2014-04-30

La preparas per la Olimpiales de Rio no vade bon

John Coates, la vispresidente de la Comite Internasional Olimpial, ia dise ce la preparas per la juas en Rio en 2016 es la plu males de istoria.

La australian, ci ia aida organiza la Olimpiales de 2000 en Sydney, ia clari ce la CIO ia reata sin presedente par ajunta espertas a la comite local organizante, per serti ce la juas va aveni.

La novas veni en cuando Brasil luta ance per prepara se per la Copa Mundal de futbal, cual va comensa pos no plu ca ses semanas.

Coates ia comenta ce, en se opina, la situa es plu mal ca en 2004, cuando on ia es ansiosa sur preparas per la juas en Atinai. Ala, la laboras ia es colpada par retardas en construi e en furni de servis, ma on ia susede ultima completi tota locas e infrastrutur a la tempo coreta.

La vispresidente ia dise ce on no ia comensa an construi alga de la locas de sporte en Rio. La infrastrutur esperia retardas major, e la site ave "problemes sosial cual on debe fronti".

El ia ajunta ce la organizores de Rio ave 600 empleadas, la mesma cuantia como London a esta grado de se preparas per la Olimpiales de 2012. Ma la organizores no ave la esperias nesesada.

Entre la paises de America Sude, Rio va es la ospitor prima de la Olimpiales.

2014-04-29

Un diplomata deutx es ferida en un saisi atentada en Iaman

Un diplomata deutx ia es ferida en un atenta suspetada de saisi el en Sanaa, la capital de Iaman.

Fusilores ia atenta obliga la veculo portante la diplomata e un colaboror a para en Hadda, un distrito sude cual conteni multe ambasadas. Cuando la diplomatas ia refusa e ia fuji de la sena, la atacores ia comensa fusili.

On no conose la identia de la fusilores, ma saisis de stranjeres par membros enarmada de tribus o par combatosas liada a al-Qaidah es comun en Iaman.

La ministreria deutx de esternas ia confirma ce un veculo engranada a cuatro rotas, parteninte a se ambasada en Sanaa, ia es atacada con fusiles. On ia declara ce la pasajores es secur, ma no ia confirma esce cualcun ia es ferida.

En la mense pasada, du empleadas de la Nasiones Unida ia es saisida en la distrito, ma fortes de securia ia libri los pos poca oras. En febrero, on ia saisi ance un dotor txesce, un deutx, e du otra europeanes.

La plu de persones saisida par tribales es librida sin es ferida, pos un periodo corta de prisonia. Ma los ci es saisida par combatosas fronti un situa min serta.

La grupo jihadiste al-Qaidah en la Penisola Arabi teni ja un instruor sudafrican depos maio 2013. Los teni ancora ance un visconsul saudi ci los ia saisi en 2012. E un empleada de un ambasada irani resta prisonida pos es saisida par combatosas suspetada de al-Qaidah en julio 2013.

2014-04-28

Portugal selebra 40 anios de democratia, entre protestas

Protestas sur medios sever forsada par la Uni European ia ombri la aniversario 40 de democratia en Portugal.

Alga miles de persones ia marxa en la sentro de Lisbon e ia escuta parlas criticante reduis de spende par la governa. La partisipores en la protestas ia inclui alga de la gidores de la Revolui Cariofilo de 1974, cual ia fini cuasi sinco desenios de tirania.

Portugal ia debe reali medios finansial sever pos reseta un presta internasional en 2011.

Figures influosa ci ia partisipa en la revolui de 1974, en cual ofisiores minor ia suverti la governa, ia boicota la aniversario ofisial per la anio tre en segue.

Selebras organizada par la governa ia aveni a un distantia corta de la protestas.

Vasco Lourenço, un de la gidores de la c, ia critica la governa presente de Portugal, cual ocupa un loca political a destra de sentro. El ia demanda esce la pais debe an resta en la Uni European.

Otelo Saraiva de Carvalho, un otra ofisior ci ia aida organiza la colpa de state, ia descrive la medios sever como "la comanda de mori per la esperas e valuas" de la revolui.

Miguel Januario, un artiste, ia dise ce la portugeses "ia permete ce formas nova de tirania – finansial en esta caso – ia saisi la controla".

Ma la ministro xef, Pedro Passos Coelho, ia dise: "Par un coaveni felis, nos onora esta dia simbolin a cuasi la mesma tempo a cuando nos fini nos program de aida economial."

La program de presta ia dura tra tre anios, e va fini a 17 maio. En maio 2011, Portugal ia reseta plu ca 78 mil milion euros de aida urjente. La cuantia de nonempleadas en la pais resta entre la plu altas en la eurozona.

Portugal selebra la Revolui Cariofilo con un festa nasional a 25 april, nomida la Dia de Libria.

2014-04-27

Tsvangirai es suspendeda par se partito

La Promove per Cambia Democrata, la partito oposante en Zimbabue, dise ce lo ia suspende se gidor Morgan Tsvangirai car el ia "devia de prinsipes democrata".

La anunsia par Tendai Biti, la secretor jeneral, segue un consenta de la partito en la capital, Harare.

De 2009 a 2013, Tsvangirai ia servi como ministro xef en un governa frajil aliada, en cuando Robert Mugabe ia resta la presidente de la pais.

Acel governa ia fini con la elejes en julio 2013, cuando la partito de Mugabe ia gania un majoria grande. Tsvangirai ia descrive la elejes como frodante.

Se defeta ia es un problem major per un om ci ia es la sola oposor credable de Mugabe tra multe anios. El ia fali ance vinse la gidor vea en du atentas presedente.

Oservores dise ce batalias interna ia aveni entre la gidores de la Promove per Cambia Democrata tra menses, seguente la elejes.

On ia reporta ce alga otra persones importante de la partito ia es ance suspendeda par la consenta a saturdi, e ce on ia repone alga membros ci ia es suspendeda a ante.

2014-04-26

Viletas afgani es grave inondada

Inondas subita en Afganistan norde ia mata a la min 58 persones e ia isoli sentos de viletanes. Plu ca 80 persones manca.

Boymurod Qoyinli, la governor de la provinse Jowzjan, ia averti ce la cuantia de vitimes va crese probable.

Persones ia deveni trapida sur la tetos de se casas, e on ia envia elicadores salvante a la area.

On reporta ance inondas en otra provinses en la norde e ueste de la pais.

Qoyinli ia dise: "Miles de casas es destruida, e miles de persones sufri." Tre distritos difisil per asede ia es spesial grave afetada.

Un fem ia es surprendeda par la inonda, direta pos leje se preas de sera. El ia perde du de se enfantes.

Un pluve forte e tempestas en la note de jovedi ia crea un situa perilosa per la viletanes, de ci se casas es xef construida con fango.

2014-04-25

Un crus relijiosa crase un om en Italia

En Italia norde, un om de 21 anios ia mori cuando el ia es craseda par un crus erijeda per onora Pape Ioannes Paulus 2. Marco Gusmini ia es matada sin pausa, e un otra om ia es ospitalida.

La sculta ia ave un altia de 30 metres. Un parte de lo ia colasa a un rituo ante la santi de Ioannes Paulus 2 e la pape presedente, Ioannes 23, a soldi.

La crus simboli la visita de la pape a Brescia, un site prosima, en 1998. Lo ia es desiniada par scultor Enrico Job. Lo ave la forma de un crus grande e curva, con un sculta de Jesus Cristo fisada a la culmina. La sculta de Cristo ave un pesa de 600 cilogrames.

Un grupo de enfantes ia es presente cuando lo ia cade.

Esta no es la mori prima causada par un crus cadente en Italia. En 2004, un fem de 72 anios ia es craseda par un crus de metal, con altia de pico plu ca 2 metres, en la vila Sant'Onofrio en la sude.

2014-04-24

Fatah e Hamas anunsia un reconsilia

Fatah e Hamas, partitos filastini oposante, ia anunsia un acorda de reconsilia. Los ia dise ce los intende formi un governa unida en la sinco semanas veninte.

Esta aveni a un tempo cuando la negosias de pas entre presidente Mahmoud Abbas e Israel es prosima a colasa.

Hamas e Fatah ia separa violente en 2007, e acordas presedente de reconsilia ia es nunca realida. Israel, la SUA, e la UE regarda Hamas como un organiza teroriste.

Benjamin Netanyahu, la ministro xef de Israel ia averti ce Abbas va debe eleje entre pas con Israel e pas con Hamas. "On pote ave la un ma no la otra. Me espera ce el va eleje pas. Asta aora, el no ia fa esta."

Ofisiores filastini ia responde par dise ce la reconsilia es un cosa interna, e ce la uni de la popla filastini va forti la pas.

Plu temprana en esta semana, Abbas ia envia un delega de se partito Fatah a Gaza per discutes de reconsilia.

La anunsia ia es fada a martedi, a un confere jornaliste con representores de Fatah e de Hamas. La partitos ia dise ce los vole fa un vota parlamental en la ses menses seguente.

Ismail Haniyeh, ministro xef de la governa en Gaza, gidada par Hamas, ia dise: "Estas es la bon novas cual nos reporta a nos popla. La eda de divide es finida."

Pos oia la novas, miles de filastinis ia veni sur la stradas de la Site de Gaza per selebra.

2014-04-23

Colombia recorda se autor la plu selebrada

Colombia onora se autor la plu selebrada, Gabriel García Márquez, la premior Nobel ci ia mori a jovedi a la eda de 87 anios.

La presidente, Juan Manuel Santos, ia gida un rituo en la catedral de Bogotá, do la sores e otra membros de la familia de la autor ia es presente.

A lundi, on ia fa un onora formal de García Márquez en la Site Mexico, do la autor ia abita.

On ia seni el en un rituo privata de familia en Mexico en la semana pasada. La familia ancora no ia revela lo cual los intende fa con se senes. On ia sujesta ce cisa los va es divideda entre se pais de nase e Mexico, se pais de abita tra alga desenios.

