2018-09-30

Misre condena un ativiste per diretos umana

En Misre, un corte ia dona un multa e un condena suspendeda de du anios a Amal Fathy, un ator e ativiste per diretos umana, car el ia "sperde novas falsa".

Fathy es ja detenida de maio pos sua publici de un video en cual el ia critica la governa sur la grado de turba sesal en la pais. Amnestia Internasional ia dise ce esta es "un caso scandalosa de nonjustia".

Misre ia aseta resente un lege cual forti sua controla de la interede – un cambia desaprobada par ativistes per diretos.

Par la lege nova sur sibercrimin, Misre pote bloci la asede a locas de rede sur cual on judi ce los menasa la securia nasional o la economia. La lege permete ance ce on supravide cualce conta de rede sosial cual ave plu ca 5000 seguores.

La potiosas de la pais dise ce esta es nesesada per combate nonstablia e terorisme. Car protestas sur strada es aora cuasi intera proibida en Misre, la interede ia es un de la foros final restante do misris pote espresa sua disenti.

En ajunta a la condena suspendeda, la corte a saturdi ia multa ance Fathy per 10 000 paundes misri (560 dolares SUA). Sua avocato ia dise ce Fathy va apela contra la judi.

En maio, Fathy ia publici un video de 12 minutos a Facebook, en cual el ia descrive como on ia turba el en modo sesal cuando el ia visita sua banco. El ia critica ance ce la governa no ata sufisinte per proteje femes.

Pos du dias, on ia aresta el e ia acusa el de atenta dana la stato misri e de posese materia ofendente.

Organizas per diretos umana dise ce autoriosas en Misre usa sempre plu la cortes e la leges de contraterorisme e crise per fa litigas nonjusta contra jornalistes, ativistes e oposores per sua critica pasosa. La autoriosas no ia comenta sur la judi contra Fathy.

2018-09-29

Un trematera e tsunami en Indonesia

Plu ca 380 persones ia mori cuando un tsunami, causada par un trematera grande, ia bate un site indonesian ier. Ondas con altia de asta tre metres ia pasa tra Palu sur la isola Sulawesi.

Replicas forte secute ancora la site. Miles de casas ia colasa, como ance ospitales, oteles, mascitas e sentros comersial.

La labora de salva es impedida par un rompe major de eletrica. La via xef a Palu es blocida par un liscatera e un ponte importante ia cade.

A la min 540 persones es ferida. Alga ia survive par asende en arbores alta per evade la ondas.

Ance ier, un trematera min potiosa ia mata un person e ia feri a la min des en Donggala, un vila de pexa. Plu ca 600 mil persones abita en Palu e Donggala.

En Palu, sentos de persones ia intende partisipa en un festa de plaia, cual ia ta comensa a la sera de venerdi.

La ospital xef de la site ia es danada en la trema, e on trata pasientes a estra en tendas tempora.

La airoporto xef resta cluida pos la tsunami. Sua atereria ia es danada, ma on espera ce elicotores va pote ancora atera. La militar de la pais envia aviones de aida de la capital, Jakarta.

La trematera ia aveni prosima a la isola Sulawesi, con profondia de 10 cilometres e fortia 7,5. On ia difusa un averti de tunami, ma ia cansela lo pos min ca un ora. On ia critica la departe meteorolojial per esta, ma lo pare ce la ondas ia ariva cuando la averti ia es ancora ativa.

2018-09-28

Un avion cade en un lagon en Micronesia

Un avion de pasajores ia cade en un lagon prosima a la Airoporto Internasional Chuuk en Micronesia. Lo ia suprapasa la atereria.

Imajes sirculinte mostra la avion de Air Niugini, de Papua Gine Nova, cual reposa en acua nonprofonda a lado de la costa. No feris grave ia es sufrida par cualce de la 35 pasajores e 12 ecipores en la vola ANG73.

La manejor de la airoporto ia dise: "La avion ia cade en la lagon, a sirca 150 metres de la atereria. A esta momento nos no sabe vera como lo ia aveni. On va comensa investiga a la plu temprana de doman, ma operas comensa denova como usual en la airporto."

El ia ajunta ce tota la persones en la avion Boeing 737-800 ia es transportada a ospital per es esaminada. El ia crede ce alga ia sufri "feris minor".

La avion ia vola de la isola Pohnpei en Micronesia a Port Moresby, la capital de Papua Gine Nova, parante a la isola Weno en via.

2018-09-27

Maduro vole presa manos con Trump

Nicolás Maduro, la presidente de Venezuela, ia dise ier ce el es preparada per presa manos con sua corespondente Donald Trump en la SUA, "an con la diferes".

La xef sosialiste ia fa un visita nonespetada a la Asembla Jeneral de la Nasiones Unida en York Nova "per defende sua pais". Ses nasiones ia acusa el de crimines contra umanas, e Trump ia indiceta la posible de ata militar contra Venezuela en ajunta a punis esistente.

Trump ia dise plu temprana ce el ta aseta consenta con Maduro. An tal, el ia dise ance ce "tota posibles es sur la table" car el "vole vide Venezuela ordinada".

Venezuela es en un crise grave de economia de pos 2014. On estima ce 2,3 milion sitadanes ia fuji de iperinfla, rompes de eletrica, e mancas de comeda e medisin.

A la Nasiones Unida, la xef de la pais ia declara: "An con la diferes, me ta aseta estende mea mano a la presidente de la Statos Unida, Donald Trump, per discute biladal la situa." En sua parla longa, el ia asentua ce el es "un laboror, un gidor, un om de la popla" e "no un maniate".

A martedi, la tesoreria de la governa SUA ia pone punis finansial a la Dama Prima de Venezuela, cual la sosialiste ia descrive como "punis nonlegal uniladal". Maduro ia acusa la SUA ance de "dona ordina a la resta de la mundo como si la mundo ta es sua propria".

La sosialiste ia repete acusas ce la SUA ia controla un ataca par avioneta en agosto, un ata sur cual la SUA nega tota conose. El ia xerca un consenta con Trump tra cuasi du anios.

2018-09-26

Un corte barati deside favorente sur biometria

En Barat, la corte suprema ia deside ce Aadhaar, un scema controversa de identia biometrial, es constitual e no viole la direto de privatia. Ma lo ia limita la estende de la scema, disente ce esta no pote es obligante per contas de banco, telefonetas, o la asede a scolas.

