2016-04-30

Un construida colasa en pluve en Nairobi

Salvores en Nairobi, la capital de Cenia, xerca desuples de persones sur ci on teme ce los ia es trapida par la colasa de un construida de sete niveles en pluve forte.

Imajes televisada de la loca ia mostra la asembla de un fola en la visineria Huruma, do salvores escava per trova survivores.

La Crus Roja ia critica "senas caososa" cuando salvores ia ariva.

La polisia ia informa ce on ia salva a la min 121 persones. On no sabe clar cuanto persones es trapida su la sete niveles de beton.

En ajunta, la pluve ia causa liscas de tera, destrui casas, e inonda vias. 14 persones ia mori, incluinte sete en la colasa. Cuatro ia mori cuando un mur ia cade.

Hurumu es un distrito povre a la borda de Nairobi. Lo conteni multe stradas streta cual ia impedi la ariva de pompores. La folas grande cual ia asembla ia es ance un fator impedinte.

Pos alga tempo, la armada ia emprende la controla de la salva, con aida de la Crus Roja Cenian.

Un portavose per la Crus Roja ia dise: "Nos oia ancora voses de persones ancora a interna."

Abitores ia descrive como la construida ia secute violente en la pluve ante colasa.

La cualia basa de construidas es un fato de la vive en Cenia. Un sonda en la anio pasada ia trova ce plu ca un dui de la construidas en la capital no conveni per es abitada.

On ave un demanda grande per casas en Nairobi. Esta ia provoca alga developores de imobila a sircoveni la regulas de construi, per redui se custas e grandi se profitas.

En 2015, presidente Uhuru Kenyatta ia comanda ce on esamina tota construidas de la pais, seguente un serie de colasas.

La salvores ia esperia bon momentos cuando los ia susede estrae alga enfantes de la ruinas tra venerdi.

Entretempo, la Crus Roja dise ce du xicos-pastores manca en un otra parte de la pais inondada.

2016-04-29

La risca de avalanxa par causa de elicotores a Everest

Ofisiores nepali dise ce companias de elicotor fa volas nonpermeteda per turistes supra la partes la plu alta de Monte Everest (Sagarmata, Chomololungma).

Xerpas ia espresa se ansia ce la vibra de la elicotores pote causa avalanxas.

Aviones de turisme no es permeteda a vola plu alta ca la Campa de Base, a 5364 metres. Ma la companias de elicotor dise ce los vola sola supra atraes como la Cascade Jelada de Khumbu, e ce esta es permeteda.

On ia fa no atenta de asende la monte en la du anios pasada par causa de un serie de desastres. Des-ses xerpas ia mori en via a la Campa Prima en 2014, e a la min 18 trepores ia mori a la Campa de Base cuando un trematera major ia causa un avalanxa enorme en 2015.

Pos la desastre de 2014, on ia move la via de trepa a la media de la Cascade Jelada de Khumbu. Esta es un parte tradosa cual trepores debe traversa en asende a la culmina de la monte.

Xerpas transporta aora aparatos e materias a campas plu alta per la saison presente de trepa.

Pabitra Karki, la presidente de la Asosia de Operores de Airocompanias e Nepal, ia dise: "Nos vola a 710 metres supra la tera e manteni un distantia minima de un cilometre de la montes, donce en no modo la vibra pote causa un avalanxa."

La asosia dise ce on fa sirca ses volas de turisme en cada semana de la saison de trepa. Ma otra persones a la Campa de Base ia comenta ce tal volas deveni plu comun.

Phurba Namgyal Sherpa, la secretor jeneral de la Asosia Nasional de Gidores Montanial de Nepal, ia espresa se ansia: "Per trepores xerpa, spesial los ci porta aparatos per ecipos de mision, elicotores cual vola supra los en rejiones plu alta es un esperia mental torturosa. La state frajil de neva e jelo ta pote es disturbada a cualce tempo par la rotores de elicotores, e esta ta pote gida a un desastre per nos."

Espertas sur avioni dise ce un parte de la problem es la modo en cual tal volas es controlada. Ofisiores de la Autoria de Avioni Nonmilitar de Nepal ia confesa ce los no es presente per monitori tal volas, ma ce los depende de otra departes governal ala locada.

En ajunta, la departe de turisme ia permete ce elicotores transporta cordas e otra materias a la Campa Prima per repara la via, pos cexas par dirijores de misiones ce la trematera ia mali la difisilia de traversa la Cascade Jelada de Khumbu.

La asende de Everest es la sonia de multe trepores ci es contente de paia multe mone per ateni la culmina.

2016-04-28

La sitadania global pare crese

Persones identifia se como sitadanes sempre plu global e no nasional, seguente un sonda par la Servi Mundal de la BBC.

La tende es spesial forte en economias emerjinte, do persones opina ce se mentes es abrida e internasional. Ma en Deutxland, min persones dise ce los senti aora como sitadanes de mundo ca en 2001.

La sondores ia demanda a 20 mil persones en 18 paises.

Plu ca un dui de la persones sondada (56%) en economias emerjinte ia regarda se como xef sitadanes de mundo, no de nasion. En Nijeria (73%), Xina (71%), Peru (70%), e Barat (67%), la cuantias ia es multe alta.

Par contrasta, la tende en nasiones industrialida pare vade a la otra dirije. En esta nasiones plu rica, lo pare ce la conseta de sitadania global ia es forte colpada par la crise economial de 2008.

En Deutxland, per esemplo, sola 30% de respondores vide se como sitadanes de mundo. Esta es la proportio la plu basa en Deutxland de pos la comensa de la sonda a 15 anios ante aora.

La sonda sujesta ce multe persones en Deutxland considera profonda cuanto la pais debe abri se portes en la futur, seguente la deside par Angela Merkel de enflue milion refujadas en la anio pasada.

54% de persones deutx ia aproba bonveni persones suri a se pais. En la Rena Unida, do la governa ia defini un limita masima a la cuantia de refujadas asetable, la proportio ia es multe plu alta, a 72%.

Un cuantia notable de deutxes ia evita responde cuando on ia sonda sur temas de migra e sosia. Sur la tema de la sposi entre persones de orijines razal o relijial diversa, per esemplo, 46% de sondadas deutx no ia pote responde serta, o ia atenta cuali se responde par dise ce lo depende de la situa.

Esta contrasta con otra paises european, como Frans, do persones ia favore multe plu asentuada tal intersposis.

La datos indica ance alga divides clar entre disposas en la continentes.

En Europa, Rusia ave la resiste la plu forte contra intersposi: 43% de persones rusce ia desaproba ativa la sposi entre razas e etnicos diferente. Ma en Espania, sola 5% ia oposa lo.

Rusia pare ave la oposa la plu forte de migras. Sola 11% de la rusces sondada ta aproba aseta refujadas de Suria, per esemplo.

A la otra lado, entre tota paises en la sonda, Espania ta es la plu bonveninte a refujadas suri. Un majoria grande de 84% ala crede ce los debe aseta plu de la persones ci fuji de la sinco anios de gera interna en Suria.

La statistica indica ance un divide interesante entre disposas a refujadas en America Norde. De la canadianes sondada, 77% ia dise ce los ta aproba aseta suris fujinte. Ma en la Statos Unida, la proportio ia es sola 55%.

Indonesia ave la senti la plu debil de sitadania nasional (4%). En loca, lo pare ce persones indonesian ave un senti multe plu forte de localisme: plu ca un dui de respondores ia regarda se comunias local como defininte los a modo la plu importante.

Jeneral, relijio pare ave un rol multe plu peti ca nasionalia en la defini de persones. La eseta grande es Pacistan, do 43% de la sondadas ia pare identifia se par xef se relijio – notable plu multe ca en cualce otra pais.

