2014-12-06

Un periodo corta de inverni

Aora oji reposa per un mense, ma lo va comensa denova en janero.

2014-12-05

La re de Tai cansela se apare publica a se aniversario

Bhumibol Adulyadej, la re de Tai, ia cansela un apare publica a se aniversario 87, seguente conselas medical.

La anunsia aveni entre consernas cresente sur la sania de la re, ci es adorada par tais.

Miles de persones ia veni a la capital, Bangkok, esperante vide el a la Palasio Reial. On ia organiza avenis ance tra la pais intera, cual es ancora militar governada pos cuando la armada ia despone la governa en maio.

En un declara oji publicida, la ofisia de la re ia informa ce dotores ia esamina el e ia "acorda ce el no es en state conveninte per resetas formal, donce los ia recomenda ce el cansela se ativia reial."

Bhumibol, la monarca la plu durante de mundo, ia es publica videda en novembre. El ia spende la menses pasada en ospital, e on ia opera resente sur el per sutrae se vesica bilal.

Folas de suportores ia asembla ja estra la ospital, vestida en jala, la color de la monarcia, per envia se bon desiras.

Un de los ia comenta: "Lo no importa esce el apare publica o no. Me es mera felis ce me es asi per mostra me fida a el. Me es felis si el es en cualce loca."

En Tai, on senti un ama profonda a la re, ma la pais es ance governada par leges sever cual puni cualce critica de la monarcia con asta 15 anios en prison.

La eritor de Bhumibol es Prinse Vajiralongkorn, ma par causa de la leges, cualce discute de la pasa de rena es un tema estrema delicata, e on no pote reporta multe partes de lo en la pais mesma.

En la tarde de novembre, on ia descovre ce la prinse ia demanda ce la governa sutrae la nom reial donada de la familia de se sposa. On previde ce esta ia es la paso prima ante divorsa. On ia sabe ja ce la duple no coabita plu.

La comanda par la prinse ia segue la aresta de sete de la relatadas prosima de la prinsesa, en un elimina de ofisiores acusada de froda.

2014-12-04

NASA proba se capsula de Marte

Un capsula spasial cual ta pote aida umanas a ateni Marte va fa oji se vola prima.

Orion va es lansada de Capo Canaveral en Florida sur un roceto Delta, per un viaja corta supra la Tera per proba alga partes importante de se tecnolojia.

La capsula cono ave un aspeta simil a la barcones Apollo en cual persones ia viaja a la Luna en la desenios de 1960 e 1970, ma lo es plu grande e conteni sistemes estrema moderna.

Car esta es se viaja prima, lo no va porta pasajores. An tal, NASA, la ajenteria spasial SUA, descrive la proba como un aveni major.

On previde ce la enaira va aveni a 07:05 de ora local (12:05 UTC), dependente de la clima e de la bon state de tota preparas.

On developa Orion a lado de un roceto nova potiosa cual va es mesma inisiada en 2017 o 2018. En junta, la du va furni la capasias esensal nesesada per envia umanas ultra la Stasion Spasial Internasional a tal destinas como la planeta roja.

Oji, un otra roceto va envia Orion sirca la globo a du veses, lansante la capsula a la altia de sirca 6000 cilometres.

Esta va inisia un cade rapida a la Tera, e un reentra a la atmosfera con rapidia prosima a 30 mil cilometres per ora, cuasi tan alta como on ta previde per un capsula cual reveni de la Luna.

Injeniores va pote esamina la capasia de la scermo termal de Orion, cual va esperia probable temperatures plu ca 2000°C.

Los va oserva ance la ativi de la paracades cual va permete ce la capsula desende lenta a la Mar Pasifica, prosima a la penisola Baja California de Mexico.

La mision oji es sola un paso peti en un program multe longa de developa. Sin la recursos finansial de la eda de Apollo, NASA debe segue un curso pasiente en loca.

An si Orion ta es aora completa funsionante con se roceto propre dedicada, NASA no ta pote fa un mision a un otra planeta, car on ancora no ia produi la tecnolojia nesesada per esecuta taxes a la surfas.

2014-12-03

Arceolojistes mapa un site medieval sin escava lo

Arceolojistes ia produi un mapa detaliosa de un site medieval en England sin fa escavas a la loca.

Los ia usa la tecnicas la plu resente de scane per revela un rede de construidas a Old Sarum, un loca de la sentenio 11.

La resultas inclui un serie de strutures grande, cisa per defende, cual ave areas de tera noncovreda pos se, cisa per asembla persones o recursos.

Old Sarum – nomida Sorviodunum en latina – ia es la loca orijinal de la site Salisbury, situada a distantia de 3 cilometres, en England sude-ueste.

Lo ia comensa como un fortres de eda de fero, fundida sirca 400 aec e ocupada par la romanes pos se concista de Britan en 43 ec.

Esta esplora la plu resente de la loca ia es fada par la Universia de Southampton. Lo ia consentra sur la ensircas interna e esterna de lo cual ia es probable la fortres.

La tecnicas moderna usada per la jeometre ia inclui la magnetometria, mesuras de la resiste eletrical de la tera, la radar de penetra la tera, e la tomografia de resiste eletrical, cual usa eletrodos per esamina su la tera.

Kristian Strutt, la dirijor de servis tecnolojial arceolojial a la universia, ia dise: "Arceolojistes e istoristes sabe ja tra sentenios ce un site medieval esiste a Old Sarum, ma asta aora, on no ia ave un bon mapa de la loca.

"La nos esplora indica do construidas individua es situada, e de esta nos pote composa un pitur detaliosa de la organiza munisipal entre la mures de la site."

2014-12-02

Corea Norde no nega un siberataca contra un filma

Corea Norde ia refusa nega un envolve en un siberataca contra Sony Pictures cual ia presede la publici de un filma sur la gidor Kim Jong-un.

Sony investiga pos cuando se computadores ia es atacada e filmas nonpublicida ia deveni disponable en la interede.

En junio, Corea Norde ia cexa a la Nasiones Unida e la SUA sur la filma comedial La intervisa.

En la filma, Seth Rogen e James Franco ata como du reportores a ci on permete un conversa con Kim Jong-un. La CIA enscrive alora la du per asasina el.

Corea Norde ia descrive la filma como un ata de gera e "un sponsori nondesemblada de terorisme", e ia recomenda ce la SUA e la Nasiones Unida impedi lo.

La sistem de computadores a Sony Pictures, con base en California, ia fali en la semana pasada, e piratas de rede ia pone alora un cuantia de filmas ancora nonpublicida a locas de descarga enlinia.

Entre la titulos es un varia nova de la filma clasica Annie, cual on no ia intende publici ante 19 desembre.

Cuando on ia demanda esce la governa de Corea Norde ia es envolveda en la ataca, un portavose ia responde: "La fortes enemin relata tota a Corea Norde. Me consela jentil ce vos espeta mera e vide."

A lundi, Sony Pictures ia dise ce lo ia restora alga servis importante cual lo ia debe descomuta pos la ataca.

Lo ia dise ance ce lo labora con polisiores per investiga la ataca, ma ia fa no referes a Corea Norde.

La FBI ia confirma ce lo investiga. Lo ia averti ance otra comersias SUA ce piratas nonconoseda ia lansa un siberataca con programes vil destruosa.

2014-12-01

La xef de polisia en Kabul resinia entre atacas taliban

La xef de polisia en Kabul ia resinia, pos un crese de atacas par combatosas afgani contra stranjeres en la site tra la du semanas pasada.

Jeneral Zahir Zahir ia dona no razona per se resinia.

Tre sudafricanes ia es matada a saturdi en un ataca taliban contra un compleso usada par un asosia carital con base en la SUA. Esta ia es la tal ataca tre en 10 dias.

Presidente Ashraf Ghani, ci ia emprende se posto en setembre, ia promete reali un pas pos desenios de disputa.

Zahir mesma ia es la blanco de un ataca en la temprana de novembre, cuando un bomba umana ia infiltra se ofisias, sur cual on ia crede ce los es un de la construidas la plu secur en Kabul. Zahir no ia es presente, ma la atacor ia mata se suordinada.

En un serie de atacas en Kabul en esta semana, du soldatos american ia es matada a lundi, e du laborores de la ambasada brites ia es matada a jovedi.

Desuples de afganis ia es ance matada o ferida.

La ataca a saturdi ia es contra un construida usada par un organiza peti american de instrui. La organiza ia reporta ce tre de se empleadas ia es matada e alga otras ia es ferida en un ataca par fusilores, de ci un ia detona un bomba.

Kabul esperia comun bombis par la Taliban, ci intende ataca ofisiores militar, polisial, e governal.

En la semana pasada, combatosas taliban ia ataca ance un campa en la provinse Helmand, a un mense pos cuando fortes brites ia parti de lo.

La Taliban ia aumenta se atacas en Afganistan en cuando la plu de soldatos stranjer de combate prepara parti de la pais en desembre.

Como parte de un acorda sur la retira de esta soldatos, sirca 12 mil soldatos de OTAN va resta per instrui e consela securiores afgani, comensante a 1 janero.

2014-11-30

Suiz vota sur redui de migra

La abitores de Suiz vota en un referendo sur esce on debe redui la migras neta a la pais asta no plu ca 0,2% de la popla (16 mil migrores per anio).

Suportores de la idea declara ce lo va diminui la presa a la recursos de Suiz.

Oposores, incluinte tota la partitos political xef, dise ce lo va dana la economia.

En febrero, Suiz ia vota per reintrodui limitas, e donce en efeto ia eleje no partisipa en un acorda de moves libre en la Uni European.

La governa ancora no ia reali la resulta de la referendo de febrero, cual ia disturba la relatas de Suiz con la UE.

An si se nonemplea es basa e se cualia de vive es alta, multe suizes es ansiosa sur la problemes de suprafoli e degrada ambiental.

La cuantia de abitores en Suiz ia crese par plu ca milion en 20 anios, e es aora 8,2 milion. Cuasi un cuatri de los ci abita ala es stranjer, e la plu de estas ia veni de paises de la Uni European.

Sondas sur la vota sujesta ce la du lados va fini prosima, ma la indicas la plu resente es la idea va es ultima rejetada.

2014-11-29

Un corte egipsian va deside sur Mubarak

En Egipte, on previde la deside de un corte en la reprosede de Hosni Mubarak, la presidente desponeda, sur alegas ce el ia conspira sur la mata de protestores en la revolui de 2011.

En la anio pasada, un corte de apela ia desfa la condena inisial de prisoni per vive cual on ia dona a Mubarak.

Si on desculpa el, Mubarak no va es librida, car el es ja prisonida per tre anios per froda de reservas publica.

La om de 86 anios nega tota la alegas.

En 2012, on ia condena Mubarak – como ance se ministro de internas Habib al-Adly – a vive en prison per aida reali la moris de protestores en la revolui cual ia obliga el a resinia final.

Ma en janero 2013, un corte ia suporta un apela par la du omes contra se condenas, per razonas tecnical, e ia comanda un reprosede.

En agosto, un otra corte ia comanda ce on libri Mubarak de prison e envia el a un ospital militar en Cairo, do on teni el en state arestada.

Se fios Gamal (a ante, se eritor legal) e Alaa (un comersior), es ance reprosededa sur otra alegas de froda.

Mohamed Morsi, la islamiste ci ia segue Mubarak como presidente, ia teni la potia tra sola un anio ante se despone par la militaria en julio 2013. Acel ia segue cuatro dias de protestas antigoverna e la rejeta par Morsi de un esije ultima par la jenerales per solve la crise political la plu mal en Egipte de pos 2011.

Abdel Fattah al-Sisi, un xef pasada de la armada, ia es elejeda como la presidente nova de la pais a pos.

En un developa separada ier, a la min du protestores ia mori en scaramuxas entre protestores islamiste e la polisia en Cairo.

La protestas ia es organizada par Salafi, un grupo estrema conserviste, cual ia oposa la despone de Morsi. La grupo ia demanda ce protestores defende lo cual lo ia nomi "la identia muslim" de Egipte.

Ajunta: La corte ia deside cansela intera la caso contra Mubarak.

2014-11-28

Pape Fransisco visita Turcia

Pape Fransisco va ariva pronto en Turcia en un viaja descriveda como major, per aida comunicas intercredal en la pais.

A la comensa de se visita de tre dias, en Ankara el va encontra Recep Tayyip Erdoğan, ci ia domina la politica turces tra 12 anios.

El intende alora vade a Istanbul per consenta con la xef de la eglesa ortodox cristian.

Esta es sola la visita cuatro par un pape a Turcia, do la majoria de persones es muslim.

En se viaja, on ia organiza ce Pape Fransisco visita la mascita de Sultan Ahmed en Istanbul, un loca de adora construida en la sentenio 17 e comun conoseda como la Mascita Azul.

