2018-08-16

Un campania per jornalisme libre

Plu ca 300 organizas jornaliste en la SUA va inisia oji un campania de jornalisme libre per oposa atacas par presidente Donald Trump.

En la semana pasada, la jornal Boston Globe ia recomenda un denunsia nasional de la "gera susia" par la presidente contra jornalisme, usante la eticeta #EnemyOfNone ("enemi de nun").

Trump ia burla reportas jornaliste como "novas falsa" e ia ataca jornalistes como "enemis de la popla". Espertas en la SUA ia dise ce esta aumenta la risca de violentia contra jornalistes.

Boston Globe ia promete scrive un editorial "sur la periles de la ataca governal a jornalisme" a 16 agosto, e ia solisita ce otra jornales fa simil. Jornales nasional major e locales plu peti ia promete reata, como ance publicis internasional como la jornal Guardian, con base en London.

Acel jornal brites scrive en sua editorial ce Trump es la presidente prima "ci pare ave un politica calculada e coerente de sumina, deslegali e an perili la labora de jornalistes."

Su la titulo "La jornalisme libre nesesa tu", New York Times ia descrive la atacas par Trump como "perilosa per la sangue animante de democratia," e ia ajunta estraedas de desuples de otra publicis a su.

En sua propre editorial, su la titulo "Jornalistes no es la enemi", Boston Globe ia dise ce jornalisme libre ia es un prinsipe esensal de la SUA tra plu ca 200 anios. "Oji lo es su menasa grave," lo ia continua, razonante ce un tal trata de jornalisme par la presidente american "envia un sinial alarmante a despotas" tra la mundo.

La campania de oji segue un serie de avenis e comentas par Trump cual ia alti la presa contra jornalistes.

An si la fia de Trump, Ivanka, ia distanti se de esta atacas par sua padre, Sarah Saunders, la Portavose de la Casa Blanca, ia refusa dise ce jornalisme no es un enemi de la popla.

2018-08-15

Un ponte de autovia colasa en Italia

En la site Genoa en Italia norde-ueste, on continua xerca survivores pos la colasa dramosa de un ponte de autovia.

A la min 35 persones ia mori cuando desuples de veculos ia cade tra 45 metres. La colasa ia feri ance sirca 16 persones, e on estima ce entre cuatro e des-du persones manca.

Sirca 250 pompores de tota Italia partisipa en la xerca, usante canes detetante e aparatos de trepa. On ia evacua plu ca 400 persones, temente ce otra partes de la ponte va cade.

La colasa ia aveni en un pluve deluvial. Sua causa no es clar, ma on ia fa ja demandas sur la securia de la strutur. Matteo Salvini, la ministro de internas, ia promete puni cualcun culpable per la cade.

La Ponte Morandi, construida en la desenio de 1960, sta sur la autovia A10, un via importante per trafica de benes de portos local. La autovia servi ance la Riviera Italian e la costa sude de Frans.

Pompores atenta abri fesures peti per trova cualcun cisa trapida en un veculo. On crede ce alga persones vive ancora, ma tre enfantes es entre la mores.

Entre 30 e 35 autos e tre veculos pesosa ia es sur la ponte cuando lo ia colasa. Un tore enorme e partes de la ponte mesma ia cade sur linias de ferovia, un rio e un beneria.

2018-08-14

La site la plu abitable de mundo

Wien, la capital de Osteraic, ia vinse Melbourne en Australia per deveni nomida la site la plu abitable de mundo.

Esta es la ves prima cuando un site european ia ateni la loca prima en la sonda anial, fada par Economist Intelligence Unit. La lista global ordina 140 sites par fatores diversa, incluinte stablia political e sosial, crimin, educa e asede a aida medical.

En la sonda, Manchester ia asende plu ca cualce otra site european, tra 16 puntos a la numero 35. Pos sua asende, lo es plu alta ca London par 13 puntos, la difere la plu grande entre la du pos la comensa de la sonda a du desenios ante aora.

La salta de Manchester tra la lista es la resulta de un gradi bonida per securia. En la anio pasada, on ia critica la sonda car lo ia basi Manchester pos un ataca en stadion cual ia mata 22 persones.

En esta anio, la editor de la sonda ia dise ce Manchester "ia mostra durantia en la recovre de la site pos un ataca resente de terorisme multe reportada, cual ia secute la stablia a ante."

El ia dise ce la securia ia boni ance en "alga sites de Europa ueste" e ce la susede de Wien refleta "un reveni a stablia relativa tra multe de Europa".

Longo la sonda, cuasi un dui de la sites ia reseta un boni de sua grado de abitablia en la anio pasada. Melbourne, cual ave la numero du en la lista de esta anio, ia vinse en cada de la sete anios direta presedente. Du plu sites australian apare ance entre la des plu abitables de esta anio: Sydney e Adelaide.

A la otra estrema de la scala, Dimashq en Suria apare como la site la min abitable, prosima segueda par Dhaka en Bangladex e Lagos en Nijeria. Crimin, turba interna, terorisme e gera ave ave roles forte en deside la des sites la min abitable.

2018-08-13

Turcia atenta evita un crise economial

La banco sentral de Turcia ia dise ce lo es preparada per usa "tota medias nesesada" per serti un stablia finansial pos la colasa de la lira. Lo ia promete furni "tota la licuidia cual la bancos nesesa".

Esta ia aveni pos cuando la lira turces ia ateni un punto basa recordo contra la dolar, en un disputa diplomata grandinte con la SUA.

La valuas en asionerias en Asia ia cade oji car investores ia deveni ansiosa sur la crise de mone en Turcia. A venerdi, la presidente esuan Donald Trump ia dise ce el ia aproba la dupli de tarifas a aser e aluminio turces.

Ante la anunsia de la medias nova, la indise Nikkei 225 de Japan ia cade par cuasi 2% en sua comersia tarda.

Espertas culpa temes ce Turcia desende a un crise economial per la diminui rapida en la valua de la lira. Tra la mundo, investores es consernada par la estende de la dana e esta ia provoca los a vende ativas plu riscosa, incluinte asiones asian e mones de mercatos emerjinte.

Analistes dise ce investores xerca aora un refuja en la ien e la dolar esuan.

2018-08-12

Gralias colie dejetadas en un parce franses

Un parce de divertis en Frans va usa ses avias per colie dejetadas.

On ia instrui la gralias a la parce Puy de Fou en la ueste de la pais a colie restas de sigaretas e otra dejetadas peti. Los depone la pesos en un caxa cual furni alga comeda per recompensa la labora.

La primas de esta limpores plumida labora ja, e la otras va comensa doman.

Nicolas de Villiers, la xef de la parce, ia dise: "La gol no es sola la limpi, car la visitores atende jeneral ce los manteni la limpia." Lo pertine ance a mostra ce "la natur mesma pote instrui nos a cura la ambiente".

Gralias parteni a la familia de corvos, cual inclui ance corvones e monedulas. De Villiers ia ajunta ce los es "spesial intelijente" e ce los "gusta comunica con umanas e construi un relata par jua".

Esta no es la ves prima cuando corvos ia esibi sua intelijentia. En la parte plu temprana de esta anio, siensistes ia crea un vendador cual mostra la capasia de corvos en solve problemes.

La macina ia dona un regala cuando un avia ia presenta a lo un paper de grandia definida. On ia trova ce corvos pote recorda la grandia nesesada, e ia es an capas de corti paperes plu grande per cabe los a la macina.

2018-08-11

Xasada par un scural

La polisia deutx ia aida un om ci ia es xasada par un scural bebe.

Los ia responde a un telefoni per aida en Karlsruhe, un site en la sude-ueste de Deutxland. Cuando los ia ariva, la animal peti ia es ancora asustante la om. Los ia saisi la scural cuando lo ia adormi subita.

La reporta ofisial sur la aveni dise ce la rodente persistente ia deveni la mascote nova de la polisia. On ia nomi el Karl-Friedrich, e el es aora curada en un sentro de salva animales.

Scurales pote xasa persones si los desira reseta comeda o aida. Si un scural perde sua madre, el pote foca sua atende a un person como un sustitua.

Ma atacas par scurales no es sempre tan cortes. En julio de la anio pasada, on ia averti visitores a Prospect Park en New York sur un scural "nonusal coleriosa" ci ia ataca sinco persones en un semana. E en la anio presedente en Cerno, en la sude-ueste de England, un xico de tre anios ia sangui pos deveni mordeda par ses scurales.

2018-08-10

Pilotes de Ryanair greve

Pilotes de Ryanair greve en sinco paises european, obligante la cansela de un sesi de la volas de acel airocompania en media de la saison de vacanses.

La greve de 24 oras envolve empleadas en Deutxland, Sveria, Er, Beljia e Nederland. On ia informa sirca 50 000 pasajores sur la cansela de 400 volas.

La greve es la plu grande en un serie pertinente a paia e situa. Ryanair dise ce lo ia fa la plu bon cual lo pote per solve la disputa.

Esta airocompania eres, cual es la plu grande de los de custa basa en Europa, ia evita un greve ante natal par acorda reconose sindicatos a la ves prima en sua istoria de 30 anios. Ma sempre a pos, on ia protesta sur la negosia de acordas coletiva de labora.

Sirca 300 volas de Ryanair ia es canselada en julio cuando cabinores en Beljia, Portugal e Espania ia greve per 48 oras. E en dias resente, la airocompania ia anunsia la canselas de 250 volas a e de Deutxland, 104 a e de Beljia, e 42 plu cual afeta Sveria e Er.

A la sera de jovedi, un corte nederlandes ia rejeta un caso de Ryanair cual ia atenta preveni pilotes en Nederland de junta se a la greve, afetante sirca 22 volas. Ma a cuasi la mesma tempo, la compania ia anunsia ce on va ave no canselas.

La sindicatos desira ce la contratas de empleadas de Ryanair es governada par la leges de la nasion do los ave sua base, e no par leges eres.

Ryanair ia descrive la greves como "regretable e nonmeritada", disente ce sua pilotes reseta salarios plu alta ca los de otra airocompanias de custa basa.

2018-08-09

Un trematera nova afeta Lombok

La isola indonesian Lombok ia es colpada par un trema forte nova, an cuando lo atenta recovre pos un trematera major a soldi. La trema nova ia ave un grado de 5,9, e on reporta ce lo ia cade alga construidas.

Salvores xerca ancora tra detrito e atenta trae aida a vitimes de la trema plu temprana, cual ia es plu grande e ia mata ofisial 131 persones. Ma alga jornalistes local reporta un cuantia tan alta como 347 persones mor.

Alga viletas ia colasa completa. La governa dise ce plu ca 1400 persones ia es ferida, e plu ca 156 000 ia es deslocada. Alga rejiones en la norde de la isola ia reseta ancora no aida.

Lombok es situada a este de Bali, un isola pico plu grande, e lo ave sirca 4500 cilometres cuadrida. La plu de persones abita casas simple en comunias peti. Deses de miles dormi aora su la sielo o en la ruinas de sua casas. Car ospitales es ance afetada, on trata multe de la persones ferida su la sielo o en clinicas tempora.

La trematera de soldi ia aveni a mera alga dias pos un otra plu peti, cual ia mata a la min 16 persones. On deveni ansiosa ce la industria importante de turisme va es sever danada a un tempo cuando lo ta es normal multe ativa.

Miles de turistes ci visita Lombok, como ance Bali e la Isolas Gill, ia es ja evacuada o ia eleje mesma parti.

Indonesia es propensada a tremateras car lo es locada sur la Anelo de Foco, un linia de tremateras e erutas volcanal cual ensirca cuasi tota la borda de la Mar Pasifica. Supra la nivel de mar, plu ca un dui de la volcanes ativa en la mundo parteni a esta anelo.

2018-08-08

On acusa la ministro xef pasada de Malaisia sur froda

On ia fa tre acusas de lava de mone contra Najib Razak, ministro xef pasada de Malaisia, en relata con un scandal de froda de multe miliones de dolares.

El es acusada de reseta 42 milion ringites ($10 milion) de la compania 1MDB, poseseda par la governa, en sua conta personal de banco.

On ia aresta Najib en julio e ia acusa el sur rompe de fida e sur malusa de sua posto. La investiga nova sur 1MDB ia comensa pos sua perde surprendente en la vota de maio. El ia nega sempre la culpa e ia es remeteda par autoriosas malaisian cuando el ia es ancora la ministro xef.

Najib, como ance membros de sua familia e alga aliadas, es acusada de froda cuantias vasta de mone, sur cual on alega ce los ia es usada per compra cosas diversa, incluinte obras de arte e imobilas lusosa tra la mundo.

La alegas ia fa un rol sentral en sua vinse par un alia reformiste, gidada par Mahathir Mohamad, un veteran political ci ave 93 anios.

En semanas resente, la polisia ia invade imobilas liada a Najib e sua sposa. La polisia dise ce la saisi de valuosas – incluinte bolsas de moda, joalas e mone fisical – ia es la plu grande en la istoria de Malaisia.

