2016-09-30

Un tren colpa un stasion en New Jersey

En la SUA, un tren de viajores dial ia colide con un stasion en la stato New Jersey. Un fem ia mori e plu ca sento otra persones ia es ferida.

La tren ia fali lenti, ia pasa tra la paradores de bileta, e ia entra a la reseteria de la stasion Hoboken. La vagones e la stasion ia es multe danada, e un parte de la teto de la construida ia cade.

La servis de crise ia ativi a pos: pompores e empleadas de ferovia ia aida persones a sorti de la vagones destruida.

Hoboken es situada a la Rio Hudson, a la otra lado de la site New York. Multe persones usa la stasion per viaja a Manhattan.

La fem ci ia mori ia es colpada par detrito en sta sur un plataforma. El ia ave 34 anios.

La gidor de la tren, Thomas Gallagher, ci ave 48 anios, es en un state grave a un ospital local, ma el coopera con investigores.

Chris Christie, la governor de la stato, ia dise: "Nos ave no indica ce esta es cualce otra ca un asidente trajedial."

En 2008, la Congresa de la SUA ia aseta un lege obligante tota trenes a porta sistemes nova de securia ante la fini de 2015. Ma la plu de companias ferovial no ia sasia la esije, car la sistem es custosa e complicada per instala.

Alga companias, incluinte New Jersey Transit, ia menasa clui completa si on ta enforsa la lege. La Congresa ia responde par estende la limita asta 2018. Companias va pote alora solisita plu tempo per fini la renovis e proba la sistem.

On intende completi instala la sistem nova en la trenes de viajores dial de New Jersey ante la fini de 2018.

Seguente la reporta de progresa la plu resente de New Jersey Transit, zero de la 440 trenes en acel linia porta la sistem nova, e on ia instrui zero empleadas sur se usa.

La sistem, nomida "controla positiva de tren", es desiniada per supresa automata la atas de la gidor si la locomotiva viaja tro rapida. En efeto, lo garda contra eras umana cual ta pote causa colides o desrelis. Lo usa jeolocali e un lia sin filo per envia informas de trenes a controlerias en tempo real.

On ia judi ce la parte de la construida usada per trenes de viajores dial es secur, e pote recomensa funsiona.

La Comite de Securia de Transporta Nasional va esplora esce la colide ier ave cualce similes con un colide a la mesma stasion cual ia feri 34 persones en 2011.

2016-09-29

OPEP anunsia redui la produi de petrolio

La Organiza de Paises Esportores de Petrolio (OPEP) ia fa un acorda inisial per redui la produi a la ves prima en oto anios. La premio de petrolio ia alti par resulta.

La nasiones major cual esporta petrolio ia ateni la acorda a negosias ier en Jazair per oposa temes de suprafurni.

La premio de Brent, la gida internasional per petrolio, ia crese par cuasi 6% a cuasi $49 per baril. En la comersia temprana en Asia, petrolio ia esperia sola ganias peti, ma companias de enerjia tra la rejion ia alti.

Ministros de petrolio ia dise ce on va completi la detalias de la acorda a un consenta formal de OPEP en novembre.

La esflue va diminui a sirca 700 mil bariles per dia, an si la reduis no va es coerente distribuida tra la cartel, car on permete ce Iran aumenta se produi.

Desacordas entre Iran e Arabia Saudi, se competor rejional, ia impedi atentas plu temprana de reali un acorda.

Multe de la membros plu peti de OPEP ia presa per la redui pos cuando la premio de petrolio ia cade de $110 per baril en la du anios pasada, par causa de suprafurni e demanda lentinte.

Emmanuel Ibe Kachikwu, la ministro de petrolio per Nijeria, ia descrive la acorda como "multe positiva", e Noureddine Bouarfaa, la ministro de enerjia per Jazair, ia dise: "La deside ia es par acorda unida, e sin reservas."

Mohammed Bin Saleh Al-Sada, ministro de enerjia per Catar e presidente presente de OPEP, ia dise ce la acorda va limita la esflue de paises OPEP a entre 32,5 milion e 33 milion bariles per dia.

On estima ce la esflue corente es 33,2 milion bariles per dia, ma Irac ia demanda ier como OPEP mesura la produi de se membros.

Alga mercatores de petrolio resta setica sur la acorda, disente ce los vole vide tota la constrinjes, incluinte la reduis acordada par statos membros individua, ante fa un judi final.

2016-09-28

Shimon Peres mori

Shimon Peres ia mori a la eda de 93 anios. El ia servi a du veses como la ministro xef de Israel e a un ves como la presidente.

El ia sufri un ataca serebral a du semanas ante aora. Se state ia boni ante un mali subita ier.

Se fio Chemi ia gida tribuis a "un de la padres fundinte de la stato Israel" ci "ia labora nonfatigable" per lo.

Peres ia es un de la ultimas de un jenera de politicistes israeli presente a la nase de la nasion nova en 1948.