La demanda sur relijio fa ce on recorda ance un de la diferes major entre Europa e la Statos Unida. En la SUA, 15% de la sondadas ia dise ce los defini se par xef se relijio, ma en paises european la proportio es mera 5%.

2016-04-27

Un suri porta la torxa olimpial tra un campa de refujadas

Un refujada suri, ci ia es un sportor ante perde un parte de se gama en un bombi, ia porta la flama olimpial tra un campa de refujadas en Atinai.

Ibrahim al-Hussein, a ci on ia dona refuja en Elas, ia porta la torxa tra la campa Eleonas.

Esta eletriciste de 27 anios ia partisipa en competes de nada e judo en Suria. El es entre plu ca milion migrores ci ia entra a la Uni European, traversante a Elas par barco inflable.

Al-Hussein ave aora un gama prostesal, labora en un cafe de Atinai, e jua bascetbal de seja rolante.

El pote nada 50 metres en 28 secondos – sola tre secondos min ca se ateni la plu bon ante se feri. El va compete en la concurso elinica per nadores descapasida en junio.

El ia descrive se porta de la flama como un onora. "Me porta la flama per me, ma ance per suris, per refujadas en tota locas, per Elas, per sportes, per me ecipos de nada e bascetbal. Me gol es sede nunca, ma continua, avansa sempre. E me pote reali esta par sportes."

Entretempo, la Comite Internasional Olimpial ia anunsia ce un ecipo de asta 10 refujadas va partisipa en la Juas Olimpial de Rio. Un prosede de eleje va aveni en junio.

La flama olimpial ia es ensendeda en la semana pasada en la Templo de Hera, vea de 2600 anios, a Olimpia Antica.

A martedi, on va dona lo a ofisiores brasilera en un rituo a la stadion istorial olimpial en Atinai, do la Olimpiales prima de la eda moderna ia aveni en 1896.

Des-du mil torxores va porta la flama tra Brasil ante la comensa de la Olimpiales en agosto.

2016-04-26

La aniversario tredes de Txornobil

Ucraina onora la aniversario tredes de la desastre nucleal en Txornobil.

On ia sona avertadores a la mesma momento como la esplode prima a la reatador, en la oras temprana de 26 april 1986.

La fonde a la compleso resta la desastre la plu grave de istoria. Un reata noncontrolada ia rompe la teto, emetente un nube de materia radioativa cual ia traversa la fronteras de Ucraina a Rusia, Bielarus, e un parte grande de Europa norde.

La relatadas de los ci ia mori ia partisipa en vijilas en lus de candela a eglesas, incluinte en la capital Kiev e en Slavutitx, un vila construida per recasi laborores ci ia abita prosima a la compleso nucleal.

Ante la aniversario, alga abitores pasada ia reveni a la loca, aora descurada e plen de plantas savaje.

Zoya Perevozchenko, ci ave 66 anios, ia abita en Pripyat, un vila de laborores de Txornobil cual on ia abandona pos la asidente. El ia descrive se visita: "Me ia trova apena me aparte, car lo es aora un foresta – arbores crese tra la troteria, sur la tetos. Tota la salas es vacua, la vitro ia cade de la fenetras, e tota es destruida."

La nivel de radioativia resta alta en la area ensircante. Un organiza carital, Pontes a Bielarus, averti ce alga bebes en un rejion prosima a la frontera ucrainsce nase ancora con malformis grave, e un cuantia nonusual grande de persones ave canseres de formas rara.

Ier, donores de tra la mundo ia ofre €87,5 milion ($99 milion) per crea un compleso nova suteran de dejetada nucleal en la rejion. Ucraina va nesesa ajunta ancora €10 milion per completi la projeta.

On ia comensa labora en 2010 sur un sarcofago de 25 mil tones per enclui la 200 tones de uranio cual resta en la reatador danada. Esta projeta custa €2,1 mil milion.

Espertas teme ce si partes de la reatador senesente colasa, plu materia radioativa ta pote es ejetada a la atmosfera.

On disputa ancora cuanto persones ia es matada par la desastre. Un reporta en 2005 par la Foro de Txornobil, suportada par la Nasiones Unida, ia conclui ce min ca 50 persones ia mori par esposa a radia, de ci la plu es laborores ci ia mori direta pos la aveni. Ma alga ia survive asta tan resente como 2004.

La foro ia estima ce ultima asta 9000 persones pote mori de esposa a esta radia. La organiza Greenpeace alega ce la cuantia pote es tan alta como 93 mil.

2016-04-25

La destra estrema gania la ronda prima en Osteraic

En Osteraic, la aspiror estrema destriste de la Partito de Libria ia vinse en la ronda prima de elejes presidental.

Norbert Hofer ave sirca 36% de la votas per la rol, cual es xef ritual. Esta cuantia no es sufisinte grande per evita un plu vota en maio.

Lo es probable ce el va es oposada par Alexander Van der Bellen, un aspiror autonom, suportada par la Verdes, ci ave 20% en la sondas.

A la ves prima pos la Gera Mundal Du, la aspirores de la du partitos xef de Osteraic ia es eliminada en la ronda prima.

Lo pare ce cada de Rudolf Hundstorfer de la Democratas Sosial e Andreas Khol de la Partito de la Popla, a sinistra e destra de la sentro, ia gania sirca 11% de votas.

Ambos partitos ia governa Osteraic tra desenios – o solitar o aliada.

La vinse clar de la aspiror estrema destriste refleta un noncontentia vasta con la state presente, e ance un ansia sur la economia e sur migras a la pais.

La suporta per la Democratas Sosial e la Partito de la Popla ia diminui en anios resente. En 2013, en la elejes jeneral la plu resente, la du partitos ia gania apena un cuantia sufisinte de votas per governa en un "alia grande".

Si, como pare, no aspiror gania un majoria de votas en la ronda prima de la elejes presidental, la ronda du va aveni a 22 maio.

La presidente presente, Heinz Fischer, ci ave 77 anios, no pote aspira denova la rol pos du periodos ja en la posto.

2016-04-24

Uganda va dirije se petrolio tra Tanzania

Uganda, un pais sin costa, ia anunsia ce lo va construi un tubo major per esporta se petrolio tra Tanzania.

Uganda ia projeta envia la tubo tra Cenia, cual ia desira un compleso compartida per petrolio ance de se propre campos developante.

La tubo va vade aora plu sude. On dise ce un fator en la deside ia es un ansia sur atacas posible par la islamistes al-Shaba de Somalia. Esta grupo ia ataca blancos prosima a locas do la tubo ta pasa.

Uganda ia anunsia se deside en Kampala, se capital, a un consenta alta de la Comunia de Africa Este, cual grupi Uganda, Cenia, Tanzania, Burundi, Ruanda, e Sudan Sude.

La tubo de 1400 cilometres va lia la rejion ueste de Uganda prosima a Hoima, do on ia descovre reservas grande de petrolio, con la porto Tanga en Tanzania.

On previde ce la projeta va custa sirca $4 mil milion e ce lo va crea 15 mil empleas.

La cuantia de reservas descovreda en Uganda es estimada a 6,5 mil milion bariles, e la pais espera comensa produi en 2018. La plu de la lisensas es poseseda par la companias Total de Frans, CNOOC de Xina, e Tullow de Britan e Er.

Cenia, cual ia descovre ance petrolio, ia vole ce la tubo pasa tra se teritorio. Uganda ia suscrive inisial un tal acorda, ma Total ia demanda plu tarda sur la securia de la projeta.

La ministro ugandan de esternas, Sam Kutesa, ia dise ier ce la custa es ance un fator de la eleje. "Nos ia considera la via de tubo de petrolio a Tanga en maneras diversa – entre los, lo ave la min de custa."

