2018-12-18

Un xasor de servos es condenada a regarda Bambi

En la SUA, un xasor nonlegal ia es comandada a regarda la filma Bambi a multe veses, como un parte de sua condena per mata sentos de servos.

David Berry minor, de la stato Missouri, debe regarda la filma a minima un ves per mense en sua prisoni per un anio.

El ia es arestada en agosto con du membros de sua familia per mata la servos, prende sua testas e abandona sua corpos a putri. La caso es un de la plu grandes de xasa nonlegal en la istoria de la stato.

En ajunta a la condena de prisoni, la judor ia comanda Berry a “regarda la filma Bambi de Walt Disney, con la regarda prima a o ante 23 desembre 2018 e a la min un tal regarda en cada mense seguente".

La anima sur animales de foresta, creada en 1942, mostra la mata de la madre de Bambi, la servo eponim, par un xasor.

Un investiga tra un serie de menses e un serie de statos ia ave como sua resulta la aresta de Berry minor, sua padre David Berry major e sua frate Kyle Berry.

On no sabe la cuantia intera de servos nonlegal matada, ma un conservor ia dise ce lo pote es “alga sentos”.

Berry minor ia reseta un condena de un anio en la prison de Lawrence County pos confesa se como culpable de matas nonlegal de animales.

El ia reseta ance un condena de 120 dias en la prison de Barton County per un viole de regulas de sua libria oservada, car el ia posese un fusil. Ance, la Comision Conservante de Missouri ia cansela la diretos de xasa de el e sua padre per la resta de sua vives.

2018-12-17

Mexico inisia un projeta grande de ferovia

La presidente de Mexico, Andrés Manuel López Obrador, ia inisia la Tren Maia, un projeta aspirante per construi un ferovia tra sinco statos en la sude-este de la pais.

A un rituo nativa, prosima a la ruinas maia antica de Palenque, el ia dise ce la projeta va aida la crea de sentos de miles de empleas.

La ferovia va ave un longia de 1525 cilometres. Lo va lia Palenque a la vacanseria Cancún a la costa caribe.

Ma oposores averti ce lo risca dana la biosfera importante de la rejion. Un tri de la via projetada pasa tra jungla nondevelopada, e la posesores de acel tera, la popla maia, dise ce on no ia consulta los.

López Obrador ia pone la consernas de ambientistes a lado, prometente ce “nos no va desplanta an un arbor”.

On previde ce la projeta de cuatro anios va custa asta 7,4 mil milion dolares.

2018-12-16

La acorda de Katowice sur la acorda de Paris

Negosiores en Polsca ia ateni final un acorda sur medias diversa cual permete ce la acorda climal de Paris comensa opera en 2020.

Disputas sur mercatos de carbono ia menasa la confere de du semanas, e ia estende lo par un plu dia.

La delegadas crede ce la regulas nova va serti ce paises onora sua prometes de redui emetes de carbono. La acorda de Katowice intende reali la gol de Paris de preveni ce la temperatur global crese par plu ca 2°C.

La acorda ia es suscriveda par 196 paises. Lo defini un scema per regulas comun per tota paises, governante la detalias de redui emetes, finansiante nasiones plu povre, e sertinte ce cada pais fa lo cual lo debe.

Defini la regulas es un prosede multe tecnical, car paises ave frecuente scemas diferente per sua reduis de emetes.

Paises plu povre desira alga flexablia afin los no deveni inondada par regulas cual los no es capas de reali. La idea de culpablia legal per la causa de cambia climal es ja longa rejetada par nasiones plu rica, cual teme paias enorme en la futur.

La negosias ia es menasada par un nonprogresa entre Brasil e otra paises sur la regulas per monitori creditos de carbono. Brasil ia desira regulas plu debil sur mercatos de carbono, an contra un oposa forte par multe otra paises. On ia deside pospone esta discutes asta la anio veninte.

En la fini de semana pasada, siensistes e delegadas ia es xocada cuando la SUA, Arabia Saudi, Rusia e Cuait ia oposa dise ce la confere “bonveni” un reporta resente par la Nasiones Unida sur manteni la crese de temperatur su 1,5°C. La reporta ia indica ce la mundo vade en dirije a un crese plu simil a 3°C en esta sentenio.

Par compromete, la declara final de la confere ia bonveni la completi de la reporta e ia invita paises a usa lo.

2018-12-15

Persones es ferida en un desreli de tram en Portugal

Dudes-oto persones ia es ferida en Lisbon cuando un tram ia desreli e deveni inversada.

La plu de la feridas ia es prendeda a ospital pos la asidente ier, ma no person ia es en state grave.

La tram ia salta de la reles a un curva a basa de un colina presipe, e ia colpa un construida. Pasores ia salva un bebe de ses menses e un enfante de sete anios.

La asidente ia aveni a sirca 18:00 en la parte Lapa de la capital portuges. 26 persones ia nesesa es ospitalida, e du ia es tratada a la loca de la tram. Alga persones ia es ferida a sua peto o fas.

Un atestor ia dise ce el ia oia un pum e persones xiliante cuando la tram ia fali para a la angulo e ia desreli se.

La servis de crise ia responde par envia sirca 30 veculos per aida.

La compania operante la trames, Carris, ia confirma la desreli ma ia dise ce on ia ave sola feris “minor” a 28 persones. Lo ia dise ance ce lo va fa un investiga completa per determina la causa de la asidente.

2018-12-14

Un tempesta destruosa prosimi a Australia norde

En Australia, on averti sur un siclon potiosa cual vade en dirije a la costa de Queensland.

Siclon Owen move lenta supra la acua prosima a la Teritorio Norde, con ventas de asta 200 cilometres per ora. On previde ce lo va intensi e ateni la tera en la temprana de saturdi.

La servis de crise ia envia multe plu empleadas a vilas longo la via espetada de la tempesta.

Meteorolojistes previde ce la siclon va viaja de la Golfo Carpentaria a la costa este de Queensland, portante ventas destruosa tra sentos de cilometres de tera.

Partes de la stato va reseta asta 400 milimetres de pluve en la dias veninte. Deluvias subita e mareas de tempesta es prevideda. On recomenda ce abitores resta en casa.

Australia esperia frecuente un clima estrema, con inondas, tempestas de arena e periodos tro seca en alga rejiones.

En novembre, Queensland ia sufri focones savaje cual ia obliga evacua miles de persones.

2018-12-13

Un leopardo mata un monce meditante

Un monce ci ia medita en un foresta en la stato Maharashtra en Barat ia mori atacada par un leopardo.

La om, Rahul Walke, ia medita su un arbor en la foresta Tadoba, un conserveria de tigres. El ia parteni a un templo budiste en la foresta, ma ia pasea a un loca alga distante de lo per medita.

Ofisiores de la foresta dise ce los ia averti la monces contra vaga tro profonda en la conserveria.

Ma on intende aora catura la leopardo. Forestores ia prepara du cajes e un trapa fotografial, e va atenta calmi la animal.

Ofisiores de la stato ia dise ce la familia de Walke va reseta 1,2 milion rupis ($17 mil) de compensa.

Un monce de la mesma templo ia dise ce el ia vide la ataca de Walke par la animal cuando el ia visita sua loca de medita per dona comedas a la matina de ier. El ia vade per trae aida, ma cuando el ia reveni con otra persones, Walke ia es ja mor.

On estima ce 88 tigres abita la conserveria Tadoba. Lo conteni ance multe otra animales diversa, incluinte leopardos, ursos labiosa, ienas, e rateles.

2018-12-12

Un fusilor mata a un mercato de natal franses

Frans ia avisa un nivel masima de vijila, car la polisia xerca un fusilor ci ia spara a un mercato de natal en la site Strasbourg, en la este de la pais.

Tre persones ia es matada e des-tre ia es ferida, oto a grado grave.

La fusilor ia fuji, ma on reporta ce el mesma ia es ferida. El ave 29 anios e es conoseda a la polisia como un estremiste suspetada.

Sirca 350 polisiores es envolveda en xerca el, e la departe contrateroriste franses ia inisia un investiga.

La ministro de internas ia dise ce la pais ia fa un avisa de ataca urjente, tal estendente la potias de la polisia e creante la grado la plu alta de vijila.

El ia ajunta ce la controlas de frontera es fortida e ce la securia a tota mercatos de natal va es aumentada.

La maior de Strasbourg ia dise ce oji la mercato va es cluida e banderas a la ofisia de site va es basida a altia media.

2018-12-11

Du monces fura mone per fa juas de fortuna

Du monces fema ci ia labora en un scola catolica en California ia confesa fura sirca $500 mil per aposta en casinos en Las Vegas.

Mary Kreuper e Lana Chang ia prende la mone de un conta cual ia conteni paias per instrui e otra donadas. Los ia jubila resente.

Kreuper ia es xef de la scola tra 29 anios, e Chang ia labora como ensenior tra sirca 20 anios. On crede ce los ia fura la mone tra minima un desenio, per spende lo en viaja e juas de fortuna.

Ier, sua eglesa ia dise ce la monces ia espresa “un repenti profonda” sur sua atas. La organiza ia ajunta ce la polisia es informada, ma ce on no va fa acusas criminal contra la duple.

La ordina de la monces, la Sores de San Josef de Carondelet, ia declara: “La monces ia confirma la froda de mone e ia coopera en la investiga. Nosa comunia es consernada e tristida par esta situa e regrete cualce dana a nosa relata longa con la familias de la scola.”

La arcibispia de Los Angeles ia dise ce la eglesa ia descovre la manca de la mone en un esamina normal.

Lo pare ce la monces ia pote asconde sua atas par depone alga xeces, paiada a la scola, a un otra conta de banco cual la scola no ia usa.

2018-12-10

Trump promove carbon a la confere de clima

Representores de la Casa Blanca ariva oji a discutes climal en Polsca, ma los va promove la usa de carbon e otra combustables de fosil.

La consenta aveni con ce investores, ci maneja 32 milion milion dolares de ativas, urje la fini de la usa de carbon como fonte de enerjia. Entretempo, ministros de sirca 130 paises ariva per atenta dirije la discutes a un conclui susedosa.

Como a la asembla en Bonn en la anio pasada, la Casa Blanca de Trump desira mostra un suporta forte per combustables de fosil.

Longo un declara par la ministreria SUA de esternas, la aveni “va esibi metodos de usa combustables de fosil en modo tan limpa e nonperosa como possible, e ance la usa de enerjia nucleal sin emetes”.

La aveni en Bonn ia es disturbada par protestores cantante ci ia vole indica ce la promove de carbon e gas no es bonvenida.

On dise ce la declara par investores global, publicida en Katowice, Polsca, es la interveni la plu major par investores a la tema de temperatures altinte. Lo representa alga de la reservas la plu grande de mundo.

La supravidor de la Reserva Comun de Jubila de la Stato York Nova, ci es encargada con un reserva pensional de 207 mil milion dolares, ia comenta: “An con la politicas malgidada de la governa de Trump, laboras global continua per trata la menasa multe real cual la risca climal presenta a la economia, mercatos finansial e revenus de investi. Nos resta dedicada a suporta la goles climal de la Acorda de Paris.”

Un disputa major sur siensa ia eruta en la fini de semana e ia mali la relata entre alga delegadas en Polsca.

Negosiores de la SUA, Arabia Saudi, Rusia e Cuait ia refusa “bonveni” la reporta sur 1,5°C par la Comite Intergovernal sur Cambia de Clima, cual la majoria vasta de paises ia desira pone a la sentro de la negosias.

Esta disposa ia coleri rexercores e campaniores, ci ia descrive lo como “un nonsabe intendeda e un iniora nonasetable”.

Un oservor ia comenta: “La mundo ia vide la lansa de la reporta par la CICC, e on ia comprende ce nos nesesa fa plu, ata plu rapida e plu forte e plu rapida aora. La reata no va es bon si nos fali bonveni acel siensa.”

La ministros va atenta acorda la temas restante en la regulas per la Acorda de Paris. Ma on ave ance un senti ce los debe esede acel gol e ofre plu determina per ataca la problem.

2018-12-09

Pesos de un mosaica es redonada a Turcia

Fratos mancante de un mosaica antica, conoseda como la Xica Romani, es aora esibida en un museo en Turcia. Los ia es retraeda de la Statos Unida.

On esibi los prosima a la mosaica noncompleta de un xica joven, cual ia es creada a cuasi 2000 anios en la pasada.

Sua oios meamorable ia deveni un simbol de la site sude Gaziantep.

La pesos mancante ia es contrabandada de Turcia en la desenio de 1960 e comprada par un universia en la SUA, cual ia acorda final redona los.

Arceolojistes ia descovre la mosaica a 20 anios ante aora, cuando los ia escava la ruinas de la site Zeugma, fundida par un jeneral de Alexandro la Grande e destruida en la sentenio 3.

Ma an alora, alga pesos ia es ja furada e contrabandada a estra la pais. Los ia es comprada par la Universia de Bowling Green en la stato Ohio.

