2019-01-31

Un maladia misteriosa a la ambasada canadian en Cuba

Canada va redui la cuantia de sua empleadas a sua ambasada en Cuba par asta un dui, car un maladia misteriosa ia afeta un plu person ala.

Esaminas medical, pos la reapare de sintomes nonusual en novembre, ia revela la canadian des-cuatro infetada. Empleadas esuan es ance afetada par la maladia, cual causa marea, nausea e un difisil de consentra.

Canada ia rejeta la idea ce un “ataca sonal” es la causa. Esta teoria ia es proposada par la ministreria de esternas SUA en la anio pasada.

Un declara publicida par la departe de esternas canadian ia dise ce “empleadas, sposes e dependentes” a la ambasada es entre la afetadas, e ce tota reseta tratas medical continuante. An si la ambasada va resta abrida, alga servis pote es reduida.

La cuantia de empleadas va cade de sirca 16 a cisa 8.

Canada is retira familias diplomata de Havana en april cuando alga minores ia comensa mostra sintomes. Plu ca milion canadianes visita Cuba en cada anio, ma on ave no indicas ce los es en peril.

Cuba ia nega sua envolve a multe veses. Canada dise ce lo ia labora en “coopera prosima” con Havana de cuando esta problem de sania ia apare prima en 2017.

Diferente de la SUA, Canada ia rompe nunca sua relatas diplomata con Cuba pos la revolui de 1959.

Sintomes simil ia afeta empleadas de ambasadas esuan en Xina. En la anio pasada, un avisa de la ministreria de esternas ia recomenda ce on vijila per sintomes fisical o fenomenos oiada o sensada ma nonesplicada.”

Ma alga siensistes ia proposa un otra teoria – la ruido de insetos. Sua studia sujesta ce un sona rejistrada par empleadas esuan en Cuba es vera no plu ca la canta de Anurogryllus celerinictus, ance nomida la grilo de coda corta de la Indias.

2019-01-30

La SUA trema de fria en un vortis polal

Meteorolojistes averti ce la SUA va esperia un jela nonusual fria en esta semana. La ventas la plu estrema, causada par un vortis polal – un bol jirante de aira fria – risca basi la temperatur asta -53°C.

Ofisiores en la stato Iowa ia avisa ce on debe “evita respira profonda, e minimi la parla” si on vade a estra. On previde ce a la min 55 milion persones va trova se en un temperatur su zero.

Un state de crise es declarada en Wisconsin, Michigan e Illinois (statos norde sentral) e ance en Alabama e Mississippi, statos sude cual es usual plu temperada.

On averti ce ulseras jelal es posible en mera des minutos su la sielo en un tal temperatur estrema.

La temperatur la plu fria es prevideda per la periodo entre martedi e jovedi, e meteorolojistes predise ce Chicago va es plu fria ca Antartica. Esta site, la plu grande en Illinois, risca un basa de -33°C, ma con ventas jelante cual va dona un senti plu simil a -46°C.

En Wisconsin on previde 60cm de neva, e 30cm en Illinois. Ance Alabama e Georgia, un plu stato sude, espeta neva.

Presidente Donald Trump, ci ia demanda esce umanas ia causa la cambia de clima, ia envia un tuita sur la situa. “Cual de enferno aveni a la caldi global?” el ia dise. “Per favore, reveni rapida – nos nesesa tu!”

Un de la departes meterolojial de la governa SUA ia responde rapida per refuta acel asurdia. Tota la siensistes major de la mundo dise ce la cambia de clima es xef inisiada par umanas e ce lo pote crea invernos plu dur.

On atribui esta periodo fria a un caldi subita supra la Polo Norde, causada par aira calda veninte de Magrib en desembre. Esta sistem climal ia divide la vortis polal, cual ia vaga a pos a sude.

La polisia en Chicago dise ce persones deveni aora rubada de sua jacones su menasa de fusil. Furores ataca los ci porta jacones de la marca Canada Goose, cual costa asta $1100.

Plu ca mil volas a o de la SUA ia es canselada ier, incluinte alga a Atlanta, Georgia, do la max Super Bowl va aveni a soldi.

En alga sites, incluinte en Milwaukee, Wisconsin, on ia abri desuples de “sentros de caldi”, refujerias per persones sin casa.

2019-01-29

Boves malada pasa tra un mataderia polsce

La polisia polsce investiga un mataderia sur cual on suspeta ce lo contrabanda boves malada, pos un filma secreta.

La ofisior veterinar xef de Polsca dise ce la filma, difusada en la pais par la canal TVN24, revela “ativia nonlegal, car la matas ia es esecutada con intende a note per evita supravide ofisial”.

La filma mostra boves vidable malada, e laborores de mataderia ci talia la corpos mor. On no sabe a do la carne ia es enviada.

Esta revela es posible grave per la Uni European, car un scandal de carne de cavalo en 2013 ia esposa la complicadia de vendes de carne en la mercato interna de Europa. La scandal ia causa retiras de produidas, en cuando ofisiores ia labora per trasa carne suspetada.

Un declara par la ofisior veterinar dise ce sua esaminores e la polisia ia es avisada sur “matas suspetada nonlegal” a un mataderia prosima a Ostrów Mazowiecka en la norde-este de Polsca.

En la note de 14–15 janero, los ia trova ala oto boves malada, e “on ia fa un deside de mata la animales sin retarda, per fini sua sufri. En la esamina, on ia identifia la posesores de la animales, como ance un vendor de animales ci ia transporta boves nonconveninte per transporta, e empleadas de la mataderia ci ia es encargada sur la bonstate de animales.”

La declara ia segue a poca dias pos la difusa televisada, cual mostra boves, tro malada per sta, tirada de camiones a en la mataderia.

On ia comanda la esaminores a visita otra mataderias en la rejion, e la polisia atenta identifia cualce comprores o vendores de carne de animales malada, cual no conveni per vende.

Eurostat, la departe UE sur statistica, dise ce Polsca es la produor sete de carne de bove en la UE, longo datos furnida de mataderias. En 2017, lo ia produi 558 500 tones de esta carne e sua produidas.

Polsca produi cuasi du milion boves per mata en cada anio. An tal, la carne de bove representa sola 2% de la consuma de carne en la pais.

2019-01-28

Un bande tai repenti pos porta un simbol nazi

Un de la bandes pop la plu popular en Tai ia espresa sua repenti pos la porta de un camiseta con suastica nazi par un de sua membros en un pratica televisada.

Fotos de Pichayapa “Namsai” Natha, cantor de BNK48, vestida en la camisa ia sperde virusin en la fini de semana, provocante un espresa de “xoca e angusa” par la ambasada israeli.

