2014-01-31

La discutes de pas suri fini con insultas

La governante e oposante suri ia intercambia insultas a la fini de un semana de discutes de pas en Geneve. La confere no ia ateni un acorda firma.

Walid Muallem, la ministro de esternas, ia descrive la membros de la oposante como nonmatur. Louay Safi de la oposante ia dise ce la governante no desira para la versa de sangue.

An tal, Lakhdar Brahimi, la reconsilior de la NU, ia dise ce el ia vide alga opinas comun, e el ia projeta plu discutes per 10 febrero.

La oposante ia acorda partisipa, ma Muallem ia refusa promete.

On culpa vodca per la cuantia de moris joven en Rusia

La cuantia alta de moris joven en Rusia es xef causada par bevi tro multe alcol, spesial vodca.

La studia en la jornal The Lancet revela ce 25% de omes rusce mori ante se aniversario 55. La plu de la moris es liada a alcol.

La causas de mori inclui maladia de figato e veneni par alcol. Multe mori ance en asidentes o en combates ebra.

On crede ce esta rexerca es la plu grande de se spesie en la pais.

On aproba un projeta de dejeta sur la Parador Grande de Coral

Autoriosas australian ia aproba un projeta de prende deponedas dragada e dejeta los a la Parador Grande de Coral.

Esta es un parte de un scema per crea un de la portos la plu grande de esporta carbon en la mundo. On nesesa move deponedas a via per permete barcones plu grande en la porto.

La deside ia es fada par la Autoriosa de la Parce Maral de la Parador Grande de Coral.

Siensities ia recomenda ce lo no suporta la idea, car la deponedas risca sofoca o veneni la coral.

Du rocones cadente dana un cultiveria italian

Fotos dramosa mostra la destrui causada par un rocon jigante cual ia rola tra un cultiveria en Italia Norde. Lo ia deveni desfisada de la monte visina par un lisca de tera en 21 janero.

La rocon ia evita apena un casa, ia destrui un graneria, e ia para en un viteria.

Ance un rocon du ia desfisa se en la lisca. Lo ia para direta pos la casa e ia evita apena crase un auto.

La familia cual abita la cultiveria no ia es ferida.

Mexico aresta un gidor de un cartel de drogas

Fortes de securia mexican ia aresta un de la gidores de la Jenera Nova de Jalisco, un cartel de drogas.

On crede ce Ruben Oseguera Gonzalez es la gidor suordinada en la organiza criminal cual se padre gida.

El ia es arestada en un opera major cual ia envolve desuples de soldatos.

La cartel es liada a la contrabanda vasta de drogas longo lo costa pasifica de Mexico.

La SUA xerca un puni de mori per la bombor de Boston

La governante de la SUA dise ce lo va demanda un puni de mori per Dzhokhar Tsarnaev, la suspetada per la bombis de la maraton de Boston.

Eric Holder, la avocato jeneral, ia dise: "La natur de la condui consernada e la dana resultante obliga esta deside."

17 de la 30 acusas contra la om de 20 anios permete la puni de mori, incluinte la usa de un arma de destrui coletiva per mata.

La bombis, en april 2013, ia mata tre persones e ia feri plu ca 260.

On trova la caxa de un relicia furada de Pape Joan Paul 2

La polisia italian, ci xerca un relicia manxada par la sangue de Pape Joan Paul 2, ia trova se caxa de oro e vitro.

Ma la tela mesma cual porta la sangue manca ancora.

Lo ia veni de un roba de prete cual la Pape ia porta en 1981, cuando un fusilor ia atenta asasina el.

On ia aresta tre suspetadas, alegante ce los ia fura la relicia de un eglesa en la area Abruzzo ma ia dejeta la tela sin comprende se valua.

Panama va libri ecipores de un barcon de Corea Norde

Panama ia comanda la libri de 32 membros de un barcon de Corea Norde cual ia porta armas cuban tra la Canal de Panama a ses menses ante aora.

La capitan e du otra ecipores va resta prisonida, car los es acusada de contrabanda armas.

Cuba ia dise ce on la aviones e armas de la eda soviet ia es en via a Corea Norde per es reparada.

Ma la Nasiones Unida dise ce esta ia desobedi la punis internasional contra Corea Norde.

Un scalera rolante mata un fem en Montréal

Un viajor dial ia mori pos cuando se scarfa ia deveni trapida en un scalera rolante a un stasion de metro en Montréal en Canada.

La fem ia es en se anios 30.

El ia es mor cuando on ia trova el a la basa de la scalera a la stasion Fabre, en la norde de la site, en la matina de jovedi.

Lo ia pare ce se capeles ia deveni ance trapida cuando el ia curvi per atenta estrae la scarfa.

Un multa enorme per un sicliste japanes ci ia mata par colpa

En Japan, un corte ia comanda ce un sicliste paia 47 milion ienes (cuasi un dui de milion dolares american) en compensa a la familia de un fem vea ci el ia mata par colpa.

La om de 46 anios ia colpa la fem de 75 a un pasaje de traversa per paseores.

La judor ia dise ce el vole ce la caso presenta un esemplo a otra siclistes ce bisicles pote mata.

Tokio ia esperia un alti grande en se cuantia de siclistes en anios resente.

La SUA informa OTAN sur un rompe rusce de un acorda nucleal

La SUA ia acusa Rusia de no segue un trata importante de controla de armas, cual proibi misiles nucleal de estende media.

On reporta ce ofisiores american ia dise ce, de 2008, Rusia ia fa probas de vola de un misil lansada de tera.

Un tal proba ta es proibida par la acorda.

La SUA no ia anunsia publica ce Rusia ia rompe la acorda, ma lo ia informa se aliadas en OTAN sur la tema.

Un corte confirma la condena de Amanda Knox per omiside

Amanda Knox, un fem american, dise ce el es "asustada e tristida" par la deside de un corte en Italia de suporta se condena per la omiside de Meredith Kercher, se camerada brites de aparte, en 2007.

Knox es aora en la SUA. On ia condena el a 28 anios e un dui en prison.

On ia confirma ance un condena de 25 anios per Raffaele Sollecito, se ami pasada de cor.

La avocato per la familia Kercher ia dise ce justia ia es realida.

On acusa ce la maior de Toronto ia organiza un bate

En Canada, on litiga Rob Ford, la maior de Toronto. On alega ce el ia conspira per organiza la bate de un prisonida, afin esta no parla sur la atas nonlegal de la maior.

Scott MacIntyre, la ami pasada de cor de la sore de Ford, demanda $1 milion en compensa.

El alega ce on ia ataca el en un prison de Toronto en marto 2012, su comanda de Ford.

La maior, ci ia confesa en novembre 2013 ce el ia fumi crac, aspira es denova elejeda como maior.

Scarlett Johansson resinia de Oxfam

Scarlett Johansson ia resinia como ambasador de Oxfam par causa de un disputa sur se suporta de un compania israeli cual opera en la Riva Ueste.

Un portavose per la ator ia dise ce el ave "un difere fundal de opina" con la grupo umaniste.

El va resta como un ambasador comersial per SodaStream, cual ave un fabriceria en la colonia iudi de Ma'ale Adumim.

Oxfam oposa la comersia de la colonias. Los es internasional nonlegal, ma Israel disputa esta.

On va esecuta la gidor de un partito bangla per contrabanda de armas

On ia condena Motiur Rahman Nizami, la gidor de la partito islamiste xef de Bangladex, a mori per contrabanda de armas. Esta ia provoca temes de violentia nova.

On ia judi ce el, e 13 otras, es culpable de contrabanda armas a separistes en la stato visina indian de Assam.

El ia es la ministro de industria en 2004, cuando on ia descovre la reserva de armas en Chittagong, un porto sude.

El fronti ance acusas sur crimines de gera de la tempo de autonomi en 1971.

On fura un nom rara de usor de Twitter

En Twitter, la posesor de la nom de usor @N alega ce un pirata de rede ia fura lo de el.

Naoki Hiroshima, un programor de California, ia posese la nom @N de pos 2007.

En se blog, el ia dise ce on ia ofre ja $50 000 a el afin el vende lo, e ce persones ia atenta fura lo a ante.

A esta ves, algun ia saisi la controla de alga otras de se contas enlinia, asta cuando el ia acorda sede la nom.

Dotores prepara sorti Schumacher de se coma

Dotores franses redui la drogas calminte a Michael Schumacher en prepara sorti el de un coma.

Ma lo es posible ce se velia va ocupa un tempo longa.

La campion deutx de corsa de autos a sete veses ia sufri un feri grave de testa en un asidente de sci en la Alpes franses a 29 desembre.

Pos operas per sutrae coagulas de sangue de se serebro, dotores ia manteni el en un dormi per aida se recovre.

Yanukovych dise ce la oposante ucrainsce flami la situa

Viktor Yanukovych, la presidente de Ucraina, ia insiste ce el e se governante fa tota cosas posible per solve la crise en la pais.

Ma el ia ajunta ce la oposante political continua "flami" la situa.

La mesaje ia apare en la pajeria presidental pos un anunsia ce la presidente es aora asente car el ave un febre e un maladia respiral.

Yanukovych ave 63 anios.

2014-01-30

La SUA es consernada sur la retarda de sutrae armas cimical de Suria

La SUA dise ce on ia sutrae sola sirca 4% de la armas cimical declarada par la governante suri.

Chuck Hagel, la secretor de defende, ia dise ce el es consernada ce la scema de sutrae la armas es retardada.

El ia informa reportores en Polsca ce Dimashq "debe aseta la encarga de reali se promete".

En Geneve, delegadas de la governante e oposante suri ia partisipa en un dia ses de discutes de pas.

On clari la secretas de serpentes volante

Siensistes ia solve cisa la misterio de la vola de serpentes volante.

On trova esta retiles nonusual en Asia sude-este.

Los es capas de lansa los de arbores e lisca refinada tra la aira.

Rexercores dise ce la serpentes altera estrema la forma de se corpo per jenera la fortes airodinamical nesesada per reali esta.

Google vende Motorola Mobility a Lenovo

En un move nonprevideda, Google ia vende Motorola Mobility, un compania american de telefoneta, a Lenovo, un compania xines cual fabrica computadores, per $2,91 mil milion.

Google ia paia $12,5 mil milion per la compania a min ca du anios ante aora.

Lenova intende forti se departe de telefonetas intelijente par esta compra, cual va compensa cisa per se comersia desaselerante de computadores personal.

An tal, Google va reteni la plu de la patentas profitosa de Motorola, incluinte un per programes de Androide.

On aresta un xef pasada de polisia ecuadoran

La polisia en la SUA ia aresta Edgar Vaca, un comandor pasada de la polisia ecuadoran. On acusa el sur maltratas en relata a diretos umana.

La ministro de internas en Quito ia anunsia ce la jeneral, un jubilor, ia es arestada en Washington e va es estradida a Ecuador.

On acusa Vaca e nove otra ofisiores de saisi e tortura tre rebelores sinistriste en 1985.

El nega tota la acusas.

Neandertalanes ia dona jenes de maladia a nos

Jenes cual influe maladia en umanas oji ia es otenida par reprodui con neandertalanes, en opina de un esplora major en la jornal Nature.

La neandertalanes ia dona varias de jene relatada a diabete de tipo 2, a la maladia de Crohn, e, strana, a la mania de fumi.

Studias de jenom revela ce nos spesie (Homo sapiens) ia copula con neandertalanes pos parti de Africa.

Ma a ante, la funsiona de esta ADN neandertalan no ia es clar, e on no ia sabe esce lo es liada a la sania umana.

Tensas sur istoria asian en la NU

Relatas entre Japan e se visinas ia tensa a la Consilia de Securia de la NU, sur problemes istorial. Ambasadores major ia intercambia parolas forte.

Liu Jieyi, la ambasador xines, ia dise ce un visita resente par la ministro xef japanes a Yasukuni, un santeria controversa, "ia clui la porte de dialogo".

En la entretempo, la ambasador de Corea Sude ia acusa Japan de "un persepi contorseda" sur istoria.

Japan ia dise ce leva tal cosas a la Nasiones Unida no aida redui tensas.

70 anios ante un scola prima per tota

Un reporta de Unesco dise ce plu ca 70 anios va pasa ante cuando tota enfantes pote vade a un scola prima.

Ma gidores nasional ia promete ce on va reali esta ante 2015.

La reporta dise ce 57 milion resta sin scola, e ce, a la rapidia presente de cambia, xicas povre en la campania de Africa no va vade a un scola prima ante 2086.

On descrive la manca de ensenia per tota e la cualia basa de multe scolas en paises povre como "un crise global de aprende".

Rebelores es matada par la militaria en la Pilipinas

A la min 37 rebelores pilipina ia es matada par un ataca militar de du dias en la sude.

Benigno Aquino, la presidente, ia dise ce la ataca va proteje viletanes de rebelores en la provinse de Maguindanao.

La rebelores oposa un acorda resente de pas entre la governante e la Fronte Moro de Libri Muslim, un organiza plu grande.

Su la acorda, la rebelores debe sede se armas en intercambia per autonomia en partes de la sude.

Un rusce ci ama poesia mata se ami ci ama prosa

En Rusia, un disputa ebra sur la meritas de formas leteratural ia fini cuando un amor de poesia ia mata un suportor de prosa par coteli el.

On ia acusa un om de 53 anios en Irbit, un vila en la montania Ural, sur la omiside de un otra om, de 67 anios. On dise ce la du ia es amis.

Los ia bevi distiladas en la aparte de la plu vea cuando esta ia dise – seguente la reportas – ce sola la prosa es vera leteratur.

On alega ce la plu joven, un ensenior pasada, ia coteli el ante core a via.

