2016-10-31

Delhi sofoca pos pirotecnicales de divali

Abitores coler de la capital barati, Delhi, comparti imajes de nebla fumosa, a la dia pos la selebras de divali a cual on ia relasa cuantias enorme de pirotecnicales.

La nivel de materia particulal en la aira, perilosa per la sania, ia crese a cuasi la desuple de la limita secur de 100.

Autoriosas ia averti ja ce Delhi va esperia aira contaminada a esta divali, par causa de fatores como umidia e rapidia de venta.

Divali, la festa indu la plu importante en Barat norde, selebra la vinse de bonia contra malia. On esplode comun petardos en la festa, ma estas dana la cualia de la aira.

En la semana pasada, la governa local de Delhi ia anunsia ce lo va instala puradores prosima a vias, per atenta redui la efeto de la contamina.

Ma a esta matina, la capasia de vide ia es estrema debil tra la site intera, par causa de un covrente densa de nebla fumosa.

Un tuita coler ia dise: "Bon spetaculo a sera ier, Delhi. Aora sofoca!"

Ante divali, campanias diversa ia demanda ce persones redui sua usa de pirotecnicales, ma campanias simil en la pasada ia es jeneral iniorada.

Petardos ia deveni un simbol normal de selebras, e per alga persones, divali es un momento per ostenta sua ricia. Familias comersial spende sentos de miles de rupis per compra focos artal cual los relasa en sola un note.

Un sonda par la Organiza Mundal de Sania en 2014 ia trova ce 13 de la 20 sites la plu contaminada de mundo es en Barat. Lo ia ajunta ce Delhi es la plu contaminada de tota.

La aira contaminada es ance un causa major de moris prematur en Barat, do sirca 620 mil persones mori de maladias relatada en cada anio.

En ajunta a la pirotecnicales, la contamina en Delhi en inverno es aumentada par un cade de temperatur, par causa de cual la persones povre de la site arde dejetadas a note per resta calda.

On ensende ance dejetadas cultival sur miles de ectares sirca Delhi per vacui campos de gran, e esta arde continuante tra multe dias.

2016-10-30

Clinton critica la FBI sur un investiga nova de sua epostas

En la SUA, la ecipo de la campania presidental de Hillary Clinton ia ataca la FBI sur un deside de informa la legores sur un investiga nova de la usa de eposta par la aspiror democrata.

James Comey, la dirijor de la FBI, ia informa la Congresa sur la deside en un letera a venerdi, a sola 11 dias ante la vota.

Clinton ia informa sua suportores ce la deside es "sin presedente" e "profonda disturbante". Ma Donald Trump, sua oposor republiciste, ia loda la deside.

En sua letera a la Congresa, Comey ia dise ce la FBI ia descovre la esiste de plu epostas cual es cisa "pertinente" a sua investiga presedente sur la usa de un servador privata par la aspiror democrata cuando el ia es la ministro de esternas en la governa de Obama.

Comey ia defende la deside, insistente ce nonpublici ta es "malgidante" e ta risca ance es "malcomprendeda", car la FBI no sabe esce la epostas nova trovada es importante.

Parlante ier a sua suportores en Florida, Clinton ia dise: "Lo no es mera strana, lo es sin presedente. E lo es profonda disturbante, car votores merita reseta fatos plen e completa."

Clinton ia dise ce el es serta ce la investiga no va cambia la judi orijinal par la FBI en julio, cual ia critica el ma ia desculpa el de atas nonlegal.

Comey es forte criticada par suportores de Clinton – e ance, seguente la jornal New York Times, par ofisiores de la departe de justia – per sua deside de publici la informa a tempo tan prosima a la dia de vota.

En un nota, el ia reconose ce "comun nos no informa la Congresa sur investigas corente". Ma el ia dise ce el senti "un obliga" a fa esta, car el ia atesta ja ce la investiga par la FBI es finida.

Trump ia descrive la tema como la scandal political la plu grande en la SUA pos Watergate, cual ia despone presidente Richard Nixon.

A un asembla en Colorado ier, el ia dise: "Sua ata criminal ia es voleda, desideda, intendeda, e dirijeda. Hillary ia institui un servador nonlegal con la intende evidente de scermi sua atas nonlegal de revela e esposa publica."

La FBI ia trova ja ce Clinton ia teni informas secreta en un servador privata de eposta.

En julio, Comey ia dise ce la prosede de tal documentos par Clinton en sua periodo como ministro de esternas ia es "estrema nonatendosa", ma ia desculpa el de condui criminal.

La epostas la plu resente ia es descovreda en un investiga separada sur la sposo distantida de Huma Abedin, la aidor xef de Clinton.

On ia saisi aparatos parteninte a el e a Anthony Weiner, un congresor major pasada, en un investiga sur esce el ia envia eposta sesal a un xica de 15 anios en Carolina Norde.

Investigores esamina la documentos per vide esce los conteni informas secreta.

La servador privata de Clinton ia es revelada en marto 2015 par New York Times. El no ia espresa prima sua regrete, disente ce la razona xef per sua adirije "hdr22@clintonemail.com" ia es "oportunia".

Pronto a pos, el ia demanda per es pardonada, e ia espresa sua regrete a votores a alga veses.

2016-10-29

Dylan "mudida" par sua Premio Nobel

La cantor-composor Bob Dylan dise ce el aseta sua Premio Nobel de leteratur, fininte sua silentia pos es premiada en la parte plu temprana de esta mense.

El ia comenta ce la onora ia "mudi" el.

La Funda Nobel ia dise ce on ancora no ia deside esce la cantor SUA va es presente a la rituo de premia en desembre. Ma un jornal brites reporta ce Dylan ia dise ce el intende reseta personal la premio "si an pico posible".

La premio a la stela ia es anunsiada a 13 otobre "per sua crea de espresas poesial nova en la tradision grande de canta american".

An tal, sua fali de reconose lo ia causa surprende.

En la semana pasada, un membro de la Academia Svensce, cual deside la premiadas, ia descrive sua silentia como "noncortes e egosa".

Ier, la Funda Nobel ia dise ce Dylan ia telefoni a Sara Danius, la secretor permanente de la Academia Svensce, per dise: "La novas sur la Premio Nobel ia mudi me. Me es tan grasiosa per la onora."

En un intervisa con un jornal, Dylan ia descrive la premio como "stonante, noncredable. Lo es difisil per crede. Ci de mundo sonia ce un tal cosa va aveni?"

2016-10-28

Duterte promete no blasfema plu

Rodrigo Duterte, la presidente de Pilipinas, dise ce el ia promete a Dio ce el va limpi sua linguaje famosa vulgar.

Arivante en sua site Davao pos un viaja a Japan, Duterte ia dise ce Dio ia fa un esije ultima a el en la avion.

"Me ia oia un vose cual ia comanda me a sesa blasfema o la avion va cade de la aira, e donce me ia promete sesa," el ia dise a reportores en la airoporto.

La parla brusca de Duterte, comun dirijeda a la Ueste, ia contribui a sua popularia en sua nasion.

El ia nomi Barack Obama un "fio de puta", ia descrive la Uni European como "ipocrita", ia menasa abandona la Nasiones Unida, e ia aseta comparas a Hitler, disente ce el ta mata felis tre milion drogamanicas.