El intende ance suscrive un declara juntada con Patriarca Bartolomeo 1, la gidor de 300 milion cristianes ortodox, per aida ponti la vale entre catolicisme e cristiania ortodox.

Se visita aveni a un tempo cuando la politica en la area es plu delicata ca normal.

Turcia conteni aora a la min 1,6 milion refujadas de la gera en Suria. La plu de los abita prosima a la borda cual separa la du paises.

La viaja de la pape ave cualias umaniste, e on previde ce el va comenta sur la mal situa de la refujadas.

En un intervisa a la sera ante se visita, la Pape ia clari se sentis sur la gera suri. El ia informa un jornal israeli ce la persegue de cristianes en la area es "la plu mal" de pos la dias prima de cristiania.

An si la plu de la 80 milion sitizanes de Turcia es muslim, sirca 120 mil cristianes abita en la pais, cual ia es la sentro de la mundo cristian ortodox a un ves pasada.

2014-11-27

Pasajores puia un avion jelada

En Sibir, pasajores desirante vola ia sorti de se avion e puia lo, pos cuando se frenos ia jela.

La avion ia atenta enaira de Igarka, un vila rusce, ma no ia pote move cuando la temperatur ia cade tro.

La pasajores, de ci multe ia es turnores, ia ofre aida, temente un pospone de se viaja a casa si no.

A pos, la avion de la airocompania Katekavia ia susede enaira e ia atera secur en la site Krasnoyarsk.

Un portavose ia clari: "Seguente la raconta prima, la temperatur de la aira ia ateni -52°C, e la sistem de frenos en la avion ia jela en se posa parcida. La trator puiante no ia susede move la avion a sur la via a la atereria, e la pasajores ia deside aida puia lo. Esta no es permeteda car lo pote dana la casca de la avion."

Avocatos controla aora esce la airoporto, la airocompania, la ecipo, o la pasajores ia rompe cualce leges de securia avional.

Igarka es situada a 160 cilometres a norde de la Sirculo Artica, donce temperatures multe fria en inverno no es nonusual. Ma -52°C es notable plu fria ca normal: la promedia de la temperatur basa es plu simil a -30°C.

La airoporto es un sentro major per volas en la area. Lo es usada par 100 mil pasajores per anio, de ci multe labora en la campos artica de petrolio e gas rusce.

2014-11-26

Protestas tra la SUA sur la xuta en Ferguson

Tra la SUA, folas ia asembla per protesta contra la deside a lundi de no prosede un polisior sur la mata de Michael Brown, un adolesente negra.

La polisior blanca ci ia mata Brown ala dise ce el ave "un consiensa pur". Darren Wilson ia fusili la om de 18 anios a 9 agosto, gatilinte semanas de turba en la vila Ferguson en Missouri.

Protestas de New York a Seattle ia es xef pasosa, ma tumultas ia aveni en Oakland en California. En e sirca Ferguson, la suburbe de St Louis do tumultas major ia aveni a lundi, 2200 soldatos de la Garda Nasional ia es posada per para plu turbas.

La comunia de Ferguson es xef african-american, e multe de los ia recomenda ce on prosede la polisior per omiside. Ma la deside de la juria alta sinifia ce el no va fronti alegas criminal sur la xuta.

Avocatos per la familia de Brown ia denunsia la deside como "nonjusta" ma ia condena ance la violentia cual ia segue lo.

Con un cuantia plu ca truplida de soldatos, la situa en Ferguson ia es calma tra la plu de ier, an si protestores ia clui corta un via major en la sentro de St Louis, e protestas ia aveni estra la corte federal.

Ma tarda en la sera, la situa ia deveni plu tensada. Protestores ia ensende un veculo de polisia pos fali inversa lo, e la polisia ia comensa vacui la stradas, xutante bombas de fuma e gas lacrimojen, e arestante alga persones.

La protestores ia porta cartones con la mesaje "Vives negra importa". Los ia canta lenta "Manos alta, no fusili" en refere a alegas par alga atestores ce Brown ia leva ja se manos cuando el ia es fusilida.

En Oakland, en la area de la Baia de San Francisco, tumultores ia fa vandalisme a autos de polisia e a organizas comersial en la sentro. Esta ia es la note du de turba en acel site de porto, do 406 mil persones abita.

On ia reporta la fura de benes en alga locas, incluinte un venderia de autos clasica e un boteca de telefonetas. Un strada xef ia es blocida per un tempo corta. A la note de lundi, la polisia ia aresta 43 persones en Oakland en atenta controla un fola de sirca 2000 persones.

Protestores ia susede ance para corta la trafica en la sentro de Los Angeles ante cuando la polisia ia ariva per sperde los.

A otra locas en la pais:

– Sentos de persones ia impedi la trafica en Cleveland en Ohio, en un protesta separada sur la mata par xuta de un xico de 12 anios par un polisior.

– Protestores en New York ia clui corta la Ponte de Brooklyn e ia disturba la trafica sur otra vias.

– Un auto ia xoca protestores ci ia bloci un via en Minneapolis, ferinte un person.

– En Chicago, on ia fa un protesta par senta estra la ofisia de la maior.

Parlante en Chicago ier, la presidente Barack Obama ia dise ce "no escusa" esiste per conduis destruosa e atas criminal de tumulta. El ia ajunta ce la culpables debe es prosededa.

El ia dise ce la frustra a la deside par la juria alta "ave radises profonda en multe comunias de color ci ave un senti ce nos leges no es enforsada en modo uniforma o justa".

2014-11-25

Abitores japanes es iritada par nozas malodorinte

La belia de la vista autonal de arbores ginco en Japan es ruinada par la odor repulsante de la nozas sur tera.

Alga abitores en sites japanes cexa sur la apesta de la frutas cual ia cade, e governas local atenta trova modos de solve la problem.

Cuando los es fresca, nozas de ginco es regardada como un parte valuosa de la cultur japanes de comeda. Ma la asida butirica en la pulpa cual ensirca la noza crea un odor simil a bur putrida, vomita, o un ceso estrema forte.

La problem es malida par la bolevares vasta de gincos plantada en sites japanes per se tetos jala spetaculin en autono.

On ia planta sirca 570 mil tal arbores tra la pais.

An si sola gincos fema produi nozas, la distingui entre arbores mas e arbores fema es difisil cuando los es ancora joven. Per esta razona, en un de la locas de ginco la plu bon conoseda en Osaka, sola un cuatri es fema.

Empleadas labora tra la note per secute la arbores e cade la nozas per distribui a abitores local. En Kawasaki, empleadas de la governa ia dona la nozas sin custa a un aveni munisipal.

An tal, la odor resta un problem. Un ofisior ia dise ce la apesta es final mera un cosa cual on debe tolera: "Nos ia aseta sempre lo como un situa contra cual nos pote fa no cosa."

2014-11-24

500 leones-de-mar mor es trovada en Peru

Peru investiga la moris de sirca 500 leones de mar ci on ia trova sur un plaia de se costa norde.

La governor local ia acusa pexores de veneni la mamales, ci prosimi comun a la costa per xerca comeda.

Ma la polisia ambientiste de Peru esplora otra causas posible de la moris, incluinte un maladia e la come nonintendeda de plastica.

La corpos putrinte ia es trovada sur la plaia de Anconcillo en la area Ancash. La corpos ia es de animales joven e vea.

On ia deside ce los es un peril de sania e ia sutrae rapida los de la plaia, a 400 cilometres a norde de Lima, la capital peruan.

Plu temprana en esta mense, un situa simil ia aveni plu norde, prosima a Piura, cuando la corpos de cuasi 200 leones de mar, delfines, tortugas, e pelicanes ia es deponeda sur un plaia.

Ofisiores investiga ancora la causas de acel moris.

En 2012, on ia trova sentos de delfines mor longo un estende de la costa peruan. La grupo ambientiste Orca ia judi ce acel mores ia es causada par ruidos e ondas de presa creada par esplodes relatada a la xerca de petrolio en la area.

Ma un reporta governal par la Instituida Maral ia elimina la xerca de petrolio, e ance infetas de virus or baterias, como causas de la moris de la delfines.

La reporta ia culpa causas natural.

2014-11-23

La limita de tempo prosimi en discutes sur la program nucleal de Iran

On comensa sempre plu duta ce discutes en Wien, Austria va ateni un acorda sur la program nucleal controversa de Iran ante un limita de tempo a fini de lundi.

Ambos Deutxland e la SUA ia dise ce la du lados labora per clui "bucos grande", e alga ia sujesta ce on pote estende la limita de tempo.

Ses potias global vole ce Iran restrinje se program nucleal par intercambia afin la Nasiones Unida sutrae se punis.

Iran rejeta la alega ce lo atenta construi armas nucleal. Lo dise ce se program es intera pasosa, e intende usa lo per produi enerjia.

Representores de la grupo nomida P5+1 – Britan, Frans, Rusia, la SUA, e Xina, con Deutxland – partisipa en la negosias con Iran en la capital austrian.

John Kerry, la ministro de esternas de la SUA, ia pospone un viaja a Paris per encontra se corespondente irani, Mohammad Javad Zarif, a la ves cuatro en sola tre dias.

La ministro de esternas deutx, Frank-Walter Steinmeier, ia descrive la discutes asta aora como "aidosa", ma ia ajunta: "Esta debe no masci ce un buco grande esiste ancora entre nos en multe aspetas."

On ave multe per discute, car un acorda ta pote cambia la politica en Asia sude-ueste. An tal, lo es ancora nonclar esce la du lados pote reali sufisinte rapida la desides political difisil.

On ia reporta un fonte european ci ia dise ce on ia fa "no progresa sinifiosa" e ce "la probablia de reali un acorda es alga reduida". Un ofisior major de la SUA ia dise ce la gol resta ce on ateni un acorda ante la fini de lundi, "ma nos discute e interna e con nos aliadas posibles diversa."

A la mesma tempo, un fonte irani ia dise ce la ecipo resta serta ce un acorda completa es ancora posible, sujestante ce on pote estende la limita par un o du dias.

Un conserna major de la SUA es preveni ce Iran produi un bomba a locas nucleal cual es secreta e nondetetada. Un partisipor de la discutes ia dise ce la gol es fa ce la linguaje deveni "tan nonpermeable como posible" per permete esaminas multe intruosa.

La grupo P5+1 e Iran ia ateni un acorda tempora a un anio ante aora. Ma la du lados ia fali crea un acorda durante ante julio, como prima desideda, e donce ia estende la limita asta 24 novembre.

Iran resiste ja atentas de redui se program nucleal tra cuasi un desenio.

2014-11-22

La pesta mata 40 persones sur Madagasicara

Un aveni de pesta sur la isola Madagasicara, a este de Africa sude-este, ia mata 40 persones e ia infeta sirca 80 otras.

La Organiza Mundal de Sania ia averti sur la periles de "un sperde rapida" de la maladia en la capital, Antananarivo.

La situa es malida par un grado alta de resiste par pulgas contra un insetiside popular.

Usual, umanas developa la forma bubonal de la pesta pos es mordeda par un pulga infetada cual ia es portada par un rodente. Si on diagnose temprana lo, on pote trata la pesta bubonal con antimicrobios.

Ma 2% de la casos en Madagasicara es la forma pulmonal de la maladia, cual es plu perilosa e pote es sperdeda de un person a un otra en tose.

La caso prima conoseda de la aveni ia es un om en la vileta Soamahatamana en la distrito Tsiroanomandidy, a sirca 200 cilometres a ueste de Antananarivo, a la fini de agosto.

On ia reporta du casos confirmada en la capital, de cual un ia mori.

La OMS ia declara: "On ave aora un risca de un sperde rapida de la maladia, par causa de la densia alta de abitores en la site e la debilia de la sistem de aida medical."

Un forte de taxe ia ativi per maneja la pesta.

En la anio pasada, espertas ia averti ce la isola fronti un epidemica si lo no lenti la sperde de la maladia. Lo ia indica ce prisonidas es spesial perilida, car la prisones de Madagasicara es infestada con ratas.

2014-11-21

Cenia descovre paias a miles de laborores nonesistente

La governa de Cenia ia comanda un investiga pos descovre plu ca 12 mil nomes falsa en se lista de empleadas.

La nomes inventada ia es trovada en setembre cuando autoriosas ia comensa rejistra biometrial tota ofisiores publica.

La consilio governal ia demanda ce du comisiones antifroda inisia esploras.

Detetores de la Departe de Investigas Criminal ia reseta ance la taxe de investiga ofisiores sur esta descovres.

Un esamina plu temprana en esta anio ia trova ce milion dolares, cisa plu, es perdeda a cada mense en paias a "laborores fantasmin", entre otra finansiales nonormal.

La governa suspeta ce empleadas pasada ia continua reseta salarios an pos sesa labora.