Reportas sujesta ce Uganda ia suporta la via tanzanian ance car la porto Tanga es ja completa funsionante, ma on construi ancora la porto Lamu en Cenia.

Cuando completida, esta va es la tubo major prima de petrolio de Africa Este.

Entretempo, Cenia ia dise ce lo va construi se propre tubo de Lokichar, en la norde-este, a Lamu.

2016-04-23

Un controversa de sceletos islansce

Un projeta per un otel nova en Rejkjavík, la capital islansce, ia deveni controversa, car on intende construi un parte de lo sur la semetero la plu vea de la site.

On sutrae ja sceletos de la semetero de Víkurkirkja, do la mores de Rejkjavík ia es enterada de sirca la anio 1000 asta 1838.

Ma alga membros de la consilio de site opina ce la reentera de esta abitores pasada de la capital dana la erita de la pais.

Þór Magnússon, un dirijor pasada de la Museo Nasional de Island, ia scrive: "La site debe evita un otel en la semetero. On ta pote cambia lo a un loca bela e pasosa per recorda jeneras pasada, en loca de un deponeria do turistes tira se bagaje."

An tal, los ci labora sur la projeta sirca la construida vea de telecomunica, do la semetero es situada, dise ce la controversa es la resulta de "un malcomprende".

Vala Garðarsdóttir, un arceolojiste, dise ce on ia conose ja la esiste de la semetero cuando se permete de construi ia es donada, e ce la loca ia es ja disturbada par projetas de construi en la sentenio 20, per cual la projeta presente va es un sustitua.

A esta ves, el ia nota, la construores "es multe plu bon consensa de se obliga" a locas istorial.

Si on iniora la contoversa, la escavas ia revela ja informas sur la pasada de Island. Vala dise ce "vide la rituos diferente de entera en cristianisme es interesante", e ce la osos descovreda va furni a rexercores un fenetra a plu ca 800 anios de la istoria de Rejkjavík.

2016-04-22

Tribuis purpur a la mori de Prince

Con tribuis purpur, on onora la vive de la cantor Prince, ci ia mori con eda de 57 anios. Tra la SUA e a ultra, construidas, pajerias, e pajes fronte de jornales ia cambia se color.

Prince ia mori ier a se casa en la stato Minnesota. El ia devenin un stela major en la desenio de 1980, con se albumes 1999, Pluve purpur ("Purple Rain"), e Sinia de l' eda ("Sign o' the Times").

On no ia declara la causa de mori, ma un autopsia va aveni oji.

La musica inovosa de Prince ia traversa roc, func, e jaz. El ia vende plu ca 100 milion discos en se carera.

En Minneapolis, do el ia nase, la ecipo de basebal ia purpuri se stadion. La Ponte de Lowry Avenue en la sentro de la site ia es ance purpur luminada.

Otra construidas major en New York e New Orleans ia reseta un aspeta purpur nova. E fanes de Prince ia bonveni la coaveni ce la Cascades de Niagara es ja purpurida per onora la aniversario 90 de Rea Elizabeth de la Rena Unida a la mesma dia.

Sentos de persones ia asembla en la sentro de Minneapolis asta la oras temprana de esta matina. A un momento, tota en junta ia canta Pluve purpur de 1984.

Vijilas per la cantor ia aveni ance estra se casa e en Los Angeles e Brooklyn, do Spike Lee, un dirijor de filmas e ami de Prince, ia improvisa un selebra sur strada.

La polisia ia responde a un telefoni medical a sirca 09:43 de ora local, e ia trova un mas adulte nonrespondente en un asendador a la Studios de Paisley Park. Aidores prima ia atenta revive el, ma on ia declara ce el es mor a 10:07.

Naseda como Prince Rogers Nelson en 1958, el ia es un musiciste produosa an de se jovenia. On reporta ce el ia scrive se canta prima cuando el ia ave sola sete anios.

El ia es capas de jua multe strumentos e ia rejistra plu ca 30 albumes.

El ia scrive ance musica per otra artistes. La canta No cosa simili a tu ("Nothing Compares 2 U"), creada per se bande The Family, ia deveni plu famosa cuando Sinéad O'Connor ia canta lo en 1990.

En 1984, el ia gania un Oscar per la partitur de Pluve purpur, un filma en cual el ia ave ance un rol major de ator.

Tra se carera, el ia ave un reputa de secretia e strania. A un ves, el ia cambia se nom a un simbol nonpronunsiable.

El ia ave un relata volatil con tecnolojia. En 2000, el ia publici singulares a Napster, la servi abrivial de comparti musica. Ma plu tarda, el ia declara ce la interede es "completa finida" e ia refusa permete se musica a plataformas major de flue.

Se album la plu nova ia es publicida en la anio pasada, e el ia turi tan resente como la semana pasada.

A 15 april, el ia es ospitalida pos un atera de crise par se avion privata en la stato Illinois. Esta ia aveni corta pos un presenta par el en la stato Georgia. On ia trata el, e el ia parti de ospital pos sola un pico de oras.

Otra artistes joven e vea de la spetro musical intera ia fa se tribuis.

2016-04-21

Un esplode a un compleso de petrolio mexican

Un esplode grande a un compleso de petrolio en Veracruz, un stato en la sude-este de Mexico, ia mata a la min tre persones e ia feri 136 otras.

La fabriceria es poseseda par la compania nasional de petrolio, Pemex, en Coatzacoalcos, un site de porto.

On ia sorti sentos de persones e ia clui scolas. Videos mostra un focon grande e plumones vasta de fuma.

La causa de la esplode no es clar, ma on ia reporta alga esplodes a complesos de Pemex en anios resente. La plu resente ia aveni a sirca 15:15 de ora local, e on ia sensa lo a distantia de 10 cilometres.

La focon ia es ja controlada a la temprana de sera. On ia recomenda ce abitores resta en casa par causa de la natur posible nosiva de la fuma de la esplode. Ma Pemex is dise ce la fuma ia disipa rapida, reduinte la efetos.

De la 136 feridas, 88 resta en ospital, e 13 de estas ave un state grave. Un video postada a redes sosial ia pare mostra senas de caos a un ospital local, con pasientes ci ia perde multe sangue.

Pemex ia comenta ce la parte de la compleso colpada par la esplode es manejada par un compania-sore, Mexichem.

La fabriceria produi clorido de vinil, un cimical perilosa cual on usa per crea tubos PVC e materias de paci.

La compleso es un de la terminas la plu grande de la distribui petrolio en Mexico. La compania ia ajunta ce se esportas de petrolio no va es afetada.

En setembre 2012, un esplode e focon seguente a un compleso de gas en Tamaulipas, un stato norde, ia mata 33 persones.

La propre xeferia de Pemex en la Site Mexico ia es colpada par un esplode grande de gas en janero 2013, e esta ia mata 37.

Alga focones ia aveni ance sur la plataformas de la compania en la Golfo Mexican en la anio pasada, e un laboror ia mori en un plu focon a la compleso en Veracruz en la febrero resente.

2016-04-20

La Parador Grande de Coral blanci grave

Un sonda estendosa airal e suacuan ia revela ce 93% de la Parador Grande de Coral en Australia es afetada par un fenomeno de blanci.

Esta segue avisas plu temprana ce la resife esperia se blanci la plu mal de istoria rejistrada.

Cuando la tmperatur de la acua leva, la corales ejeta se algas colorinte. La corales pote mori si la ambiente no reveni a se state normal.

La sonda mostra ce la dana la plu sever es en la parte norde de la resife.

La Parador Grande de Coral es locada a la costa de la stato Queensland e ave longia de 2300 cilometres.

