2019-05-31

La Pilipinas reenvia dejetadas canadian a Canada

La Pilipinas ia reenvia multe tones de dejetadas a Canada, pos un disputa diplomata longa en cual Presidente Rodrigo Duterte ia menasa "viaja a Canada e repone sua dejetadas ala".

Sua pais cexa ce la dejetadas ia es falsa eticetida como plasticas resiclable cuando los ia es enviada a Manila en 2014. Canada ia acorda paia la custa completa de transporta e desprende los.

69 contenadores de dejetadas ia es reenviada en un barcon de carga cual ia comensa viaja de Baia Subic, a norde de Manila.

"Baaaaaaaaa bye [pd: 'txau'], como nos dise lo," Teddy Locsin Jr, ministro de esternas pilipina, ia scrive en Twitter a esta matina. La ministro, ci es conoseda per sua stilo turbosa de tuitas, ia posta ance imajes e video de la barcon partinte de la porto.

La sirca 1500 tones de dejetadas renativida va es transportada a la site Vancouver en Canada, arivante ante la fini de junio, per es tratada en un compleso cual converti dejetadas a enerjia.

Sean Fraser, la secretor parlamental de la ministro de ambiente canadian, ia comenta: "Esta es un demostra ce nos intende obedi nosa obligas internasional de trata dejetadas cual orijina en Canada."

El ia dise ance ce Canada ia ata rapida en la semanas resente per solve la problem, cual ia continua tra alga anios, pos cuando la governa pilipina ia clari "ce esta es un conserna multe seria per los".

Un cuantia cresente de paises tra Asia sude-este urje nasiones ueste a reprende dejetadas cual ia es enviada a los, razonante ce alga de los ia es nonlegal emportada.

La cuantia de dejetadas esportada par paises developada ia es revelada cuando Xina, cual ia emporta la majoria de lo tra anios, ia introdui un proibi contra "dejetadas stranjer". Como resulta, la dejetadas – a veses, falsa declarada como resiclables – ia es enviada a otra paises developante, ma esta paises comensa aora resiste.

Ofisiores en la Pilipinas ia indica la problem de dejetadas a Canada a la ves prima en 2014, disente ce contenadores de dejetadas maleticetida ia es enviada par barcon entre 2013 e 2014, arivante a la Porto Internasional de Contenadores de Manila.

En 2016, un corte pilipina ia comanda ce la emportor paia per reenvia la dejetadas a Canada. En acel mesma anio, Canada ia cambia sua propre regulas sur transporta de dejetadas perilosa, per preveni un repete de la aveni.

Plu temprana en esta mense, Manila ia retira sua ambasador de Ottawa cuando on ia ateni la 15 de maio sin ce Canada ia retrae la dejetadas. Alora, Canada ia dise ce lo va comensa preparas per reprende los.

Aora oji va continua denova pos un semana.

2019-05-30

Un barco de turistes inversa en Budapest

Sete turistes de Corea Sude ia mori, e a la min 19 otras manca, pos la inversa de un barco sur la rio Danubio en Budapest, la capital de Magiar.

Tredes turistes e tre gidores de turi, como ance du ecipores magiar, ia es sur la barco cuando lo ia es colpada par un otra barco a sirca 22:00 de ora local ier.

On ia salva sete persones e un opera grande de xerca continua sur la rio, cual es inflada par multe pluve. La pluve ia crea corentes forte sur la Danubio.

La barco, cual ia afonda prosima a la construida de parlamento, ia es nomida la Hableány ("Fe de mar"). Lo ia ave du niveles e ia pote porta 45 persones en turis de atraes. Lo ia es liada cuando la asidente ia aveni.

La ministreria de esternas de Corea Sude ia confirma ia moris e la mancas. Lo ia dise ce la governa va envia un ecipo de ofisiores a Magiar, ajuntante ce la familias de la vitimes va dispone conselas.

A un confere jornaliste en Seoul, la capital de Corea Sude, un portavose per Lee Sang-moo, la ajenteria de viaja cual ia organiza la turi de la grupo, ia dise ce a la min un enfante es entre la persones mancante.

Un portavose per la servis de crise en Magiar ia dise ce la sete persones tirada de la acua ia es prendeda a ospital con ipotermia e sintomes de xoca.

La labora de salvores ia continua tra la note e en esta matina, usante barcos, sumerjores, radar e lampas de punto per esplora alga cilometres de la rio su la loca de la asidente.

On ia descovre la ruina de la Hableány sur la fondo de rio, pos xerca tra alga oras prosima a la ponte Margit. Con la pasa de tempo, la corentes forte va porta persones a plu distante, reduinte la probablia de trova survivores.

On ia para la trafica de barcos sur la Danubio a sude de Budapest.

2019-05-29

La re pasada de Beljia furni sua adn

Albert 2, la re pasada de Beljia, ia furni un sample de adn per evita un multa de €5000 per dia, entre un alega ce el ia jenita un fia estrasposal en la desenio de 1960.

La om de 84 anios disputa ja la alega par Delphi Boël, un artiste beljes con 51 anios, tra plu ca un desenio. El ia furni ier un sample de saliva.

Plu temprana en esta mense, un corte de apela en Beljia ia deside ce on debe puni la monarca pasada par causa de sua refusa de la proba.

La re de 1993 asta 2013 nega la alega de padria.

En un declara, sua avocato ia dise: "El ia nota ce la corte ia deside ce la concluis de esta esamina va es asoluta privata asta un deside judal."

On no previde un judi de corte asta la fini de esta anio.

En febrero, un corte en Bruxelles ia comanda la re pasada a dona un sample de adn en tre menses, o risca ce on suposa ce el es la padre de Boël.

2019-05-28

Un om mori pos come 246 sacos de cocaina

Un om japanes ia mori en un vola de la Site Mexico, pos come 246 sacos de cocaina.

La avion, viajante a la Airoporto Internasional Narita en Japan, ia debe fa un atera de crise en Sonora, un stato en la norde-ueste de Mexico, cuando la om ia comensa convulsa.

On dise ce la om, a presente identifiada sola como Udo N, ia mori de un edema serebral causada par un supradosa de drogas.

La pasajor ia embarca la avion pos comensa sua viaja en Bogotá, la capital de Colombia.

Longo un declara par la avocato jeneral de Sonora, la autopsia ia trova la sacos – con 2,5cm de longia e 1cm de largia – en sua stomaco e intestines.

La otra 198 pasajores ia continua sua viaja pos la atera nonespetada en la site Hermosillo.

The remaining 198 passengers aboard were able to continue their journey after the emergency landing in the city of Hermosillo.

