2019-08-13

Nos ia move!

Aora oji ia move a un casa nova, en la vici de elefen.

Lo va continua reporta sur la novas de la mundo ala.

Sua article la plu resente apare aora sempre en la paje xef de la loca nova.

Ance arcivida e esplorable ala es tota nosa 2456 articles pasada, de 31 desembre 2013 asta 13 agosto 2019.

On trova drogas efetosa contra ebola

Siensistes dise ce la maladia de la virus ebola va deveni cisa "prevenable e tratable". Esperimentas con du drogas ia mostra un taso notable aumentada de survive.

On ia proba cuatro drogas a pasientes en la Republica Democrata de Congo, do on sufri un aveni major de la virus.

Lo pare ce plu ca 90% de persones infetada pote survive si los reseta temprana la drogas la plu efetosa.

Aora, la drogas va es usada per trata tota pasientes con la maladia en RD Congo.

La Instituida Nasional SUA de Alerjia e Maladias Infetante (NIAID), cual ia cosponsori la probas, ia descrive la resultas como "novas multe bon" per la batalia contra ebola.

La drogas labora par ataca la virus con anticorpos, neutrinte sua afeta a selulas umana.

Diseda par Dr Anthony Fauci, dirijor de NIAID, los es "la drogas prima cual, en un studia siensal solida, ia mostra clar un diminui sinifiosa de mori" per pasientes de ebola.

Per developa esta drogas, on ia usa anticorpos recolieda de survivores de la maladia, cual ia mata plu ca 1800 persones en RD Congo en la anio pasada.

Du otra tratas posible ia es abandonada cuando on ia trova ce los es min efetosa.

2019-08-12

Un camiseta de Versace crea coleria en Xina

La marca lusosa Versace ia demanda per pardona car un imaje sur un de sua camisas T ia pare implica ce Hongkong e Macau es teritorios autonom.

Pos critica ferose par redes sosial en Xina, Versace ia dise ce lo ia era, e ia sesa vende la vestes.

La camisetas, de cual on ia distribui imajes en redes sosial, ia presenta duples de site e pais, como Milano–Italia e London–Rena Unida. Los ia inclui ance Hongkong–Hongkong e Macau–Macau.

Xina deveni sempre plu sever en controla como companias stranjer descrive Hongkong, cual es un parte de Xina ma con grado spesial, ofrente plu autonomia a sua popla ca on trova sur la tera xef.

Macau es un rejion manejal spesial de Xina.

En un posta a Weibo, la marca de moda italian ia dise ce lo ia sese vende la camisetas a 24 julio, e ia destrui los.

"Nos demanda per pardona per la disputa. Nos ama Xina e respeta la domina de la stato teritorial de Xina," un tradui ia dise.

La dirijor artal de la compania, Donatella Versace, ia publici un regrete simil.

"Nunca me ia desira desrespeta la domina nasional de Xina, e per esta razona me desira solisita personal un pardona per tal nonesatia e per cualce angusa cual lo ia causa cisa," el ia dise en sua conta de Instagram.

La situa ia fa ance ce Yang Mi, un ator popular en Xina e la ambasador de Versace en la pais, sutrae sua lias a la marca.

"La unia e domina teritorial de Xina es santa e nonviolable a tota tempos," un declara de sua studio ia dise.

La eticeta #YangMiStopsWorkingWithVersace ("#YangMiSesaLaboraConVersace") ia ave 860 milion regardas en Weibo a esta matina.

Versace es la compania stranjer la plu resente cual ia fronti un reata par consumores en Xina pos no segue la reclamas teritorial de la pais.

La situa ia deveni plu asentuada par menses de protestas prodemocratial en Hongkong.

En la anio pasada, Gap, compania esuan, ia demanda per pardona pos vende camisas T cual ia mostra "un mapa noncoreta" de Xina. La desinia ia mostra sola la tera xef e no la otra teritorios reclamada par Xina, como Taiuan.

Beijing judi ce Taiuan, cual governa se, es un provinse renegada.

Alga otra companias, incluinte Marriott e Delta Airlines, ia publici demandas per pardona simil en 2018, cuando informas en sua pajerias de rede ia pare contradise la reclamas teritorial de Xina.

2019-08-11

Un ataca contra un mascita norsce

En Noria, un om ia es arestada pos un fusili en un mascita cual ia feri un person ier.

La polisia dise ce un fusilor ia spara en la Sentro Muslim Al-Noor, en la anteurbe de Oslo, la capital.

Plu tarda, on ia trova un fem mor a la casa de la suspetada, relatada a el.

La suspetada ave sirca 20 anios, e es un sitadan norsce de acel rejion. El es aora ance suspetada de mata un relatada.

La polisia dise ce la om ia ata solitar cuando el ia ataca la mascita.

Irfan Mushtaq, dirijor de la mascita, ia informa jornalistes ce la person ferida es un congregor con 75 anios: "Un de nosa membros ia es sparada par un om blanca con elmo e uniforma."

El ia dise ance ce la atacor "ia porta du armas simil a fusiles, e un pistol. El ia rompe un porte de vitro e ia xuta."

La atacor, ci ia porta armur, ia es supresada par persones a la moscita ante la ariva de polisiores.

On ia trova alga armas en la mascita, cual es en la vila Bærum. La mascita ia reali plu modos de securia pos cuando un sparor ia mata 51 persones a du mascitas en Christchurch, Zeland Nova, en la plu temprana de esta anio.

2019-08-10

La libri de marores turces saisida par piratas

Des marores turces ci ia es saisida en la mense pasada, prosima a la costa de Africa ueste, es aora librida.

La omes ia es viajante a Costa de Ivor en un portacontenador, cuando la barcon ia es intersepida par piratas a la costa de Nijeria a 16 julio.

La piratas ia eleje prende esta des omes de la barcon, lasante oto otras ancora en lo.

La canal de governa turces TRT ia reporta ce la marores librida ave bon sania, sin dona plu detalias.

On no sabe clar ci ia saisi la omes, o esce on ia paia un rescate.

Sua portacontenador, la Paksoy-1, ia es en viaja de Camerun a Costa de Ivor cuando la piratas ia embarca en la Golfo Gine. Numan Paksoy, de la copmania cual maneja la barcon, ia dise ce "sirca 12 piratas con fusiles major ia ataca la barco".

El ia esplica ce la ecipores ia asconde en un sala secur, nomida la fortres, cuando la piratas ia embarca, ma los ia emerji cuando la atacores "ia menasa arde la barcon e mata tota de los".

Plu tarda, la barcon ia doci se a la porto Tema, en Gana.

Longo la Departe Maral Internasional, la Golfo Gine es la mar la plu perilosa de mundo, en pertine a piratas. 73% de tota saisis a mar e 92% de prendes de ostajes aveni ala, prosima a la costas de Nijeria, Gine, Togo, Benin e Camerun.

Sur un aveni nonrelatada, TRT ia reporta ance ce cuatro sitadanes turces, ci ia es saisida a 19 julio en la stato Kwara de Nijeria, ia es salvada a 26 julio.

2019-08-09

Venezia proibi barcones grande de sua sentro

La governa italian ia dise ce barcones grande de turi va es proibida de entra a la sentro istorial de Venezia.

Comensante en setembre, barcones con pesa de plu ca mil tones va es diverjeda de alga vias navigable.

Esta segue un asidente en junio, en cual un barcon ia colide con un doca, ferinte sinco persones.

Ma conservores dise ce la projeta de la governa no sufisi per preveni erodes su acua e contaminas en esta site de lagon.

Alga barcones va es obligada a doci se a la terminas Fusina e Lombardia, distante de la sentro. A la fini de 2020, un tri de tota barcones va es redirijeda.

Criticores dise ja longa ce ondas creada par barcones de turi sur la canal erode la fundas de la site, cual sufri multe inondas. Otras cexa ce los diminui la belia de la vistas istorial de Venezia e ce los trae tro multe turistes.

Ma la asidente en junio ia coraji protestores a recomenda un proibi asoluta. Un barcon con longia de 275 metres ia colpa un doca e un barco peti de turistes en la canal Giudecca.

Acel canal pasa prosima a la Plaza de San Marco, un loca multe popular per visitores, e es un de la vias navigable major de Venezia.

En 2013, la governa ia proibi barcones con pesa de plu ca 96 mil tones de la canal Giudecca, ma, plu tarda, la lege ia es canselada.

En 2017, on ia anunsia ce barcones plu grande va es diverjeda de la sentro istorial, ma on ia previde ce la reali de acel scema va ocupa cuatro anios.

2019-08-08

Un fem con bebe es comandada a sorti de la parlamento cenian

Parlamentores fema ia sorti de la parlamento de Cenia per suporta un colaboror ci on ia comanda a parti car el ia ave sua bebe con se.

Zuleika Hassan ia dise ce el ia porta sua bebe de sinco menses a labora par causa de un crise de casa, e ce la parlamento no ave un enfanteria.

Longo la regulas, on no permete ce "stranjeres" entra a la salon, incluinte enfantes. Alga parlamentores mas ia descrive la ata de Hassan como vergoniosa.

Christopher Omulele, presidente de la salon, ia comanda ce Hassan sorti e ce el pote reveni sin la bebe. Alga de la parlamentores ia cria e otra ia puxa lunlotra.

Hassan ia urje la parlamento a crea "un atmosfera plu conveninte per familias" si lo desira ce plu femes deveni parlamentores.

"Me ia atenta vera forte no veni con la bebe, ma oji me ia ave un crise. Cual me ia debe fa? Si parlamento ia ave un enfanteria o un beberia, me ta pote pone mea bebe ala," el ia dise.

Moses Cheboi, la vispresidente de parlamento, ia dise en un declara formal ce la compleso ave un sala do madres pote teti sua bebes. Ma madres debe "trae sua enfantor per atende la bebe en la sala en cuando los fa sua debes ofisial".

En 2017, legores cenian ia aseta un lege obligante empleores a construi salas spesial do madres pote teti e revesti sua bebes.

La suportores de Hassan ia condena sua trata, cual ia aveni en la semana internasional de teti. Alga politicistes fema en partes diversa de la mundo ia prende sua bebes a labora.

En 2018, Jacinda Arden, ministro xef de Zeland Nova, ia es la xef internasional prima de mundo ci ia prende sua bebe a la Asembla Jeneral de la Nasiones Unida en York Nova.

2019-08-07

Miliones en Zimbabue fronti un crise de nuri

La Nasiones Unida ia aumenta sua apela de crise per Zimbabue, avertinte ce plu ca sinco milion persones – un tri de la popla – nesesa aida.

La Program Mundal de Nuri ia inisia un apela per 331 milion dolares, car la pais batalia la efetos de secia, un siclon, e un crise economial.

A ves pasada, Zimbabue ia es un rejion major de produi de sereales, ma lo ia sufri anios de turba.

Recolies resente ia es grave afetada par secia, e la custa de comedas ia alti multe. Un nivel basa de acua ia afeta ance la compleso idroeletrical xef a Kariba, causante rompes continuante de eletrica tra la pais.

Inisiante la apela ier, David Beasley, xef de la Program, ia dise ce sirca 2,5 milion persones es a punto de fami. "Nos refere a persones ci marxa vera en dirije a mori de famia si nos no es asi per aida los," el ia dise. "Nos fronti un secia nonsimil a cualce cual nos ia vide en tempo longa."

La problemes de Zimbabue ia es malida cuando Siclon Idai ia pasa tra la rejion en la parte plu temprana de esta anio.

Acel tempesta jigante, cual ia colpa ance partes de Malaui e Mosambic, ia afeta 570 mil zimbabueanes e ia lasa deses de miles sin casa.

En la semana pasada, Mthuli Ncube, ministro de finansia, ia dise ce la governa furni ja gran a 757 mil casas de pos janero, en rejiones campanial e urban.

E a martedi, presidente Emmerson Mnangagwa, ci ia emprende la posto de renor longa Robert Mugabe en novembre 2017, ia declara ce la secia es un desastre nasional.

La Nasiones Unida ia apela ja per 294 milion dolares per aida Zimbabue, ma dise ce lo nesesa aora plu mone, car la efetos de la secia ia estende.

2019-08-06

Obama urje la rejeta de xefes ci tisa la odia

Barack Obama, presidente pasada de la SUA, ia urje esuanes a rejeta linguaje de cualce person xef si lo nuri la odia o normali la razisme.

Obama ia nomi no person, ma el ia fa sua comentas rara pos cuando presidente Donald Trump ia atenta diverje criticas disente ce sua retorica antimigral ia coraji violentia.

En un parla ier, Trump ia condena la odia e la supremia blanca. El ia parla pos la mori de 31 persones en sparas coletiva en la statos Texas e Ohio.

En sua posto presidente, Obama ia batalia per restrinje la posese de fusiles, sin susede. El ia dise en 2015 ce sua fali de institui "leges pratical per securia de fusiles" ia es la frustra la plu grande de sua preside.

