2018-10-31

Tempestas en la norde e ueste de Italia

Italia ia es bateda par ventas e pluves forte cual ia mata 11 persones en la ueste e norde. Scolas e locas turismal ia clui en alga rejiones car on ia teme sur la securia de la popla.

On ia reporta ventas de asta 180 cilometres per ora, e du tornados ia pasa tra la sentro de Terracina, un vila costal, matante un person e ferinte des otras.

En Venezia, acuas levante ia inonda multe de la plazas e paserias famosa. Cisa 75% de la site de canales es aora sumerjida.

La Plaza San Marco ia es cluida a la posmedia de lundi, cuando la acua ia ateni 156 sentimetres de profondia. On ia rejistra ala un nivel plu profonda a sola tre veses pasada.

Ultra Venezia en la norde, on ia esperia ventas forte, arbores cadente e tera liscante. En la rejion Veneto, un om ia es matada par un arbor e un pompor-bonvolor ia mori en la rejion fronteral Alto Adige (Tyrol Sude) en la norde-este de Italia.

On ia trova un om mor, de 61 anios, en un rio prosima a Belluno en Veneto, pos descovre plu temprana sua auto. Un fem ia es matada cuando sua casa ia es destruida par un liscatera, e la corpo de un pexor ia es trovada a alga oras pos cuando el ia vade per serti la state de sua barco sur un lago en Trento.

A sude de la vacanseria Rimini, un surfor airotirada con 63 anios ia mori cuando sua cometa ia lansa el contra rocas. Tra Italia, ses persones ia mori a lundi e on ia confirma plu moris ier.

Alga de la problemes la plu mal ia es esperiada a la costa ueste, spesial en Liguria en la norde-ueste.

La muron esterna de mar en Rapallo, un porto modosa, ia es destruida cuando sua beton fortida ia desintegra, danante alga de la iates ala liada. Pompores ia debe salva ance 19 persones ci ia deveni trapida en Rapallo.

Plu sude, la provinse costal Grosseto ia reporta un desastre. Arbores ia cade en la capital Roma e en Napoli, do un studiante de 21 anios ia es matada. Du tornados ia destrui la tetos de construidas en Terracina, a sude de Roma, con ce abitores ia core per proteje se.

Transporta e la furni de eletrica es ance disturbada, e meteorolojistes averti ce la mal clima va continua.

2018-10-30

Un avion indonesian cade en la Mar Djava

En Indonesia, on usa avionetas e sonar per xerca un avion de pasajores cual ia cade en la mar ier. La vola JT 610 de Lion Air ia cade pos enaira de Jakarta, portante 189 pasajores e ecipores.

On ave no indica de survivores, ma detrito de la avion e posesedas personal ia es colieda de la acua.

Lo no es clar perce la avion ia cade a sola 13 minutos pos sua enaira. La pilote de la Boeing 737 ia demanda per reveni a la airoporto Soekarno-Hatta, corta ante perde contata con la controlores de trafica airal.

La avion ia encontra ja problemes en vola de Bali a Jakarta a la dia presedente. Sua jornal tecnical ia descrive un strumento como "nonfidable", tal ce la pilote ia pasa la controla a la ofisior prima.

La dirijor xef de Lion Air ia dise oji ce la avion ia es alora reparada ante enaira denova.

JT 610 ia es viajante en dirije a la site Pangkal Pinang en la ueste de Indonesia cuando la avion ia aselera subita e ia perde altia, cadente en la Mar Djava, a norde-este de Jakarta.

Indonesia, un arcipelago vasta, depende forte de aviones, ma multe de sua airocompanias ave un mal istoria de securia. Los ia ave problemes de securia e malmaneja en la pasada e Lion Air ia es proibida de entra a la airospasio european asta 2016.

2018-10-29

Un destriste estrema va deveni la presidente de Brasil

Jair Bolsonaro, la aspiror de la destra estrema, ia fa un vinse major en la eleje presidental de Brasil. El ia gania 55,2% de la votas, contra 44,8% per la sinistriste Fernando Haddad de la Partito de Laborores.

Bolsonaro ia campania prometente elimina la froda e basi la nivel alta de crimin en la pais.

La campania ia es forte dividente. Cada partito ia declara ce un vinse per la otra pote destrui Brasil.

La vinse par Bolsonaro representa un move notable a la destra per la democratia la plu grande en America Latina, cual ia es governada par la Partito de Laborores tra 13 anios entre 2003 e 2016.

En la du anios pasada, la pais ia es governada par un conservaliste, Michel Temer, pos acusas de malcondui contra presidente Dilma Rousseff. Ma Temer ia deveni multe nonpopular con brasilanes.

La presidente partinte ia es aprobada par sola 2% de votores, un recordo basa. La popla ia esije un cambia, ma con desacorda profonda sur la dirije de la cambia.

Ultima, Bolsonaro ia vinse par 10 persentos de la votas. El ia ofre un promete de un Brasil en cual la consernas xef va es redui la crimin e promove la valuas familial.

2018-10-28

Un fusilor mata a un sinagoga en Pennsylvania

En la SUA, un om suspetada de mata 11 persones en un sinagoga en Pittsburgh, Pennsylvania es acusada de omiside, pos un aveni regardada como la ataca antisemita la plu mal en la istoria resente de la pais.

On acusa Robert Bowers, ci ave 46 anios, de fusili a la sinagoga Arbor de Vive en sua servi de la dia santa. El fasa 29 acusas, incluinte la usa de un fusil per omiside.

La acusores federal dise ce los va rejistra ance acusas de crimin de odia, e la suspetada va reseta cisa la puni de mori.

Presidente Donald Trump ia descrive la ataca como "un ata malvolente de omiside coletiva", e ia comanda la basi partal de banderas SUA a construidas governal asta 31 otobre.

Ses persones, incluinte cuatro polisiores, ia es ferida en la ataca ier. La suspetada ia es ance ferida en un batalia de fusil contra la polisia.

Plu tarda, sentos de persones, no sola de la visineria Squirrel Hill ma ance de tota Pittsburgh, ia asembla per un vijila intercredal per la vitimes de la ataca.

A la matina de ier, persones ia veni a la sinagoga per un rituo de nomi de bebe. Squirrel Hill ave un de la poplas iudi la plu grande en la stato Pennsylvania, e esta ia ta es la dia la plu ativa per la sinagoga en la semana.

