2015-10-31

Un focon matante a un loca de note romanian

Dudes-sete persones – xef adolesentes e jovenes – ia es matada cuando un focon ia ensende a un loca de note en Bucuresti, la capital de Romania.

La focon ia saisi la club Colectiv a la note pasada, causante un sorti panicada. On trata 155 persones en ospitales.

Lo pare ce la ensende ia es inisiada par focos artal cual on ia presenta a interna de la construida.

La pirotecnicales ia es un parte de un presenta par un bande de roc metal.

Atestores ia dise ce un sintil sur la stadio ia ensende alga de la decora de polistiren. Un colona e la sofito ia comensa flami, un esplode ia aveni, con fuma densa.

Un atestor ia descrive la sena: "Persones ia desmaia, los ia desmaia en la fuma. Lo ia es un caos completa: persones ia es crasente la un la otra su pede."

Lo es posible ce asta 400 persones ia es en la club, cual ia ospita un conserta de roc sin custa.

La club es situada en un vea fabriceria convertida, con du portes peti de sorti, e inisial on ia pote abri sola un de estas. Un otra atestor ia dise ce la visitores asustada ia debe rompe la porte du per evade la focon.

Multe de los en ospital sufri pos enspira fuma o ave scaldas sever. On reporta ce 25 persones, cisa plu, es en un state grave a la Ospital Munisipal.

Empleadas a un otra ospital ia indica ce la plu de la persones ci los ia trata es adolesentes con entre 14 e 16 anios.

La ministro xef, Victor Ponta, ia dise ce el corti se visita a Mexico per revade direta a Bucuresti.

Klaus Iohannis, la presidente romanian, ia scrive a se paje de Facebook ce el es "profonda lamentosa sur la avenis trajedial cual ia ariva a esta sera en la sentro de la site". El ia ajunta: "Lo es un dia multe triste per tota de nos, per nos nasion e personal per me."

2015-10-30

Ban Ki-moon recomenda flexablia en discutes sur Suria

Ban Ki-moon, la secretor jeneral de la Nasiones Unida, ia recomenda "flexablia" a discutes en Wien entre la paises cual suporta lados oposante en la gera interna de Suria.

El ia sujesta forte ce la sinco partisipantes xef – la SUA, Rusia, Iran, Arabia Saudi, e Turcia – debe sustitui "gida global" per "perspetivas nasional".

Esta discutes, en Osteraic, es la prima tales cual inclui Iran, cual – con Rusia – suporta la presidente suri, Bashar al-Assad. La SUA, Turcia, Arabia Saudi, e otra nasiones arabi de la Mar de Persia, insiste ce Assad no pote ave un rol permanente en la futur de la pais.

La gera de cuatro anios en Suria, cual ia comensa con un revolta contra Assad, ia lasa 250 mil persones mor e ia obliga un dui de la popla de la pais – o 11 milion persones – a parti de se casas.

Rusia e Iran ia aumenta resente se envolve militar en la gera, suportante la fidosas de Assad.

A la dia ante la discutes, Ban ia comenta: "Plu on segue se perspetivas nasional propre, plu la persones va sufri, e la mundo intera va sufri. Como me dise sempre, on trova no solve militar."

La ministro irani de esternas, Mohammad Javad Zarif, ia dise ce otra potias ia comprende ce no modo esiste de ateni "un solve asetable" de la gera suri, sin la envolve de Tehran.

Ministros de esternas ia fa discutes nonformal en Wien ier, con la discutes major en la ajenda per oji.

John Kerry, la ministro de esternas de la SUA, ia encontra ier Zarif, e ance la ministro rusce de esternas, Sergei Lavrov, e la ministros de esternas de Arabia Saudi e Turcia. Ministros de esternas de Deuxtland, Frans, la Rena Unida, Misre, Lubnan, e la Uni European ia confirma ance ce los va es presente a la consenta, e on previde ance la presentia de otra potias de Asia sude-ueste.

Un diplomata ueste ia descrive la discutes en Wien como "embrial", con ce un otra ia dise ce on va susede si mera on preveni ce la lados oposante parti subita en protesta.

2015-10-29

Nepal eleje se presidente fema prima

La parlamento de Nepal ia eleje Bidhya Devi Bhandari, un campanior per diretos de femes, como se presidente fema prima.

El es la person du ci ia emprende esta rol, xef ritual.

Bhandari, ci ave 54 anios, es presente la vispresidente de la Partito Comuniste cual rena la pais.

El ia es la ministro de defende de 2009 a 2011. Como presidente, el ia promete suporta forte la diretos de minorias e de femes en Nepal.

Plu temprana en esta mense, la parlamento de la pais ia eleje se ministro xef nova, KP Sharma Oli.

Bhandari prende la loca de Ram Baran Yadav, ci ia es la presidente prima elejeda de la pais en 2008, pos cuando Nepal ia aboli se monarcia.

La eleje de Bhandari segue corta pos cuando Nepal ia institui se constitui nova en setembre. Esta ia intende stabli la pais, ma ia fini par provoca violentia cual ia mata 40 persones, cisa plu.

La constitui defini la nasion indu majorial como un republica secular, divideda en sete provinses federal.

Ma grupos etnical en Nepal sude desira plu teritorio e diretos per statos federal etnical.

2015-10-28

Un padre e fio criminal es caturada en Australia

En Australia, on ia aresta Gino e Mark Stocco, du criminores fujinte ci es padre e fio, pos un xerca estendeda.

La omes ia es arestada en Dunedoo, en la area sentral ueste de Cimri Sude Nova.

On ia xerca los en relata con alga crimines violente. Los ia fuji ja tra oto anios.

Un opera grande per catura los ia es inisiada pos cuando los ia xuta, alegada, a polisiores a des dias ante aora.

La polisia dise ce los ia trova un corpo mor en la imobila do los ia aresta la du omes, e los crede ce lo ia es un om de 68 anios ci ia manca de pos la temprana de esta mense. On no ia deside la causa de mori.

A ante, la padre de 58 anios e la fio de 35 ia es condenada de crimines cual inclui ataca, fura, e froda.

On ia comanda ance se aresta sur danas alegada a imobilas, ma la du ia evita la polisia tra anios, sustante se par bricola e par se capasias propre de survive.

On crede ce los ia cambia se placas de veculo e se aspetas propre a plu ca un ves, per evite catura.

No baletas ia es xutada e nun ia es ferida en la aresta.

2015-10-27

Un trematera colpa Afganistan e Pacistan

On aumenta laboras per aida la persones afetada par un trematera ier, de grandia 7,5, cual ia colpa areas distante de Afganistan e Pacistan.

On sabe ce a la min 275 persones ia mori, e asta du mil ia es ferida.

Salvores ia vade a areas montaniosa distante do la efetos de la trema es ancora nonclar. La foca de la trema ia es profonda, reduinte se efeto.

La vitimes ia inclui 12 xicas afgani ci ia es matada en un panica en cuando los ia atenta sorti de se clases de scola.