Plu ca 12 500 nomes de empleadas de la governa ci no ia presenta se per la rejistra biometrial ia es sutraeda de la lista a la comensa de esta mense.

Uhuru Kenyatta, la presidente, la promete combate froda en la campo publica pos emprende se posto en april de la anio pasada.

2014-11-20

Un tempesta de neva mata sete persones en la SUA

On previde ce un plu metre de neva va cade sur partes norde-este de la SUA. Ier, un tempesta grande ia mata a la min sete persones en la stato de New York.

Alga partes de la site Buffalo es ja covreda su 1,5 metres de neva, e alga persones es trapida en se autos tra un dia e un dui.

Andrew Cuomo, la governor de New York, ia descrive la tempesta como "un aveni istorin".

Temperatures jelante ia continua en multe partes de la pais, disturbante multe la capasia de viaja.

Ventas forte e jelo ia causa asidentes de autovia e ia obliga alga scolas a clui.

En New York, plu ca 100 membros de la Garda Nasional ia es enviada per aida desnevi la vias e move veculos abandonada.

La Servi Nasional de Clima ia dise ce alga locas ia rompe cisa la recordo de cuantia de neva cadente en un dia. La recordo es 1,93 metres.

Servis de tren en partes de New York ia es suspendeda a mercurdi, e estendes longa de vias prosima a Buffalo ia es cluida.

En ajunta a la moris en New York, on ia reporta ance du moris relatada a la neva en New Hampshire e Michigan.

La clima ia mata sirca 20 persones tra la SUA de pos saturdi.

Tre pompores en Indiana ia es ferida cuando un otra veculo ia colpa se camion sur un strada covreda con neva.

2014-11-19

Un confere internasional sur interede aveni en Xina

Ofisiores e dirijores asembla ex Xina per un confere a tema de interede, suportada par la governa, entre criticas contra la praticas interedal de Beijing.

La Confere Mundal de Interede, en Wuzhen, es un parte de la intende par Xina de ave un rol plu grande en la maneja de la siberspasio global.

La pais ave plu ca 600 milion usores de ueb. Ma Amnestia Internasional, un grupo promovente diretos umana, ia averti ce la libria de interede en Xina es "atacada".

La confere va inclui presentas sur governa global de interede, sibersecuria, e la interede portable. Lo es organizada par la Comite Siberspasial de Xina, cual es la gardor xef de interede en la pais.

Representores de companias global como Apple, Amazon e Microsoft es presente a la confere, a lado de companias de tecnolojia xines.

La governa xines bloci costumal miles de pajerias stranjer, incluinte furnores de novas e medios sosial como Facebook e Twitter.

William Nee, un rexercor sur Xina per Amnestia Internasional ia comenta: "La libria de interede es atacada par governas tra la mundo. Aora Xina pare desira promove se regulas propre de interede como model per regulas global."

La ofisior xines de grado la plu alta ci es presente a la confere, Ma Kai, ia dise ce tota paises debe reata sever contra ativias de terorisme en la ueb e colabora contra siberatacas.

Jack Ma, la fundor de la compania e-comersial Alibaba, ia informa la confere ce "la rede xines ia influe e cambia la sosia xines e la economia xines."

Plu temprana en esta semana, la sistem con nometa de la Parafoco Grande de Xina ia aumenta se sensura cuando la autoriosas ia bloci EdgeCast, un compania major de ospita ueb e furnor de servis de nube.

Armadas de sensurores sutrae cualce testos postada par sitizanes xines cual la propagandores oposa, e a veses la cortes deside prisoni la postores.

An tal, on permete ce la partisipores de la confere asede locas de rede como Google e Facebook cual es normal blocida en la pais.

2014-11-18

Cuatro persones es matada a un sinagoga en Ieruxalim

A la min cuatro israelis ia es matada e oto ia es ferida cuando du omes con pistoles, coteles e axas ia ataca a un sinagoga en la ueste de Ieruxalim.

La atacores ia es filastinis de Ieruxalim Este, e la polisia ia mata los par fusili.

Ieruxalim ia esperia un aumenta de tensa entre filastinis e israelis, en un serie de atacas matante con relata a un santeria disputada.

La ministro xef de Israel, Benjamin Netanyahu, ia promete responde "con mano forte a la omiside savaje".

El ia declara: "Esta es un resulta direta de provoca gidada par Hamas e Abu Mazen [= Mahmoud Abbas, la presidente filastini] cual la comunia internasional iniora nonsaja."

Plu temprana en esta anio, Hamas e la partito Fatah de Abbas ia acorda formi un governa unida. Israel ia denunsia acel.

Hamas e Jihad Muslim, un otra grupo filastini de combatosas islamiste, ia loda la ataca. Israel ia eticeti ambos grupos como organizas teroriste. Abbas ancora no ia comenta.

La atacas ia aveni a un loca de seminario relijial en un area xef ortodox de la parte Har Nof de la site.

Pitures postada a la rede par un portavose per la militaria israeli mostra un axeta sanguosa de carnor, parente usada en la ataca, en la construida. On vide ance un om ferida ci porta ancora se xal de prea.

La polisia ia clui la area. La ses adorores e du polisiores ferida es tratada en ospitales de Ieruxalim. On reporta ce cuatro es en un state grave.

En semanas resente, combatosas filastini ia fa du atacas matante contra paseores en la site, entre anunsias ce Israel intende construi plu casas en Ieruxalim este.

En otobre, un rabi major ia es ferida par fusil par un filastini a un compleso relijial importante en la site.

La compleso, conoseda a iudis como la Monte de Templo, e a muslimes como al-Haram al-Sharif, es la loca la plu santa de iudisme, e la mascita al-Aqsa es la loca tre de la plu santas de Islam.

Campaniores iudi ortodox en Israel oposa un proibi durante contra prea par iudis en la compleso.

Filastinis desira Ieruxalim Este per la capital de un pais futur, ma Israel ocupa ja lo de pos 1967.

2014-11-17

La economia japanes deveni retrosedente

La economia de Japan ia diminui, nonprevideda, a la cuatri du en segue. Esta indica tecnical un retrosede en la economia tre de la plu grandes de mundo.

La produi interna bruta ia cade par 1,6% per anio entre julio e setembre, en contrasta con prevides de un aumenta par 2,1%.

Esta ia segue un cade par 7,3% en la cuatri du de la anio, la cade la plu grande pos la trematera e tsunami de marto 2011.

On previde jeneral ce la ministro xef, Shinzo Abe, va anunsia un vota subita per oteni la autoria de pospone leva la imposta de vende a 10%, como on ia intende fa en 2015.

La aumenta de imposta ia es legida en 2012 par la governa presedente per redui la deta publica de Japan, cual es la plu alta entre nasiones developada.

La fase prima de la aumenta de imposta de vende, de 5% a 8%, ia aveni ja en april. Lo ia afeta la crese en la cuatri du e pare ancora afeta la state de la economia.

La datos mostra ance ce la crese en consuma privata, cual representa sirca 60% de la economia, ia es multe plu debil ca on ia previde.

Otra indicas economial resente ia mostra ance un economia caracolin e ia sujesta ja ce la aumenta veninte de imposta no pote aveni.

Abe ia entra a se posto a mera du anios ante aora. Jornalistes japanes reporta aora ce el pote anunsia tan pronto como doman un eleje political a 14 desembre.

An si se popularia ia diminui tra se periodo de ofisia, Abe va vinse probable si el anunsia un tal vota, car la partito oposante resta divideda e confusada.

2014-11-16

La presidente de Jazair ia es ospitalida en Frans

La presidente jazairi, Abdelaziz Bouteflika, ia revade par avion a Jazair pos spende du dias en un ospital franses.

La gidor vea, ci ia sufri un ataca serebral en 2013, ia es ospitalida en Grenoble a jovedi.

On no sabe ancora la razona de se ospitali, e la governa jazairi ia fa no comenta sur la tema.

Bouteflika ave 77 anios e ia gida la pais de pos 1999. On ia vide rara el en publica pos se reeleje a se periodo cuatro de ofisia en April.

La jornal areal franses Le Dauphiné libéré [La delfinia librida] ia reporta a venerdi ce Bouteflika ia entra a la departe cardiolojial de un clinica privata en la vila en la sude-este de Frans.

La jornal ia dise ce un nivel intera de la ospital es reservada per crea un loca tan secur como posible.

Bouteflika es un veteran de la gera de autonomia jazairi de Frans, cual ia fini en 1962. On ia eleje el a presidente en 1999, a la fini de un desenio en cual la pais ia esperia un gera interna e sanguosa.

Se vinse la plu resente en esta anio ia es criticada par la partitos oposante, ci ia dise ce la votas no ia es coreta rejistrada e ce Bouteflika no conveni como aspiror par causa de se problemes de sania.

Consernas sur se sania ia comensa en 2005, cuando Bouteflika ia es ospitalida en Paris con un ulsera de stomaco.

2014-11-15

Un fem polsce vive pos declara de mori

Un fem polsce ci ia spende 11 oras en la friador de un moreria ia reveni a se familia, cexante ce el senti fria.

La dotor de la familia ia declara ce Janina Kolkiewicz, ci ave 91 anios, es mor pos esamina el.

Ma empleadas a la moreria ia es stonada de vide moves en se saco cuando lo ia es en la friador.

A se casa, Kolkiewicz ia recaldi se con un bol de sopa e du crepes.

La sobrina de la fem, en la vila Ostrów Lubelski en Polsca este, ia clama la dotor pos reveni a casa a un matina e descovre ce se tia pare no respira no ave un pulsa.

Pos esamina el, la dotor ia scrive se documnto de mori. On ia prende se corpo a la moreria e prepara per un funera pos du dias.

Kolkiewicz ia informa se relatadas ce el senti bon e normal pos reveni a casa.

El no comprende cuanto el ia prosimi a se tomba, car el sufri de un fase tarda de dementia.

On ia desvalidi se documento de mori, e la polisia investiga.

2014-11-14

Gidores de la mundo asembla en Australia

Gidores de la mundo ariva en Australia per un confere de G20 a esta fini de semana en la site Brisbane en Queensland.

La confere de du dias va consentra sur temas economial. La gidores va discute la crea de emplea, la identifia de frodores de imposta, e la forti de la economia global.

Relatas tensada con Rusia sur Ucraina va atrae ance la atende, e campaniores vole ce la gidores discute la cambia de clima.

En Brisbane, laborores de governa local ave un dia de vacanse par causa de la cuantia de restrinjes de viaja. Des-tre gidores va ariva ala oji.

6000 polisiores va manteni la securia. Dudes-sete grupos diversa ia reseta permetes de protesta a areas indicada, e on previde ce miles de persones va protesta tra la fini de semana.

Lo es probable ce la gidores va ajunta a un projeta ja acordada a un consenta de ministros de finansia en febrero, per aumenta la crese economial global par 2% en sinco anios.

Ma Australia ia resiste ajunta la cambia de clima a la temas per discute.

Plu temprana en esta semana, la SUA e Xina ia fa prometes importante sur emetes contaminante. La SUA ia promete reduis plu grande, e, a la ves prima, Xina ia declara un data ante cual se emetes va culmina.

An tal, la governa australian de Tony Abbott fronti criticas sur se politica de clima. Lo ia abandona un imposta de carbon e goles per la usa de enerjia renovable, preferente paia a contaminores per redui se emetes en loca.

Ier, plu ca 200 protestores ia asconde se testas en la arena sur la Plaia de Bondi, en un protesta simbolin contra la nonreata political a la cambia de clima.

La atende va es ance dirijeda a Vladimir Putin, la presidente rusce, en relata a Ucraina. Alga australianes ia demanda ce on impedi el de la confere par causa de la cade de avion MH17 de Malaysia Airlines.

Tredes-oto australianes ia es entre la 298 persones ci ia mori cuando la avion ia cade sur la parte este de Ucraina cual es ocupada par rebelores. Paises ueste crede ce la misil ia es furnida par Rusia, ma Rusia nega esta.

2014-11-13

On recatura un omisidor zelandes en Brasil

La polisia brasilera ia aresta un om zelandes ci ia es condenada a spende se vive en prison per molesta enfantes e per omiside.

Phillip Smith, ci ave 40 anios, ia es arestada en un otel en Rio de Janeiro. On previde ce el va es estradida o deportada.

A 6 novembre, Smith ia usa un pasaporte con se nom orijinal, Phillip Traynor, per vola a Txile e per continua alora a Brasil.

El ia fuji cuando el ia es librida per tre dias de un prison a sude de Auckland en Zeland Nova.

On ia condena Smith en 1996 pos cuando el ia mata la padre de un xico de 13 anios ci el ia maltrata sesal entre 1992 e 1995.