On reporta ce Bowers ia entra a la construida en la servi de matina, armada con un fusil de ataca e tre pistoles. Pos sirca 20 minutos, el ia mata ja 11 persones e ia es sortinte de la sinagoga, cuando el ia encontra un ecipo de polisiores spesialida e ia intercambia sparas con los.

A pos, la atacor ia reentra a la construida per atenta asconde se de la polisia. El ia sede pos un batalia de fusil, e es aora en ospital con plu ca un feri de baleta.

Longo reportas, el ia clama "tota iudis debe mori" en cuando el ia fa la ataca. Postas en redes sosial par algun con la nom Robert Bowers ia es ance plen de comentas antisemita. El no ia es conoseda a autoriosas ante la ataca. Sua motiva resta nonclar, ma on crede ce el ia ata solitar.

Trump ia descrive la fusilor como un "manica" e ia sujesta ce la SUA debe "forti nosa leges de la puni de mori", ajuntante ce la aveni "pertine poca" a la leges de fusil en la pais. "Si on ia ta ave un proteje en la construida, cisa la situa ia ta pote es diferente."

La presidente presedente, Barack Obama, ia espresa un otra opina sur la debate continuante de lege de fusil. El ia tuita: "Nos debe sesa fasili tan multe la oteni de fusiles par los ci vole feri persones inosente."

2018-10-27

Magrib abandona subita sua ora de inverno

Magrib ia deside abandona la ora de inverno e va manteni sua orolojos a la ora de estate, UTC+1, per la tota anio. La anunsia ia es fada a min ca du dias ante cuando la orolojos ia ta retira se par un ora a soldi. La deside ia es fada per salva un ora de lus natural.

La nasion de Africa norde junta se a alga otras, xef en Africa e Asia, cual no altera sua orolojos en estate.

La reata a la cambia ia es miscada en redes sosial. Un person ia dise ce la subitia de la deside pare simil a avenis en naras par Kafka. Un otra ia demanda como lo va afeta atas en ramadan, la mense santa de islam.

Ma otras ia bonveni la deside, como un comentor en Jazair ci ia broma ce sua visinas magribi, nova aliniada, va es ance plu prosima a la cultur jazairi, incluinte sua pizas cuadro.

An si multe persones en la mundo gusta spende un plu ora en leto cuando la orolojos es retirada per la inverno, otras ia fa campanias major per aboli la pratica. En agosto, la Uni European ia dise ce lo va recomenda ce sua paises membros abandona lo.

2018-10-26

On subasta un depinta par un inteleto artifis

Un obra de arte creada par un program de inteleto artifis (IA) ia es vendeda par subasta per $432 mil. La custa final es multe plu alta ca la estima de $7–10 mil proposada per lo par la subasteria Christie's en York Nova ante la vende.

La depinta, nomida Depinta de Edmond Belamy, ia es creada par un coletiva artal nomida Obvious ("Evidente"), con base en Paris.

La obra ia es produida par usa un algoritmo e un colie de 15 mil depintas personal creada entre la sentenios 14 e 20. Per jenera la imaje, la algoritmo ia compara sua propre obra a los en la colie asta cuando lo no ia pote plu distingui los.

La depinta es la obra prima de arte par IA cual on ia  vende en un subasteria major. La vende ia atrae un cuantia notable de atende jornaliste.

Richard Lloyd, la spesialiste a Christie's ci ia organiza la vende, ia comenta: "IA es sola un de alga tecnolojias cual va fa un efeto a la mercato artal de la futur, an si lo es multe tro temprana per predise la detalias de acel cambias."

2018-10-25

Google abandona un compleso deutx pos protestas

Google ia abandona un projeta de abri un compleso grande en un distrito modosa de Berlin, pos un oposa forte par campaniores local.

La jigante tecnolojial ia intende crea un incubador per companias nova en Kreuzberg, ma ia dise ier ce lo va sede la loca a du asosias carital. Sua portavose no ia dise esce la oposa local ia fa un rol en la deside, ma ativistes contra la enflue de abitores rica ia declara ce la aveni mostra ce "protestas susede".

La compleso en Berlin ia ta es la numero sete de Google, pos London, Tel Aviv, Seoul, Madrid, São Paulo e Warszawa.

En setembre, ativistes ia ocupa la construida pertinente per alga oras. Los ia posta ance aderentes en la distrito, con sloganes como "Adio, Google" e "Google no es un bon visina".

Alga ativistes ia oposa lo cual los ia descrive como la praticas "malvolente" de Google, como la evita de imposta e la usa nonetical de datos personal.

Otras ia protesta contra la enflue de abitores rica, sur cual los dise ce lo leva la custa de casas a un nivel cual persones local no pote compra. Entre 2016 e 2017, la custa de un casa en Berlin ia crese jeneral par 20%, ma par 71% en Kreuzberg.

La distrito es longa conoseda per sua cultural revoluiste e suvertinte.

Un portavose per Google ia dise ce discutes con grupos umaniste local ia gida la compania a conclui ce la solve la plu bon per la construida ta es dona lo a estas. La asosias es Betterplace, un plataforma enlinia per dona carita, e Karuna, cual suporta enfantes povre.

2018-10-24

Un leoneta es trovada en un aparte franses

Un om de 30 anios ia es arestada cuando on ia descovre un leoneta en un aparte en la suburbes de Paris.

La polisia ia es avisada cuando la suspetada ia atenta vende la leon fema, ci ave ses semanas, per 10 mil euros.

La om ia asconde se en un armario en la casa de un visina, do on ia trova el ier. La leoneta ia es trovada sur un leto de enfante.

On reporta ce la animal es sana. Autoriosas sur viventes savaje cura aora el. La om suspetada ia ave condenas presedente per furas.

Esta no es la ves prima cuando polisiores ia descovre gatos savaje ci on ia manteni nonlegal.

En 2017, la polisia ia trova un leoneta magra en un aparte vacua en Paris, mantenida par un om ci ia fa selfis con el. La leoneta ia es recasida en un conserveria de animales en Sudafrica en esta agosto.

Plu temprana en esta mense, un coror en Nederland ia trova un leoneta abandonada en un caje en un campo.