La autoriosas federal de Mexico va emprende la investiga.

2019-05-27

Blocos potiosa perde potia en la Parlamento European

La resultas de la votas per la Parlamento European mostra ce la blocos grande sentral destriste e sentral sinistriste ia perde sua majoria combinada, contra un suporta cresente per libralistes, verdes e nasionalistes.

An tal, la Partito de la Popla European (PPE), sentral destriste, resta la grupo la plu grande. On previde ce lo va formi un alia suportante la Uni European con la sosialistes e democratas, aidada par libralistes e verdes. Poplistes ia fa ganias en alga paises, ma no ia ateni la resultas estrema cual alga persones ia predise.

La Parlamento aida deside la leges de la UE. Esta resultas va fa un rol major en asinia la postos xef en la Comision European, la departe cual reali la leges.

Tra la 28 statos-membros, pico min ca 51% de la votores posible ia partisipa. Esta proportio es la plu alta en 20 anios, reversante du desenios de apatia profondinte.

Con la estimas presente, la blocos cual ia domina a ante (la PPE e la sosialistes-democratas) no va es capas de formi un alia grande en la parlamento, sin suporta. On predise ce la PPE ia gania 179 sejas, contra sua 216 sejas en 2014. La cuantia de parlamentores sosialiste-democrata va redui de 191 a sirca 150.

Lo es probable ce la partitos favorente la Uni European va reteni ancora un majoria de la sejas, xef pos la ganias fada par la bloco libraliste, ma ance pos un deside par la partito de Emmanuel Macron, presidente franses, de junta Frans a acel grupo. Sua alia Renase ia perde contra la Asembla Nasional estrema destriste de Marine Le Pen.

La partitos verde ia fa susedes grande. Sondas sujesta ce la verdes va asende de 50 parlamentores a sirca 67. Ma ganias par partitos nasionaliste en Italia, Frans e otra paises va forti la euroseticas ci vole restrinje la potia de la UE.

En Deutxland, ambos partitos sentral major ia sufri. La proportio de votas per la Democratas Cristian de Angela Merkel ia redui de 35% en 2014 a 28%, e la Uni Sosial Democrata (sentral sinistriste) ia cade de 27% a sola 15,5%. La Alternativa per Deutxland, partito popliste e destriste, ia fa min bon ca prevideda, an si plu bon ca a sua ves prima en 2014. La sondas indica ce lo ia gania 10,5%.

En la Rena Unida, la Partito de Brexit, nova formida e gidada par Nigel Farage, ia gania 32% de votas. Ance la Democratas Libraliste ia fa ganias, ma la partitos major Conservaliste e Laboriste ia sufri perdes grande.

Entre resultas miscada per partitos estrema destriste tra Europa, en Frans, la Asembla Nasional de Le Pen (nomida la Fronte Nasional en la pasada) ia selebra sua vinse, pos reseta 24% de votas contra la 22,5% per la partito de Macron. Un ofisior presidental ia descrive esta como un "delude", ma "asoluta onorosa" en compara con resultas pasada.

En Magiar, la partito antimigral de Viktor Orbán ia gania 52% de votas e donce 13 de la 21 sejas parlamental de sua pais. "Nos es peti ma nos vole cambia Europa," el ia dise, descrivente la elejes como "la comensa de un eda nova contra la migra".

En Espania, la partito sosialiste renante ia vinse clar, ganiante 32,8% de votas e 20 sejas. La partito Vox de la destra estrema ia prende sola 6,2% de votas e tre sejas, finite a la loca sinco.

En Elas, la ministro xef Alexis Tsipras ia recomenda un eleje nasional temprana, pos cuando la partito conservaliste Democratia Nova ia gania 33,5% de votas contra sola 20% per sua propre partito Syriza.

Sitadanes de la Uni European ia vade per vota con cuantia notable plu alta ca a la ves presedente, en 2014, cuando min ca 43% de la votores posible ia partisipa. La cuantia de votores en Magiar e Polsca ia deveni plu ca la duple de lo a acel ves, e en Danmarc on ia ateni 63%, un cuantia recordo.

Analistes atribui la partisipa grande a fatores diversa, incluinte la asende de partitos popliste e la consensia cresente sur la crise de clima.

2019-05-26

On averti iudis deutx contra porta publica la cipa

La comisionor de la governa deutx sur antisemitisme ia recomenda ce iudis evita porta la cipa en locas publica.

Felix Klein ia averti contra la porta de esta xapeta en alga partes de la pais, par causa de un crese notable de la cuantia de ofendes antiiudiste. El ia ajunta ce sua opina sur la tema ia cambia.

La statistica ofisial mostra ce la governa deutx ia rejistra 1646 crimines de odia contra iudis en 2018. Esta es plu par 10% ca en la anio presedente.

Ance la cuantia de atacas fisical contra iudis en Deutxland ia crese en la mesma periodo. 62 avenis violente ia es rejistrada, contrastada con 37 en 2017.

Katarina Barley, ministro de justia, ia comenta ce la aumenta de crimines antisemita es "vergoniosa per nosa pais".

Klein ia sujesta ce "la sutrae de inibis e la brutia" de la sosia moderna es cisa la causa de esta crese. El ia dise ce la interede, medias sosial e "atacas constante contra nosa cultur de recorda" pote es fatores contribuinte.

El ia recomenda ance ce polisiores, enseniores e avocatos debe reseta instruis per clari "lo cual es permeteda e lo cual no" en pertine a antisemitisme.

Organizas iudi ia averti ce un crese de la popularia de grupos estrema destriste nuri aora la antisemitisme e la odia de otra minorias tra Europa.

De 2017, Alternativa per Deutxland es la partito oposante xef en acel pais, e lo ave credes estrema destriste. Lo oposa la migra a Deutxland, ma lo nega ce sua credes es antisemita.

An tal, alga comentas fada par sua politicistes, incluinte sur la Olocausto, ia provoca critica par organizas iudi e otra politicistes.

2019-05-25

Theresa May resinia sin reali Brexit

Presidente Emmanuel Macron de Frans ia recomenda "un clari rapida" sur Brexit pos la resinia de Theresa May, ministro xef de la Rena Unida. El ia asentua la nesesa de "manteni la funsiona lisa de la Uni European".

May resinia pos tre atentas nonsudesosa de fa ce la parlamento aseta sua Acorda de Retira, negosiada con la UE en novembre. Macron ia junta se a otra xefes de la Uni European ci ia loda la "coraje" de May.

La Comision European ia dise ce lo va labora con la ministro xef seguente, ma ce lo no va cambia la Acorda.