La familia ia move casa, ma el ia trasa la xico a se casa nova en Wellington en desembre 1995. El ia coteli la padre a multe veses, matante el. La xico ia susede evade e crea un alarma.

Pos oia ce on ia catura denova Smith, la vitim, ci ave aora 30 anios, ia dise ce el pote aora sesa dormi con un cotel su se cuxin.

La evade par Smith ia pone ajenterias de la governa zelandes en controversia. On sujesta forte un revisa de la sistem de libris corta de prison e de monitoris de ofendores major.

En un e-posta a Radio Zeland Nova, Smith ia clari ce el ia scemi se evade par controla criminal se nom orijinal e descovre ce nun ia ajunta un averti a lo.

El ia dise ance ce el ia pote finansia se evade con mone prendeda de alga comersias cual el ia maneja de prison.

Smith ia eleje Brasil car el ia crede ce, si on catura el, estradi el va es plu difisil, car Brasil e Zeland Nova ave no acorda formal de estradi.

On ia aresta el pos cuando algun en Rio de Janeiro ia reconose el de pitures sirculinte en oteles.

2014-11-12

On atenta atera un robot sur un cometa

La Ajenteria European de Spasio ia dona se aproba final per un atenta osante de atera sur un cometa.

La satelite Rosetta veni de relasa un aterador en un desende de sete oras a la surfas de cometa 67P/Churyumov-Gerasimenko.

La ecipo tecnical, locada en Darmstadt en Deutxland, ia confirma ce Rosetta es coreta aliniada.

Si Philae ariva susedosa, esta va es la ves prima de atera un robot sur la surfas de un cometa. On previde oia un confirma de susede o fali sirca 16:00 de ora universal oji.

On intende ce la robot peti usa vises e arpones per securi se posa sur la cometa.

Lo va envia direta un foto de se ambiente – un vista strana de cavas profonda e pinaculos de jelo.

Ma esta es un emprende de cual la resulta es estrema nonserta. Plu temprana oji, on no ia susede inisia la sistem de puxadores cual la robot ta usa per forsa se a en la surfas pos atera.

Stephan Ulamec, xef de atera, ia comenta: "Nos va debe aora fida sola la arpones, la vises en la pedes, o la molia de la surfas. Esta no fasili la taxe, serta."

Plu, la tereno elejeda per la atera es vera no plana. La robot risca xoca contra falesas, cade sur un inclina presipe, o desapare an en un fesur.

Ma Fred Jansen, la manejor de mision, ia dise ce an con esta defias, el es multe esperosa ce la resulta va es positiva.

Ian Wright, un otra siensiste laborante sur la aterador, ia dise: "Nos comprende ce esta es un aventura riscosa. En alga modo, acel es un parte de la stimula de la emprende. Tal es esplora: on visita la nonconoseda, on no sabe lo cual on va fronti."

La premio per un atera susedosa va es enorme valuosa – la capasia de esamina un cometa. On crede ce cometas conteni indicas importante de la materias orijinal de cual nos sistem solal ia es creada a plu ca 4,5 mil milion anios ante aora.

La aterador es nomida Philae, seguente la nom de un isola en la Rio Nilo do on ia descovre un obelisce cual, como la Petra famosa de Rosetta, ia aida desifri la ieroglifos egipsian.

2014-11-11

On descondena siensistes ci no ia preside un trematera

On ia desculpa un grupo de siensistes italian ci ia es condenada de mata sin intende pos fali predise un trematera.

La sete omes ia es condenada a ses anios en prison pos un trematera cual ia ruina L'Aquila, un vila medieval, en 2009, matante 309 persones.

La condena ia provoca controversia, e alga persones ia dise ce on ia prosede contra la siensa mesma.

Ier, un corte de apela ia desculpa la grupo. La judor, Fabrizia Ida Francabandera, ia judi ce no caso valida esiste per esamina.

Stefano Gresta, presidente de la Instituida Nasional de Jeofisica e Volcanolojia, ia dise: "La credablia de la comunia siensal intera de Italia es restorada."

La sete omes – de ci tota es siensistes major o espertas sur desastre – ia es membros de un comite asemblada en L'Aquila en 2009, pos un serie de tremas en la area.

A alga dias pos se consenta, un trematera de grado 6,3 ia colpa la vila a media de la note. Multe de la construidas medieval ia es destruida, e alga abitores ia culpa la comite per no furni avisas sufisinte.

En la prosede cual ia segue, la avocatos acusante ia dise ce la espertas ia ofre informas falsa calminte a la abitores. Los ia nota ce un comitor ia dise ce la tremas presenta "no peril".

Pos la condenas, plu ca 5000 siensistes ia suscrive un letera publica a Giorgio Napolitano, la presidente de Italia, per suporta la espertas. Multe ia espresa la opina ce la condenas representa un malcomprende fundal de la siensa de tremateras.

La deside de cansela ia aveni pos un apela cual ia dura tra un mense. La acusores ave ancora la direto de vade a un corte plu alta per atenta repone la condenas.

2014-11-10

80% de catalanes suporta autonomia de Catalunia

Un vota nonformal sur autonomia completa per Catalunia, en la norde-este de Espania, ia indica ce plu ca 80% de persones favore lo.

La vota nonobligante ia aveni pos cuando la corte constitual de Espania ia deside contra un referendo formal.

Plu ca du milion votores (de 5,4 milion ci ia ave la direto de vota) ia partisipa.

Artur Mas, la presidente catalan, ia bonveni la vota como "un susede grande", disente ce lo debe gida aora a un referendo obligante. "Nos ia gania la direto a un referendo," el ia dise a suportores aclamante. "Denova, Catalunia ia mostra ce lo vole governa se mesma."

El ia ajunta: "Me demanda a la persones de la mundo, me demanda a la jornalistes, e me demanda ance a la governas democrata de la mundo ce los aida la popla catalan a deside se futur political."

La vota ia aveni an si lo ia es forte oposada par la governa espaniol.

Parlante a ante, Rafael Catalá, la ministro espaniol de justia, ia descrive la eserse como "futil e nonusosa". En un declara formal, el ia scrive: "La governa considera ce esta es un dia de propaganda political, organizada par fortes proautonomia e con no spesie de validia democrata."

On ia presenta du demandas a votores – esce los desira ce Catalunia deveni un stato, e esce los desira ce acel stato es autonom.

Joana Ortega, la vispresidente de Catalunia, ia dise ce plu ca du milion persones ia partisipa en "un consulta de sitizanes", e ce, pos la conta de cuasi tota votas, 80,72% ia responde "si" a ambos demandas.

El ia clari ce pico plu ca 10% ia vota "si" a la demanda prima e "no" a la otra. Sirca 4,5% ia responde "no" a ambos demandas.

Otra sondas sujesta ce cisa 80% de catalanes desira un referendo ofisial sur la demanda de la state de Catalunia, e ce 50% favore autonomia completa.

Partitos unidiste razona ce, car la vota ia es organizada par grupos proautonomia, on no pote interprete ofisial lo como la desira de la area intera.

Plu ca 40 mil bonvolores ia aida organiza e esecuta la eserse nonformal.

La grupo Asembla Catalan Nasional ia colie suscrives a voterias sur un apela formal cual on va envia a la Nasiones Unida e la Comision European, demandante aida per convinse Espania a permete un referendo ofisial.

Nasionalisme en Catalunia es nurida par cexas economial e cultural. Esta area rica de 7,5 milion persones contribui plu a la economia espaniol ca lo reseta de la reservas de la governa sentral.

2014-11-09

25 anios pos la cade de la Mur de Berlin

Selebras aveni en Deutxland per onora la aniversario 25 de la cade de la Mur de Berlin.

On presenta consertas e esibis en la site, e canselor Angela Merkel va vade a un selebra enorme su sielo a la Porton de Brandenburg. On va relasa balones blanca longo do un parte de la mur ia sta, per simboli se desapare.

La Mur de Berlin ia es construida en 1961 per preveni fujis de Deutxland Este, un pais comuniste, a la ueste. Se cade en 1989 ia deveni un simbol forte de la fini de la Gera Fria.

Merkel va es acompaniada a la selebra par Lech Wałęsa, un organizor pasada de sindicatos polsce, e par Mihail Gorbatxov, la gidor soviet final.

La mur ia estende tra 155 cilometres de Berlin, ma oji sola sirca tre cilometres de lo sta ancora. En min ca un anio pos se cade, Deutxland – divideda pos se defeta en la Gera Mundal Du – ia es reunida.

Plu ca milion visitores ia ariva en Berlin per un fini de semana selebrosa cual va culmina plu tarda oji a la Pordon de Brandenburg.

Ier, persones ia posa se per fotos ante la poca partes restante de la mur grafitosa, o ia leje paneles de informa sur la vive en Berlin divideda. Otras ia amira un presenta artal de cuasi 7000 balones blanca, liada a la tera e serpente longo 15 cilometres de la curso de la mur.

Ma Gorbatxov ia fa ier un comenta sombre ce la mundo sta a punto de un Gera Fria nova. El ia dise ce la Ueste, e spesial la Statos Unida de America, ia deveni tro autosasiada sur se atenis pos la colasa de la Uni Soviet en 1991. Per esta razona, el ia dise, la potias global ia fali maneja la problemes en Iugoslavia, Asia sude-ueste, e aora Ucraina.

Gorbatxov ia gida la Uni Soviet en la parte tarda de la desenio de 1980. On atribui a el la rearmoni con la Ueste, e la crea de un atmosfera plu libriste cual ia causa final la cade de renas comuniste en Europe este en 1989.

2014-11-08

La Pilipinas onora la aniversario prima de un siclon ruinante

Miles de persones ia partisipa en un pasea de recorda a la aniversario de Siclon Hai-ian, cual ia ruina partes sentral de la Pilipinas a un anio ante aora.

Folas ia marxa tra la site Tacloban, e claxones e campanas ia sona a la ora esata de la colpa de la tempesta.

On ia fa ance protestas antigoverna sur lo cual alga vide como un reconstrui nonsufisinte rapida. La presidente, Benigno Aquino, ia nega ce la reconstrui es tro lenta.

La siclon, nomida Yolanda en la Pilipinas, ia colpa a 8 novembre 2003, enviante ondas enorme a areas interna e destruinte partes grande de la sentro de la pais.

Plu ca 7000 persones ia es matada en la desastre, e plu ca cuatro milion ia es deslocada. Multe de los abita ancora refujas tempora.

On ia fa rituos de recorda a saturdi a tombas coletiva en Tacloban, do alga miles de la vitimes es enterada.

A leva de sol, miles ia marxa en lus de candelas tra la site, pasante tra areas ruinada par la siclon. Asemblante a la tombas, lamentores ia scrive la nomes de amadas sur cruses blanca, plantada en modo simbolin per representa vitimes nonidentifiada.

La protestores ia arde un pupa de la presidente en la media de Tacloban. On ia acusa Aquino de no reconose ce la nesesa de reconstrui es urjente, en cuando projetas de construi casas nova e de trova tera secur distante de la costa deveni retardada.

Aquino no ia veni a Tacloban per onora la aniversario, ma el la visita ier la provinse Samar Este, colpada par la tempesta.

Tacloban es un fortres de la enemis political de la presidente. La dama prima pasada Imelda Marcos ia nase ala.

2014-11-07

Un corte malaisian desvalidi un lege relijial contra transvesti

Tre femes malaisian transjenero ia gania un apela contra un lege relijial cual proibi omes muslim de porta vestes fema.

La judor de la corte de apela, Mohamad Yunus, ia dise ce la lege "degradante, opresante, e noncompatiosa" ia es prejudosa contra persones con difisiles de jenero.

Tal difisiles, e ance la omosesalia, resta areas tabu en Malaisia.

La avocato de la apelores, Aston Paiva, ia dise ce esta judi en la pais relijial tradisional va es "un presedente" major. "Esta corte domina tota otra cortes alta."

En un sistem duple de leges en Malaisia, tota muslimes en la pais es su la controla de leges muslim.

Ce omes vesti o condui como femes es nonlegal su acel leges, e ofendores risca prisoni per asta tre anios. Alga statos proibi ance femes de vesti como omes.

La apelores, de cual tota es muslimes ci ia nase mas ma identifia aora se como femes, ia es arestada a cuatro anios ante aora. Los ia dise ce los ia es atacada e prisonida per porta tal cosas como clipes de capeles. En 2012, un corte minor ia deside ce, car los ia nase mas, los debe porta vestes mas.

La femes no ia apare en la corte de apela, ma un ia comenta a pos: "Me es felis ce nos ia vinse. Me senti aora min tensada."

La comite de apela en la stato Negeri Sembilan, con tre judores, ia dise ce la lege "priva la apelores de la direto de vive con dinia. Lo ave la efeto de proibi ce la apelores e ote sufrores de disforia de jenero move libre en locas publica."