El ia asteni de comenta sur la retorica controversa par Trump a tema de migrores, ma ia publici un declara formal ier.

"Nos debe rejeta solida," Obama ia dise, "linguaje sortinte de la bocas de cualce de nosa xefes si lo nuri un clima de teme e odia, o normali sentis raziste: xefes ci demoni los ci no aspeta como nos, o sujesta ce otra persones, incluinte migrores, menasa nosa modo de vive, o refere a otra persones como suumanas, o implica ce America parteni a sola un spesie de persones. Lo ave no loca en nosa politica e nosa vive publica. E aora es cuando la majoria vasta de americanes de bonvole, de cada raza e crede e partito political, ta dise esta – clar e nonambigua."

En sua campania presidential, Trump ia dise ce migrores de Mexico inclui vendores de drogas, criminores, e violores sesal.

Plu resente, el ia sperde coleria par sujesta ce cuatro congresores fema de color ta "revade e aida repara la locas, completa rompeda e infestada par crimin, de do los ia veni". El ia nega ce sua comentas es raziste.

2019-08-05

Un rompe grande de eletrica en Jakarta

On ia restora eletrica a Jakarta, capital de Indonesia, e sites prosima, a 12 oras pos la comensa de un perde enorme ier.

La rompe ia afeta deses de miliones de persones, e on ia evacua la metro nova abrida en Jakarta. Redes de telefoneta ia es ance afetada.

La fali ia es causada par problemes tecnical.

Cuasi des milion persones abita en Jakarta, e sirca 20 milion en la sites ensircante. Ance afetada ia es provinses visina, do plu deses de miliones abita.

La problem ia comensa ier, a mediadia de ora local, e pos nove oras, la eletrica ia deveni lenta restorada.

Perdes de eletrica aveni comun en Jakarta, ma lo de soldi ia es nonusual longa.

La airoporto internasional de la site no ia es afetada, e ospitales ia usa sua jeneradores reservada de eletrica.

Ma semafores ia descomuta en alga partes de la capital, malinte la conjesta en un site malfamosa per sua trafica.

Un pasajor de tren ia raconta: "La tren ia para subita. Nos ia debe espeta tra un tempo longa. On ia ave tan multe bebes en la vagon. Los ia plora, e persones ia cria 'abri la porte'."

2019-08-04

Arabia Saudi permete femes a viaja nondependente

Femes en Arabia Saudi pote aora viaja estra la pais sin la permete de un defendor mas.

La regula nova, anunsiada par declara rial a venerdi, capasi femes de plu ca 21 anios a solisita mesma un pasaporto, e rejistra nases, sposis e divorsas.

La rena ia laxi resente ance otra restrinjes de dura longa contra femes, ma campaniores dise ce on nesesa fa ancora plu per aumenta la diretos de femes.

Arabia Saudi ia deveni sempre plu esaminada par causa de sua trata de sua sitadanes fema, un problem asentuada par alga casos major de femes saudi ci ia xerca refuja estra la pais.

La xef par fato, prinse erital Muhammad bin Salman, ia laxi alga restrinjes contra femes, incluinte par sutrae un proibi de gida autos en la anio pasada, en atenta moderni la rena tradisional.

Ma el ia responde sever contra ativistes per diretos fema, litigante alga de los en menses resente.

La sistem de defendores mas en Arabia Saudi dona a sposos, padres e otra relatadas mas la autoria de fa desides esensal sur femes.

Asta aora, esta ia causa ce femes ala nesesa xerca la permete de acel relatadas per oteni o renovi un pasaporto per sorti de la pais.

Ma la declaras rial nova, publicida en la jornal ofisial semanal de la rena, comanda ce un pasaporto saudi ta es donada a cualce sitadan ci solisita lo, e ce persones con 21 anios o plu no nesesa un permete de viaja.

La cambias covre ance regulas de emplea cual estende per femes la posibles de labora. Longo la regula, tota sitadanes ave aora la direto de labora sin discrimina de jenero, descapasia o eda.

An pos la reformis, alga partes de la sistem de defendores mas resta. Per esemplo, femes nesesa la permete de un relatada mas per sposi o vive nondependente, e per sorti de prison pos es arestada.

Los no pote ancora transfere sitadania a sua enfantes, o dona la acorda ce sua enfantes sposi.

2019-08-03

Un governor nova controversa en Porto Rica

Un governor nova ia es inaugurada en Porto Rica, traente controversia nova a esta teritorio esuan.

Pedro Pierluisi es la seguor spesial elejeda de Ricardo Rosselló, ci ia resinia entre protestas coletiva sur un parleta esposada en cual el e aidores major ia comparti mesajes ofendente.

Ma la periodo de Pierluisi como governor va es cisa corta, car lo es ancora no validida par la Senato de la isola. Oposores dise ce la asinia es nonconstitual.

En sua parla inaugural ier, Pierluisi ia dise ce el es "intera capas e autorida per ata, ma la Senato va fa sua deside. Si me no va es validida, alora la numero du en linia, la secretor de justia de Porto Rica, va emprende la governoria."

Pierluisi ia dise ce el no intende move a la cason de governor, e va evita fa cambias major asta pos la vota en la semana veninte.

El ia es inaugurada par un judor a 17:00 de ora local a venerdi, la momento ofisial cuando Rosselló ia resinia. Multe ia critica la deside, e Thomas Rivera Schatz, presidente de la Senato, ia descrive lo como "nonetical e nonlegal".

Carmen Yulín Cruz, maior de la capital San Juan, ia dise ce la munisipa va defia la inaugura, e un organiza de avocatos ia acusa el de "diverje" la constitui.

La asinia a venerdi ia aveni en cuando folas ia selebra la cade de Rosselló.

Asemblas coletiva sur strada ia comensa en Porto Rica pos la esposa de mesajetas entre Rosselló e sua ecipo a 13 julio.

Otenida par la Sentro de Jornalisme Investigante de Porto Rica, la mesajes covre 900 pajes. Los ia es estraeda de un parleta grupal cual ia inclui la governor e des-un de sua aidores e consiliores.

La mesajes inclui bromas sur vitimes de Siclon Maria, e comentas sesiste e omofobica.

Inisial, Rosselló ia demanda per pardona, ma ia dise ce el no va resinia sur la scandal. An tal, a 24 julio, el ia anunsia sua resinia en un declara video rejistrada.

"Me senti ce mea continua en esta posto ta difisili la dura de la susede cual me ia ateni," el ia dise alora.

2019-08-02

La SUA retira se de un acorda nucleal con Rusia

La SUA va retira formal se de un acorda nucleal con Rusia, provocante temes de un corsa nova de armas.

La Acorda INF (de Fortes Nucleal de Distantia Media) ia es suscriveda par Ronald Reagan e Mikhail Gorbachev en 1987. Lo ia proibi misiles con estendes entre 500 e 5500 cilometres.

Ma plu temprana en esta anio, la SUA e OTAN ia acusa Rusia de viole la acorda par ativi un tipo nova de misil cruser. Moscva ia nega esta alega.

La esuanes ia dise ce los ave indicas ce Rusia ia stasioni alga misiles de spesie 9M729. La acusa ia es pasada a la aliadas de Washington en OTAN, de ci tota ia suporta la reclama.

Donald Trump ia anunsia en febrero ce la SUA va retira de la acorda si Rusia continua no segue lo, e ia defini oji per la limita de tempo.

Corta a pos, Vladimir Putin ia suspende ance la obligas de sua pais a la acorda.

2019-08-01

Un soldato traversa de Corea Norde a Sude

Corea Sude ia deteni un soldato de Corea Norde ci ia traversa la zona desmilitarida, forte gardada, cual divide la du paises.

El ia es detetada par aparatos de imaji termal.

La om, nonidentifiada, ia es un soldato ativa ci ia espresa un interesa en alia se con Seoul.

Desuples de persones fuji de Corea Norde en cada anio, ma traversas de la zona desmilitarida es estrema perilosa e rara.

En novembre 2017, un soldato de Corea Norde ia es fusilida a cuatrodes veses par soldatos de sua lado cuando el ia atenta traversa.

En la aveni resente, la om ia es detetada a mercurdi, sirca medianote, prosima a la rio Imjin, cual flue de Corea Norde a Corea Sude tra la zona desmilitarida en la ueste de la penisola. El ia es arestada par soldatos de Corea Sude.

Esta ia aveni en la dia pos cuando Corea Norde ia fa du lansas de misiles de distantia corta.

La ajenteria de nova de Corea Norde ia dise ce la lansas, supravideda par Kim Jong-un, ia es probas de "un sistem de roceto gidada de spesie nova, con calibre grande, capas de lansas multiple".

La probas ia es "un averti" a Corea Sude sur eserses militar projetada con la SUA, plu tarda en agosto.

2019-07-31

Un onda de caldia matante en Japan

En Japan, un om vestida como un mascote a un parce de divertis ia deveni un de la vitimes de un temperatur estrema calda cual ia mata 11 persones.

La om de 28 anios ia mori de ipertermia en la Parce Hirakata, pos spende 20 minutos en dansa portante vestes con pesa de 16 cilogrames.

Respondente, la parce ia cansela tota avenis con mascotes en esta estate.

La statistica ofisial revela ce plu ca 5000 persones ia xerca aida en ospital par causa de la onda de caldia en la semana pasada. Plu ca 50% de la ospitalidas ia ave 65 anios o plu.

On previde ce la temperatur va resta plu alta ca la promedia en la semana veninte.

La mascote ia deveni malada cuando el ia fa sua presenta a sirca 19:30 de ora local a soldi. Pos un plu dui de ora, la temperatur en la site Hirakata ia es 28,7°C. La om ia perde consensia. On ia move rapida el a ospital, do el ia mori.

En un declara formal, la compania cual posese la parce ia promete "trova la causa" de la aveni e "labora per preveni ce lo aveni denova".

En julio de la anio pasada, un periodo multe calda ia es descriveda como un desastre natural cuando lo ia mata 65 persones en un semana.

2019-07-30

Un avion militar cade sur casas en Pacistan

En Pacistan, a la min 17 persones ia es matada e 12 ferida cuando un avion militar peti ia cade sur un rejion abital, prosima a la site Rawalpindi.

Sinco ecipores e 12 siviles ia es entre la mores.

La avion ia fa un vola de eserse cuando lo ia cade, ensendente alga casas. Un atestor ia dise ce la avion mesma ia es en flamas ante la cade.

On reporta ce la avion King Air 350, con turboelica, ia fa un verje agu, prosima a la airoporto a do lo ia viaja, ante cade.

Rawalpindi, prosima a la capital Islamabad, conteni la xeferia de la armada pacistani, e la avion ia parteni a la unia de avioni de la armada.

Imajes de la loca mostra construidas negrida e reduida a detrito. Un reportor ia comenta ce fuma asende ancora de la ruina, e ce pesos de la avion es vidable sur un teto.

Alga de la persones ferida ia es rapida ospitalida. La corpos mor ia es prendeda a via per es identifiada.

Pacistan ave un istoria miscada de securia de aviones.

En 2010, un avion operada par un compania privata ia cade prosima a Islamabad, matante tota la 152 persones portada. Acel ia es la desastre la plu matosa en la istoria de Pacistan.

En 2016, un avion de la compania Pacistan Internasional ia ensende subita en un viaja de Pacistan norde a Islamabad, matante plu ca 40 persones.

2019-07-29

Un premio recordo per la campion de un jua video

Un adolesente esuan ia gania $3 milion par deveni la campion de mundo de Fortnite, un jua video. Esta es un premio recordo en la istoria de sporte video, e $30 milion ia es divideda entre la vinsores.

Kyle Giersdorf, ci ave 16 anios, ia vinse en la parte solo de la compete en la Stadio Arthur Ashe en York Nova, cual es plu famosa per sua ospita de la torneo "US Open" de tenis.

Gielsdorf, de ci sua nom enlinia es Bugha, ia sta riente e negante con testa la rujis de la fola cuando sua nom ia es anunsiada.

El ia dise ce el intende garda la plu de sua premio. "Me desira sola un table nova e cisa un table per mea trofeo."

La jua final ia es descriveda par la comentores como "un core de vinse riable", car la vinsor ia reali la defeta de sua oposores con surie a sua fas.

On vide la aveni como un momento major en sporte video, un industria con valua estimada de bilion dolares en 2019.

An tal, la recordo per la coletiva la plu grande de premios va es rompeda par un plu aveni, la Internasional, en agosto.

En la finales de Fortnite, 100 juores ia batalia sur scermos jigante de computador. Cuatrodes milion juores ia atenta cuali en des semanas de compete enlinia. Plu ca 30 nasiones ia es representada.

La jua envolve 100 persones poneda sur un isola do los debe trova armas, construi strutures, e elimina lunlotra asta cuando un juor emerji vinsente.

Lo ave 200 milion juores rejistrada tra la mundo e on pote descarga lo sin paia, ma juores pote spende mone par compras en la jua.

