2018-12-31

Merkel dise ce Deuxtland va prende plu encargas

En sua parla anial, Angela Merkel ia dise ce en 2019, Deutxland va prende plu encargas internasional e debe defende sua credes. La intera de la parla de la anio nova par la canselor va es difusada en la plu tarda de oji.

El ia dise ce sertas vea de coopera internasional ia “veni su presa”, referente a relatas tensada entre Deutxland e la SUA. En 2018, Merkel e presidente Donald Trump ia disputa problemes interna e esterna de Deutxland.

En la anio pasada, Merkel ia es un defendor major de multiladalisme, contrastada con la politica esterna “America Prima” de Trump.

“En nosa propre interesa, nos debe prende plu encargas,” la xef deutx ia dise, avertinte ce problemes global como la cambia climal, la migra e la terorisme no pote es solveda en modo solitar. Par ocupa un seja tempora en la Consilio de Securia de la NU en 2019 e 2020, Deutxland va presa per “solves global”, Merkel ia dise.

La canselor, ci va renunsia sua posto en 2021, ia promete aumenta la spende par la pais a aidas umaniste e developal, e a defende.

Merkel ia parla ance sur la divide profonda political en Deutxland, sedente ce sua governa ia delude la sitadanes, ma recomendante unia e coopera. “Nos va mestri la defias de nosa eda sola si nos coere e colabora con otras ultra fronteras.”

En esta anio, Merkel ia preveni apena la colasa de sua governa de aliadas en un disputa sur migra, inisiada par la aseta par Deutxland de plu ca milion migrores e refujadas en 2015.

Pos la resultas povre de sua partito en elejes rejional en 2018, Merkel ia anunsia ce el va renunsia sua posto como presidente de la partito, un posto cual el ia ocupa tra 18 anios.

2018-12-30

Voterias en RD Congo abri per un eleje tensada

Vota ia comensa en la pais du de la plu grandes de Africa, en un eleje retardada per plu ca du anios.

Cuasi 40 milion persones pote vota en la Republica Democrata de Congo, do presidente Joseph Kabila renunsia sua posto, cual el ia ocupa de 2001.

Ma la tempo ante la eleje ia es afetada par violentia e controveria sur la deside de esclui cuasi 1,3 milion persones de vota. Ier, la aspirores oposante ia fali ance acorda un declara intendeda per redui la tensa.

Si tota va pasa sin mal avenis oji, esta va es la traversa pasosa prima de potia en RD Congo pos sua autonomi de Beljia en 1960.

Kabila ia prende la potia de sua padre asasinada en 2001, ma la constitui proibi el de aspira un plu periodo en la posto.

La intende ia es ce el renunsia a du anios ante aora, ma on ia pospone la eleje cuando la comision elejal ia dise ce lo nesesa plu tempo per rejistra votores.

La deside ia provoca scaramuxas violente, con ce la oposores ia acusa Kabila de atenta reteni la potia.

En la semana pasada, la eleje ia es denova posponeda, per sete dias, par causa de problemes en prepara la voterias. Esta ia segue pos cuando miles de macinas eletronical de vota, usada a la ves prima, ia es destruida en un focon en la capital, Kinshasa.

En esta semana, vota en tre distritos ia es retardada asta marto. La comision elejal ia culpa nonsecuria e un eruta de la virus ebola.

Par resulta, sirca 1,2 milion persones no va pote vota oji. En efeto, la deside ia cansela sua votas, car la presidente nova va es inaugurada per la media de janero, an tal.

Un fola ia ataca un clinica de ebola en la este de la pais pos la anunsia.

2018-12-29

Un proibi de focos artal a la Isolas Galapagos

Sur la Isolas Galapagos, on ia proibi la vende e usa de focos artal, per proteje la animales unica de la arcipelago. Focos cual produi lus sin sona es escluida de la proibi.

Conservores dise ce animales ia sufri de rapidias altida de cor, trema e ansia pos avenis pirotecnical.

Miles de persones visita la isolas en cada anio, atraeda par sua biodiversia e ambiente noncontaminada. La isolas es situada a sirca mil cilometres de la costa xef de Ecuador.

La autoriosas ia dise ance ce focos artal causa multe feris per anio, spesial en enfantes.

La campania contra pirotecnicales ia comensa en 2017. La regula nova proibi transporta los a la isolas e vende o usa ala los.

On ave un presa cresente a la governa ecuadoran afin lo fa plu per proteje sua ecosistemes sensosa. Plasticas de un sola usa es ance proibida sur la isolas, cual ave un popla de 25 mil persones.

La spesies nativa de la Isolas Galapagos, incluinte iguanas e tortugas, ia fa un rol major en la developa de la Teoria de Evolui par Charles Darwin.

2018-12-28

Datos de abandonores de Corea Norde es esposada

Cuasi 1000 abandonores de Corea Norde ia esperia un esposa de sua datos personal pos un ataca contra un computador a un sentro de relocali en Corea Sude.

On ia trova ce un computador personal a la sentro, manejada par la governa, ia es “infetada con codigo malvolente”.

La identia de la atacores e la orijina de la siberataca es ancora no clar.

A multe veses, Corea Norde ia menasa silenti abandonores en la Sude ci fa declaras degradante contra la governa.

Ma a esta ves, la governa en la Sude no ia indica Corea Norde como suspetada, an si multe espertas de sibersecuria averti ja sur la sofistica cresente de atacores de la Norde.

Un de la atacas la plu famosa liada a Corea Norde en anios resente ia es contra la comersia de diverti de Sony en 2015. Acel ataca ia destrui cuantias enorme de informa e ia distribui enlinia epostas e datos personal delicata.

2018-12-27

Abitores evacuada de un tore fesurida en Sydney

En Sydney, Australia, sentos de persones ia debe parti de un tore de apartes a la ves du, pos la apare de un fesur en sua mures a lundi.

La Tore Opal ave 38 niveles. Multe de sua abitores ia reinstala ja se pos la alarma inisial, cuando on ia oia ruidos forte e la fesur ia es descovreda.