Multe persones tra la area, temente un trema nova, ia pasa la note en dormi su sielo en temperatur cuasi de jelo.

En un parla televisada, Ashraf Ghani, la presidente de Afganistan, ia recomenda ce abitores en la areas afetada aida en la laboras de salva.

Un ofisior de Badakhshan, un provinse norde-este, ia dise ce salvores no va pote ateni areas montaniosa afetada asta la tarda de oji. Ance, partes de la provinse es saisida par combatores taliban.

La plu de la moris reportada asta aora es en Pacistan norde e la areas tribal norde-ueste. En sola la provinse Khyber Pakhtunkhwa, autoriosas ia informa ce a la min 179 persones ia mori e plu ca 1800 ia es ferida.

La Cresente Roja de Pacistan ia tuita ce se ecipo de responde a desastres es enviada a la areas afetada.

La ministro pacistani de informa ia dise ce la salva de vives es la taxe la plu importante, e ce la labora de salva va continua "sirca la orolojo".

Baata, Iran, e fortias SUA en Afganistan ia ofre se aida, ma asta aora la autoriosas local no ia solisita tal aidas.

La trematera ia es sentrida en la area montaniosa Hindu Cux, a 76 cilometres a sude de Faizabad, en la provinse Badakhshan.

Lo ia es profonda – a plu ca 200 cilometres su la surfas – tal ce la trema a la surfas ia es min ca per un trematera plu alta.

Un serie de otra tremas, de cual on ia mesura tota como 4,0 o plu – ia colpa a ueste de la orijinal en la oras seguente.

Abitores de Kabul e Delhi ia es xocada par la trema, cual ia causa ce persones asustada freta a la stradas.

Construidas en Dushanbe, la capital tadjic, ia es ance danada par la tremas.

La area ave un istoria de tremateras potiosa, causada par la xoca de Barat con Eurasia en dirije a norde. La du placas move la un a la otra con rapidia de 4–5 sentimetres per anio.

En 2005, un trema de grandia 7,6 en la parte pacistani de Caxmir ia lasa plu ca 75 mil persones mor. E en april de esta anio, Nepal ia sufri se trematera la plu sever rejistrada. Lo ia mata 9000 persones e ia dana o destrui sirca 900 mil casas.

2015-10-26

Un asidente de naveta en Hongkong

A la min 124 persones ia es ferida cuando un naveta de rapidia alta, viajante de Macau a Hongkong, ia colpa un ojeto en la acua.

La naveta, portante 174 pasajores e ecipores, ia perde se potia cuando lo ia es prosima a la isola Lantau a sirca 18:00 de ora local, e ia comensa lasa acua a en.

On ia envia barcos de polisia maral per salva la pasajores. Jornalistes local ia reporta ce multe ia ave feris a se membros e fases.

Alga pasajores ia resta sur la barcon, espetante es salvada tra alga oras.

Un pasajor ia descrive la esperia: "La lampas ia estingui subita. Prima, lo ia es caososa, ma alora la pasajores ia susede calmi se pos tempo corta."

A esta matina, sinco persones es ancora en un state estrema grave.

Hongkong ave vias navigable entre la plu ativa de mundo, e la via de Macau es un de la plu populares.

La nivel de securia es alta, ma on ia vide alga asidentes sever en anios resente.

Desuples de persones ia es ferida en novembre 2013 en un aveni simil, cuando un naveta ia colpa un ojeto en la acua.

En otobre 2012, 39 persones ia mori en un xoca entre un barcon de plaser e un naveta de pasajores. On ia condena la capitan de la naveta de mata sin intende.

2015-10-25

Conservistes espera gania un vota polsce

Polsca fa un vota parlamental, en cual la conservistes espera reveni a potia pos oto anios de oposa.

Sondas de opina ante la vota ia indica ce la partito Lege e Justia, gidada par Jarosław Kaczyński, es multe plu popular ca la partito Platforma Sitadanal de la ministro xef, Ewa Kopacz.

Lege e Justia ia regania la presidentia en maio, cuando Andrzej Duda ia es elejeda.

Multe polsces es nonfelis sur se futur, e senti ce paias par la stato es distribuida en modo nonjusta.

La suporta la plu forte per Lege e Justia es en areas campanial e par persones prosima a la Eglesa potiosa catolica de la pais.

Plataforma Sitadanal ia es colpada par malreputa, con ce alga ministros ia es caturada en un scandal de escuta secreta en la anio pasada.

E a venerdi, Monika Zbrojewska, la ministro suordinada de justia, ia es desempleada pos es acusada de gida enebriada un auto.

Ance la crise european de refujadas ia apare como un tema major de debate ante la vota. An si la governa ia acorda aseta 7000 migrores, partitos oposante ia denunsia la idea.

En la semana pasada, on ia critica Kaczyński per sujesta ce migrores pote trae maladias e parasitos a Polsce.

La om de 66 anios no ofre se como aspiror de ministro xef, e ia proposa Beata Szydło, un fem relativa nonconoseda, como la elejeda ofisial per la posto en loca.

An tal, alga oservores crede ce, si Lege e Justia vinse forte, Kaczyński va emprende mesma la posto suprema.

La resulta de la vota va es regardada con interesa en nasiones eurosetica como la Rena Unida.

An si Plataforma Sitadanal xerca relatas prosima con la Uni European, un membro de Lege e Justia ia comenta ce los desira "un UE min burocrata, plu nonperosa cual no xerca un integra political plu profonda".

2015-10-24

Un siclon sever colpa Mexico

Partes de Mexico risca liscas de tera e inondas major pos la ariva de Siclon Patricia, la tempesta la plu forte rejistrada en la Americas.

La tempesta ia ateni la tera en Mexico ueste, traente ventas e pluves destruosa, ma lo pare ce on ia evita danas sever.

La statos Nayarit, Jalisco, Colima, Michoacan, e Guerrero es en peril spesial en cuando la tempesta move de la costa. Sirca 400 mil persones abita la areas perilida.

La polisia federal de Mexico ia dise ce en Colima on ia reporta sola "liscas minor e arbores cadeda". Ma la governa ia averti ce sene de la volcan de Colima, cual ia deveni sempre plu ativa en esta anio, pote combina con pluve intensa per causa flues vasta de fango.

La siclon ia ateni la costa con ventas de 265 cilometres per ora. A ante, la ventas ia es sufisinte forte per "enaira un avion e manteni lo en vola", diseda par un portavose de la Organiza Meteorolojial Mundal.

Videos filmada en la site de porto Manzanillo, corta ante la ariva de la siclon, mostra arbores curvinte en venta sever.

Abitores ia reserva comedas e otra furnis, e botecores ia planci fenetras.

Jalisco conteni la vila vacanserial Puerto Vallarta, cual ia pare evade la plu mal de la tempesta. Patrulias de polisia ia recomenda ce persones retira se de la costa per vade a areas plu secur, distante par a la min tre blocos. Parladores ia comanda persones en oteles a sorti.

On ia clui la airoporto de la vila, e ance du otras en la curso de la tempesta.

