2016-07-31

Un selula lusosa en un prison paraguai

En Paraguai, la polisia ia invade la selula de prison de un padron de drogas, e ia descovre ce el ia ave ala un vive lusosa.

La selula ia ave tre salas, e ia inclui un table de confere, un cosina, un biblioteca, e un televisador con scermo de plasma. Lo ia es ocupada par Jarvis Chimenes Pavão, un criminal brasilera.

On ia destrui aora la interna.

La polisia ia aprende ce Pavão ia intende deveni libre par usa esplodentes per crea un buco en la mur de la prison.

El ia ta fini se condena per lava de mone en la anio veninte, e alora el ia ta es probable estradida a Brasil. Aora, on ia move el a un unia spesial, distante de se selula lusosa en la prison Tacumbú, do el ia es prosima a Asunción, la capital de la pais.

On investiga per trova cual ofisiores ia permete esta vive de luso a Pavão.

Otra prisonidas a Tacumbú ia dise ce algun ci ia desira resta en la aparte lusosa ia debe dona un paia inisial de $5000 a Pavão, e $600 per cada semana a pos.

"El ia es la om la plu amada en esta prison," un prisonida ia comenta.

La selula ia conteni ance un frescador, mobilas comfortosa, un sala de bani, e un colie de DVDs. Entre la DVDs on ia trova un televisa de la vive de Pablo Escobar, un padron de drogas de Colombia.

Escobar ia es matada en 1993. El ia fa un acorda con autoriosas colombian, permetente el a desinia se propre prison.

2016-07-30

Un polisior en bicini para un furor

On ia loda un polisior svensce ci ia tacle un furor suspetada, an cuando el ia es baninte su sol en bicini con se amis en Stockholm.

Mikaela Kellner ia dise a jornalistes ce el e un otra polisior ia xasa la om cuando los ia comprende ce el ia prende un de se telefonetas. El ia ajunta ce el ta interveni "an si el ta es nuda".

Un foto de la tacle a la paje de Instagram de Kellner ia atrae plu ca 9000 aprobas en min ca du dias.

La situa ia aveni en la Parce Rålambshov a mercurdi. La grupo de amis ia es visitada par un om ci ia dise ce el vende publicis per aida persones sin casa.

Kellner ia deveni suspetosa cuando la om ia persiste, posante paperes sur la tapeto sur cual la grupo ia es reclinante.

Direta cuando la om ia parti, reprendente se paperes, un otra membro de la grupo ia vide ce se telefoneta manca.

"Nos ia ave no tempo," Kellner ia esplica, "donce me ia core pos el per cisa 15 metres o simil. Un de me amis es ance un polisior, donce nos ia saisi la om. El ia atenta evade, donce nos ia teni plu forte el."

Los ia regania rapida la telefoneta furada, e la om ia es arestada par polisiores patruliante.

"Me ia reseta multe comentas positiva e de amis e de colaborores," Kellner ia dise. "Lo es multe comun ce valuosas es prendeda en esta modo. Me ia vole xef crese la consensia ce esta persones es tan rusosa, cuasi como majistes."

2016-07-29

Salvador colpa un gang potiosa

La autoriosas en Salvador ia anunsia un serie de atacas contra un de la ganges criminal la plu potiosa de la pais, la Mara Salvatrucha o MS-13.

On ia aresta sinco xefes de la gang, incluinte la xef de finansia. La polisia ia deteni 120 persones e ia saisi armas, mone, e drogas.

Salvador es pestada par violentia de ganges e ave un de la tasos la plu alta de omiside en la mundo.

Multe de la moris ia es causada par la compete entre la MS-13 e un otra gang, nomida Barrio 18. Un sesafusili tempora entre la du en 2012 ia redui la taso de omiside par 40%.

La atacas contra MS-13 ia comensa a la note de mercurdi. La blancos ia es oteles, bares, restorantes, bordeles, casas, e transporta liada con la gang. Miliones de dolares ia es saisida e alga contas de banco ia es suspendeda.

Mauricio Ramírez Landaverde, la ministro de justia e securia, ia dise ce esta es la ves prima cuando la governa ia disturba la finansia de la gang par investiga como los investi se ganias nonlegal.

MS-13 e Barrio 18 ave se radises en California sude en la desenio de 1980.

Los ia es creada en Los Angeles e se suburbes par migrores povre (e nonlegal, per la plu) ci ia fuji de geras interna en America Sentral. Cuando la geras ia fini ala, multe gangsteres ia es deportada de la SUA, esportante la cultur de gang de Los Angeles a la mesma tempo.

On estima ce Salvador ave 70 mil gangsteres ativa.

2016-07-28

Cuatro infetas misteriosa de Zica en Florida

En la SUA, ofisiores de sania en la stato Florida investiga cuatro casos de la virus de Zica cual no pare relatada a viajas.

Asta aora, casos estra America Latina e Caribe, do la virus es comun, ia sperde par viajas a acel rejion o par transmete sesal. La cuatro casos en Florida leva la posible ce moscitos en la SUA comensa aora porta la virus.

La virus de Zica causa no plu ca un maladia minor en la plu de persones, ma on ia lia lo con defetos grave de serebro en bebetas.

Ofisiores en Florida dise ce los ancora no ia veni a un conclui. Los investiga ancora la metodo par cual la virus ia es transmeteda.

Per confirma esce Zica es portada par moscitos local, siensistes va sonda casas e persones en raio de 150 metres de la casos. Esta es la raio de vola de la insetos.

Espertas en la SUA ia es confondeda en la semana pasada par un otra caso, en la stato Utah, en cual un curor ia developa la febre de Zica pos pasa tempo con un om vea morinte ci ia ave la virus.

E plu temprana en la semana presente, un fem espaniol infetada par Zica ia pari un xico con microsefalia, un maladia de serebro. On crede ce esta es la nase prima de esta spesie en Europa.

En febrero, la Organiza de Sania Mundal ia declara ce la virus de Zica es un crise global de sania publica, par causa de la risca a bebetas. En casos grave, enfantes pote mori, e los ci survive pote ave descapasias inteletal o retardas developal.

2016-07-27

Un prete franses es matada en se eglesa

Un de la omes suspetada de mata un prete en un eglesa en Frans norde ia es vijilada par la polisia, e ia porta an un monitor eletronical a la tempo de la ataca.

Adel Kermiche, ci ia ave 19 anios, ia es arestada a du veses en la anio pasada, en atenta vade a Suria.

El e un otra atacor ia ataca la eglesa en Saint-Étienne-du-Rouvray, un suburbe de Rouen, en la misa de matina. Los ia talia la garga de la prete vea, ante cuando la polisia ia mata los.

Un de cuatro ostajes, un parocian vea, ia sufri feris grave de cotel.

Cuando los ia entra a la eglesa catolica, la du atacores ia porta "un aparato finjeda de esplode, covreda en paper de aluminio" e armas de mano.

En cuando los ia ataca padre Jacques Hamel, alga de la congrega ia susede evade per avisa la polisia, ci ia envia un ecipo spesialida sur situas de ostaje.

Tre de la ostajes ia es usada como scermos umana per impedi la polisia de entra a la eglesa. Pos libri final la ostajes, la du atacores ia segue los a estra la eglesa, criante "Dio es grande" en arabi, e la polisia ia mata los.

La organiza Daex (o Stato Islamiste) ia anunsia ce se "soldatos" ia fa la ataca.