La compania Icon cual ia construi la tore ia dise ce lo resta “en bon state strutural” e ce la reloca es mera un proteje per permete ce injeniores e investigores labora a 24 oras per dia.

Icon ia clari ce nun es en peril, ma la reloca de persones va aida los a repara la tore en tempo tan corta como posible, sin plu disturbas a la abitores.

A ante, ofisiores ia dise ce sola 51 de la 392 apartes de la tore es afetada. La construida nova en la Parce Olimpial de Sydney ia es declarada como secur per la reveni de la plu de abitores.

A lundi, la polisia ia evacua sirca 3000 persones cuando un mur de suporta interna ia fali a la nivel 10 de la construida.

Icon ia confirma ce un panel premoldida de beton ia fesuri. Un ecipo de injeniores de Icon e la developores Ecove esamina aora la construida, cual ia es completida en la parte plu temprana de esta anio.

Ier, la governa de Cimri Sude Nova ia dise ce lo investiga ance la solidia strutural de la construida e de tores abital visina.

Jornalistes local ia publici fotos de la dana a la construida, mostrante jeso nonfisada e mures desintegrante. Ma Ecovre ia defende la “cualia alta” de la construida, cual lo ia descrive como supra la norma de la industria.

Icon ia dise ce abitores va debe cisa abita estra sua apartes per asta 10 dias. Tota abiterias tempora va es furnida par la compania.

2018-12-26

Un cade de elicotor en Mexico mata un governor

Un governor mexican ci ia es inaugurada en la plu temprana de esta mense, e sua sposo ci ia es un senator, ia mori en un cade de elicotor en Puebla, un stato en la sentro de la pais.

La veculo portante Martha Erika Alonso e Rafael Moreno Valle ia cade corta pos sua enaira.

La du pilotes ia es matada. On reporta ce un pasajor tre ia mori ance.

Ofisiores dise ce la elicotor ia sufri cisa un fali nonspesifada. On ia inisia un investiga.

Alonso ia ave 45 anios. El ia es inaugurada a 14 desembre como la governor fema prima de la stato, pos un eleje difisil ganiada.

Moreno ia servi como governor de la stato Puebla entre 2011 e 2017. El ia ave 50 anios

2018-12-25

La pape condena la mundo de materialisme

Pape Fransisco ia urje persones en paises developada a un vive plu simple e min materialiste.

El ia condena ance la divide vasta entre la ricas e la povres de la mundo, disente ce la nase de Jesus en povria en un stala debe fa ce cadun considera la sinifia de la vive.

El ia parla en la misa tradisional a la sera de natal en la Basilica de San Pedro en la Vatican.

“Per multe persones,” el ia dise, “la sinifia de la vive es trovada en posese, en ave un esede de ojetos material. Un avaria nonsasiable marca tota la istoria umana, an oji, cuando, paradoxal, alga persones come lusosa an si la pan dial nesesada per survive manca a tro multe.”

Per Fransisco, ci ave 82 anios, esta natal es la numero ses como la xef de la Eglesa Catolica.

El va presenta oji sua mesaje “Urbi et Orbi” (a la site e a la mundo) de la balcon de San Pedro.

Fransisco, la pape prima de America Latina, ia atrae atende a la povria como un tema major de sua papia.

2018-12-24

La monarca de Japan dise adio a un fola grande

Plu ca 80 mil persones ia es presente cuando Imperor Akihito de Japan ia fa sua parla final a sua aniversario de nase ante sua renunsia.

La imperor, ci ave 85 anios, ia dise ce el senti "un comforta profonda" ce sua rena ia pasa sin ce Japan engrana denova a gera.

El ia deveni emosiosa en grasia la popla de Japan e sua sposa Imperoresa Michiko per sua suporta.

Akihito es la monarca vivente prima ci renunsia la trono de crisantemo en cuasi 200 anios. El ia reseta sirurjia de cor e ia es tratada per canser de prostata. El va es segueda en april par sua fio la plu vea, Prinse Naruhito.

Sua rena de tre desenios es conoseda como la eda Heisei, cual sinifia "ateninte la pas" en japanes.

En sua parla corta, Akihito ia ofre ance compatia a persones japanes ci ia perde familianes o ia sufri dana – un refere a la tremateras, tempestas e ondas de caldia cual ia afeta la pais en la anio pasada.

Sua posto es ritual e el ave no potia political, ma tra la plu de sua rena, Akihito ia sperde un consensia de la atas de Japan en la Gera Mundal Du en la rena de sua padre, Imperor Hirohito.

El ia espresa regrete sur la atas militar par Japan en Xina e la penisola corean, e ia visita ance alga campos de batalia pasifica per onora la mores. Esta atas ia pone el en desacorda con grupos destriste en Japan.

Ante sua aniversario, Akihito ia comenta: “Lo es importante ce on no oblida ce vives noncontable ia es perdeda en la Gera Mundal Du … e ce on pasa esta istoria en modo esata a persones naseda pos la gera.”

2018-12-23

Un tsunami en la Streta Sunda pos un eruta volcanal

En Indonesia ier, a la min 168 persones ia mori e 745 ia es ferida cuando un tsunami ia ariva a la costa de la Streta Sunda, entre Sumatra e Djava.

Ance sentos de construidas ia es destruida. La causa ia es cisa un lisca de la fondo de mar pos la eruta de la volcan Anak Krakatau.

Temente un plu tsunami, la departe de maneja desastres ia averti ce la popla debe resta distante de la costa.

On reporta moris en la rejiones Pandeglang, Lampung e Serang. La cuantia de persones mor en Lampung es cisa plu ca sento.

Videos distribuida en redes sosial mostra la ariva subita de un ondon a un tenda en Lampung, do un bande roc popular, Seventeen, ia es presentante. Membros de la bande ia es puxada a via cuando la ondon ia destrui la stadio.

Un cantor de la bande ia dise ce sua basiste e sua organizor de turi ia mori, e ce tre otra membros de la bande e sua propre sposa es mancante.

La Crus Roja xerca vitimes en la detrito de construidas colasada.

On investiga esce la tsunami ia es causada par Anak Krakatau, un isola volcanal en la streta liante la Mar Djava a la Mar Indian.

