2014-02-28

Japan va revista un declara pasada sur sclavos sesal

Japan va formi un ecipo per esamina la avenis gidante a un declara en 1993 cual ia reconose se usa de sclavos sesal en la Gera Mundal Du.

La declara, ce la militaria nasional ia sabe ce on ia obliga femes a deveni sclavos, ia es regardada como un demanda de pardona.

Un gidor pasada ia dise ce cualce revista de esta declara de Kono ta es "asurda".

On estima ce 200 000 femes ia es obligada a deveni sclavos sesal per soldatos en teritorios ocupada par Japan. Multe de los ia veni de Xina e Corea Sude. Alga ia veni de la Pilipinas, Indonesia, e Taiuan.

Migrores african invade un enclave espaniol

Plu ca 200 migrores de Africa susaharan ia entra par forsa a la enclave espaniol de Melilla, en Africa norde, par trepa a traversa de la serca bordal.

Esta es un de la arivas la plu grande de migrores a Melilla en anios resente.

Multe de la arivores ia sufri talias en trepa. Los ia lansa petras, bastos, e botelas a polisiores.

En esta mense, cosas simil ia aveni ja en Melilla e Ceuta, un otra site espaniol en la area.

Miama para la labora de Dotores Sin Bordas en Rakhine

La governa miama ia suspende la operas de un de la ajenterias de aida cual labora en la stato Rakhine, do multe violentia aveni.

Un portavose de la presidente ia alega ce Médecins Sans Frontières (Dotores Sin Bordas) ia es prejudosa e favore la minoria muslim, la rohingias.

La asosia carital es un de la furnores major de aida medical en Rakhine.

Lo ofre aida urjente a desuples de miles de persones rohingia deslocada par violentia resente.

15 persones mori en un asidente de bus en Tai

Un asidente de bus en Tai este ia mata 15 persones, cisa plu, entre ci 13 ia es studiantes.

La bus ia es viajante a Pattaya, un vila costal a sirca 150 cilometres a sude-este de Bangkok, cuando lo ia colpa un camion.

Des-tre studiantes e du enseniores ia mori, e plu ca 30 ia es ferida.

Asidentes de trafica es comun en Tai. Normas basa de securia e stradas folida es cualias contribuinte.

On aresta un maniate indian per froda

Subrata Roy, un de la maniates la plu ostentosa en India, ia es arestada pos sede a la polisia.

La Corte Suprema ia comanda se aresta en mercurdi, pos cuando el ia fali apare ante judores en un caso de froda.

Du companias de se grupo Sahara es acusada de colie 240 mil milion rupis ($3,9 mil milion) tra obligas finansial cual ia es nonlegal.

Regulores de la mercato dise ce Roy ia fali repaia la mone a miliones de investores, an pos un comanda de corte.

Obama anunsia un projeta de aida mases joven de minorias

Barack Obama, la presidente de la SUA, ia demanda un campania nasional per boni la situa de xicos e jovenes negra o latina.

En jovedi, el ia anunsia un projeta nomida "Gardor de me frate", intendeda per vinse la state sosioeconomial cual impedi tal persones de flori.

La Casa Blanca ia clari ce comersias ia promete $150 milion per promove la projeta.

Obama ia disce ce lo es "scandalosa" ce omes negra e latina en la SUA susede tan min ca blancas.

On aresta multe frodores de asiones sin valua

La polisia ia reata contra ganges criminal ci engana persones a investi en asiones sin valua.

Esta opera internasional, la plu grande de sempre contra tal frodas, ia resulta 110 arestas, xef en Espania e la Rena Unida.

La polisia ia dirije se a la scemores de la crimin.

La intende de la investiga de du anios, nomida Opera Rico, es elimina tal froda en Europa.

La Banco Mundal pospone un presta a Uganda

La Banco Mundal ia pospone un presta de $90 milion a Uganda par causa de se lege nova sever contra omosesalia. On ia critica la lege sirca la mundo.

Ofisiores de la banco ia clari ce los vole serti ce la projetas cual la presta suporta no va es malafetada par la lege nova.

La presta ia es intendeda per boni la servis de sania en Uganda.

La lege nova, realida en lundi, forti regulas ja sever sur persones omosesal en la pais.

Fortes rusce bloci airoportos en Crim

Fortes militar de Rusia bloci la airoporto de Sevastopol en Crim, un area de Ucraina.

Arsen Avakov, la ministro de internas de Ucraina, ia descrive se presentia como "un invade enarmada".

Omes enarmada ia saisi ance Simferopol, la otra airoporto xef de Crim, en la matina de venerdi.

Relatas entre Rusia e Ucraina ia deveni tensa pos la despone de Viktor Yanukovych, ci es aora en Rusia. La situa ia es spesial tensa en Crim, la sola parte de Ucraina con majoria rusce.

Boeing crea un telefoneta capas de autodestrui

Boeing ia developa un telefoneta intelijente per comunicas secreta.

Si algun interfere con la telefon, lo sutrae automata tota datos e deveni nonusable.

La compania, plu bon conoseda per se aviones, ia clari ce lo vole aida organizas a "reali se misiones" con datos fidable.

La aparato es nomida Black ("Negra"). Alga otra telefonetas de securia alta apare ance en la mercato aora.

La ambasador SUA a Xina recomenda bonis sur diretos umana

Gary Locke, partinte como la ambasador SUA a Xina, ia recomenda forte ce Beijing boni se nivel de diretos umana e labora con Japan per destensa relatas en la Mar de Xina Este.

En se parla final en la rol, Locke ia espresa se conserna a la crese resente de la cuantia de arestas de jornalistes e ativistes ci protesta pasosa.

El ia dise ance ce ambos Xina e Japan debe evita atas regardable como provocante sur isolas disputada.

Locke ave 63 anios, e es la xines-american prima ci ia servi en la posto.

Un momia en America Sude ia es ritual sacrifiada

Rexercores ia descovre ce un momia fema en America Sude, nonidentifiada a ante, ia es matada en un sacrifia ritual.

Siensistes ia analise la cranio e ia trova indicas de un trauma a la testa cual sujesta ce la fem ia es colpada e ia mori multe rapida.

Plu, un analise de se ADN ia revela ce el ia sufri de un infeta parasital cual on nomi la maladia de Chagas.

Se sintomes ia indica ce no ia ta survive tra un tempo longa an si el ia ta evade se matores.

Angela Merkel dise ce reformi la Uni European no va es fasil

Angela Merkel, la canselor deux, ia dise ce el pote labora con la Rena Unida per reformi la Uni European, ma ce la taxe no va es fasil.

Pos un encontra en Downing Street con David Cameron, la ministro xef de la RU, el ia comenta ce ambos paises pote introdui leges per restrinje la migras de persones ci vole sola reseta aida sosial.

Cameron ia dise ce cambias a la UE es "posible, atenable, e realable".

Merkel ia parla ance a la parlamento brites e ia bevi te con la Rea.

Un spior cuban es librida de prison en la SUA

La SUA ia libri Fernando González, un ajente cuban, de prison. El ia completi se periodo prisonida.

El es la spior du ci on ia libri de un grupo ci ia deveni conoseda como la Sinco Cuban. On ia condena los en 2001 per conspira e otra crimines.

On previde la deporta de González a Cuba en poca dias. El e se colaborores es regardada como eroes ala.

Avocatos prosedente ia dise ce la sinco ia xerca infiltra bases militar de la SUA, e ia spia sur escluidas cuban ci abita en Florida.

Un ospital ganaian debe mostra ce sinco bebes mancante ia mori

En la site Kumasi en Gana, la ministro de sania ia esije ce un ospital produi pronto la corpos de sinco bebes, sur cual la ospital dise ce los ia nase mor.

On ia acusa sete persones de fura o conspira de fura un bebe de la Ospital Enseniante de Komfo Anokye en febrero.

Suwaiba Mumuni, de cual se bebe es entre la sinco ci manca, ia dise ce el crede ce se fio vive ancora.

La ospital, la du la plu grande en la pais, ia nega la alega.

Un misionor demanda pardona per se "crimines" en Corea Norde

En Corea Norde, un misionor prisonida de Corea Sude ia apare ante jornalistes per leje un declara en cual el ia demanda publica un pardona per "crimines contra la stato".

Baptiste Kim Jong-uk, ci ave 50 anios, ia dise ce on ia aresta el pos cuando el ia entra tra Xina con materias relijiosa en otobre.

Ativias relijiosa es restrinjeda en la Norde, e on ia aresta multe misionores en la pasada.

A veses, persones stranjer ci on ia aresta en Corea Norde ia confesa publica, ma a pos los ia clari ce la stato ia menasa los.

Un presidente deutx pasada es nonculpable de froda

Un corte deutx ia desculpa Christian Wulff, un presidente pasada de Deutxland, de froda.

El ia es un gidor suordinada de la partito conserviste de Angela Merkel, ci ia eleje el per la rol – xef ritual – de presidente.

Wulff ia resinia a du anios ante aora sur alegas ce el ia aseta ce David Grönewold, un produor de filmas, paia 720 euros de costas de otel e diverti per el e se familia en un visita a München en 2008.

On ia alega ce Wulff ia promove alora la labora de Grönewold a companias deutx. El ia risca tre anios en prison.

2014-02-27

Spiores ia intersepi cameras de ueb de usores de Yahoo

GCHQ, un departe de spia brites, ia intersepi imajes de camera de ueb de miliones de usores de Yahoo sirca la mundo.

Yahoo ia nega conose a ante la scema, e ia descrive lo como un viole de privatia "intera nonasetable".

Documentos esposada revela ce la scema ia colie acaso an imajes sesal.

La departe ia declara ce tota se atas segue la lege.

Jihadistes suri forsa constrinjes a cristianes

Un grupo jihadiste en Suria ia esije ce cristianes en Raqqa, un site norde, paia un imposta en oro e aseta restrinjes a se atas relijiosa, o risca es matada.

La Stato Muslim de Irac e la Mediteraneo Este ia dise ce lo va furni "proteje" a abitores cristian si los acorda la lista de constrinjes.

On ia fa la anunsia en un declara enlinia.

La grupo atenta reali un interprete estrema de lege muslim en areas cual lo controla.

Bombis en Baghdad mata 26 persones

A la min 26 persones ia es matada en bombis sirca Baghdad, la capital de Irac.

17 ia es matada en un sola esplode a un mercato de motosicles usada en la distrito este de Site Sadr.

Lo pare ce acel bomba, cual ia feri 38 otras, ia es locada en un motosicle.

Ance en Site Sadr, sinco persones ia es matada e 14 ia es ferida par la esplode de un bomba fisada a un minibus.

La capitan de la Costa Concordia visita la ruina

Francesco Schettino, la capitan de la barcon de turi Costa Concordia, ia revade a la ruina en jovedi.

Esta ia es se ves prima de visita la barcon pos se colpa de un resife prosima a la isola Giglio en janero 2012. Lo ia inversa, matante 32 persones.

La visita ia es un parte de un investiga a se prosede, do on acusa el de mata sin intende e de abandona se barcon.

El nega la acusas, ma si on judi ce el es culpable, el risca spende asta 20 anios en prison.

Adidas para la vende de camisetas ofendente a Brasil

Adidas, un compania grande de vestes de sporte, retira la vende de alga camisetas de Copa Mundal pos un cexa par Brasil ce los sesali la persepi de la pais.

Un ia mostra la demanda "Tu vole fa un gol?" a lado de un fem poca vestida. Un otra ia porta un cor en forma de un posterior en bicini, con la declara "Me ama Brasil".

Embratur, la corpo de turisme brasilera, oposa forte cualce produida cual lia la persepi de la pais a la atrae sesal.

Adidas furni la bales de la Copa Mundal, e es un de la sponsores xef de la aveni.

Un soldato indian fusili se colaborores

En Kashmir, un soldato indian ia fusili matante sinco de se colaborores, ante mata se.

Esta ia aveni en la note de mercurdi a un campa militar a sirca 20 cilometres a norde de la site Srinagar.

On ia comensa un investiga per determina la causa.

Kashmir es divideda en lados manejada par India e Pacistan, ma ambos lados reclama la area intera.

Qantas va sutrae 5000 empleas

Qantas, un airolinia australian, ia anunsia se intende de elimina 5000 empleas. Lo ia reporta ance un perde finansial grande.

Esta es un parte de se projeta de redui se costas par A$2 mil milion ($1,8 mil milion) tra la tre anios veninte.

On ia anunsia la reduis a lado de un perde fundal, ante imposta, de A$252 milion en la ses menses asta la fini de 2013.

La compania intende ance elimina plu ca 50 aviones. Lo fronti competes forte en se operas nasional e internasional.

La telescopio Kepler descovre multe planetas nova

La siensistes ci esplora datos de la telescopio Kepler de NASA dise ce lo ia identifia 715 planetas nova ultra nos sistem solal.

En cuasi du desenios de pos la descovre de la prima "esoplaneta", rexercores ia deteta apena plu ca 1000 mundos nova.

La recolie la plu resente de Kepler es planetas en orbita sirca sola 305 stelas. Esta implica ce tota de los es en sistemes multiplaneta.

95% de los es plu peti ca Netuno, de cual se raio es la cuatruple de lo de la Tera.

Fusilores saisi construidas de governa en Crim

Fortes de securia en Ucraina es vijilante pos la saisi de construidas de governa par omes enarmada en Crimea, un area con majoria rusce.

On ia leva la bandera rusce supra de construidas en Simferopol, la capital.

La governa local ia dise ce lo negosia con la fusilores.

La saisi de la construidas aveni a la dia pos frontis entre separadistes favorente Rusia e suportores de la gidores nova de Ucraina.