Un monce ci ia identifia se como sore Danielle ia es en la eglesa e ia descrive la esperia. "Los ia forsa el [Hamel] a se jenos. El ia vole defende se, e esta es cuando la trajedia ia aveni. Los ia rejistra se. Los ia fa un spesie de sermon sirca la altar, en arabi. Lo es un teror."

Hamel ia ave 85 anios. Abitores de la vila ia reata con xoca e tristia a se mata, descrivente el como modesta, dedicada, amada, e sempre disponable a se parocianes.

La imam local, Mohammed Karabila, ia dise ce el es "stonada par la mori de me ami. El ia es algun ci ia dona se vive a otras."

Investigores labora ancora per identifia la atacor du.

François Hollande, la presidente de Frans, ia apela per unia, avertinte ce la gera contra terorisme "va es longa". "Nos democratia es la blanco," el ia dise, "e lo va es nos scermo. Ta ce nos sta con lunlotra. Nos va vinse en esta gera."

2016-07-26

Un barcon colpa la mur de la Canal Panaman

Un portacontenador xines ia colpa un mur de la Canal Panaman, resente largida a custa de multe miliones de dolares.

Esta es la asidente tre de esta spesie pos la abri de la renovis a un mense ante aora.

Alga persones ia ave ja ansia ce la canal nova ave min spasio per manobras e pote es nonsecur.

Laborores cexa ce la clusas es tro peti per funsiona secur su la scema nova, en cual la canal aseta barcones truple plu grande ca a ante.

La organiza autoriosa de la canal investiga la avenis.

La barcon Xin Fei Zhou ia sufri un talia grande a se corpo. On repara aora lo.

La clusas nova es desiniada en tal modo ce barcos tirante gida la barcones tra la canal. En la sistem vea, locomotivas conoseda como "mulos" ia teni la barcones en bon alinia en cuando los ia pasa a tra.

Un studia per la Federa Internasional de Laborores de Transporta, publicida en la plu temprana de esta anio, ia conclui ce la cameras de la clusas nova es tro peti per permete bon manobras par la barcos tirante.

On ia comensa labora sur la largi en setembre 2007, con intende orijinal de fini en 2014. Pos retardas causada par greves de construores e par disputas sur esedes de bujeta, on ia pospone la data per completi asta april 2016.

La viaja prima tra la canal grandida ia aveni a 26 junio.

2016-07-25

Un foco savaje en California

En la montania a norde de Los Angeles, California, pompores batalia per maneja un foco savaje cual ia destrui 18 casas e menasa sentos de otras.

La focon covre plu ca 89 cilometres cuadrida. Abitores de sirca 1500 casas prosima a Santa Clarita ia parti.

On ia trova un corpo en un auto ardeda, ma lo no es clar esce la mori pertine a la foco.

Ventas forte ia aumenta la flamas, soflante fuma e sene a Los Angeles.

Sirca 900 pompores atenta maneja la foco, aidada par elicotores e aviones cual cade acua e paraflama.

California sude es a media de un onda de caldia, ma meteorolojistes previde un temperatur plu fresca per la futur prosima.

2016-07-24

La avion noncarburante cual ia sirconaviga la mundo

Impulsa Solal, la avion de zero carburante, ia parti de la capital misre, Qahira, en la paso final de se turi de globo.

Lo viaja a Abu Zabi en la Amirias Arabi Unida, do lo ia comensa se sirconaviga en marto 2015.

La viaja va ocupa sirca 48 oras, e la pilote es Bertrand Piccard.

On previde un vola relativa simple, an si la ecipo ave ansia sur la efeto de la caldia en Asia sude-ueste a la avion. Piccard va debe probable spende multe tempo a altia grande, enspirante osijen aumental, per leva supra la colones termal e la turba cual los produi.

La aira plu calda e min densa supra la deserto saudi va labora ance plu la motores per propulsa la veculo. Par causa de esta, on va maneja atendente la reservas de enerjia en la pilas de polimer de litio, per serti ce los susta la avion tra la oras de note.

Impulsa Solal ia viaja tra 30 mil cilometres en se aventura per deveni la avion prima cual sirconaviga la mundo par sola la enerjia de la sol, en loca de carburante.

La vola de Qahira a Abu Zabi es la parte 17 e final en se viaja grande, cual ia inclui traversas de la Mares Pasifica e Atlantica.

Piccard e André Borschberg, se ami e asosior comersial, ia alterna como pilote.

La duple ia espera completi la defia en la anio pasada, ma se progresa no ia es sufisinte rapida per encontra la clima la plu bon en la estate de la emisfera norde. E cuando la pilas ia es danada en un viaja epica de sinco dias e notes supra la Pasifica ueste en junio e julio 2015, on ia deside resta a tera per des menses.

La idea ia nase cuando Piccard ia fa la sirconaviga prima nonparante en balon en 1999. Se balon ia ariva apena, aterante en la deserto misre con cuasi no reservas restante de la propano cual lo ia usa per susta se vola.

Piccard ia dise alora ce un otra metodo debe esiste.

El aseta ce aviones comersial no es a punto de cambia se motores de jeto a selulas solal, ma el razona ce enerjia solal va ave un rol en la futur de avioni.

"Me aposta," el ia dise, "ce pos des anios nos va ave aviones eletrical con 50 pasajores per volas corta o media. On pote vola sin contamina e sin ruido, ma aterante en airoportos urban, creante no disturba per la visinas."

2016-07-23

Un fusilor solitar ataca en München

La polisia deutx ia dise ce un fusili a un boteceria en München, cual ia mata nove persones, ia es fada par un fusilor ci ia fini par mata se.

La suspetada es un om de 18 anios con nasionalia duple deutx-irani ci ia abita en München, la capital de la stato Bayern. Se motiva no es clar.

Des-ses persones ia es ferida, tre de los a grado grave. Enfantes ia es entre la persones mor.

On ia comensa un xerca vasta pos reportas ce asta tre fusilores ia partisipa en la ataca. Atestores ia vide du persones partinte de la loca en un auto con multe rapidia. Plu tarda, la polisia ia afirma ce esta du persones no ia es envolveda.

La corpo de la suspetada ia es trovada a distantia de sirca un cilometre de la sentro comersial Olympia en Moosach, un suburbe norde-ueste.

La om no ia es conoseda par la polisia a ante, e ia pare ave no lias a grupos teroriste.

Seguente la ataca, on ia suspende la sistem de transporta en München e ia vacui la stasion sentral de ferovia. On ia reabri la transporta publica a alga oras plu tarda cuando la polisia ia indica cauta ce tota es secur.

Miles de persones ia es encaliada par la crise, noncapas de revade a se casas. Abitores local ia refuja los.

La reportas prima de la xuta ia aveni corta ante 18:00 ier. La atacor ia fusili membros de la publica a un restorante de comeda rapida en la strada Hanauer ante move a la boteceria prosima.

Un video sirculinte a redes sosial ia mostra un om negra vestida con pistol ci pasea a via de un restorante, xutante a persones ci fuji.

La polisia ia descrive la aveni como "un situa acuta de teror", an si asentuante ce on ancora no conose la motiva.

La canselor Angela Merkel va consenta oji la consilio de securia de se governa.

Securiores deutx ia es ja vijilante pos cuando un migror adolesente ia coteli e feri sinco persones en un tren en Bayern a lundi, en un ataca reclamada par la organiza Daex. La autoriosas ia averti alora sur la risca de avenis simil.

