2018-05-31

La batalia de Telegram

Apple e Rusia fronti lunlotra en relata con la boteca de ap de la compania. La organiza regulante de telecomunica rusce ia demanda ce Apple sutrae Telegram, un ap popular de mesajes, de la varia rusce de sua boteca.

An pos atentas par autoriosas rusce de bloci la ap pos la media de april, lo resta multe usada. La regulor Roskomnadzor ia permete un mense per un responde par Apple; lo es nonclar cual cosa va aveni si lo iniora la solisita.

En la pasada, Apple ia obedi solisitas xines e ia sutrae servis de VPN (rede privata virtual) de sua boteca.

Telegram ia es developada en Rusia e es un de la servis de mesaje la plu popular de mundo. Lo es disponable per tabletines, computadores e telefonetas, e furni la capasia de sifri comunicas tal ce sola la envior e resetor pote vide los. Mesajes resta privata de otra rolores, como la governa rusce.

La compania Telegram ia parti de Rusia par causa de la regulas de interede en acel pais, e ave aora sua base en Dubai.

En april, miles de persones ia asembla en Moscva per protestas contra la proibi de la ap, e Pavel Durov, fundor de Telegram, ci ia nase en San Petersburg, ia envia un tuita per grasia la protestores.

En la demandas frecuente de sua pajeria, Telegram dise ce "Apple bloci ja Telegram de refresci sua ap iOS de la media de april, global. Lo es posible ce, como resulta, la ap no conforma a GDPR. En la boteca Google Play de Android, en compara, la ap ia es la plu resente refrescida a 26 maio, la dia pos la data de reali de GDPR."

Apple ia refusa comenta.

2018-05-30

No usa un volcan per tosta cremas de zucar

La Jeometre Jeolojial de la SUA ia responde a un demanda en rede sosial sur esce lo ta es sin peril si on ta tosta cremas de zucar supra un ximine volcanal. Los ia dise ce no.

Kilauea en la stato Hawaii es un de la volcanes la plu ativa de mundo, e lo es multe ativa en semanas pasada. Sua rios de lava roja calda ia destrui desuples de casas sur la Isola Grande de Hawaii, e 2000 persones ia es comandada a abandona sua imobilas.

Jay Furr de Vermont ia demanda a la departe de la governa esce on ta pote secur rosta cremas de zucar supra ximines de volcan si on ta usa un basto longa.

La conta "Volcanes" de la Jeometre Jeolojial posta novas ofisial e informas sur volcanes en la SUA. Lo ia responde a la demanda, disente ce un tal esperimenta ta produi un mal sabor e "un reata vera spetaculin". Los ia clari ce lo ta es perilosa e ia consela ce on no atenta lo.

En la semana pasada, persones en Hawaii is es avertida sur la fumas nosiva emeteda cuando roca fondeda flue a en la mar.

Kilauea es estrema ativa e sua eruta presente ia comensa a 35 anios ante aora. Par causa de un aumenta de sua ativia en semanas resente, lo ia eruta an en la jardines de casas.

On ia reporta sola un feri grave, cuando un om sentante sur sua balcon ia es colpada par roca fondeda ejetada.

2018-05-29

Osteraic va redui paias a migrores

En Osteraic, la governa aliada ia revela sua intende de redui paias aidante a migrores, incluinte refujadas, per impedi arivas nova.

La paia xef va es limitada a 563 euros per mense, altinte asta 863 – la cuantia resetada par osteraiceses – si on susede un esamina de capasia de lingua deutx. Migrores va es ance proibida de reclama tal paias per sinco anios.

Sebastian Kurz, la canselor conservaliste en governa con destristes estrema, ia promete un politica sever sur migras. El ia campania en la eleje parlamental en la anio pasada con prometes de limita paias a refujadas e de clui vias de migra a Europa.

La anunsia ier pone Osteraic en desacorda con la resta de la Uni European, car regulas UE sur libria de institui esije ce la sitadanes de tota statos-membros es egal tratada.

La governa aliada entre la Partito de Popla (conservaliste) e la Partito de Libria (estrema destriste) ia es aprobada en desembre pos cuando elejes a 15 otobre no ia produi un resulta concluinte.

La campanias de la partitos ia es dominada par la crise de migra en Europa, un tema sur cual la Partito de Libria campania longa, oposada a migra.

En 2015, a la culmina de la crise de migra, plu ca 90 mil persones ia solisita la refuja en Osteraic. La cuantia ia es plu ca 1% de la popla de la pais. Inisial, on ia bonveni la refujadas, ma la umor en la pais ia cambia a pos.

2018-05-28

Un vota de fida pos un compra de casa

En Espania, la xef de la partito sinistriste Podemos ("Nos Pote") e sua acompanior ia survive un vota de fida provocada par sua deside de compra un casa lusosa.

On ia acusa Pablo Iglesias e Irene Montero, la portavose de la partito, de spende 600 mil euros per un casa con pisina e abiteria per visitores. En la pasada, Iglesias ia critica politicistes ci abita en casas grande.

La duple ia reseta 68,4% de cuasi 190 mil votas fada. Los ia anunsia la vota enlinia en la plu temprana de esta mense, pos un furia publica sur sua deside de compra la casa en la anteurbe de Madrid. Alga membros ia dise ce esta sumina la credablia de la partito entre persones comun.

On ia demanda a votores: "Esce tu opina ce Pablo Iglesias e Irene Montero debe continua como xef e portavose de la partito?"

Iglesias e Monero, ci espeta pari jemelos, ia defende la compra, disente ce la casa es per sua propre usa e no es un investi divinante.

Podemos ia es formida en janero 2014 par Iglesias e un grupo de enseniores sinistriste de universia. La partito ia crese de un promove cual ia protesta medias sever de economia, recomendante cambias radisal entre nonemplea altinte e reduis de servis publica.

Iglesias ia descrive la susede de la partito como la nase de "un Espania nova" e la mori de desenios de politica de du partitos. En pasada, el ia foca atende a lo ce el abita modesta en Vallecas, un visineria de clase laborante en Madrid, e ce el compra sua vestes en supramercatos.

2018-05-27

On vende vino vera vea e recolie recordo

Un botela de vino orijinante en 1774 ia es subastada en Frans este per la cuantia recordo de 103 700 euros.

La botela de "vino jala" veni de la rejion Jura Este, e ia es preparada con uvas recolieda en la rena de Re Louis 16.

A la mesma subasta, un otra botela de la mesma anio ia ateni 76 250 euros, e un plu ia es vendeda per €73 200. La tre botelas de 87 sentilitres ia es preparada par la vinor Anatoile Vercel. Los ia es poseseda par sua desendentes en Arbois, la cor vinal de la rejion Jura, e on crede ce los es entre la vinos esistente la plu vea de mundo.

La comprores ia es canadianes e un person ci en la pasada ia compra vino per americanes con lias a Frans.

Brigitte Fenaux, subastor de la compania Jura Enchères, ia comenta: "Me no ia crede ce on va vende esta botelas per tan multe. La recordo presedente, creada en 2011, ia es 57 mil euros. On ia ave vinores en la sala ci ia aplaudi, ci ia es felis – lo ia es emosiante."