Organizores de la aveni en catedral de Bogotá ia dise ce lo no va ave un natur relijiosa. An tal, lo ia comensa con preas gidada par Rubén Salazar Gómez, la arcibispo de Bogotá.

La Orcestra Simfonial Nasional de Colombia e la Sosia Coral de Santa Sesilia ia jua alora la Misa de Moria de Mozart. La rituo ia es direta difusada par la televisa e radio nasional, e ance sur scermos jigante estra la catedral.

A martedi, per coaveni con la Dia Mundal de Libro, colombianes va recorda plu García Márquez par organiza lejes de se noveleta "Nun scrive a la coronel" a plu ca 1000 bibliotecas, parces, scolas, e universias.

2014-04-22

La maraton de Boston onora vitimes de bomba

En la SUA, miles de maratonores ia core sur la stradas de Boston, pos cuando la site ia onora la tre persones matada e plu ca 260 ferida par un ataca de bomba a un anio ante aora.

Tota ia resta silente per un momento ante la comensa en via de 36 000 corores – 9000 plu ca normal.

Ofisiores ia fa un opera enorme de securia cual inclui postos de controla e un proibi de bolsones. On ia previde ce un dui de milion persones va regarda la maraton. La polisia de Boston ia erije 8000 paradores de aser, 1200 plu ca en la anio pasada.

Atletas descapasida ia es la prima competores, comensante a 08:50 de ora local (12:50 UTC).

La corsa de atletas profesal fema ia comensa a 09:32. La atletas profesal mas ia comensa pos un dui de ora, e los ia es segueda par miles de otra corores.

La corsa de omes ia es ganiada par Meb Keflizighi, un atleta SUA, e la corsa de femes ia es ganiada par Rita Jeptoo de Cenia. Keflizighi ia completi la distantia de 42,2 cilometres en 2 oras, 8 minutos, e 37 secondos, deveninte la ganior SUA prima de pos 1985.

Jeptoo ia traversa la linia de fini en 2 oras, 18 minutos, e 57 secondos, un tempo recordo. Esta es se vinse tre en la compete.

2014-04-21

Moris pascual causa protestas prosima a Rio

En Brasil, abitores de un visineria povre, prosima a la site Rio de Janeiro, ia ensende veculos en protesta contra la moris de du persones en avenis cual ia envolve la polisia.

Un de la vitimes ia es estra un eglesa con se familia a venerdi santa cuando un baleta deviante ia colpa el. El ia es trapida en un fusili entre polisiores e persones suspetada de vende drogas.

Amnestia Internasional dise ce sirca 2000 persones mori en cada anio en Brasil, par causa de atas nonatendente e violente par la polisia.

Abitores de Caramujo, un visineria de lata, ia esije justia en cuando los ia ensende cuatro buses e tre autos.

La mori de Anderson Santos Silva, ci ia ave 21 anios, cuando el ia es a punto de vade a un rituo spesial de pascua, ia coleri la comunia. La eglesa catolica local ia dise: "El ia mori en atenta proteje se madre e sore."

La vitim du, identifiada como Emanoel Gomes, ia mori a la note de venerdi cuando se motosicle ia xoca un veculo blindada de polisia en un area prosima.

Consernas sur securia en Brasil esiste ante la Copa Mundal de futbal, cual va aveni entre 12 junio e 13 julio. E la site Rio de Janeiro va ospita ance la Juas Olimpial en 2016.

Plu temprana en esta mense, cuasi 3000 soldatos e polisiores ia saisi la compleso Mare, un de la vilas de lata la plu perilosa de Rio, prosima a la airoporto xef internasional. Tra desenios, lo ia es controlada par alga de la padrones de drogas la plu malfamosa e violente.

On espeta ce soldatos va resta en la area asta la fini de la Copa Mundal.

2014-04-20

Japan va xasa balenas pasifica en la semana veninte

Japan dise ce lo va comensa xasa balenas en la Mar Pasifica en la semana veninte, pos cansela se xasas antartica per segue un judi de la Corte Internasional de Justia. En marto, la corte ia deside ce la xasas antartica par Japan es comersial, e no siensal como Tokyo ia declara.

Ambientistes es colerida par la defia japanes contra un proibi mundal de la xasa de balenas.

Yoshimasa Hayashi, la ministro de pexerias, ia dise ce on intende catura 210 balenas pasifica en la xasa veninte, un cuantia reduida.

El ia clari: "Nos politica fundal es con la continua de xasa de balenas per rexerca. Esta es un modo de xerca un via de sorti de la proibi presente par colie datos siensal. Donce nos intende recomensa la xasas comersial tan pronto como posible, par fa xasas per rexerca."

La Corte Internasional de Justia es un autoriosa de la Nasiones Unida. Se judi en la mense pasada ia acorda con Australia, cual ia prosede Japan en maio 2010. La corte ia esije ce Japan reesamina se politica intera de balenas, e ia dise ce la pais ia fali esplica perce lo nesesa mata tan multe balenas sola per rexerca.

La proibi internasional de xasa de balenas esiste ja de pos 1986. En la anio seguente, Japan ia comensa lo cual lo ia nomi xasas siensal.

La carne de la balenas matada es comersial vendeda en Japan.

Hayashi ia dise ce Japan intende "proposa un program nova de rexerca a la Comision Internasional de Xasa de Balenas, no plu tarda ca esta autono, cual va refleta la criterios listada en la deside" de la corte.

2014-04-19

12 gidores xerpa mori en un avalanxa sur Sagarmata

A la min 12 gidores local ia mori pos un avalanxa sur la inclinas de Monte Sagarmata (Everest). On crede ce esta es la trajedia la plu matante de istoria sur la monte.

La avalanxa ia aveni a sirca 06:45 de ora local en un area nomida la "campo de popcorn", no multe plu alta ca la campa de base a 5800 metres.

On ia salva alga trepores, ma otras manca ancora.

La gidores xerpa ia asende la inclina en la temprana de la matina, per fisa cordas e prepara la via per trepores, cuando la avalanxa ia colpa.

On no ia revela ofisial la identias de la mores e mancantes. Un opera de xerca e salva aveni aora, e on ia envia tre elicadores a la area. On ia transporta alga trepores ferida a la campa de base.

La asidente indica la riscas cual la gidores emprende en prepara la monte per trepores visitante. Lo ia aveni a media de la periodo de april e maio, la menses major de trepa. Sentos de trepores ia converje a la campa de base, esperante asende a la culmina.

En 1996, oto trepores ia mori en un tempesta, un desastre cual ia formi la funda de un libro bonvendeda.

Plu ca 3000 persones ia asende la monte pos se concista prima par Edmund Hillary and Tenzing Norgay en 1953, ma ance multe ia mori atentante.

Situada entre Nepal e Xina, la monte la plu alta de mundo ave un altia de 8848 metres.

2014-04-18

Un xica arjentina ia es prisonida en un garaje tra cuasi un desenio

La polisia en Arjentina dise ce los ia salva un xica de 15 anios ci se jenitores adotante ia fami, bate, e prisoni en un garaje tra nove anios.

El ia pesa sola 20 cilogrames, e ia dise ce on ia nuri el con sola pan e acua tra se prisonia. Se sola acompaniores ia es un can e un simia. El ia dise ce on ia bate el con un sintur si el ia atenta come la comedas restante cual on ia lansa a la animales.

On ia aresta se adotores e acusa los de sclavia e maltrata.

La adolesente ia es trovada en Buenos Aires, la capital de la pais, par un de se frates biolojial ci ia perde trasa de el.

La xica ia dise ce el ia sorti de la garaje a sola du veses en nove anios. El es aora en ospital.

Seguente ofisiores, se jenitores adotante ia adota tempora la xica en 2001, pos cuando un corte ia judi ce se jenitores biolojial – ci ia ave ance sete otra enfantes – no ia es finansial capas de cura el.

Prima, la du familias ia resta en contata, ma lo cual ia aveni pos 2005 no es clar. On ance no sabe perce la familia biolojial de la xica ia perde trasa de el.

La jenitores adotante ia es espetante la completi de la paperes formal de adota.

2014-04-17

On xerca survivores de un naveta afondada en Corea Sude

Servis de crise continua xerca cisa 300 persones ci manca pos la afonda de un naveta en la mar prosima a Corea Sude. Lo ia transporta 462 persones de Porto Incheon en la norde-ueste de la pais a la isola Jeju en la sude.

Ofisiores dise ce 174 persones ia es salvada de la barcon. On crede ce nove persones ia mori, e desuples de otras ia es ferida.

Tra la note, ecipos de salvores ia usa lampas inondante e misiles luminante per xerca pasajores.

On ancora no sabe perce la naveta ia apoia a un angulo estrema e inversa, tal ce sola un parte peti de se corpo resta vidable supra la acua.

Lo ia afonda en 30 metres de acua, e, car on crede ce multe pasajores ia deveni trapida a interna, la salvores consentra se laboras sur la ruina de la barcon.

Chung Hong-won, la ministro xef de Corea Sude, ia avisa ce on pote "peri an no un minuto o secondo" en la xerca per survivores. El ia speroni la ecipos a fa tan multe como posible per salva plu vives.

La opera envolve barcos gardacostal, militar e comersial. Ma lo es impedida par corentes forte e par un mal capasia de vide. Lee Gyeong-og, visministro de securia e dirije publica, ia comenta: "La acua conteni tan multe fango, e on no pote vide clar."

2014-04-16

Berlusconi debe servi la comunia como puni per froda

Un corte en Milan ia judi ce Silvio Berlusconi, la ministro xef pasada de Italia, debe servi la comunia per un anio en un casa de cura persones vea. La puni segue se condena en 2013 per froda liada a la compra de diretos televisal par se compania Mediaset en la desenio de 1990.

Se avocatos ia dise ce los es "sasiada" ce la puni va permete ce el resta political ativa.

Berlusconi, ci ave 77 anios e es un bilionor, ia es envolveda en un serie de casos de corte. En la caso de Mediaset, on no ia prisoni el, car la sistem legal en Italia es pardonosa a persones con plu ca 70 anios.

