2015-06-30

Un dia rara de 86 401 secondos

La medianote va es pico plu tarda a esta note. A la ves prima de tre anios, on va ajunta un secondo a la ora ofisial indicada par orolojos atomal.

Esta secondo ajuntada va causa ce la minuto final de junio conteni 61 secondos. An si 23:59:59 deveni normal 00:00:00, oji lo va deveni 23:59:60.

On usa secondos ajuntada (e anios estendeda) como modos fasil de manteni la orolojo en sincronia con la Tera e se saisones.

Ma secondos ajuntada crea ance problemes per alga sistemes de infotecnolojia, car los es tan nonusual e nonautomatable. Los depende de mesuras de la jira de la Tera, cual varia en modo nonpredisable, e donce los aveni a intervales nonperiodal.

Car on avisa ce un secondo ajuntada va aveni a mera ses menses a ante, computadores no pote es furnida con un lista ja programida de la secondos ajuntada, e on nesesa ajunta los par mano.

Cronometristes profesal es divideda sur la demanda de reteni la secondos ajuntada, e esta va es debateda a un confere de radiocomunica en Geneve en Suiz, plu tarda en esta anio.

Jornalistes ia scrive sur la risca de problemes de computador cual ta pote afeta comersias finansial e otra operas tra la mundo cual depende de cronometris esata.

Sempre cuando un secondo ajuntada aveni, alga sistemes encontra problemes par causa de eretas en la codigo scriveda per trata los. La resultas es la plu sever en la ueste de la Pasifica, do secondos ajuntada aveni en la periodo xef de labora.

Alga grupos ia proposa aboli esta secondos ajuntada car los presenta problemes per redes de comunica.

La secondo ajuntada de esta note va es la numero 26 de istoria.

2015-06-29

Un fusilor matante en Tunis ia es aidada

Ofisiores dise ce un fusilor ci ia mata 38 persones a un plaia tunisi a venerdi ia es aidada par otra persones.

Un portavose per la ministreria de internas ia dise ce la polisia es "serta" ce Seifeddine Rezgui Yacoubi ia ave aidores.

Rezgui ia finje ce el es mera un banior, ma el ia porta un fusil su se parasol. El ia fusili sur la plaia ante entra a un otel, do el ia continua fusili.

La governa ia anunsia un securia plu alta pos la ataca, cual ia es reclamada par la Stato Islamiste.

A la min 30 de la mores ia es turistes de la Rena Unida, do la polisia dise ce los ia envia polisiores a la Republica Tunisi, e ce sentos plu labora sur un de la investigas antiterorisme la plu grande en la Rena Unida de pos un serie de bombis en London en 2005. La plu de la otra vitimes ia es eres.

Investigores tunisian crede ce la aidores suspetada ia furni la fusil Kalashnikov a Rezgui e ia aida el a ariva a la sena.

La polisia interoga la padre e tre cameradas de aparte de Rezgui, ma no ia dise ce cualce de los es suspetada de envolve.

Visinas e relatadas en Gaâfour, la vila de orijin de la atacor, ia parla a jornalistes sur se xoca a la ata.

"Ci ta imajina ce el va esecuta un tal asusta?" se tio ia dise. "Cisa el ia es cambiada do el ia studia, cisa el ia trova alga cosa en la interede. Ma nos ave simple no respondes."

La autoriosas en la pais dise ce soldatos reserviste va es enviada e locas de turisme, e ce on va clui sirca 80 mascitas acusada de provoca violentia ante la fini de esta semana.

La ataca a venerdi ia es la plu matante en la istoria resente de Tunis. En marto, combatosas ia mata 22 persones, xef stranjeres, a la museo Bardo en la site Tunis.

La economia turisi depende de turisme, e on teme ce la atacas resente va colpa sever acel industria.

2015-06-28

Un esplode a un parce acual en Taiuan

En Taiuan, plu ca 500 persones ia es ferida cuando un foco ia ensende en un fola a un selebra en un parce de diverti, prosima a la capital, Taipei.

La foco ia aveni cuando un polvo colorida ia es jetada supra la fola e ia ensende.

Persones ia panica e xilia. Materases inflable de nada ia es usada como portaferidas.

Cuasi 200 persones ia es grave ferida e reseta aida medical intensa. Alga de los ia enspira la polvo, causante problemes respiral.

La organizores de la selebra Color Play Asia ("Jua Colorosa de Asia") es interogada par la autoriosas.

Filmas de la aveni mostra un selebra multe ativa cuando un foco esplode subita.

Un studiante mas ci ia es minor ferida ia descrive la sena como "la enferno". "Sangue ia es a tota locas, incluinte en la pisina, do multe feridas ia empapa se per lejeri la dole."

Plu ca 1000 persones ia es prosima a la stadio a la tempo de la foco. On ia envia la 519 vitimes a 41 ospitales, e 413 es ancora ospitalida.

La foco ia es rapida controlada, ma on investiga ancora la causa. Pompores suspeta ce la caldia de la lampas sur la stadio ia ensende la polvo colorida, usada per crea un ambiente selebrosa. La polvo es fada de mais secida, e pote es estrema flamable.

Multe persones ia foli ier parces acual en Taiuan, cuando la temperatur ia ateni 38 °C. La maior de la site Taipei Nova ia comanda ce la parce acual clui completa per la tempo de la investiga.

Taiuan ia esperia un serie de focones matante en la du o tre anios pasada, partal causada par la enforsa debil de regulas de securia e par construis nonlegal.

Un focon plu temprana en esta anio ia mata ses pompores, provocante un comanda per coreti construidas nonlegal e per renovi la aparatos e instruis de pompores.

2015-06-27

La potia de pedales en São Paulo

Un banda per bisiclistes va abri doman en un de la stradas la plu famosa de America Latina. La banda roja ia es construida en Avenida Paulista, en la sentro de São Paulo.

La site brasilera ave plu ca 5,6 milion autos e es conoseda tra la mundo per se conjestas de trafica.

La maior, Fernando Haddad, ia promete estende la longia de la rede de bandas bisiclal de 65 a 400 cilometres ante 2016.

Ma la projeta no es noncontroversa. Alga oposores dise ce lo ia es mal desiniada e ce la consultas no ia sufisi. Otras dise ce la cuantia de demanda no justi la custa e la disturba.