El ia gania la Premio Nobel de pas en 1994 per se rol en negosia acordas de pas con la filastinis en la anio presedente. El ia dise ce la filastinis es la "visinas la plu prosima" de Israel e ta pote deveni se "amis la plu prosima".

Peres ia mori en un ospital prosima a Tel Aviv en la temprana de esta matina, con se familia a lado de se leto. El ia es ja en la unia de cura intensa de la Sentro Medical Sheba pos un ataca serebral major a 13 setembre.

Benjamin Netanyahu, la ministro xef de Israel, ia espresa se "tristia personal profonda sur la mori de la presidente pasada e amada de la nasion".

En un declara, Barack Obama, la presidente de la SUA, ia nomi Peres se "ami cara", comentante: "El ia es gidada par un imajina de la dinia e progresa cual, el ia sabe, persones bonvolente ta pote avansa juntada."

Ephraim Mirvis, la rabi xef de Britan, ia descrive Peres como "un jigante vera entre umanas" e "la esemplo vivente la plu grande de un crede nonmovable a la xerca de pas an contra tota. Trajedial, asta aora, nos no ia susede. Ma de Shimon Peres nos ia aprende ce nos debe nunca desteni acel promete corajosa a pas, an cuando tota la mundo sirca nos vole fa tal."

Peres ia divide se Premio Nobel de pas con la ministro xef Yitzhak Rabin, ci ia es asasinada a tempo plu tarda, e la xef filastini Yasser Arafat.

A la comensa de se carera political longa, on ia encarga el con organiza de empleadas e compra de armas per la Haganah, la presedente de la Fortes de Defende de Israel.

El ia negosia un acorda con Frans afin la nasion israeli nova ta es furnida con jetos xasante Mirage. El ia institui ance la compleso nucleal secreta de Israel.

El ia es la ministro de defende en 1976, cuando saisores filastini ia diverje un avion de Israel a Entebbe en Uganda. El ia supravide la salva susedosa de plu ca 100 ostajes.

Inisial un promovor de colonias iudi a la Riva Ueste ocupada, Peres ia deveni plu tarda un simbol political major de pas. El ia parla a multe veses sur la nesesa de compromete sur esijes teritorial en areas filastini.

El ia manteni un program ativa de apares publica an en se senese, xef en contesto de se organiza nongovernal, la Sentro Peres per Pas, cual promove lias plu prosima entre israelis e filastinis.

En 2013 el ia dise: "On ave no alternativa de pas. La vade a gera es nonrazonante."

El ia retira se de se rol como presidente de la pais en 2014.

Se funera va aveni a venerdi a Monte Herzl, la semetero nasional de Israel en Ieruxalim. Se caxon va es locada a la parlamento a jovedi afin la popla pote ofre respeta.

2016-09-27

Un acorda major de pas en Colombia

En Colombia, la governa e la rebelores sinistriste de FARC ia suscrive un acorda major per fini formal 52 anios de gera armada.

La xef de la rebelores, Timoleón Jiménez, conoseda como Timochenco, ia demanda per pardona de "tota la vitimes de la gera" e ia es salutada par aclamas e aplaudis.

El ia dise: "Mi desira demanda per pardona per tota la dole cual nos ia causa en esta gera."

Invitadas a la rituo en Cartagena ia porta vestes blanca per simboli la pas.

La ultima de la geras de la Gera Fria ia mata 260 mil persones e ia lasa plu ca 6 milion deslocadas.

Juan Manuel Santos, la presidente, ia declara: "Colombia selebra, la planeta selebra, car on ave un min gera en la mundo. Nos va reali cualce gol, vinse cualce ostaculo, e cambia nos nasion a un pais a cual nos ia fantasia sempre – un pais en pas."

Timchenco ia dise ce la FARC, cual ia comensa en 1964 como la ala armada de la Partito Comuniste, abandona la gera armada per entra a la politica pasosa.

"Nos es renaseda per inisia un eda nova de reconsilia e de construi la pas," el ia dise. "Ta ce tota de nos es preparada per desarma nos cores."

La presidente e Timochenco ia usa un pen fada de un baleta per suscrive la acorda.

La acorda aveni pos cuatro anios de discutes en Havana, Cuba, entre negosiores de governa e rebela. Lo debe es aprobada par la popla colombian en un vota a soldi ante cuando lo pote deveni legal.

Sondas indica ce la plu de colombianes suporta la acorda, an si on ave alga oposores, gidada par Alvaro Uribe, un presidente pasada.

Con la acorda, la FARC va es reinisiada como un partito political.

Santos risca se futur political sur la susede de la acorda. On espera jeneral ce lo va fini la furas de persones e la versa de sangue cual ia manxa Colombia tra sinco desenios, ma lo ia crea ance divides en la economia cuatro de la plu grandes de America Latina.

Alga persones es coler ce lo permete ce rebelores entra a parlamento sin pasa tempo en prison.