La alternativa de servi la comunia ta es ce el abita como un prisonida en se casa propre.

La jornalisme italian dise ce Berlusconi va labora probable per un dui de dia per semana a un casa de persones vea e descapasida, prosima a se imobila estra Milan.

El va debe obedi un ora de retira e va es proibida de encontra persones con condenas criminal. Esta proibi aplica a un, e cisa plu, de se asosiores. Ma el va es libre de viaja a Roma entre martedi e jovedi de cada semana.

El es ancora la gidor de Forza Italia, la alia conserviste cual es la oposa political xef, an si on proibi el de presenta se per eleje en la votas european cual va aveni en maio.

2014-04-15

Un strada nederlandes lumina se a note

Sur un dui de un cilometre sur un autovia en Nederland, on ia desveli marcas de strada cual brilia en la note.

La pinta usada conteni un polvo spesial cual carga se en la dia e relasa lenta un lumina verde per asta oto oras de la note. Con tal linias per indica la strada, on no nesesa lampas.

On proba aora la tecnolojia a la ves prima, e va inisia ofisial lo a un data plu tarda en esta mense. Lo es situada sur la N329 en Oss, a sirca 100 cilometres a sude-este de Amsterdam.

Daan Roosegaarde, un artiste de interata, ia labora sur la idea con Heijmans, un compania nederlandes de injenia sivil. El ia dise: "La governa sutrae lampas a note per conserva mone, e enerjia deveni multe plu importante ca nos ia pote imajina a 50 anios ante aora. Esta strada esiste per securia e per modeli un mundo plu autosustante e plu interatante."

Se projetas aida la interata de persones e tecnolojia. En la pasada, el ia crea un solo de dansa con lampas discotecal cual prende enerjia de la moves de la pedes de la dansores, e un roba cual deveni diafana cuando la person ci porta lo es stimulada.

El ia dise ance: "Me ia es intera stonada ce nos spende biliones sur la desinia e developa de autos, ma en alga modo la stradas – cual determina vera la aspeta de nos ambiente – es intera imune de acel prosede."

Inisial, la ecipo ia intende ance developa simboles de clima cual ta apare sur la via cuando la temperatur ta ateni un grado spesifada. On ta usa un pinta capas de reata a temperatur per crea simboles jigante en forma de flocos de neva sur la asfalto, per averti persones ce jelo es cisa sur la via. Ma la strada en Oss no inclui esta cualia.

2014-04-14

Rusia recomenda ce Kiev evita la usa de fortia

Rusia ia recomenda forte ce la autoriosas en Kiev no usa fortia contra protestores prorusce en Ucraina este.

A un consenta spesial de la Consilio de Securia de la Nasiones Unida, la ambasador de Rusia ia apela per la "comensa de un dialogo vera" par Kiev. Ma Yuriy Sergeyev, la ambasador de Ucraina, ia dise ce Moscva ia crea artifisial la crise en Ucraina este.

Ucraina ia institui un limita de tempo sur la parti par ativistes prorusce de la construidas cual los ocupa. Esta ia pasa a 6:00 UTC a lundi.

Kiev ia promete atas militar si los ta fali parti. En Ucraina este, on espeta aora per vide esce Olexander Turchynov, la presidente tempora, va usa la armada per atenta regania la construidas. A soldi, el ia dise ce se fortes militar ta fa "un opera antiteroriste de estende completa" contra la omes enarmada ci teni la construidas.

Tal limitas ia pasa a ante, ma oji ta pote deveni un dia multe importante per Ucraina este. La governa nova en Kiev luta per pare credable en acel parte de la pais, e, tra la fini de semana, alga vilas e sites ia es saisida en efeto par grupos prorusce.

Sloviansk, en la area de Donetsk, es intera ensircada con paradores de rebelores. Postos de controla operada par militias prorusce sta sur vias xef cual entra a la site.

An si Kiev ia promete reprende controla de Sloviansk, un ataca par tota fortes ave riscas enorme, e ta pote gatili un reata de Rusia, de cual desuples de miles de soldatos campa prosima a se borda con Ucraina.

Ministros de esternas de la Uni European va consenta oji en Luxemburg per discute la crise.

2014-04-10

Aora oji

Esta blog va recomensa pos alga dias.

Queensland prepara ante un tempesta forte

La stato Queensland en Australia prepara per la ariva de Siclon Ita, un tempesta de categoria sinco cual va colpa se costa estrema norde.

On previde ce lo va ateni la penisola Cape York a un ora tarda de venerdi, portante ventas multe destruosa. La Departe de Meterolojia ia dise ce ondas pote dana alga areas basa, e ce pluves forte pote causa inondas.

Esta es la tempesta la plu forte cual ia colpa la area de pos Siclon Yasi en 2011.

On ia averti abitores costal sur "un marea tempestal perilinte" a cuando la siclon traversa la costa.

Ventones pote estende a 190 cilometres de la sentro de la tempesta, cisa afetante alga vilas incluinte Port Douglas, un loca popular per turistes, situada a norde de Cairns.

Siclon Ita ia porta ja pluves deluviante a la Isolas Solomon en la semana pasada, causante inondas subita cual ia mata 21 persones, cisa plu.

La polisia de Hongkong xerca un pinta valuosa dejetada

La polisia en Hongkong investiga un pinta con valua de $3,7 milion, cual ia desapare de un otel. Reportas sujesta ce on ia dejeta acaso lo.

On crede ce lo es Monte Nevosa, un obra de inca par Cui Ruzhuo, un artiste xines.

La subasteria Poly Auction ia reporta lo como mancante a martedi, pos vende lo a la dia presedente.

Lo es posible ce limpores a la otel Grand Hyatt ia malpersepi la pinta como dejetada. Video de un camera vijilante mostra ce un gardor de securia pedi la pinta pacida a traversa la solo en dirije a un monton de dejetadas.

La polisia dise ce on ia vide ance limpores ci prepara la dejetadas per transporta a via, e ce on ia prende ja los a un dejeteria.

La otel ia anunsia ce lo labora con investigores: "Car la organizores ia lua nos salon per esta subasta, Grand Hyatt Hongkong fa la plu bon cual lo pote per ofre aida a Poly Auction, incluinte permete ce la polisia regarda la videos vijilante a lado de nos ecipo propre de securia."

Ma la otel ia dise ce la subasteria es encargada per la ojetos cual lo vende.

La polisia ia trova no trasa de la pinta. Lo ia deveni cisa un de la dejetadas la plu valuosa de istoria.

20 persones es cotelida a un liseo en Pennsylvania

Un adolesente enarmada con du coteles ia fa un ataca a un liseo en la stato Pennsylvania en la SUA. El ia feri 19 studiantes e un gardor de securia. La studiante, ci ave 16 anios, ia es arestada.

Alga persones ia reseta feris grave de cotel a se troncos, e ia nesesa sirurjia en ospital. Alga ia ave no plu ca 14 anios. An tal, on previde ce tota va survive.

Algun, cisa un studiante, ia sona un alarma de focon pos vide la cotelis prima. La studiantes ia panica e ia freta en fola per sorti de la construida, en cuando la polisia ia ariva per xerca la atacor. Alga persones ia deveni ferida par la caos de la fola.

La polisia no ia descovre un motiva, ma on esplora reportas de un telefoni menasante entre la suspetada e un otra studiante a la note presedente.

La scola va es cluida en la dias seguente, afin investigores labora plu a la sena de la crimin.

2014-04-09

Khamenei dise ce Iran va abandona nunca se program nucleal

Aiatola Ali Khamenei, la gidor suprema de Iran, ia suporta discutes con la potias de la mundo, ma el ia averti ce Tehran va abandona nunca se program nucleal. El ia dise ce Iran ia acorda la discutes per "rompe la atmosfera enemin" con la comunia internasional.

Iran e ses potias labora per fa un acorda sustituable per un negosia entretempal cual va espira en julio.

Javad Zarif, la ministro irani de esternas, ia dise ce la du lados acorda ja sur 60% de cosas pos la discutes la plu resente en Wien, Austria.

Un ofisior major de la SUA ia pare min otimiste, disente mera ce ambos lados va continua ostinosa se atentas de acorda.

La SUA, Rusia, Xina, Britan, Frans, e Deutxland vole ce Iran redui se ricis de uranio, sur cual los teme ce on va pote usa lo per crea un bomba nucleal. Tehran dise ce se laboras nucleal es intera pasosa, e espera fa un acorda en intercambia per la sutrae permanente de la punis internasional cual esiste aora contra lo.

Khamenei ia clari a un asembla de siensistes nucleal ce Tehran ia acorda la discutes per mostra a la comunia internasional ce lo no desira construi armas nucleal.

Su un acorda tempora, fada en janero, Iran ia pausa alga de ativia nucleal per ses menses en intercambia per un sutrae partal de punis. La potias global vole aora ce la pais acorda redui permanente la estende de se program de rici uranio, e ce lo permete plu capasia de supravide a esaminores de la Nasiones Unida.

Asta aora, la ses potias ia es unida en se negosias. Ma la saisi de Crim par Rusia en marto ia crea tensas entre Moscva e la Ueste. On dise ce Rusia e Iran negosia un intercambia de petrolio e benes, con valua de asta $20 mil milion. La SUA dise ce esta ta sumina la discutes nucleal.

Espania refusa un referendo sur autonomia catalan

Parlamentores espaniol ia eleje forte rejeta un demanda par la autoriosas catalan ce los fa un referendo sur autonomia a 9 novembre. Pos sete oras de debate, 299 membros de parlamento ia vota contra la proposa. Sola 47 votas ia favore lo, e un ia asteni.

Mariano Rajoy, la ministro xef espaniol, ia averti plu temprana ce un referendo ta es "un desastre economial", no sola per Espania ma ance per Catalunia.

La idea de permete ce la popla de acel area este separa de Espania ia causa menses de debate constitual. Catalunia ave ja un grado alta de autonomia, ma la crise resente de economia en Espania ia nuri la nasionalisme catalan.

