2014-06-30

Construidas colasa en Barat

On teme ce plu ca 100 persones es ancora trapida pos la colasa de un construida en Barat sude.

A la min nove ia mori e alga otras ia es ferida a saturdi cuando la construida de 12 niveles, ancora no completida, ia cade en Chennai, en un pluve forte.

A mera alga oras plu temprana, un construida de cuatro niveles ia colasa en Delhi, la capital. Esta ia mata 10 persones, de cual sinco ia es enfantes.

Colasas de construidas no es noncomun en Barat. Per multe de los, on culpa un nivel laxe de securia e la usa de materias de cualia basa.

On ia aresta a la min du ofisiores de la compania de construi en relata a la colasa en Chennai, en la stato sude Tamil Nadu.

Ecipos de salvores, usante palas e utiles de talia, continua xerca survivores. Sirca 130 laborores es ancora su la detrito.

On ia salva plu ca 25 persones asta aora, e la polisia ia comensa un investiga.

2014-06-29

Xi Jinping promete ce Xina no va domina se visinas

Xi Jinping, la presidente xines, ia dise ce Xina va atenta nunca forsa se desiras a otra nasiones, an si lo deveni multe forte.

Xi ia parla en Beijing, ospitante gidores de Barat e Miama per un fini de semana de discutes.

Multe de la visinas de Xina es maraniada en disputas teritorial con Beijing. Los es consernada sur aumentas de spende militar par Xina e sur lo cual alga persones regarda como la autofida cresente de la pais.

La parla de la presidente ia es fada a la aniversario 60 de un acorda mutua de nonataca e noninterfere, suscriveda con Barat e Miama.

El ia dise: "Xina no junta se a la idea ce un pais debe nesesada xerca domina cuando lo crese en fortia. La domina e militarisme no es en la jenes de la xineses. Xina va xerca developa pasosa, sin diverje, car esta es bon per Xina, bon per Asia, e bon per la mundo."

E en lo cual ia pare un burla contra la Statos Unida, el ia sujesta ce la domina par potias grande es ja un cualia de la pasada. "La idea de domina relatas internasional parteni a un eda diferente, e tal atentas es destinada a fali."

Xina es fisada en disputas con alga visinas sur reclamas en la Mar de Xina Sude, e atenta oposa atentas par la SUA de aumenta se presentia en Asia.

2014-06-28

La sistem bancal de Balgaria es atacada

La banco sentral de Balgaria ia dise ce on ia fa un atenta metodosa de destabli la pais par ataca la sistem bancal. Lo ia promete usa tota se potias per proteje la reservas de sitizanes.

Asiones en bancos balgarsce ia diminui forte en la dia du en segue.

On imajina ce la esije subita per retira mone de Banco Comersial Corporada, la banco cuatro de la plu grandes de la pais, pote estende a otras.

La banco sentral ia emprende la maneja ce la Banco Comersial Corporada en la semana pasada, comentante ce se problemes es isolida.

Ance economistes ia desasentua la risca ce la problem va deveni vasta, e bancos stranjer cual ave sucompanias en Balgaria ia insiste ce se operas es secur.

Ma a jovedi, un suordinada de la partito governante ia dise ce cisa un otra banco va sufri un fortuna simil. Esta ia redui la fida, e investores ia freta per desprende se asiones de bancos balgarsce.

La banco sentral ia recomenda forte ce tota instituidas de stato ta colabora per proteje la stablia finansial, e ta fa prosedes legal contra los ci difusa "rumores falsa e malintendosa" sur la sania de la bancos en la pais.

En un developa separada, on ia anunsia 5 otobe como la data per un vota parlamental en Balgaria. Plu temprana en junio, la governa minorial de Plamen Orexarsci ia acorda resinia, pos cuando la partito sosialiste – la plu grande en la uni governante – ia fali sever en la elejes european de maio.

2014-06-27

Suarez es proibida de futbal per cuatro menses pos morde

En sporte, on ia proibi la atacor uruguaia Luis Suarez de tota ativia relatada a futbal per cuatro menses, car el ia morde un defendor italian, Giorgio Chiellini, en un max de la Copa Mundal a martedi.

En ajunta, on ia esclui el de la nove maxes internasional veninte. Esta va elimina el de la resta de la Copa Mundal.

Uruguai intende apela, descrivente la deside como "plu ca nesesada", disente ce on no ia ave atestas sufisinte per justi lo.

Plu, on ia multa la juor per 100 000 frances suiz.

Se proibi es la plu grande en la istoria de la Copa Mundal. Lo suprapasa la proibi de oto maxes cual on ia dona a Mauro Tassotti de Italia cuando el ia usa se codo per colpa forte Luis Enrique de Espania en 1994.

