2016-03-31

Fondes antartica pote dupli la alti de nivel global de mar

La nivel global de mar ta pote leva par plu ca la duple de la estima corente la plu bon, seguente un analise nova de la cambia climal en Antartica.

La evalua modelinte dise ce mera la fonde antartica ta pote contribui plu ca un metre a la nivel de mar ante la fini de esta sentenio.

Ante 2500, seguente la rexerca, la mesma fonte ta pote causa un leva de 13 metres tra la mundo.

La autores de la studia dise ce un redui rapida de emetes de carbono pote limita esta risca.

En 2013, la Panel Intergovernal sur Cambia Climal ia predise ce, sin restrinjes de emetes de carbono, la mares tra la mundo va leva probable par no plu ca 98 sentimetres ante 2100. Ma esta estimas ia conteni un contribui minima de Antartica.

Otra analises a pos ia previde levas plu alta. Un studia resente ia sujesta ce la mares leva plu rapida ca a cualce tempo en la 2800 anios pasada, e ce en 2100 los va es plu alta par asta 1,31 metres.

On ia debate multe la nivel esata de la efeto de Antartica a esta prevides. En la tarda de la anio pasada, rexercores ia sujesta ce prevides de un contribui de un metre o plu no es credable.

Ma lo esta studia nova razona ce, ante la fini de la sentenio, la mundo ta pote esperia 1,14m de alti, mera de Antartica.

La siensistes pertinente dise ce se model es capas de furni un predise plu esata car lo integra la efetos de alga prosedes fisical a la ves prima.

Otra modeles ia foca a la efeto de acuas plu calda cual fonde la planos de jelo de su, esta rexerca nova inclui ance la efeto de acua fondeda a la surfas e de pluve cual flueta de supra e frati jelo suportante, tal rapidinte se lisca a la mar.

La model calcula ance la efeto de la desintegra de planos de jelo flotante. Se esta aveni, lo va revela mures de jelo tan alta ce los no pote suporta se pesa propre.

La siensistes previde ce esta fatores ajuntada va ativi en la desenios veninte, en cuando la caldi de la atmosfera (e no mera de la acuas plu calda a su) deveni la causa dominante de perde de jelo.

La autores crede ce los ia demostra la esatia de la model nova par reprodui coreta la alti de nivel de mar en periodos calda, tra miliones de anios pasada.

Si la mundo continua emete niveles corente de diosido de carbono en la desenios veninte, la rexercores razona ce la alti de nivel e mar va es la duple de la estima esistente per la sento anios pos aora.

Los opina ce se reporta conteni ance novas bon. Si on redui major la emetes global de carbono, alora la fatores cual aumenta la fonde antartica va es evitada. Mares va leva ancora, ma no a la rapidia estrema sujestada par esta studia.

2016-03-30

Un om usa un sintur falsa de bomba per saisi un avion

Un om egipsian ci ia forsa un avion interna a atera en Cipros ier ia usa un sintur falsa de bomba umana. Se motivas resta nonclar, ma la presidente ciprica ia dise ce la aveni no ia pertine a terorisme.

Videos publicida par la ministreria interna de Egipte mostra la om en pasa tra puntos diversa de securia a la airoporto Borg El Arab en Iskandariyya (Alexandria).

La drama ia fini a la airoporto de Larnaka en Cipros, con no pasajores ferida, cuando la om ia sede se.

Ofisiores ciprica ia nomi la om como Seif Eldin Mustafa, descrivente el como "psicolojial nonstable".

El ia demanda prima per parla con se sposa pasada ciprica, ci la polisia ia trae a la airoporto, e ia fa un serie de esijes "noncoerente" a pos.

El va apare en corte en la site Larnaka oji.

La avion de Egyptair ia reparti de Larnaka a 22:05 de ora local ier, en dirije a Qahira (Cairo), se destina orijinal.

La ministreria egipsian de turisme ia insiste ce tota medios de securia airoportal ia es "completa realida" ante cuando la vola MS181 ia comensa plu temprana en la dia.

Videos de cameras vijilante mostra ce securiores ia esamina Mustafa par palpa a du puntos de controla, e ce el ia pone un saco magra tra radiografes.

Egipte ia boni la securia de se airoportos pos cuando un avion rusce ia es esplodeda supra Sina en otobre pasada. Lo spende aora mil milion plu dolares per anio sur securia.

An tal, on reporta ce la esaminas resta noncoerente. Multe persones major e parlamentores refusa es palpada, e la empleadas de la airoporto e la airocompanias sircoveni comun multe de la controlas.

Pos un nonprogresa de alga oras, Mustafa ia desende un scalera de la avion e ia sede se a securiores ciprica. Se sintur blanca de bomba, con filos protendente, ia es final revelada como falsa.

Corta a ante, on ia vide alga persones fujinte de la avion, incluinte un, parente un ecipor, ci ia trepa tra un fenetra de la piloteria.

Plu temprana, la presidente ciprica Nicos Anastasiades ia responde en modo controversa a un demanda de un reportor sur la motivas cisa romantica de la saisor. El ia rie, disente: "Sempre un fem pertine."

Egyptair ia indica ce la Airbus A320 ia intende porta 56 pasajores de Iskandariyya a Qahira, con ses ecipores e un securior.

Un declara par la ministreria egipsian de avioni nonmilitar ia dise ce la avion ia conteni 26 pasajores stranjer, incluinte oto de la SUA, cuatro de Britan, du de Beljia, du de Elas, un franses, un italian, e un suri.

2016-03-29

Un tore de apartes arde en la AAU

Un focon grande ia colpa a la min du tores abital en la Amirias Arabi Unida. Esta es la tal aveni tre en no multe plu ca un anio.

La foco ia comensa en un tore en la amiria Ajman, a norde de Dubai, ante estende a un bloco visina.

On ia sorti la abitores, ma alga ia nesesa es tratada per problemes de respira e per feris minor.

A 31 desembre, un focon ia engoli un otel lusosa de 63 niveles en la sentro de Dubai.

La focon nova ia comensa en la tarda de lundi en la compleso Ajman Un, un developa de des-du tores con sirca 3000 apartes.

Videos postada a Twitter par la polisia ia mostra flamas consumante la plu de un lado de la tore, ateninte la altia de alga niveles.

Un video presedente ia mostra un cuantia grande de detrito ardente en cade a la tera.

A esta matina, la autoriosas ia dise ce la focon es estinguida e ce ecipos espeta la descaldi de la construida.

On ia spende 2,7 mil milion dirhemes ($735 milion) per completi la compleso, de cual se abri ia es projetada – ma no realida – per la anio 2009.

La focon a la sera de la anio nova ia arde tra plu ca dudes oras. 16 persones ia deveni ferida, ma focos artal a un loca visina ia es mostrada como intendeda.

La polisia ia dise ce la strato covrente la esterna de acel otel no ia conforma a normas de securia. La focon ia es causada par un sircuito corta en un lampa de punto.

En febrero de la anio pasada, un focon grande ia dana multe la rascasielo Marina Torch en Dubai, un de la tores abital la plu alta de mundo.

2016-03-28

Palmira es recaturada

Fotos nova ia emerji de Palmira, a oras pos cuando soldatos suri ia recatura lo de la grupo Daex.

La imajes revela la estende de la destrui fada par la grupo en se ocupa tra de menses a esta loca de erita mundal.

An si alga monumentos valuada es destruida, on dise ce multe de la ruinas de la site antica resta intata.

Maamoun Abdulkarim, la xef de anticas de Suria, ia dise ce la autoriosas ia "previde la plu mal". Ma el ia ajunta ce "la tereno, jeneral, es en bon forma".

Presidente Bashar al-Assad ia bonveni la recatura de Palmira como "un ateni importante" en la "gera contra terorisme".