Tota la partitos major de Espania, incluinte la conservistes de Rajoy e la oposa sosialiste, ia rejeta la demanda. Sola partitos nasionaliste de Catalunia e Euscaleria ia vota favorente.

Rajoy ia repete se razona ce on ta regarda un referendo como nonlegal car, su leges espaniol, referendos sur autonomia debe aveni nasional, no areal.

"Juntada, tota de nos gania, ma separada, tota de nos perde. Esta no es mera un demanda de lege, ma de senti… Me no pote imajina Espania sin Catalunia, o Catalunia estra Europa," el ia dise a parlamento en un debate ante la vota.

An tal, parlante pos la conta de votas, Artur Mas, la presidente catalan, ia dise ce se governa areal va continua con la projeta de un referendo en novembre. El ia dise: "Alga ta vole presenta esta como la fini de la cosa, ma, como presidente de Catalunia, me dise a los ce lo no es la fini."

Un defeto programal crea un problem enorme en la interede

Lo es posible ce un defeto en un program usada par miliones de servadores de ueb ia esposa ja visitores de la pajes ospitada a spias e oservas secreta.

La defeto es en un biblioteca nomida "OpenSSL", usada en servadores, sistemes de opera, e programes de e-posta e mesajes pronto. La intende de la biblioteca es proteje datos privata en cuando los viaja tra la rede.

On no sabe esce o cuanto on ia esplota ja la defeto, car atacas cual usa lo ta lasa no trasa.

Un article en la blog de la projeta Tor, cual produi programes cual aida persones evita ce on oserva se abituas de surfa, ia dise: "Si tu nesesa anonimia o privatia forte en la interede, cisa tu va prefere evita intera la rede tra alga dias seguente, asta cuando la situa calmi."

Partes vasta de la ueb pote es atacable, car OpenSSL es usada en Apache e Nginx, du servadores multe popular. On crede ce sirca 500 mil de la servadores secur en la ueb opera con varias diversa de esta biblioteca.

Multe companias freta per aplica ajustas a programes atacable. Otras ia clui an se servis tra cuando los labora sur reparas. Car on comparti ja codigo cual demostra la metodo de ataca, multe persones es ansiosa ce sibercriminales va comensa pronto esplota la defeto.

Par un coaveni strana, esta problem enorme de securia ia apare a esata la mesma tempo cuando Microsoft abandona furni solves de tal problemes a usores de Windows XP.

Moris par Ebola esede 100 en Gine

La Organiza Mundal de Sania dise ce plu ca 100 persones ia es aora matada par la virus Ebola en Gine. Esta aveni de la virus es un de la plu difisiles de istoria. On va nesesa cisa cuatro plu menses per supresa lo.

La virus ia mata 101 persones en Gine e 10 en Liberia. Lo es estendeda par contata prosima, e lo mata entre 25% e 90% de se vitimes. Multe paises en Africa ueste ave bordas porosa, e persones viaja frecuente entre la paises.

Gine sude es a la sentro de la maladias. La caso prima ia es reportada ala en marto.

La estende jeografial de la virus continua aumenta la difisilia estrema de conteni lo. Avenis pasada ia envolve areas multe min grande.

On ia rejistra 157 casos suspetada en Gine, incluinte 20 en Conakry, la capital. On ia confirma 67 de los como Ebola. En Liberia, un pais visina, 21 casos es reportada, de cual sinco es confirmada como Ebola.

Mali ia reporta nove casos suspetada, ma esaminas medical ia mostra ce du de los no ave la virus. En la semana pasada, Mali ia dise ce lo va severi se controlas bordal, temente la estende de Ebola.

Esta aveni de Ebola es la prima conoseda en Gine. La plu de casos resente ia aveni a distantias de miles de cilometres, en Uganda e la Republica Democrata de Congo.

On conose no cura o vasin per esta virus tropical. Lo gida a febre emorajal, cual causa dole de musculos, debilia, vomita, diarea, e, en casos sever, faltas de organos e sanguis nonparable.

2014-04-08

Un bomba separadiste mata en un tren pacistani

En Pacistan, a la min des-tre persones ia es matada par un bomba en un tren de pasajores. La esplode a un stasion en Balotxistan ia feri desuples de persones, e ofisiores ia dise ce la cuantia de mores va crese probable.

La Armada Balotxi Unida, un de alga grupos separadiste enarmada en la area, ia dise ce lo ia fa la ataca. La esplode ia aveni a la dia pos cuando soldatos pacistani ia ataca combatosas en la provinse.

La tren, nomida la Espresa de Jaffar, fa un viaja dial de 1460 cilometres, de Rawalpindi en la provinse Pandjab a Quetta en Balotxistan. La bomba ia esplode cuando la tren ia ariva a la stasion Sibi e pasajores ia comensa desembarca. Sibi es situada a sirca 160 cilometres a sude de Quetta, la capital de se provinse.

Un de la polisiores a la sena ia dise ce du de la vagones de la tren ia deveni rapida engolida par flamas, e alga pasajores ia luta per evade.

"Nos ia regania 12 corpos mor de la tren," el ia dise, ajuntante ce un de la feridas ia mori pos es ospitalida. "Me no pote dise esce la mores es adultes o enfantes, car los es nonreconosable."

Khawaja Saad Rafique, la ministro de ferovias en Pacistan, ia dise ce la mesma servi ia es atacada a sola alga dias ante aora, ma ce nun ia es alora matada.

Un corte pilipina defia la eglesa e suporta contraconsepi

La corte suprema en la Pilipinas ia aproba un lege de contraconsepi, en un defeta per la Eglesa Catolica. La lege esije ce sentros governal de sania distribui aora condomes libre e piles contraconsepal.

La corte ia pospone reali la lege en desembre 2012 pos cuando grupos eglesal ia sujesta ce lo es nonconstitual.

Suportores de la lege ia aclama cuando la corte ia anunsia se judi ce la plu de la esijes en la lege es constitual.

La governa de presidente Benigno Aquino ia defia anios de presa par la eglesa cuando lo ia aseta la lege. Lo dise ce la lege va aida persones povre, ci no pote comun compra contraconsepales, e ce lo va redui la cuantia alta de madres en la pais ci mori.

Par la lege, cuasi tota formas de contraconsepi va deveni libre disponable a clinicas de sania publica. Instruis sesal va deveni ance obligada en scolas, e laborores de sania publica va debe reseta instruis sur la metodos de projeta un familia. On va furni ance curas medical a femes ci ia fa abortas nonlegal.

Cuasi 100 milion persones abita en la Pilipinas, e sirca 80% de los es catolica. La pais ave un de la tasos de nase la plu alta en Asia.

La Eglesa ia batalia forte contra la lege, descrivente lo como un menasa malvolente contra la vive. Lo ia denunsia politicistes ci ia suporta lo, incluinte Aquino.

Campaniores ia averti sur la posible de desobedis publica pos la judi de la corte. La Eglesa Catolica ia fa un rol importante en la vive political de la Pilipinas, e lo continua influe forte la popla.

Usores de XP fronti la fini de suporta par Microsoft

La suporta par Microsoft per Windows XP fini oji. Ofisial, la compania va ofre no plu reparas de defetos e ajustas contra problemes de securia en acel sistem vea de opera.

Alga governas ia negosia contratas spesial de suporta estendeda per la sistem, per atenta continua proteje se computadores. Companias de securia ia dise ce otra persones ci usa ancora la sistem, aora con eda de 13 anios, va fronti un risca aumentada de infeta e perili par siberfurores.

La statistica sujesta ce entre 20% e 25% de tota usores ia resta con XP, an pos la publici de tre varias major de Windows en la entretempo. Ma plu ca un cuatri de infetas pertine a XP. Acel proportio va crese pos la publici de la repara securial ultima per XP.

Acel repara ultima va coreti un cuantia de defetos, de cual un es regardada como estrema grave e es ja esplotada par criminales, an si on ia descovre lo sola en la parte tarda de marto.

Scrivores de programes vil sabe ce infeta un computador de XP es multe plu fasil ca infeta un macina nova cual usa Windows 8.1, con se multe cualias nova de securia.

Lo es probable ce grupos criminal va cumula secreta la metodos de ataca cual los conose, en loca de ajunta los a la spam infetante cual miliones de persones reseta. Los va reserve se metodos per usa contra blancos major e per spias companial. Alga organizas va es spesial consernada car la move a via de XP es tan difisil per los.

Ma pos cuando algun usa un metodo nova per ataca un blanco companial, lo es probable ce la mesma metodo va deveni comun reusada a pos, car criminales va ajunta lo a la utiles per scrive programes enemin.

La gidor de la tren en un asidente ia sufri de apnea de dormi

Investigores ia revela ce la gidor de un tren plen de viajores dial cual ia salta de la reles en desembre, matante cuatro persones, sufri de un maladia grave de dormi.

On ia descovre ce William Rockefeller sufri de apnea de dormi, ma on no ia clari esce esta ia contribui a la desastre.

Cuando la tren ia salta, lo ia es viajante sur un curva agu a 132 cilometres per ora – cuasi la truple de la limita de rapidia per acel curva. Plu ca 60 persones ia es ferida en la asidente. La tren ia para a un distantia corta de la Rio Harlem en la distrito Bronx de New York.

La Funda Nasional de Dormi dise ce plu ca 18 milion adultes american esperia apnea de dormi, un state medical en cual la respira de la dormor es interompeda a veses corta ma repeteda.

La avocato de Rockefeller e la gidor de se sindicato ia sujesta ja ce el ia adormi en cuando el ia es controlante la tren.

La Comite Nasional de Securia Transportal va publici se concluis sur la causa de la asidente en un reporta plu tarda.

2014-04-07

Pistorius demanda pardona per la mata de Steenkamp

En un corte en Pretoria en Sudafrica, Oscar Pistorius, un atleta paralimpial, ia demanda emosiosa un pardona de la familia de Reeva Steenkamp, se ami de cor, a la dia prima de se atesta a se prosede per mata el.