La scema la plu grande de identia biometrial en la mundo pertine a paias de aida sosial e de imposta, e a servis sosial diversa.

Plu ca mil miliones baratis es ja enscriveda en la scema. Los ia reseta un numero unica con 12 dijitos pos presenta sua datos biometrial.

Sirca tredes apelores ia vade a corte per declara ce la scema viole la privatia. Ma la panel de tota sinco judores corente en la corte suprema ia dise: "Aadhaar dona dinia a grupos marjinida, e esta es plu importante ca la dana. On no pote ejeta la bebe con la acua de bani*."

Aadhaar ia es inisiada en 2010 par la governa, gidada par la partito Congresa Nasional Barati. Alora lo ia es un program nonobligante, intendeda per fronti froda en la aida sosial.

Ma la scema ia deveni multe plu vasta, e aora, pos oto anios, lo es entre la sistemes de identia la plu grande de mundo. La numeros de identia ia deveni sempre plu nesesada per servis comun, como la interata con bancos, la solisita de un pasaporto, e la oteni de cartas SIM per telefonetas.

* Un idiom engles cual espresa la perde de un cosa favorable en la sutrae de un nonfavorable.

2018-09-25

La descovre major de un barcon ruinada portuges

Arceolojistes ia trova un barcon ruinada ante 400 anios a lado de la costa de Portugal.

La barcon reposa a 12 metres su la surfas de la acua, ensircada par spises, seramicas e canones gravada con la scermo eraldial de la pais. On ia trova lo prosima a Cascais, un vila turismal en la rejion de la capital Lisbon.

On crede ce la barcon ia es reveninte de Barat cuando lo ia afonda a alga tempo entre 1575 e 1625. Esta ia es a la zenito de la comersia portuges de spises con Asia.

Jorge Freire, dirijor de la projeta, ia dise ce la barcon es multe bon conservada. "De punto de vista istorial, esta es la descovre de la desenio," el ia comenta, descrivente lo ance como "la trova la plu importante de tota tempo" per Portugal.

On ia trova porselana xines de la tarda de la sentenio 16 e la temprana de la sentenio 17 en la ruina, e ance artileria de bronze e cascas de cauri, usada como mone en la comersia de sclavos.

La barcon ia es descovreda a la comensa de esta mense cuando on ia draga la estuario de la rio Tejo, cual flue longo Cascais e Lisbon. La maior Carlos Carreiras ia descrive la trova como "un descovre estracomun" cual va forti la "identia coletiva e valuas compartida".

Luis Mendes, ministro de cultur, ia dise ce on regarda la boca de la Tejo como un loca major per ruinas de barcon. "Esta descovre ia aveni per demostra lo," el ia ajunta.

La projeta arceolojial estende tra 10 anios, suportada par la vila Cascais, la governa e marina portuges, e la Universia Nova de Lisbon.

2018-09-24

Frans sutrae numaticos nosiva de la fondo de mar

A la fondo de mar a sude de Frans, sumerjores labora per leva un resife artifis composada de multe miles de numaticos de autos. On ia trova ce la numaticos sperde contamina par cimicales nosiva.

La opera custa plu ca milion euros e es partal finansiada par Michelin, fabricor de numaticos, e ance par la governa franses. La sumerjores usa un barco con aparatos de leva.

On ia nota ce pexes ia evita la loca. Alga ia nada sirca la colie de numaticos, e no spesie ia susede abitua a los.

A un ves pasada, on ia vide tal resifes como un solve duple: un modo de dejeta numaticos vea, ma ance de crea abitadas per viventes maral e de stimula organismes a crese sur la cauxo.

En la desenio de 1980, autoriosas local ia acorda la afonda de 25 mil numaticos en la acuas a 500 metres de la costa entre Cannes e Antibes, a la Riviera Franses. En 2005, rexercores ia descovre ce la numaticos emete cimicales, incluinte metales pesosa cual perili umanas, a la ambiente.

Ma en 2015, autoriosas ia informa jornalistes ce, a la tempo de sua afonda, on ia crede ce la numaticos es "completa inerte" e ia presenta no risca. Un otra problem documentida es ce pilas de numaticos pote colasa o desintegra, disturbante viventes prosima.

On ia sutrae un colie prima de 25 mil numaticos en 2015, e intende leva 10 mil en la semanas veninte, e plu en 2019.

Resifes de numaticos ia es ance sumerjida en otra partes de la mundo. Deses de miles de numaticos ia es sutraeda de la fondo de mar a Fort Lauderdale en Florida en la SUA. E sirca Jibraltar, la numaticos ia es moveda a via par corentes en la desenio de 1970. Plu tarda, on ia usa barcos, autos e blocos de beton.

2018-09-23

Un ferovia nova controversa entre Hongkong e Xina

On ia abri un ferovia de rapidia alta en Hongkong, liante la teritorio a la site Guangzhou en Xina sude. La viaja ocupa sola 40 minutos, min ca la dui de la tempo usada par trenes plu vea.

La autoriosas xines va opera a un punto de controla juntada a la stasion e en la trenes. Esta es controversa, car lo es la ves prima cuando la lege criminal de Xina es enforsada en Hongkong. Oposores dise ce esta viole la libria e constitui de la teritorio.

La ferovia ia es abrida con un rituo ier. Un legor local ia loda la viaja prima a Guangzhou como "multe cuieta, como si me ta es en un avion". Ofisiores governal dise ce la lia va aida la comersia en Hongkong, Shenzhen e Guangzhou.

La ferovia va abri oji per la popla jeneral, aidante ance la lias de tren con la resta de Xina, incluinte la capital Beijing. Ma legores prodemocratial ia boicota la rituo de abri e ia organiza un protesta estra la stasion, disente ce la ferovia menasa la sistem de lege autonom de la teritorio.

Hongkong, un colonia brites pasada, ia es redonada a Xina en 1997, longo un acorda ce la teritorio va esperia sincodes anios de "un grado alta de autonomia, estra problemes esterna e de defende". Como resulta, Hongkong ave sua propre leges, e protejes per alga diretos e librias, e on no pote aplica ala la plu de la leges de la tera xef de Xina.

La corpo leginte suprema de Xina ia dise ce la sistem en la ferovia nova no sumina la autonomia de Hongkong. Sua suportores razona ce lo simpli la prosede de migra.