En 2012, Turcia ia solisita la reenvia de la pesos, e la redona ia es acordada pos sinco anios de negosias.

Ier, la pesos mancante ia deveni esibida en la Museo de Mosaicas de Zeugma en Gaziantep, la museo la plu grande de mosaicas en la mundo.

Fatma Şahin, la maior de Gaziantep, ia dise: “La Xica Romani es reunida con sua familia.”

2018-12-08

Un mision xines a la lado distante de la Luna

Xina ia lansa la mision prima per atera un veculo robotal a la lado distante de la Luna.

La mision Chang’e 4 va atenta pone un aterador e vagador sur la crater Von Kármán, locada a la lado de la Luna cual fasa nunca la Tera. Lo abri la via de retrae samples de roca e solo a la Tera.

La atera no va aveni asta la temprana de janero, cuando la veculo va desende usante puxadores.

La crater Von Kármán interesa siensistes car lo es situada en la cualia la plu vea e grande sur la Luna – la Basin Polo Sude / Aitken, probable formida par la colpa de un asteroide enorme a miles de miliones de anios ante aora.

La ateradores va analise la jeolojia de la rejion e la composa de la roca e solo.

Par causa de un fenomeno nomida “jira sincrona”, la Tera vide sempre la mesma lado de la Luna. Esta aveni car la Luna pasa esata la mesma tempo en jira sur sua propre ase como en completi un orbita de la Tera.

An si on refere comun a la otra lado como “la lado oscur”, acel parte de la Luna es ance luminada par la Sol e ave la mesma fases como la lado cual fasa nos. “Oscur” asi vole dise mera “nonvideda”.

La lado distante aspeta alga diferente de la lado prosima. Lo ave un crosta plu densa e vea, cual conteni plu crateres. On ave ance poca de la “mares” de basaltos oscur, creada par flues de lava, cual es tan evidente sur la lado prosima.

Cisa la colpa potiosa cual la crea la Basin Polo Sude / Aitken ia penetra la crosta, ateninte la litosfera de la Luna. La strumentos en Chang’e 4 pote esamina esce esta ia aveni, clarinte un parte de la istoria temprana de nosa sola satelite.

La mision va analise ance la “radioambiente” a la lado distante, en un esperimenta desiniada per fa la labora fundal per la crea de telescopios futur de radioastronomia a acel lado, do los ta es protejeda de la ruido de la Tera.

La aterador nonmovente va porta un contenador de tre cilogrames, con semes de patata e arabis, per un esperimenta biolojial. Esta esperimenta de “minibiosfera lunal” ia es desiniada par 28 universias xines.

La desinia de la veculo es simil a lo de sua presedente, Chang’e 3, cual ia envia veculos aterante a la rejion Mar de Pluves en 2013. Ma lo ave alga alteras importante.

La aterador porta du cameras: un esperimenta sur radia, construida en Deutxland, e un spetrometre cual va fa la oservas radioastronomial de frecuentia basa.

La vagador va porta un camera panoramal, un radar per sonda su la surfas, un spetrometre imajinte per identifia minerales, e un esperimenta per esamina la interata entre la venta solal (un flue de particulas enerjida de la Sol) e la surfas de la Luna.

La mision parteni a un program xines plu grande de esplora lunal. La misiones Chang’e prima e du ia es desiniada per colie datos en orbita, e la numeros tre e cuatro ia es construida per opera sur la surfas.

2018-12-07

Un stajior de Google distribui un anunsia vacua

A Google, un era en un eserse de instrui empleores ia causa la apare de un anunsia comersial falsa en un cuantia grande de apes e pajes de rede.

Un retangulo jala vacua ia es vidable en acel locas tra sirca 45 minutos a 4 desembre, ma sola per persones en la SUA e Australia.

La era ia aveni cuando stajiores ia aprende la sistem interna de Google per compra anunsias. Esta anunsia vacua ia es enviada car un stajior ia esede la intende e ia ajunta un comanda vera a la sistem.

La anunsia ia es ativida con taso de revenu multe plu alta ca cualce otra, e ia es dirijeda tra alga sistemes de otra companias, tal ateninte un popla vasta.

Google ia declara: “Direta cuando nos ia deveni consensa de esta era onesta, nos ia labora rapida per para la sirculi de la campanias.” Lo ia ajunta ce lo va reali cualce paias cual publicores ia incore par causa de la era.

On no ia clari la custa esata de la era, ma un jornal ia divina ce lo va fa ce Google paia sirca $10 milion per sasia publicores e desmarania la situa. La compania ia dise ce lo va institui plu controlas per preveni un repete de la problem.

2018-12-06

On discute pas per Iaman en Sveria

En Sveria, on comensa consultas de pas, suportada par la Nasiones Unida, per fini cuasi cuatro anios de gera interna en Iaman.

En ecipo NU va labora con delegas de la governa iamani e la rebelores huti a la castel de Johannesberg, prosima a Stockholm, en discutes nonformal cual va ocupa un semana.

La gera ia causa la crise umaniste la plu grave de mundo en tempo resente. Miles de persones ia mori en combate e miliones ia veni cuasi a state de mori par fami.

La consultas recomensa a la ves prima pos 2016. La atentas la plu resente per un pas negosiada ia colasa en setembre, cuando la hutis no ia apare en Geneve.

On no previde un avansa major par la discutes presente. La intende xef de los es preveni un batalia forte per Hudaida, un porto a la Mar Roja do miles de siviles es trapida, car la porto es ocupada par la rebelores.

La NU espera ance crea un armatur per discute la natur de un solve political futur en la pais.

2018-12-05

Un bebe nase pos transplanta de utero mor

Dotores ia revela ce un xica bebe ia nase par un utero transplantada de un corpo mor.

La opera de transplanta ia ocupa 10 oras e ia aveni en 2016 en São Paulo, Brasil, do on ia fa ance la aida de fertilia. La madre, ci ave 32 anios, ia nase sin utero.

On ia fa 39 transplantas de utero usante un donor vivente, incluinte madres ci dona sua utero a sua fia, produinte 11 bebes. Ma tota la 10 transplantas presedente de un donor mor ia fali o aborta.

En esta caso, la donor ia es un madre de tre enfantes a media de sua desenio sinco, ci ia mori par emoraje serebral.

La resetor ia ave un sindrom cual afeta sirca un fem en cada grupo de 4500 e preveni la formi normal de la vajina e utero. Ma sua ovarios ia funsiona, e dotores ia pote estrae ovos, fertili los con la spermas de la padre futur, e jela los.

La fem ia prende drogas per debili sua sistem imunial e preveni ce sua corpo ataca e rejeta la transplanta.

Pos sirca ses semanas, el ia comensa menstrui. Pos sete menses, la ovos fertilida ia es implantada. E pos un ensintia normal, un bebe de 2,5 cilogrames ia es parida par sesarea a 15 desembre 2017.

La xef de la rexerca, Dr Dani Ejzenberg de Hospital das Clínicas en São Paolo, ia dise: “La transplantas prima de utero de donores vivente ia es un monumento en medica, creante la posiblia de pari per multe femes nonfertil ci pote asede donores conveninte e la recursos medical nesesada. An tal, la nesesa de un donor vivente es un constrinje major, car donores es rara: tipal, los es familianes o amis volente e cualinte.”

2018-12-04

Un avocato defendente ia es un informor de polisia

La condenas de alga de la criminores major de Australia es aora dutada pos la desmasci de un avocato como un informor de polisia.

La avocato defendente, ci ia representa figures malfamosa de crimin organizada, ia dona informas a la polisia de Victoria entre 2005 e 2009. La governa de la stato ia anunsia un investiga publica per determina cuanto condenas ia es direta afetada.

La caso ia es revelada cuando restrinjes judal ia es sutraeda ier. Esta ia es la fini de un batalia de corte en cual, tra du anios, la polisia ia atenta preveni la esposa de la identia de la avocato a sua clientes. La Corte Alta ia deside contra la polisia.

En un judi despetosa, la corte ia dise ce la polisia de Victoria ia es culpable de “un condui odiable” par coraji la avocato a furni informas sur sua clientes.

La avocato, un fem ci on no pote nomi per razonas legal, ia representa figures major en la criminalia de Melbourne en un periodo de violentia aumentada de ganges. Un disputa violente cual ia prende a la min 28 vives en la site ia fini a plu ca un desenio ante aora, ma detetores dise ce un tensa resta ancora.

A cada dia, la avocato ia contata la polisia e ia reseta la nom sifral 3838.

Documentos mostra ce la polisia ia atenta preveni acusores de avisa la omes condenada sur la rol de sua propre avocato como un informor. Ma par causa de la deside par la Corte Alta de sutrae restrinjes sur la caso, criminores va reseta aora un letera sur la situa. Los va pote alora apela, e sua condenas va es cisa reduida o an canselada.

La xef de la polisia de Victoria ia defende ier la usa de la avocato como informor: “Melbourne ia es saisida par lo cual on conose aora como la geras de gang. La risca per la comunia a esta tempo ia es notable.”

El ia ajunta ce, en 2009, la polisia ia cambia sua modo de trata informores, e un aveni simil no ta es posible aora.

2018-12-03

La clima sta a un crus de vias

Cuatro persones major ci suporta laboras per limita la cambia de clima ia averti ce la planeta sta “a un crus de vias”, cuando un consenta importante ia abri en Polsca.

En un ata rara, cuatro presidentes pasada de esta confere, sponsorida par la Nasiones Unida, ia recomenda ata nonvasilante.

La consenta en Katowice es la plu importante sur la cambia de clima pos la acorda de Paris en 2015. Espertas dise ce la mundo nesesa redui estrema sua emetes si lo vole ateni la goles acordada en Frans.

Negosiores ia asembla per la confere a un dia plu temprana ca espetada, car on presa los a progresa.

Entretempo, la Banco Mundal ia anunsia 200 mil milion dolares de finansia tra sinco anios, per suporta paises cual ata contra la cambia de clima.

Esta confere de la partitos acordada es la prima cual ia aveni pos la apare en otobre de la reporta major par la Comite Intergovernal sur Cambia de Clima, cual ia discute la problem de limita la aumenta de temperatur global a 1,5°C.

Acel reporta ia dise ce per ateni la gol, governas va debe redui emetes de gases invernerial par 45% ante 2030. Ma un studia resente ia mostra ce aora la emetes de diosido de carbono alti denova pos un reposa de cuatro anios.

Ier, cuatro presidentes pasada de la confere ia publici un declara urjente. Los ia dise ce “atas desidente en la du anios veninte va es esensal”.

Ma la divide ia es nunca plu larga entre lo cual paises dise ce los fa e lo cual nesesa es fada.

29 xefes de stato e governa va presenta declaras a la comensa de la consenta. Esta cuantia es multe min ca en Paris a tre anios ante aora, cisa indicante ce multe regarda la confere como mera un punto longo la via e no un crus major.

Ma per Xina e la Uni European, la confere es multe importante. Los vole mostra ce la coopera internasional pote susede ancora, an en la eda de Presidente Trump.

2018-12-02

Gas lacrimojen contra protestores en jacetas jala

En Frans, en un fini de semana tre de protestas en “jacetas jala”, persones ia asende la Arco de Vinse en la sentro de Paris, e scaramuxas ia continua con polisiores de tumulta.

La polisiores ia spara gas lacrimojen, granadas aturdinte e canones de acua sur la Champs-Élysées, e protestores ia lansa misiles e ia ensende construidas.

A la min 110 persones ia es ferida, incluinte 17 membros de la fortes de securia, e on ia fa 270 arestas.

La protestas sur la imposta de carburante ia crese a un coleria jeneral sur la custa alta de vive. Emmanuel Macron, presidente de Frans, dise ce sua politica de carburante es nesesada per combate la caldi global.

Un person ia es state grave pos la destrui par protestores de un porton de fero a la jardin Tuileries, prosima a la museo Louvre. La porton ia cade sur un grupo de persones.

On ia fura ance un fusil de ataca de un veculo de polisia, ma lo no es clar esce lo ia es cargada.

La ministreria de internas franses ia dise ce, tra la pais intera, a la min 75 mil persones ia partisipa en la protestas la plu resente de jacetas jala. La protestas ave acel nom car la partisipores porta la jaceta de vidablia cual, par lege, es presente en cada veculo.

On ia estingui cuasi 190 focones, e ses construidas ia es ensendeda.

En la confere G20 en Buenos Aires, Macron ia responde ce la protestas “ia pertine en tota no modo a un esibi pasosa de un nonfelisia o noncontentia legal.” El ia ajunta ce la culpables no desira cambias, ma intende crea un caos.

2018-12-01

La mori de Bush major e la vive de la Obamas

George H W Bush, presidente pasada de la SUA, ia mori con 94 anios. El ia servi como la presidente 41 entre 1989 e 1993. Sua periodo ia es definida par la fini de la Gera Fria e par la gera prima contra Saddam Hussein en Irac.