Tota de estas ia es respondes a criticas de sua gera sanguosa contra drogas, en cual miles de vendores e usores alegada de drogas ia es matada par la polisia e par patruliores estralegal.

Duterte ia dise ce el ia promete a Dio ce el no va "espresa jergo, parolas blasfemante, e tota", e ia ajunta ce "un promete a Dio es un promete a la popla pilipina".

Ma el ia sujesta ce sua promete va ave cisa limitas. El ia dise ce la nonvulgaria de sua linguaje cuando el parla sur la SUA, la UE, o sua arcenemi political Leila de Lima va depende de la momento.

Como la plu de pilipinas, Duterte es catolica, an si el ia vanta sur sua relatas sesal e ia nomi la Pape un "fio de puta" per causa conjesta de trafica cuando el ia visita.

La presidente ia dise ce el ia es maltrada par un prete SUA cuando el ia es un enfante, e ce acel esperia ia influe sua opinas political.

Resente, el ia dise ce Pilipinas desira "un separa" de la Statos Unida, sua aliada longa, e vole ce soldatos de la SUA parti de la pais, cisa ante la pasa de du anios.

2016-10-27

Tremateras en Italia sentral

Du tremateras forte ia aveni en Italia sentral, danante construidas e ferinte desuples de persones.

Un trema de mesura 5,5 ia aveni a 19:10 de ora local, prosima a Visso en la provinse Macerata, segueda a du oras plu tarda par un trema de mesura 6,1 en la mesma area.

En agosto, un trematera ia mata sirca 300 persones a sude de Visso.

Ecipos de crise ia labora tra la note. On ave poca reportas de feris grave, ma un mal clima ia impedi atentas de evalua la dana.

Visso es a 70 cilometres de Amatrice, cual ia es multe danada en la trematera de mesura 6,2 en agosto.

La tremas de martedi ia es sentida tra Italia sentral, incluinte en la capital, Roma, do construidas ia secute, e portes e fenetras ia clace.

Desuples de persones ia es ferida, ma sola cuatro persones ia sufri feris grave.

La trematera du ia es notable plu forte ca la prima, e multe replicas sismica ia aveni a pos. Un atestor ia dise ce el ia regarda cuando un parte de un construida ia colasa ante el.

On crede ce la vila Camerino ia deveni multe danada. Un abitor ia comenta: "Totas parti de Camerino par pede o auto per xerca securia. Du eglesas es destruida e multe casas ia cade."

En Campo, prosima a Norcia en la rejion Umbria, la eglesa de San Salvatore de la tarda de la sentenio 15 ia colasa. Lo ia es ja debilida par la trema en agosto.

On reporta ance cades de linias eletrical, danas a construidas istorial, e un lisca de tera sur un via xef a norde de Roma.

La trema prima, a 7 cilometres a sude-ueste de Visso, ia es relativa nonprofonda, a 9 cilometres su la surfas. La trema du, cual ia aveni a 21:18 de ora local, ia es a profondia de 10 cilometres, a 2 cilometres a norde-ueste de Visso.

Ofisiores ia dise ce esta tremas es relatada con lo de agosto. Mario Tozzi de ia Instituida Nasional de Jeofisica ia clari: "Replicas sismica pote dura tra tempo longa, tra menses a veses."

2016-10-26

Un fosil de papagaio sibirsce

On ia descovre un fosil de papagaio en Sibir. Esta es la loca la plu norde do on ia trova un de esta avias.

Un oso de papagaio, desenterada en la rejion Baikal, ave la eda de entre 16 e 18 milion anios.

Esta sujesta ce la avias, cual abita oji xef en partes tropical e sutropical, ia es plu jeneral trovada en Eurasia a un ves pasada.

Lo es ance la ves prima de trova un fosil de papagaio en Asia.

Dotor Nikita Zelenkov, de la Instituida Paleontolojial de la Academia Rusce de Siensas en Moscva, ia descovre un parte de un oso nomida un tarsometatarso, locada en la basa de gama de avias. Pos compara lo con otra spesies, el ia trova ce lo ia parteni a un papagaio peti.

"Nonfortunosa," el ia comenta, "esta descovre no es sufisinte bon per reconstrui la aspeta o modo de vive de esta papagaio, ma nos pote vide ce lo ia es alga simil a la modernas. Donce probable lo ia es un avia peti de aspeta multe moderna, con la grandia aprosima de un papagaio de casa."

Lo ave alga cualias comun con un otra oso de papagaio, reportada en un studia en 2010.

La descovre pote cambia nos comprende de la sperde de papagaios temprana tra la mundo, e de sua modo de ariva en la Americas.

Teorias esistente sujesta ce los ia vola a la Americas de Africa, ma la trova nova sujesta cisa un otra via, longo la Streta Bering, de Rusia a Canada e Alasca.

2016-10-25

Militaristes mata a un scola de polisia en Pacistan

A la min 59 stajiores e gardores ia es matada cuando militaristes ia ataca un scola de polisia en la site Quetta en Pacistan.

Tre militaristes, portante jacetas de bomba umana, ia entra a la scola en la tarda de lundi, saisinte ostajes.

Un opera major de securia ia dura tra alga oras, e tota la atacores ia es matada.

No grupo ia dise ce lo ia esecuta la ataca, ma Quetta ia esperia atacas simil par separadistes e militaristes islamiste en anios resente.

On ia sorti sentos de stajiores de la Scola de Polisia de Balotxistan en cuando soldatos ia ariva per forsa la militaristes a via. A la min tre esplodes ia es oiada a la loca.

La scola de polisia es abitada par sentos de stajiores, e multe de los ci ia mori ia es matada en la esplodes.

La segue esata de avenis es ancora nonclar, ma fusilis ia es intercambiada de tempo a tempo entre la atacores e la securiores tra alga oras. On ia reporta ance un situa de ostaje.

Plu ca 100 persones, xef stajiores, ia es ferida.

La armada e la Corpo de Frontera paramilitar ia partisipa en la contraopera militar, cual ia fini aora.

Du de la militaristes ia mori pos detona sua jacetas, e un ia es matada par soldatos.

Ofisiores ia culpa un partito de la grupo militariste Lashkar-e-Jhangvi, disente ce la atacores "es en comunica con ativistes en Afganistan".

Quetta es la capital de la provinse Balotxistan, cual batalia no sola militaristes islamiste ma ance un rebela. Atacas violente aveni comun.

Plu temprana en la dia, du duanores ia es matada par fusil e un otra ia es grave ferida en Surab, a sude de Quetta. E en agosto, 88 persones en Quetta ia mori en atacas de bomba contra un ospital e avocatos.

La militaria pacistani ia fa operas militar contra combatosas en areas tribal volatil prosima a la frontera afgani.

2016-10-24

Sosialistes espaniol permete la governa conserviste

En Espania, la sosialistes oposante ia vota per, en efeto, permete un governa minorial par la conservistes su Mariano Rajoy.

A un consenta en Madrid, un majoria de xefes de partito ia deside asteni cuando la parlamento vota sur la governa par la Partito Poplal.

