2015-08-31

Un maior joven brasilera es xercada per froda

Un maior en Brasil es aora un fujor pos es acusada de fura mone de la sistem scolal e de telemaneja se vila par WhatsApp.

Lidiane Leite, un fem con 25 anios, ia fa un vive lusosa en la capital de la stato Maranhão. Se acusores dise ce se sola contatas con se vila, Bom Jardim, ia es par mesajes dial a se consilio, enviada con WhatsApp, un program de telefoneta.

On ia comanda la aresta de el e se xico de cor, ci ia servi como se conselor xef.

Leite ia es en la temprana de se desenio tre cuando Beto Rocha, se xico de cor, ia es proibida de atenta deveni la maior, su alegas de froda. Leite ia sustitui se e ia deveni elejeda. El ia nomi Rocha como se conselor xef, e ia vade per abita en São Luís, la capital de stato, a distantia de 275 cilometres.

Se avocato ia comenta: "El ia es tro joven e sin esperia cuando el ia emprende se posto. El no ia ave autofida, e ia delega multe taxes a senior Rocha."

Jornalistes brasilera dise ce la duple ia fini se relata a un tempo plu temprana de esta anio, corta ante cuando Rocha ia resinia.

Leite ia fuji cuando se nom ia apare en un investiga federal sur la malusa de reservas per instrui statal. La investiga "Eden" ia descovre atestas ce sirca $4 milion de mone per la scolas de Bom Jardim ia desapare.

La sistem de instrui, ja coxeante, de la vila ia colasa aora. Enseniores no reseta se paias.

Un maior nova – la suordinada pasada de Leite – ia es inaugurada a saturdi. El ia promete fa un investiga completa.

Un judor statal ia dise ce el va xerca un comanda internasional de aresta si Leite no presenta se ante martedi.

Maranhão en Brasil norde-este es un de la statos la plu povre de la pais.

2015-08-30

Un asembla antigoverna sur la crise de dejetadas en Lubnan

Miles de persones ia partisipa en un asembla en Beirut, la capital de Lubnan, per protesta contra un governa sur cual los dise ce lo es frodante e noncapas.

Multe securiores ia es presente car on ia teme ce la protesta va deveni violente, simil a los a la fini pasada de semana. En fato, la asembla a saturdi ia es xef pasosa.

Se organizores ia esije ce la ministro de ambiente resinia ante la pasa de 72 oras.

La fali par la governa de solve la crise sur desprende dejetadas ia provoca la campania "Tu apesta".

La campaniores recomenda ce la governa fa un vota parlamental subita, e vole ance ce on judi la ministro de internas per la tro multe fortia usada par la polisia a la protestas de la semana pasada.

La protestores ia flue a un plaza major en Beirut sentral, brandinte banderas lubnani e criante sloganes antigoverna. Multe ia porta camisetas con la parolas "Tu apesta". Alga de los ia canta o jua musica.

Un grupo peti de jovenes mascida ia atenta rompe un parador de filo spinosa per ateni la ofisia de la ministro xef. Los ia ensende dejetadas e ia lansa petras e botelas de plastica a polisiores.

La paradores ia es instalada sirca construidas governal per forti la securia ante la asembla.

Montones de dejetadas ia formi sur la stradas de Beirut pos la clui en julio de la dejeteria enterante la plu grande de la pais. No loca alternativa es preparada.

Esta ia provoca a crea la promove "Tu apesta", cual culpa la paralise e froda political per la fali de solve la problem.

A martedi, la consilio de ministros no ia pote acorda un modo de progresa, disente ce la custas proposada par companias privata de maneja dejetadas es tro alta.

Lubnan es ja sin presidente tra plu ca un anio, e parlamentores ia estende se periodos propre de ofisia asta 2017 pos fali acorda un lege per votas nova.

La gera en Suria visina ia mali ance divides political e setal, e ia causa la ariva de 1,1 milion refujadas, tensante la economia e la servis publica.

2015-08-29

Un esperimenta de un anio simula la vive sur Marte

Per simula la vive sur Marte, un ecipo de enscrivedas de NASA, la ajenteria spasial SUA, ia comensa abita un cupola prosima a un volcan steril en Hauaii.

La esperia isolinte, cual va dura tra un anio, va es la plu longa de se spesie cual on ia atenta.

Espertas estima ce un mision umana a la planeta roja ta ocupa entre un e tre anios.

La ecipo de ses persones va abita en prosimia su la cupola, sin aira fresca, comedas fresca, e privatia.

Los ia enclui se a la ora 15 local de ier (la ora 1 de oji par orolojo global).

Cada viaja estra la cupola – cual ave un diametre de sola 11 metres e un altia de 6 metres – va nesesa un veste spasial.

La ecipo conteni un astrobiolojiste, un fisiciste deutx, e cuatro persones de la SUA – un pilote, un arcitetor, un jornaliste, e un siensiste de solo de tera.

Cada de la omes e femes va ave un sala propre con un leteta e un table. Furnis inclui ceso polvida e tun botida.

Misiones a la Stasion Spasial Internasional dura tra ses menses. NASA ia fa resente esperimentas isolinte de cuatro e oto menses.

An si otra esperimentas consentra a la defias tecnical e siensal de la viaja, los de isoli considera la elemento umana de esplora, e la problemes cual aveni cuando persones comparti un abitada peti.

Un investigor ia dise: "Me pensa ce un de la lesones es ce vera on no pote preveni disputas interpersonal. Los va aveni en tal misiones longa, an con la persones la plu bon."

2015-08-28

Xerpas repara la via de Sagarmata

Un ecipo de trepores spesialiste xerpa nepali ia comensa labora per repara la via de trepa sur Monte Sagarmata (Everest), a cuatro menses pos cuando lo ia es destruida par un trematera grande.

En april, 18 trepores e aidores ia es matada cuando la trematera ia causa un avalanxa cual ia pasa tra la campa de base de la monte.

La ecipo, conoseda como la "dotores de cascade," ia comensa sonda la monte. Los intende fisa cordas tra la Cascade Jelada de Khumbu en la dias seguente.

La Cascade Jelada es un estende malfamosa tradosa de jelo movente e fesurinte, tra cual trepores debe pasa pos sorti de la campa de base en via a la campa prima sur la monte. Sin la cordas fisada, esta no ta es posible.

La dotores de cascade espera ce la via restorada va atrae trepores a la monte per la saison autonal.

Un ecipo japanes ia ariva ja en Nepal. A martedi, trepor Nobukazu Kuriki, ci ave 33 anios, ia parti de Kathmandu, la capital de Nepal, per vade a la area de Sagarmata, e per comensa ajusta a la clima ala ante se atenta propre de ateni la apico en setembre.