Ativistes enlinia menasa la Copa Mundal

Ativistes enlinia en Brasil menasa disturba la Copa Mundal de futbal de esta anio.

Un grupo parteninte a Anonim, un coletiva laxe, ia dise ce lo va ataca pajerias ofisial.

On ia fa protestas major en la pais contra lo cual alga ia descrive como un spende estravagante.

La armada brasilera ia confesa ce lo no pote furni un proteje completa, ma ia insiste ce lo va responde a la menasas la plu probable.

On aproba regulas nova contra fumi en la UE

On va introdui leges contra fumi tra la Uni European, per atenta redui la cuantia de fumores par 2,4 milion.

La regulas, asetada par la Parlamento European, esije ce avertis sur sania con pitures va domina la fronte e retro de tota pacetas.

On va proibi ance sigaretas con sabor. Caritales de canser ia suporta la cambia, ma grupos favorente fumores ia critica lo.

On estima ce 700 mil persones en la UE mori prematur par causa de fumi en cada anio.

Rexercores crea un virus de Wi-Fi

En Britan, rexercores en Liverpool ia crea un virus de computador cual pote sperde fasil par Wi-Fi.

En areas densa poplida do multe redes de Wi-Fi esiste, la virus pote traversa la redes, xercante puntos debil.

Pos controla un punto de Wi-Fi, lo lasa tota computadores en acel rede en un state estrema atacable.

La rexercor xef ia dise ce lo developa programes per preveni tal atacas.

La xef de un banco suiz regrete ce se bancores ia rompe leges de imposta

La xef de Credit Suiss, un banco suiz, ia dise ce el "regrete profonda" ce alga de se bancores ia rompe leges SUA de imposta.

An tal, Brady Dougan ia declara a un comite de la Senato SUA ce on ave sola "atestas sperdeda" de malcondui.

La Senato ia alega ce la banco ia aida clientes american a asconde biliones de dolares de la autoriosas de imposta.

Dougan ia confesa ce alga bancores privata ia aida americanes a asconde revenu e ativas, per evita impostas en modo nonlegal.

Un corte deutx aboli la limita de votas per entra a la Parlamento European

La corte suprema de Deutxland ia declara la nonconstitualia de un regula cual esije ce partitos gania a la min 3% de votas per pote entra a la Parlamento European.

La governa ia basi la limita de 5% en la anio pasada, ma la Corte Constitual Federal en Karlsruhe ia dise ce on debe aboli intera la limita.

Esta permete ce partitos plu peti deveni capas de gania sejas en la vota de maio 2014.

Un de los es la Partito Democrata Nasional, cual es estrema destriste e frecuente acusada de promove un ideolojia neonazi.

Parla sur la retira SUA de Afganistan pote forti la Taliban

La plu alta de la ofisiores militar SUA ia dise ce parla sur la retira de la SUA de Afganistan risca "coraji la enemi".

Major Jeneral Martin Dempsey ia clari ce parla de un retira completa ta pote gida alga fortes afgani a alia con la Taliban.

En lundi, presidente Barack Obama ia averti ce la SUA va retira cisa tota se soldatos de la pais en esta anio, si on no va suscrive un acorda biladal de securia.

Ma Hamid Karzai, la presidente de Afganistan, ia refusa suscrive lo asta aora.

Violentia en Sudan Sude perili la labora de dotores

Dotores Sin Bordas, un carita medical, ia avisa ce se laboras en Sudan Sude es perilida par atacas savaje contra complesos medical.

Lo dise ce la efeto es impedi la furni de aida esensal a sentos de miles de persones.

La Nasiones Unida dise ce la combate entre la governa e rebelores ia desloca sirca 860 mil persones de pos la media de desembre.

Ambos lados ia acusa la un la otra de rompe un sesafusili acordada en janero.

Egipte condena 26 persones a mori sur terorisme

Un corte egipsian ia condena 26 persones a mori per fundi un "grupo de teror" con intende de ataca barcones en la Canal de Suez.

Judores ia dise ce la omes ia es ance acusada de fabrica misiles e esplodentes.

On ia prosede la acusadas en se asentia.

La condenas aveni a la dia pos cuando Ibrahim Mahlab, la ministro xef nova, ia promete "crase terorisme en tota la angulos de la pais".

2014-02-26

On esplica un tomba de multe balenas en Txile

En 2011, on ia descovre un tomba de multe balenas fosilida, a lado de la Autovia Panamerican en Txile.

Siensistes crede ce los pote ara esplica como tan multe de la bestias ia mori en un sola loca a plu ca sinco milion anios ante aora.

La atesta sujesta forte ce tota la balenas ia come algas nosiva, e ce esta ia aveni a cuatro veses separada.

En o pos cuando los ia mori, la flue ia porta los a un estuario e ia lasa los sur arenas plana do la tempo ia entera los.

On revela la governa nova de Ucraina

On ia presenta la governa tempora nova de Ucraina a la campa xef de protesta en Kiev, seguente la despone de Viktor Yanukovych en la semana pasada.

On ia nomi Arseniy Yatsenyuk per deveni la ministro xef. La consilio, sur ci la parlamento va vota en jovedi, inclui alga protestores.

La governa fronti defias grande, incluinte la repara de la economia lutante de la pais.

En la entretempo, on ia pone Yanukovych en la lista internasional de criminales, acusante el sur la matas de plu ca 100 protestores par polisiores de tumulta.

On condena un dotor canadian per viole femes

Un dotor canadian ia viole sesal 21 pasientes calmida, en cuando los ia regarda el sin defende. On ia condena el a des anios en prison.

George Doodnaught, un anestesiste de 65 anios, ia maltrata femes con entre 25 e 75 anios ci ia es su se cura.

La vitimes ia atesta ce los ia es consensa, ma noncapas de move, cuando los ia es besada, caresada, e atacada par Doodnaught.

La plu atacas ia aveni en Toronto entre 2006 e 2010, e ia es ascondeda de otra empleadas medical par mera un cortina sirurjial.

On permete la televisa partal de la prosede de Oscar Pistorius

Un judor sudafrican ia judi ce on pote televisa partes de la prosede de la atleta Oscar Pistorius.

Pistorius ia fusili se xica de cor, Reeva Steenkamp, un model e un stela de televisa de realia, a plu ca un anio ante aora. Se prosede va comensa en lundi.

Avocatos prosedente alega ce el ia preconsidera la mata, ma el dise ce el ia malpersepi Steenkamp como un intruor.

Esta va es la ves prima de televisa direta partes de un prosede en Sudafrica.

La ministro egipsian pasada de casas va formi un governa nova

La presidente de Egipte ia demanda ce Ibrahim Mahlab, la ministro direta pasada de casas, formi un governa nova, a la dia pos la resinia nonespetada de la governa tempora.

Hazem Beblawi, la ministro xef tempora, no ia dona un razona clar per la resinia coletiva en lundi.

Mahlab ia esplica a jornalistes ce el va foca se labora a trova metodos de preveni greves, aumenta emplea e produi, e restora calmia a la pais.

On previde un indui de la governa nova en saturdi.

On fura la portamone de un prete en un servi

En Noria, on ia fura la portamone e telefoneta de un prete en cuando el ia gida la servi de soldi.

John Olav Hodne, la prete de un parocia prosima a Trondheim, dise ce el ia lasa la ojetos en la vesteria a retro de la eglesa. El ia trova ce los ia desapare pos la fini de la servi relijiosa.

La autoriosas ave no trasas per segue, donce los ia fa un anunsia publica per xerca plu informas.

Un portavose de la polisia ia dise: "Esta es un fura spesial desplasente e nonusual."

Conjesta estrema entre Arabia Saudi e Barain

Miles de viajores dial fronti conjestas de trafica de oto oras per traversa un via levada de 26 cilometres entre Arabia Saudi e la isola de Barain.

La filos dura asta tarda en la note.

La cuantia de duanores a la borda no sufisi per maneja la desuples de miles de persones ci vole traversa a cada dia.

La departes de trafica e de pasportas culpa la un la otra per la conjesta estrema.

Un intercambieria major de bitcoin deveni estralinia

Mt. Gox, un de la ofisias la plu grande de intercambia de bitcoin, ia desapare de la interede.

Lo ia es ja colpada par problemes tecnical, e resente lo ia para tota retiras de mone par clientes, pos persepi lo cual lo ia descrive como "ativia nonusual".

La desapare embarasa suportores de bitcoin, ci ia promove la adota plu vasta de esta mone dijital.

En la entretempo, ses otra intercambierias major de bitcoin ia fa un declara juntada en cual los distanti se de la problemes de MtGox.

Un om xines litiga la governa local sur contamina de aira

Un abitor de la site de Shijiazhuang en Xina norde atenta litiga la governa local sur la nivel alta de contamina en la aira.

Li Guixin ia rejistra un cexa a un corte distrital en la provinse Hebei, prosima a Beijing.

El esije ce la ofisia ambiental de la site fa plu per controla la strato de nebla fumosa cual cade comun sur Xina norde en la menses de inverno.

El esije ance compensa finansial, pos spende mone per compra mascas, un purador de aira, e un paseador sur cual el eserse en se casa cuando la contamina es estrema mal.

Protestores filastini ataca polisiores israeli en Ieruxalim

Protestores filastini ia scaramuxa con la polisia israeli sur la Monte de Templo en Ieruxalim.

De la loca santa, conoseda a muslimes como la Haram al-Sharif ("refuja nobil"), sirca 20 jovenes ia lansa petras e esplodentes minor a polisiores.

A pos, la polisia ia entra la compleso e ia aresta tre persones.

La turba ia aveni en cuando la parlamento de Israel ia prepara debate un proposa recomendante ce Israel "reali se autoria" en relata a la Monte de Templo.

Un om bisicli sur un autovia pos era de telefoneta

En Britan, un om ia bisicli tra alga cilometres sur un autovia xef a sude-ueste de London, car se telefoneta ia furni dirijes falsa a el.

Motoristes ia vide el sur se bisicle en la banda de crise, a media de la ora de presa a la matina de martedi.

El ia dise ce el ia xerca un via plu corta de reveni a se casa pos labora.

La polisia ia comenta ce, an pos la era de la telefoneta, el ia debe para ante entra a la autovia.

Xina projeta festas de aniversarios de la gera contra Japan

Xina considera du festas nasional nova per selebra la gera contra Japan en la desenios de 1930 e 1940, a media de un senti cresente antijapanes.

La idea, aora en parlamento, es ce on va selebra la aniversarios de la sede formal de Japan en 1945 e de la masacra de Nanjing en 1937.

Xina dise ce 300 000 siviles ia es matada en acel site pos se ocupa par soldatos japanes.

Nasionalistes japanes disputa la descrive xines de avenis.

Un ataca contra un scola nijerian mata desuples

En Nijeria norde-este, combatosas islamiste de la grupo Boko Haram ia ataca un scola e fusili alga studiantes.

Desuples de enfantes ia es matada. La polisia ia dise ce tota de los ia es xicos, e ce alga de la corpos ia es "ardeda asta senes".

Abitores de la vila de Buni Yadi ia clari ce la ataca ia aveni a note.

La atacores ia talia ance la gargas de alga studiantes.

Un scandal sur un rejistra audio de la ministro xef turces

La ministro xef de Turcia, Recep Tayyip Erdoğan, ia condena coler un rejistra audio cual pare mostra el en parla a se fio sur asconde somas grande de mone.

El ia dise ce la rejistra secreta, distribuida en redes sosial, ia es "un ataca tradosa".

Lo pare revela Erdoğan demandante ce se fio Bilal desprende miliones de euros de mone fisical de un casa.

La oposa ia esije la resinia de la ministro xef.

Un jornal ugandan nomi 200 omosesales

Un jornal ugandan ia nomi la "200 omosesales major" de la pais, a la dia pos cuando presidente Yoweri Museveni ia suscrive un lege cual severi la punis per persones ge.

La lista ia apare su la titolo "Esposada", provocante consernas sur un panica moral contra persones omosesal.

Governas ueste ia condena la deside de Museveni de aproba la lege.

Uganda es un sosia profonda conserviste do la plu persones oposa omosesalia.

La presidente tempora de Ucraina averti sur separadisme

Olexander Turchynov, la presidente tempora de Ucraina ia averti sur la periles de separadisme pos la despone de Viktor Yanukovych.

El ia fa se comentas en cuando areas ucrainsce de lingua rusce continua se oposa de la governa nova en Kiev.

On ia pospone la formi de un governa unida asta jovedi.

En la entretempo, on reporta ce Andriy Kliuyev, un de la aidores pasada de Yanukovych, ia es ferida par un fusilor.

2014-02-25

La SUA intende retira tota se soldatos de Afganistan

Presidente Barack Obama ia averti Hamid Karzai, se corespondente afgani, ce la SUA va cisa retira tota se soldatos de Afganistan ante la fini de esta anio.

Obama ia dona la mesaje en un telefoni a Karzai, ci ia refusa suscrive un acorda de securia.

La SUA insiste ce esta acorda debe esiste ante cuando lo va promete lasa alga soldatos en la pais per combate rebelores e per instrui otras.

La SUA ave soldatos en Afganistan de pos 2001, cuando lo ia despone la Taliban.

La ministro xef nova de Italia vole reformi multe

Matteo Renzi, la ministro xef nova induida de Italia, ia clari se ideas de reformi, a alga oras ante gania un vota importante de fida sur se governa nova.

Renzi ia proposa cambia la leges de vota, redui impostas, e investi sur empleas, en responde a la economia malada de la pais.

La gidor democrata ia clari ance ce el vole aboli la Senato como un autoriosa capas de crea leges.

Temprana en martedi, se alia ia gania un vota de fida par la Senato. 169 membros ia favore, e 139 ia oposa.