On culpa la efetos de El Niño e cambias climal per la leva de temperatures maral.

Plu ca 900 resifes individua ia es sondada con un avion lejera e un elicotor. A pos, la esatia de la sonda airal ia es controlada par ecipos de sumerjores.

Profesor Terry Hughes, ci ia gida la sonda per la Unia Nasional sur Blanci de Coral, ia comenta: "Me es fundal un otimiste, ma me crede ce nos fenetra de posiblia per salva la Parador Grande clui rapida. Si nos no ata contra la caldi global, lo va deveni plu danada. Pos tre avenis de blanci, la misca de spesies de coral ia cambia ja."

La aveni la plu resente es multe plu grave ca presedentes en 2002 e 1998.

A esta ves, sola 7% de la resife no ia blanci. La cuantia ia es aprosima 40% a la otra du veses.

Turisme a la Parador Grande jenera sinco mil milion dolares australian ($3,9 mil milion SUA) a cada anio, e emplea sirca 70 mil persones.

La Consilio de Industria Turiste de Queensland ia dise: "Nos es grasiosa ce multe partes de la resife es ancora en forma eselente. Ma nos no pote mera iniora la blanci de la coral e espera un recovre rapida."

La departe de ambiente en Australia ia indica a ante ce governas statal e federal investi un cuantia projetada de du mil milion dolares australian tra la desenio veninte per proteje la resife.

2016-04-19

Xina atera un avion militar sur un isola disputada

Xina ia atera un avion militar sur un de se isolas artifis en la Mar Xines Sude, un area disputada.

On crede ce esta es la ves prima cuando la militaria xines ia declara publica ce lo ia atera un avion sur la isola Resife de Fiery Cross ("Crus Focosa", nomida per un barcon cual ia deveni ruinada ala en 1860).

La avion ia sorti tre laborores ferida de la resife.

Xina e alga de se visinas fa un disputa teritorial sur la Mar Xines Sude, cual Beijing reclama cuasi intera.

La avion militar ia atera a la matina de soldi per prende la tre laborores. Lo ia vola los a la Isola Hainan per tratas medical.

Xina ia atera aviones nonmilitar sur la resife en la pasada, provocante criticas de Vietnam, un pais cual reclama ance la teritorio, e de la SUA.

Beijing dise ce lo construi isolas e strutures artifis sur resifes per intendes sivil. Ma otra paises ia espresa se ansia ce la complesos pote deveni usada en modos militar.

La SUA ia sujesta ce la construi de isolas par Xina aumenta la tensas en la rejion e preveni ce barcones naviga libre tra la area.

Xina, Taiuan, Vietnam, Pilipinas, Malaisia, e Brune reclama partes de esta mar.

Xina ia cambia la Resife de Fiery Cross a un isola artifis par un opera jigante de draga. Lo ia crea construidas e un atereria per aviones.

Paises oposante disputa ja teritorio en la Mar Xines Sude tra sentenios, ma la tensa ia crese constante en anios resente.

En febrero, Taiuan e la SUA ia dise ce Xina ia posa misiles de tera a aira sur un otra isola disputada. Xina ia responde par dise ce la SUA militari la mar par se patrulias avional e marinal.

Ofisial, la SUA ave no opina sur la disputas. Lo descrive se patrulias como operas de "libria de naviga" cual serti la posible de asede vias major de barcon e avion.

2016-04-18

Miles marxa tra Bruxelles contra teror e odia

A la min sete mil persones ia marxa sur la stradas de Bruxelles per protesta "contra teror e odia".

A la fronte de la prosegues ia es alga de los afetada par la atacas resente de bomba umana a la airoporto e stasion de metro cual ia mata 32 persones.

Un difusor beljes ia descrive la protesta como "calma e silente".

On ia intende fa la marxa a un semana pos la atacas de 22 marto, ma ofisiores ia demanda ce on pospone lo par causa de la menasa a securia.

Relatadas de la vitimes, e paramedicistes e empleadas airoportal afetada par la atacas, ia junta se a persones de relijios diversa en la marxa ier. On ia porta flores per recorda la persones ci ia perde se vives.

La prosegue ia gida los a lado de la visineria Molenbeek – do multe de la esecutores alegada de la atacas en Bruxelles e Paris ia abita – e a la monumento tempora estra la asioneria de la site.

Un de la organizores de la marxa, Hassan Bousetta, ia dise: "Cuando nos cositadanes, persones comun sin defende, es cadeda en un ataca coarde, tota sitadanes debe sta per espresa se repulsa e unia."

La partisipa ia es min ca un dui de la 15 mil cual organizores ia espera.

La atacas en Bruxelles ia es reclamada par la grupo militariste Daex, cual ia dise ance ce lo ia esecuta la atacas par fusil e bomba en Paris a 13 novembre cual ia mata 130 persones.

La polisia beljes ia fa desuples de arestas en semanas resente, ma la autoriosas – como otra departes de securia en Europa — es presada par revelas de falis alegada e oportunes iniorada per para la selula teroriste cual ia reali ambos atacas.

2016-04-17

Aora un trematera en Ecuador

Pos la du tremateras resente en Japan, un nova de grandia 7,8 ia mata a la min 41 persones en Ecuador.

La trema ia colpa a 18:58 de ora local ier, prosima a Musine, un vila costal norde.

On reporta danas major en multe rejiones, e un ponte ia es destruida tan sude como Guayaquil a distantia de sirca 300 cilometres.

Un state de crise es ja declarada en ses provinses, e on ia ativi la Garda Nasional.

La trema ia es la plu grande de desenios en la pais. Lo ia secute ance construidas en la capital, Quito, do la eletrica ia fali tra alga tempo.

Presidente Rafael Correa corti se visita a Italia per reveni a Ecuador. El ia demanda per calmia, disente en Twitter: "La nos ama infinita a la familias de la mores."

La maior de la vila Pedernale, prosima a la episentro, ia comenta: "Nos atenta fa tan multe como posible, ma nos pote fa cuasi no cosa." El ia ajunta ce desuples ia construidas ia deveni platida e ce on ia comensa fura.

"Esta no ia es mera un casa colasada, lo ia es un vila intera," el ia dise.

Danas major ia es ance reportada en la site Manta, do un tore de airoporto es entre la construidas destruida.

Un abitor ia dise: "La plu de persones es en la stradas, portante bolsones e vadente a tera plu alta. La stradas es fesurida. La eletrica ia fali e telefonas no funsiona."

La trematera ia colpa no multe profonda, a 19,2 cilometres su la surfas e a sirca 27 cilometres de Muisne, en un area poca abitada.

Alga replicas sismica ia segue, de cual la plu grande ia es mesurada a grado 5,4.

La Sentro Pasifica de Averti sur Tsunamis ia publici un informa ce la menasa de un tsunami ia desapare per la plu, e ce cualce risca restante debe es evaluada par autoriosas local. An tal, plu temprana, lo ia dise ce ondas con altia de asta un metre supra la nivel de marea es posible per alga costas de Ecuador.

La pais visina, Peru, ia averti ance sur un tsunami posible a se costa norde.

On ia sensa la trema ance en Colombia, do on ia sorti pasientes de un clinica en la site Cali como medio protejente.

Ecuador es propensada a tremateras. Lo es situada longo la Anelo de Foco, un area sismica turbosa con forma de fero de cavalo en la Mar Pasifica.

2016-04-16

Un duple de tremateras en Japan

On labora per aida vitimes de un trematera forte cual ia aida Japan sude-ueste a sola un dia pos un trema simil matante.

20 mil soldatos es ativa en la opera en la rejion Kyushu pos la trema de grado 7,3 a 01:25 de ora local a esta matina.