Cuando volcanes eruta, magma calda puxa se su la tera e pote desloca e penetra roca plu fria. Esta pote causa un lisca de tera.

Ma car un parte de esta volcan es su la acua, cisa la fondo de mar ia lisca, levante un tsunami.

Anak Krakatau ia deveni plu ativa en menses resente. Lo ia eruta tra 2 minutos e 12 secondos a venerdi, creante un nube de sene cual ia asende a 400 metres supra la monte. On ia recomenda ce on proibi ce persones vade a plu ca du cilometres de la crater.

La mar ia es ance altida par causa de la luna plen, e lo es posible ce ance esta ia contribui a la fortia de la ondon.

La portavose per la departe de desastres ia dise inisial ce la onda no es un tsunami, e mera un ondon mareal, e el ia recomenda ce la popla resta calma. A pos, el ia demanda per pardona, disente ce la era ia aveni car on no ia esperia un trematera.

Entretempo, en la plu temprana de oji, un alarma de tsunami ia sona par era tecnical, provocante un panica vasta e nonesesada. Multe persones ia core a refujas per salva se.

Indonesia es propensada a tsunamis car lo es situada a la Sintur de Foco, la linia de tremateras e erutas frecuente cual ensirca cuasi tota la Mar Pasifica longo sua borda.

En setembre, plu ca 2000 persones ia mori cuando un trematera forte ia aveni prosima a la isola Sulawesi, creante un tsunami cual ia ruina Palu, un site a la costa.

A 26 desembre 2004, un serie de ondones jigante, jenerada par un trematera potiosa en la Mar Indian, ia mata sirca 228 mil persones en Indonesia e des-tre otra paises.

Tsunamis causada par ativia volcanal es min frecuente.

2018-12-22

Un airoporto brites es disturbada par avionetas

En Britan, on ia aresta un om e un fem en relata a un serie de avionetas cual ia para la funsiona de la Airoporto Gatwick en London. La du ia es arestada en acel rejion a sirca 22:00 ier.

Per plu ca un dia, aviones ia es proibida de vola, car on ia oserva avionetas en la sielo prosima a la atereria.

La polisia ia dise ce los continua sua investiga sur “la usa criminal de avionetas”. Los demanda per informas de la popla.

La airoporto ia declara ce sua atereria va es oji abrida, ma ia recomenda ce pasajores regarda la state de sua vola ante viaja.

Polisiores resta a la airoporto, preparada per “deteta e lejeri” cualce plu volas de avioneta, par stratejias diversa. On ia solisita ce pasajores e abitores local resta vijilante e reporta sua suspetas.

Gatwick ia reabri a la matina ier pos disturbas a desuples de volas cual ia afeta plu ca 100 mil viajores.

La atereria ia es denova cluida per un tempo corta pos un plu oserva confirmada a 17:10. Un portavose ia dise ce la reabri es secur car on ia institui metodos militar sirca la campo de vola.

Des-un aviones arivante ia es diverjeda a otra airoportos en la clui la plu resente. Aviones partinte va esperia un retarda cumulada, ma zero de los es canselada, a la min longo la declara ofisial.

2018-12-21

Un gitariste jaz jua tra sua sirurjia serebral

Un musiciste jaz de Sudafrica, ci ia jua sua gitar en sua sirurjia serebral, recovre bon.

Musa Manzini ia resta veliada tra la opera de ses oras, partal per conserva e restora la move de sua ditos. La deside ia es fada “considerante mea carera como musiciste”, longo la multistrumentiste e ensenior de universia.

La prosede ia aveni a la ospital Chief Albert Luthuli en la site costal Durban.

Un video de la sirurjia mostra Manzini ci toca lejera sua gitar sur la table de opera, en cuando medicistes atende el.

La opera ia es fada en la semana pasada par un ecipo de neurosirurjistes, gidada par Dr Basil Enicker e Dr Rohen Harrichandparsad.

Manzini ia dise ce la tumor recorente en sua serebro es relatada a un disturba neurolojial cual el sufri ja de 2006.

Enicker ia esplica ce en esta caso on ia prefere fa un opera veliada ca usa un anestesente jeneral. “Tal, nos pote proba rejiones de la serebro ante la sutrae. Esta permete un sutrae aumentada de la tumor, e minimi la dana a la serebro,” el ia dise.

Dotores ia desira minimi la risca de paralise o perde de funsionas en la cortex de move, la parte de la serebro cual controla moves voleda.

Manzini ia comenta ce el es grasiosa per sua trata, ajuntante: “Me no crede ce nos reconose sufisinte la valua de nosa instituidas publica de sania.”

La musiciste campionida ia dise ance ce el desira apare denova sur stadios pos completi sua recovre.

2018-12-20

Un xica nederlandes fusilida en un cabana de bisicles

En Nederland, studiantes, enseniores e familias en la site Rotterdam ia espresa sua xoca pos la mori de un studiante fema de 16 anios ci ia es fusilida a sua scola.

Humeyra Öz ia es atacada en la cabana de bisicles a la Scola de Desinia, corta pos la fini de sua lesones a la posmedia de martedi.

Un om de 31 anios ia es arestada. La amis de la xica ia dise ce el ia separa de la om a alga tempo pasada e ia cexa ce la om ia menasa el.

La polisia ia confirma ce la xica ia conose la suspetada, ma no ia dona plu detalias.

La scola ave sirca 300 studiantes. Alga de los ia es en la cabana a la tempo de la fusili, e los ia vide lo cual ia aveni.

E la vitim e la suspetada es descriveda como membros de la comunia nederlandes-turces, e la consul turces ia visita la scola ier.

Costudiantes ia es xocada par la mata, e jenitores ia espresa ansia sur securia.

Un ami de la vitim ia dise: “El ia es un bon xica bela e intelijente. Nos es ancora vera asustada. Como lo ia pote aveni?”

La xef de la scola ia dise ce el no pote discute cualce menasas contra la vitim, car acel pertine a la investiga par la polisia. Ma el ia insiste ce la securia de la scola no es dutada. “Esta relata a un person plu vea ci entra subita a un scola,” el ia dise. “Esta no es un prison.”