Frans acusa un airolinia iamani sur un cade matante en 2009

Frans ia acusa Yemenia, un airolinia iamani, con mata nonintendeda pos un cade de avion cual ia mata 152 persones en 2009.

Lo ia cade prosima a Comori en la Canal de Mosambic.

Autoriosas franses dise ce la Airbus A310 ia comensa de la capital de Iaman, ma ce on no ia debe permete ce lo vola.

La plu de la persones matada ia es sitizanes franses ci ia vola a Comori per visita relatadas. Sola un person ia survive: un xica adolesente ci on ia salva de la mar.

Un ministro libi survive un atenta de asasina

En Libia, la ministro tempora de relatas interna ia survive un atenta de asasina el en la capital, Tripoli.

Al-Sidik Abdul-Karim ia es en via a un encontra cuando se auto ia es fusilida par atacores nonidentifiada.

Plu temprana en janero, Hassan al-Droui, la ministro suordinada de industria, ia es matada par fusili – la asasina prima de un membro de la governante tempora.

Libia ia sufri un anarcia estrema de pos la despone de Muammar Gaddafi en otobre 2011.

La fia de un maniate de Hongkong defende se sesia en letera publica

La fia de un maniate de Hongkong ia scrive un letera publica per demanda forte ce se padre aseta ce el es lesbian.

Gigi Chao dise ce se padre Cecil debe aseta se acompanior e "trata el como un umana normal e diniosa". Seniora Chao ave 33 anios, e ia sposi Sean Eav en 2012.

En la semana pasada, senior Chao ia proposa dupli se ofre de $65 milion en 2012 per trova un sposo per se fia.

Hongkong no reconose sposis de la mesma seso, an si omosesalia ia es descriminalida ala en 1991.

La banco sentral de la SUA redui se compra de obligas

En la SUA, la Sistem de Reserva Federal ia anunsia ce lo redui se compras mensal de obligas finansial par $10 000 milion a $65 000 milion.

La banco sentral ia es comprante obligas per atenta manteni basa la tasos de interesa e stimula la crese.

Lo ia declara ce "la crese en ativia economial ia boni" de pos se consenta la plu resente en desembre.

On ia previde la deside, ma asiones american ia debili par 200 puntos a la anunsia, an tal.

Jornalistes es acusada en Egipte

Dudes jornalistes fronti acusas en Egipte.

Des ses es egipsianes acusada de parteni a un organiza teroriste, e la otra cuatro es stranjeres acusada de aida la mesma organiza o de difusa novas falsa.

La stranjeres es un australian, du briteses, e un nederlandes.

Plu temprana, redes internasional de novas ia demanda la libri de sinco jornalistes de al-Jazirah.

Un tempesta de neva en la sude profonda de la SUA

En la sude profonda de la SUA, miluples de persones ia spende la note sur autovias, en scolas, o en eglesas, par causa de un tempesta de neva.

Airoportos e stradas ia es cluida, e sinco statos ia declara states de crise.

La militaria ia envia veculos per aida motoristes trapida e persones ci ia nesesa comedas e acua.

No plu ca 7,6 sentimetres de neva ia causa un caos en un area usual calda, do multe sites ave no scopinevas e no camiones salinte.

Un descovre major sur selulas madrin

Rexercores sur selulas madrin ia anunsia "un descovre siensal major" cual pote comensa un eda nova de medica personalida.

Siensistes en Japan ia mostra ce on pote rapida crea selulas madrin par sumerji selulas de sangue en asida.

Selulas madrin es capas de muta a cualce texeda, e on proba ja los per sani oios, la cores, e serebros.

Con la developa nova, publicida en la jornal Nature, la tecnolojia pote deveni plu barata, rapida, e secur.

Un presidente pasada averti sur un gera interna en Ucraina

Un presidente pasada de Ucraina, la prima de pos la autonomi de la nasion, ia averti ce la pais es "a la borda de un gera interna".

Leonid Kravchuk ia es la presidente de 1991 a 1994.

El ia recomenda aora ce la parlamento ata con encarga masima en se debates sur un amnestia per protestores prisonida.

Viktor Yanukovych, la presidente corente, vole dona un amnestia sola si la protestores sorti de construidas ofisial e desasembla se paradores.

2014-01-29

"No cosa sustantial" va resulta de la discutes suri

Lakhdar Brahimi, la reconsilior de la NU en Geneve, ia dise ce el previde ateni "no cosa sustantial" en la serie prima de discutes suri. La discutes va fini en venerdi.

El ia dise ce el "no es deludeda" e ce "la jelo rompe lenta".

El ia clari ance ce la NU negosia ancora con la governante suri sur la posible de envia un convoia de aida umaniste a Homs, un site asejada.

El ia informa ce la distantia entre la du lados resta "alga grande", ma ce ambos vole continua discute.

Un dotor cose se gama propre pos un ataca par selaco

Un dotor en Zeland Nova ia usa se cotel per survive un ataca par selaco, ia cose se feris, e ia vade final a la taverna per un bir.

James Grant ave 24 anios. En saturdi, el ia es pexante con lansia a la costa sude de la pais cuando (en se parolas) "alga cosa ia fisa se a me gama".

El ia coteli la bestia, sur cual el ia suposa ce lo es un selaco, e ia susede forsa lo a via.

A pos, el ia nada a tera e ia cose se gama con la utiles en un caxa de aida prima.

On condena du briteses per gida a 232km per ora

En la Rena Unida, on ia condena du omes ci ia gida se autos a 232 cilometres per ora sur un via xef en la contia de Yorkshire Norde.

Daniel Scott Richardson, ci ave 21 anios, e James Burrows, de 26 anios, ia confesa ce los ia es culpable de viaja perilinte.

La laboror de la camera de polisia ia es "completa stonada" cuando el ia rejistra la du autos tan rapida movente, la un vera prosima a la otra.

On ia condena ambos a cuatro menses en prison, ma la punis ia es suspendeda per 18 menses.

La polisia franses esamina la casas de Dieudonné

En Frans, la polisia ia invade casas liada a la comediste controversa Dieudonné M'Bala M'Bala.

Los ia entra subita a alga imobilas poseseda par Dieudonné, e ance a la teatro Main d'Or (Mano de Oro) en Paris, do el ia reali alga de se presentas.

On suspeta ce el ia fa un declara frodante de bancarotia, ia lava mone, e ia malusa la ativas de un compania.

La governante ia jura ce el va paia ance multas per parla odiosa.

Un contrabandor de ivor reseta un multa recordo en Cenia

En Cenia, un corte ia multa un om xines per 20 milion xilinges ($230 000) per contrabanda ivor. Esta es un recordo.

On ia catura Tang Yong Jian en la semana pasada con un denton de elefante, de pesa 3,4 cilogrames, en un valis a la airoporto internasional de Nairobi.

Si el no pote paia la multa, el va spende sete anios en prison.

Cenia ia proibi la comersia de ivor en 1989, ma en anios resente la pratica ia deveni plu comun.

Du partitos oposante fusa en Sudafrica

La partito xef oposante de Sudafrica ia anunsia ce Mamphela Ramphele va es se aspiror presidental en esta anio.

Ramphele es un ativiste antiapartait, e ia formi se partito propre, Agang, en 2013. El ia es la acompanior de Steve Biko, un gidor de consensia negra ci es aora mor.

Helen Zille, la gidor de la Alia Democrata, ia dise ce on ave "no person plu bon" ca Ramphele per gida se campania.

Analistes dise ce la move intende forsa a via acusas ce la AD es "tro blanca" per vinse.

La SUA jela denova

Multe de la Statos Unida de America esperia denova un clima estrema fria. On previde neva an en la Sude Profonda.

La tempesta invernal va estende de Mississippi a Carolina Sude en la dias veninte.

On ia declara un state de crise en Louisiana, do la governor ia avisa abitores de resta en se casas.

On ia clui multe scolas, e sirca 3000 aviones no ia pote vole en martedi.

On condena polisiores pilipina per un rota de tortura

Grupos de diretos umana ia critica la polisia en la Pilipinas per la usa alegada de un "rota de tortura" en un prison.

On alega ce polisiores ia jira la rota per eleje metodos de maltrata prisonidas.

La punis posible ia inclui "la posa de cirotero", en cual persones ia debe pende inversada per 30 secondos.

Amnestia Internasional ia dise ce polisiores en la provinse de Laguna, prosima a Manila, ia maltrata la prisonidas "per un diverti".

La NU va nesesa envia 10 000 soldatos a la RAS

La NU crede ce on va nesesa envia 10 000 soldatos, cisa plu, per fini la turbas en la Republica de Africa Sentral.

Gérard Araud, un ambasador franses, ia descrive la situa en la pais como "multe multe grave".

La Consilia de Securia ia aproba ja un deside cual permete la usa de forsa par soldatos european en la RAS.

Sirca milion persones – 20% de la popla – ia fuji de se casas en menses de violentia relijiosa.

On cansela la lansa de un libro par Malala Yousafzai

On ia cansela un aveni en Pacistan norde-ueste per lansa la racontas de Malala Yousafzai a mercato, pos presa de ofisiores local.

Malala es la xica ci ia es fusilida a la testa par la Taliban en 2012 per se campania per boni instruis a femes.

La polisia e ofisiores de la provinse ia dise ce on ia para la aveni par causa de securia.

Ma Imran Khan, de ci se partito governa la provinse, ia dise ce el no pote comprende la deside.

Un bilionor demanda pardona pos compara un disputa a un persegue nazi

Un capitaliste riscosa ia demanda pardona pos compara un disputa sur buses libre per laborores de tecnolojia en San Francisco a la persegue de la iudis su la nazis en Deutxland.

Esta segue un mense de protestas en San Francisco sur lo cual alga abitores vide como un efeto negativa de tal laborores.

En un letera publica a Wall Street Journal, Tom Perkins, un bilionor, ia descrive "un marea levante de odia" de ricas.

On ia critica se comentas en Twitter.

Israel prisoni un antisioniste per intende de tradi

Un corte en Ieruxalim ia condena un om israeli a cuatro anios e un dui en prison per ofre spia per Iran.

Yitzhak Bergel, de 46 anios, ia confesa se culpablia de contata un ajente stranjer, de intende de tradi, e de atenta aida un enemi de Israel.

Ma la judi de la corte ia nota ce "no dana ia es fada a la pais".

Bergel parteni a un seta iudi ultraortodox cual es forte oposada a la esiste de la Stato de Israel.

Mladić refusa atesta per Karadžić

A la prosede en Den Haag de Radovan Karadžić, la gidor pasada de la serbsces bosance, Ratko Mladić, la xef pasada de la armada bosance, ia refusa atesta per la defende.

El ia denunsia la prosede de la NU como "diablosa", e ia dise ce el ta dana se caso propre si el ta atesta.

Ambos omes nega acusas de crimines de gera e contra umania. Los ia intercambia salutas amin en se apare publica prima de pos la fini de la gera bosansce de la desenio de 1990.

En sorti de la corte, Mladić ia dise: "Multe grasias, Radovan. Pardona, esta foles no ia permete ce me parla. Los defende bombas de OTAN."

La ministro xef de Ucraina resinia

Viktor Yanukovych, la presidente de Ucraina, ia aseta la resinia de la ministro xef e se ecipo, entre protestas continuante contra la governante.

Mykola Azarov ia ofre resinia como ministro xef per crea "un compromete sosial e political".

La parlamento ucrainsce ia acorda cuasi unida per cansela un lege controversa contra protestas.

En dias resente, protestas ia estende tra la pais, ateninte an la fortres de la presidente en la este.

La metano de boves esplode se cabana

La metano relasada par boves de leteria ia causa un esplode en un cabana de boves en Rasdorf, en Deutxland sentral.

La teto ia es danada, e un de la boves ia es ferida.

Cuantias grande de la gas ia colie en la cabana par causa de la rutas e petas de la 90 boves en lo.

On crede ce un bove es capas de emete 500 litres de metano per dia.

Hongkong mata miluples de galetas par causa de gripe avial

Hongkong ia comensa mata 20 000 galetas pos descovre la virus H7N9 de gripe avial en avias emportada de la parte xef de Xina.

On ia fa la descovre a un mercato per vendores major. La governante ia dise ce on debe destrui tota galetas a la mercato.

La governante ia proibi ance la emporta de galetas vivente de la parte xef de Xina per tre semanas.

H7N9 ia move de infeta galetas e patos a infeta umanas en la periodo temprana de 2013.

2014-01-28

On catura la gidor de un cartel de drogas en Mexico

Fortes mexican ia catura un de la plu xercadas de la padrones de drogas.

Dionicio Loya Plancarte, conoseda como "La Tio", ia es un de la gidores de la cartel Cavalores Templal en la stato de Michoacán en la ueste de la pais.

La governante ia ofre un premio de 30 milion pesos ($2,2 milion) per se catura. On xerca el per crimines de droga e de lava de mone.

Plu temprana en esta mense, la pais ia envia soldatos a Michoacán post combates entre ganges e patruliores estralegal.

La nonemplea franses es recorda alta

La nonemplea franses ia ateni un punto recordo alta. Plu ca 3,3 milion persones es aora enscriveda como nonempleada.

En desembre, 10 200 plu persones ia es enscriveda. Esta ia rompe un promete par presidente François Hollande ce la nonemplea va redui ante la fini de 2013.

La proportio de nonempleadas en Frans es aora 11,1%. Lo ia crese par 5,7% en 2013, e par 0,3% en desembre.

En un visita a Turcia, Hollande ia dise: "Un stabli, cual nos ia ateni, no sufisi."

On sujesta un lia entre DDT e la maladia de Alzheimer

Rexercores sujesta ce la esposa a diclorodifeniltricloroetano (DDT), un pestiside cual ia es vasta usada en la pasada, pote aumenta la posible de developa la maladia de Alzheimer.