En un vose tremante, el ia dise ce el ia "atenta proteje" el, e ce el no pote imajina la dole de la familia. El ia dise ce el sufri malsonias asustante, e velia frecuente credente ce el ole la sangue de Steenkamp.

La avocatos prosedente dise ce Pistorius ia mata Steenkamp en febrero 2013 pos un disputa. El dise ce el ia malpersepi se ami de cor como un intruor.

A la relatadas de Steenkamp, Pistorius ia dise: "A cada momento pos la aveni de esta trajedia, me ia pensa sur vos familia. Me velia a cada matina e vos es la persones prima sur ci me pensa, la persones prima per ci me prea."

El ia continua: "Me promete ce, cuando Reeva ia vade a leto a acel note, el ia senti amada. Me ia atenta pone me parolas sur paper a multe multe veses per scrive a vos. Ma no parolas va sufisi an."

June, la madre de Reeva Steenkamp, ia senta con fas fria en cuando Pistorius ia parla a la corte folida.

La atleta de 27 anios ia dise ce el usa aora piles antidepresante e piles de dormi, e ce el vole nunca denova toca un fusil. El ia informa la corte sur se enfantia difisil, pos nase sin partes de ambos gamas e donce nesesante porta membros prostesal.

On ia demanda a Pistorius esce el e se familia ia es esposada a atas criminal. El ia responde ce multe intruis criminal ia aveni en se enfantia. El ia dise ance ce, a un ves, un auto ia segue el a en se comunia securida, ma el ia ave se fusil con se, e la du omes en la auto ia vade rapida a via.

El ia dise ce el ia mostra se fusil a un otra ves en atenta proteje un taxiste ci persones ia es atacante. "Los ia comensa bate el con rocas a se fas e se testa. A acel punto, me ia pasa un lampa roja, sonante la claxon de me auto. Me ia estrae me fusil. Me ia punta lo a la tre persones. Los ia entra rapida a la taxi. Los ia vade rapida a via."

El ia detalia la importantia de relijio a se: "Cuando me ia encontra Reeva, me crede ce lo ia es vera un bondise. Me ia vole sempre un acompanior ci es un cristian. El ia es un cristian forte."

El ia deveni denova emosiosa cuando el ia dise: "Me Dio es un Dio de refuja." Se avocato ia demanda un pausa. La avocatos prosedente ia permete esta, con la constrinje ce lo no va aveni a cada dia. La caso va recomensa a la matina de martedi.

La ministro xef de Ungaria declara se vinse pos un vota

Viktor Orbán, la ministro xef de Ungaria, ia declara un vinse en la eleje parlamental cual ia aveni a soldi. Como resulta, el va governa per un periodo du en segue.

Se partito sentral destriste ia reseta 45% de la votas, pos la conta de la plu de los. On predise ce lo va gania final 135 de la 199 sejas de parlamento. Un alia oposante sentral sinistriste ia reseta 25%, e un partito estrema destriste ia gania 21%.

La sinistristes ungarian no ia recovre vera pos se defeta grande en la eleje de 2010, cuando Orbán ia comensa governa con un majoria forte de du tris. La eleje resente ia pertine xef a la state de la economia.

A un asembla de se suportores en Budapest, la capital, Orbán ia dise: "Sin duta nos ia vinse. Esta no ia es mera un vinse acaso. Nos ia gania un vinse tan completa, de cual nos ancora no pote comprende intera se sinifia a esta sera."

El ia dise ce la resulta de la eleje mostra ce ungarianes vole resta en la Uni European, ma con un governa nasional forte. "Me va labora a cada dia afin Ungaria deveni un loca merveliosa," el ia declara.

Lo pare probable ce la destristes estrema va es la partito du la plu grande en parlamento, car, an si la oposa sosialiste ia reseta plu votas, la sinco partitos en acel alia intende reformi se partitos propre pos la eleje.

Oservores dise ce la destristes estrema ia susede par adota un imaje min sever. Un sonda resente de opinas ia trova ce Gábor Vona, la gidor de acel partito, es la plu popular entre la politicistes oposante en la pais.

Suportores de Orbán dise ce se vinse refleta se capasia de gida. Ma tra la campania intera, partitos oposante ia acusa la ministro xef de sumina la democratia ungarian, de restrinje librias personal, e de impedi la libria de espresa.

La partito governante ia insiste ce un reforma ia es nesesada per completi la taxe de elimina la restantes de comunisme en la pais, e per redui la salda negativa a su 3% de la produi interna bruta, como esijeda par la Uni European.

La xerca per la avion mancante trova un sinial prometosa

Un barcon australian cual xerca la avion mancante de Airolina Malaisian ia deteta siniales coerente con los de un rejistrador de vola (ance nomida "un caxa negra"). La barcon Ocean Shield ia oia la sinial a du veses.

Marexal Xef de Aira Angus Houston, ci gida la xerca, ia nomi esta "la trasa la plu prometosa" asta aora. Ma el ia ajunta: "Nos ancora no ia trova la avion, e nos nesesa plu confirmas."

La avion, portante 239 persones, ia es en vola de Kuala Lumpur a Beijing cuando lo ia desapare a 8 marto. On ia trova an no un peso ruinada de lo, ma, pos esamina datos de satelite, ofisiores malaisian ia conclui ce lo ia cade en la Mar Indian sude, a ueste de la site australian Perth. On no sabe perce lo ia perde la contata con controlores de trafica airal e ia fini tan distante de se via intendeda.

Cuando la barcon ia deteta la sinial, lo ia continua oia lo tra du oras e dudes minutos ante perde lo. A pos, la barcon ia turna e retraversa la mesma area, e ia oia denova la sinial tra 13 minutos. A esta ves, lo ia distingui du siniales separada, coerente con la esiste de la du caxas negra: un cual rejistra la voses de la pilotes e un cual nota informas tecnical de vola.

La barcon ia resta en la area, ma no ia susede deteta la siniales a un ves tre. On nesesa determina la loca esata de la siniales. A pos, on va pote basi un veculo autonom per atenta trova ruinas sur la fondo de mar. Ma la sinial ia es detetada en acua con profondia de 4500 metres, cual es sirca la limita de la capasia de la veculo.

Houston ia clari: "Cisa alga dias va pasa ante cuando nos ave la informa per sabe esce nos pote confirma ce esta detetas veni de MH370. En acua multe profonda de mar, no cosa aveni rapida."

La xerca corsa contra la tempo, car la pilas de la caxas negra no va dura multe plu longa, e la rejistradores va sesa emete se siniales.

Un barcon xines de xerca, Haixun 01, ia dise ance ce lo ia oia siniales tra un tempo corta en un area diferente a la fini de semana. On investiga ance estas.

Frans no partisipa en la aniversario de la jenoside ruanda

La governa franses ia anunsia ce lo retira se de la onoras a lundi per la aniversario 20 de la jenoside ruanda. La deside segue un acusa par Paul Kagame, la presidente de Ruanda, ce Frans ia partisipa en la matas coletiva en 1994.

Kagame ia fa alegas simil a ante, e Frans ia nega sempre los. La ministreria franses de esternas dise ce la comentas oposa laboras de reconsilia entre la du paises.

Christiane Taubira, la ministro franses de justia, ia cansela se intende de vade a la avenis en Kigali a lundi.

Kagame ia parla a un jornal semanal de novas en la lingua franses. El ia denunsia "la rol direta de Beljia e Frans en la prepara political per la jenoside". Ruanda ia es un colonia beljes asta 1962.

La intervisa ia es publicida a soldi, ma ia es fada a 27 marto. En lo, Kagame dise ce, pos 20 anios, "la sola critica credable en la oios de Frans es ce los no ia fa sufisinte per salva vives en la tempo de jenoside".

Ruanda prepara per onora la aniversario de la jenoside cual ia mata a la min 800 mil persones en sirca 100 dias. La matadas ia es xef tutsis e hutus moderada.

La violentia ia es gatilida par la mori de presidente Juvenal Habyarimana, un hutu ci ia es matada en un cade de avion a 6 april 1994. La jenoside ia fini cuando la Fronte Patriota Ruanda, la grupo rebelante tutsi de Kagame, ia vinse la soldatos de governa en julio de acel anio.

2014-04-06

Un volcan en Ecuador eruta con un plumon jigante

En Ecuador, un volcan prosima a sude de la capital, Quito, ia eruta. Lo ia crea un plumon spetaculin de sene, con altia de 10 cilometres.

La volcan Tungurahua ia emete la nube jigante a venerdi, en un eruta cual ia dura tra sola sinco minutos.

La volcan eruta de tempo a tempo de pos 1999, ma lo ia deveni spesial ativa en la du menses pasada.

Tungurahua es un de oto volcanes ativa en Ecuador, cual es situada en la Anelo de Foco en la Mar Pasifica.

2014-04-05

On condena violores sesal a mori en India

Un corte en India ia condena tre omes a pende, su un lege nova cual dona la puni de mori a persones culpable de violes sesal multiple. La omes ia es condenada per viole un fotojornaliste en Mumbai en la anio pasada.

Los ia es ance entre sinco omes condenada a pasa se vives en prison en marto de esta anio per viole un otra fem en un aveni separada en la mesma site. Los es la prima ci on ia condena su la lege nova.

A un corte en Mumbai, judor Shalini Phansalkar Joshi ia dise: "On debe ave no tolera per tal avenis. On debe envia un mesaje forte e clar a la sosia."

Ambos vitimes – un telefoniste ci ia ave 18 anios, e la fotojornaliste ci ia ave 22 – ia es atacada en 2013. Ambos prosedes ia es completida en sete menses.

La fotojornaliste, un stajior con un jornal de Mumbai, ia vade a la Molines Shakti – un molin aora abandonada – con un colaboror mas per un taxe de fotografia cuando on ia ataca el. Se colaboror ia es bateda par la atacores. Pos la publici de acel caso, la telefoniste ia anunsia ce el ia es atacada en la mesma loca a un mense a ante.