An si el ia es min sana en anios resente, el ia susede ancora apare publica. En april, el ia vade a ospital con infeta de sangue, ma ia es desospitalida a pos. El ia mori a sete menses pos sua sposa, Barbara.

En un otra anunsia de la SUA, la autobiografia de Michelle Obama, dama prima pasada, ia deveni la libro la plu bonvendeda en la pais en esta anio, a sola 15 dias pos sua publici. On ia vende plu ca du milion copias en la SUA e Canada, e la publicor dise ce lo es bonvendeda ance en multe otra paises.

La libro es un fenetra a la vive personal de la Obamas ante, tra e pos sua tempo en la Casa Blanca. Sra Obama revela difisiles en sua sposia con Barack, detaliante como los ia sufri un aborta natural e ia usa la fertili en vitro per consepi ambos sua enfantes.

Sra Obama ance critica Donald Trump, la presidente presente, scrivente ce el pote “pardona nunca” Trump per “risca la securia de mea familia” sur sua defende forte de la teoria ce Sr Obama no ia nase en la SUA e donce no ia es un presidente valida de la pais.

2018-11-30

Cameras deteta enganiores en un duimaraton xines

Cuasi 250 corores en un duimaraton ia es descovreda como enganiante par cameras de trafica, cual ia rejistra sua usa de un via rapida tra arboretas.

La organizores de la corsa en Shenzhen, Xina, ia trova ance 18 partisipores ci ia porta numeros falsa e tre corores descriveda como “finjores”. Tota la 237 persones ci ia froda es aora proibida de corsa en maratones.

“La core de maraton es no mera un eserse, lo es un metafor per la vive, e cada coror es encargada per se,” la organizores ia comenta.

Imajes caturada par cameras de polisia ia mostra corores ci ia pasa tra arboretas a un otra strada visina, en loca de continua longo la via coreta e turna a la fini.

La enganiores ia core tra du o tre cilometres min ca la distantia completa de 21 cilometres.

Esta corsa aveni anial en la site cuatro de la plu grandes en Xina, e lo atrae tipal sirca 16 mil partisipores.

La reportas de la engania ia provoca la jornal Dial de la Popla, un de la publicis la plu grande en Xina, a urje corores a “respeta la maraton e respeta la spirito de sporte” en un editorial.

En la anio pasada, organizores de la duimaraton de Beijing ia introdui un sistem de reconose fases, per preveni ce persones sustitui otras per core per los.

Xina ia aveni 1072 maratones e otra corsas de strada en esta anio. Esta cuantia es plu par 22 ca en 2011, longo la Asosia de Atletisme Xines.

2018-11-29

Israel presenta un masca neolitica

La Autoriosa de Anticas Israeli (AAI) ia revela un masca de petra cual ave 9000 anios.

La ojeto ia orijina en la area sirca Hebron en la sude de la Riva Ueste ocupada. Lo ia es fabricada de arenito ros e jala en la eda neolitica.

On reporta ce lo ia es reganiada de furores en la parte plu temprana de esta anio, ma la detalias es ancora nonclar.

Lo es multe naturin. On pote vide fasil la osos de jena e la nas.

Arceolojistes divina ce lo ia es cisa portada en la adora ritual de asendentes. Bucos forada en sua lados sujesta ce lo ia es cisa ance pendeda per esibi.

En un declara, la AAI ia dise ce la masca veni de un tempo cuando xasores-coliores ia comensa cultiva la campos e doma la bestias, “acompaniada par un cambia en strutur sosial e un aumenta grande en ativia ritual o relijiosa”.

La masca es un de sola 15 similes en la mundo. Des-tre es en colies privata, cual difisili la studia de los. On va presenta oji la resultas de un studia inisial de esta masca a la Museo de Israel en Ieruxalim.

2018-11-28

Un siensiste altera la jenom de bebes

Un siensiste xines, ci dise ce el ia crea la bebes prima de mundo ci es jenetical alterada, ia defende sua labora.

Parlante a un confere sur jenomes en Hongkong, He Jiankui ia dise ce el es “orgulosa” sur sua labora, ajuntante ce “un plu ensintia posible” es ja en sua grado temprana.

On no ia serti la reclama en modo nondependente. Multe siensistes ia condena la anunsia, e alga ia descrive la idea como monstrin. Tal laboras es proibida en la plu de paises.

La Universia Sude de Siensa e Tecnolojia en Shenzhen, do He labora, ia dise ce lo no ia conose la esiste de la projeta e va fa un investiga.

Plu temprana en esta semana, He ia anunsia ce el ia altera la ADN de embrios – xicas jemelo – per preveni ce los reseta VUI (la virus de imunodebilia umana). En un video, el reclama ce el ia elimina un jen nomida CCR5 per fa ce la xicas deveni plu capas de resiste la virus.

Sentos de siensistes xines ia suscrive ja un letera en redes sosial per condena la rexerca.

Oji, He ia parla publica a la ves prima pos la video. El ia revela ce la du xicas, nomida Lulu e Nana, “ia nase normal e sana”. El ia dise ance ce on intende monitori la jemelos tra la 18 anios veninte.

El ia esplica ce oto duples, de padres seropositiva per VIU e madres seronegativa, ia suscrive volente per la esperimenta. Un duple ia sesa partisipa plu tarda. La siensiste mesma ia finansia inisial la esperimenta.

La altera de jenes ta aida cisa evita maladias eritable par sutrae o cambia codigos problemosa en embrios. Ma espertas averti ce interferes con la jenom de un embrio ta pote dana no sola la individua ma ance jeneras futur cual erita la cambias.

2018-11-27

Un misionor matada par un tribu noncontatada

Ofisiores barati ia pospone sua laboras per retrae la corpo de un misionor esuan ci ia es matada par un tribu perilida en la Isolas Andaman en la semana pasada.

John Allen Chau, de 27 anios, ia es matada par flexas cuando el ia atera sur la Isola Sentinel Norde a 17 novembre. El ia desira converti la tribu a cristianisme. Sua corpo es ancora sur la isola, e atentas per retrae lo ia fali.

La tribu sentineles es un popla noncontatada ci reata violente a stranjeres. Los es protejeda par lege.

Un ofisior anonim ia clari la deside de para la xerca per la corpo, disente ce la taxe “es tro riscosa” e car “protestas” ia es fada par grupos diversa.

Ier, Survive Internasional, un organiza promovente diretos, ia recomenda para la xerca car lo es “noncredable perilosa” per e la sentineleses e la ofisiores. Sua dirijor ia comenta: “Tal laboras en casos simil en la pasada ia fini con ce la sentineleses atenta defende violente sua isola.”

Ance antropolojistes e rexercores barati ia espresa sua ansia ce ecipos visitante la isola ta aumenta cisa la problem.

En la dias la plu resente, polisiores ia usa un barco e un elicotor per veni prosima a la isola, pos la rejistra de un caso de omiside cual los debe investiga. Ma car la tribu es protejeda, la polisia no sabe un bon modo de continua.

En 2006, la sentineleses ia mata du pexores barati ci ia atenta atera furtiva sur la isola. Pos alga atentas, la governa ia pote retrae sola un de la corpos. La otra resta ala enterada.

La atenta la plu resente per retrae la corpo de Chau ia aveni a la fini de semana, cuando un barco polisial ia viaja asta sirca 400 metres de la costa. Usante binoculos, polisiores ia vide omes de la tribu sur la plaia, armada con arcos e flexas. La barco ia parti.

Ses pexores ci ia transporta Chau a la isola ia es arestada.

On proibi an la prosimi par stranjeres a la isola, per proteje la popla abitante e sua modo de vive. Car la popla es completa isolida, contatas con la mundo esterna ta perili los, car lo es probable ce los ave no imunia contra maladias comun como la gripe e la morbilio.

2018-11-26

La UE aproba la acorda per la sorti de la RU

Xefes de la Uni European ia aproba ier un acorda sur la retira de la Rena Unida (RU) e relatas futur, insistente ce lo es “la sola acorda posible, e la plu bon”.

Pos dudes menses de negosias, la 27 xefes ia aproba la acorda pos min ca un ora de discute. La acorda nesesa ancora es aprobada par la parlamento de la RU, ma la UE ia dise ce lo ofre un modo de “retira ordinada”.

Parlante en Bruxelles, Theresa May, ministro xef de la RU, ia urje tota persones a uni sur la acorda, declarante ce la popla brites “no desira spende plu tempo en disputa sur Brexit”.

La Rena Unida va retira se de la Uni European a 29 marto 2019. La UE ia validi ofisial la reegulas per esta en un consenta corta, fininte negosias cual ia comensa en marto 2017.

Jean-Claude Juncker, presidente de la Comision European, ia dise ce si cualce person en Britan opina ce la bloco va ofre regulas plu bon si parlamentores rejeta la acorda, acel person va es “deludeda”.

Ma la presidente de la Consilio European, Donald Tusk, ci ia anunsia la acorda en Twitter, ia indica ce el no va divina sur lo cual ta aveni en un tal situa, disente: “Me no es un clarvidente.”

On previde ce la parlamento RU va vota sur la acorda a 12 desembre, ma lo no es serta ce esta va aproba lo.

A un confere jornaliste en Bruxelles, May ia dise ce la acorda va fini la direto de viaja "en modo completa e per sempre", va proteje la unia constitual de la pais, e va garantia ce un reveni a "leges preparada en nosa pais par politicistes democrata elejeda, interpreteda e enforsada par cortes brites".

El ia ajunta ce la acorda no va sutrae Jibraltar de la "familia RU", en refere a un disputa resente con Espania sur acel teritorio.

On ia aproba vera du cosas. La un es la acorda de retira, un documento legal de 599 pajes cual presenta la regulas de la retira de la RU. Lo clari la paia nesesada, la diretos de sitadanes e un garantia de manteni la frontera entre Er e Er Norde.

La otra es un declara political cual defini la relata posible entre la Rena Unida e la Uni European a pos, resomante como comersia e securia va funsiona.

On ia ave no vota formal ier, e la UE ia prosede simple par acorda jeneral. Juncker ia dise ce lo es "un dia triste" e ce nun debe "leva vitros de xampania" a la idea de la retira.

2018-11-25

Nijeria: la presidente responde pos un ataca islamiste

La presidente de Nijeria ia promete clui la fesures organizal cual ia permete la mata de desuples de soldatos par ativistes djihadiste a un base en la stato Borno, en la norde-este de la pais.

Muhammadu Buhari ia parla ja publica sur la ataca en la soldi pasada, pos cuando la armada ia confirma ce lo ia aveni.

On ia reporta ce minima 40 soldatos ia mori cuando un grupo islamiste ia ataca la base en Metele. La armada ia refusa confirma esta asta venerdi, cuando los ia publici un declara disputante la cuantia de mores, ma indicante no otra cuantia.

Buhari ia dise ce el es profonda xocada par la novas, en sua declara ier.

La presidente, ci va fronti un vota publica pos tre menses, ia ajunta ce no presidente fidable “ta reposa sur sua remos per permete ce teroristes perili la vives de sua empleadas militar e otra sitadanes”. En resulta, el intende consenta con xefes de la militar e de securia “en la dias veninte” per deside sua “pasos seguente”.

Buhari ia veni a sua posto en 2015 pos promete vinse la ativistes de Boko Haram, ci ia turba la pais par un onda de atacas per atenta suverti la governa e crea un pais muslim. Ma an si la armada ia recatura la plu de la teritorio cual la ativistes ia controla, estas es ancora capas de reali atacas matante.

En sua declara, publicida a la sera de venerdi, la armada confesa ce lo opera en “un eda difisil”. Esta comenta velida pare indica ce la armada esperia problemes grande en sua combate contra la djihadistes.

2018-11-24

Un scola en Brasil gania un premio arcitetal

Un scola abitada per enfantes nonvantajida en un parte distante e forestosa de Brasil ia gania la premio de esta anio per la construida nova la plu bon de mundo.

La compleso Vileta de Enfantes, cual casi 540 enfantes, ia reseta un premio internasional per eselentia en esta semana. Lo es situada en un cultiveria ensircada par foresta pluvosa en la stato Tocantins.

La construida es xef composada de lenio colida e conteni tre patios de jardines desiniada. La dormerias ensirca la jardines, e cada es distinguida par un panel de porte con un motif unica.

La salas es ventida con brices perforada, fabricada par mano en la compleso mesma, e los conteni mobilas spesial preparada. Un serie de scaleras de lenio scultada lia a la nivel alta de paserias e balcones, de do on pote regarda la patios e la compleso intera.

La judores de la premio ia loda la strutur per sua “eroisme umil”. Lo ia es desiniada par Aleph Zero e Rosenbaum, du companias de arcitetores.

Gustavo Utrabo, ci labora a Aleph Zero, ia dise ce la construida “boni la cualia de vive de la enfantes”. El ia ajunta: “Nos ia atenta crea un senti nova e un interprete contempora de la modos tradisional de construi en esta parte de Brasil.”