La dirijor xef de BNK48 e ia cantor, ci ave 19 anios, ia encontra la ambasador israeli e ia demanda per pardona. Multe tais dise ce los no conose la istoria de la nazis en la Gera Mundal Du.

Pos fotos de la pratica, Smadar Shapira, visambasador de Israel a Tai, ia comenta: “La presenta de simboles nazi par la cantor de la bande ia turba miliones de persones tra la mundo, de ci sua relatadas ia es matada par la nazis.”

Enlinia, on ia critica la bande, ma alga fanes ia clari ce ance los no ia comprende la sinifia de simboles nazi.

En un declara formal, BNK48 ia dise ce la “veste cual ia inclui un primida nonconveninte” ia “causa angusa e turba a persones afetada par la aveni pasada sur la crimin contra umanas tra la mundo intera”. Lo ia dise ce la bande va “fa tota posible per serti ce un tal situa va aveni nunca denova”.

Entretempo, Namsai ia espresa sua repenti a un conserta a saturdi, e, en un declara, ia dise ance ce el va labora forte per deveni plu bon informada.

La bande ia acorda partisipa en un seminar sur la Olocausto per aumenta la consensia, Shapira ia dise en Twitter.

2019-01-27

Trudeau desemplea la ambasador canadian a Xina

Justin Trudeau, ministro xef de Canada, ia desemplea la ambasador de sua pais a Xina, John McCallum.

Esta segue comentas controversa cual McCallum ia fa sur un caso de estradi, envolvente un dirijor major de Huawei, la corpora jigante de telecomunica xines.

La deteni de Meng Wanzhou, solisitada par la SUA, ia coleri Xina, asidinte sua relata con Canada. La SUA acusa Meng, la ofisior finansial xef de Huawei, de sircoveni punis contra Iran. El e Huawei nega la alega.

En un declara formal, Trudeau ia dise: “A la sera pasada, me ia solisita e aseta la resinia de John McCallum como ambasador de Canada a Xina.”

El ia dise ce la diplomata veteran ia servi canadianes con onora e esele en multe postos governal, e ia grasia el e sua familia per sua labora.

McCallum ia causa un controversa a martedi cuando el ia dise publica ce la solisita SUA per estradi Meng ia es grave problemosa.

A la dia seguente, el ia fa un declara disente ce el ia “malespresa se” e regretente ce sua comentas ia crea “confusa”. Ma a venerdi, el ia dise ce lo ta es “eselente per Canada” si la SUA ta abandona la solisita.

La caso de Meng ia provoca un aumenta de tensa diplomata entre Canada e Xina. Plu temprana en esta mense, un om canadian ia es condenada a mori en Xina cuando un corte ia judi ce un prisoni de 15 anios es tro pardonosa.

Du otra canadianes ia es arestada pos la deteni de Meng. Alga analistes sur Xina crede ce la arestas ia es un responde entrevenjante contra la deteni, ma ofisiores xines ia nega esta.

Entretempo, on previde ce avocatos SUA va rejistra un solisita formal de estradi con Canada pos tempo corta. La ministreria de esternas xines ia recomenda ce ofisiores SUA retira la comanda de aresta e freni se de avansa con la solisita de estradi.

Un corte canadian ia libri Meng con garantia en la mense pasada.

2019-01-26

La colasa de un parario brasilera

Sirca 200 persones manca pos la colasa de un parario a un mineria de minerales ferosa en la sude-este de Brasil.

La rompe ia relasa un mar de mugre fangosa cual ia covre la caferia do sentos de laborores ia es comente.

Ecipos salvante ia usa escavadores a la loca, cual es prosima a la vila Brumadinho en la stato Minas Gerais. Romeu Zema, governor de la state, ia dise ce lo es nonprobable ce on va trova persones vivente.

Asta aora, on ia confirma la mori de nove persones. La causa de la colasa no es clar.

La parario es poseseda par Vale, la compania minante la plu grande de la pais. Lo ia es construida en 1976 con otras en la rejion, e ia es usada per teni tera escavada de la mineria.

Lo ia ave un volum de 12 milion metres cubo, ma on ancora no sabe cuanto dejetada ia es relasada en la asidente. La loca ia es ja nonativa tra tre anios, Vale ia dise.

La colasa segue a sola tre anios pos la creve de un parario en Mariana, en la mesma state, cual ia mata 19 persones. On regarda acel como la desastre ambiental la plu grave en la istoria de Brasil.

2019-01-25

La orolojo a du minutos ante la fini de la mundo

En 2019, la Orolojo de Apocalise – un simbol cual representa la probablia de la fini de la mundo – resta a sua punto la plu prosima a medianote en sua istoria, par causa de la “nonormalia nova” cual la mundo fronti entre tal riscas como gera nucleal e clima cambiante.

La orolojo intende averti sur desastres menasante. Lo ia es creada par la organiza Bulletin of the Atomic Scientists (BAS, “Revisteta de la Siensistes Atomal”) en 1947.

On ia anunsia ier sua indica per esta anio: lo resta a la mesma punto como en 2018. BAS ia averti ce “nos normali un mundo multe perilosa”.

Medianote en la orolojo simboli un desastre cual ta fini la mundo. Esta es sola la anio tre en cual la orolojo ia veni tan prosima a acel punto. Lo ia es prima atenida en 1953 pos la proba de bombas de idrojen estrema destruosa par la SUA e la Uni Soviet.

En la anunsia en Washington a jovedi, representores de BAS ia dise ce la posa mantenida de la orolojo es “novas vera mal”.

Rachel Bronson, presidente e dirijor xef de BAS, ia dise: “An si noncambiada pos 2018, on debe no regarda esta indica como un sinia de stablia, ma como un averti brusca a gidores e sitadanes tra la mundo. Esta nonormalia nova es simple tro volatil e tro perilosa per aseta.”

Jerry Brown, governor pasada de California ci servi como presidente dirijal de BAS, ia averti simil: “Nos jua un roleta rusce con la mundo umana.”

En la anunsia, la organiza ia reconose bonis en relatas entre la SUA e Corea Norde, ma ia critica ance tal developas como emetes aumentada de carbono par alga nasiones e fendes diplomata cual continua tra la mundo.

La grupo sita armas nucleal e la cambia de clima como la du menasas major corente per umanas, e averti ce la riscas deveni “malida” par la “usa grandida de gera par informas per sumina la democratia sirca la mundo”.

Herb Lin, un erudita ci rexerca sur siberpolitica e sibersecuria a la Universia de Stanford, ia parla sur la periles spesial de “novas falsa” a la anunsia ier. “Un mundo asustante es un en cual furia e fantasia sustitui per veria,” el ia nota.