2016-07-22

Soldatos veteran zimbabuean sesa suporta Mugabe

La asosia de soldatos veteran de Zimbabue, cual ia fa un rol major e a veses violente en suporta presidente Robert Mugabe, ia publici un declara retirante se suporta de el.

Lo acusa Mugabe de tendes tiranin, egosentralia, e malgoverna.

On no sabe esce tota la membros de la asosia acorda con la testo.

La presa contra Mugabe, ci ave 92 anios, crese. Grupos en ZANU-PF, la partito governante, disputa publica per segue el, e on fa protestas sur la economia falinte. Ma Mugabe ia dise ce el intende aspira la presidentia denova en 2018 per governa asta se mori.

An en la momentos la plu difisil de se 36 anios en potia, Mugabe ia pote fida sempre la soldatos veteran, se cameradas en la campania per libria de Zimbabue en la desenio de 1970. Los ia es suportores dedicada ci a veses ia furni a el la fortia per violentia political.

La declara, ier publicida pos un consenta de representores de tra la pais, ia averti: "Nos nota, con ansia, xoca, e angusa, la radisi de tendes tiranin, personida par la presidente e se suportores, cual ia devora lenta la valuas de la campania per libria."

Lo pare ce la declara refleta no sola la opinas de alga soldatos veteran, ma ance alga persones militar major. Mugabe depende forte de la militaria per reteni se potia.

En la declara, la veteranes dise ce los no va suporta la campania de Mugabe per reeleje. Los acusa el de abandona los per la alia joven de ZANU-PF.

Plu, la declara culpa la "gida bancarota" per la crise economial de la pais. Mone manca de la bancos, e la governa ave difisiles en paia ofisiores publica.

"Nos es angusada," la declara ia dise, "par la tende de la presidente a favore se vitriol usual contra enemis persepida, incluinte protestores pasosa e ance soldatos veteran, cuando la economia es a punto de colasa. El es multe culpable per la situa grave de la economia nasional."

Plu temprana en esta semana, Mugabe ia responde a protestas antigoverna par recomenda ce Evan Mawarire, la prete ci ia organiza un greve nasional, ta parti de Zimbabue si el es noncontente con la situa ala.

On ia aresta Mawarire en la semana pasada, ma ia libri el cuando un corte ia rejeta la acusa de suverti. A pos, el ia sorti de Zimbabue a Sudafrica, do el ia dise ce el teme plu la critica par se fias ce el fali reata ca la puni cual la governa ta pote dona a el si el ta revade.

2016-07-21

On investiga un crimin posible par monces arjentina

La eglesa roman catolica en Arjentina ia comensa un investiga sur esce cuatro monces fema ia aida asconde un cumula de mone e joalas.

La investigor xef, Tom O'Donnell, ia dise ce on atenta descovre esce un crimin contra la leges eglesal ia aveni.

En junio, un ministro pasada de governa ia es arestada estra la monceria. On alega ce el ia atenta asconde cuasi $9 milion de joalas e mone fisical.

La monceria es la comunia de Nos Dama de Rosaria de Fátima, situada a sirca 55 cilometres a ueste de la capital, Buenos Aires. Monces fema laborante ala ia clama la polisia pos vide un om jetante sacos plastica a ultra un mur.

On alega ce el es José López, ci ia es la ministro de infrastrutur en la governa de Cristina Fernández de Kirchner.

Resente en Arjentina, on ia publici imajes de camera vijilante sur cual on alega ce los mostra López portante la sacos, conteninte joalas e faxas de biletas de mones diversa, a en la monceria, aidada par du monces.

On dise ce cuatro monces ia aida el en soma. Un de los va apare ante un judor en la mense veninte.

De pos la emprende de la posto de presidente par Mauricio Macri en la parte plu temprana de esta anio, on ia fa un serie de investigas de ofisiores pasada sur la tema de lava de mone.

2016-07-20

Juores de Pokémon Go risca bombetas en Bosnia

On averti bosances ci jua Pokémon Go contra vaga en areas do la tera conteni ancora bombetas de la gera en la desenio de 1990.

Un asosia carital bosansce, Posavina bez mina (Posavina sin bombetas), ia fa se averti pos oia reportas ce usores de Pokémon Go entra a areas perilosa.

En la jua multe susedosa, juores usa se telefonetas per xerca monstros animada en la mundo real.

Asidentes de bombeta ia mata a la min 600 persones en Bosnia pos la fini de la gera en 1995. On estima ce sirca 120 mil bombetas resta nondescovreda.

En cuando la popularia de Pokémon Go ia crese, la mundo ia esperia multe avenis e asidentes envolvente la juores.

Plu temprana en esta semana, en la stato Florida en la SUA, un posesor de casa ia xuta a du juores adolesente sur ci el ia crede ce los es efratores.

Ma la jua ia produi ance alga efetos positiva e nonespetada. En un vila en la Rena Unida, la polisia ia dise ce juores ia reporta un fura en cuando los ia xerca monstros.

2016-07-19

Xefes olimpial deside esce Rusia pote compete

La Ajenteria Mundal Antidrogi (AMA) ia dise ce on debe esclui Rusia de la juas olimpial e paralimpial de esta estate, car on ia descovre indicas de un program de cuatro anios de drogi governal sponsorida.

Un reporta comandada par AMA ia trova ce samples de competores rusce ia es manipulada tra "la majoria vasta" de sportes olimpial de estate e inverno de la tarda de 2011 asta agosto 2015.

La Comite Internasional Olimpial (CIO) va deside oji esce lo va esclui Rusia de la olimpiales a Rio, cual va comensa a 5 agosto.

Thomas Bach, la presidente de la CIO, ia promete "la punis la plu sever disponable" e ia dise ce la trovas es "un ataca xocante e sin presedente contra la unia de sporte e contra la juas olimpial".

La reporta par Richard McLaren, un dotor canadian, ia trova ce 580 probas positiva ia es ascondeda en 30 sportes diversa, incluinte en la prepara per la olimpiales en London en 2012 e a la olimpiales de inverno de 2014 en Sotxi en Rusia.

McLaren ia comenta ce el "ia toca mera la surfas" en se investiga de 57 dias. AMA vole ce el completi se taxe par identifia atletas ci ia es beneficada par la program.

La sportores rusce de atletisme lejera es ja proibida de compete en Rio, pos cuando la Asosia Internasional de Federas de Atletisme ia vota en junio per manteni un proibi global de compete par la Federa Rusce de Atletisme (FRA).

La FRA espera reversa acel deside e va trova a no plu tarda ca jovedi esce se apela a la Corte de Arbitra per Sporte ia susede.

Presidente Vladimir Putin ia dise ce el va suspende ofisiores nomida en la reporta de McLaren, e Yuri Nagornykh, la ministro de sporte, es ja la prima.

Seguente la reporta, el ia conose "cada trova analisal positiva" e ia deside cual atletas on va proteje.

Putin ia dise ce Grigory Rodchenkov, la xef pasada de la laboreria antidrogi nasional de Rusia, de ci se alegas denunsiante ia provoca la investiga, es "un person de reputa scandalosa".

La Cremlin ia demanda ce AMA furni "informas plu completa, empirical, fundida sur atesta" a investigores rusce.