A la min 18 persones ia mori, e sentos es ferida. On teme ce desuples es trapida en la detrito de construidas colasada. La trema a jovedi ia mata nove.

Vias ia deveni danada, e liscas de tera ia aveni en multe locas. Sirca 200 mil casas es aora sin eletrica.

On teme ce pluves prevideda va provoca plu liscas de tera.

La trema du ia aveni prosima a Kumamoto, con profondia de 10 cilometres. Lo ia es multe plu grande e ia colpa un area plu vasta ca lo cual ia colpa la site Kumamoto a la note de jovedi.

Miles de persones ia pasa la note sur stradas e en parces – do los ia foli su covreletos, con espresas aturdida e temosa.

On ave multe reportas de persones trapida en construidas, incluinte a la min 60 en un casa de persones vea.

Un vileta es vacuida pos la colasa de un parario, resultante de la trema, e un eruta peti ia aveni a Monte Aso, un de la volcanes ativa la plu grande de mundo.

La trema nova ia impedi la opera esistente de salva, e ia dana probable plu car lo ia es min profonda e se linia de falia ia es multe plu longa.

La trema a jovedi ia ave la grado 6,2. En alga locas, lo ia causa secutes tan intensa como la trematera enorme cual ia colpa la pais en 2011 e cual ia inisia un tsunami e un fonde nucleal a la sentro eletrical en Fukushima.

La plu de la persones ci ia mori en la trema a jovedi ia es en la vila Mashiki, do un tore de apartes ia colasa e multe casas ia es danada. Plu ca mil persones ia es ferida.

Inisial, sirca 40 mil persones ia fuji de se casas. Multe de la plu prosimas a la episentro ia spende la note su la sielo, car plu ca 130 replicas sismica ia colpa ance la rejion.

2016-04-15

Barat considera envia tigres a otra paises

On va reloca cisa tigres barati a Camputxa como parte de un projeta per crese la popla global de esta animales.

La deside de reloca los ia es prinsipal acordada a un consenta ministral en Delhi de des-tre nasiones asian do tigres abita.

La animales va es moveda de paises do los flori, a nasiones do los es cuasi estinguida.

La cuantia estimada de tigres savaje en la mundo ia crese resente a la ves prima en un sentenio. On estima ce la cuantia global de tigres es aora cuasi 3900, an si en 2010 lo ia es sola 3200. Barat ave plu ca la dui, con 2226.

Un campania internasional espera dupli la cuantia de tigres ante la fini de 2022.

Estra tigres barati, lo es posible ce tigres sibirsce de Rusia va es relocada a Cazacstan, do no gatos grande resta plu.

Rajesh Gopal, la secretor jeneral de la Foro Global de Tigre, un organiza intergovernal instituida per salva tigres de estingui, ia comenta: "Relocas va aveni pos la prepara nesesada de abitadas e la oteni de spesies sufisinte de preda per tigres."

La ministro barati de ambiente, Prakash Javadekar, ia dise ce se governa es "preparada per coopera con tota paises" per conserva tigres.

Cisa tigres va es relocada ance a interna de Barat. Per esemplo, la parce nasional Corbett conteni 260 tigres, a densia de 20 per sento cilometres cuadrida, ma en la parce Rajaji, relativa prosima, on trova sola du o tre tigres fema.

2016-04-14

Un video de Boko Haram mostra la xicas saisida de Chibok

Un video publicida par la grupo islamiste Boko Haram en Nijeria pare mostra alga de la xicas ci ia es saisida a du anios ante aora de la vila Chibok.

La video, parente filmada en desembre, ia es enviada a la governa nijerian. Lo mostra des-sinco xicas en robas negra ci identifia se como aprendores saisida de la scola.

Estas es la imajes prima de la xicas cual on vide de pos maio 2014, e alga de la filmadas ia es identifiada par se jenitores.

La saisi de la 276 xicas ia provoca un campania global en redes sosial. Ma an pos acel, la plu de la xicas manca ancora.

Entretempo, sentos de jenitores va marxa en Abuja, la capital nijerian, per esije ce la governa fa plu per trova se fias. Los culpa e la governa presedente cual no ia reata cuando la saisi ia aveni, e la governa presente sur cual los cexa ce lo no dedica recursos sufisinte a la xerca.

Militaristes de Boko Haram ia ataca la scola abitada governal en la stato Borno a 14 april 2014, saisinte la xicas ci ia vade ala per fa se esaminas.

Corta a pos, los ia publici un video de los, e ia esije un intercambia de prisonidas.

La xef de Boko Haram, Abubakar Shekau, ia dise ce la xicas ia converti a Islam. El ia menasa obliga los a sposi se soldatos o vende los como sclavos.

Con la pasa de la menses, sirca 57 studiantes ia susede evade, ma a la min 219 es ancora mancante.

La video nova, parente filmada a la dia de natal en 2015, mostra la xicas preante a la governa nijerian per coopera con la militaristes sur se libria. Los dise ce los es bon tratada, ma ce los desira es con se familias.

Du madres, Rifkatu Ayuba e Mary Ishaya, ia dise ce los reconose se fias en la video, e un madre tre, Yana Galang, ia identifia sinco de la xicas mancante.

Amnestia Internasional dise ce Boko Haram ia saisi sirca du mil enfantes de pos 2014. Multe es usada como sclavos sesal, soldatos, e an bombas umana.

An si la miltaristes continua ataca, la armada nijerian ia fa alga progresas en batalia los en la anio pasada. Lo ia recaturas vilas e viletas controlada par Boko Haram, e ia libri ance sentos de femes e enfantes prisonida.

2016-04-13

La gidor de un tren colidente ia usa un jua video

On ia aresta un gidor de tren deutx par causa de un desastre ferovial cual ia mata 11 persones en Bayern en febrero. Avocatos suspeta ce el ia es distraeda par un jua video a la tempo pertinente.

Seguente los, el ia fa un era de siniali en cuando el ia usa la jua en se telefoneta, e ia telefoni alora a la numero noncoreta de crise.

La om acusada ia confirma ce esta ia es la segue de avenis.

Du trenes de viaja dial ia colide sur un estende de ferovia con sola un duple de reles.

Otodes-sinco pasajores ia sufri feris, de cual alga ia menasa la vive.

Cisa la om va es acusada de mata sin intende, e pote spende sinco anios en prison.

La frontes de la trenes ia colide contra lunlotra en cuando ambos ia viaja a sirca 100 cilometres per ora, a este de Bad Aibling, un vila de banieria mineral a sirca 60 cilometres a sude-este de München.

Investigores ia dise ce la cronometri de la jua computada e de la colide indica ce "la acusada ia es distraeda de se maneja de trafica ferovial a la force".

La estende pertinente de ferovia ia ave un sistem de siniali automata, desiniada per para cualce tren cual ia pasa un sinial blocinte. Ma reportas sujesta ce on ia descomuta la sistem per permete la pasa de la tren, ja tarda, cual ia vade a este.

La investiga ia elimina falis tecnical en la trenes o la sistem de siniali como causa de la desastre.

Tota los ci ia mori en la colide ia es omes con entre 24 e 59 anios.

2016-04-12

Un comite vota per acusa la presidente de Brasil

Lo ia deveni min probable ce la presidente de Brasil, Dilma Rousseff, va evita un esamina judal de se ativias, pos cuando un comite ia vota ce esta debe aveni.

38 de la 65 membros de la comite congresal ia vota per recomenda acusa formal Rousseff sur alegas ce el ia manipula contas de governa per asconde problemes finansial cresente.

Un plu vota va aveni en la salon basa a 17 o 18 april.

La tema ia divide la pais, e la polisia prepara per protestas coletiva en la capital, Brasília.

