2014-10-31

La presidente de Burcina Faso va resta per ancora un anio

Pos un dia de protestas violente per esije la resinia de Blaise Compaoré, la presidente de Burcina Faso, el ia dise ce el va resta en potia per un anio su un governa traversante.

El va retira un lege controversa cual ta permete ce el aspira un periodo nova de ofisia a la fini de se periodo presente en 2015. El governa ja tra 27 anios.

A jovedi, protestores coler ia ensende la parlamento e alga construidas de governa. Los vole ce el resinia direta.

La crea de un governa traversante ia es anunsiada a jovedi par jeneral Honoré Traoré, la xef de la armada, ci ia declara ance la fini de parlamento.

Mohamed Ibn Chambas, la ambasador spesial per Africa ueste de Ban Ki-moon, la xef de la Nasiones Unida, va vade oji a Burcina Faso per atenta lejeri la crise.

En un mesaje difusada par tv local pos la declara par la jeneral, Compaoré ia bonveni la "atas patriota" de la militaria.

A la min un person ia es matada en la protestas en la capital, Ouagadougou. La gidor xef oposante, Zéphirin Diabré, ia dise ce desuples de protestores ia es matada tra la pais par la fortes de securia en "un aumenta barbar de violentia".

La militaria ia xuta baletas cargada per atenta sperde la protestores ci ia ocupa la parlamento. Protestores ia avansa ance contra la palasio presidental, e un elicotor governal ia xuta gas lacrimojen a los.

Desuples de soldatos ia junta se a la protesta en la plaza xef, incluinte un ministro pasada de defende, jeneral Kouamé Lougué. La protestores ia esije ce on instala el como presidente.

Los ia arde ance la ofisia de site, la casas de parlamentores, e un otel superior.

Protestas simil ia colpa ance Bobo-Dioulasso, un site sude-ueste, e otra vilas. La televisa nasional ia sesa difusa cuando la protestores ia saca se construida.

Compaoré, un soldato pasada, ia saisi la potia par colpa de stato en 1987, e ia gania cuatro elejes disputada a pos. El ia fronti avenis de violentia a alga veses, incluinte un rebela militar en 2011.

El ia susede sempre resta en potia par un combina de tecnicas pasinte e la usa moderada de fortia. Ma la tensas presente crese ja tra alga menses, e lo no es clar esce el pote survive a esta ves.

Compaoré es un aliada forte de la SUA e Frans, cual usa Burcina Faso como un base per operas militar contra islamistes combatosa en la area Sahel.

Ma la pais es entre la plu povres de Africa ueste, e lo es sin defende contra cambias en la custas mundal de coton, la funda economial de multe burcinabes.

Plu tarda en la dia: Compaoré ia resinia como presidente, recomendante un vota en la 90 dias veninte. Traoré ia emprende tempora la governa.

2014-10-30

Sistemes nova en la Egleseta Sistina

La Vatican ia desveli un sistem de lumina e frescadores cual pote conserva e esibi plu bon la frescos famosa de la Egleseta Sistina.

On previde ce la frescadores nova va redui la dana causada a la frescos par polvo, e par la respira, sua, e caldia de la ses milion persones ci visita en cada anio.

La atraes de la egleseta inclui un sofito par Michelangelo (1475–1564), cual pituri un Dio barbida ci dona vive a Adam.

La lumina nova par 7000 diodos de lus garda enerjia. Alga de los asentua la fondo oscur blu de un otra fresco par Michelangelo, La Judi Ultima.

Otra luses lumina frescos par artistes como Botticelli, Perugino, e Domenico Ghirlandaio, de cual se laboras en la Egleseta Sistina ia deveni ombrida par los de Michelangelo.

La sistem nova va usa min ca 20% de la enerjia de la sistem presedente, cual ia es instalada a 20 anios ante aora, cuando la egleseta ia reseta sola 1,5 milion visitores per anio.

La frescadores va move lenta la aira tra la salon vasta, per evita dana la frescos. La flue, umidia, e temperatur de la aira va es ajustada seguente datos de 70 sensadores en la mures, e ance de cameras tv cual monitori la cuantia de visitores.

On ia spende tre anios e 3 milion euros per instala la sistemes nova.

Michelangelo ia pinti se frescos en la Egleseta Sistina en la dui prima de la sentenio 16. On ia restora la plu resente los en un projeta de 14 anios, completida en 1994.

Antonio Paolucci, la dirijor de museos vatican, ia dise ce lo conveni bon ce on onora la aniversario 450 de la mori de Michelangelo con "alga cosa durante, no tempora".

2014-10-29

Furores ruba un banco barati par escava un tunel

La polisia en Barat norde xerca furores ci ia ruba un banco par escava un tunel de 40 metres, direta a la sala securida, en la media de la note.

La furores ia prende mone, joalas, e otra cosas con valua de sentos de miles de dolares, de un departe de la Banco Nasional Pandjabi en Haryana.

La tunel ia comensa en un casa vacua prosima.

Lo pare ce la furores ia es inspirada par Dhoom, un filma popular hindi cual mostra un ruba simil.

A matina de lundi, ofisiores de la banco governal en la vila Gohana ia es stonada en descovre la buco grande en la tera.

La polisia crede ce la fura ia aveni en la note de saturdi. La rubores ia vacui 77 de plu ca 350 caxas securida.

On ia asembla un ecipo spesial per investiga la fura, ma on ia fa ancora no arestas.

Ofisiores de banco ia dise ce la valua esata de la cosas furada ancora no es calculada.

Devender Malik, la manejor de la banco, ia comenta: "Lo pare ce la fura ia es esecutada pos un scemi atendosa par la rubores cual ia estende cisa tra alga dias."

2014-10-28

La divide entre la jeneros redui global

La Foro Economial Mundal ia dise ce asedes bonida per femes a politica e labora ia redui la divide global entre la jeneros en la 10 anios pasada.

Se sonda anial sur jenero ia confirma "cambias radisal" en multe paises. 105 paises ia deveni plu egal de pos 2005.

Island ocupa la loca prima en la lista per la anio ses en segue, e Iaman es en la loca la plu basa.

La sonda ia esplora fatores de economia, sania, instrui, e partisipa political en 142 paises.