Jetos israeli ataca Lubnan este

Jetos israeli ia fa atacas airal en Lubnan este, prosima a la borda con Suria.

La militaria de Israel no ia comenta, ma on ia reporta ce un fonte de securia israeli ia refere a "ativia par fortes de aira en la norde".

La ajenteria nasional de novas en Lubnan ia dise ce la atacas ia aveni prosima a la vileta de Nabi Shayth en la Vale Beqaa.

Hezbollah, un grupo combatosa lubnani, es forte en la vale.

La frato la plu vea de la crosta de la Tera

Un cristal pico, con eda de 4,4 mil milion anios, ia es confirmada como la frato la plu vea de la crosta de la Tera. On ia trova la peso de zircon en arenito en un area nomida Jack Hills en Australia Ueste.

Siensistes ia dati lo par studia se atomes de uranio e plomo. Uranio dejenera estrema lenta a plomo, tal ce on pote usa lo como un orolojo.

La implica es ce la Tera ia formi un crosta solida a un tempo multe plu temprana ca on ia crede, pos se formi a 4,6 mil milion anios ante aora.

La crosta ia apare multe rapida pos la colpa grande cual ia produi la Luna a sola alga desuples de miliones de anios pos la formi de nos planeta.

Venezuelanes protestante para la trafica

En Venezuela, protestores antigoverna ia erije paradores en la capital, Caracas.

Los ia pone dejetadas e mobilas ardente sur stradas major, per atenta bloci asedes a la site.

Plu temprana, Henrique Capriles, la gidor oposante, ia demanda ce se suportores no obedi un clama en redes sosial per un "bloci nasional".

La blocis es la paso la plu resente en un serie de protestas en cual 13 persones ia mori.

Un corte SUA rejeta un caso de mesajeta ofendente

En la SUA, la corte suprema de la stato Georgia ia rejeta un caso contra un om ci ia envia a un fem un mesajeta con un foto nonxercada de se penis tatuada.

La corte ia judi unida ce un lege de 1970 aplica sola a materias "concreta" enviada par posta.

Charles Les Warren ia risca spende asta tre anios en prison pos envia la foto en 2012.

La lege su cual on ia prosede el defini ce lo es un crimin major si on envia pitures nonxercada de nudia o atas sesal, estra si la "envelopa o contenador" porta un averti en leteras spesa.

Alegas ce avocatos turces ia escuta secreta telefonis

En Turcia, on alega ce un grupo de avocatos prosedente e antigoverna ia escuta secreta la telefonis de miles de persones importante.

La blancos ia inclui ministros de governa e gidores de comersia.

La avocatos ia nega la acusas. On dise ce los es fidosa a Fethullah Gulen, un eglesor en la SUA.

On ia acusa ce Gulen dirije un "stato paralel" en Turcia, controlante grupos de polisia, avocatos, e polisiores. El nega esta.

Un crese de profita per la posesente de Weibo

La profita de Sina.com, la posesente de Weibo, la pajeria xines la plu grande cual sembla Twitter, ia alti multe en la cuatri cuatro de 2013.

Lo ia es aumentada par un crese de revenu par anunsias comersial.

Lo ia reporta un profita neta de $44,5 milion en la periodo de otobre a desembre, comparable con $2,4 milion a un anio a ante.

Weibo dise ce lo ave plu ca 500 milion usores rejistrada.

Corea Norde viole un borda maral de la Sude

Un barcon patruliante de Corea Norde ia viole un borda maral de la Sude a plu ca un ves en la tarda de lundi.

La barcon ia spende alga oras a sude de la borda, prosiminte a un isola de Corea Sude. Pos avisas repeteda de la Sude, lo ia revade.

Corea Norde disputa la borda maral e se barcos ia traversa lo en la pasada.

Esta aveni a media de eserses juntada entre la armadas de la SUA e Corea Sude, cual Pyongyang oposa.

La gidor de Nijeria defende la rol de la armada contra Boko Haram

La presidente de Nijeria ia defende la laboras de la armada contra combatosas islamiste en la norde, pos la moris de plu ca 200 siviles en atacas en la semana pasada.

Respondente a criticas resente, Goodluck Jonathan ia dise ce la batalia contra Boko Haram "va boni".

Esta segue un demanda par la governor de Borno, la stato la plu afetada, per un envia de plu soldatos a la area.

Boko Haram ia fa un campania violente tra cuatro anios per esije un rena muslim en Nijeria norde.

Un meteorite recordo colpa la Luna

Siensistes ia revela se oserva de un colpa recorda a la Luna.

Astronomistes ia vide la efeto de un meteorite con masa de sirca un dui de ton, cual ia cade sur la surfas lunal en setembre pasada.

Los dise ce la xoca ia jenera un flax tan briliante ce lo ia ta es vidable de la Tera.

Lo es la colpa la plu grande e briliante de sempre cual on ia oserva sur la Luna.

La Pape crea un departe nova per supravide finansia

Pape Francisco ia crea un departe en la Vatican per supravide la finansia, pos scandales a la instituida.

La ministreria nova va studia "la problemes organizal e economial de la Seja Santa".

Plu, un esaminor va oserva la ativia de la departe.

En janero, un eglesor major italian ia es acusada de blanci miliones de mone tra la banco de Vatican.

Un leopardo core libre en un vila indian

Un panica ia saisi la vila de Meerut en India norde, do un leopardo core libre.

On ia clui scolas e universias en la vila, cual es situada a du oras par auto de Delhi.

La animal ia entra a un ospital a soldi. On ia securi el en un sala per alga oras, ma lo ia evade final.

On ia posa un cuantia grande de polisiores, e ia clama espertas de viventes savaje per aida catura la bestia.

Uganda adota un lege sever contra persones ge

La gidor de Uganda, Yoweri Museveni, ia suscrive un lege cual severi la punis per persones ge. Ma el ia omete un parte cual ta criminali los ci no reporta conosedas ge.

La lege inclui un condena de prisoni tra vive, per relatas sesal ge e sposis ge. Un condena proposada de asta 14 anios per ofendores de ves prima ia es sutraeda.

Barack Obama, la presidente de la SUA, ia averti ce la lege es un paso retrogradal. A ante, Museveni ia acorda pospone la suscrive asta reseta conselas siensal de la SUA.

Atas omosesal es ja nonlegal en Uganda.

La governa tempora de Egipte resinia nonprevideda

04:17

Hazem Beblawi, la ministro xef tempora de Egipte, ia anunsia subita la resinia de se governa.

El ia dise ce la deside ia es fada "en considera la situa presente cual la pais esperia".

Esta ia aveni a media de un serie de greves, incluinte un par laborores de la campo publica e coliores de dejetadas. On ave ance un manca sever de gas de coce.

On ia asinia Beblawi en julio pos la despone militar de Mohammed Morsi, seguente protestas coletiva.

La Olimpiales Invernal clui con un broma

La Juas Olimpiales de Sochi ia clui con un burla par Rusia a se mesma.

A la rituo abrinte, un falta tecnical ia causa ce un de la anelos olimpial en un efeto spesial ia refusa abri.

Ma, a la rituo cluinte, sentos de dansores ia formi la anelos e, inisial, la anelo sinco ia fali abri.

La umor ia es un surprende: a la rituo abrinte, la televisa rusce ia atenta asconde la problem par difusa pitures ja rejistrada en un presenta de eserse.

La SUA va redui la grandia de se fortes armada

La Pentagon va anunsia un projeta de redui la armada nasional de la SUA a se grado la plu peti de ante la Gera Mundal Du.

On previde ce un clase intera de jetos atacante va es abolida cuando Chuck Hagel, la ministro de defende, anunsia se proposas finansial per 2015.

Probable el va proposa redui la armada ativa a entre 440 e 450 mil persones.

La militaria SUA senti un presa per redui, pos du geras stranjer e costosa.

2014-02-24

Ucrainsces descovre la lusosia de la imobila privata de Yanukovych

En Ucraina, on ia abri la imobila campanial e lusosa de Viktor Yanukovych a la publica, pos se despone par vota de parlamento.

Yanukovych ia parti de Kiev, la capital, e on no sabe do el es.

A soldi, la parlamento ia vota per redona la posese de la imobila a la stato.

Lo conteni un campo de golf, un zo privata con astruzos e servos, e un reprodui de un galeon sur un rio artifisial.

Mozilla projeta un telefoneta de $25 per la mundo developante

Mozilla is esibi un prototipo de un telefoneta intelijente, con preso de sola $25, intendeda per la mundo developante.

La compania es la plu bon conoseda per se surfador Firefox. Per esta projeta, lo ia asosia con Spreadtrum, un fabricor xines de microtelias barata.

La aparato no va es tan potiosa como modeles plu costosa, ma lo va suporta programes e va usa la interede sin filo.

Analistes ia comenta ce lo va atrae persones ci compra aora telefonetas barata de un spesie partal intelijente.

On reporta un maladia simil a poliomielite en California

Dotores averti sur un maladia emerjinte, simil a poliomielite, en California. Lo ia infeta asta 20 persones.

Alga pasientes ia developa un paralise de tota cuatro membros, cual no ia boni pos es medical tratada.

Poliomielite no esiste en la SUA, ma viruses relatada pote ataca ance la sistem de nervos, causante paralise.

Dotores dise ce la infeta es ancora rara, e ce los no previde un epidemica.

La survivente la plu vea de la Olocausto mori con 110 anios

Alice Herz-Sommer, la survivente la plu vea conoseda de la Olocausto Nazi, ia mori en London a la eda de 110.

El ia nase en un familia iudi en Prague en 1903. El ia spende du anios en un campa nazi de consentra en Terezín.

El ia es multe capas como pianiste e ensenior de musica. El ia instrui a la Scola de Musica en Ieruxalim asta 1986, cuando el ia move a London.

On ia nomi un filma sur se vive per la premio de filma atestante la plu bon a la premios Oscar de la mense veninte.

Un omisidor SUA es fusilida en un prison israeli

Fortes spesial de Israel ia mata un prisonida american-israeli par fusili, pos cuando el ia xuta a gardores de prison.

Samuel Sheinbein ia es prisonida per 24 anios per un omiside savaje en 1997 en la SUA.

Pos la omiside, el ia fuji a Israel en un caso cual ia dana relatas entre la SUA e Israel per un tempo corta.

El ia xuta aora tre ofisiores de securia, grave ferinte un de los, e ia bari la entra a la compleso.

Oservores de Eta dise ce los labora per pas

En Espania, oservores laborante per reali la desarma de combatores de Eta ia insiste ce se sola gol es ateni pas en la area euscara.

Membros de la Comision Internasional de Serti ia comenta pos es interogada par judores sur un consenta resente con membros mascada de Eta.

La Comision ia anunsia en venerdi ce la grupo separadiste euscara ia pone un cuantia peti de se armas "ultra capasia de usa".

Eta ia declara la fini de se campania enarmada en 2011.

Un comandor de rebelores es matada en Aleppo

En Aleppo, un site suri, un comandor major de rebelores liada al al-Qaidah ia es matada par un bomba umana.

Abu Khaled al-Suri ia es un de alga ci ia mori en la ataca contra un compleso de se grupo combatosa.

On crede ce un otra grupo combatosa, la Stato Muslim de Irac e la Mediteraneo Este, es culpable.

Lo fa scaramuxas violente con otra tal grupos de pos la temprana de janero. Sentos de combatores de ambos lados es ja matada.

La armada tai no va interveni en la crise

La xef de la armada de Tai dise ce la militaria no va interveni en la crise de la pais.

En soldi, un esplode parente de granada, prosima a un loca de protesta antigoverna, ia mata un fem e un xico de cuatro anios.

Dotores ia dise ce la sore de la xico ia mori ance, plu tarda, par causa de feris serebral.

Dudes du persones ia es ferida par la esplode, incluinte un xico de nove anios ci reseta aora cura intensa en ospital.

Eserses militar comensa de Corea Sude e la SUA

Eserses militar juntada entre Corea Sude e la SUA ia comensa, a la mesma tempo como reunis rara de relatadas separada tra desenios par la divide entre la du Coreas.

La eserses va dura asta 18 april.

Pyongyang oposa los, e a ante ia menasa cansela la reunis si los aveni.

La eserses va envolve plu ca 12 500 soldatos american.

Rusia retira se ambasador de Ucraina

Rusia ia retira se ambasador de Ucraina sur lo cual lo ia descrive como la situa malinte en la pais.

Moscva ia condena la despone de presidente Viktor Yanukovych par parlamentores en saturdi.

La presidente tempora, Olexander Turchynov, nova asiniada, dise ce la pais va foca aora a integra plu prosima con la Uni European.

La turba ia es causada cuando Yanukovych ia rejeta un acorda de negosia con la UE, preferente relatas plu prosima con Rusia.

Un duple sientolojial sposi en London

Un duple ia sposi en un egleseta de sientolojia en London, pos gania un apela de Corte Suprema.

Louisa Hodkin ia inisia un caso legal cuando ofisiores ia refusa rejistra la egleseta como un loca de sposi per el e se prometeda, Alessandro Calcioli.

En desembre, sinco judores de la Corte Suprema ia deside ce la egleseta de sientolojia es "un loca de reuni per adora relijiosa".

Pos la sposi, Calcioli ia dise ce el no pote crede ce la dia ia ariva.

Samsung mostra du orolojetas intelijente nova

Samsung ia esibi la Gear 2, se atenta du de crea un orolojeta intelijente per atrae multe consumores.

La compania ia mostra la aparato a lado de un otra model nova, la Gear 2 Neo, cual es min pesosa.

Ambos conteni un sensador de frecuentia de bateta de cor, un podometre, e utiles diversa per mesura eserse, dormi, e niveles de stresa.