Un studia ia mostra ce la cuantia de DDT restante en pasientes con la maladia ia es la cuatruple de lo en persones sana.

Alga paises usa ancora la pestiside per controla malaria.

Ma un organiza de rexercores sur la maladia ia dise ce on nesesa plu atestas per demostra ce DDT fa un rol en dementia.

La NU recomenda no paia rescates a teroristes

La Consilia de Securia de la Nasiones Unida ia aproba un deside cual recomenda ce paises sesa paia rescates a grupos teroriste.

On intende ce la deside va presa governantes.

La ambasador brites de la NU ia dise ce grupos liada a al-Qaidah ia gania $105 milion, cisa plu, par rescati ostajes en tre anios e un dui.

La deside no introdui obligas legal nova, car, su un acorda adotada en 2001, paises debe ja no paia rescates per persones furada.

Japan revisa manuales scolal per clari se teritorio

En Japan, la ministreria de ensenia dise ce lo revisa manuales per instruores afin on clari se posese de isolas disputada.

Hakubun Shimomura, la ministro, ia dise ce Japan vole ensenia se enfantes "sur partes integral de se teritorio".

La teritorio disputada inclui isolas en la Mar de Xina Este cual Japan controla ma cual Xina reclama ance, e alga isolas controlada par Corea Sude.

La disputas ia tensa la relatas entre Japan e la du paises.

On vende plu ca mil milion telefonetas intelijente en un anio

Tra la mundo, on ia vende plu ca mil milion telefonetas intelijente en 2013. La cuantia es plu grande par 38,4% ca en la anio presedente.

Samsung ia estende se gida como la vendor xef de mundo. Apple e la compania xines Huawei ia ocupa la locas seguente.

Plu ca un dui de la 1,8 mil milion telefonetas vendeda ia es intelijente.

Un compania de rexerca mercatiste ia dise ce esta es la ves prima de vende plu ca mil milion telefonetas intelijente en un anio.

Morsi ariva a corte per un prosede sur evade de prison

Mohammed Morsi, la presidente islamiste pasada de Egipte, ia ariva a un corte en Qahira (Cairo) per es prosededa sur se evade de prison en 2011.

On ia prende el a la corte par elicotor de un prison en Alexandria.

Morsi ia es un presidente libre elejeda, la prima en Egipte, ma la militaria ia despone el en julio 2013 pos protestas coletiva contra se governa.

El debe apare en cuatro prosedes separada sur acusas de crimines diversa.

Karadžić e Mladić va apare en junta a un prosede

Du de la figures la plu potiosa de la gera en Bosnia de la desenio de 1990 va apare publica en junta a la ves prima de pos la fini de la gera.

Radovan Karadžić, la gidor pasada de serbsces bosansce, ia clama Ratko Mladić per atesta a la prosede de la NU en Den Haag sur crimines de gera iugoslavian.

Karadžić fronti 11 acusas, incluinte jenoside en relata a la masacra de Srebrenica en julio 1995.

Ambos omes es prosededa. Los nega crimines de gera e crimines contra umania.

Pete Seeger mori con 94 anios

Pete Seeger, un cantor de folclor e un ativiste american ia mori a la eda de 94, pos un maladia corta.

El ia deveni famosa en la grupo The Weavers (La Texores), formida en 1947, ma ia continua fa presentas solitar en un carera de ses desenios.

Conoseda per se cantas de protesta, Seeger ia es poneda en lista negra en la desenio de 1950 per se disposa sinistriste.

La banjiste alta e barbida ia deveni un figur de proa per tal causas political como la desarma nucleal e la promove "Occupy Wall Street" de 2011.

La fio de Bhutto demanda atas militar contra la Taliban

La fio de Benazir Bhutto, la ministro xef asasinada de Pacistan, ia demanda ce la autoriosas de la pais fa atas militar contra grupos de gerores.

Bilawal Bhutto Zardari ia dise ce politicistes debe comprende la menasa de tal grupos enarmada como la Taliban.

La governante fa discutes urjente sur modos de trata violentia aumentante.

Bhutto, ci ave 25 anios, ia dise ce el considera deveni elejable en elejes prevideda per 2018.

Un jornaliste dise ce on ia emplea el per se capasia de pirati telefonetas

En Britan, un prosede sur la pirati nonlegal de telefonetas par jornalistes ia oia ce un jornaliste ia revela se capasia en acel campo en un intervisa de emplea.

Dan Evans ia clari ce on ia ensenia el sur tal pirati cuando el ia labora a la jornal Sunday Mirror ("Miror a Soldi"), e ce News of the World ("Novas de la Mundo") ia enscrive el per acel capasia.

Plu temprana, la ator Jude Law ia oia un alega ce News of the World ia paia un de se relatadas per esposa informas.

La SUA aresta du lavores de bitcoines

La manejores de du locas de intercambia per bitcoin, un mone virtual, ia es arestada en la SUA.

La Departe de Justia ia dise ce Robert Faiella e Charlie Shrem es acusada sur lava de mone.

La autoriosas ia clari ce la du ia emprende un scema de vende plu ca un milion dolares de bitcoines a usores de la Silk Road (Via de Seda), un mercato enlinia de drogas.

On ia clui la Via de Seda en otobre de la anio pasada, e ia aresta se posesor alegada.

Protestores ucrainsce sorti de la ministreria de justia

En Ucraina, protestores antigoverna ia fini se ocupa de la ministreria de justia, car la ministro ia menasa un state de crise.

Un portavose per la protestores ia dise ce los ia parti car los no ia desira provoca la autoriosas.

Sirca 30 persones resta estra la construida e refusa permete ce cualcun entra.

La turba ia estende tra la pais en dias resente, spesial sirca construidas munisipal.

Un congresor de la SUA va resinia sur cocaina

En la SUA, un congresor de Florida ci ia confesa se culpablia sur posese de cocaina intende resinia se posto.

Republiciste Trey Radel ia revade resente a la Congresa pos un periodo de asentia e un reposa en un clinica de recapasi. El ave 37 anios.

El ia confesa ce el ia compra 3,5 grames de cocaina de un polisior desemblada en otobre. On ia condena el a un anio de libria oservada.

El ia dise ce el ia luta con alcolomania e malusa de drogas.

La colie de alio es proibida sirca Sochi

Parente, on ia proibi abitores de alga partes de Txetxnia en Inguxetia de colie alio savaje tra la periodo de la Olimpiales Invernal.

La reporta ia apare sur un pajeria jihadiste: "La seculares e nonrelijiosas no ia esplica en cual modo la colie de alio savaje en la forestas pote perili la Olimpiales de Sochi."

En alga operas de securia en anios resente, persones coliente alio en partes de la Caucaso Norde ia es matada o ferida car on ia malpersepi los como rebelores.

La pajeria sita fontes anonim ce la proibi va dura de 23 janero a 23 marto.

Atacas en Nijeria mata desuples

Gerores islamiste suspetada ia ataca du viletas en Nijeria norde-este, lasante 74 persones mor.

Los ia ataca la vileta Kawuri en la stato de Borno a la clui de un mercato folida a soldi. Los ia usa esplodentes e ia ensende casas.

Atestores ia dise ce 52 persones ia es matada en acel ataca. 22 ia mori en un otra ataca a un servi de eglesa en Waga Chakawa en la stato de Adamawa en la mesma dia.

On culpa la grupo Boko Haram per la atacas.

Un xef de Google demanda reformas plu grande de la NSA

Un empleada major de Google ia dise ce la stratejia de presidente Barack Obama per restrinje spiores a la NSA (Departe de Securia Nasional) no sufisi.

David Drummond, la ofisior legal xef de Google, ia dise ce la SUA nesesa cambia se disposa sur securia per restora la fida sur la interede.

Se comentas es entre la primas par persones major en la mundo de tecnolojia pos un parla sur la tema par la presidente, plu temprana en janero.

En la entretempo, Edward Snowden ia fa se intervisa televisada prima. El ia dise ce la NSA spia sur companias deutx cual compete con companias american.

On fura un relicia de Pape Joan Paul 2 de un egleseta

La polisia italian xerca un relicia santa furada cual conteni la sangue de Pape Joan Paul 2.

Lo ia es furada en un efrata de un egleseta cual ia es un loca de sinifia spesial a acel Pape. La eglesa de San Pietro della Ienca es isolida en la montania de la area de Abruzzo en Italia sentral.

En la fini de semana, furores ia rompe alga baras de fero protejente e ia entra tra un fenetra.

Los ia lasa la caxa de mone, ma ia prende un crus e la relicia nonestimable. Lo conteni un peso de gaza cual ia es empapada en la sangue de la Pape – un de sola tre tal ojetos en la mundo.

2014-01-27

La discutes sur pas suri fa no progresa sur move de potia

La discutes de pas en Geneve ia fa no progresa sur la tema controversa de move la potia a un governante tempora.

La ecipo de la governante ia presenta un "declara de prinsipes" cual ia conteni no refere a un move de potia, e la oposante ia rejeta lo.

La lados no pote acorda la rol futur de presidente Bashar al-Assad.

Un avisor de la presidente ia dise a jornalistes ce la discutes va continua an tal.

La armada egipsian suporta Sisi como elejable per presidente

La autoriosa militar xef de Egipte ia aproba ce la Abdul Fattah al-Sisi, la xef de la armada, deveni elejable per presidente.

En julio 2013, Sisi la gida la despone de Mohammed Morsi, la presidente prima de Egipte ci on ia eleje democrata.

On previde ce el va aseta la proposa de la Consilia Suprema per Fortes Enarmada e resinia se posto militar en la dias veninte.

Plu temprana, la presidente tempora ia leva Sisi de la grado de jeneral a marexal de campo.

Misiles american ataca un gidor de al-Shabab en Somalia

La militaria de la SUA ia fa un ataca con misiles en Somalia, contra un gidor suspetada de gerores relatada a al-Qaidah e al-Shabab.

Ofisiores de defende american dise ce los atenta descovre esce la colpa ia mata la blanco, de ci los no ia revela se identia.

La ataca ia es dirijeda a un veculo en un area distante de Somalia sude, prosima a la vila Barawe.

Al-Shabab es la grupo xef en Africa este cual ave lias a al-Qaidah.

On fusili crocodiles pos un ataca a un xico en Australia

En Australia, la polisia ia fusili du crocodiles en xerca un xico mancante ci ia es atacada par un crocodil a soldi.

La enfante de 12 anios ia es saisida par la bestia en cuando el ia nada con se amis en un stange en Kakadu, un parce nasional en la Teritorio Norde.

Un otra xico ia es savajida par la crocodil, ma el ia susede evade.

Gardaforestas ia dise ce probable la du crocodiles matada no ia fa la ataca, e ce la xerca va continua.

Un constitui nova per Tunisia

La parlamento de Tunis ia adota un constitui nova, la prima pos la despone de presidente Zine el-Abidine Ben Ali a tre anios ante aora.

La Asembla Constituinte Nasional ia aseta la testo con 200 favorentes entre 216 votas.

Politicistes espera ce esta va envia un mesaje de stablia pos menses de nonprogresa entre fortes muslim e nonrelijiosa.

En la entretempo, Mehdi Jomaa, la ministro xef nomida, dise ce el ia formi un governante tempora nova.

Un eglesor turces nega inisia investigas sur froda

En Turcia, Fethullah Gülen, un eglesor muslim e retirada, ia nega usa se influe per comensa investigas sur froda de governante.

On regarda Gülen como un competor de Recep Tayyip Erdoğan, la ministro xef turces.

El ia responde a la alega ce el ia comanda se seguores con postos major en la polisia e la juderia a inisia la investigas.

Gülen es la gidor de la promove de hizmet, un forma tolerante de Islam. Lo asentua la instrui, la altruisme, e la asiduia, e ave miliones de seguores tra la mundo.

La vagador lunal xines esperia un problem

Yutu (la Coneo de Jada), un vagador xines, ia esperia un falta de controla macinal.

La veculo esplora la luna, ma lo ia encontra problemes causada par lo cual siensistes ofisial ia descrive como "la ambiente complicada de la surfas lunal".

La vagador ia atera en desembre como un parte de la mision Chang'e-3: la atera prima nondanada sur la Luna de pos 1976.

On ia previde ce Yutu va funsiona per sirca tre menses.

La ministro de justia ucrainsce menasa un state de crise

En Ucraina, la ministro de justia ia avisa protestores antigoverna ci ocupa se ofisia ce el va demanda un state de crise si los no parti.

Olena Lukash ia informa jornalistes local ce el va demanda esta de la Consilia Nasional de Securia e Defende.

Protestores ia saisi la construida en Kiev a un ora tarda de soldi, e ia crea paradores con sacos de neva per impedi entra.

Un turba estende tra la pais. Ativistes ocupa construidas munisipal en asta des sites.

La Banco Mundal promete aida Burma

La Banco Mundal ia promete $2000 milion en aida de developa a Burma, per projetas cual inclui la furni de enerjia e la aida medical.

Jim Yong Kim, la presidente de la banco, ia fa esta anunsia en se visita prima a la pais.

Burma, ance conoseda como Miama, ia es cluida a multe de la mundo esterna tra multe anios. Lo luta per reconstrui se economia.

La banco ia sesa presta a Burma a cuasi tre desenios ante aora, cuando la junta militar renante ia fali repaia.

Siviles es permeteda de sorti de Homs

La reconsilior a la discutes de pas en Geneve ia dise ce Suria va permete ce femes e enfantes sorti de la area asejada de Homs "de aora".

Lakhdar Brahimi ia alega ce grupos enarmada ia impedi la sortis.

El ia clari ance ce la oposante ia acorda dona a la governante listas de la persones prisonida par tal grupos.