Fontes militar dise ce la armada suri ave aora "controla completa" pos dias de batalia, suportada par atacas airal rusce.

Vladimir Putin, la presidente rusce, ia loda Assad. La Cremlin ia dise ce Assad sabe ce la opera de Palmira "ia ta es nonposible sin la suporta de Rusia".

Daex ia saisi la loca de Erita Mundal de Unesco, e ance la vila moderna, en maio 2015. Corta a pos, los ia mata la arceolojiste ci ia atende la ruinas tra 40 anios.

Palmira es situada en un area stratejial importante a la via entre la capital Dimashq e Deir al-Zour, un site este sur cual on batalia.

Cuando Daex ia saisi la site, lo ia destrui locas arceolojial, provocante un coleria global. Du templos vea de du mil anios, un arco, e tores funeral ia es lasada en ruinas.

La grupo jihadiste, cual ia destrui ance alga locas premuslim en Irac, crede ce tal strutures representa la adora de idoles.

A la min 400 bataliores de Daex ia es matada en la batalia per Palmira. En un declara a saturdi, la ministreria de defende rusce ia dise ce se atacas airal ia colpa 158 blancos de Daex, matante plu ca 100 militaristes.

2016-03-27

On aprende la aida prima en Paris

Sirca 3200 persones en Paris ia fa sin custa un curso de aida prima, per es plu preparada per la posible de un ataca.

La sesiones de du oras ia aveni en cada distrito de Paris, e ia mostra a se partisipores como on debe reata en un situa de crise.

Ofisiores intende repete la curso a un ves o plu per anio.

La curso ia es aprobada par la consilio de site pos la atacas teroriste en novembre pasada cual ia mata 130 persones en la capital franses.

A pos, pompores e la Crus Roja ia nota un aumenta major de demandas per se programes de instrui de aida prima.

2016-03-26

Microsoft repenti un inteleto artifisial ofendente

Microsoft ia demanda ce on pardona lo per crea un inteleto artifisial capas de conversa, cual ia deveni rapida un raziste e negor de la Olocausto.

Ma a la mesma tempo, lo ia clari ce la opinas de Tay resulta de se eleva, e no de se natur. La aveni confirma lo cual nos ia sabe ja: persones en la interede pote es cruel.

Tay ia es intendeda per interata con persones de entre 18 e 24 anios en redes sosial, ma lo ia esperia "un ataca coordinada par un sugrupo de persones" pos se publici en la semana pasada.

Pos 24 oras, la ecipo de Microsoft ia desativi Tay per fa "ajustas".

Ier, Peter Lee, la xef de rexerca ia dise ce la compania es "profonda repentosa per la tuitas nonintendeda ofendente e cruel" e ia sutrae Tay de Twitter per la futur prosima.

Lee ia ajunta: "Tay es aora estralinia, e nos va atenta retrae lo sola cuando nos es serta ce nos pote previde intendes malvolente cual desacorda con nos prinsipes e valuas."

Tay ia es desiniada per aprende de se interatas con persones vera a Twitter. Saisinte la momento, alga usores ia deside nuri lo con informas raziste e ofendente.

En Xina, on ia reata diferente. Un conversador simil ia es ja publicida par Microsoft a usores xines, ma con resultas plu bon: sirca 40 milion persones interata con lo, deletada par se racontas e parletas.

Lee ia confesa ce un era en la desinia ia permete ce Tay deveni cruel.

"An si nos ia prepara contra multe spesies de malusa de la sistem, nos ia fali imajina esta modo esata de ataca. Como resulta, Tay ia tuita parolas e imajes estrema nonconveninte e condenable. Nos aseta la culpa intera per no previde esta posible."

2016-03-25

Corea Norde simula ataca la presidente de Corea Sude

Corea Norde dise ce lo ia usa artileria en simula un ataca contra la abitada ofisial de la presidente de Corea Sude.

La eserse ia es supravideda par Kim Jong-un, la xef de Corea Norde, ci ia recomenda ce la militaria prepara se per destrui "cruel" la governa en la Sude.

Esta es la plu resente en un serie de jestis par Pyongyang.

La presidente sude, Park Geun-Hye, ia comanda la armada a vijila. Ma el ia dise ier ce "provocas fretosa va deveni mera un via a autodestrui per la governa txoson".

Corea Norde ia reata ja pos cuando la Nasiones Unida ia pone alga de se punis la plu forte, seguente probas nucleal e de rocetos de distantia longa par la pais.

Pyongyang ia es colerida, como en cada anio, par eserses militar juntada entre la SUA e Corea Sude cual aveni a sude de la frontera.

Ja conoseda per linguaje vitriolosa, la reporta par la Ajenteria Sentral de Novas Corean ia menasa cambia la abitada presidental sude, nomida la Casa Azul, a "un mar de flamas e senes".

Lo no es clar cuando la eserse simulante ia es fada, ma la reporta ia averti sur "un fini misera" per presidente Park.

La Casa Azul ia es atacada par comandos de Corea Norde en 1968.

Lo acel atenta alora a asasina la presidente no ia susede, ma sete persones de Corea Sude e la plu de la 31 atacores ia es matada.

2016-03-24

Un zebra japanes mori en un lago de golf

En Japan, un zebra ci ia evade un club de cavalores ia mori en un lago a un campo de golf, pos cuando on ia calmi el.

Polisiores e dotores veterinar ia spende oras en xasa la animal sirca la golferia prosima a la site Toki en Gifu, un prefetia en la sentro de la pais.

On ia xuta un dardo calminte a el, e el ia core a en la lago pos un tempo corta.

El ia mori an si on ia susede estrae el de la lago en poca minutos. Probable el ia afoca e se cor ia sesa bateta.

La zebra mas de du anios ia es poseseda par un zo viajante, ma ia es tempora casida a la staleria de un club de cavalores.

A la sera de martedi, manejores ia es movente la zebra a interna per la note cuando el ia deveni ajitada, ia crase un serca su pede, e ia evade, fujinte en dirije a un monte prosima.

Ja temprana en la matina de ier, la polisia ia reseta reportas ce un zebra core longo un strada. Los ia locali rapida el a la Campo de Golf Internasional en Toki, do dotores e polisiores ia atenta catura el.

El ia sumerji en un lago a tempo no longa pos reseta la dardo calminte.

La raconta nonusual ia deveni rapida un punto de discute entre interedores japanes ier, ci ia espresa se xoca e tristia. La parola shimauma, cual sinifia "zebra" en japanes, ia deveni modosa en Twitter.

Multe persones ia retuita un foto par un fem joven ci ia vide la animal galopante longo un via en la note de martedi, e ia indica se surprende a trova "un zebra en la foresta".

2016-03-23

Du frates ia fa la ataca en Bruxelles

Jornalistes beljes ia nomi la du bombores ci ia ataca la airoporto internasional en Bruxelles ier como Khalid e Brahim el-Bakraoui.

La polisia ia es ja consensa de la du frates ante la ataca. Los ia ave un istoria criminal.

On xerca ancora un om tre ci ia es fotografida con los a la airoporto.

A martedi, du esplodes ala – e un plu a un stasion de metro – ia mata sirca 34 persones e ia feri 250.

La grupo Daex ia dise ce lo ia esecuta la atacas, e ia averti ce plu va segue.

Beljia fa tre dias de lamenta nasional, e on va oserva un minuto de silentia a mediadia per onora la vitimes.

Lo pare ce Khalid el-Bakraoui ia usa un nom falsa per lua la aparte en la area Forest de la capital beljes do la polisia ia mata un fusilor en la semana pasada.

En acel opera, polisiores ia deteta un impresa de dito de Salah Abdeslam, la suspetada xef de la atacas teroriste a Paris, ci on ia aresta a venerdi.