La presidente de la comite disiplinal de FIFA ia comenta: "La tal condui no pote es tolerada sur cualce campo de futbal, e spesial no a un max de la Copa Mundal, cuando la oios de miliones de persones regarda la stelas sur la campo."

Suarez es aora judida como culpable de morde tre juores oposante en se carera.

2014-06-26

Corea Sude reteni se ministro xef pos la desastre de naveta

Chung Hong-won, la ministro xef de Core Sude ci ia ofre resinia en april sur la desastre de la naveta Sewol, va reteni se posto.

La presidente, Park Geun-hye, ia anunsia ce el va reteni Chung, en un deside cual el ia descrive como "angusosa".

Du aspirores ci el mesma ia eleje ia atrae controversia, obligante los a retira se proposas.

La governa ia deveni forte criticada per la afonda de la naveta a 16 april, en cual sirca 300 persones ia mori.

Criticistes regarda la governa como prosedable sur la taxes urjente de responde e salva: alga persones crede ce estas no ia sufisi e ia pote salva plu vives.

La barcon ia porta 476 pasajores, de ci la plu ia es scolores.

Park ia reorganiza ja se consilio e recambia alga ministros. El ia promete ance reformi la burocratia per elimina froda e perosia.

La person prima ci Park ia proposa per la ministro xef nova ia es Ahn Dai-hee, un judor pasada de la Corte Suprema. Ma el ia es criticada sur la cuantia de mone cual el gania en la campo privata pos se jubila.

Park ia eleje alora Moon Chang-keuk, un jornaliste pasada. Ma alga persones ia acusa ce el ia favore tro Japan en se articles e comentas.

2014-06-25

Autos va flota en Israel

On va construi un rede de autos flotante en Tel Aviv. Un anelo de 500 metres va es construida a la compleso de Industrias Airospasial de Israel.

Veculos per du persones va es suspendeda de cursos alta e magnetal, furninte un alternativa de stradas conjestada.

On previde ce la sistem inisial va funsiona ante la fini de 2015, e va gida a un rede comersial.

La intende es permete ce un pasajor usa se telefoneta per comanda ce un veculo encontra el a un stasion spesifada, e vade alora direta a se destina.

La veculos inisial va ateni un rapidia de asta 70 cilometres per ora, ma on previde la esiste de veculos multe plu rapida en la fase comersial.

On projeta ance otra sistemes simil tra la mundo, incluinte en Barat e la SUA, ma estas va depende de la susede de la sistem israeli.

La sistem SkyTran ave se base a la parce rexercal de NASA en California, e on espera ce lo revolui la transporta publica.

2014-06-24

Un fem condenada a mori en Sudan es librida

Un fem sudani, ci on ia condena a mori per abandona se fida muslim, ia deveni librida de prison.

La puni de mori per Meriam Ibrahim ia es canselada par un corte de apela.

El es sposida a un om cristian. En maio, su la lege de xaria, on ia condena el a pende cuando el ia refusa renunsia cristianisme.

Se sposo, Daniel Wani, ia espeta zelosa vide el, e desira ce se familia parti de Sudan tan pronto como posible.

Meriam Ibrahim ia pari un fia en prison, no longa pos se condena. Se puni ia jenera un coleria internasional.

Se avocato, Elshareef Ali, ia comenta ce Ibrahim ia mostra "un coraje estracomun" tra se malesperia.

El ia dise ance: "Lo es un vinse per libria de relijio en Sudan. Nos crede ce nun en futur va sufri tal."

2014-06-23

Siclistes en Sarajevo recorda la comensa de la Gera Mundal Prima

Miles de siclistes, incluinte competores profesal, ia partisipa en un corsa en Sarajevo, la capital de Bosnia e Hersegovina.

Esta ia es la prima en un serie de avenis en la pais per recorda la asasina ala de Arciduxe Franz Ferdinand a sento anios ante aora, cual ia causa la Gera Mundal Prima.

La corsa ia es sponsorida par la organizores de la Turi de Frans, e ia funsiona como un comensa ritual per la Premio Grande de Sarajevo 2014, en cual 140 profesales va compete.

La via de la corsa completa ave un longia de 140 cilometres. Lo traversa locas cual ia es linias de batalia en la gera de 1992–95. Lo asende ance Monte Igman, alta de 1510 metres, cual es situada a sude-ueste de la capital e ia es un campo de batalia en la gera.

La intende de la corsa ritual de soldi ia es asembla e uni la popla, e envia un mesaje de pas e unia.