2018-11-23

Pexes xines mori par causa de un ponte nova

En Xina, lo pare ce la construi en un zona de ecoturisme ia causa la mori de 6000 sturiones estrema perilida.

Un ponte en la provinse Hubei ia es en construi, prosima a un cultiveria a la rio Yangzi do on eleva la pexes. Aora, tota labora ia sesa en cuando on investiga. Un pajeria de novas xines ia reporta ce la moris ia es “direta liada a la xocas, ruidos e cambias de fontes de acua”.

Como spesie, la sturiones xines esiste ja tra plu ca 140 milion anios. Pexes individua pote crese asta longia de 5 metres e pote vive tra asta 60 anios, ma los ovipari a sola un pico de veses en acel tempo.

La spesie es cuasi estinguida en natur par causa de contamina, tro multe pexa (car on vende la carne e ovos como comedas), e cambias a la ambiente. Per esemplo, pararios idroeletrical vasta traversa aora la Yangzi, preveninte la pexes de visita sua locas de ovipari.

En la desenio de 1970, Xina la inisia un program de eleva per salva la spesie, e on crede ce sirca mil sturiones adulte esiste aora en la pais.

La cultiveria Hengshang, prosima a Jingzhou, ia es un parte esensal de esta program. Ma de la comensa de la anio, on ia reporta la mori de plu ca 6000 sturiones bebe ala, como ance de 36 pexes con eda de 20 anios o plu.

On sabe ce la pexes es multe sensosa a ruido e disturba, e jornalistes sita ofisiores de la cultiveria ci ia dise ce la pexes ia es angusada par la construi prosima, an saltante de la acua a veses.

Un siensiste de pexeria ia comenta ce la adultes ci ia mori ia es “estrema valuosa”, car los ia desende direta de sturiones savaje.

La ministreria de cultiva e campania ia investiga e ia descovre ce la construi de la ponte ia intrui nonlegal a un conserveria natural. Un ofisior de la ministreria ia indica ce cualce person, sur ci on ta judi ce el es culpable, va es litigada su la lege de pexerias.

2018-11-22

Un tempesta major de polvo en Sydney

Tra la sude-este de Australia, un tempesta grande de polvo ia orani la sielo e ia crea ansia sur la cualia de aira.

On ia fa un avisa publica sur sania per oji en Sydney cuando la banda de polvo, con largia de 500 cilometres, ia ateni la site e ia retarda aviones. Multe otra rejiones en Cimri Sude Nove ia esperia ance un mal vidablia.

La tempesta es produida par la menove de tera seca par ventas forte, malida par un periodo seca cual afeta ja la stato intera de agosto.

Paramedicistes ia dise ce desuples de persones ia reporta difisiles de respira o disturbas asmica, ma la cuantia vera de persones afetada par polvo no es clar.

En Sydney, la polvo ia oscuri la sielo e ia causa indicas de aira “perilosa” en alga suburbes. Ofisiores de sania ia recomenda ce abitores local resta en sua casas, spesial enfantes, veas e persones con disturbas respiral.

On ia compara la tempesta a un aveni simil ma plu intensa cual ia covre la site en 2009. Acel tempesta ia lasa sentos de persones con problemes de respira, e ia preveni la vola de aviones.

2018-11-21

Presidentia de Interpol: Rusia vinseda par Corea Sude

La organiza internasional de polisia criminal, Interpol, ia eleje Kim Jong-yang de Corea Sude como sua presidente nova, rejetante la competor favoreda rusce ci es acusada de malusa la sistem de aresta.

Kim ia es elejeda par la 194 statos membros de Interpol a un consenta de sua congresa anial en Dubai. Membros ia deveni consernada ce Aleksander Prokopchuk, la aspiror rusce, ta usa la rol per ojeti oposores de presidente Putin.

La eleje segue la desapare de Meng Hongwei, la presidente pasada de Interpol, ci ia desapare en un viaja a Xina en setembre. Beijing ia confirma ce Meng es detenida e investigada sur alegas ce el ia aseta sobornas.

Kim, ci ia labora ja como presidente tempora, va completi la du anios restante de la periodo de Meng.

Prokopchuk es un veteran de la ministreria rusce de internas. Cuando el ia es la xef de la ofisia de Interpol en Moscva, on ia acusa ce el ia malusa la sistem de “avisas roja” (comandas internasional per aresta) contra criticores de la Kremlin.

Grupos rusce per diretos umama, como ance ofisiores de otra paises, ia comensa teme ce Moscva ta usa la posto de xef de Interpol per elimina sua oposores political.

Un grupo de senatores esuan ia dise ce la eleje de Prokopchuk ta es “simil a encarga un volpe con la casa de gales”, e un criticor major de la Kremlin ia compara la idea a “dona la controla a la mafia”.

Lietuva, cual ia regania sua autonomia de Rusia cuando la Uni Soviet ia colasa e es aora un membro e de OTAN e de la UE, ia menasa an esclui se de Interpol si on ta eleje Prokopchuk.

2018-11-20

Gera iamani: batalias recomensa a un porto major

Batalias ia recomensa en la site Hudayda en Iaman, an pos cuando la alia militar e la rebelores huti ia acorda para sua atacas. Aviones aliada ia bombi denova pos scaramuxas entre la rebelores e la fortes progovernal.

La Nasiones Unida atenta revive discutes per fini un gera de tre anios cual ia causa un crise umaniste grande. La gera ia mata miles de persones e ia fa ce plu miliones de iamanis mori cuasi de famia.

En la semana pasada, la alia, gidada par Arabia Saudi e la Amirias Arabi Unida, ia comanda un sesa a sua atacas contra Hudayda, un porto a la Mar Roja. La alia suporta ance la discutes gidada par la NU. La hutis ia fali apare a negosias de pas en setembre.

Esta violentia nova va impedi la labora internasional per fini la gera continuante. La porto es esensal per cuasi du tris de la popla de Iaman, cual depende forte de emportas de comedas, carburante e medisin.

La gera ia comensa en 2014, cuando la hutis, un promove relijial de rebelores armada, ia esplota la debilia de la presidente e ia saisi la controla de la provinse Sada e partes visina en la norde de Iaman.

A pos, la hutis ia catura la capital, Sana, obligante ce presidente Abdrabbuh Mansur Hadi esclui se a estra la pais.

En marto 2015, la gera ia deveni multe plu sever. Arabia Saudi e oto plu statos arabi, xef de islam suni, e suportada par la SUA, la Rena Unida e Frans, ia inisia atacas airal contra la hutis, intendente restora la governa de Hadi.

2018-11-19

Macron: Europa debe uni contra “caos global”

La presidente franses, Emmanuel Macron, ia recomenda relatas plu prosima entre sua pais e Deutxland, disente ce Europa “ave la obliga de no lasa ce la mundo lisca a caos”.

El es en Berlin per la dia anial de lamenta per vitimes de gera. En sua parla a la parlamento deutx, el ia dise ce Europa debe no “deveni un jueta de potias grande”.

Macron desira un Uni European plu integrada, con bujeta compartida tra la eurozona. El desira ance la suporta de Deutxland per un armada european, sur cual el ia dise ce lo ta redui la depende esuan de la bloco, e per un imposta nova a la companias jigante de tecnolojia de interede.

La canselor deutx, Angela Merkel, ia espresa sua suporta inisial per alga de esta ideas, ma otras es controversa en Berlin.

La xef de Frans ia refere a fortes nasionaliste “con no memoria” e ia urje fortes progresiste a uni en un mundo nonserta.

“On ave tro multe potias cual vole impedi nos,” el ia dise, “cual interfere en nosa debates publica, ataca nosa democratias libraliste, e atenta fa ce nos oposa lunlotra. E en esta ordina global, cual nos debe trata multe seria, nosa fortia – nosa fortia vera – es trovada en unia.”

La presidente de la SUA, Donald Trump, ia es provocada a un arenga de tuitas par comentas simil fada par Macron a un semana ante aora, cuando la xef franses ia descrive nasionalisme como “un tradi de patriotisme” en onora la fini de la Gera Mundal Prima.

Macron ia reconose ce la unia pote es “asustante”, e ta implica ce la nasiones ta combina sua reservas finansial e sua prosedes de deside. Ma el ia demanda: “Esce lo es plu bon ce nos resta fisada en un rua sin sorti?”

La xefes franses e deutx ia consenta per discutes pos la parla de Macron. Los ia intende discute la migra, la coopera per defende, e strutures de imposta per companias dijital. On previde ce oji la du paises va desveli un scema limitada per un bujeta juntada per la eurozona.

Merkel ia dise a Macron: “Tu ia clari en un parla impresante ce la amia e coopera deutx-franses es tan importante, e ce lo jua un rol en la contesto european. Tu ia dise ce nos sta a un crus de vias, e esta es esata lo cual me persepi. Los de nos ci ia nase pos la gera es encargada con la lesones cual nos ia aprende.”

Merkel, ci ia governa Deutxland tra 13 anios, ia declara resente ce el no va aspira continua como la xef de sua partito.

El intende completi sua periodo cuatro como canselor, cual va fini en 2021, ma alga comentores crede ce el va deveni cisa desponeda ante alora par disputas interna en sua partito o en la alia governante plu vasta cual el dirije.

2018-11-18

Arjentina "no ave recursos" per leva un sumarina

On ia trova la ruina de un sumarina arjentina cual ia desapare con 44 ecipores en la Mar Atlantica. Ma la ministro de defende ia dise ce la pais "no ave la recursos" per leva lo.

La San Juan ia deveni mancante a 430 cilometres de la costa de Arjentina en 15 novembre 2017, e ia es retrovada pos un anio e un dia. Lo reposa a 900 metres su la surfas.

Relatadas de la ecipo esije aora ce la governa leva la ruina.

La sumarina ia implode. Sua casco es completa desformida e colasada, e detrito es sperdeda tra un area de sirca 70 metres.

Lo ia es trovada par un compania privata esuan cual pote mapa la fondo de mar. Arjentinaes fada ia emplea la compania pos la fali de un labora internasional per trova la barcon.

En pasada, la compania, cual usa vagadores suacuan, ia atenta trova la ruina de la avion malaisian perdeda MH370, ma sin susede.

La descovre de la San Juan ia aveni a la dia pos un rituo sombre per relatadas recordante sua amadas. Presidente Mauricio Macri ia es presente, e ia promete manteni la xerca per la sumarina.

Un ofisior marinal ia dise anonim: "Leva la sumarina a la surfas no es nonposible, ma lo es un opera multe complicada, e donce multe custosa."

La causa de la implode de la barcon es ancora nonclar, e la familias de la vitimes desira un investiga nondependente.

2018-11-17

Focon savaje en California: mil persones manca

En California, SUA, plu ca 1000 persones es reportada como mancante en un focon savaje cual ia destrui miles de casas e ia mata a la min 71 persones.

On ia averti ce alga de los en la lista de asentes es cisa en bon state, ma mera nonconsensa ce on atenta trova los, o noncapas de telefoni. Ma, egal, un person ta pote es mor sin ce cualcun ta comprende ce el manca.

La focon es la plu matante en la istoria de la stato. Lo ia destrui ja 57 000 ectares, incluinte la plu de la vila Paradise, do 27 000 persones ia abita. Laborores de salva, aidada par canes, ia continua ier esamina la restas de la vila.

En soma, on ia evacua 47 000 persones. Alga de los ci ia fuji es aora casida en refujas de crise. Otras campa, o abita con sua amis o familia.

Presidente Donald Trump va visita oji California per regarda la dana e encontra persones afetada.

La departe de pompores dise ce lo ia preveni aora la sperde de sirca 50% de la focon, ma no espeta completi la controla de lo asta la fini de esta mense.

On batalia ance otra focones simil, ma min grande, incluinte un cual es prosima a San Francisco e un otra prosima a Los Angeles.

La dirijor de la Ajenteria Federal per Maneja de Crises ia descrive la dana a Paradise como “un de la desastres la plu mal” cual el ia vide en sua vive. Ofisiores dise ce Paradise va nesesa alga anios de reconstrui completa.

Investigas continua, e on ancora no ia confirma la causa de la focones. Ma alga persones litiga ja un compania local de eletrica, alegante ce la focon grande ia ensende cuando un cable transmetente de tensa alta ia fali.

Istorial, la saison de focones savaje en California ia comensa en estate e ia continua asta la temprana de autono. Espertas averti ce on ave aora un risca de los tra la anio intera.

Umidia basa, ventas calda e tera seca pos un mense sin pluve ia combina per produi un ambiente en cual focones pote aveni e sperde rapida.

2018-11-16

Gidores de Cmer Roja es culpable de jenoside

A la ves prima, on ia judi ce du xefes de Cmer Roja, la rena cruel en Camputxa, es culpable de jenoside.