La maior de Rotterdam ia dise ce on debe no regarda la ataca como un fusili en scola, ma ce lo ia envolve un om demente ci ia ta pote fa la ataca en cualce loca. El ia espresa la espera ce la situa va revade a normalia pos la vacanse de natal.

Humeyra Öz ia comensa conose la suspetada, identifiada como Bekir E, en Facebook a du anios ante aora. Ance en acel loca de rede el ia fini sua relata.

Amis ia dise ce la xica ia es prendeda a scola par sua padre par causa de la menasas contra se.

Un cusin ia comenta: “Sua familia ia vade an per parla a la familia de la om. Los ia dise ce el es tro joven. Ma la om la continua presa e menasa el.”

La cusin ia ajunta ce la familia ia rejistra un cexa contra la suspetada a sirca un anio pasada, e ce el ia es resente condenada a du anios en prison. Avocatos ia confirma la condena resente de la suspetada, e ce el ia es supravideda en libria oservada, sin spesifa la acusa.

2018-12-19

Vanuatu usa un avioneta per distribui medisin

Un bebe sur un isola peti en la Mar Pasifica ia deveni la person prima ci reseta un vasin traeda par un avioneta comersial.

UNICEF ia organiza la vola de la avioneta tra 40 cilometres de montania ru cual on pote traversa rapida en no otra modo.

Sirca 20% de enfantes en Vanuatu no reseta vasinis importante car la furni de los es tro difisil. La reserva NU per enfantes espera ce la furni par avioneta va deveni multe importante en locas distante.

Sua dirijor Henrietta Fore ia dise: “La vola peti par avioneta oji es un avansa grande per la sania global. Car la mundo luta ancora per imuni enfantes la plu difisil atenable, tecnolojias de avioneta pote muta la situa e traversa la distantia restante per ateni cada enfante.”

An si avionetas es ja usada per furni medisin, UNICEF dise ce esta ia es la ves prima de mundo ce un pais ia contrata un compania comersial de avionetas per trae vasines a locas distante.

Du companias ia compete per la projeta de Vanuatu. Swoop Aero de Austraila ia gania la contrata pos esperimentas susedosa en la plu temprana de esta mense.

Sua avioneta ia porta la vasines en un caxa de polistiren con pacos de jelo e un rejistrador de temperatur. Lo ia vade a un vileta distante sur la isola Erromango, de Baia Dillon en la ueste a Baia Cook en la este.

Ala, la medisin ia es usada par Miriam Nampil, un curor local, per vasini des-tre enfantes e sinco femes ensinta.

Sin avioneta, Baia Cook es asedable sola par pede o barco, ma ambos posibles ocupa oras, en contrasta con la 25 minutos usada par la viaja de la avioneta a la vileta.

On nesesa ance manteni furnis medical a temperatur fria.

“Lo es estrema difisil si on debe porta caxas de jelo per manteni la fria de la vasines en pasea a traversa de rios, montes, pluve e cornisas de roca,” Nampil ia comenta. “Car la viaja es frecuente longa e difisil, me pote vade ala a sola un ves per mense per vasini enfantes. Ma aora, con esta avionetas, nos pote espera ateni multe plu enfantes en la partes la plu distante de la isola.”

2018-12-18

Un xasor de servos es condenada a regarda Bambi

En la SUA, un xasor nonlegal ia es comandada a regarda la filma Bambi a multe veses, como un parte de sua condena per mata sentos de servos.

David Berry minor, de la stato Missouri, debe regarda la filma a minima un ves per mense en sua prisoni per un anio.

El ia es arestada en agosto con du membros de sua familia per mata la servos, prende sua testas e abandona sua corpos a putri. La caso es un de la plu grandes de xasa nonlegal en la istoria de la stato.

En ajunta a la condena de prisoni, la judor ia comanda Berry a “regarda la filma Bambi de Walt Disney, con la regarda prima a o ante 23 desembre 2018 e a la min un tal regarda en cada mense seguente".

La anima sur animales de foresta, creada en 1942, mostra la mata de la madre de Bambi, la servo eponim, par un xasor.

Un investiga tra un serie de menses e un serie de statos ia ave como sua resulta la aresta de Berry minor, sua padre David Berry major e sua frate Kyle Berry.

On no sabe la cuantia intera de servos nonlegal matada, ma un conservor ia dise ce lo pote es “alga sentos”.

Berry minor ia reseta un condena de un anio en la prison de Lawrence County pos confesa se como culpable de matas nonlegal de animales.

El ia reseta ance un condena de 120 dias en la prison de Barton County per un viole de regulas de sua libria oservada, car el ia posese un fusil. Ance, la Comision Conservante de Missouri ia cansela la diretos de xasa de el e sua padre per la resta de sua vives.

2018-12-17

Mexico inisia un projeta grande de ferovia

La presidente de Mexico, Andrés Manuel López Obrador, ia inisia la Tren Maia, un projeta aspirante per construi un ferovia tra sinco statos en la sude-este de la pais.

A un rituo nativa, prosima a la ruinas maia antica de Palenque, el ia dise ce la projeta va aida la crea de sentos de miles de empleas.

La ferovia va ave un longia de 1525 cilometres. Lo va lia Palenque a la vacanseria Cancún a la costa caribe.

Ma oposores averti ce lo risca dana la biosfera importante de la rejion. Un tri de la via projetada pasa tra jungla nondevelopada, e la posesores de acel tera, la popla maia, dise ce on no ia consulta los.

López Obrador ia pone la consernas de ambientistes a lado, prometente ce “nos no va desplanta an un arbor”.

On previde ce la projeta de cuatro anios va custa asta 7,4 mil milion dolares.

2018-12-16

La acorda de Katowice sur la acorda de Paris

Negosiores en Polsca ia ateni final un acorda sur medias diversa cual permete ce la acorda climal de Paris comensa opera en 2020.

Disputas sur mercatos de carbono ia menasa la confere de du semanas, e ia estende lo par un plu dia.

La delegadas crede ce la regulas nova va serti ce paises onora sua prometes de redui emetes de carbono. La acorda de Katowice intende reali la gol de Paris de preveni ce la temperatur global crese par plu ca 2°C.

