2019-02-28

Un focon sever a la stasion de ferovia en Qahira

A la min dudes persones ia es matada e 40 ia es ferida pos cuando un colide de tren ia causa un focon grande a la stasion xef de ferovia en Qahira, capital de Misre.

La tren ia colpa multe rapida un cuxin, prosima a la fini de un plataforma folida a la stasion Ramses en la sentro de la site.

La colide ia esplode la tance de carburante de la tren, ensendente la plataforma e construidas prosima.

On ancora no sabe perce la tren ia colide, ma a sola alga oras plu tarda, la ministro de transporta ia resinia.

Jornales governal ia reporta inisial cuantias plu alta de 25 mores e 50 feridas.

La sistem de ferovias en Misre ave un mal istoria de securia. Multe oservores culpa la manca de investi par un serie de governas e la malmaneja.

2019-02-27

Trump e Kim consenta en Vietnam

Donald Trump, presidente de la SUA, e Kim Jong-un, xef de Corea Norde, va comensa un confere oji con discutes corta, segueda par un come de sera a un otel de sinco stelas.

En sua consenta de du dias en Hanoi, capital de Vietnam, on previde ce los va discute un scema per elimina armas nucleal de la penisola corean.

Ante sua reuni con Kim, Trump va encontra la ministro xef de Vietnam e otra politicistes.

La du gidores va fa juntada un serie de consentas doman, ma la menu esata es nonconoseda. On previde ce cualce reali importante, como la suscrive de un acorda o un confere jornaliste major, va aveni en jovedi.

La jornales governal de Corea Norde ia loda Kim per sua viaja de 4000 cilometres.

La jornal Rodong Sinmun ia dedica cuatro de sua ses pajes a la tema, scrivente ce la popla ia reata a la visita con “stimula e joia nonlimitada”. Lo ia recomenda ce persones labora plu forte per “dona reportas de vinse a el cuando el reveni”.

Lo ia ajunta ance ce la manca de Kim causa notes sin dormi a alga sitadanes.

On espeta ce la consenta en Hanoi va construi sur la funda de la atenis en Singapor en junio de la anio pasada. Acel confere ia produi un acorda en parolas neblosa, en cual ambos xefes ia promete “labora en dirije a la desnucleali”, an si la detalias no ia es clarida.

Poca progresa diplomata ia es fada a pos. A esta ves, ambos xefes va conose la nesesa de ofre sinias de avansas concreta a sua criticores.

An tal, Trump ia pare maneja la espetas, disente ce el va es felis si Corea Norde va acorda mera fa no plu probas nucleal.

En la pasada, Washington ia dise ce Corea Norde va debe sede uniladal sua armas nucleal ante cuando la SUA va redui sua menasas de puni.

Vietnam ave relatas diplomata con e la SUA e Corea Norde, an si lo ia es un enemi de la SUA a ves pasada. La SUA pote presenta lo como un esemplo de du paises cual colabora pos un disputa pasada.

2019-02-26

La ministro de esternas irani resinia

Mohammad Javad Zarif, la ministro de esternas de Iran, ia dise ce el resinia en un anunsia surprendente postada a sua conta de Instagram.

El ia demanda per pardona sur “falis” en sua tempo en governa.

Zarif ia fa un rol importante en negosia la acorda nucleal de 2015 entre Iran e potiosas major internasional. Ma la futur de la acorda es en duta pos cuando presidente Donald Trump ia fini la envolve de la SUA.

La resinia de Zarif ia es confirmada par IRNA, la departe governal de novas, cual ia sita un portavose per la ministreria de esternas.

La om de 59 anios ia es educada en la SUA e ave un diploma dotoral sur lege internasional de la Universia de Denver.

El ia servi como la ambasador irani a la Nasiones Unida, e ia deveni la ministro de esternas en 2013 cuando presidente Hassan Rouhani ia es elejeda con prometes de un Iran plu moderada e abrida a otra paises.

2019-02-25

La anio 50 de la festa african la plu grande de filmas

On previde ce sirca 100 mil persones va vide 450 mostras de filmas en la semana veninte a la festa Fespaco en Burcina Faso, do la securia es tensada pos atacas par militaristes islamiste en la pais.

En la 50 anios de la comensa de Fespaco, ancora no fem ia gania la premio la plu alta, la Cavalo de Oro de Yennenga.

Un de la favoredas en esta anio es Rafiki par Wanuri Kahiu de Cenia, sur un relata lesbian. Lo ia es tempora proibida en sua propre pais ma ia es mostrada a la festa de filmas en Cannes en Frans.

Un otra competor major per la premio, cual on va anunsia a saturdi, es Desrances, un filma par la dirijor de Apolline Traore de Burcina Faso, sur la violentia poselejal en Costa de Ivor en 2010 e 2011.