Nuon Chea, ci ave aora 92 anios, ia es la suordinada de la xef major Pol Pot, e Khieu Samphan, ci ave 87, ia es de xef de stato. Los ia es litigada a un corte suportada par la Nasiones Unida, sur acusas de mata muslimes txam e persones ci es etnical viet.

La judi de culpablia es la deside ofisial prima ce lo cual la rena ia fa ia es un jenoside, como definida par leges internasional.

On crede ce asta du milion persones, de ci la plu ia es etnical cmeres, ia mori en la rena corta e sistemin barbar de Cmer Roja entre 1975 e 1979.

Car la matas plu vasta de la popla camputxa no cabe a la defini streta de jenoside en leges internasional, aceles ia es prosededa como crimines contra umanas, en loca.

La du omes, ci es ja en prison per sua vive intera par causa de sua crimines contra umanas, ia reseta aora un plu condena a prisoni eterna. Los es du de sola tre persones condenada en la esiste de esta corte, nomida la Cambras Estracomun de la Cortes de Camputxa.

2018-11-15

Rohingias teme ce on va reenvia los a Miama

On ave teme e confusa en campas de refujadas par causa de nonsertia sur esce Bangladex va reenvia rohingias a Miama. La autoriosas ia dise ce los intende move oji la grupo prima, ma lo no es clar esce esta va aveni.

La Nasiones Unida e grupos per diretos umana ia dise ce on debe obliga nun a revade, car la situa en Miama no es secur.

Plu ca 700 mil muslimes rohingia e otra persones ia fuji a Bangladex en la anio pasada. Los ia fuji de violentia e atas militar en la ueste de la provinse Rakhine.

La NU ia dise ce on debe investiga ofisiores miama major e litiga los sur jenoside par causa de esta atas, sur cual la armada dise ce los ia ojeti sola ativistes violente.

Sirca 300 mil rohingias ia fuji ja Miama pos ondas plu temprana de violentia comunial.

La plu de la refujadas abita en state simple en campas estendosa, prosima a la site Cox's Bazar a la frontera bangla. Miama e Bangladex ia acorda ce on debe gradal reenvia los a Miama, e miles de persones es ja aprobada par Miama per esta prosede.

Esta ia provoca un panica entre la refujadas. En Miama, multe de los ia sufri violentia, ia perde membros de sua familias, o ia esperia la arde de sua casas.

La rohingias muslim es un de la multe minorias etnical en Miama. La pais es xef budiste, e la autoriosas ala regarda los como migrores nonlegal, privante los de sitadania e otra diretos. Tra multe anios, la NU ia alega multe maltratas de diretos umana, incluinte matas caprisal, viole sesal, e arde de imobilas.

En la anio pasada, la militar miama ia inisia medias forte en Rakhine, pos cuando ativistes rohingia ia fa atacas matante contra polisierias. Pos alora, a la min 700 mil rohingias ia fuji a Bangladex, pais visina.

La armada miama ia desculpa ja se de malcondui e ia rejeta la alegas. Aung San Suu Kyi, la xef nonmilitar de Miama par fato, es presente en Singapor per un confere internasional.

El es internasional criticada per lo cual promovores de diretos umana descrive como sua fali de oposa la ativia militar contra la rohingias.

2018-11-14

On proposa ce bancos sentral ta furni mone dijital

Christine Lagarde, la xef de la Reserva Monal Internasional, ia dise ce bancos sentral tra la mundo debe considera la furni de mone dijital. Parlante en Singapor, el ia dise ce esta ta forti la securia de intercambias dijital.

Paias par mone nonfisical ia multipli tra la anios, creante defias per governas e bancos sentral. Regulores ia espresa sua consernas sur mone dijital e ia recomenda un supravide aumentada.

"La vantaje es clar," Lagarde ia dise. "Paias ta es direta, secur, barata e cisa semianonim. E bancos sentral ta reteni un funda solida per paias." El ia ajunta ce bancos sentral en Canada, Xina, Sveria e Uruguai "considera seria" la proposas sur mone dijital.

La encarga de mone virtual, si furnida par un banco sentral, ta parteni a la governa, como lo de mone fisical, e no a un compania privata. Esta ta aida consumores par fa ce intercambias deveni plu secur e plu comun, e donce min custosa.

"Si on servi plu persones, la servi es plu barata e plu usosa," el ia nota. "Companias privata pote investi tan poca a securia ce los no mesura completa la custa sosial de un fali de paia."

El ia dise ce, an si la favore a mone dijital "no es universal", on debe investiga lo en modo "seria, atendente e creosa".

On ia loda la tecnolojia cual suporta mone dijital car lo ia rapidi intercambias finansial e ia redui custas. Ma la anonimia de comersia con sistemes como Bitcoin ia ansi regulores.

En pasada, Lagarde ia dise ce criminores e teroristes usa tal criptomones par causa de la la anonimia cual los ofre. E la governor de la Banco de England ia dise ce on debe regula la criptomones per combate ativia nonlegal e proteje la sistem finansial.

2018-11-13

Un focon cisa criminal en un scola ugandan

A la min des persones es mor e desuples es ferida pos un ataca, sur cual on alega ce lo ia es un ensende criminal, contra un dormeria en un scola abitada per xicos en Uganda sude.

La focon ia comensa en la temprana de la matina de lundi, en un bloco cual ia casi desuples de studiantes de la Liseo San Bernard en la distrito Rakai. La portes de la dormeria ia es securida, e desuples de persones ia es trapida a la interna.

La ensenior xef de la scola, Henry Nsubuga, ia descrive la focon como "un ata odiable".

Tre persones, incluinte un gardor de scola, ia es arestada par la polisia per interoga. Dudes studiantes es en state estrema grave en ospital, e ofisiores averti ce la cuantia de mores va crese cisa.

On investiga esce studiantes escluida ia es envolveda en la ensende alegada.

Persones visina desperante ia atenta estingui la flamas, usante arena, acua e brices, ma sua labora ia es complicada par la portes clavida e par un fuma densa en la construida.

Rakai es situada a sirca 280 cilometres a sude de Kampala, la capital de Uganda, prosima a la frontera con Tanzania. Alga ofisiores major de la governa, incluinte la ministros de educa e securia, ia viaja a la scola pos la focon.

2018-11-12

Sento anios pos la autonomi de Polsca

Folas vasta ia selebra la aniversario sento de la autonomi de Polsca, ma con controversia sur un deside de inclui grupos estrema destriste.

Nasionalistes ia es entre plu ca 200 mil persones partisipante en un prosegue en la capital, Warszawa, gidada par presidente Andrzej Duda. Partitos oposante ia boicota la aveni.

A la mesma tempo, presidente Emmanuel Macron de Frans ia urje xefes de stato a rejeta la nasionalisme, en cuando los ia onora la aniversario sento de la fini de la Gera Mundal Prima.

La Dia Nasional de Autonomia en Polsca remente la popla sur la restora de potia a la pais en 1918, de la imperos rusce, deutx e osteraices-magiar.

La plu de la partisipores en la prosegue en Warszawa ier ia porta banderas polsce e sinturetas roja e blanca, ma alga ia teni banderas representante partitos estrema destriste de Polsca e Italia. Multe de la proseguores ia ave pirotecnicales portable, cual ia pleni la stradas con fuma roja.

Duda ia dise ce el desira ce la prosegue es un selebra orgulosa e joiosa, e ia averti ce la polisia va prosede cualcun ci porta banderas ofendente o canta sloganes de la spesie oiada a la prosegue en 2017, como "Polsca pur, Polsca blanca".

En la semana pasada, un corte polsce ia reversa un proibi contra la prosegue de nasionalistes en Warszawa, ma on reporta ce la avenis de ier ia es pasosa, sen banderas o cantas ofendente.

La prosegue a la Dia Nasional de Autonomia es ance popular con miles de polsces patriota comun, incluinte los ci suporta la partito Lege e Justia, cual governa. Sirca 60 mil persones ia partisipa en la anio pasada.

Macron, parlante a xefes de stato en Paris, ia descrive la nasionalisme como "un tradi de patriotisme" e ia urje otras a "batalia per la pas". El ia ajunta: "Si on dise 'nosa consernas es prima e la otras no importa', on elimina la cosa la plu valuosa de un nasion – sua valuas moral."

2018-11-11

Sento anios pos la fini de la Gera Mundal Prima

Rituos aveni oji tra la mundo per onora la aniversario sento de la sesaspara cual ia fini la Gera Mundal Prima.

En Australia, on ia fa un rituo a la Monumento Nasional de Gera en Canberra, e en Adelaide un avion ia cade miles de papaveras de paper roja. En Zeland Nova, un saluta par fusil ia aveni en la capital, Wellington. La militares de esta du paises ia perde multe soldatos en la campania de la Penisola Gallipoli en 1915.

En Barat, rituos ia es fada per onora la 74 000 soldatos ci ia mori en combate a la otra lado de la mundo. La papaveras cual es en Europa moderna un simbol de la versa de sangue ia reposa miscada con calendulas jala, egal simbolin.

La rituo xef en Europa va aveni en Paris. Donald Trump e Vladimir Putin es entre los ci va es presente a un rituo su la Arco de Vinse.

En la Rena Unida, 10 000 persones va prosegue a la Senotafio en London, e membros de la popla, elejeda par votas, va partisipa en la rituo de pone ala garlandas de papaveras.

Ier, Emmanuel Macron e Angel Merkel ia visita la vila Compiègne en la norde de Frans. Los ia suscrive un libro de recorda en un vagon de ferovia identica a lo en cual on ia acorda ala la sesaspara de 11 novembre 1918.

Donald Trump ia condui controversa par cansela un visita a un semetero de la mores de gera, par causa de un mal clima. Sirca 50 organizas ativiste intende fa oji un protesta en Paris contra sua visita.

2018-11-10

Pluve deluvial en Urdun

En Urdun, deluvias subita ia mata a la min sete persones e ia obliga la evacua de cuasi 4000 turistes de la site antica Petra.

Salvores e elicotores xerca sinco persones de ci sua auto ia es puxada a via en Madaba, a sude-ueste de la capital Aman. Pluves forte ia causa ance un state de crise en Aqaba, site de porto.

Esta segue a sola du semanas pos la afoca de 21 persones, xef enfantes, en un deluvia subita prosima a la Mar Mor.

Un enfante ia es un de la sete persones matada par la inondas en la rejion Daba'a, a sude de Aman. Ance un autovia liante la capital con la sude de la pais ia deveni blocida.

En Petra, la acua ia ateni 4m de altia en alga locas. Videos mostra persones sur la strada xef de la site ci ia atenta traversa la acua. La turistes evacuada ia es moveda a locas secur.

On previde plu pluve forte per oji, e recomenda ce abitores en partes afetada parti de sua casas.

Urdun ia sufri ja alga semanas de pluve intensa. En otobre, la popla ia coleri cuando 18 scolores en un turi educal ia es puxada a via par acua. La ministros urduni de educa e turisme ia resinia a pos.

2018-11-09

Un nederlandes litiga per redui sua eda par 20 anios

Un instruor nederlandes de positivia ia comensa un batalia legal per cambia sua eda per aumenta sua posibles de cortea.

Emile Ratelband, ci ia nase a 11 marto 1949 e ave 69 anios, vole move sua data de nase a 11 marto 1969. El descrive la cambia como simil a la autoidentifia de persones como transjenero.

Un corte local en la site Arnhem en la este de Nederland va judi la caso ante la fini de cuatro semanas. Ma la ofisiores duta, credente on ave no mecanicisme legal cual permete ce un person cambia sua data de nase.

Un de la judores ia demanda como on ta trata la dudes anios cual Ratelband desira sutrae. "Ci tua jenitores ia cura alora? Ci ia es acel xico peti?"

Ratelband dise ce otras es prejudosa contra el par causa de sua eda, e ce esta afeta sua posibles de emplea e sua susede en Tinder, la ap de cortea. Plu, el dise ce, longo sua dotores, el ave la corpo de un om de 45 anios. El descrive se an como un "dio joven".

El dise ce el no teme senese ma desira masimi sua vive per un tempo tan longa como posible. El dise ance ce el va renunsia sua pension si el susede cambia sua data de nase.

La constitui de Nederland proibi clar la prejudi contra emplea par causa de eda.

Ratelband, un famosa en medias publica e un guru motivante, ia converti a budisme en la parte plu temprana de esta anio. El es un ensenior de programi neurolinguistical, e ia vosi la carater Vladimir Trunkov en la varia nederlandes de la filma de Pixar Autos 2 en 2011.

2018-11-08

Un fe de mar salva un bove afocante

En England, un bove afocante ia es salvada de la Rio Thames par un "fe de mar" pasante en sua nada de 320 cilometres.

Lindsey Cole nada per aumenta la consensia de la efetos ambiental de plastica dejetable. El ia comensa a venerdi en la vila Lechlade, la punto la plu alta do la rio es navigable, portante un paracua, un xapo e un coda de fe de mar.

Nomida la "fe de mar urban", Cole ia vide la bove afetada cuando el ia traversa la contia Oxfordshire a soldi. El ia continua nada en cuando sua canoiste aidante ia telefoni la servis de crise.