On ia comensa esamina plu atendosa la viole sesal en India pos la viole coletiva e omiside de un studiante de 23 anios en un bus en Delhi en desembre 2012. Acel caso ia causa protestas tra la nasion e ia obliga la autoriosas indian a introdui leges nova e sever.

Per la ataca en Delhi, on ia condena cuatro omes a mori, e on ia envia un otra a un prison per jovenes per tre anios. La ataca contra la fotojornaliste en Mumbai ia renovi la coleria publica.

Du pretes e un monce es saisida en Camerun

En Camerun, du pretes italian e un monce fema de Canada ia es saisida par fusilores nonidentifiada. La fusilores ia saca un construida en la norde-ueste de la pais ante prende la ostajes.

La area es prosima a un fortres de Boko Haram, un grupo combatosa nijerian. La ataca ia segue a tre menses pos cuando la grupo ia libri un prete franses ci los ia saisi en la mesma area e ia teni en Nijeria.

La ataca nova ia aveni en la distrito Maroua en la oras temprana de la matina de saturdi. On reporta ce la fusilores ia ariva par auto a sirca 02:00 de ora local (01:00 UTC) ante entra a la construida do la pretes e monce ia es reposante.

La du pretes veni de la area Vicenza de Italia. La ministreria italian de esternas dise ce lo ia formi un ecipo de crise ci va labora per la libri de la pretes.

Un de la pretes es ja en Camerun tra plu ca ses anios. La otra ia aveni a sirca un anio ante aora.

En la anio pasada, sete membros (de ci cuatro ia es enfantes) de la familia Moulin-Fournier ia es saisida par Boko Haram en Camerun norde e tenida como ostajes tra du menses.

Desuples manca pos inondas en la Isolas Solomon

En la Isolas Solomon, sirca 30 persones manca ancora pos inondas subita en jovedi. La inondas ia mata a la min 12 persones e ia lasa 10 mil persones sin casa.

Miles de persones ia vade a refujas cuando multe de la capital, Honiara, ia deveni inondada. On ia declara un state de crise, con consernas sur furnis de comeda e acua, e sur infrastrutur danada.

La rio xef de Honiara, la Matanikau, ia supraflue en la tempesta, destruinte casas e pontes, e inondante la sentro de la site.

Joanne Zoleveke, la Secretor Jeneral de la Crus Roja en la Isolas Solomon, ia descrive la inondas como "un trajedia cual nun de nos ia previde". El ia dise: "Nos ia monitori la rio, ma nos no ia suposa ce lo pote crese tan rapida. Lo ia surprende nos. Per esta razona, persones ia mori."

On ia crea des-un sentros de refuja a scolas e a la airoporto internasional. La airoporto interna es inondada, e on teme la estende de maladias pos la desapare de la acua. Otra partes de la provinse capital ia declara ance zonas de desastre.

Fontes de acua limpa es contaminada, recursos de ijenia es destruida, e medisines manca per cura persones malada. La polisia ave la taxe nonplasente de trova corpos en detrito longo la rio e la borda de la mar.

La grado de dana estra Honiara es ancora nonclar, car ambos pontes cual sorti de la site ia deveni nonusable. Ma miles de casas en la site mesma ia es completa eliminada.

Un xico de 5 anios descovre un problem de securia de Microsoft

Un xico de sinco anios ia descovre un problem de securia en la servi Xbox Live de Microsoft. La compania ia grasia formal el.

Kristoffer Von Hassel, de San Diego en California, ia trova un metodo de entra a la conta de se padre sin la parola secreta. Microsoft ia coreti la defeto e ia ajunta Kristoffer a se lista reconoseda de rexercores sur securia.

Pos cuando la xico ia tape un parola noncoreta a la scermo prima de identifia, la sistem ia mostra un scermo du simil. El ia trova ce si el fa no plu ca tape multe spasios per la parola secreta a la scermo du, la sistem ia permete ce el entra a la conta.

En un intervisa en se televisa local, Kristoffer ia dise: "Me ia deveni nervosa. Me ia pensa ce me padre va trova lo cual me ia fa. Me ia pensa ce algun va fura la Xbox."

Se padre Robert, ci labora en la campo de securia, ia envia la detalias a Microsoft.

La compania ia dise: "Nos escuta sempre nos clientes, e nos grasia los cuando los mostra problemes a nos." Lo ia dona a Kristoffer ance cuatro juas, 50 dolares, e un enscrive a Xbox Live per un anio.

2014-04-04

Un polisior afgani ataca du jornalistes e mata un

Du jornalistes laborante per Associated Press ia es fusilida par un comandor de polisia en Afganistan este. Un de la femes, Anja Niedringhaus, ia mori en la ataca. On reporta ce se colaboror, Kathy Gannon, es en un state stable.

La ataca ia aveni en la vila Khost, prosima a la borda con Pacistan, a un tempo cuando Afganistan intensi la securia ante se elejes presidental a saturdi, respondente a menasas de violentia taliban.

La presidente nova va segue Hamid Karzai, ci governa ja de pos la despone de la taliban en 2001, ma ci la constitui proibi de continua per un periodo tre en segue. On teme ce un froda votal va aveni.

La du jornalistes ia es viajante con un convoia de laborores votal, protejeda par soldatos de securia afgani. La convoia ia es traente caxas de vota de la sentro de Khost a Tani, un distrito a la borda de la vila. La jornalistes ia es en se auto propre, con un interpretor e un otra jornaliste autonom.

No longa ante la xuta, los ia ariva en un compleso forte gardada. En cuando los ia senta sur la seja retro de la auto, espetante ce la convoia va move denova, un comandor de polisia ia cria "Dio es grande" en arabi e ia fusili a los. El ia sede alora a la otra polisiores ci ia aresta el.

Anja Niedringhaus ia es direta matada. El ia ave 48 anios. El ia es un fotojornaliste deutx e un membro de un ecipo ci ia gania la Premio Pulitzer per se reportas sur la gera en Irac.

La UE lansa un satelite per monitori la state de la Tera

On ia lansa un roceto de Guian Franses con la satelite prima en un program nova de la Uni European per monitori la Tera. La veculo Sentinel-1a orbita aora en un mision per mapa la surfas de nos planeta con radar. Un flotila de otra satelites, ance nomida Sentineles, va segue lo en la sinco anios seguente.

Bruxelles descrive se program "Copernicus" como la atenta la plu grande de istoria per oserva nos mundo. Cuando la sistem intera opera, lo va produi oto terabaites de datos en cada dia, detaliante la state de la surfas, la mares, e la atmosfera de la Tera.

Nasiones european ia dona 7,5 mil milion euros ($10,3 mil milion) a la projeta. Ma on intende ce la program va sesa nunca. Cada satelite Sentinel va es recambiada a la fini de se mision, sertinte ce on ave informas continuante tra esta sentenio.

José Manuel Barroso, la Presidente de la Comision European, ia dise: "Esta investi va permete ce Europa institui se a la fronte de rexerca e inova en un campo estrema moderna – la spasio. On ia crea multe postos per persones capas, e multe plu va veni futur."

La roceto Soyuz cual ia porta la oservador prima ia asende de la lanseria a la costa guianes a 18:02 de ora local (21:02 UTC). Se viaja a la altia de 699 cilometres ia ocupa 23 minuts. Pronto a pos, on ia reseta un sinial confirmante ce Sentinel-1a ia separa bon de la roceto.

A la sentro de opera de la Departe Spasial European en Darmstadt en Deutxland, controlores ia comensa par inisia la satelite. Los ia spende la oras prima en envia comandas a lo afin lo despaci se alas solal e la paneles de se strumento de radar. Estas ia es pliada per pote senta en la roceto.

On previde ce la satelite va comensa formal se servi pos sirca tre menses. An tal, probable lo va comensa imaji la Tera an en la semana veninte, per comensa la prosede de ajusta se strumentos.

Radar ave multe usas, incluinte la monitori de vias de barcon per contamina o isberges, e la mapa de surfases teral per segue la desforesti o la produi de ris. Ma Sentinel-1a va es estrema usosa ance en responde a desastres. Radar es spesial bon per deteta la estende de acuas de inonda, e on emplea comun lo ance pos tremateras major per evalua danas a infrastrutur.

Un selaco mata un fem nadante a un plaia australian

Un fem ia deveni matada par un selaco cuando el ia nada a un plaia popular en Cimri Sude Nova en Australia. Christine Armstrong ia es nadante entre la molo e la plaia a la vileta Tathra cuando el ia es atacada. El ia ave 63 anios.

La polisia reporta ce se sposo ia vide la forma de un selaco cual ia pare ave tre o cuatro metres de longia. On ia clui la plaia en cuando barcos e elicotores ia xerca se corpo, ma un mal clima ia fa ce on abandona la xerca.

La servis de crise ia trova alga restas umana partal, ma on ancora no ia confirma ce los relata a la fem mancante.

La manejor jeneral de la comite local ia dise ce la grupo de nadores de cual seniora Armstrong ia es un membro reuni a la plaia a cada matina per nada asta la molo e reveni. Seniora Armstrong ia nada con un grupo en la matina de jovedi, ma cuando la selaco ia ataca, el ia separa ja de los e ia comensa reveni solitar.

Se familia ia clari ce el ia nada a la plaia de Tathra tra 14 anios. On ancora no sabe cual spesie de selaco ia ataca el. Un cuantia de tal atacas ia aveni prosima a plaias australian en la menses resente.

En Australia Ueste, la polisia crede ce un om de 38 anios, ci ia desapare en tufa prosima a Perth en la semana pasada, ia es cisa prendeda par un selaco. On ia trova restas umana con indicas de mordes par selaco, ma on no sabe esce estas ia es fada ante o pos la mori.

La governa de Australia Ueste ia comanda resente un mata de selacos, pos ses atacas matante a la plaias de la stato en sola tre anios. On ia instala oncas con tentantes en la acua prosima a la plaias popular de Perth, con intende de fusili cualce selaco con plu ca tre metres de longia. Ma miles de persones ia partisipa en protestas contra esta politica.