Per sinemafilicas, la defia es regarda tota la filmas, car a la min sesdes es mostrada, de 08:00 asta la tarda de sera. Alga locas mostra plu ca un filma a la mesam tempo.

Mostras aveni a nove locas tra Ouagadougou, la capital, e ance en la otra sites major de la pais, Bobo-Dioulasso e Ouahigouya.

Fespaco, acronim de la Festa Panafrican de Sinematografia e Televisa de Ouagadougou, aveni en cada anio du.

Plu ca 2000 gardores es stasionida per garantia la securia de invitadas e visitores. Sirca 80 persones ia es matada en la tre menses pasada par atacas militariste, cual ia obliga ance la clui de scolas en alga rejiones.

2019-02-24

Maduro bloci la entra de aida a Venezuela

Scaramuxas ia eruta en vilas fronteral de Venezuela ier, cuando presidente Nicolás Maduro ia preveni aida umaniste de entra de Colombia e Brasil.

Soldatos ia xuta gas lacrimojen e baletas de cauxo a protestores ci ia atenta colie e transporta la furnis. Grupos por diretos dise ce alga persones ia es atacada con muni cargada, e a la min du persones ia es matada.

La oposa vole dona la aida a persones afetada par la crise economial, ma Maduro regarda lo como un menasa de securia.

Mike Pompeo, ministro de esternas de la SUA, ia condena la atacas, sur cual el ia culpa “la savajes de Maduro”. El ia descrive ance la arde de alga de la furnis como “repulsante”.

Juan Guaidó, xef de la partito oposante, ci ia declara se como presidente tempora e ia aida organiza la aida, ia condena la atas de la sodlatos.

Guaidó, reconoseda como la xef par desuples de nasiones, va encontra Mike Pence, vis-presidente de la SUA, doman en Bogotá, Colombia. El vade ala per consenta con gidores de la Grupo Lima rejional, an su la proibi de viaja cual la governa de Maduro ia pone a el.

2019-02-23

La presidente de Sudan declara un crise nasional

En Sudan, presidente Omar al-Bashir ia declara un state de crise nasional per un anio, desempleante la governa federal e tota governores de statos. El ia fa la anunsia en un parla televisada.

Plu temprana, la departe de securia ia dise ce Bashir va resinia. El ia es la foca de protestas antigovernal en semanas resente.

En la site Omdurman, persones ia protesta en la stradas pos la anunsia, ma ia reseta gas lacrimojen de la polisia.

En sua parla, Bashir ia demanda ce la parlamento pospone cambias constitual cual ta permete el a preside per un plu periodo. El ia dise ance ce la protestas es un atenta de destabli la pais.

A alga oras plu tarda, el ia publici du comandas presidental per asinia membros de la armada e la departe de securia per governa la des-oto provinses de Sudan.

El ia anunsia ance ce sinco membros de la consilio, incluinte la ministros de esternas, defende e justia, va reteni sua postos.

La protestas ia comensa sur reduis de aida finansial per pan e carburante en desembre, ma los ia deveni usada per espresa coleria contra la rena tra 30 anios de Bashir.

On reporta ce plu ca mil persones ia es detenida pos la comensa de la protestas. Campaniores per diretos dise ce plu ca cuatrodes persones ia es matada en scaramuxas contra la fortes de securia.

La organizores de la protestas ia promete continua asta cuando Bashir resinia sua posto.

Bashir ave 75 anios e ia deveni presidente en un colpa de stato en 1989.

2019-02-22

Eglesas engles no nesesa plu fa servis de soldi

La Sinodo Jeneral, la organiza governante de la Eglesa de England, ia vota per cambia un lege cual esiste de 1603.

La lege ia esije ce pretes fa un servi de soldi en cada eglesa en sua cura. La Episcopo de Willesden, ci ia proposa la cambia, ia descrive lo como “nonmoderna”.

Desenios de congregas diminuinte ia lasa un situa en cual alga pretes en England labora en asta dudes eglesas campanial.

A ante, un prete en la campania ia debe solisita la permete de un episcopo per no fa un servi de soldi en cada eglesa.

Entretempo, la Sinodo ia introdui ses prinsipes per boni la trata de persones de jeneros o sesalias diversa, disente ce la Eglesa ia es “descovreda como mancante en sua bonveni e trata de persones LGBTI+”.

La “prinsipes pastoral” urje eglesas a vide “la difere como un donada, no un problem” e a construi “fida” e “jenerosia”.

La prinsipes coraji persones a reconose sua prejudi, fa ce eglesas deveni locas bonveninte, fa discutes teolojial con respeta, “esclui” la teme, estende cortesia e jentilia a tota persones, e refusa esplota potia supra otras.

2019-02-21

Un distrito istorial de Dhaka desapare en flamas

Un focon rapida ia mata a la min 78 persones en un distrito vea de Dhaka, la capital de Bangladex.