Ofisiores major presente a la rituo ia inclui Ban Ki-moon (la secretor jeneral de la Nasiones Unida), John Kerry (la ministro de esternas de la Statos Unida de America), e Raúl Castro (la presidente de Cuba).

Ban ia dise a la asembladas: "Vos pote regarda la futur con otimisme. Vos invita colombianes a vive en pas."

Cuando Kerry ia ariva en la pais, el la loda la laboras de Santos per oteni la acorda, e ia promete 390 milion dolares per reali lo.

El ia clari ce la SUA ancora no va sutrae la FARC de se lista de organizas teroriste, ma lo va reconsidera la state cuando la acorda de pas funsiona.

An tal, a mera oras ante la suscrive, la Uni European ia anunsia ce lo va suspende la FARC de se lista.

"La esta deside va permete ce nos suporta la program pos gera, e va benefica tota colombianes," Federica Mogherini, la xef de politica esterna de la UE, ia comenta en redes sosial.

La rebelores de FARC debe aora dona se armas a la NU ante la pasa de 180 dias. Ma la Armada de Libria Nasional, un grupo min grande de rebelores, es ancora ativa, como ance alga grupos paramilitar destriste.

2016-09-26

Un referendo suporta la festa nasional de serbsces bosansce

Serbsces bosansce ia vota inondante per reteni 9 janero como un festa nasional, defiante la corte la plu alta de Bosnia.

Pos la conta de plu ca 70% de votas en la referendo de ier, 99,8% ia suporta la festa.

La corte ia judi ce la data es prejudosa contra bosnianes muslim e corvatsces catolica, e ce on debe cambia lo.

La serbsces ia declara la crea de se propre stato a interna de Bosnia a 9 janero 1992, provocante un gera etnical en cual sirca 100 mil persones ia mori. Bosnia es ancora etnical divideda entre la serbsces e un federa muslim-corvatsce.

La corte constitual, locada en la capital bosansce Sarajevo, ia proibi la referendo.

Sirca 1,2 milion persones ia cuali per vota, e on reporta ce plu ca 56% ia partisipa.

Milorad Dodik, la presidente de la serbsces bosansce, ia dise ce la referendo va deveni conoseda como "la dia de determina serbsce". En la vila Pale, el ia dise: "Me es orgulosa de la popla de la Republica Serbsce, de tota de los ci ia veni per vota."

9 janero es no sola la aniversario de la declara de la stato serbsce bosansce, ma ance un festa cristian ortodox.

Valentin Inzko, la Representor Alta Internasional a Bosnia e Hersegovina ia comenta ce la vota es "nonlegal e nonconstitual", disente: "No era: desides de la corte constitual es final e nonrompable. E la corte constitual ia es multe multe clar. Lo ia suspende esta referendo."

Entretempo, Bakir Izetbegovic, la xef de la bosnianes, ia acusa Dodik de "jua con foco".

La corte es un de la instituidas creada en 1995, a la fini de la gera. Par iniora lo, Dodik menasa la Acordas de Dayton cual ia fini la gera.

2016-09-25

La xef de Magiar sujesta un site per migrores en Libia

La ministro xef de Magiar, Viktor Orbán, ia dise ce la Uni European debe crea "un site jigante de refujadas" a la costa de Libia per trata refujadas african ante cuando los ariva en Europa.

Orbán, ci ave un punto de vista forte contra la migra, ia sujesta ce un governa libi nova ta maneja la campa. El ia fa se comentas a un confere de xefes european e balcan en Wien, Osteraic.

Libia ia deveni caososa pos un revolta en 2011, con governas oposante e militias lutante per oteni la potia.

Orbán, ci ia clui la fronteras sude de Magiar con sercas de filo lamosa e canes gardante, ia dise ce la UE debe reprende "controla completa" de se fronteras esterna.

El ia recomenda la cansela de un embargo ueste de armas contra Libia, e ce la ueste ta furni suporta a la Armada Libi Libre, un grupo rebelante.

Angela Merkel, la canselor deutx, ci ia es criticada par la ministro xef magiar sur se politica de "porte abrida" per refujadas e migrores, ia dise ce la solve es ce on ta fa acordas con paises african per reenvia migrores ci no cuali per es refujada.

Merkel ia recomenda ance ce la UE ata plu per para la migra nonlegal, ma segue ance se encargas umaniste a la mesma tempo.

El ia es criticada par alga persones en Deutxland sur se manera de trata la crise. En elejes resente de stato, se partito, la Democratas Cristian, ia perde alga de se vantaje a oposores popliste a antimigra.

Plu ca 300 000 migrores ia traversa la Mar Mediteraneo en esta anio, e on ia rejistra 3500 moris.

2016-09-24

Gabon confirma la resulta de se eleje presidental

La corte constitual de Gabon ia suporta la vinse de Ali Bongo en la eleje presidental, rejetante un recomenda par la oposores per un reconta de votas.

On ia teme ce un tal deside va provoca violentia nova. La governa ia dise ce lo va culpa Jean Ping, la oposor xef, si scaramuxas segue la deside.