La pais ia fronti la posible de un vota jeneral tre en un anio. Ma la sosialistes ia despone sua xef, Pedro Sanchez, plu temprana en esta mense, cuando el ia refusa asteni.

Rajoy ia gida un governa tempora pos perde sua majoria jeneral en un eleje en la desembre pasada. Un repete de la eleje en junio ia fali progresa la situa, ma ia forti sua mano.

La sosialistes ia es la sucampiones a ambos veses. Sua suporta ia es erodeda par Podemos, un partito nova de sinistristes radisal.

Tra desenio, la du partitos xef ia alterna en governa la pais, ma en la anio pasada, la vota ia es divideda a cuatro – Sitadanes, un partito sentriste nova, ia fini a la loca cuatro.

La deside a soldi ia es asetada par 139 votas favorente, con 96 oposantes e du membros de la comite federal ci no ia vota.

La sosialistes ave 85 sejas, contrastada con la 137 ganiada par la Partito Poplal en junio.

Par causa de la asteni, la partito de Rajoy no nesesa plu trova 176 votas en la parlamento de 350 sejas per formi un governa. En loca, lo va pote susede con un majoria simple cuando la parlamentores asembla.

Oposores de asteni ia protesta estra la xeferia sosialiste con cartones con la parola "No".

Pablo Iglesias, xef de Podemos, ia dise ce la sistem jirante de du partitos ia fini con un alia gande entre acel du partitos.

An con la nonsertia, la economia de Espania ia manteni un crese constante de pico plu ca 3% per anio de pos la temprana de 2015. Turistes ariva en cuantia recordo e la nonemplea redui lenta.

An tal, la empresta par la governa es ancora multe plu alta ca la cuantia desirada, e la Uni European presa per basi lo en la anio veninte.

Sin un governa sentral e intera funsionante, on pote crea no politicas nova de bujeta.

2016-10-23

Irac proibi alcol

La parlamento en Irac ia vota per proibi la vende, emporta, e produi de alcol.

Suportores de la cambia dise ce la dispone de alcol contradise Islam e es nonconstitual.

Oposores dise ce la vota viole garantias constitual de libria de crede relijial per grupos minor como cristianes. Los intende apela en la cortes contra esta deside nonprevideda.

La proibi ia es realida pos un cambia de opina par parlamentores conserviste.

Pos la cade de Saddam Hussein, atas persepida como oposada a la codigo moral de Islam ia es atacada en modo repeteda. Botecas de alcol ia es atacada en Baghdad e otra sites.

An si alcol no es comun trovada en restorantes e oteles en Irac, sua consuma es relativa comun en la multe botecas e bares peti de Baghdad.

La lege nova ia deveni asetada a un tempo cuando la atende es focada a la batalia per reprende controla de Mosul de la grupo militariste Daex, cual nomi se la Stato Islamiste.

Ammar Toma, un parlamentor ci ia suporta la proibi, ia razona ce lo es justida car la constitui esije ce "no lege cual contradise la furnis instituida de Islam pote es instituida".

2016-10-22

La Jungla de Calais va clui a lundi

Frans va comensa desasembla la campa "Jungla" de migrores en la porto Calais a la matina de lundi.

Sirca 7000 persones abita ala en state misera. On va ofre reloca los a sentros de refujadas tra la pais.

La Jungla ia deveni un simbol potiosa de la fali par Europa de maneja la crise de migrores. Multe de esta persones atenta vade a la Rena Unida par embarca camiones cuando los prosimi a portos o la Eurotunel.

La ministreria de internas franses ia dise ce, cuando on desasembla la resta de la Jungla, on va prende enfantes a la caxones de doca convertida en la campa.

Esta caxones ia es usada como abitadas tempora, en loca de tendas. La migrores ci abita presente los va es moveda a via per crea spasio per la enfantes.

On ave 7500 letos disponable per la migrores de Calais en sentros tra Frans. On va usa 60 buses per move los de la campa.

Ofisiores es ansiosa ce folas va freta per parti en la fase prima de la opera. La ministreria de interna ia dise ce lo es posible la polisia va "es obligada a interveni" si un resiste aveni.

De martedi, on va usa macinas pesosa per sutrae la tendas e refujerias restante.

On previde ce algas de la enfantes de la campa va es relocada a la Rena Unida. Bernard Cazeneuve, la ministro franses de internas, ia fa discutes sur esta tema con Amber Rudd, la ministro corespondente de la RU. En un declara, on ia reconose ce la discutes "ia es difisil a veses, como pote aveni entre asosiores prosima".

La Jungla ia esperia senas de miseria e violentia con ce migrores, xef de Africa e Asia sude-ueste, ia atenta entra a camiones dirijeda a la Rena Unida, combatente camionores e polisiores.

Un mur con longia de un cilometre, finansiada par la Rena Unida, deveni construida longo la via xef a la porto per atenta impedi pasajores secreta. La governa de la RU no ia declara la custa, ma on reporta ce lo ia contribui sirca €2,2 milion.

La labora a la mur ia comensa en la semana pasada. On previde ce lo va es completa ante la fini de la anio.

2016-10-21

Eletrica manca en la parlamento venezuelan

Un rompe de eletrica ia lasa la parlamento de Venezuela en oscuria cuando lo ia es a media de discute un lege dedicada a la campo de enerjia.

La lampas ia desensende cuando Ramón Lobo, un legor progoverna, ia defende ia politicas sur enerjia de presidente Nicolás Maduro.

Luis Florido, un parlamentor oposante, ia broma en Twitter: "La realias de la pais ia colpas los a la fas." Delsa Solórzano, un otra oposor, ia tuita un video de la salon oscur.

On ia suspende la sesion.

Venezuela fronti un crise sever de eletrica, e la furni manca frecuente. On reporta ce ance otra construidas en la mesma area de la capital, Caracas, ia sufri rompes de eletrica a la posmedia ier.

Venezuela, rica de petrolio, es a media de un crise economial profonda causada par un redui de la custa global de acel carburante. La pais sufri un manca de benes fundal, comedas, e eletrica.

Plu temprana en esta anio, la governa ia atenta maneja la crise par introdui un sistem de rasiona la enerjia e un semana de du dias de labora per laborores en la campo publica.

Lo ia culpa un secia major cual ia redui multe la profondia de acua a se parario idroeletrical xef. Ma la oposores ia acusa la autoriosas de malmaneja.

La governa ia sutrae ja alga de la medios introduida.

2016-10-20

Un sesafusili en Iaman

En Iaman, un sesafusili de tre dias ia comensa ofisial, negosiada par la Nasiones Unida.

La acorda ia ativi a un minuto ante medianote de ora local, a mera oras pos scaramuxas nova.

La soldatos de presidente Abdrabbuh Mansur Hadi, suportada par un alia saudi gidada, batalia la rebelores huti ci controla Sana.

La NU espera ce la pausa de combate va gida cisa a un recomensa de negosias de pas entre la du lados. La alia dise ce lo va onora la sesafusili si se enemis en la promove huti obedi ance lo.

La parlamento en Sana, en cual parlamentores prohuti es la majoria, ia recomenda ier "un obliga completa" a la sesafusili.