En la note de ier, un construida abital ia ensende, conteninte un beneria de cimicales flamable a la nivel de tera. La flamas ia sperde a construidas visina en tempo corta.

La distrito Chawkbazar ave sentos de anios, stradas multe streta, e abiterias a distantias pico de lunlotra. Pompores ia es impedida par la ruetas streta e la manca de fontes de acua.

La arde ia es aumentada par silindres de gas en camionetas en la rejion.

Vitimes ia inclui persones estra la construidas, alga clientes de un restorante, e membros de la grupo acompaniante un sposa futur.

Multe persones ia es trapida en la construidas. Un om, de ci sua boteca ia es destruida par la flamas, ia survive car el ia parti per vade a un farmasia.

Esta no es la ves prima de un focon ruinante en Dhaka. En junio 2010, un arde en la distrito Nimtali ia mata 124 persones, gravida par la presentia de un beneria nonlegal de cimicales.

A pos, un comite ia sujesta la sutrae de tota cimicalerias de zonas abital, e criticores ia cexa ce esta idea no ia deveni realida.

An tal, a sola un semana ante aora, la autoriosas ia anunsia un campania per identifia comersias nonlegal de cimicales en la parte vea de Dhaka. Campanias simil en la pasada no ia susede multe.

Bangladex ave ance un problem persistente de desobedi regulas de securia. En 2013, plu ca mil sento persones ia mori e miles plu ia es ferida cuando un construida grande, conteninte fabricerias de vestes, ia colasa en Dhaka.

2019-02-20

Salvores xerca sciores pos un avalanxa suiz

A la min cuatro persones ia es ferida, un a grado grave, en un avalanxa en un vacanseria popular de sci en la Alpes de Suiz.

La avalanxa ia es reportada en Crans-Montana ier, a sirca 14:20 de ora local. 240 salvores ia continua xerca en la loca tra la note.

On ia dise inisial ce asta 12 persones ia es envolveda, ma la polisia dise ce on no pote iniora la posible ce otra persones es ancora afetada.

La avalanxa ia engoli 400 metres de inclinas marcada per sciores.

Canes de xerca e elicotores de salva es usada per xerca vitimes. La esplora inisial con canes ia es nonsusedosa. La neva es compatida e ave du metres de profondia en alga locas.

On ia comensa un investiga sur la causa de la avalanxa. Lo no es clar esce lo ia es causada par la ativia de sciores o par la state de clima.

La temperatur en la rejion ia deveni min fria en dias resente, tal ce alga neva ia fonde. Ma a martedi, la grado de risca de avalanxa ia es indicada como mera du entre sinco.

2019-02-19

Vitis protesta sur un intercambia de tera con Barat

Abitores de Suva, la capital de Viti, protesta sur la deside par la governa de permete la construi de un Comision Alta Barati nova en la jardines botanical cual es multe amada en la site.

Esta es un acorda mutua con la governa de Barat, cual en 2014 ia dona un peso eselente de tera en Delhi Nova a la Comision Alta Viti.

Acel ia es alora forte criticada en Barat. Oposores ia cexa ce la valua alta de la tera no refleta la state diplomata modesta de Viti en Barat, an si cuasi 40% de vitis ave asendentes barati.

Plu, on ia dise ce la construi a bon custa en Suva no va es un intercambia ecuilibrada per la imobila custosa en Chanakyapuri, la enclave diplomata de Delhi Nova. Criticores ia razona ce Barat va perde par la acorda.

Aora, pos cuasi sinco anios, vitis protesta. Parlamentores e otra figures publica coraji la popla a suscrive un solisita cual averti sur la danas ambiental posible a la Jardines Thurston.

Un editorial en la jornal Fiji Times ia sujesta ce la acorda va gida a plu construidas en la jardines. “Cada intrui peti a esta spasio fisical, un ambiente cultural verde, debe es resisteda, car asinias futur de spasio nova par cualce governa va es tan rara como dentes de gal.”

La jornal divina ce Barat atenta mostra sua autoria rejional en Viti, frontida par la prosimia e prestijia de la Ambasada Xines.

2019-02-18

Arabia Saudi furni aida finansial a Pacistan

Arabia Saudi ia promete acordas de investi, con valua de $20 mil milion, con Pacistan, cual desira reforti sua economia frajil.

Los formi un parte de un turi publica de Asia par Mohammed bin Salman, la prinse erital de la rena.

Pacistan nesesa solve rapida un crise de salda de paias, e espera la aida de sua suportores internasional. La acordas inclui un refineria de petrolio con custa de $8 mil milion en Gwadar, un site de porto major.

La du lados ia suscrive ance alga otra acordas tempora e notas de comprende en la campos de enerjia, petrocimicales e mina.