En 1994, un comite de 24 espertas de vino ia proba la vino e ia premia lo con 9,4 puntos de 10.

2018-05-26

Un siclon sever en Uman

Siclon Mekunu ia bate la sude de Uman con ventas e pluve forte, matante un xica de 12 anios e lasante tre otra persones ferida. La xica ia es puxada contra un mur par la venta.

La televisa nasional ia mostra areas grande de inonda en la provinses Dhofar e al-Wusta, con multe veculos sumerjida.

La siclon ia deveni plu intensa ier, ma es aora reduida: ofisiores dise ce lo perde plu fortia asta deveni mera un tempesta tropical.

Mekunu ia ariva a tera a ueste de Salalah, la site du de Uman, a un dia pos colpa Socotra, un isola iamani, do on reporta ce sete persones ia es matada, cisa plu.

Miles de abitores de partes costal de Dhofar e al-Wusta ia es moveda a refujerias cuando ventas de 170 cilometres per ora e pluves deluvial ia bate la rejion. Sirca 10 mil persones ia es evacuada de scolas e construidas governal, xef en Salalah.

Meteorolojistes ia averti sur deluvias subita, previdente ce Salalah pote esperia a la min 20 sentimetres de pluve – la duple de la cuantia promedia per un anio intera. On ia recomenda ce persones resta en casa, e la airaporto de Salalah es cluida asta medianote a fini de oji.

La governa de Iaman ia declara la isola Socotra como un zona de desastre. La ministro de pexerias ia dise ce on ia reprende la corpos de sinco iamanis e du baratis, ma des-du baratis manca ancora.

Soldatos saudi ia es enviada a Socotra en la mense pasada. Un alia gidada par Arabia Saudi suporta la governa de Iaman en la gera interna de tre anios en acel pais.

2018-05-25

Trump cansela sua confere con Corea Norde

Corea Norde ia dise ce lo vole ancora discute "a cualce tempo en cualce forma", pos cuando Donald Trump, presidente de la SUA, ia cansela subita sua consenta con Kim Jong-un.

Kim Kye-gwan, visministro de esternas, ia descrive la deside par Trump como "estrema regretable". Trump ia culpa la "enemia franca" de Corea Norde per la cansela.

La confere ia ta es la aveni prima de un encontra entre un presidente corente de la SUA e un gidor de Corea Norde.

Detalias de la consenta, ajendida per Singapor a 12 junio, ia es nonclar. Ma discutes ia ta foca a modos de desnucleali la penisola corean e de redui tensa.

A mera oras ante la anunsia par Trump, Corea Norde ia dise ce lo ia reali sua promete de desasembla tuneles a sua sola proberia nucleal.

Trump ia fa sua anunsia en forma de un letera personal adirijeda a Kim.

Plu tarda, un portavose ia furni plu detalias, disente ce Corea Norde ia mostra "un manca profonda de sinseria". El ia informa reportores ce un serie de "prometes rompeda" ia veni de Pyongyang, incluinte cuando la Casa Blanca ia envia un ofisior a Singapor per fa discutes inisial con diplomatas de Corea Norde, ma la diplomatas no ia apare.

La ofisior ia afirma ce Trump "ia dita cada parola" de sua letera a Kim Jong-un.

2018-05-24

Un supraconta par la FBI de telefonetas securida

En la Statos Unida de America, la FBI ia confesa ce lo ia supraestima la cuantia de telefonetas saisida cual sua tecnicistes no pote asede. En sua investigas de crimin, lo ia saisi entre 1000 e 2000 telefonetas cual resta securida, e no la 7800 cual lo ia anunsia a ante.

Lo ia culpa un defeto de computador per sua conta de alga aparatos a plu ca un ves.

En la pasada, la ajenteria ia cexa ce medias de securia de Apple e otra fabricores impedi sua capasia de investiga.

La caso la plu conoseda veni de febrero 2016, cuando la FBI ia vole asede la iPhone de un de la du fusilores ci ia ataca un sentro comunial en la site San Bernardino en California.

Apple ia es presada par la FBI afin iPhones securida ta deveni asedable par ajenterias anticriminal per preveni ce los deveni "oscur". "Oscuria" refere a un situa en cual un ajenteria teni un aparato ma no pote asede atestas en lo, an si lo es legal permeteda a fa esta.

La caso ia es abandonada cuando la FBI ia reseta la codigo de clave de un fonte nonidentifiada.

An con la embarasa posible, on previde ce la FBI no va sesa presa companias tecnolojial a fa ce sua programes deveni plu asedable. En un declara, lo ia dise: "La FBI va continua xasa un solve cual serti ce enforsores de lege pote asede atestas de ativia criminal con autoria legal conveninte."

2018-05-23

Jenitores litiga sua fio ci refusa parti de casa

En la SUA, la jenitores de un om de 30 anios ia adota un modo estrema de obliga sua fio a move a via: los litiga el.

Documentos de corte indica ce Michael Rotondo no paia un custa de lua, no aida con taxes de casa, e ia iniora ofres de mone par sua jenitores.

An pos presenta sinco leteras de descasi, Christina e Mark Rotondo dise ce sua fio refusa parti de la casa. Michael dise ce, legal, on no ia dona a el sufisinte temprana la avisa de descasi.

La jenitores ia rejistra sua caso con la Corte Suprema de la Contia Onondaga, prosima a Syracuse, New York, a 7 maio, pos menses de recomenda nonsusedosa a sua fio ce el parti.

"Nos ia deside ce tu debe parti direta de esta casa," la letera prima ia dise a 2 febrero. Cuando la fio ia iniora esta, sua madre e padre ia scrive un avisa formal de descasi, aidada par sua avocato, ci ia dise ce los ia conose no otra modo de descasi la om.

Un avisa de 13 febrero, suscriveda par Sra Rotondo, dise: "Par esta, tu es descasida. Un prosede de enforsa legal va es direta instituida si tu no parti ante 15 marto 2018."

La jenitores ia ofre $1100 a sua fio, con ance alga comentas sever sur sua condui. "Postos es disponable an per los con mal istoria de labora como tu. Trova un – tu debe labora!"

Ma a 30 marto, lo ia deveni clar ce sua fio ancora no intende parti. En april, la Rotondos ia vade a sua corte de vila per descovre esce los pote descasi sua fio. Ma car el es un familian, los ia nesesa un judor de corte suprema per obliga ofisial sua parti.

La fio ia descrive la litiga como "venjante" e ia demanda ce la corte refusa la caso. La familia va vade a la Corte Suprema en la plu tarda de esta mense, a sola un pico de semanas ante la aniversario 31 de la nase de la fio.

2018-05-22

Un arcibispo culpable de asconde maltrata de enfantes

Un corte australian ia judi ce un arcibispo catolica es culpable de asconde la maltrata sesal de enfantes en la desenio de 1970.

Philip Wilson, arcibispo de Adelaide, deveni la catolica la plu major de mundo ci on ia acusa e condena per esta crimin.