Intervisada ante la resinia, Jean-Claude Juncker, presidente de la Comision, ia demanda: "Como un otra person va pote ateni lo cual el no ia pote?"

En la pasada, David Cameron, ministro xef presedente de la Rena Unida, ia disputa con Juncker la bujeta de la UE e otra temas. En 2016, el ia fa un referendo sur membria de la Uni, recomendante ce la pais resta como membro. Ma la popla ia deside parti.

Sur acel vota, Juncker ia comenta: "Si on dise a la popla tra 40 o 45 anios 'nos parteni, ma no vera – nos es europeanes tempora e nos no gusta esta europeanes permanente', alora on no debe es surprendeda si la popla segue sloganes simple cuando on demanda ce los vota en un referendo."

El ia aseta ance ce la UE ia "fali" par no adota "la disposa nesesada". "Asteni no es un disposa," el ia esplica.

Angela Merkel, canselor deutx, ia dise ce sua pais va continua labora en dirije a un Brexit "ordinada", ajuntante ce sua governa "va continua fa cada atenta per serti ce on ave un bon asosia con Britan".

2019-05-24

Modi grasia votores barati pos un vinse vasta

Narendra Modi, ministro xef de Barat, ia grasia la popla de sua pais ci ia dona a el sinco plu anios de la posto, pos un vinse inondante en la vota jeneral.

"Tota de nos desira un Barat nova. Me desira inclina mea testa e dise grasias," el ia dise en un parla a suportores de sua Partito Bharatiya Janata (Popla Barati).

On previde ce la partito va ave sirca 300 de la 543 sejas de parlamento, e probable lo ia reseta un proportio plu grande de la votas ca en la elejes de 2014.

La alia xef oposante, gidada par la partito Congresa de Rahul Gandhi, ia aseta sua defeta. On espeta ce Congresa va gania min ca 60 sejas.

La vota ia es jeneral regardada como un referendo sur la politica nasionaliste indu de Modi. El ia fa sua vinse an con un crese de nonemplea, un teme de un retrosede economial, e un redui de produi industrial.

Un partito o alia nesesa a la min 272 sejas per oteni un majoria en la Salon Basa, o Lok Sabha, cual ave 543 membros.

Plu ca 600 milion persones ia vota en un prosede enorme de ses semanas, envolvente sete rondas de vota.

2019-05-23

Xasa de elefantes es no plu proibida en Botsuana

Botsuana ia sutrae un proibi contra xasa de elefantes, indicante un tensa cresente entre umanas e la bestias, cual destrui recolies a veses.

Oposores de la proibi, instituida en 2014, dise ce la restrinje ia causa problemes per cultivores minor e per los ci ia benefica de xasa en la pasada.

Botsuana ave sirca 130 mil elefantes, la popla la plu grande de mundo.

La deside va provoca probable un reata coler de conservores de natur, ci crede ce lo es un caso de politica. Lo va dana cisa ance la reputa internasional de Botsuana per conserva, e va afeta sua revenu de turisme. Sola la mina de diamantes furni un fonte plu grande de revenu stranjer a la pais.

En junio pasada, presidente Mokgweetsi Masisi ia crea un comite per resenia la proibi poneda par sua presedor Ian Khama en 2014. En febrero, la comite ia recomenda denove la permete de xasa.

En un declara, la Ministreria de la Ambiente, Conserva de Recursos Natural e Turisme ia dise: "La cuantia e niveles alta de desacorda entre umanas e elefantes e la efeto resultante a la susta ia es cresente. Lo pare ce predores ia aumenta e ia causa multe dana, car los mata bestias en cuantias grande."

Lo ia ajunta ce lo va serti ce "la reinstitui de xasa es fada en manera ordinada e etical".

Sondas ia mostra ce la "estende" de elefantes – pd: la distantia tra cual los viaja – ia crese. Espertas esplica esta par multe fatores, incluinte la crise de clima.

Elefantes pote es multe destruosa cuando los veni sur cultiverias o pasa tra viletas. Los destrui cultivas de gran e a veses los mata an persones.

La plu de la elefantes de Botsuana abita la rejion norde de la pais, libre traversante fronteras a Namibia, Zambia e Zimbabue.

La sonda la plu resente de la bestias sujesta ce sua cuantia no crese, e, diseda par conservores de natur, la deside intende alti la popularia de la presidente entre votores campanial ante la eleje en otobre.

On ave sirca 415 mil elefantes en Africa, longo la Uni Internasional per Conserva de Natur. La popla ia es multe reduida par xasa nonlegal per ivor.

On ia fa campanias internasional per proibi tota vendes de ivor e preveni tal la xasa nonlegal, e estas ia deveni multe forte. Ma on desacorda ancora sur la modo de maneja poplas grande e destruosa de elefantes cual intrui en viletas umana.

2019-05-22

Tumultas en Indonesia pos la eleje presidental

On ia aresta desuples de protestores en Indonesia, pos asemblas grande contra la reeleje de la presidente Joko Widodo.

Protestas ier en la capital, Jakarta, ia comensa pasosa ma ia deveni violente. Autos ia es ensendeda e petardos ia es lansada a polisiores. La polisiores ia responde con gas lacrimojen per sperde la fola.

On reporta ce ses persones ia mori e 200 otras ia es ferida par la violentia.

La resultas inisial de la eleje ia mostra ce Widodo ia vinse sua oposor de tempo longa, Prabowo Subianto. La comision sur elejes en la pais ia confirma ier ce Widodo ia gania la presidentia, con 55,5% de la votas.

Plu ca 192 milion persones ia pote vota en la elejes jeneral e presidental cual ia aveni a 17 april.

Pos la anunsia de la resulta, miles ia asembla ante la construida de supravide de elejes, suportante Prabowo, ma ia es obligada par la polisia e move a otra locas en Jakarta a pos.

La protestas ia deveni violente en la sera. Plu ca 30 mil polisiores ia es stasionida en Jakarta contra la posible de violentia.

2019-05-21

La mori de Niki Lauda

Niki Lauda, campion de mundo en Formula 1 a tre veses, ia mori con 70 anios.

La om osteraices, un de la persones la plu conoseda en corsa de autos, ia gania la titulo per Ferrari en 1975 e 1977 e per McLaren en 1984.

El es spesial recordada per sua recovre e reveni a corsa pos deveni grave ardeda en un colide en la Premio Grande deutx en 1976.

Lauda, ci ia reseta un transplanta de pulmo en agosto, "ia parti multe pasosa" a lundi, sua familia ia dise.

