2015-04-30

Indonesia esecuta sete stranjeres sur drogas

Ban Ki-moon, ia secretor jeneral de la Nasiones Unida, ia espresa "un regrete profonda" sur la esecuta par Indonesia de oto persones condenada sur crimines de droga.

La sete stranjeres e un indonesian ia es esecutada par fusili ier, provocante un furia diplomata.

En un declara, Ban ia dise ce la puni de mori ave "no loca en la sentenio 21", e ia recomenda forte ce Indonesia salva tota otra prisonidas tal condenada.

Indonesia ia defende firma se atas como un parte de se "gera contra drogas".

Entre la prisonidas matada ia es du australianes – Andrew Chan e Myuran Sukumaran – e Rodrigo Gularte, un brasilera. Tota ia es condenada per contrabanda drogas.

Australia, un aliada major de Indonesia, ia protesta par retira se ambasador.

Tony Abbott, la ministro xef de Australia, ia descrive la trata de la prisonidas australian como "cruel e nonesesada", e un "momento ombrosa" en la relatas entre Australia e Indonesia.

Brasil ia dise ce la esecuta de Gularte – ci on ia diagnose con un maladia sever de mente – ia es "un aveni seria en la relatas entre la du paises".

El ia es la brasilera du ci Indonesia ia esecuta per contrabanda drogas en la cuatro menses pasada. Un prete ci ia acompania Gularte en cuando el ia vade a la fusili ia informa jornalistes ce el no ia pare comprende ce el es a punto de mori.

Nijeria ia espresa ance "un delude profonda" sur la esecuta de cuatro de se sitizanes. Orijinal, on ia reporta noncoreta ce un de los ia veni de Gana.

An tal, en Pilipinas, on ia selebra pos la salva de un fem pilipina de esecuta a la minuto final.

La mata de Mary Jane Veloso ia es posponeda cuando la governa indonesian ia acorda permete ce el atesta en la caso de la fem ci el ia acusa de planta eroina en se bagaje.

Maria Kristina Sergio ia presenta se a la polisia, nonespetada, en esta semana, e on ia prende el a Manila, la capital pilipina, per investigas.

Un franses, Serge Areski Atlaoui, resta en la coredor de mori. El ave un cexa legal ancora no prosededa sur se demanda per pardona.

La leges sur drogas en Indonesia es entre la plu severes de mundo. En 2013, la pais ia fini se suspende de esecutas per cuatro anios.

La governa dise ce lo condui tan sever par causa de la problemes propre de drogas en la pais, declarante ce 33 indonesianes mori a cada dia como resulta de esta problemes.

2015-04-29

Cuasi 300 persones es salvada de Boko Haram

La militaria nijerian dise ce lo ia salva 200 xicas e 93 femes de un area do la grupo combatosa islamiste Boko Haram es ativa.

Ma lo ia ajunta ce la xicas saisida de un liseo en Chibok a un anio ante aora no ia es entre estas.

La xicas e femes ia es librida en operas contra Boko Haram en la Foresta de Sambisa, do cuatro campas ia es caturada.

Un portavose militar ia dise ce on intervisa aora la libridas.

On ia saisi ance armas a la cuatro campas.

En otobre 2014, la governa ia dise ce lo ia negosia un acorda per un sesafusili e la libri de la xicas prendeda de Chibok. An tal, Boko Haram ia nega esta a pos.

2015-04-28

New York va redui se ilumina per aida avias

En la SUA, la state de New York va estingui lampas nonesensal en construidas publica per aida avias a segue se vias migral.

On crede ce avias migrante usa stelas per dirije se, ma los pote deveni tan desorientada par lampas eletrical ce los colpa construidas.

La fenomeno mata asta mil milion avias per anio en la pais. Miliones de avias migra tra la state de New York, e aora los ci vola supra la site a note va susede plu probable ariva plu norde.

Lampas briliante esterna va es estinguida entre 23:00 e lus prima, en primavera e autono.

Andrew Cuomo, la governor de New York, ia anunsia ance un loca de rede nomida "Me ama avias de NY", cual va furni informas sur oserva avias e esplica como on pote partisipa en la stratejia de estingui lampas.

La Sosia Nasional de Audubon labora ja con otra sites major per proteje avias de colpa fenetras.

La esta atrae matante a lampas pare afeta avias cantante migrante como turdos e pasaros plu ca avias local, ci aprende do los pote vola secur.

Daniel Klem, un profesor de ornitolojia ci ia abri la via a la studia de avias ci colpa fenetras, ia dise ce la membros la plu sana de la popla avial risca mori en esta modo tan probable como avias plu debil.

Scrivente plu temprana en esta mense, la novelor Jonathan Franzen ia critica la developores de un stadion en la state Minnesota per no usa un vitro con motifes spesial cual pote redui la cuantia de colpas.

2015-04-27

La cuantia de mores pos la trematera nepali suprapasa 3000

A la min 3300 persones ia mori en la teratrema enorme cual ia colpa Nepal a saturdi. Plu ca 6500 persones ia es ferida, e desuples ia es matada en Xina e Barat.

Miles de persones ia pasa un note du estra casa. La trema, de mesura 7,8, ia causa ance avalanxas matante sur Monte Everest (Sagarmata).

En la capital nepali, Kathmandu, do replicas sismica continua ancora, sites vasta de tendas ia apare per los ci ia perde se casas o ci teme revade a los.

Misiones de salva e aida ariva per maneja la tempo pos la trematera, cual ia es la plu mal en Nepal en plu ca 80 anios.

A esta matina, la clima ia boni e elicotores ia viaja a la campa de base de Everest per atenta salva 210 trepores ci ia deveni trapida cuando los ia perde se cordas e scalas en avalanxas.

Laboras per estrae vitimes de su la detrito de construidas ruinada en Kathmandu continua ance. Ma un ofisior de la ministreria de internas ia informa jornalistes ce la salvores es "en state vera mal" pos labora sin sesa tra du dias.

On ia averti ce la cuantia de mores pote crese cuando ecipos de salva ateni montanias distante en Nepal ueste.

Un om ci on ia estrae par elicotor a Pokhara, a 200 cilometres de la capital, ia dise ce cuasi cada casa en se vileta de plu ca 1000 casas ia es destruida.