A sua inisia, la ago de la orolojo ia indica la minuto sete ante medianote, e on ia move lo a 23 veses a pos.

Longo BAS, la desinia ia es consetida par la artiste Martyl Langsdorf. El ia desira imaji oservas pasionosa cual el ia oia de siensistes sur la efetos de la armas atomal prima de mundo, cual los ia aida developa.

Oji, la comite – composada de fisicistes e siensistes ambiental de multe partes de la mundo – deside ajustas a la orolojo en consulta con sua comite de sponsores, cual inclui lauridas Nobel.

2019-01-24

Malaisia eleje un re nova

Malaisia ia eleje Abdullah, Sultan de Pahang, como sua re nova pos la renunsia subita de la monarca presedente.

Sultan Muhammad 5 de Kelantan ia resinia en janero pos sola du anios a la trono, un recordo en la istoria malaisian.

Malaisia ave un monarcia constitual de spesie rara, en cual la posto pasa longo un sirculo de nove renores erital a un ves en cada anio sinco. La rol de la re es xef ritual, e el no partisipa en la governa dial.

On previde ce la Sultan de Pahang, un stato grande en la penisola malaisian, va es inaugurada como re a 31 janero. An, el ia deveni inaugurada como Sultan de Pahang mera en la plu temprana de esta mense.

Muhammad 5, ci ia ave 47 anios cuando el ia deveni la re, ia es conoseda per sua zelo per sportes estrema como motorisme multiterenal, spara, e cores de distantia longa.

En novembre de la anio pasada, el ia dise ce el va vacanse per razonas medical. Ma plu tarda en acel mense, fotos ia comensa sirculi en redes sosial cual pare mostra el en la capital rusce, sposinte un fem ci ia gania la titulo Senioreta Moscva en la pasada.

On ia dona no razona per sua renunsia.

2019-01-23

Xicas joven pasea secreta a casa en temperatur sibirsce

En Sibir, on ia trova du xicas de sinco anios ci ia sorti de sua enfanteria en temperatur intensa fria, sin ce sua enseniores vide los.

La du, ci ia vole surprende sua jenitores, ia sufri ulseras jelal e ipotermia. Los ia pasea a casa en un de la dias la plu fria de la anio: la temperatur ia es -45°C.

Un camera ia filma los cuando los ia sorti. Un de los ia teni un animal de pelux e no ia porta gantos. El es aora en ospital en Yakutsk, la capital rejional, con ulseras a tre ditos.

Sua madre, Evdokia Kutukova, ia dise: “Tre de sua ditos ia jela dur. El plora. La enfantes es ancora xocada.”

El ia descovre ce sua fia Lena ia sorti en la vileta Namtsy cuando el ia vade a la enfanteria per reprende el, e ia vide ce sua jacon es asente.

El ia averti la empleadas, e alora on ia trova ce la ami la plu prosima de sua fia, ci la reportas no nomi, manca ance. Sua jenitores no ia sabe do el es.

Kutukova ia dise ce la avo de la familia ia telefoni alora per dise ce Lena veni de ariva a casa, solitar, larmante e jelada.

Sua sposo ia dise ce un pasor nonconoseda ia dona un xarpe a la xica, cual ia aida el. “Como fria lo ia es sin gantos es difisil per imajina, e con un jueta en mano!”

La otra xica ia perde sua via en la oscuria de la vileta, e on ia trova el pos un plu ora. El ia refuja se en un casa prosima.

“Grasias a Dio, el ia deside entra a la casa de un otra person,” Kutukova ia comenta. “Lo es bon ce el no ia deveni ulserada, mera estrema fria.”

La xica ia sufri de ipotermia, ma ia vade a casa pos un esamina par medicistes.

La du xicas ia sorti nunca solitar de la enfanteria a ante. On ia inisia un investiga per descovre como la situa ia aveni.

2019-01-22

Un focon de du barcones prosima a Crim

A la min des-un persones ia mori en un focon cual ia envolve du barcones de carga tanzanian en la Mar Negra, prosima a la Streta Kerch.

Salvores rusce atenta ateni marores ci ia salta a estra. Des-cuatro persones es salvada asta aora, ma on ia vide tre plu persones lutante en la acua, e on teme ce probable los ia afoca.

Un de la barcones ia es un tancador de gas. La focon ia segue un esplode cual ia ensende la otra barcon. La un ia es en prosede de move carburante a la otra, en acuas neutra.

En la site Kerch en Crim, on prepara aora reseta la vitimes.

La nomes de la du barcones, Venice e Maestro, apare en un lista de la tesoreria SUA como ojetos posible per punis sur transporta de petrolio a Suria.

La Streta Kerch es un foca de tensa entre Rusia e Ucraina. En novembre, gardores de la frontera rusce ia saisi tre barcones de la marina ucrainsce, prosima a esta pasaje cual lia la Mar Negra e la Mar Azov.

Un corte en Rusia ia estende par tre menses la deteni de 24 marinores ucrainsce alora caturada. On acusa los de traversa nonlegal a la teritorio rusce.

Ucraina ia condena la responde par Rusia, negante ce sua barcones ia viole la leges de naviga en la rejion. La streta es prosima a la penisola Crim de Ucraina, cual Rusia ia propri en 2014.

2019-01-21

Un redui de crese en la economia xines

La economia de Xina crese a sua rapidia la plu lenta de pos 1990, provocante temes sur la efeto a la economia global.

Lo ia estende a 6,6% en 2018, longo statisticas ofisial publicida oji. En la tre menses asta desembre, sua economia ia crese par 6,4% de lo a un anio plu temprana, un taso reduida pos la 6,5% de la cuatri presedente.

La datos segue la prevides, ma los asentua la ansia resente sur la crese lentinte en la economia du de la plu grandes de mundo. Ance la gera comersial con la SUA ajunta a la vista sombre.

La statistica nova mostra la taso de crese la plu debil pos la crise global de finansia.

An si oservores de Xina recomenda cautia a tema de la declara ofisial de la produi interna bruta de la pais, on regarda la datos como un indicador usosa de la curso de crese.

La crese jeneral lenti ja tra alga anios, ma ansia sur la rapidia de la lenti en Xina ia deveni plu alta en menses resente, e alga companias ia sona un alarma sur esta mercato importante.

Plu temprana en esta mense, Apple ia averti ce la debilia en Xina va afeta sua vendes, e fabricores de autos e otra companias ia vosi sur la efeto de la gera comersial.

La governa de Xina presa per move a via de un crese gidada par esporta, e per depende plu de la consuma interna.