2018-10-23

Fratos falsida de la Enrolas de la Mar Mor

Un museo biblial en la SUA ia sesa esibi fratos crededa de la Enrolas de la Mar Mor, car probas ia sujesta ce los es falsida.

La Museo de la Biblia en Washington DC ia envia sinco de sua des-ses fratos per analise en Deutxland. La resulta ia mostra "cualias noncoerente con orijina antica".

Con custa de $500 milion, la museo ia es abrida par Steve Green, un cristian evanjelial e bilionor, en 2017.

La Enrolas de la Mar Mor es un colie de manoscritos antica de la Biblia Ivri. La primas de la enrolas ia es trovada en cavas en Qumran a la costa ueste de la Mar Mor en 1947. On dise ce sua descovror ia es un pastor badaui joven ci ia xerca sua oveas perdeda.

La probas ia es comandada cuando eruditas biblial ia dise, pos esamina des-tre de la fratos nonstudiada de la museo, ce on ave un probablia alta ce alga de los es falsidas moderna.

La conservor xef de la museo ia comenta ce el ia espera ce "la proba va furni resultas diferente". Ma el ia ajunta: "Esta es un oportun per educa la publica sur la importa de serti la autenticia de ojetos biblial rara, la prosede detaliosa de proba cual ia es emprendeda, e nosa dedica a transparentia."

Esta no es la ves prima cuando la posesores de la museo ia fronti un controversa. En la anio pasada, la compania Hobby Lobby de Green ia debe paia un multa de tre milion dolares e redona multe de ojetos, cuando la Departe de Justia SUA ia acusa lo de contrabanda ojetos fabricada de Irac.

2018-10-22

Miles de migrores traversa de Guatemala a Mexico

Miles de persones viajante de nasiones de America Sentral per atenta entra a la Statos Unida ia recomensa sua viaja de Mexico sude a la frontera SUA.

A la temprana de ier, la grupo grande ia comensa pasea en dirije a norde de Ciudad Hidalgo, un site fronteral.

La autoriosas mexican ia atenta para los a un ponte de frontera entre Mexico e Guatemala. Ma alga ia susede traversa nonlegal a Mexico par barco sur la rio Suchiate.

La caravan, ci veni xef de Onduras e inclui femes e enfantes, dise ce lo fuji de violentia e povria.

2000 migrores, votante par leva sua manos, ia deside continua sua viaja, disente: "Ta ce tota de nos pasea en junta!" e "Si, nos pote!" On no ia deteni los cuando los ia traversa la frontera.

Otra migrores resta trapida a la frontera en sua atenta de entra legal a Mexico.

La autoriosas mexican ia aseta grupos peti per trata refujal e ia dona lisensas per visitas de 45 dias a otras. Nonobligada, alga ia embarca veculos organizada par la autoriosas guatemalan a Tecún Umán, per revade a Onduras.

Presidente Trump de la SUA ia averti a multe veses ce la migrores debe reversa sua viaja, menasante clui la frontera e redui aida a paises cual permete ce la grupo pasa.

En tuitas ier, el ia dise ce on labora per "para la enflue de stranjeres nonlegal". El ia sujesta ance ce la caravan ave un motiva political.

Ance un plu grupo separada de sirca mil migrores, xef de Onduras, ia comensa en dirije a la SUA, de Esquipulas en Guatemala.

2018-10-21

Persones mori pos un disputa a un mercato nijerian

Violentia setal, provocada par un disputeta a un mercato, ia mata 55 persones en la stato Kaduna en la norde de Nijeria.

Jovenes muslim e cristian ia scaramuxa pos un disputa entre portores de careta en la vila Kasuwan Magani. La comisionor de polisia per la stato ia dise ce on ia aresta 22 persones pos la turba.

La autoriosas ia institui ance un proibi permanente de sorti en la vila.

Erutas de violentia setal aveni frecuente en Nijeria.

Un portavose ofisial per presidente Muhammadu Buhari ia tuita ce la presidente opina ce la usa comun de violentia en tal disputas es "preocupante".

Sin armonia entre grupos diversa, "nosa comersias dial ta es nonrealable," Buhari ia dise. El ia urje xefes de comunia a promove la tolera e a para tal desacorda ante cuando lo developa a violentia.

2018-10-20

Un tren barati colpa un fola selebrante

Plu ca 60 persones ia es matada e 100 ferida cuando un tren ia colide con un fola, prosima a Amritsra en la rejion Pandjab en la norde de Barat. On reporta ce la mores inclui enfantes.

La vitimes ia sta sur la ferovia per regarda selebras de Dasahara, un festa indu sur la vinse de bonia contra malia. Los no ia oia la prosimi de la tren, a media de la arde de un pupa plen de petardos, representante la re demonal Ravana.

Alga reportas sujesta ce organizores ia avisa la fola a move a via de la petardos. Otras dise ce persones ia core a la ferovia car los ia teme ce la pupo ardente va colasa.

Longo atestores, multe persones sur la ferovia ia es ocupada en filma la selebra par sua telefonetas, e no ia persepi la tren prosiminte con rapidia alta. La tren ia viaja de Jalandhar a Amritsar.

La feridas va reseta aida medical sin paia. On ia declara un state de lamenta, e ofisias e scolas en Pandjab es oji cluida.

2018-10-19

La descovre de un pirania jurasica

Siensistes ia descovre la restas fosilida de un creada simil a un pirania, de la eda jurasica. Los dise ce lo es la esemplo la plu temprana cual on conose de un pex carnivor.

La creada ososa, trovada en la sude de Deutxland, ia vive a sirca 150 milion anios ante aora e ia ave la dentes agu cual distingui la piranias de oji. Lo ia usa estas per sutrae la carne e pinas de otra pexes, de cual on ia trova ance sua restas.

Un de la rexercores ia dise: "Nos ave otra pexes de la mesma loca con pesos mancante de sua pinas. Si on come un pex, lo es mor. Si on rode sua pinas, on ave comeda per la futur."

La siensistes ia analise la mandibulas e ia trova dentes longa e puntida a la esterna de un oso cual ia formi la teto de la boca. Los ia trova ance dentes triangulo con bordas sierin sur osos longo la lado de la mandibula basa.

La ecipo internasional ia conclui ce la organiza e forma de la dentes e la strutur e funsiona de la mandibulas sujesta un boca bon preparada per talia carne o pinas.