Ma on es setica sur esce la acorda va es obedida e va deveni un modo de fini esta gera interna de 19 menses. Lo es ja la atenta ses.

Hadi, ci abita aora estra la pais, ia dise ier ce el previde ce se enemis va viole la sesafusili. "Nos no espeta de los oji cualce cosa plu ca parolas evitante e posponente," el ia dise pos encontra la ambasadores SUA e brites.

La anunsia de la sesafusili segue ansia internasional sur la moris de 140 persones en un ataca airal saudi cual ia colpa un asembal funeral en Sana.

Ofisiores saudi dise ce la intende ia es ataca gidores de la rebelores huti, ma par causa de informas erante, on ia dirije lo a un otra loca.

Ismail Ould Cheikh Ahmed, la ambasador spesial de la NU a Iaman, ia comenta ce el espera ce la sesafusili "va salva la popla iamani de la versa de plu sangue e va permete la furni aumentada de aida umaniste".

En la gera en Iaman, soldatos fidosa a la governa internasional reconoseda de presidente Hadi combate la rebelores. La alia cual suporta Hadi, gidada per Arabia Saudi, acusa Iran de suporta la rebelores.

La NU dise ce la gera ia mata cuasi 7000 persones, ia feri plu ca 35 mil, e ia desloca a la min tre milion de pos marto de la anio pasada.

2016-10-19

Un sonda spasial desende sur Marte

La Ajenteria Spasial European (ASE) prepara per pone un sonda sur Marte.

Se robot Schiaparelli va atenta la desende riscosa a la surfas en la oras veninte, pos viaja tra 500 milion cilometres de la Tera.

On regarda la atera como un eserse per un projeta multe plu importante pos cuatro anios, cuando ASE va ofre pone un vagador multe custosa sur la planeta. Acel veculo de ses rotas va fora su la surfas per xerca la vive.

La atera de Schiaparelli, un robot plu peti, debe es un taxe plu simple. Ma la istoria mostra ce Marte no es la plu bonveninte de locas, an per aparatos la plu sofisticada.

Plu ca un dui de la misiones enviada a la planeta visina de la Tera ia fali. Multe ia es perdeda en via, ia pasa se blanco, o ia es ruinada par la secutes de se ariva.

Per Europa, la sonda Schiaparelli es un posible per oblida la delude de la aterador Beagle 2 cual ia desende bon sur Marte en 2003, ma ia malfunsiona cuasi direta.

Schiaparelli, construida en Italia, va usa un combina de un scermo termal, un paracade, e un grupo de rocetos per redui se rapidia de 21 000 cilometres per ora a se entra a la atmosfera asta cuando lo flota direta supra la surfas.

En se du metres final, la robot de 600 cilogrames va cade a sur se ventre.

Desendente, la sonda va emete tonos de frecuentia estrema alta (UHF). Un telescopio de radio en Barat va atenta catura estas e envia los a controlores en Darmstadt en Deutxland.

On previde ce la atera va aveni a 14:58 de ora universal. Si la compleso barati oia ancora Schiaparelli a la comensa de la ora 15, esta va indica ce la modulo ia survive se desende a la tereno martan.

2016-10-18

Des mil ranas peruan mor

En Peru, la departe de ambiente investiga la moris de sirca 10 mil ranas de ci on ia trova se corpos en un rio en la sude de la pais.

Un grupo campaniante dise ce on debe culpa la contamina en la Rio Coata, e ce la govena ia iniora solisitas per la construi de un compleso de trata acua cloacal en la rejion.

La ranas acual de Titicaca es un spesie perilida cual on trova sola en acel lago enorme de acua dulse, compartida par Peru e Bolivia, e se afluentes.

La Comite Contra Contamina de la Rio Coata ia dise ce la autoriosas peruan ia fali dirije se a un problem grave de contamina.

Ativistes ia prende sirca sento ranas mor a la plaza sentral en Puno, la capital rejional.

Maruja Inquilla, xef de la protestores, ia comenta: "Me ia debe trae la ranas mor a los. La autoriosas no comprende como nos vive. Los no comprende ce la contamina es tan grave. La situa coleri nos."

La Emprende Nasional de Forestas e Viventes Savaje de Peru ia dise ce lo investiga la aveni. En un declara, lo ia dise: "Sur funda de atestas de abitores local e samples prendeda en la dias pos la aveni, on crede ce plu ca 10 000 ranas ia es afetada tra sirca 50 cilometres."

Telmatobius culeus ave plias enorme de pel cual grandi se area surfasal e aida la amfibio a asorbe plu osijen de la aira ambiente.

La ranas es estrema perilida car umanas ia colie tro multe de los per come, se abitada deveni perdeda, e spesies invadente ocupa la partes restante.

2016-10-17

Xicas librida de Chibok es reunida con se familias

En Nijeria, dudes-un xicas saisida par la grupo islamiste Boko Haram en la vila Chibok ia deveni reunida con se familias.

En un rituo emosiosa en la capital Abuja, un de la xicas ia dise ce los ia survive tra 40 dias sin comeda e ia evita apena mori a un ves, cisa plu.

Lo no es clar como on ia negosia la libris, ma un ofisior dise ce discutes continua per libri plu de la xicas. De la 276 studiantes saisida en april 2014, 197 manca ancora.

Un de la xicas librida ia dise en un rituo cristian en Abuja: "Me ia es en la bosce cuando la avion ia cade un bomba prosima a me, ma me no ia es ferida. Nos ia ave no comeda tra un mense e des dias, ma nos no ia mori. Nos grasia Dio," el ia ajunta, parlante en hausa, la lingua local.

Multe de la scolores saisida ia es cristian ma ia es obligada a converti a Islam en se prisonia.

Un otra xica ia dise: "Nos ia imajina nunca ce nos va vide esta dia, ma, con aida de Dio, nos ia pote sorti de sclavia.

Relatadas emosiosa ia espeta per es reunida con la xicas, ci ia es librida a jovedi.

Autoriosas nijerian ia nega reportas ce on ia intercambia soldatos caturada de Boko Haram per la xicas. Ma un ofisior ia dise ce cuatro comandores ia es librida.

On reporta ance ce un rescate de miliones de dolares ia es paiada par la governa suiz per la governa nijerian.

La ministro de informa nijerian, Lai Mohammed, ia dise ce la libri a jovedi es "la paso prima" per la libri de tota la xicas restante.

Alga de la xicas ia susede evade a mera oras pos la saisi, xef par salta de camiones e par core a arboretas prosima.

Intera, 219 xicas ia es caturada e prendeda a via. Ma lo pare posible ce alga de la xicas ia mori. Plu, on reporta ce pos plu ca du anios en prisonia e pos deveni sposida a soldatos de Boko Haram, alga de la xicas no desira revade a se familias.

2016-10-16

Arestas sur predise de jenero de bebes en Xina

La polisia en Xina ia deteni 75 persones en relata con un rede vasta cual ia revela nonlegal la jenero de bebes ancora no naseda.

La emprende, dirijeda a jenitores espetante ci desira enfantes mas, ia contrabanda samples de sangue fetal a Hongkong per probas de jenero. Lo ia opera tra multe de Xina e ia colie un revenu de $30 milion.