Pos sua carera como corsor de autos, el ia deveni un entreprenor de airocompania. Plu resente, el ia es un xef nondirijal per la ecipo Mercedes de Formula 1, influosa en la introdui de la corsor Lewis Hamilton, ci ia gania tre torneos de mundo.

La declara par sua familia ia comenta: "Sua atenis unica como atleta e entreprenor es e va resta nonoblidable. Sua zelo nonfatigable per ata, sua francia e sua coraje resta como un model e un norma per tota de nos."

2019-05-20

Un comediste inaugurada como presidente de Ucraina

La comediste ucrainsce Volodymyr Zelensky va deveni formal la presidente nova de sua pais en un rituo oji en la capital Ciiv.

Zelensky, ci ave no esperia political presedente, ia gania un vinse vasta en la eleje en la mense pasada. El ia despone Petro Poroshenko, ci ia ocupa la posto de 2014.

El ia promete ataca la froda e pone un fini a la gera contra rebelores de suporta rusce en la este.

On no sabe cual temas el va presenta en sua parla prima como presidente. La ator pasada de televisa ia fa poca dises publica pos sua vinse a 21 april.

Multe disputas political ia aveni sur la tempo de la inaugura. Zelensky ia desira fa lo a soldi, un dia de lamenta per vitimes de represa en la eda de Stalin. Ma la parlamento ia desacorda e ia vota per la matina de lundi.

Zelensky ia es la stela de Servor de la Popla, un drama satira de multe episodios, en cual sua carater deveni la presidente de Ucraina sin intende. La carater es un ensenior per ci la popla vota cuando sua arenga blasfemante contra la froda sperde virusin en redes sosial.

Per aspira la presidentia vera, Zelensky ia crea un partito political con la mesma nom como la drama. Sua campania ia asentua sua difere de la otra posibles, en loca de cualce ideas concreta de politica. An tal, el ia vinse inondante con plu ca 70% de votas.

Zelensky va fronti alga problemes grave pos ariva en la posto.

La batalia contra la froda profonda en Ucraina ia es un tema major de sua campania. En la mense pasada, sua aidores ia anunsia un projeta per sutrae la imunia de parlamentores contra litiga e per aumenta la vidablia de compras militar.

Ma la defia la plu grande per la xef nova es cisa la gera continuante en la este contra soldatos suportada par Rusia. Ante sua eleje, Zelensky ia dise ce el vole "renovi relatas" con Ucraina este e comensa "un gera potiosa de informa per fini la disputa".

Sirca 13 mil persones ia mori en combate en la rejion pos cuando Rusia ia propri la penisola ucrainsce Crim en 2014.

On ia nota indicas ce Vladimir Putin, presidente de Rusia, va defia la comensor political. Per esemplo, corta pos la eleje, Putin ia fasili la oteni de pasaportos rusce par abitores de la teritorios separadiste de Ucraina este.

En un posta respondente en Facebook, la ecipo de Zelensky ia descrive Rusia como "un stato atacosa cual gera contra Ucraina". Lo ia urje la comunia internasional a furni "un presa diplomata e la presa de punis political".

2019-05-19

Cisa un vota jeneral en Osteraic pos un scandal de froda

La canselor osteraices Sebastian Kurz ia demanda per un vota jeneral pos la resinia de sua viscanselor Heinz-Christian Strache sur un scandal de froda.

La organiza sentriste-destriste de Kurz, la Partito de la Popla, governa con la grupo estrema destriste de Strache, la Partito de Libria de Osteraic.

Strache ia resinia pos la apare de un video secreta filmada, cual pare mostra el en discute sur contratas governal con un investor alegada rusce.

Strache ia culpa alcol per sua atas "como adolesente", disente ce sua condui ia es "stupida e nonfidable", e ce el resinia per evita dana plu la governa.

Alexander Van der Bellen, la presidente de la pais, ia dise ce un vota jeneral es nesesada pos la resinia. El ia parla sur esta con Kurz, e los va discute oji la pasos veninte.

Miles de persones con cartones e banderas ia asembla en fola sur la plaza estra la ofisia de Kurz, esijente la vota.

Kurz ia atenta distanti se de scandales cual ia afeta la Partito de Libria en la pasada, xef los ci ia envolve ofisiores de partito e antisemitisme o razisme. Ma sua oposores political urje el a responde sur la revela la plu resente.

2019-05-18

Un moneta roman per la imperor de du menses

En la contia Cambridgeshire en England este, un moneta roman "noncredable rara", fabricada per onora un imperor maldestinada, ia es trovada en laboras per renovi un via xef.

Lo imaji Ulpio Cornelio Leliano, ci ia rena tra sirca du menses en 269 ec ante deveni matada.

La descovre ia es fada en un escava arceolojial, un parte de un scema per boni un via entre la site Cambridge e la vila Huntingdon.

La moneta mostra Leliano en un corona radiante, e ia es trovada en foso a un cultiveria roman peti. Lo es sola la moneta du de sua spesie cual on ia desentera en England.

Julian Bowsher, un arceolojiste esperta sur monetas, ia comenta: "Imperores roman ia ave un desira grande de fabrica monetas. Leliano ia rena tra sola du menses, cual es apena un tempo sufisinte per la fa. Ce un de esta monetas ia ateni la custas de Britan mostra un capasia notable, e lo es intera probable ce Leliano ia es ja matada cuando esta moneta ia ariva en Cambridgeshire."

La imperor maldestinada ia usurpa la trono e ia governa corta un impero en lo cual es aora Deutxland a Frans. El ia es probable matada par sua propre soldatos.

Dr Steve Sherlock, la arceolojiste xef per la projeta de via, ia dise ce "descovres de esta spesie es noncredable rara".

Un plu moneta nonusual trovada par la escavores veni de la Geras Galo, e ave sola un lado. Lo ia es fabricada en 57 aec par la tribu ambian en la rejion Somme de Frans moderna. Espertas crede ce lo ia es esportada per aida finansia la resiste par celtas brites contra Julio Cesar.

Escavas per la projeta ia descovre ance la restas de un mamute lanosa de la eda glasial, e atestas de la prepara de bir en sirca 400 aec. Lo ia desentera ance henjes (monumentos sirculo preistorial), abitadas de la eda de fero, fornones roman, tre viletas anglosason, e un vileta peti medieval.

2019-05-17

Fanes esije un rescrive de saison 8 de Jua de Tronos

En la drama televisada Jua de Tronos, inverno ia ariva, ma sua saison final encontra un reseta jelin entre fanes.

Plu ca un dui de milion persons nonfelis ia suscrive un solisita enlinia per urje HBO, la compania cual crea la serie, a refa la saison oto en modo nova.