On ia trova ce el ia asconde la maltrata de xicos de misa par un prete pedofilica en New South Wales. En sua litiga, el ia nega ce alga de la vitimes ia informa el sur la maltrata.

En un declara publicida par la Eglesa, Wilson ia dise ce el es "evidente deludeda" par la judi e va esplora sua posibles legal.

En la mense pasada, el ia dise a la corte ce el ia sabe no cosa sur la atas de prete James Fletcher, cual ia aveni cuando el ia es un prete aidante en Maitland, a 130 cilometres a norde de Sydney.

A pos, Fletcher ia es condenada sur nove acusas de maltrata sesal de enfantes en 2004. El ia mori en prison en 2006.

Un de sua vitimes, Peter Creigh, ci ia es un xico de misa, ia informa la corte ce el ia descrive la detalias de la maltrata a Wilson en 1976, a sinco anios pos cuando lo ia aveni.

La judor Robert Stone ia rejeta la reclama de Wilson ce el no recorda la conversa, e ia dise ce el crede ce Creigh es un atestor fidable. La prete ia sabe ce "lo cual el oia es un alega credable, e la acusada ia vole proteje la Eglesa e la reputa de lo," Stone ia dise.

Un plu vitim, nonomable, ia informa la corte ce el ia revela la maltrata en la confeseria cuando el ia ave 11 anios. El ia dise ce Wilson ia responde ce el menti, puninte el par comanda a resita la prea "Ave Maria" a des veses.

Pos la deside, survivores de la maltrata ia loda la judi en un sena emosiosa estra la corte. Creigh ia comenta: "Esperable la deside va desmarania la ipocritia, la engana, e la maltrata de potia e fida cual la Eglesa ia mostra."

La avocatos de Wilson ia atenta fa ce on refusa la caso a cuatro veses, pos la diagnose ce la prete de 67 anios ave la maladia de Alzheimer. El risca un prisoni de masima du anios. On va anunsia sua condena en junio.

2018-05-21

La bebe prima en 12 anios sur un isola

Un isola brasilera distante, do pari es proibida, selebra an tal la bebe prima cual ia nase ala en 12 anios.

La isola Fernando de Noronha es situada a 370 cilometres de la site Natal. Lo ave sirca 3000 abitores ma no ospital madral. On espeta ce madres espetante ta viaja a la tera xef.

Un fem ci no desira es nomida ia pari ier un xica sur la isola. El dise ce el no ia sabe an sua ensintia, e es aora "stonada". On crede ce el ave 22 anios.

La bebe, parida en la sala de banio de la fem, ia es prendeda a la ospital local. La autoriosas ia confirma la nase.

Per selebra, persones local aida aora la familia, e alga dona vestes per la xica.

Fernando de Noronha ave alga de la plaias la plu bon de mundo, e es famosa per sua conserveria de animales en la parce maral nasional de Brasil. On vide comun tortugas de mar, delfines e avias rara ala.

Par causa de la conserveria, la isola controla forte sua cuantia de popla.

2018-05-20

La sposi de la Duxe e Duxesa de Sussex

Ier, en la Rena Unida, Prinse Harry e Meghan Markle ia sposi en un rituo a la Castel de Windsor, a ueste de London. La duple ia intercambia prometes e anelos ante Rea Elizabeth 2 e 600 invitadas en la Eglesa de San Jorj. La duple es aora nomida la Duxe e Duxesa de Sussex.

Vestida en un roba par Clare Waight Keller, desinior brites, Markle ia pasea solitar longo la parte prima de la eglesa, ante cuando Prinse Charles, la padre de Harry, ia acompania el asta la altar.

Sra Markle ia es ance acompaniada par des damas e pajos, de ci tota ia es enfantes joven, incluinte Prinse George e Prinsesa Charlotte, la fies de William, frate de Harry.

El ia porta la coroneta de diamante de Rea Mary (sposa de Re George 5) de 1932, prestada a el par la rea presente. Sua roba blanca ia es desiniada per Givenchy, un compania franses de moda, e sua aspeta ia es completida par un velo longa de sinco metres e brodeda con flores de cada pais en la Comunia de Nasiones.

Persones famosa entre la invitadas ia inclui Oprah Winfrey, George e Amal Clooney, David e Victoria Beckham, e Elton John, ci ia canta a la reseta pos la rituo.

La Prinse de Cimri ia acompania Markle longo la eglesa car la sania de sua padre, Thomas, ia preveni esta de partisipa. El ia televide la rituo en California, en loca.

En sua prometes, Markle no ia dise ce el va "obedi" sua sposo, e la prinse ia rompe un tradision real par eleje porta un anelo de sposia. La sua es de platino tramada, e lo de sua sposa es de oro cimrica.

Bispo Michael Curry, presidente de la Eglesa Bispal de America, ia fa un parla animada e felisinte sur la potia de ama. Dama Jane Fellowes, sore de la madre mor de Harry, Prinsesa Diana de Cimri, ia leje de la Biblia, e Karen Gibson e la Coro Kingdom ia presenta la canta sol Stand By Me ("Resta con me").

Cuando la sposes nova ia es suscrivente la rejistra ofisial, un xeliste de 19 anios, Sheku Kanneh-Mason, ia presenta tre pesos par Gabriel Fauré, Franz Schubert e Maria Theresia von Paradis, acompaniada par un orcestra.

La coro ia presenta un varia joiosa de la canta This Little Light of Mine ("Esta lus peti de me") en cuando la Dux e Duxesa de Sussex ia sorti de la eglesa per viaja en caro tra la sentro de Windsor entre folas grande de bondesirores.

La vila ia ave ier plu ca 100 mil visitores, e 1200 persones – incluinte multe ci ia es reconoseda per sua labora carital – ia es bonvenida a en la ensirca de la Castel per la aveni.

A pos, la congrega en la eglesa ia vade a un come media ospitada par la rea, do la duxesa nova ia fa un parla, como ance sua sposo e padre par sposi. En la sera, la familia ia selebra plu privata con 200 amis prosima.

La custa de la sposi, aprosima un dui de milion paundes, ia es paiada par la familia real.

2018-05-19

Un jeto cade en Cuba

Plu ca sento persones ia mori pos la cade de un avion Boeing 737, prosima a la airoporto xef de Cuba en Havana. Esta es la desatre avional la plu mal de desenios en la pais.

On ia estrae tre femes vivente de la ruina, ma los es en un state estrema grave.

La avion, cual ia ave cuasi 40 anios, ia porta 104 pasajores e ses ecipores. Autoriosas cuban ia inisia un investiga, e on ia declara du dias de lamenta nasional.

La avion ia cade a 12:08 de ora local ier, no longa pos enaira de Havana en vola interna a Holguín en la este de la isola. Tota ses ecipores ia es mexican; la plu de la pasajores ia es cuban, con sinco stranjeres reportada entre los.

Lo es tro temprana per sabe la causa de la desastre, ma atestores sur la tera ia vide la jeto esplode en flamas ante cade sur un campo prosima a un bosce.