Kuriki, ci ia perde tota se puntos de dito e un diton par causa de ulseras jelal, es asta aora la sola person ci intende asende Sagarmata en la saison defiante de autono.

La industria profitosa de trepa en Nepal ia es destruida par la teratrema ruinante en april e la avalanxas cual ia segue lo.

La governa e la comunia xerpa, ci depende de trepores stranjer per susta se, desira reconstrui tan rapida como posible la industria. Ma alga nepalis critica la deside de reabri tan pronto la via.

La presidente de la asosia nepali de trepores, Ang Tsering Xerpa, ia descrive la mision japanes como "riscosa e perilosa". El dise ce trepa en la autono ajunta ja riscas de temperatures fria e ventas forte.

2015-08-27

Un om mata jornalistes en televisa direta

Un om ia fusili e mata du jornalistes en un difusa direta televisada en la stato Virginia en la SUA. Pos la ataca, lo pare ce el ia envia un fax longa en cual el ia descrive se como "un baril umana de polvo esplodente".

Vester Flanagan, ci ia es desempleada par la mesma stasion, WDBJ7, ia mata se pos un xasa de polisia.

En la fax, un om, parente Flanagan, descrive se sufris de prejudis e tormentas per es ge e negra.

La Casa Blanca ia dise ce la ataca ier ia mostra la nesesa de controla plu bon fusiles.

La du persones matada ia es Alison Parker, un reportor, e Adam Ward, un filmor. La dirijor de la station, Jeff Marks, ia comenta: "Me no pote dise cuanto los ia es amada."

El ia descrive Flanagan como "un om nonfelis" ci on ia debe acompania a estra de la construida pos se desemplea en 2013.

Parker ia es a media de un intervisa sur turisme, direta difusada, en la temprana de mercurdi en la vila Moneta. Subita, fusilis ia es oiada, e televidores ia vide la camera cadente a la tera. On ia oia xilias e la camera cadeda ia mostra corta la fusilor.

Plu tarda, jornalistes ia debe reporta sur la moris de du de se colaborores.

A alga oras plu tarda, la fusilor ia posta un filma de se en fusili prosima, ma on ia sutrae lo a pos.

La intervisada, Vicki Gardner de la Comite de Comersia de la Area de Smith Mountain Lake, es en un state stable en ospital pos sirurjia.

ABC News ia dise ce lo ia reseta un fax de 23 pajes, parente enviada par Flanagan como Bryce Williams (se nom profesal) plu tarda a mercurdi. En la fax, el ia dise ce se coleria ia "crese constante" e ce el ia deveni "un baril umana de polvo" cual "espeta fa PUM!!!!".

La scrivor de la fax dise ce el ia sufri razisme e omofobia en se labora, e el espresa se amira per la adolesentes ci ia mata 13 persones a la Liseo de Columbine en la stato Colorado en 1999.

El ia dise ce la ataca en Charleston en la stato Carolina Sude, cuando nove persones ia es matada en un eglesa en junio de esta anio, ia es lo cual "ia envia me ultra la limita".

Bill Overton, la xerif de Franklin County, ia dise ce la fax es aora esaminada par investigores. El ia ajunta: "Lo es evidente ce esta senior ia es turbada en alga modo."

2015-08-26

Un clima savaje a la costa de Cimri Sude Nova

En Australia, sentos de abitores a sude de Sydney ia es obligada a fuji de se casas par causa de inondas levante.

On ia salva cuasi 70 persones de acuas inondante, de pos la ariva de un clima sever a la suburbes sude de la capital a lundi.

Plu ca 1400 telefonis per aida ia es fada a la Servi de Crise de Stato, per cual un portavose ia dise ce la plu de casos ia envolve salva persones ci ia atenta gida un veculo tra acua.

"Esta es perilosa, no sola a membros de la publica ma ance a nos bonvolores," el ia comenta.

La area la plu colpada es sirca Illawarra e Shoalhaven a la costa sude de Cimri Sude Nova.

On ia salva ance alga animales, incluinte cavalos, boves, e alpacas. Persones spesialinte sur la salva de animales grande ia move los a tera plu alta.

Ier, dudes-sinco persones ia es moveda de se casas en la area de Kiama, a sirca 120 cilometres a sude de Sydney, entre temes ce la mures de un parario peti va colasa.

Autoriosas ia judi aora ce la Parario de Jerrara es secur, e ia informa abitores ce los pote revade a se casas.

2015-08-25

Asiones global afonda en teme sur la economia xines

Asionerias tra la mundo ia cade acuta, entre temes par investores de un lenti economial en Xina.

En comersia volatil, la indise Dow Jones en New York ia afonda par 6%, ma lo ia regania cuasi se perdes ante clui final basida par 3,6%. A un momento, lo ia cade su 16 000 a la ves prima pos febrero 2014.

La indise Nasdaq de companias tecnolojial ia clui basida par 3,8%, recovrente pos un tufa plu temprana de 8%.

La S&P 500 ia fini comersia a 3,9% plu basa, e a 11% su se recordo de maio, ofisial locante se en la campo nomida "coreti", cual sinifia un cade de 10% o plu de se apico.

Asiones en Asia ia es colpada en la note. La Indise Composada de Xanghai en Xina ia clui basida par 8,5%, se fini la plu mal pos 2007.

La indise FTSE 100 en London ia clui ier basida par 4,6% a 5 898,87. A se punto la plu basa, lo ia cade par 6%, perdente sirca 100 mil milion paundes de se valua.

Asionerias major en Frans e Deutxland ia afonda par 5,5% e 4,96% en acel ordina.

Investores global es ansiosa sur la crese en la economia du de la plu grandes de mundo. La banco sentral de Xina ia desvalua la iuan a du semanas ante aora, creante temes nova ce la lenti en la economia de acel pais es plu mal ca on ia suposa orijinal.

La presos de comersia en mones e benes cade ance sever, car acel mercatos depende multe de demanda forte par Xina. Sin calmis convinsente de ofisiores xines, investores no desira compra.

2015-08-24

Un om perdeda en Australia scrive un mesaje en arena

Un turiste brites ci ia es perdeda tra du dias en un area distante de Australia norde ia descrive como on ia salva el pos cuando el ia scrive un demanda per aida en la arena.

Geoff Keys, un om con 63 anios, ia perde se via en julio pos atenta trova un cascade isolida en la Parce Nasional de la Rio Jardine en la stato Queensland.