La saison la plu resente de la serie internasional popular, fundida en libros par George RR Martin, ia fronti un bombarda de critica enlinia. Regardores deludeda ia es ofendeda par cambias a la strutur naral de la drama e par la destina final de carateres amada.

La solisita a change.org, instituida pos la transmete de la episodio anteultima en esta semana, esije an un rescrive completa "con scrivores capas".

Lo opina ce la scrivores David Benioff e DB Weiss "ia mostra ce los es lamentable noncapas". En la parolas de la solisita, la scrivores ave "no materia de fonte per suporta se", referente a la libros nonfinida en cual la saison oto es laxe fundida.

Car la libro veninte par Martin, La ventas de inverno, es ancora un obra en construi, la drama televisada debe fini en modo diferente.

Suscrivores de la solisita ia lasa comentas ce la saison final "pare fretada", "ia desrepeta intera la autor" e ia pone oto anios de developa de carateres "a la baldon".

Par causa de la custa reportada de cada episodio, estimada como $15 milion, lo es nonprobable ce HBO va sede a la esijes. E un cuantia recordo de 18,4 milion persones ia regarda la episodio anteultima.

Lo ia sempre probable ce la fini va es controversa, como Benioff e Weiss mesma ia confesa. Benioff ia dise: "Un bon nara no es un bon nara si on ave un mal fini. Natural, nos es ansiosa."

2019-05-16

Dises nonsaja sur laborores forsada en la pasada

La eritor de un compania deutx de biscotas ia demanda per pardona pos dise ce la compania "ia fa no cosa erante" en sua usa de labora forsada en la rena nazi.

Verena Bahlsen, ci ave 25 anios, ia es acusada de es nonsabosa sur istoria, e ia compania ia distanti se de sua comentas. Ma pos la reata, el ia confesa ce sua dises no ia conveni.

La compania Bahlsen, cual fabrica biscotas Choco Leibniz, ia emplea sirca 200 laborores forsada entre 1943 e 1945, de ci la plu ia es femes de Ucraina, alora ocupada par la nazis.

La controversa ia comensa en la semana pasada, cuando Sra Bahlsen ia informa delegadas a un confere mercatiste: "Me es un capitaliste. Me posese un cuatri de Bahlsen, esta es eselente. Me vole compra un iate de vela e tal cosas."

An si la regardores ia aplaudi riente con la eritor, alga usores de redes sosial ia acusa ce sua bromas sur sua ricia es nonsensosa en relata a la esplota pasada de laborores forsada par la compania.

Demandada sur la critica en un intervisa a pos, Bahlsen ia responde: "Acel ia es ante mea eda, e nos ia paia esata tan multe a la laborores forsada como a la laborores deutx, e nos ia trata bon los." El ia ajunta ce la compania debe senti no culpablia.

Esta comentas ia fa no plu ca profondi la controversa.

Bahlsen ia demanda aora per pardona, disente ce sua parla ia es nonatendente. En un declara ier, el ia dise: "No cosa es plu distante de mea mente ca lejeri la sosialisme nasional o sua efetos."

El ia confesa ance ce el reconose ce el debe aprende plu sur la istoria de la compania.

2019-05-15

La subasta de un depinta par Monet per un custa recordo

Un depinta par Claude Monet ia es comprada per $110,7 milion, un recordo nova de mundo per un obra par la artiste franses.

Monet ia completi la depinta de olio en 1890 como un parte de sua serie Meules ("montones [de feno]"), cual representa la vive campanial prosima a sua casa en la rejion Normandia.

Esta es ance la ves prima cuando un depinta impresiste ia es vendeda per plu ca $100 milion.

La plu resente, lo ia es subastada en 1986, per sola $2,5 milion. Asta alora, lo ia es poseseda par un familia tra cuasi un sentenio. La familia ia compra la obra direta de la vendor de la artiste.

Un declara par la subasteria Sotheby's ia dise ce la depinta es aora la obra nove en la lista de la plu custosas subastada a cualce tempo.

On reporta ce la compror ia suprapasa sinco otra ofrores a la vende en York Nova. Sotheby's no ia nomi la posesor nova.

La serie Meules par Monet conteni 25 depintas, de cual la majoria pende en galerias de arte tra la mundo. Esta es un de sola cuatro de sua obras cual on ia subasta en la sentenio presente.

A ante, la depinta par Monet la plu custosa ia es Nymphéas en fleur ("nimfeas florinte"), cual on ia vende per $84,7 milion en maio 2018.

2019-05-14

$2m de compensa per canser causada per erbiside

Un juria en California, SUA, ia dona plu ca du mil milion dolares ci ia dise ce la erbiside Roundup ia causa sua canser.

Esta es la ves tre cuando Bayer, un compania farmasial deutx, ia es comandada a paia un compensa en relata a sua erbiside de glifosato.

La juria ia deside ce la compania ia condui nonatendente par no averti sur la riscas asosiada con la produida.

Bayer ia nega la alegas, insistente ce Roundup es secur per usa. La compania ia oteni la produida en la anio pasada, como parte de sua compra de sua competor Monsanto per 66 mil mion dolares.

Ier, un juria en Oakland ia judi ce Bayer es culpable per la limfoma reseteda par la acusores Alva e Alberta Pilliod.

Avocatos per la duple, ci es en sua desenio oto, ia descrive la deside de compensa como "notable". "La juria mesma ia vide documentos interna de la compania cual ia demostra ce, de la dia prima, Monsanto ia es nunca interesada par descovre esce Roundup es secur."

La juria ia asinia bilion dolares de compensa puninte a cada de la acusores, e ance 55 milion dolares de compensa direta.

En un declara, Bayer ia dise ce lo es deludeda par la judi e va apela. Lo ia descrive la deside par la juria como "esedente e nonjustable", ajuntante ce e Alva e Alberta Pilliod ave istorias de maladias cual es fatores conoseda de risca per tal limfomas.

La compania insiste ce desenios de studias ia mostra ce glifosato e Roundup es secur per usa umana.

Glifosato ia es developada par Monsanto en la SUA en la desenio de 1970, e ia deveni un de la ingredientes la plu comun en erbisides tra la mundo.

Ma Bayer fronti aora plu ca 13 400 litigas en la SUA sur la risca alegada de canser en relata a Roundup.

En marto, un juria en San Francisco ia dona 80 milion dolares a un otra om de California, judinte ce Roundup ia causa sua canser. E en agosto pasada, un plu om californian ia reseta 289 milion dolares cuando un juria ia fa la mesma deside.

2019-05-13

Un aidor de la Pape restora la eletrica en un refujeria

Un cardinal ci fa atas carital per Pape Fransisco ia restora la eletrica per sentos de persones en un construida en Roma, par desende en un duto de manteni e opera un comutador.