Sola ses nasiones – Srilanca, Mali, Corvatsca, Macedonia, Urdun, e Tunis – ia vide un largi de se divide de jenero en la mesma periodo.

Un de la razonas per la susede de Island es se popla relativa peti. Iaman luta contra un frecuentia altida de mori e un cuantia altida de xicas entre ses e 14 anios ci no vade a scola.

Tota la paises scandinavian ia apare a la apico de la lista: Suomi, Noria, e Sveria ia segue Island en la sinco locas la plu alta.

Ruanda ia entra a la lista a la ves prima, arivante a la loca sete e tal deveninte la economia african la plu alta en la lista. Se susede refleta la fato ce cuasi tan multe femes como omes labora ala – e en la ofisias dirijal de la pais – e no par causa de asedes bonida a sania e instrui.

Nicaragua ia asende de numero des a numero ses de la plu bones per femes. La Pilipinas ia resta la pais la plu alta gradida de Asia, ma ia cade de numero sinco a numero nove.

2014-10-27

Orolojos rusce es retardada a la ves final

Rusia ia retarda se orolojos a la ves final, en adota permanente oras invernal.

Lo ia aumenta ance se cuantia de zonas de ora de nove a des-un, estendente de la Mar Pasifica asta la bordas de la Uni European.

Tra la tre anios pasada, la pais ia esperimenta con oras permanente estatal. Ma esta ia es estrema nonpopular con multe rusces.

La Uni Soviet ia introdui oras estatal en 1981.

En 2011, cuando Dmitry Medvedev ia es la presidente, el ia redui la cuantia de zonas de ora a nove, e ia deside ance manteni la oras estatal tra la anio intera.

Rusces ia avansa alora se orolojos par un ora, ma no ia retarda los en inverno.

Medvedev ia razona ce la cambias de ora disturba la bioritmos de persones e ce los ajita an boves. Ma multe persones en la norde de Rusia ia cexa sur se matinas plu oscur en inverno.

A un confere jornaliste en Moscva, representores de la Academia Rusce de Siensas ia dise ce Europa va es aora plu prosima, car la difere entre la capital e la Tempo Media de Greenwich va es mera tre oras.

Arkady Tishkov, la visdirijor de la Instituida Jeografial, ia dise ce el oposa la cambia la plu resente car el crede ce on ia esecuta lo mera per plase anunsiores de produidas, car plu de persones va televide pos la cambia.

Cuando Rusia ia ocupa Crim en marto, la oras en Crim ia es ajustada per conforma a los en Moscva.

2014-10-26

Brasileras eleje se presidente

Miliones de brasileras va vota oji per un presidente nova en lo cual on descrive como la eleje la plu prosima en la pais en alga desenios.

La presidente esistente, Dilma Rousseff, de la Partito de Laborores (sinistriste) fronti Aécio Neves de la Partito Brasilera de Democratia Sosial (sentriste) en la fase du de la vota.

Ambos aspirores ia promete reinisia la economia la plu grande de America Latina e fa ce lo deveni plu competosa.

La sondas la plu resente ia mostra Rousseff con un vantaje pico supra la aspiror oposante, favoreda par la 52% o 53% de la sondadas, contra 47% o 48% ci favore Neves. Ma esta sondas conteni un marjin de era de plu o min 2%.

Brasileras povre, spesial en la norde-este, resta fidosa a Rousseff con grasias a la programes de aida sosial de se partito.

El ia reseta ala se suporta la plu grande en la fase prima de la eleje, a 5 otobre, recoliente cuasi 60% de la votas.

Ma brasileras rica, ci oposa tal politicas economial interveninte como impostas alta e controlas de la custa de gasolina, favore Aécio Neves ci bonveni la comersia.

En la mercatos finansial, on regarda el como capas de refresci la economia, pos cuatro anios de crese minima cual, tecnical, ia pone la pais a un state retrosededa.

Plu ca 140 milion brasileras va vota oji, ma multe va depende de lo ci gania la votas de la clase media en la sude-este industrialida.

2014-10-25

Un fugu brasilera veneni du familias

En Brasil sude-este, des-un persones ia deveni sever malada pos come un fugu venenosa.

La grupo de visinas, incluinte cuatro enfantes, ia es ospitalida pos un era en prepara la pex, cual es un de la plu venenosas de mundo.

En minutos, tota la comores ia comensa vomita forte. Ma sinco ia parti ja de ospital.

Fugus es estrema matante. Los conteni un venena capas de causa un paralise sever.

La visinas ia encontra per come media a mercurdi en Duque de Caxias, un site a la costa sude-este de Brasil.

Los ia asembla a un de se casas, e ia sabe ce los va come un fugu.

Per evita un veneni, on debe prepara la bestia, de cual se venena es plu matosa ca sianido, en modo complicada.

Un dotor a la ospital ia clari ce un de visinas ia crede ce el sabe bon coce lo, ma ce el ia fa un era en la prosede.

La afetadas ia inclui sinco membros de du familias diferente - la familias de Souza e da Silva. Tre de la enfantes da Silva ia es entre la venenidas.

On ia desospitali sinco de la visinas a venerdi. Tre resta su cura intensa, e un de la enfantes es ancora en state grave.

Reportada, un otra adulte e un otra enfante es aora en state stable.

2014-10-24

Sveria sesa xerca un sumarina suspetada

La militaria svensce ia abandona se xerca per un sumarina suspetada en la mar a sude de la capital.

Barcones marinal e aviones ia xerca en la arcipelago de Stockholm tra la semana pasada, suspetante ce un sumarina rusce esperia problemes ala.

La departe de defende de Rusia ia nega ce cualce de se barcones es envolveda.

On ia reporta ce esta es la ativi militar la plu grande en Sveria de pos la Gera Fria.

La militaria ia declara: "Esta sinifia ce la majoria de barcones e fortes amfibin ia reveni a porto." Lo ia ajunta ce alga unias plu peti va resta en la area.

La declara no ia dise perce on ia cansela la xerca.

La militaria ia investiga "ativias stranjer su acua", fundida sur lo cual lo ia descrive como "alga operas credable".

Ofisiores svensce no ia nomi paises, ma multe persones ia suspeta la envolve de la marina rusce.

Oservas de sumarinas soviet ia causa avertis de securia en Sveria en la desenio de 1980.