Se desapare ia causa un xerca grande par elicotores e otra salvores. La polisia ia dise ce se scrive de la mesaje ia salva probable se vive.

En se blog, Keys ia esplica ce el ia atenta trova un cascade nomida Elliot Falls. Se mapa ia mostra ce lo es relativa prosima a se loca de campa, donce el ia deside pasea longo un via minor per un parte de la distantia, e nada longo un rieta per la parte restante.

El ia scrive: "Me vestes ia es composada de un slip de nada, un pantala de nada supra lo, un camisa T, e un xapo."

Cuando el no ia susede trova la cascade, Keys ia para nada e ia atenta revade a se loca de campa.

"En loca de reversa me dirije e nada contra la flue, me ia deside entra a la savana e vade direta tra lo a la via. Lo ia es cuasi la note. Me ia ave no sapatos. Como me ia opina ce la idea es bon?"

El ia vaga de loca a loca asta la ora du de matina, cuando el ia reposa per la note. Se amis ia reporta ce el manca, e on ia comensa un xerca con elicotor a la dia seguente.

Keys ia dise ce el ia deside nada con la flue, e pos alga tempo el ia sorti de la rieta per scrive la mesaje "HELP 2807" ("AIDA" e la data, 28 julio) con un flexa indicante la dirije de la flue.

El ia pasa un plu note su sielo e ia recomensa nada ante cuando salvores ia vide la mesaje e ia leva el a la securia de la elicotor.

Polisiores ia dise ce los ia es a punto de move se xerca a un otra area de savana densa cuando los ia trova la demanda per aida.

2015-08-23

Un dia du de discutes alta entre la du Coreas

Corea Norde e Sude va fa oji un ronda du de discutes alta per calmi un tensa cresente. On ia fa ier alga oras de negosias.

Aidores major de la xefes de la du paises ia consenta a Panmunjom, la vileta de sesafusili a la frontera.

La Norde ia menasa "atas militar forte" si la Sude no para usa parladores a la frontera per difusas cual ia provoca "un state partal de gera".

La du lados ia acorda consenta denova a esta posmedia per "detalia diferes" pos la fini de cuasi 10 oras de discutes tra la note.

No jornalistes ia es presente a la discutes, cual ia aveni en la Zona Desmilitarida cual divide la du Coreas.

Ante la discutes, Corea Sude ia dise ce lo va es representada par Kim Kwan-jin, la xef de securia nasional, e par Hong Yong-pyo, la ministro de uni. La Norde ia envia ofisiores major Hwang Pyong-so e Kim Yong-gon.

Multe analistes regarda Hwang como la xef suordinada su Kim Jong-un.

Plu temprana, Corea Norde ia spesifa un limita de tempo per la desasembla de la strutures de multe parladores cual difusa forte novas, predises de clima, e musica de la Sude. Lo ia move artileria a locas per xuta a los.

Corea Sude ia sorti cuasi 4000 abitores de areas fronteral, avertinte ce lo va "contrataca sever".

Jetos xasante de la SUA e Corea Sude ia vola en forma, prosima a la frontera, e la soldato xef de la SUA ia reconfirma "la promete nonvasilante" de se pais per defende Corea Sude en un telefoni a se corespondente corean.

La du Coreas es ancora tecnical en gera, car la gera entre 1950 e 1953 ia fini con sesafusili, no un trata de pas.

2015-08-22

Un fusilor es desarmada en un tren franses

Tre persones ia es ferida cuando un om forte enarmada ia comensa fusili en un tren en la norde de Frans. Du pasajores de la SUA ia susede desarma el.

Esta ia aveni en la servi de rapidia alta de Thalys, prosima a Arras, do la atacor ia es arestada a la stasion.

Barack Obama, la presidente de la SUA, ia loda la pasajores, ci ia inclui du militares SUA nonlaborante.

La om arestada ia es un magribi de 26 anios, e ofisiores antiteroriste ia emprende la investiga. Se armas ia inclui un kalaxnikov, un cotel, un pistol automata, e cartuxes.

Autoriosas franses ia dise ce du persones ia es grave ferida – la un ia es colpada par la fusili, la otra par la cotel.

Bernard Cazeneuve, la ministro de internas franses, ia dise ce la ataca ia aveni ier a 17:45 de ora local (15:45 de ora global).

Jornalistes franses ia reporta ce la arestada es conoseda a la departes de securia. Asta aora, el ia refusa parla a la polisia en Arras.

Charles Michel, la ministro xef beljes, ia descrive la aveni como "un ataca teroriste".

La pasajores ia inclui Jean-Hugues Anglade, un ator franses ci ia es lejera ferida en rompe vitro per sona la alarma, e Chris Norman, un om brites ci abita en Frans. Norman e du otra omes de la SUA ia reseta medalias per coraje a un restorante en Arras.

On ia reporta ce la pasajores ci ia vinse e desarma la suspetada es soldatos maral ci ia oia cuando la om ia carga un arma en un saleta privada. Los ia fronti el cuando el ia sorti.

Imajes distribuida en redes sosial ia pare mostra la restrinje de un om sur la plataforma en Arras.

SNCF, la compania de ferovia franses, ia dise ce la tren ia porta 554 persones.

Frans es vijilante de pos la ataca contra la jornal Charlie Hebdo e un supramercato iudi en Paris en janero, cual ia mata 17 persones.

E en junio, un om, sur cual on dise ce el ia es inspirada par la grupo Stato Islamiste, ia destesti se xef de labora e ia atenta esplode un compleso de gas en Frans sude.

2015-08-21

Peru aproba xuta a aviones contrabandante drogas

La Congreso Peruan ia aproba un lege cual permete ce la forte de aira xuta per tira a tera aviones peti, suspetada de porta drogas nonlegal.

Peru produi plu cocaina ca cualce otra pais, e ajentes antinarcotica dise ce la plu de lo es contrabandada a la SUA.

La projeta ia es asetada con acorda unida – 89 congresores ia suporta lo, e nun ia oposa. On previde ce presidente Ollanta Humala va suscrive per legi lo.

An tal, ofisiores dise ce la SUA ia espresa se oposa contra la restora de lo cual on nomi "la proibi airal".

Peru ia para la tatica en 2001 pos cuando un misionor de la SUA e se fia bebe ia es matada en un ataca contra un avion sur cual on ia suspeta erante ce lo transporta drogas.

La avion ia es tirada a tera par la forte de aira de Peru, ma la opera ia es fada en junta con la CIA.

Pos acel, la SUA, cual sponsori programes antidroga tra America Sude, ia oposa atacas contra aviones suspetada de droga.

