2018-03-31

Malala Yousafzai revade a do el ia es fusilida

Malala Yousafzai, ganior de la Premio Nobel de Pas, ia revade a sua vila de nase en Pacistan a la ves prima pos es fusilida ala par militaristes taliban.

Yousafzai, ci ave aora 20 anios, ia es fusilida a la testa en 2012 car el ia campania per educa fema. La rejion Swat do sua familia ia abita ia es un fortres mlitariste en la pasada, e el ia es atacada en un bus de scola ala a la eda de 15.

Lo ia es nonclar esce el va visita la rejion, par causa de consernas de securia.

A jovedi, on ia anunsia ce Yousafzai ia revade de la Rena Unida Pacistan a la ves prima pos sua ataca. El ia fa un parla emosiosa a la ofisia de la ministro xef en Islamabad:

"Sempre lo ia es mea sonia ce me va vade a Pacistan e ala, en pas e sin teme, me pote move sur stradas, me pote encontra persones, me pote parla a persones. E me pensa ce lo es denova mea casa vea. Donce lo aveni vera, e me grasia tota de vos."

Un elicotor portante Yousafzai ia atera prosima a sua casa familial en Mingora a saturdi, entre securia forte. On previde ce sua visita a Pacistan va dura per cuatro dias.

Como xica de 11 anios, Yousafzai ia comensa scrive un jornal anonim sur sua vive su governa taliban. On ia fa un filma atestante sur el en 2009.

El ia deveni rapida un defendor franca de educa fema entre supresas par militaristes en Pacistan, e ia es atacada con intende en un bus en otobre 2012 par islamistes estrema. Sua raconta ia atrae atende internasional.

La adolesente ia reseta feris cual ia menasa sua vive, e ia nesesa ce on sutrae un parte de sua cranio per lejeri un infla contra sua serebro. Pos es tratada a un ospital militar en Pacistan, el ia es transportada a la Rena Unida per plu tratas, e per recovre en la site Birmingham, do sua familia continua abita.

Pos recovre, Yousafzai ia parla plu per la educa e diretos de enfantes tra la mundo. El ia institui la Reserva Malala con sua padre, con gol de "labora per un mundo do cada xica pote aprende e gida sin teme".

En 2014, el ia deveni la person la plu joven ci ia gania la Pas Nobel de Pas. El e Kailash Satyarthi, un ativiste barati, ia reseta lo en junta per sua laboras per diretos de enfantes.

Yousafzai ia continua campania en sua studias, e studia aora politica, filosofia e economia a la Universia de Oxford.

2018-03-30

68 persones mori en un focon en un prison venezuelan

Relatadas de 68 persones ci ia mori cuando un focon ia eruta a un polisieria en la site Valencia en Venezuela esije respondes sur la aveni. La arde ia comensa cuando prisonidas ia ensende materases en atenta sorti a mercurdi.

La Nasiones Unida ia demanda ce la autoriosas venezuelan fa un investiiga rapida e compensa la familias de la vitimes. La focon ia es un de la avenis la plu matante en la prisones de Venezuela.

A mercurdi, relatadas angusada ia asembla ante la polisieria, esijente informa sur sua amadas. La polisia ia forsa los a via par gas lacrimojen.

Tarek William Saab, la avocato acusante xef, ia dise ce 66 omes e du femes, ci ia visita la selulas en la note, ia es matada en la focon. El ia dise ance ce on va inisia "direta" un investiga.

On no ia confirma ofisial la avenis cual ia causa la focon, ma la asosia Un Fenetra a Libria, cual monitori la state de prisones, ia dise ce un prisonida ia fusili la gama de un polisior, e ce, corta a pos, materases en selulas ia es ensendeda. La arde ia sperde rapida.

Salvores ia rompe mures per atenta libri persones trapida par la flamas.

Prisones en Venezuela es suprafolida, e violentia e tumultas matante es comun. La pais ia batalia per casi sua prisonidas a media de un crise economial, e per esta razona lo usa complesos tempora como la prison en Valencia.

2018-03-29

La consentas de Corea Norde

La gidores de Corea Norde e Sude va fa sua confere prima de plu ca un desenio a 27 april.

Un declara juntada ia dise ce discutes entre Kim Jong-un de la Norde (Txoson) e presidente Moon-Jae-in de la Sude (Tehan) va aveni en la vileta fronteral Panmunjom.

La data ia es revelada pos un consenta entre ofisiores de ambos lados per prepara la encontra.

La anunsia segue a la dia pos reportas de discutes entre Kim Jong-un e Xi Jinping, presidente de Xina. A acel consenta en Beijing, la gidor de Corea Norde ia repete sua ofre de desnucleali la Penisola Corean.

Kim Jong-un ia dise resente ce el vole consenta con Donald Trump, presidente de la SUA. Trump ia aseta la ofre, e lo es posible ce los pote encontra lunlotra a tempo tan prosima como maio.

La presenta de un data per discutes entre la du Coreas es la move la plu resente en un eruta de ativia diplomata en esta anio, en cual Txoson ia es presente a la Juas Olimpial de Inverno en Tehan.

2018-03-28

Un gania de loto a sua aniversario 18

Un fem canadian ia gania masima pos compra sua bileta prima de loto a sua aniversario 18.

Charlie Lagarde, de la provinse Québec, ia compra un bileta de rasca en un botela de xampania per selebra ateni la eda de 18 anios a 14 marto.

El ia gania, e ia fronti un eleje entre prende un sola premio de milion dolares canadian o reseta mil dolares a cada semana per la resta de sua vive. Pos consulta un conselor finansial, la ganior joven ia eleje la paia anial de mil dolares, car lo no es impostada.

Un portavose per la compania de loto ia comenta: "Lo es estra imposta, alora lo coresponde a un salario de plu ca 100 mil dolares per anio, donce lo es un comensa eselente de la vive de acel fem joven."

Lagarde dise ce el vole usa la mone per viaja e paia per sua educa. "Me desira studia fotografia. Un de mea sonias es labora per National Geographic.

2018-03-27

La fumi confondente de un elefante barati

Un video de un elefante savaje en Barat cual pare espira sene ia confonde espertas tra la mundo. Vinay Kumar, un siensiste ci parteni a la Sosia de Conserva de Viventes Savaje de India, ia filma la video de 48 secondos en un visita laborante a la foresta Nagarhole en la stato Karnataka en April 2016.

Asta aora, el no ia comprende la importa de la video. Lo es la filma prima conoseda de un elefante savaje con esta condui, e siensistes es ancora no serta sur lo.