Politicistes en la pais ia aumenta sua labora en menses resente per suporta la economia. Los ia atenta aumenta la compras par rapidi projetas de construi, redui alga impostas, e basi la cuantia de mone cual bancos debe reserva.

2019-01-20

Un alpaca en un oculeria

Un alpaca ia confonde e deleta abitores de un vila peti franses par vaga en un boteca de oculos.

La bestia pelosa ia pasa ala un dui de ora, calma regardante la lentes en la vila Hennebont en Bres.

On ia crede inisial ce lo ia evade un sirco prosima, ma la autoriosas ia trova la posesor privata ci ia veni per reprende la animal caprisosa pos un tempo corta.

Empleadas de Les Opticiens Mutualistes en la Rue Nationale ia vide prima la alpaca cuando lo ia vaga a estra en la tarda de matina de venerdi.

“Nos ia vide ce el pasea prosima a la boteca,” un empleada ia clari. “El ia para ante la portes automata, cual ia abri, e el ia entra multe cuieta. El ia es tota no atacosa – el ia segue mera sua desira.”

Ante telefoni la autoriosas, la cuatro empleadas ia clui la boteca, temente ce la animal va core a la stradas e causa un asidente.

Pos min ca tredes minutos, la posesor – ci ia vole resta anonim – ia ariva per prende la animal. Lo pare ce lo ia vaga de un imobila privata prosima.

La jornal Ouest France ia dona la reporta prima de la aveni, indicante ce la animal ia es un liama. Ma otra jornales ia dise a pos ce en fato lo ia es un alpaca.

Liamas ave oreas longa con forma de banana. Alpacas es min grande e plu pelosa ca sua corespondentes de la Andes.

2019-01-19

Espania es xocada par matas en violentia de jenero

On crede aora ce un om espaniol, condenada de mata sua sposa, ia omiside ance sua avocato de defende, con ci el ia fa un relata de ama, ante mata se mesma a venerdi.

José Javier Salvador Calvo, de 50 anios, ia salta de un ponte en la este de Espania cuando la polisia ia fronti el.

La caso ia xoca la pais, provocante debates sur leges de violentia familial.

En reata al la moris, la ministro xef Pedro Sánchez ia promete continua batalia violentia contra femes. On regarda sua tuita como un replica a Vox, un partito estrema destriste e influosa en Andalusia, un rejion sude. Vox vole para la aida legal a femes bateda par omes, disente ce lo favore la femes en modo nonjusta.

Salvador Calvo ia mata sua sposa, Patricia Maurel Conté, ci ia ave 29 anios, par fusil en maio 2003 en Aragon, un rejion en la norde-este de Espania.

Librida con restrinjes en 2017, la mator ia comensa un relata de ama con Rebeca Santamalia Cáncer, la avocato ci ia defende el a sua litiga.

La polisia ia trova la avocato matada par cotel a la casa de Salvador Calvo en Zaragoza, la capital de Aragon, poca pos 04:00 a la matina de ier, pos cuando sua sposo ia reporta el como mancante. El ia ave 47 anios.

Sirca medianote, la omisidor suspetada ia salta ja de un ponte en Teruel, un vila a 150 cilometres a la sude, cuando un patrulia de polisia ia vide el.

Carmen Sánchez, representor de governa local, ia comenta a reportores ce la avocato ia es un vitim de “violentia de jenero”.

En Twitter, la ministro xef ia dise ce cuatro femes ia es omisideda en Espania en dias resente, e ce tota persones debe labora per para esta situa xocante.

En la anio pasada en Espania, 47 femes ia es omisideda, cuatro en Aragon, en crimines de violentia de jenero.

La mata de Laura Luelmo, un ensenior con 26 anios, en Andalusia en desembre ia causa un onda de repulsa en la pais. On ia trova sua corpo, partal nuda, prosima a un vileta pos sinco dias de xerca.

A pos, Bernardo Montoya, un om local abitante ia confesa mata el pos atenta viole el. Montoya, ci ave 50 anios, ia spende ja tempo en prison per la omiside de un fem en 1995.

2019-01-18

Sensadores en spasio per defende contra misiles

Un reporta de la Pentagon dise ce la SUA debe rexerca tecnolojias nova, per esemplo un strato de sensadores en spasio, per trova e destrui misiles prosiminte.

La resenia dise ce la pais debe renovi sua program de defende contra misiles per combate menasas stranjer. Lo inclui un projeta per studia un sistem posible de sensadores orbital per intersepi e para misiles.

“La mundo cambia e nos va cambia multe plu rapida,” presidente Trump ia dise cuando el ia desveli la reporta. En la pasada, el ia comanda la militar a crea un ramo ses de se per serti “la domina american en spasio”.

Parlante ante la publici de la reporta, un ofisior anonim ia dise ce la spasio es “la clave” per defende contra misiles. Ma el ia asentua ce la militar fa no plu ca esamina esce un tal sistem pote funsiona, e ce no desides ia es fada.

Esta segue projetas ja anunsiada per construi plu sistemes de defende sur la tera en Alaska.

La proposas per armas en la reporta nova refleta ideas developada par la SUA en la desenio de 1980. Nonformal conoseda como “Star Wars” como la filma famosa, la Scema de Defende Stratejial ia es un scermo intendeda per proteje la pais contra misiles balistical intercontinental.

Presidente Ronald Reagan ia anunsia la conseta en 1983, ma lo ia es ultima abandonada en 1993 pos la fini de la Gera Fria.

2019-01-17

La corpo de un escavor barati trovada en un buco de rata

Sumerjores de la marina barati ia trova la corpo de un laboror ci ia es trapida con 14 otras en un mineria de carbon inondada en Meghalaya, un stato norde-este.

A 13 desembre, la omes ia entra a la poso nonlegal, de la spesie nomida “buco de rata”, e ia deveni trapida cuando acua levante de un rio prosima ia enflue.

Un veculo suacuan ia deteta la corpo a profondia de 48 metres. Lo va es estraeda de la mineria con supravide par dotores.

Sirca 200 salvores ia es enviada a la loca, do los ia atenta sutrae la acua de la mineria.

On ancora no sabe esce la otra escavores vive ancora, ma sola tre elmos ia es trovada ante la descovre de la corpo.

Atentas de salva presedente ia es impedida par un manca de aparatos. Inisial, on ia ave sola du pompas de potia basa per drena la acua.

La mineria de carbon do la laborores es trapida es situada en un distrito distante, e ave 112 metres de profondia.

Esta metodo de mina envolve escava dutos en la tera per crea un buco streta, e lo es perilosa. Laborores, incluinte enfantes, usa scalas de bambu per desende, e asidentes aveni comun.