La loca do la pexes ia es trovada es entre la plu bon en la mundo per descovre fosiles, ma lo continua ofre surprendes como esta.

2018-10-18

eBay litiga contra la envia de epostas par Amazon

La mercato enlinia eBay va litiga contra Amazon, acusante Amazon de usa taticas nonlegal per atrae vendores. Lo dise ce representores de Amazon ia malusa la sistem interna de eposta de eBay per contata vendores, en un viole de sua politica.

Amazon ia refusa comenta sur la caso, cual segue un letera de eBay esijente un fini a la pratica. A ante, lo ia dise ce lo investiga la acusa.

eBay ia declara ce laborores de Amazon ia crea contas de eBay per solisita vendores, comun enviante mesajes a mera minutos pos prepara sua profiles. Lo dise ce esta ativia ia aveni ja en 2015 e ia envolve desuples de representores de Amazon, de ci cadun ia envia sentos de epostas.

Un vendor ia averti eBay sur la problem a alga semanas ante aora, e eBay ia demanda ce Amazon para lo.

La declara litigal dise ce la mesajes mostra ce Amazon ia sabe ce sua pratica viole la politica de usa de eBay. Lo cexa ce la pratica de Amazon "pare es un parte de un model plu grande de condui atacosa e nonmoral" par la compania vendente.

eBay, cual posese ance StubHub, un revenderia de biletas, xerca la ofre de compensa monal par un litiga con juria. La compania californian, cual ia inisia se en 1995, ia es un abrivia de vende enlinia, developante un plataforma per lia comprores a vendores.

Aora lo ave plu ca 175 milion comprores ativa, con vendes de cuasi $90 mil milion par sua plataforma en la anio pasada. Ma sua brilia ia pali entre competores, spesial car la domina de Amazon atrae plu mercatores a acel plataforma.

En la anio pasada, plu ca un dui de la cosas vendeda par Amazon ia veni de vendores esterna. Intera, on estima ce Amazon representa sirca un dui de la dolares enlinia paiada a vendores en la SUA.

2018-10-17

Canada legali canaba recreal

Canada ia deveni la pais du en la mundo cual legali la posese e usa recreal de canaba.

La mercato nasional per canaba ia abri a medianote, an entre demandas restante sur sua efeto a la sania, la lege e la securia publica.

On ia envia informa a 15 milion casas sur la leges nova e la campanias de consensia. Ma on ave ancora consernas, incluinte sur esce la polisia es sufisinte preparada per trata motoristes drogosa.

Uruguai ia es la pais prima do canaba recreal ia es legalida, ma ance Portugal e Nederland ia descriminali la sustantia.

Provinses e munisipas canadian ia fa menses de prepara per la fini de la proibi. La provinses e teritorios es encargada per defini multe de la detalias sur la locas do on pote compra e consuma canaba en sua rejiones. Esta ia crea un misca de leges tra la pais, con ce rejiones eleje sistemes plu o min restrinjente per vende e usa la droga.

Botecas en la provinse Newfoundland, cual ave la zona de ora la plu este en Canada, ia abri a la momento de medianote per la vendes legal prima de canaba en la pais.

La legali reali un promete campaniante de 2016 par la ministro xef Justin Trudeau, la xef de la Partito Libraliste cual governa aora.

El ia razona ce la leges cual criminali canaba, e cual esiste ja tra cuasi un sentenio, ia es nonefetosa, car canadianes es ancora entre la usores la plu major de la droga en la mundo. El ia dise ce la lege nova es desiniada per teni drogas ultra la manos de minores e profitas ultra la manos de criminores.

La governa federal predise ce lo va recolie $400 milion per anio en revenu impostal sur la vende de canaba.

2018-10-16

La Eglesa Ortodox Rusce separa de Constantinopoli

La Eglesa Ortodox Rusce dise ce lo rompe tota lias con la Patriarcia Nonramal de Constantinopoli, cual ave la autoria spirital supra la 300 milion cristianes ortodox de la mundo.

La Patriarcia, con base en Istanbul, ia reconose resente ce la Eglesa Ucrainsce es autonom de Moscva. Multe cristianes ucrainsce acusa la Eglesa Rusce de favore rebelores suportada par Rusia en Ucraina este.

Moscva refusa la autonomia de la Eglesa Ucrainsce. Un bispo major – Hilarion Alfeyev - ia dise ce la deside de reconose lo es "contra la veria istorial". A ante, Constantinopoli ia rejeta la moves per autonomi de la Eglesa Ucrainsce, ma ia aseta aproba los en la semana pasada.

Petro Poroshenko, presidente de Ucraina, ia dise ce la autonomia de la Eglesa vade con mano en mano con la autonomia de Ucraina. El ia ajunta: "Lo es un tema de securia nasional ucrainsce. Lo es un tema de la nasionia ucrainsce."

Ucraina ia deveni autonom en 1991, cuando la Uni Soviet ia disolve. Ma la propri de Crim par Rusia en 2014 e la batalias en Ucraina este ia veneni sua relatas con sua visina.

La ramo moscvan de la eglesa ia nega ce lo es un util de la Cremlin, e dise en loca ce lo ia atenta reali la pas en Ucraina este. Moscva dise ce lo espera ce Constantinopoli va cambia sua deside sur reconose la autonomia de la Eglesa Ucrainsce, per evita un separa formal entre la du eglesas.

Rusia regarda Ciiv como la cuna istorial de la Eglesa Ortodox Rusce. La Cremlin ia dise resente ce lo teme la aveni de scaramuxas en Ucraina sur locas ortodox do la Patriarcia de Moscva fa sua servis.

2018-10-15

Un perde grande per un partito aliada con Merkel

En Deutxland, la resultas inisial de un eleje governal en Baiern sujesta ce un partito liada con lo de Angela Merkel ia sufri un perde grande. La Uni Sosial Cristian de Baiern, aliada con la Uni Democrata Cristian nasional cual canselor Merkel gida, va perde probable sua majoria asoluta en la parlamento nasional.

La Partito Verde va asende a la loca du, e la Alternativa per Deutxland, cual ia campania contra la aseta de migrores, va entra probable a la parlamento a la ves prima.

La Uni Sosial Cristian (USC) es cuasi la sola partito governante de Baiern de pos 1957. Ma sua suporta ia diminui con la polali de opinas sur tal temas como la migra.