En la distrito Dhading, a 80 cilometres a ueste de Kathmandu, persones campa su sielo, la ospital es estrema plen, la eletrica manca, e la botecas es cluida.

Ier, on ia esperia un replica forte en Nepal, Barat, e Bangladex, e plu avalanxas ia aveni prosima a Everest.

Esta trema nova, de mesura 6,7 e con sentro a 60 cilometres a este de Kathmandu, ia causa un panica en la site cuando persones ia core de construidas. Lo ia cade alga casas cual ia es ja danada par la trema prima.

Ospitales privata e publica ave no plu spasio, e trata se pasientes su sielo.

A la min cuatro de sete locas de Erita Mundal de Unesco en la vale de Kathmandu ia deveni sever danada. Tre ia es plazas de sites antica.

En Bhaktapur, cual ia es la site vea nepali la plu bon conservada a ante, un dui de tota casas es aora ruinada e oto de des temples es danada.

Pluves forte a saturdi ia mali an plu la situa. Ofisiores de la Nasiones Unida ia espresa ansia ce tempestas de lampo pote feri los ci resta su sielo.

2015-04-26

Un lansor de mango es recompensada con un casa

Nicolás Maduro, la presidente de Venezuela, ia reali la desira de un fem per un aparte pos cuando la fem ia colpa el sur la testa con un mango.

Marleny Olivo ia lansa la fruta a Maduro cuando el ia gida un bus tra Aragua, un stato sentral. Lo ia porta un mesaje scriveda, en cual Olivo ia prea a el per aida.

Maduro ia mostra la mango con se numero de telefon sur lo en un difusa televisada a pos. El ia dise ce el ia acorda a la demanda per un aparte.

Olivo ia scrive "Si tu pote, telefoni me" con se nom e numero. El ia vade tan prosima como posible a la bus en cuando lo ia pasa, e ia lansa la mango a la presidente.

En un video cual ia sperde virusin en la pais, on vide ce Maduro basi se testa cuando la mango colpa el supra se orea sinistra. Alora, el prende calma la fruta e mostra lo a la fola.

A pos, la presidente ia apare en un de se difusas direta normal, do el ia discute la aveni.

"El ia ave un problem de casi, si? E, Marleny, me ia aproba ja lo, como un parte de la mision grande de casis venezuelan, tu va reseta un aparte e on va dona lo a tu en la oras veninte. Doman, no plu tarda ca a la dia pos doman, nos va dona lo a tu."

Olivo ia dise ce se ata ia conteni "no intende malvolente", ma sola un desira a reali se aspira de posese un casa ante se mori.

En un posto pasada, la presidente ia gida buses. El gusta aora crea relatas con venezuelanes comun par turi comunias local a la volante de un bus.

El ia ajunta ce la mango es matur, e ce plu tarda el va come lo.

2015-04-25

Un trematera colpa Nepal

Un trematera forte ia secute Nepal sentral, causante danas estendosa a construidas.

On no sabe ja esce persones ia mori.

La trema ia colpa a 81 cilometres a norde-ueste de la capital, Kathmandu.

Inisial, se fortia ia es mesurada como 7,5, ma on ia alti esta estima asta 7,9.

Sites en Barat norde, como Delhi, prosima a la frontera con Nepal, ia esperia ance la trema.

La autoriosas barati responde.

Narendra Modi, la ministro xef de Barat, ia tuita: "Nos es a media de descovre plu informas, e labora per estende a la afetadas, e asi e en Nepal."

2015-04-24

On completi la seguensa de jenom de mamute

Un grupo internasional de siensistes ia seguensa la jenom intera de la mamute lanosa.

E un ecipo en la SUA atenta ja studia la cualias de la animales par introdui jenes de mamute en selulas madrin de elefantes. Los vole descovre como mamutes ia difere de se relatadas moderna, e como se ajustas ia aida los a survive la edas glasial.

Dotor Love Dalén a la Museo Svensce de Istoria Natural en Stockholm ia dise ce la publici prima de la ADN intera de la mamute pote aida los ci atenta revive la animal.

"En prinsipe," el ia comenta, "vide un mamute vivente ta es multe divertinte, per persepi como lo condui e como lo move." Ma el prefere ce on no usa se rexercas per esta. "Lo pare a me ce lo ta gida cisa a sufris per elefantes fema, e esta no ta es etical justable."

Dalén e la rexercores internasional con ci el colabora no atenta revive la mamute. Ma Long Now Foundation (la Funda de Presente Longa), un organiza en San Francisco, ia anunsia ce lo fa esta.

En se loca de rede, la fonda dise ce se gol ultima es "produi mamutes nova cual es capas de repopli la estendes vasta de tundra e taiga en Eurasia e America Norde."

"La gol no es crea copias perfeta de mamutes lanosa estinguida, ma consentra sur la ajustas de mamute nesesada afin elefantes asian pote vive en la clima fria de la tundra."

La fonda suporta un ecipo a la Universia de Harvard cual usa tecnicas de injenia jenetical per introdui jenes de mamute en selulas vivente de elefantes. La ecipo dise ce lo ia pone ja jenes relatada con sangue, gras, e capeles en selulas madrin de elefantes per studia la efetos de esta jenes.

La rexercores espera produi selulas roja de sangue per vide cuanto osijen los ia porta, e en esta modo aprende plu sur la fisiolojia de la animales.

La fonda dise ce lo intende introdui materia jenetical de mamute, artifisial creada, en un ovo de elefante, cual los ta pone alora en un elefante de zo. Lo crede ce atentas de clone va pote comensa ja en 2018.

Ma multe espertas opina ce ostaculos major esiste contra la tal crea de un mamute. Entre los es profesor Beth Shapiro de la Universia de California, ci ia scrive un libro nomida La modo de clone un mamute.

El ia dise: "Un difere enorme esiste entre un selula vivente en un plateta en un laboreria siensal, con alga cambias de jenom, e un animal vivente ci es alga mamutin. On ta debe usa acel selula per crea un embrio, move la embrio a un madre ospitante, e institui un ensintia e espera ce acel ensintia va susede."

Shapiro oposa lo cual spesialistes nomi la "desestingui de mamutes".