La canoa tira un sculta grande de un fe de mar, composada de botelas plastica. Cole pleni lo con pesos de plastica cual el encontra en la acua, e pasores pote ajunta ance plastica trovada longo la rio.

El ia pensa inisial ce la bove es mera un plata grande de plastica blanca. Ma cuando el ia siniali a sua canoiste (la artiste Barbara de Moubray) per retrae lo, los ia descovre ce "lo ave cuatro gamas e lo mui".

Pompores de la ecipo local ci fa salvas de rio ia susede lia un corda a la animal per leva lo a un loca de securia. On crede ce la bove ia cade en la acua cuando lo ia es en la campo visina e ia atenta bevi.

Cole intende nada longo la rio en 22 dias, e va pausa a scolas per discute la problemes de plastica.

2018-11-07

Democratas regania sejas en la Salon Basa de la SUA

En la elejes mediaperiodal en la SUA, la Partito Democrata ia gania la controla de la Salon Basa a la ves prima en oto anios, ma la Republicistes de presidente Trump ia forti sua controla de la Salon Alta.

On ia regarda la vota ier como un referendo sur un presidente polalinte, an si el mesma no va aspira la reeleje asta 2020.

La resulta confirma la tende istorial ce la partito cual no es en la Casa Blanca fa ganias a media de la periodo presidental.

Democratas ia converti la enerjia de la resiste libraliste contra Trump a ganias elejal, en la vota nasional prima pos la asende a potia par la presidente a du anios ante aora.

On predise ce la Partito Democrata va gania la 23 sejas cual los nesesa per prende la controla de la Salon Basa de la Congresa. Esuanes ia vota per tota 435 sejas en la Salon.

Aora, la Democratas va pote inisia investigas sur la atas manejal e comersial de Trump, de sua declaras de revenu impostable asta alga nonconvenis posible entre sua interesas. Los ta pote ance impedi plu efetosa sua projetas legal, incluinte sua promete de construi un mur longo la frontera con Mexico.

Aspirores fema ia susede notable bon en un sicle elejal cual on ia eticeti como la Anio de la Fem.

Du Democratas de 29 anios, Alexandria Ocasio-Cortez e Abby Finkenauer, va deveni la femes la plu joven en istoria ci gania sejas en la Salon Basa.

Ilhan Omar e Rashida Tlaib es la femes muslim prima, e Sharice Davids e Debra Haaland es la femes prima american orijinal, ci deveni elejeda a la Congresa. Tota es Democratas.

2018-11-06

La saisi de enfantes de un scola camerunes

Desuples de persones, xef scolores, ia es saisida de un scola abitada en la ueste de Camerun.

A la min 79 studiantes e tre otras, incluinte la ensenior xef, ia es ier saisida en la temprana de la matina en Bamenda, la capital de la rejion norde-ueste. On fa aora un opera vasta de xerca, envolvente la armada camerunes.

La rejiones norde-ueste e sude-ueste de la pais ia es afetada par un rebela separadiste en anios resente. Militias ci ia esije la autonomia de la rejiones ia urje ce on boicota la scolas.

Ma no organiza ia dise ce lo ia fa la saisi a la Liseo Presbiterian de Bamenda, cual ave enfantes de edas entre 10 e 14 anios.

Un video de alga de la enfantes, sur cual on crede ce un de la saisores ia filma lo, sirculi en redes sosial.

La studiantes, de ci tota es xicos, es en un sala pico. Los aspeta nervosa cuando la person ci teni la camera comanda los a dise sua nomes e locas de orijina. Los repete ance: "Me ia es prendeda de scola en la note pasada par la xicos amba. Me no sabe do me es."

"Amba" pertine a Ambazonia, la nom de la pais nova cual la separadistes desira crea.

La militias separadiste ia comensa emerji en 2017 pos cuando la fortes de securia ia supresa protestas coletiva, gidada par avocatos e enseniores, sur la alega ce la governa ia fali reconose sufisinte la sistemes engles de lege e educa en la norde-ueste e sude-ueste.

On ia acusa la governa de emplea persones instruida en la tradision legal e educal franses en postos major, e de marjini jeneral la minoria de lingua engles, ci composa sirca 20% de la popla de Camerun.

Paul Biya, ci es presidente ja de 1982, ia es resente reelejeda per un periodo sete, con plu ca 70% de la votas. Partitos oposante alega ce la eleje ia es frodosa, ma atentas legal ia fali cansela la resulta.

2018-11-05

Un ativiste ucrainsce mori pos un ataca de asida

Un ativiste major ucrainsce contra la froda ia mori a tre menses pos deveni ferida en un ataca de asida.

Kateryna Handzyuk, ci ia ave 33 anios, ia sufri ardedas a 40% de sua corpo e danas grave a sua oios par resulta de la ataca a 31 julio en la site sude Kherson. Handzyuk ia esperia 11 operas sirurjial en la capital Ciiv.

El ia es ance un membro de la comite de la site, e ia campania contra la separadisme suportada par Rusia.

Ier, presidente Petro Poroshenko ia urje ce on puni la matores. Sinco suspetadas es ja arestada.

La causa esata de la mori de Handzyuk no ia es direta sabeda, ma reportas par jornalistes local ia sujesta ce lo ia aveni par un coagula de sangue.

En setembre, la ativiste ia posta un video en cual el ia urje ucrainsces a batalia la froda nonfrenida. "Me sabe ce aora me aspeta mal. Ma a la min on trata me. E me sabe serta ce me aspeta multe plu bon ca la justia en Ucraina, car nun trata acel."

Sua mori ier ia relasa un avalanxa de reatas en redes sosial ucrainsce, en cual multe usores ia espresa sua xoca.

2018-11-04

Un disputa sur votas reensende en Gabon

Jean Ping, la xef de la partito oposante en Gabon, ia reclama denova la vinse de la eleje fada en 2016, car presidente Ali Bongo Ondimba es en un ospital estra la pais.

Parlante en Libreville, Ping ia urje la nasion a abandona sua divides e foca a un ideal comun. El ia ajunta ce esta ideal es lo indicada par la votas de agosto 2016, disente ce el es la person ci ia gania vera la plu de los.

Protestas violente ia eruta cuando Bongo ia es ofisial declarada como la vinsor con marjin estrema peti.

Bongo, de ci sua familia ia governa acel nasion de Africa ueste tra 50 anios, es tratada a presente en un ospital en Riad, la capital de Arabia Saudi. No plu novas ofisial ia apare sur la state de la presidente pos la anunsia inisial, a des dias ante aora, ce el es estrema fatigada e nesesa reposa.

Pos la eleje de 2016, la partito oposante ia declara ce la votas ia es frodosa manejada, e ia esije ce on reconta los. La esije ia es refusada par la corte constitual de la pais.

En sua deside, la corte ia cambia partal la resulta de la eleje difisil bataliada, donante 50,66% de la votas a Bongo e 47,24% a Ping.

2018-11-03

Turcia culpa Arabia Saudi per la mata de Khashoggi

La presidente de Turcia, Recep Tayyip Erdoğan, a la ves prima ia acusa direta la governa saudi de mata la jornaliste Jamal Khashoggi. Ma asentuante la relatas amin entre Turcia e Arabia Saudi, el ia ajunta ce el no crede ce Re Salman ia es envolveda.

Khashoggi ia es omisideda a la consuleria saudi en Istanbul a 2 otobre.

Investigores turces crede ce la jornaliste, ci ia abita como un escluida, ia es strangulada cuando el ia visita per prende documentos per sua sposi veninte a un sitadan turces. On no ia trova sua corpo, e un aidor de Erdoğan ia dise ce el crede ce lo ia es disolveda en asida pos deveni taliada a pesos.

La omiside, inisial ascondeda par ofisiores saudi, ia causa un crise diplomata entre Arabia Saudi e sua aliadas. La saudis ia aresta 18 suspetadas, sur ci los dise ce los va es litigada en Arabia Saudi. Turcia vole estradi los.

Ofisiores saudi ia confesa ce Khashoggi ia mori a la consuleria, ma nega ce los sabe do sua corpo ia vade.

En la plu temprana de esta semana, un litigor major turces, Irfan Fidan, ia dise ce investigores crede ce la jornaliste ia es strangulada direta pos entra a la consuleria, en un omiside scemida. Fidan ia ajunta ce la corpo ia es desmembrida e destruida, "denova seguente scemas preparada".

2018-11-02

Un pasajor coler causa ce un bus cade en un rio

Video de securia filmada en un bus cual ia cade en un rio en Xina ia revela ce la gidor ia veni de combate un pasajor.

La bus ia cade tra 50 metres de un ponte supra la Rio Yangtze en Chonqging a soldi. A la min 13 persones ia mori e du otras manca.

Reportas temprana ia dise ce la bus ia devia per evita un veculo prosiminte. Ma la metraje nova mostra ce la gidor ia retalia pos es bateda par un pasajor. La bus, viajante con rapidia, ia verje alora a la banda oposada e ia rompe la paradores de securia.

La polisia ia declara ce la combate ia causa la cade.

La pasajor, identifiada como un fem de 48 anios con nom familial Liu, ia es coler ce la bus no ia pausa a sua parabus. Cuando la gidor, nomida Ran, ia refusa para per lasa ce el desembarca, la fem ia colpa el con sua telefoneta.

Un opera enorme de salva ia es fada, usante ecipos de sumerjores e desuples de barcos e grus. Ma on ia reporta no survivores. A la note de mercurdi, la ruina de la bus ia es tirada de 71 metres de profondia en la rio.

La asidente, sur un ponte bon mantenida e relativa cuieta, ia xoca Xina. La plu de comentas oji en redes sosial culpa la pasajor, ma alga persones critica ance la gidor per sua reata.

2018-11-01

La mares asorbe plu caldia ca on ia estima

Rexercores en la jornal Natur dise ce la mundo ia suestima multe la cuantia de caldia cual nosa mares ia asorbe en la 25 anios pasada. Sua studia sujesta ce la cuantia vera esede par 60% lo cual on ia crede a ante.

Longo la evalua major la plu resente par la Panel Intergovernal sur la Cambia de Clima, la mares de la mundo ia asorbe plu ca 90% de la caldia esedente cual ia deveni trapida par gases invernerial. Ma esta studia nova dise ce, en cada de la 25 anios pasada, nos ia pone en la mares sirca la 150-uple de la enerjia usada per jenera eletrica global.

Siensistes ateni sua predises sur la caldi de la planeta par ajunta tota la caldia esedente cual es produida par la cuantia conoseda de gases emeteda par atas umana. La calcula nova mostra no sola ce multe plu caldia ca nos ia suposa ia entra a la mares, ma ance ce multe plu caldia ia es jenerada par acel gases.

Si la descovre es coreta, lo indica ce la Tera es plu sensosa a emetes de combustables de fosil ca on ia estima. La rexercores crede ce esta situa va impedi multe la atentas per manteni la caldi global a un nivel secur en esta sentenio, como difinida par governas en la acorda de Paris.

De 2007, siensistes ia pote usa un sistem de sirca 4000 flotas cual rejistra la temperatur e salosia de mares tra la mundo. Ma ante esta, la metodos usada ia ave multe defetos e nonsertas.

Aora, la rexercores ia developa un metodo multe esata per deteta la temperatur de la mares par mesura la cuantia de osijen e diosido de carbono en la aira: acua plu calda relasa plu de esta gases a la aira. Esta metodo permete mesura la temperatur de mares tra la mundo en cada anio pasada de 1991, cuando datos ia deveni disponable de un rede global de stasiones.

Otra siensistes ia reata a la anunsia con ansia, car la rexercores ave un bon reputa. An tal, alga siensistes dise ce on nesesa ancora plu investiga car ance la metodo nova conteni alga nonsertia.

2018-10-31

Tempestas en la norde e ueste de Italia

Italia ia es bateda par ventas e pluves forte cual ia mata 11 persones en la ueste e norde. Scolas e locas turismal ia clui en alga rejiones car on ia teme sur la securia de la popla.

On ia reporta ventas de asta 180 cilometres per ora, e du tornados ia pasa tra la sentro de Terracina, un vila costal, matante un person e ferinte des otras.

En Venezia, acuas levante ia inonda multe de la plazas e paserias famosa. Cisa 75% de la site de canales es aora sumerjida.

La Plaza San Marco ia es cluida a la posmedia de lundi, cuando la acua ia ateni 156 sentimetres de profondia. On ia rejistra ala un nivel plu profonda a sola tre veses pasada.

Ultra Venezia en la norde, on ia esperia ventas forte, arbores cadente e tera liscante. En la rejion Veneto, un om ia es matada par un arbor e un pompor-bonvolor ia mori en la rejion fronteral Alto Adige (Tyrol Sude) en la norde-este de Italia.