La interveni militar de Rusia en Ucraina en esta anio ia provoca suspetas sur se intendes en relata a otra statos visina, spesial la balticas.

A martedi, OTAN ia dise ce se jetos ia intersepi un avion rusce de spia cual ia entra a la spasio airal de Esti per un tempo corta.

Rusia ia dise ce la avion ia fa un vola de instrui e no ia viole la spasio esti.

2014-10-23

Modi visita la glasia Siachen

Narendra Modi, la ministro xef de Barat, ia fa un visita corta a la glasia Siachen. El ia es en via a la parte barati de Caxmir per spende la festa Diwali en regarda la dana causada par inondas en setembre.

La glasia es reclamada e par Barat e par Pacistan, e es conoseda como la campo de batalia la plu alta de mundo.

Modi ia tuita ce el vade a Siachen per "pasa tempo con nos soldatos forte a esta dia spesial".

El es sola la ministro xef du, pos Manmohan Singh, ci ia visita la loca disputada. Singh ia visita la glasia en junio 2005, disente ce lo debe deveni "un monte de pas" entre la du paises.

Plu soldatos ia es matada par la clima sever de Siachen ca par combate. On ia posa ala soldatos asta 6700 metres supra la nivel de mar.

Soldatos barati ia saisi controla de la glasia, en Caxmir norde, en april 1984, vinsente apena Pacistan. Pos tre desenios, la du lados resta aora fisada en un state de nonprogresa.

Modi va viaja plu tarda a Caxmir, do inondas en la mense pasada ia mata 281 persones e ia lasa la site Srinagar su acua. Plu ca milion persones ia es deslocada. El ia descrive la deluvia como "un desastre nasional".

La inondas ia dana 180 mil casas. Multe persones abita ancora en campas de aida.

On previde ce Modi va esamina la sistem de aida, visita un campa per vitimes de la inondas, e anunsia un aida spesial per la afetadas.

Se visita aveni a Diwali, la plu grande de la festas indu, e on regarda lo como un jesto de unia e aida a la persones colpada par la inondas.

An si alga persones ia bonveni la visita, disente ce los espera ce Modi va anunsia plu aida per la stato, separadistes caxmiri ia recomenda un protesta contra la visita.

Los ci abita en la campas tende opina ce Modi debe furni plu aida a la afetadas. Un ia dise: "Nos comprende ce senior Modi sacrifia se festa per partisipa en nos lamenta. Ma esta no sufisi. El ta fa un servi grande si el ta serti la recapasi rapida de la descasidas."

2014-10-22

La SUA esplora esce la SI ia saisi armas intendeda per aida defendores

La departe de defende SUA ia dise ce lo esamina un video de Stato Islamiste cual pare mostra la violentes en controla de armas american intendeda per defendores curdi en Suria.

A lundi, la SUA ia cade 27 faxos con armas de calibre peti, munis, e otra armas per militias ci defende la vila Kobane contra la SI.

Un portavose per la SUA ia dise ce la majoria grande ia ateni se goles intendeda. Un declara plu tarda ia clari ce un faxo ia devia, ma on ia destrui lo per preveni ce la enemi reseta lo. Tota la otra faxos ia ariva secur.

Ma un video poneda a interede par un grupo jornaliste favorente la Stato Islamiste ia mostra un reserva de armas, parente cadeda par la SUA, en la manos de la violentes.

Fortes curdi controla la plu de la vila, ma la Stato Islamiste resta menasante.

Ativistes ia lansa un ataca ferose en Kobane a lundi, pos du dias de calmia relativa en cuando lo ia pare ce la defendores de la vila ia forsa los a via.

30 atacores SI e 11 defendores curdi ia es matada a martedi, ma la islamistes ajunta fortes nova.

Kobane, a la borda turces, es ja atacada par la SI tra alga semanas. La plu de se abitores ia es obligada a parti.

La combate nova ia aveni pos cuando Turcia ia dise ce lo va permete ce soldatos curdi iraci traversa a Suria per aida defende contra SI. An tal, un ofisial curdi local ia dise ce el no sabe cuando esta va aveni.

La avansa de SI en Suria aveni sur fondo de la gera interna. Atacas airal, gidada, par la SUA, aveni ala sin permete de presidente Bashar al-Assad, sur ci la Ueste desira ce el sede se potia.

En Irac, la atacas airal es suportada par la governa. Plu temprana en esta anio, la SI ala ia avansa a locas prosima a la capital, Baghdad. La SI menasa ancora la site, e ia ocupa la plu de Anbar, la provinse ueste, en semanas resente.

On crede ce un serie de bombis en Baghdad en la dias pasada, matante desuples de persones, ia es fada par la SI.

A martedi, a la min 12 persones ia es matada en un ataca duple par bomba de auto en la distrito Talibiya, xef xia, de Baghdad este.

2014-10-21

La xef de Total mori en avion en Moscva

Christophe de Margerie, la dirijor xef de Total, un compania franses de petrolio, ia mori en un xoca de avion en Moscva.

Se jeto companial ia colpa un scopineva e ia es engolida par flamas. Tota cuatro persones en la avion ia es matada.

Investigores rusce dise ce la gidor de la scopineva ia es enebriada.

De Margerie, ci ia ave 63 anios, ia deveni la dirijor xef de la compania tre de la plu grandes en Europa en 2007.

El ia junta se a Grupo Total pos gradua de la Scola Alta de Comersia en Paris en 1964. El ia spende se carera intera a la compania, do el ia reseta la nometa "Mustax Grande".

Jornales rusce reporta ce el ia encontra Dmitry Medvedev, la ministro xef de Rusia, a se casa en la campania prosima a Moscva per discute investis stranjer en Rusia.

Total es un juor importante en la mercato rusce de enerjia, e de Margerie ia es un defendor forte de manteni relatas, an entre punis ueste contra Moscva sur se atas en Ucraina.

La compania es un de la investores stranjer la plu grande en Rusia, e intende dupli se esflue de la pais ante 2020. Lo labora sur la projeta Yamal per estrae gas natural en Siberia norde-ueste.

En se tempo a la timon de Total, de Margerie ia susede defende la compania contra alegas de froda en relata a la program de la Nasiones Unida de intercambia petrolio per comedas en Irac.

2014-10-20

Du ministros fema resinia en Japan

Midori Matsushima, la ministro de justia de Japan, ia resinia, a oras pos la resinia de Yuko Obuchi, la ministro de comersia e industria.