Kumar e sua ecipo ia vade a la foresta, en la temprana de matina, per monitori trapas de camera intendeda per fa imajes de tigres. El ia vide un elefante fema a no plu ca 50 metres de distantia, e ia comensa filma lo.

En la filma, la elefante pare come carbon de lenio lasada par un foco controlada sur la tera, e sofla la sene en espira a pos. Kumar ia dise: "Lo cual nos ia vide a acel dia ia pare cuasi como si la elefante fumi – el pleni sua trompa con sene, leva lo a sua boca, e espira a lo, produinte un sofleta de fuma."

Varun R Goswami, un biolojiste de elefantes ci ia esamina la video crede ce "la plu probable, la elefante ia atenta come carbon de lenio, car el ia pare prende alga cosa de la solo ardeda de foresta, soflante per sutrae la sene cual ia acompania lo en sua trompa, e consumante la resta".

El ia dise: "Carbon de lenio ave un capasia reconoseda de lia a toxinas, e an si lo ave cisa no multe contenida nural, animales savaje es cisa atraeda a lo per esta valua medisinal. Lo pote servi ance como un laxinte, duplinte sua usosia per animales cual consuma lo pos focones savaje, colpas de lampo o ardes controlada."

2018-03-26

Un focon en un sentro comersial en Sibir

A la min 53 persones ia mori ier en un focon cual ia destrui un compleso de botecas e diverterias en Cemerovo, un site en Sibir. Lo es posible ce 41 enfantes es entre la vitimes, e on no conose do plu ca 10 persones es.

La arde ia comensa a un solo alta de la compleso Seriso de Inverno, cuando multe de la vitimes ia es a la sinema. Persones ia salta de fenetras per evade la flamas.

La causa de la focon es ancora no conoseda, e autoriosas ia inisia un investiga. 660 laborores de crise ia es usada en la salva, e pompores ia batalia la flamas tra plu ca 17 oras.

Cemerovo, un loca major de mina de carbon, es situada a sirca 3600 cilometres a este de Moscva.

La sentro comersial ia abri en 2013. En ajunta a un sinema-multipleso, lo conteni restorantes, un sauna, un bolingeria e un zo per enfantes. On ia deteni cuatro persones per interoga, incluinte la xef de la compania cual maneja la sentro e la proprior de la compleso.

Ofisiores rusce ia dise prima ce 64 persones manca, ma ia clari plu tarda ce esta inclui vitimes de ci on no ia identifia sua restas. A la min nove de la corpos trovada asta aora es enfantes.

La servis de crise ia ateni final un salon de sinema a la solo tre, pos es impedida par fuma e la peril de partes colasante. Los ia trova no corpos a interna, ma teme ce alga persones ia es cisa covreda par detrito.

2018-03-25

Un protesta par tradisionalistes en Corvatsca

Miles de corvatsces ia asembla en la sentro de Zagreb contra un acorda european desiniada per proteje femes, protestante ce lo menasa valuas tradisional.

Los cexa ce la Acorda de Istanbul va legali la sposi omosesal e va boni diretos per persones transjenero.

Grupos de diretos fema ia fa un contraprotesta longo la via de la prosegue, disente ce sondas sujesta ce du tris de corvatsces suporta la acorda, an con la asende de la destra estrema pos la junta de Corvatsca a la Uni European en 2013.

Parlamento ancora no ia validi la acorda, ma la governa destra sentriste ia aproba lo, provocante disentis de en se mesma, de grupos conservaliste, e de la Eglesa Catolica.

Multe de la protestores suporta combate violentia de casa e violentia contra femes, ma dise ce la defini de jenero en la acorda es tro fluente, abrinte la via per un reconose plu grande de persones transesal e transjenero.

La acorda defini jenero como "la roles, conduis, atas e cualias sosial construida cual un sosia spesifada regarda como conveninte per femes e omes".

Organizas eglesal ia esije un referendo sur la validi, an si sondas indica ce la plu de corvatsces suporta la acorda. Serbia, Bosnia e Slovenia ia validi ja lo, ma Balgaria e Slovensco ia rejeta lo.

2018-03-24

Un eroe de polisia franses mori de sua feriis

Un polisior franses ia mori, ci ia sustitui se per un ostaje en un aseja de supramercato ier. Emmanuel Macron, presidente de Frans, ia dise ce Arnaud Beltrame, de 45 anios, "ia cade como un eroe" e ia mostra "coraje estracomun".

Beltrame ia aida fini la ativia de un fusilor ci ia mata tre persones en la sude de Frans. La fusilor estremiste islamiste, Redouane Lakdim, de 25 anios, ia es matada par la polisia.

Gérard Collomb, la ministro franses de internas, ia dise ce Beltrame "ia mori per sua pais. Frans va oblida nunca sua eroisme, sua coraje, sua sacrifia."

Plu temprana, Macron ia revela ce Beltrame ia sufri feris grave e batalia per sua vive en ospital. Des-ses persones ia es ferida, du en modo grave, en lo cual Macron ia nomi un ata de "terorisme islamiste".

Lakdim ia esije la libri de Salah Abdeslam, la plu importante de la suspetadas survivente de la atacas en Paris a 3 novembre 2015, cual ia mata 130 persones.

La violentia ier ia comensa en la matina en Carcassonne, do Lakdim ia saisi un auto. El ia mata un pasajor, de ci on ia trova sua corpo ascondeda en un arboreta, e ia feri la gidor. A pos, el ia xuta a un grupo de polisiores corente, ferinte un de los.

Lo pare ce el ia viaja tra distantia peti a Trèbes, un vila peti do el ia invade la supramercato Super-U, criante: "Me es un soldato de Daex!" El ia mata du persones – un cliente e un laboror – ante saisi otras como ostajes.

La polisia ia susede sorti alga persones de la boteca, ma la fusilor ia reteni un fem como scermo umana. A esta punto, Beltrame ia ofre sustitui se per la fem. El ia lasa sua telefoneta sur un table, con linia abrida, afin polisiores estra la construida pote monitori la situa.

Cuando la polisia ia oia xutas, un ecipo tatical ia entra a la supramercato. La fusilor ia es matada, ma Beltrame ia es ferida.

2018-03-23

La vortis pasifica de plastica crese rapida

Un colie de plastica flotante en la Mar Pasifica crese rapida. Predises sujesta un cumula de sirca 80 mil tones de plastica en la "vortis de dejetadas" entre California e Hawaii. Esta mesura es plu ca la des-sincuple de lo cual on ia reporta a ante.