Lo es la sola aveni recordante la comensa de la Gera Mundal Prima cual es organizada en junta par ambos areas etnical de Bosnia e Hersegovina.

La aniversario ofisial de la fusili de Franz Ferdinand, eritor de la trono osteraices-magiar, va es a la saturdi veninte.

2014-06-22

Estremistes saisi plu vilas iraci longo la Eufrates

En Irac ueste, estremistes suni dise ce los ia saisi un crusa de borda e du vilas longo la rio Eufrates.

La crusa de borda a Suria, prosima a la vila Qiam, es stratejial importante. Ativistes ia saisi lo pos batalia tra un dia, matante 30 soldatos.

La rebelores ia catura ance la vilas Rawa e Aneh.

Analistes dise ce un tal campania longo la rio pote gida final a un ataca contra Baghdad de la ueste. La saisi de la crusa a Qaim pote aida la grupo estremiste ISIS (Stato Muslim de Irac e Suria) a transporta armas e otra aparatos a otra campos de batalia.

Combatosas suni ia catura areas grande de tera tra tota Irac en dias resente.

Los ia declara se catura de partes de la refineria de petrolio a Baiji, la plu grande en la pais. Los ia saisi ance un fabriceria desusada de armas cimical en Muthanna, a sirca 70 cilometres norde-ueste de Baghdad.

A saturdi, la governa ia nega denova ce estremistes ia susede asede partes de la refineria a Baiji. An tal, los ia confesa ce la armada fronti "atacas violente" par fusilores.

2014-06-21

La polisia en Xinjiang mata 13 atacores de se ofisia

En Xinjiang, un provinse ueste de Xina, des-tre atacores ia es matada en un ataca contra un ofisia de polisia. Los ia gida un auto a en la ofisia e ia usa esplodentes a la matina de saturdi.

Tre polisiores ia sufri feris minor, ma no siviles ia es ferida. La polisia ia mata la atacores par fusili.

La autoriosas xines culpa uigures muslim de Xinjiang per un cuantia cresente de atacas en la provinse.

En menses resente, la securia ia es aumentada en la provinse, e a lundi, des-tre persones ala ia es esecutada per lo cual Xina ia descrive como "atacas teroriste".

On ia condena ance tre omes – sur ci on crede ce los es uigures – sur un xoca matante de auto en Beijing en la anio pasada.

Sinco persones ia es matada e desuples ia es ferida cuando un auto ia entra a un fola en la Plaza Tiananmen en otobre de la anio pasada.

Gidores uighur nega ce los maneja un campania teroriste. Ativistes ia acusa ce Beijing ia esajera la menasa de separadistes uigur per justi restrinjes sever aplicada a la librias relijiosa e cultural de la uigures.

2014-06-20

On investiga un dona de sposa a la xef de SABC

En Sudafrica, un investiga ia comensa sur alegas ce la xef de SABC, la compania difusante, ia reseta un sposa como un donada.

La Comision per Egalia de Jenero ia oia cexas pos un reporta ce xefes tradisional ia dona un sposa a Hlaudi Motsoeneng. Estas ia es un parte de un grupo cultural cual ia desira la difusa de plu programas en la lingua venda.

La governa ia dise ce la condui de la grupo ia es "regretable". Motsoeneng no ia comenta.

Esta ia aveni en un visita resente de Motsoeneng a Limpopo, un provinse norde, do el e otra dirijores de SABC ia encontra la grupo de promove venda.

Seguente un de la promovores, sirca des femes joven ia parada ante Motsoeneng, e el ia eleje la fem cual el ia gusta. Tota la femes ia es acompaniada par se jenitores, ci ia sabe ja lo cual va aveni, e ia acorda sur lo.

On reporta ce Motsoeneng ia eleje un studiante de maneja. On ia publici un foto de la fem, con peto nuda, con el. On dise ce Motsoeneng ia reseta ance un bove e un boveta.

La ministreria de femes sudafrican ia espresa ce lo regarda la prosede intera como un maltrata de valuas cultural: "La usa de femes como donadas, en modo de bestias, es un regresa grave e un insulta a la beneficas de 20 anios de democratia e libria, spesial la contribuis de femes."

2014-06-19

La polisia de Albania batalia contra cultivores de canaba

La polisia albanian ia saisi plu ca 10 tones de mariuana en un opera major contra cultivores de canaba en Lazarat, un vileta sude. 800 polisiores ia es usada per controla la plu de la vileta ante la fini de la sera de mercurdi.

Un polisior e du siviles ia es ferida en fusilis intercambiada.

Lazarat produi 900 tones de canaba en cada anio, con valua de 4,5 mil milion euros ($6,1 mil milion), egal a cuasi un dui de la produi interna bruta de Albania.