La partito oposante ia acusa ce Matsushima ia viole leges de vota par malusa mone de se grupos de suporta political.

La resinia de du femes es un problem grande per la ministro xef, Shinzo Abe, ci vole ce plu femes opera a la nivel la plu alta de governa.

Abe ia dise ce el aseta ce el ia asinia la postos a ambos femes, e ce ministros sustitua va es nomida pos un dia. Ambos es membros de la Partito Democrata Liberal.

Obuchi ia es un de sinco femes ci Abe ia eleje a se consilio en setembre. Alga persones ia regarda el como un ministro xef futur.

Ma en la semana pasada, alegas ia apare ce se empleadas ia malusa miles de dolares de reservas de campania political.

Obuchi no ia confesa ce el ia fa mal a grado personal, ma a un confere jornaliste televisada oji, el ia dise ce el resinia car "nos no pote permete la stania de la politica sur economia e enerjia … par causa de me problemes".

A oras plu tarda, Abe ia anunsia la resinia ance de Matsushima. El ia distribui ventadores de paper cual ia mostra se pitur e se politicas a un carnaval en se distrito de vota.

La partito oposante ia acusa el de crimin a venerdi, esijente se resinia, e disente ce esta viole la regulas sur la usa de mone political.

En la periodo prima de Abe mesma como ministro xef en 2006 e 2007, un otra serie de scandales entre se ministros ia causa final se resinia propre, per razonas de sania, pos mera un anio en la posto.

2014-10-19

Pluvones en Nicaragua e un siclon en Bermuda

En Nicaragua, 22 persones ia mori en alga dias de pluve forte.

Nove de los ia es matada en la capital, Managua, cuando un mur ia colasa en un pluvon deluviante.

En otra areas de la site, ecipos de crise ia aida la sorti de familias de areas cual risca liscas de tera. Los va junta se a miles de otras casida en refujas tempora par causa de pluvones ja de setembre.

Multe de la comunias plu povre en Nicaragua no gusta la locas a do la governa prende los, car estas es comun tro distante de sentros urban e de se locas de labora. La sortidas tende reveni a se casas.

Plu ca 30 mil persones es afetada par la pluves en Nicaragua. Salvador, Onduras, e Guatemala sufri ance.

En la entretempo, en Bermuda, un colpa direta par un siclon nomida Gonzalo ia dana construidas e tira cordas eletrical a tera.

An si la tempesta sur la isola ia es la plu forte de des anios, on ia reporta sola feris minor. Esta ia es la tempesta du sur la isola en un semana.

Plu ca 30 mil casas ia esperia un rompe de eletrica, ma on ia restora la furni a du tris de los ja a posmedia de saturdi.

La siclon ia inonda ance, e ia cade arbores.

2014-10-18

Nijeria acorda un sesafusili con Boko Haram

La militaria de Nijeria dise ce lo ia acorda un sesafusili con Boko Haram, un grupo de islamistes combatosa, e ce la grupo va libri la xicas cual lo ia saisi.

La sesafusili ia es anunsiada par Alex Badeh, la ofisior militar la plu alta de Nijeria. Boko Haram no ia fa un declara publica.

La grupo rebela ja de pos 2009, matante sirca 2000 siviles en esta anio.

Boko Haram ia coleri la mundo a ses menses ante aora cuando lo ia saisi plu ca 200 xicas de scola como ostajes.

Los ia es prendeda en Chibok, un vila norde-este en la stato Borno. Se prisonia continuante ia provoca criticas de la laboras par la governa nijerian per libri los.

Como parte de la negosias, un delega de la governa ia encontra representores de Boko Haram a du veses.

On va fini organiza la libri de la ostajes a un plu consenta en Ndjamena, la capital de Txad, en la semana veninte.

On crede ce la grupo ia move los a la foresta vasta Sambisa, cual sta longo la borda entre Nijeria e Camerun.

2014-10-17

La NU suplica mone per combate Ebola

Ban Ki-moon ia inisia un suplica nova per mone per aida combate la virus Ebola, car un otra colie de reservas no ia ateni se gol.

La secretor jeneral de la NU ia dise ce un reserva fidusial cual el ia inisia en setembre ia reseta sola $100 mil asta aora.

Un coro cresente de gidores mundal critica aora la reata global per combate la virus. La maladia ia mata ja 4500 persones, xef en Liberia, Gine, e Siera Leon.

Donores ia furni cuasi $400 milion direta a otra departes de la NU e otra organizas de aida, ma la fidusial, intendeda per servi como un reserva de spende variosa, ia reseta prometes de sola $20 milion.

De acel paises cual ia promete mone a lo, sola Colombia ia paia, donante $100 mil.

Ban ia dise ce la momento es aora bon ce la paises "ci ave vera la capasia" ta furni suporta finansial e lojistical.

Comentas simil ia veni en dias resente ance de Barack Obama, la presidente de la SUA, de David Cameron, la ministro xef de la Rena Unida, e de Jim Yong Kim, la presidente de la Banco Mundal.

Kofi Annan, la secretor jeneral presedente de la NU ia descrive se como "amarga deludeda" par la responde de la comunia internasional.

"Si la crise ia colpa alga otra area, probable on ia ta maneja lo en modo multe diferente," el ia dise. "Cuando on regarda la evolui de la crise, la comunia internasional ia velia vera cuando la maladia ia ateni America e Europa."

La Organiza de Sania Mundal ia dise ce lo aselera se laboras per preveni la estende de Ebola ultra la tre paises la plu colpada.

On foca la aida a 15 paises african, e spesial a la cuatro cual bordi direta la areas afetada – Costa Ivor, Gine-Bisau, Mali, e Senegal.

En la entretempo, Obama ia aproba la envia de soldatos reservada SUA a Africa ueste si nesesada. Los ta junta se a la 4000 soldatos SUA ja enviada a la area.

Se conselores major sur sania ia es sever criticada pos la infeta de du ospitalores en Texas par un pasiente ci ia mori con la virus a pos.

On crede aora ce un de la ospitalores ia es cisa malada e ja comunicante la maladia tra cuatro dias, en cual el ia vola en du aviones, ante deveni diagnoseda.