An pos desenios de campanias, familias xines continua valua xicos plu ca xicas, spesial en areas estra urbes.

La autoriosas en la provinse este Zhejiang ia dise ce a la min 300 persones ia es envolveda en la emprende nonlegal.

La grandia de la emprende e la mone relatada revela la despera de la jenitores ci ia desira lo.

Xina ia fini se politica de sola un enfante en la anio pasada. On ia judi ce lo ia contribui a la nonecuilibra de jenero en Xina. Ma ofisiores xines de cuantia de popla ia averti en esta semana ce la nonecuilibra – 113 xicos per cada sentuple de xicas – va resta per anios.

2016-10-15

Un acorda nova sur gases de inverneria

Plu ca 150 paises ia fa un acorda per retira gradal gases cual aumenta la caldi global.

Idrofluorocarbonos (IFCs) es vasta usada en friadores, frescadores, e boteles de airosol.

Delegadas consentante en Ruanda ia aseta un cambia complicada a la Protocol de Montréal, disente, entre otra cosas, ce paises plu rica va redui se usa de IFCs pos 2019.

Alga oposores dise ce la compromete pote ave un efeto min grande ca desirada.

Ma John Kerry, la ministro de esternas SUA ci ia aida reali la acorda en un serie de consentas en la capital de Ruanda, ia descrive lo como un vinse major per la Tera: "Lo es un avansa monumentin cual trata la nesesas de nasiones individua, ma lo va permete ce nos redui la caldi de la planeta par un dui intera de grado celsius."

La acorda projeta tre vias separada per paises diversa. La plu ricas – como la UE, la SUA, e otras – va comensa limita se usa de IFCs pos poca anios e va redui par a la min 10% pos 2019.

Alga paises developante – incluinte Xina, nasiones en America Latina, e statos isolal – no va aumenta plu se usa de IFCs pos 2024.

E otra paises developante – spesifada como Barat, Pacistan, Iran, Irac, e la statos de la Golfo Irani – no va aumenta plu se usa pos 2028.

Xina, la produor de IFCs la plu grande de mundo, no va comensa redui la produi o usa de los asta 2029. Barat va comensa an plu tarde, no reduinte se usa par 10% asta 2032.

Serta, si on reali intera la acorda, lo va ave un efeto grande a la caldi global. Espertas estima ce lo va sutrae un cuantia corespondente a sirca 70 mil milion tones de diosido de carbono de la atmosfera a 2050.

Ma alga oservores ia leva demandas sur la sedes fada a Barat e Xina, sujestante ce los ia debili la resulta jeneral. Lo es posible ce on no va ateni la intende de redui la caldi global par 0,5 grados.

Suportores dise ce la esta acorda en Kigali va construi sur la funda creada par la acorda de clima en Paris, suscriveda par plu ca 190 paises en desembre 2015, cual va comensa funsiona en la temprana de novembre.

Los indica ance la istoria pasada de la Protocol de Montréal: on ia elemina plu ca 100 gases fluorida en la 30 anios de la acorda. Pos aseta la regula, industrias developa rapida alternativas.

2016-10-14

Tai lamenta se re

La popla de Tai lamenta la mori de Re Bhumibol Adulyadej, la monarca la plu longa renante de mundo, ci ia mori ier con 88 anios.

En Bangkok, un fola emosiosa ia fa un vijila en la tarde de note, e folas en vestes negra pleni aora la stradas.

Plu tarda oji, on va prende la corpo de la re a la Templo de Esmeralda en la Palasio Grande. La lamenta ofisial va dura per un anio.

On previde ce Maha Vajiralongkorn, la prinse erital, va deveni la monarca nova, ma el ia demanda per un pospone de pasa de rena.

La consilio governante ia declara ce oji es un festa nasional, e banderas va vola sola partal levada per la 30 dias seguente.

La governa ia demanda ance ce la popla porta vestes negra e evita "avenis joiosa" en esta periodo. Locas de rede jornaliste ia ajusta se pajes a blanca-negra, e xefes tra la mundo ia ofre se tribuis.

Miles de lamentores sta aora sur la stradas de Bangkok espetante la prosegue funeral de la re. La prinse erital va fa la rituo tradisional de bani la corpo de la re a esta sera.

Bhumibol ia es regardada como un figur stablinte en un pais cual esperia sicles de turba political e colpas de stato. El ia es vasta respetada tra Tai, e multe persones ia regarda el como semidivin. El ia gania la dedica de tais per se laboras de aida persones povre en la campania, incluinte projetas de developa cultival, e per se otra atas carital.

La re ia es malada tra tempo longa. Cuando on ia anunsia ier se mori, multe persones en la folas grande estra la ospital ia perde controla de se emosias.

La pasa de rena ia pare inisial simple, ma lo es aora probable ce lo va nesesa un tempo plu longa de clari. La prinse ia dise ce el no va prende direta la corona, car el desira tempo per lamenta la mori de se padre.

Tai es ancora militar governada pos un colpa de stato en 2014.

La pais ia sufri violentia political e turbas grande en la desenio pasada, e ance un rebela longa par separadistes muslim en la provinses sude cual fa atacas minor e periodal de bomba.

An si Bhumibol ia es un monarca constitual con potia limitada, multe tais ia espeta ce el va interveni en tempos de tensa alta. On ia vide el como un influe uninte e calminte tra multe colpas de stato e 20 constituis.

Se oposores ia alega ce el ia validi la controla militar e ia fali parla contra maltratas de diretos umana a veses.

La prinse erital ave 64 anios. El es multe min conoseda a tais, e no ia ateni la popularia vasta de se padre. El pasa multe de se tempo estra la pais, spesial en Deutxland.

Leges sever contra tradi proteje la membros la plu alta de la familia reial tai de insultas e menasas. Discutes publica de la pasa de rena pote es punida par un prisoni longa.

2016-10-13

La SUA ataca radarerias iamani

La militaria de la SUA ia ataca stasiones de radar en Iaman pos cuando un de se barcones de gera en la Mar Roja ia es atacada par misiles a la ves du en poca dias.

La Pentagon ia dise ce se evaluas inisial ia mostra ce tre radarerias envolveda en la atacas resente ia es destruida. La locas ia es en teritorio controlada par rebelores huti aliada con Iran.

La atacas ia es autorida par presidente Barack Obama, e esecutada usante misiles cruser Tomahawk xutada de la xasatorpedo Nitze.

Un portavose ia dise: "Esta atacas limitada de autodefende ia es fada per proteje nos empleadas, nos barcones, e nos libria de naviga en esta coredor maral importante. La Statos Unida va responde a cualce plu menasas a nos barcones e trafica comersial, a grado conveninte."

A la min un misil ia es xutada a la Mason, un xasamisil, en la Mar Roja prosima a Iaman. La barcon ia ata per defende se e ia sufri no dana.

A soldi, du misiles ia es xutada a la mesma barcon SUA de la mesma teritorio de rebelores. Ambos ia colpa la acua ante ateni la barcon. Un portavose huti ia dise ce lo ia punta no atacas a barcones de gera.