2015-10-23

Un scola svensce sufri un ataca raziste

La polisia crede ce un om mascida ci ia mata ier un ensenior e un aprendor a un scola en Sveria ia ave "motivas raziste".

Niclas Hallgren, la xef de polisia, ia dise ce los ia fundi esta conclui sur lo cual los ia descovre a la aparte de la mator e "se condui en la ata".

Reportas jornaliste sujesta ce la atacor, de 21 anios, ia ave tendes estrema destriste.

Enarmada con un spada e portante un elmo e masca, el ia ataca un scola en Trollhättan, prosima a Göteborg, ante deveni matada par fusil de polisia.

El ia es fotografida con un grupo de studiantes, ci ia suposa ce el es vestida per selebra la Vijila de Tota Santas. A pos, el ia visita salas de clase diversa a la scola Kronan.

Un ensenior e xico de 17 anios ia mori de feris de cotel. Un otra studiante mas, de 15 anios, e un ensenior de 41 anios resta en state grave en ospital.

La polisia ancora no ia publici la nom de la atacor, an si los dise ce el ia es un abitor de Trollhättan.

Sveria ia reata con xoca a la matas. Ante visita la sena de la ataca, la ministro xef, Stefan Löfven, ia dise ce lo es "un dia negra" per la pais. "La scola debe es la loca per aprende, jua e curiosia e amia, e donce esta es un trajedia cual afeta la pais intera."

La re Carl Gustaf ia dise ce el es "en xoca" e ce el ia oia sur la avenis en Trollhättan "con angusa e tristia grande".

A la sera de ier, desuples de persones ia asembla estra la scola per paia se respetas a la vitimes e per pone flores e candelas sur la tera.

Alga abitores de la vila ia teni cartones con la demanda "perce on mata?"

Seguente reportas svensce, la contas de la suspetada en Facebook e YouTube sujesta ce el ia es interesada sur Hitler e Deutxland Nazi, e ia es ance oposada a Islam e migras. La polisia ia comenta ce los no ia conose el a ante.

Un costudiante pasada ia dise: "El ia es un person solitar. El ia usa juas de video, ia vive en se mundo propre."

La scola Kronan ave sirca 400 studiantes con entre ses e des-sinco anios, incluinte multe enfantes de migrores. Trollhättan es un vila industrial en Sveria ueste, situada a sirca 75 cilometres a norde de Göteborg, la site du de la plu grandes en la nasion.

Atacas a scolas es rara en Sveria. Sola un tal ia aveni en la 20 anios pasada. En acel, un aprendor ia mori pos es fusilida.

2015-10-22

Un projeta de proteje selacos en Cuba

La governa cuban ia inisia un projeta permanente per proteje la selacos sirca se costas.

La projeta, formulada con un grupo ambientiste de la SUA, va obliga pexores a rejistra e limita caturas de selacos, e va crea ance areas nova de pexa protejeda.

On crede ce cuasi 20% de la 500 spesies de selaco de mundo nada en acuas cuban.

La cuantia de selacos ia declina rapida par causa de tro multe pexa, un demanda per pinas de selaco, e caturas nonintendeda.

Cuba proibi ja recolie selacos sola per se selacos.

La projeta ia es anunsiada pos du anios de labora con la Reserva de Defende Ambientiste en la SUA.

La dirijor de se program en Cuba ia dise ce la cuantia de selacos en Cuba es sustada par resifes de coral relativa sana. "On regarda Cuba como la joala de corona de la Caribe, xef par causa de se ecosistemes stonante de resife de coral, se rizoforas, se erbas de mar."

La grupo dise ce la proteje de selacos pote es ance un bon comersia, car ecoturisme crese, e la recursos maral de un pais es un poseseda importante.

Cuba prepara aora un projeta areal per conserva de selacos.

2015-10-21

La xefes de un megaeglesa en Singapor es condenada de froda

On ia judi ce ses xefes de un eglesa jigante en Singapor es culpable de froda, en un caso con valua de 50 milion dolares singapor (35 milion dolares SUA).

La judor ia deside ce la pastor de la eglesa Recolie de Site, Kong Hee, e otras ia usa la recursos de la eglesa per finansia la carera musical de se sposa, Sun Ho, o ia falsi contas per asconde esta fato.

La acusadas ia razona ce la carera pop de Ho es un modo de estende la mano a noncristianes. On ia libri los su cautia asta se condena, ma los fronti la posible de spende se vives en prison.

On no acusa ce Sun Ho mesma ia fa mal.

Recolie de Site – regardada como un "megaeglesa" – es entre la eglesas evanjelial la plu rica de Singapor, con sirca 30 mil membros en Singapor e 15 servis a cada fini de semana. Lo dise ce lo ave 48 ramos en paises incluinte Malaisia, Indonesia, Barata, Taiuan, Brune, e Australia.

En un anunsia postada a la loca de rede de la eglesa, Ho ia dise ce los es "deludeda par la resulta" e ce la ses xefes reseta plu conselas legal.

El ia grasia membros de la eglesa per se "fida nonvasilante en ama Dio e en ama la un la otra" e ia recomenda "un unia cual es nonrompable".

Cuando la ses xefes ia apare en corte, la eglesa ia envia tuitas solisitante ce suportores prea.

La avocatos prosedente ia dise ce la malusa de reservas ia aveni entre 2007 e 2008.

On ia acusa la ses xefes e alga empleores finansial de embuti 24 milion dolares singapor de un reserva de construi a investis falsa, cual los ia usa alora en un projeta per usa la musica de Ho per evanjelisme. La acusores ia dise ce on ia spende ance 26 milion dolares singapor en asconde acel investis.

Ma la judor, See Kee Oon, ia dise ce la fatos fondal de la caso es "jeneral nondisputada" e ce "la pesa de la atesta mostra ce los ia condui nononesta".

Kong e un membro pasada de la comite de la eglesa, John Lam, ia es judida como culpable su tre acusas de rompe criminal de fida.

La pastor senior (Tan Ye Pang), un comitor (Chew Eng Han), e du manajores pasada de finansia (Serina Wee e Sharon Tan) ia es condenada su plu ca un acusa de rompe criminal de fida e de falsi contas.

Ho, ci ia es en corte per suporta se sposo, ia inisia se carera musical en 2002. El ia publici alga albumes en putong, e es conoseda en Xina e Taiuan.

El ia labora ance con figures de la industria musical SUA, como la composor de cantas Diane Warren e la rapor Wyclef Jean, ci ia produi se album engles.

2015-10-20

Un esplode de gas en Rio de Janeiro

Un esplode ia causa danas major en la site Rio de Janeiro en Brasil.

Desuples de construidas ia es danada en la esplode en la visineria São Cristóvão, e a la min sete persones ia es ferida, incluinte un enfante.

Ofisiores ia dise ce los suspeta ce la causa ia es un gotea de gas en un compania local.

Laborores de salva xerca en la detrito, ma asta aora los ia reporta no moris.

La esplode ia es oiada a distantia tan grande como ses cilometres.