2014-10-16

On xerca trepores mancante pos nevon en Nepal

En Nepal, ecipos de salva xerca a la min 70 persones mancante longo la vias de pasea en Himalaia, pos un venton de neva sur la Curso Annapurna. Nove corpos ia es trovada a mercurdi.

On teme ce la cuantia final de mores va es multe plu alta. Multe paseores resta ultra contata.

Esta es un de la climas la plu matante cual la area ia esperia. On crede ce la pluves e nevones sever ia es causada par Siclon Hudhud en Barat.

La mal clima ia colpa un loca de reposa a 4500 metres supra la nivel de mar, no multe su la punto la plu alta de la curso, la colo Thorung La.

La mores inclui trepores nepali, israeli e polsce, ma reportas no acorda sur la cuantia esata.

Ofisiores indica ce la saison presente es popular per paseores, e donce lo es probable ce multe trepores ia es sur la colos de la montes.

Cuatro canadianes e un barati es entre los ci on ia reporta como mancante.

A mercurdi, du elicotores militar ia es enviada de Kathmandu, la capital, per aida la opera de salva, e nove persones ia es salvada en la note.

Un survivor ia descrive la xoca de vide corpos mor en la viaja de reveni pos la tempesta.

En april, un avalanxa sur Sagarmata/Everest ia mata 16 xerpas e ia redui grande la cuantia de misiones a la monte la plu alta de mundo.

La apicos de Nepal atrae alga de la trepores la plu esperiosa. Ma paseas en la montanias nepali es jeneral secur, atraente cuantias vasta de persones comun.

2014-10-15

On abandona un max serbsce-albanian pos scaramuxas political

Un max de futbal entre Serbia e Albania ia es abandonada cuando un avion sin pilote, portante un mesaje political, ia provoca scaramuxas de juores e fanes.

La max per entra a Euro 2016 ia es sesada en se minuto 41, egal a zero puntos.

La disturba ia comensa cuando un bandera e mesaje albanian ia vola supra la campo e ia es caturada par un juor serbsce.

Juores albanian ia atenta prende lo, e alora alga fanes ia invade la campo.

La arbitror ia gida la juores de sur la campo. Pos un pausa de sirca 30 minutos, UEFA ia confirma ce on ia abandona la max.

Fanes albanian ia es ja proibida de es presente a la max entre la du nasiones balcan oposante.

Serbia e Albania ave un istoria de relatas turbosa, spesial consernante Cosovo, un provinse pasada serbsce cual ia declara se autonomia en 2008.

La SUA e paises major de la Uni European reconose Cosovo como un stato, ma Serbia (e la plu de serbsces etnical en Cosovo) refusa lo.

Un delegada de UEFA ia comenta: "Esta es un situa regretable sur cual nos va reporta – la arbitror, me, e la conselor de securia. La situa ia es tal ce nos no ia pote continua la max."

On ia reporta la aresta de Olsi Rama, la frate de la ministro xef de Albania, en la parte de la stadion reservada per persones importante, per inisia la situa, ma esta es ancora no confirmada.

2014-10-14

Un consilio vatican proposa revisa se disposa a omosesalia

Eglesores major ci partisipa en un revisa de instruis catolica sur la familia ia recomenda ce la eglesa adota un disposa plu positiva a omosesalia.

Un reporta inisial, scriveda par bispos en un consilio vatican, ia dise ce omosesales ave "capasias e cualias per ofre".

La reporta no defia la oposa longa de la eglesa contra sposia omosesal, ma alga grupos de diretos ge ia bonveni lo como un avansa grande.

Ma grupos tradisional ia rejeta la reporta. Un ia descrive lo como "un tradi", e "un de la documentos la plu mal de istoria de la eglesa".

Plu ca 200 bispos partisipa en la consilio, cual ia comensa a 5 otobre. Pape Fransisco ia asembla lo per debate tal temas controversa como aborta, contraconsepi, omosesalia, e divorsa.

La reporta de lundi, publicida a media de la consilio de du semanas, ia dise: "Omosesales ave capasias e cualias per ofre a la comunia cristian. Esce nos es capas de bonveni esta persones, garantiante a los un spasio fratin en nos comunias?"

La documento ajunta: "Sin nega la problemes moral liada a unis omosesal, on debe nota ce casos esiste en cual la aida mutua, a grado de sacrifia, formi un suporta valuosa en la vive de la duple."

En la anio pasada, un sonda inisiada par la pape ia sujesta ce la majoria de catolicas rejeta la instruis eglesal sur temas como seso e contraconsepi.

2014-10-13

Un ferovia reabri en Srilanca

En Srilanca, la Rea de Jaffna, un ferovia popular, va reabri oji. Lo lia la capital, Colombo, a Jaffna en la norde de la pais.

Presidente Mahinda Rajapaksa va inaugura la ferovia renovida, cual ia clui a 24 anios ante aora par causa de la gera interna de Srilanca.

Lo ia furni un lia multe importante entre norde e sude, transportante benes e persones tra la pais.

Multe persones regarda la reabri como un simbol positiva de Srilanca pos gera.

La tren va ofre un esperia nova a la jovenes de Jaffna, de ci multe ia vide nunca un tren.

Tra desenios, tamiles ia usa la servi per viaja de un fini de la isola a la otra, navetinte entre se viletas de abita en la norde e se empleas en la sude.

En la gera interna, soldatos governal ia usa la servi per asede la norde. La trenes ia deveni un blanco per ataca cuando los ia pasa tra areas controlada par la rebelores Tigres Tamil.

La gera ia comensa en 1983 e ia mata plu ca 70 mil persones.

Lo ia fini en maio 2009, cuando soldatos de la governa ia recatura la teritorios ultima cual ia rebelores ia saisi.

2014-10-12

Un siclon sever bate la costa este de Barat

La bandas esterna de Siclon Hudhud colpa la costa este de Barat, causante danas estendosa e provocante ce 300 mil persones sorti de la area.

La siclon porta ventas de asta 195 cilometres per ora, e es categorida como "multe sever".

Lo ia desradisi ja sentos de arbores e ia tira cordas eletrical a tera en la statos Andhra Pradesh e Orissa.

Du persones es ja matada en Andhra Pradesh, la un per un arbor e la otra par un mur cadente.

On teme ce un ondon de asta du metres de altia pote inonda areas basa, e donce sentos de sentros aidante ia abri en la du statos.