La metodo ia es proibida en 2014, ma la posesores de la minas ia defia la judi en la Corta Suprema de Barat.

La plu de la escavores nonlegal de Meghalaya ia migra de statos visina per gania mone.

Barat es la nasion tre de la plu grandes cual produi carbon, e carbon furni 60% de la enerjia usada par la pais. Ma la industria es mal regulada. Laborores, ci fronti frecuente situas cual perili la vive, es poca protejeda contra menasas a sua sania.

2019-01-16

La aseja teroriste de un otel en Nairobi

En Cenia, Presidente Uhuru Kenyatta ia dise ce un aseja par militaristes en Nairobi ia fini, e tota la atacores es “eliminada”.

Ier, fusilores ia ataca la compleso de un otel en Nairobi, la capital, matante a la min 14 persones. La compleso conteni un otel e ofisias.

Ofisiores ia anunsia inisial la fini de la aseja a alga oras pos sua comensa, ma on ia oia sparas e esplodes denova en la temprana de esta matina.

Al-Shabab, un grupo militariste con base en Somalia, ia dise ce lo ia reali la ataca. On no sabe cuanto atacores ia es presente.

La ataca ia comensa a sirca 15:00 de ora local, cuando cuatro fusilores ia lansa bombas a veculos en la parce de autos ante entra a la atrio de la otel, do un ia esplode se.

Video de cameras de securia mostra a la min cuatro omes forte armada ci ia entra e comensa spara. On reporta ce persones ia vide la omes visitante la compleso en dias resente.

A 23:00, la secretor de la consilio interna de la governa, Fred Matiang’i, ia dise ce tota la construidas en la compleso ia deveni securida. “La situa es controlada e la pais es secur. Terorisme va vinse nunca nos.”

Ma a mera un ora plu tarda, on ia reporta plu sparas e esplodes de ves a ves en la loca. Plu sparas intensa ia aveni a sirca 07:00.

Fortes de securia ia xerca sistemosa la construida, do laborores asustada ia bloci la portes, con se a interna, ascondente su tables e sejas o en salas de banio.

En la oras temprana, plu ca 100 persones ia es salvada. Sirca tredes es aora tratada en ospitales en Nairobi.

La atacores ia retira se asta la nivel sete de la otel, do on crede ce plu siviles ia asconde se.

La otel DusitD2, de sinco stelas, ave 101 salas. Locada en la suburbe Westlands, a distantia corta de la distrito comersial de la capital, lo ave sua propre banieria e alga restorantes.

Cenia ia esperia alga atacas teroriste en anios resente, xef en rejiones prosima a la frontera somali e en la capital.

Al-Shabab es un grupo militariste e islamiste cual oposa la governa de Somalia e ia fa atacas tra la este de Africa. Cenia parteni a un opera rejional per manteni la pas, cual suporta la governa somali en sua batalia contra la teroristes.

2019-01-15

La canta “Africa” jua en sicle eterna en Africa

La deserto la plu vea de mundo es aora ornada con un de la cantas la plu escutada, “Africa” par la bande Toto.

Max Siedentopf, un artiste namibian, ia prepara un instala audio en la Deserto Namib a la costa sude-ueste de la continente, juante en sicle de tribui a esta clasica de roc suave.

La peso musical de 1982 ia vende plu ca cuatro milion copias, e ia es la canta la plu flueda en 2017, con plu ca 440 milion regardas en YouTube.

Siedentopf, ci ave 27 anios, dise ce sua instala va jua la musica per sempre, con pilas solal “per fa ce Toto va continua per tota la eternia”.

La canta, cual es longa de cuasi sinco minutos, resta popular en la cultur pop de oji. En la interede, lo ia deveni la tema de memes e an pajes intera de Reddit.

“Me ia desira dona la onora la plu alta a la canta e esibi fisical ‘Africa’ en Africa,” la artiste ia esplica. “Alga namibianes ama lo, e alga dise ce lo es probable la instala audio la plu mal de istoria. Me crede ce esta es un loda grande.”

El ia eleje un loca nonrevelada en la 81 cilometres cuadrida de la Deserto Namib per pone ses parladores, liada a un baladador dijital cual conteni sola esta musica.

La deserto esiste ja tra 55 milion anios, e Siedentopf dise ce el espera ce la canta va jua tra 55 milion plu. “La plu partes ia es elejeda per es tan durante como posible, ma me es serta ce, ultima, la ambiente dur de la deserto va devora la instala.”

Asta aora, el dise ce sola la fanes la plu fidosa de Toto va pote trova esta “tesoro” entre la dunas.

2019-01-14

La destina de la monetas de la fonte de Trevi

Un disputa ia comensa entre la maior de Roma e la Eglesa Catolica sur lo cual on debe fa con la monetas de la fonte de Trevi.

En cada anio, on estrae cuasi 1,5 milion euros de la monumento famosa. La mone es tradisional donada a un asosia de carita catolica per aida persones povre.

Ma aora la maior, Virginia Raggi, vole ce on spende la mone per la infrastrutur desintegrante de la site en loca.

La asosia Caritas dise ce persones la plu povre va es afetada par la perde de revenu, e la jornal de la confere de bispos italian ia apare un article despetosa sur la tema en sua numero de saturdi.

Conselores de la site ia aproba la cambia, cual on intende reali en april. An tal, multe italianes en redes sosial demanda aora ce la comite de vila reconsidera la deside.

Raggi ia prende la controla de Roma en 2016 per la Promove Sinco Stelas, cual ia formi un governa nasional aliada en la anio pasada. Sua popularia ia cade car el ia fali trata la difisiles de la site debente.

En otobre, miles de protestores ia asembla estra la ofisia de site per denunsia Raggi a tema de problemes cual inclui dejetadas noncolieda e stradas dolinetosa.

La fonte de Trevi ave cuasi 300 anios e es visitada par miliones de turistes en cada anio.

La tradision de lansa monetas en la fonte ia deveni famosa pos la canta “Tre monetas en la fonte” par Frank Sinatra en la comedia romantica de 1954 con la mesma nom.

La fonte ia deveni ance conoseda pos sua apare en la filma La dolce vita (“La vive dulse”) de 1960, en cual la ator Anita Ekberg ia vada tra la acua en un roba.

2019-01-13

Pompeo es otimiste sur un acorda per proteje curdis

Mike Pompeo, la ministro de internas esuan, ia dise ce el es otimiste ce on pote ateni un acorda con Turcia per proteje combatores curdi en Suria pos la parti de la SUA.

El ia parla en la Amirias Arabi Unida pos un telefoni con sua corespondente turces.