1MDB, instituida par Najib en 2009, ia es intendeda per cambia la capital Kuala Lumpur a un sentro finansial e per aumenta la economia tra investis stratejial.

Lo ia comensa atrae atendes negativa en la temprana de 2015 cuando lo ia fali repaia alga de la 11 mil milion dolares cual lo ia debe a bancos e posesores de obligas finansial.

A pos, un jornal ia reporta ce lo ia vide un serie de documentos sur cual lo alega ce lo trasa cuasi $700 milion de la compania a la contas personal de banco de Najib. Miles de miliones de dolares es ancora nontrasada.

2018-08-07

Brasil clui e reabri sua frontera per venezuelanes

Brasil ia reabri sua frontera norde con Venezuela a persones fujinte de la problemes economial e political ala, pos clui lo per tempo corta. La Corte Suprema ia reversa un comanda plu temprana per clui la frontera asta cuando Brasil ta crea un situa conveninte per reseta la enflue grande de persones.

Persones autoriosa en la stato brasilera Roraima (a media de la rejion de la rio Amazon) dise ce sirca 500 venezuelanes traversa la frontera a cada dia.

La frontera ia es reabrida a migrores venezuelan pos alga oras ier. Un atenta parente de asasina contra Nicolás Maduro, la presidente de Venezuela, en la fini de semana, ia aumenta an plu la tensa en la pais.

Rosa Weber, judor de la Corte Suprema, ia anunsia sua deside corta ante medianote. El ia dise: "Lo no es justable ce on segue la via fasil de 'clui la portes' par causa de difisiles per ospita refujadas."

La comanda tempora par un judor de corte basa ia dise ce la frontera va resta abrida per brasileras e otra nonvenezuelanes. On ia intende ance abri lo per venezuelanes ci reveni de Brasil. Fronteras de mar e aira no ia es afetada par la deside.

En la tre anios pasada, multe miles de venezuelanes ia fuji a paises visina, xef Colombia e Brasil, xercante un situa economial plu bon. La plu de los ci ia traversa a Brasil en menses resente abita aora en state xocante mal sur la stradas de la Boa Vista, la capital povre de la state Roraima.

Tra menses, autoriosas en Roraima ia recomenda ce on clui la frontera. Los dise ce la servis publica ia colasa e ce la migra ia causa un crese notable de crimines.

La governa sentral de Brasil ia oposa tota cluis de frontera, razonante ce venezuelanes comun sufri la resultas de un crise umaniste e ce Brasil debe continua aida.

2018-08-06

Un avion de la Gera Mundal Du cade en Suiz

Dudes persones ia mori cuando un avion vea de la Gera Mundal Du ia cade sur un monte en la este de Suiz.

La avion ia porta 17 pasajores e tre ecipores en un vola turiste cuando lo ia enaira a la posmedia de saturdi.

JU-Air, la compania operante, ia espresa sua tristia sur la aveni e ia institui un numero de telefon per aida relatadas. Lo ia suspende tota volas per la tempo presente.

La pasajores ia es reveninte a Zürich pos un viaja de du dias en Locarno, prosima a la frontera sude de Suiz.

La avion no ia ave un caxa negra, e on ia pote poca monitori lo par radar par causa de sua loca distante alpan. On sabe ce lo ia colpa cuasi vertical la tera, a rapidia relativa alta. On ia elimina ja la posible de un colide con un otra avion o ostaculo.

Un person ci ia es sur la monte a la tempo de la cade ia dise ce la avion ia turna tra 180° a la sude, e ia cade a la tera como un petra.

De la dudes persones volante, des-un ia es omes e nove ia es femes. Los ia ave entre 42 e 84 anios. Des-sete ia es de Suiz e tre ia es osteraices.

La avion ia cade a sirca 2540 metres supra la nivel de mar, a la lado ueste de un monte de 3000 metres, nomida Piz Segnas.

JU-Air organiza turis de atraes en sua scuadron de aviones vea deutx. La turis enaira de la campo avional militar a Dübendorf, prosima a Zürich. La avion cual ia cade ia es mantenal esaminada en julio.

En un plu cade a saturdi, un familia de cuatro persones, incluinte du enfantes joven, ia es matada cuando un avion peti ia cade en Suiz sentral.

2018-07-27

Focones elinica ia es criminal ensendeda

Elas ave "indicas seria" ce un focon prosima a Atina, cual ia mata a la min 83 persones en la parte prima de esta semana, ia es ensendeda con intende.

La focon ia comensa a lundi e ia afeta viletas costal cual es popular con turistes. Sirca 60 persones es ancora tratada en ospital, e 11 de los es en state grave. Desuples de otra persones manca.

Salvores xercante un falesa en Mati, un vila costal, ia trova restas umana. Multe de la vitimes ia es trapida prosima a la falesa cuando la flamas ia estende rapida, intensida par ventas tan rapida como 120 cilometres per ora. Multe survivores ia es salvada par la mar, ma otra persones no ia pote ateni la acua.

Nikos Toskas, la ministro de proteje sitadanes, ia dise ce un otra focon prosima a Atina a alga oras plu temprana ia es ance inisiada con intende. Acel focon ia mata no person. El ia ajunta ce la state climal en la locas afetada par focones ia es "estrema par causa de cambia de clima".

Plu temprana, Panos Kammenos, la ministro de defende, ia dise ce construidas nonlegal ia contribui a la desastre, descrivente la construi par abitores entre areas boscin como "un crimin" cual ia bloci la vias de fuji.

Kammenos ia es encontrada par persones coler cuando el ia visita partes ruinada par focones a este de Atina en esta semana. Cuando el ia ariva en Mati, el ia es ensircada par abitores local ci ia acusa el de abandona los.

Ma el ia dise: "Esta es un crimin de la pasada. Esta costa de Atina, tota esta imobilas, la majoria es sin lisensa, e los ia ocupa la costa sin regulas."

Entre la persones mancante es Vassiliki e Sofia Philippopoulou, du xicas jemelo de nove anios ci ia es con sua avis, prosima a Mati, cuando la focon ia aveni.

Aora oji pausa per un semana.

2018-07-26

Facebook perde valua par crese tro lenta

La valua de asiones de Facebook ia cade par plu ca 20% ier, cuando la crese de revenu e usores de acel rede sosial ia fali sasia la espetas de investores.

La compania fronti un contrareata per sua trata de novas falsa e de privatia. Lo ia dise ce, a la fini de junio, lo ia ave 2,23 mil milion usores ativa mensal. Esta ia es plu ca en junio 2017 par mera 11% – la crese la plu lenta en plu ca du anios.

Lo ia averti ance sua investores ce sua crese de spende va esede sua ganias de revenu en 2019, reduinte la profitas.

Facebook espeta un lenti de revenu car persones comensa usa posibles nova de vide min anunsias comersial. Sua crese deveni ance propulsada par mercatos min profitosa ultramar.

Lo intende ance spende miles de miliones de dolares per boni sua metodos de monitori contenidas, trasa anunsiores comersial e prosede datos de usor. Esta partes de sua opera ia es resente esaminada par organizas regulante.

La compania, cual posese ance Instagram e WhatsApp, investi aora a posibles nova como video e realia virtual.

Inisial ier, sua asiones ia cade par sirca 12% en la oras tarda en York Nova, ma la perde ia aselera cuando la compania ia presenta sua projeta de spende.

2018-07-25

Un parario inonda un vileta lau

En Lau, on freta per trova survivores pos la colasa de un parario en la tarda de lundi. La colasa ia inonda alga viletas e ia mata a la min dudes persones. A la min sento persones manca ancora, e miles ia perde sua casas.

La parario ia es un parte de un projeta de enerjia idroeletrical cual envolve companias de Lau, Tai e Tehan (Corea Sude).

La autoriosas en la provinse Attapeu usa elicotores e barcos per atenta evacua viletanes trapida. Los ia apela a organizas governal e a otra comunias per furni aida como vestes, comedas, acua bevable e medisin.

Videos mostra survivores folida sur la tetos de sua casas sumerjida, o teninte enfantes e posesedas en cuando los vada tra acua.

90% de la parario ia es ja completa, e on ia intende comensa opera comersial lo en 2019.

En anios resente, Lau ia investi forte a potia idroeletrical, cual composa sirca 30% de sua esportadas. La governa intende dupli la produi de enerjia ante 2020, per deveni "la pila de Asia sude-este". Ma grupos averti sur la efeto de la projeta a la ambiente e a la nasiones cual la rio suporta.

2018-07-24

Cenianes perde sua casas per la crea de un autovia

On ia desconstrui la casas de sirca 30 mil persones en un visineria misera en Nairobi, la capital de Cenia, per crea spasio per un autovia nova con custa de $20 milion.

La abitores de Kibera, la visineria misera la plu grande de la site, ia es avisada a sola du semanas ante cuando los ia debe parti. Buldozeres ia avansa a lus prima, e on ia regarda sin potia.

La grupo per diretos umana Amnestia Internasional ia condena la descasis, ma ofisiores cenian ia dise ce la popla de la area ia es abitores nonlegal.

La abitores ia oposa la strada nova en corte, presentante du defias legal, ma ia perde en la anio pasada cuando un judor ia deside ce la autovia va benefica la popla. Autoriosas dise ce la autovia nova va redui la trafica en la ueste de la site.

A lundi, alga de la abitores de Kibera ia senta con sua posesedas e ia cria angusada.

Jacqueline Anzemo, un madre de tre enfantes ci ave 30 anios e ia abita en Kibera tra 16 anios, ia dise: "Nos ia es elevada asi, nos ia vade a scola asi, e nos ia sposi asi. Aora nos no sabe do nos va vade."

Ance Arthur Shakwira ia oserva cuando on ia crase la loca do el ia abita tra plu ca du desenios. "Me ia prende mea posesedas a un visina. Mea sposa e enfantes ia move a la casa de mea frate per reposa ala per la presente. Me no sabe de do me va comensa. Nos no ia refusa ce la strada pasa, ma on debe considera nosa bonstate."

On ia desconstrui du scolas prima e un orfaneria. Amnestia Internasional ia descrive la descasis como un trajedia nonlegal, notante la angusa de vide enfantes joven ci porta la posesedas de sua familias a via.

Irungu Houghton, la dirijor de Amnestia per Cenia, ia ajunta ce la desconstruis tradi un acorda ja fada per deside sur un projeta de relocali ante descasi.

La departe de la governa cenian per stradas urban ia refusa comenta direta, mera referente a un declara plu temprana en cual lo ia dise ce lo colabora con otra grupos per relocali la abitores.

2018-07-23

Un aspiror controversa per la presidentia de Brasil

Un politiciste controversa de la destra estrema, Jair Bolsonaro, ia declara formal ce el aspira la presidentia de Brasil en la eleje a esta otobre.

En sondas, esta ofisior militar pasada ocupa aora la loca du, pos la presidente pasada Luiz Inácio Lula da Silva. Ma Lula es en prison per froda e lo es nonprobable ce el va partisipa.

Bolsonaro ia coleri multe persones en Brasil con sua comentas raziste e omofobica. Ma sua suportores regarda el como un salvor en un pais criminosa. An tal, sondas sujesta ce el ta fali vinse an si el ta trova se en un rompelia.

Bolsonaro, ci ave 63 anios, ia anunsia se como aspiror ante sirca 3000 suportores aclamante a un asembla en Rio de Janeiro.

La congresor ia dise ce el va es representada par la Partito Sosial Libraliste, cual on no regarda como forte en la politica brasilera. Per esta razona, el va ave sola des secondos de tempo per la anunsias televisada de sua campania: un nonvantaje major en la compete presidental.

El ia dise: "Nos no ave un partito grande. Nos no ave finansia elejal. Nos no ave tempo televisada. Ma nos ave lo cual la otras no ave, cual es vos, la popla brasilera."

Bolsonaro es segueda par miliones de brasileras en redes sosial, e multe persones descrive el como "la Trump de Brasil". El recomenda laxi la leges sur fusiles per maneja la crimin, e es ance suportada par miliones de cristianes evanjelial per sua disposa noncomprometente contra la aborta.

2018-07-22

Barat cansela un imposta a produidas ijenial

En Barat, la governa ia cansela un imposta de 12% a tota produidas ijenial, pos menses de campania par ativistes.

La anunsia ia segue a un anio pos la introdui par la governa de imposta per tota benes, incluinte a 12% per produidas de ijenia menstrual. Campaniores ia dise ce la imposta va fa ce esta produidas deveni an min comprada en un pais do on estima ce cuatro de sinco femes e xicas ave ja no asede a tal cosas.

Surbhi Singh, fundor de un carital per promove consensia de sania menstrual, ia comenta: "Esta ia es un paso multe nesesada per aida xicas e femes a resta en scola e sua emplea, e a pratica bon ijenia menstrual. Esta va aida los a crese, a mostra sua potensia vera."