La orolojetas usa Tizen, un sistem nova de opera, en loca de la sistem Android de Google.

La paises G20 proposa un crese economial de 2%

Gidores finansial de la 20 economias la plu grande ia proposa la gol de ajunta $2 milion milion a se esflues en la sinco anios veninte.

En acel periodo, los vole aumenta la produi interna bruta de la paises G20 par 2% plu ca la nivel aora prevideda.

Los espera ce la cambia de politica va crea miliones de empleas nova.

La gol ia es anunsiada a un consenta de la Grupo de 20 en Sydney. La encontra xef va aveni en Brisbane en novembre.

Un reporta sur dejeta de obras de arte ia es esajerada

La conservor de un esibi de arte en Italia, do un limpor ia dejeta acaso alga obras, ia dise ce la detalias reportada sur la aveni no es vera.

On ia dise en la semana pasada ce obras fada de jornales e carton ia es baldonida car los ia aspeta como dejetadas.

Ma Ala Roushan, la conservor, ia nega esta, clarinte ce on no ia despaci ja la obras de se caxas de carton.

El ia dise ce la limpor no ia vide an la obras, e ia crede mera ce el baldoni caxas vacua.

Un ospital suri es atacada con bomba de auto

Alga persones ia es matada par un bomba de auto en visinia de un ospital de campania en Suria norde, prosima a la borda con Turcia.

La esplode ia aveni en la vila de Atmeh, cual es ocupada par rebelores e conteni un campa per miles de persones deslocada par la gera interna.

On no ia sabe direta ci ia fa la ataca.

En saturdi, tota la Consilio de Securia de la Nasiones Unida ia aproba un deside sur asede a aida umaniste en la pais.

Mugabe selebra se aniversario 90

Miles de zimbabueanes ia vade a un selebra ofisial de la aniversario 90 de presidente Robert Mugabe.

La gidor vea, ci rena ja de pos 1980, ia relasa 90 balones en la aira a un stadion a este de Harara, la capital.

El ia ateni la eda de 90 anios en venerdi, cuando el ia es en Singapor per sirurjia de oio.

Multe scolores ia es en la fola, brandinte banderas e cantante la nom de clan de Mugabe.

2014-02-23

On alega ce Morsi ia esposa secretas nasional a Iran

En Egipte, avocatos prosedente ia acusa Mohammed Morsi, la presidente desponeda, de esposa secretas nasional a la Armada de Gardores de la Revolui de Islam en Iran.

On ia oia la alega en la escuta du de se prosede sur alegas de spia.

Avocatos dise ce el, e 35 otras, ia es envolveda en un conspira per destabli Egipte.

A pos, on ia pospone la prosede a 27 febrero.

La Taliban ataca un posto de controla en Afganistan

Combatores de la Taliban ia mata a la min 20 soldatos afgani en un ataca contra un posto de controla en la provinse de Kunar, prosima a la borda entre Afganistan e Pacistan.

A la min un de la atacores ia es matada, e la Taliban ia dise ce los ia catura sete soldatos.

Par causa de la ataca, Hamid Karzai, la presidente de Afganistan, ia pospone un visita projetada a Srilanca en soldi.

La violentia presede un vota presidental cual va aveni en marto.

On asinia un presidente tempora per Ucraina

La parlamento ucrainsce ia nomi se presidente interna como la presidente tempora de la pais.

Oleksandr Turchynov emprende la posto pos la despone de Viktor Yanukovych en saturdi. El ia dise ce parlamentores debe formi un governa nova unida ante martedi.

La parlamento ia vota ance per saisi la imobila lusosa de Yanukovych, prosima a Kiev, a cual protestores ia entra en saturdi.

En la entretempo, Yulia Tymoshenko, la ministro xef pasada ci on ia libri de prison, ia clari ce el no desira es denova la ministro xef.

Ienas perili persones sin casa en Itiopia

Ienas urban deveni un problem perilosa en Addis Ababa, la capital de Itiopia, do los ataca persones ci dormi sin casa.

En 2011, la autoriosas de la airoporto ia debe clama xasores per xuta un manada de ienas cual ia menasa la atera e enaira de aviones.

Persones ci abita prosima a un semetero publica ia cexa ce la bestias escava e come la corpos de povres ci es enterada en tombas multe profonda.

La ienas tende xasa en grupos. A un note, un gardor a un ambasada ia vide un linia de 40 corente longo la serca retro de la compleso.

Consentas separada ma prosima de la governas de Scotland e la Rena Unida

En lundi, ministros de Scotland e la Rena Unida va fa consentas separada en la norde-este de Scotland, ante un referendo sur autonomia scotes.

La consentas va aveni a un distantia de min ca 16 cilometres la un de la otra, en Aberdeen e un vila prosima.

Esta va es sola la ves du en plu ca 90 anios do la consilio completa de ministros de la RU ia consenta en Scotland.

La norde-este es la sentro de la industria de petrolio e gas de la pais. On previde ce ambos governas va fa anunsias en relata a acel campo.

Scaramuxas violente a un marxa en Caracas

En Caracas, protestores oposante ia scaramuxa con la polisia venezuelan a la fini de un marxa cual ia colie desuples de miles de persones.

Alga persones ia es ferida cuando polisiores ia xuta gas de larma e ativistes ia lansa petras.

Suportores de Nicolás Maduro, la presidente sinistriste, ia marxa en la sentro de Caracas e otra sites.

En cuasi du semanas de protestas, des persones ia mori. Maduro ia descrive la protestores como atentante un colpa de stato.

La Nasiones Unida uni sur aida umaniste en Suria

La Consilio de Securia de la NU ia aproba unida un deside sur asede a aida umaniste en Suria.

Esta es la ves prima cuando lo ia acorda unida sur la problem. Rusia e Xina, cual ia rejeta desides simil en la pasada, ia vota favorente.

La deside dise ce la fortes de la governa e la oposa debe permete ce convoias de aida ateni siviles tra la pais.

La testo acordada no menasa punis, ma averti sur "pasos ajuntada" si la lados no segue la deside.

Maria von Trapp mori

La membro ultima survivente de la Cantores de la Familia Trapp ia mori a la eda de 99.

Maria von Trapp ia mori a se casa en Vermont en martedi. Se frate ia descrive el como "un fem merveliosa ci ia es un de la poca persones vera bon."

La familia ia fuji de la ocupa nazi en Austria en 1938, e ia presenta cantas tra la SUA.

Se esperias ia inspira La sona de Musica, cual ia es un teatral musical de 1959 e un filma multe susedosa de 1965.

Fusilores ataca un asembla antigoverna en Tai

Fusilores ia xuta a un asembla antigoverna en Tai este. Los ia mata un xica de sinco anios, e ia feri desuples de otra persones.

La atacores ia lansa esplodentes e ia fusili a protestores a la asembla, cual ia es clamada par la Comite Poplal de Reformi Democrata.

La asembla ia es aveninte a un mercato de note en la distrito Khao Saming de la provinse Trat, en la tarda de saturdi.

Tensas tra Tai ia aumenta de pos novembre, cuando un serie de protestas antigoverna ia comensa.

Tymoshenko recomenda la continua de protestas ucrainsce

Yulia Tymoshenko, un ministro xef pasada de Ucraina, ia parla a suportores oposante en la Plaza de Autonomia en Kiev. El ia recomenda forte ce los continua se protestas.

Tymoshenko ia veni de es librida de prison. Se dorso es ferida, donce el ia parla de un seja rolante. El ia dise: "Asta cuando vos fini esta taxe, nun ave la direto de parti."

Se parla ia aveni a la fini de un dia dramosa en cual la presidente, Viktor Yanukovych, ia fuji de Kiev, ma ancora refusante resinia.

Tymoshenko ia plora en dise a se suportores: "Vos es eroes. Nun ta pote fa lo cual vos ia fa. Nos ia elimina esta canser, esta tumor."

Elvis canta per pas en Belfast

En Er Norde, un eglesor vestida como Elvis Presley ia pasea cantante tra Belfast. El vole promove pas e laboras de reconsilia.

Andy Kelso es un imitor profesal de Elvis en se tempo libre, cuando el no labora per la Eglesa Anglican.

El ia traversa de Strada Falls – un de la areas republiciste la plu bon conoseda de la site – a Strada Shankill, un parte forte unidiste de Belfast ueste.

A pos, el ia fa un conserta carital.

Marit Bjørgen gania se medalia ses de oro

En la Olimpiales Invernal, Marit Bjørgen, un corsor norsce de sci, ia gania la corsa coletiva fema de 30 cilometres.

El ia deveni aora la atleta fema con la plu medalias de Olimpiales Invernal de sempre. El ave 33 anios.

Esta ia es se medalia ses de oro, e la medalia des de se colie intera.

El ia fini la corsa en un ora, 11 minutos, e 5,2 secondos. La du sucampiones, Therese Johaug e Kristin Størmer Steira, es ance norsce.

Famosas partisipa en un video de lodas de sposi

Con aida de Twitter, Steven Williams ia crea un video de lodas per selebra se sposi a Ceri en la mense pasada.

La video ia es spesial car lo ia conteni multe mesajes de persones famosa en Britan.

Steven, ci ave 29 anios e veni de Cimri, ia segue la tuitas de la famosas e ia demanda mesajes video de los.

La video dura tra 12 minutos e ia atrae plu ca 4000 regardas en YouTube.

La governa nova de Italia es induida

En Italia, on ia indui un governa nova, gidada par Matteo Renzi, un politiciste sinistriste sentral.

Con sola 39 anios, Renzi es la ministro xef la plu joven en la istoria de la pais, e un de la min esperiosas.

El ia asende a importa como la maior de Firenze, ma on ia eleje nunca el a parlamento, e el ia labora nunca en un governa nasional.

El ia eleje un consilio de ministros relativa joven. Sirca un dui de los es femes.

La presidente aljeri va presenta denova se per la posto

La presidente de Aljeria, ci no ia parla publica a la pais en cuasi tre anios, va presenta se como aspiror de un periodo cuatro de presidentia en april.

Abdelaziz Bouteflika ave 76 anios. El ia sufri un ataca serebral en la anio pasada, e criticistes dise ce el es tro malada per governa.

La ministro xef, Abdelmalek Sellal, ia fa la anunsia, declarante ce an si la presidente no ia recovre intera fisical, el posese ancora tota se capasias inteletal.

Bouteflika ia comensa governa en 1999. El es un de poca veteranes survivente de la gera de autonomia contra Frans.

Un protestor rompe un vaso valuosa de Ai Weiwei

En la SUA, un artiste de Florida fronti acusas criminal pos cade intendosa un vaso par Ai Weiwei, un artiste xines oposante.

Maximo Caminero, ci ave 51 anios, ia es acusada sur turba criminal pos rompe la vaso en Miami. Lo ia ave un valua de milion dolares.

El ia informa la polisia ce el ia rompe lo per protesta contra la fato ce la Museo Perez de Arte en acel site no esibi obras de artistes local.

Ai ia dise ce el no suporta artistes ci destrui obras de otras.

Un campanior australian contra troles de rede mata se

Charlotte Dawson, un presentor de televisa australian, ia es trovada pos mori en se casa en Sydney.

La polisia dise ce no situa suspetosa pertine a la aveni. Dawson ia ave 47 anios e un istoria longa de depresa.

El ia es un model pasada de Zeland Nova, e ance un vitim bon conoseda de sibertormenta.

En 2012, el ia es ospitalida pos es tormentada en Twitter. A pos, el ia deveni un campanior major contra troles de rede.

2014-02-22

Rusia defende un ataca contra Pussy Riot

Dmitry Kozak, la ministro xef suordinada de Rusia, ia defende como minor un ataca en Sochi contra la grupo protestante Pussy Riot.

Sinco membros de la grupo punc e un filmor ia es atacada en mercurdi par patrulias cosac de securia cuando los ia atenta presenta su un bandera anunsiante la Olimpiales Invernal.

Un video ia mostra la cosaces flajelinte la bande, tirante se mascas de sci a via, e lansante los a la tera.

Kozak ia dise: "La xicas ia veni asi spesial per provoca esta disputa."

On aresta un padron major de drogas en Mexico

La Statos Unida dise ce on ia aresta un de la padrones de drogas la plu criminal de mundo en Mexico.

Joaquín Guzmán, conoseda como El Chapo (car el es un om corta), ia gida la cartel Sinaloa, cual contrabanda cuantias vasta de drogas nonlegal a la SUA.

Guzmán ia es un fujor de pos evade un prison de securia alta en un sesto de vestes en 2001.

On ia aresta el en la stato Sinaloa, en un opera juntada con fortes antidroga de la SUA.

Ucraina libri un ministro xef pasada pos la fuji de Yanukovych

En Ucraina, on ia libri Yulia Tymoshenko de prison. El es un gidor oposante e un ministro xef pasada.

El es librida par un vota de parlamentores pos la fuji de presidente Viktor Yanukovych de Kiev.

Parlante pos se libri, el ia anunsia ce "la autocratia ia cade".

On ia condena el a sete anios en prison en 2011, pos un judi controversa sur se atas como ministro xef.

Eta pone alga armas ultra capasia de usa

Esaminores internasional dise ce Eta, la grupo separadiste euscara, ia pone alga de se armas "ultra capasia de usa".

La Comision Internasional de Serti, en la site euscara de Bilbao, dise ce un parte peti de la armeria de Eta es aora selida a via.

La governa espaniol ia refusa negosia con Eta, e lo ia rejeta la desarma como un move "teatral".

Eta ia declara un fini de se campania enarmada en 2011. Lo ia mata plu ca 800 sentos en cuatro desenios.