Un abitor local, Marlene Sangy Aires, ia descrive la momento cuando la esplode ia aveni: "La teto ia colasa, e me fio de 21 anios ia susede proteje me fia de 18 anios con se corpo. Nos ia es trapida en la detrito e ia usa la lus de nos telefonetas per siniali a la laborores de salva. Los ia trova nos e ia estrae nos."

Un xica de nove anios ia es prendeda a ospital pos deveni enterada su la detrito tra tre oras.

Laborores de crise ia dise ce 40 construidas ia es danada.

2015-10-19

La curso balcan de migrores es blocida

La tensa aumenta entre miles de migrores ci viaja a norde tra statos balcan, car restrinjes nova impedi se curso a Europa ueste.

Corvatsca ia demanda ce Slovenia, se visina norde, aseta 5000 migrores per dia, ma Slovenia ia dise ce lo va aseta sola un dui de acel cuantia.

Esta ia causa un cumula de persones a la frontera corvatsce con Serbia, e Corvatsca risca consuma tota la spasio en se campas de traversa.

Buses folida con persones ia formi un filo en Serbia ier, e temperas ia coleri entre la migrores frustrada e la polisiores tro cargada. Multe ia es obligada a espeta en la fria e la pluve tra la note.

Miles de refujadas move a norde tra la Balcanes, e la plu espera ateni Osteraic, Deutxland, e otra statos de la Uni European.

Magiar, sitante consernas de securia, ia clui se fronteras con Serbia e Corvatsca, forsante migrores a adota un curso plu lenta tra Slovenia.

Esplicante la restrinjes nova a soldi, Boštjan Šefic, la ministro de internas slovensce, ia dise ce se visina norde Osteraic aseta no plu ca 1500 persones per dia.

El ia dise ce Slovenia "no pote aseta cuantias nonlimitada de migrores si nos sabe ce los no pote continua se viaja. Si nos ta aseta 5000 migrores per dia, acel ta causa ce 35 mil va es en Slovenia pos 10 dias. Acel ta es nonasetable."

Sirca 5000 migrores ia pasa un note fria en un campa de traversa en Opatovac en la este de Corvatsca.

Ultra la frontera en Serbia, miles de persones ia es tenida en sirca 50 buses de pos la temprana de soldi, espetante traversa a Corvatsca.

Muhammad Samin de Afganistan ia dise: "Nos espeta asi tra cuatro oras en la bus. La clima es tro fria. Nos porta multe de camisas. La enfantes es ance en la fria. No comeda."

La migrores, de ci la plu veni de Afganistan, Suria e Irac, ia spende ja semanas en pasea de Turcia, tra Elas, Macedonia, e Serbia.

La departe de refujadas de la Nasiones Unida ia comenta ce la curso nova tra Slovenia longi la malesperia per miles de persones. Un portavose ia dise: "La deside par Magiar de clui se frontera ia ajunta serta a la sufri e miseria e la longia de la viaja per esta persones desperante. On va ave defias si la prosede deveni lenta o nos ave un cumula de persones nontratada."

Plu ca 600 mil persones, de cual la plu es suri, ia ateni ja Europa en esta anio, contrastada con pico plu ca 200 mil en la intera de 2014.

Deutxland ia dise ce lo previde 800 mil refujadas en esta anio, ma on crede ce la cuantia pote es tan grande como 1,5 milion.

2015-10-18

Un siclon lenta bate sever la Pilipinas

Construidas es platida, linias eletrical cade, e miles de persones ia fuji de se casas en cuando Siclon Koppu puxa se tra la norde de la Pilipinas.

La tempesta crea ance ondones con altia de cuatro metres a la costa.

La siclon enorme e lenta movente ia ariva a la tera prosima a la vila Casiguran sur la isola Luzon a la temprana de esta matina.

On previde ce lo va trae tre dias de pluve deluvial, causante inondas sever e cisa liscas de tera.

Des mil persones ia es deslocada en la norde-este de Luzon, ma asta aora on ia reporta no moris.

La sentro de la tempesta move a ueste con rapidia de sola 3 cilometres per ora, par causa de un cresta de presa alta entre lo e un otra siclon cual es ance presente en la Pasifica ueste.

On ia cansela aviones e navetas de mar en la norde, e on ia suspende la servi de bus en montanias do on teme ce la tera va lisca.

A venerdi, la presidente Benigno Aquino ia dona un averti televisada, a la ves prima pos Siclon Haiyan en 2013, cual ia mata plu ca 6300 persones.

La sistemes de averti la popla ia boni multe pos acel siclon, donce lo es multe plu probable ce persones va es secur a esta ves.

Siclon Koppu, ance nomida Lando, ave un largia de asta 650 cilometres, e produi ventas de asta 250 cilometres per ora. Car lo move lenta, lo pote trae un pluve intensa tra un tempo longa.

Persones en la areas la plu sever colpada nesesa es capas de susta se tra asta 72 oras, car en acel periodo la usa de transporta va es estrema difisil.

2015-10-17

La SUA restrinje foras per petrolio e gas en mares artica

La governa SUA ia anunsia restrinjes nova de esplora per petrolio e gas en la acuas artica prosima a la costa norde de Alasca.

Esta segue pos cuando Royal Dutch Shell, un compania jigante de petrolio, ia sesa se ativias en la Artica en la mense pasada, reportante probas "deludente".

La departe de internas SUA ia dise ce lo cansela du vendes de contratas de lua costal en la Artica, e no va estende contratas esistente.

La anunsia ia es bonvenida par ambientistes. Miyoko Sakashita de la Sentro per Diversia Biolojial ia dise ce la deside es "eselente per la Artica e se ursos blanca. Nos nesesa teni tota la petrolio artica en la tera."

Luas par la governa va desvalidi en la Mar de Beaufort en 2017 e en la Mar Txucot en 2020.

Shell ia spende sirca $7 mil milion sur developa costal artica en acel mares. Ma lo ia anunsia resente ce lo no ia trova un cuantia sufisinte de petrolio e gas en la area per merita plu esploras. La compania ia dise ce lo va abandona se esploras a Alasca "per la futur previdable".

Par companias de petrolio, la Artica es un loca riscosa e custosa per esplora, e la custa basa presente de petrolio fa ce lo pare an min atraente.

La Jeometre Jeolojial de la SUA estima ce la Artica conteni sirca 30% de la gas natural nondescovreda de la mundo, e ance 13% de se petrolio.

Ma grupos ambientiste dise ce foras costal contamina e dana un tera savaje natural. Los razona ance ce on debe lasa combustables de fosil, como petrolio e gas, en la tera – car si no, la mundo va esperia un cambia noncontrolable de clima.

2015-10-16

Un xef temeda de la armada brasilera mori

La xef pasada de la departe de securia de la armada en la stato brasilera São Paulo ia mori. El ia ave 83 anios.

Grupos de diretos umana ia acusa ce Coronel Carlos Alberto Brilhante Ustra ia comanda la aresta e tortura nonlegal de sirca 500 ativists sinistriste.