De pos lundi, polisiores ia aseja la vileta, cual es situada a 230 cilometres a sude de la capital, Tirana. Los ia encontra omes forte enarmada ci ia xuta granadas e morteros par roceto.

On ia vide fuma levante supra la vileta. Alga atestores ia opina ce esta ia es causada par la arde de plantas de mariuana par persones local ante la ariva de la polisia.

La opera continua ancora. La gidor alegada de la grupo ia sede, e des otra membros es ancora encluida en un casa.

Saimir Tahiri, la ministro de internas, ia dise ce la opera va continua asta cuando "cada sentimetre cuadro en Lazarat es controlada par la stato".

La esta opera ia aveni como parte de un campania par la governa sosialiste nova per elimina la comersia de mariuana, en atenta ce Albania deveni un membro de la Uni European.

2014-06-18

Un tubo ucrainsce de gas esplode

En Ucraina, un tubo major cual porta gas de Rusia a la resta de Europa, ia es colpada par un esplode.

On ia pote vide flamas erutante de la Linia Transibirsce en Ucraina sentral. Nun ia es ferida par la esplode.

La causa no es clar, ma la servi nasional de crise de Ucraina ia dise ce lo ia pare es la resulta de un creve o un perde de presa. An tal, la ministrerias de enerjia e internas ia dise ce lo ia es cisa un ataca terroriste atentada.

Companias european e rusce ia dise ce la problem no ia afeta esportas de gas a la Uni European.

En lundi, Ucraina ia anunsia ce Rusia ia sesa furni gas a la pais, pos un disputa sur paias.

Sentos de vives es ja perdeda en la provinses de Ucraina este, do rebelores prorusce es bataliante soldatos governal pos se declara de autonomia a pico plu ca un mense ante aora.

2014-06-17

Un telon preinca reveni a Peru

En Lima, on esibi un telon funeral de Peru antica cual veni de la periodo preinca. Lo ia es redonada de Sveria.

La Telon de Göteborg es multe complicada. Lo conteni plu ca 80 tinjes de blu, verde, jala, e roja, texeda en un motif de 32 imajes.

Lo es un de cuatro stofas antica cual on redona su un acorda intergovernal. Un diplomata svensce ia contrabanda los de Peru a 80 anios ante aora.

Rexercores crede ce la imajes sur la telon ia funsiona como un calendario de saisones cultival. La imajes mostra condores, ranas, gatos, mais, manioca, e persones.

La telon es esibida a la Museo Nasional de Arceolojia, Antropolojia, e Istoria.

On previde la redona de 85 otra stofas ante 2021. Los ia es produida par un sivilia cual ia flori en la penisola Paracas, en la sude-ueste de Peru moderna.

An si la telones ave sirca 2000 anios, los es perfeta conservada, car on ia entera los en arena seca, fria, e salosa de deserto, tal protejente los como osijen e lus ultravioleta cual ta dejenera los.

2014-06-16

Un lege saudi proteje laborores de la sielo

En Arabia Saudi, on ia introdui regulas nova per proteje laborores su sielo de la sol. De aora asta la media de setembre, laborores es proibida de labora su sielo entre mediadia e la ora des-sinco.

La governa saudi dise ce la regulas mostra se conserna per la bonstate e securia de laborores.

Los ci labora sur petrolio e laborores de repara urjente es esentada de la regula nova, ma sola si on ia introdui medios de aida proteje de la sol.

Companias cual desobedi la proibi va es punida con multas sever o an cluida.

La ministreria de labora ia declara ce lo "labora asidua en furni un ambiente secur de labora cual es imune contra tota periles de taxe".

An tal, alga laborores ia espresa dutas esce on va enforsa la regula. Otras ia teme ce se salarios va diminui si on redui se oras de labora.

Catar, un pais visina, ia es forte criticada per obliga ce laborores asian, ci construi la stadiones per la Copa Mundal de futbal de 2022, labora su sielo tra la dia intera. La governa ala ia dise ce lo va adota medios per fa ce se ambientes de labora deveni plu secur.

2014-06-15

La SUA envia un barcon de gera a la Golfo

La SUA envia un barcon major de gera a la Golfo Farsi per ave un capasia militar si lo aveni ce la situa en Irac mali plu.

La barcon, cual porta desuples de jetos de combate, ia es moveda de la Mar Arabi Norde.

En la entretempo, Iran dise ce lo considera labora con la SUA per batalia rebelores suni en Irac ci ia saisi alga sites e menasa aora Baghdad, la capital.