Dejetadas deveni colieda en sinco rejiones de mar, de cual la plu grande es esta, en la norde de la Mar Pasifica. Rexercores ia usa barcos e aviones per mapa esta parte, do corentes jirante e ventas causa la converje de dejetadas, incluinte plastica, alges e plancton.

Sua labora de tre anios mostra ce la contamina par plastica "crese esponental e plu rapida ca en la acua ensircante", la ecipo internasional ia dise.

8% de la masa de plastica flotante en un area de 1,6 milion cilometres cuadrida es microplastica. De sirca 1,8 milion milion pesos de plastica, alga es plu grande, incluinte redes de pexa, juetas, e an un seja de vason.

La usa de esploras airal, e no sola de barcos, esplica cisa partal perce la estimas nova es plu alta. Ma la diferes pote es ance causada par un crese de la contamina par plastica en la tempo pos studias presedente.

Plastica puxada a mar pos la trematera e tsunami en Japan en 2011 representa cisa an 20% de la cumula resente, la rexercores sujesta.

En cada anio, miliones de tones de plastica entra a la mar e vaga. Algas junta se a sistemes plu grande de corentes sirculinte, do los descomposa a microplastica – pesos pico cual pote es comeda par viventes maral.

2018-03-22

Zuckerberg responde sur esplota de datos de usor

Mark Zuckerberg, la fondor de Facebook, ia confesa ce sua rede sosial ia fa eras causante la esplota de la datos de miliones de usores par un compania conselante. On ia acusa Cambridge Analytica de malusa la datos per benefica clientes political.

En un declara, Zuckerberg ia dise ce "un rompe de fida" ia aveni. En un intervisa plu tarda, el ia demanda per pardona e ia promete reata contra "apes vil", ajuntante ce el va atesta ante la Congresa SUA "si lo es la ata coreta".

Prometente cambia la situa afin apes no pote recolie tan fasil informas de usor, el ia dise: "Nos es encargada per proteje vosa datos, e si nos no pote, alora nos no merita servi vos."

En 2014, Facebook ia invita usores a descovre sua tipo de personalia par un cuiz developada par un rexercor de la Universia de Cambridge. La datos de sirca 270 mil usores ia es colieda, ma ance alga datos publica de la amis de la partisipores.

Entretempo, Facebook ia cambia la cuantia de datos cual un ap pote recolie en esta modo, ma un denunsior, Christopher Wylie, dise ce la datos de sirca 50 milion persones ia es ja colieda ante esta per Cambridge Analytica – un compania en London sin relata con la Universia de Cambridge. El reclama ce la datos ia es vendeda a la compania, cual ia usa los per jenera profiles psicolojial de persones e distribui informas suportante la campania presidental de Donald Trump.

La dirijor xef de la compania, Alexander Nix, ia es ier suspendeda. On ia rejistra secreta un comenta par el ce Cambridge Analytica ia maneja la campania dijital de Trump en la elejes de 2016 en la SUA.

La rexercor, Dr Aleksandr Kogan, ia dise ce a acel tempo la compania ia informa el ce tota cual lo ia fa es legal, e ce aora lo e Facebook usa el como un portaculpa.

2018-03-21

La resinia de la presidente miama

Htin Kyaw, la presidente de Miama, ia resinia. En menses resente on ia deveni plu consernada sur la sania de la om de 71 anios, cuando el ia pare frajil a avenis ofisial.

El ia es inaugurada como presidente en 2016 pos elejes cual ia fini desenios de gida militar. Ma el ia es esensal un gidor per rituos, con ce Aung San Suu Kyi, la gidor oposante, servinte como presidente par fato.

Un declara a la paje de Facebook de la presidentia ia dise ce Htin Kyaw desira "un reposa". La vispresidente, Myint Swe, un jeneral pasada, va servi como presidente asta cuando on eleje un nova ante la pasa de sete dias.

Suu Kyi, ci ia es prisonida tra anios su la junta militar, es proibida de prende la posto. Un frase en la consititui – jeneral regardada como desiniada con intende de impedi el – dise ce no person con enfantes de un otra nasionalia pote deveni presidente. El ia ave du enfantes con sua sposo brites (ci es aora mor).

Como enfante, Htin Kyaw ia es la ami de Suu Kyi, sua conselor tra tempo longa, e sua gidor de veculo tra alga tempo. On ia regarda Htin Kyaw como cuieta e fidable.

La Alia Nasional per Democratia de Suu Kyi ia vinse inondante en elejes en novembre 2015. Ma la partito ia es segueda par problemes pos sua prende de potia, de cual la plu evidente es la crise en la provinse Rakain.

Deses de miles de migrores rohingia ia fuji de un colpa militar provocada par atacas matante contra polisierias. La governa ia dise ce la opera es dirijeda a persones combatosa, ma sua estende ia leva acusas de jenoside.

La popularia global de Suu Kyi ia cade rapida, e el ia trova ce el es sempre plu isolida par sua aliadas internasional pasada.

2018-03-20

La mori de la mas final de la rinoseros blanca de norde

La mas final de la rinoseros blanca de norde ia mori pos menses de maladia. Sudan, ci ia ave 45 anios, ia abita en la Conserveria Ol Pejeta en Cenia. On ia adormi el a lundi pos un mali notable de sua problemes de senese.

Sua mori lasa sola du femas vivente – sua fia e neta – de la suspesie en la mundo. Atentas de usa Sudan per continua la suspesie con los ia fali. Esperas per conserva esta rinoseros foca aora a tecnicas de fertili en vitro (FEV).

On ia crea un conta per la mas en Tinder, la ap de cortea, en la anio pasada, no per trova ama, ma per aida finansia la developa de FEV per rinoseros. La conta ia gania per el fanes tra la mundo, ci lamenta aora sua mori e la prosimia de rinoseros blanca de norde a estingui.

Sua materia jenetical ia es colieda a lundi per suporta atentas futur de reprodui rinoseros blanca de norde par tecnolojias avansada selulal, usante semin conservada e ovos de la femas Najin e Fatu.

La rinosero mas, de ci sua eda ia coresponde a 90 anios per un umana, ia es tratada per cambias dejeneral en sua musculos e osos, combinada con multe feris de pel. El no ia pote sta, e ia sufri en sua oras final, regretable.

2018-03-19

Puigdemont proposa la model suiz de autonomia

Carles Puigdemont, la gidor de la separadistes en Catalunia, dise ce un majoria de la catalanes ta suporta cisa un autonomia federal simil a lo en Suiz, en loca de un autonomia completa.

Sua comentas en Geneve pare sujesta un cambia de sua suporta presedente per autonomia completa. La presidente pasada ia fuji a Beljia pos la declara de autonomia par Catalunia, seguente un vota disputada en otobre pasada.