On pote jua solitar, o parteninte a un ecipo de cuatro o dudes membros, ci pote es o amis o persones nonconoseda.

En la mense pasada, la creores de la jua, Epic Games, ia es interogada par parlamentores brites sur esce los fa sufisinte per serti la eda de juores, e per promove la reposa de usores pos sesiones longa de jua.

2019-07-28

Inondas trapi un tren de pasajores prosima a Mumbai

En Barat, 1050 persones ia es salvada de un tren cual ia deveni trapida par un inonda, prosima a Mumbai.

Elicotores, barcos e sumerjores ia es enviada cuando la Mahalaxmi Rapida ia es encaliada, prosima a la vila Vangani, a la sera de venerdi.

On ia comanda la pasajores a resta en la tren, do los ia ave no comedas e no acua tra 15 oras.

Imajes publicida par la Forte de Responde a Desastres Nasional mostra la salva de pasajores en barcos de cauxo.

La compania Ferovia Sentral ia dise ce tota pasajores, incluinte nove femes ensinta, ia es estraeda e prendeda a securia.

Un campa tempora es instituida en la prosima, con comedas e furnis medical, e otra modos de viaja es organizada per la pasajores afetada.

Semanas de inondas de monson en Asia sude ia mata ja plu ca 600 persones.

La plu partes de la vilas Vangani, Badlapur e Ulhasnagar es sumerjida par pluves forte cual ia colpa la rejion, levante rios local.

Otra modos de transporta en Mumbai es ance afetada par inondas. 11 volas ia es canselada e alga otras ia es diverjeda a via de la airoporto.

2019-07-27

Tremateras mata en la Pilipinas

Du tremeteras en un provinse de la Pilipinas ia mata a la min oto persones e ia feri desuples plu.

La tremateras, de grados 5,4 e 5,9, ia aveni en Batanes, un arcipelago en la norde de la pais en la temprana de oji.

La maior, Raul de Sagon, ia dise ce sirca 60 persones ia es ferida. Multe ia es en sua casas cuando la tera ia trema.

On no ia avisa un risca de tsunami.

Un sarjento de polisia ia dise: "Nos ia vide casas secutente. Alga de la mures de la casas ia colasa e ia cade sur la vitimes. Alga persones ia mori car los ia es profonda dorminte, car lo ia es ancora temprana."

Imajes postada a redes sosial par la Crus Roja Pilipina mostra casas reduida a detrito.

La Pilipinas es un parte de la Anelo de Foco sirca la Mar Pasifica, un zona sismica major cual ave un de la linias de falia la plu ativa de mundo.

2019-07-26

Un serpente cade de la sofito de un legeria nijerian

En la stato Ondo en la sude-ueste de Nijeria, legores ia abandona ier sua sesion cuando un serpente ia cade de la teto.

Membros ia es a punto de comensa sua taxes de la dia cuando la serpente ia desende de un buco en la sofito. La persones en la salon ia fuji, incluinte regardores sur la balcon.

Un reporta dise ce la serpente ia morde nun, e ce ultima on ia mata e arde lo. Ma un otra dise ce lo ia serpe a via, nonferida.

Olugbenga Omole, un de la legores, ia comenta: "Acel salon es no plu secur per labora leginte, e par esta causa nos ia deside pausa pronto. La labora va es suspendeda per un tempo nondefinida."

Fumiga de la compleso es projetada per oji, cuando la legores es asente.

2019-07-25

Traversa la Manga sur un plance de jeto

Un inventor franses atenta traversa la Manga sur un plance de jeto.

Franky Zapata, un campion pasada de sci de jeto, espera traversa de Frans norde a England sude en sola 20 minutos.

La om de 40 anios ia enaira prosima a Calais e va prende carburante nova a media de la Manga par atera sur un barco.

El intende manteni la rapidia promedia de 140 cilometres per ora, viajante a 15 o 20 metres supra la acua.

La defia aveni oji per onora la aniversario 110 de la vola prima de avion a traversa de la Manga, par Louis Blériot en 1909.

Zapata ia parti de la plaia a Sangatte a sirca la ora nove de ora local. La minuto esata ia depende de la clima e trafica maral.

Si el susede, el intende atera en Dover, a distantia de sirca 35 cilometres.

Ante la vola, el ia dise: "Nos ia crea un modo nova de vola. Nosa no usa alas. On es como un avia: sua corpo es lo cual vola. Lo es un fantasia de mea enfantia."

El ia averti ce la venta va complica cisa la traversa.

Zapata ia reseta multe atende pos la parade anial a la festa nasional franses en Paris a des dias ante oji, cuando el ia partisipa en un presenta militar sur sua veculo futurin.

La inventa, cual ave la grandia aprosima de un scet, es propulsada par sinco motores peti de jeto. Per carburante, lo usa cerosen tenida en la bolson de sua pilote.

2019-07-24

Parlamentores franses boicota un parla par Greta Thunberg

Greta Thunberg, ativiste adolesente contra la cambia de clima, ia critica legores franses ci ia burla el, en un parla a la parlamento cual ia es boicotada par politicistes estrema destriste.

La xica de 16 anios ia parla ier a la legores, urjente los a "uni per la siensa" de la clima cambiante.

El e otra enfantes ia es invitada a la parlamento de Frans par un grupo de politicistes multipartital. "Vos no debe escuta nos, ma vos debe escuta la siensa," el ia dise.

On ia loda Thunberg, de ci sua protesta solo estra la parlamento svensce ia inspira un promove de greves climal par scolores, per sua parlas emosiante a politicistes.

Ma legores de partitos franses, incluinte la Republicistes conservaliste e la Reasembla Nasional a la destra estrema, ia dise ce los va evita sua parla en la parlamento.

Recomendante ce sua colaborores boicota la parla de Thunberg, Guillaume Larrivé, aspiror per gida la Republicistes, ia tuita: "Nos no nesesa gurus de la apocalise."

Otra legores franses ia lansa insultas a Thunberg ante sua parla, nominte el "un profetesa en pantala" e "la Justin Bieber de ecolojia". Julien Aubert, ci ance espera gida la Republicistes, ia sujesta ce Thunberg ta gania "un Premio Nobel de Teme".

Jordan Bardella, un parlamento european per la Reasembla Nasional, ia egali la labora campaniante de Thunberg a "un tirania de emosia eterna".

Membros de otra partitos, como la Verdes e En Marche, la sentristes de la presidente Emmanuel Macron, ia es plu suportosa de sua apare.

En sua parla, Thunberg ia responde a sua criticores e ia repete sua esijes ce governas ta ata rapida per restrinje emetes de carbono.

Parlante en engles, el ia dise ce enfantes como el ia deveni "la viles" car los ia osa dise a politicistes "cosas noncomfortante" sur la clima cambiante. "E mera car nos sita o reata a esta mesuras, esta fatos siensal, nos reseta cuantias nonimajinable de odia e menasas. Parlamentores e jornalistes burla nos e menti sur nos," el ia ajunta.

La adolesente ia inisia un promove joven internasional pos fa un "greve de scola per clima" ante la parlamento de Sveria en agosto de la anio pasada.

Pos alora, el ia encontra la Pape e ia parla a la Parlamento European, vergoniante politicistes per lo cual el regarda como un manca de reata a la cambia de clima.

Thunberg ia es cruel atacada par jornalistes e troles en Twitter, ma politicistes usa tipal un retorica plu considerada cuando los critica el.

Parlamentores verde ia reproxa la tono bruta de la critica par legores franses. Delphi Batho, xef de la partito Jenera Ecolojia, ia dise: "Larrivé e Aubert fa un jua interna a dorso de la batalia contra la clima cambiante."

2019-07-23

Un rompe de eletrica tra la plu de Venezuela

Venezuela ia esperia un plu rompe major de eletrica, e la capital Caracas ia es entre la rejiones afetada. On crede ce no min ca 18 de la 23 statos de la pais ia perde sua eletrica.

La ministro de informa ia dise ce la problem ia es causada par "un ataca eletromagnetal", e ce ofisiores labora per restora la sistem.

En marto, un serie de tal rompes ia aveni en Venezuela, incluinte un cual ia afeta tota 23 statos e ia dura tra un semana, creante mancas de furnis e provocante tumultas.

Un plu rompe en april ia pone partes grande de la pais en oscuria, ma lo ia dura tra mera alga oras, no dias.

Perdes acaso de eletrica aveni comun en Venezuela, do la economia ia colasa en un crise political.

Presidente Nicolás Maduro e otra ofisiores de la governa ia culpa terorisme e sabotas par sua oposores, alegante ance un envolve par la SUA. La oposores dise ce la rompes resulta de anios de froda e suinvesti.

La compania de eletrica Corpolec, cual es poseseda par la governa, ia reporta plu temprana ce la problem ia afeta sola partes de Caracas.

Juan Guaidó, xef de la oposores, e la presidente batalia ja de janero, cuando la prima ia usa la constitui per declara se como presidente tempora. El ia razona ce la votas cual ia reeleje Maduro per sua periodo du en 2018 no ia es libre e justa.

A pos, plu ca 50 paises, incluinte la SUA e la plu de nasiones en America latina, ia reconose Guaidó como la xef legal de Venezuela. Ma la militar potiosa de la pais, como ance aliadas influosa como Xina e Rusia, ia resta a lado de Maduro.

Un atenta par Guaidó per veni la militar a sua lado ia fali, e la pais resta pendente, con ce ambos omes reclama se como la presidente vera.

Discutes inisial entre la du ia aveni en Oslo en maio, ma los ia fali sin acorda. On ia recomensa los en la plu temprana de esta mense, denova su arbitra de la ministreria de esternas norsce.

Entretempo, la crise economial ia mali, e mancas de comedas e medisines ia deveni sempre plu grave.

2019-07-22

On va move salmones par elicotor pos un lisca de tera

Miles de salmones canadian va es elicotorida a securia pos deveni trapida par un lisca de tera.

En junio, ofisiores ia trova ce la rocas ia bloci un parte de Rio Fraser en Columbia Brites, preveninte la salmon de nada contra la corente per ovipari.

Salvores ia spende semanas en prepara un metodo de vola la pexes par elicotor a un loca a la otra lado de la rocas cadeda.

Conservores de natur averti ce la pexes nesesa ovipari per no perili la popla local de salmones. Multe de la poplas umana nativa de Canada depende de la salmones per nuri se e per usas ritual.

On no sabe esata cuanto pexes es trapida, ma on crede ce sola 700 ia susede pasa tra la rejion afetada par la lisca, sin aida. Ofisiores no ia dise cuando la transporta va comensa.

On construi aora un stange per teni la salmones, de do los va es moveda a tances de entre 780 e 2700 litres cual un elicotor va porta a via de la rocas liscada.

La acua en la tances va es osijenida per aida calmi la pexes.

En cuando on construi la stange, otra laborores eticeti la salmones per pote trasa sua viaja a pos.

Ecipos ia atenta move la rocas la plu grande per fasili alga ce la pexes mesma pasa. Los ia prende a via ance rocas de un falesa prosima cual ta pote es perilosa per la persones laborante ala.

2019-07-21

On ia atera sur la Luna a sincodes anios ante aora oji

On selebra la aniversario sincodes de la atera prima sur la Luna, cuando la modulo Agila de Apolo 11 ia ariva a la Mar de Calmia e Neil Armstrong ia deveni la person prima ci sta sur la Luna.

Orijinal inspirada par la compete entre la SUA e la Uni Soviet en la Gera Fria, la mision es aora recordada como un momento major la mundo intera.

Armstrong ia es acompaniada par Buzz Aldrin e Michael Collins. Tota ia nase en 1930. Aldrin e Collins vive ancora, ma Armstrong ia mori en 2012, con 82 anios.

Michael Collins ia comenta ce el no pensa multe aora sur la mision. "Me ave un vive cuieta. Cisa me pasea longo mea strada a note, cuando lo comensa deveni oscur, e me sensa alga cosa supra mea spala destra – e me regarda a supra e vide acel ageta peti arjento e me pensa: 'O! acel es la Luna. Me ia es ala!'"

Plu temprana ier, en un lansa coaveninte con la aniversario, un barcon spasial portante astronautas de la SUA, Rusia e Italia ia enaira de la lanseria Baiconur en Cazacstan.

Cuando la roceto ia es lansada, un presentor de NASA ia dise: "E la enaira – a sincodes anios pos un paso peti per un om, la roceto Soiuz e sua ecipo multinasional fa un salta jigante de la lanseria, dirijeda a la Stasion Spasial Internasional."

2019-07-20

Bolsonaro nega datos sur la desforesti de la Amazona

Jair Bolsonaro, la presidente de Brasil, ia acusa ce la ajenteria nasional de spasio de sua propre pais ia menti sur la cuantia de desforesti en la Amazona.

El ia dise ce la organiza mali la reputa de Brasil en otra paises par publici datos mostrante un crese notable de desforesti ala.

La presidente estrema destriste ia dise ce el vole encontra la xef de la ajenteria per discute la situa.