On ia recategori la fortia de la siclon de pos venerdi, e la marina barati e otra ecipos es preparada per aida.

Un siclon simil en 1999 ia mata plu ca 10 mil persones en Orissa, e en otobre de la anio pasada, cisa 500 mil persones ia debe sorti de esta du statos cuando un siclon sever ia pasa a tra.

La costa este de Barat, como ance Bangladex, es costumal colpada par tempestas siclonal entre april e novembre. Los causa comun moris e danas vasta a imobilas.

2014-10-11

Airoportos SUA vijila contra la virus Ebola

La airoporto JFK en New York comensa probas medical per atenta para la aveni de Ebola cual ia mata plu ca 4000 persones.

Pasajores de la paises la plu forte afetada va debe responde a un serie de demandas e permete ce on mesura se temperatures.

Probas simil a cuatro otra airoportos major en la SUA va comensa en la dias veninte.

Esta segue la mori prima de algun par la virus en Texas a mercurdi.

On va dona a viajores pajes informante sur la sintomes de Ebola, instruinte ce on debe vide un dotor si on deveni malada en tre semanas.

90% de viajores ci ariva en la SUA par avion veni a JFK o un de la cuatro otra airoportos. A cada dia, asta 160 persones entra de la tre paises la plu afetada.

La statistica la plu resente de la Organiza de Sania Mundal indica ce la cuantia de moris atribuable a la febre emorajal ia ateni 4033. Tota de estas, estra 9, ia aveni en Liberia, Siera Leon, e Gine, nasiones de Africa ueste.

La governa magribi ia demanda ce on pospone la torneo de futbal Copa de Africa de Nasiones de la anio veninte, par causa de la virus.

On ia pospone ja la elejes de senatores en Liberia a la semana veninte, per redui la risca ce votores va sperde la virus.

A la ves prima, la crise ia ativi  la Constitui Internasinal sur Desastres Spasial o Major. En se rol normal, lo furni imajes de satelite per crea mapas de dana e peril.

Per controla esce la sistemes de New York es sufisinte preparada, persones ci finje la sintomes de la virus – nomida "pasientes simulada" – ia presenta se a ospitales.

2014-10-10

Kim Jong-un es publica asente tra plu ca un mense

Kim Jong-un, la gidor de Corea Norde, no ia es presente a un rituo importante de aniversario political.

En venerdi, se nom no ia apare en un lista de los ci ia visita Palasio Kumsusan, la mausoleo de la du gidores Kim Il-sung e Kim Jong-il, per selebra la aniversario 69 de la Partito de Laborores.

Nun ia vide Kim en publica de pos 3 setembre. Esta es se asentia la plu longa pos la comensa de se rena en 2011.

El ia pasa 21 dias sin es publica videda en marte 2012, e 24 dias en junio de la mesma anio. En janero 2013 el ia es asente tra 18 dias.

En setembre, la televisa nasional ia dise ce el ave "un state fisical noncomfortosa", e ia mostra el con coxea.

Corea Sude ia comenta ce lo crede ce Kim resta en controla de la stato comuniste, ma se asentia provoca divinas sur se sania e se capasia de governa.

Jornalistes de Corea Sude sujesta ce el sufri de la artrite inflamante nomida gota. El ave 31 anios e es tro pesosa.

Apares de la visgidor Hwang Pyong-so, e ance alegas resente de un ofisior pasada de Corea Norde, ia provoca sujestas ce cisa on ia despone Kim de se posto.

Hwang ia gida un delega de ofisiores de Corea Norde a Seul per la rituo cluinte de la Juas Asian, en un visita regardada como un momento rara per discutes alta entre la Norde e la Sude.

On pote confirma no parte de la divinas.

2014-10-09

Mexico protesta contra la desapare de studiantes

En sites tra Mexico, miles de persones ia fa protestas contra la desapare de studiantes en Iguala, un vila sude, en setembre.

La studiantes ia scaramuxa con polisiores en se protesta propre, e on no ia vide los pos cuando los ia es prendeda a via en autos de polisia.

Sentos de patruliores estralegal ia junta se a la xerca, disente ce los va xerca en cada casa.

En la entretempo, on fa probas siensal a desuples de corpos trovada en tombas nonprofonda, prosima a la vila en la semana pasada. On teme ce la corpos es de la studiantes.

En la Site Mexico, membros de la familias ia gida un prosegue, portante fotografis de la mancantes. Protestas ia aveni ance en multe otra sites, incluinte un marxa silente par la Zapatistas, un grupo rebelante nativa.

La desapare e la situa ambiente ia causa un xoca en la pais.

La studiantes, de un scola de enseniores en Ayotzinapa en la stato Guerrero, ia viaja a la vila prosima Iguala per protesta contra lo cual los ia persepi como metodos prejudosa de lua enseniores.

Pos un dia de protestas, los ia vole revade a se scola. Membros de la uni de studiantes dise ce los ia embarca tre buses local, ma la polisia dise ce la studiantes ia saisi la buses.

En la oras seguente, ses persones ia mori cuando omes enarmada ia fusili contra la tre buses e la bus de un ecipo de futbal. Tre studiantes, un futbalor, la gidor de un de la buses, e un fem en un taxi ia es matada par la xutas. Multe plu ia es ferida.

La polisia munisipal ia xasa la studiantes, e on crede ce los ia fusili contra los. On ia teni dudes-du ofisiores en relata a esta.

Pos esta avenis a la note de 26 setembre, on ia reporta ce 57 studiantes manca. A 30 setembre, on ia anunsia ce 13 de los ia reveni. On ia trova ce un nom apare en la lista a du veses, donce 43 studiantes resta ancora mancante.

A 4 otobre, avocatos prosedente ia anunsia la descovre de ses tombas basa cual conteni la restas de 28 persones, cisa plu. La corpos es tan ardeda ce on ancora no ia pote identifia los.

La scola de la studiantes ave un istoria de ativia sinistriste, ma on no sabe esce la studiantes ia es atacada per se credes political.

Alga pensa ce los ia coleri un gang local de drogas par refusa paia mone de estorse.

Otras suspeta ce los ia es atacada par teme ce los pote disturba un parla a ofisiores major local par María de los Ángeles Pineda Villa, la sposa de la maior de Iguala.