El ia gida la departe DOI-CODI (Destacamento de Operações de Informações – Centro de Operações de Defesa Interna) de 1970 a 1974, cuando Brasil ia es militar renada.

"Me ia batalia la terorisme," el ia dise a un comision de veria en maio 2013. La armada ia preveni Brasil de deveni "un autocratia de la proletaria", el ia ajunta.

Ustra ia regrete nunca – e ia demanda nunca es pardonada per – se atas contra grupos sinistriste ci ia combate la governa militar, cual ia ave la potia de 1964 asta 1985.

El ia dise ce la presidente presente de Brasil, Dilma Rousseff, "parteni a cuatro organizas teroriste" cual suporta la reali de un tirania comuniste en la pais. Rousseff ia es arestada a torturada en São Paulo en 1970 per se ativias political.

Ustra ia dise ce el mesma ia viole nunca la lege, e ce el ia fa no plu ca obedi comandas de persones superior en la armada.

Ma Marival Dias Chaves, un ajente pasada de DOI-CODI, ia informa la comision ce Ustra ia dirije personal du sentros de tortura. "El ia es la mestre de vive e mori a acel veses. El ia deside ci va vive e ci va mori."

En 2012, un judor ia trova ce Ustra es culpable de viole diretos umana, e ia comanda el a paia un compensa per la tortura de un jornaliste saisida par ajentes secreta a sirca 30 anios ante aora.

Ustra ia es apelante contra la judi cuando el ia mori.

2015-10-15

Futbalores de Ertra xerca refuja en Botsuana

Des juores de la ecipo ertri de futbal ia refusa revade a Ertra pos jua en un max per entra a la Copa Mundal en Botsuana. Los xerca aora refuja ala.

La omes ia es tenida par la polisia pos deside no embarca se avion.

On reporta ce los ia refusa revade a se pais an pos la interveni de la ambasador ertri en Botsuana.

Alga atletas ertri ia abandona coletiva se pais en anios resente. Un de la tal avenis la plu notable ia es en 2013, cuando Uganda ia refuja un ecipo de 15 juores ertri e se dotor, pos cuando los ia fuji a la fini de un torneo de futbal.

Un ofisior major a la Asosia Tsuana de Futbal dise ce on ancora no ia descovre perce la juores ia refusa parti con se coecipores.

Ma un reporta en la jornal tsuana La vose ia dise ce la juores ia es angusada sur la posible de deveni enscriveda a la armada ertri, e ce los ia desira xerca refuja an pos cuando la ambasador ia proba convinse los a via de esta.

Ofisiores de la ecipo ia trova ce la juores es asente de se salas de otel en la temprana de la matina de ier.

Basadi Akoonyatse, la vispresidente de la Asosia Tsuana de Futbal, ia esplica: "On ia fa un reporta a la polisia, ci ia trova los en Francistown, do los ia dise ce los xerca un sentro de la Crus Roja per es aidada a refuja en Botsuana."

Un representor de la juores ia dise ce el ia oia ce on ia atenta estrae la juores de Botsuana par forsa.

Ertra es malfamosa per maltratas contra diretos umana. Un reporta par un comision de la Nasiones Unida ia indica ce la tortura e la sclavia es comun.

La NU ia acusa ance ce la pais obliga se sitadanes a servi militar sin fini definida, e ce lo mata persones ci atenta evade a otra paises. La governa ertri ia rejeta esta acusas como "intera sin funda e con asentia de merita".

2015-10-14

Rusia e la SUA discute la securia airal supra Suria

Rusia e la SUA va fa discutes nova sur securia airal en Suria, pos cuando on ia descovre ce aviones de combate de la du nasiones ia veni tro prosima la un a la otra a saturdi.

La aviones ia es vidable la un de la otra, con distantia de 15 a 30 cilometres entre los.

Esta va es la ves tre de tal discutes, en cual la du paises atenta trova maneras de evita un gera nonintendeda.

An con la discutes, la SUA ia descrive la atas de Rusia en Suria como "malgidada".

La ministro de defende de la SUA ia dise ce el previde un acorda pos un tempo corta. Rusia ia dise ce lo ia "refresci la proposas" cual on va discute en un confere video.

Rusia ia comensa se campania de atacas airal en Suria a 30 setembre, disente ce se blanco es la combatosas de Stato Islamiste e otra grupos jihadiste, pos cuando la presidente suri ia solisita aidas militar.

Paises ueste e ativistes suri dise ce aviones rusce ia ataca blancos nonmilitar. Moscva nega esta.

En un developa separada a martedi, du cartuxes ia colpa la compleso de la ambasada rusce en Dimashq, la capital suri, en cuando sentos de persones progoverna ia asembla estra casa per suporta la atacas airal rusce.

Nun ia mori, ma alga persones ia es ferida. Rusia ia descrive la bombarda como "un ataca teroriste".

2015-10-13

Israelis es atacada par cotel en Ieruxalim

Sinco persones israeli ia es atacada con coteles en Ieruxalim, en la plu resente de un series de cotelis resente par persones filastini.

En la ataca la plu resente, un soldato israeli ia es ferida pos es cotelida en un bus. La atacor ia es matada con fusil e un person nonmilitar ia es ferida.

Plu temprana, du jovenes ia es cotelida a un comunia israeli en Ieruxalim Este, lasante un de los, un xico de 13 anios, en un state estrema grave.

Du polisiores israeli ia es ance ferida en atacas separada.

Cuatro israelies e desuples de filastinis, incluinte alga atacores, ia es matada en la aumenta resente de violentia.

En la ataca sinco de ier, un om ci la polisia israeli descrive como arabi ia coteli un soldato israeli en un bus, pos atenta saisi se fusil. Un nonmilitar ia es ance ferida ante cuando on ia fusili la atacor.

La atacas de la dia ia comensa cuando un om arabi ia coteli un polisior en la Site Vea pos es parada par la polisior ci ia persepi ce el ata suspetosa. La polisior ia es salvada de feris car el ia porta un jaceta protejente. Se atacor ia es ance matada con fusil par la polisia.

Esta ia aveni prosima a la Porton de la Leones, la sena de alga otra cotelis presedente.

Plu tarda, un fem arabi ia coteli un polisior prosima a un xeferia de polisia en la area Colina de Munis en Ieruxalim Este. La polisior, ci ia deveni lejera ferida, ia susede fusili e feri se atacor.

Un de la atacores filastini de la du jovenes en la comunia Pisgat Ze'ev ia es fusilida e matada par la polisia. Se aidor, ci ia ave 13 anios, ia es fusilida e grave ferida.

Un portavose de la polisia israeli ia identifia la du atacores como filastinis de 13 e 17 anios de la comunia prosima Beit Hanina.

Tensas entre israelis e filastinis ia alti resente, sustada par scaramuxas a un santeria provocante en Ieruxalim, a la Riva Ueste, e a otra lado de la frontera de Gaza, como ance par la serie de cotelis.

A la fini de semana, alga filastinis ia es matada en combate con soldatos israeli e par un ataca airal israeli contra un loca de ativistes en Gaza en responde a un xuta de rocetos a Israel.