La avion ia es construida en 1979 e ia es susedosa esaminada en novembre de la anio pasada.

Longo rexercas en la industria, 2017 ia es la plu secur en la istoria intera de volas comersial, con zero cades de jetos de pasajor. Ma en esta febrero, un avion ia cade prosima a Moscva, matante 71 persones; en marto, un cade ia aveni en Catmandu, matante 51; e en april, un avion militar ia cade en Jazair, causante la moris de plu ca 250 persones.

En 1989, un jeto soviet ia cade prosima a Havana, matante 126 persones en la avion e 24 otras sur la tera.

2018-05-18

Polsca aborta grupos rusce de gera ibride

Polsca ia aresta un fem rusce sur ci on suspeta ce el ia labora con aidores per provoca tensa con Ucraina.

La ABW, la ajenteria de securia interna polsce, ia dise ce "Yekaterina C" va es pronto escluida. Cuatro otra persones es aora proibida de entra a Polsca.

Un portavose per la ABW ia dise ce la ajenteria ia "neutri" du "redes rusce de gera ibride" cual ia ataca Polsca. La terma "gera ibride" inclui la sperde de novas falsa per cambia disposas publica.

Polsca es ja vijilosa contra atentas par la Cremlin de influe opinas polsce pos cuando Rusia ia propri la rejion Crim de Ucraina en marto 2014.

Polsca, un membro de la Uni European e OTAN, es un de la oposores la plu forte de la politica stranjer rusce, e spesial de la interveni militar par Rusia en Ucraina. Ma manxas resta ance pos un enemia istorial entre Polsca e Ucraina de la periodo soviet e la Gera Mundal Du.

La portavose ia dise ce sua ajenteria es informada ce Rusia "no mera inspira sitadanes polsce a fa atas spesifada contra Polsca e favorente Rusia, ma ance finansia sua ativia".

El no ia furni detalias sur la ativia de la redes alegada, ma ia comenta ce los es engranada a "nuri odia polsce-ucrainsce en la sfera sosial e political e a sumina la interprete de la istoria polsce, sustituinte un nara rusce per lo".

Governas ueste acusa Rusia de sperde novas falsa sur la gera ucrainsce e otra temas delicata, per debili la suporta publica per politicas de OTAN e la UE.

2018-05-17

La Pape consela sobria de monces en redes sosial

La Pape ia dona instruis conselante ce monces fema debe usa apes de redes sosial "con sobria e cautia".

La documento, titulida Cor orans ("Cor preante"), clari regulas sur la vive moncal cual ia apare en 2016. Lo esplica ce sua conselas es intendeda per proteje silentia e recorda. La testo refere a "comunicas sosial" en loca de nomi apes, ma la jornal catolica La Tableta ia indica ce esta refere a Facebook e Twitter entre otra servis.

En la documento, on dise ce on debe aplica cautia a "la cuantia de la informa e la tipo de comunica", en ajunta a la contenida vera de la mesaje.

Un ordina de monces fema en Espania norde ia usa redes sosial en la mense pasada per comenta sur un caso controversa en Pamplona, en cual un grupo de omes acusada de viole coletiva ia reseta condenas cual multe ia regarda como tro pardonosa.

En sua paje de Facebook, la Monces Carmelal de Hondarribia ia defende la vitim par refere a sua propre eleje de vive en un monceria, sin alcol e sin sosiali de sera: "Car lo es un deside libre, nos va defende con tota medias disponable a nos (e esta es un) la direto de tota femes de fa libre la oposada sin ce on judi, viole, menasa o vergonia los per lo."

On no crede ce la consela nova de la Pape resulta de acel caso. Plu, esta no es la ves prima cuando la Eglesa Catolica ia furni conselas a monces fema sur la usa de redes sosial.

La constitui orijinal sur la vive fema moncal, Sponsa Christi ("Sposa de Cristo"), ia es publicida en 1950 par Pape Pio 12, ma Pape Fransisco ia estende lo en 2016 per averti contra la "influe desidente" de la cultur dijital a la sosia. El ia recomenda ce monces no permete ce comunicas dijital "deveni veses per perde tempo".

La Vatican mesma es un tuitor major. Lo ia envia cuasi 15 mil mesajes par sua conta de novas, e plu ca 1500 par la paje engles ofisial de la Pape. Lo opera ance contas de Facebook, Google+, Instagram e YouTube.

2018-05-16

Corea Norde menasa cansela sua consenta con Trump

Corea Norde ia dise ce lo va cisa retira se de un confere con Donald Trump, presidente de la SUA, si la SUA insiste ce lo abandona sua armas nucleal.

On ia espeta ce la consenta entre Trump e Kim Jong-un va aveni a 12 junio. Ma en un declara coler, la visministro txoson de esternas ia acusa la SUA de parla fretosa e de ave intendes malvolente. Kim Kye-gwan acusa direta John Bolton, la conselor SUA de securia nasional, disente: "Nos no asconde nosa senti de repulsa par el."

La acorda monumental per un encontra entre Kim e Trump ia reali cuando Corea Norde ia dise ce lo intende desnucleali la penisola corean. La implicas esata de esta resta nonclar, ma la pais ia invita jornalistes stranjer a oserva la desasembla de sua proberia nucleal xef en la parte du de esta mense.

La anunsia par Kim, nasional difusada, dise ce si la SUA "trapi nos e esije uniladal ce nos abandona armas nucleal, nos va es no plu interesada par discutes" e "va debe reconsidera" sua partisipa en la consenta a 12 junio.

El ia dise ce Corea Norde ave "esperas alta" ma ce lo es "multe nonfortunosa ce la SUA provoca nos ante la confere par sputa dises asurda".

On sabe ce Kim Kye-gwan es forte respetada entre la gidores de Corea Norde. El ia partisipa en negosias presedente con la SUA. Lo es multe nonprobable ce sua comentas no ia es personal aprobada par Kim Jong-un.

Bolton, political conservaliste, es un defendor dedicada de la potia de la SUA e de usa lo a stranjer. En la pasada, el ia dise ce un ataca preveninte contra Corea Norde ta es "perfeta legal". En intervisas en la fini de semana, el ia comenta ce Corea Norde pote segue la model libi de desnucleali: Libia ia abandona sua armas ante prende aida economial.

A oras ante la anunsia, en un indica de problemes cresente, Corea Norde ia retira se ance de un consenta ajendida per ier con Corea Sude. Acel ia es un reata a la comensa de eserses militar juntada par la SUA e Corea Sude. Corea Norde ia dise ce lo va permete la eserses, ma plu tarda lo ia descrive los como "un disturba militar provocante" cual sumina sua atentas diplomata.

2018-05-15

Bisicles nondocida inonda la mundo

La nederlandeses ia populari la idea de bisicli en sites, ma par un modo nova tecnolojial de lua veculos, on espera revolui la usa de bisicles en sites tra la mundo.

La inova xef es la lua de bisicles nondocida. On trova e libri los par un pico de tapes a un telefoneta, e pos lua los per un ora, un dia, un semana, etc, on reclavi los e lasa los a cualce loca do sua viaja fini, e no en un doca definida.