On no ia vide el e se sposo, José Luis Abarca Velázquez, de pos 26 setembre. La polisia xerca los.

2014-10-08

La automata prima de banco abri en Somalia

On ia instala la automata prima de banco en Somalia en la capital, Mogadishu.

Alga persones ia pare confusada sur lo, car los ia usa nunca un tal automata.

La macina ia es poneda par Banco Salaam Somali en un otel superior, e lo permete ce clientes retira dolares SUA.

La campo bancal en Somalia es multe nondevelopada, impedida par plu ca du desenios de gera entre clanes e grupos relijial combatosa. Multe persones depende de envias de mone de estra la pais.

La unia ofisial de mone en la pais, la xiling, es cuasi sin valua, donce multe comersiores e stranjeres usa dolares en loca.

La automata nova permete ce on retira mone de se conta internasional de banco, usante tal cartas como Visa, MasterCard, e American Express.

Un portavose ia clari ce on pote retira sola dolares SUA. "Cisa nos va ajunta otra mones internasional en la futur. Persones de la popla sperdeda e stranjeres ia bonveni zelosa la idea. Nos intende instala plu automatas de banco en Mogadishu."

Un visitor stranjer, stante en la filo ante la automata, ia descrive la instala como "un avansa grande" per Somalia. "Me abita ja plu longa en Mogadishu ca me ia intende orijinal, donce me ia consuma me mone fisical. Me ia es stonada par me bon fortuna cuando on ia informa me sur la automata nova."

2014-10-07

Miama libri 3000 prisonidas per pas e stablia

La governa de Miama ia anunsia ce lo libri plu ca 3000 prisonidas.

Un mesaje a la paje de Facebook de Ye Htut, la ministro de informa, ia dise ce presidente Thein Sein ia pardona los per pas e stablia.

On crede ce alga de la prisonidas es ofisiores pasada de securia militar. Ma la plu de los ia es condenada per crimines minor.

La plu de prisonidas political en Miama (ance conoseda como Burma) ia es ja librida como parte de la prosede de reformi.

Grupos de diretos umana estima ce on teni ancora alga sentos.

Thein Sein ia promete libri tota prisonidas political. El ia deveni presidente en 2010 en un eleje cual ia causa la sustitui de un governa nonmilitar (ma militar suportada) per la rena militar pasada.

En anios resente, Miama ia destensa ance se restrinjes a jornalistes, e partitos oposante ia rejunta se a la prosede political. En responde, la comunia internasional ia reposa la plu de se punis contra la pais.

An tal, ativistes per diretos umana ia insiste ce on debe libri cada prisonida political. On no sabe esata cuanto tal persones resta en prison.

2014-10-06

La eleje presidental de Brasil no es desideda

Dilma Rousseff, la presidente presente de Brasil, ia gania la plu votas en la eleje presidental de la pais, sin susede vinse completa.

El ia reseta sirca 42% de la votas, e debe partisipa en un eleje du contra Aécio Neves, se oposor media destriste, ci ia gania 34%.

Analistes previde ce la eleje du, a 26 otobre, va es de marjin minima.

Rousseff ia dise ce la popla ia espresa se rejeta de "la fantasmas de la pasada: retrosede e nonemplea", e ia promete continua labora per cambia.

"Me ia comprende clar la mesaje de la stradas e de la caxas de vota," el ia dise. "La majoria de brasileras vole ce nos rapidi la Brasil cual nos construi."

Marina Silva, la aspiror de la partitio sosialiste e un ambientiste importante, ia surprende par fini en loca tre con 21%, e no va partisipa plu en la eleje.

Neves, un governor pasada de la stato Minas Gerais, ia recomenda ce la suportores de Silva move se suporta a el, disente ce el representa "espera per cambia".

Silva ia dise ce el e otra gidores sosialiste va consenta en la dias veninte per discute cualce tal cosas. "Brasil ia siniali clar ce lo no desira la state presente," el ia dise.

Plu ca 142 milion persones ia ave la potia de vota a soldi, e 80% de los ia usa lo. Los de entre 18 e 70 anios debe vota.

Brasileras ia eleje ance congresores e governores areal a la mesma tempo.

2014-10-05

Duvalier, renor malfamosa de Aiti, mori

Jean-Claude Duvalier, la renor pasada de Aiti, ia mori de un ataca de cor en Port-au-Prince a la eda de 63.

En 1971, el ia ave mera 19 anios cuando el ia erita la titulo "presidente de vive intera" de se padre, la malfamosa François Duvalier.

On ia acusa el de froda, maltratas de diretos umana, e represa en se rena, cual ia fini en un revolta en 1986.

Pos anios de esclui en Frans, el ia revade a Aiti en 2011.

Se mori ia es anunsiada par la ministro aitian de sania, e se avocato ia confirma ce el ia mori a casa a saturdi.

A la tempo de se inaugura, Duvalier ia es la presidente la plu joven de mundo.

Prima, lo ia pare ce el va move a via de la stilo sever de governa de se padre, cual ia es suportada par la polisia secreta de Aiti, la Tontons Macoutes.

El ia prosimi plu a la SUA, de cual se padre ia stranjeri se. Comersias SUA ia entra a Aiti, e el ia permete un libria limitada de jornalisme.

Ma Duvalier ia vive lusosa. Se sposi en 1980, finansiada par la pais, ia custa sinco milion dolares en cuando la plu de aitianes ia sufri la povria la plu mal de la emisfera ueste.

On alega plu ce miles de prisonidas political ia es torturada o matada su se governa.

Cuando el ia revade a Aiti, en la anio pos cuando la pais ia es ruinada par un trematera major, el ia descrive se reveni como un jesto de unia a la nasion.

Ma on ia aresta e acusa el. An si on ia libri el a pos, el ia apare final en corte en febrero de la anio pasada, do, ante alga de se vitimes alegada, el ia nega se culpablia per maltratas fada en se tempo como presidente.

2014-10-04

Un bebe nase de un utero transplantada

A la ves prima de mundo, un fem ia pari un bebe de un utero transplantada.

La madre, ci ave 36 anios e ia nase sin utero, ia reseta un utero donada de un ami.

La xico bebe ia es prematur naseda en Sveria en setembre, con pesa de 1,8 cilogrames. La padre ia descrive se fio como "stonante".