La rejion ajitada resta direta governada par Madrid, an si en elejes en desembre, partitos favorente autonomia ia gania un majoria de sejas.

Espania vole deteni Puigdemont sur acusas de rebela. Cuatro plu gidores catalan, incluinte la vispresidente pasada Oriol Junqueras, es ancora en prison per sua parte en la vota de autonomia en otobre.

La autonomia de Catalunia resta pausada, car Madrid refusa desprisoni la om nominada per gida la governa rejional de Catalunia.

Puigdemont, parlante a un festa de film per diretos umana internasional en Geneve, ia sujesta ce autonomia completa no es la sola posible. "Cisa, entre otra modos, la model suiz es la plu efetosa e atraente," el ia dise. Suiz ave un governa multe desentrida, en cual governas rejional, nomida cantones, ave un cuantia notable de potia.

2018-03-18

Srilanca emerji de sua state de crise

Srilanca ia sutrae un state de crise ajuntada a 6 marto en responde a violentia contra comunias muslim. Du persones ia es matada, cuasi 450 casas e botecas de posese muslim ia es danada, e 60 veculos ia es ardeda en atacas en la distrito sentral de Kandy.

On ia introdui proibis de sorti e de redes sosial per atenta redui la tensa.

Violentia ia crese en la pais de majoria budiste de pos 2012, e on alega ce lo es nurida par grupos budiste estremiste. Los ia acusa muslimes de forsa persones a converti a islam e de vandali locas arceolojial de budisme. Deses de locas relijial muslim ia es ance danada.

Asta aora, la polisia ia aresta cuasi 300 persones, incluinte un gidor de organiza budiste estremiste sur ci los suspeta ce el ia inisia la violentia.

En la state de crise, autoriosas ia pote aresta e deteni suspetadas per periodos longa si los ia judi ce esta es nesesada. Sentos de soldatos ia es asiniada a la rejion de Kandy, e gas lacrimojen ia es usada cuando alga grupos ia continua defia la proibis de sorti.

Presidente Maithripala Sirisena ia anunsia par tuita ce el sutrae la state de crise a soldi, pos evalua la securia publica. Plu temprana en la semana, on ia sutrae ance proibis nasional contra locas ueb de redes sosial, incluinte Facebook.

Esta ia es la ves prima en sete anios cuando Srilanca ia adota un state de crise. La pais ia es en tal state tra cuasi tre desenios cuando la governa ia combate rebelores tamil en la gera interna cual ia fini en 2009.

2018-03-17

Protestas grande contra la governa slovensce

En Slovensco, sirca 65 mil persones ia partisipa en protestas antigoverna a la semana tre en segue. Coleria sur la mata de jornaliste Ján Kuciak e sua prometeda Martina Kušnírová ia provoca la ministro xef Robert Fico a resinia a jovedi.

Fico ia presenta sua colaboror Peter Pellegrini como sua sustitua, e ia promete resta political ativa. Protestores dise ce Fico va continua aplica potia e los esije elejes tempranida. Fico ia dise ce sua governa aliada ave autoria per servi tra tota sua periodo de cuatro anios, cual fini en 2020.

Kuciak ia investiga froda political alegada, liada a crimin organizada italian. Sua artcle final, no completida, ia es publicida pos sua mori en la tarda de febrero, tisante la coleria publica contra un governa jeneral regardada como falinte fronti la froda.

Protestas ia aveni ier en 35 sites tra la pais. La protesta en Bratislava en la semana pasada ia es probable la plu grande en Slovensco pos la cade de comunisme, con plu ca 40 mil partisipores. Ier la fola ala ia es an plu grande.

2018-03-16

Suris fuji en la rejion asejada Guta Este

Plu ca 12 mil persones ia fuji de un vila en la rejion Guta Este cual ensirca Dimashq, la capital de Suria, con ce soldatos de governa avansa. A presente, la rejion es asejada e ocupada par rebelores.

Omes, femes e enfantes, portante covreletos e sacos, ia parti de Hamuria, cual ia deveni intensa bombardada en dias resente. Esta es la parti la plu grande de la enclave pos cuando la militar ia aumenta sua campania de resaisi lo en la mense pasada.

A la mesma tempo, 25 camiones portante comables ia entra a la vila Duma. La Comite Internasional de la Crus Roja ia dise ce la aida es mera un parte peti de lo cual es nesesada en Guta Este, do cuasi 400 mil persones fronti un manca sever de comedas e furnis medical.

La gera interna en Suria comensa aora sua anio oto. Lo ia lasa plu ca 350 mil persones mor, 1,5 milion otras con descapasias permanente, e 11 milion deslocada e en e estra la pais. Plu ca 1100 persons ia es matada de pos la intensi de la bombarda de Guta Este par la governa e sua aliadas a 18 febrero.

Pos cuando soldatos ia penetra la linias de rebelores estra Hamouria a la note de mercurdi, la governa ia identifia un via tra cual sitadanes pote parti. Ier, plu ca 12 mil persones ia usa la momento per fuji en dirije a un punto de controla governal en Adra.

"Nos ia es trapida en la suteras e no ia osa sorti," un om ia comenta en la anteurbe de Hamouria. "Nos ia pote fa no cosa… On ia ave no comables."

2018-03-15

La Rena Unida esclui diplomatas rusce

La Casa Blanca dise ce lo "sta en unia" con la Rena Unida, "sua aliada la plu prosima", e suporta la deside de esta de esclui 23 diplomatas rusce.

Theresa May, la ministro xef brites, ia anunsia la esclui de la diplomatas pos cuando Moscva ia refusa esplica como un cimical antinervo ia es usada a un spior pasada en la Rena Unida. Moscva continua nega tota envolve en la ataca.

Un portavose per Donald Trump ia acusa Rusia de sumina securia, disente ce la SUA vole serti ce "esta spesie de ataca odiable no aveni denova", e descrivente la esclui de la diplomatas como "un responde justa":

"Esta ata la plu resente par Rusia conforma a un model de condui en cual Rusia iniora la ordina internasional regulada, sumina la autonomia e securia de paises tra la mundo, e atenta suverti e desonora instituidas e prosedes democrata de la Ueste."

La spior pasada Sergei Scripal e sua fia Iulia resta estrema malada en ospital pos es trovada colasada sur un banca en Salisbury, England a 4 marto.

May ia comenta ce on ia identifia la cimical usada en la ataca contra los como parteninte a un grupo de antinervos developada par Rusia, conoseda como Novitxoc. El ia dise ce on ave "no otra conclui" ca crede ce Rusia es "culpable" per la venenis.