Otra paises en la area, incluinte Colombia, Brasil, Venezuela, e Bolivia, permete ja la xuta a tal aviones, ma con regulas sever.

Ofisiores en Peru dise ce sirca un dui de la cocaina cual traversa se frontera es prendeda en aviones peti a Bolivia.

Carlos Tubino, la congresor peruan ci ia scrive la projeta legal, dise ce la governa no pote plu permete ce contrabandores defia se leges. El ia dise ce on ave sirca 600 tal volas de avion per anio en Peru, e ia ajunta: "An oji on ia fa du!"

Humala ia promete xefi la taxe de combate la contrabanda de drogas cuando el ia emprende se posto en 2011.

Se governa ia elimina un cuantia recordo de cultivas de coca, con aida de la SUA, ma on ia critica lo per saisi un cuantia relativa peti de cocaina e per lasa nondisturbada la lia airal a Bolivia.

2015-08-20

Un crise umaniste en Iaman

Un ofisior major dise ce la gera en Iaman ia trae la pais cuasi a famion.

Ertharin Cousin, la xef de la Program Mundal de Nuri de la Nasiones Unida, ia dise ce mercatos en iamani no ave comedas sufisinte per nuri la popla, e ce cuasi 13 milion persones nesesa urjente es aidada.

El ia ajunta ce la violentia continuante causa ce ajenterias de aida no pote ateni areas de nesesa.

La gera envolve rebelores huti ci combate fortes fidosa de la governa iamani e se aliadas.

Cousin, parlante en Qahira (Cairo) pos un visita de tre dias a Iaman, ia dise ce la batalias sirca la portos major preveni la furni de aida.

El ia dise ce Iaman fronti "la tempesta perfeta" car on no ateni la persones la plu nesesante, e car grupos aidante no reseta un suporta finansial sufisinite de donores.

Entretempo, Stephen O'Brien, la xef umaniste de la Nasiones Unida ci veni ance de visita Iaman, ia informa ier la Consilia de Securia ce "la estende de sufri umana es cuasi noncomprendable".

El ia critica ance forte la alia, saudi gidada, en Iaman per bombi la porto Hodeida, descrivente esta como un viole de la lege umaniste internasional.

Un barcon de la Program Mundal de Nuri ia es en la porto, a la costa ueste de la pais, cuando lo ia es atacada par aviones a la note de martedi.

La NU ia leva Iaman a se grado la plu alta de crise umaniste, locante lo con los en Sudan Sude, Suria, e Irac.

On dise ce cuasi 2000 persones nonmilitar ia mori pos cuando la alia ia comensa se campania de bombi en marto, suportante la governa escluida.

Plu ca 21 milion persones en Iaman – sirca 80% de la popla – nesesa es aidada, seguente la Nasiones Unida.

2015-08-19

La aresta de contrabandores de ceso en Rusia

La polisia rusce dise ce los ia aresta un gang cual ia produi miliones de dolares de ceso contrabandada.

Ses persones ia es tenida, acusada de crea ceso con valua de $30 milion, usante ingredientes de la Ueste.

En venja per la punis sur la ocupa de Crim, Rusia ia proibi alga emportas e ia destrui multe tones de cesos e otra comedas fada en la Ueste, incluinte lado, netarinas, pescas, e tomates.

On ia institui un linia direta par cual la popla pote dona informas sur emportas o vendes nonlegal.

La destrui de la comedas ia provoca criticas de alga politicistes, e cexas de campaniores contra povria ci dise ce on ta debe dona la comedas a persones povre en loca.

Plu ca 370 000 persones ia suscrive un solisita enlinia cual proposa ce presidente Vladimir Putin distribui la comedas a la povres.

La polisia en la area de Moscva ia acusa la arestadas de usa un dui de ton de calio proibida per calia la ceso. La gang ia dona alora eticetas falsa a la ceso e ia vende lo en supramercatos en Moscva e San Peterbug.

La gang risca es acusada de froda, con puni de asta 10 anios en prison.

Ofisiores insiste ce la destrui de la comedas pertine a sania e no a politica. Los dise ce la plu de la ingredientes nonlegal furnida es de mal cualia.

Asta lundi, on ia saisi ja 321 tones de produidas de animal e 592 tones de frutas e vejetales.

2015-08-18

Un bomba matante a un santeria tai

Prayut Chan-ocha, la ministro xef de Tai, ia dise ce la bombi ier de un santeria en la capital, Bangkok, ia es "la ataca la plu sever de istoria" contra la pais.

La ataca ia mata a la min 20 persones, incluinte stranjeres, e desuples ia es ferida.

Prayut ia dise ce on no ia identifia la bombores, ma ce la polisia investiga un suspetada ci ia es filmada par cameras vijilante.

La bomba ia esplode a Erawan, un santeria indu e un atrae major de turistes, a sirca 19:00 de ora local (12:00 de ora global) a lundi. La santeria, e la crusa Ratchaprasong do lo es situada, ia es folida.

Prayut ia dise: "Nos ia esperia bombas minor o mera ruidos, ma a esta ves los ataca vives inosente. Los vole destrui nos economia, nos turisme."

Autoriosas esamina aora la video de alga cameras vijilante a la santeria per trova trasas. Los xerca spesial un om joven ci ia pare entra a la santeria con un bolson negra a se dorso, ma ci ia pasea sin lo a pos. Membros de la publica dona ance se videos propre.

Lo es clar ce la bomba ia es locada per mata tan multe persones como posible. On senti un xoca en Tai, un pais cual ia evita asta aora la spesies de aveni teroriste cual alga de se visinas ia esperia.

La xef de polisia nasional ia descrive la aparato como "un bomba de tubo". On ia reporta ce lo ia conteni 3 cilogrames de TNT.

La santeria es dedicada a la dio indu Brahma, ma lo es ance visitada par miles de budistes a cada dia. Lo es situada entre un otel de sinco stelas e un sentro popular de botecas a la crusa Ratchaprasong, do protestas political ia aveni en anios resente.

Bangkok ia esperia un desenio de oposa, violente a veses, entre partitos political. La militaria ia emprende la pais en maio 2014, desponente un governa elejeda, pos menses de turba. La capital ia es entretempo relativa calma.

Suspetadas posible no manca. Cisa la bomba ia es esplodeda par la revoluistes muslim ci combate per un stato autonom en la sude estrema. Multe bombas esplode ala, ma la revoluistes ia fa nunca un ataca estra se area propre, donce esta ta es un cambia grande de stratejia.