Femes pote es ance lasada sin utero funsionante pos trata de canser. Ante aora, los ci ia desira un enfante propre ia debe usa un madre sustitua.

On no ia publici la identia de la madre e padre en Sveria, ma on sabe ce la madre ia ave ovarios ancora funsionante.

La duple ia usa la tecnica de fertili en vitro per produi 11 embrios, cual on ia jela. Dotores a la Universia de Göteborg ia transplanta alora la utero.

La donor ia ave 61 anios. El ia es un ami de la familia, ci ia esperia la menopausa a sete anios plu temprana.

La dotores ia nesesa usa drogas per supresa la sistem de imunia, afin la corpo de la fem no rejeta la utero.

A un anio pos la transplanta, la dotores ia deside ce los pote implanta un de la embrios jelada, e un ensintia ia segue.

La bebe ia es naseda pos cuasi 32 semanas de ensintia, cuando la madre ia developa preeclampsia, e la bates de cor de la bebe ia adota un rapidia nonormal.

Ambos la bebe e la mama vade aora bon.

2014-10-03

Australia aproba atacas contra la Stato Islamiste

La governa australian ia aproba ce se jetos de combate junta se a la ativia militar, gidada par la SUA, contra blancos de la Stato Islamiste en Irac.

Tony Abbott, la ministro xef, ia dise ce la Stato Islamiste es "un culto de mata" cual ia "declara gera contra la mundo" e cual on debe para.

Lo controla aora un teritorio grande en un estende sin frontera de Suria e Irac.

La SUA e se aliadas arabi ia bombi blancos de la Stato Islamiste en acel du paises tra la du semanas pasada. Paises european ia ataca sola locas iraci.

Ier, la parlamento turces ia suporta un proposa cual permete ce se soldatos entra a Irac e Suria per junta se a la campania.

Soldatos de la Stato Islamiste ia avansa resente a prosima a la frontera con Turcia, provocante ce miles de refujadas curdi traversa la frontera. Turcia ospita ja plu ca milion refujadas suri.

La Nasiones Unida dise ce la islamistes combatosa ia fa "un cuantia stonante" de maltratas de diretos umana.

Abbott ia dise ce on no projeta ce la partisipa australian va estende a Suria, e ance no ce soldatos va deveni envolveda en combate sur tera.

Australia ia envia ja 400 membros de se forte de aira, 200 membros de se forte spesial, e ses aviones de gera a un base SUA en la Amirias Arabi Unida.

La deside de partisipa en la ativia militar – per cual la governa no ia nesesa un aproba parlamental – ia aveni entre consernas cresente sur la cuantia de australianes liada a la Stato Islamiste.

La governa crede ce 60 australianes, cisa plu, batalia con grupos teroriste en Asia sude-ueste, e ce a la min 100 en Australia mesma suporta ativa los.

En setembre, la polisia ia invade alga casas en Sydney, seguente reportas ce estremistes islamiste projeta matas acaso en la pais. Pos esta invades, usante 800 ofisiores forte enarmada, on ia aresta 15 persones.

2014-10-02

Sinco sieraleonianes es infetada con ebola en cada ora

Un asosia carital major ia avisa ce esijes per aida medical en Siera Leon suprapasa multe la capasia de furni lo, car on descovre aora sinco casos nova de ebola en cada ora.

Salva la Enfantes ia dise ce, en la semana pasada, 765 casos nova ia es reportada en la pais, cual ave sola 327 litos de ospital.

Espertas e politicistes va consenta en London per debate un responde global a la crise.

La aveni presente de la virus en Africa ueste es la plu mal de istoria de mundo. Lo ia mata 3338 persones asta aora, e on ia confirma 7178 casos. Siera Leon, Liberia, e Gine sufri la plu.

La asosia carital dise ce Ebola estende tra Siera Leon a "un rapidia asustante". La cuantia de casos nova dupli en cada pico de semanas.

An cuando organizas medical susede maneja la virus en un area, lo ia estende ja a un otra.

La asosia cexa ance ce la grado de la maladia es ance "enorme nonreportada", car "cuantias noncontable de enfantes mori anonim a casa o en la stradas".

Plu temprana en esta mense, Britan ia promete construi complesos per 700 litos nova en Siera Leon. Ma an la prima de estas no va es preparada asta pos alga semanas, e la construi de la otras va ocupa alga menses.

Salva la Enfantes ia dise ce, si la comunia internasional no ta aumenta forte se responde, persones ta continua mori a casa e risca infeta se familia e otra persones prosima abitante.

Ier, la Organiza Mundal de Sania ia anunsia ce probas de du vasines esperimental progresa en la SUA e la Rena Unida, e ce esta probas va continua a des locas en Africa, Europa, e America Norde en la semanas veninte.

Lo previde ce on va comensa usa la vasines, a la min a un grado peti, en Africa ueste en la parte temprana de 2015.

2014-10-01

Noria es la loca la plu bon per senese

Noria es la loca la plu bon per senese, si on crede un indise de la cualia de vive vea en 96 paises.

Publicida a la Dia Internasional NU de Persones Plu Vea, lo mesura la bonstate sosial e economial de persones con plu ca 60 anios.

Lo gradi alta Australia, Europa ueste e America Norde, e pone Afganistan a la grado la plu basa. Sveria apare direta pos Noria en la lista, e Suiz, Canada, e Deutxland segue.

Lo predise ce, en 2050, 21% de la popla de la mundo va ave plu ca 60 anios, e ce 40 paises en la lista va ave poplas en cual 30% de persones ave un tal eda.

La indise mesura cuatro cualias – securia de revenu, sania, capasia personal, e esce on abita en un "ambiente capasinte".

Alga paises de America latina, spesial Mexico e Peru, ia asende rapida la lista par causa de se promete de serti "pensiones sosial" a la persones vea la plu povre.

Esta pensiones es noncontribuida, ma finansiada par impostas, e los garantia un revenu fundal per la plu povres. En Mexico, cuasi 90% de persones con 65 anios o plu reseta un tal pension.

Par esta causa, Mexico apare a numero 30 en la lista, suprapasante Brasil, Rusia, Barat, Xina, e Sudafrica.

Peru ia reali un program nomida "Pension 65", cual dona 250 soles nova ($86) a veas a cada duple de menses.