Sola $8 mil milion de reservas stranjer resta en la banco sentral de Pacistan.

La ministro xef, Imran Khan, ia xerca aida de paises amin per redui la grandia probable de la rescate finansial cual sua pais va nesesa de la Funda Monal Internasional, su restrinjes multe sever. Lo xerca un rescate finansial a la ves des-tre pos la parte tarda de la desenio de 1980, e Arabia Saudi ia presta ja $6 mil milion.

Pacistan es la stasion prima en la turi de Asia. La prinse erital, conoseda como MBS, va es en Barat a martedi, e va visita Xina a jovedi e venerdi.

La prinse desira remoldi sua imaje internasional pos la caso de Jamal Khashoggi, un jornaliste ci ia es omisideda en la consuleria saudi en Istanbul en otobre.

En cuando Pacistan pote benefica de la jenerosia de Arabia Saudi, la pais en Asia sude importa ance a la rena. La du paises ave un relata militar longa, e la visita par MBS aveni a un tempo cuando la jeopolitica en la rejion cambia, incluinte entre consernas sur la influe de Iran.

2019-02-17

Un tren nova barati fali en sua viaja prima

La tren la plu rapida en Barat ia rompe en sua viaja prima, a la dia pos sua inaugura par Narendra Modi, ministro xef de la pais.

Tren 18, ance conoseda como la Vande Bharat, ia es en reveni a la capital Delhi de la site Varanasi pos sua turi prima, cuando la frenos de un vagon ia deveni fisada.

Un portavose per la ministro de ferovias ia dise ce cisa la tren ia colpa un bove sur la linia.

Corta pos la fali de la frenos, la locomotivores ia nota fuma en la cuatro vagones final, e la eletrica ia rompe en tota compartes.

La pasajores, xef ofisiores de ferovia e jornalistes, ia debe usa un otra tren per reveni a Delhi.

An con la sujesta par la ministreria ce la tren ia colpa un bove, la fronte de la tren pos la aveni ia mostra no indica de dana.

On previde ce la tren nova va comensa sua servi comersial oji. Lo va redui la tempo de viaja entre Delhi e Varanasi par ses oras. En sua probas, la tren ia ateni un rapidia de 180km per ora.

2019-02-16

Trump usa potias de crise per inisia sua muron

En la SUA, presidente Donald Trump ia confirma ce el va usa sua potias de crise per construi un muron longo la frontera con Mexico, declarante ce “murones susede”.

Construi la muron ia es un promete xef de la campania elejal de Trump, ma democratas ia descrive la reali como un malusa estrema de potia.

Trump ia suscrive aora la scema, como ance un projeta legal intendeda per preveni un repete de la sesa resente de funsionas governal.

El ia fa la anunsia pos cuando la Congresa ia refusa paia per la muron projetada. Sin pausa, democratas major ia dise ce los va defia la stratejia en la cortes.

Parlante en la jardin de la Casa Blanca, Trump ia dise ce sua declara de crise permete ce el asede cuasi oto mil milion dolares per sua muron.

On previde ce la mone va es diverjeda de projetas de construi militar e de laboras per combate la comersia de drogas.

La cuantia es ancora multe min ca la 23 mil milion dolares cual on estima per la custa de la muron longo plu ca 3000 cilometres de frontera.

“Nos va fronti la crise de securia nasional a nosa frontera sude,” Trump ia dise. “Nos ave un invade par drogas, invade par ganges, invade par persones, e lo es nonasedable. Cadun sabe ce murones susede.”

Ma el ia aseta ce el va es litigada per la deside, predisente ce la caso va vade probable a la Corte Suprema.

Ja pos sola alga oras, la defia legal prima contra la declara ia es inisiada. Un organiza de promove libraliste ia litiga per un conserveria de natur e tre imobilores, a ci on ia dise ce la muron va es cisa construida sur sua tera.

2019-02-15

Un parlamentor fura un sanduitx en Slovenia

Un membro de la parlamento slovenian ia resinia pos fura un sanduitx de un boteca en Ljubljana, disente ce la empleadas ala ia iniora el.

Darij Krajčič ia informa jornalistes local ce el ia deveni iritada cuando el ia es “tratada como aira”, e ce el ia deside alora sorti per proba la securia de la supramercato.

La fura no ia es detetada, e la parlamentor, ci parteni a la partito governante, ia insiste ce el ia revade plu tarda per paia. El ia demanda per pardona, disente ce el regrete sua “esperimenta sosial”.

Sua confesa inisial ia deveni publica cuando el ia comparti la raconta con otra parlamentores en un consenta de comite a mercurdi.

“Me ia spende serta tre minutos en sta a la table de vende,” la profesor pasada de 54 anios ia esplica, ajuntante ce tre empleadas de la supramercato ia fali persepi el car los ia es ocupada en conversa entre se.