Tal veculos composa aora la majoria de la 18 milion bisicles de autoservi publica en la mundo, en 1608 sites. La cuantia ia grandi ja de sola du milion a la fini de 2016.

La plu de la crese ia aveni en Xina, do du companias nova, rica con finansia de jigantes comersial competente, batalia per domina la stradas. Como resulta, 1,5 milion bisicles ia inonda la stradas de sola Shanghai.

Ma la combate mercatal ia lasa ance montones de bisicles dejetada en la campos ensircante. En setembre, la sites la plu grande de Xina ia proibi companias de introdui plu bisicles a la vias, e la montones ia comensa aora desapare.

Estra la oportunia de pote lasa un sicle en cualce loca, scemas de bisicles nondocida es multe plu barata per opera ca la sistemes vea, car on no nesesa instala e manteni un doca.

Par move la tecnolojia de clavi e paia de la doca a la bisicle, operores pote ajunta sicles en modo vera rapida. Sensadores de jeolocali aida siclistes a trova bisicles par un ap de telefoneta, e on fa la lua e desclavi par scane un codigo QR o par usa identifiadores radiofrecuential.

La tecnolojia es enerjida par un pila cual deveni cargada par un dinamo tra cuando la sicliste pedali.

La susede de la bisicles en Xina ia atrae investores: la capital riscosa cual on investi a companias de bisicles nondocida tra la mundo ia alti de $290 milion en 2016 asta $2,6 mil milion en 2017.

Siclistes no lasa sempre la bisicles en locas ideal per otra usores, donce la operores de la scemas debe redistibui los a veses. En Oslo, un compania usa computadores per descovre la modo la plu nonperosa de distribui la sicles, atentante masimi la cuantia de viajas par cada veculo ante cuando on nesesa reloca lo.

2018-05-14

Marvel ave supraeroes xines a la ves prima

La supraeroes prima xines ia entra ofisial a la universo de Marvel Comics.

Aero e Lin Lie es sola du de un grupo de carateres xines ci debua en novelas grafica en esta semana. Cocreada par Marvel e NetEase, un plataforma enlinia major en Xina, los es un atenta par Marvel de atrae plu fanes en la mercato profitosa xines.

Lin Lie es la carater xef en un de la publicidas nova, de cual on pote tradui sua titulo como "Gerores de tre monarcas". La nara foca a esta xico de des-oto anios ci prende un spada antica per batalia contra Chiyou – un vil reincarneda ci vole destrui umanas.

La novela du, traduable como "Siclon", presenta Aero, ance conoseda como Lei Ling, un fem ci labora como arcitetor ma es capas de controla corentes de aira. En la notes, el usa sua suprapotia per salva sua site de viles diversa.

On ancora no ia fa un confirma ofisial, ma en la numero prima de "Gerores de tre monarcas", un imaje de la masca de Iron Man es vidable en la sala de Lin Lie.

En la anio pasada, Marvel Comics ia anunsia ce lo va labora con NetEase – un de la companias la plu grande de juas video e tecnolojia en Xina – per crea sua supraeroes xines prima. Alora, la editor xef de Marvel ia dise ce la supraeroes nova va es "forte fundida sur cultur e mitolojia xines, ma locada en la mundo moderna".

Artistes e scrivores de Xina ia es multe envolveda en la crea.

Economial, la colabora es nonsurprendente, car Marvel ave un cuantia grande de fanes en Xina. En Weibo, la rede sosial la plu grande de Xina, la paje de Marvel ave plu ca 3,5 milion suportores.

"Gerores de tre monarcas" es ja lejeda a plu ca du milion veses pos sua publici, e "Siclon" a pico su 750 mil.

Un comentor en NetEase ia dise: "Final, nos ave supraeroes xines. Nos ia ariva." Un otra ia ajunta: "Cisa a alga dia, los va pote combate a lado de la Venjores."

2018-05-13

Un atacor coteli pasores en Paris

Un ataca matante de cotel ia aveni en la sentro de Paris a la sera de ier. La suspetada ia nase en 1997 en la republica rusce Txetxnia.

La atacor ia mata un om de 29 anios e ia feri cuatro otras en la distrito de la Plaza de l'Opera ante cuando la polisia ia mata el par fusil. La organiza Daex ia dise a pos ce un de sua "soldatos" ia fa la ataca. On interoga la jenitores de la suspetada.

Emmanuel Macron, la presidente de Frans, ia tuita: "Frans ia paia denova con sangue, ma no va sede par un diton a la enemis de libria." La maior de Paris, Anne Hidalgo, ia tuita: "A esta sera, nosa site ia es contusada."

La atacor ia comensa coteli pasores a sirca 21:00 de ora local. Atestores descrive el como un om joven con capeles brun e un barba, portante un pantalon negra de sporte. El ia atenta entra a alga bares e restorantes ma ia es forsada a via par persones a la interna.

Polisiores ia ariva pos sinco minutos. Prima, los ia atenta para la atacor par pistol eletrical, ma ultima los ia mata el, ante nove minutos pos la comensa de la ataca. Du de la persones ferida es en state grave, ma sua vives no es menasada.

La unia antiteroriste de la departe litigal franses ia inisia un investiga.

Frans ia es ja vijilosa pos un serie de atacas. Plu ca 230 persones ia es matada par djihadistes inspirada par Daex en la tre anios pasada. La violentia la plu matante ia aveni a 13 novembre 2015, cuando fusilores e bombas umana ia ataca locas publica diversa en Paris a cuasi la mesma momento, e ia mata 130 persones.

Pos gania la eleje de la anio pasada, Macron ia promete ce la combate de terorisme islamiste va es sua conserna xef de politica esterna. El ia dise ce la vinse de Daex en Irac e Suria debe acompania medias antiteroriste en Africa.

2018-05-12

Un cabana motorida atenta la recordo de rapidia

Sur un plaia en Cimri a esta fini de semana, on va atenta crea recordos mundal nova de rapidia – usante un cabana multe aumentada e un motosicle.

La veculo prima va atenta rompe sua propre recordo – 129 km/h – per la cabana la plu rapida viajante. E sur sua motosicle supracargada, Zef Eisenberg va atenta crea un recordo nova de rapidia sur arena.

Kevin Nicks, proprior de la cabana, ci ave 53 anios e labora como jardinor, ia dise ce lo es la sola cabana motorida en la mundo cual es legal usable sur vias publica. El ia spende miles de paundes en crea sua cabana movente, cual conteni aora un motor de 400 cavalos frenal, plu potiosa ca multe autos de sporte.

El ia ave prima la idea de crea un cabana sur rotas en 2015 cuando sua Volkswagen Passat vea ia reposa rompeda ante sua casa. Alora el ia pensa: "Ta ce nos vide esce me pote fa pico diferente."