Presidente Bongo ia gania la eleje en agosto par sola 6000 votas, ma la oposores dise ce la eleje ia es frodante.

Pos la judi de la corte, Bongo ia recomenda "un conversa political" con se oposores.

Abitores de Libreville, la capital, ia cumula comedas ante la deside. On ia esperia filos longa a bancos e supramercatos ier, e la ambasada franses ia dise ce se sitadanes debe resta en casa.

Polisiores antitumulta es posada tra la site.

Ping ia alega froda en un de la provinses forte de la presidente, Haut-Ogooué, do Bongo ia gania 95% de votas con partisipa de 99,9% de votores.

Ping ia averti ce Gabon pote fronti un nonstablia grave si la corte rejeta se apela per un reconta en acel provinse.

La corte ia ajusta partal la resultas de la eleje amarga ganiada, donante 50,66% de la votas a Bongo e 47,24% a Ping.

La resulta inisial a 27 agosto ia provoca dias de violentia matante.

2016-09-23

Un enfante peti survive tra tre dias en foresta sibirsce

En Rusia, un xico de tre anios ia survive solitar tra 72 oras en un foresta sibirsce, en un area conoseda per lupos e ursos.

Tserin Dopchut ia ave sola un bara peti de xocolada en se pox cuando el ia vaga a en la foresta. On ia inisia un xerca vasta de tera e aira per trova Tserin, ci ia segue cisa un caneta cuando el ia desapare.

La enfante ia es atendeda par se duava, ma el ia vade a via prosima a la vileta Khut, situada en foresta densa en la Republica Tuva, cuando la fem ia turna se dorso.

Tra 72 oras la enfante corajosa la fronti temperatures basinte, la menasa de bestias savaje, e la peril de cade a un rio rapida, ante cuando se tio ia salva final el.

"La situa ia es multe peril," Ayas Saryglar, la xef de la ajenteria de defende e crises sivil de Tuva, ia dise. "La Rio Minas es rapida e fria. Si un enfante peti ta cade a en, el ta mori serta."

"On ave lupos e ursos en la foresta. La ursos nuri aora se per la inverno. Los pote ataca cualce cosa movente. En ajunta, lo es calda en la dia, ma a note la tera jela an. Si nos recorda ce la enfante ia desapare en la dia, el no ia es bon vestida – sola un camisa e sapatos, no jacon."

La opera de xerca Tserin ia envolve viletanes, polisiores local, e un elicotor en un area vasta de sirca 120 cilometres cuadrida, tra dia e note.

Un otra ofisior ia dise ce on ia trova la enfante cuando el ia reconose la vose de se tio clamante se nom. Pos es abrasada, se demanda prima ia es esce se auto de jueta ia es oce.

Salvores ia loda la stratejia de la paseor nova – el ia trova un loca seca su un larix e ia dormi entre se radises.

Sholban Kara-Ool, un xef de la rejion, ia comenta: "La vileta intera fa un selebra per festi se survive."

Dotores dise ce Tserin ia sufri no feris grave de se malesperia.

On ia dona a el la nometa Mowgli, la nom de la orfan imajinada en la novelas Libro de Junglas par Rudyard Kipling. On predise ce Tserin va deveni mesma un salvor, car el ia mostra un capasia stonante de dura per survive tan longa a se eda en la foresta fria.

2016-09-22

Busores causa caos en Caracas

Busores en Caracas, la capital de Venezuela, ia paralise la site tra oto oras par bloci la stradas con se veculos. Los protesta contra la crise economial de la pais.

Sentos de busores ia esije plu paia e proteje de crimin violente.

Multe ia dise ce los nesesa plu mone per manteni se buses, e ia cexa ce partes reservada manca.

Entretempo, la autoriosas elejal ia deside contra fa un referendo en esta anio per deseleje cisa Nicolás Maduro, la presidente.

La deside es un problem per la oposores, ci ia recomenda forte un vota per despone el.

La comision elejal ia dise ce un referendo pote aveni en la temprana de la anio veninte si la oposores gania suscrives de cuatro milion votores en un periodo de tre dias en otobre.

La tempo de la vota es esensal. Si Maduro ta sesa preside pos 10 janero, on no ta fa elejes fresca, e la vispresidente ta emprende la posto.

On crede ce la protesta par busores ia afeta un dui de la buses en Caracas, un site de tre milion persones.

Venezuela ia fronti un nonsufisi de multe benes, incluinte comedas e medisin. La busores dise ce numaticos, pilas de auto, e petrolio de motor manca.

Se portavose ia dise ce los va recomensa se protesta oji si la governa no responde a se cexas.

2016-09-21

On va prosede un presidente brasilera pasada sur froda

Luiz Inácio Lula da Silva, la presidente pasada de Brasil, va es prosededa sur acusas de froda e blanci de mone a Petrobras, la compania nasional de petrolio.

Avocatos prosedente dise ce el ia aseta 3,7 milion reales ($1,11 milion) de sobornas en relata con un scema de du mil miliones de dolares.