La Instituida Nasional de Rexerca Spasial (INPE) dise ce sua datos ave un coretia de 95%.

Bolsonaro ia fa sua comentas ier, a la dia pos cuando datos inisial de satelito, publicida par INPE, ia indica ce plu ca 1000 cilometres cuadrida de la foresta pluvosa ia es destruida en en la 15 dias prima de esta mense: plu par 68% ca en la intera de julio 2018.

Parlante en un consenta con jornalistes stranjer, Bolsonaro ia dise ce la datos "no relata con la realia".

Siensistes dise ce la Amazona ia sufri perdes aselerada pos la ariva de Bolsonaro a sua posto en janero, con politicas cual favore la developa plu ca la conserva.

Como la foresta pluvosa la plu grande de mundo, la Amazona es un conserveria esensal de carbono cual redui la rapidia de la caldi global.

La statistica ofisial sujesta ce la razona major de cade arbores ala es per crea pastos nova per boves.

Tra la desenio pasada, governas presedente ia susede redui la desforesti, coordinante respondes par ajenterias federal e usante un sistem de multas.

Ma Bolsonaro e sua ministros ia critica esta punis e ia supravide un diminui notable de confiscas de lenio nova e de condenas per crimines ambiental.

Alga instituidas siensal, incluinte la Academia Brasilera de Siensas, ia defende INPE e la coretia de sua datos.

En sua comentas a jornalistes stranjer ier, Bolsonaro ia nega ance la esiste de famia en Brasil. El ia dise ce on ave "no persones sur la stradas con corpos sceletin como on vide en otra paises".

Ma longo datos de la Organiza de la Nasiones Unida per Nuri e Cultiva, 5,2 milion persones ia sufri de famia en Brasil en 2017.

2019-07-19

Un tigre dormi sur un leto en un casa barati

En Barat, un tigre fema ia fuji en la stato Assam, e un abitor local ia trova el reposante sur un leto en sua casa.

On crede ce la tigre ia sorti de la Parce Nasional Kaziranga, do 50 animales ia mori par causa de inondas major en dias resente.

Ofisiores de un organiza de conserva ia vade a la casa, e ia crea un via secur per la parti de la tigre. On ia gida el en dirije a la jungla.

La tigre ia es prima videda a lado de un via xef en la matina de ier, a 200 metres de la parce. Probable el ia deveni disturbada par la trafica e ia refuja se en la casa, prosima a la via.

La posesor de la casa e la boteca visina ia core, como ance sua familia, cuando los ia vide la tigre entrante. La person dise ce el va conserva la tela e cuxin sur cual la tigre ia reposa.

Trafica ia es blocida per un ora e on ia esplode petardos per velia la bestia, ci ia sorti de la casa a 17:30 de ora local, vadente a la foresta. On no sabe esce el ia entra a la foresta o ia pasea mera a un otra area visina.

La parce, reconoseda par UNESCO, ave 110 tigres.

Inondas de monson ia afeta grave Bihar e Assam, statos en la este de la pais, matante plu ca 100 persones e deslocante miliones.

La saison de monsones aveni entre junio e setembre. En esta anio, lo ia causa caos ance en Nepal e Bangladex.

2019-07-18

Un ensende criminal a un compania de anima en Japan

En Japan, a la min 12 persones ia mori, e desuples ia es ferida, en un ataca suspetada de ensende criminal contra un studio de anima en Kyoto. La loca de 30 persones resta nonconoseda.

La polisia ia dise ce un om ia entra par forsa a la studio de la compania Kyoto Animation en la matina de jovedi, e ia jeta un licuida nonidentifiada.

On ia deteni la suspetada, ci on no ia nomi, e ia ospitali el con feris. La polisia ia trova ance coteles.

La focon ia comensa en la construida de tre niveles sirca 10:30 de ora local en jovedi. On continua ancora la opera de salva.

On reporta ce la om ia dise "cade mor" cuando el ia ensende la construida. Sua relata con la compania no es clar.

Atestores ia descrive un esplode forte, segueda par un enferno cual ia engoli rapide la construida.

Kyoto Animation, conoseda como KyoAni, ia es fundida en 1981. Lo ia produi programes animada popular, incluinte "K-On" e "La Melancolia de Haruhi Suzumiya".

En redes sosial, multe fanes ia espresa sua xoca e ia posta imajes de sua programes favoreda de KyoAni.

Un campania de finansia coletiva, titulida "Aida KyoAni a Sani" ia es ance inisiada, coliente cuasi $30 mil en un ora.

2019-07-17

Formicas aspeta como pluve en un mapa meteorolojial

Xamas enorme de formicas volante en la sude de England ia apare sur un mapa meteorolojial, aspetante como pluve.

Un cuantia vasta de lo cual la Ofisia Meteorojial la descrive como "insetos desordinada" ia es rejistrada par sistemes de radar entre 8:00 e 11:00 de ora local.

Nubes de la insetos ia es vidable, movente a este, sur la mapa interatante de clima.

La altia do ia formicas ia flota en la atmosfera, prosima a la funda de un nube, e sua cuantia jigante ia permete ce la sistemes de radar deteta los.

Rexercores ia sujesta ce on no ave un sola dia de formicas volante en la Rena Unida, ma un studia de la insetos ia trova ce los vola a alga loca en la pais a 96% de dias entre la comensa de junio e la comensa de setembre.

La moves es causada par la volas per reprodui de la reas nova e la formicas mas.

2019-07-16

Congresores fema responde pos un ataca par Trump

En la SUA, cuatro congresores fema ci ia es atacada par presidente Donald Trump en tuitas vasta condenada como raziste, ia rejeta sua comentas como un distrae.

Representores Alexandria Ocasio-Cortez, Ilhan Omar, Ayanna Pressley e Rashida Tlaib ia recomenda ce la popla esuan "no segue la tenta", a un confere jornaliste ier.

Trump ia sujesta ce la cuatro femes, de ci cada es un sitadan de la SUA, "pote parti". El ia defende sua comentas e ia nega alegas de razisme.

Parlante a reportores, tota la cuatro femes ia dise ce on debe foca a politica e no a la parolas de la presidente.

"Esta es simple un disturba e un distrae de la caos calosa e cultur nononesta de esta governa, tra tota niveles," Pressley ia dise.

Omar e Tlaib ia repete sua recomendas ce on acusa Trump de malcondui.

Tre de la femes ia nase en la SUA. Omar ia nase en Somalia.

Los ia responde pos un arenga en Twitter par Trump a soldi, comandante la cuatro femes a "revade per aida repara la locas completa rompeda e infestada par crimin, de do los ia veni".

La comentas de Trump ia es jeneral condenada como raziste e xenofobica.

2019-07-15

Un militior burundes gida la difusante nasional

En Burundi, la xef de un militia acusada de atas odiable ia es elejeda per gida la difusante nasional (RTNB), provocante condenas par organizas suportante diretos umana.

La grupo Human Rights Watch ("Vijila de Diretos Umana") ia dise ce la asinia de Eric Nshimirimana es "un colpa contra tota vitimes de maltrata fada par Imbonerakure, como ance contra la libria jornaliste en Burundi".

On alega ce Imbonerakure, la ala joven de la partito governante, ia mata, viole e ruba ativistes oposante. La governa ia nega la alegas.

Imbonerakure ia es acusada de multe maltratas pos la eruta de violentia cuando presidente Pierre Nkurunziza ia xerca e gania un periodo tre, en un paso controversa, en 2015.

Nkurunziza ia survive un atenta de colpa de stato e protestas coletiva, e deses de miles de persones burundes ia fuji de la violentia.

La Nasiones Unida ia nomi Imbonerakure un militia, un descrive cual la grupo rejeta como insultante.

La governa de Burundi ia nega alegas ce Imbonerakure ia envolve se en maltratas, spesial en la viole sesal coletiva de relatadas fema de ativistes oposante. "Imbonerakure no es un gang de violores," un portavose per la presidente ia dise.

Elejes nova es projetada per la anio veninte. Cambias constitual asetada en 2018 permete ce Nkurunziza aspira denova la posto, ma el ia dise ce el no va fa esta.

2019-07-14

Misre abri un piramide curva

Misre ia abri un piramide curva, prosima a Qahira, en un cambia cual parteni a un stratejia plu jeneral per crese turisme.

La Piramida Curva a Daxur ia es construida per la faraon Snefru a sirca 2600 aec. Orijinal, on ia intende ce lo va es un piramida vera, con angula presipe de 54 grados.

Ma lo ia es construida sur arjila mol e arenin, e on ia encontra problemes de stablia e afonda. Per solve, on ia cambia la angula a sola 43 grados, cuando la strutur ia ave ja 45 metres de altia.

La forma nonusual cual ia resulta es contrastada con la lados reta de la Piramide Roja direta a norde.

Visitores pote aora trepa tra 79 metres per desende un tunel streta, de un porte levada en la lado norde, per ateni du cambras en la interna profonda de la construida.

Arceolojistes ia presenta ance momias, mascas e utiles descovreda en la escavas cual los ia comensa prosima a la piramides de Daxur en la anio pasada, e cual continua ancora.

Turisme es un fonte importante de revenu per la pais.

2019-07-13

Un roceto es perdeda corta pos enaira

Un roceto Vega de la compania Arianespace ia es perdeda a poca minutos pos sua enaira. Esta es la fali prima en 15 lansas de tal rocetos.

Lo ia porta un satelito militar per la Amirias Arabi Unida cuando lo ia enaira de la porto spasial european en Guian Franses a la sera de mercurdi.

On crede ce lo ia cade en la Mar Atlantica a norde de la sentro spasial.

Luce Fabreguettes, la vispresidente dirijial de misiones, ia dise ce "un anomal major" ia aveni a sirca du minutos pos la enaira, cuando la fase du ia ensende.

"Per Arianespace, me desira espresa nosa regretes la plu profonda a nosa clientes per la perde de sua carga," el ia dise. "De la analise prima de la datos de vola, nos va reseta informas plu esata en la oras veninte, e nos va comunica tan pronto como posible a tota."

On no ia conose direta la causa de la fali. La vola ia es ja posponeda a du veses par mal clima.

La roceto ia porta un satelito nomida FalconEye1, la prima de du cual va composa la sistem FalconEye de la Amirias.

Vega (Vettore Europeo di Generazione Avanzata, italian per "Transportador European de Jenera Avansada") ia fa sua vola prima en 2012. Lo ia es developada per permete ce paises european envia satelitos peti a spasio.

Arianespace, con base en Frans, vende esta sistem de rocetos de cuatro fases, developada en junta par la Ajenteria Spasial de Italia e la Ajenteria Spasial European.

2019-07-12

Un monton de turistes nonrespetosa asende Uluru

En Australia, turistes a Uluru ia condui controversa par asende la roca santa en cuantias vasta en la menses ante la proibi de esta.

Fotos enlinia mostra filos serpente de persones asendente Uluru.

On critica esta como desrespetante la popla pidjandjadjara orijinal, ci demanda ja tra tempo longa ce turistes no asende.

Abitores local dise ce alga turistes lasa dejetadas e campa nonlegal en la prosima.

A du anios ante aora, la comite de la Parce Nasional Uluṟu-Kata Tjuṯa ia acorda unida fini la posible de asende, par causa de la sinifia spirital de la loca. La proibi va comensa en otobre.

La monolito jigante de arenito roja, istorial conoseda como Ayers Rock, ia esperia un crese de cuantia de visitores pos la anunsia de la deside.

Un oposor ia tuita: "Esce lo es imajinable ce persones ta comensa trepa sur la Monumento Australian de Gera?"

Avisas a la pede de la roca solisita ce persones asteni de asende, como punto de respeta.

La presidente de la comite de la parce ia dise en 2017: "Lo es un loca estrema importante, no un jueria o parce de divertis como Disneyland."

Parks Australia, un divide de la Departe de Ambiente e Enerjia, ia reporta ce la parce ia reseta 70 mil plu visitores en 2018 ca en la anio presedente. La statistica per la menses resente es ancora nondisponable.

2019-07-11

Un tempesta subita mata turistes en Elas

Ses turistes ia es matada e a la min 30 otra persones ia es ferida en un tempesta violente cual ia traversa un parte de Elas norde.

Ventones, pluve forte e graniza ia bate Halkidiki, prosima a la site Thessaloniki, en la tarda de ier.

Un duple txesce ia mori cuando sua caravan ia vola tra la aira.

Un fem romanian e sua enfante ia es matada par la colasa de la teto de un restorante en Nea Plagia.

Un om rusce e sua fio ia es matada par un arbor cual ia cade prosima a sua otel en Potidea, un vacanseria costal.

La governa ia declara un state de crise e ia envia plu ca sento laborores de salva.

La tempesta ia segue un periodo de clima multe calda en Elas. La temperatur ia ateni 37°C en la du dias pasada.

Imajes e videos en redes sosial mostra arbores cadeda, autos inversada, e construidas danada.