Un otra campanior, Amar Tulsiyan, ia descrive la deside como "un vinse grande per cadun" en la pais.

La menstrua es un de la razonas xef de la abandona de educa par xicas en Barat. Multe otras es obligada a resta a casa car los no pote asede produidas ijenial. Alga femes usa telas o trapos acaso, cual porta un risca de infeta si los no es limpa.

Donce cuando la governa ia eticeti tal tampones e teletas como cosas lusosa, con imposta de 12%, lo ia provoca direta un campania per cansela esta, incluinte defias en corte e solisitas formal, de cual un ia colie plu ca 400 mil suscrives. En hindi, la imposta ia es nomida "lahu ka lagaan", traduable como "imposta de sangue".

La anunsia ce la campania ia susede ia es fada par Piyush Goyal, la ministro tempora de finansia, ci ia dise ce el es "serta ce tota madres e sores va es multe felis de oia ce teletas de fem es aora tra 100% esentada de imposta."

2018-07-21

Un can detetante manca en Dar es Salaam

En Tanzania, polisiores xerca un can detetante talentosa ci manca ja tra du dias. Hobby es capas de catura contrabandores a la porto Dar es Salaam par ole fusiles, ivor e drogas.

Kangi Lugola, la ministro de internas, ia permete un dia a la polisia per trova la can, ma asta aora los no ia susede. El ia dise ce lo es posible ce algun ia prende Hobby a via de la porto, do sola tre otra canes detetante labora aora.

El ia comenta: "Lo cual me ia oia sur esta canes es vera nonplasente. On informa me ce alga es luada per otra usas. Me es vera tristida par esta reportas, car esta canes es polisiores."

En 2016, la SUA ia dona a Tanzania cuatro canes instruida per deteta ivor e drogas nonlegal a la porto e airoporto xef de la pais. Lo no es clar esce Hobby ia es entre los.

2018-07-20

Un casa covreda con un depinta par Van Gogh

En Florida, SUA, un maior ia espresa sua regrete a tema de un duple ci on ia multa per miles de dolares cuando los ia recrea La Note Stelosa par Vincent van Gogh sur la esterna de sua casa como un gidador per sua fio autiste.

La consilio de Mount Dora, cual ia dise a ante ce la depinta viole la leges de la site, ia acorda ance ce la arte pote resta e ce la familia va reseta un paia de $15 000.

La duple ia dise ce la arte es intendeda per aida sua fio a retrova sua via si el ta deveni perdeda.

En julio de la anio pasada, on ia informa la jenitores Nancy Nemhauser e Lubomir Jastrzebski ce la depinta, cual covre la esterna de sua casa, no obedi la leges de sinia de la site e ta pote deveni un distrae per motoristes. Plu tarda, on ia multa los per $10 000 e ia comanda ce los repinti supra la arte.

Nemhauser ia oposa la judi e la litiga la consilio per viole la direto de la familia a espresa libre, comentante sur sua fio ce "el ta pote a la min descrive la casa de Van Gogh e persones ta pote aida".

A martedi, la consilio de la site ia acorda unida sur la cansela de la multa e sur la paia a la familia. Maior Nick Girone ia espresa ance sua regrete a la duple, ajuntante ce sua site ave un istoria longa de suporta artistes.

La Note Stelosa es un de la obras la plu famosa par Van Gogh, e la casa ia deveni un atrae minor per turistes en la site, cual es situada a sirca 40 cilometres a norde-ueste de Orlando.

2018-07-19

Focones de la Sirculo Artica asta la Mar Baltica

Focones savaje arde en multe partes de Sveria, an tan norde como la Sirculo Artica, provocante solisitas per aida internasional.

En la posmedia ier, 44 focones ia es flaminte, de Sami en la norde estrema asta la isola Gotland en la sude. Los es xef causada par un clima calda e un secia persistente. La servi meteorolojial nasional ia averti sur risca de foco en cuasi tota la pais.

Italia ia aida par envia des-tre persones en du "bombadores de acua" de Canadair, de cual cada es capas de porta 6000 litres de acua. Noria ia envia des elicotores per aida sua visina, ses a martedi e cuatro plu ier, an con la risca de focones simil en Noria mesma.

En alga partes, la focones arde ja tra dias, e car la clima continua es multe calda e seca, lo no pare probable ce los va sesa.

On ia evacua multe persones de sua casas en Sveria, e ia recomenda ce otras clui tota fenetras e otra abris de venti per teni la fuma a estra.

La focon en Jämtland es la plu grande e la plu rapida cresente. Sola en martedi, sua area ia dupli cuasi, de 1600 ectares a 3000. Pompores no ia susede conteni lo. On retira multe pompores de vacanse per forti la opera.

Nove avertis publica major ia es fada – un cuantia recordo – con ce la temperatur ia resta prosima a, o plu ca, 30°C tra un tempo notable.

Un ofisior de salva en Jokkmokk, un vila popular per turistes de inverno, ia dise: "La plu resente cuando nos ia vide focones savaje de esta grado ia es a des-du anios ante aora."

La servi telefonal de crise en Sveria, SOS Alarm, ia dise ce lo labora estrema par causa de la focones. Lo reseta multe clamas de persones ci diverti se en la clima solosa e ci encontra problemes en nada, barci o bisicli.

2018-07-18

On trova la atesta la plu vea de pan

Arceolojistes ia descovre la atesta la plu vea de la prepara de pan, en un loca de escava con eda de 14 mil anios.

Lo ia ta aspeta como un pan plata e ia ta sabori alga simil a la varias moderna cual on prepara con granes diversa. Cisa nosa asendentes ia usa lo per conteni carne rostada. Tal, lo ta es ance la sanduitx la plu vea.

La descovre, en un deserto en Urdun, temprani la atesta prima de pan par plu ca 5000 anios.

La panores de la eda de petra ia prende farina preparada de trigo e orzo savaje, ia misca lo con radises moleda de plantas, ia ajunta acua, e ia forni lo sur petras calda sirca un foco.

Pan es ja longa un comeda major per umanas, ma on sabe poca sur la orijinas de prepara lo. Asta aora, la atesta la plu vea de pan ia veni de Turcia, en trovas cual ave 9000 anios.

En Urdun, siensistes ia descovre du construidas. Cada conteni un ximineria grande e sirculo de petra, en cual on ia trova picos carbonida de pan. Analiseda su microscopio, la samples ia indica sinias revelante de mole, tamisi e amasa.

La abitores de la rejion a acel tempo ia es xasores-coliores. Los ia xasa gazelas e ia trapi animales plu peti, como lepres e avias. Los ia foraje ance per comedas plantal como nozas, frutas e sereales savaje.

La rexercores opina ce la pan ia es preparada cuando persones ia asembla per un selebra o banceta.

Esta ia aveni ante la inisia de cultiva, cuando on ia comensa crese sereales e eleva animales, e donce lo es posible ce la razona per comensa an cultiva ia es la desira per come pan.

2018-07-17

Trump es criticada pos defende Rusia

Multe persones en la SUA ia reata criticante cuando presidente Donald Trump ia defende Rusia sur alegas de interfere en la vota esuan de 2016.

A un consenta con la presidente rusce Vladimir Putin en Finland, Trump ia contradise sua departes de securia, disente ce Rusia ia ave no razona per interfere.

La republiciste xef en la Congresa, Paul Ryan, ia dise ce Trump debe vide ce "Rusia no es nosa aliada". E Dan Coats, la dirijor de securia nasional de la SUA, ia alega ce Rusia es culpable de "atentas continuante e permeante" de sumina la democratia.

Putin ia nega la alega.

Ier, la du presidentes ia fa cuasi du oras de discutes sin sua conselores, en la capital finsce, Helsinki.

A un confere jornaliste a pos, on ia demanda a Trump esce el crede sua departes de securia o la presidente rusce a tema de la alegas de interfere en la vota. El ia responde: "Presidente Putin dise ce Rusia no ia fa lo. Me vide no razona perce lo ta fa lo."

Trump ia culpa ance governas pasada de sua pais, e no atas rusce, per la mal relata de la SUA con Rusia.

Plu tarda, el ia desfa sua pasos, tuitante ce el ave "fida grande a mea persones de securia".

En 2016, departes de securia esuan ia conclui ce Rusia ia inisia un atenta de influe la eleje contra Hillary Clinton, con un campania autorida de siberatacas e articles de novas falsa en redes sosial.

2018-07-16

Frans gania la Copa Mundal

En futbal, Frans ia vinse Corvatsca par 4–2 en la final de la Copa Mundal, deveninte campiones de mundo a la ves du.

Finales de la Copa Mundal en anios resente ia furni poca goles, ma esta final ia ateni la soma combinada de goles en la cuatro presedente. La final la plu resente con plu ca du goles ia es en 1998, a la otra ves cuando Frans ia gania.

Lo ia egali ance la cuantia recordo de goles en un final pos 1958, cuando Brasil ia vinse Sveria par 5–2. La torneo de 2018 ia furni 169 goles – du min ca la recordo de 171 en Brasil a cuatro anios ante aora, e en Frans en 1998.

En esta anio, la Copa Mundal ia vide 12 autogoles, e an la final ia conteni un. La corvatsce Mario Mandžukić ia fa un colpa de testa par cual el ia deveni la juor prima ci ia fa un autogol en un final de la Copa Mundal. Esta ia es an la gol prima de la max.

La franses Kylian Mbappé ia deveni la juor tre con min ca 20 anios ci ia partisipa en un final de la Copa, e la numero du ci ia fa ala un gol, pos la du par Pelé contra Sveria en 1958. Plu temprana en la torneo, Mbappé ia deveni ance la juor prima su 20 anios ci ia fa du goles en cualce max de Copa pos acel juor brasilera famosa.

En esta final, Hugo Lloris, la capitan franses, ia fa cisa la era la plu grande de la torneo intera. Cuando sua coecipor Samuel Umtiti ia reenvia la bal a el, Lloris ia atenta move la bal sirca Mandžukić, ma ia susede mera colpa lo contra el e a en sua propre gol. En esta modo, Mandžukić ia deveni la juor du ci ia fa e un gol e un autogol en un max de la Copa Mundal, e la prima en un final.

Car la torneo ia es ospitada par Rusia, on ia ave ansia sur la posible de razisme, vandalisme e violentia contra fanes ge. Ma tota ia rola lisa – asta un invade de la campo en la final, sur cual la grupo punc Pussy Riot ia dise ce los ia inisia lo, per protesta contra alga problemes political en la pais.

Empleadas ia reata rapida per sutrae la protestores de la campo, ma alga de los ia fronti juores de ambos lados.

2018-07-15

Un vileta gronlandes es menasada par un isberg

Un isberg enorme ia flota prosima a un vileta en la ueste de Gronland, provocante un evacua partal per caso ce lo fende e produi un onda deluviante.

La isberg tori supra casas sur un promontania en la vileta Innaarsuit, ma ia deveni encaliada e no ia move en la note. Persones local ia vide nunca un isberg tan grande.

En la estate pasada, cuatro persones ia mori en Gronland norde-ueste cuando un trematera ia crea ondas cual ia deluvia casas.

Innaarsuit ave sola 169 abitores, e on ia move los ci es la plu prosima a la monte de jelo flotante.

Un membro de la consilio de vileta ia comenta: "Lo ave fesures e bucos cual fa ce nos teme ce lo pote fende a cualce tempo." El ia ajunta ce la sentro eletrical e tances de combustable es prosima a la custa.

Alga espertas ia averti ce isberges estrema risca deveni plu comun par causa de la clima cambiante, e esta va grandi la risca de tsunamis.

En junio, siensistes ia publici un video de un isberg jigante fendente de un glasia en Gronland este.

2018-07-14

La presidente de Ertra visita Itiopia

Isaias Afwerki, presidente de Ertra, va ariva en Itiopia a la ves prima pos la comensa en 1998 de la gera fronteral entre la du paises.

Sua visita intende forti la reconsilia resente de la enemis longa. Un acorda de pas per fini la gera de 1998–2000 ia es nunca completa realida, e on ia ave un tensa entre la du paises sempre a pos. Aora on ia acorda reinstitui relatas comersial e diplomata.

La frontera ia es cluida a la fini de la gera, separante familianes. La du paises ia es en un state de "no gera, no pas" de pos 2000, cuando los ia fini un gera en cual deses de miles de persones ia es matada.

Un comision fronteral, instituida par la acorda de pas, ia judi ce la vila Badme, la sentro de la gera, parteni a Ertra. Ma Itiopia ia refusa aseta esta, e donce on ia recomensa nunca la relatas normal.

La disputa ia afeta la rejion intera, con ce cada pais ia adota opinas oposada sur cualce tema. Los ia oposa lunlotra ance en la gera longa de Somalia. On ia acusa Ertra de suporta grupos islamiste, e Itiopia, aliada con la SUA, ia suporta la governa internasional reconoseda.