Un jornal reporta oji ce la polisia ia es ja xercante Khalid el-Bakraoui par causa de se ativia teroriste, e ce Brahim ia es un fujor pos es condenada per otra atas criminal.

La polisia ia distribui un imaje de camera vijilante cual mostra tre omes a la airoporto. La mesma jornal ia nomi la om tre como Najim Laachraoui, ci la polisia ia nomi plu temprana en la semana como un aidor de Abdeslam.

2016-03-22

Du esplodes a la airoporto de Bruxelles

Du esplodes ia aveni en la zona de parti a la airoporto Zaventem en Bruxelles.

La governa beljes ia confirma ce persones ia deveni ferida, ma ancora no ia indica cuanto.

La causa de la esplodes no es clar. Tota persones es sortida de la airoporto, cual on ia clui a aviones arivante.

En minutos resente, un plu esplode ia aveni a la stasion de metro Maelbeek, prosima a la instituidas de la Uni European. On ia clui la metro intera.

La esplodes ia aveni a cuatro dias pos la catura en Bruxelles de Salah Abdeslam, la suspetada xef en la atacas a Paris a 13 novembre 2015.
Beljia ia aumenta se nivel de menasa teroriste a grado masima.

On reporta ce on ia trova plu bombas, e ce on ia oia fusilis e crias en arabi ante la esplodes.

Imajes a redes sosial mostra fuma levante de un de la construidas de la termina, e on ia descrive un panica en cuando persones ia fuji de la construidas.

On ia para la transporta ferovial a la airporto e ia recomenda ce persones no atenta veni a lo.

Imajes ia mostra un banda de vitro fratida sur un de la construidas.

Alga reportas dise ce a la min un de la esplodes ia aveni prosima a la area de rejistra per American Airlines, ma denova on no ia confirma esta.

Un difusor beljes ia sita un atestor ci ia dise ce persones es ferida o nonconsensa en la zona de parti, a fas de la otel Sheraton.

Jan Jambon, la ministro beljes de internas, ia dise ier ce la pais es a la nivel masima de vijila atacas venjante pos la catura de Abdeslam. El ia comenta: "Nos sabe ce la para de un selula pote provoca otras a ata. Nos es consensa de lo en esta caso."

La airoporto Zaventem es situada a 11 cilometres a norde-este de Bruxelles e ia trata plu ca 23 milion pasajores en la anio pasada.

2016-03-21

Obama visita Cuba

Barack Obama ia ariva en Cuba per un visita sin presedente resente a la isola, e per discute con se xef comuniste.

El es la presidente corente prima de la SUA ci ia visita de pos la revolui de 1959, cual ia provoca desenios de enemia.

Parlante en la ambasada SUA reabrida en la capital Havana, el ia descrive la visita como "istorin". El ia pasa ance tempo en la site vea.

Obama va encontra presidente Raúl Castro – ma no la xef revoluiste jubilada Fidel Castro – e la du va discute comersia e reformis political.

La presidente SUA ia emerji suriente de la avion Forte de Aira Un con se sposa Michelle e se fias Sasha e Malia. Teninte parapluves, la grupo ia pasea tra pluve lejera longo un tapeto roja per es salutada par Bruno Rodríguez Parrilla, la ministro cuban de esternas.

A du oras pos atera, Obama ia saluta empleadas de la ambasada SUA con la parolas: "Lo es merveliosa ce me es asi. En 1928, presidente Coolidge ia veni en un barcon blindada. El ia spende tre dias per ateni; me ia spende sola tre oras. A la ves prima de istoria, Forte de Aira Un ia atera en Cuba, e esta es nos punto prima de pausa."

El ia ajunta ce la visita es un oportun ce el presenta "un idea per un futur cual brilia plu ca nos pasada".

Plu tarda, la Obamas ia comensa un pasea tra Havana Vea. On ia intende ce los va interata con cubanes comun a la stradas, ma esta parte de la dia ia es manxada par un tempesta tropical.

Los ia foli su parapluves ante visita la catedral nasional en loca.

La visita de Obama es la punto alta de un lejeri resente de relatas, incluinte la abri de ambasadas en la anio pasada.

Ma a mera oras ante se ariva, on ia aresta protestores en Havana ci ia clama per la libri de prisonidas political. La polisia ia prende desuples de protestores de la grupo Damas en Blanca, formida de sposas de prisonidas political, de estra un eglesa do los atenta fa un protesta a cada semana.

Obama e Castro va senta con lunlotra a un banceta formal, los va fa un confere de jornalistes en junta, e los va discute la comersia.

La Casa Blanca ia clari ce Obama va encontra oposores political, o si esta plase a la autoriosas cuban, o si no. On previde ce estas va inclui membros de la grupo Damas en Blanca.

An si la presidente SUA no va encontra Fidel Castro, Cubanes ia recorda ier se xef veteran pasada cuando jornales ia publici fotos de el en consenta con Nicolás Maduro, la presidente de Venezuela.

Analistes sujesta ce la publici de esta fotos indica sentis desacordante en la Partito Comuniste sur ospita Obama.

2016-03-20

On catura un suspetada de la atacas teroriste en Paris

Un avocato franses dise ce Salah Abdeslam, suspetada de la atacas en Paris, ia confesa ce el ia vole esplode se a la Stadion de Frans, ma ia cambia se deside.

A la dia pos catura el, on ia acusa el de crimines teroriste. Se avocato dise ce el va oposa se estradi a Frans, ma ce el coopera con la polisia.

La atacas en Paris en novembre ia mata 130 persones e ia feri multe otras. La grupo Daex ia dise ce la bombis e fusilis ia es esecutada par lo.

Abdeslam, un sitadan franses naseda en Beljia a 26 anios ante aora, ia es arestada en Bruxelles a venerdi, pos cuatro menses de fuji. El ia deveni fusilida a se gama cuando on ia aresta el.

Investigores espera ce el va revela plu informas sur la rede de Daex, se finansia, e se projetas.

Los crede ce el ia aida con lojistica, incluinte lua salas e transporta bombas umana a la Stadion de Frans. Los crede ance ce el ia fuji corta pos la atacas, revadente a la distrito Molenbeek de Bruxelles.

Entretempo, Interpol ia recomenda "un vijila aumentada" a fronteras pos la catura a venerdi, disente ce cisa plu aidores va atenta evade Europa.

La sujeto de un xerca jigante, Abdeslam ia es arestada a sirca un dui de cilometre de se casa en Molenbeek. Se frate, Brahim, ia es un de la atacores ci ia esplode se en Paris.

Un otra om arestada a la mesma tempo como Abdeslam, Monir Ahmed Alaaj, es ance acusada de partisipa en omiside teroriste e la ativias de un grupo teroriste.

La catura a venerdi ia deteni ance tre membros de un familia. Los inclui Abid Aberkan, descriveda como un ami de Abdeslam, ci on ia acusa de partisipa en la ativias de un grupo teroriste e de refuja criminores.

Un otra membro de familia, identifiada como Djemila M, es acusada de refuja criminores, ma no es arestada. La madre es ja librida sin es acusada.

On ia catura Abdeslam pos trova se impresas de dito en un aparte en Forest, un otra distrito de Bruxelles, invadeda par la polisia a martedi.

Metraje dramosa de venerdi mostra Abdeslam puxada a en un auto de polisia pos un serie de fusilis. Alaaj ia es ance ferida en la arestas, ma ambos suspetadas ia es desospitalida ier.

François Hollande, la presidente de Frans, ia descrive la aresta de Abdeslam como "un momento importante".

A un confere jornaliste con Charles Michel, la ministro xef de Beljia, el ia declara: "La batalia contra terorisme no fini a esta sera, an si esta es un vinse. Nos debe catura tota los ci ia permete, organiza, o fasili esta atacas, e nos comprende ce los es multe plu numerosa ca nos ia crede e identifia plu temprana."