On dise ce esta tempesta estracomun ia dura tra mera 20 minutos.

La ministro de proteje de sitadanes, Michalis Chryssohoidis, va visita la rejion oji.

2019-07-10

La resinia de la ministro de finansia mexican

La ministro finansial de Mexico ia resinia par causa de desacordas con Andrés Manuel López Obrador, la presidente sinistriste de la pais.

En un letera, publicida en sua conta de Twitter, Carlos Manuel Urzúa Macías ia dise ce on ave multe "devias" economial, e ce politica economial debe es fundida sur fatos e libre de "estremisme".

El ia scrive ance ce el trova ce "la introdui de ofisiores sin sabes sur finansia publica" es "nonasetable". La mercatos finansial ia cade pos la anunsia de sua resinia.

Arturo Herrera Gutiérrez ia deveni aora la ministro finansial de la economia du de la plu grandes en America Latina. En sua confere jornaliste prima, el ia dise ce el no previde un retrosede.

La economia de Mexico ia diminui par 0,2% en la cuatri prima de 2019.

López Obrador ia deveni presidente par promete reali un "muta radisal" de sua pais per furni un crese economial, empleas nova, e programes de developa sosial.

An si la asinia de Herrera, un ofisior reconoseda per sua capasia tecnical, va pasi alga investores, on previde ce consernas jeneral sur la economia de Mexico va continua.

2019-07-09

Arestas de patinetores enebriada en Kobenhavn

En Danmarc, la polisia ia aresta 28 persones en Kobenhavn ci ia viaja sur patinetas eletrical su influe de drogas o alcol.

En la fini de semana, 24 patinetores ia es arestada per sua enebria par alcol, e cuatro per sua state pos usa drogas recreal.

La polisia ia anunsia la arestas a Twitter, pos un colpa contra la usa nonsecur de patinetas en la capital dansce en la plu temprana de esta anio.

Gidores enebriada debe paia un multa de 2000 krones ($300 dolares esuan).

Patinetas eletrical ia deveni plu popular en Kobenhavn pos alga cambias de la regulas trafical cual ia fasili sua usa. On lua la patinetas par ap, e on pote parci los a cualce loca en un zona definida.

Esta modo de transporta reseta resenias diversa. Abitores local cexa sur plu feris e sur la nonoportunia per se.

On ia introdui patinetas eletrical ance en alga sites tra Europa, como ance San Francisco, la Site Mexico, e York Nova.

En junio, la maior de Paris ia anunsia un colpa contra la usa de la patinetas, seguente un crese de la cuantia de persones ferida. El ia dise ce la situa es "no nonsimil de anarcia" e ce sua site nesesa reali "ordina e regulas per serti la securia de vias".

2019-07-08

Un astronauta african futur mori en un colide

Un sudafrican ci ia gania la oportun de deveni la african negra prima en spasio ia mori en un asidente de motosicle ante pote reali sua sonia.

Mandla Maseko, ci ia ave 30 anios, ia es matada a saturdi.

En 2013, esta membro de la Forte de Aira Sudafrican ia vinse milion otra competores per gania un de 23 locas en un academia de spasio en la SUA.

Con la nometas Afronauta e Xico de Spasio, Maseko ia descrive se como un xico tipal de geto de Pretoria.

El ia pasa un semana a la Sentro Spasial Kennedy en Florida, fante probas preparante per un vola suorbital de un ora, orijinal ajendida per 2015.

Maseko ia dise ce el desira fa alga cosa cual va motiva e inspira persones joven en Africa, e demostra ce los pote reali cualce cosa, contra cualce fondo.

El ia dise a la BBC ce el intende telefoni los de spasio: "Me espera ce me ave un frase cual on va usa en anios veninte, como lo de Neil Armstrong."

Acel astronauta esuan, ci ia mori en 2012 a la eda de 82 anios, ia es la person prima ci ia pasea sur la Luna en 1969. Cuando el ia pone sua pede sur la surfas lunal, el ia dise famosa: "Acel es un paso peti per un om, un salta jigante per umanas."

2019-07-07

La persones de Elas eleje un parlamento nova

La elinicas vota oji per eleje un parlamento nova. La oposantes sentral destriste defia la governa sinistriste.

La partito Democratia Nova de Kyriakos Mitsotakis espera fini plu ca cuatro anios de governa par la partito Syriza de Alexis Tsipras, la ministro xef.

Tsipras ia inisia un vota subita pos sua defeta en la elejes european en maio. Esta es la vota ses en Elas pos la crise finansial global en 2008.

La crise ia provoca un serie de rescates finansial, en cuando la economia elinica ia diminui par 28% entre 2008 e 2016. La nonemplea ia povri multe persones elinicas. Elas ia parti de la program de rescates en agosto de la anio pasada, e la crese ia reveni.

Mistotakis promete impostas min alta, privatis plu grande de servis publica, e projetas per renegosia un acorda con la creditores de Elas cual ta permete ce on reinvesti plu mone a la pais.

Tsipras, ci ia veni a governa e 2015, ia promete investi plu, e ia aumenta resente la pensiones. Ance sua propre politicas de investi ta debe es renegosiada con creditores, car la pais resta supravideda par la eurozona.

Per entra a la parlamento, cada de la multe partitos en la pais nesesa gania a la min 3% de la votas. Cisa tan multe como sete de los va gania sejas.

La partito vinsente va reseta 50 plu sejas de regala, e nesesa ave 151 sejas en la parlamento de 300 sejas per teni un majoria.

En la elejes european, Democratia Nova ia gania 33,11% de votas contra 23,78% per Syriza. La proportio la plu alta (30,5%) de persones con entre 18 e 24 anios ia suporta Democratia Nova en acel elejes.

2019-07-06

Un politiciste quebecan posta un foto controversa

Un ministro de educa en Quebec es criticada per posta un foto de se con Malala Yousafzai, campanior educal. Esta ganior de la Premio Nobel de Pas, ci porta un tela de testa, no ta pote ensenia en acel provinse canadian.

En junio, Quebec ia aseta un lege controversa cual proibi alga ofisiores publica, incluinte enseniores, de porta simboles relijial como cipas, turbanes o hidjabes en sua labora.

La ministro Jean-François Roberge ia dise ce el ia discute asedes educal e developa internasional con Yousafzai.

Malala Yousafzai ia es fusilida par un militariste taliban en Pacistan en 2012 par causa de sua ativisme umaniste. A pos, on ia reconose el a grado internasional per sua labora campaniante per educa de xicas.

La lege nova pertine a judores, polisiores, enseniores e alga otra figures publica con autoria. Lo ia provoca protestas e multe debate en la provinse. Suportores dise ce lo es un paso asetable en dirije a la separa formal de la eglesa e la governa en Quebec.

An si la lege no identifia relijios spesifada, oposores razona ce lo es discriminante e nonjusta, afetante femes muslim en la provinse ci porta hidjabes o otra covrentes de testa.

Alga comentores enlinia ia descrive la ministro como ipocrita per es fotada con Yousafzai.

Roberge, ci ia encontra el cuando ambos ia es en Frans, ia defende la lege cuando un jornaliste ia demanda como el ta responde si Yousafzai ta desira ensenia en Quebec.

"Me ta informa serta ce lo ta es un onora enorme, e ce en Quebec, como ance en Frans (do nos es aora) e en otra paises abrida e tolerante, enseniores no pote porta simboles relijial cuando los fa sua taxes," el ia dise.

2019-07-05

Frodores asede contas de clientes de 7-Eleven en Japan

En un fali notable de securia, clientes japanes de 7-Eleven, un cadena de supramercatos peti, ia perde miliones de enes cuando frodores ia susede asede sua contas enlinia.

Plu temprana en esta semana, la compania ia inisia un ap de telefon per paias eletronical, sin comprende la risca de securia.

La contas de sirca 900 clientes en Japan ia es atacada, perdente 55 milion enes (510 mil dolares esuan) en combina. La compania ia suspende la ap e ia promete repaia la mone a la clientes.

En un afirma, 7-Eleven ia dise ce persones nonautorida ia es capas de asede la contas de persones usante sua ap 7pay, imita esta persones, e fatura sua contas par la carta rejistrada de credito o banco.

La era ia permete criminores a solisita un reinisia de la parola secreta de la conta de cualce person. Los ia pote alora envia la lia de recovre a sua propre adirije de eposta, no lo de la posesor de la conta.

La sistem per reinisia la parola secreta ia demanda mera per informas minima, como la data de nase e la adirije de eposta de la posesor de la conta. En multe casos, tal informas ia es enlinia e fasil disponable.

La compania ia dise ce lo ia sesa aora aseta usores nova e ia suspende la usa de cartas de credito con sua ap.

2019-07-04

Un volcan eruta en Italia

Un volcan ia eruta sur Stromboli, un isola italian, matante un person e fujinte turistes asustada.

La vitim ia es un paseor mas. El ia es colpada par un petra cadente. On ia descovre sua ami brasilera desidratada e xocada. Otra persones ia es ferida.

La marina es preparada per fa cisa un evacua coletiva. 70 persones es ja evacuada. Pompores batalia focones sur la isola.

La volcan es un de la plu ativas sur nosa planeta, en un state de eruta periodal de 1932.

Un laboror de otel ia comenta: "Nos ia vide la esplode de la otel. On ia ave un ruji forte. Nos ia tapi nosa oreas, e pos esta, un nube de sene ia traversa nos. La sielo intera es plen de sene, un nube alga grande."

Un turiste sur la isola Panarea, a cuasi 30 cilometres de la volcan, ia oia la eruta. "Nos ia turna e ia vide un nube xampinionin veninte de Stromboli. Cadun ia es xocada. Alora lava roja calda ia comensa desende la monte en dirije a la vileta peti Ginostra."

On reporta ce vacansores ia core en la mar pos vide sene asendente de la volcan. La isola es un loca popular per casas de vacanse per persones rica e famosa.

Stromboli ave la nometa "Faro de la Mediteraneo" e es abitada par sirca 500 persones. La eruta major la plu resente ia aveni en 2002, cuando un esplode ia destrui construidas e molos, ferinte ses persones.

2019-07-03

14 marinores mori en un sumarina rusce

Un focon en un barcon sumerjable rexercante de la marina rusce ia mata 14 ecipores. Los ia es venenida par vapor nosiva cuando los ia fa mesuras en acuas teritorial de Rusia en lundi.

La ministreria de defende ia furni no detalias sur la tipo de barcon, ma on reporta ce lo ia es un minisumarina nucleal, usada per operas spesial.

Ultima, on ia estingui la focon, e la barcon es aora a Severomorsk, la base xef de la Flotila Norde Rusce.

On no ia revela cuanto persones ia es en la ecipo a la tempo de la asidente. Reportas en jornales local dise ce alga ecipores ia es ferida e ospitalida.

La comandor xef de la marina ia inisia un investiga.

Ier, Vladimir Putin, presidente de Rusce, ia retira se de un aveni ajendida en la rejion Tver, a norde-ueste de Moscva, per discute la asidente con Sergei Shoigu, ministro de defende.

Putin ia descrive la asidente como un perde grande per la marina rusce, e ia espresa compatia a la familias de la vitimes. El ia dise ance ce sete capitanes e du empleadas portante la titulo onorosa la plu alta, Eroe de la Federa Rusce, ia es entre los ci ia mori.

2019-07-02

La pasea epica de un volpe artica

Un volpe artica joven ia pasea a traversa de la jelo en un viaja epica de la isolas Svalbard en Noria asta la norde de Canada. Lo ia traversa 3506 cilometres en 76 dias.

En la tarda de marto de la anio pasada, rexercores a la Instituida Polal de Noria ia pone un aparato de jeolocali a la fema joven, e ia libri el su la sielo de la costa este de Spitsbergen, la isola xef de la arcipelago Svalbard.

La volpe ia ave min ca un anio cuando el ia comensa pasea a ueste per xerca comedas, arivante en Gronland pos sola 21 dias e un viaja de 1512 cilometres.

On ia locali el sur Isola Ellesmere en Canada, pos cuasi 2000 plu cilometres e sola 76 dias pos sua parti de Svalbard.

Nunca a ante, on ia rejistra un volpe cual ia viaja tan distante. Ma la rexercores ia es plu stonada par la rapidia de la volpe ca par la longia de sua viaja. La animal ia traversa promedia plu ca 46 cilometres per dia, e an 155 cilometres a veses.

Rexercor Eva Fuglei ia comenta: "Prima, nos no ia pote crede nosa oios. Nos ia pensa ce cisa lo ia mori, o ia es portada ala sur un barco, ma on ia ave no barcos en la rejion. Nos ia es intera aturdida."

Fuglei ia labora per esplora como volpes maneja la cambias dramosa de la saisones artica.

"On ave comedas sufisinte en la estate," el ia dise, "ma lo deveni difisil en inverno. Esta es cuando la volpe artica migra comun a otra rejiones jeografial per trova comedas per survive. Ma esta volpe ia vade multe plu distante ca la plu de otras cual nos ia segue a ante. Lo mostra vera la capasia spesial de esta creada peti."