La acorda ia es suscriveda par 196 paises. Lo defini un scema per regulas comun per tota paises, governante la detalias de redui emetes, finansiante nasiones plu povre, e sertinte ce cada pais fa lo cual lo debe.

Defini la regulas es un prosede multe tecnical, car paises ave frecuente scemas diferente per sua reduis de emetes.

Paises plu povre desira alga flexablia afin los no deveni inondada par regulas cual los no es capas de reali. La idea de culpablia legal per la causa de cambia climal es ja longa rejetada par nasiones plu rica, cual teme paias enorme en la futur.

La negosias ia es menasada par un nonprogresa entre Brasil e otra paises sur la regulas per monitori creditos de carbono. Brasil ia desira regulas plu debil sur mercatos de carbono, an contra un oposa forte par multe otra paises. On ia deside pospone esta discutes asta la anio veninte.

En la fini de semana pasada, siensistes e delegadas ia es xocada cuando la SUA, Arabia Saudi, Rusia e Cuait ia oposa dise ce la confere “bonveni” un reporta resente par la Nasiones Unida sur manteni la crese de temperatur su 1,5°C. La reporta ia indica ce la mundo vade en dirije a un crese plu simil a 3°C en esta sentenio.

Par compromete, la declara final de la confere ia bonveni la completi de la reporta e ia invita paises a usa lo.

2018-12-15

Persones es ferida en un desreli de tram en Portugal

Dudes-oto persones ia es ferida en Lisbon cuando un tram ia desreli e deveni inversada.

La plu de la feridas ia es prendeda a ospital pos la asidente ier, ma no person ia es en state grave.

La tram ia salta de la reles a un curva a basa de un colina presipe, e ia colpa un construida. Pasores ia salva un bebe de ses menses e un enfante de sete anios.

La asidente ia aveni a sirca 18:00 en la parte Lapa de la capital portuges. 26 persones ia nesesa es ospitalida, e du ia es tratada a la loca de la tram. Alga persones ia es ferida a sua peto o fas.

Un atestor ia dise ce el ia oia un pum e persones xiliante cuando la tram ia fali para a la angulo e ia desreli se.

La servis de crise ia responde par envia sirca 30 veculos per aida.

La compania operante la trames, Carris, ia confirma la desreli ma ia dise ce on ia ave sola feris “minor” a 28 persones. Lo ia dise ance ce lo va fa un investiga completa per determina la causa de la asidente.

2018-12-14

Un tempesta destruosa prosimi a Australia norde

En Australia, on averti sur un siclon potiosa cual vade en dirije a la costa de Queensland.

Siclon Owen move lenta supra la acua prosima a la Teritorio Norde, con ventas de asta 200 cilometres per ora. On previde ce lo va intensi e ateni la tera en la temprana de saturdi.

La servis de crise ia envia multe plu empleadas a vilas longo la via espetada de la tempesta.

Meteorolojistes previde ce la siclon va viaja de la Golfo Carpentaria a la costa este de Queensland, portante ventas destruosa tra sentos de cilometres de tera.

Partes de la stato va reseta asta 400 milimetres de pluve en la dias veninte. Deluvias subita e mareas de tempesta es prevideda. On recomenda ce abitores resta en casa.

Australia esperia frecuente un clima estrema, con inondas, tempestas de arena e periodos tro seca en alga rejiones.

En novembre, Queensland ia sufri focones savaje cual ia obliga evacua miles de persones.

2018-12-13

Un leopardo mata un monce meditante

Un monce ci ia medita en un foresta en la stato Maharashtra en Barat ia mori atacada par un leopardo.

La om, Rahul Walke, ia medita su un arbor en la foresta Tadoba, un conserveria de tigres. El ia parteni a un templo budiste en la foresta, ma ia pasea a un loca alga distante de lo per medita.

Ofisiores de la foresta dise ce los ia averti la monces contra vaga tro profonda en la conserveria.

Ma on intende aora catura la leopardo. Forestores ia prepara du cajes e un trapa fotografial, e va atenta calmi la animal.

Ofisiores de la stato ia dise ce la familia de Walke va reseta 1,2 milion rupis ($17 mil) de compensa.

Un monce de la mesma templo ia dise ce el ia vide la ataca de Walke par la animal cuando el ia visita sua loca de medita per dona comedas a la matina de ier. El ia vade per trae aida, ma cuando el ia reveni con otra persones, Walke ia es ja mor.

On estima ce 88 tigres abita la conserveria Tadoba. Lo conteni ance multe otra animales diversa, incluinte leopardos, ursos labiosa, ienas, e rateles.

2018-12-12

Un fusilor mata a un mercato de natal franses

Frans ia avisa un nivel masima de vijila, car la polisia xerca un fusilor ci ia spara a un mercato de natal en la site Strasbourg, en la este de la pais.

Tre persones ia es matada e des-tre ia es ferida, oto a grado grave.

La fusilor ia fuji, ma on reporta ce el mesma ia es ferida. El ave 29 anios e es conoseda a la polisia como un estremiste suspetada.

Sirca 350 polisiores es envolveda en xerca el, e la departe contrateroriste franses ia inisia un investiga.

La ministro de internas ia dise ce la pais ia fa un avisa de ataca urjente, tal estendente la potias de la polisia e creante la grado la plu alta de vijila.

El ia ajunta ce la controlas de frontera es fortida e ce la securia a tota mercatos de natal va es aumentada.

La maior de Strasbourg ia dise ce oji la mercato va es cluida e banderas a la ofisia de site va es basida a altia media.

2018-12-11

Du monces fura mone per fa juas de fortuna

Du monces fema ci ia labora en un scola catolica en California ia confesa fura sirca $500 mil per aposta en casinos en Las Vegas.

Mary Kreuper e Lana Chang ia prende la mone de un conta cual ia conteni paias per instrui e otra donadas. Los ia jubila resente.

Kreuper ia es xef de la scola tra 29 anios, e Chang ia labora como ensenior tra sirca 20 anios. On crede ce los ia fura la mone tra minima un desenio, per spende lo en viaja e juas de fortuna.