Studiantes SUA pone un laso a un sculta de desepara

Ofisiores de la Universia de Mississippi en la SUA vole interoga tre studiantes blanca, sur ci on suspeta ce los ia pone un laso de pende sur un sculta cual selebra la desepara.

La laso es ia trovada sur un sculta de James Meredith, un studiante african-american ci ia fronti corajosa manadas de separistes en 1962.

La tre studiantes ave 19 anios e es en se anio prima de universia. Se avocatos ancora no ia permete ce on interoga los.

La aveni ia provoca protestas par studiantes.

Motoristes en Miami salva un bebe

En Miami en la SUA, un bebe de sinco menses ci ia sesa respira ia survive pos es aidada par motoristes trapida en conjesta sur un autovia.

En jovedi, Pamela Rauseo, ci ave 37 anios, ia lasa se veculo, criante per aida, en cuando se sobrino Sebastian ia comensa deveni blu.

Un fem ia aida direta Rauseo a fa la reanima cardiopulmonal, en cuando un fotojornaliste ia trova un polisior en un veculo prosima.

Sebastian ia survive e ia es un state stable en ospital a un ora tarda de jovedi.

Uganda pausa ante un lege contra omosesalia

Yoweri Museveni, la presidente de Uganda, demanda ce la SUA consela siensistes ugandan sur omosesalia. El considera esce el debe suscrive un lege per aumenta punis.

Un portavose per Museveni ia dise ce la presidente no va suscrive la lege asta reseta la consela siensal.

En la semana pasada, el ia deside suscrive la Lege Contra Omosesalia, cual la parlamento ia aseta.

La SUA – un de la donores la plu grande de aida a Uganda – ia avisa ce la lege ta complica relatas entre la du paises.

Pape Fransisco crea 19 cardinales nova

Pape Fransisco va asinia 19 cardinales nova a un rituo en Roma – la tal nomis prima de se papia.

Cardinales es la eglesores catolica la plu major su la pape.

La inclui de eglesores de locas como Aiti e Burcina Faso refleta la suporta de la pape arjentina per nasiones povre.

Des ses de la novas ave min ca 80 anios, donce los va pote fa un conclave per eleje la pape seguente.

Maduro invita Obama a discutes sur relatas

Nicolás Maduro, la gidor de Venezuela, ia invita Barack Obama, la presidente de la SUA, a partisipa en discutes intendeda per solve la problemes entre la du paises.

Maduro ia dise ce le consenta ta aida "esposa la veria a sur la table".

El ia acusa conservistes SUA e organizas jornaliste de conspira per suverti se governa.

Plu temprana en venerdi, Venezuela ia cansela la permetes de reportores de CNN ci analise la crise de la pais. Oto persones ia mori en protestas resente.

Lemures pote es salvada par turisme

Conservores de natur dise ce la lemures de Madagasicara, la primates la plu perilida de mundo, pote es salvada de estingui par ecoturisme.

La animales es peluxetin e ave oios grande. Los parteni unica a la isola, ma se cuantia ia diminui estrema en anios resente.

Rexercores ia desveli un projeta cual combina turisme con laboras aumentada de conserva. La projeta va costa $7,6 milion.

La siensa conose plu ca sento spesies de lemur. La majoria esiste en cuantias perilinte basa, xef pos perde se abitadas par causa de esplota nonlegal de forestas.

La ofisias de Yanukovych es nongardada

La ofisias en Kiev de Viktor Yanukovych, la presidente ucrainsce, es aora nongardada.

Lo pare ce protestores oposante controla intera la distrito de governa.

La gidores oposante dise ce Yanukovych, de ci on no sabe se loca presente, debe resinia sin pospone.

Los esije un vota ante 25 maio – no la fini de desembre, como projetada en la acorda de pas de venerdi.

Matteo Renzi nomi se ministros

Matteo Renzi, la gidor de la Partito Democrata italian, ia aseta formal la gida de un governa nova, e ia nomi la membros de se consilio.

Con sola 39 anios, Renzi va es la ministro xef la plu joven de Italia. On va indui el en saturdi.

El gida un partito sinistriste sentral, ma el ia spende alga dias en negosia con otra partitos per organiza se alia.

Renzi ia despone se colaboror de partito Enrico Letta, ci ia gida Italia tra no plu ca 10 menses.

On usa bus per combate un virus en Txile

Ofisiores en Txile fa un alia nonprobable – con bus savaje. On atenta combate un maladia comunicable cual ia causa ja sirca 15 moris.

Bus es la predores natural de la ratas cual porta un virus matante.

Tipal, la ratas dona la virus a umanas sola cuando los encontra tendores en la forestas. Ma focos savaje en la menses de estate ia forsa la ratas a areas urban, maladinte plu persones.

La maladia no afeta la ratas mesma.

Serebros de canes reata a voses como serebros umana

Posesores de canes dise comun ce se animales pote comprende los. Un studia nova sujesta ce cisa los no imajina esta.

Siensistes de Ungaria ia pone canes en un scanador de imaji par resona magnetal.

Los ia descovre ce la serebro de un can reata a voses en la mesma modo como la serebro umana.

Sonas emosiosa, como ploras o ries, ia provoca ance respondes simil, cisa esplicante perce canes pote ajusta a emosias umana.

La Jornal de Anne Frank es laserada en bibliotecas japanes

On ia dana plu ca 100 copias de la Jornal de un xica joven par Anne Frank, en bibliotecas publica en la capital de Japan.

Pajes ia es laserada de 265 copias, cisa plu, de la Jornal e otra libros relatada.

On no sabe ci ia fa la vandalisme. Un grupo SUA de diretos iudi ia demanda un investiga par polisia.

Anne Frank ia scrive se jornal en la Gera Mundal Du, en cuando el ia asconde de la nazis en Amsterdam ocupada.

La palasio presidental en Mogadishu es atacada

Un bomba enorme de auto ia crea un buco en la mur de la palasio de la presidente de Somalia. Un batalia ferose de fusiles ia segue a interna.

A la min du ofisiores senior e nove atacores es mor, ma la ministro de securia ia dise ce la situa es "controlada".

La presidente, Hassan Sheikh Mohamud, ia informa la ambasador de la Nasiones Unida ce el no ia es ferida.

La grupo al-Shabab, liada a al-Qaidah, ia dise ce lo ia fa la ataca.

On no va prosede un om arestada sur tre matas en la Alpes

Avocatos en Frans ia dise ce on no va prosede un om arestada en relata a la mata de un injenior brites e se familia.

Saad al-Hilli, ci ia ave 50 anios, se sposa Iqbal, e la madre de esta, Suhaila al-Allaf, ia es fusilida sur un rua de foresta en la Alpes en 2012.

La om suspetada ave 48 anios, e es aora librida de prisoni polisial.

Ma on investiga ancora el sur un alega de partisipa en contrabanda de armas.

2014-02-21

Nepal va abri un ofisia de securia sur Monte Everest

Nepal ia deside envia un ecipo de ofisiores de securia a la campa de base de Monte Everest, per atenta preveni disputas entre trepores.

En april pasada, un combate ia aveni entre trepores european e un grupo de xerpas a la altia de 7470 metres.

Acel disputa ia es ultima solveda, ma on dise ce la inclinas de la monte deveni sempre plu folida.

Un ofisia con soldatos e polisiores va abri en april a la campa, a la comensa de la saison de trepa.

Corea Sude va crea utiles de siberataca

Corea Sude intende developa utiles de siberataca per atenta dana complesos nucleal de Corea Norde.

La ministreria de defende vole crea armas simil a Stuxnet, la program desiniada per ataca complesos de rici nucleal en Iran.

On ia dise ce soldatos de Corea Sude va fa misiones usante la utiles.

Un esperta sur securia de computadores ia dise ce la usa de tal armas pote es "multe perilosa".

Un avion libi cade en Tunis

Un avion militar libi, portante dotores e pasientes, ia cade en Tunis, matante tota 11 persones embarcada.

La avion ia desende sur un campo prosima a Grombalia, a sirca 40 cilometres a sude de la capital.

Lo ia porta tre dotores, du pasientes, e ses ecipoores. Se motor ia falta.

Libis es comun medical tratada en Tunis, do la cualia de cura es plu alta.

La presidente e protestores ucrainsce acorda un vota temprana

Viktor Yanukovych, la presidente ucrainsce, e protestores oposante ia acorda un vota temprana de presidentia, ante la fini de la anio.

Esta un parte de un acorda per fini la crise political en la pais.

On no ia publici ja la detalias, ma Yanukovych ia refere a un governa de unia nasional e a cambias constitual per redui la potia presidental.

La compromete ia es atenida pos oras de negosias, arbitrada par tre ministros european de esternas.

La ministros deutx e polsce ia encontra protestores en la Plaza de Autonomia de Kiev, ante anunsia ce se gidores suporta la acorda.

Isolas recrese en la sentenio pos un siclon

Lo pare ce un serie de isolas Pasifica ia "recrese" pos es ruinada par un siclon a un sentenio ante aora.

Un tempesta potiosa en 1905 ia mata cuasi tota abitores de la Atol Nadikdik – un parte de la Isolas Majel – e ia lava la plu de la isolas a via.

Ma parente la isolas ia recrea se. La un es aora denova covreda con plantas stable, e otra isolas plu peti ia repare e deveni un sola masa de tera.

On esplica ce la tempesta ia colie un cuantia enorme coral a sur la isolas, e esta ia aida los a reorganiza se.

Un om usa un levacarga contra un vendador de xocolada

Un om en la stato de Iowa en la SUA ia es desempleada pos usa un levacarga per desfisa un bara de xocolada de un vendador faltante.

Robert McKevitt, ci ave 27 anios, ia es laborante en la site de Milford cuando esta ia aveni en la autono de 2013.

El ia dise ce el ia pone un dolar en la macina, ma se bara ia deveni trapida sur un onca.

El ia usa alora un levacarga de cuasi 4000 cilogrames per secute la macina, en dise de se empleor.

On aresta gardores suspetada de Auschwitz

Autoriosas deutx ia prisoni omes con 88, 92, e 94 anios, sur ci on suspeta ce los ia es gardores a la campa nazi de Auschwitz.

On ia invade la casas de alga omes en tre statos de Deutxland, a menses pos cuando investigores de crimines de gera de la eda nazi ia anunsia ce los recomenda acusa 30 persones.

La tre omes ia es prendeda a un ospital de prison.

Plu ca 1,1 milion persones, de cual la majoria ia es iudi, ia es matada en Auschwitz.

Google revela un telefoneta con sensadores 3D

Google ia revela un telefoneta intelijente con aparatos e programes con cual lo pote crea mapas de tre dimensiones sur la ambiente de un usor.

La sensadores de la aparato permete ce lo fa plu ca 250 000 mesuras en cada secondo, e refresci se consensia de se loca en tempo real.

Google ia comenta ce aplicas posible inclui juas, la crea de mapas de spasios interna, e aida persones ci no vide bon a traversa salas nonconoseda.

Lo ia ofre 200 modeles prototipal a developores ci desira scrive programes per la aparato.

On ajunta miles de plu ajentes de securia a la Copa Mundal

Brasil ia anunsia un aumenta de securia con sirca 70 mil plu polisiores per manteni la bon ordina a la Copa Mundal de futbal.

En soma, on previde ce 170 000 persones va enforsa securia tra la 12 sites ospitante.

Presidente Dilma Rousseff ia dise en mercurdi ce on va pote introdui ance la fortes armada, si nesesada.

De pos junio de la anio pasada, protestores ia organiza marxas en stradas, con alga violentia, cual ia provoca consernas sur securia a la torneo.

Obama va ospita la Dalai-Lama a la Casa Blanca

Barack Obama, la presidente de la SUA, va encontra oji la Dalai-Lama, la gidor spirital de Tibet.

Xina ia recomenda forte ce la SUA cansela la encontra, disente ce lo va "dana seria" la relatas entre Xina e la SUA.

Xina regarda la Dalai-Lama como un separadiste, ma el mesma dise ce el promove mera autonomia plu grande per Tibet, no autonomia completa.

La SUA dise ce lo no suporta la autonomia completa de Tibet, ma lo es consernada sur diretos umana en Xina.

Gana proibi un parola de jergo en parlamento

La parlamento ganaian ia proibi un parola de jergo popular, pos cuando se usa ia disturba la prosegues.

La parola "tweaa" espresa desaproba en acan, la lingua xef de Gana. On ia usa lo a multe veses en debates parlamental, tal ce Edward Doe Adjaho, la presidente de la parlamento, ia proibi intera lo.

Criticistes dise ce la regula nova ia ariva a esata la bon momento per proibi politicistes de cria "tweaa" a presidente John Mahama en se parla anial en la semana veninte.

La parola ia deveni popular pos la sperde virusin de un video en cual un ofisior dise coler "Ci ia dise 'tweaa'?" pos un interompe de se parla estra un ospital.

On rejistra un trematera entre Cimri e England sude-ueste

On ia rejistra un trematera su la Canal de Bristol cual separa la sude de Cimri de la sude-ueste de England.

La trema ia es de cuantia 4,1. Lo ia aveni en la posmedia temprana de jovedi, e on ia senti lo en multe locas.

La episentro ia es entre la Penisola Gower en Cimri e la vila peti de Ilfracombe en la contia de Devon.

La trema ia aveni a la profondia de 5 cilometres.

Un limpor baldoni obras de arte moderna

Un limpor ia fa la era de baldoni alga obras de arte moderna cual on ia intende esibi en Italia sude.

El ia dejeta jornales e pesos de carton e biscoto cual ia es sperdeda sur un solo. La obras ia es creada par Sala Murat.

Lorenzo Roca de la compania de limpi ia dise ce la limpor – no nomida – ia "fa no plu ca se taxe".