On ia critica ance la projeta de la ferovia car lo ave tre anios de tardia e ia esede sua bujeta par cuasi $3 mil milion.

2018-09-22

Un naveta inversa sur Lago Victoria

A la min 136 persones ia mori pos la inversa de un naveta portante sentos de pasajores sur Lago Victoria en Tanzania. Multe persones manca, e on teme ce plu ca 200 persones ia afoca.

La naveta MV Nyerere ia inversa prosima a la isola Ukara en viaja de Bugorora. On crede ce la barco tro cargada ia desecuilibra cuando la fola ia move a un lado per permete la doci.

La opera de salva sur la lago la plu grande en Africa ia envolve sumerjores de la polisia e armada, como ance barcos privata peti e pexores local. Abitores de la rejion Mwanza teme oia la fortuna de sua relatadas ci ia viaja sur la barco a jovedi.

La motores de la naveta ia es resente recambiada pos cuando un parlamentor local ia cexa sur la presedentes.

La barco ia es capas de porta 100 persones, ma on reporta ce lo ia conteni un fola de plu ca 400 cuando lo ia inversa. A oto veses per dia, lo traversa entre la isolas Ukara e Ukwerewe, cual es prosima a Mwanza, la site du de la plu grandes de Tanzania.

La naveta ia es spesial folida car jovedi ia es la dia de mercato en Bugorora sur Ukerewe. Lo ia porta ance carga, incluinte sacos de semento e mais, cuando lo ia desecuilibra a sincodes metres de la costa.

On crede ce multe de la pasajores no ia pote nada. Un investiga ofisial va aveni pos la fini de la atentas de trova survivores.

2018-09-21

Un liscatera segue la siclon en la Pilipinas

Un lisca de tera en la Pilipinas ia mata a la min 21 persones e ia manca desuples de otras. Alga su la detrito ia envia mesajetas demandante per aida.

La lisca ier ia engoli du viletas parteninte a la site Naga en la provinse Cebu. Lo ia aveni corta pos un tempesta forte cual ia mata plu ca 80 persones en la norde de la Pilipinas.

Siclon Mangkhut no ia pasa direta tra Cebu, ma ia provoca pluves plu forte de monson, levante la risca de liscateras tra la pais.

La lisca en Cebu ia sutrae un parte grande de un colina sur cual persones ia construi sua casas tempora.

Un abitor ia descrive la esperia: "Lo ia es como un trematera e on ia ave un sona tonante, puminte, forte. Tota de nos ia sorti corente." El ia ajunta ce sua sposo e enfantes ia survive la desastre. "Multe de nosa visinas ia es criante e xiliante per aida. Alga ia vole aida la colpadas, ma tro multe tera ia covre la casas, incluinte lo de mea frate."

Plu ca 600 familias de Naga ia pasa la note pasada en sentros de evacua.

Un polisior xef ia dise ce on ia susede salva alga persones de en casas enterada. "On ia ave sinias de vive. Alga de los ia susede envia mesajetas." On espera ce otra persones es trapida en cavetas de aira en la detrito.

Plu ca 20 casas ia es afetada, a la borda de Naga. Los ia es prosima a un escaveria pasada de calcario, cual ia destabli cisa la colina supra la viletas. Autoriosas local ia identifia ja la loca como riscosa per lisca.

En la plu temprana de esta semana, la Pilipinas ia sufri ance liscateras cual ia mata a la min 32 persones en Itogon, un vila de mineria en la provinse Benguet. Un grupo de persones ia fuji de la siclon a un refujeria en un colina, ma la colina ia colasa.

2018-09-20

La produi recordo de cocaina en Colombia

Un statistica nova publicida par la Nasiones Unida indica ce la produi de cocaina en Colombia ia ateni un nivel recordo en 2017.

La Ofisia NU sur Drogas e Crimin dise ce la produi ia crese par sirca 31% a 1400 tones, cultivada sur 171 mil ectares. La departe ia averti ce la produi pote dana laboras resente de pasi.

Colombia es la produor de cocaina la plu grande de mundo. Multe de la droga fini en la SUA, cual es la consumor la plu grande.

La reporta dise ce la area usada per crese coca en Colombia en la anio pasada ia es la plu grande rejistrada a cualce tempo, e plu grande ca en 2016 par 25 mil ectares. La cocaina teorial produable ta ave un valua de $2,7 mil milion en la mercato local.

La NU ia dise ce la rejion bordante la Mar Pasifica en Colombia es la plu intensa cultivada. Sola, la stato Nariño a la frontera con Ecuador conteni plu tera cultivada per coca ca la intera de Peru, cual es un otra produor major.

Otodes persentos de la coca ia es creseda en la mesma area tra la des anios pasada, e la recolies produi folias de coca – la ingrediente xef de cocaina – a 33% plu ca en 2012.

La pais ia batalia la produi de cocaina tra anios, e la SUA furni sirca $400 milion en cada anio per aida esta. En la anio pasada, Colombia ia suscrive ance un acorda de $300 milion con la NU, intendeda per redui la produi de cocaina par compensa cultivores ci aseta cambia de crese coca a crese otra plantas.

En agosto, Iván Duque Márquez, la presidente nova elejeda, ia informa reportores ce la governa va crea un politica nova de combate drogas, disente ce la gol es "resultas concreta" en la cuatro anios seguente. Ma un scema de usa avionetas per jeta erbiside a cultivas de coca ia atrae critica.

Sua presedor, Juan Manuel Santos, ia suspende la fumiga airal con glifosato en 2015, pos avertis par la Organiza Mundal de Sania ce la cimical ave cisa un relata con canser.

La comersia de cocaina en Colombia flori ancora, an pos un acorda de pas de 2016 cual ia fini sinco desenios de gera armada con la FARC, un grupo rebelante major. Alga culpa la governa per consentra tro forte a pas. Otras ia dise ce par deveni legal, la rebelores FARC ia lasa un vacua en la mercato cual los ia controla a ante.

2018-09-19

Corea Norde acorda clui un compleso de misiles

La presidente de Corea Sude dise ce Kim Jong-un ia acorda descomuta un de la locas xef de proba e lansa misiles en Corea Norde.