"Elefantes no vade bon en prisonia. Los luta con la reprodui aidada, e on debe permete ce los crea plu elefantes. Plu, elefantes es animales estrema sosial, e on ave no razona per suspeta ce esta no ia es vera ance per mamutes. Un mamute ta es solitar en la mundo. On no ta pote relasa lo a la libria de la Artica ante ave multe de los. E asta cuando nos pote crea multe mamutes sin usa elefantes, en me opina lo es etical mal."

Dalén e se colaborores ia seguensa la jenom de mamute per aprende plu sur lo cual ia aveni cuando la animal ia deveni estinguida a sirca 4000 anios ante aora, sur la Isola Wrangel de Rusia.

Los ia compara la ADN de un de la animales final ci ia vive ala con un ci ia vive a 45 mil anios ante oji, cuando mamutes ia es plu comun. La esta studia ia mostra ce la cuantia de mamutes sur la isola ia es tan peti ce la animales ia deveni endogama en la 5000 anios final de se esiste.

Dalén no pote dise serta ce la endogamia ia es la causa o ia contribui a la mori ultima, car lo no ave sempre un efeto negativa. Ma el dise ce se studia leva esta como un posible clar.

La datos jenetical ia mostra ance un diminui en la cuantia de mamutes a 300 mil anios ante oji.

"Esta ia surprende multe nos," Dalén ia dise. "Lo ia aveni ante cuando umanas moderna ia es en acel area, e nos no es intera serta sur la causa. Un divina probable es ce lo ia es causada par un cambia istorial de clima."

2015-04-23

Un volcan txilan eruta

La volcan Calbuco en Txile sude ia eruta a la ves prima de plu ca cuatro desenios, puxante un plumon de fuma e sene a altia de alga cilometres.

Servis de crise ia anunsia un alarma roja, e on ia sorti sirca 1500 persones de un raio de 20 cilometres, per proteje los.

Puerto Montt, un site prosima, ia deveni ja covreda par un nube de sene. La maior, Gervoy Paredes, ia dise ce abitores es "multe multe asustada".

Arjentina, pais visina, ia inisia ance medios de crise per la site Bariloche – a sirca 100 cilometres de Calbuco – do on ia previde nubes de sene. On ia avisa abitores ala a resta en casa.

Ofisiores dise ce on ia vide no rocas calda o lava asta aora, ma sola sene. An tal, espertas ia averti ce rios local pote deveni inondada par la fonde de neva e jelo.

Pitures televisada ia mostra conjestas de trafica en Puerto Montt, e filos longa a gasolinerias. Puerto Varas, un vila prosima, es ance en state vijilante.

Rodrigo Peñailillo, la ministro txilan de internas, ia recomenda ce la persones afetada "resta calma e informada".

Calbuco ia eruta la plu resente en 1972.

Entre la cadenas de volcanes en la mundo, Txile ave la numero du par grandia (pos sola Indonesia), con sirca 500 cual es posible ativa.

Esta es la eruta volcanal du en Txile sude en du menses. En marto, la volcan Villarrica ia eruta en la temprana de matina, ejetante sene e lava.

2015-04-22

Sinco norsces es prisonida per xasa lupos

En Noria, on ia condena sinco omes a prison per organiza un xasa nonlegal de lupos, a fini de la prosede prima de un tal caso en la pais.

La xef de la grupo ia es condenada a un anio e oto menses en prison, e on ia comanda la prisoni de cuatro otras per entre ses e des-du menses.

Tota ia nega la acusa, e cuatro ia apela contra la deside.

La caso importante ia considera la diretos norsce a xasa a lado de la survive de un de la colies la plu peti de lupos en Europa.

On ia prosede la omes per atenta trapi lupos en febrero 2014, su la leges norsce de crimin organizada, pos un opera alta en cual la polisia ia escuta secreta telefonis.

La condena la plu sever ia es donada a Dennis Nordahl, ci ave 48 anios. On ia regarda el como la acusada xef.

On ia acusa el ance de fusili un lupo en un aveni separada en marto de la anio pasada. El ia dise ce el ia partisipa en un mision de xasa volpes, e ia nega sabe ce la animal matada es un lupo.

En ajunta a la condenas prisonal, tota sinco omes ia es proibida de xasa per periodos diversa.

La corte areal en Noria este ia judi ce un acusada ses es nonculpable.

On crede ce la cuantia de lupos de Noria es entre la plu petis en Europa, cisa tan basa como 30.

En Scandinavia sude, lupos ia es xasada cuasi asta estingui. La pratica ia deveni nonlegal sola en la desenio de 1970. An tal, cultivores bonveni jeneral la xasa de lupos, car los vide la animales como un menasa grande a oveas e canes.

2015-04-21

La ministro xef de Corea Sude ofre resinia

Lee Wan-koo, la ministro xef de Corea Sude, ia ofre resinia pos es acusada de aseta sobornas.

La presidente, Park Geun-hye, no ia dise esce el va aseta se resinia, ma ia espresa compatia con el.

La ajenteria jornaliste nasional ia dise ce Park ia demanda "un investiga completa" sur la scandal.

Lee nega ce el ia aseta 30 milion uones (cuasi $28 mil) en forma de reservas nonlegal de campania en 2013. On ia presa el a resinia se posto, an tal.

Su leges de Corea Sude, politicistes no pote aseta plu ca 100 mil uones en contribuis.

La scandal ia comensa cuando on ia trova la corpo mor de Sung Wan-jong, un comersior, plu temprana en esta mense, pos se suiside suspetada. Sung ia es a punto de fronti demandas par autoriosas sur alegas ce el ia froda mone de companias per soborna politicistes.

Investigores ia trova un nota en se pox cual ia lista la nomes de alga persones, incluinte Lee, e numeros cual ia pare es cuantias paiada a los. Un partito oposante ia demanda alora ce on acusa Lee.

En refere a la resinia, seniora Park ia dise en un declara scriveda: "Me trova ce lo es regretable. Me compatia ance la angusa de la ministro xef."

Park fa presente un visita de cuatro dias a Peru. On reporta ce el va deside sur aseta la resinia ante la semana veninte.

Lee ocupa ja se posto tra sola du menses. El ia deveni la ministro xef pos un xerca longa per recambia se presedente, Chung Hong-won.

Chung ia resinia a corta pos la desastre de la naveta Sewol en april 2014, cual ia mata plu ca 300 persones.