El ia dise ce cuando el ia parti per proba esce los atenta el, “nun ia segue me, nun ia cria,” sujestante ce cuando empleadas depende tro de sistemes de monitori video, los pote fali vide lo cual aveni.

La otra parlamentores ia rie inisial a la raconta, ma ier un xef de la partito de Krajčič ia condena sua atas como nonasedable.

Krajčič ia es elejeda a parlamento en setembre, cuando la partito sentral sinistriste de Marjan Šarec, la ministro xef, ia deveni la membro major en la alia governante.

2019-02-14

Airbus sesa produi sua aviones suprajigante

Airbus, un compania european cual fabrica aviones, ia dise ce lo va sesa construi la A380, sua model “suprajigante” cual es la avion la plu grande per pasajores en la mundo.

En un declara formal oji, Airbus esplica ce lo va fa sua furnis final de la A380 en 2021.

La deside ia aveni pos cuando la airocompania Emirates (Amirias), la cliente la plu grande de la avion, ia redui sua comanda de 162 aviones a sola 123.

La avion custosa ia compete difisil contra modeles plu peti e plu eficas.

En sua declara, Airbus ia dise ce on pote vide la efeto futur de la deside en sua resultas per 2018, cual ia mostra un profita neta de 3 mil milion euros, aumentada par cuasi 30% de la anio presedente.

Airbus va furni entre 880 e 890 aviones comersial nova en esta anio.

2019-02-13

Un canabor trova un tigre en un casa abandonada

Un person ci ia entra a un casa abandonada en Texas, per fumi canaba, ia trova ala un tigre descurada.

Polisiores en Houston ia dise ce cuando la person ia telefoni a lundi per reporta lo cual el ia vide, los ia suposa ce la person alusina.

Ma cuando los ia ariva a la loca, on ia ave vera un tigre grande, securida en un caje peti en la garaje. Alga pacos de carne ia sta en la prosima, ma no otra cosa ia indica ce cualcun abita la casa.

Aora, polisiores va investiga como la tigre ia veni ala.

Los ia dise ce la “sitadan consernada” ci ia descovre la tigre no abita en la casa, e ia atenta entra mera afin el pote usa canaba. Los ia demanda esce el esperia la efetos de drogas o esce el ia vide vera un tigre.

La polisia ia descrive la caje como “inferior”, ajuntante ce lo ia es securida con un turnavise e un banda de nilon.

An si la tigre ia es relativa calma per un bestia en sua situa, on ia debe aplica un calminte a lo afin ofisiores de salva ia pote move lo de la casa sin peril.

La tigre es aora en via a un conserveria de animales en Texas, de cual on no ia revela publica sua loca esata.

Tigres es nativa a Asia sude e sude-este, e a la este estrema de Rusia. Los es perilida. La Funda Mundal de Natur (WWF) estima ce min ca cuatro mil resta savaje.

2019-02-12

Un reporta asentua la multe crises de la ambiente

Politicistes e governores ia fali comprende la gravia de la crise ambiental cual fronti la Tera, diseda par un reporta nova.

La Instituida per Rexerca Publica sur Politicas, un organiza sinistriste en London, dise ce la efetos de umanas ia ateni un grado perilosa e ce lo menasa destabli la sosia e la economia global.

Siensistes averti sur un combia de fatores cisa matante. Estas inclui cambias a la clima, la perde de multe spesies, la erode de suprasolo, e la asidi de la mares.

La reporta dise ce esta fatores “avansa un prosede complicosa e dinamical de destabli ambiental cual ia ateni un nivel grave. Esta destabli aveni a rapidias sin presedente en la istoria umana e, en alga casos, an en miles de miliones de anios.”

Lo averti ce, per evita un resulta desastrosa, la fenestra de posiblia va es cluida pos tempo corta.

La autores recomenda tre cambias de la comprende political: sur la vastia e rapidia de la crise ambiental; la implicas per sosias; e la nesesa seguente per cambias mutante.

Los dise ce, pos 2005, la cuantia de inondas tra la mundo ia crese des-sincuple, avenis de temperatur estrema ia dudesupli, e focones savaje ia deveni setuple plu comun.

A la min la cambia de clima apare aora en discutes de politica, los dise, ma otra efetos multe importante es apena discuteda.

2019-02-11

Protestas contra froda alegada en Aiti

Protestores en Aiti ia arde numaticos e ia lansa petras, urjente ce presidente Jovenel Moïse resinia.

A la min cuatro persones ia es matada e desuples ia es ferida en cuatro dias de protestas en la capital Port-au-Prince e otra sites.

Multe aitianes acusa ce Moïse e otra ofisiores ia froda. Miles ia vade sur la stradas per protesta en esta semana.