Ier, sua eglesa ia dise ce la monces ia espresa “un repenti profonda” sur sua atas. La organiza ia ajunta ce la polisia es informada, ma ce on no va fa acusas criminal contra la duple.

La ordina de la monces, la Sores de San Josef de Carondelet, ia declara: “La monces ia confirma la froda de mone e ia coopera en la investiga. Nosa comunia es consernada e tristida par esta situa e regrete cualce dana a nosa relata longa con la familias de la scola.”

La arcibispia de Los Angeles ia dise ce la eglesa ia descovre la manca de la mone en un esamina normal.

Lo pare ce la monces ia pote asconde sua atas par depone alga xeces, paiada a la scola, a un otra conta de banco cual la scola no ia usa.

2018-12-10

Trump promove carbon a la confere de clima

Representores de la Casa Blanca ariva oji a discutes climal en Polsca, ma los va promove la usa de carbon e otra combustables de fosil.

La consenta aveni con ce investores, ci maneja 32 milion milion dolares de ativas, urje la fini de la usa de carbon como fonte de enerjia. Entretempo, ministros de sirca 130 paises ariva per atenta dirije la discutes a un conclui susedosa.

Como a la asembla en Bonn en la anio pasada, la Casa Blanca de Trump desira mostra un suporta forte per combustables de fosil.

Longo un declara par la ministreria SUA de esternas, la aveni “va esibi metodos de usa combustables de fosil en modo tan limpa e nonperosa como possible, e ance la usa de enerjia nucleal sin emetes”.

La aveni en Bonn ia es disturbada par protestores cantante ci ia vole indica ce la promove de carbon e gas no es bonvenida.

On dise ce la declara par investores global, publicida en Katowice, Polsca, es la interveni la plu major par investores a la tema de temperatures altinte. Lo representa alga de la reservas la plu grande de mundo.

La supravidor de la Reserva Comun de Jubila de la Stato York Nova, ci es encargada con un reserva pensional de 207 mil milion dolares, ia comenta: “An con la politicas malgidada de la governa de Trump, laboras global continua per trata la menasa multe real cual la risca climal presenta a la economia, mercatos finansial e revenus de investi. Nos resta dedicada a suporta la goles climal de la Acorda de Paris.”

Un disputa major sur siensa ia eruta en la fini de semana e ia mali la relata entre alga delegadas en Polsca.

Negosiores de la SUA, Arabia Saudi, Rusia e Cuait ia refusa “bonveni” la reporta sur 1,5°C par la Comite Intergovernal sur Cambia de Clima, cual la majoria vasta de paises ia desira pone a la sentro de la negosias.

Esta disposa ia coleri rexercores e campaniores, ci ia descrive lo como “un nonsabe intendeda e un iniora nonasetable”.

Un oservor ia comenta: “La mundo ia vide la lansa de la reporta par la CICC, e on ia comprende ce nos nesesa fa plu, ata plu rapida e plu forte e plu rapida aora. La reata no va es bon si nos fali bonveni acel siensa.”

La ministros va atenta acorda la temas restante en la regulas per la Acorda de Paris. Ma on ave ance un senti ce los debe esede acel gol e ofre plu determina per ataca la problem.

2018-12-09

Pesos de un mosaica es redonada a Turcia

Fratos mancante de un mosaica antica, conoseda como la Xica Romani, es aora esibida en un museo en Turcia. Los ia es retraeda de la Statos Unida.

On esibi los prosima a la mosaica noncompleta de un xica joven, cual ia es creada a cuasi 2000 anios en la pasada.

Sua oios meamorable ia deveni un simbol de la site sude Gaziantep.

La pesos mancante ia es contrabandada de Turcia en la desenio de 1960 e comprada par un universia en la SUA, cual ia acorda final redona los.

Arceolojistes ia descovre la mosaica a 20 anios ante aora, cuando los ia escava la ruinas de la site Zeugma, fundida par un jeneral de Alexandro la Grande e destruida en la sentenio 3.

Ma an alora, alga pesos ia es ja furada e contrabandada a estra la pais. Los ia es comprada par la Universia de Bowling Green en la stato Ohio.

En 2012, Turcia ia solisita la reenvia de la pesos, e la redona ia es acordada pos sinco anios de negosias.

Ier, la pesos mancante ia deveni esibida en la Museo de Mosaicas de Zeugma en Gaziantep, la museo la plu grande de mosaicas en la mundo.

Fatma Şahin, la maior de Gaziantep, ia dise: “La Xica Romani es reunida con sua familia.”

2018-12-08

Un mision xines a la lado distante de la Luna

Xina ia lansa la mision prima per atera un veculo robotal a la lado distante de la Luna.

La mision Chang’e 4 va atenta pone un aterador e vagador sur la crater Von Kármán, locada a la lado de la Luna cual fasa nunca la Tera. Lo abri la via de retrae samples de roca e solo a la Tera.

La atera no va aveni asta la temprana de janero, cuando la veculo va desende usante puxadores.

La crater Von Kármán interesa siensistes car lo es situada en la cualia la plu vea e grande sur la Luna – la Basin Polo Sude / Aitken, probable formida par la colpa de un asteroide enorme a miles de miliones de anios ante aora.

La ateradores va analise la jeolojia de la rejion e la composa de la roca e solo.

Par causa de un fenomeno nomida “jira sincrona”, la Tera vide sempre la mesma lado de la Luna. Esta aveni car la Luna pasa esata la mesma tempo en jira sur sua propre ase como en completi un orbita de la Tera.

An si on refere comun a la otra lado como “la lado oscur”, acel parte de la Luna es ance luminada par la Sol e ave la mesma fases como la lado cual fasa nos. “Oscur” asi vole dise mera “nonvideda”.

La lado distante aspeta alga diferente de la lado prosima. Lo ave un crosta plu densa e vea, cual conteni plu crateres. On ave ance poca de la “mares” de basaltos oscur, creada par flues de lava, cual es tan evidente sur la lado prosima.