Asta aora, Ertra ia dise sempre ce la gera pote recomensa a cualce tempo, e donce lo obliga sitadanes a enscrive militar, cisa sin fini. Esta es un de la razonas xef per cual tan multe ertris atenta parti de la pais, xercante refuja en Europa.

La visita de Afwerki es un cambia notable per la presidente, ci ave 72 anios e ia deveni diplomata isolida e regardada como secretosa e paranoica.

Cuando Abiy Ahmed ia emprende la posto de ministro xef de Itiopia a tre menses ante aora, el ia introdui multe cambias. En ajunta a sua invitas a Ertra, el ia sutrae un state de crise, ia libri prisonidas political e ia anunsa reformis economial.

El ia erita un pais cual ia esperia un de la creses economial la plu rapida de mundo en anios resente, ma ia es ance divideda par anios de protestas par persones ci senti marjinida. Multe persones ia acusa la governa presedente de violes de diretos umana, incluinte torturas e matas estralegal de oposores political.

Abiy es la xef itiopian prima de la etnico oromo, la grupo a la cor de cuasi tre anios de protestas antigovernal en cual sentos de persones ia mori.

La du xefes ia dise ce sua paises va boni la relatas political, economial e diplomata. On va reinstitui lias de transporta e telefon. E on previde ce la volas prima entre la paises en du desenios va aveni en la semana veninte.

Tra la dudes anios pasada, on no ia pote viaja direta de un nasion a la otra. On ia ave no volas, la frontera ia es cluida, e linias de telefon no ia funsiona. La cambia ofre la posible de reuni final per familias divideda par la gera.

2018-07-13

Lias a la disionario primida en Amazon

Disionario de lingua franca nova: elefen–engles / engles–elefen

amazon.com
amazon.co.uk
amazon.es
amazon.fr
amazon.it
amazon.de

Compra e saborea!

Alga imajes:
La paje prima de la introdui
Un paje tipal en la parte elefen–engles
Un paje tipal en la parte engles–elefen

Trump "sur un unicorno supra un arco de sielo"

Sean Spicer, portavose pasada per Donald Trump, ia descrive la presidente de la SUA como "sur un unicorno supra un arco de sielo" en sua libro nova.

La portavose prima de la Casa Blanca de Trump scrive lodante sur sua empleor pasada, ma el ance contradise sua judi de Paul Manafort, la xef pasada de campania.

"Me no crede ce nos va vide denova un aspiror como Donald Trump," Spicer scrive. "Sua ata de trapezior es tal ce poca persones va pote segue lo. El es sur un unicorno supra un arco de sielo. Sua capasia de pivote de un momento cual ta pare fini la carera asta un ataca furiosa contra sua oposores es un talento cual poca politicistes dispone."

La libro contradise comentas presedente par Spicer sur Manafort, ci ia resinia en agosto 2016 entre alegas ce el no ia declara paias orijinante en paises pasada soviet do el ia labora como un promovor political. El ia es prisonida en junio, acusada de lava de mone, froda de imposta, fali rejistra se como un ajente stranjer, e impedi de justia.

En un confere jornaliste a la Casa Blanca, Spicer ia dise ce Manafort ia "fa un rol multe limitada tra un cuantia multe limitada de tempo". En la libro, Spicer scrive ce Manafort "ia trae un maturia multe nesesada a la campania de Trump", ajuntante ce ante sua partisipa, "on ia ave no pare de un strutur de campania, ma sola alga persones ajitada e tro laborante ci ia abaia constante a sua telefones. Paul ia institui e ia ecipi la la operas political e comunical nesesada per combate la macina de [Hillary] Clinton."

Spicer scrive ance ce la Departe SUA de Securia Interna ia consenta con la campania en otobre 2016 per serti los "ce on ave no modo de infiltra o manipula la resulta de un eleje nasional." Ma securiores SUA ia conclui ce piratas rusce ia ataca servadores democrata de eposta e ia fa otra siberatacas per aida la campania de Trump.

"Parente crede ce Clinton va vinse, los ia suplica nos a espresa publica un sertia sur la solidia de la prosede, sistem e resulta de vota," Spicer scrive.

2018-07-12

Un redui grande a la custa de petrolio

La custa de petrolio ia redui multe ier cuando Libia ia dise ce lo va aumenta la furni, an si investores teme ce la tensa comersial va afeta la compra.

Petrolio Brent ia redui par 6,9% – la cade la plu grande en plu ca du anios – fininte a $73,40 per baril. Petrolio SUA ia cade par 5% a $70,38 per baril – sua redui dial la plu grande en un anio.

Esta segue un reenerji tra menses cual ia leva la custa asta un de la niveles la plu alta en anios resente. Ma la custa de petrolio ia deveni volatil en la semanas resente, pos cuando la SUA ia anunsia ce lo va repone punis contra Iran, un produor major.

La vende ier ia comensa pos un anunsia par la Corpora Nasional de Petrolio de Libia ce lo va reabri cuatro terminas de esporta cual lo ia clui en la tarda de junio, impedinte la plu de la esflue de petrolio de la pais.

La redui de custa ia aveni an con un reporta par la governa SUA ce sua reservas de petrolio ia diminui par plu ca 12 milion bariles en la semana pasada e es aora plu basa par sirca 4% ca la promedia per esta parte de la anio.

Suhail Al-Mazrouei, la presidente de OPEP, ia dise ce volatilia en la custa de petrolio no es desirable: "Flutua no es bon, e nos no gusta vide multe flutua en la custas."

Economistes es ansiosa ce la crese de tensa comersial entre la SUA e Xina va dana la economia global, reduinte la compra.

A martedi, la SUA ia desveli un lista de $200 mil milion de produidas a cual on va ajunta un tarifa de 10%, provocante Xina a promete un contratatica. Esta ia segue la reali en la semana pasada de tarifas a $34 mil milion de la benes de cada de la du paises.

An si on no previde un resulta estrema mal de la tarifas, esta va pote cambia si la interbatalia continua. Xina ia es la importor la plu grande de petrolio en la anio pasada, segueda par la SUA.

2018-07-11

La estraeda la plu vea de la Odisea

Un tableta de arjila escavada conteni cisa la testo la plu vea trovada en Elas de la Odisea, un poesia epica de Homero.

On ia descovre la tableta en un escava arceolojial prosima a la ruina de la Templo de Zeus en la site antica Olimpia, e on ia dati lo a la eda roman.

Lo es gravada con 13 linias de la poesia cual raconta la aventuras de la eroe Odiseo pos la cade de Troia. La nara ia es probable composada en la tarda de la sentenio oto aec, e es tradisional atribuida a un poesiste semilejendal nomida Homero. On ia resita lo per recorda lo tra sentos de anios ante la enscrive de la tableta.

On ancora no ia confirma la data esata de la tableta, ma la ministreria de cultur elinica ia descrive sua descovre como "un esibi grande arceolojial, epigrafial, leteratural e istorial". La escavas cual ia trova lo ia ocupa tre anios.

La Odisea es jeneral regardada como un obra influosa a leteratur ueste. En sirca 12 mil linias, la poesia nara sur Odiseo, re de Itaca, ci ia pasa des anios en atenta reveni a sua propre pais pos partisipa en la destrui de la rena de Troia.

La tableta ia es descovreda par rexercores elinica e deutx. Lo conteni 13 linias de capitol 14 de la poesia, en cual Odiseo parla a sua ami Eumeo.

2018-07-10

La moleculas colorosa la plu vea de mundo

Siensistes ia descovre lo cual los descrive como la colores biolojial survivente la plu vea de mundo, de rocas antica su la deserto Sahara.

La eda de la pigmentos es 1,1 mil milion anios. Los ave un color briliante ros, ma en sua forma consentrada los varia de un roja sanguin asta un purpur oscur e intensa.

Los es moleculas fosilida de clorofila produida par organismes maral. Per estrae los, rexercores ia mole xel a polvo.

Nur Gueneli, un studiante dotoral de la Universia Nasional Australian, ia trova la pigmentos cuando el ia pasa un disolvente organica tra la roca polvida. La prosede de estrae ia es "simil a un macina de cafe".

Un profesor ia comenta: "Lo es simple stonante ce alga cosa con color biolojial pote survive tra un tempo tan longa."

Un compania de mina ia trova la rocas en un deponeda de xel maral en la Basin Taoudeni en Muritania, en Africa ueste, a sirca des anios ante aora, pos fora un buco a profondia de sentos de metres.

Analisente la pigmentos, on ia trova ce los ia es produida par sianobaterias en la mares a mil milion anios ante aora. Esta contribui a nosa comprende de la evolui de vive sur la Tera.

A acel tempo, sianobaterias pico ia domina la funda de la cadena nural en la mares, preveninte la esiste de animales plu grande contempora. Viventes no ia deveni plu grande asta sirca 600 mil milion anios ante oji, car on no ia ave un fonte sufisinte de comeda a ante.

La rexerca ia envolve ance siensistes en Japan e la SUA.

2018-07-09

Un ofisial enebriada retarda trenes barati

En la stato Uttar Pradesh en Barat norde, alga trenes ia es retardada cuando la xef de stasion ia deveni enebriada e ia adormi en sua labora.

Deep Singh no ia responde a telefonis repeteda de ofisiores, tal ce los ia freta a la stasion de Murshadpur. Los ia trova ce el dormi en sua ofisia con botelas vacua de distilada sur la solo.

Un esamina medical ia mostra un cuantia grande de alcol en sua sangue. On ia comanda un investiga.

"El ia es tota enebriada e apena capas de pasea," un ofisior major de ferovia ia dise, ajuntante ce la aveni ia es "multe grave" e va es investigada.

Multe trenes de distantia longa ia debe para car la stasion no ia mostra un sinial verde. La cuantia de trenes cual pasa tra la stasion de Murshadpur en cada dia es alta. Tra la pais, plu ca 22 milion baratis viaja dial en sirca 9000 trenes.

Tal avenis no es sin presedente en Barat. En April, on ia suspende la emplea de alga persones en la stato Orissa cuando 22 vagones ia deveni desfisada de un tren e ia rapidi a retro tra 11 cilometres.

E en novembre de la anio pasada, un grupo de cultivores veliante ia descovre ce la tren en cual los viaja ia vade tra 160 cilometres en dirije noncoreta en la note.

2018-07-08

Deluvias e tera liscante en Japan

A la min 60 persones ia es matada par inondas e liscas de tera en areas ueste de Japan. Desuples de otra persones manca.

La plu de la moris ia aveni en la prefetia Hiroshima, cual ia es bateda par un pluve deluvial cual ia comensa a jovedi. Sentos de casas es danada.

On ia comanda ce sirca 1,5 milion persones parti de sua casas, e consela la mesma a tre milion otras.

Autoriosas dise ce lo es cisa la desastre climal la plu grave cual Japan ia esperia en desenios. Shinzo Abe, la ministro xef, ia dise ce on fa "un corsa contra la tempo" per salva e evacua persones.

Alga de la vitimes ia deveni enterada su la tera liscante. Miles de polisiores, pompores e soldatos partisipa en operas de xerca e salva.

En la vila Motoyama, a sirca 600 cilometres a ueste de la capital Tokyo, 583 milimetres de pluve ia cade entre la matina de venerdi e lo de saturdi, longo la ajenteria meteorolojial de la pais. On previde plu pluve en la dias veninte.

Kyoto, a sirca 300 cilometres a este de Hiroshima, ia es ance deluviada. Persones ci abita prosima a la rio es nervosa car la saison de siclones comensa aora.

2018-07-07

Cloro ia es cisa usada en la ataca a Duma

Un organiza vijilante sur armas cimical dise ce cloro ia es cisa usada en un ataca contra la site Duma en Suria en april. La reporta tempora par la Organiza per la Proibi de Armas Cimica (OPCW) dise ce on ia trova "cimicales organica clorida diversa", ma no indica de gases nerval.

Desuples de sitadanes ia es matada en la ataca contra la vila ocupada par rebelores en la rejion Guta Este prosima a Dimashq. La governa suri nega ce lo ia esecuta atacas par armas cimical. Pos la ataca a Duma, aviones militar de la SUA, Britan e Frans ia ataca blancos militar governal.

Potias nova ia es resente donada a OPCW per nomi los ci usa armas cimical. Sua investiga sur la ataca a Duma continua.

A 7 april, medicistes en Duma ia reporta ce on ia trae plu ca 500 pasientes a sentros medical con sintomes cual ia sujesta esposa a un cimical. Laborores de salva ia reporta ance un odor forte de cloro en la aira pos un ataca airal contra du locas en Duma.

OPCW ia envia un mision rexercante a Duma a sirca un semana a pos. Sua reporta aora dise ce du samples de silindres de gas a la sena ia indica positiva sur cloro.