Fortes esuan en Suria norde combate con un militia curdi contra ativistes de Daex. Ma Turcia regarda esta militia, la Unias de Proteje Poplal, como un grupo teroriste e vole elimina lo.

Pompeo visita paises diversa en Asia sude-ueste per atenta calmi aliadas pos la anunsia subita par presidente Trump, en desembre, ce fortes esuan va retira se de Suria.

En la semana pasada, presidente Erdoğan ia rejeta coler la recomenda par John Bolton, la Conselor de Securia Nasional de la SUA, ce on ta proteje la militia curdi. Erdoğan ia descrive tal dises como “nonasetable”.

2019-01-12

Un sumarina istorial deutx emerji a la costa franses

Sur un plaia en la norde de Frans, la ruina de un sumarina deutx de la Gera Mundal Prima reapare gradal pos desenios de es enterada en la arena.

La moves natural de arena a Wissant, prosima a Calais, esposa la restas de la UC-61 cual ia encalia ala en julio 1917. La ecipo ia inonda la barcon e ia abandona lo, e ja en la desenio de 1930 la plu de la sumarina ia es enterada.

Aora lo deveni denova un atrae de turistes, ma la maior local averti ce sua apare va es cisa no plu ca tempora.

De desembre, du partes de la sumarina es vidable a marea basa, a sirca sento metres de la dunas.

Bernard Bracq, la maior de Wissant, ia dise: “La ruina es vidable per tempo corta a cada anio du o tre, dependente de la mareas e la venta cual causa la moves de arena. Ma pos un bon soflon de venta, la ruina va desapare denova.”

An tal, Vincent Schmitt, un gidor local de turistes, crede ce la ventas e mareas va causa la esposa de an plu de la UC-61. “Tota la abitores de Wissant ia sabe ce on ave asi un sumarina, ma la plu de la ruina es covreda par deponeda e es donce nonvidable. Pesos reapare de tempo a tempo, ma esta es la ves prima cuando nos ia descovre tan multe.”

Sumarinas deutx ia ojeti barcones de la Aliadas en la Gera Mundal Prima, afondante sentos de los. Istoristes dise ce la UC-61 ia afonda a la min 11, o par pone bombetas o par xuta torpedos.

En sua viaja final, la sumarina ia parti de Zeebrugge en Beljia, dirijente se a Boulogne-sur-Mer e Le Havre per pone bombetas, cuando lo ia encalia. La 26 ecipores ia sede se a la autoriosas franses.

2019-01-11

Un valis de mone es furada de Robert Mugabe

En Zimbabue, tre persones ia apare en corte, acusada de fura un valis conteninte $150 mil de mone fisical de Robert Mugabe, la presidente desponeda de la pais.

On alega ce la furores suspetada ia spende la mone per autos, casas e animales.

Entre la acusadas es un relatada de la presidente pasada, Constantia Mugabe, sur ci on dise ce el ia posese claves de sua casa campanial en Zvimba, prosima a la capital, Harare. On alega ce esta ia reali la asede.

La otra suspetadas ia es empleada como limpores a la tempo de la fura, cual ia es parente fada entre la prima de desembre e la temprana de janero.

“Johanne Mapurisa ia compra un Toyota Camry e un casa per $20 mil pos la aveni," Teveraishe Zinyemba, avocato acusante, ia informa la corte en la vila Chinhoyi. “Saymore Nhetekwa ia compra ance un Honda e bestias cual ia inclui porcos e boves per un cuantia nonrevelada.”

Robert Mugabe, ci ave aora 94 anios, ia es espulsada de sua posto par la militar de Zimbabue en 2017. Asta alora, el ia ave autoria tra 37 anios, prima como la ministro xef e a pos como la presidente.

Mugabe, ci ia declara famosa ce un pais pote nunca bancaroti, ia es acusada de saborea un vive lusosa en sua preside supra la colasa economial de Zimbabue.

Dolares SUA es ala alta valuada. En teoria, la “biletas obligante” cual bancos furni es egal a la mone SUA – ma en realia los compra multe min.

Pos jubila, Mugabe ia esperia difisiles de pasea e ia pasa alga menses en Singapor per trata medical. Lo no es clar esce el ia es a casa cuando la fura ia aveni.

On ia libri la tre suspetadas con garantia, ma reportas indica ce un person cuatro resta ultra la lege.

2019-01-10

La deteta de radiosiniales de la spasio profonda

Astronomistes ia revela detalias de radioemetes misteriosa cual emerji de un galasia distante e ia es detetada par un telescopio en Canada. On no sabe la natur esata e la orijin de los.

Entre la 13 “radioflaxes rapida” ia es un sinial repetente e multe nonusal, veninte de la mesma fonte con distantia de sirca 1,5 mil milion anios de lus. On ia reporta un tal aveni a sola un ves presedente, detetada par un otra telescopio.

Ingrid Stairs, un astrofisiciste de la Universia de Columbia Brites, ia dise: “Ce on ave un otra fonte sujesta ce on ta pote ave plu. E con plu repetentes e plu fontes disponable per studia, nos va comprende cisa esta rompetestas astronomial – de do los veni e como los es causada.”

La oserveria CHIME, locada en la Vale Okanagan de Columbia Brites, es composada de cuatro antenas semisilindre con longia de 100 metres, cual scane tota la sielo norde a cada dia.

La telescopio ia comensa funsiona sola en la anio pasada, e cuasi sin retarda lo ia deteta des-tre de la radioemetes, incluinte la repetente.

“Nos ia descovre un repetente du, e sua cualias es multe simil a la repetente prima,” Shriharsh Tendulkar de la Universia McGill en Quebec ia comenta. “Esta furni plu informa sur la cualias de repetentes como un colie.”

Radioflaxes rapida es emetes corta e briliante de radioondas, cual pare traversa cuasi un dui de la universo. Asta aora, siensistes ia deteta cuasi 60 nonrepetentes e 2 cual repete. On crede ce cisa mil aveni en la sielo a cada dia.

On ave teorias diversa sur la causa, incluinte un stela de neutron con campo magnetal multe forte e multe rapida jirante; du stelas de neutron cual fusa con lunlotra; e (entre un minoria peti de comentores) alga spesie de veculo spasial estrateran.

2019-01-09

Un fuji a refuja per un fem saudi

Un fem saudi ci ia fuji de sua familia e ia refusa sorti de un otel en Bangkok ia es formal asetada como un refujada legal par la Nasiones Unida.

Rahaf Mohammed Al-Qunun, ci ave 18 anios, ia refusa embarca un avion de Bangkok a Cuait a lundi, e ia resta en sua sala de otel de airoporto pos bloci la porte. El ia teme ce sua familia va mata el per sua renunsia de islam.