La padre ia spende inisial £5000 e des-du menses en aumenta sua cabana, cual el mesma ia construi, per pote prende sua fia a scola e visita la botecas. A pos, el ia demanda a se sur la rapidia masima. En concursos el ia susede rompe la recordo Guinness. Ma la cabana ia desintegra, nesesante reparas major.

Aora, pos du anios e 30 000 cilometres de viaja, Nicks ia usa plu £8000 per renovi la cabana con un motor RS4 de Audi, cual el ia ajusta multe. El ia comenta: "Me ia spende tota la inverno en boni lo e ajunta un motor e suspende nova. Lo inisia tan rapida. Ma nun sabe a cuanto rapidia lo va vade."

El va comensa sua atenta de recordo oji a Pendine, un plaia cual ia deveni asosiada con rapidia teral cuando Sir Malcolm Campbell ia rompe ala la recordo en la desenio de 1920. Ance sur la plaia on va trova multe supracaros, autos de tre rotas, e motosicles de potia alta, con sua gidores ci espera rompe recordos.

"Arenas Pendine es un corseria malfamosa difisil," Eisenberg ia dise. "Concursores ave no idea sur la natur de la surfas asta la esflue de la marea. Car Pendine es un loca ofisial de proba de artileria, on encontra comun armas nonesplodeda a lado de medusas jigante encaliada."

Eisenberg, ci veni de Gernsi, ia mori cuasi pos rompe la recordo teral per un turbosicle a 18 menses ante aora, cuando el ia colide a 370 km/h e ia es en ospital tra tre menses.

"Nun en istoria, con auto o motosicle, ia esede 200 milias per ora (322 km/h) sur la arena a Pendine," el ia ajunta. Lo es la calix santa de rapidia, do la corsores la plu rapida de mundo ia fa la atenta."

2018-05-11

Un canal xines es proibida de difusa Eurovision

La Uni European de Radio-Televisa (UER) ia proibi un de la canales tv la plu popular en Xina de difusa la concurso Eurovision de canta, car lo ia sensura elementos LGBT de la presenta.

Mango TV ia es criticada en redes sosial cuando lo ia pare ce lo ia nebli banderas con colores de arco de sielo e ia sensura tatuas en la semifinal prima a martedi. Lo ia deside ance no difusa la presentas de Er e Albania.

La UER ia dise ce la sensura no acorda con sua valuas de diversia. En un declara, lo ia afirma: "Lo es con regrete ce donce nos va fini direta nosa asosia con la difusor, e los no va es permeteda a difusa la semifinal du o la final grande."

Un conta, La Vose de Omosesalia, ia dise ce la deside par la difusor de elimina referes a omosesalia es "un retropaso major". Otra usores de Weibo ia recomenda ce on "boicota Mango TV", e un usor ia dise ce el "serta no va regarda Mango TV en la mense veninte".

La entrada eres, Ryan O'Shaughnessy, ia comenta ce el bonveni la deside par la UER: "De la comensa mesma, nos ia dise ce la ama es la ama – si lo es entre du xicos, du xicas, o un xico e un xica – donce me crede ce esta es un deside vera importante. On no ia reata pardonosa, e me crede ce lo es un move en la bon dirije, donce me es felis sur lo."

El va canta en la ronda final en Lisbon doman con un canta sur la fini de un relata. El ia es acompaniada par du dansores mas en la presenta cual Mango TV ia pare sensura.

Otra paises cual ia susede ateni la final inclui Australia, Danmarc e Magiar.

2018-05-10

Malaisa eleje un ministro xef la plu vea de mundo

Mahathir Mohamad va deveni la plu vea de la xefes elejeda en la mundo, pos un vinse surprendente en Malaisia. El ave 92 anios. La ministro xef pasada ia pausa sua jubila, ia junta se a la partito oposante, e ia batalia contra Najib Razak, orijinal sua disiplo, ma aora atacada par alegas de froda.

La vinse monumental de Mahathir despone la alia Barisan Nasional (BN), cual ia rena sempre pos la autonomi de la pais en 1957. Sua suportores joiosa ia pleni la stradas cuando la vinse ia deveni clar.

Najib ia dise ce el va "aseta la deside de la popla", ma un move fasil de potia no es serta pos un cambia political tan grande. No partito en la alia ia gania un majoria, donce la deside resta tecnical con la re de Malaisia.

En la oras temprana de esta matina, Mahathir ia esplica ce sua alia no desira venja ma va "restora la rena de lege". El ia anunsia ance – aclamada par suportores – un festa de du dias, ajuntante: "Ma la vinsores no va reposa."

La resultas ofisial ia mostra ce la partito oposante, Pakatan Harapan o la Alia de Espera, ia gania 113 de la 222 sejas, incluinte alga cual ia es sempre ocupada par la governa en la pasada. Barisan Nasional ia gania 79 sejas. La custa altinte de vive e alegas durante de froda ia convinse multe votores, tirante los a via de Najib e sua alia de fortia pasada.

Mahathir ia es la ministro xef, gidante la alia BN, tra 22 anios, de 1981 asta sua resinia en 2003. Su sua governa, Malaisia ia deveni un de la "tigres asian" – la paises de cual sua economias ia crese rapida en la desenio de 1990.

Ma el ia es un figur autoritar ci ia usa leges controversa de securia per prisoni sua oposores. La plu malfamosa, sua ministro visxef, Anwar Ibrahim, ia es desempleada e acusada de froda e sodomia – e, plu tarda, prisonida par la acusa du – cuando el ia recomenda reformis economial e political.

Mahathir ia es ance un conselor a Najib, ci ia deveni la ministro xef en 2008. Ma Najib es xasada par alegas de froda. On ia acusa el de poxi $700 milion de un reserva nasional de investi cual el ia institui. Najib ia nega forte tota la alegas, e autoriosas malaisian ia remete el, ma alga otra paises investiga ancora la reserva. On ia acusa Najib ance de sofoca investigas malaisian par despone ofisiores major de sua postos.

En 2016, acel alegas ia gida a la traversa surprendente de Mahathir de Barisan Nasional a Pakatan Harapan, descrivente se como "embarasada" de asosia "con un partito cual on regarda como suportante froda". A pos, en esta janero, el ia anunsia ce el aspira denova la posto xef.

Ma an pos sua vinse presente, sua periodo de ofisia es nonclar. Ante la vinse, el ia intende governa per du anios ante resenia. El ia promete ce el va organiza un pardona per Anwar, abrinte la via per la reeleje de esta, ci ta deveni ultima la ministro xef.

On ia ave alegas ante la eleje ce la vota no va es justa. La governa ia aseta resente un lege cual ia cambia la distritos elejal, provocante acusas ce lo ia malmanipula los per serti ce los es plenida par muslimes melaiu, ci es tradisional suportores de Barisan Nasional.

Resente, on ia introdui ance un lege controversa sur novas falsa, sur cual oposores dise ce la autoriosas ta pote usa lo per mudi disentis. Mahathir mesma es investigada su acel lege pos alega ce on ia sabota sua avion.