2016-07-18

Un om mata tre polisiores en Louisiana

En la SUA, on ia revela ce Gavin Long, la om identifiada como la mator de tre polisiores en Baton Rouge, Louisiana, ia posta videos cexante sur la trata de persones afroamerican par la polisia e recomendante un retalia.

El ia es matada par polisia en la ataca a la matina de ier.

La situa en Baton Rouge ia es multe tensada pos cuando la polisia ia mata ala un om negra a du semanas ante aora.

La acel mata, e un plu fusili par la polisia en Minnesota, ia provoca protestas tra la Statos Unida e un ataca venjante par un veteran negra de armada ci ia mata sinco polisiores en la site Dallas, Texas.

Respondente a la matas la plu resente, presidente Barack Obama ia asentua ce tota americanes debe uni e evita linguaje dividente.

Plu detalias ia emerji sur Long, ci ia veni de Site Kansas, Missouri, incluinte se istoria de servi militar.

El ia es un marinor de pede entre agosto 2005 e agosto 2010, asendente a la grado sarjento e servinte en Irac de junio 2008 asta januario 2009. El ia gania alga medalias e lodas, e ia es relasada con onor.

Se videos e postas enlinia ia usa la nom falsa Cosmo Setepenra. En los, el arenga sur lo cual el ia vide como atas nonjusta contra persones negra. A un punto, el dise "on debe retalia".

En un video postada a YouTube, Long asentua ce, en caso ce alga mal cosa ta aveni a el, el no es liada con un grupo. "Me parteni a la spirito de justia, no plu, no min," el ia dise. "Me ia pensa me propre pensas, me ia fa me propre desides."

2016-07-17

La polisia deutx invade parlores de odia

La polisia deutx ia fa un serie de invades a persones sur ci on suspeta ce los ia posta parlas de odia a redes sosial.

La invades coordinada a 60 adirijes ia es la ves prima cuando la autoriosas ia reata en esta modo sur esta problem.

On intende fronti lo cual la polisia ia descrive como "un aumenta sustantial de testos estremiste". Crimines tipal inclui "dona gloria a nazisme e estremismes xenofobica, antisemita, e de otra spesies destriste".

La presidente de la autoria polisial criminal federal de la pais ia dise ce crimines de odia political motivada a la interede ia crese notable pos la comensa de la crise european de refujadas.

En la anio pasada, Deutxland ia aseta asta milion migrores e refujadas.

Multe de la parla de odia alegada ia aveni en un grupo secreta de Facebook entre julio e novembre 2015.

La invades ia es fada en 14 provinses deutx, e ia envolve 25 departes de polisia.

La provoca de odia razal es un crimin par lege deutx. Un person pote es prisonida per asta sinco anios en un caso de provoca "odia contra un grupo nasional, razal, relijial, o un grupo definida par se orijines etnical".

On ia critica Facebook, Twitter, e Google en Deutxland car los no ia sutrae rapida parlas de odia de se plataformas.

Presada par la autoriosas deutx a la fini de la anio pasada, la tre companias tecnolojial ia acorda sutrae tal contenidas de se servis pos no plu ca 24 oras.

2016-07-16

Un colpa de stato es atentada en Turcia

La presidente de Turcia, Recep Tayyip Erdoğan, ia denunsia un atenta de colpa de stato como "un ata de tradi" e ia insiste ce se governa resta en controla.

On acusa un parte de la fortes armada de atenta saisi la potia. Ofisiores dise ce la colpa ia fini, ma on ancora no ia confirma esta.

La sites Ankara e Istanbul ia esperia un note de bombas esplodente, atacas airal, e fusilis. A la min 60 persones ia mori e sentos ia es ferida. 1563 soldatos ia es arestada.

Imajes dramosa ia mostra desuples de soldatos paseante a via de se tances, con manos levada, sur un de la pontes supra la Bosporo en Istanbul. Los ia clui la ponte contra trafica tra la note intera.

La Cresente Roja en Turcia dise ce 800 persones en Ankara e 200 en Istanbul es en ospital pos la note de violentia.

La avenis ia comensa a la sera de ier, cuando tances ia posa se sur pontes major en Istanbul, blocinte los. On ia vide soldatos en la stradas e jetos militar ia vola basa supra Ankara, la capital.

Alora, un partito de la armada ia declara ce "un consilio de pas" maneja la pais, e ce on va enforsa un ora de retira e leges militar.

La grupo ia dise ce lo ia inisia la colpa de stato "per serti e restora la ordina constitual, democratia, diretos e librias umana." Lo ia declara ce la governa presente ia erode la lege democrata e secular, e ce on va ave un constitui nova.

Erdoğan ia es en Marmaris, un vacanseria en la sude-ueste de la pais, ma ia vola a Istanbul. El ia dise ce Marmaris ia es bombida pos se parti.

El ia usa se telefoneta per fa un declara televisada, recomendante ce persones vade sur la stradas per oposa la revolta. "Me ia crede nunca a un potia plu alta ca la potia de la popla," el ia dise.

La ministro xef, Binali Yıldırım, ia comanda la militaria a tira a tera la aviones usada par la conspirores.

On reporta ce Hulusi Akar, la jeneral xef de la armada, ia es saisida como ostaje par la rebelores, ma el es aora librida.

La parlamento e construidas presidental en Ankara ia es atacada en la note. A la min un bomba ia colpa la compleso parlamental. On crede ce parlamentores ia asconde en refujerias.

On ia oia xutas ance estra la xeferia de la polisia en Istanbul, e tances ia es posada estra la airoporto. La canal de novas CNN Türk ia es saisida par soldatos e se difusa direta ia es abortada.

Multe persones ia segue la recomenda de Erdoğan e ia fronti la revoltores sur la stradas. On ia reporta scaramuxas en la Plaza Taksim de Istanbul, con fusilis e esplodes prosima.

Un de la elicotores volada par la rebelores ia es tirada a tera en Ankara, e fusilis ia es ancora oiada de tempo a tempo en alga partes cuando la matina ia ariva.

La situa no es clar, ma la ministreria turces de esternas ia dise ce la colpa de stato ia es "prevenida par la popla turces en unia e acorda. Nos presidente e governa es en controla."

Atatürk, la airporto xef de Istanbul es aora controlada par la armada, e on ia intende recomensa volas – interompeda per alga oras – a 06:00.

La sede de un grupo de 60 soldatos sur un de la pontes de Istanbul ia es direta televisada a esta matina.

On ancora no sabe ci ia scemi la colpa de stato. Turcia ia descrive la faores como "un ronda cluida en la fortes armada".

Plu temprana, Erdoğan ia colpa "un strutur paralel", un espresa cual el ia usa en la pasada per refere a Fethullah Gülen, un eglesor muslim en la SUA ci el acusa de provoca turbas.

Ma, en un declara, Gülen ia rejeta la sujesta ce el es liada a la avenis. "Me condena, en termas la plu forte, la colpa militar atentada en Turcia," el ia dise.

En Washington, Barack Obama, la presidente de la SUA, ia recomenda ce tota partitos en Turcia suporta "la governa democrata elejeda".

OTAN ia recomenda "respeta completa" per la instituis democrata de Turcia. E Donald Tusk, la presidente de la Consilio European, ia descrive la pais como "un asosior major per la Uni European", ajuntante: "Nos esije un reveni rapida a la ordina constitual de Turcia."