Cardinal Konrad Krajewski ia dise ce el ia ata "desperante", car la ocupores de la imobila, poseseda par la governa, ia pasa un semana sin eletrica e sin acua calda.

Ativistes usa la construida per refuja persones sin casa. Lo conteni plu ca 400 persones, incluinte cuasi 100 enfantes.

La furnor de eletrica ia descomuta la furni par causa de un deta de €300 mil. On crede ce la deta ia cumula en la anios pos cuando la ativistes ia comensa usa la construida vacua, en 2013.

Matteo Salvini, la ministro visxef popliste de Italia, ia dise ce el espeta aora ce la aida papal va paia la faturas tarda.

Ier, Krajewski ia descrive como el ia trepa a su en un duto de manteni e ia sutrae selos covrente un comutador, per pote recomuta la eletrica a la construida.

"Me ia interveni personal en la note pasada per rejunta la mesuradores," el ia esplica. "Lo ia es un jesti desperante. On ia ave plu ca 400 persones sin eletrica, con familias, enfantes, sin an la posible de funsiona la friadores." On reporta ce la cardinal ia ajunta: "Me no ia fa lo car me ia es enebriada."

La construida sur Via de Santa Croce furni no sola refuja, ma conteni oji ance spasios de labora, incluinte un microbireria e un boteca de carpenta.

2019-05-12

300 iaces mori trapida en neva en Barat

A la min 300 iaces ia mori de famia prosima a la frontera barati con Xina, pos deveni trapida par un cade grande de neva.

La corpos ia es trovada en Sikkim, un state norde-este, a venerdi.

La iaces ia deveni trapida en desembre. On ia atenta usa un elicotor per cade comedas a los, ma la mal clima ia preveni esta.

Iaces esiste ja en la rejion tra miles de anios. Los es usada per sua lete e carne, e per transporta benes.

An si entre 10 e 15 iaces mori comun en cada anio, la cuantia en esta anio es la plu alta rejistrada.

On labora aora per ateni asta 50 iaces ancora trapida en la rejion.

La posesores de la bestias mor va reseta un compensa de 30 mil rupis per iac, asta la masima de tre iaces per familia.

2019-05-11

Un barco de refujadas inversa se prosima a Tunis

A la min 65 migrores ia mori cuando sua barco ia inversa se en la Mar Mediteraneo, prosima a la costa de Tunis. 16 persones ia es salvada.

La barco ia parti de Zuwara en Libia a jovedi e ia encontra problemes entre ondas forte.

Statisticas de la departe de la Nasiones Unida sur refujadas mostra ce sirca 164 persones ia mori en via de Libia e Europa en la cuatro menses prima de esta anio.

On crede ce la aveni presente es un de la ruinas de barco la plu matante en la anio asta aora.

La survivores ia es traeda a la costa par la marina tunisi, e los espeta la permete de desembarca. Un person ia es ospitalida per trata medical.

La marina ia envia un barcon direta cuando lo ia es informada sur la aveni. Lo ia encontra un barco de pexa cual ia es coliente la survivores.

On comprende ce la pasajores ia veni de Africa susaharan.

2019-05-10

La traversa de la Mar Atlantica en un baril

Un aventuror franses de 72 anios ia ariva sur la isola caribe Martinic, pos traversa la Mar Atlantica en un capsula orania simil a un baril.

Jean-Jacques Savin ia comensa sua viaja en la tarda de desembre, de El Hierro en la Isolas Canario. El ia usa no plu ca la corentes de mar per propulsa sua baril tra la Atlantica.

El ia anunsia la susede de sua viaja a 27 april, cuando el ia entra a la Mar Caribe pos 122 dias a mar. La viaja ia traversa plu ca 4500 cilometres.

Como Savin ia esplica en un posta a Facebook, inisial un tancador nederlandes de petrolio ia colie el e la baril en acuas caribe, traente los a Sint Eustatius, un isola nederlandes pico.

Pos alga dias ala, un barco franses de tira ia transporta el a Martinic, un departe ultramar de Frans, ier. "Lo ia es un viaja deletante ma ance alga riscosa," el ia comenta pos ariva.

La paracador militar pasada ia spende plu ca cuatro menses en la baril, cual ave 3m de longia e 2,10m de largia. Lo inclui un leteta, un cosina e spasio per furnis, e ave en la solo un fenetreta tra cual el ia pote regarda pexes pasante.

La capsula ia es construida per resiste ondas e atacas posible par orcas. Un panel solal ia es usada per jenera eletrica per comunica e jeolocali.

Savin ia come reservas de comeda criosecida, e ance pexes fresca caturada e furnis ofreda par barcones cual el ia pasa. La costa de la viaja ia es xef colieda par finansia coletiva.

Cuando el ia parti en desembre, Savin ia broma ce el desira multe ariva a un isola franses como Martinic o Guadelupe. Viajante, la aventuror ia scrive un libro sur la esperia, cual el intende publici plu tarda en esta anio.

2019-05-09

La prisoni de la furor prima de banco en Svalbard

Un om rusce ci ia fa la fura prima de banco en Svalbard, un arcipelago norsce en la artica distante, ia es condenada a 14 menses en prison.

Maxim Popov, ci ave 29 anios, ia fura 70 mil kroner (US$ 8000) de la banco la plu norde de mundo en la vila Longyearbyen en desembre.

La polisia dise ce el ia vade a Svalvard per mata se, ma ia cambia sua deside pos ariva ala. Alora el ia proposa sua propre aresta per evita revade a Rusia. Lo no es clar perce el no ia desira revade ala.

La investigor xef de polisia en Svalbard ia dise ce Popov ia es condenada par causa de sua condui menasante con un arma, no sua fura de la banco. La om ia atenta atrae atende a se.

On ia aresta el prosima a la banco sur la isola Spitsbergen pos la fura, e tota la mone ia es reganiada. No indica esiste de un scema per parti de la isola, do on ave poca vias, lias de barco, o volas.

Documentos de corte afirma ce Popov ia veni a Svalbard, a 1000 cilometres de la Polo Norde, pos leje enlinia ce on pote fasil oteni ala un fusil. Fusiles es vendeda en Svalbard per proteje contra ursos blanca.

Criminalia es estrema rara en Svalbard, e la polisia dise ce Popov es la person prima ci ia fura ala la banco. Min ca 3000 persones abita en Longyearbyen, un vila de mina de carbon, do la temperatur en inverno pote desende a su -40°C.

Popov ia es litigada e va es prisonida sur la tera xef de Noria, car Svalbard ave no prison.