Ma on ia reteni Chung tra alga menses en cuando Park ia xerca un seguente. Du aspirores ia retira se pos acusas de fa mal, ante cuando Lee ia reseta la posto.

2015-04-20

Migrores mori pos un inversa de barco en la Mediteraneo

On teme ce sentos de persones ia afoca pos la inversa de un barco portante asta 700 migrores en la Mar Mediteraneo.

La barco, sur cual on crede ce lo ia es no plu longa ca 20 metres, ia inversa a medianote ante soldi, en acuas libi a sude de Lampedusa, un isola italian.

Asta aora, on ia salva sola 28 persones e ia retrova sola 24 corpos.

Matteo Renzi, la ministro xef de Italia, ia descrive la aveni como un trajedia per Europa, e ia recomenda un confere alta e spesial de la Uni European a tema de migrores.

La ajenteria de la Nasiones Unida per refujadas ia dise ce la afonda representa cisa la perde la plu grande de vives en un traversa par migrores a Europa. A la min 900 otra migrores ia mori en traversa la Mediteraneo ja en esta anio.

Barcones de la marina e gardacosta italian e malti, con ance tre elicotores, partisipa en la opera de salva, a distantia de 210 cilometres de la costa de Lampedusa, e 27 cilometres de la costa de Libia.

On reporta ce la migrores ia cade en la mar cuando los ia freta per atrae la atende de un barcon comersial portuges cual ia veni prosima. La esta move subita ia causa ce se barco propre ia inversa.

2015-04-19

Microndales e lavavestes domina la monte de dejetadas

Un reporta sujesta ce 60% de la 41,8 milion tones de dejetadas eletronical cual on ia baldoni en 2014 ia es aparatos de cosina, laveria, e sala de banio.

Scriveda par rexercores a la Universia de la NU en Tocio, la reporta detalia cuanto tal dejetadas apare en areas diversa de la mundo.

La plu de la dejetadas ia es fornos microndal, lavavestes, lavaplatos, e otra aparatos simil de casa.

Sola 16% de la dejetadas ia ariva coreta a scemas de resicli e reusa.

La reporta ia judi ce la SUA es la nasion con la plu multe dejetadas eletronical. Lo ia jenera 7072 mil tones en 2014. Xina ia es numero du (6032 mil tones) e Japan numero tre (2200 mil tones).

Nasiones european ia domina la lista de areas mesurada per cuanto cada sitizan dejeta.

En Noria, cada abitor ia desprende sirca 28,4 cilogrames de dejetadas eletronical. Tra Africa, la mesuras ia es plu basa: 1,7 cilogrames per person.

La reporta ia dise ce la cuantia multiplinte de aparatos eletronical dejetada es nurida par la popularia cresente de eletronicales de casa, e par causa ce multe aparatos moderna no dura tra tan longa como varias plu vea de la mesma produidas.

La 41,8 milion tones de dejetada ia conteni plu ca 16 milion tones de fero, 1900 mil tones de cupre, 300 tones de oro, e ance cuantias de otra metales valuosa, como paladio.

La reporta estima ce la valua combinada de tota esta recursos es sirca $52 mil milion.

Plu, la dejetadas conteni sustantias nosiva como plomo, cual on ta desprende plu saja con plu atende.

2015-04-18

On aresta australianes sur alegas de terorisme intendeda

La polisia en Australia dise ce los ia preveni un conspira per fa un ataca a un aveni per onora la aniversario sento de la Gera Mundal Prima.

On ia aresta sinco suspetadas, incluinte du omes de 18 anios ci on teni per ofendes alegada con relata a terorisme.

On ia dise ce la suspetadas ia intende ataca la polisia a un aveni de recorda en Melbourne en la semana veninte.

Sirca 200 polisiores ia partisipa en la opera contrateroriste en la site, temprana oji.

La indicas colieda par la polisia ia sujesta ce la suspetadas ia deveni influeda par la Stato Islamiste.

Un om tre, ance con 18 anios, ia es arestada per posese nonlegal un arma. Du otra adolesentes arestada, con 18 e 19 anios, es interogada par la polisia..

Ofisiores ia refere a atacas posible con "armas agu", ma la viscomisionor de polisia ia dise ce on ave no indica cual sujesta "un destesti intendeda".

La dia de ANZAC (Corpo de Armada de Australia e Zeland Nova) es un dia anial de recorda soldatos de acel du paises.

On projeta un serie de avenis per la semana veninte, a la aniversario sento de la ateras aliada sur la penisola Gelibolu (Gallipoli) per securi la streta Dardanelos.

La polisia ia dise ce, an si los mesma ia es la blanco xef de la conspira alegada en Melbourne, un menasa ia esiste ance a la popla jeneral.

On continua xerca a alga adirijes en la sude-este de la site.

Australia ia aumenta se nivel de menasa a "alta" en setembre 2014, e ia fa alga atacas contrateroriste pos alora.

2015-04-17

Rabia mata 160 persones per dia

Un reporta par la Alia Global per Controla de Rabia dise ce sirca 59 mil persones mori en cada anio par causa de rabia comunicada par canes.

La autores recomenda ce on fa plu per vasini canes, spesial en paises de revenu basa.

Vasines per vitimes mordeda debe es ance plu disponable a custa plu bon en tal areas.

Rabia es un infeta virusal matante, cual es cuasi intera prevenable. Lo pote infeta tota mamales, ma la reporta dise ce canes domada causa plu ca 99% de tota moris umana de la virus.

La plu de paises developada ia elimina rabia de se popla de canes. Ma en multe paises developante, rabia es ancora presente en canes domada, e lo es comun mal controlada.

La reporta estima ce sirca 160 persones mori de la maladia per dia, e la plu de esta avenis es trovada en Asia (representante 60% de moris) e Africa (36%).

Par se mesma, Barat ave 35% de moris umana de rabia – plu ca cualce otra pais.

La reporta dise ce la proportio de canes vasinida en cuasi tota paises en Africa e Asia es multe tro basa per susede controla la maladia.

Lo dise ce la modo la plu bon e frugal de preveni rabia de can es la vasini de canes, ma on debe ance boni la disponablia de vasines umana.