Ma el ia dise ce lo es "tro temprana" per evalua la posible de un acorda vasta.

Un corvo e un gavota ataca la pijones pasosa de la Pape

Du pijones blanca, librida par enfantes a lado de Pape Fransisco en la Vatican, ia es atacada par otra avias.

La pijones ia es librida de la Palasio Apostolal en jesto de pas. Ma un gavota e un corvo negra ia desende rapida sur los.

Desuples de miluples de persones ia regarda en cuando un pijon ia luta per evade. La corvo ia pica repetente la otra.

Final, ambos pijones ia vola a via. On no sabe cual ia aveni a los a pos.

Un autor mexican es en ospital pos un cade

José Emilio Pacheco, un poesiste e novelor mexican de 74 anios, es en un state multe grave en ospital, pos dana se testa en un cade.

En 2009, on ia dona a el la Premio Cervantes, la onora leteratural la plu alta en la mundo de la lingua espaniol.

On regarda Pacheco como un de la poesistes la plu grande de se pais, e un representor importante de se jenera.

El es la plu bon conoseda per se naras de adolesentes en un Mexico malida e nonjusta en la desenios de 1940 e 1950.

Laborores en la Eurotunel es venenida con monosido de carbono

19 laborores ia esperia veneni con monosido de carbono cuando los ia labora tra la note en la Eurotunel. Un de los es en un state grave.

60 laborores ia es cambiante la reles en la linia entre Calais en Frans e Folkestone en England.

Un soldor ia maladi en la oras temprana de soldi, e on ia diagnose veneni par monosido de carbono.

Trafica en la tunel no ia es afetada.

La xef de NHK parla sur sclavos sesal en la Gera Mundal Du

En Japan, la xef nova de NHK, la organiza difusante nasional, ia causa un controversa par desasentua la usa de sclavos sesal – conoseda como "femes de comforta" – par la militaria en la Gera Mundal Du.

A sola alga dias pos emprende se posto nova, Katsuto Momii ia dise ce la pratica ia es comun en cualce pais en gera.

El ia dise ance ce NHK debe suporta la governante japanes en se disputa teritorial con Xina.

Como un difusante publica finansiada, NHK debe es political neutral.

Un barco de turistes inversa matante en la Baia de Bangla

Un barco de turisme ia afonda prosima a la Isolas Andaman e Nicobar en la Baia de Bangla. 21 persones ia mori.

La barco, Aqua Marine, ia inversa sirca 16:00 a soldi.

13 persones ia es salvada e moveda a ospital, ma nove persones manca ancora.

Un investiga studia la causa de la afonda.

Protestores tai impedi votas temprana

En Tai, protestores ia ensirca voterias, impedinte votas temprana ante la eleje jeneral de la semana veninte.

Un de se gidores ia es matada par fusili en un scaramuxa con suportores de la governante en Bangkok este.

On ia cansela la vota temprana en desuples de locas tra la capital e alga provinses sude.

Ativistes antigoverna vole ce la ministro xef resinia, e ce on reformi la sistem political.

Lampo causa un esplode matante de armas en RD Congo

En la Republica Democrata de Congo, un esplode a un reserva de armas ia mata a la min 20 persones.

La esplode ia aveni a venerdi cuando un raio de lampo ia causa un focon a un base de armada en la site de Mbuji-Mayi.

Plu ca 50 persones ia es ance ferida, e casas ia es destruida.

La pais luta per recovre de un gera cual ia mata miliones entre 1998 e 2003. Lo ave recursos enorme de mineral, ma la majoria de se popla es povre.

2014-01-26

Docores txilan fini se greve

En Txile, laborores de doca ia acorda fini un greve danante sur salario.

Un portavose per la docores ia dise ce los va recomensa labora a soldi, pos suscrive un acorda con la dirijores de la porto.

Los ia acorda un paia spesial per pausas de come, de un dui de ora, cual ia resta nonpaiada de pos 2005.

La greve ia comensa a alga portos a 3 janero. Lo ia costa miliones de dolares a la campo de esporta frutas e vejetales en Txile.

Multe manca ancora pos un focon en un casa de veas en Canada

Ecipos ia trova du plu corpos a la dia tre de xerca a la ruina de un casa de veas en Québec, destruida par foco.

On ia confirma ce des persones es mor pos la focon en jovedi. 22 manca ancora.

Xercores ia introdui aparatos nova, intendeda per dejela barcones, car la temperatur ia resta sirca -10°C.

La polisia investiga un teoria ce la focon ia es comensada par un sigareta.

Un fusilor en un boteca en Maryland mata du persones e se

Un om ia fusili a un sentro comersial en Maryland en la SUA, matante du persones ante mata se. Sinco otra persones ia es ferida.

Esta ia aveni a un grupo de botecas en Columbia, un suburbe de la site de Baltimore.

La om ia es en un boteca de vestes de patini cuando el ia xuta. El ia mata un om e un fem. Ambos ia es empleadas de la boteca.

La fusilor ia es ja mor cuando on ia trova el prosima a un fusil e muni.

128 es arestada per violentia a un protesta contra la Copa Mundal

La polisia en la site brasilera de São Paulo ia aresta 128 persones en scaramuxas pos un protesta contra la Copa Mundal de futbal.

On ia ensende un auto, e ia dana ance botecas, bancos, e un veculo de polisia.

La violentia ia obliga la autoriosas a cansela alga de la selebras intendeda per la aniversario 460 de la site.

2500 persones ia protesta en la strada sur la costa de ospita la Copa Mundal en Brasil.

Un bomba umana esplode en Kabul

En Afganistan, un bomba umana ia esplode se, prosima a un bus cual ia porta soldatos en la capital, Kabul. A la min cuatro persones ia es matada.

La Taliban dise ce los ia fa esta ataca en la sude-este de la site. Los ia forti se campania ante la parti de soldatos gidada par OTAN a la fini de 2014.

La ataca la plu resente es la numero tre par la rebelores en Kabul en pico plu ca un semana. A 17 janero, 21 persones ia mori en un ataca par fusil e bomba a un restorante.

En la ataca a soldi, du soldatos en la bus e du siviles sur la strada ia mori.

Un ativiste xines de diretos es condenada a cuatro anios en prison

Un corte xines ia condena Xu Zhiyong, un ativiste conoseda de diretos umana, a cuatro anios en prison.

Xu ia campania per diretos de enfantes e contra froda. On ia condena el per "asembla folas per rompe la ordina publica".

Alga otra ativisites de un promove de nonasconde fronti acusas simil.

Grupos de diretos ia critica presidente Xi Jinping, ci ia promete batalia froda, sur se casos.

La oposante ucrainse rejeta un ofre de Yanukovych

En Ucraina, Arseniy Yatsenyuk, la gidor oposante, ia dise ce protestas va continua. El ia rejeta un ofre par presidente Viktor Yanukovych de nomi el como ministro xef de la pais.

Yatsenyuk ia dise ce la oposante es jeneral preparada de aseta un gidor nova, ma ce alga esijes importante debe es sasiada a ante, incluinte elejes nova.

Scaramuxas ia continua tra la note. En Kiev, ativistes ia ataca un construida de polisiores.

En la sentro de la site, per selebra se sposi nova, un duple ia trepa a la culmina de un parador de protesta.

Pexes ave la ADN per ditos, ma descomutada

Un studia sujesta ce pexes ave la jenetica nesesada per formi ditos, ma ce lo es descomutada.

La rexerca aida esplica como pexes ia evolui per deveni la animales la plu temprana de tera, a miliones de anios ante aora.

Pexes ia susede traversa a la tera par reusa un parte de se ADN per crea ditos.

La siensistes ia prende jenes de pexes e ia introdui los a muses.

On condena un deside de no envia un scior sudafrican a Sochi

Suportores de la sola scior posible de la Juas Olimpial ia condena un deside de no envia el a Sochi.

La comite Olimpial nasional ia dise ce Sive Speelman "ia fali sasia la esijes minima".

Speelman ave 18 anios e es gradida como numero 2290 en la mundo.

Peter Pilz, la xef de sci de Sudafrica ia dise: "El ia sede un dui de se enfantia per segue se sonia. Esta es un delude."

La Pilipinas acorda sur pas con rebelores muslim

La Pilipinas ia acorda la parte final de un acorda de pas con rebelores muslim ci batalia en un rebela durante en la sude de la pais.

Lo es la parte cuatro de un projeta de pas con la Fronte Moro de Libri Muslim cual on ia comensa en otobre 2012.

La acorda detalia como la rebelores va sede se armas en intercambia per autonomia en partes de la sude.

La acorda, realida en Kuala Lumpur, va gida a un trata de pas final e completa.

La enemis suri consenta per discute a du veses

La oposante e governante de Suria ia consenta a du veses en lo cual Lakhdar Brahimi de la NU ia descrive como "un bon comensa" a discutes de pas.

Brahimi, la reconsilior, ia confesa ce la du lados "no ia ateni multe", ma el ia dise ce el atenta forti la relatas par leva prima temas umaniste.

El ia clari ce on ia discute la entra de un convoia de aida a Homs, e ce on va discute prisonidas en soldi.

La delegadas en Geneve xerca sedes peti, no un acorda de pas completa.

Hollande confirma se separa de Trierweiler

La presidente de Frans, François Hollande, ia confirma se separa de se acompanior Valérie Trierweiler. El ia informa un ajenteria de novas franses ce se vive compartida ia fini.

Ma plu temprana, se ofisia a la Palasio de Elisio ia dise ancora ce "rumores falsa" sirculi en la jornalisme franses.

A du semanas ante aora, un jornal ia publici fotos cual ia pare mostra Hollande en un relata de ama con Julie Gayet, un ator.

Trierweiler ia pasa un semana en ospital pos la revelas.

Sete persones mori a la aniversario tre de la revolta egipsian

A la min sete persones ia es matada en scaramuxas en Egipte. La pais onora la aniversario de la revolta en 2011 cual ia fini con la despone de presidente Hosni Mubarak.

Protestas competente de suportores e oposores de la governante ia aveni en Qahira (Cairo).

Ma la polisia la para protestas antigoverna par usa de gas de larma, e on ia reportas arestas en Qahira e Alexandria.

La governante ia dise ce lo ia forti la medios de securia per saturdi.

La presidente ucrainsce ofre la posto de ministro xef a un oposor

Viktor Yanukovych, la presidente de Ucraina, ia ofre la posto de ministro xef a Arseniy Yatsenyuk, un gidor oposante.

Yatsenyuk es un aliada de Yulia Tymoshenko, la ministro xef pasada prisonida.

La ofre ia segue discutes en saturdi con gidores oposante, en un atenta nova de fini la turba cresente cual ia estende tra la pais.

Plu temprana, la ministro de relatas interna ia dise ce laboras per solve pasosa la crise es futil.

Protestores tai promete no impedi la vota

Suthep Thaugsuban, la gidor de protestas en Tai, ia promete ce se suportores no va impedi votas temprana per la eleje jeneral de la semana veninte.

Suthep dise ce protestores no va atenta para persones ci vole fa se votas, de soldi. Ma los va protesta ancora estra la voterias.

Los desira ce la ministro xef resinia, e ce on reformi la sistem political.

La governante dise ce la vota va aveni, an pos un judi par la Corte Constitual ce on pote pospone lo.

On comanda a para la vive de un fem ensinta ma serebral mor en Texas

En la SUA, un judor en Texas ia comanda un ospital a sesa la susta de vive de un fem serebral mor, ci on manteni en vive car el es ensinta.

R. H. Wallace ia dise ce la Ospital John Peter Smith debe para la vive de Marlise Munoz ante la sera de lundi.

Munoz ave 33 anios. El ia es ja ensinta de 14 semanas cuando el ia deveni nonconsensa en novembre. On crede ce el ave un coagula de sangue.

La ospital ia razona ce un lege de stato proibi la refusa de salva la vive a pasientes ensinta.

2014-01-25

Rusia libri Lebedev, un asosior pasada de Khodorkovsky

Platon Lebedev, un asosior comersial pasada de Mikhail Khodorkovsky, ia es librida pos 10 anios en prison en Rusia.

On ia intende libri el en maio, ma la Corte Suprema ia redui se periodo en jovedi.

Pos finansia partitos oposante e entra a un disputa con presidente Vladimir Putin, Lebedev e Khodorkovsky ia es condenada de evade de imposta e de fura.

Putin ia pardona Khodorkovsky en desembre 2013. Lebedev no ia demanda un pardona.

Un dieta grasosa en ensintia pote altera la serebro de la bebe

Rexercas en la SUA sujesta ce si un fem ensinta ave un dieta con multe gras, esta pote afeta la developa de la serebro de la bebe e alti se probablia de obesia en se vive plu tarda.

Un ecipo a la Scola de Medica de la Universia de Yale ia mostra ce dietas pote cambia la strutur de serebros de muses.

On razona ce esta esplica perce lo es plu probable ce la enfantes de jenitores obesa pote deveni estrema obesa.

Espertas ia dise ce la studia ave valua, ma ce lo no demostra la esiste de alteras en serebros umana.

Protestores condena un balo estrema destriste en Wien

En Wien en Austria, miluples de persones ia partisipa en prosegues protestante contra un balo anial a cual on ia previde ce gidores stranjer estrema destriste va vade.

La protestores no vole ce la Partito de Libria, un partito oposante, fa se Korporierten-Fest ("balo de studiantes") en la palasio Hofburg.

On ia aresta alga persones pos atas violente.

En anios pasada, la balo ia atrae persones estrema destriste como Marine le Pen, la gidor de la Fronte Nasional, un partito franses.