La departe de refujadas de la NU ia fa ce Australia considera el per relocali posible.

Sua padre e frate ia ariva en Tai ma el refusa encontra los. Ofisiores de migra en Tai ia dise prima ce el debe revade a Cuait, do sua familia espeta.

Ofisiores en Australia ia sujesta ce los va aseta sua apela per refuja.

Al-Qunun ia comparti desuples de corentis direta sur sua caso en redes sosial, atraente la atende internasional.

Renunsia de islam es punable par mori en Arabia Saudi, e la padre de Al-Qunun es la governor de Al-Sulaimi, un vila en Hail, un provinse norde. Grupos campaniante ia espresa multe ansia.

Un portavose per sua familia ia dise ce la familia no vole comenta e ce los desira sola la securia de la fem joven.

A la matina de ier, Al-Qunun ia retuita sua apela orijinal per refuja, solisitante ce Australia, la SUA, Canada o la Rena Unida aseta el.

On reporta ce un diplomata ia saisi sua pasaporto cuando el ia vola a Tai de Cuait a saturdi, intendente viaja plu a Australia. A martedi, Al-Qunun ia dise ce la pasaporto ia es redonada a el.

2019-01-08

Guatemala espulsa investigores de froda

Guatemala dise ce lo retira se de un comision contra froda, suportada par la Nasiones Unida, cual investiga la presidente de la pais, Jimmy Morales.

Sandra Jovel, ministro de esternas, ia dise ier ce la comite NU ave 24 oras per sorti de Guatemala. El ia ajunta ce Morales va continua la batalia contra froda, ma ce un malcomprende ia aveni sur la investigas de sua ativia.

Elejeda a tre anios ante aora, Morales ia suporta inisial la Comision Internasional Contra Esenta en Guatemala (CICEG), cual ia aida acusores en litigas contra desuples de ofisiores e dirijores major.

An tal, cuando Morales mesma ia deveni la tema de investiga, la presidente ia dise ce el va reesamina la autoria de la comision.

Sua comentas ia es criticada e ia provoca protestas sur strada contra froda ofisial, esijente ce el resinia.

En un consenta con António Guterres, secretor jeneral de la NU, Jovel ia anunsia ce la autoria de CICEG va fini. La CICEG ia es creada par la NU en 2006 e ia es desiniada per forti la usa de leges en la pais.

Guterres ia responde en un declara formal, disente ce el “rejeta forte” la deside, ajuntante ce la governa debe obedi la acorda internasional.

CICEG ia intende acusa Morales sur alegas de noncoeres finansial relatada a sua campania elejal de 2015. Morales ia es un comediste ante deveni presidente en 2016.

La NU ia suporta la recomenda ce on sutrae la esenta de Morales per permete ce on investiga el. Acel recomenda ia segue investigas separada sur membros de sua familia par CICEG.

2019-01-07

Un catedral e mascita nova abri en Qahira

Presidente Abdul Fattah al-Sisi ia inaugura la catedral la plu grande de Misre, en la capital nova (e ancora nonomida) a este de Qahira. La inaugura ia aveni a la dia pos la esplode de un bomba prosima a un eglesa copta.

La Catedral de Natal, nova construida, ia esperia sua misa prima su securia forte a soldi, la dia ante la natal copta.

A saturdi, un polisior ia mori en atenta desativi un aparato esplodente cual ia es ascondeda sur un teto en Site Nasr, ance a este de Qahira.

Coptas composa sirca 10% de la popla de Misre, de ci la plu es muslim. Multe coptas dise ce la governa es prejudosa contra los e no ofre protejes sufisinte.

Sisi, ci declara se como un defendor de cristianes contra estremistes, ia informa adorores ce la abri simultan de la catedral e la mascita major Al-Fattah Al-Aleem porta un mesaje de unia.

“Nos es un e nos va resta un,” Sisi ia dise en abri la catedral, referente a cristianes e muslimes misri.

Pape Fransisco ia envia sua salutas a Pape Tawadros 2 de Alexandria, la xef de la eglesa coptica, ci ia fa ance un misa de medianote ier.

La mascita, ance nova construida, va pote conteni cuasi duple tan multe persones como la catedral. Ambos es situada en la rejion developada cual va deveni la capital nova de la pais.

2019-01-06

Brasil usa soldatos contra crimin violente

Sirca 300 soldatos ia es enviada a la site Fortaleza en la norde-este de Brasil per combate un crese de violentia criminal. Soldatos va patrulia ala e tra la stato Ceará per atenta para la atacas contra botecas, bancos e buses.

La ministreria de justia ia comanda esta envia spesial pos desuples de atacas en la semana pasada. La atacas protesta contra medias nova e plu sever en prisones local, cual es xef controlada par ganges criminal.

Prisones en la sato ia bloci siniales de telefoneta e ia abandona un politica de grupi prisonidas par la gang a cual los parteni.

Esta segue a poca dias pos la inaugura de presidente Jair Bolsonaro, ci ia es elejeda per sua promete de combate la crimin nonfrenida en la pais.

Videos de securia televisada en Brasil mostra ganges ci ensende gasolinerias. On ia aresta sirca 50 suspetadas sur ci on alega ce los pertine a la violentia.

Brasil ave plu ca 700 mil persones en prison, la numero tre de la cuantias la plu alta de mundo, pos la SUA e Xina.

Bolsonaro, ci ave 63 anios, ia gania la eleje presidental con marjin grande contra Fernando Haddad de la Partito de Laborores a 28 otobre. On regarda Bolsonaro como un figur profonda dividente, de ci sua comentas raziste, omofobica e misojine ia coleri multe persones.

Ante deveni un politiciste, Bolsonaro ia servi en la militar brasilera, do el ia es un paracador e ia deveni un capitan. El reteni lias prosima a la fortes armada.

2019-01-05

Trump menasa un crise nasional per finansia un muron

Donald Trump, presidente de la SUA, ia dise ce el pote declara un crise nasional per construi un muron de frontera con Mexico sin aproba par Congresa. Esta ia segue un consenta ier con democratas major, ci ia refusa sua demandas per finansia.

Trump reteni sua suporta per un lege cual finansia completa la governa asta cuando el va oteni la finansia per sua muron de frontera.

La governa es aora partal cluida – ja tra du semanas – e Trump ia indica ce el es preparada ce la clui continua tra anios.

Sirca 800 mil laborores federal es nonpaiada de pos 22 desembre.

Aidores de Trump e legores va consenta oji per atenta denova solve la situa.