La studia mostra ce la custa global de rabia es sirca 8,6 mil milion dolares USA per anio, si on inclui la moris prematur, la revenu perdeda par mordedas, e la spende sur vasines umana.

2015-04-16

La editor de Charlie Hebdo publici un libro sur islam

On publici oji un libro scriveda par Stéphane Charbonnier, la editor mor de Charlie Hebdo, un jornal satira semanal franses.

La libro suporta la direto de burla relijios, e ia es completida a sola du dias ante la mata de se autor – conoseda como Charb – par combatosas islamiste en janero.

Lo razona ce en loca de la bon batalia contra razisme, la mundo sustitui sempre plu un luta maljudida contra "islamofobia".

Charb e 11 otras ia es matada a media de un consenta edital de la jornal.

La ataca a la ofisias de la jornal en Paris ia es esecutada par du frates, Saïd e Chérif Kouachi, ci mesma ia es matada a pos par fusili par la polisia.

Charb ia reseta multe menasas de mata pos la publici par Charlie Hebdo de cartunes mostrante la profeta Muhammad en 2006. La ofisias de la jornal ia es ensendeda par bomba en 2012.

La titulo de la libro es Un letera publica a la frodores de islamofobia ci vantaji la razistes. Lo es no sola un defende de la disposa edital de la jornal, ma ance un ataca a se oposores.

La autor scrive: "La sujesta ce on pote rie sur tota, con eseta de alga partes de islam, car muslimes es multe plu iritable ca la resta de la popla – cual es esta, si no un separa prejudosa?"

El condena esta disposa como un "paternalisme inteletal burjes sinistriste blanca".

Charlie Hebdo, cual ia es inisiada en 1969, ia burla conservistes e tota relijios. Lo ia sirculi en cuantia peti, e ia colasa en 1981, ma on ia revive lo en 1992.

2015-04-15

Un avion lisca de la atereria en Japan

En Japan, autoriosas de securia investiga como un avion de Corea Sude ia patini de sur un atereria pos atera a la airoporto de Hiroshima.

La 74 pasajores e sete ecipores ia debe infla la toboganes de crise per sorti de la Airbus 320, tarda ier. On reporta ce a la min 20 persones ia es ferida.

Ofisiores de la ministreria de transporta ia dise ce probable un rota de la avion ia colpa un strutur de radio prosima a la atereria.

La strutur, nomida la locador, aida aviones a trova la atereria. On ia descovre un frato de lo sur la rota sinistra de la avion.

Imajes de la sena ia pare mostra un dana a la tore de 6 metres, con metal laserada e torseda.

La lado sinistra de la coda de la avion ia es ance danada, e la comite de securia de transporta investiga.

La airocompania Asiana ia demanda es pardonada per la asidente, disente ce lo ia institui un ecipo de responde per maneja la tempo seguente.

Pasajores ia comenta ce los ia oia un esplode pos atera, e la cabana ia es pronto plenida con fuma e un odor de arde. La avion ia pare ance lisca longo la tera.

Un fem ia dise: "Fuma ia emerji, e alga de la mascas de osijen ia desende. La ospitores ia es tan en panica, e me ia pensa: «nos va mori»."

La avion ia vola de Hiroshima de la airoporto Incheon, prosima a Seoul en Corea Sude.

En julio 2013, un otra avion de la mesma compania ia cade en atera a San Francisco en la SUA pos colpa se coda contra un mur maral. Tre persones ia mori en acel cade, incluinte un adolesente xines ci ia es craseda par un camion de pompores en la caos.

2015-04-14

On recorda la xicas saisida en Nijeria a un anio ante aora

On va fa rituos tra la mundo per onora la aniversario de la saisi de plu ca 200 xicas par Boko Haram, un grupo islamiste combatosa en Nijeria.

Un prosegue va aveni en la capital, Abuja, con partisipa de 219 xicas per representa cada xica ci ia desapare.

On organiza prosegues simil en otra paises, incluinte en Washington e London.

A martedi, Amnestia Internasional ia dise ce 2000 xicas e femes ia es saisida de pos la comensa de la anio pasada, e obligada a deveni cosinores, combatores, o sclavos sesal. Lo ia fundi se reporta sur cuasi 200 racontas par atestores, incluinte 28 femes e xicas ci ia evade se prisonia.

La saisi de la xicas de un scola en Chibok en Nijeria norde-este a 14 april 2014 ia coleri la mundo, e nasiones como la SUA e Xina ia promete aida trova los. Ma asta aora, on no ia susede trova an un.

Campaniores ia critica la governa de Goodluck Jonathan, la presidente aora partinte, per no ata sufisinte per deteta la xicas e combate la rebela de ses anios par Boko Haram en la norde.

La presidente nova, Muhammadu Buhari ia promete "crase" la rebelores. On va inaugura el a 29 maio pos se defeta de Jonathan en la eleje de la mense pasada.

2015-04-13

Turcia es coler a la parola "jenoside" parlada par la Pape

Turcia ia retira se ambasador de la Vatican pos cuando Pape Fransisco ia descrive como "jenoside" la mata coletiva de armenianes su governa osmanian en la Gera Mundal Prima.

La pape ia fa la comenta a un servi en Roma ier, e Turcia ia reata coler.

Armenia e multe istoriistes dise ce asta 1,5 milion persones ia es matada par soldatos osmanian en 1915. Ma Turcia ia disputa sempre esta mesura, disente ce la moris ia es un parte de un batalia interna cual la Gera Mundal ia causa.

La disputa continua dana la relatas entre Armenia e Turcia.

La comentas de la pape ia es fada a un misa en la rituo armenian catolica a la basilica de San Pedro, ante la presidente e xefes eglesal de Armenia.

El ia dise ce umanas ia vive tra "tre trajedias enorme e sin presedente" en la sentenio pasada.

"La prima," el ia dise, "cual es jeneral considerada como «la jenoside prima de la sentenio 20», ia colpa vos popla armenian propre." Se parolas ia repete un espresa usada en un declara par Pape Joan Paulo 2 en 2001.

Pape Fransisco ia refere ance a la crimines "esecutada par nazisme e stalinisme", e ia dise ce otra jenosides ia segue en Camputxa, Ruanda, Burundi e Bosnia.

El ia dise ce la onora de la memoria de los ci ia es matada es se debe.