Bataliante su la nom de la Stato Muslim de Irac e la Mediteraneo Este, la rebelores regarda la majoria xia de Irac como ereses.

Ma soldatos iraci, fortida par un cuantia cresente de militiores xia e curdi, pare resiste aora la avansa de gerores suni a norde de Baghdad. Los ia recatura alga vilas cual la rebelores ia saisi.

En la vila Ishaq, soldatos ia trova la corpos ardeda de des-du polisiores.

La fortes de la governa asembla en la site Samarra, parente en prepara de un contrataca per forsa rebelores a via de Tikrit, la vila de nase de Saddam Hussein, a la norde.

Soldatos de governa e militiores xia ia desprende rebelores ance de du vilas en la provinse Diyala, a norde-este de Baghdad. Ma un bombarda de aira a la vila Jalawla ia mata sete combatores curdi par era. Los ia adota plu tremprana locas cual la rebelores suni ia vacui.

2014-06-14

Al-Xabab forsa un codigo de vestes a femes somali

En Somalia, ativistes de al-Xabab ia aresta 100 femes e informa los ce si los no segue un lege muslim de vestes, los risca es flajelida.

La femes ia es arestada en Buale, a sirca 300 cilometres a sude-ueste de la capital, Mogadixu.

Al-Xabab es un grupo liada con al-Qaidah. Se nom sinifia "la jovenes". Lo no fa comun tal arestas coletiva. La grupo controla multe partes sude e sentral de la pais.

La femes ia es prendeda de la mercato, avisada, e relasada. Car esta ia es se ofende prima, on no ia puni los, ma los pote es publica flajelida si on aresta denova los.

La temperatur pote ateni 35° en esta parte de la anio, donce multe femes prefere porta vestes tradisional ma plu lejera ca los cual al-Xabab aproba.

On ia comanda ce la femes porta un nicab, cual covre tota se corpo e fas, lasante sola un fesur peti per se oios.

Al-Xabab recomenda un varia sever de Islam. Los ia mata persones acusada de adultera par bombarda los con petras, e los ia amputa la manos de furores.

Un governa suportada de la Nasiones Unida e aidada par soldatos de la Uni African, ia susede ejeta al-Xabab de la sites xef de Somalia, ma la grupo continua fa atacas matante ala.

2014-06-13

Familias de MH370 reseta paias compensante

La familias de pasajores sur la avion malaisian mancante ia comensa reseta paias compensante de $50 mil.

Asta aora, ses familias malaisian e un familia xines ia reseta la mone, e asecurores evalua la reclamas de 40 plu familias xines. Cada relatada de la 239 pasajores mancante pote reclama asta $175 mil.

La jeto MH370 ia desapare a 8 marto en vola de Kuala Lumpur a Beijing. On ia trova no trasa de lo.

Hamzah Zainudin, la visministro malaisian de esternas, ia asentua ce la governa ancora no ia declara ce la avion es perdeda.

Ance multe de la familias refusa aseta ce se relatadas pote es mor. Un grupo de familias ia colie $5 milion per investiga la desapare de la avion e per coraji la parla de cualcun ci pote informa.

Un taxe jigante de xerca, fada en mares a un distantia vasta de cualce tera, ia fali trova detrito de la jeto.

Espertas continua sonda la fondo de mar, e introdui aora aparatos spesial. Los crede ce la avion ia fini se viaja en la Mar Indian, a sentos de cilometres a norde-ueste de Perth, un site a la costa sude-ueste de Australia.

2014-06-12

Un otra fem pende de un arbor en Uttar Pradex

En Barat norde, on ia trova un fem de 19 anios ci pende de un arbor en un vileta. Esta es la tal caso tre en semanas resente en la stato Uttar Pradex.

La corpo ia es trovada en la area Moradabad, a tre oras par auto de Delhi. Se familia ia dise a la polisia ce el ia es sesal violeda. Investigores fa un autopsia.

On ia trova un otra fem, de 44 anios, pendente de un arbor en la stato a mercurdi. La polisia ia dise ce locales ia menasa el per se vende de distiladas en la area.

Se familia ia nomi sinco persones, alegante ce los ia viole sesal el, ma la autopsia ia es nonconcluinte.

La viole e mata par gang de du adolesentes fema en la distrito Badaun, a 29 maio, ia renovi un senti de protesta tra la pais contra la violentia sesal. On ia aresta tre atacores suspetada en acel caso, e ance du polisiores sur ci on suspeta ce los ia abandona se debes e ia conspira criminal.

200 milion persones abita en Uttar Pradex, cual alga ia descrive como la stato falinte la plu grande de mundo.

Narendra Modi, la ministro xef nova de Barat, ia dise ce la proteje de femes debe es estrema importante.