Pos consenta en Pyongyang, Moon Jae-in e Kim Jong-un "ia acorda un modo de reali la desnucleali", longo Moon. Kim ia descrive la acorda como "un salta a ante" en dirije a pas militar sur la penisola. El ia dise ance ce el espera "visita Seoul en la futur prosima". El ta deveni la xef prima de Corea Norde ci ta fa tal.

La tema xef de la consenta ia es la problem de desnucleali. An si la SUA e Corea Norde ia acorda jeneral labora per acel gol, la negosias ia sesa progresa. Aora, Pyongyang ia fa un paso per reconfirma sua sinseria.

Moon ia dise ce Kim ia "acorda clui permanente la proberia de motores de misiles e compleso de lansa misiles a Tongchang-ri", e ce, importante, esta va aveni "con la presentia de espertas de nasiones pertinente" ci va serti ce lo no funsiona plu.

El ia dise ce Kim ia acorda ance clui la compleso nucleal a Yongbyon – sur cual on crede ce Corea Norde ia produi ala la materia usada en sua probas nucleal – ma sola si la SUA ta fa alga ata resiproca. On no ia spesifa la detalias de esta.

Corea Norde ia esplode sua proberia nucleal xef a Punggye-ri a tempo corta ante la consenta de Kim con presidente Donald Trump de la SUA en junio.

La du Coreas ia avansa ance a tema de relatas mutua, anunsiante projetas per lia sua ferovias, permete plu reunis per familias separada par la frontera, e colabora sur aida medical.

Moon ia invita Kim a Seoul, la capital de Corea Sude, sujestante ce la visita ta aveni ante la fini de esta anio. La du va aspira ance ospita juntada la Juas Olimpial de Estate en 2032.

La ministro de defende de Corea Sude e la xef de la armada de Corea Norde ia suscrive ance un acorda per redui la tensa militar, instituinte un zona de cuxin longo la frontera per preveni scaramuxas nonintendeda.

La suscrive ia aveni a media de un visita de tre dias a Pyongyang par Moon. La labora per desnucleali entre Corea Norde e la SUA ia ariva resente a un state de nonprogresa, e la consenta en Pyongyang de esta semana va forti la rol de la Sude como un reconsilior.

An tal, multe oservores averti ce, asta aora, la Norde ia fa no pasos major per fini sua program controversa de armas nucleal.

2018-09-18

Un problem de conserva corpos mor en Mexico

En la stato Jalisco en la ueste de Mexico, abitores ia cexa sur la odor de un vagon frida cual conteni a la min 100 corpos mor.

La autoriosas local ia dise ier ce los atenta move la contenador, cual los ia lua cuando morerias en la site Guadalajara ia deveni plen.

Un abitor ia comenta: "Nos ave multe enfantes en esta visineria. Lo ta pote maladi tota de nos."

Leges en Mexico preveni ce on seni corpos relatada con crimin violente. On xerca un solve per la problem de conserva corpos pos un aumenta resente de violentia.

La xef de la unia de investigores forense de Jalisco ia dise: "Nos ia usa ja tota la locas de semetero do nos ia pote entera los." El ia ajunta ce on prepara un compleso sur cual on previde ce lo va conserva 800 corpos.

A ante, la vagon frida ia es parcida a un beneria a la borda de Guadalajara. Pos du semanas, la abitores ia comensa cexa sur un mal odor e ia dise ce la contenador atrae moscas.

On ia move lo a un peso vacua en la suburbe Tlajomulco de Zúñiga, ma la abitores ala ia comensa protesta a la fini de semana.

Mexico ia sufri un aumenta de matas violente en anios resente. Plu ca 200 mil persones ia es matada o ia desapare de pos desembre 2006, cuando la governa mexican ia declara un gera contra crimin organizada.

La statistica ofisial sujesta ce Mexico ia esperia sua anio la plu violente en 2017, con plu ca 25 mil omisides. Esta es la cuantia anial la plu alta pos la comensa de rejistras moderna. Crimin organizada ia representa cuasi tre cuatris de acel matas.

2018-09-17

Un recordo mundal nova de maraton

Eliud Kipchoge ia rompe un recordo mundal par completi un maraton en du oras, un minuto e 39 secondos en Berlin.

La atleta cenian, ci ave 33 anios, ia suprapasa la recordo presente par cuasi 80 secondos. Acel recordo ia es fada par un otra cenian, Dennis Kimetto, ci ia core la 42 195 cilometres en 2 oras, 2 minutos e 57 secondos en la mesma site en 2014.

"Me ave no parolas per descrive esta dia," Kipchoge ia dise. "Me es vera grasiosa, felis de rompe la recordo mundal."

La corsa de femes ia es vinseda par Gladys Cherono de Cenia en 2 oras, 18 minutos e 11 secondos.

Kipchoge ia gania la Maraton de London a la ves tre en la parte plu temprana de esta anio, e el es la campion olimpial de maraton.

"Lo ia es difisil," el ia comenta. "Me ia core mea propre corsa. Me ia fida mea program e mea instruores. Acel ia puxa me en la cilometres final."

En 2017, Kipchoge ia core an plu rapida, falinte completi la maraton prima de min ca du oras par sola 26 secondos. Car on ia usa alora precorsores ci ia pote entra a e sorti de la core, on no ia reconose acel cronometri como un recordo.

2018-09-16

Un ministro nijerian resinia sur un documento falsa

La ministro finansial de Nijeria ia resinia pos alegas ce el ia usa un documento falsida per evita sua obliga de partisipa per un anio en un scema de servi nasional joven.

Kemi Adeosun, ci ia abita en la Rena Unida asta la eda de 34 anios, ia dise ce on ia informa el ce el es esentada car el ave plu ca 30 anios.

La bancor investal pasada ia dise ce on ia dona a el un documento sur cual el ia crede ce lo es autentica. Ma un investiga interna ia mostra ce lo es falsida.

Sua resinia segue menses de discute en jornalisme local sur la veria de sua documento de la Corpo Nasional de Servi Joven. Inisial, el no ia comenta sur la alega, provocante critica de sua oposores. Ma en un declara formal, el ia dise ce el senti obligada a resinia pos la publici de la resulta de la investiga.

La rol de ministro de finansia ia es asiniada a Adesoun par presidente Muhammadu Buhari en 2015. Sua politica xef ia es un atenta de boni la colie de impostas e enforsa regulas sur malmaneja par departes governal.