Tais regarda ance la violentia political resente e demanda a se sur la envolve posible de la partitos vinseda.

2015-08-17

Un vota jeneral en Srilanca

Srilancas fa un vota jeneral, e la presidente pasada Mahinda Rajapaksa espera revade a un posto major como ministro xef.

Rajapaksa ia perde la presidentia a la ministro de sania, Maithripala Sirisena, en un vota subita en janero.

Cuatro persones ia mori en avenis violente en la campania political, ma oservores dise ce on ia esperia min violentia ca en anios presedente.

Des-sinco milion persones ave la direto de vota, e on previde sabe la resulta doman.

Rajapaksa vole deveni la ministro xef de un governa gidada par la Partito de Libria de Srilanca. Sirisena, ci gida aora acel partito, ia menasa rejeta la idea.

Multe de la majoria sinala budiste de la pais regarda la presidente pasada, ci ave 69 anios, como un eroe per supresa un revolta tamil de 26 anios en 2009.

Ma oposores acusa el de opera un governa frodante, savaje, e dinastial. Rajapaksa nega esta.

Tensas etnical entre la majoria sinala e la minoria tamil ia es la forte impulsante en un gera interna longa e amarga, cual ia fini en maio 2009 pos plu ca un cuatri de sentenio de violentia. An tal, acusas venjante continua sur maltratas fada par ambos lados.

Sirisena ave 63 anios. Per despone Rajapaksa en janero, el ia formi un alia multiladal gidada par la Partito Nasional Unida.

Pos resinia se posto como ministro de sania en la governa de Rajapaksa, el ia gida la alia a un vinse surprendente contra la presidente.

En un letera esposada en la campania, Sirisena ia acusa ce Rajapaksa "ostaji" la partito e ia esclui la idea de nomi el como ministro xef.

La presidente presente ia usa ance se potia como gidor de partito per elimina fidistes de Rajapaksa de postos major en dias resente.

"Tota de nos ia uni e vota contra Rajapaksa per envia el a jubila," Ranil Wickremesinghe, la ministro xef, ia dise a se campanieria final a sera de venerdi. "Si el no ia comprende la mesaje, nos debe uni per serti ce el comprende aora lo."

2015-08-16

Un redui de migrores intruinte a Eurotunel

La cuantia de migrores ci atenta entra a la termina de Eurotunel, prosima a Calais en Frans, ia redui a sirca 150 per note. Esta es un cade grande de un apico de 2000 persones per note a la fini de la mense pasada.

La compania de tren Eurotunel ia dise ce medios de securia, resente ajuntada, fa "un efeto real", ma ce la cuantia de intruis atentada resta "nonasetable".

A cada note, migrores en Calais atenta traversa la Manga a la Rena Unida, causante pospones a alga trenes de la tunel.

La governa de la Rena Unida dise ce lo spende 7 milion paundes (11 milion dolares) per boni la securia a la tunel, ma confesa ce on debe labora ancora plu sur la problem.

On ia erije sercas nova, per cual la Rena Unida ia paia, con intende de impedi la via de migrores a la plataformas e trenes.

Un cuantia plu grande de polisiores preveni ance alga migrores de prosimi a la termina, tal ce min disturbas aveni a trenes de pasajor e carga.

La compania Eurotunel ia descrive la diminui en la cuantia de intruis como "un boni enorme", ajuntante ce la plu de los ci susede asede la stasion es caturada par gardores. An tal, lo crede ce alga migrores susede ancora ariva a Britan.

La medios acordada a ante entre la autoriosas brites e franses inclui: la ajunta de plu gardores privata, finansiada par la Rena Unida, a la ecipo esistente de 200 persones; plu polisiores franses a la frontera tra la estate; plu sercas sirca la tunel, con plu altia e plu stratos de materia cuando nesesada, e con un parador grande de metal per proteje la plataformas; e plu cameras, detetadores infraroja, e lampas inondante a la perimetre.

David Cameron, la ministro xef brites, ia defende ier se maneja de la crise, insistente ce se governa atenta serti ce migrores nonlegal no pote "entra par forsa a Britan".

El ia dise: "Nos debe rompe la lia entre embarca un barco en la Mediteraneo e reseta la direto de abita en Europa."

Ofisiores estima ce cisa 250 000 persones ia traversa ja a Europa par barco en esta anio. Plu ca 40 migrores ia mori resente en un barco suprafolida en la Mar Mediteraneo.

2015-08-15

Un salva finansial nova per Elas

Ministros finansial de la Eurozona ia acorda un scema nova de salva Elas, pos reseta la suporta de Atina.

Jean-Claude Juncker, la presidente de la Comision European, ia dise ce la acorda envia un mesaje "forte e clar" ce Elas va resta en la Eurozona.

La acorda esije aumentas de impostas e plu reduis sever de spende, intercambiada per la salva finansial tre de Elas en sinco anios.

Como resulta, prestas nova de asta €86 mil milion ($95 mil milion) va es disponable en la tre anios veninte.

La parte prima va es €26 mil milion per recapitali la bancos e €16 mil milion en un serie de paias partal, de cual la prima (€13 mil milion) va es fada ante 20 agosto, cuando Elas debe repaia sirca €3,2 mil milion a la Banco Sentral European.

La acorda ave un custa grande political per Alexis Tsipras, la ministro xef, ci ia fronti un rebela en Syriza, se partito sinistriste.

Plu ca 40 parlamentores de Syriza ia vota contra el ier cuando la parlamento ia deside sur la acorda, pos discutes durante tra la note intera. Reportas sujesta ce Tsipras va xerca un vota de fida en parlamento en la semana veninte, tal prosiminte la posible de un eleje subita.

Euclides Tsakalotos, la ministro finansial de Elas, ia dise ce la acorda "avansa Elas tal ce on previde ce la sistem finansial va es multe plu stable de aora. On ave un promete de recapitali la bancos, sin ce cualce deponor debe contribui a la salva o deveni ansiosa."

Un serie de votas en parlamentos nasional tra Europa va debe aora suporta la acorda.

2015-08-14

Un busor deutx bonveni migrores a se pais

Un busor deutx ia atrae la atende de jornalistes pos pausa per fa un parla bonveninte a un grupo de migrores en se bus.

Sven Latteyer ia improvisa la anunsia en cuando el ia gida se bus sirca Erlangen, un vila calma en Baiern, con pasajores ci ia inclui sirca 15 stranjeres joven, de ci alga ia es de Africa.