La vota ia aveni a media de un sena caososa en cuando ambos la suportores e la oposores de la presidente ia cria sloganes e ia brandi cartones.

La vota de la comite es vera no plu ca un simbol, ma on oserva lo como un mesura de la cuantia de suporta per la prosede de acusa, ante la vota major en la salon basa de la Congresa.

Ala, un majoria de du tris va es nesesada per envia plu la demanda a la Senato. Un sonda resente sujesta ce 292 de la 513 membros favore la proposa, con 115 oposores e 106 ci ancora no ia deside.

La Senato ta ave alora la potia de suspende Rousseff, prosede el, e forsa ultima el de se posto.

Si on suspende Rousseff, la vispresidente Michael Temer, de un partito oposante, ta deveni la presidente tempora. Ma en un plu developa, jornalistes brasilera ia revela ier un banda audio cual ia pare un varia ru de un parla cual el intende dise, asetante la posto e recomendante unia nasional.

En la rejistra, el dise: "Multe persones ia xerca me afin me va dona comentas inisial, a la min, a la nasion brasilera, e me fa esta con modestia, cautia, e modera."

Se ofisia dise ce la rejistra ia es enviada a aidores par era.

En la caso ce on ta suspende ance Temer, la seguente en la posto xef ta es la presidente de la salon basa, Eduardo Cunha. Ma on ia acusa el de blanci mone e de otra malfas con orijin en la scandal de Petrobras.

2016-04-11

Darfur vota sur se futur political

La rejion Darfur en la ueste de Sudan va vota sur se state political, a 13 anios pos la comensa de un gera cual ia mata 300 mil persones.

La demanda es esce la rejion va uni o resta como sinco states, e la referendo va continua asta mercurdi.

On fa esta a un tempo ancora nonsecur, e multe persones deslocada no ia es rejistrada per vota. La SUA ia dise ce la vota no va es credable, ma Omar al-Bashir, la presidente sudani, insiste ce lo va es libre e justa.

La referendo es la paso final en un prosede de pas cual ia es negosiada en Doha, en Catar.

Tra tempo longa, rebelores ia demanda per plu potia rejional per fini lo cual los regarda como interfere par la capital sudani, Khartoum, en disputas sur posese de tera.

Los crede ce si Darfur eleje deveni sola un rejion, lo ta es plu forte en la pais.

Ma multe de los ci ia desira inisial esta referendo va boicota probable la vota car los opina aora ce lo no va es justa.

Plu ca 2,5 milion persones resta deslocada en Darfur, seguente un statistica de la Nasiones Unida, e 130 mil otras ia fuji de violentia renovida ja en esta anio.

Sirca 300 mil ia mori de pos la comensa de gera en la rejion turbada en 2003.

Militiores janjauid sur cavalos ia sperde teror en un gera de multe niveles pos cuando rebelores ia batalia la governa sentral, sentinte ce los es marjinida.

La janjauides ia es usada par la governa, como ance campanias de bombi. Oji, multe de los es integrada en la Fortes de Suporta Rapida ci combate presente en la rejion de la montania Marra.

La Corte Criminal Internasiona ia acusa Bashir de jenoside e crimines geral en Darfur. Bashir, ci ia indica ce el va resinia como presidente en 2020, ia rejeta la CCI como "judores political".

2016-04-10

Sento persones mori en un focon de templo barati

En Barat, plu ca sento persones ia mori en un focon a la Templo Puttingal en Paravur.

La focon ia comensa a sirca 03:30 de ora local, cuando un esplode ia aveni en un reserva de pirotecnicales per usa en selebra un festa de anio nova indu.

Multe persones ia mori cuando un construida a la templo ia colasa. Plu ca 200 es ferida.

La ministro xef de la pais, Narendra Modi, viaja a la loca, e ia tuita ce la asidente en Paravur es "angusante e xocante ultra la capasia de parolas".

Multe de la feridas es en un state grave e on trata los a la scola medical de governa en Thiruvananthapuram, la capital de la stato Kerala.

La xef de polisia de la stato ia dise ce multe de la mores es tan carbonida ce on va debe usa probas de ADN per identifia los.

On ia senti la colpa de la esplode en casas a distantia de an un cilometre. Un abitor ia comenta: "Pesos enorme de beton ia vola tra la aira. Blocos ia atera en nos jardin."

La ministro de internas ia comanda ce on investiga la asidente, e la ministro xef de Kerala va visita ance la loca a esta matina.

On ia teni la pirotecnicales en prepara per selebras a jovedi de un festa local, nomida vishu, a la comensa de la anio nova indu.

An tal, la judor distrital ia refusa permete ce on mostra la focos artal a esta ves, par causa de ansia sur securia e cexas par abitores prosima.

La polisia intende prosede la manejores de la templo e la contratores ci ia prepara la mostra de focos artal.

Pirotecnicales e petardos es comun usada a festas de templo e otra avenis publica en Barat, e asidentes no es rara.

2016-04-09

Corea Norde proba un motor de misil

Corea Norde dise ce lo ia proba susedosa un motor desiniada per un misil balistical intercontinental.

La ajenteria jornaliste KCNA ia dise ce la spesie nova de motor va "garantia" la capasia de lansa un ataca nucleal contra la SUA.

La proba ia es fada a la lanseria de misiles de distantia longa, prosima a la costa ueste de la pais.

Lo es la plu resente en un serie de esperimentas e lansas esecutada par la nasion isolida.

La xef Kim Jong-un ia supravide la proba, en cual "la motor ia sputa flamas enorme con un pum sordinte".

Seguente reportas, Kim ia dise ce Corea Norde va pote aora "teni cualce posos de malia en la tera, incluinte la continente SUA, en nos campo de ataca".

Un portavose per la departe SUA de esternas ia dise ce Corea Norde debe "asteni de atas e retorica cual destabli plu la rejion, e foca en loca sur la fa de pasos concreta en dirije a reali se prometes e obligas internasional".

En marto, Corea Norde ia anunsia ce lo ia developa ojivas nucleal tan peti ce los cabe en un misil balistical. Ma espertas ia duta la veria de esta.

Ance en la mense pasada, la pais ia menasa atacas nucleal "nondistinguinte" contra la SUA e Corea Sude en cuando los ia fa juntada eserses militar, cual la norde regarda como praticas per un invade futur.

Entretempo, la SUA forsa punis nova a Corea Norde pos un proba nucleal en janero e un lansa de satelite en febrero, jeneral interpreteda como un proba de tecnolojia proibida de misil.

La SUA ia fa ance discutes con Corea Sude, con intende de posa un sistem SUA de misiles defendente a la penisola corean, un idea forte oposada par Corea Norde, Rusia, e Xina.

Beijing ia comenta ce la sistem THAAD ta compromete se securia e ta sumina se teoria de desconvinse nucleal.

2016-04-08

La SUA rejeta un proposa per plu spasio en aviones

La Senato de la SUA ia rejeta un lege cual ia ta fisa un norma minima per spasio de pasajor en aviones comersial.

En anios resente, airocompanias desirante redui se spendes ia redui la grandias de sejas e la cuantia de spasio per gamas, entre otra cambias.

Pasajores ia cexa frecuente sur la ambiente sempre plu restrinjeda.

Alga volas ia es disturbada cuando disputas ia aveni entre pasajores par causa de la organiza de sejas.

Multe airocompanias aumenta aora la custa a pasajores ci desira plu spasio.

"On debe paia un braso e un gama sola per ave spasio per se brasos e gamas," Senator Chuck Schumer ia dise. El ia sponsori la proposa, cual ia es liada a un lege plu vasta sur avioni.

La lege ia ta proibi airocompanias de redui plu la "grandia, largia, cuxini, e angulo" de sejas. Lo ia fronti ance la problemes de spasio per gamas e la largia de coredores.