Aora la ministro per bujeta e projeta nasional, Zainab Ahmed, va supravide la ministreria de finansia.

Studiantes de universia en Nijeria debe fa un anio de servi nasional pos gradua, per serti ce graduadas contribui a la developa de la pais. On envia Membros de la Corpo a statos ultra sua loca de nase, per forti la senti de unia nasional.

Graduadas nijerian no pote labora per la governa o fa multe postos privata asta sua completi de la anio obligante.

2018-09-15

Un salutor faxiste es prisonida en Deutxland

Un corte deutx ia prisoni per sinco menses un om de 34 anios ci ia fa salutas faxiste en un protesta en Chemnitz, un site este. La om, un abitor de la site, ia es presente a un protesta grande par destristes estrema a 27 agosto, provocada par la coteli matante de un om deutx en un scaramuxa con migrores.

Sinias e simboles, incluinte salutas faxiste, es nonlegal en Deutxland.

A jovedi, la corte en Chemnitz ia dona un prisoni suspendeda de oto menses a un otra om, de 33 anios, ci ia fa ta salutas. On ia comanda ance ce el paia un multa de €2000.

Car la om ier prisonida ia ave ja un serie de otra condenas, incluinte per viole fisical, un puni suspendeda no ia es posible.

En Chemnitz, pos la coteli de Daniel H a 26 agosto, miles de persones ia fa un serie de protestas estrema destriste. Contraprotestas sinistriste ia aveni ance.

On ia deteni du refujadas – un suri e un iraci – en relata con la mata. La polisia xerca un suspetada tre, ci es ance un migror.

Deuxtland ia es scandalida par atacas e insultas raziste liada a la protestas en Chemnitz. Grupos estrema destriste, incluinte la partito oposante xef, es coler ce on permete ce plu ca milion refujadas ci ia ariva en Deutxland en 2015 e 2016 resta.

A mercurdi, canselor Angela Merkel ia dise a la parlamento ce "on ave no escusa o razona per xasa persones en modo enemin, per usa violentia e sloganes nazi, per mostra enemia a persones ci aspeta diferente, ci ave un restorante iudi, per atacas contra polisiores".

En la semana pasada, plu ca 60 mil persones ia es presente a un conserta sin custa en Chemnitz per protesta contra la destra estrema.

2018-09-14

Siclones sever menasa la Statos Unida e la Pilipinas

Siclon Florence ia ariva a la costa este de la SUA. Deses de miles de casas es sin eletrica, e acua de mar versa longo stradas costal.

La tempesta crea ventas con rapidia masima de 150 cilometres per ora. Lo ia perde alga de sua fortia en cuando lo ia prosimi a Carolina Norde e Sude, ma ofisiores averti ce lo pote ancora mata multe persones e produi inondas desastrosa.

Lo es probable ce Carolina Norde va reseta oto menses de pluve en sola du o tre dias.

La situa es simil en la Pilipinas, do un siclon enorme prosimi e miles de persones ia comensa parti de rejiones costal. Siclon Mangkhut va ariva a la punto norde de Luzon, la isola xef, a no min tarda ca saturdi.

On clui scolas e ofisias, e cultivores atenta salva sua recolies. Des milion persones es en la curso de la tempesta, como ance miliones de otras longo la costa sude de Xina.

La Pilipinas reseta sirca dudes siclones o otra tempestas en cada anio. Mangkhut es la plu forte asta aora en esta anio, con diametre de 900 cilometres e venta sustada de plu ca 200 cilometres per ora.

Lo ia bate ja la Isolas Mariana norde e Guam.

2018-09-13

Un desinia de 73 mil anios sur un petra

Siensistes ia descovre ia desinia astrata la plu vea conoseda sur un frato peti de roca en Sudafrica. La imaje ave sirca 73 mil anios e mostra linias crusada de pigmento ocer roja.

La frato de imaje ia es trovada en la Cava Blombos a la costa sude. Un reporta publicida en la jornal Natur descrive lo como "un indica eselente de cognisio moderna".

An si on ia trova gravas plu vea en locas diversa en la mundo, la rexercores dise ce la linias sur esta petra es la desinia astrata la plu temprana cual on conose.

Tota la linias fini subita a la bordas de la frato, sujestante ce la desinia intera ia es probable plu grande e complicada. La rexercores esita descrive la imaje como arte, ma aseta ce lo ia ave cuasi serta "alga sinifia a sua faor".

Umanas ia usa ocer, un pigmento de arjila, tra 285 mil anios, e cisa plu. La apare prima conoseda de umanas moderna ia es a plu ca 315 mil anios ante aora, en Africa.

On ia trova multe otra ojetos fabricada en la Cava Blombos, a 300 cilometres a este de Site Capo, incluinte perletas covreda con ocer roja, fratos gravada de ocer, e utiles per crea pinta con eda de sirca sento mil anios.

2018-09-12

Milion catalanes asembla per sua Dia Nasional

Sirca milion persones ia vade sur la stradas de Barcelona ier per selebra la Dia Nasional de Catalunia e per mostra sua suporta continuada per autonomia. Esta festa anial es la prima pos la atenta falida de Catalunia per deveni nondependente de Espania en la otobre pasada.

Un fola de protestores en camisas roja e portante banderas roja e jala ia bate tambures, ia sona sibilas e ia canta sloganes de suporta. La cuantia de partisipores ia es aprosima la mesma como en 2017.

Quim Torra, presidente rejional de Catalunia, e sua presedor Carles Puigdemont, ci ia fuji a Beljia pos la fali de la atenta per autonomi, ia recomenda forte ce la popla protesta. A la fini de la asembla, Torra ia dise: "Nos comensa un marxa sin fini."

La festa "Diada" onora la dia cuando Barcelona ia cade a la soldatos de de Re Felipe 5 en 1714. Ma tra la oto anios pasada, on ia usa lo ance como un punto enerjinte per autonomia.

Catalunia ia fa un referendo sur la tema a 1 otobre 2017 e ia declara autonomia uniladal a 27 otobre. Ma la atenta ia fali cuando la corte constitual de Espania ia judi ce la cambia es nonlegal e Madrid ia forsa sua governa direta.

Ier, protestores ia formi tores umana e ia esije la libri de xefes separadiste ci es detenida ante sua litiga pos la campania per nondepende. On projeta plu protestas a la aniversarios de la referendo e la declara.