Lula, ci ave 70 anios, ia es ja acusada en agosto sur impedis de investigas. El nega ce el ia fa mal, e dise ce la acusas es political motivada.

"Me es triste," el ia dise. "Lo es un farsa grande, un menti grande, un pirotecnical grande. Lo cual aveni no depresa me, ma simple lo motiva me a apare e parla plu."

Sérgio Moro, la judor ci supravide Opera Lava de Auto – la investiga sur alegas de froda a Petrobras – ia dise ce on ave "atesta sufisinte sur la culpablia" de Lula.

Seguente la prosedores, la mone cual, alegada, la presidente pasada ia reseta ia es lavada par la compra e renovi de un aparte de plaia. La aparte ia es construida par un compania implicada en la scandal. Se sposa, Marisa Letícia, e ses otra persones es ance acusada.

Prosedores ia acusa ce Lula ia es la "xef" de la scema, sur cual on estima ce lo ia custa plu ca $2 mil milion de la compania.

On ia aresta e condena alga politicistes e dirijores de Petrobras como resulta de la investiga de du anios.

La investigores crede ce on ia dona contratas con Petrobras de custa inflada par intercambia per sobornas. Los alega ce alga de la mone nonlegal otenida ia es usada per finansia la campanias elejal de politicistes brasilera major.

Lula, ci ia servi como presidente entre 2003 e 2011, ia es un de la xefes la plu popular de Brasil, e on regarda el como un aspiror posible per la elejes presidental de 2018.

An tal, la popularia de se Partito Laboriste ia afonda en esta anio, e se seguor Dilma Rousseff ia es acusada de malcondui en agosto. Un condena criminal ta proibi Lula de es nominada en 2018.

2016-09-20

Migrores fuji de un campa elinica ardente

On ia sorti asta 4000 migrores de la campa Moria sur Lesbos, un isola elinica, pos un focon grande cual ia destrui tendas e casas prefabricada.

No feridas es reportada, e on ia permete ce alga migrores revade a la campa. Sirca 30% de la campa ia es destruida.

La polisia investiga esce la focon ia es ensendeda con intende, ma un laboror de aida ia indica ce lo ia comensa pos un disputa sur comedas. On dise ce un scaramuxa ia comensa ier pos un rumor ce refujadas va es coletiva deportada a Turcia.

Multe de los sur la isola teme deveni enviada a Turcia o se paises nativa.

Lesbos conteni aora sirca 5600 refujadas, diseda par la Nasiones Unida, ma la isola es capas de sola 3600.

La situa ala es malida car multe migrores atera ala, do los resta asta cuando on fini trata se demandas per refuja. Los ci on refuja pote viaja a Elas continental, e la otras es enviada a via.

La prosede es un parte de un acorda fada entre la Uni European e Turcia en marto. La UE ia promete labora per permete ce sitadanes turces viaja sin visa a la zona Schengen de Europa, si Turcia va aida impedi migrores ci traversa a la isolas elinica.

2016-09-19

Bombas bruta en New York

Un bomba detonada a saturdi en New York, e un otra aparato trovada en la prosimia, ia es casolas de presa plenida con fratos, simil a la bombas usada a la maraton de Boston en 2013.

Ambos ia ave telefonetas e lampetas de natal como detonadores tempora.

La esplode en la parte Chelsea de Manhattan ia feri 29 peresones.

La FBI ia dise ce lo ia para "un veculo de interesa" en Brooklyn ier, ma ia aresta nun. Lo ia teni sinco persones per interoga.

La bomba en Manhattan ia es segueda par un esplode de un bomba tubal sur la curso de un corsa carital en New Jersey a soldi.

Investigores esamina ance un aparato suspetosa cual on ia trova prosima a un stasion de ferovia en Elizabeth, New Jersey.

Andrew Cuomo, governor de New York, ia dise ce un aparato du cual on ia descovre en la site New York en la fini de semana ia pare es "simil en desinia" a lo cual ia esplode.

On ia trova lo a cuatro blocos de la loca de la esplode, e ia prende lo a via per destrui lo en manera controlada. Nun ia es ferida.

Mil plu securiores es aora posada a la sentros transportal de New York.

Autoriosas ia descrive la bombis en New York e New Jersey, como ance un ataca de coteli en Minnesota, como atas de teror. Los atenta comprende esce cualce lias esiste entre los. Ma los dise ce la bombas ia es tan bruta ce lo no es probable ce un grupo internasional ia crea los.

La organiza Daex ia dise ce la atacor suspetada en Minnesota ia es un de la "soldatos" de la grupo, an si lo no es clar esce lo ia es envolveda en scemi la ataca.

La esplode en Chelsea ia aveni a sirca 21:00 de ora local. Se fortia ia destrui fenetras e ia es oiable a distantia de alga blocos.

Alga reportas dise ce lo ia esplode en un caxa de metal negra per utiles; otras dise ce lo ia es en un baldon.