La presidente de Colombia espera la pas

Juan Manuel Santos, la presidente de Colombia, ia dise ce el espera suscrive un acorda de pas con rebelores sinistriste en esta anio, per fini un disputa de 50 anios.

El ia dise ce on ia debili la rebelores de FARC, e ce la securia en Colombia ia boni.

Ma el ia defende se oposa a un sesafusili, clarinte ce, per fini rapida la gera, on va nesesa no sola discutes de pas ma ance la prema militar.

La du lados negosia ja en Cuba de pos novembre 2012.

Asiones diminui sur la valua de mone en paises emerjinte

En Wall Street, asiones ia diminui multe en venerdi par causa de ansia en mercatos emerjinte.

En New York, la indise Dow Jones ia cade par 318,24 puntos, donce par cuasi 2%. Ance NASDAQ e la indise S&P 500 ia cade par 2%, fininte a 4130,44 e 1790,31 en acel ordina.

En jovedi, Arjentina ia abandona se atentas de defende la peso, e acel mone ia diminui par 11% en relata a la dolar.

Otra mones en paises emerjinte ia cade ance, e un ansia ia ateni asionerias european en venerdi.

Peru desculpa un governante pasada de sterilis obligada

Peru ia desculpa la governante de Alberto Fujimori, un presidente pasada, de fa un campania de sterilis obligada en la desenio de 1990.

Prosedores dise ce los ia trova no atesta cual suporta alegas ce on ia sterili sentuples de femes e omes, xef povre e nativa, contra se vole.

La governante de Fujimori ia insiste sempre ce tota operas ia es acordada con la pasientes.

Ma grupos de diretos umana ia reata coler, disente ce los va apela.

On judi ce la pospone de elejes tai es legal

La Corte Constitual de Tai ia judi ce elejes projetada per 2 febrero pote es legal posponeda.

Ma lo ia dise ce cualce pospone nesesa es asetada par la comision de eleje e par la ministro xef.

La comision recomenda pospone la elejes par causa de la tumulta political. La governante insiste ce la elejes debe aveni como intendeda, an tal.

Tai es en un de state de crise car protestores esije la resinia de la ministro xef, Yingluck Shinawatra.

On estradi un spior pasada corvatsce a Deutxland

On ia estradi Josip Perković, un xef pasada de spia corvatsce, suspetante ce el ia scemi la omiside de un oposor iugoslavian.

On ia dona el a la autoriosas deutx a la airoporto, de do on ia vola el a München.

Stjepan Đureković ia es matada en 1983 prosime a München, a un tempo cuando Perković ia es un membro de la ajenteria secreta de Iugoslavia.

Corvatsca ia esita estradi el, causante un disputa cual ia manxa se junta a la UE en julio 2013.

Du persones mori en un ataca a un corte en Frankfurt

En Deutxland, du omes ia es matada en un ataca de fusili e coteli a un compleso de corte en Frankfurt.

La atacor suspetada ia core de la sena, ma on ia aresta el en la area prosima.

La ataca ia aveni a sirca 08:45 de ora local, a la corte de stato en la capital finansial deutx.

La du vitimes ia ave 45 e 50 anios. Un de los ia mori a la sena, e la otra ia mori plu tarda en ospital.

On descovre la jenetica de la canser moderna la plu vea

Siensistes en la Rena Unida ia descovre ce la canser vivente la plu vea conoseda ave un eda de 11 000 anios.

Lo ia apare en un sola can, e ia survive en canines asta aora. La selulas de canser ia pasa entre animales cuando los ia copula.

Un ecipo gidada par la Instituida Sanger, prosima a Cambridge, ia desifri la ADN de la canser, revelante la jenetica de un can antica de grandia media.

La animal ia es simil a un husci, e ia ave un pelo corta e lisa de color gris brun o cisa negra.

La fria impedi la xerca per survivores de un focon en Québec

Un fria amarga impedi la xerca per asta 30 canadianes vea e debil ci manca pos un focon cual ia destrui un casa de veas en Québec.

Xercores luta en un temperatur de -21°C en L'Isle-Verte, a la dia pos la focon. Sinco persones ia mori en la arde.

La ruinas de la casa ia colasa, e es aora covreda con un strato spesa de jelo pos la usa de mangetas par la pompores.

Multe de la persones mancante ia depende de sejas rolante e aidapaseas.

La FBI averti botecas sur furas eletronical

La FBI ia avisa botecas american ce los nesesa forti se defendes contra siberfurores.

La departe de securia ia inclui se averti en un reporta privata a vendores grande cual Reuters, la ajenteria jornaliste, ia oteni.

La FBI ia dise ce botecas debe spesial reconose la tipo de program vil cual on ia usa per fura miliones de detalias de carta de credito de comprores a la compania Target.

En 2013, la departe ia vide sirca 20 casos de fura de datos par la mesma spesie de codigo malvolente.

Protestores ucrainsce ataca ofisias areal de governa

Ativistes antigoverna en Ucraina aumenta se protestas pos un manca de progresa en discutes entre presidente Viktor Yanukovych e la oposante.

En Ucraina ueste, la ativistes ia saisi la ofisia areal de governa en la site Ivano-Frankivsk, e ia ataca un otra en Chernivtsi.

On ia reporta ance protestas en Lutsk en la norde-ueste e en Sumy en la este.

En la entretempo, Yanukovych ia promete usa "tota medios legal" si on no trova un solve de la crise.

Un brites en Pacistan es condenada a mori per blasfema

Un corte en la site de Rawalpindi en Pacistan ia condena un om brites de 70 anios a mori per blasfema.

Muhammad Asghar ia es arestada en 2010 pos scrive leteras a persones diversa en cual el ia declara ce el es un profeta.

Se avocatos ia razona per tolera, disente ce el ave un istoria de maladia mental, ma un panel medical ia refusa esta.

La leges controversa de blasfema en Pacistan furni la posible de un condena a mori per cualcun sur ci on judi ce el ia insulta Islam.

Trierweiler va visita India

Valérie Trierweiler, ofisial la dama prima de Frans, va visita India, en cuando on resta nonserta sur se relata con presidente François Hollande.

Trierweiler va es en Mumbai en soldi e lundi per un visita organizada e finansiada par un ajenteria franses de aida, Ata Contra Famia.

On ia invita el a India en se capasia ofisial.

Dutas ia apare sur se titulo pos alegas ce Hollande fa un relata de ama con un otra fem.

La enemis suri va parla la un a la otra en Geneve en saturdi

La governante e oposante de Suria va consenta en la mesma sala en Geneve en saturdi. La dia prima de la confere de pas ia fini sin discutes direta.

Lakhdar Brahimi, la ambasador de la NU, ia discute separada con ambos lados en venerdi. El ia dise ce ambos comprende ce la confere atenta "salva Suria".

La du lados ia colpa la un la otra per la manca de progresa.

Diplomatas dise ce los espera aora sedes peti, como sesafusilis local, en loca de un acorda de pas jeneral.

Snowden dise ce el no pote revade a la SUA

Edward Snowden, un contrator pasada de la Departe de Securia Nasional american, ia dise ce el ave "no posible" de un prosede justa en la SUA, e ce el ave no intende de revade ala.

El ia dise ce la lege de 100 anios, su cual on ia acusa el, "proibi un defende fundida sur la benefica publica".

En un intervisa enlinia, el ia comenta: "Me pote en no modo reveni a me pais e defende me ante un juria".

Snowden, ci ave 30 anios, es tempora refujada en Rusia pos esposa detalias de programes de monitori eletronical.

2014-01-24

On aresta la posesor pasada de un pajeria de pornografia venjante

Autoriosas en la SUA ia aresta du omes en Californai per invade contas de e-posta e per fura fotos nuda per publici los en un loca de rede de "pornografia venjante".

Hunter Moore, ci ave 27 anios, e Charles Evens, ci ave 24, es acusada de conspira, de asede nonautorida un computador protejeda per oteni informas, e de fura de identia.

On reporta ce la omes ia publici imajes ofendente a la pajeria sin la permete de la vitimes.

Los fronti un puni de desenios en prison si on judi ce los es culpable.

Un airolinia ecuadoran suspende volas a Venezuela

TAME, un airolina de Ecuador, ia suspende se volas a Venezuela. Lo esije $43 milion en paias tarda per biletas.

En jovedi, 80 pasajores ia es abandonada a la airoporto en la capital, Quito.

TAME dise ce la Banco Sentral Venezuelan ia move no mone a se conta en Ecuador de pos April 2013.

Medios sever sur mone stranjer crea difisiles per airolinias stranjer cual vole renativi mone otenida par vendes de bileta en Venezuela.

Atletas cenian menasa boicota sur impostas

Alga de la atletas xef de Cenia ia menasa para representa se nasion a competes internasional como la Juas Olimpial, par causa de leges nova sur imposta.

Wesley Korir, un parlamentor e un ganior pasada de la maraton de Boston, ia dise ce atletas va paia imposta a du veses, car los paia ja un imposta sur se ganias stranjer.

Parlante a un foro de atletas en Eldoret, el ia clari ce atletas reteni aora no plu ca sirca 15% de se ganias.

El ia averti ce la lege nova pote causa ce multe atletas cambia se nasionalia.

La profita de cuatri de Samsung diminui

Samsung Electronics, la fabricor la plu grande de mundo de telefonetas e televisadores, ia reporta un redui de profita de cuatri, a la ves prima en du anios.

Se profita neta en la periodo de otobre a desembre ia es 7300 mil milion uones ($6800 milion). Acel es min ca la cuatri presedente par 11%.

La revenu de la compania ia es afetada par un diminui de profitas par 18% entre la du cuatris en se departe de telefoneta.

Un paia spesial e flutuas de valua de mone ia dana ance se ganias.

On alega ce Berlusconi ia interfere con atestas en un prosede

On va investiga Silvio Berlusconi, la ministro xef pasada de Italia, sur alegas ce el ia interfere con atestas en un prosede de prostitui par minores.

El e se avocatos es acusada de encontra la atestores fema per discute la atestas cual los va furni.

En 2013, on ia condena Berlusconi de paia per seso con un prostituida minor, Karima El Mahroug, ance conoseda como "Ruby la Furacor".

Esta es la plu resente en un cadena de casos legal cual afeta Berlusconi.

La oposante ucrainsce es setica sur discutes

Protestores en Ucraina ia dise ce los no crede ce discutes entre un gidor oposante e presidente Viktor Yanukovych pote ateni un progresa.

Alga en la capital, Kiev, ia cria "Vergonia!" e ia sibila en cuando Oleg Tyagnybok ia informa la folas ce la discutes va redui la versa de sangue.

On reporta ce otras ia ensende numaticos prosima a paradores de la oposante.

Un otra gidor oposante, Vitaly Klitschko, ia dise ce la presidente ia fa no sedes en la discutes.

Corea Norde demanda reconsilia con la Sude

Corea Norde ia envia un letera publica a la Sude, demandante reconsilia e un sesa de "atas militar enemin".

La letera ia es publicida en la jornalisme nasional de Corea Norde, a alga semanas ante cuando Corea Sude va fa eserses militar en junta con la SUA.

Corea Sude ia iniora la letera, disente ce lo ave "un motiva ascondeda".

Lo es tradisional ce tensas sur la penisola corean aumenta ante la eserses anial. Pyongyang ia condena la eserses como provocante.

Un bomba grande de auto en Cairo sentral

Un bomba de auto ia esplode estra la xeferia de polisia en la capital de Egipte. Lo ia mata cuatro persones e ia feri 51.

La esplode ia es sensada tra Cairo, e un fuma negra ia es vidable, levante supra la sentro de la site.

Plu tarda, un esplode du ia es oiada en la distrito Dokki de la site.

No grupo ia dise ce lo es culpable per la atacas.

Amnestia Internasional descrive la violentia egipsian como sin presedente

Amnestia Internasional dise ce Egipte ia esperia violentia "a un scala sin presedente" pos la despone de la presidente islamiste Mohammed Morsi par la armada en julio 2013.

Lo ia acusa ce la fortes de securia maltrata comun la popla, e ce diretos e librias en Egipte deveni erodeda.

La organiza de diretos umana publici se reporta a du dias ante la aniversario tre de la revolta cual ia obliga la resinia de presidente Hosni Mubarak.

En la entretempo, un studiante favorente Morsi ia mori en batalia con la polisia en la site Alexandria.

On suscrive un acorda de sesafusili en Sudan Sude

La governante e rebelores de Sudan Sude ia suscrive un acorda de sesafusili, pos discutes en Itiopia.

La acorda ia es asetada en un otel en Addis Ababa, la capial itiopian. La combate debe fini en min ca 24 oras pos la suscrive.

En la semana pasada, soldatos de la governante ia recatura la du sites xef cual la rebelores ia saisi.

Plu ca un dui de milion persones ia es forsada de se casas en esta gera de un mense.

La dia prima completa de discutes suri va comensa en Suiz

La dia prima completa de discutes sur pas entre la governa e oposante suri va comensa en Geneve.

En jovedi, Lakhdar Brahimi, un reconsilior de la NU, ia move navetin de un lado a la otra per evalua la desira de consenta juntada.

La dia abrinte de la confere ia es ospitada en la site suiz de Montreux. Parolas amarga ia es intercambiada par la delegas competente.

La NU dise ce la gera de tre anios en Suria ia mata multe plu ca un desi de milion vives.

Un comite consilia ce spia par la NSA es nonlegal

Un comite gardante de privatia american ia judi ce la colie coletiva de datos sur telefonis, par departes de securia, es nonlegal, e ce lo ia fa beneficas mera "minima" en la impedi de terorisme.

La Comite Supravidente de Privatia e Librias Sivil ia conclui con un majoria de 3/2 ce la program debe sesa.