Un otra pasajor raconta ce la busor ia saisi se microfon e ia dise en engles: "Pardona me, senioras e seniores de tra la mundo intera en esta bus – me vole dise alga cosa. Me vole dise bonveni. Bonveni a Deutxland, bonveni a me pais." El ia conclui con: "Ave un bon dia!"

La parla ia es oiada con fases stonada, segueda par ries e aplaudis, incluinte de la deutxes. "Un de la xicos african ia brosi un larma de se oio."

La raconta ia sperde virusin en Deutxland, provocante un onda de respondes positiva. "Lodas a la busor," un om ia tuita con un emosicon de cor roja. Un otra person ia scrive: "Resente me ia comenta ce nun dise bonveni a Deutxland. Lo es bon ce me ia era." An un lejor de novas en un canal nasional de televisa ia pare emosiosa en reporta la aveni.

Latteyer dise ce el ia senti inspirada a fa la parla par la esperia de se frate par sposi, ci ia fuji de la gera de Cosovo en la desenio de 1990, e se avo, ci ia es ferida en la Gera Mundal Du.

Cuasi 180 000 persones ia xerca refuja en Deutxland en la dui prima de 2015 – la duple de la cuantia ci ia fa tal en la mesma periodo de la anio pasada. On ia vide ance un aumenta de atacas contra abitadas de migrores, incluinte vandalisme e ensendes criminal fada par grupos estrema destriste tra la pais.

2015-08-13

Un beneria esplode en un porto de Xina

A la min 44 persones ia mori e plu ca 500 ia es ferida par du esplodes major en Tianjin, un site en la norde de Xina. Des-du pompores es entre la mores.

Presidente Xi Jinping ia esije "laboras completa" per salva vitimes e restrinje la focon.

La esplodes ia aveni en un beneria conteninte "benes perilosa e cimical" en esta site de porto. Un bal enorme de foco ia lumina la sielo, e construidas prosima ia colasa.

La esplode prima, a sirca 23:30 de ora local (15:30 de ora global) ier, ia es segueda par un otra esplode plu forte a alga secondos plu tarda. On ia senti la ondas de xoca a distantia de alga cilometres.

La Sentro de Redes de Tremateras de Xina ia dise ce la fortia de la esplode prima ia es egal a un detona de tre tones de TNT, e ce la numero du ia coresponde a 21 tones. A pos, otra esplodes ia es gatilida en la visinia.

La Televisa Sentral de Xina ia reporta ce un carga de esplodentes ia detona, ma on no ia confirma esta. Lo ia dise ance ce alga tores prosima a la area de porto ave no eletrica.

La dirijores alta de la compania Lojistica Ruihai, cual posese la beneria cual ia esplode, es aora interogada par autoriosas.

Un atestor ia informa jornalistes local ce el ia es comprante en un boteca cuando "subita, de pos, on ia ave un bal grande de foco e esplode". El ia dise: "A tempo de la esplode, la tera ia secute ferose, autos e construidas prosima ia secute, tota la vitro de alga construidas ia rompe, e cadun ia comensa core."

Un otra atestor, un ensenior canadian, ia descrive velia en panica pos lo cual ia pare un trematera.

"Me ia regarda tra la fenetra e la sielo ia es roja. Me ia vide la aveni de un esplode du, e on ia ave sola un caos – cadun ia sorti de se tores de apartes en pensa ce lo es un trematera, autos ia atenta parti de la compleso. Lo ia es demente."

La Radio Nasional de Xina ia dise ce fesures es vidable en construidas prosima a la loca de la esplode.

15 milion persones abita en Tianjin, un porto e area industrial major a sude-este de Beijing, la capital xines.

2015-08-12

On trova fratos de misil rusce a la loca de cade de MH17

Investigores ia trova fratos de lo cual pare es un sistem de misil rusce a la loca en Ucraina do la avion MH17 cade. Los dise ce ce la partes, cisa de un sistem Buk de tera a aira, es "de interesa spesial" e pote aida descovre la causa de la cade. Ma los no ia demostra ce lo ojeto aora fratida ia es la causa.

MH17, un avion de Malaysia Airlines, ia cade sur tera ocupada par rebelores suportada par Rusia a 17 julio 2014, matante tota 298 viajores: 283 pasajores (incluinte 80 enfantes) e 15 ecipores. Sirca du tris de los ci ia mori ia es nederlandes, e desuples de malaisianes e australianes ia es entre la otras.

Ucraina e multe paises ueste ia acusa ce rebelores prorusce ia tira la avion a tera, alegante ce los ia ave la capasia de usa un sistem Buk de misil, furnida par Rusia.

Rusia e la rebelores nega tota culpablia e culpa la militaria ucrainsce.

La investigores va es aora aidada par espertas de armas e spesialistes forense en esamina la partes trovada. La ecipo conteni representores de Nederland, Ucraina, Beljia, Malaisia, e Australia, ci consenta en Den Haag per discute un reporta ru sur la causas de la cade. On previde la publici de la reporta final en otobre.

A du semanas ante aora, Rusia ia rejeta un deside ru per asembla un corpo de judores internasional sur la desastre, provocante un coleria estendeda.

2015-08-11

On reinisia un reatador nucleal en Japan

Japan ia reinisia un reatador nucleal, su regulas nova de securia, a la ves prima pos la desastre a Fukushima en 2011.

On ia descomuta gradal tota la complesos nucleal en la pais pos un serie de fondes a Fukushima, causada par un tsunami e trematera.

Pos susede en esaminas nova sever de securia, la Compania de Potia Eletrical de Kyushu ia reinisia la reatador xef a se compleso en Sendai a esta matina.

Ma la popla jeneral es ancora multe noncalma sur la idea de revade a potia nucleal: ante la desastre a Fukushima, on ia dise ce un tal aveni es nonposible.

Protestas ia aveni estra la compleso de Sendai, e estra la abitada de la ministro xef Shinzo abe en Tokyo, a distantia de sirca mil cilometres.

25 otra complesos ia proposa se per reinisia, ma tota fronti defias legal de persones local.

Imajes televisada ia mostra la controleria de la compleso en cuando laborores ia recomuta la reatador. Un portavose per la compania ia dise ce on ia esperia no problemes.

Sirca 24 oras va pasa ante un reata completa aveni, e on previde ce la compleso va jenera potia a o ante venerdi. Lo va ateni se capasia masima a alga tempo en la mense veninte.

Abe ia dise ier ce la reatadores ia susede pasa tra "la esamina de securia la plu sever de mundo".

Pos descomuta tota se complesos nucleal, Japan ia depende de emporta combustables de fosil per oteni se enerjia, a custa enorme. La governa ia dise ce on nesesa recomensa usa la potia nucleal per redui la custa de emporta e la emetes cresente de diosido de carbon.