Tal bandas es ja un cosa de debate en São Paulo de pos 1975, cuando la prima ia es construida. Pos 15 anios, on ia sustitui per lo un tunel de autos.

Tre proposas de crea un rede de bandas per bisiclistes en la 30 anios pasada ia reali nunca. Ma lo pare ce la suporta aora par la autoriosas de la site ia dona un impulsa nova a la siclistes.

La secretor de transporta de la site ia dise: "Multe persones ia desira usa bisicles, ma no ia fa, car los ia teme. Nos vole garantia la securia de la siclistes. Esta es se direto."

Un sonda fada en febrero ia sujesta ce 66% de abitores suporta la politica. Plu ca un dui de la intervisadas ia dise ce los usa un bisicle a un ves de semana, cisa plu. 13% ia dise ce los bisicli nunca.

A des-tre anios ante aora, un grupo de bisiclistes ia comensa un protesta, ocupante un parte de Avenida Paulista per esije ce on investi a modos de transporta otra ca autos.

2015-06-26

Frans reata contra Uber pos protestas

En Frans, la ministro de internas ia comanda un proibi contra UberPOP, un servi de comparti autos a custa basa, pos un dia de protestas nasional par taxistes.

Bernard Cazeneuve ia descrive la servi como "nonlegal" e ia comanda ce la polisia e avocatos enforsa se clui.

La dia ia es plen de protestas, violente a veses, par taxistes franses, ci dise ce Uber, un compania situada en la SUA, fura se modo de susta.

Courtney Cobain, un cantor roc famosa, ia es trapida a media de la tumulta. El ia tuita se frustra, mostrante un foto de la fenetra de se auto salpicada con ovos, e grasiante du motosiclistes ci ia salva el.

La grevores ia bloci autovias major sirca Paris e ia arde numaticos. Blocis ia apare ance sirca Marseille e Aix-en-Provence en Frans sude-este.

Alga autos ia es inversada, e la fenetras de otras ia es rompeda con bastones.

La compania cual opera la airoportos Charles de Gaulle e Orly en Paris ia avisa ce pasajores debe ariva par tren, car "la asede par strada es completa blocida". Alga viajores ia pasea longo la lado de la autovia per ateni la airoporto.

La taxistes de Frans – ci debe paia miles de euros per un lisensa – dise ce lo es nonjusta ca UberPOP vende plu barata ca los.

Un portavose de la sindicato de taxistes ia dise ce on debe crea un lege per proibi la transporta de pasajores par taxistes nonlisensada. El ia ajunta ce la lisensadas ia perde entre 30% e 40% de se revenu tra la du anios pasada par causa de la crese de UberPOP.

UberPOP es un servi cual lia clientes a taxistes privata a custa min basa ca companias tradisional de taxi e an ca otra servis de Uber.

Lo es ja nonlegal en Frans de pos janero, ma la lege ia es difisil per enforsa e la servi ia continua opera. Cazeneuve ia dise ier ce el ia comanda la polisia en Paris a proibi UberPOP e saisi cualce autos cual defia esta.

Thomas Meister, un portavose de Uber, ia dise ce se compania ia oposa la lege cual ia nonlegali UberPOP, e ia acusa la ministro de iniora la metodo normal de lege.

Uber, con se base en San Francisco, dise ce lo ave milion usores en Frans, incluinte 250 mil per UberPOP. La compania opera ance un servi lusosa cual no es proibida.

Lo ia fronti problemes simil con taxistes tradisional en sites tra la mundo. Ma on ia critica la taxistes lisensada per no adota rapida la tecnolojia jeolocalinte cual ia permete la susede de Uber.

2015-06-25

Corea Norde desvela un airoporto nova

Fotos de botecas e otra recursos en un termina nova de airoporto en Corea Norde ia es publicida.

Alga pajes de la jornal dial Rodong Sinmun ia mostra imajes de la xef de stato Kim Jong-un e se sposa, ci ia regarda la restorantes e la botecas.

Corea Norde ia desvela un diversa de construidas grande nova en anios resente, ma grupos de diretos umana dise ce multe de la pais vive ancora en state povre.

La airoporto nova en Pyongyang va abri a 1 julio, e va servi a sola un pico de volas.

Plu temprana en esta mense, la pais ia dise ce lo fronti se secia la plu sever de sento anios, causante temes de mancas malinte de comedas.

Tre pajes de Rodong Sinmun (Jornal de Laborores) – la jornal dial ofisial de la Partito de Laborores – ia es dedicada a fotos de la turi de Kim Jong-un en la termina.

En un foto, baras Mars e bires botelida ia es vidable en un de la botecas sin imposta de la airoporto. Un otra ia mostra un caferia servinte espresos.

La construida ave un fronte de vitro, e es sesuple plu grande ca la termina vea, ma se cuantia de pasajores va es probable basa.

La plu de la cuantia pico de volas a e de la capital de Corea Norde porta turistes xines e coreanes norde con taxes ofisial entre Pyongyang e Beijing.

On reporta ce Kim Jong-un ia demanda ance la construi de un ferovia rapida e un autovia entre Pyongyang e la airoporto, cual es situada a 24 cilometres a norde-ueste de la capital.

Pos deveni la xef de stato en 2011, Kim ia promete boni la cualia de vive en la pais isolida, ma la plu de se projetas es ultra la ateni de la popla promedia, como vacanserias de sci e parces acual.

Multe coreanes norde sufri de un manca de comedas, acua bevable, e un furni fidable de eletrica.

2015-06-24

La presidente de Nijeria parla sur la manca de mone governal

Muhammadu Buhari, la presidente de Nijeria, ia dise ce la tesoreria de se pais es "cuasi vacua".

El ia promete regania miles de miliones de dolares "furada" su governas presedente.

Buhari ia fa discutes con governores de la provinses sur la manca de mone per paia salarios a laborores governal.

El e se Congresa de Tota Progresistes ia gania la eleje en marto, fininte 16 anios de governa par la Partitio Democrata de la Popla.

On ia inaugura Buhari a min ca cuatro semanas ante aora. El ia emprende la presidentia de Goodluck Jonathan, ci ia ocupa la posto de pos 2010.

A la governores provinsal, Buhari ia dise: "La dias de esenta e nonprosedablia es pasada. La tre menses veninte va es cisa difisil, ma nos pote regania biliones de dolares, e nos va fa la plu bon cual nos pote."