2016-07-15

Un fola en Nice es atacada par camion

A la min 84 persones ia mori, incluinte enfantes, cuando un camion ia puxa se tra un fola selebrante la Festa Nasional en la site Nice en la sude-este de Frans.

La camionor ia continua tra 2 cilometres longo la Promenade des Anglais, un bolevar de plaia, a sirca 23:00 de ora local ante cuando la polisia ia mata el par fusil.

Presidente François Hollande ia dise ce la ataca ave "un natur nonegable teroriste".

Un state de crise, ja ativa pos la atacas en Paris en novembre, es aora estendeda par tre menses. Frans ia es ja estrema vijilosa pos acel atacas cual ia mata 130 persones e ia feri sentos de otras.

"Frans es grave colpada," Hollande ia dise, ajuntante ce "nos nesesa fa tota posibles per combate contra" tal atacas. "La intera de Frans es su la menasa de terorisme islamiste," el ia comenta.

El ia ajunta ce on va envia soldatos reservada per suporta la armada e fortes de securia tra la pais, con foca spesial a la fronteras.

Sirca 50 persones ia es ferida, 18 a grado estrema, en la aveni a jovedi, cual ia es Dia Nasional de Frans.

Un portavose per la ministro de internas ia nega reportas plu temprana ce on ave un situa de ostaje. El ia dise ce on ia "neutri" la camionor. Ofisiores investiga esce la camionor ia ata solitar.

Asta aora, no grupo ia reclama la ataca, ma avocatos prosedente ia indica ce la investiga va es fada par ofisiores antiterorisme.

Alga reportas ia dise ce la polisia e los en la camion ia fusili a lunlotra, ma on no ia confirma esta.

Videos en redes sosial ia mostra persones corente tra la stradas en panica pos la aveni. Un otra imaje, a Twitter, ia mostra un camion blanca, fronte danada e parada a media de la bolevar, con cuatro polisiores oservante lo de pos un palma.

Barack Obama, la presidente de la SUA, ia condena "en termas la plu forte" lo cual ia pare es "un ataca teroriste asustante en Nice".

Ance la presidente de la Consilio European, Donald Tusk, ia condena la ataca, disente: "Lo es un paradox trajedin ce la blanco de esta ataca ia es persones selebrante libria, egalia, e fratia."

Banderas en Frans va es basida a la altia media, e on ia cansela la carnaval de jaz en Nice.

2016-07-14

Un prete zimbabuean recomenda protesta plu

Un prete zimbabuean, ci on ia deteni per tempo corta car el ia organiza un greve nasional en la semana pasada, ia recomenda ce on continua protesta.

Evan Mawarire ia dise ce persones debe resta a casa per contribui a un campania contra froda, malmaneja de la economia, e nonemplea. El ia ajunta ce la campania es seria en se desira de cambia.

Ier, Mawarire ia es librida cuando un corte en Harare ia rejeta un caso legal contra el.

Se avocatos ia susede convinse ce la acusa de suverti ia es ajuntada a minuto final, sutraente la posiblia de un prosede justa per el.

La prete ia es resente a la sentro de un campania en redes sosial per denunsia la maneja de la economia par la governa. El ia dise ce la gol de la promove #ThisFlag ("esta bandera") es "fa ce tan multe sitadanes como posible deveni envolveda en construi la nasion".

Se demanda la plu resente ce persones resta a via de labora per protesta contra la crise economial ia es jeneral iniorada, e la plu comersias ia abri como normal a mercurdi.

Mawarire ia confesa ce la protesta no ia es tan susedosa como lo de la semana pasada – cuando la sites de la pais ia pare abandonada – ma el ia dise ce la greve debe continua a jovedi.

"Ta ce tota de nos para e envia un mesaje a nos governa ce la situa basta ja," el ia dise. "Nos nesesa cambias en cosas multe simple, en campos multe simple. E la nos protesta – nonviolente, nonprovocante, en nos casas propre – es la plu bon car lo segue la constrinjes de la lege. Cada zimbabuean ci no partisipa prende de nos la posiblia de ajunta a la momento de la viaja de nos pais."

2016-07-13

Brasil aumenta securia ante la olimpiales

La governa federal en Brasil dise ce lo relasa plu finansias per aumenta la securia ante la juas olimpial en Rio de Janeiro en agosto.

Leonardo Picciani, la ministro de sporte, ia dise ce la fortes armada va reseta $24 milion plu per aida los a sasia la esijes de securia.

El ia ajunta ce la militaria va comensa patrulia avenerias sportal a 24 julio. Plu ca 80 mil polisiores e soldatos va patrulia la stradas de Rio tra la intera de la juas.

La stato de Rio de Janeiro ia redui resente multe spesies de bujeta, incluinte de la polisia.

La polisia ia organiza protestas contra la paia tarda de se salarios e la manca de nesesadas fundal como carburante de auto e paper de vason.

On reporta esta protestas como un sintom de la mal fortunas political e economial cual ia engoli Brasil en la tempo resente.

En maio, la Senato de Brasil ia suspende Dilma Rousseff, la presidente de la pais, ante inisia un prosede de acusa el sur alegas ce el ia manipula la bujeta governal ante se campania de reeleje en 2014.

A vista economial, la statistica governal per la cuatri prima de 2016 ia mostra ce Brasil esperia se retrosede la plu sever de 25 anios.

E la comite organizante de la juas olimpial ia debe maneja la anunsia ce alga sportores famosa – incluinte Jason Day, campion de mundo de golf – ia retira se de la juas par causa de la teme sur la virus de Zica.

An tal, la dirijor xef de la juas ia dise ce la ansia sur la efeto de la virus a la olimpiales ia deveni "esajerada estra proportio".

2016-07-12

La economia italian va stania per dudes anios

La Funda Monal Internasional (FMI) ia averti ce Italia va esperia du desenios de stania en se economia.

Se reporta la plu resente sur la pais estima la crese en esta anio a min ca 1%, reduida de 1,1% – se estima presedente – e previde un crese de sirca 1% en 2017, reduida de la 1,25% estimada.

La FMI dise ce Italia no va reateni se nivel de ante la crise asta 2025, cuando se visinas va ave economias a 20–25% supra la nivel de 2008.

Italia es la pais tre de la plu grandes en la eurozona. Lo ave nonemplea a 11% e un campo bancal en crise, e la deta de se governa es plu alta ca lo de tota otra paises estra Elas.

La bancos de la pais es su presa, car la povria longa de la economia ia basi la revenu par impostas e ia alti la probablia ce companias va trova se en la situa difisil de no pote manteni se paias per prestas.

Bancos italian porta un carga enorme de detas reganiable e va nesesa cisa un injeta notable de finansia nova.

Seguente la FMI, lo es probable ce la recovre va es longa e riscosa.

Entre la riscas es la retira de la Rena Unida de la Uni European, cual ia dise en la semana pasada ce per esta razona lo ia deside redui se prevides de crese economial per la eurozona intera.

Otra partes problemosa inclui "la ondon de refujadas, e ventas oposante par la lenti de comersia global".

En la semana pasada, la FMI ia comenta ce lo previde ce la eurozona va crese par 1,6% en esta anio, e par 1,4% en 2017. Ante la referendo de Brexit, la FMI ia predise un crese de 1,7% per ambos anios.

Lo ia revisa ance se previde de crese per 2018, reduinte lo de 1,7% a 1,6%.