En un parla major de la semana pasada, presidente Barack Obama ia clari ce el comanda restrinjes a la usa de tal datos.

Ma el ia dise ance ce la SUA debe continua colie datos per preveni atacas.

La marina angolan xerca piratas suspetada

La marina e forte de aira angolan xerca piratas suspetada pos la desapare de un barcon de petrolio en se acuas. La barcon Kerala es elinica e ave 75 000 tones.

Capitan Augusto Alfredo de la marina ia dise ce on ia vide un barcon nonconoseda en la visinia de Kerala cuando lo ia es ancorida prosima a la porto de Luanda.

El no ia pote confirma un ataca par piratas. Lo ta es la prima tal ataca en acuas angolan.

Angola es entre la produores la plu grande de petrolio en la mundo.

Un focon mata tre persones en un casa de veas en Québec

En Canada, a la min tre persones ia mori, e 30 otras manca, pos un focon cual ia destrui completa un casa de veas en Québec.

On ia reporta la focon a sirca 00:30 de ora local. Lo ia aveni en Résidence du Havre en L'Isle-Verte, a 225 cilometres a este de la capital provinsal.

La construida ia ave 52 apartes, abitada par 50-60 persones vea.

Un polisior ia dise ce la salvores espera ancora trova alga persones mancante.

Laborores sudafrican de platino greve sur paia

La sindicato la plu grande en la campo de platino de Sudafrica ia clama un greve sur paia.

La greve es la plu grande en la campo, de pos un greve en Marikana en 2012 cual ia deveni un masacra. 34 escavores ci ia partisipa en un protesta nonlegal sur salarios ia es fusilida par la polisia.

La greve en jovedi va para la produi par la tre companias xef de platino en la mundo.

Pos un judi de corte, on ia pospone un greve diferente en la campo de oro, ance intendeda per jovedi.

Israel aresta tre membros de al-Qaidah en Ieruxalim

Shabak, la departe de securia interna de Israel, ia aresta tre membros alegada de un selula de al-Qaidah.

Un portavose de la ministro xef ia dise ce la omes ia intende ataca locas incluinte la ambasada de la SUA.

Shabak ia dise ce la omes ia es enscriveda par un ajente de al-Qaidah en la Banda de Gaza. Un sentro grande de confere en Ieruxalim ia es ance un blanco.

La promove Hamas, cual governa la Banda de Gaza, ia nega la alegas.

Bolivia va construi se reatador nucleal prima

Evo Morales, la presidente de Bolivia, ia anunsia un projeta de construi la reatador nucleal prima en la pais.

Morales ia dise ce la developa de tecnolojia nucleal con intendes pasosa ia deveni stratejial importante per Bolivia.

Parlante a membros de la Congresa Bolivian, el ia dise ce Iran, Frans, e Arjentina ia ofre se como bonvolores per aida con la projeta.

En America Latina, la sola tre paises con sentros nucleal de eletrica es Brasil, Arjentina, e Mexico.

2014-01-23

Un fem es violeda par gang su comanda de veas de vileta

En la stato Bangla Ueste en India, la polisia ia aresta 13 persones sur un viole par gang de un fem. On alega ce la viole ia es comandada par veas de vileta ci ia oposa se relata con un om.

La fem de 20 anios es ospitalida en un state estrema grave.

Cortes nonofisial en viletas indian permete comun la matas de duples sur ci on judi ce los ia rompe regulas local de condui.

On esamina aora plu la violentia sesal en India pos la viole e mata par gang de un studiante en un bus en Delhi en 2012.

La presidente arjentina parla publica pos sirurjia de serebro

Cristina Fernandez de Kirchner, la presidente de Arjentina, ia fa se parla publica prima en ses semanas. Esta fini un silentia longa cual ia leva demandas sur se sania pos sirurjia de serebro.

Fernandez ia es bonvenida par sentuples de suportores a la palasio presidental en Buenos Aires.

En un parla televisada, el ia anunsia un scema de aida jovenes nonempleada. El ia critica la jornalistes arjentina per se divinas sur se sania.

On ia opera sur el a 8 otobre per sutrae un coagula de sangue de se serebro. El ia recomensa labora a 18 novembre.

Polisiores egipsian es matada a un posto de controla

Sinco polisiores ia es matada en Egipte pos un ataca enarmada contra un posto de controla a sude de Cairo.

Du otras ia es ferida, un de los en modo grave, en la ataca en la provinse Beni Suef, a 100 cilometres de la capital.

Du omes sur motosicles ia fusili multe a la fortes a la posto.

Atacas contra fortes de securia ia aumenta de pos la despone de Mohammend Morsi, la presidente islamiste, en julio.

Goles nova per enerjia en la Uni European ante 2030

La Comision European ia descrive se intendes per politica de clima e enerjia asta 2030.

Los vole un gol obligada de redui emetes de carbon par 40% de se cuantia en 1990. 27% de enerjia european va debe es renovable en o ante 2030, ma on no va dona goles obligada a la statos membros individua.

La proposas va es revisada par ministros xef.

Grupos verde ia dise ce la goles nova no es sufisinte aspirante, e ce la redui de emetes par 40% es "perilosa basa".

Du protestores mori en scaramuxas en Kiev

Du protestores ia es matada en combates con la polisia en Kiev, la capital de Ucraina.

Prosedores ia confirma ce los ia mori par feris de baleta. Los es la matadas prima de pos la comensa de protestas antigoverna en novembre.

La scaramuxas en mercurdi ia comensa cuando la polisia ia invade per desasembla un campa de protesta.

Pos discutes con presidente Viktor Yanukovych, un xef oposante, Vitali Klitschko, ia menasa gida protestores "en un ataca".

La asteroide Ceres emete vapor de acua

Oservas de la asteroide la plu grande en la sistem solal sujesta ce lo emete plumones de vapor de acua.

Tra un tempo longa, on crede ja ce Ceres conteni cuantias sustantial de jelo, ma esta es la ves prima de deteta tal relasas.

La descovre ia es fada par Herschel, un telescopio infraroja european en orbita, e reportada en la jornal Nature.

Siensistes crede ce la vapor veni de areas de color oscur sur la surfas de Ceres. Cisa la jelo deveni caldida par la Sol e muta direta a gas.

Gardores pacistani es matada en acompania un sicliste espaniol

En la provinse de Balochistan en Pacistan, fusilores ia mata a la min ses gardores ci ia acompania un sicliste espaniol.

On ia embosce los a 50 cilometres a ueste de Quetta, la capital provinsal.

Javier Colorado ia es pico ferida pos cade de se bisicle.

En un mesaje en Facebook, el ia dise ce el intende continua se viaja de Europa a Asia e la mundo restante.

La polisia italian aresta 90 mafiores

En Italia, la polisia ia fa 90 arestas en un opera major contra un grupo potiosa de mafia.

Los ia saisi propria con valua de multe plu ca 222 milion euros ($300 milion) en atacas ante lus prima a membros de la clan Contini.

Acel clan es un parte de la Camorra, un rede criminal potiosa en la area de Napoli.

On ia aresta persones en Napoli, Roma, e Firenze.

Un sculta de Mandela ave un coneo en se orea

La governante de Sudafrica ia comanda ce scultores sutrae un coneo de bronze cual los ia asconde en la orea de un sculta de Nelson Mandela.

La sculta ia es desvelida pos la mori de la presidente pasada en desembre.

On reporta ce la scultores ia ajunta la coneo como un suscrive comersial, e per representa la rapidia con cual los ia debe completi la obra.

En africans, la parola per "coneo" es "haas", cual sinifia ance "freta".

Migrores mori, tirada par la gardacosta elinica

La Nasiones Unida ia demanda per un investiga pos cuando un barco de migrores ia inversa, tirada par un barcon de la gardacosta elinica. Asta des du persones ia mori.

On ia trova du corpos, ma 10 plu persones ia manca pos la aveni prosima a la isola Farmakonisi en lundi. On ia salva 16 persones.

La gardacosta dise ce, en clima mal, migrores es plu secur si on no move los de se barco propre.

Ofisiores elinica ia dise ce migrores panicante ia causa mesma la inversa de se barco.

La ministro xef de Japan recomenda un restrinje de militaria en Asia

Shinzo Abe, la ministro xef de Japan, ia informa un fola a la Foro Economial Mundal en Davos ce on debe restrinje la crese militar en Asia.

On crede ce se comentas refere a Xina, cual es envolveda en disputas teritorial con se visinas.

El ia compara la relatas con Xina a los entre la Rena Unida e Deutxland direta ane la comensa de la Gera Mundal Prima.

El ia dise: "Japan ia jura ce lo va fa nunca denova un gera. Nos va continua desira ce la mundo es pasosa."

On discute un foto de un saleta privata jemelo en Sochi

On ia conversa multe en Twitter a tema de un foto de un saleta privata per omes en un construida de la Olimpiales en Sochi. La saleta conteni du vasones.

La foto, fada en la Sentro de Biatlon, ia es tuitada par un corespondente de la BBC, e Alexei Navalny, un gidor oposante rusce, ia tira la atende a lo.

Navalny ia demanda esce on ia spende la soma de 1 700 mil milion rublos ($50 000 milion) per la juas en la modo la plu bon posible.

Otras ia reata a la foto con noncrede e ilaria, e alga ia broma ce lo relata a la debate resente sur diretos ge.

Rusia xerca un bomba umana suspetada

La polisia rusce en Sochi xerca un fem ci es suspetada de intende fa un ataca como bomba umana.

Los ia mostra posteres con la fas de la fem en oteles sirca la vila, do la Juas Olimpial de Inverno va aveni en febrero.

On crede ce Ruzanna Ibragimova, ci ave 23 anios e veni de Dagestan en Caucaso Norde, es la vidua de un geror islamiste.

On dise ce el ia entra secreta a Sochi, plu temprana en esta mense, sircoveninte la securia forte ante la sporte.

Un monumento en Sahara es vidable de spasio

En la deserto Sahara, a 16°51'53.748"N 11°57'13.362"E, on trova la contorno de un avion dirijeda a Paris. Imajes de lo en fotos de satelite ia sperde virusin.

Lo es un monumento a un vola cual ia ariva nunca.

En 19 setembre 1989, un avion franses ia es viajante a Paris de Brazzaville en la Republica de Congo cuando un bomba ia esplode lo supra la deserto. Tota la 156 pasajores e 14 ecipores ia es matada.

Do la avion ia cade, la familias de la vitimes ia construi un monumento durante. Un silueta de la avion, de grandia natural, reposa en un sirculo de petra oscur, ensircada par 170 mirores rompeda. A la punto norde, un ala de la avion sta protendente.

On interoga Dieudonné pos alegas de fusili

La polisia ia interoga Dieudonné M'Bala M'Bala, un comediste controversa franses, pos alegas par ajentes de corte ce on ia xuta baletas de cauxo a los ante se casa.

La ajentes no ia pote vide ci ia fusili, ma un arma ia es trovada en un xerca plu tarda de la casa de Dieudonné.

La comediste debe paia miluples de euros en multas per ofendes diversa, incluinte parlas odiosa antisemita.

La ajentes ia intende dona a el un esije de paia, ma la securiores a la casa ia demanda ce los parti. On ia fusili cuando la ajentes ia revade a se auto.

Texas va esecuta un mexican contra la desira de Mexico e la SUA

La stato Texas intende esecuta un sitizan mexican condenada sur omiside, an contra oposa par la governantes de la SUA e Mexico.

Mexico dise ce la esecuta de Edgar Tamayo, ci ave 46 anios, va viole leges internasional.

La pais dise ce on no ia informa el sur se direto de reseta aida legal de la consuleria mexican cuando on ia aresta el.

John Kerry, la ministro de relatas interna de la SUA, ia fa la ata rara de demanda ce Texas pospone la esecuta.

Intercambias amarga a la confere de pas en Geneve

En la dia prima de un confere major de pas en Suiz, la governante suri e se oposores political major ia intercambia acusas amarga.

La oposante e la SUA ia dise ce presidente Bashar al-Assad ave no validia, e ce el debe renunsia se potia.

La ministro suri de relatas stranjer ia fa un intercambia brusca con Ban Ki-moon de la NU sur la longia de se parla. El ia dise ance ce sola suris pote deside la fortuna de Assad.

La confere en Geneve discute un documento cual proposa un scema de cambia political per Suria.

2014-01-22

On confirma un judi de compensa femes afetada par implantadas PIP

Un corte franses de apela ia suporta un judi importante de compensa 1700 femes, a ci on ia furni implantadas de seno con silicon defetosa. Multe de la implantadas ia fende.

Judores ia dise ce la compania deutx cual ia validi la implantadas, TÜV Rheinland, debe paia 3000 euros a cada fem afetada.

En 2013, on ia judi ce la compania es culpable sur esta scandal de sania, en junta con la compania franses Poly Implant Prothèse (PIP).

Jean-Claude Mas, la fondor de PIP, ia es condenada a cuatro anios en prison e multada per 75 000 euros en desembre.

FIFA menasa Curitiba sur rapidia de construi

FIFA ia avisa Curitiba, un site brasilera cual intende ospita la Copa Mundal de 2014, ce lo risca deveni escluida si la labora no rapidi.

La secretor jeneral de FIFA, Jérôme Valcke, ia dise ce la progresa de laboras a la stadion Arena de Baixada es grave retardada.

A 18 febrero, on va anunsia esce Curitiba, en Brasil sude, va resta un site ospitante.

A min ca sinco menses ante la comensa de la torneo, ses de la 12 stadiones es ancora noncompletida.

La costa este de la SUA esperia un tempesta invernal

La costa este de la SUA esperia la tempesta major du de esta anio. On previde asta 30 sentimetres de neva, un venta forte, e un fria estrema.