On ia trova un om mor, de 61 anios, en un rio prosima a Belluno en Veneto, pos descovre plu temprana sua auto. Un fem ia es matada cuando sua casa ia es destruida par un liscatera, e la corpo de un pexor ia es trovada a alga oras pos cuando el ia vade per serti la state de sua barco sur un lago en Trento.

A sude de la vacanseria Rimini, un surfor airotirada con 63 anios ia mori cuando sua cometa ia lansa el contra rocas. Tra Italia, ses persones ia mori a lundi e on ia confirma plu moris ier.

Alga de la problemes la plu mal ia es esperiada a la costa ueste, spesial en Liguria en la norde-ueste.

La muron esterna de mar en Rapallo, un porto modosa, ia es destruida cuando sua beton fortida ia desintegra, danante alga de la iates ala liada. Pompores ia debe salva ance 19 persones ci ia deveni trapida en Rapallo.

Plu sude, la provinse costal Grosseto ia reporta un desastre. Arbores ia cade en la capital Roma e en Napoli, do un studiante de 21 anios ia es matada. Du tornados ia destrui la tetos de construidas en Terracina, a sude de Roma, con ce abitores ia core per proteje se.

Transporta e la furni de eletrica es ance disturbada, e meteorolojistes averti ce la mal clima va continua.

2018-10-30

Un avion indonesian cade en la Mar Djava

En Indonesia, on usa avionetas e sonar per xerca un avion de pasajores cual ia cade en la mar ier. La vola JT 610 de Lion Air ia cade pos enaira de Jakarta, portante 189 pasajores e ecipores.

On ave no indica de survivores, ma detrito de la avion e posesedas personal ia es colieda de la acua.

Lo no es clar perce la avion ia cade a sola 13 minutos pos sua enaira. La pilote de la Boeing 737 ia demanda per reveni a la airoporto Soekarno-Hatta, corta ante perde contata con la controlores de trafica airal.

La avion ia encontra ja problemes en vola de Bali a Jakarta a la dia presedente. Sua jornal tecnical ia descrive un strumento como "nonfidable", tal ce la pilote ia pasa la controla a la ofisior prima.

La dirijor xef de Lion Air ia dise oji ce la avion ia es alora reparada ante enaira denova.

JT 610 ia es viajante en dirije a la site Pangkal Pinang en la ueste de Indonesia cuando la avion ia aselera subita e ia perde altia, cadente en la Mar Djava, a norde-este de Jakarta.

Indonesia, un arcipelago vasta, depende forte de aviones, ma multe de sua airocompanias ave un mal istoria de securia. Los ia ave problemes de securia e malmaneja en la pasada e Lion Air ia es proibida de entra a la airospasio european asta 2016.

2018-10-29

Un destriste estrema va deveni la presidente de Brasil

Jair Bolsonaro, la aspiror de la destra estrema, ia fa un vinse major en la eleje presidental de Brasil. El ia gania 55,2% de la votas, contra 44,8% per la sinistriste Fernando Haddad de la Partito de Laborores.

Bolsonaro ia campania prometente elimina la froda e basi la nivel alta de crimin en la pais.

La campania ia es forte dividente. Cada partito ia declara ce un vinse per la otra pote destrui Brasil.

La vinse par Bolsonaro representa un move notable a la destra per la democratia la plu grande en America Latina, cual ia es governada par la Partito de Laborores tra 13 anios entre 2003 e 2016.

En la du anios pasada, la pais ia es governada par un conservaliste, Michel Temer, pos acusas de malcondui contra presidente Dilma Rousseff. Ma Temer ia deveni multe nonpopular con brasilanes.

La presidente partinte ia es aprobada par sola 2% de votores, un recordo basa. La popla ia esije un cambia, ma con desacorda profonda sur la dirije de la cambia.

Ultima, Bolsonaro ia vinse par 10 persentos de la votas. El ia ofre un promete de un Brasil en cual la consernas xef va es redui la crimin e promove la valuas familial.

2018-10-28

Un fusilor mata a un sinagoga en Pennsylvania

En la SUA, un om suspetada de mata 11 persones en un sinagoga en Pittsburgh, Pennsylvania es acusada de omiside, pos un aveni regardada como la ataca antisemita la plu mal en la istoria resente de la pais.

On acusa Robert Bowers, ci ave 46 anios, de fusili a la sinagoga Arbor de Vive en sua servi de la dia santa. El fasa 29 acusas, incluinte la usa de un fusil per omiside.

La acusores federal dise ce los va rejistra ance acusas de crimin de odia, e la suspetada va reseta cisa la puni de mori.

Presidente Donald Trump ia descrive la ataca como "un ata malvolente de omiside coletiva", e ia comanda la basi partal de banderas SUA a construidas governal asta 31 otobre.

Ses persones, incluinte cuatro polisiores, ia es ferida en la ataca ier. La suspetada ia es ance ferida en un batalia de fusil contra la polisia.

Plu tarda, sentos de persones, no sola de la visineria Squirrel Hill ma ance de tota Pittsburgh, ia asembla per un vijila intercredal per la vitimes de la ataca.

A la matina de ier, persones ia veni a la sinagoga per un rituo de nomi de bebe. Squirrel Hill ave un de la poplas iudi la plu grande en la stato Pennsylvania, e esta ia ta es la dia la plu ativa per la sinagoga en la semana.

On reporta ce Bowers ia entra a la construida en la servi de matina, armada con un fusil de ataca e tre pistoles. Pos sirca 20 minutos, el ia mata ja 11 persones e ia es sortinte de la sinagoga, cuando el ia encontra un ecipo de polisiores spesialida e ia intercambia sparas con los.

A pos, la atacor ia reentra a la construida per atenta asconde se de la polisia. El ia sede pos un batalia de fusil, e es aora en ospital con plu ca un feri de baleta.

Longo reportas, el ia clama "tota iudis debe mori" en cuando el ia fa la ataca. Postas en redes sosial par algun con la nom Robert Bowers ia es ance plen de comentas antisemita. El no ia es conoseda a autoriosas ante la ataca. Sua motiva resta nonclar, ma on crede ce el ia ata solitar.

Trump ia descrive la fusilor como un "manica" e ia sujesta ce la SUA debe "forti nosa leges de la puni de mori", ajuntante ce la aveni "pertine poca" a la leges de fusil en la pais. "Si on ia ta ave un proteje en la construida, cisa la situa ia ta pote es diferente."

La presidente presedente, Barack Obama, ia espresa un otra opina sur la debate continuante de lege de fusil. El ia tuita: "Nos debe sesa fasili tan multe la oteni de fusiles par los ci vole feri persones inosente."

2018-10-27

Magrib abandona subita sua ora de inverno

Magrib ia deside abandona la ora de inverno e va manteni sua orolojos a la ora de estate, UTC+1, per la tota anio. La anunsia ia es fada a min ca du dias ante cuando la orolojos ia ta retira se par un ora a soldi. La deside ia es fada per salva un ora de lus natural.

La nasion de Africa norde junta se a alga otras, xef en Africa e Asia, cual no altera sua orolojos en estate.

La reata a la cambia ia es miscada en redes sosial. Un person ia dise ce la subitia de la deside pare simil a avenis en naras par Kafka. Un otra ia demanda como lo va afeta atas en ramadan, la mense santa de islam.

Ma otras ia bonveni la deside, como un comentor en Jazair ci ia broma ce sua visinas magribi, nova aliniada, va es ance plu prosima a la cultur jazairi, incluinte sua pizas cuadro.

An si multe persones en la mundo gusta spende un plu ora en leto cuando la orolojos es retirada per la inverno, otras ia fa campanias major per aboli la pratica. En agosto, la Uni European ia dise ce lo va recomenda ce sua paises membros abandona lo.

2018-10-26

On subasta un depinta par un inteleto artifis

Un obra de arte creada par un program de inteleto artifis (IA) ia es vendeda par subasta per $432 mil. La custa final es multe plu alta ca la estima de $7–10 mil proposada per lo par la subasteria Christie's en York Nova ante la vende.

La depinta, nomida Depinta de Edmond Belamy, ia es creada par un coletiva artal nomida Obvious ("Evidente"), con base en Paris.

La obra ia es produida par usa un algoritmo e un colie de 15 mil depintas personal creada entre la sentenios 14 e 20. Per jenera la imaje, la algoritmo ia compara sua propre obra a los en la colie asta cuando lo no ia pote plu distingui los.

La depinta es la obra prima de arte par IA cual on ia  vende en un subasteria major. La vende ia atrae un cuantia notable de atende jornaliste.

Richard Lloyd, la spesialiste a Christie's ci ia organiza la vende, ia comenta: "IA es sola un de alga tecnolojias cual va fa un efeto a la mercato artal de la futur, an si lo es multe tro temprana per predise la detalias de acel cambias."

2018-10-25

Google abandona un compleso deutx pos protestas

Google ia abandona un projeta de abri un compleso grande en un distrito modosa de Berlin, pos un oposa forte par campaniores local.

La jigante tecnolojial ia intende crea un incubador per companias nova en Kreuzberg, ma ia dise ier ce lo va sede la loca a du asosias carital. Sua portavose no ia dise esce la oposa local ia fa un rol en la deside, ma ativistes contra la enflue de abitores rica ia declara ce la aveni mostra ce "protestas susede".

La compleso en Berlin ia ta es la numero sete de Google, pos London, Tel Aviv, Seoul, Madrid, São Paulo e Warszawa.

En setembre, ativistes ia ocupa la construida pertinente per alga oras. Los ia posta ance aderentes en la distrito, con sloganes como "Adio, Google" e "Google no es un bon visina".

Alga ativistes ia oposa lo cual los ia descrive como la praticas "malvolente" de Google, como la evita de imposta e la usa nonetical de datos personal.

Otras ia protesta contra la enflue de abitores rica, sur cual los dise ce lo leva la custa de casas a un nivel cual persones local no pote compra. Entre 2016 e 2017, la custa de un casa en Berlin ia crese jeneral par 20%, ma par 71% en Kreuzberg.

La distrito es longa conoseda per sua cultural revoluiste e suvertinte.

Un portavose per Google ia dise ce discutes con grupos umaniste local ia gida la compania a conclui ce la solve la plu bon per la construida ta es dona lo a estas. La asosias es Betterplace, un plataforma enlinia per dona carita, e Karuna, cual suporta enfantes povre.

2018-10-24

Un leoneta es trovada en un aparte franses

Un om de 30 anios ia es arestada cuando on ia descovre un leoneta en un aparte en la suburbes de Paris.

La polisia ia es avisada cuando la suspetada ia atenta vende la leon fema, ci ave ses semanas, per 10 mil euros.

La om ia asconde se en un armario en la casa de un visina, do on ia trova el ier. La leoneta ia es trovada sur un leto de enfante.

On reporta ce la animal es sana. Autoriosas sur viventes savaje cura aora el. La om suspetada ia ave condenas presedente per furas.

Esta no es la ves prima cuando polisiores ia descovre gatos savaje ci on ia manteni nonlegal.

En 2017, la polisia ia trova un leoneta magra en un aparte vacua en Paris, mantenida par un om ci ia fa selfis con el. La leoneta ia es recasida en un conserveria de animales en Sudafrica en esta agosto.

Plu temprana en esta mense, un coror en Nederland ia trova un leoneta abandonada en un caje en un campo.

2018-10-23

Fratos falsida de la Enrolas de la Mar Mor

Un museo biblial en la SUA ia sesa esibi fratos crededa de la Enrolas de la Mar Mor, car probas ia sujesta ce los es falsida.

La Museo de la Biblia en Washington DC ia envia sinco de sua des-ses fratos per analise en Deutxland. La resulta ia mostra "cualias noncoerente con orijina antica".

Con custa de $500 milion, la museo ia es abrida par Steve Green, un cristian evanjelial e bilionor, en 2017.

La Enrolas de la Mar Mor es un colie de manoscritos antica de la Biblia Ivri. La primas de la enrolas ia es trovada en cavas en Qumran a la costa ueste de la Mar Mor en 1947. On dise ce sua descovror ia es un pastor badaui joven ci ia xerca sua oveas perdeda.

La probas ia es comandada cuando eruditas biblial ia dise, pos esamina des-tre de la fratos nonstudiada de la museo, ce on ave un probablia alta ce alga de los es falsidas moderna.

La conservor xef de la museo ia comenta ce el ia espera ce "la proba va furni resultas diferente". Ma el ia ajunta: "Esta es un oportun per educa la publica sur la importa de serti la autenticia de ojetos biblial rara, la prosede detaliosa de proba cual ia es emprendeda, e nosa dedica a transparentia."

Esta no es la ves prima cuando la posesores de la museo ia fronti un controversa. En la anio pasada, la compania Hobby Lobby de Green ia debe paia un multa de tre milion dolares e redona multe de ojetos, cuando la Departe de Justia SUA ia acusa lo de contrabanda ojetos fabricada de Irac.