Plu temprana, en un presenta a jornalistes, el ia dise ce lo es "vergoniosa" ce laborores governal ia reseta no paia tra alga menses.

"En esta situa mal manejada," el ia dise, "nos nesesa vera vos aida per proteje nos de persones ante cuando los va marxa contra nos."

Yemi Osinbajo, la vispresidente, estima ce Nijeria ave un deta de sirca 60 mil milion dolares. Ma Ngozi Okonjo-Iweala, un ministro pasada de finansia ia dise ce la cuantia es multe plu basa, e ce la plu de lo ia es incoreda par la provinses, e no par la governa federal.

La presidente ia gania la vota pos promete fronti la froda e rici la pais. Nijeria produi plu petrolio ca cualce otra pais african, ma la plu de se sitizanes es povre.

2015-06-23

Un avansa en la discutes per salva la economia de Elas

La ministro de economia elinica ia revela la detalias de proposas nova per fini la state de nonprogresa sur la crise de deta en la pais. La ideas inclui impostas nova a comersias e persones rica.

Ministros de finansia en la eurozona ia bonveni la scema, disente ce lo es aora posible ce un acorda va es realida pos no multe dias.

Elas debe repaia un presta de 1,6 mil milion euros par la Reserva Monal Internasional ante la fini de esta mense. Si lo no repaia, lo va risca sorti de la euro e cisa ance de la Uni European.

Xefes de statos en la eurozona ia discute ier la proposas a un confere en Bruxelles.

La proposas inclui ance un aumenta en la tarifa de IVA (imposta de valua ajuntada) per alga benes.

Entretempo, desuples de polisiores antitumulta es ativa per preveni scaramuxas entre protestores asemblada estra la parlamento elinica.

La discutes ia es trapida en un rua sin sorti tra la sinco menses pasada. La Comision European, la Reserva Monal Internasional, e la Banco Sentral European no desira relasa la 7,2 mil milion euros final de se mone de salva ante cuando Elas acorda a reformis economial.

La Banco Sentral European ia crese denova se finansia de crise a bancos elinica, pos cuando clientes ansiosa ia retira plu ca 4 mil milion euros en la dias resente.

Alexis Tsipras, la ministro xef de Elas, ia esclui ja la posibles de redui pensiones o alti la custa de eletrica. El ia dise ce el espera ce Elas "va reveni a crese en la eurozona".

El ia consenta ier con la xefes de la tre creditores internasional de Elas en Bruxelles, la capital de Beljia, ante discute con la ministros xef de 18 otra nasiones de la eurozona.

Ma ministros finansial ia dise ce los no ia reseta un tempo sufisinte per studia la proposas e judi coreta los, a media ance de un confusa causada par la presenta de varias diversa de los.

Un de la figures major, Jean-Claude Juncker, la xef de la Comision European, ia dise ce se gol es trova un acorda "ante la fini de la semana".

La novas de un avansa posible ia felisi asionerias european. La asioneria xef de Elas ia asende par 9% a la fini de comersia ier.

2015-06-22

Narendra Modi gida miles en un selebra de ioga

Narendra Modi, la ministro xef de Barat, ia gida miles de persones en un program de ioga coletiva en la capital, Delhi, a la aveni prima de la Dia Internasional de Ioga.

El ia fa estendes, curvis, e eserses de respira con 35 mil enfantes, burocratas, e soldatos.

La securia en la site ia es forte vijilada, con miles de polisiores e paramilitares presente a la aveni a la matina de soldi.

On ia previde ce miliones de otra persones va fa ioga a avenis simil en sentos de sites e vilas barati.

Modi, ci es zelosa sur ioga e dise ce el pratica esta arte barati antica a cada dia, ia promove ce la Nasiones Unida declara 21 junio como la Dia Internasonal de Ioga.

On ia pone miles de tapetos colorosa sur Rajpath (la Bolevar de la Re), do la aveni xef ia es fada.

Plu temprana, ofisiores ia dise ce la ministro xef va visita la aveni per parla a la fola asemblada, ma ce el no va fa ioga. Ma Modi ia surprende par partisipa en la eserses.

La cuantia de partisipores ia crea cisa un recordo nova de mundo per la clase la plu grande de ioga a un loca.

Ioga ia es ance praticada sur la glasia Siachen en la Montes Himalaia, e sur la mar profonda, e on ia festi la dia tra la mundo. 30 mil persones ia fa ioga en Times Square en New York.

An tal, la dia, cual ia intende promove armonia e pas, ia provoca un controversa cuando alga organizas muslim ia dise ce ioga es esensal un pratica indu e es contra la credes de Islam.

2015-06-21

Un fem txilan ia porta un feto tra 50 anios

Dotores en Txile ia descovre un fem ci ia porta un feto calcida tra sirca 50 anios.

La fem, ci ave a la min 90 anios, ia vade a ospital en la site San Antonio pos un cade.

Radiogrames ia revela alora la presentia de un feto cual ia pesa sirca du cilogrames.

La fenomeno, nomida un litopedio, aveni cuando un feto mori en la ensintia e deveni alora calcida estra la utero.

Ance alga casos rejistrada a ante ia envolve femes ci no ia es consensa sur la presentia de la feto asta la pasa de desenios.

La dirijor de la ospital ia descrive la caso como "estracomun rara", e ia dise ce la feto ia es "grande e developada e ia ocupa tota de se caveta adomenal".

On ia envia aora la pasiente a se casa. Dotores dise ce lo no es probable ce los va atenta estrae la feto de la fem, car un tal opera ta crea tro multe riscas per un pasiente de se eda.

2015-06-20

La aterador Philae siniali denova de se cometa

Philae, la aterador european de cometa, ia fa un contata nova con la Tera – se prima pos la note de soldi pasada.

Se comunica ia es sinialida par Rosetta, se veculo madrin, cual orbita un bal de fango jelada con la nom 67P/Churyumov-Gerasimenko.

La sinial ia es resetada par un antena enorme de la ajenteria spasial SUA en California, e alora enviada a la Ajenteria Spasial European en Deutxland.

Ante la fini de semana pasada, Philae ia dormi tra sete menses.

La robot ia perde potia a mera 60 oras pos atera sur la cometa a 12 novembre, car lo ia rebondi e ia entra tal a un foso do la lus de sol no ia ateni se paneles solal per jenera eletrica.