Airocompanias ia oposa la proposa, disente ce on atenta "reregula" la industria.

La projeta ia es rejetada par 54 votas contra 42. Tota republicistes ia vota contra la lege, con eseta de un.

2016-04-07

Nederland rejeta un asosia entre la UE e Ucraina

En Nederland, votores en un referendo ia rejeta un acorda UE per sutrae ostaculos contra comersia con Ucraina.

La partisipa ia es peti, a sola 32,2%, ma car plu ca 30% de persones ia vota, ia resulta es valida. La acorda ia es rejetada par 61,1% de la votas, con 38% favorente lo.

La ministro xef, Mark Rutte, ia dise ce la governa va debe cisa reconsidera la acorda, an si la vota no es legal obligante.

Petro Poroshenko, la presidente ucrainsce, ia insiste ce se pais va "continua nos move en dirije a la UE".

Un ofisior de la ministreria de esternas en Kiev ia comenta ce la resulta es deludente, e ia ajunta ce euroseticas no pote saisi Ucraina como ostaje per espresa se nonsasia con la Uni European.

On ia regarda jeneral la vota en Nederland como un proba de la opina publica sur la UE. Lo ia es provocada par un apela en la interede inisiada par ativistes eurosetica cual ia atrae plu ca 400 mil suscrives.

La resulta crea un problem pr la governa nederlandes, car la parlamento ia validi la acorda de asosia UE con Ucraina en la anio pasada. Tota la otra 27 statos membros de la Uni ia validi ja la acorda.

Televisada, Rutte ia dise: "Lo me opina es ce si la partisipa es plu ca 30%, con un tal vinse per la lado de 'no', la validi no pote aveni sin discute."

Geert Wilders, ci gida la Partito de Libria, oposante la Uni European ma ance oposante islam, ia descrive la resulta como "la comensa de la fini per la UE".

La governa rusce ia es forte oposada a la acorda UE con Ucraina e on ia crede jeneral ce lo ia presa Viktor Yanukovych, alora la presidente, a rejeta lo en novembre 2013. La deside de Yanukovych ia provoca protestas en Kiev cual ia gida ultima a se perde de potia.

Multe persones ia culpa separadistes prorusce en Ucraina este per la mata de 298 persones cuando un avion de Malaysia Airlines de Amsterdam ia es tirada a tera en julio 2014. Nederland ia perde alora 193 sitadanes.

La presidente ucrainsce ia asentua la natur nonobligante de la vota.

Ante la referendo, Thierry Baudet, un de la euroseticas nederlandes ci ia inisia lo, ia avisa la governa a atende un vota de "no". A la sera presedente, el ia dise televisada: "Lo no es bon per Nederland, no bon per Europa, e no bon per Ucraina."

Ance a ante, la presidente de la Comision UE, Jean-Claude Juncker, ia descrive la risca como alta, avertinte ce un vota de "no" ta pote gida a un crise plu vasta en la uni.

2016-04-06

La resinia de la ministro xef de Island

La ministro xef de Island ia resinia. El es la vitim major prima de la "Paperes Panaman" esposada cual ia lumina la mundo oscur de finansia estrateritorial.

La esposas, veninte de la compania avocatal Mossack Fonseca, ia mostra ce Sigmundur Gunnlaugsson posese un compania estrateritorial con se sposa, ma no ia declara lo cuando el ia entra a parlamento.

On acusa el de asconde miliones de dolares de mone familial. El dise ce el ia vende se asiones a se sposa, e nega ce el ia ata mal.

El es un de desuples de persones global importante ci es indicada en la 11,5 milion fixes finansial e legal, prima publicida a soldi.

Pos alora, la presa ia aumenta per se resinia. A lundi, miles de persones ia protesta estra la casa parlamental en la capital Reykjavík, e partitos oposante ia proposa un vota de no fida.

Plu temprana ier, Gunnlaugsson ia demanda ce la presidente Ólafur Ragnar Grímsson clui la parlamento e inisia un eleje political.

Ma Grímsson ia responde ce, ante acel, el vole consulta la xefes de la Partito de Autonomia, cual es un membro de la alia governante con la Partito Progresante de Gunnlaugsson de pos 2013.

Plu tarda, ante la vota proposada, la ministro xef ia anunsia ce el resinia se posto.

Sigurður Ingi Jóhannsson, la xef suordinada de la Partito Progresante, la ministro de cultiva, ia informa reportores, pos un consenta, ce la partito intende nomi el como la xef nova e proposa ce el deveni la ministro xef.

An pos la resinia, Katrín Jakobsdóttir, la xef de la Promove Verde-Sinistra, ia dise ce partitos oposante desira ancora elejes tempranida.

La compania estrateritorial Wintris ia es usada per investi miliones de dolares de mone eritada, seguente un documento suscriveda par Anna Sigurlaug Pálsdóttir, la sposa de Gunnlaugsson, en 2015.

On crede ce alga de la coleria de la islansces veni de un persepi de interesas nonarmoniosa.

La ministro xef ia es envolveda en negosias sur la futur de la bancos islansce, e ia descrive creditores stranjer ci ia desira recovre se mone como "vultures", an cuando se compania Wintris mesma ia es un creditor.

En se anunsia de resinia, Gunnlaugsson ia indica ce el ave no desira de impedi la labora continuante de la governa, incluinte un reformi de la sistem finansial.

2016-04-05

La vispresidente cenian a la Corte Criminal Internasional

William Ruto, la vispresidente de Cenia, va trova esce judores a la Corte Criminal Internasional (CCI) intende rejeta un caso contra el sur crimines contraumana.

Ruto nega acusas de omiside, deporta, e persegue en la violentia cual ia segue la elejes de 2007 e cual ia mata sirca 1200 persones.

Se avocatos vole ce on abandona la caso par causa de un manca de atesta. Ruto es un de la politicistes la plu importante ci la CCI ia prosede.

La caso contra el es ja impedida par problemes diversa.

En febrero, judores a la CCI ia proibi la usa de atestas retirada, con resulta ce avocatos no ia pote usa declaras rejistrada a ante par atestores.

Alga atestores major en la caso ia cambia se declaras. Avocatos ia dise ce esta ia es causada par menasas e sobornas.

La avocatos de Ruto dise ce on debe remete el car tan multe atestores major de la lado prosedente ia sutrae o cambia se declaras orijinal.

Fatou Bensouda, un de la avocatos prosedente a la CCI, ia aseta ce la perde de atestores ia debili la caso contra la vispresidente, ma el ia razona ce on ave ancora atestas sufisinte per fa la prosede.

Un posible es ce la judores va desculpa Ruto de tota acusas. Un otra es ce los va solisita ce la prosedores ajusta la acusas. O los va rejeta la razonas de la defendores e permete ce la prosede continua.

En 2014, la prosedor ia abandona acusas simil contra la presidente cenian Uhuru Kenyatta, alegante ce on ia menasa atestores afin los cambia se declaras.

Aora, la futur de la caso pare depende de esce la avocatos prosedente ia demostra ce los ave atestas sufisinte per ecuilibra un proposa de "no caso esiste" par la avocatos de Ruto.

La usa de atestas presedente es definida par Regula 68 de la Trata de Roma, cual ia institui la Corte Criminal Internasional.

Ma la ecipo defendente de Ruto ia protesta ce esta es nonjusta, car on ia introdui cambias a la regula pos la comensa de la caso contra el e se coacusada, Joshua Sang, un jornaliste.

La judor presidente Piotr Hofmanski ia deside ce atestas rejistrada a ante es presentada sin permete ce la acusadas contrainteroga la atestores.

Sang, ci on acusa de usa se program de radio per organiza atacas pos la elejes political, ia dise ce acel deside es "un paso a nos libria".