Avocatos ia dise ce Alaaj ia viaja con Abdeslam a Deutxland en otobre pasada, do on ia rejistra se impresas de dito en un esamina de identia.

En la aparte en Forest, on ia trova un pasaporto suri falsa con nom de Alaaj e paperes beljes de identia falsa.

2016-03-19

Desuples mori en un cade de avion en Rusia

En Rusia sude, un jeto ia cade en la site Rostov-de-Don, matante tota se 55 pasajores e sete ecipores.

La Boeing 737-800 de FlyDubai, viajante de Dubai, no ia trova la atereria cuando lo ia atenta atera a 03:50 de ora local a esta matina.

La causa de la era no es clar, ma un mal capasia de vide e ventas alta es cisa fatores.

Cameras vijilante ia rejistra un esplode e un lampi grande pos la cade de la avion.

A se pajeria, la Comite Investigante de Rusia ia dise: "La avion ia colpa la tera e ia rompe a pesos."

On reporta ce la avion ia abandona se atenta prima de atera, e ia sirculi tra du oras ante cade a la atenta du. Lo ia colpa la tera a sirca 250 metres ante la comensa de la atereria en Rostov, un site a 950 cilometres a sude de Moscva.

La plu de la pasajores en la vola FZ981 ia es rusce, diseda par la governor rejional. Un otra ofisior ia informa ce tre stranjeres es en la lista de pasajores.

Ses de la ecipores ia es nonrusce, seguente un declara de la ministreria rusce de situas urjente.

On ia envia sirca 700 laborores de salva a la loca de cade, e la foco ia es estinguida. On xerca aora la rejistradores de vola, e ia comensa un investiga sur la causa de cade.

Otra aviones es diverjeda de la airoporto.

La airocompania ia confirma la "asidente trajedin" a se paje de Facebook, ajuntante ce lo ia inisia un reata de crise. A Twitter, Boeing ia indica ce se ecipo labora per recolie plu detalias.

FlyDubai es un compania transportante de custa basa con sentro en Dubai. Lo ia es lansada en 2009 e vola aora a 90 destinas.

2016-03-18

On abandona la mision Kon-Tiki2

Autoriosas en Txile dise ce los ia salva 14 persones de du balsas, fininte un atenta de imita la viaja famosa de Kon-Tiki en 1947.

La mision Kon-Tiki2 la comensa en Peru en novembre, e la balsas ia ateni la Isola Pascual de Txile pos 43 dias.

Ma la organizores ia dise ce los ia deside abandona la viaja de reveni car lo "ia mostra se como plu difisil par causa de ventas nontipal".

La governa txilan ia indica ce la ecipores salvada es en bon sania.

La ecipo ia comensa se viaja de reveni, en dirije a Txile, en janero, ma corentes forte ia devia los. La marina txilan ia declara ce la balsas ia veni a sirca 1600 cilometres a ueste de la site Puerto Montt. A mercurdi, la mision ia envia un sinial per solisita aida.

En un declara, Torgeir Higraff, la gidor de mision ia dise: "Nos comprende ce la viaja a America Sude va ocupa tro multe tempo, e nos prefere abandona per serti la securia de tota persones."

El ia culpa la fenomeno El Niño per crea modeles nontipal de clima, ajuntante ce "en un anio normal, nos ia ta ateni ja America Sude. En loca, nos es ancora a 900 milias maral de la tera, e la predises meteorolojial no es prometente."

Alga de la ecipores ia fa rexercas sur cambia de clima, contamina par microplasticas, e la efeto de la fenomeno El Niño.

En la mision de la Kon-Tiki orijinal de 1947, un ecipo xef norsce ia traversa la Mar Pasifica par balsa. Lo ia es gidada par Thor Heyerdahl, un norsce ci on regarda como un de la aventurores grande de la sentenio 20.

Se mision ia demostra la posibilia de un viaja par balsa de Peru a Polinesia, contradisente ideas alora asetada.

2016-03-17

Presidente Trump es entre la 10 riscas global la plu grave

Seguente la Unia de Informa Economiste, un de la des riscas la plu grave cual la mondo fronti es un gania de la presidentia de la SUA par Donald Trump.

La compania rexercante, cual parteni a la jornal La economiste, averti ce el ta pote disturba la economia global e aumenta riscas political e securial en la SUA.

An tal, lo no previde ce Trump va vinse Hillary Clinton, ci lo regarda como "se competor democrata la plu probable".

On gradi Trump como plu riscosa ca un sorti par Britan de la Uni European o un gera en la Mar de Xina Sude.

Otra avenis listada como plu perilosa es un lenti subita de la economia de Xina, e un gera fria nova causada par la intervenis de Rusia en Ucraina e Suria.

En se evalua de riscas global, cual considera efetos e probablias, la compania ia dise: "Asta aora, senior Trump ia dona vera poca detalias de se politicas – e estas tende es propensada a revisas constante."

La lista usa un scala de 1 asta 25. Trump colie la grado 12, la mesma risca como "un destabli de la economia global par la menasa cresente de terorisme jihadiste".

Sur Trump, la compania ia comenta plu: "El ia es spesial enemin a la comersia libre, e a veses repeteda el ia eticeti Xina como un 'manipulor de mone'."

Lo ia averti ce se linguaje forte en dirije spesial a Mexico e Xina "ta pote grandi rapida a un gera de comersia".

Trump ia recomenda la construi de "un mur tan grande" a la frontera SUA–Mexican, paiada par Mexico, per preveni ce migrores nonlegal e vendores de drogas entra a la Statos Unida.

Campaniante, Trump ia recomenda ance ce on mata la familias de teroristes e invade Suria per elimina la grupo Daex e prende se petrolio.

La Unia de Informa Economiste ia ajunta: "Se tendes atacosa militar en dirije a Asia sude-ueste e se proibi de tota viajas muslim a la SUA ta es un util potiosa de enscrive per grupos jihadiste, aumentante se menasa e en la rejion e ultra lo."

Oposores political de Trump ia fa comentas simil. An tal, la comersior prosimi plu a deveni la aspiror proposada par la partito republiciste. Trump, ci ave no esperia political, ia dise ce se suportores "va tumulta" si el no deveni proposada.

Si el gania la presidentia, la rexercores predise ce la politicas interna e esterna de la SUA va es suminada: "La enemia inata en la ierarcia republiciste en dirije a senior Trump, combinada con la oposa amarga e nonevitable par la partito democrata, va causa ce multe de se politicas plu estrema deveni blocida en la Congresa."

2016-03-16

Arjentina afonda un barcon de pexa xines

La gardacosta de Arjentina dise ce lo ia xasa e afonda un barcon xines cual ia pexa nonlegal en acuas arjentina ier.

En un declara publica, la gardacosta ia clari ce un de barcones propre ia xuta avertinte a la Lu Yan Yuan YU 010 en cuando lo ia vade en dirije a acuas internasional.

Lo ia dise ance ce lo ia atenta prima oteni un responde par radio.

Tota 32 ecipores ia es salvada.

Xina ia espresa formal se ansia sur la afonda.

Un portavose per la ministreria xines de esternas ia dise en un declara ce Beijing ia fa comentas formal urjente a Arjentina, esijente un investiga completa sur la aveni.

La pexa nonlegal es un problem comun en la rejion.

"A plu ca un ves, la barcon ofendente ia fa manobras desiniada per obliga un colide con la gardacosta, perilinte no sola se ecipo propre ma ance empleadas de la gardacosta, ci on ia comanda a xuta a partes de la barcon," la declara de la gardacosta ia dise.

Esta ia aveni an si la relata de Arjentina a Xina ia deveni plu prosima en anios resente.

2016-03-15

Rusia retira se de Suria

Fortes rusce prepara comensa parti de Suria pos un anunsia surprendente ier par presidente Vladimir Putin.