Ma la cometa ia veni aora considerable plu prosima a la sol, e donce la lumina ia boni e Philae ia velia.

La comunicas con la Tera, tra un distantia de 305 milion cilometres, es multe corta asta aora, durante no plu ca un pico de desuples de secondos. La sinial prima ia ariva a saturdi, segueda par un otra a soldi.

Ance la sinial de oji es multe corta. Lo revela sola la state de Philae, cual pare bon. Controlores manobra aora Rosetta a plu prosima a la cometa, per atenta reali comunicas plu longa e fidable. On intende ce lo desende a un orbita de min ca 200 cilometres.

Probable pos alga tempo, Philae va deveni capas de recomensa la investigas siensal de la cometa cual ia para cuando la eletrica ia manca.

La esperimenta xef va fora un buco en la corpo jelada, per determina se composa cimical.

On ia atenta ja esta en la 60 oras disponable en novembre, ma sin susede, probable car la posa de la robot ia preveni ce la forador toca la surfas.

La injeniores crede ce si los pote comanda Philae a jira en la semanas veninte, lo va pote oteni un sample. Ma tota va depende de la cuantia de potia disponable a la aterador en se loca ombrida.

On es ance consernada sur la veculo madrin. Lo ia retira resente se de la cometa per atenta evita la multe gas e polvo cual la cometa ejeta aora, deveninte plu calda en se prosimi a la sol.

Esta materia risca confusa la sistemes navigal automida de Rosetta, e la controlores debe atende ce se labora per crea un comunica plu bon con la aterador no esposa la sonda mesma a peril.

2015-06-19

Partitos oposante gania en Danmarc

En Danmarc, la partitos oposante ia vinse la alia governante, pos un eleje difisil ganiada.

Pos la conta de tota votas estra los de la isolas dansce, la grupo sentriste-destriste gidada par Lars Løkke Rasmussen, un ministro xef pasada, ia vinse la alia sentriste-sinistriste de la ministro xef Helle Thorning-Schmidt.

La Partito de la Popla Dansce, cual es destriste e oposa migras a la pais, va deveni la numero du de la plu grandes en parlamento.

A ante, Kristian Thulesen Dahl, la xef de acel partito, ia espresa un manca de zelo sur la idea de entra a la governa. El ia dise ce el prefere "la rol de la avia libre peti, par cual la Partito de la Popla Dansce pote prosimi plu a reali nos politica en la mundo real ca on opina".

Ma Dahl pote es ancora en un bon situa per deveni la ministro xef.

En se parla de vinse, Rasmussen (ci ia gida la pais entre 2009 e 2011) ia dise: "A cuatro anios ante aora, nos ia redona la claves a la ofisia de la ministro xef. Me ia dise a acel tempo ce los es sola un presta."

El ia dise ance ce el va presa per "controla de la flue de refujadas".

An si lo ia perde jeneral, la Partito Democrata Sosial de Thorning-Schmidt va es la plu grande, ganiante a la min 26,3% de la votas. Ma se aliadas ia fali gania tan multe votas como la oposantes, e pos aseta la perde, el ia resinia como xef de la partito.

2015-06-18

Un fusili matante en un eglesa en la SUA

En la SUA, nove persones ia mori en un fusili a un eglesa vea african-american en la site Charleston en la stato Carolina Sude.

Oto de la vitimes ia es matada en la Eglesa Episcopal Metodiste African Emanuel a la sera de mercurdi, e un otra person ia mori a pos.

La polisia xerca un suspetada mas blanca ci ave sirca 21 anios.

La pastor de la eglesa e senator de la stato, Clementa Pickney, ia es entre la matadas.

A la tempo de la fusili a sirca 21:00 de ora local, un consenta de prea ia es aveninte en la eglesa.

La xef de polisia de la site ia dise: "Lo es noncomprendable ce algun en la sosia de oji ta entra a un eglesa do on fa un consenta de prea e mata los. Me crede vera ce lo ia es un crimin de odia."

On ia vide elicotores supra la area, e un eglesor polisial ia es presente.

A un punto, la polisia ia demanda ce abitores move a via pos reportas de un bomba, ma plu tarda los ia indica ce acel reportas es falsa.

Un grupo de adorores ia es videda en prea, prosima a la eglesa. Un de los ia dise: "Nos desira respondes vera aora."

La ataca ia aveni a du menses pos cuando Walter Scott, un om negra e sin armas, ia es fusilida e matada par un polisior blanca en North Charleston, un site prosima.

Acel fusili ia provoca protestas coler e ia asentua tensas razal en la site. La polisior ia es acusada de omiside.

La eglesa de la fusili en Carolina Sude ia es construida en la sentenio 19, e es un de la plu veas en la SUA. Un de se fundores, Denmark Vesey, ia gida un revolta falida de sclavos en 1822.

2015-06-17

OTAN critica un secute de sabres rusce

OTAN ia condena un move par Rusia per forti se armas nucleal, descrivente lo como "un secute de sabres nucleal", "nonjustida", e "perilosa".

Presidente Vladimir Putin ia dise ce, en esta anio, Rusia va ajunta plu ca 40 misiles balistical intercontinental a se colie de armas ativa.

Esta es un parte de un program estendeda de moderni la armada de la pais. La move segue un proposa par la SUA de aumenta se presentia militar propre en Europa este.

La tensa es alta sur la rol de Rusia en la gera en Ucraina este.

Pos la comentas par Jens Stoltenberg, la secretor jeneral de OTAN, Putin ia dise ce Rusia ta es obligada a punta se militaria a cualce pais cual ta menasa lo.

Plu temprana, el ia dise ce la armas ta pote vinse an la sistemes de defende la plu tecnical avansada contra misiles.

OTAN e xefes de statos ueste acusa Rusia de envia soldatos e armas pesosa, incluinte tances e misiles, a la separadistes prorusce en Ucraina este. Rusia ia nega repeteda esta, insistente ce cualce rusces ci combate ala es "bonvolores".

2015-06-16

Rebelores sede armas en la Pilipinas

En la Pilipinas, la Fronte Moro de Libri Muslim (MILF), un grupo de rebelores, ia sede un colie prima de armas en parte de un prosede de pas.

Presidente Benigno Aquino ia es presente a la aveni en Maguindanao, e ia loda lo como un paso major de progresa.