An tal, oposores ia cexa ce on usurpa la Diada, car no tota catalanes suporta la autonomia. Josep Borrell, la ministro de esternas de Espania, ci es catalan, ia dise: "Nos catalanes debe selebra nosa dia nasional e no sola un recomenda de autonomia cual es comun a min ca un dui de la popla."

Un sonda de opina en julio ia sujesta ce 46,7% de catalanes favore la autonomia e 44,9% oposa lo.

2018-09-11

La presidente de Srilanca cexa sur nozas

La airocompania nasional ia es criticada par la presidente de la pais sur mal nozas.

Presidente Maithripala Sirisena ia cexa ce, en un viaja resente con SriLankan, on ia dona a el alga anacardias cual no ia conveni per come. En fato, la xef coler ia ajunta, los no ta conveni an per es comeda par canes.

La airocompania, cual ave a la min mil milion dolares de deta, ia fa ancora no comenta sur la cexa de Sirisena. Lo es xasada par alegas de froda en anios resente, e es aora investigada par un comision presidental spesial.

An tal, la natur esata de la problem de la nozas no es clar.

Parlante ier a un asembla de cultivores en la sude de Srilanca, Sirisena ia dise ce la produidas ofendente ia es servida a el en un vola de Kathmandu, la capital de Nepal, a Colombo en la semana pasada.

Esta no es la ves prima cuando un paceta de nozas en un avion ia deveni un tema per jornalistes.

A cuatro anios ante aora, Heather Cho, la fia de la xef de Korean Air, ia obliga un avion a revade a sua porte de parti, cuando un ospitor ia servi a el nozas de macadamia en un paceta e no sur un plato. A pos, on ia condena el per viole la securia de la avion, e el ia spende alga menses en prison.

2018-09-10

La du blocos political svensce fini cuasi egal

La vota jeneral en Sveria ia lasa la du blocos political xef en state cuasi egal, e la partito contra migras ia avansa.

Pos la conta de cuasi tota la votas, la alia governante de la sinistra sentral es pico ante sua oposores desvensce la alia de la destra sentral. Ambos ave sirca 40% de la votas. La partito nasionaliste, la Democratas Svensce, ia gania sirca 18%, un crese de 5% pos la eleje presedente.

Lo es serta ce on va fa aora un batalia longa per formi un alia funsionante.

Sveria usa un sistem de representa proportial, en cual on asinia a cada partito un cuantia de sejas en cada distrito en modo corespondente a sua parte de la votas. Ambos de la blocos xef ia refusa governa con la nasionalistes, ma sua gidor ia dise ce el es preparada per negosia con tota otra partitos.

Otra paises european ia vide un crese en la suporta per partitos antimigral en anios resente. Plu temprana en esta anio, Italia ia instala un alia governante nova, dirijeda par un partito antiortodox e un alia destriste. En 2017 en Deutxland, un partito de la destra estrema ia gania 12,6% de votas, e la Partito de la Popla Dansce ia gania 21% en 2015.

Migras ia es un tema major de la campania. La nasionalistes desira restrinje forte los. La ministro xef ci fini sua periodo, Stefan Löfven, ia descrive esta como "raziste".

La Democratas Svensce ia es liada tra anios a neonazis e otra grupos estrema destriste, e ia ave no parlamentores asta 2010. Los ia labora per restili se, cambiante sua logo de un torxa flaminte a un margarita en la colores de la bandera de la pais.

La economia de Sveria buma, ma multe votores es consernada ce servis de casi, sania e aida sosial ia deveni presada par un onda de persones ci ia ariva en la crise migrante de 2015. En acel anio, Sveria ia aseta 163 mil xercores de refuja – la enflue la plu alta en la Uni European en proportio a cuantia de abitores.

Multe votores es ance consernada sur violentia. La nasionalistes lia un crese de fusilis a la crese de migra, an si la statistica ofisial mostra no corelata. Los desira ance sorti de la Uni European, e ia proposa un referendo. Ma tota la partitos sentriste oposa un tal vota, donce lo no es probable ce lo va aveni.

Ultra la migra, la cambia de clima es un tema sur cual multe svensces es ansiosa, spesial pos un estate longa e calda con focones savaje. En la caldia estrema, sirca 25 mil ectares de foresta ia arde. La suporta per la partito verde, cual ia es danada par alga scandales interna, ia reforti tra la pais.

2018-09-09

Un parocian espaniol malfa un restora de scultas

Un parocian espaniol ia repinti un colie de scultas de la sentenio 15 en colores xiliante, atraente burlas tra la pais.

En un de la scultetas de lenio, cual ia es nonpintida a ante, Jesus porta aora un roba briliante verde, e Maria ave un tela de testa e linioio de ros briliante. Un otra sculta mostra San Pedro, aora vestida en roja intensa.

Los es situada en un eglesa en un vileta en la rejion Asturias en Espania norde.

Un de la 28 abitores de El Ranadoiro, María Luisa Menéndez, ia reseta la permete de la prete local per pinti la scultetas. El ia comenta: "Me no es un [depintor] profesal, ma me ia gusta sempre lo, e la figures ia nesesa vera es pintida. Donce me ia pinti los a mea capasia, con la colores cual ia aspeta bon a me, e la visinas ia gusta lo."

Ofisiores de la rejion ia es min plaseda.

En junio on ia critica un eglesa en Estella, un vila norde, cuando lo ia emplea un ensenior de arte e artisania per refresci un sculta de lenio de San Jorj de la sentenio 16. La geror ia es vera mutada, ganiante un fas ros e armur de colores briliante. Alga comentores ia compara lo a Tintin, un carater de cartunes.

Ma entretempo, un restora malfada de un fresco en 2012 ia deveni mesma un atrae major, tirante miles de visitores a la vila Borja, ance en Espania norde. Ecce Homo par Elías García Martínez ia es vidable en un eglesa prosima a Zaragoza tra plu ca sento anios, mostrante Jesus en la corona de spinas.

La fresco ia dejenera gradal par causa de umidia, asta cuando un parocian vea ia atenta boni lo par sua brosa. La resulta aspeta simil a un simia.

2018-09-08

Un defior per la strada la plu presipe de mundo

La abitores de la vila Harlech en la norde de Cimri desira ce on reconose ofisial un de sua stradas como la plu presipe en la mundo.