Cisa la colpa potiosa cual la crea la Basin Polo Sude / Aitken ia penetra la crosta, ateninte la litosfera de la Luna. La strumentos en Chang’e 4 pote esamina esce esta ia aveni, clarinte un parte de la istoria temprana de nosa sola satelite.

La mision va analise ance la “radioambiente” a la lado distante, en un esperimenta desiniada per fa la labora fundal per la crea de telescopios futur de radioastronomia a acel lado, do los ta es protejeda de la ruido de la Tera.

La aterador nonmovente va porta un contenador de tre cilogrames, con semes de patata e arabis, per un esperimenta biolojial. Esta esperimenta de “minibiosfera lunal” ia es desiniada par 28 universias xines.

La desinia de la veculo es simil a lo de sua presedente, Chang’e 3, cual ia envia veculos aterante a la rejion Mar de Pluves en 2013. Ma lo ave alga alteras importante.

La aterador porta du cameras: un esperimenta sur radia, construida en Deutxland, e un spetrometre cual va fa la oservas radioastronomial de frecuentia basa.

La vagador va porta un camera panoramal, un radar per sonda su la surfas, un spetrometre imajinte per identifia minerales, e un esperimenta per esamina la interata entre la venta solal (un flue de particulas enerjida de la Sol) e la surfas de la Luna.

La mision parteni a un program xines plu grande de esplora lunal. La misiones Chang’e prima e du ia es desiniada per colie datos en orbita, e la numeros tre e cuatro ia es construida per opera sur la surfas.

2018-12-07

Un stajior de Google distribui un anunsia vacua

A Google, un era en un eserse de instrui empleores ia causa la apare de un anunsia comersial falsa en un cuantia grande de apes e pajes de rede.

Un retangulo jala vacua ia es vidable en acel locas tra sirca 45 minutos a 4 desembre, ma sola per persones en la SUA e Australia.

La era ia aveni cuando stajiores ia aprende la sistem interna de Google per compra anunsias. Esta anunsia vacua ia es enviada car un stajior ia esede la intende e ia ajunta un comanda vera a la sistem.

La anunsia ia es ativida con taso de revenu multe plu alta ca cualce otra, e ia es dirijeda tra alga sistemes de otra companias, tal ateninte un popla vasta.

Google ia declara: “Direta cuando nos ia deveni consensa de esta era onesta, nos ia labora rapida per para la sirculi de la campanias.” Lo ia ajunta ce lo va reali cualce paias cual publicores ia incore par causa de la era.

On no ia clari la custa esata de la era, ma un jornal ia divina ce lo va fa ce Google paia sirca $10 milion per sasia publicores e desmarania la situa. La compania ia dise ce lo va institui plu controlas per preveni un repete de la problem.

2018-12-06

On discute pas per Iaman en Sveria

En Sveria, on comensa consultas de pas, suportada par la Nasiones Unida, per fini cuasi cuatro anios de gera interna en Iaman.

En ecipo NU va labora con delegas de la governa iamani e la rebelores huti a la castel de Johannesberg, prosima a Stockholm, en discutes nonformal cual va ocupa un semana.

La gera ia causa la crise umaniste la plu grave de mundo en tempo resente. Miles de persones ia mori en combate e miliones ia veni cuasi a state de mori par fami.

La consultas recomensa a la ves prima pos 2016. La atentas la plu resente per un pas negosiada ia colasa en setembre, cuando la hutis no ia apare en Geneve.

On no previde un avansa major par la discutes presente. La intende xef de los es preveni un batalia forte per Hudaida, un porto a la Mar Roja do miles de siviles es trapida, car la porto es ocupada par la rebelores.

La NU espera ance crea un armatur per discute la natur de un solve political futur en la pais.

2018-12-05

Un bebe nase pos transplanta de utero mor

Dotores ia revela ce un xica bebe ia nase par un utero transplantada de un corpo mor.

La opera de transplanta ia ocupa 10 oras e ia aveni en 2016 en São Paulo, Brasil, do on ia fa ance la aida de fertilia. La madre, ci ave 32 anios, ia nase sin utero.

On ia fa 39 transplantas de utero usante un donor vivente, incluinte madres ci dona sua utero a sua fia, produinte 11 bebes. Ma tota la 10 transplantas presedente de un donor mor ia fali o aborta.

En esta caso, la donor ia es un madre de tre enfantes a media de sua desenio sinco, ci ia mori par emoraje serebral.

La resetor ia ave un sindrom cual afeta sirca un fem en cada grupo de 4500 e preveni la formi normal de la vajina e utero. Ma sua ovarios ia funsiona, e dotores ia pote estrae ovos, fertili los con la spermas de la padre futur, e jela los.

La fem ia prende drogas per debili sua sistem imunial e preveni ce sua corpo ataca e rejeta la transplanta.

Pos sirca ses semanas, el ia comensa menstrui. Pos sete menses, la ovos fertilida ia es implantada. E pos un ensintia normal, un bebe de 2,5 cilogrames ia es parida par sesarea a 15 desembre 2017.

La xef de la rexerca, Dr Dani Ejzenberg de Hospital das Clínicas en São Paolo, ia dise: “La transplantas prima de utero de donores vivente ia es un monumento en medica, creante la posiblia de pari per multe femes nonfertil ci pote asede donores conveninte e la recursos medical nesesada. An tal, la nesesa de un donor vivente es un constrinje major, car donores es rara: tipal, los es familianes o amis volente e cualinte.”

2018-12-04

Un avocato defendente ia es un informor de polisia

La condenas de alga de la criminores major de Australia es aora dutada pos la desmasci de un avocato como un informor de polisia.

La avocato defendente, ci ia representa figures malfamosa de crimin organizada, ia dona informas a la polisia de Victoria entre 2005 e 2009. La governa de la stato ia anunsia un investiga publica per determina cuanto condenas ia es direta afetada.

La caso ia es revelada cuando restrinjes judal ia es sutraeda ier. Esta ia es la fini de un batalia de corte en cual, tra du anios, la polisia ia atenta preveni la esposa de la identia de la avocato a sua clientes. La Corte Alta ia deside contra la polisia.

En un judi despetosa, la corte ia dise ce la polisia de Victoria ia es culpable de “un condui odiable” par coraji la avocato a furni informas sur sua clientes.