Grupos de diretos ia bonveni la deside. Un portavose per la Organiza Aidante de Femes ia dise: "Esta es un vinse per tota malaisianes, car la constitui proteje tota de nos, sin relata a etnicia, jenero, e clase. Serta no corte, o sivil o de xaria, pote refuta la fato ce la dinia umana es suprema importante."

La grupo SUA Vijila de Diretos Umana ia lista Malaisia como un de la locas la plu mal per persones transjenero.

En un reporta en setembre, la grupo ia dise ce tal persones fronti persegues sempre plu mal, incluinte arestas e atacas fisical e sesal par autoriosas de relijio e polisia.

La reporta ia indica avenis de vergonia forsada en cual femes transjenero ia es obligada a desvesti publica. Lo ia lista ance ostaculos contra asede aida medical, emplea, e instrui.

2014-11-06

Un program vil ataca usores de Apple en Xina

Un compania de securia enlinia ia averti ce un program vil nova en produidas de Apple afeta xef usores xines.

Palo Alto Networks ia dise ce la program "WireLurker" (Spiafilo), cual infeta la sistemes de opera de computadores de table e aparatos portable, pare ave se orijin en Xina e infeta xef aparatos ala.

La program sperde se en otra programes descargada de un boteca esterna de Apple, e pote fura datos. Plu ca 400 programes infetada es ja descargada a plu ca 350 mil veses.

Un dirijor de la compania ia comenta: "WireLurker difere de tota cual nos ia vide a ante en programes vil per iOS e OS X. La tecnicas usada sujesta ce atacores deveni plu refinada en la campo de esplota alga plataformas la plu conoseda de mundo."

WireLurker es capas de envia entre un computador Mac a un aparato portable (un telefoneta o tabletin) tra un corda USB.

Lo pote fura "informas diversa" de aparatos portable cual lo infeta, e lo refresci frecuente se de la servador controlante de la atacores.

Plu, iCloud, la servi de ospitafix de Apple, ia es atacada en Xina en otobre par criminales ci ia atenta fura datos de usores.

Un grupo xines ci monitori la ueb ia dise ce atacores ia intersepi datos, cisa asedente parolas secreta, mesajes, fotos, e listas de persones conoseda. Los crede ce la governa en Beijing ia es culpable.

Ma la governa xines ia nega la alegas, e ia es suportada par China Telecom, un furnor nasionalida de servis de rede, ci ia descrive la acusa como "nonvera e sin funda".

Xina conteni la mercato de telefoneta la plu grande de mundo. En la cuatri de april a junio, Apple ia esperia ala un aumenta par 50% en la cuantia de vendes de se iPhone.

2014-11-05

Republicistes gania controla de la Senato SUA

En la SUA, en elejes de mediaperiodo, la republicistes ia gania controla de la Salon alta (la Senato), aumentante se potia en la du anios final de la presidentia de Barack Obama.

La partito ia vinse en Arkansas, Colorado, Iowa, Carolina Norde, Dakota Sude, e Virginia Ueste, e lo previde plu ganias pos la conta de votas en otra statos.

Mitch McConnell, un senator republiciste sur ci on predise ce el va gida la salon, ia descrive la resulta como un vota contra "un governa cual la popla no pote fida plu".

En la elejes de mediaperiodo (tal nomida car los aveni a media de la periodo du de cuatro anios de la presidentia de Obama), votores ia eleje cuasi un tri de la Salon alta, la Salon basa intera, 36 de 50 governores de stato, e multe ofisiores local o de stato.

Tra la campania, republicistes ia consentra sur la nonsasia de votores con Obama, un democrata. Los ia presenta la vota como un referendo sur se presidentia.

En cuando la resultas prima ia apare tarda a martedi, lo ia deveni clar ce la republicistes ia fa ganias major en la Salon.

La votas es ancora contada en multe statos, ma la Partito Republiciste ia gania fasil la ses sejas nesesada per prende la controla de la Senato.

Cuando la Congresa nova es inaugurada en janero, la republicistes va controla ambos salones a la ves prima pos 2006.

Los va ave aora la capasia de complica, e cisa an impedi completa, la projetas de Obama en la du anios final de se periodo en la Casa Blanca.

Par controla la Senato, la republicistes va pote ance restrinje la capasia de Obama de nomi persones nova como judores federal, membros de consilio, e ofisiores major de governa.

En ajunta a la sejas cual la partito ia gania de la democratas, la republicistes ia reteni se sejas en Alabama, Georgia, Idaho, Kansas, Kentucky, Maine, Mississippi, Nebraska, Oklahoma, Carolina Sude, Tennessee, e Texas.

En Louisiana, no la un e no la otra de la du aspirores major ia gania 50% de la votas. Acel stato va debe fa un eleje nova en la parte temprana de desembre.

2014-11-04

Un proibi contra macistes fema en Barat deveni nonlegal

La corte la plu alta de Barat ia judi ce femes debe es permeteda de labora como macistes per filmas.

Un pratica de 59 anios ia proibi femes de deveni macistes, ma ia permete ce los labora como capelores.

Sindicatos ia resiste promoves de permete ce femes macia, disente ce esta ta dana la modo de susta de omes. Ma la corte ia deside ce esta es nonlegal.

Barat ave un de la industrias la plu grande de filma e televisa en la mundo.

Nove femes ia apela a la corte en janero 2013, cexante ce un sindicato potiosa de Bollywood no permete ce los fa labora de macia.

La Corte Suprema ia deside a lundi ce esta pratica es "un prejudi constitual nonpermetable". La judores ia dise: "Nos no vide un razona per proibi un fem de deveni un maciste si el ave la capasia."

La corte ia comanda ce la asosia de macistes e capelores abandona direta se proibi de macistes fema.

"Nos es en 2014, no 1935," la judores ia comenta. "Tal cosas no pote continua an per un dia."

Un de la apelores, Charu Khurana, ia clari ce el ia aprende macia de un scola en California, ma ce el ia es impedida de labora en Bollywood.

"Me ia labora sur du filmas, ma esta ia es difisil. La sindicatos es forte e veni a la studio per para la filma. Produores es obligada a paia multas. Multe macistes fema desira labora sur filmas. E atores fema ta trova ance ce lo es plu oportun e comfortosa si los es maciada par un fem."

Femes ia es menasada e an bateda en Barat per atenta labora como macistes per filmas.

La plu de femes instruida sur macia fini par labora per galas de moda e anunsias comersial o par macia sposas nova.

2014-11-03

Abitores de un parte de Benghazi parti ante un opera militar

La armada de Libia ia demanda ce abitores parti de un distrito sentral de la site Benghazi ante un opera major militar contra islamistes.

Plu ca 200 persones ia es matada en la site de porto pos la comensa de un atenta nova par la armada per recatura la loca de militias islamiste en la mense pasada.

La campania es gidada par Khalifa Haftar, un jeneral pasada, sur ci on reporta ce el es ance suportada par la armada.

A soldi, un portavose de la armada ia demanda ce abitores de la distrito Sabiri parti ante mediadia de oji.

Libia es en un state de nonstablia de pos la despone de Qaddafi en 2011.

La pais, rica con petrolio, es divideda entre du governas oposada, e tribus de rebelores, militias, e partitos political diversa combate per la potia.

La governa nova elejeda e internasional reconoseda ia es obligada a fuji a la site Tobruk en la este estrema, prosima a la borda con Misre, pos deveni forsada a via de Tripoli cuando militias enemin ia ataca la capital en julio.

Grupos islamiste, incluinte Ansar al-Sharia, listada par paises ueste como un organiza teroriste, ia declara un califia en Derna, un site costal.

La governa escluida ia perde la tre sites xef en la crise political:

– En Tripoli, la parlamento nova – la Congresa Nasional Jeneral – ia continua consenta. Lo ia crea an se governa alternativa propre.

– Benghazi, la site du e la sentro de la revolui de 2011, es xef ocupada par combatores islamiste, de cual alga es liada a al-Qaidah. Ofisiores, jornalistes, e ativistes sosial es asasinada a cada dia.

– Misrata, la site tre e la porto xef, es ance fidosa a la autoriosas de Tripoli. Se militias es lo cual permete ce la autoriosas resta.

2014-11-02

Bangladex esperia un rompe major de eletrica

On ia restora eletrica a la plu de Bangladex pos un rompe de potia tra la pais intera ier.

Injeniores ia susede repara sentros cual furni eletrica a sirca 70% de usores, e los espera reopera la otras oji.

Aclamas forte ia es oiada en la capital, Dhaka, cuando lus ia reveni par grado.

La rompe eletrical ia es la plu mal en Bangladex pos 2007, cuando un siclon ia dana la rede nasional per alga oras.

Per la rompe ier, autoriosas ia culpa la malfunsiona de un linia de transmete, cual ia causa ce sentros e susentros eletrical sesa opera.

La corda de tensa alta cual ia malfunsiona vade de Baharampur en Bangla ueste en Barat a Bheramara en Bangladex sude-ueste.

La rompe ia comensa sirca mediadia en ora local a saturdi, e ia afeta tota partes de la pais cual es liada a la rede nasional.

La ospitales e airoporto internasional de Dhaka ia usa jeneradores de crise per continua funsiona, ma multe ofisias ia debe envia se empleadas a casa.

Furnis de acua ia es ance grave colpada, car multe de la pompas cual leva acua de su tera no ia pote opera.

Bangladex ia comensa emporta eletrica de Barat en otobre de la anio pasada.

2014-11-01

Un veculo spasial de Virgin Galactic esplode

Richard Branson ia promete continua se projeta de turisme spasial, an pos cuando un de se veculos ia cade matante en la deserto de California.

Un pilote ia mori e la otra ia es grave ferida cuando la veculo SpaceShipTwo ["Barcon Spasial Du"] de Virgin Galactic ia esplode ier.

La fundor de la Grupo Virgin ia dise ce el es "xocada e tristida", ma el ia insiste ce el va continua con viajas spasial.

La veculo ia es en vola de proba cuando lo ia esperia lo cual ia compania ia descrive como "un anomal grave".

Ofisiores de la Comite Nasional SUA de Securia de Transporta comensa oji se investiga, cual va dura probable tra alga dias.

Branson ia dise ce Virgin Galactic va colabora completa con la autoriosas investigante la desastre. El ia clari ance ce el mesma vola a California, descrivente esta como "un de la viajas la plu difisil cual me ia fa a cualce tempo".

"La spasio es difisil – ma lo merita la labora," el ia ajunta. "Nos va ostina e progresa unida."

Charles Bolden, la xef de NASA, la organiza spasial de la SUA, ia vosi se xoca propre a la desastre: "La dole de esta trajedia va es sentida par tota la omes e femes ci ia dedica se vives a esplora. La vola spasial es noncredable difisil, e nos loda la pasion de tota en la comunia spasial ci emprende riscas per avansa la fronteras de la susedes umana."

En la semana presente, esta ia es la asidente du per un compania comersial de spasio en la SUA .

A martedi, un roceto nonabitada nomida Antares ia esplode corta pos se lansa de Virginia. Lo ia porta cargas a la Stasion Spasial Internasional.

Virgin Galactic es un competor major en la industria nasente de turisme spasial, e en otobre Branson ia dise ce el previde ce se veculo va ateni la spasio suorbital pos alga menses.

Plu ca 800 persones ia paia o depone ja per un viaja en SpaceShipTwo, a custa de sirca $200 mil per person.

2014-10-31

La presidente de Burcina Faso va resta per ancora un anio

Pos un dia de protestas violente per esije la resinia de Blaise Compaoré, la presidente de Burcina Faso, el ia dise ce el va resta en potia per un anio su un governa traversante.

El va retira un lege controversa cual ta permete ce el aspira un periodo nova de ofisia a la fini de se periodo presente en 2015. El governa ja tra 27 anios.

A jovedi, protestores coler ia ensende la parlamento e alga construidas de governa. Los vole ce el resinia direta.

La crea de un governa traversante ia es anunsiada a jovedi par jeneral Honoré Traoré, la xef de la armada, ci ia declara ance la fini de parlamento.

Mohamed Ibn Chambas, la ambasador spesial per Africa ueste de Ban Ki-moon, la xef de la Nasiones Unida, va vade oji a Burcina Faso per atenta lejeri la crise.

En un mesaje difusada par tv local pos la declara par la jeneral, Compaoré ia bonveni la "atas patriota" de la militaria.

A la min un person ia es matada en la protestas en la capital, Ouagadougou. La gidor xef oposante, Zéphirin Diabré, ia dise ce desuples de protestores ia es matada tra la pais par la fortes de securia en "un aumenta barbar de violentia".

La militaria ia xuta baletas cargada per atenta sperde la protestores ci ia ocupa la parlamento. Protestores ia avansa ance contra la palasio presidental, e un elicotor governal ia xuta gas lacrimojen a los.