Pos la ataca, un investiga par la Nasiones Unida ia dise ce la atesta sujesta la usa de cloro, ma ce alga persones ia mostra sintomes plu coerente con esposa a un gas nerval. An tal, la reporta par OPCW ia dise ce "no gases nerval organofosforal o produidas de sua descomposa ia es detetada" a la locas.

La aseja de Guta Este, un rejion cultival estra la capital do a la min 265 000 nonmilitares ia abita, ia dura tra sinco anios, e ia deveni la aseja la plu longa en istoria moderna. Lo ia fini en april, pos un ataca de du menses par fortes progovernal, suportada par atacas airal rusce, cual ia destrui casas, companias e ospitales e ia mata plu ca 1700 persones.

2018-07-06

Canada esperia un semana de temperatur estrema

En Canada, tredes-tre persones ia mori en un onda de caldia forninte la parte sude de la provinse Quebec.

La temperatur nonormal ia comensa a un semana ante aora, e ia ateni 35°C con umidia alta. Persones ia mori a cada dia en esta semana. La plu de los ia ave entre 50 e 80 anios.

La caldia es la plu estrema cual la provinse ia esperia en desenios. On recomenda bevi multe acua e resta en ombra.

La site Montreal ia abri pisinas e construidas con frescadores per la usa de la popla. Respondores medical prima ia visita casas de 15 mil abitores perilida, per serti sua bonstate.

18 de la 33 moris ia aveni en Montreal, la site la plu poplada en la provinse. Otra moris ia aveni en la rejiones ensircante.

Ondas de caldia pote es spesial perilosa per persones multe joven o multe vea e debil. La plu de la montrealanes ci ia mori ia ave plu ca 65 anios, problemes medical esistente, e no frescador.

La temperatur promedia en Montreal en esta parte de la anio es sola 25°C. On predise ce la caldia va redui multe oji, cadente asta 24°C.

2018-07-05

Xicos tai ancora trapida en un cava

En Tai, salvores batalia la clima per libri la des-du xicos e sua instruor de futbal ci es trapida en un cava inondada.

On previde la comensa de pluves forte pos un pico de dias. La nivel de acua va leva, menasante la loca do la grupo ia refuja se.

La provinse Chiang Rai ia esperia un periodo corta de clima seca en la dias resente. Aora on considera la modo la plu bon de retrae la grupo a securia.

La governor provinsal ia dise ce un posible es flota la xicos en jacetas inflable. El ia dise ance ce on instala linias de telefon en la cava afin la xicos pote parla a sua familias, ma la linias ancora no ia ateni la xicos.

On prende ance un telefon nova a la cava, car un presedente ia cade en la acua e ia sesa funsiona.

Si la pluve sesa per tempo sufisinte longa, on ave un posible ce la grupo ta pasea o flota tra la compleso de cavas, en loca de sumerji.

A presente, la viaja de la entra a la cava asta la grupo ocupa ses oras, e la reveni ocupa sinco. Multe de la xicos no pote nada, e on va debe ensenia a los la tecnica fundal de sumerjores si los va sorti en acel modo.

La militar tai ia dise ce si la grupo no pote sorti par sumerji, los va debe cisa spende cuatro menses en la cava asta cuando la inonda basi denova. On prepara comedas e otra furnis per acel situa.

On atenta redui la risca de plu inondas par pompi acua de la sistem de cavas. La nivel de acua ia cade tra plu ca 40 sentimetres de ier, tal ce salvores pote aora pasea tra un estende de 1,5 cilometres de la entra asta la cambra tre.

La xicos, con edas entre 11 e 16, e sua instruor de 25 anios ia entra a la cava a 23 junio cuando lo ia es seca, ma un pluvon subita ia bloci la sorti. On ia trova la grupo a lundi, sur un area peti de roca a sirca cuatro cilometres de la boca de la cava.

2018-07-04

Un turiste mori sur Uluru

Un turiste japanes ia mori en asende Uluru en Australia sentral.

La om, ci ia ave 76 anios, ia colasa ier a sirca la altia media de la roca e on no ia pote revive el. On no trata sua mori como suspetosa.

De la desenio de 1950, a la min 37 persones ia mori en esta asende, cual on va proibi de otobre 2019. Tra tempo longa, la australianes orijinal ia demanda ce visitores no trepa sur la monolito jigante, car lo es un loca santa.

La polisia de la Teritorio Norde ia dise ce un elicotor ia vola la turiste a un sentro medical prosima, do on ia declara ce el ia mori.

Plu ca 250 000 persones visita la monumento, istorial conoseda como Ayers Rock, en cada anio. La mori la plu resente rejistrada ia es en 2010.

Autoriosas dise ce sola 16% de visitores entre 2011 e 2015 ia fa la asende, cual es presipe e ocupa sirca un ora de tempo.

En la anio pasada, la comite de la Parce Nasional de Uluru e Kata Tjuta ia vota unida per proibi la trepa par causa de la importa cultural.

Un declara a la pajeria de la parce dise: "Tro multe persones ia mori en atenta asende Uluru. Multe otras ia deveni ferida en la asende. Nos senti un tristia grande cuando un person mori o es ferida sur nosa tera."

2018-07-03

Nos anunsia la disionario primida de elefen

La labora longa per prepara e coreti la disionario primida de elefen es oji completida.

La Disionario de lingua franca nova: elefen–engles / engles–elefen va es disponable per compra ante la fini de julio. [Ajuntada, 13 julio: alga lias a lo en Amazon.]

La libro ave 14mm de largia, 21,5mm de altia e, con 622 pajes, plu ca 3cm de spesia. La parte elefen–engles coresponde a nosa disionario enlinia, e la parte du conteni la mesma informas en reversa, atendosa editada a un forma oportun.

Sur la covrente retro, la testo seguente presenta la obra:

Esta disionario bilingual es dirijeda a parlores de engles ci usa lingua franca nova, un lingua aidante internasional construida par George Boeree, prima publicida a la rede en 1998, developada par sua comunia tra du desenios, e aora comun conoseda – longo sua inisiales – como elefen.

La parte elefen–engles conteni plu ca 17 000 entradas xef e plu ca 6 000 espresas ajuntada; on trova plu ca 34 000 entradas xef en la parte engles–elefen. La libro ofre ance un resoma corta de la gramatica elefen, incluinte listas aidosa de parolas funsional, prefisas e sufisas.

Nos grasia Michael Everson, ci ia emprende la taxes major de tipografi e publici la libro. E per sita la prefasa: nos opina ce esta disionario va es un bon ajunta a vosa bibliotecas.

2018-07-02

Mexico eleje un presidente nova

Andrés Manuel López Obrador, la aspiror sinistriste, ia gania clar la eleje presidental de Mexico.

Un conta rapida pos la eleje ier ia indica ce la maior pasada de la Site Mexico ia vinse con sirca 53% de votas, plu ca la duple de los de sua defior la plu prosima.

Ance la sondas a sorti ia predise un vinse per López Obrador, conoseda per sua inisiales AMLO. Sua oposores ia sede, lodante el sur sua vinse.

La resultas inisial sujesta ce José Antonio Meade, la aspiror de la partito governante, ocupa la loca tre. Sua Partito Revolual Institual ia domina la politica mexican tra multe de la sentenio pasada, ma sua popularia diminui aora.

En sua comentas publica prima pos la eleje, López Obrador ia dise ce la mision xef de sua governa va es la elimina de froda e esenta. El ia dise ce el va xerca ance "amia e coopera" con la Statos Unida.

Relatas con Washington es tensada pos la eleje de presidente Donald Trump, ci ia critica forte Mexico sur comersia e migra. Ma ier, Trump ia tuita un loda a López Obrador "sur deveni la presidente veninte de Mexico".

2018-07-01

Un anunsia de locas nova de erita mundal

UNESCO, la organiza cultural de la Nasiones Unida, ia consenta en Barain per acorda alga locas monumentin tra la mundo cual on debe conserva per sua importa cultural, istorial o siensal. Esta locas va es legal protejeda su tratas internasional. Los inclui la seguentes:

— En la este de Oman, la site muronida Qalhat ia es un porto major en la sentenios 11 e 15. UNESCO descrive lo como "un atesta arceolojial unica" de la relatas entre la este de Arabia e la resta de la mundo.

— La isola Kyushu en Japan conteni un loca cristian de des viletas, un castel e un catedral, construida en la sentenios 18 e 19, cuando cristianisme ia es proibida en la pais. Esta loca refleta la ativia la plu temprana de misionores e colonistes cristian en Japan.

— Pos deveni un sentro de comersia global en la tarda de la sentenio 19, Mumbai ia inisia un projeta major de arciteta, creante construidas bela per abita e labora. Los en la stilo gotica victorian ave un aspeta clasica con balcones e verandas, e los de arte deco es sinemas, apartes e ospitales en multe colores.

— Al-Ahsa, en la este de la Penisola Arabi, es la oasis la plu grande de mundo. Umanas abita lo ja de la eda neolitica asta oji. Lo conteni ance jardines, canales, fontes, posos, un lago de drena, construidas istorial, locas arceolojial e 2,5 milion datilos. UNESCO descrive lo como "un esemplo esetal de interata umana con la ambiente".

— La moncerias montanial Sansa en la sude de Tehan opera como sentros relijial de la sentenio 7. On ave sete templos conteninte patios abrida con salas de educa, paviliones e salones ornosa budiste.

— A oto locas arceolojial en Fars, un provinse irani, un misca de strutures fortida, palasios e planas de sites survive de la eda de la Impero Sasanan, de la sentenios 3 asta 5. Longo UNESCO, esta locas refleta no sola "la usa masimida de topografia natural", ma ance la influe de arte roman e la tradisiones de la cultures acemenan e partian.

— Thimlich Ohinga en Cenia es la abiteria con mures de petra seca la plu bon conservada. Lo es situada a norde-ueste de la vila Migori, e es tipal de la rejion de Lago Victoria. On crede ce lo ia es construida en la sentenio 16, parente como un fortres per comunias pastoral e sua bestias.

2018-06-30

Mone furada va es donada a nijerianes povre

En Nijeria, mone furada par la renor militar pasada Sani Abacha va es redistribuida a familias povre, pos cuando plu ca $300 milion ia es redonada par la autoriosas en Suiz.

La mone ia es furada par Abacha en la desenio de 1990. On va comensa dona lo a sirca 300 mil casa en la mense veninte, tal ce cada reseta sirca $14 per mense.

La paias, a abitores en 19 de la 36 statos de Nijeria, va continua tra sirca ses anios. Ma oposores teme ce los es cisa un modo de influe la votas en la anio veninte.

La mone ia es orijinal deponeda en Luxemburg, e es mera un frato de la biliones de dolares alegada como furada cuando Abacha ia governa de 1993 a 1998. El ia rena Nijeria con punio ferin asta sua mori subita a 8 junio 1998, parente par un ataca de cor.

La regania de mone furada ia es un parte major de la campania de eleje de presidente Muhammadu Buhari en 2015. El ia dise ce el va aspira deveni reelejeda.

On crede ce Suiz ia redona sirca mil milion dolares a Nijeria en la des anios pasada.

La paias pertine a la Program de Rede de Securia Sosial Nasional de Nijeria, cual aida familias povre. La mone va es donada como paias partal e en cuantias peti, comensante en julio e supravideda par la Banco Mundal, cual va fa ance esaminas periodal.

Si la paia prima no es coreta manejada, on va sesa paias seguente, per preveni ce on fura la mone denova.

2018-06-29

Xicos tai trapida en un cava

Des-du futbalores joven e sua instruor es trapida en un cava en la provinse Chiang Rai en Tai tra cuasi un semana.

Los ia desapare pos parti per esplora la cava Tham Luang Nang Non, acompaniada par sua instruor, ci ave 25 anios. On crede ce los ia deveni trapida par acua levante.

Un xerca grande per la grupo ia saisi la atende de la pais.

Alga usores de redes sosial ia comparti un imaje de la xicos sentante sur un senglar, cual es la sinifia de la nom la ecipo Moo Pa per cual los jua futbal. Otras ia envia mesajes suportante a la salvores.

On reporta ce la enfantes ia visita frecuente la cava en la distrito Mae Sai per eserse a recrea. Ma en la saison pluvosa, entre junio e otobre, la cava pote deveni inondada a profondia de sinco metres.

Car la boca xef de la cava es aora blocida par acua, sumerjores profesal, salvores e militares ia labora per trova un otra modo de entra. Sua atentas es frustrada par la profondi continuante de la acua en la cava.

On no sabe esata do la grupo es trapida, ma impresas de pede ia es trovada en la compleso de cavas, donante espera ce la xicos vive ancora.

Mesajes enviada par la enfantes ante sua parti a saturdi sujesta ce los ave lampas de pox e alga comedas.

2018-06-28

Macron reintrodui la servi nasional a Frans

La governa franses ia introdui un scema de servi nasional per tota persones de 16 anios.

Esta idea ia es proposada par Emmanuel Macron en sua campania presidental, per promove un senti de debe munisipal e unia nasional entre jovenes franses. Ma alga resta nonconvinseda sur la vantajes.