"Asconde o nega la malia es simil a permete ce un feri continua sangui sin trata lo con banda," la Pape ia ajunta.

Serzh Sargsyan, la presidente de Armenia, ia bonveni se comentas, disente ce los envia un mesaje potiosa a la comunia internasional.

Ma Turcia ia clama direta la ambasador de la Vatican a Ankara per demanda un esplica, e ia retira plu tarda se ambasador de Roma.

La ministreria de esternas ia dise ce lo senti "un delude e tristia grande" a la comentas de la Pape, sur cual lo ia dise ce los va causa "un problem de fida" entre los.

2015-04-12

La televisa turces impedi la partito oposante

La televisa nasional de Turcia ia proibi la mostra de la presenta campaniante de la partito oposante xef, car lo ataca direta la governa.

La Partito Republiciste de Popla ia acusa la difusor TRT de "malusa se ofisia publica" e ia promete ce lo va pone la caso ante un corte.

Lo ia protesta ja a ante contra la "prejudi" de TRT en favore a presidente Recep Tayyip Erdoğan e se Partito de Justia e Developa.

La popla va vota a 7 junio.

En un declara turces en la pajeria de la partito oposante, la visxef Bülent Tezcan ia dise: "Par fa la deside de no difusa la presenta, TRT ia crea un scandal nova."

El ia ajunta: "La intende xef de televisa nasional finansiada en tota paises democrata es la justia de difusa. La dirijores de TRT fa la crimin de malusa se ofisia publica."

Tezcan ia dona ance un recorda a la difusor ce lo es "poseseda par la popla".

TRT ia refusa comenta asta aora.

La anunsia de la partito oposante ia conteni la slogan "nos aplaudi como un nasion". Lo ia critica la "opresa" de justia, libria e secularisme en la pais.

Lo ia recomenda forte ce votores visita la asembla coletiva prima de la partito a saturdi.

Esta controversa segue un judi par un corte en Ankara a jovedi, pos cual Kemal Kılıçdaroğlu, la xef oposante, debe paia un compensa per insulta presidente Erdoğan en un parla en 2013.

2015-04-11

100 tances deutx dorminte va reativi

Deutxland va reativi sento tances desusada, parente per responde a tensas cresente contra Rusia supra Ucraina.

A ante, la tances ia es vendeda a la campo industrial como parte de reduis pos la Gera Fria.

La ministreria deutx de defende ia dise ce lo va spende 22 milion euros en aumenta se cuantia de tances a 328.

En febrero, ofisiores de OTAN ia acorda crea un forte de reata rapida per fronti la defias stada par la crise ucrainsce e par estremistes muslim.

Ministros de defende en OTAN ia acorda ance grandi la Forte de Responde de la aliada a plu ca duple.

On regarda esta cambias como un sinial ce OTAN regarda la saisi par Rusia de Crim e se ativias militar en Ucraina este como multe plu ca un crise tempora.

Un portavose per la ministreria deutx de defende ia confirma un reporta jornaliste, disente ce on va recompra sento tances batalial de spesie Leopardo 2 de la industria defendal, cual ia reteni los.

El ia dise ce Deutxland debe serti ce lo pote envia soldatos con la aparatos coreta a la loca coreta en un tempo corta, considerante la goles nova de flexablia e reatas rapida.

"Esta pote susede sola si on no nesesa prima move la aparatos tra la pais," el ia ajunta.

La cambia reversa partal un deside de cuatro anios ante aora, cual ia talia la cuantia de tances deutx de 350 a 225.

On va comensa moderni la tances en 2017.

2015-04-10

On sutrae un sculta colonialiste en Kaapstad

En Sudafrica, la Universia de Kaapstad (Cape Town) ia sutrae un sculta de Cecil Rhodes, un colonialiste brites, cual ia deveni un foca de protestas.

La monumento ia es basida ante protestores aclamante, ma on va conserva ancora secur lo.

Studiantes ia campania per la sutrae de la sculta de la figur de la sentenio 19, cual on ia desveli en 1934. Otra monumentos a gidores de la eda colonial ia deveni ance focas per protestores en la pais.

Pos cuando la sculta ia es basida par gru, alga studiantes ia salta sur lo, ia bate lo con bastos de lenio, e ia covre la fas con plastica.

Esta ia es un vinse grande per sudafricanes negra ci es iritada par un manca de instruis e posibles de emplea, an a 20 anios pos la fini de apartait.

"Nos ia susede final senta la blancas afin los escuta nos," un studiante ci ia campania ia dise.

La fola ci ia regarda la basi ia es miscada, con multe profesores e studiantes blanca ci ia suporta ance la sutrae.

La protestores ia dise ce la sculta ave "un potia simbolin grande" cual glori algun "ci ia esplota la labora negra e ia fura tera de persones nativa".

La aveni intera indica ce Sudafrica nesesa fronti la problem de nonegalia razal. La Universia de Kaapstad ave sola sinco profesores negra ci ia nase en la pais.

La 30 membros de la comite de la universia ia vota a mercurdi per sutrae la sculta. Los ia esamina la opinas de studiantes, profesores, studiantes pasada, e la popla jeneral ante fa se deside.

"Esta es esata la bon modo de funsiona per un universia, e nos crede ce lo es un model per la pais en fronti problemes de erita," la comite ia comenta.

La campania ia provoca atacas contra otra scultas en Sudafrica cual on persepi como representas de la pasada raziste de la pais.

Ma lo ia causa ance un contrareata, en cual alga sudafricanes blanca ia asembla per proteje la sculta de Paul Kruger, un presidente de la sentenio 19, en la capital, Pretoria, e de Jan van Riebeeck, un colonialiste de la sentenio 17 en Kaapstad.

2015-04-09

Simias es refusada en un disputa diplomata

Arabia Saudi ia refusa aseta cuatro simias pico amazonal de un zo svensce par causa de un disputa diplomata.

On ia intende ce la uistitis pigmeo de la zo Skansen en Stockholm vade a un zo en Riyadh.

Jonas Wahlström, la xef de Skansen, ia dise: "Los no ia desira plu la simias, par causa de la situa political."

En la mense pasada, la ambasador saudi a Sveria ia es retirada pos cuando Sveria ia abandona un acorda sur armas en un disputa sur diretos umana.