Desuples de soldatos ia junta se a la protesta en la plaza xef, incluinte un ministro pasada de defende, jeneral Kouamé Lougué. La protestores ia esije ce on instala el como presidente.

Los ia arde ance la ofisia de site, la casas de parlamentores, e un otel superior.

Protestas simil ia colpa ance Bobo-Dioulasso, un site sude-ueste, e otra vilas. La televisa nasional ia sesa difusa cuando la protestores ia saca se construida.

Compaoré, un soldato pasada, ia saisi la potia par colpa de stato en 1987, e ia gania cuatro elejes disputada a pos. El ia fronti avenis de violentia a alga veses, incluinte un rebela militar en 2011.

El ia susede sempre resta en potia par un combina de tecnicas pasinte e la usa moderada de fortia. Ma la tensas presente crese ja tra alga menses, e lo no es clar esce el pote survive a esta ves.

Compaoré es un aliada forte de la SUA e Frans, cual usa Burcina Faso como un base per operas militar contra islamistes combatosa en la area Sahel.

Ma la pais es entre la plu povres de Africa ueste, e lo es sin defende contra cambias en la custas mundal de coton, la funda economial de multe burcinabes.

Plu tarda en la dia: Compaoré ia resinia como presidente, recomendante un vota en la 90 dias veninte. Traoré ia emprende tempora la governa.

2014-10-30

Sistemes nova en la Egleseta Sistina

La Vatican ia desveli un sistem de lumina e frescadores cual pote conserva e esibi plu bon la frescos famosa de la Egleseta Sistina.

On previde ce la frescadores nova va redui la dana causada a la frescos par polvo, e par la respira, sua, e caldia de la ses milion persones ci visita en cada anio.

La atraes de la egleseta inclui un sofito par Michelangelo (1475–1564), cual pituri un Dio barbida ci dona vive a Adam.

La lumina nova par 7000 diodos de lus garda enerjia. Alga de los asentua la fondo oscur blu de un otra fresco par Michelangelo, La Judi Ultima.

Otra luses lumina frescos par artistes como Botticelli, Perugino, e Domenico Ghirlandaio, de cual se laboras en la Egleseta Sistina ia deveni ombrida par los de Michelangelo.

La sistem nova va usa min ca 20% de la enerjia de la sistem presedente, cual ia es instalada a 20 anios ante aora, cuando la egleseta ia reseta sola 1,5 milion visitores per anio.

La frescadores va move lenta la aira tra la salon vasta, per evita dana la frescos. La flue, umidia, e temperatur de la aira va es ajustada seguente datos de 70 sensadores en la mures, e ance de cameras tv cual monitori la cuantia de visitores.

On ia spende tre anios e 3 milion euros per instala la sistemes nova.

Michelangelo ia pinti se frescos en la Egleseta Sistina en la dui prima de la sentenio 16. On ia restora la plu resente los en un projeta de 14 anios, completida en 1994.

Antonio Paolucci, la dirijor de museos vatican, ia dise ce lo conveni bon ce on onora la aniversario 450 de la mori de Michelangelo con "alga cosa durante, no tempora".

2014-10-29

Furores ruba un banco barati par escava un tunel

La polisia en Barat norde xerca furores ci ia ruba un banco par escava un tunel de 40 metres, direta a la sala securida, en la media de la note.

La furores ia prende mone, joalas, e otra cosas con valua de sentos de miles de dolares, de un departe de la Banco Nasional Pandjabi en Haryana.

La tunel ia comensa en un casa vacua prosima.

Lo pare ce la furores ia es inspirada par Dhoom, un filma popular hindi cual mostra un ruba simil.

A matina de lundi, ofisiores de la banco governal en la vila Gohana ia es stonada en descovre la buco grande en la tera.

La polisia crede ce la fura ia aveni en la note de saturdi. La rubores ia vacui 77 de plu ca 350 caxas securida.

On ia asembla un ecipo spesial per investiga la fura, ma on ia fa ancora no arestas.

Ofisiores de banco ia dise ce la valua esata de la cosas furada ancora no es calculada.

Devender Malik, la manejor de la banco, ia comenta: "Lo pare ce la fura ia es esecutada pos un scemi atendosa par la rubores cual ia estende cisa tra alga dias."

2014-10-28

La divide entre la jeneros redui global

La Foro Economial Mundal ia dise ce asedes bonida per femes a politica e labora ia redui la divide global entre la jeneros en la 10 anios pasada.

Se sonda anial sur jenero ia confirma "cambias radisal" en multe paises. 105 paises ia deveni plu egal de pos 2005.

Island ocupa la loca prima en la lista per la anio ses en segue, e Iaman es en la loca la plu basa.

La sonda ia esplora fatores de economia, sania, instrui, e partisipa political en 142 paises.

Sola ses nasiones – Srilanca, Mali, Corvatsca, Macedonia, Urdun, e Tunis – ia vide un largi de se divide de jenero en la mesma periodo.

Un de la razonas per la susede de Island es se popla relativa peti. Iaman luta contra un frecuentia altida de mori e un cuantia altida de xicas entre ses e 14 anios ci no vade a scola.

Tota la paises scandinavian ia apare a la apico de la lista: Suomi, Noria, e Sveria ia segue Island en la sinco locas la plu alta.

Ruanda ia entra a la lista a la ves prima, arivante a la loca sete e tal deveninte la economia african la plu alta en la lista. Se susede refleta la fato ce cuasi tan multe femes como omes labora ala – e en la ofisias dirijal de la pais – e no par causa de asedes bonida a sania e instrui.

Nicaragua ia asende de numero des a numero ses de la plu bones per femes. La Pilipinas ia resta la pais la plu alta gradida de Asia, ma ia cade de numero sinco a numero nove.

2014-10-27

Orolojos rusce es retardada a la ves final

Rusia ia retarda se orolojos a la ves final, en adota permanente oras invernal.

Lo ia aumenta ance se cuantia de zonas de ora de nove a des-un, estendente de la Mar Pasifica asta la bordas de la Uni European.

Tra la tre anios pasada, la pais ia esperimenta con oras permanente estatal. Ma esta ia es estrema nonpopular con multe rusces.

La Uni Soviet ia introdui oras estatal en 1981.

En 2011, cuando Dmitry Medvedev ia es la presidente, el ia redui la cuantia de zonas de ora a nove, e ia deside ance manteni la oras estatal tra la anio intera.

Rusces ia avansa alora se orolojos par un ora, ma no ia retarda los en inverno.

Medvedev ia razona ce la cambias de ora disturba la bioritmos de persones e ce los ajita an boves. Ma multe persones en la norde de Rusia ia cexa sur se matinas plu oscur en inverno.

A un confere jornaliste en Moscva, representores de la Academia Rusce de Siensas ia dise ce Europa va es aora plu prosima, car la difere entre la capital e la Tempo Media de Greenwich va es mera tre oras.

Arkady Tishkov, la visdirijor de la Instituida Jeografial, ia dise ce el oposa la cambia la plu resente car el crede ce on ia esecuta lo mera per plase anunsiores de produidas, car plu de persones va televide pos la cambia.

Cuando Rusia ia ocupa Crim en marto, la oras en Crim ia es ajustada per conforma a los en Moscva.

2014-10-26

Brasileras eleje se presidente

Miliones de brasileras va vota oji per un presidente nova en lo cual on descrive como la eleje la plu prosima en la pais en alga desenios.

La presidente esistente, Dilma Rousseff, de la Partito de Laborores (sinistriste) fronti Aécio Neves de la Partito Brasilera de Democratia Sosial (sentriste) en la fase du de la vota.

Ambos aspirores ia promete reinisia la economia la plu grande de America Latina e fa ce lo deveni plu competosa.

La sondas la plu resente ia mostra Rousseff con un vantaje pico supra la aspiror oposante, favoreda par la 52% o 53% de la sondadas, contra 47% o 48% ci favore Neves. Ma esta sondas conteni un marjin de era de plu o min 2%.

Brasileras povre, spesial en la norde-este, resta fidosa a Rousseff con grasias a la programes de aida sosial de se partito.

El ia reseta ala se suporta la plu grande en la fase prima de la eleje, a 5 otobre, recoliente cuasi 60% de la votas.

Ma brasileras rica, ci oposa tal politicas economial interveninte como impostas alta e controlas de la custa de gasolina, favore Aécio Neves ci bonveni la comersia.

En la mercatos finansial, on regarda el como capas de refresci la economia, pos cuatro anios de crese minima cual, tecnical, ia pone la pais a un state retrosededa.

Plu ca 140 milion brasileras va vota oji, ma multe va depende de lo ci gania la votas de la clase media en la sude-este industrialida.

2014-10-25

Un fugu brasilera veneni du familias

En Brasil sude-este, des-un persones ia deveni sever malada pos come un fugu venenosa.

La grupo de visinas, incluinte cuatro enfantes, ia es ospitalida pos un era en prepara la pex, cual es un de la plu venenosas de mundo.

En minutos, tota la comores ia comensa vomita forte. Ma sinco ia parti ja de ospital.

Fugus es estrema matante. Los conteni un venena capas de causa un paralise sever.

La visinas ia encontra per come media a mercurdi en Duque de Caxias, un site a la costa sude-este de Brasil.

Los ia asembla a un de se casas, e ia sabe ce los va come un fugu.

Per evita un veneni, on debe prepara la bestia, de cual se venena es plu matosa ca sianido, en modo complicada.

Un dotor a la ospital ia clari ce un de visinas ia crede ce el sabe bon coce lo, ma ce el ia fa un era en la prosede.

La afetadas ia inclui sinco membros de du familias diferente - la familias de Souza e da Silva. Tre de la enfantes da Silva ia es entre la venenidas.

On ia desospitali sinco de la visinas a venerdi. Tre resta su cura intensa, e un de la enfantes es ancora en state grave.

Reportada, un otra adulte e un otra enfante es aora en state stable.

2014-10-24

Sveria sesa xerca un sumarina suspetada

La militaria svensce ia abandona se xerca per un sumarina suspetada en la mar a sude de la capital.

Barcones marinal e aviones ia xerca en la arcipelago de Stockholm tra la semana pasada, suspetante ce un sumarina rusce esperia problemes ala.

La departe de defende de Rusia ia nega ce cualce de se barcones es envolveda.

On ia reporta ce esta es la ativi militar la plu grande en Sveria de pos la Gera Fria.

La militaria ia declara: "Esta sinifia ce la majoria de barcones e fortes amfibin ia reveni a porto." Lo ia ajunta ce alga unias plu peti va resta en la area.

La declara no ia dise perce on ia cansela la xerca.

La militaria ia investiga "ativias stranjer su acua", fundida sur lo cual lo ia descrive como "alga operas credable".

Ofisiores svensce no ia nomi paises, ma multe persones ia suspeta la envolve de la marina rusce.

Oservas de sumarinas soviet ia causa avertis de securia en Sveria en la desenio de 1980.

La interveni militar de Rusia en Ucraina en esta anio ia provoca suspetas sur se intendes en relata a otra statos visina, spesial la balticas.

A martedi, OTAN ia dise ce se jetos ia intersepi un avion rusce de spia cual ia entra a la spasio airal de Esti per un tempo corta.

Rusia ia dise ce la avion ia fa un vola de instrui e no ia viole la spasio esti.

2014-10-23

Modi visita la glasia Siachen

Narendra Modi, la ministro xef de Barat, ia fa un visita corta a la glasia Siachen. El ia es en via a la parte barati de Caxmir per spende la festa Diwali en regarda la dana causada par inondas en setembre.

La glasia es reclamada e par Barat e par Pacistan, e es conoseda como la campo de batalia la plu alta de mundo.

Modi ia tuita ce el vade a Siachen per "pasa tempo con nos soldatos forte a esta dia spesial".

El es sola la ministro xef du, pos Manmohan Singh, ci ia visita la loca disputada. Singh ia visita la glasia en junio 2005, disente ce lo debe deveni "un monte de pas" entre la du paises.

Plu soldatos ia es matada par la clima sever de Siachen ca par combate. On ia posa ala soldatos asta 6700 metres supra la nivel de mar.

Soldatos barati ia saisi controla de la glasia, en Caxmir norde, en april 1984, vinsente apena Pacistan. Pos tre desenios, la du lados resta aora fisada en un state de nonprogresa.

Modi va viaja plu tarda a Caxmir, do inondas en la mense pasada ia mata 281 persones e ia lasa la site Srinagar su acua. Plu ca milion persones ia es deslocada. El ia descrive la deluvia como "un desastre nasional".

La inondas ia dana 180 mil casas. Multe persones abita ancora en campas de aida.

On previde ce Modi va esamina la sistem de aida, visita un campa per vitimes de la inondas, e anunsia un aida spesial per la afetadas.