Chelsea es entre la distritos la plu modosa de Manhattan, e se bares e restorantes es comun folida a finis de semana.

Bill de Blasio, la maior de New York, ia dise ce on va ave un presentia "plu grande ca sempre" de polisia en New York en la semana veninte. A martedi, presidente Obama e otra xefes de mundo va es a la Asembla Jeneral de la Nasiones Unida en la site.

2016-09-18

Un airoporto turcmen con forma de avia

Turcmenistan ia revela un airoporto internasional nova, con teto en forma de un falcon volante.

La desinia refleta la mascote de se compania nasional de transporta.

La airoporto ia custa $2,3 mil milion, e es situada en la capital, Axcabat. Lo es capas de trata plu ca 1600 pasajores per ora.

Ma poca stranjeres visita esta pais isolida de Asia sentral, cual es conoseda per se gida autocrata e reservas grande de enerjia. Sola 105 000 turistes ia visita en 2015, e oteni un visa es difisil.

Presidente Gurbanguly Berdimuhamedow ia loda la "capasia solida de transporta" de se pais.

Axcabat conteni alga otra strutures unica, incluinte un casa de publici con forma de un libro abrida.

La site ava ance du scultas jigante de oro de Berdimuhamedow e se presedor mor Saparmurat Niyazov.

2016-09-17

Un eglesa peruan es destruida par foco

En Peru, un focon ia destrui la eglesa famosa baroca de San Sebastian en la site Cuzco.

Persones local ia regarda desperante en cuando la foco ia arde la altar dorada e depintos valuosa en la eglesa de la sentenio 16.

La focon ia comensa en la oras temprana de venerdi. Autoriosas dise ce lo ia es probable causada par un sircuito corta.

Pompores ia cexa ce idrantes prosima no ia funsiona, e ce on no ia repara los asta pos du oras.

La prete local ia recomenda ce abitores atenta salva la eglesa. Persones ia freta a un rio prosima per colie acua, ma tro tarda.

La construida sta ancora, ma la plu de se interna ornosa es destruida, incluinte obras par Diego Quispe Tito, un artiste nativa de la sentenio 17.

La eglesa ia es multe restorada entre 2008 e 2013, e la maior de Cuzco ia plora cuando el ia vide la estende de la dana.

Americo Carrillo, la arcitetor ci ia supravide la labora, ia descrive la eglesa como "un joala de la eda colonial de Peru".

La site Cuzco ia es la capital de la Impero Inca, cual ia es eliminada par la concista espaniol de la plu de la Americas.

2016-09-16

La campania de Trump aseta ce Obama ia nase en la SUA

La campania de Donald Trump ia publici un declara asetante ce presidente Barack Obama ia nase en la SUA. La aspiror republiciste ia es un de la gidores de un promove cual ia fa demandas sur la sitadania de Obama, ci ia nase en Hawaii.

Ma aora la campania de Trump acusa aora ce se oposor democrata Hillary Clinton ia introdui la "manxa" en la concurso de nomina democrata de 2008. No atesta esiste cual lia Clinton e la promove.

En reata, Clinton ia tuita ce la seguor de Obama "no pote es e no va es la om ci ia gida la promove raziste dutanase".

La declara ia apare pos un intervisa en cual Trump ia refusa dise ce Obama ia nase en la SUA, indicante en loca ce el no vole responde a la demanda.

Un teoria de conspira dise ce Obama ia nase vera en Cenia e es nonelejable per preside la SUA per esta razona. Reportas en publicis diversa sujesta ce la teoria ia es sirculida en 2008 par suportores forte de Clinton cuando lo ia deveni clar ce el no va gania la nomina democrata. Ma on ave no atestas relatante o Clinton o se campania de acel anio con la teoria.

La idea ia revive entre alga suportores de John McCain, la aspiror republiciste, cuando el ia comensa perde contra Obama en sondas de opina.

Trump ia fa demandas publica sur la sitadania de Obama cuando Obama ia aspira se periodo du como presidente.

En april 2011, Trump ia defia el a mostra se documento de nase, ganiante aproba de republicistes. Pos alga semanas, Obama ia publici se documento de nase de la stato Hawaii. A un come de sera con jornalistes en acel anio, Obama ia trata la alegas como nonimportante e el ia burla Trump.

En agosto 2012, la aspiror republiciste Mitt Romney ia refere a la teoria falsa ante un asembla de se campania. El ia broma ce nun ia demanda per vide se documento de nase. La campania de Obama ia condena rapida el.

2016-09-15

Un siclon vade de Taiuan a Xina

Siclon Meranti ia ateni Xina continental pos bate Taiuan con se tempesta la plu forte de 21 anios.

La suprasiclon, con soflones de asta 227 cilometres per ora, ia mata un person e ia lasa un dui de milion casas sin eletrica en Taiuan.

Lo ia ariva en Xina prosima a Xiamen, un site sude-este, a esta matina, pos perde alga de se potia.

On ia cansela desuples de aviones e trenes en Xina sude, e ia sorti deses de miles de persones.