La servi nasional va afeta e xicas e xicos e va es divideda en du fases. La prima es un posto obligante per un mense, con foca a cultur munisipal, sur cual la governa dise ce lo va "permete ce jovenes crea relatas nova e developa sua rol en sosia".

Ensenia sin salario e labora con organizas carital es entre la posibles, como ance la prepara tradisional militar con la polisia, armada o pompores.

La fase du es un posto nonobligante per entre tre e des-du menses, en cual jovenes va es corajida a servi "en un area liada a defende e securia" – ma denova los pote eleje fa taxes nonpaiada cual pertine a la istoria cultural, a la ambiente o a la aida sosial.

Cuando Macron ia sujesta la idea en la anio pasada, lo ia es un spesie de servi militar miniatur, tal ce tota sitadanes franses ta es obligada a reseta "un esperia direta de la vive militar" per minima un mense entre la edas de 18 e 21 anios.

On ia moli e largi esta a lo cual on nomi un Servi Nasional Universal, partal par causa de un teme ce la program orijinal ta custa tro multe e ta supracarga la fortes militar de la pais. An aora, on estima ce la scema va custa 1,6 mil milion euros per anio, con 1,75 mil milion euros de investi inisial.

Aora on comensa consultas, intendente reali la program en la temprana de la anio veninte. Ma on ave ancora multe detalias per deside, incluinte la funda legal.

Un comite cual esplora la scema ia averti ce la constitui franses proibi ce la governa obliga un parte intera de la popla a pasa tempo a via de sua casa, estra en la caso de defende nasional.

An ante la anunsia, des-cuatro organizas jovenial ia oposa alga noncoerentes en la proposa, nonfelis con la idea de es obligada a partisipa. "La eleje de un obliga es egal importante como la obliga mesma, si no an plu," los ia razona, recomendante ce on permete ce jovenes ave un eleje libre.

Plu jeneral, sirca 60% de la popla favore la idea, ma la cuantia diminui asta min ca 50% si on solisita sola la opinas de jovenes.

Macron es la presidente franses prima ci no ia servi militar; la pratica ia es abandonada en 1996 cuando el ia ave 18 anios. A ante, on ia espeta ce tota omes joven franses servi en la fortes armada per cuasi un anio.

2018-06-27

Litigas contra separa de familias migrante a la SUA

Des-sete statos de la SUA litiga la governa de Donald Trump sur sua separa "cruel e nonlegal" de familias migrante. Los oposa la politica de refusa ce refujadas traversa la frontera de Mexico.

Entretempo, un judor en California ia deside ce tota familias de migrores nondocumentida ci on ia separa a la frontera debe es reunida en 30 dias, e ce enfantes con min ca sinco anios debe trova se denova con sua jenitores en 14 dias.

Paperes presentada par la Uni American de Librias Sivil ia conteni multe racontas de jenitores ci no ia pote trova o comunica con sua enfantes pos deveni separada par ofisiores de frontera.

Esta es la defia legal prima par la statos sur separa de familias. On razona ce la comanda par la presidente republican preveni la tratada coreta de familias migrante, con direto de xerca refuja.

En la semana pasada, Trump ia recomenda deportas rapida, a mera un pico de dias ante fa la comanda.

Statos xerca aora un judi de corte per reuni familias e fini la pratica separante par declara ce lo es oposada a la constitui de la pais.

La litiga cexa ce la comanda par Trump no refere a la fini de separa familias o a la reuni de familias ja separada. Lo descrive ance la politica como "un ofende" contra la interesas de la statos a manteni niveles de cura per enfantes e a conserva relatas entre enfantes e jenitores.

Un nota de Barbara Underwood, la Avocato Jeneral de York Nova, ia refere a enfantes migrante, tenida en acel site, ci sufri depresa, ansia e condui suisidal. "Par aranca enfantes a via de sua jenitores e envia los a distantia de sentos de milias, la governa de Trump ia causa ja un trauma nomimajinable a esta enfantes, e ia sumina la interesas fundal de York Nova a proteje sua sania, securia e bonstate."

La Ofisia de Relocali de Refujadas de la SUA ia dise ier ce 2047 enfantes de migrores es ancora su cura de la departe de sania. On ia envia los a selulas, benerias convertida, tendas de deserto o adotores tempora.

La litiga es simil a la caso contra la proibi par la governa ce la plu de persones de Iaman, Iran, Libia, Somalia e Suria viaja a la SUA. Hawaii ia bloci inisial la proibi, ma la Corte Suprema ia reversa la deside a la matina de ier.

2018-06-26

Blasfemas par la presidente pilipina

Rodrigo Duterte, la presidente de la Pilipinas, ia descrive Dio como "stupida", provocante coleria en sua pais catolica. En un parla televisada, el ia critica la nara biblial de la cade de Adam e Eva e la lojica de la conseta cristian de la peca orijinal.

Duterte es conoseda per sua declaras scandalosa e sua atacas nonfiltrida contra sua oposores.

An si la Eglesa e multe sitadanes ia condena sua comentas, sua ofisia ia dise ce el ia espresa credes personal. En pasada, la presidente ia critica ance la Pape con linguaje cru e ia fa otra declaras jeneral regardada como estrema ofendente, cruel o misojine.

Sua comentas la plu resente ia es fada en un parla en Davao, la site cual el ia governa como maior ante campania per deveni presidente.

Demandante "Ci es esta Dio stupida?", Duterte ia critica la raconta en la Biblia ce Adam e Eva ia es espulsada de la jardin Eden car los ia come frutas proibida. "Tu ia crea un cosa perfeta," el ia dise, "e a pos tu imajina un aveni tentante cual ta manxa la cualia de tua labora."

La presidente ia cexa ance sur la conseta de la peca orijinal, par cual tota umanas es manxada par la malcondui de Adam e Eva disente: "Vos ancora no ia nase, ma aora vos porta la peca orijinal. Cual spesie de relijio es esta? Me no pote aseta lo."

Arturo Bastes, un bispo catolica local, ia responde par dise ce la presidente es "un demente" e ia recomenda ce on prea per la fini de sua "vosis blasfemosa e propensas autocrata".

Duterte es un critica conoseda e franca de la Eglesa Catolica en un pais do plu ca 90% de la popla es cristian, e la majoria grande de estas es catolica. Sua comentas ia provoca un reata negativa e multe debate enlinia.

El ia emprende sua posto presidente en julio 2016 con un disposa sever contra crimin e froda, ma on ia critica multe sua campania de matas estralegal contra vendores e usores de drogas. Plu temprana en esta anio, la Corte Criminal Internasional ia abri un investiga criminal sur estas.

Duterte ia dise ce el ta mata "felis" miliones de drogamanicas en la Pilipinas, e ia responde a criticas internasional de sua politica par descrive Barack Obama, presidente pasada de la SUA, como un "fio de puta" e la Uni European como ipocritas.

En april 2016, el ia parla a un asembla de campania elejal sur la omiside e viole sesal en 1989 de un misionor fema australian en Davao, do el ia es alora maior. Duterte ia dise: "Me ia es coler car el ia es violeda. Ma el ia es tan bela – la maior ia ta debe es la prima – un peri grande." Pos esta comentas, sua ofisia ia espresa vergonia.

2018-06-25

On aresta tota polisiores de un vila mexican

On ia deteni la polisia intera de la vila Ocampo en Mexico, suspetada sur envolve en la omiside de un aspiror maioral. Fernando Ángeles Juárez, ci ia ave 64 anios, ia es fusilida par persones nonconoseda a jovedi estra un de sua casas.

Plu ca 100 politicistes ia es matada tra Mexico ante la vota jeneral a 1 julio. Ángeles ia es la politiciste tre matada en la stato ueste Michoacán en pico plu ca un semana.

La 27 polisiores e la secretor local de securia publica ia es detenida par fortes federal en la oras temprana de ier.

Ángeles ia es un comersior susedosa con poca esperia political presedente. El ia considera aspira nondependente, ma ia junta se final a un de la partitos xef de Mexico, la Partito de la Revoluti Democrata, a la sinistra sentral.

Un de sua amis la plu prosima ia dise: "El no ia tolera vide tan multe povria, nonegalia e froda, e donce el ia deside aspira."

Pos la omiside, avocatos ia acusa la secretor de securia publica, Oscar González García, sur involve. Cuando ajentes federal mexican ia ariva en la vila a saturdi per deteni el, los ia es parada par polisiores local. Los ia reveni con refortintes en la matina de soldi e ia aresta la polisia intera e sua xef, securinte sua polsos e prendente los per interoga en Morelia, la capital de Michoacán.

Avocatos acusa la polisiores e González sur lias con grupos de crimin organizada en la stato.

Mexicanes va vota en la soldi veninte per eleje un presidente nova, con senatores e membros de la Salon Basa. Plu ca 3000 postos a niveles rejional e local va es ance riscada.

2018-06-24

Femes pote automobili en Arabia Saudi

Femes saudi es aora ofisial permeteda a gida veculos pos la sutrae de un proibi cual ia esiste tra desenios. La cambia ia es anunsiada en setembre pasada, e Arabia Saudi ia dona la lisensas prima a femes en la parte plu temprana de esta mense.

Lo ia es la sola pais restante en la mundo do femes no ia pote automobili, e familias ia debe lua gidores per relatadas fema.

An tal, la cambia es acompaniada par medias intensida contra ativistes ci ia campania per la direto. La organiza Amnestia Internasional dise ce on ia deteni a la min oto ativistes per diretos fema, ci va es cisa litigada en un corte antiteroriste, riscante an un prisoni longa per sua ativisme.

Amnestia ia urje ance per reformis plu jeneral en Arabia Saudi, do femes es ancora controlada par leges de garda mas.

Grupos de diretos umana en la rena ia campania tra anios afin on permete ce femes gida veculos. On ia aresta desduples de femes per automobili en Riad en 1990, e alga femes saudi ia comensa posta videos de se a volantes en 2008 e entre 2011 e 2014.

A 5 junio, des femes ia deveni la lisensadas fema prima pos intercambia sua lisensas stranjer per documentos saudi en sites tra la pais. La autoriosas saudi ia dise ce on espeta ce sirca 2000 femes va ave ja lisensas a la tempo de sutrae la proibi.

An tal, alga omes saudi ia espresa sua nonsasia con la cambia, usante en redes sosial un parola grilida cual on pote tradui como "Vos no va automobili".

La sutrae de la proibi es un parte de la program par la prinse erital Mohammed bin Salman per moderni alga aspetas de sosia saudi. El ia gida la projeta Vista 2030 per diversi la economia de petrolio e abri plu la sosia.

Ma on ave ancora limitas a lo cual femes saudi pote fa. La lege enforsa un forma sever de islam suni nomida uahabisme, conoseda per sua regulas separante de jenero. Femes debe segue codigos de vesti e no pote asosia con omes nonrelatada. Si los vole viaja, labora o usa aida medical, los nesesa es acompaniada par – o ave la permete scriveda – un defendor mas.

2018-06-23

Rebelores itiopian suspende sua resiste

En Itiopia, un grupo rebelante ia suspende sua resiste armada contra la governa. Ginbot 7 ia dise ce reformis par Abiy Ahmed, la ministro xef, ia dona a lo un espera ce "democratia autentica" pote es "un posible vera".

Plu temprana, la governa ia dise ce lo ia desbloci 264 locas de rede e canales de tv.

Esta es la plu resente de multe cambias fada pos cuando Abiy ia veni a sua posto en april, laxinte la teni forte a potia par la governa.

Ginbot 7, con base en Ertra, un pais visina, ia es identifiada como un organiza teroriste par governas presedente. Sua secretor jeneral, Andargachew Tsege, ia es saisida en Iaman en 2014, e enviada a Itiopia, do on ia condena el a mori en asentia ja en 2009 per conspira alegada per un colpa de stato.

La governa itiopian ia pardona Tsege en 29 maio e el ia revade a la Rena Unida, do sua familia abita.

En anios resente, Itiopia es fendeda par protestas par membros de la du etnicos la plu grande en la pais – la oromos e la amarinas. Protestas ia estende tra la pais en 2015 entre urjes per reformi political e economial e un fini de froda governal.

On ia acusa la governa de violes de diretos umana en acel tempo, incluinte la tortura e mata nonautorida de oposores political.

La canales Ethiopian Satellite Television (Televisa Satelital Itiopian) e Oromo Media Network (Rede de Medias Oromo), con bases en la SUA, ia es entre la difusores proibida e acusada en asentia par la governa presedente de provoca violentia e promove atas de teror. Aora on ia abandona la acusas, ma multe jornalistes ia es condenada a prison per articles cual los ia scrive, e otras ia fuji de la pais.

Hailemariam Desalegn ia resinia nonespetada como ministro xef en febrero, disente ce el espera fini anios de turba political.