Se visita aveni a Diwali, la plu grande de la festas indu, e on regarda lo como un jesto de unia e aida a la persones colpada par la inondas.

An si alga persones ia bonveni la visita, disente ce los espera ce Modi va anunsia plu aida per la stato, separadistes caxmiri ia recomenda un protesta contra la visita.

Los ci abita en la campas tende opina ce Modi debe furni plu aida a la afetadas. Un ia dise: "Nos comprende ce senior Modi sacrifia se festa per partisipa en nos lamenta. Ma esta no sufisi. El ta fa un servi grande si el ta serti la recapasi rapida de la descasidas."

2014-10-22

La SUA esplora esce la SI ia saisi armas intendeda per aida defendores

La departe de defende SUA ia dise ce lo esamina un video de Stato Islamiste cual pare mostra la violentes en controla de armas american intendeda per defendores curdi en Suria.

A lundi, la SUA ia cade 27 faxos con armas de calibre peti, munis, e otra armas per militias ci defende la vila Kobane contra la SI.

Un portavose per la SUA ia dise ce la majoria grande ia ateni se goles intendeda. Un declara plu tarda ia clari ce un faxo ia devia, ma on ia destrui lo per preveni ce la enemi reseta lo. Tota la otra faxos ia ariva secur.

Ma un video poneda a interede par un grupo jornaliste favorente la Stato Islamiste ia mostra un reserva de armas, parente cadeda par la SUA, en la manos de la violentes.

Fortes curdi controla la plu de la vila, ma la Stato Islamiste resta menasante.

Ativistes ia lansa un ataca ferose en Kobane a lundi, pos du dias de calmia relativa en cuando lo ia pare ce la defendores de la vila ia forsa los a via.

30 atacores SI e 11 defendores curdi ia es matada a martedi, ma la islamistes ajunta fortes nova.

Kobane, a la borda turces, es ja atacada par la SI tra alga semanas. La plu de se abitores ia es obligada a parti.

La combate nova ia aveni pos cuando Turcia ia dise ce lo va permete ce soldatos curdi iraci traversa a Suria per aida defende contra SI. An tal, un ofisial curdi local ia dise ce el no sabe cuando esta va aveni.

La avansa de SI en Suria aveni sur fondo de la gera interna. Atacas airal, gidada, par la SUA, aveni ala sin permete de presidente Bashar al-Assad, sur ci la Ueste desira ce el sede se potia.

En Irac, la atacas airal es suportada par la governa. Plu temprana en esta anio, la SI ala ia avansa a locas prosima a la capital, Baghdad. La SI menasa ancora la site, e ia ocupa la plu de Anbar, la provinse ueste, en semanas resente.

On crede ce un serie de bombis en Baghdad en la dias pasada, matante desuples de persones, ia es fada par la SI.

A martedi, a la min 12 persones ia es matada en un ataca duple par bomba de auto en la distrito Talibiya, xef xia, de Baghdad este.

2014-10-21

La xef de Total mori en avion en Moscva

Christophe de Margerie, la dirijor xef de Total, un compania franses de petrolio, ia mori en un xoca de avion en Moscva.

Se jeto companial ia colpa un scopineva e ia es engolida par flamas. Tota cuatro persones en la avion ia es matada.

Investigores rusce dise ce la gidor de la scopineva ia es enebriada.

De Margerie, ci ia ave 63 anios, ia deveni la dirijor xef de la compania tre de la plu grandes en Europa en 2007.

El ia junta se a Grupo Total pos gradua de la Scola Alta de Comersia en Paris en 1964. El ia spende se carera intera a la compania, do el ia reseta la nometa "Mustax Grande".

Jornales rusce reporta ce el ia encontra Dmitry Medvedev, la ministro xef de Rusia, a se casa en la campania prosima a Moscva per discute investis stranjer en Rusia.

Total es un juor importante en la mercato rusce de enerjia, e de Margerie ia es un defendor forte de manteni relatas, an entre punis ueste contra Moscva sur se atas en Ucraina.

La compania es un de la investores stranjer la plu grande en Rusia, e intende dupli se esflue de la pais ante 2020. Lo labora sur la projeta Yamal per estrae gas natural en Siberia norde-ueste.

En se tempo a la timon de Total, de Margerie ia susede defende la compania contra alegas de froda en relata a la program de la Nasiones Unida de intercambia petrolio per comedas en Irac.

2014-10-20

Du ministros fema resinia en Japan

Midori Matsushima, la ministro de justia de Japan, ia resinia, a oras pos la resinia de Yuko Obuchi, la ministro de comersia e industria.

La partito oposante ia acusa ce Matsushima ia viole leges de vota par malusa mone de se grupos de suporta political.

La resinia de du femes es un problem grande per la ministro xef, Shinzo Abe, ci vole ce plu femes opera a la nivel la plu alta de governa.

Abe ia dise ce el aseta ce el ia asinia la postos a ambos femes, e ce ministros sustitua va es nomida pos un dia. Ambos es membros de la Partito Democrata Liberal.

Obuchi ia es un de sinco femes ci Abe ia eleje a se consilio en setembre. Alga persones ia regarda el como un ministro xef futur.

Ma en la semana pasada, alegas ia apare ce se empleadas ia malusa miles de dolares de reservas de campania political.

Obuchi no ia confesa ce el ia fa mal a grado personal, ma a un confere jornaliste televisada oji, el ia dise ce el resinia car "nos no pote permete la stania de la politica sur economia e enerjia … par causa de me problemes".

A oras plu tarda, Abe ia anunsia la resinia ance de Matsushima. El ia distribui ventadores de paper cual ia mostra se pitur e se politicas a un carnaval en se distrito de vota.

La partito oposante ia acusa el de crimin a venerdi, esijente se resinia, e disente ce esta viole la regulas sur la usa de mone political.

En la periodo prima de Abe mesma como ministro xef en 2006 e 2007, un otra serie de scandales entre se ministros ia causa final se resinia propre, per razonas de sania, pos mera un anio en la posto.

2014-10-19

Pluvones en Nicaragua e un siclon en Bermuda

En Nicaragua, 22 persones ia mori en alga dias de pluve forte.

Nove de los ia es matada en la capital, Managua, cuando un mur ia colasa en un pluvon deluviante.

En otra areas de la site, ecipos de crise ia aida la sorti de familias de areas cual risca liscas de tera. Los va junta se a miles de otras casida en refujas tempora par causa de pluvones ja de setembre.

Multe de la comunias plu povre en Nicaragua no gusta la locas a do la governa prende los, car estas es comun tro distante de sentros urban e de se locas de labora. La sortidas tende reveni a se casas.

Plu ca 30 mil persones es afetada par la pluves en Nicaragua. Salvador, Onduras, e Guatemala sufri ance.

En la entretempo, en Bermuda, un colpa direta par un siclon nomida Gonzalo ia dana construidas e tira cordas eletrical a tera.

An si la tempesta sur la isola ia es la plu forte de des anios, on ia reporta sola feris minor. Esta ia es la tempesta du sur la isola en un semana.

Plu ca 30 mil casas ia esperia un rompe de eletrica, ma on ia restora la furni a du tris de los ja a posmedia de saturdi.

La siclon ia inonda ance, e ia cade arbores.

2014-10-18

Nijeria acorda un sesafusili con Boko Haram

La militaria de Nijeria dise ce lo ia acorda un sesafusili con Boko Haram, un grupo de islamistes combatosa, e ce la grupo va libri la xicas cual lo ia saisi.

La sesafusili ia es anunsiada par Alex Badeh, la ofisior militar la plu alta de Nijeria. Boko Haram no ia fa un declara publica.

La grupo rebela ja de pos 2009, matante sirca 2000 siviles en esta anio.

Boko Haram ia coleri la mundo a ses menses ante aora cuando lo ia saisi plu ca 200 xicas de scola como ostajes.

Los ia es prendeda en Chibok, un vila norde-este en la stato Borno. Se prisonia continuante ia provoca criticas de la laboras par la governa nijerian per libri los.

Como parte de la negosias, un delega de la governa ia encontra representores de Boko Haram a du veses.

On va fini organiza la libri de la ostajes a un plu consenta en Ndjamena, la capital de Txad, en la semana veninte.

On crede ce la grupo ia move los a la foresta vasta Sambisa, cual sta longo la borda entre Nijeria e Camerun.

2014-10-17

La NU suplica mone per combate Ebola

Ban Ki-moon ia inisia un suplica nova per mone per aida combate la virus Ebola, car un otra colie de reservas no ia ateni se gol.

La secretor jeneral de la NU ia dise ce un reserva fidusial cual el ia inisia en setembre ia reseta sola $100 mil asta aora.

Un coro cresente de gidores mundal critica aora la reata global per combate la virus. La maladia ia mata ja 4500 persones, xef en Liberia, Gine, e Siera Leon.

Donores ia furni cuasi $400 milion direta a otra departes de la NU e otra organizas de aida, ma la fidusial, intendeda per servi como un reserva de spende variosa, ia reseta prometes de sola $20 milion.

De acel paises cual ia promete mone a lo, sola Colombia ia paia, donante $100 mil.

Ban ia dise ce la momento es aora bon ce la paises "ci ave vera la capasia" ta furni suporta finansial e lojistical.

Comentas simil ia veni en dias resente ance de Barack Obama, la presidente de la SUA, de David Cameron, la ministro xef de la Rena Unida, e de Jim Yong Kim, la presidente de la Banco Mundal.

Kofi Annan, la secretor jeneral presedente de la NU ia descrive se como "amarga deludeda" par la responde de la comunia internasional.

"Si la crise ia colpa alga otra area, probable on ia ta maneja lo en modo multe diferente," el ia dise. "Cuando on regarda la evolui de la crise, la comunia internasional ia velia vera cuando la maladia ia ateni America e Europa."

La Organiza de Sania Mundal ia dise ce lo aselera se laboras per preveni la estende de Ebola ultra la tre paises la plu colpada.

On foca la aida a 15 paises african, e spesial a la cuatro cual bordi direta la areas afetada – Costa Ivor, Gine-Bisau, Mali, e Senegal.

En la entretempo, Obama ia aproba la envia de soldatos reservada SUA a Africa ueste si nesesada. Los ta junta se a la 4000 soldatos SUA ja enviada a la area.

Se conselores major sur sania ia es sever criticada pos la infeta de du ospitalores en Texas par un pasiente ci ia mori con la virus a pos.

On crede aora ce un de la ospitalores ia es cisa malada e ja comunicante la maladia tra cuatro dias, en cual el ia vola en du aviones, ante deveni diagnoseda.

2014-10-16

On xerca trepores mancante pos nevon en Nepal

En Nepal, ecipos de salva xerca a la min 70 persones mancante longo la vias de pasea en Himalaia, pos un venton de neva sur la Curso Annapurna. Nove corpos ia es trovada a mercurdi.

On teme ce la cuantia final de mores va es multe plu alta. Multe paseores resta ultra contata.

Esta es un de la climas la plu matante cual la area ia esperia. On crede ce la pluves e nevones sever ia es causada par Siclon Hudhud en Barat.

La mal clima ia colpa un loca de reposa a 4500 metres supra la nivel de mar, no multe su la punto la plu alta de la curso, la colo Thorung La.

La mores inclui trepores nepali, israeli e polsce, ma reportas no acorda sur la cuantia esata.

Ofisiores indica ce la saison presente es popular per paseores, e donce lo es probable ce multe trepores ia es sur la colos de la montes.

Cuatro canadianes e un barati es entre los ci on ia reporta como mancante.

A mercurdi, du elicotores militar ia es enviada de Kathmandu, la capital, per aida la opera de salva, e nove persones ia es salvada en la note.

Un survivor ia descrive la xoca de vide corpos mor en la viaja de reveni pos la tempesta.

En april, un avalanxa sur Sagarmata/Everest ia mata 16 xerpas e ia redui grande la cuantia de misiones a la monte la plu alta de mundo.

La apicos de Nepal atrae alga de la trepores la plu esperiosa. Ma paseas en la montanias nepali es jeneral secur, atraente cuantias vasta de persones comun.

2014-10-15

On abandona un max serbsce-albanian pos scaramuxas political

Un max de futbal entre Serbia e Albania ia es abandonada cuando un avion sin pilote, portante un mesaje political, ia provoca scaramuxas de juores e fanes.

La max per entra a Euro 2016 ia es sesada en se minuto 41, egal a zero puntos.

La disturba ia comensa cuando un bandera e mesaje albanian ia vola supra la campo e ia es caturada par un juor serbsce.

Juores albanian ia atenta prende lo, e alora alga fanes ia invade la campo.

La arbitror ia gida la juores de sur la campo. Pos un pausa de sirca 30 minutos, UEFA ia confirma ce on ia abandona la max.

Fanes albanian ia es ja proibida de es presente a la max entre la du nasiones balcan oposante.