El ia ajunta ce la asecura de se compania va covre la valua de la arte: sirca 10 mil euros.

Facebook compra Whatsapp

Facebook ia compra la compania de Whatsapp, un program de mesaje, en un acorda con valua de $19 mil milion.

Esta es la compra la plu grande asta aora de la compania jigante de rede sosial.

WhatsApp ave plu ca 450 milion usores mensal, e es popular entre los ci vole evita paia per envia mesajetas.

Lo permete ce on envia direta mesajetas tra la interede. La compania dise ce lo gania milion usores per dia.

On acorda sur un negosia de program nucleal de Iran

Iran ia dise ce discutes con potias global sur se program nucleal ia conclui con un acorda de un negosia completa.

Abbas Araqchi, la minstro suordinada de esternas, ia descrive "un atmosfera positiva" a la confere en Wien, la capital austrian.

Catherine Ashton, la xef de politica esterna de la Uni European ia comenta ce la delegadas ia identifia la problemes cual on va debe solve.

Ma el ia averti ce on ave ancora "multe per fa", e ce ajunta a la acorda tempora fada en novembre no va es fasil.

Tota parlamentores de Aurora de Oro pote es criminal acusada

Judores elinica ia demanda ce on sutrae la imunia parlamental de nove plu parlamentores de Aurora de Oro, un partito estrema destriste, afin on pote fa acusas criminal contra los.

Si la parlamento aproba la demanda, on ta acusa ce tota 18 de la parlamentores de la partito ia maneja un organiza criminal.

Nove es ja acusada, e Nikolaos Michaloliakos, la gidor, es un de ses ci on ia prisoni ante se prosede.

Se arestas segue la mata de un musiciste antifaxiste.

Jornalistes de Al-Jazeera nega acusas de terorisme a se prosede

Tre jornalistes de Al-Jazeera ia nega tota alegas a la comensa de un prosede en Cairo. La prosede ia provoca consernas sur libria de espresa en Egipte.

On ia refusa libri Mohamed Fahmy, un egipsian-canadian, Peter Greste, un reportor australian, Baher Mohamed, un produor egipsian, e sinco otras su cautia. La caso ia es alora posponeda asta 5 marto.

Los es entre 20 persones ci es acusada de aida o junta se a la Fratia Muslim, un organiza teroriste.

On prosede la otras en se asentia.

2014-02-20

On proposa compensa vitimes de viole sesal en la revolta libi

La governa de Libia ia dise ce on debe reconose femes sesal violeda en la revolta de 2011 como vitimes de gera.

Se anunsia, cual nesesa es aprobada par la congresa, ta pone la femes a la mesma grado como combatores ferida. Los ta merita alora un compensa.

On alega ce fortes favorente Muammar Gaddafi ia usa la viole sesal como un spesie de arma.

La revolta cual ia despone Gaddafi ia comensa a tre anios ante aora. Votores eleje aora un autoriosa per scrive un constitui nova.

La ministro xef de Tai nega un alega de froda

Yingluck Shinawatra, la ministro xef de Tai, ia publici un declara en cual el nega alegas de froda en relata a un scema controversa de compra ris.

En martedi, la comision antifroda de Tai ia dise ce lo va prosede el per se rol en la scema.

Si on judi ce el es culpable, el va pote es obligada de resinia.

En la entretempo, protestores contra la governa ia continua se campania de despone seniora Yingluck.

On desemplea la governor de la banco sentral de Nijeria

Lamidos Sanusi, la governor de la banco sentral de Nijeria, ia es suspendeda par la presidente per "freta e malcondui finansial".

Sanusi ia provoca un xoca en la pais cuando el ia alega ce 20 mil milion en revenu de petrolio ia desapare.

La compania nasional de petrolio de Nijeria ia nega fali justi la mone, descrivente la alega como "nonsuportada".

On respeta Sanusi pos se reformis a la campo de bancos de pos se emprende de la posto en 2009.

Dotores recomenda no desasentua la combate de malaria en Africa

Dotores ia averti ce, an si la combate de malaria en Africa ia fa susedes grande, la mundo debe "no move se pede de sur la aselerador".

Un analise detaliosa de la maladia, publicida en The Lancet ("La bisturi"), mostra ce 184 milion persones abita ancora en areas do plu ca un dui de enfantes esibi sintomes de infeta malarial.

Los dise ance ce on debe ancora fa multe plu en areas de risca alta.

Tra la mundo, 627 000 persones mori de malaria en cada anio. La plu es en Africa.

Migrores ci no vole revade a Italia es suportada par corte brites

Cuatro xercores de refuja, ci defia se deporta a Italia par regulas de Uni European, ia reseta un suporta de la Corte Suprema de la Rena Unida.

La corte ia judi ce on debe reesamina la caso, car on teme ce los risca sufri tratas "nonumana".

La cuatro – un irani e tre ertris – ia ariva en la Rena Unida par via de Italia.

La lege de la UE dise ce los debe revade a Italia, do los ia xerca prima se refuja, afin on trata se xercas.

On presenta un projeta de aida contra secia estrema en California

Politicistes en California ia anunsia un projeta de $687 milion per furni direta aidas a comunias sofocada par la secia recordo cual continua ancora.

La idea ia es proposada par democratas californian, e par Jerry Brown, la governor de la stato.

La plu de la mone, colieda de du obligas finansial cual votores ia aproba ja, ta contribui a la conserva de acua local.

Esta ta aida resicli plu acua, incluinte par catura acua de tempesta.

Pacistan bombi asconderias de combatosas

Jetos pacistani ia fa atacas de aira contra asconderias suspetada de ativistes combatosa en la norde-ueste, matante a la min 15 persones.

La atacas en la note ia consentra sur la vila de Mir Ali e la areas ambiente de Uaziristan Norde.

Los segue un falta de discutes de pas entre reconsiliores de governa e ativistes de Taliban.

A sola alga dias ante aora, un grupo de Taliban en un otra area ia confesa mata 23 soldatos paramilitar.

Ministros de UE va discute en Kiev

Ministros de esternas de Frans, Deutxland, e Polsca va fa discutes de crise en Kiev, seguente la combates matante ala de esta semana.

La governa e oposa va partisipa ance en la discutes.

Esta va presede un consenta de la Uni European en Bruxelles per deside esce on debe introdui punis political contra Ucraina.

26 persones, cisa plu, ia mori ja en esta semana en combates en Kiev.

Coreanes sude ariva en Corea Norde per reunis

Plu ca sento coreanes sude ia ariva en Corea Norde per reunis con se relatadas – la tal avenis prima de pos 2010.

La reunis segue un clama par Corea Norde per boni relatas entre la du lados. Los va aveni entre 20 e 25 febrero.

Los pertine a familias ci ia deveni separada pos la Gera Corean. La relatadas no ia vide la un la otra tra desenios.

La reunis presede eserses militar projetada par la SUA e Corea Sude, cual va comensa en lundi.

Un ataca nova en Nijeria contradise un declara de gania la gera

Bombas umana ia partisipa en un ataca major contra la vila de Bama, a la borda norde de Nijeria.

Esta ia aveni a la dia pos cuando un portavose per la presidente ia dise ce la armada "gania la gera" contra ativistes islamiste.

Ahmend Zanna, la senator per la stato de Borno, ia comenta ce la ataca ia dura tra sinco oras en la matina de mercurdi.

Islamistes suspetada ia mata plu ca 245 persones en la pais en sola esta anio.

La proportio de moris de laborores indian en Catar es normal

Ofisiores indian e catari ia insiste ce la proportio de moris entre laborores indian en Catar es normal.

En lundi, la ambasada indian en Doha ia revela ce 455 indianes ia mori en 2012 e 2013, provocante espresas de conserna de organizas de laborores.

Ma un portavose per la ministreria de esternas indian ia dise ce la majoria grande de moris ia ave causas natural.

La amiria ia trova se su presa per boni la state de vive per laborores migrante.

Bombas jemelo en Beirut mata cuatro persones

A la min cuatro persones ia es matada, e desuples ia es ferida, en un ataca con du bombas en la sude de Beirut, la capital de Lubnan.

Du bombas umana, usante un auto e un motosicle, ia esplode se en prosimia de un sentro cultural irani.

La esplodes ia causa multe dana a botecas e construidas, e ia ensende veculos.

Esta es la plu resente en un serie de atacas en la suburbes sude de Beirut, do Hezbollah ave un presentia forte.

La invade de la cason de Kim Dotcom en 2012 ia es legal

Un corte en Zeland Nova ia judi ce un invade de la cason de Kim Dotcom, un maniate de interede, ia es legal.

En janero 2012, on ia xerca tra la casa de Dotcom e ia saisi ojetos, comandada par autoriosas SUA ci acusa el de piratia de obras.

La deside pote alti la probablia ce on va estradi Dotcom a la SUA.

An tal, la corte ia acorda ce la clone de atestas eletronical par la investigores ia es nonlegal.

Corea Norde aresta un misionor australian

Corea Norde ia aresta un misionor australian, en dise de se sposa.

John Short ave 75 anios. El ia fa se visita du a Corea Norde con un grupo de turisme cuando on ia aresta el en Pyongyang.

Se sposa ia clari a jornalistes ce se sposo no ia atenta asconde se labora, e ce el ia porta materia relijiosa en tradui corean.

Un portavose per la ministro de esternas australian ia comenta ce la governa es consensa de la aresta.

Pussy Riot es flajelida en Sochi

Pussy Riot, un bande protestante rusce, ia es bateda con flajelos par cozaces ci aida patrulia Sochi tra la Olimpiales invernal.

On ia publici un video en cual membros de la bande es flajelida en cuando los protesta.

La bande ia deveni famosa pos presenta un canta protestante contra presidente Vladimir Putin en un eglesa.

En lundi, on ia aresta du membros per un fura suspetada, ma on ia libri los a pos.

La xef de la fortes armada ucrainsce es desempleada

La presidente de Ucraina, Viktor Yanukovych, ia desemplea la xef de la fortes armada, coronel jeneral Volodymyr Zamana.

Esta segue la violentia la plu intensa en la crise de tre menses, cual ia altera Kiev a un campo de batalia.

Plu temprana, la servi de securia ia anunsia ce lo lansa un campania antiteroriste tra la pais, per combate un "menasa estremiste" cresente.

On ia sujesta ce on pote introdui fortes aramda a la situa a la ves prima.

On condena un monce fema a prison per entra un compleso de defende

On ia condena un monce catolica fema vea a cuasi tre anios en prison per la dana cual el ia causa en entra par forsa a un loca SUA de defende nucleal.

Megan Rice, ci ave 84 anios, e du otra protestores ia talia sercas per entra a un compleso en Tennessee do on prosede e conserva uranio.

On ia condena la otra du a plu ca sinco anios en prison.

La aveni en julio 2012 ia causa cambias de securia a la compleso.

2014-02-19

La polisia franses interoga Serge Dassault

Serge Dassault, un bilionor industrialiste e senator franses, ia es tenida per interoga sur alegas ce el ia compra votas en un suburbe de Paris.

La polisia interoga el sur se ativias en Corbeil-Essonnes, do el ia es maior entre 1995 e 2009.

On ia sutrae se imunia parlamental a 12 febrero.

Dassault ave 88 anios e posese un compania major cual produi jetos.

Tamil Nadu va libri conspirores de asasina de Rajiv Gandhi

La governa en la stato de Tamil Nadu en India ia deside libri sete persones condenada de conspira per asasina de Rajiv Gandhi, la ministro xef pasada.

La ses omes e un fem ia es membros de la rebelores Tigres Tamil de Srilanca.

On ia anunsia esta deside a la dia pos cuando la Corte Suprema ia muta la condenas a mori de tre de la condenadas.

La omiside de Gandhi en maio 1991 ia es videda como un contrataca per la envia de indianes a Srilanca en 1987 per manteni la pas.

Egipte considera un esije ultima contra turistes

La governa egipsian ia dise ce lo reata seria a un esije ultima de 48 oras par un grupo combatosa islamiste, cual xerca ce tota turistes parti de Egipte.

On ia fa la menasa en un conta privata de Twitter cual parteni a la grupo.

La grupo ia nega posese cualce conta de rede sosial, ma Reuters, un ajenteria de novas, declara ce acel conta ia conteni informas coreta en la pasada.

La governa de Egipte luta contra un crese de ativisme combatosa en la penisola Sina.

La serebro de un simia controla la moves de un otra

On ia usa la serebro de un simia per controla la moves de un otra.

Par scane la serebro, on ia pote leje la mente de la simia prima, e stimula eletrical la medula spinal de la otra – nomida la "avatar", calmida par drogas.

La ecipo espera ce los pote refina la metodo per permete ce persones paraliseda regania la controla de se corpos propre.

On descrive la resulta como un avansa importante.

On desemplea la xef de un stasion autonom de radio rusce

La xef de Ekho Moskvy, un de la poca difusantes autonom cual resta en Rusia, ia es desempleada e recambiada con un editor de la jornalisme de stato.

Yuri Fedutinov ia gida la stasion de radio de pos 1992. La dirijor nova, Yekaterina Pavlova, ia labora la plu resente a Vose de Rusia.

Ekho Moskvy es un de poca voses nondependente en jornalisme rusce.

Se editor ia descrive la deside como "nonjusta" e "intera political", e ia comenta ce la intende ia es reali un cambia de politica edital.

On trova la corpos de du escavores nonlegal en Sudafrica

On ia descovre la corpos de du escavores nonlegal a un mina desusada, a este de Johannesburg en Sudafrica.

La mina es en la mesma area do on ia salva resente plu ca 20 escavores nonlegal ci ia deveni trapida su tera tra alga dias.