La Instituida Polal ia produi un graf cual indica como la volpe ia fa du pausas en sua viaja traversante Gronland norde.

La siensistes opina ce cisa el ia enrola se en la neva per pasa tra un clima mal, protejeda par sua pelo spesa, o ce el ia trova un fonte de comedas como avias de mar en un canal abrida de acua.

Nos va sabe nunca la condui de la volpe peti en Canada, car sua transmetador ia sesa funsiona en febrero. Ma el va debe cambia sua abituas de come, car sur Isola Ellesmere la comeda xef de volpes es leminges, en loca de la dieta plu maral de Svalbard.

La diminui de la jelo polal fa un efeto contra volpes artica. Los no pote plu visita Island, per esemplo, e pos alga tempo cisa sua popla en Svalbard va deveni completa isolida.

Ma Fuglei dise ce on ave ancora espera: "Temperatures plu alta pote dona plu renos en Svalbard, e la volpes foraje sua corpos."

2019-07-01

Un strato spesa de graniza en Mexico

En Mexico, un tempesta forte de graniza ia lasa ses suburbes de la site Guadalajara covreda par un strato spesa de jelo.

La jelo ia ave spesia de asta 150 sentimetres en alga locas, e veculos ia es partal sumerjida en lo.

On ia usa macinas de proteje sivil per clari la stradas en esta site de sinco milion abitores, locada a norde de la Site Mexico.

Ofisiores local ia reporta ance inondas e arbores cadeda, ma on crede ce no person ia es ferida.

A ante, la site ia saborea un temperatur de plu ca 30°C. Lo ia es colpada par tempestas de graniza en la pasada, ma rara tan forte como esta.

Autoriosas dise ce 200 casas ia es danada e deses de veculos ia es puxada a via en la site e distritos ensircante.

Enrique Alfaro Ramírez, governor de la stato, ia descrive la aveni como noncredable. El ia comenta: "Alora nos demanda a nos esce la cambia de clima es real. Estas es fenomenos natural nunca videda a ante."

2019-06-30

Srilanca emplea sua pendores prima en 43 anios

Srilanca ia enscrive du pendores en prepara per cuatro esecutas, la primas en 43 anios. Cuatro prisonidas condenada per crimines de droga va es punida par mori.

La esecutas va fini un suspende de la puni de mori cual esiste ja de 1976.

Plu ca sento aspirores ia responde a un anunsia en febrero per esecutores con "carater moral forte". Los ia nesesa es srilanca e mas, con entre 18 e 45 anios e posesente "fortia mental". Ance du esuanes e du femes ia presenta se per la rol.

Un portavose de prison ia dise ce la du aspirores susedosa va pasa tra instruis final, cual va ocupa sirca du semanas.

La pendor la plu resente ia resinia a sinco anios ante aora, xocada par vide la pendador. Un otra ia es empleada en la anio pasada, ma no ia apare per labora.

En Srilanca, viole sesal, contrabanda de drogas, e omiside es punable par mori, ma on ia fa no esecutas pos 1976.

Presidente Maithripala Sirisena ia dise ce on reinstitui la puni de mori per supresa la comersia de drogas en la pais. Analistes political dise ce la cambia va aumenta sua popularia ante un eleje cual va aveni ante la fini de esta anio.

"Me ia suscrive la comandas de mori de cuatro," Sirisena ia dise. "On ancora no ia informa los. Nos no vole ja anunsia la nomes, car acel ta pote causa turba en prisones."

El ia dise ce 200 mil drogamanicas esiste en la pais, e ce 60% de prisonidas es en prison per crimines de droga.

La Uni European, como ance Frans, Noria e la Rena Unida, ia condena esta deside par Srilanca: "La puni de mori es un puni cruel, nonumana e degradante, e la UE oposa nonegable sua usa en tota situas e tota casos. An si la autoriosas srilanca ia sita la nesesa de dirije se contra crimines de droga, studias mostra ce la puni de mori fali funsiona per preveni crimin."

Amnestia Internasional, un organiza nongovernal per diretos umana, ia dise ce lo es "xocada" e "scandalida" par la anunsia par la presidente, e ia declara ce esecutas per crimines de droga es nonlegal, car los no pasa la limita per "crimines la plu grave" como matas intendeda.

La dirijor de Amnestia per Asia sude ia comenta: "A un tempo cuando otra paises ia veni a la comprende ce los nesesa reformi sua politicas de controla de drogas, e ata per redui la usa de la puni de mori, Srilanca resiste la tende. Esta va ruina la reputa internasional de la pais, e nos espera ce Presidente Sirisena va reconsidera sua deside."

2019-06-29

Iran saisi mil minadores de bitcoin

Autoriosas en Iran ia saisi sirca mil minadores de bitcoin en du fabricerias pasada, pos deteta un aumenta de consuma de eletrica.

La usa eletrical ia crese par 7% en junio, e on ia divina ce esta ia es causada par jenera criptomone.

Bitcoin deveni sempre plu notable en Iran como un modo de conserva ricia.

On mina criptomone par computadores, usual spesialida per funsiona como minadores, liada a la rede monal par la interede.

La macinas furni la potia computal nesesada per validi intercambias en la criptomone, e sua posesores es recompensada con mone nova jenerada. Tal, la prosede pote es profitosa, spesial si on fa lo a grado vasta.

On reporta ce minadores de bitcoin ia apare en locas diversa en Iran.

Con ce Iran es finansial colpada par punis esuan sur sua program nucleal, iranis en redes sosial discute comun la demanda de modos secur per conserva ricia.

Oro e dolares esuan es sujestas durante poplal, ma criptomone comensa apare como la alternativa tre.

2019-06-28

Putin dise ce libralisme es anticin

Vladimir Putin ia dise ce libralisme es "anticin" en un intervisa ante vade a la confere G20. El ia dise ce la ideolojia cual suporta democratias ueste tra desenios ia "vive plu longa ca sua intende".

La xef rusce ia loda ance la crese de poplisme en Europa e America, disente ce ideas como multiculturalisme es "no plu tenable".

Sua comentas ia apare en un intervisa sur multe temas en la jornal Financial Times. La article ia es publicida cuando la xefes de la mundo comensa discute comersia e securia en Japan.

"Libralistes no pote simple dita cualce cosa a cualcun," diseda par Putin, ci ia servi como presidente de Rusia tra cuasi du desenios.

El ia ajunta ce libralisme desacorda con "la interesas de la majoria vasta de la popla", e ia punta se contra Angela Merkel, canselor deutx, par causa de permete cuantias grande de refujadas a relocali se en Deutxland.

"Esta idea libraliste presuposa ce on nesesa fa no cosa, ce migrores pote mata, saca e viole con esenta car sua diretos como migrores debe es protejeda.

Putin, ci ave 66 anios, ia dise ance ce Rusia ave "no problemes con persones lgbt, ma alga cosas pare esedente a nos. On reclama aora ce enfantes pote fa sinco o ses roles de jenero," el ia continua.

"Ta ce cadun es felis, nos ave no problem con acel. Ma on debe no permete ce esta ombri la cultur, tradisiones e valuas familial tradisional de miliones de persones composante la popla nucleal."

Estra sua comentas sur libralisme, Putin ia loda ance Donald Trump, presidente de la SUA, como "un person talentosa" ci sabe relata con votores.

Ma la xef rusce ia dise ance ce la uniladisme de la SUA es partal culpable per la gera de comersia cual continua entre Xina e la SUA, e per la tensa con Iran en la Streta Hormuz.

An tal, Donald Tusk, presidente de la Uni European, ia ataca oji Putin, informante reportores ce el desacorda forte con sua sentis sur libralisme.

"El ci reclama ce democratia libraliste es anticin reclama ance ce librias es anticin, ce la rena de lege es anticin, e ce diretos umana es anticin," el ia dise. "Lo cual pare vera anticin a me es autoritarisme, cultos de personalia, la rena de oligarcas, an si a veses los pote pare eficas."

2019-06-27

Temperatures recordo per junio en Europa

Un onda de caldia afeta multe de Europa, e on predise ce lo va intensi plu. Deutxland, Polsca e Txesco ia rejistra ier un temperatur plu alta ca en cualce junio presedente.

Meteorolojistes esplica ce la causa es un tira de aira calda de Africa norde.

Alga paises, incluinte Frans e Suiz, espeta oji temperatures supra 40°C. Ofisiores franses avisa sur la risca de mori.

En partes de Espania norde-este, la temperatur va ateni cisa 45°C a venerdi. Ala, ofisiores averti sur risca de focones savaje en alga rejiones.

En 2003, Frans ia esperia un caldia simil cual on ia culpa per 15 mil moris. Cuasi tota la pais es aora en state de alarma orania, la grado direta su la plu grave posible.

Alga sites, incluinte Paris e Lyon, ia restrinje la trafica per atenta redui la efetos de aira contaminada. En Paris, on ia instala fontes liada a idrantes.

En Toulouse, do on previde oji la temperatur 41°C, caritales ia distribui acua a persones sin casa.

Par causa de la clima noncomun calda, alga scolas franses ia pospone esaminas importante e alga ia clui an completa. La caldia afeta ance la 72 mil persones en la prisones de Frans, do on descrive la selulas como "fornos".

Ier, on ia rejistra la temperatur 38,6°C Coschen en Brandenburg – un recordo nova per junio en Deuxtland. Radzyń en Polsca e Doksany en Txesco ia rejistra ance temperatures de recordo nasional (38,2 e 38,9°C, en ordina).

An en la Alpes, temperatures ia esede 30°C en alga locas.

2019-06-26

San Francisco proibi vende sigaretas eletronical

San Francisco ia deveni la site prima en la SUA cual proibi la vende de sigaretas eletronical asta cuando on conose plu clar sua efeto a sania.

Ier, ofisiores ia vota per despermete ce botecas vende vaporadores, e ia deslegali ce vendores enlinia trae los a adirijes en la site.

La site californian conteni Juul, la compania produinte la esigaretas la plu popular en la pais. Juul ia comenta ce la cambia va forsa fumores a sigaretas tradisional e "crea un mercato negra florinte".

La maior de San Francisco, London Breed, ave des dias per suscrive la lege, ma ia indica ce el va fa lo. La lege va comensa es enforsada a sete menses pos acel data, an si on reporta ce companias va pote fa un defia legal.

Ativistes contra sigaretas eletronical dise ce companias ojeti persones joven par ofre produidas saborida. Los dise no sola ce on nesesa plu investiga siensal sur la efeto a sania, ma ance ce esigaretas pote coraji persones joven a comensa fuma sigaretas tradisional.

2019-06-25

Scolas malaisian es cluida par aira contaminada

En Malaisia, plu ca 400 scolas en la stato Johor ia clui pos problemes de respira e vomiti esperiada par 75 studiantes.

Scolas en la rejion industrial Pasir Gudang va es cluida asta jovedi. Autoriosas investiga esta contamina nova de aira.

En marto, sirca 4000 persones, enfantes per la plu, ia deveni malada pos cuando dejetadas cimical ia es nonlegal poneda en un rio.

Plu ca 100 scolas prima e liseos, como ance 300 prescolas privata, es entre la tempora cluidas de esta semana.

Dr Sahruddin Jamal, ministro xef de Johor, ia dise ce 75 studiantes de 15 scolas ia cexa sur difisiles de respira e ia comensa vomiti. Tota ia es ospitalida.

El ia dise ance ce la causa de la maladia no es clar, ma ce lo no es relatada a la contamina en marto. Alora, 111 scolas ia clui e miles de persones ia maladi pos enspira gases nosiva de la Kim Kim, un rio prosima.

On ia descovre ce asta 40 tones de dejetadas cimical ia es ajuntada a partes de la rio. A la min 15 tipos diversa de cimical ia es identifiada, incluinte sianido de idrojen, cual es sin color e estrema venenosa.

Du malaisianes e un singapor ia es acusada en relata con acel.

La ministro xef de Malaisia, Mahathir Mohamad, ia promete ier ce on va fa "atas sever" contra la culpables de la aveni nova.

2019-06-24

La partito de Erdoğan es vinseda en Istanbul

En Turcia, la Partito de Justia e Developa (AKP), gidada par presidente Recep Tayyip Erdoğan, ia perde la controla de Istanbul pos un refa de la eleje maioral de acel site.

Pos la conta de cuasi tota votas, Ekrem İmamoğlu, la aspiror per la partito xef oposante, ia ave 775 mil votas de vantaje – un aumenta grande de sua marjin de 13 mil en la eleje prima en marto. Sua vinse alora ia es canselada car AKP ia alega cualias noncoerente en la prosede.

La resulta fini 25 anios de governa par AKP en Istanbul.

La aspiror AKP, ministro xef pasada Binali Yıldırım, ia sede a sua oposor. En Twitter, Erdoğan ia scrive: "Me loda Ekrem İmamoğlu ci ia gania la eleje longo resultas inisial."