La UE vota per aboli paias vagante de telefoneta

La Parlamento European ia vota per aboli paias ajuntada per usa un telefoneta cuando on es estra se pais propre. Pos esta reforma grande de telecomunica, la costa de un telefoni o de descarga datos de interede en un otra pais de la UE va es la mesma como en la pais propre.

La cambia va reali a 15 desembre 2015, si la governas de la UE aproba lo.

Alga consumores ia reseta faturas enorme pos deveni caturada par la costas presente alta per la usa vagante de telefonetas.

En anios resente, la UE ia fa leges per redui la costas, obligante companias de telecomunica a pone un limita masima a esta paias. En 2013, la limita per surfa la ueb ia es reduida de €0,70 per megabait a €0,45.

Un sonda par la Comision European en febrero ia sujesta ce 94% de europeanes restrinje se usa de la rede cuando los viaja en Europa, par causa de la costa de vaga.

La Parlamento ia adota la proposa con 534 votas favorente e sola 25 en oposa.

Neelie Kroes, la Comisionor UE per la Futur Dijital, ia dise ce "consumores no va tolera plu la costas estrema".

La regulas nova ariva a un tempo cuando usores consuma sempre plu datos par se telefonetas e tabletines. On previde ce, cuando redes de jenera cuatro ofre descargas an plu rapida, la consuma de datos va crese esponente.

2014-04-03

Milion refujadas suri ia rejistra se en Lubnan

La Nasiones Unida dise ce la cuantia de refujadas ci ia fuji de Suria e rejistra se en Lubnan ia suprapasa un milion. Lubnan ave aora la consentra la plu alta de refujadas per person, de mundo. Lubnan es un nasion peti con multe problemes propre, e la efeto a lo es enorme.

Cuasi un dui de la popla de Suria, sirca 9,5 milion persones, ia fuji de se casas de pos la comensa de la gera interna ala, entre rebelores con gidores suni e la governa de Bashar al-Assad.

Plu ca 2,5 milion ia fuji de la pais. Cuantias grande ia vade a Turcia, Jordan, Irac, e Egipte, entre otras. Ma Lubnan ia reseta un cuantia egal a un cuatri de la cuantia de abitores local. En la mense pasada, la ministro lubnani de esternas ia comenta ce la crise "menasa la esiste" de se pais.

António Manuel de Oliveira Guterres, la ambasador NU per refujadas, ia dise: "La popla lubnani ia mostra un jenerosia notable, ma la maneja de la influe es difisil" – per los e per organizas internasional de aida.

Se departe nota ce la influe de refujadas aselera an. En cada dia en Lubnan, lo rejistra 2500 refujadas nova: plu ca un person en cada minuto. Lo ia reseta sola 14% de la $6,5 mil milion euros de suporta finansial cual lo nesesa.

La problemes cual fronti multe refujadas ia es dramosa indicada en la semana pasada, cuando un madre con sposo malada e cuatro enfantes ia ensende se en protesta contra la manca de aida. El ia es grave ferida.

La gera en Suria ia turba la tensa setal ance en Lubnan, de cual se popla muslim – suni e xia – es grande. Sentos de persones en Beirut e otra partes de la pais ia es matada en violentia entre oposores e suportores de Presidente Assad.

Yanukovych parla sur la "trajedia" de Crim

Viktor Yanukovych, la presidente desponeda de Ucraina, ia dise ce la saisi de Crim par Rusia es "un trajedia major" e ce el espera ce lo va deveni denova un parte de Ucraina.

En un intervisa, el ia clari ance ce el no ia comanda ce on xuta protestores en la capital, Kiev. Yanukovych ia fuji de Kiev pos protestas en cual plu ca 100 persones ia mori.

En la entretempo, Jeneral Philip Breedlove, un comandor xef de OTAN, ia averti ce soldatos rusce es capas de prende areas vasta de Ucraina en la poca dias veninte. On crede ce Moscva ia asembla resente desuples de miles de soldatos a la borda este de Ucraina, causante alarma en Kiev e la Ueste.

Breedlove ia dise ce tota elementos es presente per un avansa rapida, incluinte veculos blindada, unias macinida, elicotores, aviones, e tota la lojistica suportante.

En marto, Rusia ia saisi Crim, un penisola en la sude de Ucraina, pos un referendo controversa cual Kiev e la Ueste ia descrive como nonlegal. La popla de la penisola es xef de etnico rusce. Moscva ia insiste ce lo ave no intende de invade Ucraina, ma se condui ia causa consernas en Esti, Latvia, e Lietuva, cual ia parteni a la Uni Soviet en la Gera Fria.

Yanukovych es aora en Rusia. En se intervisa, el ia dise ce el va atenta convinse Vladimir Putin, la presidente rusce, a redona Crim a Ucraina. "Nos debe crea un tal taxe, e xerca modos de revade a Crim en cualce situa, afin Crim pote ave la grado masima posible de autonomia… ma como un parte de Ucraina."

El ia dise ce, si el ia ta resta en governa, el ia ta atenta preveni la referendo. El ia descrive lo como "un forma de protesta" contra la gidores nova de Ucraina ci favore la Ueste.

Sur la xuta de protestores, el ia clari ce esta ia es fada par la lado oposante, no par la polisia de tumulta. "Me mesma ia dona nunca un comanda de xuta," el ia dise. "Me prinsipes, cual me segue sempre, es ce no autoria, no potia merita an un gota de sangue."

La turba en Ucraina ia comensa tarda en la anio pasada, cuando Yanukovych ia rejeta un acorda de asosia con la Uni European, favorente lias plu prosima con Rusia en loca.

Un soldato fusili colaborores a un base militar SUA

A un base militar en Texas en la SUA, un soldato ia fusili, matante tre colaborores e ferinte 16 otras, ante mata se.

On no ia confirma ofisial la identia de la suspetada, ma jornalistes ia identifia el como Ivan Lopez. El ia ave 34 anios, e ia sufri de problemes de sania mental.

Un portavose militar ia dise ce on ave ancora no indicas ce la fusilis a mercurdi es relatada con terorisme. El ia ajunta ce la suspetada no ia deveni ferida cuando el ia servi en Irac en 2011, ma ce on ia es evaluante el per deside esce el sufri de angusa pos trauma. On ia es tratante la fusilor per depresa e angusa.

On no sabe esce la ataca ia es preconsiderada. Tota la feridas e matadas es membros de la militaria.

Lopez ia gida un veculo a du construidas a la base e ia xuta ante cuando la polisia militar ia para el. La aveni ia dura tra 15 o 20 minutos. El ia fusili alora se testa propre con un pistol semiautomata de calibre .45, cual el ia compra en un boteca local.

A la mesma base, Fort Hood, en 2009, un ataca con fusil ia mata 13 soldatos e feri 32. En setembre 2013, on ia condena Major Nidal Hasan a mori per acel ataca.

Hasan ia declara ce el ia xuta per proteje rebelores taliban de soldatos SUA ci ia es a punto de vade a Afganistan. Acel ia es la ataca la plu matante contra un loca militar en la istoria de la SUA.

Un video causa la resinia de un aidor de la ministro xef de Elas

Un aidor major de Antonis Samaras, la ministro xef de Elas, ia resinia sur un rejistra video en cual el pare acusa se xef de influe un investiga criminal.

En la video, Panayiotis Baltakos conversa con un portavose de Aurora de Oro, un partito estrema destriste, sur la aresta de se gidores en setembre. La partito acusa ce la governa, un alia gidada par conservistes, persegue lo per razonas political. Un ministro ia rejeta la acusa como un fantasia.

La video es no sola embarasante per la governa, ma ance un plu atesta ce la autoriosas judinte de Elas no es nondependente, e ce la caso contra Aurora de Oro no es intera solida.

A la vota jeneral la plu resente, en junio 2012, Aurora de Oro ia gania 7% de votas, en cuando la partito Democratia Nova de Samaras ia gania 30%.

Ilias Kasidiaris, la portavose de Aurora de Oro, ia es un de sete parlamentores de la partito ci on ia aresta en setembre de la anio pasada, su acusa de parteni a un grupo criminal. El ia es librida a pos. El ia es en parlamento a mercurdi per oposa un proposa de sutrae se direto parlamental de nonprosede – ma on ia sutrae esta esenta de el e cuatro otra parlamentores de se partito.

Kasidiaris ia publici la rejistra de se conversa con Baltakos, per suporta se declara ce la partito ia deveni un vitim political. En la video, Baltakos dise ce la gidores de Aurora de Oro ia es prisonida pos un comanda par ministros de la governa, e ce la autoriosas ia posese no atestas contra la partito.

En anunsia se resinia, Baltakos ia clari ce se comentas ia es intendeda sola per pasi ofisiores de Aurora de Oro ci ia acusa el de conspira contra los.

2014-04-02

Un corte en Turcia judi ce la proibi de Twitter es nonlegal

La corte constitual de Turcia ia judi ce la proibi resente par la pais contra la usa de Twitter es un viole de la libria de espresa e la diretos de individuas.

En un mesaje a la autoriosa de telecomunica e a la governa, la corte ia dise ance ce on debe cansela la proibi.

Twitter mesma ia rejistra un defia de la proibi, cual ia es instituida a 21 marto par causa de un fali par Twitter de sutrae alegas de froda pertinente a ofisiores major.

On no sabe esce la judi va causa vera un cansela de la proibi. La autoriosas ia fa ancora no comenta publica sur la deside, ma Recep Tayyip Erdoğan, la ministro xef, ia promete "elimina Twitter" pos cuando usores ia difusa la alegas.

Usores ia fa cexas en cortes, razonante ce la proibi es nonlegal e nonconstitual.

La corte en Ankara ia fa un comanda tempora cual obliga la autoriosa de telecomunica a restora la asede a Twitter, asta la prepara de un documento con concluis completa sur la proibi.