La rebelores va desativi setedes-sinco armas como un sinia de se promete de pas.

En 2012, la governa e la MILF ia acorda un strutur per un acorda de pas. Sirca 145 de la 10 mil membros (un cuantia estimada) de la ala enarmada de la MILF (la Fortes Enarmada Muslim Bangsamoro) va es integrada en la sosia normal.

La governa va dona 25 mil pesos pilipina ($555) a cada de la 145, per aprende e susta.

Un lege realinte la acorda de pas entre la governa e la MILF ia es sola tepida suportada en congresa.

Plu temprana en esta anio, desuples de comandos de polisia ia es matada en scaramuxas con la rebelores.

Aquino ia dise ce la cuantia de armas oji sededa es importante. "Lo no es un caso de sola un o du o un desuple de fusiles. Esta es fusiles potiosa, moderna, e los no ia deveni vea. Esta armas pote dona e ia dona sufris estrema," el ia dise a la rituo.

La armas va es tenida e desativida par un organiza nondependente.

La strutur de acorda de 2012 ia es atenida pos 17 anios de negosia. La governa pilipina ia acorda dona plu autonomia a muslimes sur la isola Mindanao, en la area sude de la pais, do la majoria de persones es muslim. La resta de la Pilipinas es xef catolica.

2015-06-15

Animales de zo vaga en Tbilisi inondada

Un inonda sever en Tbilisi, la capital de Jorjia, ia mata 12 persones, cisa plu.

Desuples de persones es lasada sin casa, e ecipos de salvores xerca abitores cisa trapida en casas sumerjida.  On ia declara ce oji es un dia de lamenta.

Ofisiores avisa la popla a resta en casa per evita animales cual ia evade un zo.

La animales vagante inclui tigres, leones, ursos, e lupos. On ia trapi un ipopotamo en un de la plazas xef de la site e ia adormi lo con un fusil de medisin calminte.

Tre de la persones mor ia es trovada en la zo, incluinte du empleadas.

Un portavose per la zo ia dise ce la compleso ia deveni "un vortis enfernin", e ce lupos, tigres, xacales, e jaguares ia es matada par fusilores o es ancora libre.

La acua inondante ia ateni la tetos de ensircas en la zo, afocante sentos de animales. Lo ia puxa multe animales a estra se ensircas, e los ia evade tal.

On ia trova un urso pendente a un frescador a media de la mur esterna de un construida, e un om ia descovre un iena sur se balcon.

La inonda ia comensa cuando pluves forte ia causa un supraflue de la rio Vere – cual es normal apena plu ca un rieta.

Miles de persones es lasada sin acua e eletrica, e on ia debe usa elicotores per leva otras a securia.

Stradas es destruida, e autos e casas peti ia es puxada a via par la acua. On reporta ce la acua ia desentera caxones en un semetero de la site e ia lasa los sur la fango.

On no sabe cuanto animales vaga ancora. Elicotores sirculi supra la site en parte de la labora de xerca e salva.

2015-06-14

Nicaraguanes protesta contra un canal nova

Miles de nicaraguanes ia protesta contra la construi projetada de un canal entre la mares Atlantica e Pasifica.

La scema, con custa de $50 mil milion, es ce un compania xines va construi un canal plu longa, larga e profonda ce la Canal de Panama.

Ma la protestores teme ce esta va dana vasta la ambiente e forsa miles de persones a abandona se tera.

La governa de Nicaragua dise ce la canal va trae investis esensal a un de la paises la plu povre de America Sentral.

La plu de la protestores ia es cultivores. Alga de los ia acusa la presidente Daniel Ortega de vende Nicaragua a Xina.

La labora inisial sur loca ia comensa en desembre de la anio pasada. On previde ce la projeta va es completida pos sinco anios.

2015-06-13

Un greve de enseniores brasilera fini

En Brasil, enseniores ia vota per revade a labora pos cuasi tre menses de greve.

Miles de protestores de un de la sindicatos la plu grande de enseniores en la Americas ia asembla en la sentro de la site São Paulo.

La greves ia comensa cuando la governa ia refusa ofre un aumenta de salario.

Un gidor de la sindicato ia comenta ce la greve ia perde se fortia cuando la sindicato ia debe redui se paias compensante a la enseniores.

La grevores de la Sindicato de Enseniores Ofisial per la Stato de São Paulo ia demanda un aumenta de salario de 75%. La sindicato representa sirca 180 mil enseniores.

En la anio pasada, cuando la Copa Mundal ia prosimi, miles de protestores ia pasea sur la stradas en sites tra Brasil en cexa contra froda e la custas spiralinte de construi la stadiones de futbal.

Multe protestores ia cexa alora ce on ia sutrae mone de servis publica fundal.

2015-06-12

Diferes major resta pos discutes sur finansia elinica

La creditores internasional de Elas ia aumenta se presa a la governa en Atina pos negosias en Bruxelles.

Elas desira reseta mone par intercambia per reformis interna, afin lo ta evita fali repaia un deta de 1,5 mil milion euros ($1,7 mil milion) a la Reserva Monal Internasional.

Un portavose per la Reserva ia dise ce diferes major esiste ancora e ce on es "vera distante de un acorda". El ia ajunta ce la problemes xef restante es pensiones, impostas, e modos de finansia.

La presidente de la Consilio European ia dise ce no plu tempo resta per apostas, e ce la jua va es finida pos no longa.

Alexis Tsipras, la ministro xef de Elas, ia negosia con Jean-Claude Juncker, la xef de la Comision European, en Bruxelles en la posmedia de ier. Ma poca progresa ia es realida.

El ia fa ance un consenta en la tarda de note con la xefes franses e deutx, pos cual el ia dise ce los ia deside intensi la discutes.

La Uni European e la RMI es nonfelis sur la cuantia de reformis cual la governa elinica ofre per la relasa de 7,2 mil milion euros salvante. Se acorda per salva Elas va desvalidi a la fini de esta mense.

Plu temprana ier, asiones elinica ia alti par plu ca 8% pos cuando un comisionor de la UE ia dise ce un acorda es prosima. Ma, cuando la umor ia afonda, asionerias en otra locas ia comensa retira se, e a acel ora la asioneria de Atina ia clui ja.

Syriza, la partito sinistra de Tsipras, ia es elejeda per governa en janero, pos campania contra medios economial sever.