La xef de la partito, Horst Seehofer, ia dise ce lo es "no un bon dia", ma ia ajunta ce lo representa "sola un lado de la medalia" car la vota dona "un autoria clar" cual permete ce la USC formi un governa nova.

La resultas ofisial inisial ia mostra ce la USC ia gania sirca 37% de la votas, min par 10 persentos ca a cuatro anios ante aora. La Verdes, ci es sinistriste e favore la aseta de migrores, ia gania pico min ca 18%. La Alternativa per Deutxland ia fini en la loca cuatro con sirca 10% de la votas, pos un coletiva de aspirores nondependente, conoseda como la Votores Libre.

La aliadas nasional de Merkel, la Democratas Sosial sentriste-sinistriste, ia fini con min ca 10%, la dui de sua cuantia presedente. Un rumor sujesta ce lo va estrae se de la governa federal deutx per atenta survive como un partito. Sua xef, Andrea Nahles, ia culpa disputas interna per sua mal resulta en Baiern.

2018-10-14

La canoni de Arcibispo Oscar Romero

Sentos de persones relijiosa en America Sentral ia comensa selebras per onora la santi oji de Oscar Romero, un arcibispo salvadoran ci ia es omisideda a 38 anios ante aora.

En la gera interna de Salvador, Romero ia recomenda franca la pas, e ia es fusilida par soldatos destriste a media de un misa en marto 1980. Sua matores ia es nunca litigada, car un amnestia de 1992 proteje los.

Pape Fransisco va santi el en Roma oji.

La dona de santia a Romero es ja longa promoveda par catolicas en la rejion, ci regarda el como la santa de America Sentral. Per relijiosas, sua potia ia veni de lo ce el ia critica ambos lados de la gera salvadoran, e la sinistriste e la destriste, per cualce ata cual ia afeta persones nonmilitar.

El es ancora despetada par alga persones a la destra estrema, ci descrive el como "un gerilia en roba de prete", car el ia urje soldatos a escuta sua cor e desobedi comandas.

Sua mori ia xoca la mundo e ia intensi la violentia en Salvador, cual ia dejenera rapida a un gera interna de 12 anios cual ia prende 75 mil vives.

2018-10-13

Un lisca de tera en Uganda

Un lisca de tera ia mata plu ca 40 persones pos pluve forte en la rejion Bududa, prosima a Monte Elgon en la este de Uganda. On teme ce la cuantia de mores va crese.

Un rio ia supraflue e un deluvia de fango e acua ia puxa viletas a via. Imajes mostra persones ci retrae corpos de la fango.

Un aveni simil en la mesma rejion ia mata plu ca 300 persones en 2010. Lo es un loca montaniosa con un solo volcanal cual es rica per cultiva. Ma la rejion es ance multe poplada, donce la tera cultivable es forte desirada.

Pos desastres presedente, on ia recomenda ce persones move a via de la rejion. An tal, multe reveni par causa de la fertilia de la tera e sua lias a sua orijina familial.

La Crus Roja de Uganda dise ce lo ia regania 36 corpos, ma un ofisior local, sitada en la Monitor Dial, un jornal ugandan, ia dise ce on ia trova 40 corpos.

Un portavose per la Crus Roja ia dise: "Cuando la acua ia flue a su, lo ia trae con se alga petras grande cual ia destrui la casas de persones."

La ofisia de la ministro xef ia envia un ecipo per aida con la labora de xerca e salva, cual continua en la tereno ru e colinosa.

2018-10-12

Un roceto Soiuz malfunsiona dramosa

En Rusia, on investiga la causa de un problem en un roceto aidante cual ia obliga un capsula Soiuz a fa un atera urjente direta pos sua lansa.

La du astronautas, Alexey Ovchinin de Rusia e Nick Hague de la SUA, ave bon sania. Los ia vade a un mision de ses menses en la Stasion Spasial Internasional cuando sua vola ia es abortada. Sua capsula ia separa, aterante a 400 cilometres de la loca de lansa.

La lansa ia pare vade bon, ma a sirca 90 secondos pos la comensa de la vola, NASA, la ajenteria spasial de la SUA, ia reporta un problem con la roceto aidante entre la sesiones prima e du.

En video direta difusada de la astronautas, los ia secute violente con la vibras causada par la malfunsiona. Pos sirca 114 secondos, la sistem de crise ia inisia se, separante de la roceto la capsula portante la ecipores.

La capsula ia comensa alora lo cual NASA ia nomi "un desende balistical", esposante la ecipores a un forte aseleral plu intensa ca en un atera normal. Usante paracades, la capsula ia atera sur la stepe cazac pos 34 minutos, a sentos de cilometres a norde-este de la lanseria a Baikonur.

On ia lansa direta un mision de salva. Ecipos en veculos multiterenal e paracadores en elicotores ia rapidi per trova la capsula, cual ia ariva prosima a la site Dzhezkazgan en Cazacstan.

Corta a pos, ambos ajenterias spasial ia reporta ce la astronautas es en bon sania. Fotos ia mostra la du omes sentante con suries sur un sofa, liada a monitores de rapidia de cor e presa sangual.

La ministro visxef de Rusia, Yuri Borisov, ia dise ce no plu misiones abitada va aveni "asta cuando nos crede ce la situa intera garantia la securia". El ia rejeta sujestas ce la fali de esta mision va dana la relata entre Rusia e la SUA, disente ce on reconose ce rocetos es "un industria de tecnolojia alta, liada a risca", ma el ia ajunta: "Nos serta no va asconde la razonas – tal situas es noncomun."

La colabora spasial es un campo cual ia survive la relatas jeneral tensada entre la du paises. NASA paia ja per sejas en rocetos Soiuz per transporta sua astronautas a la Stasion Spasial Internasional (SSI) de pos la fini de la programa de la Naveta Spasial en 2011.

La ecipores ja en la SSI no va es afetada par la mision abortada, car los ave furnis sufisinte. Ma la tre persones – un deutx, un rusce e un esuan – va debe cisa resta en la stasion asta la anio veninte.

Roscosmos, la departe spasial de Rusia, ia comanda la institui de un comision governal per investiga la aveni, e on espeta ance un investiga criminal.