A presente, la libro Guinness de Recordos de Mundo declara ce la strada la plu presipe es Baldwin Street, en la site Dunedin en Zeland Nova, de cual sua gradiente ateni 35%. Ma en Harlech, on crede ce Ffordd Pen Llech es plu presipe, con gradiente de 36%.

Sarah Badhan, ci maneja un paje de discute en Facebook per la comunia de Harlech, ia dise ce la plu de persones abita a basa de la colina, ma la farmasia e posteria es a la culmina.

"Esta manteni nos en bon forma, lo es serta," el ia dise. "La asende es un defia grande. On es vera fatigada pos ariva a la culmina."

2018-09-07

Un aspiror presidental es cotelida en Brasil

Un competor favoreda en la eleje presidental de Brasil, Jair Bolsonaro, ia es cotelida en un asembla campaniante. La politiciste estrema destriste ia es atacada entre un fola en Minas Gerais, un stato sude-este.

El ia reseta sirurjia per feris a sua intestines e on previde ce el va recovre.

Esta politiciste controversa, ci ia scandali multe en Brasil par sua comentas raziste e omofobica, ia presenta forte en sondas resente. Si la sondas es coreta, el va gania la plu votas en la eleje en otobre si la presidente pasada Lula da Silva va fali en sua atenta de reversa un proibi ce el mesma reaspira la posto.

Videos de la aveni en la site de Juiz de Fora mostra Bolsonaro tenida en la aira par sua suportores e levante sua diton, cuando algun feri el con lo cual pare es un cotel. El convulsa en dole, e sua suportores basi rapida el a la tera per pone el en un auto.

Pos la ataca, sua fio Flavio ia tuita inisial ce la feri es "sola surfasal", ma el ia dona un evalua plu sombre pos du oras, disente ce Bolsonaro ia ariva "cuasi mor" a la ospital.

Ofisiores de la ospital ia clari plu tarda ce Bolsonaro ia sufri un coteli profonda e perilinte en sua intestines e es aora en un state "grave ma stable". El va spende a la min un semana en ospital.

La polisia ia dise ce los ia aresta un suspetada nomida Adelio Obispo de Oliveira, ci ave 40 anios. On reporta ce el ia pare mental disturbada. Suportores coler de Bolsonaro ia puxa e bate el ante sua aresta.

Tota la competores de Bolsonaro ia condena la coteli. Presidente Michel Temer ia dise ce un tal ataca es "nontolerable" en un stato democrata e ce el espera ce Bolsonaro va recovre rapida. "La tolera es un parte de democratia," el ia dise. "Lo es un parte de la rena de lege."

2018-09-06

Reportas de resiste ofisial contra Trump

En la SUA, un ofisior major su Donald Trump ia dise ce membros de la governa labora per frustra partes de la projeta de la presidente, per proteje la pais de sua "tendes la plu mal".

En un editorial en la jornal New York Times, la autor anonim ia dise ce la "manca de moralia" e "noncautia" de la presidente ia gida a desides mal informada e fretosa.

Trump mesma ia descrive la scrivor como "coarde" e la jornal como "finjente".

La jornal ia defende la editorial en un declara, disente: "Nos es estrema orgulosa ce nos ia publici esta peso, cual ajunta valua importante a la comprende publica de lo cual aveni en la governa de Trump."

La article de opina ia es publicida a la dia pos cuando estraedas de un libro par Bob Woodward sur Trump ia sujesta ce sua ofisiores xef es engranada en un "colpa de stato manejal" per proteje la nasion de sua presidente, incluinte par move documentos major a via de sua table ante cuando el pote suscrive los.

La lista de criticas de Trump en la article inclui sua consentas desorganizada, sua condui fretante e trivial, un noncapasia de segue sua desides, un antipatia contra jornalisme libre, e sua instintos "antidemocrata".

La autor descrive un "presidentia de du niveles", en cual la atas de la presidente – como sua disposa pasinte a "autocratas e tiranos" como Kim Jong-un e Vladimir Putin – es constrinjeda e redirijeda par "adultes en la sala".

Plu, el dise ce alga persones en la governa ia xuxa an sur usa la Altera 25, un regula en la constitui cual permete un vota par la vispresidente e un majoria de ministros per sutrae un presidente ci es "noncapas de reali la potias e debes de sua ofisia".

On reporta un promove atacosa de en la Casa Blanca per descovre la identia de la fontes de ci Woodward ia depende per sua libro Teme: Trump en la Casa Blanca.

Sur la article en la jornal, Trump ia tuita un sola parola: "TRADI?" El ia segue esta par demanda esce la ofisior esiste vera o esce la jornal ia inventa el, ajuntante: "Si la persona anonim COARDE esiste vera, la Times debe, per razonas de Securia Nasional, envia el a la governa sin pausa!"

Plu tarda, el ia ajunta un plu tuita, disente: "Me drena la Pantan, e la Pantan atenta contrataca. No ansi, nos va vinse!"

2018-09-05

Un siclon destrui multe en Japan

A la min des persones ia es matada par Siclon Jebi, la tempesta la plu forte cual Japan ia esperia en 25 anios. Lo ia pasa tra la ueste de la pais, colpante sites major como Kyoto e Osaka e causante multe destrui.

Aviones, trenes e navetas ia es canselada, ma on ia susede evacua miles de pasajores trapida a la airoporto internasional de Osaka. En cuando la ventas lenti aora e move norde, on recomenda ce persones resta vijilante per inondas e liscas de tera.

La siclon ia feri 300 persones, cisa plu. A esta matina, on ia avisa la evacua de plu 1,2 milion persones. E a plu ca 30 mil persones on ia dona recomendas plu forte de evacua, ma ancora no en modo obligante.

Videos en redes sosial ia mostra ce la rota jigante con altia de 100 metres en Osaka ia jira rapida en la tempesta, an si lo ia es descomutada.

Plu ca du milion casas ia esperia perdes de eletrica en la tempesta, e scolas e companias en la rejion afetada ia resta cluida. On ia cansela cuasi 800 aviones, incluinte volas internasional a Nagoya e Osaka.

Oji, viajores a la airoporto Kansai en Osaka ia es transportada par barcos a un otra airoporto local. Asta tre mil persones ia deveni encaliada a Kansai, cual es construida sur un isola artifis, cuando un tancador ia colide con la ponte cual lia lo a la tera xef.