La ministro de defende, Sergei Shoigu, ia comanda la retira, e on carga aora aviones per vola a Rusia.

Ofisiores ueste ia bonveni cauta la move, disente ce lo ta pote presa la governa de Suria a partisipa en negosias. Discutes de pas entra ja a se dia du.

Entretempo, un comision de la Nasiones Unida va presenta oji un reporta sur crimines de gera en Suria.

La redui de la fortes rusce ia es anunsiada a un consenta entre Putin e se ministros de defende e esternas.

Rusia es un aliada esensal de la presidente suri, Bashar al-Assad, de ci se ofisia ia rejeta divinas ce un divide ia apare entre la du paises, descrivente la move como mutua acordada.

La campania airal rusce ia comensa en setembre pasada, aidante la governa suri e permetente ce lo recatura teritorio de rebelores.

On no ia dona detalias sur la cuantia de aviones e soldatos cual va es retirada de la base Khmeimim en la provinse Latakia. On ia indica ance no limita de tempo per completi la retira.

Ma la ministreria rusce de defende ia declara en se pajeria ce la "parte xef" de la grupo de fortes armada rusce en Suria deveni relocada a la Federa Rusce.

Lo ia ajunta ce aviones de la base va fa la vola a Rusia – de plu ca 5000 cilometres – en forma ofisial, acompaniada par la aviones de transporta, con pausas per prende carburante longo la via.

Lo no es clar cuanto soldatos Rusia ia envia a Suria, ma estimas par la SUA sujesta ce la cuantia es entre 3000 e 6000.

An tal, Putin ia dise ce Khmeimim e la base marinal mediteraneo de Rusia a Tartus va continua opera en modo normal.

Rusia insiste ja longa ce se campania de bombarda ataca sola grupos teroriste, ma potias ueste ia cexa ce la atacas colpa ance oposores political de Assad.

En Genève, discutes con intende de fini la gera continua. On previde ce la ambasador NU per Suria, Staffan de Mistura, va consenta con la supragrupo oposante, la Comite Alta de Negosias.

Plu temprana, de Mistura ia descrive la discutes como "un momento de veria" e ia averti ce on ave no otra scema per si la discutes va fali. La sola alternativa ta es un revade a gera.

La plu de partisipores en la gera ia acorda un sesa de batalia, e jeneral on ia obedi esta, an con reportas de alga violes.

En un telefoni, Putin e Barack Obama, la presidente SUA, ia discute la situa en Suria e "la pasos seguente nesesada per reali completa la sesa de batalia" acordada en la mense pasada.

La Cremlin ia dise ce ambos presidentes ia "recomenda un intensi de la prosede per un solve political" de la gera.

La move rusce ia reseta un bonveni reservada de diplomatas ueste e la oposores suri.

2016-03-14

Un bomba mata en Ankara

Recep Tayyip Erdoğan, la presidente de Turcia, ia promete trae terorisme "a se jenos" pos un ataca en la capital, Ankara, cual ia mata a la min 32 persones.

Erdoğan ia dise ce la bomba umana de auto va susede mera forti la determina de la securiores turces.

La esplode en Güvenpark, un sentro major de transporta, ia feri a la min 125 persones. Du bombores suspetada ia mori ance.

La ministro de internas, Efkan Ala, ia dise ce un investiga va conclui oji e la atacores va es nomida.

No grupo ia dise ce lo ia esecuta la ataca, ma fontes governal sujesta ce on suspeta la Partito de Laborores de Curdistan (PKK).

La rebelores curdi ia fa un serie de atacas en Turcia en menses resente, matante sentos de persones, pos la fini de un sesafusili en la anio pasada. Ance la grupo Daex ia ataca resente Ankara.

Turcia es un parte de la alia gidada par la SUA contra Daex, e lo permete ce aviones aliada usa se base a İncirlik per atacas contra Irac e Suria.

Lo ia fa ance un campania de bombardas contra combatores curdi suri de la Unias Protejente de la Popla (YPG), cual lo regarda como un estende de la PKK.

Erdoğan ia declara ce grupos teroriste ataca nonmilitares car los perde la batalia contra la fortes de securia turces.

Demandante per unia nasional, el ia dise ce Turcia va usa se direto a autodefende per preveni atacas futur. "Nos popla no debe es ansiosa. La luta contra terorisme va fini serta con susede, e terorisme va es traeda a se jenos."

Seguente la ajenteria nasional de novas de Turcia, Ahmet Davutoğlu, la ministro xef, ia pospone un visita a Urdun par causa de la bombi.

La Statos Unida ia condena la ataca. Un portavose per la departe de esternas ia dise: "Nos reafirma nos asosia forte con Turcia, nos aliada en OTAN, en combate la menasa compartida de terorisme."

Jens Stoltenberg, la secretor jeneral de OTAN, ia condena ance la bombi, disente ce on ave "no justi de tal atas de violentia odiable".

La partito turces procurdi ia publici un declara condenante la ataca. La Partito Democrata de la Popla (HDP) ia dise ce lo comparti "la dole vasta sentida a lado de nos sitadanes".

On acusa frecuente ce la HDP es la ala political de la PKK – un acusa cual lo nega – e ce lo no parla contra la violentia de la PKK.

La esplode ia aveni ier a sirca 18:40 de ora local, e on ia sorti cadun de la area per si un ataca du ta aveni.

Mehmet Müezzinoğlu, la ministro turces de sania, ia informa un confere jornaliste ce 30 persones ia es matada a la loca de esplode, e cuatro ia mori plu tarda en ospital. On crede ce du de la mores ia es la atacores.

Müezzinoğlu ia dise ce 125 persones es tratada a ospitales diversa en Ankara, e ce 19 de los es en state grave.

En la mense pasada, un ataca de bomba contra un convoia militar en Ankara ia mata 28 persones e ia feri desuples de otras.

Lo acel bombi ia es reclamada par un grupo militariste curdi, la Falcones de Libria de Curdistan. La grupo ia dise a se pajeria ce la ataca retalia contra la politicas de presidente Erdoğan. Ma Turcia ia culpa un suri ci ia es un membro de la YPG.

En otobre 2015, plu ca 100 persones ia es matada en un bombi umana duple a un asembla de pas curdi en Ankara.

Tre atacas en la capital turces en min ca ses menses indica la menasa multiple cual la pais fronti aora, e leva demandas sur la capasia de la governa de manteni la securia.

La pais cual ia es la angulo stable de Asia sude-ueste e la aliada esensal de la Ueste en un area volatil trova aora se a un momento perilosa.

2016-03-13

Un artiste brasilera bandi la oios de scultas

Sento scultas sur la stradas de Rio de Janeiro ia ave se oios covreda con bandas roja, en un protesta artal contra la crise political profondinte en Brasil.

La artiste anonim ia dise ce el desira proteje figures nasional de istoria brasilera contra vide la state vergoniosa de la pais.

El ia dise ce la obra no es liada con prosegues protestante contra presidente Dilma Rousseff, cual va aveni oji.

La scultas, a locas diversa tra la site, inclui un de Getúlio Vargas, la autocrata prima de la pais, ci ia rena de 1930 a 1945 e ia vole transforma Brasil de un economia fundida en cultiverias a un pais de industria forte.

Ance con oios bandida ia es un sculta de Alberto Santos-Dumont, la padre de avioni brasilera e Isabel, la Prinsesa Imperal de Brasil ci, cuando renante, ia promove ativa e suscrive final la "Lei Aurea" (Lege Orosa), librinte tota sclavos en Brasil a 13 maio 1888.

La artiste, ci labora en un projeta de arte nomida Oraculo, ia clari ce el vole espresa ce "protesta no es mera prosegues sur stradas".