La turba ia obliga maiores en alga sites a cansela la selebras de carnaval en la temprana de marto.

Moïse, ci governa de 2017, ia recomenda discutes con la oposores, ma sin resulta asta aora.

Grupos oposante ia urje protestas pos un reporta de corte cual ia alega ce ofisiores e ministros pasada ia prende nononesta alga prestas per developa, donada a Aiti par Venezuela pos 2008.

La reporta ia sujesta ance ce Moïse ia es envolveda en atas nonregulada.

Aiti es la pais la plu povre en la Caribe, e 60% de persones vive con min ca $2 per dia.

2019-02-10

Un focon savaje grande en Zeland Nova

Miles de persones es evacuada de un vila en Zeland Nova, en cuando pompores batalia un focon savaje tisada par ventas en la Isola Sude.

La arde, cual ia comensa a ses dias ante aora, prosima a la site Nelson, menasa aora la vila Wakefield.

On ia declara un state de crise, e sirca tre mil persones ia fuji de sua casas en la distrito Tasman.

Ventas forte es prevideda, e on averti ce oji pote es un “punto de peril estrema” per la focon. Jacinda Ardern, la ministro xef, ia dise ce el espera ce “la clima va coopera”.

On crede ce esta es la focon savaje la plu grave en Zeland Nova pos 1955.

La parlamentor per Nelson ia dise ce la rejion intera es “flamable como esca” e ce sua 70 mil abitores es “tensada”.

Dudes-tre elicotores e du aviones es enviada per combate la arde. On previde pluve a martedi ma ce lo no va cade sur la zona flaminte.

Focones de esta grandia es nonusual per Zeland Nova, e jornalistes local descrive lo como la plu grave de 50 anios.

2019-02-09

Controversia sur la condena de un omisidor canadian

Un om canadian ci ia mata adorores en un mascita en la Site Quebec en 2017 ia deveni condenada a spende sua vive en prison.

Alexandre Bissonnette, ci ave 29 anios, va cuali per libria limitada pos 40 anios.

La acusores ia demanda per un condena de 150 anios en prison, cual ta es la puni prisonal la plu sever en la istoria de Canada. En loca, la judor François Huot ia eleje permete la posiblia de libria limitada cuando Bissonnette va vive ancora.

Anunsiante sua deside, la judor de la Corte Superior de Quebec ia dise ce “punis no debe es venjas”.

En Canada, un condena per omiside de grado la plu estrema trae automata un condena per vive, sin posiblia de libria limitada ante la pasa de 25 anios.

A la sera de 29 janero 2017, Bissonnette ia entra violente a la Sentro Cultural Muslim de Quebec e ia spara a la persones asemblada per preas, matante ses de los e causante feris grave a sinco otras, incluinte Aymen Derbali, ci es aora paraliseda.

En marto, Bissonnette ia confesa la mata de Khaled Belkacemi (60 anios), Azzedine Soufiane (57), Abdelkrim Hassane (41), Mamadou Tanou Barry (42), Aboubaker Thabti (44) e Ibrahima Barry (39), en sua ataca.

El ia declara se culpable ance sur ses acusas de omiside atentada, incluinte un per la 35 persones ci ia es en la mascita a la tempo de la ataca, ma ci no ia es ferida.

“Me vergonia sur lo cual me ia fa,” el ia dise a un corte en Quebec en la pasada. “Me no es un teroriste, me no es un islamofobica.”

Huot ia dise ce la atacas par Bissonnette ia es motivada par prejudi, ma el ia nota ance ce Bissonnette ave disturbas de sania mental.

Derbali ia informa jornalistes a la corte ce multe de la survivores es profonda deludeda par la deside. El ia dise ce la condena no refleta bon la estremia de la crimines fada.

En 2011, la lege canadian ia es alterada per permete ce, per omisides multiple, judores dona un serie de condenas en loca de condenas paralel de 10 o 25 anios, sin posiblia de libria limitada.

La avocatos de Bissonnette ia razona ce, si on ta condena el a un serie de 25 anios per cada omiside, esta ta es egal a mata el par prisoni.

2019-02-08

Graniza deleta la abitores de Delhi

Delhi, la capital de Barat, ia es colpada ier par un tempesta forte de graniza. La site ia deveni blanca, stonante e deletante sua abitores.

Imajes e videos en redes sosial mostra bales de jelo con grandia de seriso, e stradas covreda con estas.

Multe persones ia compara la vista rara a un sena plu comun en Chicago o London.

La clima sever ia obliga ance ce on diverje plu ca 30 aviones en la oras temprana de la sera.

Ma un resulta sasiante de la tempesta es ce lo ia aida boni la cualia famosa contaminada de la aira en la site.

Partes norde de Barat ia esperia cades grande de neva en la dias resente. La clima ala ia provoca ance avertis sur avalanxas e cluis de scolas.