On crede ce Tsipras ia sede alga se opina sur reformis de IVA (imposta de valua ajuntada) en la dias resente. Ma el esije ancora alga lejeris de la deta de se pais, e esta es la problem major en la negosias. Gidores european no va aboli la detas si Elas no promete reformi.

Tsipras ia averti ce si on fali ateni un acorda per salva Elas ante la fini de junio, esta va es la comensa de la fini per la eurozona.

Se partito ia reali ier un de se prometes de campania: la difusor nasional ERT ia recomensa presenta programes, a esata du anios pos cuando on ia sustitui un compania plu peti.

2015-06-11

Un focon grave en un caferia en Queensland

Oto persones es en un state estrema grave pos cuando un camioneta ia colpa un caferia en la stato Queensland en Australia a martedi, ensendente la construida.

La xoca ia causa ce un botela de gas ia esplode a un caferia en Ravenshoe, a sude de Cairns.

La oto pasientes de state grave, scaldada asta 80%, es entre 20 persones ferida en la esplode e focon en acel vila peti de cultiverias.

Ofisiores en Queensland ia descrive esta como la aveni la plu grave de scaldas en la istoria de la stato. On ia envia ja ses persones a un ospital en Brisbane, la capital de Queensland, e du otra pasientes va es ance enviada oji.

Cameras vijilante ia mostra como la esplode ia lansa clientes a estra la caferia e longo la paseria.

Alga persones ia emerji de la construida con vestes ardente, en cuando otras ia freta per estingui la flamas.

La esplode ia destrui ambos lados de la construida, e un ora ia es nesesada per controla la focon.

On no sabe cual ia causa ce la veculo verje de sur la strada e colpa la caferia, ma alga reportas sujesta ce la gidor ia sufri un ataca de cor.

La presidente de la sentro comunial de la vila ia comenta ce lo es stonante ce cualcun ia survive la esplode. El ia dise ce un grupo de sirca oto persones vea ia es en la caferia, e ia veni de oia un presenta par pompores local sur securia contra foco.

Conselores es presente per aida vitimes, atestores, e la comunia jeneral.

2015-06-10

La fia de Nemtsov condena la propaganda jornaliste

Un fia de Boris Nemtsov, un politiciste rusce oposante ci ia es asasinada, ia acusa jornalistes pro-Cremlin de sperde propaganda odiosa. El dise ce el ia parti de Rusia per abita escluida.

Janna Nemtsova ia dise ce el ia esperia menasas, e ce esta es un de la razonas per se parti.

En un article en un jornal dial de comersia, el ia scrive ce la propaganda rusce ia sembla la edas de jenoside en Deutxland nazi e en Ruanda.

Nemtsov, un oposor major de la Cremlin, ia es matada par fusil en Moscva en febrero.

On ia aresta sinco suspetadas sur la omiside, de ci tota veni de la republica rusce Txetxnia. An tal, la investiga no ia descovre ci ia comanda la mata, e un de la sinco ia dise ce on ia forsa el a confesa.

Alga oposores de la presidente rusce Vladimir Putin ia parti de la pais en anios resente, protestante contra menasas e autoritarisme.

Vladimir Kara-Murza, un ami prosima de Nemtsov, ia es ospitalida con un problem acuta renal en la mense pasada. Dotores no ia trova la causa, e se padre ia dise ce el suspeta venena.

Nemtsova ia scrive ce la medios controlada par la governa en Rusia ia contribui a la mori de se padre par descrive el e otra gidores oposante como "tradores".

El ia acusa jornalistes progoverna de sperde odia e nontolera, e el ia demanda forte ce la Ueste puni la envolvedas.

"Multe de la testos jornaliste controlada par la Cremlin fa ce on recorda la retorica de propagandistes african. La macina de informa de Putin – simil a los en Deutxland nazi e Ruanda – usa metodos criminal de propaganda, e semi un odia cual jenera violentia e teror."

2015-06-09

Un proposa per stabili Libia

La Nasiones Unida ia presenta un proposa ru per un governa unida libi a la partitos bataliante, en un atenta de stabili la pais.

La projeta ia es desvelida entre discutes en Magrib ier, e lo sujesta un manera de ateni un sesafusili e la desarma de grupos enarmada.

Pos la suverti de Muammar Gaddafi en 2011, Libia ia desende a caos, con grupos jihadiste combatente per controla esta nasion rica de petrolio. Gerores de Stato Islamiste ia ocupa resente la sites Darnah e Surt.

Bernardino Léon, la diplomata spesial de la NU per Libia, ia recomenda forte ce la libis suporta la proposa.

A la discutores en Skhirat, el ia dise: "Oji, la popla de Libia regarda esta asembla, vos, esperante, ce vos va salva vos pais e vos popla de un gera longida. Me es plen de espera ce esta proposa ru representa un modo justa e asetable de progresa."

La documento proposa un governa nasional unida per un anio, e dise ce la parlamento elejeda en 2014 es la sola organiza capas de fa leges.

Presente, la parlamento internasional reconoseda es situada en Tubruq, un porto este. Se oposante, la Congresa Nasional Jeneral, dominada par estremistes islamiste, es a cuasi 1000 cilometres a ueste en la capital, Tarabulus/Tripoli.

On previde ce representores de ambos grupos, ci ia fa no comenta publica sur la proposa asta aora, va reasembla per plu negosias en la semana veninte.

2015-06-08

On lamenta la vitimes de un teratrema en Malaisia

En Singapor e la state Sabah en este de Malaisia, on fa un dia un lamenta per la persones matada en un teratrema a Monte Kinabalu.

Des-ses persones ia mori pos la trema de grandia 6.0, cual ia colpa la monte en Sabah a venerdi.

Entre la mores es ses enfantes singapor e se ensenior e gidor, ci ia fa un viaja instrual.

En Singapor, banderas es partal basida, e on ia silenti per un minuto a la locas de la Juas de Asia Sude-Este, cual la site-stato ospita.

A la fini de semana, Joseph Pairin Kitingan, la visministro xef de Sabah, ia relata la teratrema con un grupo de des stranjeres ci ia nudi se sur Monte Kinabalu.

El ia dise ce la trajedia es "un confirma" ce los ia mostra "desrespeta" a la monte. "Lo es un monte santa e on no pote trata nonseria lo."