Lo es la siclon la plu forte cual ia colpa Taiuan en 21 anios, si on regarda se masima de venta sustada a la sentro.

La venton ia ariva a la comensa de la Festa de Mediautono cual dura per tre dias.

On ia recomenda ce abitores resta en casa e ce barcones revade a porto. Ma a persones en Pingtung en Taiuan on ia recomenda parti de la casas.

En Taiuan, un person ia es matada e 38 ferida.

La tempesta ia provoca avertis sur lisca de tera posible en montanias. On ia previde 800 milimetres de pluve en alga partes.

Scolas e ofisias ia es cluida en la plu de contias este e sude, e 650 000 casas ia esperia rompes de eletrica.

Palos eletrical e arbores ia deveni desradisida. Camiones ia es cadeda de vertical e tetos ia es sutraeda par la venton.

Tempestas potiosa no es rara en Taiuan. En la anio pasada, siclon Dujuan ia mata tre persones e ia feri plu ca 300 ala. E en julio de esta anio, tre ia mori e sentos ia es ferida cuando siclon Nepartak ia bate la costa este de Taiuan.

On predise ce un otra siclon, Malakas, va prosimi a venerdi e saturdi, ma probable lo va resta a mar.

2016-09-14

Parlamentores brites ataca Cameron sur la colasa de Libia

Un reporta parlamental en la Rena Unida ia critica sever la interveni par Britan e Frans cual ia produi la suverti de Muʿammar Qaddafi, la xef de Libia, en 2011.

La comite de esternas ia acusa David Cameron, la ministro xef de acel tempo, de no ave un stratejia coerente per la campania de atacas airal. Lo ia dise ce la interveni no ia es determinada par informas esata, e ce se resulta ia es la crese de la organiza Daex en Africa norde.

La governa de la RU ia dise ce la deside de interveni ia es internasional, recomendada par la Alia Arabi, e autorida par la Consilio de Securia de la Nasiones Unida.

Un alia internasional, gidada par Britan e Frans, ia inisia un campania de atacas par avion e misil contra la fortes de Muammar Qaddafi en marto 2011, pos cuando el ia menasa ataca la site Benghazi, ocupada par rebelores.

Ma pos la suverti de Qaddafi, Libia ia cade a violentia, con governas diversa oposante e sentos de militias, e la organiza Daex ia deveni plu forte.

Cameron ia defende se trata de la situa. En janero, el ia clari a parlamentores ce on ia debe reata car Qaddafi "ia es maltratante persones en Benghazi e menasante fusili se propre popla como ratas".

Ma la comite de esternas ia reporta ce la governa "ia fali identifia ce la menasa a persones nonmilitar es esajerada", ajuntante ce lo "ia comprende leteral elementos elejeda de la retorica de Qaddafi".

La governa ia fali ance reconose "la elemento estremiste islamiste combatosa en la rebela", la comite ia dise. "La posible ce grupos estremiste combatosa va atenta benefica de la rebela no ia ta debe es reservada per la retrospeta. La stratejia de la RU ia es fundida sur suposas erante e un comprende noncompleta de la atestas."

La comite ia dise ce "elejables political" ia deveni disponable pos la securi de Benghazi, incluinte par la contatas de la ministro xef pasada Tony Blair con Qaddafi, ma la governa RU ia "foca escluinte sur interveni militar".

La reporta dise ce ja en la estate de 2011, la interveni limitada per proteje nonmilitares ia deveni un politica oportunitse de cambia de rena.

"Acel politica no ia es fortida par un stratejia de suporta e formi Libia pos Qaddafi. La resulta ia es un colasa political e economial, geras entre militias e tribus, crises umaniste e migral, violes vasta de diretos umana, la estende de armas de la rena de Qaddafi tra la rejion, e la crese de Isil [Daex] en Africa Norde. Par la desides cual el ia fa en la Consilio de Securia Nasional, la ministro xef pasada David Cameron ia es ultima culpable per la fali de developa un stratejia coerente sur Libia."

La comite ia recomenda un resenia nondependente de la funsiona de la Consilio de Securia Nasional (de la Rena Unida, presideda par la ministro xef) per vide esce lo ia susede boni la state debil de la fa de desides governal cual on ia reconose en la tempo ante la invade de Irac en 2003.

La ministreria de esternas ia defende la interveni.

Un portavose ia dise: "Muʿammar Qaddafi ia es nonpredisable, e el ia ave medios e motivas per esecuta se menasas. Se atas no ia pote es iniorada e ia esije un ata internasional, desidente e coletiva. Tra la campania intera, nos ia segue la autoria de la Nasiones Unida per proteje nonmilitares. Pos cuatro desenios de malgoverna par Qaddafi, Libia fronti defias enorme, sin duta. La RU va continua ave un rol major en la comunia internasional per suporta la Governa Libi de Acorda Nasional, internasional reconoseda."