2015-10-12

Un vitim ensinta de viole alegada vola de Nauero

Un fem somali ci ia deveni ensinta pos un viole alegada sur Nauero ia ariva en Australia.

A alga semanas ante aora, la fem de 23 anios ia demanda ja ce on envia el de Nauru a Australia per un aborta.

La isola Nauru es un parte de un rede de locas do Australia casi persones ci xerca refuja. La corte suprema de Australia revisa aora la legalia de esta sentros.

Miles de australianes ia asembla a la fini de semana per suporta refujadas e esije la clui de la sentros.

Entretempo, Nauru ia nega un alega par un otra refujada somali ce on ia viole el. La autoriosas ia dise ce la atesta no sufisi per suporta la declara par la fem ce el ia es violeda par du omes nauero.

Su la politica sever de refuja australian, on intersepi tota migrores nonprevideda ci atenta ariva a la pais par barco, e on teni los en sentros sur Nauero e la Isola Manus de Papua Gine Nova.

La governa dise ce esta preveni contrabandores de persones, ma on ia critica la situa a la campas.

On reporta ce la fem somali de 23 anios ave plu ca 12 semanas de ensintia. Nauero permete abortas en alga situas, ma no en la caso de viole.

La governa australian ia es ja presada sur permete ce el entra a Australia per aborta la ensintia.

Se avocato ia comenta: "Nos cliente es lejerida ce esta problem delicata es concluida. El es aora en Australia, e la governa ia acorda furni medica a el."

Ma un politiciste oposante, Sarah Hanson-Young de la Partito Verde, ia cexa sur la manera en cual on ia trata la fem. "On debe demanda perce la situa multe angusante de un fem joven ia deveni tan publica, e la popla australian ia debe solisita de la ministro xef."

2015-10-11

Turcia lamenta pos esplodes matante

Turcia comensa tre dias de lamenta pos cuando du esplodes ier a un asembla per pas en la capital Ankara ia mata a la min 95 persones. Esta ia es la tal ataca la plu matante en la pais.

Lo ia lasa ance 245 persones ferida, con 48 de los en state sever.

Pitures televisada ia mostra senas de panica e persones covreda en sangue sur la tera, entre banderas protestante.

La governa ia nomi la esplodes "un ata teroriste" e ia rejeta coler alegas ce lo mesma es culpable.

La esplodes ia aveni prosima a la stasion sentral de ferovia en cuando on ia asembla per un prosegue organizada par grupos sinistriste. La asembla ia esije un fini de la violentia entre la rebelores separadiste curdi e la governa turces.

On ia intende comensa lo a mediadia. La du esplodes ia aveni no longa pos 10:00, en cuando folas ia comensa formi per prosegue. Un video de amator mostra un grupo de persones joven teninte manos e cantante cuando la esplode prima aveni.

Atestors ia descrive un coleria en la fola contra la polisia a pos. Un partisipor de la asembla ia dise ce la polisia ia usa gas lacrimojen "direta cuando la bomba ia esplode" e "no ia permete la pasa de ambulansias".

La ministro xef Ahmet Davutoglu ia dise ce on ave indicas ce du bombas umana ia esecuta la ataca. Lo ia aveni a tre semanas ante un refa de la vota parlamental nonconcluinte de junio.

La presidente Erdoğan ia descrive la ataca como "despetable". El ia cansela un visita intendeda a Turcmenistan.

La partitio HDP cual suporta la curdis ia es entre la asembladas. Se xef, Selahattin Demirtaş, ia culpa la stato per la ataca e ia cansela tota asemblas ante la vota.

Demirtaş ia condena la governa como "omisidores" e ia dise ce lo ave sangue sur se manos.

A ante, la partito ia culpa la governa per conspira en tal atacas contra ativistes curdi, ma la governa nega esta.

Cemalettin Haşimi, la dirijor de jornalisme e informa a la ofisia de la ministro xef, ia comenta ce tal alegas es "desonorosa, nonasetable". El ia insiste ce la autoriosas vole forte trova la atacores.

2015-10-10

Paradas grande a la aniversario 70 de Corea Norde

Corea Norde fa un de se selebras la plu grande de istoria, onorante la aniversario 70 de la Partito de Laborores.

Un prosegue de veculos blindada e misiles balistical ia comensa move tra la capital Pyongyang, acompaniada par soldatos marxante.

Kim Jong-un, la xef suprema de la pais, va preside a la rituo, ma no xefes de otra paises va es presente.

La comensa de la ativia ia es retardada par un pluve forte en la note.

Analistes va oserva atendosa per deteta cualce aparatos nova cual indica la developa militar de la Norde.

Cuando lo ia anunsia se intendes per la aniversario en la plu temprana de esta anio, la governa ia refere a armas "vangarda" conveninte a gera moderna.

On no sabe esce Kim Jong-un – la avo de la xef prima, Kim Il-sung – va parla a cualce de la avenis de la dia, ma on previde ce la aniversario va envia un sinial defiante, spesial a Corea Sude e la Statos Unida.

El ia comensa la dia par mostra se respeta a se padre e avo mor a la Palasio Kumsusan de la Suno en Pyongyang.

Ofisiores no ia revela detalias de la selebras de la dia, ma on ia vide miles de sitadanes en plazas publica tra la site, praticante ante un parada con torxas cual va aveni en la sera.

On ia construi ance un stadio sur un rio per un conserta tarda cual va inclui la banda fema Moranbong, la grupo musical la plu popular de la pais.

Xina, la aliada la plu prosima de Corea Norde, ia envia un ofisior major de la Partito Comuniste a la aniversario.

La program nucleal de Corea Norde es ja longa un causa de teme en la area. On crede ce Pyongyang ia fa tre detonas nucleal esperimental suteran, e lo menasa fa un plu, an entre condenas e reproxas internasional.

En la mense pasada, lo ia anunsia ce lo reinisia Yongbyon, se compleso nucleal xef, e ce lo boni se armas nucleal "en cualia e cuantia".

La Norde declara ce lo ia crea un bomba nucleal sufisinte peti per es casida en la ojiva de un misil. Ma ofisiores de la SUA ia espresa se duta sur esta, e espertas dise ce on no pote fasil estima la progresa cual Corea Norde ia fa sur miniaturi.

2015-10-09

La fumi va mata un tri de omes joven xines

Un studia nova averti ce un tri de tota omes en Xina ci ave aora min ca 20 anios va mori prematur si los no sesa fumi.

La rexerca, publicida en la jornal medical The Lancet ("La bisturi"), dise ce aora du tris de omes xines comensa fumi ante se anio 20. Lo conclui ce la abitua va mata sirca un dui de estas.

La siensistes ia fa du studias nasional, con interval de 15 anios, envolvente sentos de miles de persones.

Si la tendes presente continua, la cuantia anial de moris par tabaco en Xina, xef entre omes, va ateni du milion en o ante 2030. La rexercores ia descrive esta como "un epidemica cresente de moris prematur".