Pos emprende la posto en april, Abiy ia anunsia multe reformis estendosa. El ia promete abri la mundo de difusa, e ia recomenda an ce difusores oposante con bases stranjer abri ofisias en Itiopia. Un portavose ia dise ce "libria de espresa es un direto fundal. Un flue libre de informa es esensal per sitadanes engranada e encargada. Sola un mercato libre de ideas va gida a la veria."

Abiy ia anunsia ance la privati partal de companias nasional. El atenta stabli la relata problemosa entre Itiopia e Ertra, e ia cansela un state de crise inisiada par la governa presedente.

2018-06-22

Sara Netanyahu es acusada de froda

La sposa de Benjamin Netanyahu, ministro xef de Israel, es acusada sur froda pertinente a un malusa alegada de mone governal. On ia acusa Sara Netanyahu de usa 359 mil xeceles per furni comedas a la casa ofisial de la ministro xef. On ia acusa el ance sur un rompe de fida pos un investiga polisial.

Sara Netanyahu ia nega tota la acusas, cual sua avocatos ia descrive como asurda e iludente.

En la anio pasada, la avocato jeneral ia anunsia ce el considera acusa Netanyahu sur la alegas pos un investiga longa cual ia deveni la tema de discutes intensa en jornales israeli.

On suspeta Netanyahu e Ezra Seidoff, un visdirijor pasada de la ofisia de la ministro xef, sur es envolveda en reclamas de spende entre setembre 2010 e marto 2013 per comedas traeda a la casa de la ministro xef e per cosinores privata.

On dise ce la reclamas de spende ia es fada en asconde ce la casa emplea ance sua propre cosinor. On no permete ce la governa finansia ambos.

Un declara de la avocato jeneral en setembre pasada ia dise: "En esta modo, sentos de comes de restorantes e cosinores ia es frodosa resetada a cuantia de 359 mil xeceles."

Benjamin Netanyahu ia reata coler a lo cual el ia regarda longo como un xasa de sorsores contra sua familia de profil alta, gidada par oposores political.

La avocatos de Sara Netanyahu ia dise ce no froda o rompe de fida ia aveni, e ce el no ia conose la prosedes coreta. Los ia ajunta ce la person ci ia comanda la comedas ia es la manejor pasada de la casa.

2018-06-21

Jazair descomuta la interede per esaminas

En Jazair, on ia descomuta la interede tra la pais intera per atenta fronti froda en esaminas de scola.

La servis de interede, e par linia fisada e par telefoneta, va sesa per un ora pos la comensa de cada esamina de diploma de liseo, per preveni esposas de informa. Esta va aveni tra tota la semana de esaminas, de 20 a 25 junio.

La responde segue un froda vasta en 2016, cuando on ia esposa enlinia la demandas ante e en la esaminas. Como resulta, la autoriosas ia solisita en la anio pasada ce furnores de servis de interede preveni la asede a redes sosial – ma esta medias nonobligante no ia sufisi.

Nouria Benghabrit, ministro de educa, ia dise ce Facebook va es blocida tra la pais per la periodo intera. El ia comenta ce, an si la governa "no es comfortosa" con la deside, "nos debe no sta pasiva ante un tal esposa posible".

En ajunta, on ia proibi tota studiantes e empleadas scolal de entra a cualce de la 2000 esaminerias de la pais si los porta un aparato eletronical con capasia de asede la rede. On ia pone detetadores de metales a la portes.

Benghrabit ia dise ance ce on ia instala cameras monitorinte e blocadores de telefoneta a locas do on primi la paperes de esamina.

Pico plu ca 700 mil studiantes va presenta se per la esaminas de liseo en la semana veninte. Los espeta descovre sua resultas de 22 julio.

2018-06-20

Ratas destrui biletas en un automata de banco

En la stato Assam en Barat, tecnicistes ci ia ariva per repara un automata malfunsionante de banco ia es xocada cuando los ia abri lo.

Biletas con valua de plu ca 1,2 milion rupis ia es trinxada. On suspeta ce ratas es culpable. Probable los ia entra a la macina tra un fora per filos.

On ia tuita fotos de la mone masticada a la Banco Nasional de Barat en la distrito Tinsukia. Un de la fotos mostra un rodente mor, reclinante en la desordina.

La macina ia es malfunsionante tra sirca 12 dias. La tecnicistes ci ia desasembla lo ia trova biletas destruida de 2000 e 500 rupis. Los ia susede salva biletas con valua de 1,7 milion rupis, an tal.

2018-06-19

Un orangutan multe vea mori en Australia

La orangutan sumatran la plu vea conoseda ia mori en un zo australian con 62 anios, lasante 54 desendentes.

Puan, descriveda como "la vea dama grande" de la zo de Perth, ia es eutanasiada ier par causa de complicas relatada con sua eda. El ia es a la zo de 1968, e ia es ofisial reconoseda par Recordos Mundal Guinness como la plu vea de sua spesie en 2016.

Orangutanes sumatran ateni rara la eda de 50 anios, estra en zos, e los es multe perilida.

On crede ce Puan ia nase en un jungla en Sumatra, Indonesia, en 1956. La zo ia dise ce el ia lasa "un lega noncredable" de 11 enfantes e 54 desendentes en la SUA, Europa e otra partes.

Holly Thompson, supravidor de primates a Perth, ia dise: "Sua jenetica representa cuasi 10% de la popla zolojial global. El ia fa tan multe per la colonia en la zo de Perth e per la survive de sua spesie."

On ia relasa alga de la desendentes de Puan a savaje en Sumatra. Sola sirca 14 600 orangutanes sumatran resta.

Martina Hart, la atendor xef de Puan ia scrive un anunsia de mori, publicida oji en la jornal La Australian Ueste: "Tra la anios, la siles de Puan ia grisi, sua moves ia lenti e sua mente ia comensa vaga. Ma el ia resta la madron, la dama cuieta e diniosa ci el ia es sempre."

2018-06-18

Un pasea tra Barat per remente Modi

Un om barati ci ia pasea tra 1350 cilometres, per asentua "un promete nonrealida" par la ministro xef, ia recomensa sua viaja pos un reposa corta en ospital.

Muktikant Biswal ia intende pasea de la stato este Orissa asta la capital Delhi en la norde. El ia es ospitalida en Agra, a 218 cilometres de sua destina.

Biswal ia dise ce el vole "remente" la ministro xef sur sua promete de renovi un ospital en sua stato. El ia comensa sua pasea a 16 april, con la bandera barati en mano, e tra la temperatur sempre plu altinte de estate.

La ministro xef Narendra Modi ia dise en 2015 ce on va converti la ospital a "un compleso de spesialia eselente", simil a la Instituida de Siensas Medical de Tota Barat en Delhi.

Biswal is dise ce el vole encontra Modi e demanda ce el reali sua promete de renovi la ospital jeneral de Ispat. "Me no sabe esce la ministro xef va encontra me o no," el ia clari. "Si el no va encontra me, me va fa un juna."

Modi no ia reata a Biswal, de ci sua raconta ia deveni bon conoseda pos un tuita suportante par Rahul Gandhi, la xef de la partito xef oposante de la pais.

Biswal ia dise ce el es felis ce Gandhi ia tuita sur sua pasea con promete de aida, ma el no sabe la detalias de la modo de aida. On previde ce el va ariva en Delhi en la parte plu tarda de esta semana.

2018-06-17

Deutxland no litiga du rapores antisemita

Du rapores deutx no va es litigada pos un furia publica sur un testo antisemita. On ia critica Kollegah e Farid Bang per compara sua corpos musculosa con los de prisonidas a Auschwitz, e per sujesta un Olocausto nova.

Ma litigores ia dise ce libria artal es garantiada par la constitui. Los ia dise ce la rap gangsteral, an si ofendente, no coresponde a un nega de la Olocausto o un provoca de violentia. Un portavose per la ofisia litigante de Düsseldorf ia clari ce esta spesie de rap es vulgar, misojine e omofobica, ma litiga no va es posible.

La controversa sur la du rapores foca a du linias en sua album la plu resente JBG3. (La leteras es un corti de la parolas deutx per "joven, savaje, bonaspetante".) Un peso inclui la testo "Mea corpo es plu definida ca los de prisonidas de Auschwitz", e un otra conteni la frase: "Me fa un plu Olocausto, veninte con la Molotov."

Cuando la industria musical de Deutxland ia deside dona a esta rapores la premio Echo en la categoria hiphop/urban, artistes tra la pais ia condena sin esita. Par causa de la responde furiosa, la industria ia abandona completa la premios Echo, como un marca ruinada.

La museo Auschwitz en Polsca sude inclui la locas de la casernas, cambras de gas e otra construidas a la campas de consentra de Auschwitz e Birkenau, do sirca 1,1 milion persones ia es matada par la nazis en la ocupa deutx en la Gera Mundal Du. La plu de la matadas ia es iudis european.

2018-06-16

La xef txesce destrui un vesteta de oposa

Miloš Zeman, presidente de Txesco, ia asembla ier jornalistes per ensende un pantaleta jigante roja. La presidente ia organiza la aveni subita sin dona un razona, provocante multe divinas.

La vesteta vasta ia es usada en pasada par un grupo de artistes per critica el. El ia arde lo en un calderon tempora de foco, ante parti, disente a reportores: "Me regrete fa ce vos pare como stupidas peti; vera, vos no merita lo."

La ajenteria de novas AFP ia descrive la confere como "un aveni bizara" cual ia surprende la jornalistes asemblada.

La supantala, longa de un metre, ia es creada par Ztohoven, un coletiva de artistes ci ia vola lo supra la palasio presidental en 2015. La presidente ia compra lo de la ofisia de propria nasional per sola un corona txesce.

En menses resente, Ztohoven ia produi camisas e insinias de la pantaleta roja per protesta contra la campania de reeleje de Zeman, par cual el ia vinse, ma apena, en janero. Radio Praha ia dise ce la protesta ia intende simboli "la tempo per fini la eda de lavadas susia en politica".

La oposores political de Zeman ia fali vide la umor en la presenta focosa a jovedi. Un ia scrive ce si el no ta ave respeta per la presidentia, el "ta dise ce la presidente ia deveni un fol" e ce la spetaculo "redui la dinia de la posto presidental".

Esta confere nonusual no ia es la ves prima cuando Zeman ia ataca jornalistes. En otobre de la anio pasada, el ia veni a un confere jornaliste con un fusil falsa con la eticeta "per jornalistes". En maio, el ia dise ce on debe "licuidi" jornalistes – un comenta cual on ia representa como un broma.

En janero, el ia broma ance ce on pote despone la ministro xef de Txesco o par vota o par Kalashnikov, referente a un tipo popular de fusil automata.

La presidente de 73 anios ia gania difisil sua periodo du en janero, fininte con sola 52% de votas, ma tal vinsente sua oposor ci ia favore la Uni European. Zeman suporta ce sua pais parteni a la UE e OTAN, ma con dutas. El oposa ce la UE puni Rusia e el critica la sistem UE per distribui migrores entre statos-membros.

2018-06-15

Nicaragua greve contra sua presidente

Un greve jeneral de 24 oras ia para multe de Nicaragua, con ce campaniores esije la resinia de presidente Daniel Ortega.

En la capital, Managua, companias ia clui e stradas es vacua, ma protestas violente ia eruta en otra sites. On reporta ce a la min tre persones ia mori ier. La cuantia de persones matada en oto semanas de scaramuxas es aora sirca 160.

On va fa oji discutes nova, con intende de fini la situa.

La protestas ia comensa a 19 april, pos cuando la governa ia redui sua programes de pension e securia sosial. Plu tarda, la reduis ia es abandonada, ma la protestas ia evolui a un rejeta de la governa intera, e miles de persones ia vade sur la stradas.

En Managua ier, polisiores de tumulta con fusiles de ataca ia patrulia stradas vacua do gasolinerias, supramercatos e comederias ia es cluida.

En la site León, un xico de altar con 15 anios ia mori fusilida par polisiores, diseda par la episcopo aidante de Managua. El ia dise ance ce la polisia ia xuta nondistinguinte sur la stradas de Nindiri, a sude-este de la capital. On no ia confirma esta, ma reportas de batalias de strada ia veni ance de Nagarote, Masatepe e Tipitapa.

La Eglesa Catolica de la pais ia atenta ja negosia un acorda, ma tota sujestas ia fali asta aora.

En la mense pasada, la Comision Interamerican sur Diretos Umana ia visita Nicaragua e ia dise ce lo ia vide violes grave de diretos umana en la protestas. Lo ia dise ce securiores nasional e otra partitos armada ia usa un fortia esedente. La ministreria de esternas de la pais ia rejeta ier la reporta como "prejudosa".

La protestas ia deveni la defia la plu grande a la autoria de Ortega pos sua emprende de posto en 2007. El dise ce asemblas de protestores es infiltrada par criminores e ganges. Studiantes e sindicatistes ia acusa el de un represa violente e ia urje el a resinia.