E en la dias ante la vota, un grupo campaniante per reformis ia acusa la Comite de Eleje sur multe "crimines elejal", incluinte cualias nonlegal en la prosede de vota postal e un fali de sutrae persones mor de la lista de votores. La governa ia insiste ce la eleje va es libre e justa, e Najib ia dise ce la Comite de Eleje ata "per la benefica de cadun".

2018-05-09

La virus ebola reapare en DR Congo

On ia declara un eruta de la virus ebola en la norde-ueste de la Republica Democrata de Congo, con du casos confirmada e 17 moris.

La aveni en la vila Bikoro segue a plu ca un anio pos la mata par la maladia de cuatro persones en la pais. E en 2014, la virus ia mata plu ca 11 mil persones en Gine, Siera Leon e Liberia.

La anunsia ia es fada pos cuando resultas de laboreria ia confirma du casos de ebola en un sample de sinco pasientes suspetada.

Un portavose per la Organiza Mundal de Sania ia dise: "Nosa conserna xef es vade a Bikoro per labora a lado de la governa. Laboras con asosiores e respondes temprana e coordinada va es esensal per conteni esta maladia matante."

La organiza ia relasa $1 milion de un reserva de crise e ia envia plu ca 50 espertas per labora con ofisiores en la pais.

Esta es la ves nove de un eruta rejistrada de ebola en la Republica Democrata de Congo. On ia fa ala la descovre prima de la virus en 1976 (cuando la pais ia es conoseda como Zair) – la virus prende sua nom de la rio Ebola.

On crede ce la virus es sperdeda tra distantia longa par ciroteros de fruta, e es comun transmeteda a umanas tra carne contaminada de animales xasada.

2018-05-08

Un volcan destrui casas hawaian

La eruta de la volcan Kilauea en Hawaii ia destrui 35 construidas, xef casas, e menasa sentos de plu.

On ia evacua cuasi 2000 persones asta aora. Alga abitores ia es permeteda a visita sua casas per salva animales, ma ofisiores ia dise ce resta no es secur.

Fesures e bocas nova ia abri en la rejion Leilani Estates, do lava ia es lansada en la aira a asta 70 metres de altia.

La isola ia es colpada par un trematera de potia 6,9 a venerdi. Kilauea es un de la volcanes la plu ativa de mundo e es ja en eruta constante tra 35 anios.

On ia recolie plu ca $35 mil per un ensenior de scola prima ci ia perde tota en la flue de lava. Un fesur ia abri direta su sua casa de nove anios.

La ensenior, Amber Makuakane, ia responde: "Franca me no sabe como me debe comensa o cual me debe dise, otra ca… MAHALO! MAHALO MAHALO!", usante un parola hawaian cual sinifia "grasias".

2018-05-07

La tomba de Tutancamon ave no cambra secreta

Ofisiores en Misre ia fini sua xerca per un cambra secreta en la tomba de Tutancamon, concluinte ce lo no esiste. Presedente, los ia es cuasi serta ce un plu sala es ascondeda pos la mur de la tomba famosa de la re-xico ci ia vive a 3000 anios ante aora.

Un teoria ia sujesta ce la sala es cisa la tomba de Rea Nefertiti, sur ci alga pensa ce el ia es la madre de Tuntancamon. Ma rexercas nova ia trova simple ce la cambra no esiste.

La xerca per la loca ascondeda ia comensa cuando Nicholas Reeves, un arceolojiste engles, ia esamina scanes detaliosa de la tomba xef, e ia descovre lo cual ia pare como trasas apena persepable de portes su la jeso. En sua esajo "La entera de Nefertiti", el ia razona ce la tomba relativa peti ia es orijinal desiniada per la rea, e ce lo es posible ce sua restas reposa en un tomba plu profonda.

On ia trova nunca la restas de Nefertiti, ma on ia fa multe divinas. Par causa de un sculta de el, con 3000 anios ma perfeta conservada, Nefertiti es probable la fem la plu reconosable de Egipte antica. On crede ance ce cisa el mesma ia rena Egipte entre la mori de sua sposo e la troni de Tutancamon.

Pos la publici dramosa par Reeves, un serie de scanes de radar ia pare suporta sua teoria tan multe ce autoriosas major en Misre ia declara ce los ave "un sertia de 90%" sur la esiste de un plu cambra. Un plu scane ia pare ance suporta la idea, cual ia ta es la descovre la plu importante en desenios per la studia de Egipte antica.

An tal, spesialistes italian de la Universia de Torino ia usa scanes nova de radar penetrante per ateni sua conclui, declarante ce los fida la resultas.

Dr Francesco Porcelli, xef de la rexercores, ia comenta: "Lo es cisa pico deludente ce no cosa esiste pos la mures de la tomba de Tutancamon – ma a la otra lado me crede ce esta es bon siensa." El ia esplica ce los ia analise tre colies diversa de datos de radar, e ia contracompara la resultas per elimina "complicas en la datos" cual ia afeta la resultas de scanes pasada.

La ministro misri de anticas, Khaled al-Anani, ia dise ce la autoriosas en la pais aseta la conclui.

2018-05-06

Lubnanis eleje un parlamento nova

En Lubnan, on ia comensa vota en la elejes parlamental prima de cuasi un desenio. La ves la plu resente ia es en 2009, per lo cual on ia intende como un periodo de cuatro anios.

Ma la parlamento ia estende sua periodo a du veses par causa de nonstablia en Suria visina, e per reformi la leges elejal de la pais. Lo ia cambia la sistem de vota, ia redui la cuantia de distritos, e ia permete votas par sitadanes a stranjer a la ves prima.

Hezbollah, un grupo armada cual la Statos Unida e otras regarda como un organiza teroriste, desira aumenta sua representa en parlamento.

La prosede de vota per tota 128 sejas continua asta 19:00 de ora local. On no previde la apare de resultas ofisial asta lundi o martedi, ma analistes espeta ce detalias temprana va emerji a esta note.

Deses de miles de sitadanes lubnani ci abita estra la pais ia fa ja sua votas en la parte plu temprana de esta semana.

La sistem nova usa un sistem proportial, con sejas distribuida entre la grupos diversa cristian e muslim. Tra multe tempo, Lubnan ave ja un sistem political de comparti potia entre la relijios. La cuantia de sejas es divideda entre muslimes e cristianes, e cada de la presidente, ministro xef e ofisior autoriosa de la parlamento debe veni de un fondo relijial spesifada.

Saad Hariri, la ministro xef presente, ia causa un crise major en novembre cuando el ia fuji de la pais a Arabia Saudi, anunsiante sua resinia en un parla televisada en cual el ia dise ce el teme un atenta de asasina. Pos du semanas, el ia suspende sua resinia pos parla con presidente Michel Aoun en Lubnan, e ia retira completa sua deside en desembre.

La Uni European ia dise ce lo ia envia oservores elejal a tota de la distritos de vota lubnani.

Temas major cual la parlamento nova va fronti inclui la destina de un cuantia grande de refujadas ci ia entra a la pais pos la eruta de la gera interna suri, e problemes continuante de economia.

2018-05-05

Un futbalor mori pos un colpa de lampo

Un futbalor sudafrican, colpada par lampo en un max, ia mori en ospital.