2019-02-07

Un eruta de morbilio en la Pilipinas

On ia declara un eruta de morbilio, un virus multe comunicable, en Manila, la capital de la Pilipinas.

196 persones ia developa la maladia en la 19 dias prima de janero, en contrasta con mera 20 casos en la mesma periodo de la anio pasada.

On crede ce 50 persones – de ci la plu ia es enfantes – ia mori ja par la maladia. Autoriosas dise ce 2,4 milion enfantes nonvasinida es perilida.

La ministro de sania ia averti ce la broncopneumonia causada par complicas de morbilio es capas de mata, e ia urje jenitores a trae sua enfantes per imuni.

Ultra la casos confirmada, la ministreria de sania ia dise ier ce a la min 861 casos suspetada de morbilio ia es reportada a o ante 2 febrero. Oji, la ministreria ia largi sua defini de la area afetada per inclui otra partes de la Pilipinas.

Persones en la pais esita imuni sua enfantes a sentros governal de sania, pos problemes relatada a un vasin contra la maladia denge.

Morbilio es un maladia portada par aira; lo es fasil comunicada par toses e stornuis. La sintomes inisial inclui usual un febre, tose, rinorea (un flue de muco de la nas) e oios inflamada. Un eruta roja apare sur la fas e corpo pos alga dias.

2019-02-06

Joalas real de Sveria es retrovada pos un fura

La polisia svensce dise ce la tesoros valuosa de la familia real, furada en julio pasada, es cisa aora reganiada.

Un declara enlinia informa ce polisiores “labora intensa” per confirma ce la ojetos es autentica.

Furores ia prende du coronas e un globo con crus, ante parti par motorbarco sur un lago prosima. La joalas ia parteni a un de la monarcas de Sveria en la sentenio 17.

Reportas en medias local sujesta ce la ojetos ia es trovada sur un baldon de dejetadas en un suburbe de Stockholm.

“Tota indicas es ce on ia trova la ornas funeral furada de Karl 9, prosima a Stockholm,” la declara dise, ajuntante ce la autoriosas labora “a sento persentos” per identifia los.

La furores ia entra corente a la catedral de Strängnäs, a ueste de Stockholm, per saisi la joalas.

Un om de 22 anios es aora prosededa per la fura, ma la autoriosas xerca ancora “criminores ajuntal”, como la declara dise.

La ojetos es ornada con perlas, petras valuosa e oro, e veni de la vestes funeral de Re Carl 9 e Rea Christina en 1611. A la tempo de sua fura, un portavose per la polisia ia descrive los como “ojetos de interesa nasional ultra valua”.

2019-02-05

Criptomone es nonasedable pos la mori de la encargada

La intercambieria la plu grande de criptomone en Canada es noncapas de asede miliones de dolares de mone dijital, pos la mori subita de sua fundor.

Quadriga ia rejistra se per proteje contra detas, estimante ce sirca 180 milion dolares canadian manca.

Lo no ia pote loca o securi sua reservas de criptomone pos cuando Gerald Cotten ia mori en desembre. Cotten, ci ia ave 30 anios, ia ave la sola encarga per manipula la reservas e la mone.

En documentos rejistrada con la Corte Suprema de Scotia Nova a 31 janero, sua vidua Jennifer Robertson dise ce la computador portable cual Cotten ia usa per labora “es sifrida, e me no conose la parola secreta o la clave de recovre. An con xercas repeteda e asidua, me no ia pote trova los scriveda en cualce loca.”

La compania ia emplea un investigor per esplora esce on pote asede la datos, ma esta labora continuante ia fa sola “susedes limitada en regania un pico de monetas” e alga informas de la computador e telefoneta de Cotten.

Quadriga investiga ance esce lo es posible ce alga de la criptomone es securida en otra intercambierias. La compania dise ce sirca 115 mil de sua usores teni saldas en sua contas personal en forma de obligas.

La compania estima ce lo debe sirca 250 milion dolares canadian, incluinte 70 milion de mone fisical.

La afidavit dise ce la majoria de la criptomone ia es tenida par Quadriga en un “portamone fria”, cual es estralinia e usada per securi criptomone de piratas e furores.

Problemes de licuidia per la compania, locada en Columbia Brites, ia comensa en janero 2018, cuando CIBC, un banco canadian, ia jela plu ca 25 milion dolares liada a sua prosedor de paia cuando la banco ia esperia difisiles en determina ci posese la mone.

La problemes es aumentada par la mori nonespetada de Cotten. El ia mori en un viaja en Barat, par complicas con la maladia de Crohn.

2019-02-04

Un granada entre patatas a un fabriceria

Un granada deutx de la Gera Mundal Prima ia es trovada en un trae de patatas transportada de Frans a un fabricerias de xipes en Hongkong.