Ance parlante a la Consilio de Securia de la Nasiones Unida, un ambasador brites, Jonathan Allen, ia acusa Rusia de rompe sua obligas su la Acorda de Proibi de Armas Cimical. En responde, la ambasador rusce, Vasili Nebenzia, ia nega la envolve par Moscva en la ataca e ia esije un "demostra material" de Britan per suporta sua acusa.

Sergei Lavrov, la ministro rusce de esternas, ia dise ce Moscva va coopera en la caso si lo reseta de la Rena Unida un solisita formal per clari su la Acorda de Proibi, cual defini un limita de des dias per un responde.

Ma Rusia ia refusa sasia la limita definida par la Rena Unida per esplica la usa de la antinervo, provocante May a anunsia la esclui de diplomatas e otra medias intendeda per envia "un mesaje clar" a Rusia.

2018-03-14

La vive de Stephen Hawking, 1942–2018

La fisiciste famosa Stephen Hawking ia mori a la eda de 76 anios. El ia mori pasosa a sua casa en Cambridge, England en la oras temprana de oji.

El ia batalia la maladia de motoneuron per deveni un de la siensistes la plu respetada e bon conoseda de sua tempo. Un om de umor grande, el ia deveni un ambasador poplal per siensa e ia atende sempre ce sua laboras es jeneral asedable.

Sua libro Un istoria consisa de tempo ia deveni un bonvendeda nonprobable, an si on no sabe cuanto persones ia susede leje asta la fini de lo. El ia apare en alga programes popular televisada, e ia presta sua vose sinteseda a rejistras diversa.

Stephen William Hawking ia nase en Oxford, England a 8 janero 1942. Sua padre, un biolojiste rexercante, ia move de London con sua madre per evade la bombi deutx. Hawking ia crese en London e St Albans e, pos gania un diploma de grado prima en fisica a Oxford, ia vade a Cambridge per fa rexercas posgraduada en cosmolojia.

Como adolesente, el ia gusta es un cavalor e remor, ma cuando el ia es a Cambridge on ia diagnose el con un forma de maladia de motoneuron par cual el ia deveni ultima cuasi intera paraliseda. En 1964, cuando el ia prepara sposi sua sposa prima, Jane, sua dotores ia suposa ce el ave no plu ca du o tre anios de vive restante.

Ma la maladia ia developa plu lenta ca on ia previde. La duple ia ave tre enfantes, e en 1988 – an si alora capas de parla sola con usa de un sintesador de vose, pos un traceotomia – Hawking ia completi scrive Un istoria consisa de tempo, un gida a cosomolojia per nonfisicistes. Lo ia vende plu ca des milion copias, an si sua autor ia es consensa ce on ia descrive lo como "la plu popular de la libros nonlejeda".

El ia descovre la fenomeno cual on nomi aora la radia de Hawking, en cual bucos negra emete enerjia e desapare. El ia es famosa per sua capasia nonusual de imajina solves siensal sin calcula o esperimenta.

Ma la plu atende ia es cisa atraeda par sua "teoria de tota", cual ia sujesta ce la universo evolui seguente leges bon definida. El ia dise: "Esta colie completa de leges pote dona a nos la respondes de esta demandas: Como la universo la comensa? A do lo vade, e esce lo va ave un fini? Si tal, como lo va fini? Si nos trova la respondes de esta demandas, nos va conose vera la mente de Dio."

La fama de Hawking ia es atestada an par La Simpsones – el ia es imajida como bevinte a un bar con Homer, e sujestante ce el considera fura la idea de Homer ce la universo ave la forma de un donut.

El ia apare ance como se mesma en un episodio de la serie comedial Nana Roja de la BBC, e como un ologram de se en Star Trek: La jenera nova. La bande roc Pink Floyd ia usa sua vose sinteseda famosa en la introdui de un canta en sua album The Division Bell de 1994.

Nonprevenida par sua state medical, el ia continua sua labora como Profesor Lucasal de Matematica a la Universia de Cambridge, e en 2001, el ia publici sua libro du – La universo en un casca de noza.

El ia crede ce sua maladia ia trae alga beneficas, disente ce ante cuando el ia developa lo, el ia es noiada par la vive. Ma sua state ia fa ce el deveni nonevitable dependente de otras. El ia loda comun sua sposa, ci ia cura el tra plu ca dudes anios, e amis e relatadas ia es xocada cuando el ia divorsa el per un de sua curores, ci el ia sposi en 1995.

Ja en 2000, Hawking ia es un visitor frecuente a la departe de urjentes en la Ospital Addenbrooke en Cambridge, xercante trata per feris diversa. La polisia ia interoga persones sur alegas ce el ia sufri maltratas parlada e fisical tra alga anios. On ia sabe ce el tende gida sua seja rolante eletrical en modo cuasi iniorante peril, e Hawking ia insiste ce sua feris no es causada par maltrata. On no ia litiga.

En 2007, el ia deveni la tetraplejica prima ci esperia lejeria completa, en un avion spesial desiniada per simula la manca de gravita. El ia dise ce el ia fa esta per coraji la interesa a viaja spasial:

"Me crede ce la vive sur Tera fronti un risca sempre cresente de deveni eliminada par un desastre como un gera nucleal subita, un virus jenetical injeniada, o otra periles. Me pensa ce umanas ave no futur si los no vade a spasio. Donce me desira coraji la interesa publica a spasio."

En 2014, la filma La teoria de tota ia es publicida, fundida en un raconta par Jane Hawking de sua cortea e sposia. Hawking mesma ia encontra la ator Eddie Redmayne en sua preparas per la rol de la siensiste.

En un serie televisada per Discovery Channel, el ia dise ce on ave bon razonas per suposa ce la vive intelijente esiste en otra partes de la universo, ma ia averti ce estrateranes visitante ta fura cisa la recursos de la Tera.

El ia scrive ce el ia ave la maladia de motoneuron tra cuasi tota sua vive adulte, ma el ia clari ce lo no ia impedi el de un familia atraosa e laboras susedosa. "Lo mostra," el ia dise, "ce on no debe perde la espera."

2018-03-13

Un avion cade en Kathmandu

Un avion portante 71 pasajores e ecipores ia cade en atera a la airoporto Tribhuvan en Kathmandu en Nepal, matante 49 persones. Pos estingui la focon, salvores ia tira corpos de la ruina negrida de la avion, cual ia es operada par la airocompania US-Bangla.