2018-10-11

Florida es bateda par un tempesta estrema

En la SUA, un siclon estrema potiosa ia colpa la norde-ueste de Florida, inondante vilas costal, sumerjinte casas e rompente arbores. Siclon Michael ia ateni la costa en la posmedia de ier como un tempesta de categoria tre, con ventas de 200 cilometres per ora.

La tempesta ia lasa cuasi un dui de milion persones sin eletrica en Florida, Alabama e Georgia. Un person ia es matada par un arbor cadente.

Lo ia es tan forte ce lo ia es ancora un siclon cuando lo ia move a plu interna. Sua intensi rapida ia surprende multe persones, an si lo ia debili plu tarda.

Acua nonusual calda en la Golfo Mexico ia aumenta esta tempesta de mera un depresa tropical a soldi. Lo ia deveni ja un siclon de categoria du a martedi, e ia ateni cuasi la categoria sinco a la matina de mercurdi.

Lo ia mata a la min des-tre persones en America Sentral: ses en Onduras, cuatro en Nicaragua e tre en El Salvador. On ia comanda ce plu ca 370 mil persones en Florida evacua, ma ofisiores crede ce multe ia iniora la averti.

Michael es la tempesta tre de la plu potiosas cual ia ateni la tera xef de la SUA en istoria, pos Camille en Mississippi en 1969 e la siclon de la Dia de Labora en Florida en 1935.

La site costal Apalachicola ia reporta un leva de mar par cuasi 2,5 metres. Meteorolojistes ia sujesta ce partes de Florida va esperia levas de mar par asta 4 metres, e deluvias subita par asta 30 sentimetres de pluve.

Scolas e ofisias governal en la rejion va resta cluida en esta semana.

2018-10-10

La vispresidente pasada de Guatemala es prisonida

Un corte en Guatemala ia condena la vispresidente pasada, Roxana Baldetti, a des-sinco anios e un dui en prison per sua rol en lo cual ia deveni conoseda como la scandal de "acua majiosa".

Acusores ia dise ce el ia froda un reserva governal instituida per descontamina un lago. El ia acorda paia cuasi $18 milion a un compania israeli per puri la lago Amatitlán, ma la formula usada ia es un solve nonefetosa de acua, sal e cloro.

La acorda ia es negosiada par sua frate, Mario, ci no ia ave un posto ofisial. On ia condena el a des-tre anios en prison.

En sua deside, judor Pablo Xitumul ia dise ce Baldetti ia es la scemor de un projeta intendeda per froda la governa guatemalteca.

Jornalistes en Guatemala descrive la deside como major, en un rejion do persones rica e potiosa ia es tradisional esenta de puni.

Baldetti ia parti desonorada de sua posto en 2015, pos la protestas antifrodal la plu grande cual la pais ia vide. El va es ance litigada en un otra scandal relatada con la paia de sobornas par companias privata a la duana guatemalteca.

Acusores ia implica Baldetti e Otto Pérez Molina, la presidente de acel tempo, en la scema de froda. Pérez Molina ia es detenida a la fini de sua presidentia en 2015 e es ancora arestada, espetante sua litiga. Ambos nega la alegas.

2018-10-09

On aresta du mexicanes ci ia reteni partes de corpo

La polisia en Mexico investiga un om e fem ci ia es arestada per transporta partes de corpo en un caro de bebe, en relata con a la min des omisides.

On reporta ce a un escuta pos sua aresta, la om ia confesa mata dudes femes en un suburbe de la Site Mexico.

Investigores ia trova partes de corpo en la aparte de la duple e ance a un otra imobila prosima. Los ia es retenida en baldes plen de semento e en un friador.

La avocatos acusante dise ce la duple ia vende la partes de corpo, ma on no sabe a ci.

Matas de femes es comun en Mexico e multe es nonpunida, ma la detalias macabre de esta caso ia crea un scandal e ia provoca protestas sur strada en Ecatepec, la suburbe povre en la Stato Mexico do los ia aveni.

Visinas ia dise ce sempre cuando los ia vide la duple, los ia puia la caro en cual polisiores ia trova la partes de corpo.

La polisia ia para los per xerca pos la desapare en setembre de un fem local de 28 anios, Nancy Huitron, e Valentina, sua bebe de du menses.

La Stato Mexico es la rejion con la cuantia la plu alta de femes mancante en la pais. Entre janero e april de esta anio, 395 persones ia desapare en la stato, de ci 207 ia es femes.

La desapares es xef consentrada en locas violente cual es comun controlada par ganges e a cual la polisia teme entra.

2018-10-08

Un nasionaliste serbsce gania un seja presidential

En Bosnia e Hersegovina, Milorad Dodik, la xef nasionaliste de serbsces bosnian, ia gania la seja per sua comunia en la sistem de tre presidentes. Dodik, ci ave relatas prosima con Rusia, ia recomenda forte ce serbsces bosnian ta separa, disente ce la pais ia fali.

La partito xef de la bosniaces ia dise ce sua aspiror Šefik Džaferović va es sua representor. Votores corvatsce ia repone la democrata sosial sentriste Željko Komšić a sua seja presidential. 53% de votores ia partisipa ier.

La tempo ante la eleje ia es malida par maltratas e menasas etnical, a plu ca dudes anios pos la gera interna en Bosnia.

La pais es ancora divideda en du esentes: la Republica Serbsce e la Federa de Bosnia e Hersegovina. Sua presidentia coletiva de tre membros (corvatsce, bosniace e serbsce) ia es instituida como un parte de la acorda de pas en 1995 cual ia fini la gera en cual sento mil persones ia mori.

Dodik, ci gida la Republica Serbsce ja de 2006, ia reclama sua vinse en Banja Luka, un vila norde.

Par la sistem political complicada de Bosnia e Hersegovina, votores ia debe eleje sinco presidentes e des-cuatro ministros xef. Aspirores ia xerca entra a la governa sentral, composada de du salones parlamental e la presidentia tripartisan, como ance a la governas de la du esentes political.

2018-10-07

Un depinta trinxa se en la subasteria

La artiste Banksy ia publici un video cual mostra como el ia ajunta secreta un trinxador a un de sua depintas cual ia destrui se direta pos cuando on ia vende lo per plu ca milion paundes.