Luyanda Ntshangase, atacor per la ecipo Maritzburg Unida, ia es en un coma induida pos deveni ferida en la jua amin a 1 marto. El ia ave 21 anios.

En un declara en Facebook, la club ia descrive el como un de sua stelas joven e asendente, e ia dise ce la ecipo es lamentosa.

Ntsangase ia asende tra sua club pos sua apare prima contra Kaizer Chiefs a du anios ante aora. El ia es un de tre juores colpada par la flax de lampo en la max en la provinse KwaZulu-Natal. La du otras ia es mera pico ferida, ma Ntshangase ia sufri un peto ardeda.

Sua mori es la trajedia tre per Maritzburg Unida en anios resente. La sentrores prometosa Mondli Cele, con 27 anios, e Mlondi Dlamini, con 20, ia mori en asidentes separada de auto en 2016 e 2017.

A presente, la club ave la numero 4 en la Liga Prima de Sudafrica.

2018-05-04

Pexores guianan es matada par piratas

Presidente David Granger de Guiana ia dise ce un ataca par piratas en la semana pasada ia es "un masacra, un trajedia grande". On teme ce lo ia mata a la min des-du pexores.

Cuatro barcos, portante 20 persones, ia es atacada a lado de la costa de Suriname, visina en America Sude, a venerdi pasada. On ia trova la corpos de tre omes, e cuatro otras ia evade.

Alga de la pexores ci es ancora asente ia es puxada a en la mar con pesas liada a sua gamas, longo reportas par la survivores. La om, de ci la plu ia es guianan, ia es bateda e rubada.

Ier, Granger ia informa reportores ce Guiana ia es multe susedosa en restrinje piratia en la rejion, ma ce la atacas la plu resente ia "veni como un reversa grande". "Nos estende compatia a la familias privada," el ia ajunta.

La familias de la vitimes ia es informada ce la governa va suporta los. Ecipos de salvores continua opera en la rejion, con colabora entre autoriosas sranan e guianan.

Piratia es ja longa un problem en la mar prosima a Suriname e Guiana, an si la cuantia de avenis reportada ia redui en anios resente.

2018-05-03

Trump es contradiseda sur un compra de silentia

En la SUA, Rudy Giuliani, aidor legal de presidente Donald Trump, ia dise ce Trump ia repaia personal a sua avocato $130 000 usada per compra la silentia de un ator de filmas adulte sur un adultera alegada.

Esta pare contradise Trump, ci ia insiste ce el no ia sabe sur esta paia, fada par avocato Michael Cohen a Stormy Daniels ante la eleje de 2016. Trump ia nega ance la alega par Sra Daniels sur la relata de ama en 2006.

Giuliani ia dise ce no finansia campaniante ia es usada – un cualia major en la situa, car acel ia ta es nonlegal.

La maior pasada de la Site York Nova, ci ia deveni resente un membro de la ecipo legal de Trump, ia comenta: "Los ia embuti lo tra un compania de avocatos e la presidente ia repaia lo." El ia ajunta ce la repaia ia es fada "tra un periodo de alga menses".

La avocato de Daniels, Michael Avenatti, ia dise ce americanes "debe es scandalida" par la revela de Giuliani. El ia tuita: "Nos ia predise a menses ante aora ce on va demostra ce on ia menti a la popla american sur la paia de $130 mil e lo cual Trump ia sabe."

Pos nega inisial la paia, Cohen ia confesa ultima ce el ia fa la paia privata a Stormy Daniels – de ci sua nom vera es Stephanie Clifford – en otobre de 2016, usante sua propre finansia, per compra sua silentia. El ia dise ance ce la campania de Trump e la organiza de Trump ia ave no sabe sur la paia, e ce el mesma no ia reseta un repaia de la mone.

La presidente ia aseta resente ce on ia fa un "acorda". La paia relata a alegas par Daniels ce el ia fa la seso con Trump en 2006, negada par Trump.

En marto de esta anio, Daniels ia inisia un litiga contra la presidente, alegante ce la acorda de nonrevela ia es nonvalida car Trump no ia suscrive lo. A pos, Daniels ia perde un proposa de corte ce Trump ta atesta jurada sur sua reclama ce los ia fa un relata de ama.

An si Trump ia nega la reclama, sua avocatos xerca $20 milion de compensa de Daniels, razonante ce el ia rompe la acorda de nonrevela.

Daniels litiga la presidente ance sur un tuita "malacusante" cual el ia envia pos cuando Daniels ia dise ce un om ia menasa el en un parce de autos en Las Vegas a abandona sua alegas. Trump ia dise ce la reclamas es "un caso completa de froda".

2018-05-02

La color contaminada de la Taj Mahal

En Barat, la Corte Suprema ia comanda la governa a xerca aidas stranjer per repara lo cual lo descrive como un cambia ansinte de la color de la Taj Mahal.

Lo dise ce la tomba famosa, construida en la sentenio 17 de marmo blanca e otra materias, ia jali e deveni aora brun e verde. La causas inclui contamina airal, construis, e la fece de insetos.

La judores ia esamina fotos de la palasio furnida par ambientistes e ia comanda ce la governa trova espertas en e estra la pais.

En la pasada, la governa ia covre la fenetras de miles de fabricerias prosima a la Taj Mahal, ma ativistes dise ce la marmo perde ancora sua brilieta. Cloacales en la Rio Yamuna, a lado de la palasio, atrae insetos cual escrete sur la mures, manxante los.

La Taj Mahal ia es construida en la site Agra par la Imperor Mugul Shah Jahan, e es aora un de la atraes major de turisme global, con asta 70 mil visitores per dia.

La problem de susia no es nova, ma on teme ce lo deveni plu sever. A veses diversa en la du desenios pasada, on ia covre la marmo su un trata de fango: cuando on lava la fango a via, lo desprende ance alga de la susia. La plu resente de esta tratas ia comensa en janero.

2018-05-01

La secretas jenetical de la rosa

A la ves prima, rexercores ia desifri la "testo" jenetical intera de la rosa. Sua istoria revela un surprende: lo es plu prosima relatada a la fresa ca nos ia suposa. Pos tempo, la labora va produi cisa rosas con odores e colores nova.

La prepara de la mapa nova de jenom ia ocupa oto anios, e ia revela jenes pertinente a la crea de odor e color e a la longia de vive de flores.

La studia, par un grupo de plu ca 40 siensistes de Frans, Deutxland, la Rena Unida e Xina, furni un comprende plu bon de la razonas perce la colores e odores de rosas es tan diversa. La informa jenetical va aida cultivores a developa varias nova cual dura plu longa en la vaso, o es plu capas de resiste pestes.

Lo lumina ance la familia Rosaceae, cual conteni no sola plantas ornal como la rosa, ma ance frutintes como pomos, peros e plantas de fresa.

La cultiva de rosas en jardines ia comensa a miles de anios ante aora, probable en Xina. En la periodo roman, rosas ia es multe creseda en Asia sude-ueste, do on ia usa los per parfum o como confeti.