"Lo es alga comica," Wahlström ia comenta. "Me va debe mera espeta asta cuando on dona denova visas a comersiores svensce. Cisa ance simias va reseta alora visas."

En marto, Arabia Saudi ia ataca Margot Wallström, la ministro svensce de esternas, per un parla "ofendente" cual lo ia descrive como "un interfere evidente" en se governa interna.

Arabia Saudi ia preveni ce el leje la parla a un consenta de la Alia Arabi en Cairo.

En la parla, Wallström ia recomenda "libria de asosia, asembla, relijio, e espresa" e ce nasiones arabi "foca se atende a diretos de femes, representa de femes, e se recursos sufisinte".

Cada simia pesa apena plu ca 100 grames. Uistitis pigmeo es la primates la plu peti de mundo.

2015-04-08

Taiuan restrinje furnis de acua

Taiuan ia comensa divide furnis de acua a plu ca milion casas en cuando lo fronti la secia la plu mal sur la isola en multe anios.

On va para intera la furni de acua per du dias en cada semana, en modo sirculinte, en alga sites norde.

La manca es causada par un redui de pluve cual ia lasa un nivel estrema basa de acua en lagos de reserva. Ma on culpa ance un sistem goteante de furni, la cumula de deponeda en la lagos, e simple la peri.

En la tarda de marto, la governa ia predise ce la periodo seca va continua.

On ia avisa ce abitores en areas afetada ta conserva acua per usa en coce e lava.

Sirca 1400 usores industrial – incluinte fabricores de composantes cimical e eletronical – es ance afetada. Asta aora, se produis no ia cambia car los ave furnis en tores propre de acua, o ia ajusta se program de fabrica.

En Taiuan, la custa de acua es entre la plu basas de mundo. Esta ia causa ce on peri vasta lo. La tubos sur la isola ia es construida a desenios ante aora, causante un perde par goteas de sentos de miliones de tones de acua per anio.

Ance deponedas acumulada en la lagos ia redui la capasia de conserva la pluve.

On critica la governas presedente e presente de Taiuan, como ance la compania publica de acua, per no ata sufisinte per trata esta problem a tempo plu temprana.

La governa ofre aora regalas per promove la conserva de acua, incluinte descontas per usas reduida, e un suporta finansial per instala valvas e vasones nonperosa.

On considera alti la custa de acua per minimi la peri, ma politicistes teme fa esta ante la elejes presidental e parlamental de la anio veninte.

2015-04-07

Un esplode a un compleso cimical en Xina

En Xina sude-este, un esplode ia aveni a un compleso cimical en la provinse Fujian, causante un focon major.

La esplode ia aveni ier, a sirca 19:00 de ora local, a la compleso en Zhangzhou. On ia reporta tre persones ferida.

La compleso produi paraxilen (PX), un cimical flamable cual on usa en la fabrica de poliester e plastica. Lo es operada par un de la produores autonom la plu grande en Xina.

Esta es la esplode du a la compleso en Zhangzhou en du anios. La compania no ia comenta.

La esplode ia rompe la fenetras de un gasolineriia a un cilometre de la compleso.

On ia televisa la focon, mostrante flamas cual salta en la aira, ma furninte poca detalios. Sirca 430 pompores es a la loca.

Abitores ia protesta contra la construi de complesos de PX en Xina, incluinte cexas violente en la provinse Guangdong en april 2014. Multe persones teme ce la contamina de la complesos perili la sania.

Protestas publica es ancora rara en Xina, do protestores debe ave un lisensa. Ma campanias sur la ambiente crese en cuantia.

En anios resente, paraxilen ia deveni un foca de tal protestas, obligante ce on retarda o cansela la complesos, iritante la governa nasional.

2015-04-06

Cavores espaniol mori en la montania de Magrib

Du cavores espaniol ia mori, e un ia survive, pos deveni trapida tra dias a la fondo de un canion profonda en la montes Atlas de Magrib.

Tarda ier, on ia salva un om de 27 anios, ma se du acompaniores ia es matada par se feris ante pote es salvada.

Jornalistes local reporta ce la survivor es nonferida, ma ce el sufri de ipotermia e de angusa pos trauma.

Tota tre cavores ia es vivente cuando on ia trova los a la matina de saturdi.

Los ia separa de la resta de se grupo per esplora cavas diferente, e a martedi on ia reporta ce los ia desapare.

A saturdi, los ia pare en bon state, reatante a siniales de un avion xercante.

Ma un de los, Gustavo Virués, ia mori plu tarda en acel dia en cuando ecipos de salva ia luta ancora per ateni la mancantes. La canion ave 400 metres de profondia, e asede lo no es fasil.

Cuando los ia ariva e dona aida medical, José Antonio Martínez ia mori an tal.

Juan Bolivar Bueno ia es susedosa estraeda de la canion e ia es moveda a Ouarzazate, un site visina.

La montania Atlas Alta inclui montes con plu ca 4000 metres de altia. Multe turistes visita la montania per pasea o sci.

2015-04-05

Cenia lamenta la vitimes de un ataca somali

Cenia ia comensa tre dias de lamenta per la 148 vitimes de un ataca contra studiantes par al-Xabab, un grupo ativiste.

On va fa rituos pascual per recorda los ci ia mori en la ataca a la Universia de Garissa a jovedi, e banderas va es basida a altia media.

Presidente Uhuru Kenyatta ia promete responde a la ataca "en la modos tan sever como posible".

En Cairo, la Universia de al-Azhar – la loca de studia la plu respetada sur islam suni, ia condena ance la ataca.

La Crus Roja de Cenia dise ce, asta aora, relatadas ia identifia 54 de la vitimes a un moreria en la capital, Nairobi.

Buses transporta plu ca 600 studiantes e sirca 50 empleadas survivente a se vilas propre.

Multe survivores ia es reunida con se familias a la Stadion Nasional Nyayo en Nairobi, cual ia deveni un base de desastre.

Cuasi tota la 148 matadas ia es studiantes. 79 otra persones ia es ferida.

Cuatro fusilores ia es matada, e ofisiores dise ce los teni sinco persones per interoga los. On crede ce un de esta persones es un securior de la universia.

Ambos cristianes e muslimes ia denunsia la ataca. On previde ce, en se mesaje pascual tradisional, Pape Fransisco va descrive la studiantes como martires cristian contempora.