La depinta moldurida Xica con balon, un de la obras la plu conoseda de la artiste, ia es subastada par Sotheby's en London. Ma a mera momentos pos sua vende, la lona ia pasa se tra la lado basa de la moldur, deveninte trinxada. La depinta ia mostra un xica estendente sua mano a un balon con forma de cor.

Banksy ia publici un video en sua conta de Instagram, ajuntante un sita de Picasso: "La desira per destrui es ance un desira construinte."

La video comensa con un testo cual dise: "A alga anios ante aora, me ia pone secreta un trinxador en un depinta." On vide algun en un sueter de capeta ci instala un trinxador en la moldur, pos cual un plu testo ajunta: "Per la caso ce on ta ofre lo per subasta."

La video mostra alora la momento cuando la depinta ia trinxa se a la subasteria en venerdi, filmada par telefoneta. On no sabe como la trinxador ia es ativida. La depinta, stensilida con pinta jetada en 2006, ia veni de vende per 1 042 000 paundes.

Banksy ia deveni conoseda par un serie de obras de grafiti tra Britan. On crede ce el ia crese en Bristol en la sude-ueste de England, ma sua identia resta secreta an pos multe esplora tra la anios.

La depinta Xica con balon ia apare orijinal sur un mur en un strada en London. La varia vendeda ia usa pinta jetada e acrilica sur lona, e ia es monturida sur un funda. Sotheby's no ia revela ci ia compra la obra ante la trinxa, e lo es nonclar esce la contrata es ancora obligante. Ma cisa la truco par la artiste ia ajunta an a la valua de la obra.

2018-10-06

La mori de Montserrat Caballé

Montserrat Caballé, la cantor de opera de ci sua presenta duple con Freddie Mercury ia deveni forte asosiada con la Juas Olimpial en Barcelona en 1992, ia mori a la eda de 85 anios. Sua sania ia sufri tra alga tempo, e el ia es ospitalida en Barcelona en setembre.

Sua carera ia estende tra 50 anios. El ia presenta con la Operas de Basel e Bremen ante sua avansa major en 1965 en Lucrezia Borgia a Carnegie Hall en York Nova.

Plu tarda, el ia presenta con la Opera Metropolitan, la Opera de San Francisco e la Opera Nasional de Wien, aparente con tal cantores como  Luciano Pavarotti e Placido Domingo.

La canta Barcelona ia es prima publicida en 1987 e ia deveni un imno per la Olimpiales en la site en la anio pos la mori de Mercury. Caballé ia canta a la rituo abrinte, con Domingo e José Carreras.

Montserrat Caballé ia nase en Barcelona, e cuando el ia ave sola nove anios, el ia es asetada per instrui a la Conservatori Liceu en la site. El ia gradua en 1953, e ia vade a Italia, do el ia canta alga roles minor.

Sua carera ia avansa rapida pos un apare susedosa como Mimi en La Bohème a la Opera Nasional de Suiz en Basel.

En 1965, el ia fa un debua vinsente en la Statos Unida, emprendente con poca preavisa la rol titulal en Lucrezia Borgia par Donizetti a Carnegie Hall. Sua presenta ia trae multe lodas per la belia de sua vose e sua interprete dramosa, e ia institui el como un stela internasional.

En la mesma anio, el ia apare a Glyndebourne en Der Rosenkavalier e La sposi de Figaro, ma el ia espeta tra sete plu anios ante sua debua en Covent Garden, como Violetta en La Traviata.

Con figur corta ma impresante, Caballé ia cari se a regardores tra la mundo con sua personalia nonrepresable. Sua fanes ia nomi el "La Superba".

Sua carera ia es difisilida par maladia. En 1985, el ia pasa tre menses en ospital con un tumor serebral, e ia reseta un trata per un disturba cardial en 1993. En 2015, el ia es condenada a un prisoni suspendeda de ses menses per froda impostal.

Sua funera va aveni en Barcelona a lundi.

2018-10-05

Rusia es acusada sur siberatacas global

On ia acusa spiores rusce sur relatas con un serie de siberatacas tra la mundo. Rusia ia rejeta la alegas como "un mania ueste sur spiores".

Nederland ia acusa cuatro omes rusce de conspira per ataca en april la Organiza per la Proibi de Armas Cimical (OPCW), cual ia investiga un ataca cimical contra un spior pasada rusce en la Rena Unida.

La governa de la Rena Unida ia acusa la departe militar de securia rusce de scemi cuatro siberatacas major contra companias en Rusia e Ucraina, un rede peti de televisa en la Rena Unida, e la Partito Democrata de la SUA.

La SUA ia dise ce departes de securia rusce ia ataca sua departe contra drogi, un de sua companias de enerjia nucleal, e FIFA, la organiza governante de futbal.

Canada ia dise "con sertia alta" ce penetras a sua sentro per etica en sporte e a la Departe Mundal Contra Drogi en Montreal ia es fada par departes rusce.

Nederland dise ce aparatos en la portabagaje de la auto de la suspetadas ia es dirijeda a la construida de OPCW per recolie detalias de usores. Un antena ia es ascondeda su un jaca sur la scafal retro de la auto. Cuando on ia intersepi la omes, los ia atenta destrui un de sua telefonetas.

En ajunta, la autoriosas nederlandes ia trova ce un computador portable saisida de la cuatro suspetadas ia es ja usada en Brasil, Suiz e Malaisia. Lo ia es usada en Malaisia per ataca la investiga contra la cade de la vola MH17 en 2014 supra teritorio ocupada par rebelores suportada par Rusia en Ucraina este.

La departe rusce de esternas ia publici un declara ofisial en la tarda de ier, descrivente se como la vitim de "ancora un plu campania organizada de propaganda". La declara ia ajunta: "Cualce sitadan rusce con un aparato portable es regardada como un spior."

2018-10-04

Peru reversa la pardona a sua presidente pasada

Un corte en Peru ia reversa un pardona donada a Alberto Fujimori, un presidente pasada de la pais. El ia es pardonada en desembre par causa de sania, a nove anios pos cuando on ia judi el como culpable de relatas con un scuadron de moria e du masacras.

Ma un corte ia comanda sua revade a prison cuando un grupo de vitimes ia gania un apela contra la deside, fada par la presidente a acel tempo, Pedro Pablo Kuczynski.

