa de violentia en esta semana.

2015-07-08

Madrid va renomi stradas cual pertine a Franco

En Espania, la comite nova sinistriste de Madrid, la capital, ia dise ce lo intende sutrae tota nomes de stradas e plazas cual pertine a la autocratia de jeneral Francisco Franco.

On ia renomi ja multe stradas su un lege de 2007 de "memoria istorial" cual ia introdui sustituas per la simboles de la rena de Franco entre 1939 e 1975. Ma 167 stradas es ancora nomida pos figures major de acel periodo.

Manuela Carmena Castrillo, la maior nova de Madrid, e un sinistriste, ia es un avocato anti-Franco en la anios tarda de la tirania.

El ia emprende la posto en Madrid pos anios de governa par la Partito Poplal, sentral destriste.

Se presedente, Ana Botella Serrano, ia es un de 38 maiores ci un avocato de diretos umana, en la parte prima de esta anio, ia acusa de pospone tro longa la sutrae de simboles de Franco.

An si un portavose per la comite de vila ia dise ce on ave "no projeta concreta" per comensa cambia la nomes de stradas, el ia indica ce esta va aveni en colabora con distritos local e grupos sitizanal.

Nomes listada par jornalistes espaniol inclui la strada de la Mores de la Divide Azul, un unia cual ia servi con la nazis en la Gera Mundal Du, e la plaza Arriba España, cual refere a Falanje, un partito vea de Espania.

Alga vestijios de la rena de Franco resta sur construidas istorial en Madrid. Entre los es un arco de vinse a un de la entras a la site, alga construidas de defende, e la palasios El Pardo e Santa Cruz.

2015-07-07

Brasil introdui regulas nova sur sesareas

En Brasil, regulas nova ia comensa es usada con intende de redui la cuantia alta de paris par sesarea en la pais.

Otodes-sinco persentos de tota nases en ospitales privata en Brasil es sesareal, e en ospitales publica la persentos es 45.

La regulas nova obliga dotores a informa femes sur la riscas e a solisita se suscrive sur un formulario de acorda ante la opera.

Dotores va debe ance justi perce un sesarea es nesesada. Los va debe scrive un rejistra completa de la developa de la pari e nase, e esplica se atas. Cada fem ensinta va ave aora notas medical rejistrante la istoria de se ensintia, e el va pote prende estas si el cambia se dotor.

On intende ce la regulas va redui sirurjias nonesesada e serti ce ensintas es consensa de la riscas asosiada con sesareas.

An tal, espertas dise ce car on ave un nonsufisi de letos de pari e de salas capas de prosede nases natural, un sesarea es regardada como la eleje la plu bon per multe femes en Brasil.

Femes ci desira pari natural en un ospital privata ia reporta trova ce tota letos es reservada per paris ajendida. On ia reporta sur multe femes ci ia comensa pari sin reserva ja un sesarea, e ci ia debe donce viaja de ospital a ospital per xerca un leto.

Rexercores dise ce multe femes regarda ance sesareas como plu sivil e moderna, e paris natural como primitiva, fea, e nonoportun.

En la cultur brasilera preocupada de aspeta, do on distribui poca informas sur pari, on ave ance un ansia grande ce la pari natural pote redui la atrae sesal de femes.

Multe dotores prefere ance sesareas, car los permete organiza la ora de un nase, e la dotores senti plu protejeda de litiga.

2015-07-06

Elas eleje "no"

Alexis Tsipras, la ministro xef de Elas, ia dise ce la popla elinica ia fa "un eleje corajosa" en vota per rejeta un acorda de salva finansial internasional en un referendo ier.

Miles de persones ia selebra en la stradas pos oia ce la resulta final es 61,3% per "no" e 38,7% per "si".

Ma ofisiores european ia averti ce esta pote causa la ejeta de la pais de la eurozona. La valua de la euro ia cade ja en tota asionerias en Asia oji.

La ministro finansial de Elas, ci ia desacorda frecuente con la creditores, ia resinia. En se blog, el ia scrive ce el ia "deveni consensa de un prefere par alga partisipores de la Eurogrupo per se 'asentia' de la consentas".

La partito governante, Syriza, ia campania per un vota de "no", disente ce la acorda ta es umilinte.

Tarda ier, en un parla televisada, Tsipras ia comenta ce la elinicas ia demostra ce "democratia refusa deveni estorseda".