Un alia multinasional, gidada par Arabia Saudi e suportada par la SUA, fa un campania de atacas airal contra la promove huti. Ma la suporta SUA per esta ia deveni tensada pos un ataca a un salon funeral en la capital Sana cual ia mata a la min 140 persones en la parte plu temprana de esta mense.

Washington ia dise ce lo va revisa se suporta per "alinia plu bon con prinsipes, valuas, e interesas de la SUA".

La governa saudi no ia reconose publica ce se aviones ia esecuta la ataca de misil, ma lo ia inisia un investiga. Lo ia dise ance ce lo va aida la retrae de iamanis ferida en la ataca ci nesesa es medical tratada estra la pais.

La Nasiones Unida dise ce a la min 4125 persones nonmilitar es matada e 7207 es ferida pos marto 2015, cuando la alia ia interveni en la gera entre fortes fidosa a la governa internasional reconoseda de Iaman e los aliada a la hutis.

2016-10-12

La avocatos per Salah Abdeslam sesa defende el

Avocatos per la suspetada xef de la atacas islamiste en Paris en la anio pasada dise ce los no plu va defende el.

Salah Abdeslam va usa se direto de resta silente.

Un de la du avocatos, Frank Berton, ia esplica: "Nos ia dise de la comensa ce se nos cliente ta resta silente, nos ta para se defende."

En novembre pasada, atacas contra bares, restorantes, un salon de conserta, e la stadion nasional ia mata 130 persones. La organiza Daex ia dise ce lo ia esecuta la atacas.

On ia aresta Salah Abdeslam en Bruxelles en marto. El ia resta silente pos se move a Frans en april.

El es monitorida par camera per 24 oras de dia en se selula de prison. En maio, Berton ia dise ce la suspetada es "spesial disturbada" par la monitori.

On crede ce Abdeslam ia fa un rol major en scemi la atacas de Paris e en transporta la atacores, ma investigores ancora no ia descovre se rol esata.

A 6 otobre, la avocatos ia informa el ce los va sesa representa el. On reporta ce, a presente, Abdeslam no desira es defendeda par un otra avocato.

El no nesesa un representa legal en cuando la investiga continua, ma va nesesa lo a se prosede.

La otra avocato, Sven Mary, ia comenta: "La vitimes vera de tota de esta es la vitimes de la atacas de Paris, car los ave la direto de esta veria e de atenta comprende la noncomprendable."

2016-10-11

Construidas colasa en Xina

Dudes-du persones ia mori cuando un grupo de construidas abital ia colasa ier en la este de Xina.

Cuatro construidas en Wenzhou, en la provinze Zhejiang, ia es reduida a detrito.

On reporta ce la construidas ia es creada par viletanes en la desenio de 1970 e ce los ia es en un mal state.

La plu de la vitimes ia es laborores migrante ci ia lua salas barata.

Un atestor ia comenta: "Los ia perde se vive per benefica de lua barata. Lo es xocante."

On ia tira ses persones vivente de la detrito. Un de los ia es un xica joven ci ia es protejeda par la corpos de se jenitores.

2016-10-10

Nijeria saisi $800 000 de judores frodosa

En Nijeria, la departe de securia ia saisi $800 mil de mone fisical en atacas contra judores major ci on ia suspeta de froda.

La ajenteria dise ce la atacas ia es fada en dias resente e ce alga judores ia es arestada.

La Asosia de Avocatos Nijerian ia acusa la autoriosas de fa un opera "en stilo de Gestapo", e ia esije la libri de la arestadas.

En un declara, la departe de securia ia dise: "La xercas ia descovre un monton de mone fisical de valuas diversa, local e stranjer, con imobila con valua de alga miliones de naira e documentos afirmante atas pecosa par esta judores. Nos ia monitori la modo de vive custosa e lusosa de alga de la judores, como ance cexas de la public consernada sur judis donada par froda e pertinente a cuantias de mone paiada."

La declara ia detalia ce la judores es de la corte suprema, la corte de apela, e la corte alta. On no ia publici la nomes de la suspetadas.

Reatante a la atacas, la asosia de avocatos ia recomenda ce presidente Muhammadu Buhari "averti direta tota la ajenterias de securia nasional e respeta la regulas de lege".

Pos emprende se posto en la anio pasada, Buhari ia promete labora contra la froda vasta florinte cual ia impedi la crese economial tra la pais.

Como parte de acel campania, un cuantia de ofisiores major pasada ia es acusada, ma se casos no ia progresa multe en la cortes.

Par causa de froda en la sistem legal, la condena de individuas potiosa es estrema difisil.

2016-10-09

Republicistes abandona Trump pos se comentas repulsante

En la SUA, multe republicistes major ia retira se suporta per Donald Trump, aspiror de la presidentia, pos la publici de comentas ofendente par el a tema de femes.

A venerdi, la jornal The Washington Post ia revela un rejistra audio de 2005 en cual el vanta ce el ia palpa e besa femes.

Trump ia responde ce el va abandona nunca la compete per deveni la presidente, e va delude nunca se suportores.

A la min des-du republicistes ia dise aora ce los no va vota plu per el. La plu resentes es John McCain, aspiror pasada de la presidentia, e Condoleezza Rice, ministro pasada de esternas.

McCain ia dise ce la comentas de Trump "nonposibli ce on continua ofre an un suporta dependente per se aspira". Rice ia dise: "Basta! Donald Trump no debe es la presidente. El debe retira."

Kelly Ayotte, senator de la stato Nova Hampshire, ia dise: "Me no pote suporta e no va suporta un aspiror de la presidentia ci vanta sur degrada e ataca femes." El ia dise ance ce el no va vota per Hillary Clinton ma intende scrive la nom de Mike Pence, la aspiror republiciste de la vispresidentia, sur se paper de vota.

Alga otra republicistes ia dise ce los va vota per Pence ance.

Trump mesma ia asentua ce el vide "no probable ce me va abandona", ajuntante ce el reseta un suporta "noncredable". En un tuita, el ia dise ce "la jornalistes e la funda desira tan multe ce me parti de la corsa".

Se sposa Melania ia declara ier ce "la parolas usada par me sposo es nonasetable e ofendente a me". Ma el ia ajunta ce se sposo ave "la cor e mente de un xef", disente ce el "espera ce on va aseta se escusa, como me ia fa, e va foca a la problemes importante cual sta ante nos nasion e la mundo". El ia sposi Trump en 2005, la anio de la rejistra ofendente.

Paul Ryan, presidente de la Salon basa, ia invita ja Trump a un aveni campaniante en la stato Wisconsin a esta fini de semana, ma ia cansela se invita, descrivente se como "repulsada" par lo cual el ia oia. On ia intende ce Pence vade en loca, ma el ia deside resta asente.

Hillary Clinton, la oposor democrata en la compete per la presidentia, ia descrive la comentas de Trump en la rejistra como "repulsante".

En la rejistra, fada en 2005 cuando Trump ia es a punto de apare en un telenovela, el dise ce "on pote fa cualce cosa" a femes "cuando on es un stela" e usa an la espresa "saisi los par la cuno".

Se parolas conteni un violentia casual cual cualce vitim de maltrata sesal reconose e cual repulsa la plu de femes.