Serbia e Albania ave un istoria de relatas turbosa, spesial consernante Cosovo, un provinse pasada serbsce cual ia declara se autonomia en 2008.

La SUA e paises major de la Uni European reconose Cosovo como un stato, ma Serbia (e la plu de serbsces etnical en Cosovo) refusa lo.

Un delegada de UEFA ia comenta: "Esta es un situa regretable sur cual nos va reporta – la arbitror, me, e la conselor de securia. La situa ia es tal ce nos no ia pote continua la max."

On ia reporta la aresta de Olsi Rama, la frate de la ministro xef de Albania, en la parte de la stadion reservada per persones importante, per inisia la situa, ma esta es ancora no confirmada.

2014-10-14

Un consilio vatican proposa revisa se disposa a omosesalia

Eglesores major ci partisipa en un revisa de instruis catolica sur la familia ia recomenda ce la eglesa adota un disposa plu positiva a omosesalia.

Un reporta inisial, scriveda par bispos en un consilio vatican, ia dise ce omosesales ave "capasias e cualias per ofre".

La reporta no defia la oposa longa de la eglesa contra sposia omosesal, ma alga grupos de diretos ge ia bonveni lo como un avansa grande.

Ma grupos tradisional ia rejeta la reporta. Un ia descrive lo como "un tradi", e "un de la documentos la plu mal de istoria de la eglesa".

Plu ca 200 bispos partisipa en la consilio, cual ia comensa a 5 otobre. Pape Fransisco ia asembla lo per debate tal temas controversa como aborta, contraconsepi, omosesalia, e divorsa.

La reporta de lundi, publicida a media de la consilio de du semanas, ia dise: "Omosesales ave capasias e cualias per ofre a la comunia cristian. Esce nos es capas de bonveni esta persones, garantiante a los un spasio fratin en nos comunias?"

La documento ajunta: "Sin nega la problemes moral liada a unis omosesal, on debe nota ce casos esiste en cual la aida mutua, a grado de sacrifia, formi un suporta valuosa en la vive de la duple."

En la anio pasada, un sonda inisiada par la pape ia sujesta ce la majoria de catolicas rejeta la instruis eglesal sur temas como seso e contraconsepi.

2014-10-13

Un ferovia reabri en Srilanca

En Srilanca, la Rea de Jaffna, un ferovia popular, va reabri oji. Lo lia la capital, Colombo, a Jaffna en la norde de la pais.

Presidente Mahinda Rajapaksa va inaugura la ferovia renovida, cual ia clui a 24 anios ante aora par causa de la gera interna de Srilanca.

Lo ia furni un lia multe importante entre norde e sude, transportante benes e persones tra la pais.

Multe persones regarda la reabri como un simbol positiva de Srilanca pos gera.

La tren va ofre un esperia nova a la jovenes de Jaffna, de ci multe ia vide nunca un tren.

Tra desenios, tamiles ia usa la servi per viaja de un fini de la isola a la otra, navetinte entre se viletas de abita en la norde e se empleas en la sude.

En la gera interna, soldatos governal ia usa la servi per asede la norde. La trenes ia deveni un blanco per ataca cuando los ia pasa tra areas controlada par la rebelores Tigres Tamil.

La gera ia comensa en 1983 e ia mata plu ca 70 mil persones.

Lo ia fini en maio 2009, cuando soldatos de la governa ia recatura la teritorios ultima cual ia rebelores ia saisi.

2014-10-12

Un siclon sever bate la costa este de Barat

La bandas esterna de Siclon Hudhud colpa la costa este de Barat, causante danas estendosa e provocante ce 300 mil persones sorti de la area.

La siclon porta ventas de asta 195 cilometres per ora, e es categorida como "multe sever".

Lo ia desradisi ja sentos de arbores e ia tira cordas eletrical a tera en la statos Andhra Pradesh e Orissa.

Du persones es ja matada en Andhra Pradesh, la un per un arbor e la otra par un mur cadente.

On teme ce un ondon de asta du metres de altia pote inonda areas basa, e donce sentos de sentros aidante ia abri en la du statos.

On ia recategori la fortia de la siclon de pos venerdi, e la marina barati e otra ecipos es preparada per aida.

Un siclon simil en 1999 ia mata plu ca 10 mil persones en Orissa, e en otobre de la anio pasada, cisa 500 mil persones ia debe sorti de esta du statos cuando un siclon sever ia pasa a tra.

La costa este de Barat, como ance Bangladex, es costumal colpada par tempestas siclonal entre april e novembre. Los causa comun moris e danas vasta a imobilas.

2014-10-11

Airoportos SUA vijila contra la virus Ebola

La airoporto JFK en New York comensa probas medical per atenta para la aveni de Ebola cual ia mata plu ca 4000 persones.

Pasajores de la paises la plu forte afetada va debe responde a un serie de demandas e permete ce on mesura se temperatures.

Probas simil a cuatro otra airoportos major en la SUA va comensa en la dias veninte.

Esta segue la mori prima de algun par la virus en Texas a mercurdi.

On va dona a viajores pajes informante sur la sintomes de Ebola, instruinte ce on debe vide un dotor si on deveni malada en tre semanas.

90% de viajores ci ariva en la SUA par avion veni a JFK o un de la cuatro otra airoportos. A cada dia, asta 160 persones entra de la tre paises la plu afetada.

La statistica la plu resente de la Organiza de Sania Mundal indica ce la cuantia de moris atribuable a la febre emorajal ia ateni 4033. Tota de estas, estra 9, ia aveni en Liberia, Siera Leon, e Gine, nasiones de Africa ueste.

La governa magribi ia demanda ce on pospone la torneo de futbal Copa de Africa de Nasiones de la anio veninte, par causa de la virus.

On ia pospone ja la elejes de senatores en Liberia a la semana veninte, per redui la risca ce votores va sperde la virus.

A la ves prima, la crise ia ativi  la Constitui Internasinal sur Desastres Spasial o Major. En se rol normal, lo furni imajes de satelite per crea mapas de dana e peril.

Per controla esce la sistemes de New York es sufisinte preparada, persones ci finje la sintomes de la virus – nomida "pasientes simulada" – ia presenta se a ospitales.

2014-10-10

Kim Jong-un es publica asente tra plu ca un mense

Kim Jong-un, la gidor de Corea Norde, no ia es presente a un rituo importante de aniversario political.

En venerdi, se nom no ia apare en un lista de los ci ia visita Palasio Kumsusan, la mausoleo de la du gidores Kim Il-sung e Kim Jong-il, per selebra la aniversario 69 de la Partito de Laborores.

Nun ia vide Kim en publica de pos 3 setembre. Esta es se asentia la plu longa pos la comensa de se rena en 2011.

El ia pasa 21 dias sin es publica videda en marte 2012, e 24 dias en junio de la mesma anio. En janero 2013 el ia es asente tra 18 dias.

En setembre, la televisa nasional ia dise ce el ave "un state fisical noncomfortosa", e ia mostra el con coxea.

Corea Sude ia comenta ce lo crede ce Kim resta en controla de la stato comuniste, ma se asentia provoca divinas sur se sania e se capasia de governa.

Jornalistes de Corea Sude sujesta ce el sufri de la artrite inflamante nomida gota. El ave 31 anios e es tro pesosa.

Apares de la visgidor Hwang Pyong-so, e ance alegas resente de un ofisior pasada de Corea Norde, ia provoca sujestas ce cisa on ia despone Kim de se posto.

Hwang ia gida un delega de ofisiores de Corea Norde a Seul per la rituo cluinte de la Juas Asian, en un visita regardada como un momento rara per discutes alta entre la Norde e la Sude.

On pote confirma no parte de la divinas.

2014-10-09

Mexico protesta contra la desapare de studiantes

En sites tra Mexico, miles de persones ia fa protestas contra la desapare de studiantes en Iguala, un vila sude, en setembre.

La studiantes ia scaramuxa con polisiores en se protesta propre, e on no ia vide los pos cuando los ia es prendeda a via en autos de polisia.

Sentos de patruliores estralegal ia junta se a la xerca, disente ce los va xerca en cada casa.

En la entretempo, on fa probas siensal a desuples de corpos trovada en tombas nonprofonda, prosima a la vila en la semana pasada. On teme ce la corpos es de la studiantes.

En la Site Mexico, membros de la familias ia gida un prosegue, portante fotografis de la mancantes. Protestas ia aveni ance en multe otra sites, incluinte un marxa silente par la Zapatistas, un grupo rebelante nativa.

La desapare e la situa ambiente ia causa un xoca en la pais.

La studiantes, de un scola de enseniores en Ayotzinapa en la stato Guerrero, ia viaja a la vila prosima Iguala per protesta contra lo cual los ia persepi como metodos prejudosa de lua enseniores.

Pos un dia de protestas, los ia vole revade a se scola. Membros de la uni de studiantes dise ce los ia embarca tre buses local, ma la polisia dise ce la studiantes ia saisi la buses.

En la oras seguente, ses persones ia mori cuando omes enarmada ia fusili contra la tre buses e la bus de un ecipo de futbal. Tre studiantes, un futbalor, la gidor de un de la buses, e un fem en un taxi ia es matada par la xutas. Multe plu ia es ferida.

La polisia munisipal ia xasa la studiantes, e on crede ce los ia fusili contra los. On ia teni dudes-du ofisiores en relata a esta.

Pos esta avenis a la note de 26 setembre, on ia reporta ce 57 studiantes manca. A 30 setembre, on ia anunsia ce 13 de los ia reveni. On ia trova ce un nom apare en la lista a du veses, donce 43 studiantes resta ancora mancante.

A 4 otobre, avocatos prosedente ia anunsia la descovre de ses tombas basa cual conteni la restas de 28 persones, cisa plu. La corpos es tan ardeda ce on ancora no ia pote identifia los.

La scola de la studiantes ave un istoria de ativia sinistriste, ma on no sabe esce la studiantes ia es atacada per se credes political.

Alga pensa ce los ia coleri un gang local de drogas par refusa paia mone de estorse.

Otras suspeta ce los ia es atacada par teme ce los pote disturba un parla a ofisiores major local par María de los Ángeles Pineda Villa, la sposa de la maior de Iguala.

On no ia vide el e se sposo, José Luis Abarca Velázquez, de pos 26 setembre. La polisia xerca los.

2014-10-08

La automata prima de banco abri en Somalia

On ia instala la automata prima de banco en Somalia en la capital, Mogadishu.

Alga persones ia pare confusada sur lo, car los ia usa nunca un tal automata.

La macina ia es poneda par Banco Salaam Somali en un otel superior, e lo permete ce clientes retira dolares SUA.

La campo bancal en Somalia es multe nondevelopada, impedida par plu ca du desenios de gera entre clanes e grupos relijial combatosa. Multe persones depende de envias de mone de estra la pais.

La unia ofisial de mone en la pais, la xiling, es cuasi sin valua, donce multe comersiores e stranjeres usa dolares en loca.

La automata nova permete ce on retira mone de se conta internasional de banco, usante tal cartas como Visa, MasterCard, e American Express.

Un portavose ia clari ce on pote retira sola dolares SUA. "Cisa nos va ajunta otra mones internasional en la futur. Persones de la popla sperdeda e stranjeres ia bonveni zelosa la idea. Nos intende instala plu automatas de banco en Mogadishu."

Un visitor stranjer, stante en la filo ante la automata, ia descrive la instala como "un avansa grande" per Somalia. "Me abita ja plu longa en Mogadishu ca me ia intende orijinal, donce me ia consuma me mone fisical. Me ia es stonada par me bon fortuna cuando on ia informa me sur la automata nova."

2014-10-07

Miama libri 3000 prisonidas per pas e stablia

La governa de Miama ia anunsia ce lo libri plu ca 3000 prisonidas.

Un mesaje a la paje de Facebook de Ye Htut, la ministro de informa, ia dise ce presidente Thein Sein ia pardona los per pas e stablia.

On crede ce alga de la prisonidas es ofisiores pasada de securia militar. Ma la plu de los ia es condenada per crimines minor.

La plu de prisonidas political en Miama (ance conoseda como Burma) ia es ja librida como parte de la prosede de reformi.

Grupos de diretos umana estima ce on teni ancora alga sentos.

Thein Sein ia promete libri tota prisonidas political. El ia deveni presidente en 2010 en un eleje cual ia causa la sustitui de un governa nonmilitar (ma militar suportada) per la rena militar pasada.

En anios resente, Miama ia destensa ance se restrinjes a jornalistes, e partitos oposante ia rejunta se a la prosede political. En responde, la comunia internasional ia reposa la plu de se punis contra la pais.

An tal, ativistes per diretos umana ia insiste ce on debe libri cada prisonida political. On no sabe esata cuanto tal persones resta en prison.