La compania culpa la controla de trafica airal, ma la airoporto dise ce la avion ia prosimi de dirije erante. La vola BS211 ia verje de sur la atereria en la posmedia ier.

Un rejistra de la conversa entre la pilote e la controlores de trafica a poca minutos ante la cade sujesta un malcomprende sur cual fini de la atereria ia es preparada per esta avion. On oia un controlor ci dise: "Me repete, turna!"

La avion, volante de Dhaka, la capital de Bangladex, ia ave 17 anios. Atestores ia descrive un pum grande e un secute violente de la veculo. Pasajores ia plora e ia repete frases en grupo. Dudes-du persones ia survive, e es aora en ospital: 11 nepalis e 11 banglas.

Esta es la desastre avional la plu mal en Nepal de anios. La nasion himalaian ave un istoria miscada en esta relata, con plu ca 70 cades envolvente aviones e elicotores pos 1949, cuando la avion prima ia atera ala. On ia atribui la plu de la asidentes a mal clima, pilotes nonesperiosa e manteni nonsufisinte.

2018-03-12

Un vota colombian no suporta la FARC

La partitos conservaliste de Colombia, oposada a la acorda de pas de 2016 con rebelores FARC, es a punto de gania la elejes en la pais.

La vota ier ia es la prima en cual la gerilias FARC pasada, aora un partito political, ia partisipa.

Pos conta plu ca 90% de la votas, la partito Sentro Democrata de Álvaro Uribe ia gania la plu sejas.

La FARC no ia reseta multe votas, seguente la espetas – ma la acorda de pas garantia alga sejas per lo. Lo ia reseta sola 0,4% de la votas, ma va reseta sinco sejas en cada de la du salones de parlamento.

La partitos destra ia susede la plu, ma no ia ateni un majoria jeneral, an tal.

On previde anunsia la resultas ofisial final a ora plu tarda oji.

On ia reporta ance sesiones de vota plu pasosa ca en anios presedente, cuando la aveni ia es malida par violentia a veses.

2018-03-11

Impostas plu alta per companias minante en RD Congo

La Republica Democrata de Congo ia deside alti la impostas de companias minante, an con oposa forte par companias internasional. Presidente Joseph Kabila ia suscrive un codigo nova de mina, legalinte lo, a venerdi.

La pais es la produor la plu grande en Africa de cupre e cobalto, un composante esensal en pilas de telefonetas.

Companias minante internasional ia oposa la lege, disente ce sua operas en RD Congo va sesa es profitosa.

Alga dirijores xef ia vola a Kinshasha, la capital congoles, en esta semana, esperante convinse Kabila a cambia sua opina. Los ia razona ce la lege nova va impedi investis futur e va viole acordas esistente.

Ma la governa ia acorda considera sua consernas en modo individua, e labora con los per reali la codigo nova.

Tra anios, RD Congo ia parla sur cambia sua codigo de mina de 2002, sur cual lo ia crede ce lo pone tro multe profitas en la manos de companias stranjer. Sua industria de mina – cual produi ance diamante, tantalo, stanio e oro – es la fonte la plu grande de revenu esportal en la pais.

La lege, asetada par parlamento en janero, va dupli la paias cual produores de tota minerales debe dona a la governa.

La nasion es povre, ma rica con minerales, e furni plu ca 60% de la cobalto per la mundo. La custa de cobalto ia deveni plu ca duple en la anio pasada par causa de un esije cresente per autos eletrical, cual nesesa cobalto per sua pilas.

La imposta de cobalto ta pote ance deveni plu ca cuatruple si la governa deside clasi lo como "un sustantia stratejial".

2018-03-10

Orolojos es retardada par un disputa political

Esce tu deveni tarda per labora e culpa tua veliador eletrical? La razona vera es cisa ce la rede eletrical de Europa es afetada par un disputa entre Cosovo e Serbia.

La organiza cual representa companias de transmete eletrical tra 25 paises european ia dise ce orolojos a lado de leto ia lenti par asta ses minutos pos la media de janero. Tempadores de caldi sentral e orolojos de fornos es ance afetada, ma no computadores o telefonetas.

Paises de Espania a Turcia e de Polsce asta Nederland parteni a un area grande en Europa cual es liada en un rede eletrical cual opera a un frecuentia sincronida. Esta frecuentia regula la cronometri en alga aparatos.

En la periodo de crise, Cosovo no ia jenera un cuantia sufisinte de eletrica per sua esije. Serbia es legal obligada a sasia esta esije, per manteni la stablia de la rede european. Ma car Cosovo e Serbia disputa esta situa – como ance multe plu temas relatada con la separa uniladal par Cosovo de Serbia a des anios ante aora – Serbia no ia reali sua obliga.

Esta manca de responde puntual ia devia la frecuentia, e la redui ia afeta orolojos. Otra paises, pos perde reservas en cuantia de 113 cilovate-oras, xerca un compensa.

Per remedia la ecuilibra tra la continente, on debe jenera enerjia suprapasante e introdui lo a la sistem per alga tempo.

Tu pote ajusta manual tua orolojos, ma sua retarda va sesa automata pos la restabli de la rede.

2018-03-09

Corea Norde es dedicada a desnucleali

On ia anunsia ce Kim Jong-un, gidor de Corea Norde, e Donald Trump, presidente de la SUA, va fa un consenta personal en maio, pos menses de enemia mutua.

La informa ia es furnida par ofisiores de Corea Sude pos discutes con Trump a la Casa Blanca. Los ia comunica un mesaje de Kim, disente ce el es "dedicada a desnucleali".

Moon Jae-in, presidente de Corea Sude, ia dise ce la anunsia "ia veni como un miracle". El ia comenta: "Si Presidente Trump e Dirijor Kim consenta pos un confere de xefes intercorean, la desnucleali completa de la Penisola Corean va entra forte a la bon curso."

La move ia aveni a alga dias pos un consenta de un delega de Corea Sude con Kim en Pyongyang, Corea Norde.

Parlante estra la Casa Blanca pos discute con Trump, Chung Eui-yong, avisor de securia nasional de Corea Sude, ia comunica un mesaje ce Kim ia "promete ce Corea Norde va asteni de tota plu probas nucleal o de misiles".

Trump ia dise ce la developa representa "progresa eselente" ma ce punis a Corea Norde va resta ativa asta cuando on ateni un acorda firma.

La ambasador de Corea Norde a la Nasiones Unida ia dise ce "la deside corajosa" de Kim va aida securi "pas e stablia en la Penisola Corean e la rejion de Asia este".

On ave ancora no indica do la discutes Trump–Kim va aveni, ma locas probable inclui Beijing e la zona desmilitarida a la frontera corean.