An ante la cade de la flocos prima, on ia clui ofisias de governante en Washington e scolas en alga statos.

En New York, neva ia comensa cade ja ante la viaja a labora, e autoriosas ia averti sur un state perilosa sur la stradas.

Plu ca 2500 volas es ja canselada en la pais.

Un bomba colpa un bus de peregrinores xia en Pacistan

En Pacistan, a la min 22 peregrinores xia ia es matada cuando un bomba ia colpa un bus en la distrito Mastung de la provinse Balochistan.

La peregrinores ia es reveninte de un viaja a locas santa en Iran cuando la esplode ia aveni.

Un de la convoia de buses ia es ensendeda, e plu ca dudes persones ia es ferida.

Gerores suni opera en acel area, e blanci frecuente la muslimes xia.

Miliones de parolas secreta es furada en Deutxland

On ia fura la parolas secreta e otra detalias de 16 milion usores de e-posta en Deutxland.

La Ofisia Federal per Securia ia dise ce criminales ia infeta computadores con programes cual permete la recolie de adirijes de e-posta e parolas secreta de contas.

La ajenteria no ia dise esce lo ia identifia la atacores. Lo ia crea un loca de rede do on pote controla esce on es un vitim.

La ataca es tan grande ce cuasi un sinci de la popla deutx pote es vitimes.

La gidor nova de la RAS xerca plu soldatos

Catherine Samba-Panza, la gidor nova de la Republica de Africa Sentral, ia demanda ce paises european e african envia plu soldatos per aida restora la ordina.

La maior pasada de la capital, Bangui, ia es elejeda par la parlamento tempora en lundi. El ave 59 anios.

Sirca milion persones – 20% de la popla – ia fuji de se casas tra menses de violentia relijiosa.

En la entretempo, la ministro franses de defende dise ce on ia descovre un tomba coletiva nova, estra Bangui, con 15 corpos.

Un investigor envolve Rusia en la mori de Alexander Litvinenko

La legiste medical ci investiga la mori de Alexander Litvinenko, un spior rusce, ia dise ce lo pare evidente ce Rusia ia es envolveda.

Avocatos per se vidua xerca un esplora ofisial de la refusa "legal nonrazonada" par la ministro brites de relatas interna de comanda un investiga publica.

An tal, avocatos de la governante dise ce la deside ia es razonada e legal.

Litvinenko ia es venenida con polonio radioativa en London en 2006, a la eda de 43.

Un bomba mata cuatro en un suburbe xia de Beirut

En Beirut, un bomba ia mata cuatro persones en un fortres de Hizbu'llah en un suburbe dominada par xias.

On suspeta ce la bomba ia es algun en un auto. A la min 20 persones ia es ferida.

Flamas e fuma ia versa de la fasada de un construida multinivel.

La tensa setal en Lubnan ia aumenta par causa de la batalia visina en Suria.

Arvind Kejriwal sesa se protesta en Delhi

La ministro xef de Delhi, Arvind Kejriwal, ia sesa se protesta en la sentro de la site sur la controla de la polisia de Delhi.

Kejriwal ia spende la note de lundi su la sielo, e ia labora con membros de la governante en la strada.

Se ecipo ia acusa la polisia de fali reata a un sirculo alegada de drogas e prostitui. La polisia ia nega la alega.

Kejriwal dise ce el ia gania comprometes de la governante sentral.

Xina esecuta un om per viole e omiside de sclavos sesal

Xina ia esecuta un om ci ia reteni ses femes como sclavos sesal e ia obliga tre de los a mata du de la otras.

Li Hao, ci ia ave 36 anios, ia es condenada a mori en 2012 sur acusas de omiside, viole sesal, prostitui organizada, e prisoni nonlegal.

El ia construi un prison en un susolo, e ia teni ala la femes asta 2011, cuando un de los ia evade e reporta el.

La polisia ia dise ce Li ia vole fa mone par forsa la femes a prostitui.

Un partito islamiste sorti de la governante libi

En Libia, la Partito de Justia e Construi, la partito du la plu grande en la governante tempora, ia anunsia ce lo no va partisipa plu.

La partitio islamiste ia dise ce se sinco ministros va resinia pos cuando lo no ia gania suporta sufisinte per un proposa de reproxa Ali Zeidan, la ministro xef.

La ministros inclui los de petrolio, la economia, e casas.

La partito es la ramo political de la Fratia Muslim en Libia.

Un eglesor de la Vatican es acusada de lava mone

On ia acusa ce un eglesor senior italian ia lava miliones de euros par usa la banco vatican.

Nunzio Scarano es ja prosededa e arestada sur otra alegas ce el ia conspira per contrabanda 20 milion euros ($26 milion) a Italia.

La polisia ia aresta la contor pasada de la Vatican, e du otra persones, en martedi.

En 2013, Papa Fransisco ia crea un encargada per esamina la ativia de la banco, pos un serie de scandales.

Autor Binyavanga Wainaina anunsia se omosesalia

A se aniversario 43, Binyavanga Wainaina, un autor major de Cenia, ia revela ce el es ge.

El es un de la africanes la plu bon conoseda ci ia fa un tal anunsia.

Atas omosesal es nonlegal en Cenia e multe otra paises african.

Nijeria ia adota resente un lege cual aumenta restrinjes a grupos ge, ma la presidente de Uganda ia impedi un lege simil.

La presidente de Sudan Sude denunsia la NU

Salva Kiir, la presidente de Sudan Sude, ia acusa ce la mision de pas par la Nasiones Unida condui como un "governante paralel" en se pais.

El ia fa se comentas pos alegas par se governante ce la NU asconde rebelores e fusiles en se bases. La NU nega esta.

Plu ca 70 000 siviles xerca refuja en bases de la NU tra Sudan Sude.

La NU dise ce ambos la rebelores e la soldatos de la governante ia fa atas cruel en un de la paises la plu povre de mundo.

Tai entra a un state de crise per maneja protestas

La governante tai ia forsa un state de crise en la capital, Bangkok, e la provinses ensircante.

La state va dura tra 60 dias, comensante a mercurdi.

La anunsia dona a la governante potias vasta per maneja protestores.

Protestores antigoverna ia bloci partes de la capital per atenta obliga la resinia de Yingluck Shinawatra, la ministro xef.

Vasinores de poliomielite es matada en Karachi

En la site de Karachi en Pacistan sude, tre laborores de poliomielite ia es matada en la dia pos la comensa de un projeta nova de vasini coletiva.

Atacores ia fusili en la area Qayumabad, matante un om e du femes ci ia es servinte la vasin.

Esta continua un serie de atacas contra ecipos de poliomielite en la pais.

No grupo ia declara se como culplable, ma la Taliban oposa la projeta, opinante ce lo es un metodo de spia internasional.

2014-01-21

Un esplode mata du a un fabriceria en Nebraska

En la SUA, a un fabriceria de comeda per bestias en Omaha en Nebraska, du persones ia es matada par un esplode e la colasa partal de un construida.

Des otras ia es ferida en la esplode a International Nutrition. 19 otra laborores ia susede evade.

Salvores ia labora per stabli la construida ante suspende se xerca.

On ancora no sabe la causa de la esplode.

La armada de Colombia mata rebelores de FARC

Soldatos colombian ia mata 14 rebelores en un opera en la norde-este de la pais.

La mores ia parteni a la FARC (Fortes Enarmada Revoluinte de Colombia), la grupo xef de rebelores colombian. Los ia sabota instalas de petrolio en la provinse de Arauca.

La governante colombian e la rebelores sinistriste fa ja discutes de pas en Cuba tra plu ca un anio. Ma la combate ia continua, an con demandas repeteda par la FARC per un sesafusili tempora.

La governante dise ce un sesa de ativia militar ta permete ce la rebelores reenarma se.

Txile proibi camisas antiiudiste de un ecipo de futbal

La federa txilan de futbal ia proibi ce un ecipo de divide prima usa camisas nova sur cual la numero 1 ave la forma de la mapa de Filastin ante la crea de Israel.

Palestino, un ecipo fundida par la comunia filastini grande en Txile, ia usa ja la vestes nova en tre maxes.

Organizas iudi ia cexa ce la desinia implica ce tota la area es filastini.

La federa txilan ia dise ce lo oposa tota formas de prejudi, e lo ia multa la ecipo per $1300.

GE comanda $4000m de aviones de Boeing

GECAS, la ramo de la compania General Electric cual lua aviones a airolinias, ia confirma ce lo ia comanda 40 aviones de Boeing con valua de $4000 milion.

La comanda inclui 20 aviones 737 MAX 8 e 20 jetos 737NG-800.

La comanda ia es fada en 2013, ma asta aora Boeing atribui lo a un cliente nonidentifiada.

GE Capital Aviation Services ia dise ce la aviones nova va aida lo a sasia la esije cresente de clientes per aviones min perosa de carburante.

Cimri Sude Nova anunsia leges nova contra violentia ebra

En Australia, la stato de Cimri Sude Nova va introdui leges nova per severi la punis per violentia ebra.

La medios inclui un condena minima de oto anios per atacas matante con un sola colpa de punio, influeda par drogas o alcol.

Botecas de alcol va clui plu temprana, e beverias en partes de Sydney va debe sesa servi bevidas a 03:00.

Esta segue la mori de un om de 18 anios ci ia es atacada en Sydney.

On acusa Suria de tortura e esecuta 11 000 prisonidas

Un reporta, par tre prosedores pasada de crimines de gera, dise ce on ave atestas clar ce la governante de Suria ia tortura e esecuta sirca 11 000 prisonidas en un modo sistemosa de pos la comensa de la rebela.

Dimashq nega la alegas.

La investigores ia esamina miluples de fotos de prisonidas mor cual ia es furtiva sortida de la pais.

On publici la reporta a la dia ante la comensa de discutes de pas en Suiz. La discutes va comensa en la vila de Montreux, e pos du dias va continua en Geneve.

Aviones pacistani bombi locas de la Taliban

Aviones militar de Pacistan ia bombi locas suspetada de la Taliban en Waziristan Norde, pos un serie de atacas contra fortes de securia.

Un ofisior ia dise ce 25 gerores ia es matada par la bombardas en la area tribal, cual bordi Afganistan.

En soldi, 20 soldatos pacistani ia es matada en un embosce a un convoia militar.

La Taliban de Pacistan ia promete aumenta se atacas pos la mori de se gidor en un ataca par avion autonom.

La sposa de Shashi Tharoor ia mori cisa par supradosa

Dotores dise ce la mori de la sposa de Shashi Tharoor, un ministro indian, ia es cisa causada par un supradosa de drogas.

On ia trova la corpo Sunanda Pushkar en un sala de otel en Delhi en venerdi.

La duple ia deveni la tema de un disputa en mercurdi cuando mesajes en Twitter ia sujesta ce la sposo fa un relata de ama.

La autopsia ia descovre ance "marcas de feri" sur la corpo, ma on no ia dise esce los es relatada a se mori.

La Taliban afgani ataca un base de OTAN

Ofisiores de OTAN en Afganistan dise ce un de se soldatos ia es matada cuando rebelores ia ataca un base en la provinse sude de Kandahar.

La atacores ia esplode un bomba de auto a la entra de la base Zhari a sude de la site de Kandahar. A pos, otra gerores ia comensa fusili.

Nove fusilores ia partisipa, e tota ia es matada.

Soldatos de batalia, gidada par OTAN, va parti de Afganistan a la fini de 2014, pos 13 anios de combate la Taliban.

Un prisonida en Corea Norde demanda per aida american

Un sitizan american, tenida tra plu ca un anio en Corea Norde, ia parla a jornalistes stranjer, e ia demanda per colabora american per reali se libri.

Forte gardada par ofisiores de prison, Kenneth Bae ia fa se confere prima de jornalistes de pos se prisoni.

El es un corean-american. On ia aresta el en novembre 2012 e ia condena el a 15 anios de labora puninte con manos.

Corea Norde ia dise ce el ia usa se compania de turisme per formi grupos per despone la governante.

Japan critica un monumento xines per un asasinor

Japan ia critica un monumento construida en Xina per onora un ativiste de autonomia de Corea, ci ia asasina un statiste japanes importante en 1909.

Ahn Jung-geun ia mata par fusili Hirobumi Ito, la ministro xef de Japan a cuatro veses, e la governor abitante prima de Corea. A acel tempo, Corea ia es renada par Japan.

Un portavose per la governante japanes ia eticeti el como un "teroriste" cuando la salon de recorda ia abri en la site xines de Harbin, do Ito ia es matada.

En Corea, on regarda Ahn como un eroe.

La ministro xef nova de Delhi fronti polisiores

Arvind Kejriwal, la ministro xef de Delhi, ia fronti polisiores sur un strada ocupada de la site, pos cuando on ia preveni el de fa un protesta a la ofisia de la ministro de relatas interna.

La polisia ia para Kejriwal prosima a la Porton de India, e ia bloci la stradas cual gida a la ofisia de Sushil Kumar Shinde.

Kejriwal dise ce el protesta sur la refusa par la polisa de fa medios contra un sirculo de drogas e prostitui. La polisia nega esta.

El ia deveni la ministro xef en esta mense, cuando se partito ia gania 28 de la 70 sejas en elejes resente, prometente combate la froda e limpi la politica.

Futbalores Ribery e Benzema es prosededa sur un prostituida minor

En Paris, on ia comensa la prosede de Franck Ribery e Karim Benzema, du futbalores acusada de copula con un prostituida de eda minor.

Ribery, un alor de Bayern München ci ave 30 anios, e Benzema, un atacor de Real Madrid ci ave 26 anios, nega ce los ia paia intendente per seso con Zahia Dehar cuando el ia ave min ca 18 anios.

Cada fronti asta tre anios en prison e multas de asta 45 000 euros ($55 000).