2019-05-08

Un bomba a un santeria major en Pacistan

A la min sinco persones ia es matada en un esplode estra un santeria sufi major en la site Lahore en Pacistan. On teme ce multe es ferida, incluinte alga polisiores.

La esplode ia pare es dirijeda contra un veculo de polisia. Lo ia aveni prosima a Data Darbar, un de la santerias muslim la plu vea en Asia sude.

Asta aora, no organiza ia dise ce lo ia reali la ataca, cual ia aveni cuando la majoria muslim en Pacistan onora la mense santa Ramadan.

Un opera de securia continua en la rejion, con multe polisiores a la loca de la esplode.

La ministro xef Imran Khan ia denunsia forte la ataca, e ia urje autoriosas a furni aida medical tan bon como posible a la persones ferida.

La santeria Data Darbar es locada en la parte vea de Lahore, la site du de la plu grandes en Pacistan. Lo es visitada par sentos de miles de persones en cada anio.

Sufisme es un forma de misticisme cual esiste tra la mundo muslim, incluinte e sunis e xias. Sua seguores en Pacistan ia es atacada par combatosas en la pasada.

En 2010, desuples de persones ia es matada par du bombas umana a Data Darbar. Pos la mata de 141 persones en un ataca contra un scola en Peshawar en 2014, Pacistan ia atenta responde sever a estremistes.

Ma an si la securia es aora plu bon, la pais ave ancora un problem de organizas militariste. En 2016, a la min 72 persones ia mori en Lahore en un bombi contra cristianes a la soldi de pascua.

2019-05-07

Neva nonespetada a un festa en Frans

A un rev franses, on ia debe trata sirca tredes persones per ipotermia pos un cade nonespetada de neva.

Selebrores a Teknival, un festa de musica tecno en la rejion Creuse, ia deveni esposada a un mal clima cuando la temperatur ia desende a -3°C.

Aprosima des mil persones ia es asemblada a la culmina de un colina de posese militar, cuando lo ia comensa neva multe.

Laborores de la Crus Roja ia trata la plu de la afetadas a la loca mesma, ma on ia debe prende du persones a ospital.

Los ia distribui ance 500 telones de survive, e la organizores de la festa ia caldi un tenda. Ma ja en la posmedia de soldi, la plu de la partisipores ia parti: diseda par jornalistes local, sola 2500 de la des mil persones orijinal ia resta.

On reporta ce la rev no ia es ofisial permeteda, e ce la militar franses ia rejistra un cexa a pos.

Esta ia es la anio 26 de Teknival. En la anio pasada, sua organizores ia es acusada par conservores ce los ia turba un zona natural e ia disturba avias abitante la rejion.

2019-05-06

Un reporta revela la crise silente de la perde de natur

Un reporta multe condenante sur la state de la natur va es oji publicida en Paris. La Evalua Global par la Nasiones Unida va asentua la efeto turbante cual umanas fa a la mundo natural.

Lo va dise ce spesies deveni perdeda con rapidia la plu alta de istoria, xef causada par usas cambiante de tera. Atas rapida es nesesada a la nivel political per evita un desastre ecolojial.

La Plataforma Intergovernal sur Biodiversia e Servis Ecosistemal ia labora tra la tre anios pasada sur sua reporta de 1800 pajes. En la semana pasada, la autores xef ia encontra representores governal de plu ca 130 paises en Paris per deside la contenida de un resoma multe plu corta.

La studia va sulini cuanto umanas depende de la mundo natural, e per comedas, e per acua limpa, e per asorbe la diosido de carbono cual cambia la clima.

On predise ce la reporta va mostra, en detalia sombre, como umanas ia crase la natur en la 50 anios pasada, e la avenis probable en la desenios veninte si nos no reali cambias major.

Lo va analise la efetos de cambias de la usa de tera a la natur. La sutrae de forestas per cultiva, nurida par consumas plu grande de produidas de animal, ia forsa multe spesies nativa a via de sua abitadas antica. La suprapexa ia redui grave la reservas de pexes en la plu partes de la mundo.

La reporta va averti ce la rapidia de perde va aumenta probable en la desenios veninte, riscante la estingui de cuantias vasta de spesies.

Parlante a la abri de la consenta en Paris, François de Rugy, la ministro franses de ecolojia, ia compara la perde de biodiversia con la dana causada par la cambia de clima. Nonsimil a la alti de temperatur, sur cual la consensia publica ia esperia ja un aumenta enorme, el ia descrive la perde lenta de la natur como "un crise plu silente".

Ante la publici, 600 campaniores de 50 paises per la conserva de natur ia suscrive un letera publica, inisiada par la Funda Mundal de Natur. La letera, cual apare en jornales major tra la mundo, urje respondes political.

"On ave ancora tempo per proteje lo cual resta e per comensa restora la natur," la letera dise. "Ma per fa esta, nos debe cambia radisal nosa modo de vive, incluinte como nos usa enerjia per dirije nosa sosias, crese nosa comedas e maneja nosa dejetadas. E afin esta aveni, nos nesesa atas desidente e aspirante de la xefes de la mundo."

2019-05-05

Spadas es sededa en Srilanca pos la bombis a pascua

Autoriosas en Srilanca urje la popla a sede cualce spadas e coteles grande, entre consernas alta sur securia pos la atacas matante en la soldi de pascua. La polisia ia clari ce on no solisita coteles usada per atas legal.

On ia saisi ja sentos de armas pos la atacas a 21 april. Plu ca 250 persones ia es matada par bombas umana coordinada, cual ia ojeti eglesas e oteles lusosa.

En ajunta a armas, la polisia ia urje ce cadun ci posese "uniformas de polisia o de camofla militar" sede los a sua polisieria la plu prosima a saturdi o soldi. On no ia confirma esce la polisia va amnestia los ci sede sua armas.

Investigas continua sur la bombis. La presidente srilanca Maithripala Sirisena ia dise ier ce entre 25 e 30 persones liada a la bombis es ancora libre. "Nos ia identifia ja tota membros ativa de la grupo, e lo pertine aora a aresta los," el ia dise, ajuntante ce on ave "ancora no informa ce esta suspetadas es bombas umana".

El ia dise ce el ia crede la grupo Daex (cual nomi se la Stato Islamiste) cuando los ia dise ce los ia scemi la atacas. "Lo es cristalin clar, car pos la atacas la organiza SI ia fa un anunsia reclamante la reali de la bombis."

La autoriosas en la pais ia pone la culpa de la esplodes a du grupos islamiste local e poca conoseda a ante, sur ci los suspeta ce los ave lias internasional. Sirisena ia dise ce departes de securia de oto paises aida Srilanca con la investiga.