Trump ia publici un declara video en cual el escusa se per la comentas. Esta ia ombri la publici de transcrives par Wikileaks de parlas par Clinton a asemblas privata.

La debate televisada du entre Trump e Clinton va aveni a esta sera en la site San Louis en la stato Missouri.

Trump ia dise resente ce en la debate el no intende reali se menasas de raconta sur la adulteras de Bill Clinton. Ma en se escusa video, el ia ataca direta la presidente pasada: "Bill Clinton ia maltrata vera femes, e Hillary ia tormenta, ataca, e vergonia se vitimes. Nos va discute esta en la dias veninte. Asta revide a la debate a soldi."

2016-10-08

Tutu desira la direto de mori aidada

Arcibispo Desmond Tutu de Sudafrica ia revela ce el desira ave la posible de un mori aidada.

Tutu, ci ia gania un premio Nobel de pas e ia campania contra apartait, ia dise ce el "no desira ce se vive es mantenida an con tota". El ia scrive en la jornal Washington Post a se aniversario 85.

El ia declara se como un suportor de moris aidada en 2014, sin spesifa esce el mesma vole ave la eleje. En la mense pasada, el ia es ospitalida per sirurjia per trata infetas recorente.

"Me espera ce on va trata me con compatia e va permete ce me progresa a la fase seguente de la viaja de la vive en la manera cual me eleje," Tutu ia scrive. "Sin relata a lo cual on ta eleje per se mesma, perce on ta nega a otras la direto de fa esta eleje? Per los ci sufri nontolerable e veni a la fini de se vives, mera la sabe ce un mori aidada es disponable pote furni un comforta nonmesurable a los."

Sudafrica ave no leges spesifada per governa la mori aidada. Ma en un judi major en april 2015, un corte sudafrican ia permete la direto de mori a un om con maladia nonremediable. A pos, on ia solisita un clari de la leges en tal casos.

Esta no es la ves prima cuando Tutu ia parla contra la eglesa.

El es un suportor franca de diretos ge, e ia critica publica la disposas de cristianes tradisional sur omosesalia. En 2013, el ia dise ce el "ta refusa vade a un sielo omofobica" e ta prefere "la otra loca". El ia ajunta: "Me no ta adora un dio ci es omofobica, e esta es la profondia de me sentis sur esta."

Plu temprana en esta anio, el ia bondise la sposi de se fia Mpho con se acompanior fema, an si la lege anglican sur sposi en Sudafrica declara ce "la sposi santa es la uni eterna e escluine entre un om e un fem".

En la media de la desenio de 1990, Tutu, alora esente la arcibispo de Site de Capo, ia suporta controversa un cambia afin abortas ta deveni plu disponable en Sudafrica, an con alga dutas personal.

2016-10-07

Xicas labora 40% plu ca xicos

Diseda par un reporta nova de Unicef, la departe de la Nasiones Unida per enfantes, xicas pasa 40% plu tempo ca xicos en fa taxes nonpaiada de casa.

La difere soma a 160 milion plu oras per dia tra la mundo.

Du de tre xicas cosini e limpi en se casa, e cuasi un dui colie acua o lenio de foco.

Los fa ance laboras "min vidable", como atende enfantes o persones vea.

La reporta ia trova ance ce la labora ajuntal aumenta con la pasa tempo. Entre sinco e nove anios, xicas spende promedia 30% plu tempo sur tal taxes, ma cuando los ave 14 anios, esta cuantia crese asta 50%.

Lo averti ance ce taxes como colie de acua e lenio pote esposa xicas a plu risca de violentia sesal.

En Somalia, xicas con entre 10 e 14 anios pasa 26 oras per semana en taxes de casa – la plu de cualce pais. Burcina Faso e Iaman ave ance alga de la caniones la plu grande de labora entre xicos e xicas.

Anju Malhotra de Unicef ia dise: "Xicas sacrifia posibles importante de aprende, de crese, e an de joia se enfantia. La esta distribui nonegal de labora entre enfantes permane la stereotipos de jenero e la carga duple a femes e xicas tra jeneras."

La reporta, cual inclui ance datos sur violentia, sposi de enfantes, mutila jenital fema, e instrui, es publicida en coaveni con la dia internasional NU de enfantes fema a 11 otobre.

2016-10-06

Aiti es sever colpada par un siclon

En Aiti, salvores labora forte per asede partes de la pais colpada par la siclon la plu potiosa en la Caribe de cuasi un desenio.

La destrui causada par siclon Matthew ia forsa la pospone de la eleje presidental en Aiti a esta fini de semana. Miles de persones es deslocada e des, cisa plu, ia mori.

La statos Florida e Carolina Sude en la SUA prepara per la tempesta, cual prosimi aora a la Bahamas. Ala, tota trafica de aira e mar ia sesa, e on ia recomenda ce persones vade a tera plu alta.

Presente, la siclon es un tempesta de categoria 3, ma on previde ce lo va forti a categoria 4 cuando lo ariva a la costa de la SUA.

A martedi, ventas de asta 230 cilometres per ora ia bate un area distante de Aiti – un de la paises la plu povre de mundo, do multe abitores abita en casas frajil en areas inondable.

On ancora no pote judi la estende vera de la dana, spesial en la area Grande-Anse a la punto sude de la isola, cual ia es direta en la curso de la siclon.

Un ponte esensal ia es destruida, vias es blocida, e telefones no funsiona. A la min des mil persones es en refujerias, e ospitales supraflue.

Entre la construidas danada es scolas e eglesas cual on ia intende usa como voterias per la eleje. On ancora no ia anunsia un data nova per la vota ja multe posponeda.

On crede ce la siclon ia mata a la min 16 persones asta aora, incluinte cuatro par mures colasante e liscas de fango en la Republica Dominican.

En Cuba, desuples de casas ia es destruida en Baracoa, un site este.

2016-10-05

Un sumerjor es matada par un raia

Un sumerjor profesal ia es matada par un raia de spina a un parce de animales maral en Singapor.

Philip Chan, ci ia ave 62 anios, ia gida un ecipo de sumerjores ci ia es movente animales de la atrae Mundo Suacuan ier.

La parce popular ia clui resente.

Chan ia es moveda a ospital, do el ia mori par causa de se feris. La polisia investiga "la mori nonatural".

La aveni ia es la prima de se spesie en Singapor. Un declara ofisial de la Corpora Haw Par, cual posese la parce, ia descrive lo como "un asidente trajedin".

"Senior Chan ia es un de des empleadas ci ia continua labora per cura la animales en cuando on ia trova casas conveninte," un portavose ia dise, ajuntante ce on ia suspende aora la program de move la animales.

"El ia es esperta como sumerjor, acueriste, e curor de animales, ci ia cura ja la animales acual de la abri de Mundo Suacuan."

La parce ia abri en maio 1991 ma ia clui en junio pos no susede compete contra atraes simil de acueria.

On ia critica lo per teni delfines ros rara, de cual alga ia es prendeda de la natur. La animales move aora a un acueria en Xina.

Raias de spina es comun trovada en acuas tropical. Se spinas lamin, locada a fini de se codas, es covreda con venena nosiva cual los usa frecuente per defende se de menasas.