Espertas ia averti ce cuando on reinisia un reatador nonusada tra alga anios, lo tende esperia problemes temprana. Los dise ance ce on ia atenta nunca un tal reinisia coletiva de reatadores dorminte.

La Autoriosa de Regula Nucleal de Japan ia aproba du reatadores a Sendai en setembre 2014, su la regulas nova. On intende reinisia la reatador du en otobre.

On ia spende plu ca $100 milion en ajunta sistemes nova de securia a la compleso de Sendai. Ma abitores local dise ce estas no sufisi. Los es ansiosa sur la peril posible de volcanes ativa en la area.

La protestores ia es asemblada par Naoto Kan, la ministro xef a la tempo de la crise de Fukushima, ci ia dise ce acel desastre "ia esposa la mito de la securia e baratia de potia nucleal, cual ia es final mostrada como perilosa e custosa."

Un trematera de la plu fortes de istoria rejistrada ia colpa prosima a la custa de Japan en marto 2011. Lo ia crea un tsunami vasta cual ia dana la compleso de Fukushima e ia causa un fonde nucleal.

Cuasi 16 mil persones ia mori, e plu ca 2500 es ancora listada como asente, an si no un de la moris ia es ofisial liada a la desastre.

160 mil persones ia es sortida de la areas ambiente en la semanas a pos, e la plu de los ia reveni nunca a se casas par causa de la nivel continuante de radia alta.

2015-08-10

Un panica a un tempe barati mata 10 persones

A la min 10 persones ia mori e 20 ia es ferida en un panica a un temple en la stato Jharkhand en la este de Barat.

Peregrinores ia selebra un festa indu en la vila Deoghar. La panica ia aveni cuando los ia atenta entra a la compleso.

Panicas matante es comun en tal festas relijiosa, car los atrae folas grande e no ave multe medios de securia.

La panica a la temple Baidyanath ia comensa pos cuando la portes ia abri a un ora temprana de oji. La peregrinores ia avansa subita en dirije a la santeria.

Ironial, on ia regarda oji como un data fortunosa per visita la loca, cual inclui un temple xef e 21 plu petis dedicada a Xiva, la dio de destrui.

La peregrinores ia formi un filo con longia de ses cilometres. Alga de los ia es ancora dorminte, e ia es craseda en cuando otras ia es puxada en dirije a la portes.

Multe ia atenta freta a la fronte de la filo. Esta ia causa un caos e cuando alga de los ia cade, la adorores ia deveni craseda.

On ia confirma la moris de des persones, incluinte un fem.

En otobre 2014, 91 peregrinores, xef femes e enfantes, ia es matada en un panica a un festa indu prosima a la temple de Ratangarh en la stato Madhya Pradesh. E en 2011, plu ca 100 persones ia mori a un festa en Kerala, un stato sude.

2015-08-09

50 anios pos la autonomi de Singapor

Singapor fa avenis nasional per selebra la aniversario 50 de cuando lo ia deveni un stato autonom.

On previde ce desuples de miles de persones va es presente a un parada, cual va inclui ance paradas volante par la forte de aira e un avion A380 de Singapore Airlines.

Singapores va junta se en resita la promete nasional e en canta la imno nasional.

La pais ia deveni autonom cuando lo ia es ejetada de la Federa de Malaisia entre turbas sosial.

En 50 anios, Singapor, cual ia es un colonia brites a ante, ia cambia se a un de la plu ricas de la paises de mundo. Ma criticistes dise ce la developa ia es acompaniada par controlas sever de la parla libre e la politica.

La site-stato selebra se dia de autonomia en cada anio, ma on presenta la avenis "SG50" de esta anio como la selebra la plu grande de istoria en la pais, pos menses de preparas en botecas, scolas, laborerias, e jornalisme.

La parada va inclui un tribui spesial a Lee Kuan Yew, ci ia gida Singapor a autonomia e ia es se ministro xef asta 1990. Acel gidor respetada ia mori en marto de esta anio, con lamenta publica. On ia difusa un rejistra de el lejente la Proclama de Autonomia a la ora nove de esta matina.

Parlante ier, Lee Hsien Loong, la ministro xef presente e la fio de Lee Kuan Yew, ia dise: "A sincodes anios, cuando nos sta a un campa de base alta, nos retrospeta e mervelia ce nos ia veni de tan distante. Nos grasia los ci ia reali esta."

Otra persones major ci va es presente a la selebras es Najib Razak, la ministro xef de Malaisia, e Warren Truss, la visministro xef de Australia.

An si la pais ia ateni goles como la posese de casas par 90% de la abitores e un produi interna bruta de plu ca $56 mil per person, oposores continua asentua la restrinjes political sever.

La Partito de Ata Poplal (PAP) rena ja tra plu ca 50 anios, ma la oposores espera susede plu en un vota cual va aveni cisa en setembre. En la eleje la plu resente, la PAP ia es debilida, an si lo ia reteni ancora 80 de la 87 sejas.

La PAP espera ce la aniversario e la reconose de la lega de Lee Kuan Yew va aida lo a la vota veninte.

2015-08-08

Un redui de profondia de barcones a la Canal de Panama

La Autoriosa de la Canal de Panama dise ce lo va redui tempora la grandia masima de barcones cual lo permete traversa la canal. Esta es la resulta de la secia causada par la fenomeno climal El Niño.

De 8 setembre, la profondia masima de barcones va es reduida a 11,89 metres, cisa afetante 20% de la trafica. Un restrinje simil ia es usada en 1998 per la mesma razona.

La autoriosa dise ce lo va redui plu la profondia masima a 16 setembre si la situa no boni.

On ia fa esta deside car la nivel de acua en la lagos Gatún e Alhajuela ia diminui como resulta de El Niño.

A presente, la limita masima es 12,04 metres. A 16 setembre, lo va es cisa reduida asta 11,73 metres.

Companias de barconi ia reseta ja avertis ce esta reduis prosimi.

La Canal de Panama ia selebra se aniversario 100 en la anio pasada, pos esperia la traversa de plu ca milion barcones.

Panama ia prende la encarga de la canal de la SUA en 2000, e on ia loda jeneral la modo en cual lo ia maneja la funsiona. La paias per usa la canal trae aora sirca bilion dolares per anio a la governa panaman.

2015-08-07

Un zona de ora nova en Corea Norde

Corea Norde va adota un zona de ora nova per onora se libri de Japan a la fini de la Gera Mundal Du.