2018-10-22

Miles de migrores traversa de Guatemala a Mexico

Miles de persones viajante de nasiones de America Sentral per atenta entra a la Statos Unida ia recomensa sua viaja de Mexico sude a la frontera SUA.

A la temprana de ier, la grupo grande ia comensa pasea en dirije a norde de Ciudad Hidalgo, un site fronteral.

La autoriosas mexican ia atenta para los a un ponte de frontera entre Mexico e Guatemala. Ma alga ia susede traversa nonlegal a Mexico par barco sur la rio Suchiate.

La caravan, ci veni xef de Onduras e inclui femes e enfantes, dise ce lo fuji de violentia e povria.

2000 migrores, votante par leva sua manos, ia deside continua sua viaja, disente: "Ta ce tota de nos pasea en junta!" e "Si, nos pote!" On no ia deteni los cuando los ia traversa la frontera.

Otra migrores resta trapida a la frontera en sua atenta de entra legal a Mexico.

La autoriosas mexican ia aseta grupos peti per trata refujal e ia dona lisensas per visitas de 45 dias a otras. Nonobligada, alga ia embarca veculos organizada par la autoriosas guatemalan a Tecún Umán, per revade a Onduras.

Presidente Trump de la SUA ia averti a multe veses ce la migrores debe reversa sua viaja, menasante clui la frontera e redui aida a paises cual permete ce la grupo pasa.

En tuitas ier, el ia dise ce on labora per "para la enflue de stranjeres nonlegal". El ia sujesta ance ce la caravan ave un motiva political.

Ance un plu grupo separada de sirca mil migrores, xef de Onduras, ia comensa en dirije a la SUA, de Esquipulas en Guatemala.

2018-10-21

Persones mori pos un disputa a un mercato nijerian

Violentia setal, provocada par un disputeta a un mercato, ia mata 55 persones en la stato Kaduna en la norde de Nijeria.

Jovenes muslim e cristian ia scaramuxa pos un disputa entre portores de careta en la vila Kasuwan Magani. La comisionor de polisia per la stato ia dise ce on ia aresta 22 persones pos la turba.

La autoriosas ia institui ance un proibi permanente de sorti en la vila.

Erutas de violentia setal aveni frecuente en Nijeria.

Un portavose ofisial per presidente Muhammadu Buhari ia tuita ce la presidente opina ce la usa comun de violentia en tal disputas es "preocupante".

Sin armonia entre grupos diversa, "nosa comersias dial ta es nonrealable," Buhari ia dise. El ia urje xefes de comunia a promove la tolera e a para tal desacorda ante cuando lo developa a violentia.

2018-10-20

Un tren barati colpa un fola selebrante

Plu ca 60 persones ia es matada e 100 ferida cuando un tren ia colide con un fola, prosima a Amritsra en la rejion Pandjab en la norde de Barat. On reporta ce la mores inclui enfantes.

La vitimes ia sta sur la ferovia per regarda selebras de Dasahara, un festa indu sur la vinse de bonia contra malia. Los no ia oia la prosimi de la tren, a media de la arde de un pupa plen de petardos, representante la re demonal Ravana.

Alga reportas sujesta ce organizores ia avisa la fola a move a via de la petardos. Otras dise ce persones ia core a la ferovia car los ia teme ce la pupo ardente va colasa.

Longo atestores, multe persones sur la ferovia ia es ocupada en filma la selebra par sua telefonetas, e no ia persepi la tren prosiminte con rapidia alta. La tren ia viaja de Jalandhar a Amritsar.

La feridas va reseta aida medical sin paia. On ia declara un state de lamenta, e ofisias e scolas en Pandjab es oji cluida.

2018-10-19

La descovre de un pirania jurasica

Siensistes ia descovre la restas fosilida de un creada simil a un pirania, de la eda jurasica. Los dise ce lo es la esemplo la plu temprana cual on conose de un pex carnivor.

La creada ososa, trovada en la sude de Deutxland, ia vive a sirca 150 milion anios ante aora e ia ave la dentes agu cual distingui la piranias de oji. Lo ia usa estas per sutrae la carne e pinas de otra pexes, de cual on ia trova ance sua restas.

Un de la rexercores ia dise: "Nos ave otra pexes de la mesma loca con pesos mancante de sua pinas. Si on come un pex, lo es mor. Si on rode sua pinas, on ave comeda per la futur."

La siensistes ia analise la mandibulas e ia trova dentes longa e puntida a la esterna de un oso cual ia formi la teto de la boca. Los ia trova ance dentes triangulo con bordas sierin sur osos longo la lado de la mandibula basa.

La ecipo internasional ia conclui ce la organiza e forma de la dentes e la strutur e funsiona de la mandibulas sujesta un boca bon preparada per talia carne o pinas.

La loca do la pexes ia es trovada es entre la plu bon en la mundo per descovre fosiles, ma lo continua ofre surprendes como esta.

2018-10-18

eBay litiga contra la envia de epostas par Amazon

La mercato enlinia eBay va litiga contra Amazon, acusante Amazon de usa taticas nonlegal per atrae vendores. Lo dise ce representores de Amazon ia malusa la sistem interna de eposta de eBay per contata vendores, en un viole de sua politica.

Amazon ia refusa comenta sur la caso, cual segue un letera de eBay esijente un fini a la pratica. A ante, lo ia dise ce lo investiga la acusa.

eBay ia declara ce laborores de Amazon ia crea contas de eBay per solisita vendores, comun enviante mesajes a mera minutos pos prepara sua profiles. Lo dise ce esta ativia ia aveni ja en 2015 e ia envolve desuples de representores de Amazon, de ci cadun ia envia sentos de epostas.

Un vendor ia averti eBay sur la problem a alga semanas ante aora, e eBay ia demanda ce Amazon para lo.

La declara litigal dise ce la mesajes mostra ce Amazon ia sabe ce sua pratica viole la politica de usa de eBay. Lo cexa ce la pratica de Amazon "pare es un parte de un model plu grande de condui atacosa e nonmoral" par la compania vendente.

eBay, cual posese ance StubHub, un revenderia de biletas, xerca la ofre de compensa monal par un litiga con juria. La compania californian, cual ia inisia se en 1995, ia es un abrivia de vende enlinia, developante un plataforma per lia comprores a vendores.

Aora lo ave plu ca 175 milion comprores ativa, con vendes de cuasi $90 mil milion par sua plataforma en la anio pasada. Ma sua brilia ia pali entre competores, spesial car la domina de Amazon atrae plu mercatores a acel plataforma.

En la anio pasada, plu ca un dui de la cosas vendeda par Amazon ia veni de vendores esterna. Intera, on estima ce Amazon representa sirca un dui de la dolares enlinia paiada a vendores en la SUA.

2018-10-17

Canada legali canaba recreal

Canada ia deveni la pais du en la mundo cual legali la posese e usa recreal de canaba.

La mercato nasional per canaba ia abri a medianote, an entre demandas restante sur sua efeto a la sania, la lege e la securia publica.

On ia envia informa a 15 milion casas sur la leges nova e la campanias de consensia. Ma on ave ancora consernas, incluinte sur esce la polisia es sufisinte preparada per trata motoristes drogosa.

Uruguai ia es la pais prima do canaba recreal ia es legalida, ma ance Portugal e Nederland ia descriminali la sustantia.

Provinses e munisipas canadian ia fa menses de prepara per la fini de la proibi. La provinses e teritorios es encargada per defini multe de la detalias sur la locas do on pote compra e consuma canaba en sua rejiones. Esta ia crea un misca de leges tra la pais, con ce rejiones eleje sistemes plu o min restrinjente per vende e usa la droga.

Botecas en la provinse Newfoundland, cual ave la zona de ora la plu este en Canada, ia abri a la momento de medianote per la vendes legal prima de canaba en la pais.

La legali reali un promete campaniante de 2016 par la ministro xef Justin Trudeau, la xef de la Partito Libraliste cual governa aora.

El ia razona ce la leges cual criminali canaba, e cual esiste ja tra cuasi un sentenio, ia es nonefetosa, car canadianes es ancora entre la usores la plu major de la droga en la mundo. El ia dise ce la lege nova es desiniada per teni drogas ultra la manos de minores e profitas ultra la manos de criminores.

La governa federal predise ce lo va recolie $400 milion per anio en revenu impostal sur la vende de canaba.

2018-10-16

La Eglesa Ortodox Rusce separa de Constantinopoli

La Eglesa Ortodox Rusce dise ce lo rompe tota lias con la Patriarcia Nonramal de Constantinopoli, cual ave la autoria spirital supra la 300 milion cristianes ortodox de la mundo.

La Patriarcia, con base en Istanbul, ia reconose resente ce la Eglesa Ucrainsce es autonom de Moscva. Multe cristianes ucrainsce acusa la Eglesa Rusce de favore rebelores suportada par Rusia en Ucraina este.

Moscva refusa la autonomia de la Eglesa Ucrainsce. Un bispo major – Hilarion Alfeyev - ia dise ce la deside de reconose lo es "contra la veria istorial". A ante, Constantinopoli ia rejeta la moves per autonomi de la Eglesa Ucrainsce, ma ia aseta aproba los en la semana pasada.

Petro Poroshenko, presidente de Ucraina, ia dise ce la autonomia de la Eglesa vade con mano en mano con la autonomia de Ucraina. El ia ajunta: "Lo es un tema de securia nasional ucrainsce. Lo es un tema de la nasionia ucrainsce."

Ucraina ia deveni autonom en 1991, cuando la Uni Soviet ia disolve. Ma la propri de Crim par Rusia en 2014 e la batalias en Ucraina este ia veneni sua relatas con sua visina.

La ramo moscvan de la eglesa ia nega ce lo es un util de la Cremlin, e dise en loca ce lo ia atenta reali la pas en Ucraina este. Moscva dise ce lo espera ce Constantinopoli va cambia sua deside sur reconose la autonomia de la Eglesa Ucrainsce, per evita un separa formal entre la du eglesas.

Rusia regarda Ciiv como la cuna istorial de la Eglesa Ortodox Rusce. La Cremlin ia dise resente ce lo teme la aveni de scaramuxas en Ucraina sur locas ortodox do la Patriarcia de Moscva fa sua servis.

2018-10-15

Un perde grande per un partito aliada con Merkel

En Deutxland, la resultas inisial de un eleje governal en Baiern sujesta ce un partito liada con lo de Angela Merkel ia sufri un perde grande. La Uni Sosial Cristian de Baiern, aliada con la Uni Democrata Cristian nasional cual canselor Merkel gida, va perde probable sua majoria asoluta en la parlamento nasional.

La Partito Verde va asende a la loca du, e la Alternativa per Deutxland, cual ia campania contra la aseta de migrores, va entra probable a la parlamento a la ves prima.

La Uni Sosial Cristian (USC) es cuasi la sola partito governante de Baiern de pos 1957. Ma sua suporta ia diminui con la polali de opinas sur tal temas como la migra.

La xef de la partito, Horst Seehofer, ia dise ce lo es "no un bon dia", ma ia ajunta ce lo representa "sola un lado de la medalia" car la vota dona "un autoria clar" cual permete ce la USC formi un governa nova.

La resultas ofisial inisial ia mostra ce la USC ia gania sirca 37% de la votas, min par 10 persentos ca a cuatro anios ante aora. La Verdes, ci es sinistriste e favore la aseta de migrores, ia gania pico min ca 18%. La Alternativa per Deutxland ia fini en la loca cuatro con sirca 10% de la votas, pos un coletiva de aspirores nondependente, conoseda como la Votores Libre.

La aliadas nasional de Merkel, la Democratas Sosial sentriste-sinistriste, ia fini con min ca 10%, la dui de sua cuantia presedente. Un rumor sujesta ce lo va estrae se de la governa federal deutx per atenta survive como un partito. Sua xef, Andrea Nahles, ia culpa disputas interna per sua mal resulta en Baiern.

2018-10-14

La canoni de Arcibispo Oscar Romero

Sentos de persones relijiosa en America Sentral ia comensa selebras per onora la santi oji de Oscar Romero, un arcibispo salvadoran ci ia es omisideda a 38 anios ante aora.

En la gera interna de Salvador, Romero ia recomenda franca la pas, e ia es fusilida par soldatos destriste a media de un misa en marto 1980. Sua matores ia es nunca litigada, car un amnestia de 1992 proteje los.

Pape Fransisco va santi el en Roma oji.

La dona de santia a Romero es ja longa promoveda par catolicas en la rejion, ci regarda el como la santa de America Sentral. Per relijiosas, sua potia ia veni de lo ce el ia critica ambos lados de la gera salvadoran, e la sinistriste e la destriste, per cualce ata cual ia afeta persones nonmilitar.

El es ancora despetada par alga persones a la destra estrema, ci descrive el como "un gerilia en roba de prete", car el ia urje soldatos a escuta sua cor e desobedi comandas.

Sua mori ia xoca la mundo e ia intensi la violentia en Salvador, cual ia dejenera rapida a un gera interna de 12 anios cual ia prende 75 mil vives.