2016-07-11

Venezuelanes compra comedas en Colombia

Miles de persones ia traversa a Colombia pos cuando Venezuela ia abri se frontera comun per permete ce se popla compra comedas e medisin.

La frontera ia es cluida par Venezuela en agosto de la anio pasada, como un medio contra crimin. Lo ia resta abrida per 12 oras.

Venezuela esperia aora un crise profonda de economia, e multe persones dise ce nuri se familias ia deveni difisil.

En la semana pasada, sirca 500 femes venezuelan ia forsa se tra la frontera per xerca comedas.

Nicolás Maduro, la presidente de Venezuela, ia comanda ce on clui la frontera car, diseda par el, la rejion ia es infiltrada par paramilitares e ganges colombian.

La medio preveni ance la contrabanda de benes finansial suportada a Colombia de Venezuela.

Sirca 35 mil persones ia traversa ier la frontera entre San Antonio del Táchira en Venezuela e Cúcuta en Colombia, pos pone se en filo en la oras temprana de la dia.

Multe ia porta camisetas blanca como un simbol de pas, negante ce esta es liada con la oposa political.

Un fem anonim ci ia traversa con se sposo e du enfantes joven ia dise ce lo es "nonjusta" ce la frontera es normal cluida. "Nos es de San Antonio, e la realia es ce nos ave no comedas per dona a nos enfantes."

2016-07-10

Un matador es matada par un bove

En Espania, un matador ia mori pos deveni lansida par un bove. El es la combator prima de boves ci ia mori en la combateria en esta sentenio.

Víctor Barrio ia ave 29 anios e ia es un combator profesal de boves. El ia es matada cuando la corno de la bove mas ia perfora se peto.

La combate, en la vila Teruel en la este de la pais, ia es direta televisada. La imajes mostra ce la bove lansa Barrio tra la aira ante perfora el a la lado destra de se peto e lansa violente el.

Mariano Rajoy, la ministro xef de Espania, ia espresa se compatia a Barrio en se flue de Twitter.

Un comenta en la flue ofisial de la combateria Las Ventas en Madrid, do Barrio ia comensa como un stajior, ia dise ce lo es "angusada e multe emosiada" par se mori.

La jornal El País ia reporta ce en la sentenio pasada, 134 persones, incluinte 33 matadores, ia es matada par boves mas en Espania.

En la anio pasada, matador Francisco Rivera Ordóñez ia es grave ferida cuando el ia partisipa en un combate de bove en la vila Huesca en la norde-este.

La matador presedente ci ia mori en un combate de bove en Espania ia es José Cubero, conoseda como "El Yiyo", en 1985.

On organiza sirca 2000 combates de bove en Espania a cada anio, ma la cuantia diminui. En 2010, Catalunia ia deveni la numero du de la rejiones espaniol cual ia proibi la tradision. La Isolas Canario ia es la prima.

Oposores descrive la galas sanguosa como barbar. Ma fanes – incluinte Rajoy – dise ce la tradision es un forma de arte antica con radises profonda en la istoria nasional.

Ance ier, un om de 28 anios ia mori pos deveni lansida par un bestia en un corsa de boves mas tra la vileta Pedreguer, prosima a Valencia. Jornalistes espaniol reporta ce el ia atenta aida un otra coror cuando un bove ia lansi se garga e adomen.

Entretempo, en la carnaval de corsa de boves mas en San Fermín en Pamplona ier, un om japanes de 33 anios ia es lansida a se peto, e un om espaniol a se braso. 12 otra persones ia es ferida.

2016-07-09

Filantropiste Edhi mori en Pacistan

Abdul Sattar Edhi, un filantropiste pacistani selebrada ci ia dedica se vive a persones povre, ia mori con 88 anios, a un sentro medical en Karachi do on ia trata el tra alga semanas.

El ia comensa se labora carital cuando ancora joven. La Funda Edhi furni aora servis sosial diversa e sin custa, incluinte ambulansias, orfanerias, e suporta per persones vea e descapasida.

La ministro xef, Nawaz Sharif, ia espresa se tristia a la mori, disente ce el prea ce Edhi va ave "la loca la plu bon en paradiso".

"Nos ia perde un servor grande de umania," Sharif ia dise. "El ia es la representa real de ama per los ci ia es sosial dolable, sin defende, e povre."

Malala Yousafzai, la resetor la plu joven de la Premio Nobel de pas, ia descrive Edhi como "un figur lejendin". "El ia vive se vive per la vives e felisia de otras, e per esta razona el es un model per segue. Me no ia vide cualcun otra simil a el."

Yousafzai ia repete se recomenda ce on onora Edhi con la Premio Nobel de pas.

Edhi ia veni de un familia de comersiores gujarati e ia ariva en Pacistan en 1947. Ma el ia deside emprende filantropia pos vide como la stato ia fali aida se familia a cura se madre paraliseda e malada.

El ia abri se clinica prima en 1951. La Funda Edhi ia crese per deveni la organiza de aida sosial la plu grande de Pacistan, manejante scolas, ospitales, e servis de ambulansia tra la pais, comun covrente bucos en servis cual la stato ia fali furni.

Edhi ia es cisa la person la plu respetada en Pacistan. Alga persones ia regarda el cuasi como un santa.

El ia lista la cualias fundal de se labora: simplia, onestia, asiduia, e puntualia.

"Cura otras es la obliga de cadun – esta es la sinifia de es umana," el ia esplica. "Si plu persones ta crede tal, on ta pote solve tan multe problemes."

El ia es ance famosa per se modo de vive umil. On ia reporta ce el posese sola du colies de vestes e vive en un sala peti e poca mobilida, a lado de la ofisia de se organiza.

On ia diagnose Edhi con renes falinte en 2013. En junio el ia refusa un ofre par Asif Ali Zardari, un presidente pasada, de trata medical estra la pais. El ia insiste ce on trata el en un ospital publica en Pacistan.

2016-07-08

Polisiores es matada a media de protestas en Dallas

En la SUA, sinco polisiores ia es matada e ses ia es ferida par xutores en protestas en la site Dallas contra fusilis a omes negra par la polisia.

La polisia es aora en un state nonprogresante con un om armada en un garaje. Tre otra persones es detenida.

Fusili ia aveni a sirca 20:45 de ora local ier, en cuando protestores ia prosegue tra la site. La protestas ia es provocada par la moris resente de Philando Castile en Minnesota e Alton Sterling en Louisiana.

David Brown, la xef de polisia de Dallas, ia dise ce on crede ce tota suspetadas ia colabora, atacante par fusil en cuando la protesta ia aveni.

El ia dise plu temprana ce 11 polisiores ia es fusilida en "modo emboscin" par xutores, e tre ia mori. La polisia ia tuita plu tarda ce un polisior cuatro ia mori ance, e on ia confirma resente la mori de un plu de la feridas.

Lo pare ce du xutores ia fusili de locas alta. Brown ia comenta: "Nos crede ce esta suspetadas ia posa se en modo per trianguli esta polisiores de du perxas separada… e ia intende feri e mata tan multe polisiores como los ia pote."

La maior de Dallas, Mike Rawlings, ia dise ce lo es "un momento estrema angusante per la site".

On ia restrinje volas supra Dallas.

La protesta ia es un de un cuantia cual on ia fa tra la Statos Unida sur la usa de fortia matante par la polisia contra persones afroamerican.