En Cenia, persones ia vade sur la stradas per protesta sur la matas e per rejeta la idea ce al-Xabab ia susede divide la pais.

Ma on ia critica como la servis de securia ia trata la ataca. Sola du gardores ia es laborante cuando la ataca ia aveni, an pos avertis ofisial ce un tal ataca contra un universia es probable.

Garissa es situada a 150 cilometres de la frontera de Somalia, de do al-Xabab opera. La grupo ativiste ia dise ce se atacas venja atas par soldatos cenian en Somalia.

2015-04-04

On salva un marinor perdeda pos du menses

On ia salva un marinor ci ia es perdeda a mar tra du menses. El ia survive par come pexes cru e bevi acua de pluve.

Louis Jordan veni de la SUA e ave 37 anios. El ia catura pexes par pone se vestes en la acua.

El ia dise: "Final, Dio ia responde a me preas, direta ante cuando me ia consuma me gutas ultima de acua."

Se barco de vela ia inversa, e ia es trovada par un barcon deutx a jovedi, a distantia de plu ca 300 cilometres de la costa de Carolina Norde.

Jordan ia sufri desidrata e un spala ferida.

La gardacosta ia espresa un surprende sur la bon state de la marinor, ma ave no razona per duta se raconta.

El dise ce cuando la barco ia inversa a media de un note, el ia vade volante tra la aira.

Par causa de la feri a se spala, el no ia pote repara se masto rompeda, e se sistemes eletronical de naviga ia resta nonusable.

Pos consuma tota se comedas e bevidas, el ia colie acua de pluve, e ia ave ultima 25 galones. El ia bevi un otigalon de esta per dia.

Prima, el ia trova ce catura pexes es difisil, asta cuando el ia oserva ce los ia deveni atraeda a se vestes cuando el ia pone los en la mar per lava los. Tal, usante un rede de mano, el ia susede oteni comedas.

Se familia, ci ia reporta se asentia a fini de janero pos cuando el ia vade per pexa, ia parla a el par telefon pos la salva.

Se padre ia dise: "Me ia pensa ce me ia perde tu." En responde, Jordan ia demanda un pardona per no pote renaviga a casa.

La gardacosta ia transporta el de la barcon deutx par elicotor a un ospital en Virjinia. On ia desospitali el a la matina de venerdi.

2015-04-03

Un tempesta de arena en la AAU

Un tempesta grande de arena ia colpa la Amirias Arabi Unida, ascondente la orizon famosa de Dubai.

Ventas forte ia enaira la arenas de deserto, sever reduinte la capasia de vide a mera 500 metres, e causante problemes de respira a alga persones.

Per evita la tempesta, aviones ia debe diverje de la Airoporto Internasional de Dubai, lasante multe pasajores encaliada.

An si tempestas de arena no es nonusual en la area, la estremia de esta clima ia xoca alga abitores.

La polisia en Abu Dhabi dise ce la tempesta ia causa un asidente major de trafica. Un person de 24 anios ia es portada a ospital par avion pos deveni grave ferida en la asidente.

Meteorolojistes predise ce la tempesta pote dura tra alga dias.

2015-04-02

Un barco de pexa afonda en Rusia este

Un dragador rusce ia afonda prosima a la penisola Kamchatka en la este de la pais, matante a la min 54 marinores, incluinte la capitan.

On ia salva 63 tre persones, de ci multe ia sufri de ipotermia, ma la 15 otras manca ancora. On crede ce la 15 ia es grapida en la cala.

78 de la ecipo ia es rusce, e 42 ia es de Miama. La resta ia veni de Vanuatu, Latvia e Ucraina.

La Vostok Dalniy ("Este Distante") ia es un barco de pexa. Lo ia afonda en la Mar de Okhotsk, a 330 cilometres a ueste de Krutogorovsky, a sirca 06:30 de ora local (20:30 de ora universal).

La capitan de un de la 26 barcones de salva ia dise ce la clima ia es mal cuando la barco ia afonda, con neva, venta, e ondas de asta tre metres de altia.

La acua ia ave un temperatur cuasi jelada. Un portavose ia dise ce on pote survive en tal acua per asta dudes minutos.

On no sabe la causa de la trajedia, ma un dana a se sala de motor sujesta ce la barco ia colpa alga ostaculo, cisa jelo vagante. Acua ia inonda la sala e la barco ia desapare en min ca 15 minutos.

Un ofisior en Kamchatka ia dise ce, cuando la barco ia afonda, lo ia tira un rede de draga con pesa de 100 tones. Cisa on ia desobedi regulas de securia, esedente la limita masima de carga.

La barco no ia envia un clama per aida.

2015-04-01

Nijeria eleje un presidente nova

Muhammadu Buhari, un renor militar pasada, ia deveni la oposor prima ci gania un vota presidental en Nijeria.

Se partito ia dise ce se competor, Goodluck Jonathan, ia aseta se defeta con lodas a la ganior. Buhari ia gania sirca du milion votas plu ca Jonathan cuando la presidente pasada ia aseta la resulta.

La plu de oservores ia comenta bon sur la prosede de eleje, ma on ia oia alga alegas de froda, e alga persones teme ce esta ta pote gida a protestas e violentia.

Esta es un momento estrema importante en la istoria turbada de la pais. Nun a ante ia despone un presidente en un vota ala.

Pos la autonomi de Nijeria de Britan en 1960, la pais ia esperia multe colpas de stato, e la plu de votas a acel tempo ia es falsida.

Natural, pos un compete difisil ganiada, multe votores no va es contente sur la resulta, ma la prosede intera sujesta ce la democratia profondi en Nijeria.

La vota ia fa ce diferes perilosa de relijio e teritorio emerji denova, e on senti ancora un menasa de violentia.

La suportores de Buhari ia vade sur la stradas en Kano e Kaduna, sites norde, per canta e dansa selebrante.

Esta es ja la ves cuatro a cual Buhari ia xerca la presidentia. El ave 72 anios. El ia rena la pais de janero 1984 asta agosto 1985, pos un colpa militar a la fini de 1983.

Multe votores ia dise ce los crede ce Buhari conveni plu bon ca Jonathan per vinse la grupo islamiste combatosa Boko Haram.