A presente, la pais es en la mesma zona como Corea Sude e Japan, a nove oras ante la Tempo Universal Coordinada (TUC). Ma a 15 agosto, la orolojos en Corea Norde va es cambiada per indica un ora plu temprana par 30 minutos.

KCNA, la ajenteria nasional de novas, ia dise ce "imperalistes japanes malvolente" ia "priva Corea de an se ora normal" par cambia la orolojos cuando los ia ocupa la pais.

La penisola corean intera – un sola pais a acel tempo – ia es a 8,5 oras ante TUC asta cuando Japan ia coloni lo en 1910.

Corea Sude ia dise ce la cambia va causa cisa alga cualias nonoportun per un tempo corta a la compleso industrial de Kaesong en Corea Norde, cual es operada en junta par ambos Coreas.

"E en tempo plu longa, on pote ave un efeto a laboras per uni normas e redui diferes entre la du lados," Jeong Joon-Hee, un ofisior de la ministreria de uni, ia comenta.

No autoria internasional esiste cual aproba un tal cambia de zona de ora, car cada pais deside propre.

En 2011, Samoa ia cambia per situa se a la otra lado de la linia internasional de data, perdente un dia intera, ma fasilinte se comunicas con se visinas Australia e Zeland Nova.

Corea Norde no es la sola pais cual ia crea se zona de ora propre e unica. En 2007, Venezula ia deside reversa se orolojos par un dui de ora, car presidente Hugo Chávez ia desira "un distribui plu justa de la leva de sol" per la abitores.

Venezuela es aora la sola pais con un zona de ora a 4,5 oras ante TUC.

2015-08-06

La aniversario 70 de la bombi de Hiroshima

Abitores de la site japanes Hiroshima onora la aniversario 70 de la cade de la bomba atomal prima par un avion SUA.

Un rituo, a cual la ministro xef Shinzo Abe ia es presente, ia es fada en la parce monumental en la site, ante la relasa de miles de lampas sur la rio Motoyasu.

On atribui la fini de la Gera Mundal Du a la bombi de Hiroshima – e a la otra en Nagasaki a tre dias a pos. Ma lo ia mata a la min 140 mil persones en la site.

Un bombador B-29 nomida Enola Gay ia cade la bomba de uranio, cual ia esplode a 600 metres supra la site a sirca 08:15 a 6 agosto 1945.

En sola acel dia, on crede ce 70 mil persones – e cisa plu – ia es matada. Multe plu ia mori de feris xocante causada par veneni de radia en la semanas e menses seguente.

Tra Japan, on ia fa un minuto de silentia per onora la aniversario. En Hiroshima, un campana ia sona a 08:15.

Parlante a 40 mil persones a la rituo en la parce, prosima a la episentro de la ataca, Abe ia recomenda un desarma nucleal de la mundo intera. El ia dise ce, en ajunta a mata miles de persones en la site, la bomba atomal ia causa ance sufris nondescrivable a la survivores.

"Oji Hiroshima ia revive," el ia dise, "e ia deveni un site de cultur e ricia. Pos setedes anios, me vole reasentua la nesesa de pas mundal."

2015-08-05

Rusia reclama partes de la artica

Rusia ia renovi se laboras per fa ce la Nasiones Unida reconose 1,2 milion cilometres cuadrida de la plano artica suacuan cual lo reclama.

Lo ia fa un promove simil per esta teritorio rica de recursos en 2001. Ma un comision de la NU ia rejeta lo par causa de un nonsufisi de atesta.

La ministreria rusce de esternas ia dise ce la move nova es suportada par datos siensal.

Ma tota la otra paises cual borda la artica – Noria, Danmarc, Canada, e la SUA – rejeta la reclama de Moscva.

Tota sinco nasiones ia atenta declara se autoria sur partes de la artica, sur cual on crede ce lo conteni asta un cuatri de la petrolio e gas ancora nondescovreda de la mundo.

La compete per recursos artica ia intensi en anios resente, car la jelo diminuinte de polo presenta posibles nova per esplora.

Rusia ia dise ce se proposa nova a la Comision NU sur la Limitas de la Plano Continental conteni razonas nova.

En 2007, Rusia ia fa un reclama per la fondo de mar par cade un silindre conteninte la bandera rusce de un sumarina a la Polo Norde.

La promove fresca aveni a un semana pos cuando la Cremlin ia anunsia ce lo aumenta se fortes marinal en la artica como parte de un stratejia nova militar.

Dmitry Rogozin, la visministro xef, ia dise ce la projeta inclui un flotila nova de    rompejelos.

Plu temprana en esta anio, la militaria rusce ia fa eserses en la artica con 38 mil soldatos, plu ca 50 barcones surfasal e suacuan, e 110 aviones.

2015-08-04

Pacistan esecuta Shafqat Hussain an pos apelas

Pacistan ia esecuta Shafqat Hussain, condenada de mata un enfante en 2004, an pos apelas de grupos internasional de diretos umana.

Se avocatos dise ce el ia ave 14 anios cuando on ia judi el como culpable, e ce on ia estrae se confesa par tortura, ma ofisiores dise ce on ave no demostra ce el ia es un minor cuando on ia condena el.

El ia encontra se familia a un ves final ante medianote, e ia es pendeda a un tempo corta ante lus prima en un prison en Karachi.

Pos disputas legal, se esecuta ia es posponeda a cuatro veses en la anio presente. Ma an con la pospones, disputas, e promoves, tota se apelas per pardona ia es ultima refusada.

La governa pacistani ia aboli un suspende de la puni de mori en la tempo pos un ataca contra un scola en Peshawar en desembre 2014, en cual la taliban ia mata plu ca 150 aprendores e enseniores. Pos acel, la autoriosas ia pende a la min 193 condenadas en prisones tra la pais.

Pacistan ave la cuantia la plu grande de mundo de prisonidas en la coredor de mori. On reporta ce plu ca 8000 persones espeta se esecuta, e la pais va ateni probable un frecuentia de esecuta entre la plu altas de mundo.

Reprieve, un organiza nonprofitante cual labora contra la puni de mori, ia declara ce la sistem legal de Pacistan ia abandona Hussain a cada ves, e ce on no ia investiga bon se caso.

Corta pos la esecuta, la organiza ia dise: "Lo pare ce la deside par la governa de continua a la esecuta, an pos clamas per para lo de tra Pacistan e sirca la mundo, ia es plu un esibi de potia political ca un aveni con alga relata a justia."

Ma la governa pacistani crede ce Hussain ia ave 23 anios cuando on ia judi el como culpable, e cortes ia rejeta solisitas ce on serti sur la eda.