Ambos ia es asente de corte, representada par se avocatos. Ance Dehar, ci ave aora 21 anios, no ia es presente.

La suordinada de la governor de New Jersey fronti alegas

En la SUA, la suordinada de Chris Christie, la governor de New Jersey, ia nega alegas ce los ia menasa reteni mone intendeda per aida un site colpada par Siclon Sandy en 2012.

Kim Guadagno ia informa reportores ce la acusa es "intera e completa falsa".

La maior de la site de Hoboken alega ce on ia dise a el ce se site risca no reseta mone federal, si el no suporta un projeta de imobila cual Christie favore.

Esta es un alega nova de froda contra la governor republican. Plu temprana en esta mense, on ia sujesta ce se ecipo ia causa un conjesta grande en un retalia political.

Un estremiste elinica menasa la governante

Un fujor elinica ci ia desapare en un asentia permeteda de prison ia menasa la governante con retalia enarmada. El acusa ce la governante ia ruina la pais con se medios economial sever.

Christodoulos Xiros, ci on ia condena en 2003 de parteni a Novembre 17, un organiza estrema sinistriste, ia jura ce el va revade a batalia.

El ia es pasante ses periodos de vive en prison per bombis e fusilis.

El ia desapare en janero cuando on ia permete ce el sorti de prison per visita se familia.

Detalias de miliones de cartas de credito es furada en Corea Sude

On ia fura la detalias de cartas de credito de cuasi un dui de tota la popla de Corea Sude, e ia vende los a companias mercatiste.

La datos ia es furada par un spesialiste de computadores, laborante per un compania nomida la Departe de Credito de Corea cual calcula riscas de credito personal.

La laboror ia copia la nomes, numeros de identia, e detalias de carta de 20 milion coreanes sude.

La estende de la fura ia deveni clar pos cuando on ia aresta la laboror a la sentro de la crimin.

La SUA no vole ce Iran partisipa en discutes de pas suri

La SUA ia recomenda forte ce la NU retira se invita ce Iran junta se a la discutes de pas suri cual va comensa pos du dias.

Ofisiores american ia acusa Iran de fali suporta la intende de la discutes, cual es fundi un governante tempora en Suria.

Iran es un aliada importante de la governante suri. Lo ia dise ce lo no va aseta constrinjes a se partisipa.

Ban Ki-moon, la xef de la Nasiones Unida, ia dise ce el es "deludeda" a la disputa, e ce el reconsidera la moves posible per la NU.

2014-01-20

On alega ce Snowden ia colabora con Rusia

On alega ce Edward Snowden, la esposor de metodos de spia american, ia colabora con Rusia.

Mike Rogers, la gidor de un comite de governores cual supravide la departes de securia, ia dise ce el crede ce esta esplica perce Snowden ia vade final a un ajente en Moscva.

Ma el ia ofre no atesta firma per suporta se teoria.

Snowden es tempora refujada en Rusia. El es acusada sur se atas de denunsia, ma el nega ce el ia dona documentos a cualce governante stranjer.

Vietnam condena 30 a mori per contrabanda de drogas

Un corte en Vietnam ia condena 30 persones a mori per contrabanda de eroina en un prosede cual on descrive como la plu grande de se spesie de sempre en la pais.

La prosede sur la contrabanda de cuasi du tones de eroina, ia comensa en la provinse de Quang Ninh en la temprana de janero.

Desuples de otras ia es ance condenada a periodos en prison de entre du anios e la vive intera.

Esta es la prosede la plu grande de sempre en Vietnam sur drogas, en relata a la cuantia de acusadas e la cuantia de condenas de mori.

21 es matada par bombas en Baghdad

A la min 21 persones ia es matada par un serie de bombas tra Baghdad, la capital de Irac.

40 persones, cisa plu, ia es ferida en la esplodes.

La ataca la plu matante, en cual a la min sete ia mori, ia colpa un mercato en la sude de la site.

En un aumenta de violentia, a la min 759 persones ia mori sola en desembre, e plu ca 650 ia mori asta aora en esta mense.

Claudio Abbado, xef de orcestra, mori a 80 anios

Claudio Abbado, un xef italian de orcestra, ia mori a la eda de 80.

Se carera ia comensa en La Scala, la teatro de opera en Milan, e el ia labora ala como dirijor musical asta 1986.

El ia mori en Bologna pos un maladia longa, per cual el ia debe cansela alga apares resente.

La gidor de la club de fanes de Abbado en Milan ia dise: "Esta es un momento tan dolosa. Me no pote parla."

On espeta un sinial de la sonda Rosetta

La projeta Rosetta, un sonda spasial cual intende atera un robot sur un cometa, ia ateni un paso importante.

La sonda ia spende la tredes menses pasada en viaja tra spasio en un dormi profonda, ma aora on espera ce lo va velia e envia un sinial a la Tera.

Si los reseta esta mesaje de un distantia de 800 milion cilometres, siensistes va sabe ce la projeta vade ancora bon.

Rosetta va ariva a la cometa 67P/Churyumov-Gerasimenko en agosto, e la atera de la robot peti cual el porta va aveni en novembre.

La crese economial de Xina es plu lenta ca en 14 anios

En 2013, la economia de Xina, la numero du la plu grande de mundo, ia crese la plu lenta en 14 anios.

Se produida intera bruta ia crese par 7.7% anial entre otobre e desembre. En la cuatri presedente, la proportio ia es 7,8%.

La cuantia resente ia es ancora plu alta ca la 7,5% intendeda par la governante.

La datos asentua la defia cual politicistes fronti en susta la crese economial alta de Xina, en cuando los atenta reecuilibra la sistem.

La NU invita Iran a discutes de pas suri

Ban Ki-moon, la gidor de la Nasiones Unida, ia invita Iran a partisipa en la discutes de pas suri en Suiz en esta semana. Iran ia aseta.

Ban ia dise ce on ia serti el ce la pais va fa un rol positiva en organiza un governante tempora.

Ma la grupo xef oposante de Suria ia dise ce lo va retira se de la negosias, estra si on cansela la ofre a Iran.

La SUA ia dise ce la ofre debe depende de suporta par Iran per la acorda de 2012 sur la muta de Suria.

Iran comensa redui la rici de uranio

Iran ia comensa redui se rici de uranio, su un acorda cual va diminui ance la medios de puni internasional la pais.

La acorda ia es fada con la SUA, Rusia, Xina, e potias european en novembre.

La Departe Internasional de Enerjia Atomal, un gardor sur cosas nucleal, va confirma ce Tehran ia limita se rici.

La suspende partal de medios puninte par la UE e SUA va permete ce Iran recomensa se esportas de petrocimicales e se comersia sur oro.

Zeland Nova esperia un trematera grande

Un trematera de grado 6,3 ia secute la Isola Norde de Zeland Nova, ma on reporta no danas major o feris grave.

La trema ia aveni a 38 cilometres a norde-ueste de Masterton a 15:52 de ora local.

On ia descrive un secute grande, benes cadente de scafales, e pitures colpada a un posa nonreta.

Un sculta de un agila jigante, suspendeda de la teto a la airoporto en Wellington per promove un filma, ia cade.

La filma de Superman e Batman es posponeda asta 2016

Warner Bros ia confirma ce on ia pospone un filma conteninte ambos Superman e Batman par cuasi un anio.

Orijinal intendeda per julio 2015, aora la filma va apare en 6 maio 2016.

La filma ancora no ave un titulo, ma Ben Affleck va fa la rol de Batman, a lado de Henry Cavill en la rol de Superman. Gal Gadot va apare como Wonder Woman.

On ia reporta ce la pospone es causada par un feri de gama de Affleck, ma la studio ia nega esta. Los dise en loca ce la pospone "permete ce la sinemistes reali completa se ideas".

Berlusconi reveni con un acorda sur reformas

Silvio Berlusconi, la ministro xef pasada e controversa de Italia, ia revade a la sena political. El ia fa un acorda de reforma con un competor.

On ia esclui el de la parlamento en 2013 pos un condena per froda de imposta.

Ma el es ancora la gidor de Forza Italia, un partito oposante. El ia fa discutes longa con Matteo Renzi, la gidor de la Partito Democrata, asta tarda en saturdi.

La acorda va suporta proposas elejal e constitual per fa ce Italia deveni plu governable. La sistem presente ia lasa la pais con un serie de alias bambolante.

On arde corpos en la strada en la RAS

Un manada cristian en Bangui, la capital de la Republica de Africa Sentral, ia mata e arde du muslimes en la strada.

La ganges ia dise ce los va continua mata muslimes en se area.

Soldatos de Frans e la Uni African luta per limita la violentia setal cual ia comensa pos cuando rebelores, xef muslim, ia saisi la controla de la pais.

Parlamentores va eleje un presidente nova tempora en lundi, a un semana pos cuando Michel Djotodia, gidor de la rebelores, ia sesa en la posto.

Morsi va es prosededa a un ves cuatro

Mohammed Morsi, la presidente desponeda de Egipte, fronti un prosede cuatro. On acusa de el ia insulta la judores.

On va prosede la gidor islamiste e 24 ora politicistes, carateres de la medios, ativisets, e avocatos sur la acusas nova.

On ia despone Morsi en julio, e se Fratia Muslim ia es declarada como un organiza teroriste.

Plu temprana en esta mense, se prosede prima ia es posponeda. La prosede nova indica ce la militaria no intende abandona se oposa de la Fratia Muslim.

Scaramuxas aveni en un protesta en Kiev

En la capital de Ucraine, scaramuxas ia aveni cuando folas grande de protestores favorente la Uni European ia asembla per cexa contra un lege nova cual restrinje protestas publica.

On ia lansa granadas aturdinte e misiles luminante cuando grupos de persones ia vade en dirije a la parlamento.

La parlamento ia es barida par linias de polisiores e buses.

Vitali Klitschko, un politiciste oposante, ia atenta para atacas contra la polisia. On ia jeta polvo a el de un estinguador.

Madonna demanda pardona pos usa un parola raziste

Madonna, la stela de pop, ia demanda pardona pos usa un parola raziste en refere a se fio, en un ajunta a Instagram.

La cantor ia ajunta un foto de Rocco Ritchie, se fio de 13 anios, en ata de boxe en la note de venerdi. El ia usa la descrive ofendente en un parola-eticeta cual ia acompania la imaje.

El ia dise: "Me no ia intende un ofende raziste. Me no es un raziste. On no pote defende la usa de la parola."

El ia sutrae rapida la foto, ma ia reajunta lo con un testo nova cual ia conteni otra parolas ofendente. Final, el ia sutrae intera la cosa, e ia demanda pardona.

Assad dise ce on no va discute la posible de se resinia

On reporta ce Bashar al-Assad, la presidente suri, ia dise ce el ave no intende de resinia, e ce on no va discute esta a la consenta de pas en la semana veninte.

"Si nos ta vole sede, nos ia ta sede de la comensa," Assad ia dise a parlamentores rusce en Dimashq.

An tal, se ecipo ia clari plu tarda ce la comentas es nonesata reportada, sin dona plu detalias.

La governante, grupos oposante, e diplomatas ueste va partisipa en discutes de pas en Suiz de mercurdi.

2014-01-19

Atacores colpa la campa de protesta en Bangkok

Atacores ia lansa esplodentes a protestores antigoverna en Bangkok, ferinte a la min 28 persones.

La esplodes ia colpa ativistes ci vole clui la capital de Tai e forsa ce la governante resinia.

Un gidor de la protesta ia dise ce on ia xasa la atacores, ma ce los ia evade sur bisicles de motor pos xuta a se seguores.

En venerdi, un ataca simil ia lasa un person mor.

La protestores acusa ce la governante es ancora dirijeda par Thaksin Shinawatra, la gidor pasada e escluida.

Un consilior brites culpa sposis ge per la mal clima

Un consilior de UKIP, la Partito de Autonomia de la Rena Unida, ia declara ce la tempestas e inondas resente tra Britan ia es causada par la deside par la governa de legali sposis ge.

En un letera a se jornal local, David Silvester ia dise ce la ministro xef ia ata "egosa contra la evanjelio", e ce el ia averti ce la legali va causa "un desastre".

La partito mesma ia clari ce la opinas de Silvester "no es la crede de la partito", ma lo ia defende la direto de el de espresa los.

UKIP es forte eurosetica e ave 30 000 membros.

La SUA loda la deside de discute pas par la Alia Nasional Suri

John Kerry, la secretor de stato de la SUA, ia bonveni la deside par la grupo xef oposante de Suria ce los va vade a la discutes de pas en Suiz en la semana veninte.

Se lodas per la move "corajosa" de la Alia Nasional Suri ia es repeteda par Frans e la Rena Unida.

La discutes va aveni en Montreux. Los intende comensa la taxe de institui un governante tempora per fini la gera en Suria. La gera ia mata plu ca 100 000 persones en tre anios.

On estima ce du milion persones ia fuji de Suria, e ce 6,5 milion es deslocada ma resta en la pais.

Serena Williams es vinseda par Ana Ivanović

En tenis, Serena Williams ia sorti de la Abrida Australian.

Un feri de dorso ia impedi la campion de sinco veses, en un max contra Ana Ivanović.

Pos perde la set prima, la serbsce ia reveni per gania par 4-6 6-3 6-3.

Esta ia es se vinse prima contra Williams en sinco atentas.

Turcia protesta sur un lege proposada sur usa de la rede

La polisia turces ia usa gas de larma e canones de acua per sperde sentuples de protestores en Istanbul e Ankara.

La protestas ia relata a un lege proposada par la governante, per forti la esamina de la usa de la interede.

La lega controversa ta permete ce la governante reteni rejistras de tota ativia par usores tra asta du anios.