“Me es multe orgulosa ce me fa lo cual me fa,” la presidente ia comenta. “Me no nomi lo un clui. Me nomi lo la fa de lo cual on debe fa per la benefica e securia de nosa pais.”

Nancy Pelosi, gidor de la Salon Basa, ia dise ce la consenta ier ia es “controversa”, e Chuck Schumer, xef democrata de la Salon Alta, ia dise: “Nos ia informa la presidente ce nos nesesa ce la governa funsiona. El ia resiste.”

A jovedi, democratas, ci ocupa aora la majoria de sejas en la Salon Basa, ia aseta leges de spende per reabri la governa, incluinte 1,3 mil milion dolares de finansia per securia de frontera asta 8 febrero.

Ma la lege no pote reali estra si lo es asetada par la Salon Alta, cual es controlada par republicistes. Sua gidor Mitch McConnell ia dise ce sua partito va suporta no proposa sin suporta par la presidente.

2019-01-04

Un focon crea un sielo apocalisal supra Hobart

En Australia, un focon savaje, ardente en un rejion nonabitada, ia fa ce la sielo deveni orania e negra supra la site Hobart sur la isola Tasmania.

Nubes de fuma ia covre oji la capital de la stato Tasmania, an con ce la site es situada a sirca 100 cilometres a sude-este de la focon.

La arde en la Savajeria Tasmanian, cual es un area de erita mundal, ia provoca avertis de securia per comunias prosima, ma on ia reporta no feris.

La statos sude de Australia ia esperia oji un caldia estrema. En redes sosial, persones ia descrive la sielo de Hobart como “apocalisal” e “menasante”.

La polisia ia dise ce la focon no va ateni Hobart, ma la fuma pote perili persones con problemes respiral. Plu prosima a la flamas, on ia recomenda ce abitores de alga distritos atende forte la avertis e reali scemas de survive.

La focon ia destrui plu ca 8000 ectares pos sua comensa en la semana pasada.

On ia reporta oji focones savaje ance sur la tera xef de Australia. En Melbourne, la site du de la plu grandes de la pais, la temperatur ia esede 42°C.

Plu caldia es prevideda ante la comensa de la torneo Abrida Australian a 14 janero.

2019-01-03

Xina pone un robot a la lado distante de la Luna

Xina dise ce lo ia susede atera un veculo spasial a la lado distante de la Luna, en la atenta prima de esta en istoria.

A 02:26 de ora universal, la sonda robotal Chang’e-4 ia toca la surfas en la Basin Polo Sude / Aitken.

Lo porta strumentos per analise la jeolojia de la rejion nonesplorada e per fa esperimentas biolojial.

Multe misiones a la Luna ia aveni en anios resente, ma cuasi tota ia fa no plu ca orbita, pasa o colide. La visita la plu resente par umanas ia es Apollo 17 en 1972.

Chang’e-4 ia envia ja sua imajes prima de la surfas. Car un lia direta de comunica es nonposible, tota imajes e datos nesesa rebondi de un satelite separada cual envia los a la Tera.

La aterador, cual no es capas de move, porta du cameras: un esperimenta sur radia, de construi deutx, e un spetrometre cual va fa oservas radioastronomial de frecuentia basa.

Siensistes crede ce la lado distante de la Luna pote es un loca eselente per radioastronomia, car lo es scermida contra la ruido de la Tera. La spetrometre va esamina esta idea.

La sonda porta ance un contenador de tre cilogrames con semes de patata e arabis, e ance ovos de eruga de seda, per fa studias biolojial, en un esperimenta desiniada par 28 universias xines.

2019-01-02

Femes crea un presedente par entra a un templo indu

Du femes barati en sua desenio sinco ia ata sin presidente par entra a un santeria indu major en Kerala, un stato sude, pos menses de protestas contra la asede par femes.

La templo Sabarimala ia es istorial cluida per femes de “eda menstrual”, definida como entre 10 e 50 anios.

La Corte Suprema ia cansela acel proibi, ma protestores ia ataca femes e ia preveni ce los entra a la santeria an tal.

Bindu Ammini, ci ave 42 anios, e Kanaka Durga, ci ave 44, ia entra a la santeria sirca la lus prima. Los ia atenta entra ance a 24 desembre, ma ia es obligada a reveni par protestores.

Ofisiores de la templo, ci dise ce la femes ia “viole” la templo, ia clui la santeria per un ora per fa “rituos de puri”.

La ministro xef de Kerala ia declara ce la entra par la femes a la templo es un momento monumental. Sua governa suporta la judi de la corte. El ia dise ance ce la deside, par la manejores de la templo, de clui pos la visita de la femes ia viole acel judi.

La plu de templos indu permete ce femes entra si los no es menstruinte, ma la templo Sabarimala es nonusual: lo ia es un de poca cual ia despermete la entra par cualce fem con eda en un estende larga.

Lo es situada a la culmina de un colina presipe cual, en cada anio, miliones de adorores mas asende, comun con pedes nuda, per visita la santeria. Un de la modos de entra a la templo es par asende 18 grados santa. Longo la pajeria de la templo, esta es un ata santa cual no peregrinor pote fa sin juna sever per 41 dias.

Ammini ia dise ce la du femes no ia asende la grados car la loca ia es multe folida e los ia teme ce on va ataca los. El ia ajunta ce los ia es acompaniada par polisiores en vestes comun.

La templo es sola abrida per periodos corta en la anio. An si la proibi ia es canselada en setembre, no fem ia pote entra a la templo asta aora par causa de la protestas grande.

2019-01-01

Un furgon colide con paseores en Tokyo

En Japan, un furgon peti ia colide con paseores selebrante la anio nova sur un de la stradas la plu famosa de Tokyo.

La om ci ia gida la veculo ia fuji, ma plu tarda la polisia ia aresta el per omiside atentada.

Nove persones ia es ferida – un a grado grave – par la ataca en la distrito modosa Harajuku, corta pos medianote. La strada, cual ia es cluida per veculos, ia es plen de persones paseante a un santeria per preas per la anio nova.

La gidor de la furgon ia es identifiada como Kazuhiro Kusakabe, ci ave 21 anios.

La polisia ia dise ce la om ia declara inisial ce el ia fa un ata teroriste, ma plu tarda el ia dise ce sua ata ia pertine a esecutas. Lo no es clar esce el ia refere a un esecuta spesifada o plu jeneral a la puni de mori.

Investigores ia trova un tance de cerosen en la furgon, e on alega ce la atacor ia intende arde sua veculo.

La strada Takeshita en la rejion Shibuya es un area popular de botecas, conoseda per un cultur joven con modas nonusual. Lo atrae ance multe turistes internasional.