Acel omes, sur ci on dise ce un grupo oposante de escavores nonlegal ia trapi los, ia es arestada pos se emerji de la duto.

Los va apare en corte, acusada sur escavas nonlegal.

Cuasi 50 persones es matada par bombas de auto en Irac

En Irac, a la min 49 persones ia es matada en un serie de bombas de auto en la sites de Baghdad e Hilla.

La esplodes veni a un dia pos cuando 23 persones, cisa plu, ia es matada par bombas en la capital.

En la mense pasada, plu ca mil persones ia mori en tal atacas, xef contra blancos xia e governal.

No organiza ia declara se culpablia, ma grupos combatosa suni ia ataca ja areas xia en la pasada.

FIFA permete ce la stadion de Curitiba partisipa en la Copa Mundal

La site de Curitiba en Brasil va resta un loca de la Copa Mundal de futbal de esta anio. Ma FIFA, la asosia autoriosa de la sporte, ia insiste ce la preparas debe continua con rapidia masima.

La stadion Arena da Baixada en la sude de la pais ia es un de ses locas cual no ia es preparada ante un limita inisial de 31 desembre.

Organizores ia introdui plu sentos de laborores per sasia la esijes de construi, e per evita deveni la loca prima abandonada de un Copa Mundal.

La stadion de 40 000 persones va ospita cuatro maxes de la torneo.

La gidor oposante en Venezuela presenta se per aresta

Leopoldo López, la gidor oposante en Venezuela, ia presenta se a la polisia pos parla a miles de se suportores.

El ia dise ce el ia espera ce se aresta va consensi la pais sur se "justia nonjusta".

A la mesma tempo, alga miles de suportores e oposores de la governa ia partisipa en asemblas tensada e competente en la capital, Caracas.

López ia es acusada de provoca violentia en protestas resente en cual cuatro persones, cisa plu, ia mori.

Chicago contra la carpas

La site de Chicago en la SUA considera medios estrema per preveni ce pexes jigante infesta la Lagos Grande de America Norde.

Autoriosas esplora la idea de bloci la sistem de canales en la site, per impedi la entra de carpas asian a Lago Michigan.

La projeta ta pote costa asta $18 mil milion e ta disturba enorme la economia de la site.

On esamina ance posibles min costosa, incluinte crea amburgeres de la pexes e come los asta se estingui.

La polisia australian investiga un paia a Schapelle Corby per un intervisa

La polisia en Australia ia invade la ofisias de un rede de televisa, alegante ce lo intende paia a Schapelle Corby, condenada per contrabanda de drogas, per un intervisa.

Corby ia es prisonida per 20 anios en 2005 per trae mariuana a Bali. On ia libri el su cautia, plu temprana en esta mense.

La invade par la polisia es relatada a la Ata de Revenu de Crimin, cual proibi ce criminales profita de se crimines.

La rede ia denunsia la atacas, disente ce lo no ia acorda un paia con Corby.

Italia retira se ambasador de India en disputa sur un prosede de marinores

Italia ia retira se ambasador de India en un disputa continuante con Delhi sur du marinores italian ci on acusa de mata du pexores indian.

La ministreria de esternas ia dise ce Daniele Mancini va vola direta a Roma, par causa de "un plu pospone nonasetable e intendeda" en la cortes.

La Corte Suprema ia es a punto de escuta la caso en martedi, ma on ia pospone lo.

Italia ia es ja colerida par un deside indian de prosede la du omes, su un lege contra piratia, per la matas en 2012.

Musharraf apare en corte a la ves prima

Pervez Musharraf, la renor militar pasada de Pacistan, ia apare en corte a la ves prima, acusada de tradi.

Consernas de securia e sania ia impedi se presentia en escutas plu temprana. El ia spende plu ca un mense en ospital.

On acusa el de suspende nonlegal la constitui e de institui un rena de crise en 2007.

El es la prima de la renores militar pasada ci on prosede en Pacistan, e el risca la puni de mori.

Un maior de Ruanda es condenada per se rol en jenoside

Un corte deutx ia condena Onesphore Rwabukombe, un maior pasada de Ruanda, a 14 anios en prison per se rol en la jenoside en Ruanda en 1994.

On ia judi ce la om de 56 anios es culpable de comanda la matas de sentos de persones en un eglesa en Kiziguro, do los ia xerca refuja.

El abita ja como un refujada political en Deutxland de pos 2002.

Esta ia es la prosede prima sur la jenoside ruanda cual ia aveni en Deutxland.

Membros de Pussy Riot es librida en Sochi

On ia libri du membros de Pussy Riot, un bande protestante rusce, ci ia es arestada en lundi, prosima a la site de Sochi.

Maria Alyokhina e Nadezhda Tolokonnikova ia es tenida car on ia suspeta los de fura.

La duple ia es condenada per protesta contra presidente Putin en 2012.

Los ia fa se protesta con otra membros de la bande en la catedral la plu grande de Moscva. On ia libri los de prison en desembre.

Un sesafusili en Sudan Sude es rompeda

En la stato de Nil Alta en Sudan Sude, batalias ia aveni. Estas es la prima tal atacas de pos la suscrive de un acorda entre la governa e la rebelores en janero.

Ambos lados acusa la un la otra de comensa la violentia en Malakal, la capital de la stato.

La governa dise ce batalias ia aveni en la plu partes de la vila.

La violentia va causa consernas nova sur la securia de campos de petrolio en la norde, cual es la funda de la economia.

2014-02-18

Violentia matante sirca la parlamento en Kiev

Violentia ia esplode denova entre protestores e polisiores en Kieve, la capital de Ucraina. A la min sete persones ia es matada.

En la violentia la plu mal de semanas, la polisia ia usa baletas de cauxo e granadas aturdinte per para miles de protestores ci ia marxa contra la parlamento, lansante petras.

Fortes de securia ia pone un limita de tempo de 18:00 per fini la turba.

La scaramuxas ia aveni cuando parlamentores ia es a punto de debate cambias a la constitui.

On aresta un fem american sur lua de video tarda de nove anios

En la SUA, un fem en Carolina Sude ia es arestada e prisonida per un note, sur un video luada de cual se redona ia es tarda de nove anios.

Kayla Finley ia visita un ofisia de polisia per reporta un crimin. Ma el ia descovre ce on ia comanda se aresta en 2005, cuando el ia ave 18 anios.

Finley ia lua un copia VHS de Monster-in-Law ("Monstro par sposi"), un comedia romantica con Jennifer Lopez e Jane Fonda.

La televisa local ia descrive el como "xocada e repulsada" par la aresta.

On prosede polisiores brasilera sur un masacra de 1992

On prosede 15 polisiores en Brasil, acusada de partisipa en un masacra a la prison de Carandiru en São Paulo en 1992.

On ia divide la prosede en cuatro fases – un per cada solo de la prison do la 111 matas ia aveni.

La escuta presente relata a los ci on acusa de mata oto prisonidas. Se avocatos dise ce on no pote serti ci ia fa la xutas matante.

48 polisiores ia es condenada en la du fases presedente de la caso.

Un construida en Corea Sude colasa

A la min des persones ia mori, e plu ca sento ia es ferida, cuando un construida ia colasa en Corea Sude.

On crede ce plu ca 560 persones ia es presente a un conserta en Gyeonghu, un site sude-este, cuando un parte de la salon ia cade.

Nove de la matadas ia es studiantes.

Pompores ia culpa la pesa de neva sur la teto. La clima ia impedi ance la laboras de salva.

Discutes sur la program nucleal de Iran comensa en Wien

Iran e ses potias global comensa la serie prima de discutes sur un acorda durante sur la program nucleal controversa de Tehran.

La discutes en Wien en Austria intende ajunta a un resulta tempora de novembre, en cual Iran ia acorda restrinje se rici de uranio en intercambia per un lejeri partal de punis internasional.

Ante la consenta, ambos Iran e la SUA ia desasentua esperas de un solve rapida.

La Ueste suspeta ce Iran atenta construi armas nucleal. Tehran nega esta.

La polisia e protestores scaramuxa en Tai

La polisia tai ia fronti protestores en Bangkok sentral. Alga persones ia es ferida, e un polisior ia es matada.

La protestores ia bloci locas e construidas ofisial, e la polisia ia atenta reprende los.

Plu temprana en martedi, los ia aresta sirca 100 protestores estra un construida de ministreria.

Tai es en un crise political profonda de pos la comensa de protestas contra la governa en novembre.

La aniversario 75 de calsas de nilon

Un veste cual ia cambia la mundo de moda per sempre ia es comersial produida a la ves prima a 75 anios ante aora.

La calsas de nilon de DuPont, fada de la fibro nova "miraclin", ia es multe comprada cuando on ia comensa vende los en la SUA en 1940, la anio seguente.

Los ia es developada par la ecipo de dotor Wallace Carothers.

Calsas de nilon ia es durante, barata, e plu diafana ca la corespondentes de seda.

On nomi un fem como editor xef de un jornal dial en Arabia Saudi

En Arabia Saudi, on ia nomi un fem como la editor xef de un jornal dial a la ves prima.

La Saudi Gazette, scriveda en engles, ia anunsia en se pajeria ce Somayya Jabarti va segue Khaled Almaeena.

En la numero de soldi, Almaeena ia scrive ce Jabarti ia gania la posto par merita, descrivente el como un jornaliste ostinosa e dedicada.

Jabarti ia comenta: "Un fesur ia apare en la sofito de vitro. E me espera ce on va cambia lo a un porte."

Plu matas con fusil en Missouri pos cansela de lege de compra

Un rexerca nova furni atesta nova per recomenda un controla plu sever de fusiles en la SUA.

La rexercores ia esplora la resultas de la cansela par la Stato Missori de se lege sur fusiles de mano en 2007.

Su la lege, on ia debe es sertida par la xerif local e reseta un lisensa ante compra un fusil.

En un numero veninte de la Jornal de Sania Urban, la rexercores va dise ce la cansela ia causa un alti direta en violes e matas con fusil.

Un editor indian es acusada sur viole sesal

En India, on ia acusa la editor pasada de un jornal major de novas sur la viole sesal de un colaboror fema.

On ia acusa Tarun Tejpal ance sur "molesta sesal" e "viole la modestia de un fem".

Tejpal es ja en prison de pos 30 novembre. El nega la acusas.

On no ia nomi se acusor, ma el alega ce Tejpal ia ataca el a un aveni organizada par la jornal en Goa en novembre.

On aresta escavores sudafrican pos se emerji de mina

Des escavores nonlegal de oro ia emerji de un mina vea en Sudafrica. Plu es ancora su tera.

Alga de la omes ia sorti pos oia ce la polisia no es prosima. Ma polisiores ia asconde se, e ia aresta aora tota de la des.

On reporta ce la escavores ia es trapida par un grupo competente.

Los su la tera refusa denova emerji, temente ce on va aresta ance los.

Un amnestia comensa per protestores ucrainsce

Un amnestia per protestores antigoverna en Ucraina ia comensa funsiona, pos cuando la protestores ia fini se ocupa de construidas ofisial.

La pajeria de la avocato prosedente ia dise ce on va supresa acusas criminal, car la oposa ia parti ja de la ofisia de site de Kiev.

La protestores ia ocupa alga de la construidas tra plu ca du menses.

Ma un vila vasta de campas resta en un plaza sentral, do alga ia denunsia la deside de fini la ocupas.

Karzai comanda cambias a un lege sur atesta de viole familial

Hamid Karzai, la presidente de Afganistan, ia comanda alteras a leges projetada sur cual on ia critica ce los va restrinje sever la justia per vitimes de viole familial.

Un portavose ia clari ce el va insiste ce on fa "cambias nesesada".

La projeta – asetada par la parlamento en la anio pasada – proibi ce relatadas atesta contra maltratores alegada.

Grupos de diretos umana ia comenta ce, su la lege, un condena ta es cuasi nonposible en un caso de viole contra femes.

Un grupo disentinte de Taliban mata 23 soldatos pacistani

Nawaz Sharif, la ministro xef de Pacistan, ia condena la matas de 23 soldatos, par un grupo disentinte de Taliban, como un crimin "odiable".

A la note de soldi, ativistes ia declara ce los ia mata la soldatos, ci los ia prisoni de pos 2010.

Sharif ia dise ce la moris va fa un efeto negativa a discutes corente de pas con la Taliban.

Negosiores de governa ia cansela un consenta, projetada per lundi, con la Taliban.

No mal intende ia es envolveda en la asidente de Schumacher

La avocato prosedente franses ci investiga la asidente de sci de Michael Schumacher ia trova no atesta de mal intende, e ia clui la investiga.

Patrick Quincy ia dise ce la indicadores e informas a la scieria Meribel, do la asidente ia aveni, conforma a leges franses.

La famosa deutx de Formula 1, ci ave 45 anios, es medical curada de pos se asidente a 29 desembre.

El ia sci sur un inclina savaje cuando el ia cade e colpa se testa a un roca.

La Armada Suri Libre recambia se xef

La gidor de la Armada Suri Libre (ASL), suportada par la ueste e la statos de Golfo Farsi, ia es desempleada. On ia sustitui un comandor plu esperiosa.

Coronel Abdul-Ilah al-Bashir va segue Brigador Jeneral Salim Idris como la xef de la Consilio Militar Suprema de la ASL.

Un portavose ia dise ce on ia fa la deside par causa de la "nonproduosia" de la comanda pasada e un nesesa de "restruturi".

Tra la anio pasada, la Consilio ia perde influe a grupos de rebelores islamiste, de cual alga es liada a al-Qaidah.

Un avion itiopian es saisida par se copilote

Plu detalias ia emerji sur la saisi de un avion de Airolinia Itiopian, volante de Addis Ababa a Rome.