Fujimori, ci ia gida Peru en la desenio de 1990, va batalia contra la judi. Sua fia Keiko, ci gida la partito xef oposante, ia descrive lo como "nonumana" e "nonjusta".

La plu de peruanes ia crede ce Fujimori, ci ave aora 80 anios, va es en prison per la resta de sua vive, car on ia condena el a 25 anios en 2009. On ia judi el como culpable de comanda la matas de 25 persones par un scuadron de moria, finansiada par la governa, en la gera interna en la pais.

Ma en desembre 2017, on ia move el de prison a un ospital en la capital, Lima, car el ia sufri de presa sangual basa e un ritmo nonormal de cor.

Kuczynski, ci ia resinia en marto sur un scandal de compra votas, ia dona un pardona a Fujimori en la mesma mense, provocante protestas en Lima, an cuando la suportores de Fujimori ia selebra estra la ospital do on ia trata el.

On ia regarda jeneral la pardona como un parte de un acorda political. A tre dias a ante, Kuczynski ia evita difisil un acusa de malcondui, con la suporta de la suportores de Fujimori.

Carlos Rivera, ci representa familianes de la vitimes, ia dise ce la deside de reversa la pardona "reinstitui la direto a justia per la membros de la familias".

Fujimori es amirada par multe en Peru car el ia crase noncompatiosa la rebelores maoiste en la desenio de 1990, fininte un gera cual ia custa deses de miles de vives. Ma sua oposores dise ce el es un tirano frodante ci on ia prisoni justa per comanda la matas de campanianes inosente.

2018-10-03

On recatura un gangster franses major

Rédoine Faïd, un gangster franses ci en julio ia evade prison par usa un elicotor saisida, es aora recaturada. La fujor la plu xercada en Frans ia es detenida a norde de Paris, con sua frate e du otra omes.

Faïd, ci ave 46 anios, ia descrive se como un fan de filmas de gangster, sur cual el dise ce los ia instrui el sur metodos de fa atacas subita.

On ia aresta el a la ves prima en 1998, per un ruba armada. Sua fuji a 1 julio ia es sua evade du e la plu dramosa. El ia es librida de un prison en Réau, a sude-este de Paris, par tre omes forte armada ci ia entra par forsa a la sala de visitores. Los ia puxa el a un elicotor de ci la pilote ia es un instruor de vola, saisida como ostaje.

Faïd ia es prisonida per 25 anios per scemi un ruba malfada en cual un polisior fema ia es matada en 2010. On ia recatura el en la vila Creil.

Naseda en 1972, el ia crese en un parte turbosa de Paris. En la desenio de 1990, el ia dirije un gang envolveda con rubas armada e estorse.

El ia dise ce filmas de Hollywood, como la triler Scarface de Al Pacino, ia inspira sua modo de vive e alga de sua scemas. A un ves a un festa de filmas en Paris, el ia parla a Michael Mann, dirijor de filmas de crimin, disente: "Tu ia es mea conselor tecnical."

Sua fama ia es aidada par un libro en 2009 cual ia resoma sua dias plu joven sur la stradas de Paris e sua desende a la vive de un criminor profesal. Par causa de esta, el ia gania la nometa "la scrivor" entre la polisia franses.

2018-10-02

Palu deveni desperante per aida

La popla de Palu, la vila indonesian afetada par un trematera e tsunami a venerdi, deveni sempre plu desperante per aida. Acua, comedas e carburante es rara, e la vias danada difisili la furni e la asede a locas distante.

La polisia ia xuta avertinte e usa gas lacrimojen contra un fola ci ia atenta prende cosas de un boteca peti.

On ia confirma ce a la min 844 persones ia es matada par la desastre. Entre los es 34 studiantes indonesian de ci on ia trova sua corpos su un eglesa enterada par un lisca de fango. On teme ce alga survivores es ancora trapida su esta e otra construidas.

Salvores xerca ance en la ruinas de un otel de cuatro niveles, cual ia conteni sirca 50 persones cuando lo ia colasa. On ia estrae 12 persones, de ci sola tre ia es vivente.

Car ospitales es danada, on trata la feridas su la sielo, e ia institui un ospital militar en la campania.

La militar ia prende controla de la airoporto per transporta aida a la loca, e per fa evacuas. Ma miles de persones espeta ancora longa la vola comersial prima a via de Palu.

La trematera a venerdi ia es potiosa ma nonprofonda, e sua move ia es plu ladal ca vertical. Lo no ia es de la spesie cual crea tipal un tsunami.

Vispresidente Jusuf Kalla ia dise ce la conta final de la mores pote es plu ca mil, e la Crus Roja estima ce plu ca 1,6 milion persones es afetada.

2018-10-01

Iran xuta misiles venjante a Suria

En Iran, la Corpo de Gardores de la Revolui Muslim dise ce los ia xuta misiles a ativistes en Suria este, en responde a un ataca matante contra un parada militar en setembre. Sua declara dise ce "multe teroristes ia es matada o ferida" par la misiles.

A la min 25 persones ia es matada en la fusili en la mense pasada en la site Ahvaz. Esta ia es la ataca la plu matante en Iran en plu ca un desenio. E la grupo Daex e un grupo separadiste arabi ia reclama lo.

Oji, alga misiles balistical ia es xutada a un area a este de la rio Eufrates en Suria. La Corpo ia publici alga fotos sur cual los dise ce los mostra la lansa de la misiles.

Iran ia suporta presidente Bashar al-Assad en la gera interna en Suria, enviante sentos de soldatos e fortinte militias cual combate per la governa suri.

Femes, enfantes e membros de la Corpo de Gardores ia es entre la persones matada cuando cuatro fusilores ia spara a un parada onorante la aniversario de la comensa de la gera de 1980 a 1988 entre Iran e Irac. A pos, Iran ia anunsia la aresta de 22 persones en relata con esta.

A la funeras de la vitimes, la visxef de la Corpo de Gardores ia promete un responde "crasente e ruinante" a la ataca, per cual el ia culpa Arabia Saudi, Israel e la SUA. Sua critica ia es repeteda par presidente Hassan Rouhani de Iran, ci ia acusa ce la SUA e la statos arabi de la Golfo Persian ia capasi la ataca.

An tal, la ambasador SUA a la Nasiones Unida ia comenta: "Lo cual el debe fa es regarda la miror."