Ruto e Kenyatta ia es a lados oposante de la elejes de 2007, ma ia formi un alia cual ia gania los de 2013.

2016-04-04

Un esposa de paradisos finansial

Un esposa enorme de documentos privata ia revela como persones rica e potiosa usa paradisos finansial per asconde se ricia.

Des-un milion documentos ia es esposada de un de la companias la plu secretosa de mundo, Mossack Fonseca, un compania de notarios en Panama. Los mostra como la compania ia aida se clientes a blanci mone e evita punis e impostas.

La organiza dise ce lo ia labora en modo noncriticable tra 40 anios e ce on ia acusa nunca lo de ativia criminal.

La datos en la documentos conteni lias a 72 xefes de stato corente o pasada, incluinte la ministro xef de Island, Sigmundur Gunnlaugson, ci ia ave un interesa nondeclarada liada a la mone de se sposa.

Los lumina ance como Mossack Fonseca ia ofre servis finansial desiniada per aida clientes comersial a asconde se ricia.

A un cliente, la milionor american Marianna Olszewski, la compania ia ofre articles falsa de posese per asconde mone de la autoriosas. Esta es un rompe direta de regulas internasional intendeda per preveni la lava de mone e la evita de impostas.

La datos conteni ance companias secreta liada a la familias e asosiores de Hosni Mubarak (la presidente pasada de Egipte), Muammar Gaddafi (la xef pasada de Libia), e Bashar al-Assad (la presidente de Suria).

Los revela ance un ronda suspetada de blanci biliones de dolares cual envolve asosiores prosima de presidente Putin de Rusia. La opera ia es manejeda par Bank Rossiya, cual debe segue regulas SUA e UE pos la oteni de Crim par Rusia.

Mone ia es canalida tra companias estra la pais, de cual du ia es ofisial poseseda par un de la amis la plu prosima de la presidente rusce.

La xeliste consertal Sergei Roldugin conose ja Vladimir Putin de pos cuando los ia es adolesentes, e es la padre de batiza de la fia Maria de la presidente.

Ofisial, Roldugin ia profita personal con sentos de miliones de dolares par acordas suspetosa. Ma documentos de se companias dise: "La compania es un scermo corporal xef instituida per proteje la identia e secretia de la posesor beneficada ultima de la compania."

La documentos esposada mostra ce Gunnlaugsson ia ave un interesa nondeclarada en la bancos salvada de Island. On ia acusa el de asconde miliones de dolares de investis en esta bancos, scermida par un compania secretosa estra la pais.

La esposa indica ce el e se sposa ia compra la compania Wintris en 2007. El no ia declara esta cuando el ia entra a parlamento en 2009. A oto menses plu tarda, el ia vende se dui de la compania a se sposa per $1.

Gunnlaugsson fronti aora clamas per se resinia. Ma el dise ce el ia rompe no regulas, e ce se sposa no ia benefica finansial par se desides.

Mossack Fonseca dise ce tal companias es disponable tra la mundo e es usada per multe intendes legal.

2016-04-03

Un avion colpa un auto en California

Un avion ia cade sur un autovia en California, colpante un auto e matante un de la pasajores, a un desenio e un dui pos cuando on ia atera lo sur esata la mesma via.

Sinco otra persones ia es ferida, incluinte la pilote e pasajor de la avion.

Atestores ia dise ce la avion ia pare esperia problemes tecnical ante cuando lo ia atenta atera.

En 2000, un posesor presedente ia susede un desende de la mesma avion Lancair IV sur esta autovia cuando se motor ia rompe.

Ma a esta ves, lo ia atera sur se ventre ante lisca contra un auto prosima, crasente Antoinette Isbelle, un fem de 38 anios de la site San Diego, ci ia senta sur la seja retro.

La polisia dise ce la gidor ia parci tempora la auto per pote usa se telefon.

La pilote ia es Dennis Hogge, un om de 62 anios. El e se pasajor ia es grave ferida.

Matt Nokes, un bascetbalor profesal pasada ci ia fa la desende en 2000, ia dise ce el conose la pilote, descrivente el como un bon om.

En la desenio pasada, tre otra aviones ia es obligada a desende sur la mesma estende de via.

2016-04-02

Un broma de april par Google fa ce on no rie

Google ia sutrae un boton de Gmail cual ia es intendeda como un broma de april. La boton ia envia un anima comica, ma alga persones ia encontra problemes con lo en se laboras profesal.

La boton ia apare a lado de la boton normal de envia, e ia permete ce on fini un conversa epostal par envia un imaje animada de un minion ci cade un microfon. Pos clica lo, on ia reseta no plu mesajes en acel conversa.

Un serie de cexas sur la boton ia apare en la foros de Google. La compania ia sutrae la boton e ia demanda per un pardona.

Lo ia ajunta ce usores ancora capas de vide la boton pote sutrae lo par reinisia la program Gmail.

La cade de microfon es un conseta de cultur poplal en cual un person fa un declara o refuta concluinte, ante lasa ce se microfon cade e pasea a via.

La boton no ia apare en la contas Gmail de clientes comersial.

"Con grasias a esta, me veni de perde me emplea," un usor ia comenta a la foros de Google. "Me es un scrivor e ia debe fini ante un limita de tempo. Me ia envia me articles a me empleor e ia reoia nunca de el. Sin intende, me ia envia la eposta par la boton de cade la microfon."

Un otra person ia cexa ce ja tra tre menses el fa intervisas per un posto en un compania, ma ia envia acaso un cade de microfon a la departe de emplea.

Un usor tre ia dise ce el ia envia "un eposta importante a 30 resetores".

Plu, par causa de un era en la codigo, en alga casos la imaje de la minion ia pote es enviada a la resetor an cuando on no ia clica la boton bromante.

Google ia informa usores sur la boton e se funsiona, par un mesaje en Gmail cuando lo ia apare prima.

Usores ci ia comuta la capasia de "desenvia" ia pote retira un mesaje en un periodo de tempo pos envia lo.

La compania ia publici ance alga videos bromante, incluinte un sur un servi nova de trae benes par paracade e un otra sur un elmo de "realia vera".

Google ia anunsia orijinal la crea de Gmail a 1 april 2004, e alora multe persones ia demanda a se esce lo va es desvelida como mera un broma de april.

2016-04-01

Un ponte colasa en Kolkata

En Barat, un ponte de trafica cual on construi en la site Kolkata ia colasa, matante a la min 20 persones e ferinte cuasi 100.

On teme ce alga persones es trapida su la ponte de beton e aser, cual ia cade sur un strada traficosa.

Imajes mostra abitores local ci usa se manos en aida la labora de salva.

Problemes de securia – per esemplo, un manca de esaminas e la usa de materias sunormal – ia afeta multe projetas de construi en la pais.

La asidente ia aveni en un area prosima a un de la visinerias la plu densa poplida de Kolkata, do botecas e casas es multe prosima a lunlotra sur stradetas streta.

La ponte ave du cilometres de longia, e on construi ja lo de 2009, no sasiante la limitas de tempo per completi lo.

La causa de la desastre no es clar, ma la compania construinte ia dise ce lo va coopera con investigores.

Un video de un camera vijilante pare mostra la momento cuando la strutur ia colasa, colpante pasores, ricxas, e construidas prosima.

On reporta ce persones ia abita casas tempora su la ponte.

La armada e ajenteria de desastres nasional ia junta se a la labora de salva, cual es impedida par la difisilia de prosimi ambulansias e otra veculos a la loca.

La ministro xef de Barat, Narendra Modi, ci fa un visita ofisial a la site capital de la SUA, ia tuita ce el es "xocada e tristida" par la colasa.