2014-03-01

Esta blog publici 1000 articles en du menses

Aora oji ia publici 1000 articles corta de novas, sin pausa, de pos se comensa a la dia ultima de la anio presedente. Esta article es la numero 1001.

La blog ia es creada como un manera nova de trova vocabulo ancora mancante en Lingua Franca Nova. On ia ajunta ja multe espresas a la disionario de la lingua.

Alga visitores ia ariva tra un lia en la article sur Lingua Franca Nova en la Wikipedia engles.

La blog va reposa aora per un mense, ma lo va recomensa en april.

On trova un vivente en un saco funeral

Funerores en la stato Mississippi en la SUA ia trova un om ancora vivente en un saco de corpo, an pos cuando on ia declara ce el ia mori.

Laborores ia prepara balsami Walter Williams en jovedi, cuando subita el ia move.

Un esaminor medical ia trova un manca de pulsa cuando on ia clama el a la casa de Williams en la site Lexington en la sera presedente. El ia declara ce Williams ia mori.

On ia clari ce cisa la pasmacer de la vea ia sesa tempora funsiona.

Un corte ungarian clui un scola cual separa enfantes romani

La Eglesa Catolica Elinica en Ungaria ia perde un caso importante, do los ia vole ce un scola prima resta abrida en un area xef romani.

Ativistes de diretos umana ia susede convinse la corte ce la scola separa enfantes romani de la majoria nonromani.

La scola es en Nyíregyháza, un site este. On ia clui lo con intende de desepara en 2007, ma lo ia reabri en 2011.

La judi pote afeta ance otra scolas ungarian cual es manejada o par eglesas o par la stato.

Turcia libri la fios arestada de ministros pasada

Autoriosas turces ia libri la fios de du ministros pasada de la governa, ante un prosede.

Barış Güler e Kaan Çağlayan ia es arestada en desembre. Los es entre desuples de persones ci on ia teni en un investiga de froda en relata a furni de servis a la governa.

La investiga ia coleri Recep Tayyip Erdoğan, la ministro xef, ci ia persepi lo como un conspira contra el.

El ia responde par desemplea multe polisiores e judores major.

Yanukovych promete batalia per Ucraina

En se apare publica de pos es desponeda como presidente en la semana pasada, Viktor Yanukovych ia promete batalia per la futur de Ucraina.

Parlante a jornalistes en Rusia, el ia dise ce on no ia suverti el, ma ce el ia es obligada de parti de Ucraina pos menasas a se vive.

En la problem la plu resente, Ucraina ia acusa soldatos rusce de saisi du airoportos en Crim. Moscva nega la acusa.

Vladimir Putin, la presidente de Rusia, ia esije ce Ucraina revade rapida a un state de normalia.