La esploras ia es fada par siensistes de la Universia de Oxford, la Academia Xines de Siensas Medical, e la Sentro Xines per Controla de Maladia.

Ma un de la coautores, Richard Peto, ia dise ce un espera esiste – si on pote convinse persones a abandona la abitua. "La clave per evita esta onda enorme de moris es la sesa," el ia dise, "e si on es un om joven, ta ce on no comensa."

An si la proportio de fumores ia diminui en paises developada – a min ca un person entre sinco en la SUA, per esemplo – lo ia alti en Xina, en cuando sigaretas ia deveni plu disponable e consumores ia deveni plu rica.

Autoriosas ia mostra ansia sur la crese, e Beijing ia introdui an un proibi de fumi publica. Ma atentas de redui la fumi es impedida par la popularia de la abitua, e par se usosia como un fonte de revenu impostal.

Global, tabaco mata asta un dui de se usores, seguente la Organiza Mundal de Sania.

2015-10-08

On sesa xerca un barcon SUA mancante

La gardacosta SUA ia abandona se xerca per la barcon El Faro, cual ia afonda prosima a la Bahamas con 33 persones a sur.

La ecipores de la barcon de cargo, cual ia ave 224 metres de longia, ia manca pos envia un clama per aida.

Aviones xercante ia trova detrito cual inclui jacetas inflable, contenadores e petrolio en la acua, ma on ia recovre sola un corpo.

Lo no es clar perce la capitan ia deside gida se barcon a acuas prosima a la siclon Joaquin.

La xerca ia fini ofisial a la reposa de sol a la sera de mercurdi. La xef de la gardacosta ia comenta: "Los ia fa tota cual los ia pote en esta taxe de xerca. Nos ecipos e aviones ia vola repetente en acel tempesta."

On ia trova ance un barco de salva, vacua e grave danada.

La gardacosta ia xerca 70 mil milias maral cuadrida per atenta descovre la loca de la ecipo, cual ia es composada de 28 americanes e sinco polsces.

La barcon ia es en viaja de Florida a Porto Rica. Diseda par la clama per aida, acua ia entra a lo ante cuando lo ia afonda.

Tote Maritime, la compania cual posese la barcon, dise ce lo ia perde se potia pos la rompe de se motores. Lo ia envia du barcos a la sena, e ia trova un contenador "cual pare veni de El Faro".

La siclon ia trae pluves forte a la Bahamas, danante alga casas. La compania ia declara ce se ecipo ia es "preparada per fronti tal situas como cambias de clima".

2015-10-07

Barat atenta deteta esportas nonlegal de carne de bove

Barat intende pone laborerias siensal a portos per deteta esportas nonlegal de carne de bove, a media de un controversa causada par la linxa de un om muslim sur un rumor ce el ia come tal carne.

La plu de statos barati proibi mata boves, cual es regardada como animales santa par la comunia indu majorial de la pais. An tal, on permete jeneral la mata e come de bufalos.

La proibi ia provoca un coleria grande, en cual multe persones demanda perce la governa ave la direto de deside lo cual los come.

On ia critica ance la proibi car carne de bove es min custosa ca carne de gal o pex, e es un comeda major per la comunias plu povre muslim, tribal, e dalit (istorial conoseda como parias).

La ministro minor de cultiva ia informa jornalistes ce la laborerias va ajunta un plu strato per deteta la pasa nonlegal de carne de bove tra portos, con ce tota esportas de carne es sever regulada par la governa.

La esaminas va consentra xef a la site ueste Mumbai, cual es la punto major de sorti per esportas de carne barati.

La governa es sempre plu presada par indus noncomprometente a proteje plu la boves.

En la mense pasada, Mohammad Akhlaq, un om de 50 anios, ia es matada par un manada indu sur rumores ce se familia ia conserva e come carne de bove a se casa. Se fio de 22 anios ia es grave ferida en la ataca, ma recovre aora en ospital.

An con la proibi vasta de mata boves, Barat esporta plu carne de bove ca tota otra paises, con grasias a se esportas de carne de bufalo. On previde ce lo va esporta 2,4 milion tones de tal carne en 2015, contra (per esemplo) 2 milion par Brasil.

On reporta ce Barat ave cuasi 1700 mataderias, de cual la plu es en la stato norde Uttar Pradesh e la stato ueste Maharashtra.

2015-10-06

Un otel de governa iamani es colpada par roceto

En Iaman, un otel casinte la ministro xef e se consilio en Aden ia es colpada par un ataca de roceto.

On ia reporta feris, ma no a la ministros ci abita ala.

La otel Qasr es usada como un governeria de pos cuando un alia gidada par Saudi Arabia ia forsa rebelores huti a via de Aden, la site du de la plu grandes en la pais.

La rebelores ia avansa a la site e en marto ia obliga la presidente Abd Rabbuh Mansur Hadi e la governa a fuji a Arabia Saudi.

En julio, militiores e soldatos progoverna ia forsa la hutis e se unias armada fidosa a Ali Abdullah Saleh, la presidente pasada, a parti de la site de porto, con aida de soldatos de la alia saudi.

Hadi ia reveni de esclui a Aden en la tarda de la mense pasada, ma on reporta ce el no ia es en la otel Qasr cuando lo ia es atacada en la temprana de oji.

Abitores ia cexa ce la site ia devolui a caos e anarcia, con combatosas jihadiste liada a al-Qaida e Stato Islamiste videda sur la stradas.

La Nasiones Unida dise ce cuasi 4900 persones ia es matada en la ses menses pasada de batalia en Iaman, incluinte 2200 nonmilitares.

2015-10-05

La povria estrema diminui

La Banco Mundal ia dise ce, a la ves prima, min ca 10% de persones en la mundo va abita en povria estrema a la fini de esta anio.

La banco ia clari ce lo regarda aora $1,90 per dia como la cuantia de revenu cual defini un povria estrema, aumentada de $1,25.

Lo previde ce la proportio de la popla de mundo en esta categoria va cade de 12,8% en 2012 a 9,6%.

An tal, lo ia comenta ce "la consentra cresente de povria global en Africa susaharan es un conserna grande".

An si on predise ce la proportio de persones povre en acel parte de Africa va diminui de 42,6% en 2012 a 35,2% a la fini de 2015, esta va representa ancora sirca un dui de la persones povre en la mundo.

Jim Yong Kim, la presidente de la Banco Mundal, ia dise: "Nos es la jenera prima en istoria umana cual pote fini la povria estrema."

La banco ia esplica ce la tende basinte es causada par tasos forte de crese en paises developante e par investis en instrui, sania, e redes de securia sosial.

Ma Kim ia averti ce continua la progresa va es "estracomun difisil, spesial en un periodo de crese global min rapida, mercatos finansial volatil, geras, multe nonemplea joven, e la efeto cresente de cambia climal".

E la banco ia averti ce povria "deveni plu profonda e plu radisida en paises cual es o saturada con gera o tro dependente de esportas de benes".