Philando Castile ia es fusilida e matada par un polisior en un controla costumal de veculo en St Paul, Minnesota a mercurdi, pos dise ce el porta un fusil lisensada.

Alton Sterling ia es matada par polisia a martedi en Baton Rouge, Louisiana, seguente un reporta anonim ce el usa un revolver per menasa en se vende de cds.

Ambos matas ia es caturada en video, reensendente un debate nasional.

Presidente Barack Obama ia dise ce "tota persones justa debe es consernada" par la matas frecuente de persones negra par la polisia.

Indicante un statistica cual mostra ce lo es multe plu probable ce sitadanes afroamerican va es fusilida par la polisia ca sitadanes blanca, Obama ia recomenda ce la polisia desradisi se prejudi interna.

"Cuando atas como esta aveni, on ave un parte grande de nos cositadanes ci senti como si par causa de la color de se pel, on no trata los en la mesma modo," el ia dise. "E esta dole."

Ma Obama ia dise ance ce on ave "grasia e respeta estracomun per la majoria vasta de polisiores ci risca se vives per proteje nos a cada dia individua. Los ave un taxe perilosa. Lo es un taxe difisil."

2016-07-07

Taiuan vijila ante siclon Nepartak

Taiuan prepara per la ariva de un supersiclon, sur cual on previde ce lo va colpa la isola en la oras veninte.

Ier, a 780 cilometres a sude-este de la site taiuan Hualien, siclon Nepartak  ia trae un venta de asta 263 cilometres per ora.

Predisente un venta forte e pluves ferose, on ia averti sur risca de inondas e liscas de fango.

On ia sorti 3000 turistes de la Isola Verde e de Lan Yu (Isola Orcidea), du isolas costal popular prosima a Taitung, un contia sude-este.

Un tempesta es clasida como un supersiclon si lo susta un rapidia de venta de 65 metres per secondo a la surfas per a la min un minuto. Esta coresponde a un siclon de categoria 5 en la basin atlantica.

La ministreria de defende dise ce sirca 35 mil soldatos es preparada per aida.

Hochen Tan, la ministro de transporta, ia informa sitadanes ce on ia reali medios per serti ce la airoporto de Taoyuan no va deveni inondada.

Taiuan esperia multe siclones. Un supersiclon en la anio pasada ia mata tre persones e ia feri plu ca 300, e un otra ia mata a la min oto persones en Taiuan e 21 en Xina.

La tereno ru de la isola, con un montania alta de asta 4000 metres estendente tra la teritorio, aumenta la risca de inondas e liscas de tera en un siclon.

2016-07-06

Berlusconi vende AC Milan

Silvio Berlusconi, ministro xef pasada de Italia, dise ce el ia vende la club de futbal AC Milan a un asosia xines.

Berlusconi, ci posese esta ecipo de Serie A, ia fa la comenta a jornalistes local ier.

El ia dise ce la asosia va paia a la min 400 milion euros en la du anios seguente, cual va valua la club a cisa asta 750 milion euros, incluinte detas.

"Milano ia embarca aora sur esta via en dirije a Xina," el ia dise, sin revela la identia de la comprores. Ma otra reportas, sitante se fontes propre, ia indica ce on prepara ancora la detalias de la acorda.

Berlusconi ave 79 anios. El ia servi como ministro xef a cuatro veses ante deveni condenada sur frodas impostal e sobornas.

On reporta ce Fininvest, la compania teninte de se familia, ia comensa negosias privata con la grupo de investores xines en maio. La grupo vole compra 80% de la club ante emprende ultima ance la resta.

La vende ta pote an causa ce la club deveni listada en Xina.

Associazione Calcio Milan es un de la clubes de futbal la plu susedosa de Europa, ma lo xerca capital nova per pote opera plu capas contra otra competores bon finansiada. Lo ia reporta un perde de 93,5 milion euros en 2015.

Berlusconi ia prosimi a vende un majoria de AC Milan a un comersior tai en la anio pasada, ma ia cambia se deside.

Multe ecipos european es aora poseseda o finansiada par investores o companias rica de Asia. En la mense pasada, Inter Milano, un ecipo local competente, ia es vendeda a Suning Commerce Group, un compania xines cual vende eletronicales.

E en la mesma mense, Xia Jiantong, un comersior xines conoseda como Tony Xia, ia completi se compra de Aston Villa, club engles, per 76 milion paundes (cuasi 100 milion dolares).

Futbal es un sporte popular en Xina, e la governa ia promete developa la industria local sur lo per deveni un suprapotiosa de mundo.

2016-07-05

Clinton descrive Trump como antisemita

En la SUA, Hillary Clinton, la aspiror presidental de la partito democrata, ia dise ce un tuita par se oposor Donald Trump, conteninte un stela de ses puntos, es "evidente antisemita".

La tuita ia inclui un forma simil a la stela de David sur un fondo de multe biletas de mone, con testo descrivente Clinton como la "aspiror la plu frodante de istoria!"

Plu tarda, on ia sutrae la tuita e reenvia lo con la slogan contenida en un sirculo.

Trump ia dise ce jornalistes es "nononesta" en descrive la forma como la stela de David, un simbol de iudisme.

On reporta ce la imaje ia apare prima en un mesajeria conoseda per antisemitisme e supremia blanca.

La ecipo campaniante de Clinton ia dise: "La usa par Donald Trump de un imaje evidente antisemita de pajerias raziste per promove se campania ta es sufisinte turbante. Ma la fato ce lo es un esemplo de un serie repetente debe furni un causa major de ansia a votores."

Trump ia retalia en un declara, descrivente la forma como "un stela fundal, comun usada par xerifes", e disente ce acusas de antisemitisme es "riable". El ia acusa Clinton de atenta redirije la atende a via de un consenta entre la sposo de Clinton e la avocato jeneral.

La ecipo de Trump ia nega ce la imaje ia es prendeda de un pajeria antisemita.

La stela de David apare sur la bandera israeli, e ia es usada par la nazis per identifia persones iudi.

A ante, Trump ia es esaminada cuando el ia reposta comentas fada par grupos supremiste en redes sosial.

Plu temprana en esta anio, on ia critica el cuando el ia fali nega direta se suporta per David Duke, un xef de la Ku Klux Klan, un organiza de supremia blanca, ci ia declara se aproba per Trump.

2016-07-04

Irac lamenta la vitimes de un bombi en Baghdad

La governa iraci ia declara tre dias de lamenta nasional pos un bomba grande en la capital Baghdad, cual ia mata a la min 125 persones e ia feri sirca 150.

Un camion cargada con esplodentes ia es detonada en la distrito Karrada en cuando familias ia es comprante per la vacanse a la fini de Ramadan.

Salvores ia dise ce familias intera ia es eliminada e ce multe vitimes ia deveni nonreconosable ardeda.

La organiza Daex dise ce lo ia fa esta ataca par bomba umana.

La ministro xef, Haider al-Abadi, ia visita ier la area xef xia, ma se convoia ia encontra folas coler. Plu tarda, se ofisia ia anunsia la tre dias de lamenta, ajuntante ce Abadi comprende la reata coler de abitores.

A noti de soldi, ecipos de laborores ia sutrae ancora detrito de la loca en cuando los ia xerca en la ruinas negrida de construidas.

La bombi, a sirca medianote de saturdi, ia es la plu matante en Irac de esta anio. Lo ia aveni a un semana pos la recatura de la site Falluja de Daex par soldatos iraci.