Corea Norde es isolida tra desenios par causa de sua maltratas bon documentida de diretos umana e sua laboras per reali armas nucleal, contra leges internasional. Lo ia fa ses probas nucleal, e ave misiles capas de ateni la SUA. Lo dise ce estas es nesesada per serti sua survive.

Ma la ospita par Corea Sude de la Juas Olimpial de Inverno ia crea un posible nonespetada per diplomatia. Discutes rara entre la du Coreas ia aveni per fasili la presentia coreografida de Corea Norde.

En esta semana, Corea Sude ia fa discutes importante con Kim Jong-un en Pyongyang, e ia reveni disente ce la Norde va abandona sua armas nucleal si lo senti ce lo ave no razona per reteni los.

La anunsia par Chung ia conteni cuatro elementos xef: (1) Kim es disposada a consenta con la presidente SUA; (2) Corea Norde es "dedicada a desnucleali"; (3) lo va sesa tota probas nucleal e de misiles; (4) lo comprende ce eserses militar de la SUA e Corea Sude "nesesa continua".

Corea Norde ancora no ia promete un abandona completa de sua armas nucleal, e on no sabe esata cual lo esije par intercambia. Ja a ante, la Norde ia sesa sua probas a tempo de discutes, ma ia recomensa cuando lo ia perde sua pasientia o ia senti ce lo no reseta lo cual lo esije.

2018-03-08

Un linia de boves colpada par lampo

Un cultivor australian ia trova ses boves mor, reposante en linia, en un situa cual espertas ia atribui a un colpa de lampo. La animales ia es descovreda longo la serca de filo spinosa de un ensirca en Queensland en la semana pasada, a alga dias pos un tempesta forte.

Dr Sabrina Lomax, un rexercor sur condui e bonstate de bestias a la Universia de Sydney, ia dise ce el crede ce tota ses boves ia es tocante la serca cuando los ia mori.

"En esta asidente strana, lo ia es mera un posa nonoportun de la animales en relata a la lampo," Lomax ia esplica. "Los ia mori direta par un ataca intensa de cor."

La posesor de la boves, Sr Derek Shirley, ia descrive se como "aturdida" par la descovre. Sua cultiveria es a sirca 70 cilometres a sude de Brisbane. El ia pensa inisial ce algun ia veneni la bestias.

"On simple no vide un grupo de los aliniada longo la serca," el ia comenta. "On ia ta pote cuasi estende un regla longo los."

Dr Karl Kruszelnicki, un comentor de siensa, ia sujesta ce la boves ia es cisa xocada cuando la lampo ia colpa la tera. "La campo eletrical entra tra sua gamas posterior, tra la corpo, e los esperia un ataca de cor," el ia dise.

En 2016, plu ca 300 renos ia es matada en un tempesta de lampo en Noria.

2018-03-07

Un frontera nova per Timor Este e Australia

Australia e Timor Este ia suscrive un trata istorial sur un frontera permanente en la Mar Timor. La acorda fini un disputa de un desenio entre la visinas sur diretos a la reservas rica de petrolio e gas en acel mar. Timor Este, un de la nasiones la plu povre de mundo, va gania aora la majoria de revenu futur.

La paises ia fa la suscrive en la xeferia de la Nasiones Unida en York Nova, pos negosias en la corte internasional de arbitra.

Pos cuando Timor Este ia separa de Indonesia en 2002, no frontera permanente de mar ia es fisada entre Australia e la nasion nova. En loca, la du lados ia acorda un frontera tempora, ma Timor Este ia declara plu tarda ce los ia es nonjusta obligada a aseta lo.

Lo ia crede ce sua visina plu potiosa ave un divide nonjusta grande de asede a campos de petrolio e gas de cual on estima sua valua como deses de miles de miliones de dolares.

En 2016, Timor Este ia disputa la acorda en la Corte Permanente de Arbitration en Den Haag. La arbitra entre la nasiones ia fini en la semana pasada.

La acorda nova defini la frontera a la punto media entre la paises, seguente regulas de la Nasiones Unida sur lege maral. Australia ia presa per un frontera a la borda de sua plano continental, con frontera plu prosima a Timor Este.

Como resulta de la acorda, Timor Este va reseta a la min 70% de la campo la plu grande de petrolio. A ante, revenu ia es egal divideda entre la du paises. Australia va perde sua autoria en campos de petrolio aora compartida par ambos.

La economia de Timor Este depende forte de gas e petrolio, ma resente sua recursos ia comensa deveni consumada.

2018-03-06

On abandona un atenta de asende K2 en inverno

Trepores polsce es obligada a cansela sua atenta de deveni la primas ci asende la monte du la plu alta de mundo en inverno. Neva forte ia dana campas e aparatos sur K2, un monte cual sola sirca 300 persones ia susede asende.

Anunsiante la deside, Krzysztof Wielicki, la gidor de la ecipo, ia dise ce securia es la conserna xef. El ia es la person prima ci ia asende Monte Everest en inverno, en 1980.

La cansela segue un divide en la grupo, cuando un membro ia atenta ateni solitar la apico en lo cual on ia descrive como un atenta "completa suisidal".

La ecipo ia ariva en Pacistan en la tarda de la anio pasada per prepara per la asende. Temperatures sur la monte cade comun a -55°C en inverno.

Un cade forte de neva prosima a la apico ia covre cordones lasada par trepores presedente e ia dana tendas en via. Plu, on ia previde un mal clima per la dias seguente, e la neva densa ia crea un risca de avalanxas.

En la tarda de febrero, Denis Urubko ia deveni frustrada con la mision pos retardas, incluinte un ves en janero cuando el e un otra ecipor ia salva un trepor franses en la note. La om de 44 anios ia comensa asende solitar a 25 febrero, ma ia abandona sua atenta pos spende un note en clima sever a 7200 metres de altia.

K2, ance nomida Txogori, es situada a la frontera de Xina e Pacistan, e es la monte la plu alta en la cadena Caracorum. Lo es un de la 14 montes teran con plu ca 8000 de altia, e la sola cual on ia asende nunca en inverno.

Prima asendeda en 1954, lo es conoseda como la Monte Savaje car la trepa es tan difisil. 77 persones ia mori en atenta lo.

2018-03-05

Xina aumenta sua bujeta militar

Xina ia anunsia un bujeta militar de 1,11 milion milion iuanes ($175 mil milion) per la anio veninte. La soma es plu par 8% ca en la anio presedente, e ia es anunsiada par Li Keqiang, la ministro xef, a la comensa de la consenta anial de parlamento en Beijing.