Autoriosas ia identifia alga de acel turistes e ia comanda ce ofisiores de frontera vijila masima per la caso ce los atenta parti de Sabah.

Kinabalu es un de la montes la plu alta de Asia sude-este e un destina popular per paseores.

Cuando la teratrema ia aveni en la temprana de venerdi, persones de Japan, Xina, Tai, Turcia, la Pilipinas, la Rena Unida, e la Statos Unida ia es sur la monte. On reporta ce un turiste japanes e un xines ia es matada.

Plu ca 130 persones ia es salvada o ia evade. Multe ia debe trova mesma un via de desende, con aida de gardaforestas e gidores de turistes.

La teratrema ia aveni a profondia de 10 cilometres, con episentro a 54 cilometres de Kinabalu, cual ave 4095 metres de altia.

Lo ia es tan potiosa ce lo ia destrui un de la du formis de roca nomida "oreas de asino" a la culmina de la monte. Lo ia dana ance stradas e construidas, incluinte scolas e un ospital a la costa ueste de Sabah.

2015-06-07

Coreanes sude gania un concurso de robotica

Un ecipo de Corea Sude ia gania un concurso robotical internasional en Pomona en California, SUA.

La batalia de robotes ia aveni sur un curso de ostaculos, en un situa simil a la desastre de 2011 a la compleso nucleal de Fukushima.

La robot umanin DRC-Hubo ia vinse 22 otra robotes de spesies diversa, ganiante un premio de $2 milion de DARPA (la Ajenteria SUA de Projetas de Rexerca Avansada de Defende).

En min ca un ora en soma, la robotes ia debe completi un serie de taxes como gida un auto e asende un scalera.

La robotes ia es partal autonom, con sola un lia nonconstante a se operores, per copia states de desastre vera.

La defia ia es la prima en cual robotes ia opera sin es stabilida par cordas. Multe de los ia cade a tera, csusante ce la fola oservante jemi e rie.

La otra taxes per la robotes ia inclui sorti de un auto, abri un porte, crea un buco en un mur par fora, turna un valva, e traversa detrito – o par desbloci un via tra lo o par pasea sur lo.

La ecipo Kaist ganiante ia es la plu rapida, fininte tota taxes en 44 minutos e 28 secondos.

La concurso ia ocupa du dias, e ia inclui ance du taxes nonanunsiada a ante. A la dia prima, la robotes ia debe opera un lever, e a la dia du, los ia debe estrae un liador de un asetador e move lo a un otra.

On ia permete a cada ecipo du atentas per completi la curso.

25 ecipos ia intende compete, ma la ecipo Hydra de Japan ia retira se a la ora final pos un asidente eletronical. Un ecipo xines ia espera ance compete, ma no ia susede oteni puntual se visas.

2015-06-06

Un biblioteca trova ce arte mancante es mera malarcivida

En la SUA, du obras de arte valuosa, crededa mancante de la Biblioteca Publica de Boston, ia deveni trovada… en la biblioteca.

On ia reporta ce un grava par Rembrandt de 1634, e un grava de 1504 par Albrecht Dürer, es asente en april. Ma un conservor ia trova los en la scafales de imprimidas de la biblioteca a jovedi.

Adam e Eva par la artiste deutx Dürer, e la Autopitur con xapeta plumida e sabre basida par la pintor nederlandes Rembrandt, ia es trovada en la sala de conserva, malarcivida, pos un xerca de 320 mil ojetos cual ia dura tra oto semanas.

La polisia de Boston, la FBI, e un avocato federal ia investiga la situa de la obras, de cual on estima ce se valua combinada es sirca $630 mil, entre sujestas ce algun ia fura los.

Plu temprana en esta semana, Amy Ryan, la presidente de la biblioteca de pos 2008, ia anunsia se resinia.

Un esamina, con resultas publicida en la semana presedente, ia critica forte la biblioteca, acusante lo de proteje nonsufisinte alga colies spesial e de conserva valuosas en modo desorganizada.

En la mesma semana, la biblioteca ia anunsia ce monetas de oro, parente tenida en un capsula de tempo, ia asenti a desenios ante aora.

La Biblioteca Publica de Boston ia es la prima de la bibliotecas munisipal finansiada en la Statos Unida, e un de la primas de la bibliotecas publica sin custa en la mundo.

2015-06-05

Un focon grave a un gasolineria en Gana

En Gana, sirca 175 persones ia mori en un focon a un gasolineria en Accra, la capital.

La focon ia comensa en la note de mercurdi cuando la abitores de la site ia luta contra du dias de pluve forte, cual ia lasa multe de los sin casa e sin eletrica.

La inondas ia impedi la laboras de salva e ia causa cisa la focon. On crede ce persones ia es usante la gasolineria como un refuja de la deluvias cuando la focon ia esplode.

La presidente, John Dramani Mahama, ia anunsia tre dias de lamenta nasional en la semana veninte.

El ia visita la ruina de la gasolineria e ia descrive la moris como "desastrosa" e "cuasi sin presedente". El ia promete medios forte per preveni ce on construi sur vias de acua, car lo pare ce esta ia fa un rol en causa la desastre.

Pos un consenta estracomun sur modos de trata inondas, la governa dise ce lo va relasa 14 milion dolares per aida la vitimes.

Scolas ia clui tra la capital, e on ia demanda ce enfantes resta a casa.

Yaw Aforve, un biletor de bus, ia dormi en se veculo a la gasolineria cuando la focon ia comensa. El ia salta en la acuas, e cuando el ia emerji per respira, la foco ia arde se fas.

"La acua ia puxa me a la otra lado de la strada," el ia dise. "Me ia vide tan multe persones ci xilia e cria."

La pompores ia dise ce la inondas ia permete ce gasolio e gasolina flue a via de la gasolineria. A pos, un foco en un casa prosima ia causa la esplode.

Multe casas es inondada, e persones vaga en se vestes de dormi, obligada a sorti de se letos. Un om ia informa la radio local ce el ia pone se enfantes sur un armario per salva los de la acua entrante a se casa.

Meteorolojistes predise ancora plu pluve.

2015-06-04

Poliomielite diminui multe en Pacistan

En Pacistan, la cuantia de casos de poliomielite ia diminui par 70% en esta anio, car soldatos avansa teritorial en la norde contra persones combatosa ci oposa la program de vasini.