Metraje de la loca en la minutos pos la esplode mostra la area intera engolida par flamas.

Un bomba du ia esplode corta a pos en un otra area xef xia a norde de la capital, matante sinco plu persones.

Daex, cual segue se varia propre e estrema de Islam suni, ia dise en un declara enlinia ce la ataca en Karrada ia es realida como un parte de "operas de securia continuante".

La SUA ia dise ier ce esta ataca forti se deside per suporta soldatos iraci en se combate contra Daex.

Ján Kubiš, la ambasador de la Nasiones Unida en Irac ia descrive la violentia como "un ata coarde e odiable de grandia sin presedente". El ia dise ce ativistes de Daex ci "ia sufri defetas a la fronte de batalia atenta venja se perdes par ataca persones nonmilitar e nondefendeda".

Plu temprana ier, Abadi ia anunsia ance medios de securia aumentada, incluinte la elimina de la detetadores falsa de bombas cual on usa ancora a puntos de controla en Irac, an si on ia esposa los como nonfunsionante a alga anios ante aora.

El ia comanda ance ce on instala sistemes plu bon de esamina veculos a la puntos de entra a Baghdad e en otra provinses.

2016-07-03

Un manada ensende un mascita en Miama

Un manada ia arde un mascita en Miama norde, en la ataca du de se spesie en pico plu ca un semana.

La polisia garda la vileta Hpakant en la stato Kachin pos fali preveni viletores budiste de ensende la mascita.

En la semana pasada, un grupo de omes ia destrui un mascita en la sentro de la pais, en un disputa sur se construi.

La Nasiones Unida ia averti la governa, gidada par Aung San Suu Kyi, ganior de la Premio Nobel de Pas, ce lo debe reali medios forte contra violentia relijial.

La ataca la plu resente ia aveni a venerdi, cuando un grupo de viletores ia invade la mascita e ia ensende lo. On reporta ce los ia ataca la polisiores gardante la construida e ia preveni la brigada de pompores de ateni la loca.

Un polisior local ia comenta: "La problem ia comensa car on ia construi la mascita prosima a un pagoda [budiste]. La persones muslim ia refusa destrui la construida cuando la budistes ia descovre esta." El ia ajunta ce la situa ia calmi aora, e ce on ia fa no arestas.

En un aveni simil en la vileta Thayel Tha Mein en la stato Bago en la semana pasada, la comunia muslim ia es obligada a xerca refuja en un vila visina pos cuando se mascita ia es destruida par arde e un om muslim ia es bateda.

Jornalistes local ia reporta ce plu ca un construida ia es destruida en la ataca, sur cual on ia culpa un grupo de plu ca 200 budistes. On ia envia polisiores a la vileta per proteje la comunia muslim ala.

Tensas relijial e etnical ia esiste en Miama de pos 2012, cuando ondas de violentia matante entre budistes e muslimes ia engoli partes de la stato Rakhine en la ueste de la pais. On crede ce la plu de la muslimes es rohingias.

Yanghee Lee, investigor spesial de la Nasiones Unida sur diretos umana en Miama, ia descrive se como consernada par reportas ce la governa no intende esamina la fatos de la ataca de la semana pasada.

"Esta es esata la sinial cual on no debe envia," el ia dise pos un visita de des-du dias a la pais. "La governa debe mostra ce la provoca e esecuta de violentia contra minorias etnical o relijial ave no loca en Miama."

2016-07-02

Soldatos bangla salva ostajes en un caferia

En Bangladex, soldatos ia vacui un caferia en la capital Dhaka, do fusilores ia prende ier a la min dudes ostajes.

Des-tre ostajes, incluinte cuatro persones stranjer, ia es salvada, e a la min sinco atacores ia es matada par fusil. La state de otra persones resta nonclar.

On crede ce alga de la ostajes es italian e japanes.

La grupo combatosa Daex, cual nomi se la Stato Islamiste, ia dise ce lo ia fa la ataca.

En un parla televisada, la ministro xef Sheikha Hasina ia dise: "Lo ia es un ata estrema odiable. De cual spesie de muslim es esta persones? Los ave no relijio. On debe resiste esta teroristes. La me governa ia deside firma desradisi la terorisme e combatosia de Bangladex."

Koichi Hagiuda, la secretor suordinada de consilio de Japan, ia dise ce un sitadan japanes ia es fusilida e ferida en la ataca, e ce sete otras ia es en la caferia. La governa de Japan ancora no ia susede comunica con los.

Plu temprana, on ia oia esplodes e fusilis forte cuando la armada e comandos marinal ia invade la caferia en la matina. Los ia es suportada par la polisia e la paramilitaria Gardores de Frontera Bangla.

On ia vide ance moves de veculos blindada en la visineria. La fusilis ia sesa pos sirca un ora.

Sumon Reza, un supravidor de la caferia, ia descrive se esperia: "Me ia es en la teto. La construida intera ia secute cuando los ia detona esplodentes."

On no ia sabe direta la identia de la ostajes salvada e la state de otra ostajes sur ci on crede ce los ia es en la caferia.

A la min du polisiores ia es matada en intercambias de xuta en la tarda de venerdi, e tredes polisiores ia es ferida.

La ataca ia comensa a sirca 21:20 ier, cuando oto o nove omes armada ia entra subita a la caferia en la parte diplomata de la site e ia comensa xuta.

Un declara par la ajenteria de novas de Daex ia dise ce militaristes ia ataca un restorante "comun visitada par stranjeres". Lo ia dise ce plu ca dudes persones "de nasionalias diversa" ia es matada, ma on no ia confirma esta.

On reporta ce la ambasador italian en Dhaka, Mario Palma, ia dise ce on crede ce sete italianes ia es en la caferia.

Teninte-colonel Tuhin Mohammad Masud, la comandor de la Batalion de Ata Rapida, ia esplica ce la fusilores no ia responde cuando on ia demanda negosia con los. Lo no es clar esce la atacores ia esije cualce cosa.

La ataca segue un serie de matas de blogores secular, ativistes ge, profesores, e membros de minorias relijial, per cual on culpa combatosas islamiste.

La caferia es descriveda como popular con sitadanes a stranjer, diplomatas, e familias de clase media.

2016-07-01

Taiuan lansa un misil sin intende

La marina de Taiuan ia lansa, par era, un misil antibarcon suprasonal de se base en Kaohsiung.

On ia es a media de esamina la eserses militar sur un barco de patrulia cuando la misil Hsiung Feng III ia es ativida.

Lo ia atera en acuas prosima a la isolas Penghu, en dirije a Xina continental, e ia causa no feris.

Esta ia aveni en cuando Xina selebra la aniversario 95 de la formi de la Partito Comuniste Xines.

Cuando jornalistes ia demanda esce la asidente va afeta la relatas entre Taiuan e Beijing, la visamiral Mei Chia-hsu ia dise ce la marina ia reporta lo a la ministreria de defende de la isola.

El ia ajunta ce on investiga la caso e va trata lo "en modo conveninte".

Lo no es clar esce Beijing ia es direta avisada.

La misil ave un estende de sirca 300 cilometres.

Xina regarda Taiuan como un provinse diverjente cual debe deveni reunida con Xina continental, par forsa si nesesada. Lo ave sempre sentos de misiles puntada a la isola.

La presidente de Taiuan, Tsai Ing-wen, ci es ance la xef de la militaria, es en un otra pais a presente.