La saisor ia es la copilote. El ia espeta asta cuando la pilote ia visita la saleta privata, e alora ia securi se en la piloteria. El no ia porta un arma.

El ia atera la avion en Genève per xerca refuja en Suiz. On ia aresta el.

Tota la 201 pasajores e ecipores es secur.

2014-02-17

Matteo Renzi va deveni la ministro xef nova de Italia

Giorgio Napolitano, la presidente de Italia, ia demanda ce Matteo Renzi, la maior de Firenze, formi un governa nova.

Enrico Letta ia resinia como ministro xef en venerdi, pos es desponeda par un vota clamada par Renzi a un asembla de se Partito Democrata.

Renzi ia es nunca elejeda como un parlamentor. El va debe aora fa un acorda con la membros de la alia pasada de Letta.

El va comensa discutes en martedi, e pote es induida en jovedi.

Google compra tecnolojia de identifia par ondas de sona

Google ia compra SlickLogin – un comersia nova de Israel cual furni la tecnolojia cual permete ce un pajeria serti la identia de un usor par usa ondas de sona.

La tecnica envia un sona unica jenerada e cuasi silente tra la parladores de la computador. La sona es oiada par un program en la telefoneta de la usor.

La program analise la sona e reenvia un sinial per confirma la identia.

On pote usa la tecnolojia como sustitua per un parola secreta, o como un strato ajuntada de securia.

Patatas jenetical alterada resiste la clorose

Siensistes brites ia developa patatas jenetical alterada cual es capas de resiste la menasa la plu grande a se – la clorose.

Un esperimenta de tre anios ia mostra ce esta patatas pote survive bon, an pos esposa a la maladia Phytophthora infestans.

Acel mofo ia pesta cultivores tra jeneras. Lo ia causa la Famion Grande de Er en la desenio de 1840.

On nesesa la aproba de la Uni European ante pote cultiva comersial esta vejetal.

Refujadas evade un sentro de prisoni en Papua e Gine Nova

En Papua e Gine Nova, alga xercores de refuja ia evade la sentro de prisoni australian. Los ia rompe un serca e ia sufri feris.

Sirca 35 refujadas ia sorti de la sentro par forsa en soldi, ma on ia trova rapida los.

On ia aresta oto, e dona trata medical a 19.

La Isola Manus ospita un de la campas costal do Australia trata xercores de refuja.

Boko Haram masacra un vileta nijerian

En Nijeria, ativistes islamiste suspetada ia ataca un vileta e ia mata desuples de persones.

La atacores ia asembla un grupo de omes en Izghe e ia fusili los. A pos, los ia visita casas, matante cadun ci los ia trova.

Ofisiores ia dise ce los suspeta la grupo Boko Haram, un grupo malfamosa per viole estrema e atacas nondistinguinte.

Boko Haram declara ce lo batalia per crea un stato muslim en Nijeria norde.

On trova la ruina de un avion nepali mancante

En Nepal, on ia trova la ruina de un avion desapareda, cual ia porta 18 persones, en Arghakhanchi, un distrito ueste.

La avion ia es volante de la site Pokhara a Jumla cuando on ia perde contata, corta pos se enaira en soldi.

Un ofisior ia dise ce lo ia pare ce la avion ia colpa un colina.

Un elicotor ia identifia un ruina ardente, e xercores crede ce nun ia survive.

Un avion itiopian es saisida e atera en Suiz

Un avion de Airolinia Itiopian, en via de Addis Ababa a Roma, ia es obligada de atera en Genève pos es saisida en viaja.

On ia aresta un de la saisores. La airolinia ia anunsia ce tota pasajores e ecipores es secur.

Nun es ferida, e la polisia ia dise ce la situa es "controlada".

Vola 702 ia es saisida en cuando lo ia pasa supra Sudan.

Venezuela esclui tre ofisiores SUA sur protestas

La presidente venezuelan, Nicolás Maduro, esclui tre ofisiores de consuleria SUA. El acusa los de encontra studiantes envolveda en protestas antigoverna.

La pais ia esperia resente un crese de tensa political e asemblas protestante. Tre protestores ia mori en scaramuxas en la semana pasada.

On ia comanda ia aresta de Leopoldo López, la gidor oposante, ci ia promete gida un marxa en Caracas, la capital, en martedi.

La SUA ia espresa conserna sur arestas de protestores oposante.

La NU vole punis per crimines sistemosa de Corea Norde

La Nasiones Unida es a punto de publici un investiga de un anio sur maltratas de diretos en Corea Norde. On previde ce lo va recomenda punis per violes sistemosa par acel stato.

Un comite de espertas, con autoria de la Consilio de Diretos Umana de la NU, ia dise ce coreanes norde ia sufri "cruelias nonespresable".

La comite ia oia atestas de tortura, sclavi, viole sesal, represa political sever, e otra crimines.

On previde un recomenda de investiga par un corte o judores internasional.

Fusilores mata cuatro persones en Tunis

Fusilores en Tunis ueste ia mata cuatro persones, incluinte du polisiores, pos bloci un strada e xuta a autos.

Un patrulia de polisia ia es enviada a la area Jendouba per investiga reportas ce du persones ia es fusilida.

La atacores ia fusili alora la auto de polisia, matante la du ofisiores a interna.

Fortes de securia en la pais ia fa un campania longa contra ativistes violente islamiste tra la du anios pasada.

On pausa xerca airal un avion mancante en Nepal

On ia pausa, per la note, la xerca airal per un avion cual ia desapare en Nepal con 18 persones embarcada.

Du elicotores ia pausa se labora en un clima mal.

Soldatos continua xerca sur tera en la area do on crede ce la avion ia es situada a la tempo de se comunica final.

On va recomensa la xerca con aviones en lundi.

Un bus de turisme egipsian es bombida

Un ataca de bomba, a un bus de turisme en la penisola Sina, ia mata a la min tre turistes de Corea Sude e la gidor egipsian.

Alga otra persones corean ia es ance ferida en la ataca, cual ia aveni cuando la bus ia es a punto de traversa a Israel.

On dise ce la arma ia es o un bomba de auto o un bomba de lado de strada. No organiza ia anunsia se como culpable.

La penisola ia deveni sempre plu anarciosa de pos la despone de presidente Hosni Mubarak en 2011.

Japan es colpada par tempesta de neva

11 persones, cisa plu, ia es matada par un tempesta recordo de neva en Japan.

Sentos ia parti de se casas, e plu sentos ia es ferida. Plu ca un metre de neva ia cade en alga areas.

La clima ia clui stradas e ia obliga airoportos a cansela volas.

Meteorolojistes averti ce ventones de neva e avalanxas pote aveni. La tempesta move norde, en dirije a Hokkaido.

Protestores en Ucraina fini se ocupa de construidas

Protestores ucrainsce ia fini se ocupa de la ofisia de site e otra construidas en la capital, Kiev.

Los ia ocupa la locas tra plu ca du menses. Los es noncontente sur la abandona par presidente Yanukovych de un acorda con la Uni European.

Ofisiores ia promete desprende la acusas contra la protestores si tota de los parti de construidas de governa ante lundi.

La gidores de la protestas dise ce los ia sasia aora la constrinje de esta amnestia.

Avocatos per Morsi retira se de la prosede

Avocatos per Mohammed Morsi, la presidente desponeda de Egipte, ia abandona se prosede, do on acusa el de spia e conspira sur atas de teror.

Los ia retira se per protesta contra la fato ce Morsi e otra acusadas es restrinjeda en un caje de vitro acustical isolida.

On ia pospone aora la prosede asta 23 febrero.

La gidor pasada fronti cuatro prosedes diversa, de cual tre ia comensa ja.

Escavores sudafrican emerji de un duto colasada

Escavores nonlegal de oro ia comensa emerji, pos es trapida par un colasa en un duto abandonada prosima a Johannesburg.

Salvores sudafrican dise ce los comunica con un grupo de 30 escavores ci es trapida par rocones cadeda, prosima a la entra de la mineria.

Acel escavores ia sujesta ce cisa 200 plu persones es ancora trapida a su.

On crede ce los ia deveni trapida en la matina de saturdi. On no ia reporta feridas.

2014-02-16

Xina estende se scema de armarios de bebe

La autoriosas xines ia fundi 25 "armarios de bebe" tra la pais, afin jenitores pote abandona secur se enfantes nondesirada.

On intende fundi multe plu en la menses veninte, an entre critica ce los va coraji persones a sede se bebes.

La armarios conteni un incubador e un alarma retardada. Los boni la probablia ce la bebes va survive.

La plu de la abandonadas ave descapasias o maladias grave.

Un filma xines gania la premio Urso de Oro

A la carnaval internasional de filmas en Berlin, Bai Ri Yan Huo ("Carbon negra, jelo magra"), un filma xines, ia gania la premio Urso de Oro per la filma la plu bon.

Liao Fan ia gania la premio per ator mas la plu bon en la mesma filma. Haru Karoki ia es nomida la ator fema la plu bon per se rol en Chiisai Ouchi ("La casa peti"), un filma japanes.

Un juria de oto persones deside la premios.

En esta anio, la juria ia es gidada par James Schamus, un dirijor e produor american, ci es cisa la plu bon conoseda per produi la filma Brokeback Mountain.

Frans e la Rena Unida culpa la governa suri per nonprogresa

Frans e la Rena Unida ia colpa la governa suri per la colasa de discutes de pas con la oposa en Genève.

William Hague, la ministro de esternas de la RU, ia comenta: "La culpablia reposa intera con la governa de Assad."

Se corespondente franses, Laurent Fabius, ia dise ce la governa ia "bloci cualce progresa".

La consenta final ia dura tra no plu ca 27 minutos a la matina de saturdi, la dia ses de la serie du de discutes.

Suiz no suscrive un acorda sur migra de corvatsces

Suiz ia refusa suscrive un acorda proposada su cual corvatsces ta pote asede libre la mercato suiz de emplea.

Ambos paises ia fa la acorda en la estate pasada, pos cuando Corvatsca ia junta se a la Uni European.

Suiz ia dise ce la acorda no pote es suscriveda "en se forma presente". Un referendo resente ia desvalidi la acorda entre Suiz e la UE sur libria de move.

Par un marjin multe streta, votores suiz ia favore un proposa de relimita la cuantias de migrores de paises UE.

Miles marxa tra Caracas e per suporta e per oposa la presidente

En Caracas, la capital de Venezuela, suportores e oposores de Nicolás Maduro, la presidente, ia marxa tra la stradas en du protestas competente.

La tensa political crese en la pais.

Tre persones ia es matada en protestas antigoverna en mercurdi, e on ia aresta 100 studiantes.

Maduro ia acusa la oposa de provoca turbas como parte de projeta un colpa de stato. El ia recomenda ce se suportores marxa per pas a saturdi.

Muqtada al-Sadr retira de politica

Muqtada al-Sadr, un eglesor xia estremiste de Irac, ia anunsia ce el retira se de politica.

La declara, scriveda par mano en se loca de rede, ia dise ce el no va ocupa plu postos governante o ave representores en parlamento.

Sadr e se militia, la Armada Mehdi, ia deveni conoseda pos la invade de Irac, gidada par la SUA, en 2003.

Ma la om de 40 anios ia perde se influe en anios plu resente, pos un disputa con Nouri al-Maliki, la ministro xef.

On studia cambias en la corente de jeta supra Europa e America norde

Rexercas nova sujesta ce la sistem xef cual determina la clima de Europa Norde e America Norde es cisa cambiante.

La studia mostra ce la corente de jeta segue un via sempre plu longa e serpente.

Esta ia causa ce la clima resta la mesma tra periodos plu estendeda.

Lo es posible ce esta resulta de la caldi resente de Artica, do la temperatur ia alti con rapidia duple o truple de la resta de la globo.

John Kerry recomenda ata global contra cambia de clima

John Kerry, la secretor de stato de la SUA, va fa un parla recomendante ce la comunia global reata contra cambia de clima. El visita Indonesia.

El va dise ce on ave demostras siensal ce cambia de clima menasa no sola la ambiente, ma ance la economia de mundo.

Kerry va fa se parla a soldi, en Jakarta, la capital, como parte de un turi de la area.

La SUA e Xina, es la emetor la plu grande de gases invernerial.

Morsi va es prosededa sur spia e atas de teror

Mohammed Morsi, la presidente desponeda de Egipte, es a punto de es denova prosededa, acusada sur spia e conspira de fa atas de teror.

El e 35 otras es acusada de labora con grupos lubnani e filastini per fa atacas en Egipte.

La acusas es un de cuatro prosedes legal cual la gidor islamiste pasada fronti aora.

Morsi ia es desponeda par la militaria en julio de la anio pasada, pos protestas coletiva contra se rena.

Comores es salvada de un restorante subita inondada

En la sude de England, la armada e servis de crise ia salva 32 persones ci ia deveni trapida par un ondon inondante en un restorante sur plaia.

La fenetras de la restorante ia es ance rompeda par calculos lansada par ventas ferose en la note de venerdi.

Un comor ia dise ce la esperia "ia es alga simil a la Titanic".

Un portavose de la gardacosta ia descrive la clima como "estrema perilosa".

Laborores SUA de Volkswagen vota contra sindicati

En un move surprendente, laborores SUA ia vota contra junta se a un sindicato a un fabriceria de autos de Volkswagen, en la stato Tennessee.

La vota impedi atentas par la sindicato Laborores Unida de Auto per organiza fabricerias de posese stranjer en la SUA sude.

Espertas ia previde ce la vota ta favore la sindicati, pos implica de suporta par Volkswagen per la idea.

La vota ia fronti un resiste par politicistes republiciste, ci ia razona ce lo va retarda la crese economial.