La aparato fangosa, con largia de oto sentimetres, ia es en un state nonstable car lo ia spara se, ma sin detona.

Lo ia es descovreda a un fabriceria en Sai Kung, un distrito este, a la matina de saturdi. La nonpatata ia es detonada ala en modo secur par espertas de bomba, usante un tecnica de acua su presa alta.

On crede ce la granada ia es acaso escavada con patatas plantada en un campo en Frans, ante deveni esportada. Probable lo ia es lasada ala par soldatos en la gera, ci ia lansa lo o ia cade lo sin intende.

En la anio pasada, miles de persones ia debe es evacuada de un area comersial major de Hongkong per permete ce la polisia desativi un bomba multe danada de la Gera Mundal Du, cual on ia descovre en un construeria. Lo ia es la bomba numero du de spesie simil cual on ia trova en Hongkong en acel semana.

2019-02-03

La Pape fa un visita sin presedente a la AAU

Pape Fransisco va ariva oji en la Amirias Arabi Unida, deveninte la pape prima ci visita la Penisola Arabi.

El ia es invitada par Xec Mohammed bin Zayed al-Nahyan, la prinse erital de Abu Dhabi, a partisipa en un confere intercredal. Sua visita va inclui ance un misa a martedi, sur cual on espeta ce lo va atrae 120 mil persones.

Oservores va regarda atendente la visita per cualce referes a la gera en Iaman. La pape ia condena ia gera, en cual la AAU es envolveda como parte de un alia gidada par Arabia Saudi.

En la anio pasada, Pape Fransisco ia apela a la comunia internasional “per evita un mali de la situa ja sufrosa” en Iaman. La AAU es ance la pais de cuasi milion catolicas, de ci la plu veni de la Pilipinas o Barat.

En un mesaje video a jovedi, la Pape ia descrive la AAU como “un pais cual atenta es un model de coesiste, de fratia umana, e un asembleria entre sivilias e cultures diversa”.

En Abu Dhabi, la Pape va encontra ance Xec Ahmed al-Tayeb, la imam grande de la mascita Al-Azhar en Qahira, cual es la seja erudita la plu alta per muslimes suni.

La Vatican espera ce la visita par la Pape va laxi cisa la restrinjes contra la construi de eglesas en la rejion, spesial en Arabia Saudi, pais visina, do locas de prea nonmuslim es proibida.

2019-02-02

La re pasada de Beljia refusa un proba de ADN

Albert 2, re pasada de Beljia, ia refusa fa un proba de ADN en un caso cual intende demostra ce el ia jenita un enfante estrasposal en la desenio de 1960.

Un corte en Bruxelles ia comanda la monarca pasada, ci ave 84 anios, a furni un sample de saliva ante la fini de tre menses – o risca ce on judi ce el es la padre de Delphine Boël, de 50 anios.

Albert nega la alega de padria e reseta conselas legal sur la posiblia de apela. La avocatos de Boël ia bonveni la solisita de ADN.

La monarca pasada ia anunsia sua resinia en 2013, con refere a sua mal sania. El ia renunsia formal a 21 julio, la dia nasional de Beljia.

On ia inaugura el como la re ses de la beljeses a 9 agosto 1993, pos la mori de sua frate, Re Baudouin, a 62 anios.

La madre de Delphine Boël, Baronesa Sybille de Selys Longchamps, dise ce el ia fa un relata de ama con la re tra du desenios. Alegas ia emerji, a plu ca un desenio ante aora, ce el es la padre, causante un scandal real.

Alga jornalistes divina ce cisa esta ia influe sua deside de renunsia la trono.

Beljia ave un monarcia constitual, en cual la re fa un rol xef ritual. Ma un de la taxes cual la monarca ave es la resolve atentada de crises constitual.

2019-02-01

Japan investiga un subasta parente de uranio

En Japan, la polisia investiga como un subasta enlinia ia pote presenta un sustantia sur cual on crede ce lo es uranio. La vendor e alga ofrores es interogada.

Pacida en un tubo de vitro, la produida ia es ofreda como “Uranio 99,9%” en un subasta de Yahoo. Un esamina prima de la polvo ia sujesta ce lo es radioativa.

La subasta ia atrae la atende de la autoria de regula nucleal de la pais en 2017. La departe ia judi ce la materia es probable uranio povrida e polvo de uranio. La vendor dise ce el ia compra la sustantia de un loca de rede estra Japan.

La departe ia contata Yahoo sur la vende surprendente, la subasta ia es parada, e la caso ia es enviada a la polisia.

On no ia confirma esce la materia es vera uranio, e si tal, esce lo es ricida. Uranio ricida es un composante esensal per la jenera de potia nucleal e per armas nucleal.

La vende de tal materias es proibida en Japan e pote es recompensada par un anio en prison.