En la desenio de 1970, Ortega ia es un gerilia sinistriste ci ia aida suverti la tirania de Anastasio Somoza. An tal, sua oposores presente acusa el e sua sposa Rosario Murillo, ci es sua vispresidente, de condui ance como tiranos.

2018-06-14

Razisme en un jornal privata de Einstein

Jornales personal de viaja, nova publicida, revela alga opinas raziste e xenofobica esprimada par Albert Einstein. Scriveda entre otobre 1922 e marto 1923, la jornales trasa la esperias de la fisiciste famosa en Asia.

En los, el ia fa jeneralis negativa e nondistinguinte, per esemplo en descrive la popla de Xina como "persones  asidua, susia e nonagu."

Ma on debe recorda ce, plu tarda en sua vive, Einstein ia defende diretos sivil en la Statos Unida de America, e ia nomi razisme "un maladia de persones blanca".

Esta es la ves prima de publici la jornales como un volum individua en engles. Publicida par la Universia de Princeton, La jornales de viaja de Albert Einstein: Asia este, Filastin e Espania, 1922–1923 ia es editada par Ze'ev Rosenkranz, dirijor aidante de la Projeta de Paperes de Einstein a la Instituida de Tecnolojia de California.

Einstein ia viaja de Espania a Asia ueste, e tra Srilanca a Xina e Japan. La fisiciste ia descrive ariva en Porto Said en Misre e fronti "levantanes de cada color… como si emeteda de enferno" ci ia embarca la barcon per vende sua benes.

El ia scrive ance sur sua tempo en Colombo en Srilanca, disente sur la popla: "Los vive en susia estrema e en apesta notable sur la tera, fa poca, e nesesa poca."

Ma sua comentas la plu asida ia es fada sur persones de Xina. El ia descrive enfantes xines como "sin spirito e nonagu", e ia dise ce lo va es "triste si esta xineses recambia tota otra razas".

En otra entradas, el ia nomi Xina "un nasion strana e manadin" e "plu simil a automatas ca persones", ia reclama ce on ave "poca difere" entre omes e femes xines, e ia demanda como la omes es "noncapas de defende se" contra la "atrae ruinante" de femes.

Notada per sua brilia siensal e sua umanisme, Albert Einstein ia migra a la SUA en 1933 pos la asende de Adolf Hitler e la partito nazi. La siensiste iudi ia descrive razisme como "un maladia de persones blanca" en un parla en 1946 a la Universia de Lincoln en Pennsylvania.

2018-06-13

Un acorda pos 27 anios de disputa un nom

Elas ia fa un acorda sur la nom de sua visina norde, nomida Macedonia pos la desintegra de Iugoslavia. Pos 27 anios de discute, e multe protestas, on ia acorda la nom Republica de Macedonia Norde.

Elas ia oposa la nom Macedonia, temente reclamas teritorial contra sua propre rejion norde con acel mesma nom. Lo ia rejeta la proposa ce sua visina junta se a OTAN e la Uni European.

Aora, la nom nova debe es aprobada par la popla macedonsce e la parlamento elinica.

Su la acorda, la pais conoseda a la Nasiones Unida como Former Yugoslav Republic of Macedonia ("Republica Iugoslavian Pasada de Macedonia") va es nomida Republic of North Macedonia, o Republika Severna Makedonija en sua propre lingua. Acel lingua va es nomida "macedonsce", como sua popla.

On ia acorda ce la nom nova va es usada e internasional e biladal, tal ce an la 140 o plu paises cual reconose la nom Macedonia va debe ance adota "(Republica de) Macedonia Norde". On ia acorda ance ce e la nom engles e la nom slavica pote es usada.

Plu temprana, la du lados ia rejeta alga otra posibles, incluinte Gorna Makedonija (Macedonia Alta), Nova Makedonija (Macedonia Nova) e Macedonia de Ilinden.

La nom Macedonia parteni ja a un rejion norde de Elas cual inclui Thessaloniki, la site du de la pais. Par adota la mesma identia en 1991, la nasion slavica nova ia coleri multe elinicas, ci ia suspeta aspiras teritorial de sua visina.

La macedonsces nova no ia boni la situa cuando los ia dona la nom de Alexandro la Grande a la airoporto xef en sua capital, Skopje, e a un autovia major cual vade de la frontera serbsce asta la elinica. En la sentenio 4 aec, la Macedonia de Alexandro e sua padre Filipo 2 ia rena la intera de Elas e multe tera a ultra.

2018-06-12

Trump e Kim fa un encontra sin presedente

Donald Trump e Kim Jong-un ia fa la encontra prima entre un presidente corente de la SUA e un xef de Corea Norde (Txoson), en un developa major pos un anio de intercambia menasas.

La duple ia presa manos con lunlotra a un otel lusosa sur la isola Sentosa en Singapor ante fa discutes. A la fini de sua confere, los ia suscrive un documento descriveda como "completa", ma no ia esplica lo cual los ia acorda.

Los ia discute la redui de tensa e la desarma nucleal. "Me pensa ce ambos lados va es multe impresada con la resulta," Trump ia dise, ajuntante ce plu detalias va es furnida a pos.

La confere ia comensa con un vista saisinte, nonimajinable a mera menses ante aora. La du omes ia pasea en dirije a lunlotra, e cada ia teni firma la mano de la otra ante banderas de la SUA e Txoson.

Con Trump colpetante la braso de Kim, los ia sta sur un tapeto roja e ia intercambia alga parolas ante turna se a la jornalistes asemblada.

Sentante a lado de lunlotra ante un consenta privata, la duple ia pare destensada an en la situa. "Veni asi no ia es fasil," Kim ia dise. "On ia ave ostaculos ma nos ia vinse los per es asi." Sua corespondente ia responde: "Acel es vera."

La du omes, acompaniada mera par interpretores, ia parla tra pico min ca 40 minutos. Alora delegas peti de conselores ia ajunta se per un come en labora.

De Washington, la grupo ia inclui Mike Pompeo, ministro SUA de esternas, e John Bolton, conselor de securia. A la lado de Pyongyang ia es Kim Yong-chol, la aidor xef de Kim e un xef pasada de spiores, e Ri Yong-ho, ministro de esternas.

Los ia comparti un misca de platos de orijinas diversa, incluinte concombres plenida e pexes lenta coceda en soia.

2018-06-11

Un referendo suiz bloci aposterias stranjer

Votores en Suiz ia suporta forte un lege nova cual va bloci locas de rede stranjer de juas de fortuna. La Ata de Aposta ia gania la suporta de 72,9% de votores, an entre acusas ce lo representa un sensura enlinia.

La lege va deveni ativa en 2019 e va es un de la plu severes en Europa. Lo va permete la opera sola de casinos e aposterias autenticida en Suiz. La governa dise ce lo va aida contra apostamania.

Ambos salones de parlamento ia aseta ja la lege. Ma alga alas joven de partitos political diversa ia colie la 50 mil suscrives nesesada per fa un referendo en atenta de suverti lo.

La governa insiste ce la lege es esensal per enforsa regulas sever, como la bloci de apostamanicas conoseda, per aida contra la problem. On dise ce la lege va permete ance ce la governa imposta la revenus de aposta per finansia medias oposante.

Apostores en la pais spende sirca 250 milion frances suiz en cada anio en locas de rede stranjer e nonregulada. Ma campaniores dise ce la lege nova va custa an plu mone, car lo leva la limita de ganias impostable de mil frances suiz a milion.

Ante la vota, Luzian Franzini, copresidente de la grupo joven de la Partito Verde ia comenta ce la lege crea "un presedente multe perilosa". El ia refere a un "canion de jeneras" entre votores joven ci es coler sur la lege e la legores ci ia aseta lo. "Cisa los no ia comprende vera lo cual esta pote fa a la interede," el ia dise.

2018-06-10

Un coteli matante en un tren japanes

On ia aresta un om suspetada de mata un pasajor e de feri du otras en un ataca de cotel en un tren en Japan. La coteli ia aveni ier a sirca la ora 22:00 en un tren Shinkansen viajante de Tokyo a Osaka.

La polisia ia entra la vagon e ia aresta la om cuando la veculo ia para a la stasion de Odawara. La tren ia porta plu ca 800 pasajores a tempo de la crimin.

Un pasajor mas ia es ospitalida con feris de colo, ma ia mori plu tarda. La du otra vitimes es femes.

On ia nomi la suspetada como Ichiro Kojima, ci ave 22 anios. El ia informa la polisia ce el ia eleje vitimes en modo acaso e ia es armada con multe ojetos con lamas.

Atestores ia dise ce pasajores ia plora en atenta fuji. "Subita, multe pasajores ia es fretante. On ia panica," un om ia dise.

Tal atacas es rara en Japan, un pais cual ave un de la tasos la plu basa de crimin violente en la mundo developada. En 2015, un om ia mori pos ensende se en un tren Shinkansen. Un pasajor fema ia es ance matada e plu ca 20 persones ia es ferida cuando la foco e fuma ia sperde tra la vagones.

2018-06-09

Trump es isolida a la confere G7

Divides entre Donald Trump e otra xefes de nasiones industrida major ia es revelada en la dia prima de sua confere G7.

La presidente de la SUA ia fa un recomenda nonespetada ce on reentra Rusia a la grupo pos espulsa lo per sua propri de Crim. Ma Angela Merkel, canselor de Deutxland, ia dise ce tota membros de la Uni European presente a la confere en Canada oposa la idea.

En la sesion ier, desacordas ia continua sur la tarifas de comersia cual la governa de Trump ia institui resente. Un aida presidental franses ia es sitada en dise ce la SUA ia acorda comensa un discute tecnical sur estas con la UE en la du semanas veninte.

Canada ia descrive la tarifas como "nonlegal", e Donald Tusk, presidente de la Consilio European, ia averti ce la disposa de Trump sur comersia, cambia climal e Iran crea un peril vera.

Trump mesma parti temprana de esta confere de du dias, per vade ultima a Singapor per un encontra monumental con Kim Jong-un, xef de Corea Norde.

2018-06-08

Froda en futbal ganaian

Gana ia disolve sua asosia nasional de futbal pos cuando sua presidente ia es filmada en aseta parente de un dona de mone. Kwesi Nyantakyi ia prende $65 000 de un reportor ci ia desembla como un comersior desirante investi a futbal ganaian. El no ia comenta sur la alega.

La investiga secreta par Anas Aremayawa Anas, un jornaliste controversa, sta demandas sur la natur de futbal en Africa. Sua filma, titulda "Cuando avaria e froda deveni normal", ia es donada a autoriosas en la mense pasada e ia es publica mostrada a la ves prima a mercurdi.

Mustapha Abdul-Hamid, ministro ganaian de informa, ia dise ce la governa ia "deside fa direta medias per disolve la Asosia de Futbal de Gana" (AFG), sitante "la natur vasta de la putri parente". El ia ajunta ce medias tempora per la governa de futbal ganaian va es anunsiada pos tempo corta, en cuando on formi un asosia nova.

Nyantakyi es la vispresidente de la Federa de Futbal African e ance un membro de la Consilio de FIFA, cual es en efeto la comite cual governa futbal mundal. Pos emprende la AFG, el ia presenta la oposa de froda como un parte major de sua mesaje. Ma en la filma, el carga un saco de plastica negra con mone.

La ecipo de la filma ia invita el a un otel lusosa en Asia sude-ueste, prometente un consenta con un comersior rica ci desira negosia sponsoria con la AFG. Nyantakyi ia negosia e scrive un acorda de sponsoria cual ta permete envia alga de la mone a un compania poseseda par el. Si la acorda ia ta es realida, el ia ta pote profita par $4,5 milion.

2018-06-07

Migrores itiopian afoca prosima a la costa de Iaman

A la min 46 migrores ci ia atenta traversa de Somalia a Iaman ia afoca cuando sua barco ia inversa se. Des-ses plu persones manca pos esta perde de barco en un mar turbosa a costa de Iaman.

Survivores dise ce la barco de contrabandor ia porta 100 persones, cisa plu, ci ia parti de la porto de Bosaso per xerca labora en Iaman e paises visina. Tota la migrores ia es sitadanes de Itiopia.

La barco ia inversa se en la Golfo Aden a la matina de ier. 37 omes e 9 femes ia es entre la vitimes. On reporta ce alga de la pasajores en la veculo plenida no ia ave un jaceta inflable.

Un portavose de la Organiza Internasional per Migras ia dise: "Plu ca 7000 migrores povre fa esta viaja perilosa en cada mense; sirca 100 mil ia fa lo en sola la anio pasada. Los es deplorable tratada e los sufri esperias xocante. Esta debe sesa."

Migrores e refujadas viaja ja a Iaman de la Corno de Africa tra desenios, par causa de sua prosimia e un persepi ce la pais es un porte a la paises de la Golfo Persian e Europa. Ma Iaman es a media de un gera interna e un crise sever de sufri umana.