An si la picas de esta animales es dolosa, los ataca sola rara umanas.

Steve Irwin, un esperta famosa de conserva de natura, ia es matada par un raia de spina en 2006, prosima a la Parador Grande de Coral. Se peto ia es colpada par la spina.

2016-10-04

Gas lacrimojen a un protesta par jubilores elinica

La polisia en Elas ia usa gas lacrimojen contra jubilores ci ia protesta sur reduis de se revenu pensional.

Alga de la sentos de veas protestante ia atenta cade un bus de polisia. Otras ia atenta forsa se tra linias de polisiores antitumulta.

Medios sever en Elas ia causa la redui repeteda de pensiones. Los ave aora un valua de 25–55% min ca ante la crise economial.

Pensiones es un problem en la negosias de Elas con se creditores internasional.

La defini de un acorda aidante con prestores internasional obliga la governa de Alexis Tsipras a regania plu ca mil milion euros ($1,12 mil milion) par reformis de pensiones.

Ma un sonda publicida par la Rede Nasional de Pension en la semana pasada ia sujesta ce cuasi un dui de jubilores ave aora un revenu mensal cual es su la nivel ofisial de povria.

"Nos no pote vive con €400," ia es un canta lenta de la jubilores en se protesta. Un otra ia es: "Ta ce la ricas paia per la crise."

La protesta ier ia es organizada per coaveni con la presenta de un bujeta ru, projetante 2,7% de crese economial, a parlamento. Alga de la protestores ia burla acel sujesta.

"Lo es mera un menti vasta grande," Vassilis Bardas, ci ave 76 anios, ia dise. "Esta governa es la mentores la plu grande de tota la otras juntada."

Pos la protesta, Nikos Toska, la ministro de proteje sitadanes, ia responde rapida, comandante ce gas lacrimojen es proibida de es usada en "protestas par jubilores e laborores".

2016-10-03

Votores colombian rejeta la acorda de pas

En Colombia, votores ia rejeta un acorda monumental de pas con rebelores FARC en la resulta surprendente de un referendo. 50,24% ia vota a contra.

La acorda ia es suscriveda en la semana pasada par Juan Manuel Santos, la presidente, e Timoleón Jiménez, la xef de FARC, pos cuasi cuatro anios de negosias. Ma la popla ia nesesa validi lo ante cuando lo ia pote deveni legal.

Parlante a la nasion, Santos ia dise ce el aseta la resulta ma va continua labora per ateni la pas.

El ia dise ce la sesafusili corente resta, e ce el ia comanda negosiores a viaja a Cuba per consulta xefes de FARC sur la paso seguente.

"Me no va sede," el ia dise. "Me va continua la xerca per pas asta la momento final de me autoria, car esta es la modo de lasa un pais plu bon a nos enfantes."

Entretempo, la xef FARC, conoseda como Timochenco, ia dise ce la grupo resta dedicada a reali un fini de la gera. El ia critica ance la campania de no.

"La FARC regrete profonda ce la potia destruosa de los ci semi odia e venja ia influe la opina de la popla colombian," el ia dise.

A ante, la rebelores ia acorda abandona se armas pos 52 anios de gera per junta se a la prosede political. Ma oposores crede ce la acorda trata tro pardonosa la FARC, ci la SUA regarda ancora como un grupo teroriste.

La acorda ia ta permete ce la xefes de la rebelores evita un condena de prison si los ta confesa se crimines. On ia promete ance des sejas en congresa a la rebelores per la du elejes seguente.

La difere de cuantia entre la votores ci ia favore la acorda e los ci ia rejeta lo ia es min ca 63 mil entre 13 milion votas.

La prosede de pas es aora nubida par nonsertia.

Alvaro Uribe, la presidente pasada ci ia dirije la campania no, ia comenta ce tota colombianes desira la pas, ma ce la acorda nesesa "coretis". "Nos vole contribui a un acorda nasional e deveni oiada," el ia dise.

En la pasada, Santos ia averti ce on ave no scema alternativa per fini la gera cual ia mata 260 mil persones e ia desloca sirca oto milion.

2016-10-02

Un amnestia per evadores de imposta fini en Barat

En Barat, un amnestia per evadores de imposta ia provoca desuples de miles de persones a declara plu ca $9,5 mil milion de revenu e ativas nondeclarada.

La fenetra de cuatro menses ia fini a venerdi, e ia trae 64 275 declaras. A tota, on ia ofre imunia contra prosede legal, intercambiada per paia de la imposta, un ajuntal, e un multa.

On estima ce la governa va gania sirca $4,5 mil milion de la scema. "Mone negra" (revenu nondeclarada) es un problem grande en Barat.

Plu temprana en esta anio, la governa ia contata sirca 700 mil evadores suspetada, recomendante ce los declara se revenu e ativas ascondeda.

Los ci ia segue la recomenda inclui un grupo de vendores de comeda de strada en Mumbai, ci ia declara cuasi $7,5 milion.

Ma an esta cuantia grande es mera un frato de la ganias nonrevelada de la pais. Lo no covre mone ascondeda en bancos suiz e paradisos finansial estra la pais. Alga investigores crede ce tal mone ave un valua de sirca $500 mil milion.

En la elejes barati de 2014, la ministro xef, Narendra Modi, ia promete trata sever la froda e la mone negra. En un serie de tuitas ier, el ia declara ce la amnestia ia es "susedosa", disente ce lo ia es "un contribui grande a transparentia e la crese de la economia".

La governa dise ce lo va spende la mone ganiada per la bonstate publica.

Autoriosas ia senti presada a reata pos la publici de la "Paperes de Panama" en april cual ia revela como persones rica e potiosa usa paradisos finansial per asconde se ricia. Sirca 500 baratis ia es entre la nomidas.

2016-10-01

Un siclon intensi en la Caribe

La siclon la plu potiosa en la Mar Atlantica de nove anios move en dirije a Jamaica. La rapidia de venta es asta 260 cilometres per ora, sufisinte forte per destrui casas.

Meteorolojistes ia leva siclon Matthew a categoria sinco, la plu alta en la scala de intensia.

La ministro xef de Jamaica, Andrew Holness, ia clama un consenta urjente de parlamento per discute la preparas.

On previde ce la tempesta va ariva de la mar en o ante lundi. La costa sude va es la prima colpada. La capital, Kingston, es en acel parte, como ance la sola refineria de petrolio en la pais.

On ia averti ce la ventas alta pote bate ance la areas xef per turistes, incluinte Baia Montego en la norde.

La polisia, la armada, e ecipos local de crise es preparada per ativi, e on prepara refujerias tra la isola. Multe jamaicanes cumula aora acua e comedas.

On ia averti sur tempestas tropical ance per partes costal de Colombia e Aiti en la fini de semana.

Ofisiores en Aiti dise ce la conserna prima es proteje la isolas sude de la pais, de cual los descrive se abitores como "prima riscada".

On previde ce asta 38 sentimetres de pluve va cade sur Jamaica e Aiti sude.

Jamaica ia es danada par siclon Gilbert en 1988, ma la tempesta major la plu resente en la rejion ia es siclon Sandy en 2012.