Erdoğan ia dise en la pasada ce "el ci gania Istanbul gania Turcia". El governa la pais de 2003, como ministro xef e aora como presidente, deveninte la xef la plu potiosa de la pais pos Mustafa Kemal Atatürk, fundor de la republica turces moderna.

En sua parla de vinse, İmamoğlu, de la Partito Republiciste de la Popla (CHP), ia dise ce la resulta marca "un comensa nova" per e la site e la pais, e ce sua suportores "ia repara democratia".

"Nos abri un paje nova en Istanbul," el ia dise. "Sur esta paje nova, on va ave justia, egalia, ama." El ia ajunta ce el es preparada per labora armoniosa con Erdoğan.

Con 99% de votas contada, İmamoğlu ia ave 54% e Yıldırım 45%.

2019-06-23

Protestores invade un mineria deutx

En Deutxland ueste, sentos de ativistes contra la cambia de clima ia invade un mineria de carbon su sielo per campania contra combustables de fosil.

La protestores ia core tra campos e ia rompe un cordi de polisia per entra a la mineria Garzweiler.

Polisiores ia averti ce la mineria no es secur, e alga ia es ferida cuando los ia atenta reteni la protestores.

Deutxland ia promete neutrali sua emetes de carbono en 2050, ma ativistes dise ce esta no es sufisinte rapida.

Sondas resente ia mostra ce la cambia de clima es la conserna la plu grande en Deutxland, do la partito verde egali la Democratas Cristian governante.

Plu temprana en la dia, protestores ia bloci tempora un ferovia usada per transporta carbon.

Alga de la ativistes ia es entre 20 e 40 mil protestores ci ia partisipa en un protesta a venerdi en la site Aachen, suportante la promove de greves de scolores inisiada par Greta Thunberg, adolesente svensce.

2019-06-22

Sir Elton John es alta premiada en Frans

Elton John ia reseta la premio sivil la plu alta de Frans, la Lejion de Onora. La musiciste brites ia es premiada par presidente Emmanuel Macron en un rituo a la Palasio Elisian.

La ofisia de de la presidente ia loda Sir Elton, ci ave 72 anios, como "un jenio melodiosa" e como un de la artistes ge prima ci ia dona un vose a la comunia lgbt.

La cantor-composor ia usa sua parla asetante per promove sua labora carital. La Funda Sido de Elton John ia jenera plu ca 395 milion dolares per la preveni de, educa sur e suporta pos viu.

En sua parla, el ia esplica como la batalia contra sido importa personal a el: "Como musica, la combate de sido es ja mea pasion tra multe multe anios. E como musica, esta combate remente me a cada dia sur la potia estracomun de la spirito umana, e ce la cosas cual lia nos es plu forte ca los cual divide nos. Esta spirito umana majial es lo cual me va porta con me como un membro orgulosa de la Lejion de Onora."

El ia ajunta: "Me ave un relata vasta de ama con Frans: me ave un casa asi, me ia ama sempre veni asi, me ama la cultur franses, la modo de vive e la popla franses."

La premio ia es fada en la mense pos la publici de Rocketman ("Rocetor"), un filma biografial sur la musiciste.

Elton John ia es en Frans como parte de sua turi de adio. En la anio pasada, esta lejendin de pop ia anunsia ce el va sesa turi per pasa plu tempo con sua familia.

El grasia aora sua fanes par un turi final de mundo, Adio, via de brices jala, cual inclui plu ca 300 consertas tra sinco continentes.

2019-06-21

Un bus cade a en un canion en Barat

A la min 44 persones ia es matada en Barat cuando un bus ia cade a en un canion.

Deses de persones ia es ferida en la asidente ier en la distrito Kullu de Himachal Pradesh, un stato montaniosa en la norde de la pais.

Narendra Modi, ministro xef de Barat, ia tuita ce el es "profonda tristida".

La bus ia porta 60 persones, cisa plu, cuando lo ia verje de la via. Alga pasajores ia viaja sur la teto de la veculo. Lo ia devia a un curva agu e presipe, ante cade en un vale profonda e magra.

Ofisiores ia dise inisial ce 25 persones ia es matada, ma plu tarda la cuantia ia es revisada car 19 plu ia mori par sua feris. Multe de la vitimes ia es femes e enfantes reveninte de labora e scola.

Imajes de la loca mostra la bus craseda a lado de un rio peti, e un cadena de bonvolores aidante la survivores.

Asidentes de trafica aveni frecuente en Barat: la stato Himachal Pradesh ia rejistra plu ca 30 mil entre 2009 e 2018. Ala, plu ca 11 mil persones ia mori e sirca 54 mil ia es ferida en acel periodo.

2019-06-20

Fotos nova de Zona Zero en York Nova en un cd vea

Arcivistes ci ia compra un colie de discos compata a un vende pos la vacui de un casa ia trova 2400 fotos de Zona Zero en York Nova, fada pos la atacas de 11 setembre 2001.

La fotos pare es fada par un laboror de construi, ancora no identifiada, ci ia aida dejeta la ruinas de la tores de la Sentro Mundal de Comersia e clari la area sirca los.

La cds ia es en mal state, ma on ia susede final estra la datos. La arcivistes ia comparti la fotos en Flickr.

La albumes dijital inclui imajes de Zona Zero mesma, fada e de nivel de tera e de supra, empleadas de construi en sua labora, e la internas danada de construidas sirca la tores.

Cuasi 3000 persones ia mori cuando cuatro aviones saisida par teroristes ia es colideda con la Sentro Mundal de Comersia, la Pentagon e un campo en Pennsylvania.

La arciviste Johnathan Burgess ia comenta: "Jeneral tal articles es iniorada a vendes. Lo es multe probable ce estas ta es aora en un portadetrito si nos no ia visita." El ia ajunta: "Lo es un miracle ce la discos ia transfere tan bon. Cd-romes de acel eda es alga nonfidable."

El ia usa un servi tecnical de regania per estrae alga de la imajes. Asta aora, el no ia pote descovre la identia de la fotor o sua relatadas.

Multe de los ci ia labora ala en la tempo direta pos la atacas de 11 setembre ia deveni plu tarda malada. On crede ce sirca 400 mil persones ia es esposada a contaminantes nosiva o ia es ferida o traumada a la dia mesma, longo la Sentro per Controla e Preveni de Maladia.

Dr Burgess ia dise ce la comparti de la fotos ia "pertine a fa la bon per la raza umana" e ia sujesta ce persones emosiada par los ta considera dona mone a cualce promove meritante.

2019-06-19

Un fosil de iena en la Artica canadian

Un misterio de 50 anios sur du dentes fosilida ia es solveda par rexerca nova cual sujesta ce ienas ia vaga tra Canada artica a un ves pasada.

Rexercores ia identifia la dentes, trovada en Yukon en la desenio de 1970, como parteninte a ienas de milion anios ante aora. Sua descovre pone lus nova a la evolui de la forajores ferose, e ia es publicida ier en la jornal siensal Open Quaternary ("Cuatronaria Abrida").

La du dentes ia es trovada en un mision paleontolojial en la Basin Corvo Vea de Yukon en 1973.

Esplorores nativa labora ja con siensistes per investiga la tresores de la rejion tra plu ca un sentenio, ma entre plu ca 50 mil esemplos colieda, on ia trova sola du cual pote parteni a un iena.

Pos cuasi 50 anios on ia descovre a ci los ia parteni. La dentes ia fini en un esibi a la Museo Canadian de Natur en Ottawa, do Grant Zazula, un paleontolojiste con la governa de Yukon, ia vide los a la ves prima.

Siensistes ia ipotesi tra tempo longa ce los pote parteni a ienas, ma nun ia pote confirma la teoria.

Zazula ia labora con Jack Tseng, un biolojiste evolual con spesialia de ienas a la Universia de Buffalo, e con Lars Werdelin a la Museo Svensce de Istoria Natural.

"Un encontra de menses ia aveni," Zazula ia dise. "Car Jack es tan esperiosa sur fosiles de iena, el ia sabe direta lo cual los es."

Plu esaminas ia determina ce la fosiles ave entre 850 mil e 1,4 milion anios. An si ienas moderna abita xef en Africa, on ia trova fosiles parteninte a ienas antica tan norde como Mongol e tan ueste como Mexico.

Zazula ia comenta ce esta fosiles aida ponti acel distantia grande par confirma la ipotese ce la ienas ia ariva en America Norde de Rusia longo la Streta Bering.

La fosiles sujesta ance ce ienas antica ia vive en manera multe nonsimil de los de oji. "Nos es tan abituada a pensa de ienas abitante locas como Africa, do los core tra la savana. Ma la pensa de los abitante en neva e oscuria de 24 oras en la inverno es intera diferente."

2019-06-18

La SUA envia plu soldatos a la Golfo Uman

La militar de la SUA va envia 1000 plu soldatos a Asia sude-ueste, en un tensa cresente con Iran.

Patrick Shanahan, ministro tempora de defende, ia dise ce la stasioni responde a lo cual el ia descrive como "condui enemin" par la militar irani.

La marina esuan ia distribui ance imajes nova sur cual lo dise ce los lia Iran a atacas resente contra tancadores de petrolio en la Golfo Uman.

Ier, Iran ia dise ce pos 10 dias sua reserva de uranio va esede alga limitas fisada par un acorda nucleal de 2015.

Su la acorda, per restrinje sua capasia nucleal, on ia permete ce Iran produi asta 300 cilogrames de uranio poca ricida. Ma resente, lo ia aumenta sua produi en responde a punis plu sever par la SUA.

Xina ia recomenda autorestrinje, e ia junta se a otra partitos de la acorda nucleal en recomenda ce Iran no abandona lo.

2019-06-17

Un rompe major de eletrica en Arjentina e Uruguai

On ia restora eletrica a multe de Arjentina e Uruguai pos un rompe jigante cual ia lasa deses de miliones de persones en oscuria. Mauricio Macri, presidente arjentina, ia promete un investiga completa.

La rompe de eletrica ia aveni corta pos 07:00 ier. Lo ia para trenes e ia descomuta siniales de trafica. Lo ia es causada par un fali en un rede eletrical cual servi e Arjentina e Uruguai.

Esta ia aveni cuando la popla de Arjentina ia es a punto de vota en elejes local, e on ia debe pospone la vota en alga provinses rejional. Partes de Paraguai e Txile ia es ance afetada.

Un portavose per la compania eletrical Edesur ia dise: "Esta es la ves prima cuando un cosa de esta spesie ia aveni tra la pais intera." On ia lia la rompe a un fali en la transmete de eletrica de la parario idroeletrical Yacycretá.

Gustavo Lopetegui, ministro de enerjia en Arjentina, ia insiste ce la sistem eletrical de la pais es "multe durante", ma el ia ajunta ce la causa esata de esta fali no es clar. "A presente nos no esclui cualce posibles. Ma nos no crede ce lo es causada par un siberataca."

2019-06-16

Protestas continua contra estradis en Hongkong

En Hongkong, miles de persones protesta estra construidas governal sur un projeta controversa, an pos un retira partal par la governa. La projeta ta permete estradis a la tera xef de Xina, e lo ia provoca sentos de miles de persones a protesta en la semana pasada.

Carrie Lam, dirijor xef de Hongkong, ia dise ier ce la projeta es "suspendeda" per la tempo presente. Ma la gidores de protestores esije ce on abandona lo permanente. Alga ia demanda per la resinia de Lam.

En la temprana de posmedia oji, folas grande ia asembla en la site, en la Plaza Victoria. Multe ia porta vestes negra o flores blanca. On reporta ce la area ia es masima plenida, e ce trenes no ia para a stasiones tro folida.

Alga protestores ia fa tribuis a la loca do un om ia mori pos cade de scafales en la tarda de saturdi. El ia erije un bandera urjente la abandona de la projeta.

On es consernada sur la influe cresente de Beijing en Hongkong, e la protestas sur la projeta ia provoca alga de la violentia la plu mal de multe anios.

Hongkong es un colonia brites pasada. Lo ia revade a governa xines en 1997 en un acorda per "un pais, du sistemes" cual garantia un grado de autonomia a lo.

La governa ia razona ce la projeta proposada de estradi va "tapi la fesures" afin la site no va es un paradiso secur per criminores, pos un caso de omiside en Taiuan.

Oposores dise ce la lege nova va esposa la popla de Hongkong a la sistem multe nonperfeta de justia en Xina, e va continua erode la nondepende judal de la site.

Ier, pos dias de protestas, Lam ia dise ce el ia oia la clamas ce sua governa ta "pausa e pensa".

Jimmy Sham, de la Fronte per Diretos Umana Sivil, ia dise ce la suspende anunsiada es simil a "un cotel" cual on ia puxa a en la site. "Lo ia ateni cuasi nosa cor. Aora la governa ia dise ce los no va puia lo, ma los refusa ance estrae lo."

La ministreria de esternas xines ia suporta publica Lam pos sua anunsia.