La avocato, un fem ci on no pote nomi per razonas legal, ia representa figures major en la criminalia de Melbourne en un periodo de violentia aumentada de ganges. Un disputa violente cual ia prende a la min 28 vives en la site ia fini a plu ca un desenio ante aora, ma detetores dise ce un tensa resta ancora.

A cada dia, la avocato ia contata la polisia e ia reseta la nom sifral 3838.

Documentos mostra ce la polisia ia atenta preveni acusores de avisa la omes condenada sur la rol de sua propre avocato como un informor. Ma par causa de la deside par la Corte Alta de sutrae restrinjes sur la caso, criminores va reseta aora un letera sur la situa. Los va pote alora apela, e sua condenas va es cisa reduida o an canselada.

La xef de la polisia de Victoria ia defende ier la usa de la avocato como informor: “Melbourne ia es saisida par lo cual on conose aora como la geras de gang. La risca per la comunia a esta tempo ia es notable.”

El ia ajunta ce, en 2009, la polisia ia cambia sua modo de trata informores, e un aveni simil no ta es posible aora.

2018-12-03

La clima sta a un crus de vias

Cuatro persones major ci suporta laboras per limita la cambia de clima ia averti ce la planeta sta “a un crus de vias”, cuando un consenta importante ia abri en Polsca.

En un ata rara, cuatro presidentes pasada de esta confere, sponsorida par la Nasiones Unida, ia recomenda ata nonvasilante.

La consenta en Katowice es la plu importante sur la cambia de clima pos la acorda de Paris en 2015. Espertas dise ce la mundo nesesa redui estrema sua emetes si lo vole ateni la goles acordada en Frans.

Negosiores ia asembla per la confere a un dia plu temprana ca espetada, car on presa los a progresa.

Entretempo, la Banco Mundal ia anunsia 200 mil milion dolares de finansia tra sinco anios, per suporta paises cual ata contra la cambia de clima.

Esta confere de la partitos acordada es la prima cual ia aveni pos la apare en otobre de la reporta major par la Comite Intergovernal sur Cambia de Clima, cual ia discute la problem de limita la aumenta de temperatur global a 1,5°C.

Acel reporta ia dise ce per ateni la gol, governas va debe redui emetes de gases invernerial par 45% ante 2030. Ma un studia resente ia mostra ce aora la emetes de diosido de carbono alti denova pos un reposa de cuatro anios.

Ier, cuatro presidentes pasada de la confere ia publici un declara urjente. Los ia dise ce “atas desidente en la du anios veninte va es esensal”.

Ma la divide ia es nunca plu larga entre lo cual paises dise ce los fa e lo cual nesesa es fada.

29 xefes de stato e governa va presenta declaras a la comensa de la consenta. Esta cuantia es multe min ca en Paris a tre anios ante aora, cisa indicante ce multe regarda la confere como mera un punto longo la via e no un crus major.

Ma per Xina e la Uni European, la confere es multe importante. Los vole mostra ce la coopera internasional pote susede ancora, an en la eda de Presidente Trump.

2018-12-02

Gas lacrimojen contra protestores en jacetas jala

En Frans, en un fini de semana tre de protestas en “jacetas jala”, persones ia asende la Arco de Vinse en la sentro de Paris, e scaramuxas ia continua con polisiores de tumulta.

La polisiores ia spara gas lacrimojen, granadas aturdinte e canones de acua sur la Champs-Élysées, e protestores ia lansa misiles e ia ensende construidas.

A la min 110 persones ia es ferida, incluinte 17 membros de la fortes de securia, e on ia fa 270 arestas.

La protestas sur la imposta de carburante ia crese a un coleria jeneral sur la custa alta de vive. Emmanuel Macron, presidente de Frans, dise ce sua politica de carburante es nesesada per combate la caldi global.

Un person ia es state grave pos la destrui par protestores de un porton de fero a la jardin Tuileries, prosima a la museo Louvre. La porton ia cade sur un grupo de persones.

On ia fura ance un fusil de ataca de un veculo de polisia, ma lo no es clar esce lo ia es cargada.

La ministreria de internas franses ia dise ce, tra la pais intera, a la min 75 mil persones ia partisipa en la protestas la plu resente de jacetas jala. La protestas ave acel nom car la partisipores porta la jaceta de vidablia cual, par lege, es presente en cada veculo.

On ia estingui cuasi 190 focones, e ses construidas ia es ensendeda.

En la confere G20 en Buenos Aires, Macron ia responde ce la protestas “ia pertine en tota no modo a un esibi pasosa de un nonfelisia o noncontentia legal.” El ia ajunta ce la culpables no desira cambias, ma intende crea un caos.

2018-12-01

La mori de Bush major e la vive de la Obamas

George H W Bush, presidente pasada de la SUA, ia mori con 94 anios. El ia servi como la presidente 41 entre 1989 e 1993. Sua periodo ia es definida par la fini de la Gera Fria e par la gera prima contra Saddam Hussein en Irac.

An si el ia es min sana en anios resente, el ia susede ancora apare publica. En april, el ia vade a ospital con infeta de sangue, ma ia es desospitalida a pos. El ia mori a sete menses pos sua sposa, Barbara.

En un otra anunsia de la SUA, la autobiografia de Michelle Obama, dama prima pasada, ia deveni la libro la plu bonvendeda en la pais en esta anio, a sola 15 dias pos sua publici. On ia vende plu ca du milion copias en la SUA e Canada, e la publicor dise ce lo es bonvendeda ance en multe otra paises.

La libro es un fenetra a la vive personal de la Obamas ante, tra e pos sua tempo en la Casa Blanca. Sra Obama revela difisiles en sua sposia con Barack, detaliante como los ia sufri un aborta natural e ia usa la fertili en vitro per consepi ambos sua enfantes.

Sra Obama ance critica Donald Trump, la presidente presente, scrivente ce el pote “pardona nunca” Trump per “risca la securia de mea familia” sur sua defende forte de la teoria ce Sr Obama no ia nase en la SUA e donce no ia es un presidente valida de la pais.