Asta aora en 2015, on ia esperia sirca 25 casos.

En otobre, ofisiores ia dise ce Pacistan ia esperia se cuantia la plu alta de casos en 15 anios, xef par causa de atacas par combatosas.

A acel tempo, la pais ia ave 200 casos, plu ca la 199 casos en 2001 ma min ca la 558 casos en 1999.

La plu de infetas de poliomielite aveni en la area tribal norde-ueste, do combatosas ataca ecipos medical. Los acusa la medicistes de es spiores, e dise ce la vasinis es un parte de un conspira ueste per sterili muslimes.

Aora, probas per la maladia en zonas do lo ia aveni comun mostra resultas negativa.

La Areas Tribal Federal Manejada ia reporta sola sete casos asta aora en 2015, e Karachi ia reporta zero.

Ayesha Raza, un avisor sur poliomielite a la ministro xef, ia dise ce la armada aida multe en ambos acel areas. "Con se aida, e con la aida de finansia de la Amirias Arabi Unida, nos ia pote estende promoves de imuni a areas de risca grande," el ia dise.

En menses resente, la cuantia de atacas contra ecipos de poliomielite ia redui clar. On ia aresta alga omes ci ia partisipa en tal atacas.

La du otra paises do poliomielite es endemica ia fa simil bon. Nijeria ia reporta no casos nova en esta anio, e Afganistan ia reporta sola un.

2015-06-03

La presidente de FIFA es investigada e va resinia

Ofisiores SUA investiga Sepp Blatter, la presidente de FIFA, como un parte de se esamina de froda a la organiza governante de futbal.

Esta ia es revelada pos cuando Blatter ia dise ier ce el va resinia.

Anunsiante se parti, la suiz de 79 anios ia clama un congresa estracomun de FIFA per eleje "tan pronto como posible" un presidente nova.

Blatter es ja la presidente de FIFA de 1998. El ia es reelejeda en la semana pasada, an pos la aresta de sete ofisiores major de la organiza a mera du dias ante la vota.

Ma el ia dise aora: "Me autoria no pare es suportada par tota persones."

On previde ce la congresa estracomun va aveni entre esta desembre e marto 2016.

FIFA ia es colpada par la arestas, cual es un parte de un prosede legal par la SUA cual ia acusa 14 persones. On alega ativias criminal incluinte blancis de mone, comersias frodante, e estorses postal.

Ier, on ia reporta ance alegas ce Jérôme Valcke, la secretor jeneral de FIFA, ia organiza un paia de $10 milion de sobornas en relata con la ofre par Sudafrica de ospita la Copa Mundal de 2010.

Separada, autoriosas suiz fa ance un investiga criminal sur la asinia de la Copas Mundal de 2018 e 2022.

Blatter dise ce el ia presenta se per reeleje car el ia senti ce esta es "la via la plu bon per futbal", ma el ia deside resinia per la benefica de FIFA. El nega forte la alegas ce el ia fa mal.

2015-06-02

Un barcon de turi xines inversa

Sinco persones ia mori e sentos manca pos la inversa de un barcon de turi sur la Rio Iangtse en la provinse Hubei de Xina. Lo ia porta 458 persones.

La barcon flota aora inversada en un parte larga de la rio. Salvores ci ia bateta la strutur esterna ia oia clamas per aida de interna.

On reporta ce la barcon, la Stela Este, ia envia no sinial de crise. Alga persones ia nada a la tera per avisa la polisia.

La plu de la persones sur la barcon ia es turistes, con 50 asta 80 anios, viajante de Nanjing, un site este, a Chongqing en la sude-ueste, un viaja de plu ca 1500 cilometres.

La labora de salva es impedida par venta e pluve forte.

On ia salva sola sirca 12 persones asta aora. Alga persones con feris minor es ospitalida.

Xina no ia esperia un desastre tan grande en un tempo longa. La governa controla forte la informa cual sorti de la sena, e jornalistes local es prevenida de prosimi.

Miles de soldatos e salvores es ativida, e on envia un barcon potiosa de salva per desinversa la barcon de turi.

La capitan e la injenior xef, de ci ambos ia es salvada pos plu ca un ora en la acua, es tenida par la polisia. On reporta ce los ia dise ce la barcon ia es colpada par un siclon e ia afonda en poca minutos, cuando multe pasajores ia dormi.

La Stela Este ave 76 metres de longia, pesa 2200 tones, e es capas de casi 534 persones.

Lo ia afonda ier en la parte Damazhou de la Iangtse en la contia Jianli de Hubei, a sirca 21:30 de ora local (13:30 de ora universal). La acua ala ave sirca 15 metres de profondia.

Salvores no ia ateni lo asta du oras e en dui, cisa plu, pos la asidente.

La barcon es poseseda par la Corpora de Barcones Este de Chongqing, cual organiza turis a la Tre Caniones, un area de belia longo la rio.

Relatadas ansiosa ia asembla estra la ofisia de la compania en Shanghai, ma lo resta cluida. Los ia dise a reportores ce los no ia susede telefoni a se amadas en la barcon.

2015-06-01

Beijing proibi fumi publica

La fumi publica en Beijing, la capital de Xina, es aora proibida pos la introdui de un lege nova.

La pais ave plu ca 300 milion fumores, e plu ca milion xineses mori de maladias relatada con fumi en cada anio.

Proibis de fumi ia esiste ja en Xina, ma los ia es neblosa e jeneral los no ia susede redui la pratica.

La regulas nova e plu sever ia es acordada par legores en novembre 2014. Los proibi fumi en restorantes, ofisias, e transporta publica en la capital. Miles de esaminores va enforsa los.

Los ci desobedi va es multada per 200 iuanes ($32), e si un compania iniora la fumi de se empleadas, on pote multa lo per asta 10 mil iuanes.

Persones ci ofende repetente va es publica nomida en un pajeria de governa.

La lege nova restrinje ance anunsias de tabaco tra la site.

La Organiza Mundal de Sania ia bonveni la regulas plu sever, comentante: "Esta lege nova va trae permanente la aira limpa a la interna de tota construidas publica de Beijing. En fa esta, lo va proteje plu ca 20 milion abitores de Beijing de la efetos matante de esposa a la fuma nosiva de otra persones."

An tal, otras crede ce mera la popularia de la abitua va difisili la enforsa de la regulas.