Li ia anunsia ance un gol de crese economial par 6,5%.

On previde ce la Asembla Nasional de la Popla (ANP) va sutrae la limita presidental de du periodos, tal ce Xi Jinping pote resta en sua posto per tempo nonrestrinjeda. La cambia, longa espetada ma controversa an en Xina, aida forti la state de Xi como la gidor la plu potiosa pos Mao Zedong.

Miles de legores xines a la consenta de lundi ia esplode en aplaudi cuando on ia leje a la salon la proposa de elimina la limita de du periodos. La vota sur esta va aveni a 11 marto; on previde ce lo va es asetada par acorda unida.

La ANP es jeneral un parlamento de disesi, aprobante desides ja fada par la Partito Comuniste. Lo ave sirca 3000 delegadas, representante tota provinses e rejiones, ci es elejeda en modo democrata en teoria, ma en pratica longo la vole de la Partito.

La congresa aveni en securia sever. On sutrae de la capital oposores conoseda ante la comensa.

La governa ia dise ce lo va foca a tre goles xef en la anio veninte: redui la esposa de Xina a risca finansial, controla la contamina de la ambiente, e continua combate la povria.

En sua reporta abrinte a la parlamento, Li ia anunsia la bujeta militar nova, disente ce la armada debe es "forte como petra" fasante "cambias profonda en la campo de securia nasional".

On vide la aumenta como un bon indica de la aspiras stratejial de Xina en cuando lo continua moderni sua armada – la plu grande de mundo – e developa sua infrastrutur en rejiones disputada, como la Mar Xina Sude e sua fronteras himalaian.

An si espetada, la crese de spende va ansi plu la competores rejional de Xina.

2018-03-04

Vultures evita Portugal par manca de caronia

Un rexerca nova mostra ce vultures tende aora evita Portugal e favore Espania. Pos marca 71 avias de caronia tra tre anios, rexercores ia nota ce sola 13 de los ia vade a Portugal en acel periodo.

La causa es relatada a ensefalopatia sponjiforma boval, comun nomida la maladia de boves demente. En Portugal, leges sever aida preveni la estende de esta maladia par obliga cultivores a sutrae la corpos de bestias mor de sua campos sin pausa e presenta los per arde o entera. Per esta razona, forajores no pote usa los per nuri se.

En 2011, Espania ia esplota un cambia de regulas de la Uni European per permete ce consilios rejional deside esce on pote lasa corpos mor su la sielo – spesial car la pais es la abitada de 90% de la avias de caronia en Europa.

Pos alora, siensistes rexercante ia nota un declina forte de la vultures brun e negra cual traversa la frontera a Portugal. Sua studia trova ce esta es probable relatada a la dispone de corpos mor, e no a la clima o jeografia.

La rexercores dise ce spesies perilida paia la custa de la "paradox de regulas diversa" en la Penisola Iberian. Los sujesta ce un armoni de la regulas es esensal per la recovre de la popla nativa de vultures portuges, cual es aora cuasi estinguida.

La Sosia Portuges per la Studia de Avias campania per areas separada e selida do cultiverias pote depone corpos de bestias, prosima a la colonias la plu grande restante de vultures en la pais. Avias ia perde sua abitadas ance par la focones savaje de la estate pasada.

2018-03-03

Violentia etnical reapare en RD Congo

Plu ca 33 persones es matada en violentia etnical nova en la Republica Democrata de Congo. Turbas ia eruta entre la comunias hema e lendu en Ituri, un provinse norde-este. La atacores ia es ultima forsada a via par soldatos de securia.

De la media de desembre, violentia ia mata plu ca 100 persones en la provinse.

La turba entre la hemas, tipal pastores de boves, e la lendus, tipal cultivores de tera, es un de alga geras en RD Congo cual ia produi un cuantia vasta de refujadas e ia desloca persones en la du anios pasada. On estima ce sirca 200 mil persones ia es obligada a fuji de sua casas par la violentia en sola la rejion Ituri.

Un portavose per la armada local ia descrive un situa de venja entre la du comunias, e ia reportaVi ce alga persones ia es destestida.

La hemas e lendus ia batalia per controla de tera. Miles ia mori en combate entre la du grupos entre 1997 e 2003, un tempo cuando RD Congo ia es a la sentro de lo cual alga oservores nomi "la gera mundal de Africa", car alga otra paises ia es envolveda.

La batalia ia es nurida par la ricia mineral vasta de Congo, e la gera ia prende asta ses milion vives, o direta par combate o par maladia e malnuri.

Ajenterias de aida averti sur la custa de violentia en Ituri. UNICEF dise ce plu ca 46 mil enfantes es refujadas, e la Consilio Norsce de Refujadas, 4,5m persones en la pais nesesa aida umaniste.

2018-03-02

La urso sibirsce fa caos tra Europa

Partes grande de Europa ia esperia un plu note jelada. La neva e ventas ia clui vias, ferovias e scolas, e ia obliga la cansela de sentos de volas.

55 persones ia mori par causa de la clima; multe de los ia es sin casa en Polsca. La Organiza Mundal de Sania ia averti ce persones povre, sin casa o migrante va es la plu afetada par la fria. En Paris, on ia abri refujerias per la sirca 3000 persones sin casa de la site.

La fria noncomun afeta locas tan sude como la Mediteraneo. Neva ia apare an sur la plaias de la Riviera Franses. Er prepara per sua cade de neva la plu forte de desenios, en cuando Tempesta Emma prosimi de la sude.

On ia dona nometas diversa a la jela. En Nederland on nomi lo "la urso sibirsce"; en Sveria lo es "la canon de neva"; e en la Rena Unida on refere a "la bestia de la este".

La airoporto en la site Geneve en Suiz ia clui a la matina ier, ma ia reabri pos usa de scopinevas per desbloci la atereria. Ance la Airoporto Schiphol de Amsterdam ia es afetada par la ventas jelante, e desuples de volas ia es canselada o posponeda.

En Frans, sirca 2000 motoristes ia es encaliada sur un autovia prosima a la site Montpellier. Alga de los ia es trapida tra 24 oras. On ia cansela alga trenes de Eurostar entre Bruxelles, Paris e London.

Ucraina, do on previde plu nevones per la dias veninte, trova se en un disputa nova con Rusia sur furnis de gas. La corpora rusce jigante Gazprom ia dise ce, par manca de acordas completida, lo no va recomensa distribui gas como espetada.

La compania ucrainsce Naftogaz ia acusa Gazprom de viole sua obliga contratal, e la Comision European funsiona como un ajente entre la du.