2019-06-15

Manos juntada en un fresco enorme en Paris

Un obra de arte jigante, cual mostra un linia de manos juntada, va es formal desvelida oji a la pede de la Tore Eiffel en Paris.

La fresco de pinta jetada estende tra plu ca 600 metres longo la parce Campo de Marte en la capital franses. La plu bon, on regarda lo de la alta de la tore.

Lo es creada par Saype, un artiste franses de ci sua nom vera es Guillaume Legros, ci spesiali sur depintas grande e biodegradante.

Sua obras ia apare ja sur montes e en parces tra la mundo. Los dura tra alga dias ante desapare en la tera.

Sua arte la plu resente es nomida Ultra mures. Lo mostra un serie de manos entretexeda en tribui a la asosia carital SOS Méditerranée, cual labora per salva migrores ci risca afoca en la Mar Mediteraneo.

En la anio pasada, ses migrores per dia promedia ia mori en traversa acel mar, longo la Nasiones Unida.

Saype ia descrive sua obra nova como "un simbol de junta a un tempo cuando persones deveni sempre plu introvertida en se".

La depinta va es oji inaugurada en un rituo a cual Anne Hidalgo, maior de Paris, va es presente.

Lo marca la comensa de un projeta de tre anios en cual Saype va esibi sua obras en dudes sites major tra la mundo.

London, Berlin, Nairobi e Buenos Aires va ospita imajes simil de manos e brasos teninte lunlotra.

2019-06-14

Un tore antica colasa en Afganistan

Un tore antica en Ghazni, un site en Afganistan, ia colasa, levante demandas sur la capasia de la governa per proteje la ojetos istorial de la pais.

Video en redes sosial mostra la desintegra de un fortres en la site vea.

La tore ia es un de deses ja destruida en la site. Ofisiores ia culpa un pluve forte, ma alga oposores acusa ce la governa es descurante.

La arciteta muslim e premuslim en Ghazni es vasta amirada, an si geras ia fa un mal efeto.

Un portavose per la ministreria de informa e cultur ia dise ce la fortres ia es "danable par pluve e xef danada par pluve". El ia ajunta: "La via xef es situada en la prosimia de la fortres, e esta afeta la tores."

Ghazni ia es un sentro budiste florinte asta la sentenio 7. Ma en 683 ec, armadas arabi ia trae islam a la rejion. En la sentenio 13, lo ia es destruida par la armadas mongol de Txingis Han, gidada par sua fio Ogedei Han.

La site antica ia es identifiada como un Site Asian de Cultur Muslim par la Organiza de Coopera Muslim.

An tal, la rena taliban ia fa ce multe de sua construidas antica es difisil per visita par stranjeres.

2019-06-13

Ebola mostra no sinia de para en la RDC

La xef de un asosia carital major de rexerca medical ia descrive la eruta la plu resente de la virus ebola en Africa sentral como "vere asustante".

Jeremy Farrar, dirijor de Wellcome Trust, ia dise ce la epidemica es la plu grave pos lo de 2013–16 e ce lo mostra "no sinia de para".

Cuasi 1400 persones ia mori en la Republica Democrata de Congo, e du persones ia mori en Uganda en la casos prima reportada en acel pais. Un xico ugandan de sinco anios, infetada con la virus, ia mori a martedi, e un fem ia mori ier.

La governa de Uganda reporta aora a la min ses plu casos suspetada de la virus.

En un declara, Farrar ia dise ce la sperde de la virus es "trajedin ma nonfortunosa no surprendente". El ia averti ce on previde plu casos, e un responde "plen" nasional e internasional va es nesesada per proteje vives.

"La RDC no debe fronti solitar esta," el ia ajunta.

Pos la caso prima de ebola en la Republica Democrata de Congo en agosto pasada, cuasi 1400 persones ia mori – sirca 70% de la cuantia intera de persones infetada.

Esta es la eruta du de la plu grandes en la istoria de la maladia, con un aumenta notable de casos nova en semanas resente.

La labora per constrinje la sperde es impedida par violentia de grupos de militiores, e par suspetas contra aida medical stranjer.

Cuasi 200 construidas medical es ja atacada en la RDC en esta anio, obligante mediciste a pospone vasinis e tratas. En febrero, la asosia carital Médecins Sans Frontières (Medicistes Sin Fronteras) ia suspende sua ativia en Butembo e Katwa, du sites este en la episentro de la eruta.

2019-06-12

Greves fini en Sudan e discutes va recomensa

En Sudan, gidores de protestas e xefes militar ia acorda recomensa discutes. Plu, un alia oposada ia acorda suspende sua campania de desobedis e greves.

La armada, cual controla la pais pos la despone en april de Omar al-Bashir, presidente de tempo longa, ia acorda libri prisonidas political.

Protestores per democratia esije ce la pais revade a governa nonmilitar.

Discutes ia fali pos la mata de desuples de protestores en un colpa contra un protesta sentante a 3 junio. Pos alora, multe de la pais es nonfunsionante, car la oposores ia inisia un greve nonlimitada.

Dotores dise ce 118 persones ia mori en la eruta resente de violentia, ma ofisiores dise ce sola 71 ia mori.

Soldatos ia patrulia la stradas de vilas sudani a pos, e la plu de comersias ia resta cluida.

Ier, la reconsilior itiopian Mahmoud Dirir ia dise ce discutes per restora un governa nonmilitar va comensa pos corta.

La Alia per Libria e Cambia ia publici un declara recomendante ce persones revade a labora oji. La Asosia de Profesales Sudani, cual ia inisia la greves, ia suporta la suspende tempora e ia recomenda un revade a labora per la tempo presente.

Alga botecas e servis ia comensa ja reabri, xef entre comersias peti e ganiores de salarios dial, ci no ia pote tolera la custa de resta cluida.

2019-06-11

Locustas destrui granes cultivada en Sardinia

Un pesta enorme de locustas causa multe dana sur la isola italian Sardinia en la Mar Mediteraneo. Esta es la invade de insetos la plu grave en plu ca 60 anios.

Manadas grande destrui granes e invade casas en la comunias Ottana e Orani en Nuoro, un provinse sentral.

On reporta ce plu ca 2000 ectares de tera cultivada es ja destruida par la covre de insetos.

Esta invade par locustas es relatada a un crese resente de temperatur sur la isola, pos menses de aira min calda.

Coldiretti, la asosia de cultivores italian, ia averti en un declara ier: "Miliones es en la campania. La locustas emerji sur tera noncultivada, ma a pos los vade a tera cultivada per come." Lo ia ajunta ce on pote aora fa poca per remedia la situa.

A la min 12 cultiverias es afetada. Pastos de bestias es ruinada e poca granes resta per recolie.

Locustas apare usual sur Sardinia en la menses de estate, entre junio e agosto.

Plu, sur la tera xef, Italia norde batalia un pesta de xinxes scermin cual destrui arbores de fruta.

2019-06-10

La fini de un proibi contra tatuas a Air New Zealand

Air New Zealand va fini un proibi contra tatuas vidable sur empleadas. Lo dise ce la cambia va permete ce sua empleadas espresa sua diversia cultural e individua.

Alga zelandeses con asendentes maori porta tatuas per onora sua jenealojia e erita.

La airocompania ia dise ce, de 1 setembre, tota empleadas va pote mostra tatuas "nonofendente" en labora. Lo ia ajunta ce on ave un aseta cresente de tatuas, spesial como un modo de espresa personal.

La restrinjes contra tatuas ia atrae critica, e alga persones ia acusa la compania de ipocritia per sua usa de otra aspetas de la cultur maori – per esemplo, lingua e simboles – en sua anunsias comersial.

On reporta local ce la cambia ia aveni pos alga casos asentuada de individuas a ci on ia refusa roles a Air New Zealand par causa de sua tatuas vidable.

La compania ia dise ce sinco menses de rexerca con clientes e empleadas ia trova ce un zelandes entre sinco ave un tatua a la min, e ce plu ca 35% de persones con min ca 30 anios es tatuada.

Per persones con asendentes maori, marcas conoseda como moko es siselida sur la pel. Los es un tradision santa, representante la lias de un person a sua familia e identia cultural.

Tatuas de fas es spesial importante. Los de omes tende covre la fas intera; los de femes covre la mento.

Un portavose per la airocompania nasional ia dise ce lo va "trata tatuas como la parla" per deside lo cual es ofendente. "En la mesma modo como on no debe blasfema, fa comentas odiosa, broma vulgar, o usa linguaje violente en sua labora, per esemplo, la mesma pertine a tatuas."

Cuando un situa es nonclar, la compania va ave un comite "per aida empleadas e manejores a deside esce un tatua es aliniada con nosa politica."

2019-06-09

La presidente de Albania cansela elejes local

Ilir Meta, presidente de Albania, ia cansela elejes local pos menses de protestas antigovernal. El ia dise ce la situa political en la pais no permete elejes justa, intendeda per 30 junio.

La anunsia ia es fada no longa ante cuando protestores ia es sperdeda par polisiores xutante gas lacrimojen. Alga de la protestores ia lansa bombas de fuma e petardos estra la parlamento en Tirana, la capital.

La protestores esije la resinia de Edi Rama, la ministro xef sosialiste, e ia recomenda un vota jeneral temprana. Los desira ance la crea de un governa tempora, e ia refusa negosia con la ministro xef.

Lulzim Basha, xef de la Partito Democrata oposante, ia coraji la popla a continua la protestas asta cuando Rama resinia. A miles de sua suportores en Tirana, el ia descrive la deside par la presidente per cansela la elejes como "la resulta prima de nosa batalia contra Edi Rama". Partitos oposante ia boicota la elejes.

Ma Rama, ci gida la pais de 2013, ia dise plu tarda ce la elejes local no va es canselada.

La comunia internasional ia urje la partitos political de Albania a asteni de violentia e inisia un dialogo. En un declara ier, Presidente Meta ia solisita ce xefes oposante fa protestas "en un modo completa pasosa".

Multe figures, Presidente Meta, ia dise ce la divide continuante menasa la aspira de la pais per junta se a la Uni European. Statos-membros de la uni va vota en la semanas veninte sur la posible de comensa discutes de membria con la nasion balcan.

2019-05-31

La Pilipinas reenvia dejetadas canadian a Canada

La Pilipinas ia reenvia multe tones de dejetadas a Canada, pos un disputa diplomata longa en cual Presidente Rodrigo Duterte ia menasa "viaja a Canada e repone sua dejetadas ala".

Sua pais cexa ce la dejetadas ia es falsa eticetida como plasticas resiclable cuando los ia es enviada a Manila en 2014. Canada ia acorda paia la custa completa de transporta e desprende los.

69 contenadores de dejetadas ia es reenviada en un barcon de carga cual ia comensa viaja de Baia Subic, a norde de Manila.

"Baaaaaaaaa bye [pd: 'txau'], como nos dise lo," Teddy Locsin Jr, ministro de esternas pilipina, ia scrive en Twitter a esta matina. La ministro, ci es conoseda per sua stilo turbosa de tuitas, ia posta ance imajes e video de la barcon partinte de la porto.

La sirca 1500 tones de dejetadas renativida va es transportada a la site Vancouver en Canada, arivante ante la fini de junio, per es tratada en un compleso cual converti dejetadas a enerjia.

Sean Fraser, la secretor parlamental de la ministro de ambiente canadian, ia comenta: "Esta es un demostra ce nos intende obedi nosa obligas internasional de trata dejetadas cual orijina en Canada."

El ia dise ance ce Canada ia ata rapida en la semanas resente per solve la problem, cual ia continua tra alga anios, pos cuando la governa pilipina ia clari "ce esta es un conserna multe seria per los".

Un cuantia cresente de paises tra Asia sude-este urje nasiones ueste a reprende dejetadas cual ia es enviada a los, razonante ce alga de los ia es nonlegal emportada.

La cuantia de dejetadas esportada par paises developada ia es revelada cuando Xina, cual ia emporta la majoria de lo tra anios, ia introdui un proibi contra "dejetadas stranjer". Como resulta, la dejetadas – a veses, falsa declarada como resiclables – ia es enviada a otra paises developante, ma esta paises comensa aora resiste.

Ofisiores en la Pilipinas ia indica la problem de dejetadas a Canada a la ves prima en 2014, disente ce contenadores de dejetadas maleticetida ia es enviada par barcon entre 2013 e 2014, arivante a la Porto Internasional de Contenadores de Manila.

En 2016, un corte pilipina ia comanda ce la emportor paia per reenvia la dejetadas a Canada. En acel mesma anio, Canada ia cambia sua propre regulas sur transporta de dejetadas perilosa, per preveni un repete de la aveni.

Plu temprana en esta mense, Manila ia retira sua ambasador de Ottawa cuando on ia ateni la 15 de maio sin ce Canada ia retrae la dejetadas. Alora, Canada ia dise ce lo va comensa preparas per reprende los.

Aora oji va continua denova pos un semana.