On ia esamina plu la violentia sesal en la pais de pos 2012, cuando un studiante ia es violeda e matada par gang sur un bus en Delhi. Acel caso ia provoca protestas vasta, pos cual la governa ia severi la leges sur violentia sesal en 2013.

2014-06-11

Jihadistes saisi la site du de Irac

La ministro xef de Irac ia demanda ce la parlamento declara un state de crise pos cuando ativistes islamiste ia prende controla de Mosul.

Nouri Maliki ia confirma ce los ia saisi "areas esensal" de la site du la plu grande de la pais.

En la note, sentos de omes enarmada ia saisi la ofisias de governa e polisia local, ante catura la airoporto e la xeferia de la armada.

On crede ce sirca 150 mil persones ia fuji de la site. Los ia vade a tre vilas en Curdistan, un area prosima, do autoriosas ia crea campas per los.

Nechirvan Barzani, la ministro xef de Curdistan, ia apela ce la ajenteria refujal de la Nasiones Unida aida la fujintes de Mosul.

Ance en Irac, en Baqubah, un vila sentral, un ataca con bombas ia mata a la min 20 persones. La esplodes ia colpa un prosegue funeral e ia feri ance 28 persones.

En la semana pasada, la aliadas de la Stato Muslim de Irac e la Mediteraneo Este, un organiza jihadiste, ia ataca sites e vilas en Irac ueste e norde, matante desuples de persones.

La organiza controla ja multe de la provinse Ninawa tra menses, esijente mone de ofisiores local e per la moves de benes. Pos sinco dias de batalia, los ia prende controla de la construidas xef en Mosul, cual ave sirca 1,8 milion abitores.

2014-06-10

On atenta salva un om de un cava profonda

En Deuxtland, un ecipo atenta salva un om de 52 anios ci ia es ferida en un cade de rocas en un cava con profondia de un cilometre. Probable la labora va ocupa alga dias.

La cava Riesending es la plu profonda en la pais. Un de la acompaniores de la om ia spende 12 oras en reveni a la surfas per fa un alarma.

Sirca 200 persones es envolveda en la labora de salva, cual aveni prosima a Berchtesgaden en Deutxland sude.

La salvores prima la ateni la om en la cava vertical a lundi. Un grupo du, incluinte un dotor osteraices abituada a salvas de cava, ia desende a alga oras plu tarda, e un otra ecipo veni de Suiz.

La om ia es con du acompaniores en un vacanse en la montania Untersberg. El ia sufri feris a se testa e tronco en la cade de rocas, cual ia aveni en la oras temprana de soldi. An si el ia porta un xapo protejente, esta no ia proteje el contra la pesa de la roca.

Un ofisior ia dise: "El responde, ma el no vade bon."

La om ia es un de la rexercores ci ia descovre a cava a no multe anios ante aora.

2014-06-09

Fusilis nova a la airoporto internasional de Karachi

Fusilis ia recomensa a la airoporto la plu grande de Pacistan. Esta segue un ataca par fusilores a la note de soldi, cual ia lasa a la min 23 persones mor.

La ataca ia aveni en la airoporto internasional de Karachi, a un termina usada per volas de carga e persones importante. Multe de la matadas ia es empleadas de la airoporto.

Violentia nova ia comensa a mera oras pos un declara par la armada ce lo ia regania controla e ce tota 10 atacores ia es matada.

La Taliban de Pacistan ia dise ce los ia fa la ataca. Un de se portavoses ia dise: "Esta es un mesaje a la governa pacistani ce nos vive ancora per reata contra la matas de persones nonculpable en atacas de bomba contra se viletas."

Tota aviones es diverjeda a otra airoportos.

Analistes dise ce la ataca sumina plu la atenta par Nawaz Sharif, la ministro xef, a inisia discutes de pas con la Taliban.

La negosias ia progresa apena de pos febrero. Oposores teme ce la tempo de discute pote permete ce la ativistes regrupi e gania fortia.

2014-06-08

Ucraina ave un presidente nova

Petro Poroxenco ia es induida como presidente de Ucraina, clarinte un projeta de repasi la este turbada de la pais.

La maniate de 48 anios, ci ia gania la eleje a 25 maio, ia ofre vantajes political a persones en la este, disente ce el no desira gera o venja.

Ma el ia dise ance ce el ia informa la presidente de Rusia ce Crim, cual Moscva ia saisi, "va es sempre ucrainsce".

Alga separadistes ia rejeta la parla, declarante ce los "va sede nunca".