A soldi, protestas vasta es projetada par los ci oposa Rousseff per esije ce on acusa el de malmaneja la finansia e la economia.

Brasil sufri se retrosede economial la plu grave de desenios.

La artiste ia comenta: "La idea es ce on bandi la oios de los ci no pote plu ata per la pais, e ce on evita ce los atesta sin potia la crise economial e political en la pais, noncapas de reata."

2016-03-12

La palasio de Ceaușescu deveni visitable

La cason lusosa de Nicolae Ceaușescu, la xef pasada de Romania, abri oji se pordes a visitores.

Un cuatri de sentenio ia pasa pos cuando la presidente desponeda e se sposa Elena ia es esecutada par fusilores a la Dia de Natal en 1989. Ma aora, romanianes comun pote esplora la casa do la duple ia abita.

La construida lusosa, nomida la Palasio de Primavera, deveni oji abrida a la popla a la ves prima.

Per tan poca como 15 leus ($4), visitores pote vaga tra la abitada de 80 salas, sur cual on reporta ce lo inclui un sinema, un pisina, e un sala impresante de vesti.

Lo es situada en 14 mil metres cuadrida de tereno en Primăverii, un visineria desirable de București. Lo ia es desiniada en la media de la desenio de 1960, seguente la spesifas esata de la tirano e se sposa, sur ci on dise ce el mesma ia eleje la candelabros e mosaicas.

Pos la revolui romanian en 1989 cual ia despone Ceaușescu, la construida ia es ocupada par la stato e usada sola a veses rara per ospita delegas ofisial. On ia atenta vende lo en 2014, ma lo no ia atrae un compror.

En la mense pasada, la Palasio de la Parlamento – un otra construida enorme de cual la tirano pasada ia comanda se crea – ia abri se per turis virtual.

Con mil salas, do 100 mil persones ia labora en la dias final de la eda comuniste, lo es e amirada e despetada par la popla de Romania.

La reapare de interesa en la eda comuniste e un suavi de disposa a la rena odiada ariva aora, cuando multe romanianes senti ce la vive no ia boni multe pos la suverti de Ceaușescu.

2016-03-11

A sinco anios pos la tsunami japanes

Japan onora la aniversario sinco de la trematera e tsunami cual ia lasa plu ca 18 mil persones mor o mancante.

La ministro xef Shinzō Abe e imperor Akihito ia visita un monumento en Tokyo, e ia partisipa en un momento de silentia nasional a la tempo esata cuando la trematera ia colpa.

La trema de grandia 9,0 ia colpa a mar, creante un ondon vasta cual ia ruina la costa norde-este.

Lo ia causa ance la desastre nucleal la plu grave pos Txernobil, a la compleso Fukushima Daiichi. Acua ia inonda la compleso, descapasinte sistemes frinte e provocante un serie de fondes nucleal.

Esta ia sperde radia tra un area grande e la obliga plu ca 160 mil abitores a parti. An pos sinco anios e multe laboras descontaminante, la plu de los no pote revade a se casas.

La trematera a 11 marto 2011 ia es entre la plu fortes rejistrada de istoria. Ma la tsunami resultante ia prende la plu vives, cuando un mur de acua de mar ia forsa se tra areas costal de Tohoku, crasente vilas e viletas intera.

A 14:46 de ora japanes (05:46 de ora global), la momento esata de deteta la trema, la popla de Japan ia basi se testas per respeta la vitimes. Campanas ia sona, e en la capital la metro suteran ia pausa.

Parlante a la rituo, Akihito ia dise: "Multe de la persones afetada par la desastre senese, e me es ansiosa ce cisa alga de los sufri solitar en locas do nos oios e atende no ateni."

A la dia ante la aniversario, Abe ia redise la dedica de se governa a la potia nucleal, clarinte ce Japan "no pote funsiona sin lo" en la futur.

Pos la desastre de Fukushima, tota complesos nucleal en Japan ia es comandada a desativi entre ansia sur securia, e la pais ia es obligada a depende de emporta custosa combustables de fosil.

On ia reinisia sola un pico de complesos, e an estas es oposada par abitores ci dise ce on no ia ata sufisinte per serti ce un tal desastre va reaveni nunca.

Plu temprana en esta semana, on ia comanda ce du complesos desativi denova, par causa de temes sur se securia.

En soma, 470 mil persones ia es sortida de la area sirca Fukushima cuando la estende de la problem de radia ia deveni clar.

La governa ia spende miles de miliones de dolares en laboras de reconstrui, ma multe taxes resta nonfada e multe persones no ia pote reveni. La ministro japanes de reconstrui ia promete ce on va completi la labora.

Ma per multe survivores, problemes emosial domina.

Eiki Kumagai, un pompor-bonvolor, ia comenta: "La infrastrutur recovre, la cores no. Me ia crede ce la pasa de tempo va remedia la situa."

El ia es en Rikuzentakata, un de la areas la plu sever colpada, e ia perde 51 colaborores en la tsunami. "Me vide ancora la fases de los ci ia mori. Me ave tan multe regrete ce me no pote espresa lo."

2016-03-10

Un fem contrabanda un enfante a Paris en se saco

Un fem ia vola de Istanbul a Paris con un xica de cuatro anios ascondeda en se bagaje de mano.

Air France ia dise ce la enfante, ci ia viaja sin bileta, ia es descovreda en la avion a la sera de lundi.

La fem ia es un abitor de Frans, e ia es en media de adota la enfante de Aiti.

La airocompania ia avisa la autoriosas franses, ma avocatos prosedente ia deside no acusa el.

Cuando la fem ia es en la zona internasional en la airoporto de Istanbul, on ia preveni el de embarca se avion con la enfante. El ia compra alora un bileta nova de vola e ia asconde la enfante en un saco.

Pos embarca, el ia pone la xica a se pedes su un covreleto, ma otra pasajores ia vide la enfante cuando esta ia nesesa visita la saleta privata.

Un pasajor ia esplica plu: "La saco de stofa ia parteni a un fem sentante a la retro de la avion. A un momento, el ia abri la saco, e la person visina a la otra linia de sejas ia vide un cosa movente a interna. La person ia averti la atendores, ci ia descovre alora un bebe."

On teni aora la fem e la xica a la airoporto Charles de Gaulle en cuando la autoriosas investiga la caso.

2016-03-09

La presidente de Mexico compara Trump a Hitler

Enrique Peña Nieto, la presidente de Mexico, ia compara la retorica de Donald Trump – un de la aspirores republiciste per la presidentia de la SUA – a lo de Adolf Hitler.

En un intervisa con un jornal mexican, el ia descrive la retorica de Trump como "xiliante", e ia ajunta: "En acel modo Mussolini ia susede, en acel modo Hitler ia susede."

La xef mexican ia dise ance ce Trump ia dana la relata entre la SUA e Mexico.

Trump ia declara ce si on eleje el, el va construi un mur longo la frontera SUA–Mexico per preveni migrores de traversa nonlegal a la SUA. La aspiror republiciste ia insiste ance ce Mexico va paia per la mur, ma Peña Nieto ia rejeta intera esta, disente ce "no caso" esiste en cual Mexico ta paia per un tal mur.

Trump presenta la batalia contra la migra nonlegal como la tema sentral de se campania. El ia coleri mexicanes en junio 2015 cuando el ia descrive migrores mexican nondocumentida como "criminores" e "violores".

Peña Nieto ia dise ce Trump ofre "solves multe fasil e simple per problemes cual es evidente no tan fasil solvable".

El ia continua: "E on ia ave avenis en la istoria umana, nonfortunosa, do esta espresas de esta retorica xiliante ia gida sola a situas multe menasante." Referente a Mussolini e Hitler, el ia ajunta: "Los ia esplota un situa, cisa un problem, tra cual la mundo ia pasa a acel tempo, pos un crise economial."