El ia dise ce Elas va revade a la negosias a lundi, ajuntante ce un evalua par la Reserva Monal Internasional, publicida en esta semana, confirma ce un restruturi de la deta elinica es nesesada.

Ma alga ofisiores ia averti ce la creditores pote interprete un vota de "no" como un indica ce la elinicas rejeta plu negosias.

Xefes de statos european ia ave opinas diversa sur la idea de continua negosias con la pais pos esta referendo.

La viscanselor de Deutxland, Sigmar Gabriel, ia dise ce negosias renovida con Elas es "difisil per imajina" e ce Tsipras ia "destrui la pontes" entre Elas e Europa.

Ma ministros italian e beljes ia es plu reconsiliante. La ministro finansial de Beljia ia comenta ce la porte resta abrida per recomensa negosias.

Jeroen Dijsselbloem, ci preside la grupo eurozonal de ministros finansial, ia descrive la resulta de la referendo como "multe regretable" per la futur de Elas.

Entretempo, Martin Schulz, la presidente de la Parlamento European, ia averti ce Europa va entra a "un tempo multe difisil e an dramosa" si la governa elinica no fa proposas "sinifiosa" en la oras veninte.

Elas ia es ja en negosias con se creditores tra menses cuando la governa elinica ia clama un referendo nonprevideda sur la acorda ofreda.

2015-07-05

Xampania deveni un erita mundal

La ramo cultural de la Nasiones Unida ia dona la cualia de un erita mundal a la industria cual produi xampania.

UNESCO ia deside ce la viterias, susolos de vino e venderias do on produi e vende xampania es cultural importante.

Los ia es entre des-un cosas e locas cual la organiza ia eticeti formal como eritas mundal en Deutxland ier.

La eticeta debe serti ce la locas reseta un proteje spesial en futur.

UNESCO (la Organiza de la Nasiones Unida per Instrui, Siensa e Cultur) ia descrive la industria de xampania como "un ativia de artisanes multe spesialida, cual ia deveni un emprende agricultural-industrial".

La lista inclui ja Machu Picchu en Peru, la Taj Mahal en Barat, e la Mur Grande de Xina. La ajunta de la industria de xampania a la lista va trae cisa plu aida finansial e plu turistes.

La viterias de la area Burgonia en Frans ia reseta ance la cualia de eritas mundal a saturdi.

Entre la otra locas anunsiada ia es la Jardines Botanical de Singapor, la Fortres Diyarbakır en Turcia, e la cavas abitada de Maimand en Iran.

Un loca de erita mundal, la ruinas de Palmira en Suria, ia es ocupada par estremistes de la Stato Islamiste en maio, cuando los ia catura Tadmur, la site moderna la plu prosima. Esta ia provoca criticas ce la eticeta de UNESCO no aida proteje locas de importa cultural.

2015-07-04

La coroni de la re de Tonga

Re Tupou 6 de Tonga, un nasion de isolas en la Mar Pasifica, ia es formal coronida a plu ca tre anios pos deveni la re.

Persones reial stranjer, incluinte la prinse erital de Japan, ia es presente a la rituo de coroni en la capital, Nukuʻalofa.

La coroni mesma ia es fada par D'Arcy Wood, un prete jubilada australian de 78 anios, car toca la testa de se re es tabu per tonganes.

La re presedente, George Tupou 5, ia mori en marto 2012.

La coroni ia es la culmina de un semana de festas cual ia inclui un rituo tradisional de bevi, selebras en stradas, e bancetas. Lo ia atrae miles de tonganes e turistes.

En ajunta a Prinse Naruhito, la reiales european Prinse Georg von Habsburg de Ungaria e Prinsesa Marie-Therese von Hohenberg de Austria ia es presente.

Tupou 6 ave 55 anios. El ia es tronida pos la mori de se frate, ci no ia sposi.

Tonga ia gania se autonomia de Britan en 1970, ma se monarcia ave mil anios de istoria.

2015-07-03

Asemblas en Atina ante la referendo finansial

En Elas, partitos competente va aveni asemblas major en Atina, ante un referendo importante sur la constrinjes de un salva finansial internasional.

Alexis Tsipras, la ministro xef, va es presente a un asembla per suporta la vota de "no" per oposa la constrinjes. Ma xefes de la Uni European ia averti ce un vota de "no" pote comensa la sorti de Elas da la eurozona.