Mihail Zurabov, la ambasador rusce en Ucraina, ia dise ce la parla es "un declara prometente sur intende". Presente a la inaugura, el ia dise ce Ucraina debe fini se operas militar en la este, si militias ta clama un sesafusili e ta permete asedes umaniste.

Ucraina dise ce Rusia suporta militaristes enarmada en la area Donbas, ma Rusia nega esta.

En saturdi, combates ia continua en alga areas este. La armada ia bombarda Sloviansc, un fortres de rebelores, e fusilis ia aveni ance plu sude, en Mariupol.

Poroxenco ia es induida en la presentia de desuples de ofisiores alta stranjer, en parlamento en la capital, Ciiv.

2014-06-07

La aniversario setedes de la invade de Normandia

Onorante la sacrifias de los ci ia combate a la Dia D, François Hollande ia recomenda forte ce on combate la menasas moderna a la pas con un inspira e coraje egal.

La presidente franses ia parla a la gidores de la mundo e a cuasi 2000 veteranes en Normandia, a la aniversario 70 de la mision esensal de la Gera Mundal Du.

Hollande ia dise ce la menasas moderna inclui la terorisme, la caldi global, e la nonemplea coletiva.

La rituo xef ia aveni sur la costa norde de Frans a Sword Beach, la nom codigal per un de la sinco puntos do la Aliadas ia atera. Pos la parla, on ia recrea senas de la invade.

La ateras en 1944 ia es la paso prima de la invade de Europa cuando lo ia es ocupada par la nazis. A la fini de la "Dia D" (6 junio 1944), la Aliadas ia susede institui se en Frans, en un aveni cual ia aida ultima fini la gera.

156 000 soldatos brites, canadian, e SUA ia partisipa. Plu ca 4000 de los ia mori en la dia prima de la batalia.

En jovedi, un veteran brites de 89 anios ia desapare de se casa de veas, sin dise do el vade. En fato, el ia viaja a Frans per partisipa la rituos de recorda.

2014-06-06

La om la plu vea de Tokyo ia mori a desenios ante aora

On ia crede ce Sogen Kato es la om la plu vea en Tokyo, ma cuando ofisiores ia vade per loda el a se aniversario 111, los ia descovre sola restas sceletal e momida en se leto.

Autoriosas en Japan dise ce cisa Kato ia mori a 30 anios ante aora.

La ofisiores ia deveni suspetosa cuando los ia visita la casa de Kato, ma se neta ia informa los ce la om vea "desira vide nun". Los ia demanda la aida de la polisia, ci ia entra a la casa par forsa en mercurdi.

La polisia ia descovre un corpo momida, sur ci los crede ce el es Kato, reposante en leto, vestida en un pijama, su un covreleto.

Aora, la polisia investiga la familia sur alegas de froda.

Se relatadas ia dise a la polisia ce Kato "ia restrinje se a se sala a plu ca 30 anios ante aora, e ia deveni un buda vivente". An tal, la familia ia reseta 9,5 milion ienes ($109 mil) como pension de vidua tra la conta de banco de Kato, pos la mori de se sposa a ses anios ante aora. Alga de la mone ia es resente retirada.

La compania de pension no ia susede contata Kato tra un tempo longa.

2014-06-05

On recorda la masacra de la Plaza Tiananmen

Desuples de miles de persones ia asembla ier en Hongkong per la sola rituo major en Xina a la aniversario 25 de la masacra en la Plaza Tiananmen en Beijing.

La organizores ia dise ce sirca 180 000 persones ia partisipa en la vijila, ma la polisia ia descrive la fola como pico min ca 100 000.

La site reteni librias sivil cual on no permete en la parte xef de Xina.

La protestores en 1989 ia desira un reformi political, ma on ia comanda un colpa oposante e matante cuando asolutistes ia gania la luta per potia en la Partito Comuniste governante.

En Beijing, la autoriosas ia pone un covre de securiores, spesial en la Plaza Tiananmen, per preveni cualce atenta de onora la aniversario.

On ia teni desuples de ativistes en la dias presedente, e jornalistes stranjer ia es moveda a via de la plaza en mercurdi mesma.

La autoriosas xines clasi la protestas de 1989 como tumultas contrarevoluiste, e donce los fa no rituo.

Ma, en Hong Kong, un fola grande ia partisipa en la asembla per recorda Tiananmen, cual on organiza ja a cada anio de pos la masacra.

2014-06-04

Obama anunsia un Stratejia de Calmi European

En un visita a Polsca, presidente Barack Obama ia anunsia se intende de crea un reserva de mil milion dolares per aumenta envias de soldatos SUA a Europa.

Obama, ci va encontra gidores de OTAN entre consernas sur la crise ucrainsce, ia dise ce la securia de la aliadas european de la SUA es "nonviolable".