2015-10-04

La pape abri un sinodo entre disputas sur omosesalia

Pape Fransisco va selebra la misa a la Basilica de San Pedro en la Vatican, a la comensa de un sinodo de bispos cual va consentra sur temas de familia.

La tempo presedente ia es dominada par un disputa sur un prete vatican ci ia anunsia ier ce el es en un relata ge.

Krzysztof Charamsa, ci ia nase en Polsca, ia dise ce el vole defia la disposa "retardada" de la Eglesa a omosesalia. Plu tarda, el ia es desempleada de se posto a la ofisia vatican cual garda la credes catolica.

Un portavose ia comenta ce la deside par Charamsa de es intervisada a la sera ante la sinodo es "grave e nonencargada", e ce lo va pone la pape su "un presa jornaliste nonmeritada".

En un intervisa con la jornal Corriere Della Sera, la prete, ci ave 43 anios, ia dise: "La Eglesa debe ja abri se oios e comprende ce lo es nonumana ce a credores ge on ofre un asteni intera de un vive de ama."

Cisa 300 xefes eglesal – e alga persones nonrelijiosa – va discute tal problemes como la trata de catolicas ci es ge, e de duples ci coabita sin es sposida o ci vole fa la eucaristia pos divorsa.

Lo es nonprobable ce la Eglesa va cambia se prinsipes, ma alga tradisionalistes teme ce la sinodo sperde confusa sur la ideales de la fida catolica.

La pape ia recomenda un disposa plu tolerante sur temas sesal. Pos deveni elejeda en 2013, Pape Fransisco ia reconfirma la disposa de la Eglesa Catolica ce atas omosesal es pecas, ma ia dise ce la omosesalia mesma no es. "Si un person es ge e xerca Dio e ave un bon vole, ci es me per judi?"

La tema de omosesalia ia es ance asentuada en la visita par la pape a la SUA en la semana pasada.

A la misioneria vatican en Washington, el ia encontra privata un om ge instruida par el en la pasada e se ami de cor. El ia encontra ance un ofisior local ci ia tira resente a se la atende de jornalistes cuando el ia refusa furni lisensas sposal a duples ge.

2015-10-03

Sentos de persones manca pos un lisca de tera en Guatemala

En Guatemala, laborores de salva xerca sentos de persones ci manca pos cuando un flue de fango ia colpa un vileta prosima a la capital.

On ia recovre a la min 26 corpos asta aora de la vileta El Cambray 2, a 15 cilometres a este de la site Guatemala.

Ier, un pluve forte ia puxa un deluvia de rocones e fango a sur casas. Relatadas ia reseta telefonis e mesajetas de persones trapida su la detrito.

On ia prende survivores a refujerias tempora. La salvores ia pausa se xercas en la note par causa de pluves forte.

Un portavose per la pompores-bonvolores de Guatemala ia dise ce 26 persones ia mori, incluinte alga enfantes, e ce 36 persones ia es prendeda a ospitales.

On ia tira un om vivente de la detrito a plu ca 15 oras pos la colpa de la fango.

Ma Alejandro Maldonado, la xef de la departe guatemalteca de desastre, ia averti ce asta 600 persones es cisa ancora mancante. El ia ajunta ce esta ia es la cuantia de persones sur ci on crede ce los ia dormi en se casas cuando la fango ia lisca.

El Cambray 2 es ensircada par colinas presipe e torinte supra la casas, de cual la plu es situada en la fondo de la vale.

Intervisada a radio, Maldonado ia comenta ce la colinas forestosa ia deveni ja plu debil tra alga tempo e ce se colasa ia es xef causada par la pluve forte resente.

2015-10-02

Un fusilor mata en un universia SUA

En la SUA, nove persones ia es matada e sete ferida par un fusilor a un universia en la stato Oregon.

La atacor, ci ia ave 26 anios, ia fusili a Umpqua Community College a la matina de ier, e ia es matada par la polisia.

La polisia no ia identifia formal la atacor, ma alga ofisiores ia informa jornalistes ce se nom es Chris Harper Mercer. John Hanlin, la xerif local, ia refusa confirma la nom, ajuntante: "Me no va dona a el la onora cual probable el ia xerca par esta ata repulsante e coarde."

On no sabe la motiva de la mator, ma la polisia investiga reportas ce el ia averti sur se intendes en redes sosial.

A alga oras pos la ataca, la presidente Barack Obama, vidable frustrada, ia esije leges plu sever sur fusiles, comentante ce preas "no sufisi plu".

Apena ascondente se irita, el ia dise ce tal fusilis – e se responde propre – ia deveni ja costumal. "Nos no es la sola pais sur la Tera con persones ci ave maladias mental o vole feri otra persones. Ma nos es la sola pais avansada sur la Tera cual esperia esta fusilis coletiva en cada pico de menses."

Un fem ci abita fasante la compleso ia dise ce el ia oia un sona simil a focos artal, e cuando el ia sorti de se casa, el ia vide un esflue de studiantes. "Un xica ia sorti envolveda en un covreleto con sangue sur el," el ia nota.

Hannah Miles, un studiante de 19 anios, ia dise ce on ia gida el e se costudiantes a un libreria prosima, do los ia asconde en un sala retro.

"Nun ia es vera serta sur lo cual aveni," el ia comenta. "A la momento seguente, nos ia oia tre o cuatro plu sonas de xuta e tota de nos ia regarda la un la otras – e nos ia sabe."

La universia ave 3000 studiantes, e es situada en Roseburg, un area campanial a sirca 280 cilometres a sude de Portland. Sentos de persones ia asembla ritual en un parce de Roseburg en la sera.

Studiantes ia es transportada par bus a un feria local per es reunida con se amadas.

2015-10-01

On descovre multe armas ascondeda en Barain

En Barain, on ia descovre un de la reservas la plu grande de esplodentes e armas de pos la comensa de violentia ala en 2011.

La polisia dise ce 1,4 tones de esplodentes de grado alta ia es trovada en un sala suteran securida a sude de Manama, la capital. On ia trova ance fusiles e granadas de mano.

Barain ia esperia un turba de grado basa de pos la protestas de la Primavera Arabi. On ia acusa la governa de maltratas de diretos umana, ma rebelores ia ataca resente la polisia.

La ministreria de internas ia informa ce la materia ia es saisida en la distrito Nuwaidrat e ia conforma con trasas de esplodente trovada a un serie de atacas resente.

"La compleso ia es ajustada per conteni un rede complicada de bunceres suteran ascondeda e un opera fabricante a la surfas," la declara ia dise.

La polisia ia comenta ce los ia fa "un cuantia" de arestas, sin dona detalias.

La xef de polisia ia dise ce on ia descovre un fabriceria con macinas per crea bombetas e otra bombas, e ce on ia porta un cuantia grande de atestas dijital a via per analise.

El ia dise ce la esecutores es liada a grupos en Iran e Irac e ce lo pare ce la construi de la compleso ia ocupa menses. Iran ia nega tota envolve en la violentia baraini.

La majoria de la popla de Barain es xia, e ia solisita de la monarcia suni un representa political plu grande tra tempo longa.