Peña Nieto, ci ia evita comenta sur Trump asta aora, ia insiste ce el va es "asoluta respetosa" sur la prosede political SUA.

Ma presidentes presedente ia parla plu franca. Vicente Fox ia blasfema en televisa direta per asentua ce Mexico no va paia per la mur proposada par Trump.

E Felipe Calderón, ci ia governa de 2006 a 2012, ia rejeta ance la idea, disente: "Mexicanes, nos no va paia an un sentim per un mur tan stupida!"

2016-03-08

Libros de scola es plen de sesisme

UNESCO dise ce libros de scola usada en paises developante es plen de disposas sesiste. La ajenteria de la Nasiones Unida, onorante la Dia Internasional de Femes, dise ce stereotipos negativa sumina la instrui de xicas.

Lo dise ce, tro comun, femes es representada en tal libros como "peones nurinte" en roles de casa.

En la reporta, Manos Antoninis de UNESCO esplica ce esta es un "ostaculo ascondeda" sur la via a la egalia de jeneros.

UNESCO ia campania per furni instruis a desuples de miliones de enfantes ci no pote vade a scola, e en multe paises plu povre, la xicas es los a ci un ensenia scolal manca la plu probable.

La reporta, cual monitori la instruis global, lumina como carateres fema apare comun en rol suordinada en la libros usada a scola, e averti ce esta limita la espetas careral de xicas.

"La serti ce tota xicos e xicas vade a scola es sola un parte de la batalia. Lo cual on ensenia a los es egal, si no plu, importante. Un prejudi persistente sur jenero en libros de aprende drena de xicas la motiva, la autorespeta, e la partisipa en scola."

Con esemplos de paises en Asia e Africa, la reporta comenta ce omes en tal libros es plu probable mostrada como xefes comersial, botecores, injeniores, siensistes, e politicistes, en cuando femes resta plu probable videda en roles de cosini o atende enfantes.

Estra mera la stereotipos, la studia indica ance ce la libros de aprende depinti multe plu comun omes ca femes, e ce esta fenomeno es an plu forte trovada en libros de siensa o matematica. Lo nota ce, en alga libros de aprende siensal, sola un carater entre 20 es fema.

La reporta dise ce on ia fa sola un progresa lenta en atenta egali plu la representas. Lo sujesta ce esta resulta de un manca de vole political per xasa la problem e, en alga casos, de un resiste de la persones encargada sur la contenida de cursos de scola o sur la produi de la libros.

Un otra reporta cual onora la Dia Internasional de Femes es "La povria es sesiste", de One, un grupo campaniante per developa.

Lo dise ce la nonegalia de jenero e la povria es interliada, tal ce femes en paises povre, spesial en Africa susaharan, es probable plu povre ca se corespondentes mas.

La reporta indica ance ce sinco sento milion femes tra la mundo es noncapas de leje, e ce la cuantia corespondente de omes es sola un dui de esta. Lo dona la esemplo ce, en Mali, 93% de xicas va vade nunca a scola.

La campania ia prepara un lista de paises do "nase fema es la plu difisil", usante tal criterios como la asede a sania e instrui, la oportunes economial, la posible de ave un conta de banco, e la representa political.

En esta lista, la des paises prima es: Nijer, Somalia, Mali, la Republica de Africa Sentral, Iaman, la Republica Democrata de Congo, Afganistan, Costa de Ivor, Txad, e Comori.

2016-03-07

Un bomba de camion mata sirca 50 persones en Irac

En Irac, a la min 47 persones ia mori pos cuando un tancador de carburante ia es esplodeda a un punto de controla prosima a Hilla, un site a sude de la capital, Baghdad.

Tredes-nove de la mores ia es nonmilitar, e desuples ia deveni ferida.

La ataca ia aveni corta pos mediadia de ora local, cuando desuples de autos ia sta a la punto de controla.

La grupo Daex ia declara ce lo ia esecuta la ataca en un posta a la pajeria de la ajenteria jornaliste Amaq, cual suporta lo. La posta ia descrive la ataca como "un opera de martir".

An si la area do la esplode ia aveni no es controlada par Daex, la estremistes suni ataca ja locas distante de la combate.

Bombas umana en camiones portante esplodentes es sempre plu usada par Daex per ataca blancos nonmilitar, spesial en rejiones con majorias xia.

Un statistica de la Nasiones Unida indica ce a la min 670 iracis ia es matada en la mense pasada, de ci du tris ia es nonmilitar.

On teme ce Daex va fa plu tal atacas en cuando los perde se teritorio en la resta de la pais.

Fortes de securia iraci, suportada par la alia gidada par la SUA, aumenta la batalia en e sirca la vilas e sites ancora ocupada par Daex. Los prepara aora per un ataca major contra Mosul, la xeferia de Daex en Irac.

2016-03-06

La ministro xef de Slovensco perde se majoria

Robert Fico, la ministro xef sinistriste-nasionaliste de Slovensco, ia gania la vota jeneral ma ia perde se majoria parlamental.

El va nesesa aora alia se con otras si el vole reveni per un periodo tre.

Ganias par partitos peti, incluinte un de la destra estrema, va produi cisa un parlamento divideda sin via clar a formi un governa majorial.

Fico ia jura ce el va aseta "an no un" migror muslim.

Se pais va emprende la presidentia jirante de la Uni European en julio. Se opinas dur sur la migra refleta los de xefes polsce, txesce, e magiar.

Intera, nove partitos, incluinte Nos Slovensco, un partito estrema destriste su Marian Kotleba, va es representada en parlamento. Nos Slovensco ia gania plu ca 8% de la votas.

Kotleba es un amiror nonrepentinte de la fato ce Slovensco ia esiste como un stato nazi pupetin en la Gera Mundal Du, e asta resente, el ia vesti se en un uniforma imitante la militia pronazi de acel stato.

Pos la conta de sirca un dui de la votas, la partito de Fico es suportada par sirca 29%, cual ta coresponde a 48 sejas en la parlamento de 150 membros.

Como la xef de la partito la plu forte en la vota ier, on previde ce Fico va es solisitada a formi un governa nova. El ave 51 anios, e es conoseda per politicas popliste como la usa sin custa de la ferovia par studiantes e jubilores.

El ia oposa ferose cuotas UE sur la relocali de migrores de Elas e Italia cual ta introdui sirca 2600 persones a Slovensco. La pais ia reseta sola 260 solisitas de refuja en la anio pasada.

2016-03-05

Un barco-bus esplode en Bangkok

A la min 58 persones ia deveni ferida en Bangkok, la capital de Tai, cuando la motor de un barco-bus ia esplode cuando lo ia ariva a un molo.

La plu de la feridas ia es minor ardeda, ma on reporta ce du pasajores ia es grave colpada par detrito volante.

On sujesta ce un gotea de carburante es culpable.

Barcos-buses opera en la canales de Bangkok e es un modo popular de transporta en la site traficosa.

Un video de la aveni, postada par un jornal, mostra ce la barco folida ia prosimi a la molo Wat Thep Leela en la este de Bangkok con nubes de fuma negra vidable a se retro.

Un grupo de pasajores, parente sin reconose la peril, atenta embarca, ante cuando la barco es colpada par un esplode. Desuples de persones salta alora a securia sur la molo.

Du persones miama e un japanes es entre la feridas.

La barco ia es propulsada par e gasolio e gas natural licuidida. Se compania va usa sola gasolio en se barcos asta cuando la investiga trova se resultas.

Seguente un statistica de 2012, plu ca 100 mil persones usa esta barcos de canal en Bangkok a cada dia.

2016-03-04

On prosede Prinsesa Cristina de Espania en corte

Prinsesa Cristina de Espania ia atesta a la ves prima en se prosede per froda alegada de imposta, ma ia responde sola a demandas fada par se propre avocato.