En april, 150 soldatos SUA ia es enviada a Polsca per eserses militar a media de un situa tensinte con Rusia.

Obama va visita ance Beljia e Frans en se turi.

En la entretempo, ministros de defende de OTAN va consenta en Bruxelles per discute la atas par Rusia sur Ucraina, en relata a se implicas per securia durante.

La governa rusce nega la alegas ueste ce lo suporta separadistes en Ucraina este.

2014-06-03

Re Juan Carlos de Espania renunsia la trono

Re Juan Carlos de Espania ia anunsia se intende de renunsia, pos cuasi 40 anios sur la trono. Se fio, Prinse Erital Felipe, ci ave 45 anios, va emprende.

En un parla televisada, la re de 76 anios ia dise: "Un jenera nova debe es a la fronte… persones plu joven con enerjias nova."

Tra multe de se rena, on ia regarda Juan Carlos como un de la monarcas la plu popular de mundo. Ma resente, multe espanioles ia perde se fida sur el.

Se reputa ia deveni manxada par un investiga longa sur froda en la atas comersial de se fia e se sposo. La suporta per la re ia cade plu cuando on ia descovre ce el ia fa un viaja lusosa a Botsuana per xasa elefantes, a media de la crise finansial de Espania.

Espania no ave un lege esata per regula se pasas de rena. La ministro xef, Mariano Rajoy, ia dise ce ministros va fa un consenta spesial per discute la prosede per cual Re Felipe 6 va emprende la trono.

Juan Carlos ia deveni la re pos la mori de Jeneral Francisco Franco, la autocrata destriste ci ia rena tra 36 anios pos se vinse contra fortes republiciste en la Gera Interna Espaniol.

El ia iniora pronto la suportores de Franco, ci ia desira estende la autocratia. En loca, el ia fundi un sistem nova de monarcia parlamental.

Con la pasa de anios, la re ia envolve sempre min se en la politica dial, e ia deveni plu un xef sin potia. An tal, el ia aida stabli areas como Catalunia e Euscaleria, cual desira deveni autonom, e ia aida ance desativi un colpa atentada de stato en 1981.

2014-06-02

Tre ostajes relijiosa es librida en Camerun pos du menses

Du pretes italian e un monce canadian, saisida par fusilores en Camerun en april, ia deveni librida. La ostajes pasada ia entra a un avion a la capital, Yaounde, en soldi.

La tre ia es furada de la construida do los ia reposa en Maroua, un distrito norde, en la oras temprana de 5 april.

No grupo ia declara se como la atacores, ma on ia suspeta Boko Haram, un grupo combatosa de Nijeria ci ia saisi un otra prete, e sete membros de un familia franses, en Camerun norde en 2013.

La ministreria italian de esternas ia confirma la libri de Gianantonio Allegri e Giampaolo Marta, e de la canadian Gilberte Bussier. Lo ia grasia la autoriosas canadian e camerunes, ma no ia clari como la tre ia es librida.

Seguente se bispia en la area Vicenza de Italia, la pretes ia es laborante sur boni la furnis de acua e sur combate la sperde de aides, en ajunta a se laboras relijiosa.

La un ia es ja en Camerun tra plu ca ses anios. La otra ia ariva a sirca un anio ante se saisi.

Camerun ia anunsia resente ce lo ia envia sirca mil soldatos a se borda con Nijeria, per combate la menasa cresente de Boko Haram.

2014-06-01

Nubes de sene volcanal cansela volas en Australia

Nubes enorme de sene, ejetada par un volcan indonesian, ia obliga la cansela de tota aviones a e de la site Darwin en Australia norde.

La program de volas entre Australia e la isola Bali es ance disturbada, e otra airoportos pote es afetada en la dias veninte. Sentos de pasajores es caturada sin posible de viaja.

Monte Sangeang Api ia comensa eruta a venerdi, e plumones de sene ia move a sude en dirije a Australia. On no pote predise fasil lo cual la volcan va fa aora. La venta e otra fatores climal pote aida o impedi la situa.

La sene volcanal pote es estrema perilosa per aviones, car se particulas pico pote dana motores.

Warren Truss, la visministro xef de Australia, ia dise ce lo es posible ce alga dias va pasa ante cuando la volas en la pais reveni a normalia.

La isola Sangeang Api ave no abitores permanente. Tota ia parti pos un eruta en 1988. On ia demanda ce cultivores parti aora de la area prosima.

Indonesia es situada sur un serie de falias jeolojial. Lo esperia multe tremateras e erutas de volcanes, de cual lo conteni sirca 130 ativas.