La atererias e suteras de la airoporto ia deveni inondada, e la compleso va resta cluida tra la intera de oji.

2018-09-04

Febre de rata en acua contaminada en Kerala

Kerala, la stato inondada en la sude de Barat, ia declara un crise de sania pos la mori de des-un persones par febre de rata en la du dias pasada.

La governa ia demanda ce cadun ci ia contata la acuas de inonda prende medisin como un media protejente, per evita un epidemica. Ofisiores ia dise ce on ave no causa direta per alarma e ce la situa es controlada.

Inondas ruinante ia mata sirca 400 persones en Kerala de pos junio. Plu ca milion otras ia es deslocada, e multe de los ia refuja se en campas aidante tra la stato.

Dotores ia dise ce la eruta no ia surprende los e ce los es preparada per trata lo. Los ia espeta vide maladias portada par acua, como colera, tifoide, diarea, epatite e febre de rata (ance nomida "leptospirose"). Persones ia comensa revade de la campas a sua casas, ma en multe de estas la acua no ia retrosede.

Asta aora, on ia deteta la maladia en sinco de la des-tre distritos cual ia es inondada.

Leptospirose es sperdeda par ratas o licuidas de animal, e pote entra a la corpo umana tra talias peti en la pel, o tra la oios, nas e boca. Sintomes inclui febre, nausea, doles musculal, vomiti e diarea.

Ratas afoca en la acua inondante, plu contaminante lo e permetente ce baterias "leptospiro" entra a la corpo umana.

2018-09-03

Un museo brasilera es perdeda en flamas

Un focon ia ruina la Museo Nasional de Brasil en Rio de Janeiro, la instituida siensal la plu vea en la pais. On teme ce la plu de sua colie, incluinte fosiles, obras de arte, e documentos de tra la sentenios es destruida.

Pompores labora ancora per estingui la flamas. On no ia reporta feris.

La museo, cual ia funsiona en pasada como la casa de la familia real portuges, ia selebra sua aniversario 200 en esta anio.

La focon ia comensa ier en la sera, pos la clui de la compleso per la dia. On no sabe la causa. Imajes airal, difusada en televisa brasilera, ia mostra la estende de la flamas tra la construida.

Entre la 20 milion ojetos contenida ia es trovadas arceolojial, fosiles, e la meteorite la plu grande descovreda en Brasil. La colie de istoria natural ia inclui osos de dinosauros e la sceleto de un fem nomida Luzia, cual, con eda de 12 mil anios, ia es la sceleto la plu vea conoseda en la Americas.

La construida ia conteni ance documentos istorial pertinente a la sentenios entre la ariva de la portugeses en la desenio de 1500 e la declara de un republica en 1889. Arte e ojetos de Egipte antica e de la eda grecoroman ia es ance esibida en la museo.

La familia real ia move a la construida en 1808, cuando la pais ia fronti un menasa de invade par Napoleon.

La dirijor de la museo ia descrive la focon como "un trajedia cultural".

En pasada, empleadas ia espresa ja sua ansia sur reduis finansial e la state gastada de la construida. Aora, un ia dise ce manejores ia esperia "difisiles enorme" en atenta securi finansia per recursos "sufisinte" per la palasio. Un otra ia esplica ce la construida ia ave solos de lenio, e ia conteni "multe cosas cual arde multe rapida", como documentos de paper.

La instituida ia es fundida en 1818 como la Museo Real, con intende de promove rexerca siensal par pone sua colie a la dispone de spesialistes.

2018-09-02

Esplodes a un airoporto suri

Suria ia nega reportas ce un serie de esplodes oji a un airoporto militar prosima a Dimashq ia resulta de atacas airal israeli.

Fontes militar suri ia dise ce la pumes forte, reportada a la airoporto de Mezzeh, ia es causada par un esplode en un teneria de armas cual ia resulta de un rompe eletrical.

Israel ia inisia atacas airal contra Suria en la pasada, e on ia acusa lo de dirije estas contra la airoporto de Mezzeh en la anio pasada.

La xef de la Oserveria Suri per Diretos Umana, un grupo monitorinte, ia dise ce la airoporto militar ia es cisa colpada par "un misil israeli" xutada supra la teritorio ocupada de la Plano Alta Golan. La airoporto conteni empleadas de la Forte de Aira Suri.

Ma un fonte militar suri ia rejeta plu tarda la informa, disente ce la base no ia es la ojeto de un ataca israeli.

Imajes en redes sosial ia pare mostra alga esplodes potiosa en la rejion.

En maio, Israel ia dise ce lo ia ataca infrastrutur militar irani en Suria pos lo cual lo ia descrive como un ataca irani par roceto contra teritorio tenida par israelis. En la mense seguente, Israel ia dise ce lo ia tira a tera un avion militar suri cual ia entra a sua spasio de aira – un aveni rara entre la du enemis.

En janero de la anio pasada, jornalistes de stato ia sita un dise de la armada ce alga rocetos ia es lansada a la compleso airoportal de Mezzeh, acusante Israel de bombarda la loca.

2018-09-01

Un barcon abandonada encalia en Miama

En Miama, la polisia esplora un portacontenador misteriosa e osidinte per informas, pos cuando pexores ia vide ce lo vaga prosima a la rejion Yangon.

La barcon, portante la nom "Sam Ratulangi PB 1600", ia es descovreda en la plu temprana de esta semana, flotante prosima a la costa de la capital comersial de la pais. Lo ia conteni no marores e no benes.

Autoriosas e empleadas de la marina ia entra a la barcon a jovedi per investiga. En un declara en Facebook, la polisia de Yangon ia dise ce la barcon es "encaliada sur la plaia" e ce lo "porta un bandera indonesian".

Aung Kyaw Linn, la secretor jeneral de la Federa Nondependente de Marores Miama, ia dise ce la barcon es ancora en state funsionable, e ce el suspeta ce on ia abandona sola resente la barcon. El ia ajunta: "Un razona debe esiste."

La barcon ia es construida en 2001. Sua longia es plu ca 177 metres, longo la pajeria de Trafica Maral, cual rejistra la moves de barcones tra la mundo.

La rejistra la plu resente de esta barcon ia es a lado de la costa de Taiuan en 2009. Esta es la esemplo prima reportada de la apare de un barcon abandonada en la acuas de Miama.