La economia elinica es aora multe presada, car la pais ia perde resente se capasia de asede mone nova.

Bancos ia clui e on pone limitas a la retira de mone fisical. Alga bancos ia reabri per permete ce jubilores retira asta €120 per semana, e esta ia crea filos longa. On pote retira no plu ca €60 per dia de automatas.

Elas es ja en un state de nonprogresa con se creditores tra menses, ma lo ia anunsia la referendo sola en la semana pasada.

Un sonda oji publicida indica un vinse pico per la vota de "si" con 44,8%, contra "no" con 43,4%.

Ma on ave ancora la posible ce la referendo va es canselada. La corte suprema de la pais va judi sur la legalia de la referendo. Posible lo va deside ce la referendo desobedi la constitui.

La Consilio de Europa, promovente diretos umana, ia dise ja ce la referendo "no va sasia la normas internasional", car on no ia anunsia sufisinte temprana lo a votores, e car la linguaje de la demanda a cual la votores debe responde es multe nonclar.

6000 suportores de la Partito Comuniste Elinica ia protesta, recomendante ce votores desvalidi se votas.

A jovedi, la Reserva Monal Internasional ia comenta ce Elas va nesesa reseta €50 mil milion tra la tre anios seguente per stabli se finansias su la scema de salva. Lo ia ateni esta conclui ante la colasa de negosias entre Elas e se creditores a la fini de semana pasada, cuando la governa ia anunsia la referendo.

A martedi, la scema esistente de salva ia fini, privante Elas de asede a miles de miliones de euros, e la pais ia fali repaia €1,5 mil milion.

2015-07-02

Un prinse saudi va dona tota se mone a carita

Prinse al-Walid bin Talal, un bilionor saudi, ia dise ce el intende dona se ricia intera de $32 mil milion a un asosia carital.

La sobrino de Re Salman ave 60 anios e es un de la persones la plu rica de mundo.

El ia descrive se como inspirada par la Funda Gates, instituida par Bill e Melinda Gates en 1997.

El vole ce on usa la mone per "construi pontes per boni la comprende intercultural, developa comunias, dona potia a femes, capasi jovenes, furni aida esensal pos desastres, e crea un mundo plu tolerante e asetante".

Bill Gates ia loda la deside, descrivente lo como "un inspira a tota de nos ci labora en filantropia sirca la mundo".

Prinse Walid es la numero 34 en lista de la plu ricas en la jornal Forbes. La mone va vade a se organiza carital propre, Filantropias al-Walid, a cual el ia dona ja $3,5 mil milion.

La prinse, ci no ave un posto ofisial de governa, es la presidente de un compania de investi, Kingdom Holding, cual posese asiones en companias major, incluinte Fairmont (un compania de oteles lusosa) e Apple.

La prinse va dona se ricia personal. El ia dise: "Esta es multe separada de me asiones en Kingdom Holding."

En se anunsia, el ia ajunta: "Filantropia es un encarga personal cual me ia embarca a plu ca tre desenios ante aora, e un parte fundal de me crede muslim."

Se declara aveni en ramadan, la mense santa, cuando muslimes es corajida a carita e a aida persones povre.

La dona va es fada tra un cuantia de anios, e va es supravideda par un comite de fidusiores cual Walid va dirije.

2015-07-01

Plu ca mil prisonidas evade en Iaman

Sirca 1200 prisonidas, incluinte suspetadas de al-Qa'ida, ia fuji de un prison en Iaman sentral.

Scaramuxas ia aveni en la prison en la vila Taiz, en la montania, ante la evade.

Iaman esperia se crise la plu sever de multe anios, car fortes competente batalia per controla.

La pais ia cade en caos cuando rebelores huti ia obliga la presidente Abd Rabbuh Mansur Hadi a fuji a Aden e alora a Arabia Saudi.

On ancora no sabe como la prisonidas ia susede sorti.

Alga jornalistes sita un securior ci ia descrive un ataca a la prison par suportores de al-Qa'ida. Ma un otra ofisior ia dise ce la prisonidas ia fuji entre combates sever entre militias oposada.

La gardores de la prison ia abandona se postos pos scaramuxas entre rebelores huti e se oposores.

Esta es la numero tre de evades major par prisonidas en Iaman de pos la comensa de un campania airal, gidada par Arabia Saudi, contra la rebelores a 26 marto.