El ia informa la corte en Mallorca ce el ia demanda nunca a se sposo, Iñaki Urdangarin, como el maneja un compania de imobila cual los posese en junta.

On acusa Urdangarin de usa se relatas reial per jenera revenu comersial cual los ia usa per spendes privata.

Ambos nega ce los ia fa mal. Des-sinco otra acusadas es ance en prosede.

Cristina, ci ave 50 anios e es la sore de Re Felipe, va risca un periodo masima de oto anios en prison si on judi ce el es culpable. El nega conose la froda alegada cual envolve ance se sposo e des-ses otra acusadas.

En se apare de 20 minutos en corte, se avocato ia demanda perce el ia parla nunca con se sposo sur la ativias de la compania, e el ia responde ce "los no es temas cual interesa me".

El ia ajunta: "A acel tempo, me enfantes ia es multe peti e nos ia es multe ocupada. El ia maneja la spendes de la familia. Me no ia deveni envolveda en acel."

La caso ia es inisiada en 2010 e ia deveni ja forte simbolin de frodas persepida entre grupos superior en Espania, incluinte la familia reial.

En la anio pasada, Re Felipe ia sutrae la titulos de se sore e se sposo, la Duxe e Duxes de Palma de Mallorca.

Cristina abita aora en Suiz, ma resta la person ses en la pasa de rena e es la membro prima de la familia reial ci on ia prosede en corte.

La avocatos de la prinsesa ia razona ce on debe rejeta la acusas, car ofisiores publica ia refusa acusa formal el. Ma la tre judores ia acorda continua con la prosede, usante la atestas rejistrada par Manos Limpias (Manos Limpa), un grupo antifroda.

La acusas pertine a Aizoon, un compania de imobila cual el posese con se sposo, ci es un medaliste olimpial pasada de handbal.

On acusa ce el ia usa personal la reservas comersial per paia per vestes e lesones de dansa per se enfantes, e ance per boni se cason en Barcelona, reduinte la profitas impostable de la compania.

On alega ance ce se sposo ia usa la Instituida Nóos, un funda sportal cual el ia maneja, como un metodo de gania contratas falsa aumentada de autoriosas de governa rejional, e ia redirije alora la mone a se contas personal tra paradisos finansial.

Alegada, Nóos ia reseta plu ca €6 milion de mone publica, de cual la plu ia veni de la Isolas de Baleares e de la governas rejional de Valencia.

2016-03-03

Corea Norde xuta misiles a la mar

La ministreria de defende de Corea Sude dise ce Corea Norde ia xuta ses misiles de distantia corta a en la mar, a oras pos la pone de restrinjes nova par la Nasiones Unida.

Un portavose ia dise ce la misiles ia es lansada a sirca 10:00 (01:00 de ora global) de Wonsan a la costa este. Los ia es o rocetos o misiles gidada.

Analistes regarda esta como un ata de defia contra la restrinjes.

Mera a oras plu temprana, la Consilio de Securia de la NU ia vota unida per usa alga de se medios la plu forte de istoria contra Corea Norde. La restrinjes nova reata contra un proba nucleal e lansa de satelite par Corea Norde, ambos de cual ia viole la restrinjes esistente.

Su la restrinjes, tota carga cual entra a e sorti de la pais va es esaminada, e on ia ajunta 16 individuas e 12 organizas a la lista negra.

La Statos Unida e Xina, un aliada longa de Corea Norde, ia pasa sete semanas en discute la restrinjes nova.

La presidente SUA, Barack Obama, ia dise ce la comunia internasional "parla con un vose" per informa Corea Norde ce "lo debe abandona esta programes perilosa e eleje un via plu bon per se popla".

Park Geun-hye, la presidente de Corea Sude, ia bonveni la restrinjes nova, disente ce el espera ce la Norde "va abandona aora se program de developa nucleal e comensa un curso de cambia".

Corea Norde insiste ce se program de misiles es de natur intera siensal, ma la SUA, Corea Sude, e an se aliada Xina, dise ce lansas como lo cual ia pone un satelite en orbita en febrero ave la gol de developa misiles balistical intercontinental.

La Norde ia declara ce se proba nucleal en janero – la numero cuatro de pos 2006 – ia es fada per esplora se tecnolojia de bombas de idrojen.

2016-03-02

Bin Laden ia lega $29m per jihad

Osama bin Laden, la xef pasada de al-Qaida, ia lasa un ricia personal de sirca $29 milion pos se mori en un ataca en 2011.

Esta es indicada par se atesta final, cual es un de multe documentos saisida en la ataca par la SUA en Abbotabad en Pacistan, e aora publicida.

Bin Laden ia recomenda ce se familia ta "obedi me vole" e ta spende se erita sur "jihad, per la benefica de Alah".

El ia descrive la mone como esente en Sudan, ma lo no es clar esce lo ia es mone fisical o ativas. Bin Laden ia abita en Sudan tra sinco anios en la desenio de 1990, como un invitada de la governa sudani.

On no sabe esce cualce de la mone ia susede ateni se eritores.

Otra leteras atribuida a el e ier publicida mostra ce Bin Laden ia recomenda ce americanes combate la cambia "desastrosa" de clima per "salva umanas", ia teme ce un dentiste ia asconde un aparato de locali en la dente de se sposa, e ia projeta un campania jornaliste major per la aniversario des de la atacas de 11 setembre en la SUA.

El ia presenta ance se evalua de la progresa de la "gera contra teror" par la Ueste e de la campania militar de la SUA en Afganistan.

"Los ia pensa ce la gera va es fasil e ce los va reali se ojetos en alga dias o alga semanas," el ia scrive. "Nos nesesa es pasiente per un plu pico de tempo. Con pasientia, on vinse!"

Bin Laden ia es matada par fortes spesial de la SUA en maio 2011 en un ataca a se compleso en Pacistan. De pos, la grupo es gidada par Ayman al-Zawahiri, se viscomandor pasada.

2016-03-01

On atenta desasembla la Jungla de Calais

En Frans, ecipos va revade a la porto de Calais per desasembla plu cabanas tempora en la campa de migrores nomida "la Jungla".

En la note, polisiores antitumulta ia xuta gas lacrimojen a refujadas ci ia lansa petras a la ecipos.

La autoriosas dise ce la migrores debe move a contenadores de barconi en un otra parte de la loca. Ma multe teme ce par causa de esta los va debe xerca ofisial refuja en Frans e abandona se esperas de viaja a Britan.

En la oscuria de note, migrores ia atenta asede camiones sur la autovia cual vade a la porto. Gas lacrimojen ia es usada per forsa los a retira se.

Los ci abita en la campa, xef de Asia sude-ueste, Afganistan, e Africa, espera traversa la Manga, comun usante contrabandores per atenta entra nonlegal a Britan.

La autoriosas franses crede ce sirca 1000 migrores va es afetada par la projeta de descasi, ma ajenterias de aida dise ce la cuantia de persones ci abita ala es multe plu grande.

On ia desasembla sirca 100 cabanas ier. A la min 12 ia es ensendeda.

Plu temprana, Good Chance (Bon Acaso), un grupo teatral cual labora en la campa, ia dise ce la polisia preveni bonvolores de entra a la campa.

Ofisiores dise ce areas publica en la campa, como locas de adora relijial e scolas, no va es afetada, e los descrive la moves como "un opera umaniste".

La state de vive en la parte sude es misera, e la presentia de la campa ia deveni controversa.

La ofisiores dise ce migrores pote o move a contenadores convertida en la parte norde de la campa, do on ave spasio per 1500 persones, o move a sentros simil a otra locas en Frans, o xerca refuja ofisial en Frans.

Ma multe abitores no vole parti de Calais. Un ia comenta: "Vade a Britan es lo cual on desira. Donce destrui un parte de la Jungla no es la solve."