El ia comenta ance ce el crede ce la fortes de securia de la pais va "elimina terorisme" e restora stablia ante la elejes presidental, cual va aveni ante la fini de la anio, disente ce on no pote pospone la elejes.

On ia aresta ja desuples de suspetadas pos la atacas a pascua. La bombis ia rompe la pas relativa cual ia esiste en la nasion de pos la fini de la gera interna a un desenio ante aora. La majoria de la matadas ia es srilanca, ma multe sitadanes stranjer ia es ance entre la vitimes.

2019-05-04

Un avion fini en un rio pos atera

Un avion de pasajores ia lisca de sur un atereria en la stato Florida en la SUA, fininte en un rio, pos atera en un tempesta de lampos en la sera tarda de ier.

Nun de la 143 persones en la Boeing 737 ia es grave ferida, ma a la min 20 ia es tratada per feris minor.

La avion nonscemida, operada par Miami Air International, ia vola de la Baia Guantanamo en Cuba a un base militar en la site Jacksonville.

Pasajores dise ce lo ia atera torpe en la tempesta e ia patini a la Rio San Juan prosima.

Un pasajor ia descrive la momento cuando la avion ia lisca de la atereria como "asustante":

"Leteral, la avion ia colpa la tera e ia rebondi. Lo ia es clar ce la pilote no ave la controla completa de la avion, e lo ia rebondi denove. Nos ia es en la acua. Nos no ia pote sabe do nos trova nos, esce en un rio o un mar."

El ia ajunta ce el ia ole la gotea de carburante a en la rio.

2019-05-03

La avocato jeneral de la SUA es acusada de menti

Nancy Pelosi, presidente de la Salon Basa de la Congresa SUA, ia acusa la avocato jeneral William Barr de menti a la Congresa.

El ia fa sua comenta a la dia pos cuando Barr ia atesta a un comite de la Salon Alta sur un reporta par Robert Mueller sur alegas de interfere rusce en 2016.

Barr ia es interogada sur sua deside de desculpa presidente Donald Trump sur impedi la justia. El ia refusa atesta ier a un comite gidada par membros de la Partito Democrata, creante un posible de judi ce el ia desrepeta la Congresa.

Barr es la ofisior legal xef en la Statos Unida.

Pelosi ia dise ier: "El ia menti a la Congresa. E si cualce otra person ta fa esta, on ta regarda lo como un crimin. No person es ultra la lege."

El ia fa sua acusa car Barr ia dise ce el conose no cexa par Mueller sur la resoma de sua reporta en cuatro pajes par Barr. Ma Mueller ia scrive un letera a Barr, espresante ce "contesto" manca de la resoma.

La departe de justia ia defende Barr pos la acusas par Pelosi. Republicistes ia condena ance la comenta, descrivente lo como "un dise ofendente".

Barr ia debe veni denova ante la comite per plu responde a plu demandas, ma el no ia apare.

En un reata plu bonumorosa, congresor Steve Cohen ia trae un caxa de carne de gal fritada e un sculta de un gal a acel consenta de la comite, lasante los en la seja vacua de Barr, con refere a la usa idiomal de "chicken" (gal) per dise "coarde".

2019-05-02

La re de Tai sposi sua gardacorpo

La re de Tai ia sposi la visxef de sua ecipo de securia personal, donante a el la titulo de rea.

La anunsia nonespetada ia es fada ante la comensa de la rituos complicada per coroni la re a saturdi, cuando sua posto va es santida.

Re Maha Vajiralongkorn, ci ave 66 anios, ia deveni la monarca constitual pos la mori de sua padre en 2016. El ia es sposida e divorsada a tre veses pasada, e ave sete enfantes.

Un declara formal ia dise ce la re "ia deside leva Jeneral Suthida Vajiralongkorn Na Ayudhya, sua sposa real, a Rea Suthida e el va teni la titulo e state real como un parte de la familia real".

Suthida es ja longa la acompanior de Vajiralongkorn, publica videda con el tra multe anios, ma sua relata ia es nunca ofisial reconoseda a ante.

Imajes de la rituo de sposi ia es televisada en la pais en la tarda de ier, mostrante la presentia de otra membros de la familia real e conselores de la palasio. La re ia versa acua santa sur la testa de sua rea, e pos alora la duple ia suscrive un arcivo de sposia.

En 2014, Vajiralongkorn ia asinia Suthida Tidjai, un ospitor pasada de avion per Thai Airways, como la viscomandor de sua ecipo de gardacorpos. El ia leva el a la posto de un jeneral de la armada en desembre 2016.

La re presedente, Bhumibol Adulyadej, ia rena tra 70 anios, deveninte la monarca la plu longa renante de mundo cuando el ia mori.

2019-05-01

Un situa perilosa pos du siclones en Mosambic

Mosambic nesesa aida urjente per maneja la seguentes pos la destrui causada par Siclon Kenneth. La organiza Save the Children ("salva la enfantes") dise ce la situa es estrema, vives es menasada, e plu mone es nesesada.

La Nasiones Unida ia dona $13 milion a Mosambic e Comori per comedas, acua e repara de infrastrutur.

38 persones en Mosambic norde es reportada como mor par causa de la siclon, ma ofisiores dise ce esta cuantia va deveni plu grande.

La tempesta ia colpa la nasion en Africa sude en la semana pasada, con ventas de 220 cilometres per ora, destruinte viletas e danante miles de otra casas.

Lo ia perde sua fortia, ma un pluve deluvial ia bate ancora la rejion ier, con predises de an plu. La pluve ia impedi atentas de furni aida par aira.

On predise ce esta sistem climal va cade un cuantia de pluve duple de lo cadeda par Siclon Idai, cual ia aveni en la mense pasada, lasante plu ca 900 persones mor tra la sude de Mozambic, Malaui e Zimbabue.

La risca de inonda ia es aumentada car Siclon Kenneth ia aveni a la fini de la saison pluvosa, cuando rios ia es ja alta. Pemba, ia capital rejional de la stato Cabo Delgado, ia esperia plu ca du metres de pluve e inondas.

O pais ("La pais"), un pajeria privata manejada, ia reporta ce sinco persones ia mori cuando un parte de un dejeteria ia colasa sur casas en Pemba en la sera de soldi. Lo no es clar esce on ia inclui esta moris en la soma ofisial.

Sirca 200 mil persones es perilida sola en Pemba. La situa en Macomia e Quissanga, vilas norde, es estrema, e on ave ansia ance per la isola distante Ibo. Ma la atentas de ateni acel locas no ia susede bon.