En la entretempo, la proibi ia deveni vasta criticada e burlada, e usores tra la pais ia trova multe modos de sircoveni lo.

La voses de la papes apare en un arcivo enlinia

La Vatican ia anunsia ce on va pote escuta rejistras audio, conteninte la voses de papes de pos 1884, en un arcivo dijital nova. Esta va abri a la publica a 27 april, como un parte de la santi de Papes Ioannes Paulus 2 (1978-2005) e Ioannes 23 (1958-63).

Un portavose ia dise ce la arcivo va aida conserva la rejistras: "En esta modo, la papes resta entre nos, par se voses."

La colie enlinia es composada de plu ca 8000 rejistras istorial de Radio Vatican. Acel organiza ia cumula rejistras de pos se inisia su Pape Pius 11 en 1931. Ma lo posese ance otra rejistras, como la ensiclica Humanum Genus cual Pape Leo 13 ia rejistra par ditador en 1884.

La arcivo, "Voses de la Papes", catura momentos istorial como la apela de Pius 12 en agosto 1939, direta ante la comensa de la Gera Mundal Du, en cual el ia dise: "La peril prosimi, ma tempo es ancora disponable. On perde no cosa con pas, on pote perde tota con gera."

Lo conteni ance la "Parla a la Luna" improvisada par Ioannes 23 en 1962, cuando el ia dise a la fola en la Plaza de San Pietro: "Cuando vos vade a casa, trova vos enfantes. Abrasa e besa vos enfantes e dise a los: 'Esta es la abrasa e besa de la Pape'."

Ance en la arcivo es la parolas de Paulus 6 pos la fura e asasina de Aldo Moro, la ministro xef de Italia en 1978, e la ataca emosiosa par Ioannes Paulus 2 en 1993 contra la "cultur de moria" de la mafia pos un serie de matas major.

De plu resente, on trova la parla de renunsia par Benedictus 16 en 2013, en cual el ia dise ce el "va es simple un peregrinor ci comensa la fase final de se peregrina sur esta Tera".

Un trematera major colpa Txile

Un trematera con grandia 8,2 ia colpa Txile norde, matante a la min sinco persones e creante un peril de tsunami. La trema ia aveni a 20:46 de ora local (23:46 UTC) a sirca 86 cilometres a norde-ueste de Iquique, un area de escaverias.

Alga partes de Txile ia vide ondas con altia de asta 2,1 metres, e la pais ia esperia faltas de eletrica, focones, e liscas de tera.

On ia sorti desuples de miles de persones de la areas pertinente, do on ia declara ance un state de crise. Multe conjestas de trafica ia aveni en cuando persones ia atenta parti.

Ofisiores ia dise ce la mores inclui persones craseda par mures colasante e alga matadas par atacas de cor. Plu, Gonzalo Prieto, la governor de Iquique, ia informa jornalistes ce alga persones ia es grave ferida.

La governa ia reporta no danas major a areas costal, ma alga casas de adobe ia es destruida en Arica, un site de porto. La trema ia secute ance construidas moderna en Peru e en La Paz, la capital alta de Bolivia, a plu ca 470 cilometres de Iquique.

La trema ia es segueda par oto replicas, cisa plu, incluinte un con grandia 6,2.

Un de la vias xef estra Iquique ia deveni blocida par detrito cual ia cade. La ministreria de internas dise ce liscas de tera ia aveni ance entre la vilas Putre e General Lagos, e ce 300 prisonidas fema ia evade un prison en Iquique. On ia envia un avion de soldatos spesial per preveni saisi benes de botecas.

Michelle Bachelet, la presidente de Txile, va viaja a la area colpada.

Un reporta detalia maltratas de prisonidas par la CIA

La CIA (Departe Sentral de Securia) ia malgida la governa de la SUA sur la severia e produosia de se metodos de interoga.

Un reporta secreta de 6300 pajes, par la Senato de la pais, dise ce la CIA ia interoga prisonidas en "locas negra" secreta, usante tecnicas cual on no ia reconose a ante. Estas ia inclui sumerji suspetadas en acua jelin, e bate la testas de prisonidas contra mures.

La descovres relata a la eda de George W. Bush, ci ia es la presidente entre 2001 e 2009.

Ofisiores ci ia regarda la documento ia dise ce la interogas par la Departe ia produi poca informas usosa. Los ia dise ance ce on ia esajera esta informas a pos, afin la program pare plu produosa ca lo es.

La reporta, descriveda en la jornal Washington Post, segue un investiga vasta par la comite de securia de la Senato, cual ia comensa en 2009. La comite va consenta denova en jovedi per deside esce lo va envia un resoma de la reporta a Presidente Barack Obama, per un publici futur.

La jornal alega ce ofisiores xef de la CIA ia comanda la continua de interogas sever, an pos es convinseda ce la prisonidas pote ofre no plu informas. Un ofisior ia dise ce cuasi tota la informas valuosa de Abu Zubaida, un suspetada de al-Qaidah, ia es otenida ante se tortura a 83 veses con afocas similida.

La reporta ia refere ance a desacordas en la CIA en protesta contra la state cual prisonidas ia debe tolera.

Un portavose per la CIA ia responde ce la Departe ancora no ia vide la varia final de la reporta, e donce no pote fa un comenta ofisial sur se contenida. An tal, ofisiores presente e pasada ia informa privata la jornal ce la reporta conteni eras de fato e concluis noncoreta.

2014-04-01

Alga refujadas de Fukushima revade a se casas

La grupo prima de refujadas de Fukushima ia revade a se casas, a tre anios pos la desastre grande a la sentro de eletrica nucleal.

On ia permete ce sirca 350 abitores reveni a la distrito Miyakoji en la site Tamura, cual es en la raio de 20 cilometres cual defini la zona de esclui. La autoriosas dise ce la cuantia de radia en la area es aora tan basa ce on pote abita ala, ma multe abitores esita.

On ia sorti 80 mil persones pos la crise. A 11 marto 2011, un trematera e la tsunami seguente ia destrui la sistemes frinte de la reatadores a la sentro Fukushima Dai-ichi, fondente la reatadores e librinte radia.

Abitores de la zona de esclui es aora permeteda de revade permanente a casa. Otra partes de la area ia deveni vacua e descurada en cuando se abitores resta en casas tempora o con se relatadas.

On no sabe cuanto de la abitores va reveni. Kimiko Koyama, ci ave 69 anios, ia dise: "Multe de nos amis e visinas no va reveni. No emplea esiste asi. La situa es nonoportun, e la jovenes teme la radia."

An tal, otras es zelosa per reveni. Yutaro Aoki, un abitor ci supravide la recovre de la site, ia dise: "Persones vole revade e fa vives normal, vives de un spesie en cual los senti denova ancorida a la tera."

Lo resta nonclar cuando – o an esce – on va permete la reveni a casa de otra grupos de refujadas. On fa un taxe vasta de descontamina, ma probable alga areas va resta tro perilosa per abita tra anios.

Deutxland redona a Polsca un pinta furada par la nazis

Deutxland ia redona un pinta de la desenio des-oto cual la nazis ia fura de la Museo Nasional de Polsca en 1939. Frank-Walter Steinmeier, la ministro deutx de esternas, ia dona la obra a Radosław Sikorski, se corespondente polsce, a un presenta formal en lundi.

La obra, "Scalera de Palasio", par Francesco Guardi, un artiste venezian, ia es saisida a un tempo corta pos la invade deutx. Lo mostra aristocrates parlante a la scalera grande de la Palasio de la Doje en Venezia.

Pos la Gera Mundal Du, la pinta ia vade a la Universia de Heidelberg e a pos a la Galeria de Stato de Baden-Württemberg.

On ia reconose ce lo parteni a Polsce en la tarda de la desenio de 1990. Ma on ia nesesa un tempo longa per ateni un acorda, par esiste de diferes political entre Warszawa e Berlin sur la problem jeneral de obras de arte perdeda en la gera.

Polsca xerca ancora miles de obras furada de se museos e colies privata en la gera. Ma on crede ce multe ojetos ia es destruida a acel tempo.

Deutxland xerca la redona de 300 mil libros, desinias, e manoscritos – la colie Berlinka – de Polsca. La colie inclui partitures musical sciveda par mano par Mozart, Beethoven e Bach, cual la nazis ia move a Polsca per securi los contra bombas.

Abandonada par soldatos retirante en lo cual es aora Polsca, multe de esta ojetos es aora en la Universia Jagielloński en Kraków.

La xerca la plu defiante en istoria per un avion

La xerca per la avion mancante MH370 de Airolinia Malaisia es "la plu defiante" en istoria, e pote dura tra semanas, seguente Angus Houston, ci organiza la opera de Australia.

La avion ia desapare a 8 marto en viaja de Kuala Lumpur a Beijing, portante 239 persones. Ecipos esplora la sude de la Mar Indian per trasas de lo. Pos studia datos de satelite, la autoriosas malaisian ia conclui ce lo ia cade ala.

On ave no informa sur la altia cual la avion ia ateni pos se desapare de radar. An un cambia relativa peti ia ta pote altera la rapidia e consuma de carburante de la avion, e pos sete oras esta ia ta cambia enorme la locas posible de cade.

Multe relatadas de la pasajores ia esije un demostra ce la avion ia cade. Los ia espresa se coleria sur lo cual los persepi como un manca de informa de la autoriosas. 153 pasajores ia es xines, e duples de se relatadas ia viaja a Kuala Lumpur per xerca respondes.

Tarda a lundi, ofisiores malaisian ia publici un varia nova de la comunica final entre la controlores de trafica airal e la pilotes de la avion. A ante, los ia reporta ce la parolas ultima de la avion ia es "oce, bon note", ma los dise aora ce los ia es "bon note, malaisian tre sete zero". On no sabe la razona per la revisa.

Membros de la familias de la pasajores acusa ofisiores de malmaneja la xerca. Esta revisa la plu resente pote ajunta a se desfida de la autoriosas malaisian.