2016-09-13

Un compania rusce confesa sur la rojia de un rio

La produor la plu grande de nicel de mundo ia confesa ce un malversa a un de se complesos ia cambia la color de un rio en la Artica rusce a roja sanguin.

Norilsk Nickel dise ce pluves forte a 5 setembre ia causa la suprabunda de un parario de filtra a se compleso en Nadejda, a en la rio Daldican.

An tal, lo dise ce on ave no peril per persones o bestias savaje.

A ante, la compania ia nega intera se culpablia cuando imajes de la rio roja, prosima a la site Norilsk, ia apare en la semana pasada.

Un ativiste rusce de Greenpeace ia comenta ce lo es ancora tan temprana ce on no pote judi la efeto a la ambiente. "On no pote dise mera ce esta es no cosa grande," Alecsei Ciselyov ia dise.

El ia ajunta ce Norilsk Nickel controla la asede a la intera de la Penisola Taimir do la problem ia aveni, e ce esta impedi investigores de studia la contamina par se complesos.

En la semana pasada, ofisiores de la ministreria de ambiente ia sujesta ce un gotea de contaminantes cimical de un tubo a la compleso industrial ia pote descolori la rio.

Ma Norilsk Nickel ia nega tal alegas, an publicinte fotos sur cual lo ia dise ce los mostra la rio con un "tinje natural" a 7 setembre.

Comunias nativa ia acusa la compania de normas laxe de securia.

2016-09-12

On acorda un sesafusili per Suria

Un sesafusili va comensa en Suria a la reposa de sol oji, pos multe atacas par avion a la fini de semana.

La acorda de 10 dias va es segueda par atacas airal coordinada par la SUA e Rusia contra jihadistes militariste.

Suria ia reporta ce presidente Bashar al-Assad bonveni la acorda, cual on ia ateni en la tarda de venerdi en Genève pos menses de negosias entre Rusia e la SUA.

Ma on no sabe esce la rebelores va obedi la sesafusili.

La grupo Armada Suri Libre ia scrive a la governa de la Statos Unida, disente ce an si lo va "coopera positiva" con la sesafusili, lo es consernada ce la acorda va benefica la governa.

Un otra grupo rebelante, Ahrar al-Sham, influosa e noncomprometente, ia rejeta la acorda, disente: "Un popla rebelosa ci ia combate e sufri tra ses anios no pote aseta solves partal." Ma la comandor de la grupo no ia dise clar ce lo va desobedi la sesafusili.

En la fini de semana, la governa suri ia fa atacas par avion contra areas rebelosa, matante sirca 100 persones. Ance aviones rusce de gera ia opera en la provinses Idlib e Aleppo.

Un tal intensi de violentia ia aveni ante otra sesafusilis en Suria cual ia aborta final.

Abu Abdullah, ci abita en la parte este de Aleppo, ocupada par rebelores, ia comenta: "Nos espera ce on va ave un sesafusili afin persones nonmilitar pote ave reposa. La cartuxi continua tra note e dia – on ave matas dirijeda, sites asejada. Nonmilitares ave no plu espera."

La acorda dise ce soldatos de la governa suri va fini se misiones de combate en areas spesifada cual la rebelores ocupa.

A pos, Rusia e la SUA va institui un sentro juntada per combate grupos jihadiste, incluinte Daex e Jabhat Fateh al-Sham (conoseda asta resente como la Fronte al-Nusra).

La gera en Suria, cual ia comensa con un revolta contra Assad, ia dura intensa tra sinco anios e ia prende la vives de plu ca un cuatri de milion persones.

Miliones ia fuji a otra paises, e multe ia xerca refuja en la Uni European. Ma cuasi 18 milion resta en Suria, cual es aora divideda par combate entre fortes governante e oposante.

2016-09-11

Un trematera en Tanzania

En Tanzania norde, un trematera de grado 5,7 ia mata a la min 13 persones e ia feri 203.

La trema ia aveni prosima a la frontera con Uganda e Ruanda, no distante de Lago Victoria.

Imajes postada a redes sosial ia mostra construidas danada en Bukoba, un site de plu ca 70 mil persones do on ia reporta la cuantia la plu grande de vitimes.

On ia sensa la trema an en Cenia ueste.

La comisionor de distrito de Bukoba ia dise: "La esta aveni ia causa multe dana. Per aora, la situa es calma e controlada. On ia relasa alga persones de ospital. Nos no previde reseta multe plu feridas."

La Studia Jeolojial de la SUA dise ce la trema ia aveni a profondia de 10 cilometres a 15:27 de ora local ier.

La Vale de Falion Grande en Africa este segue un linia de falia jeolojial, ma tremateras major es rara ala.

Un trema de grado 6 ia colpa la vila Arusha en Tanzania, a este de Bukoba, en julio 2007.

2016-09-10

Miliones de persones peregrina a Mecca

Sirca 1,5 milion muslimes ia comensa la hadj, la peregrina anial a Mecca en Arabia Saudi.

La peregrinores fronti aora medios nova de securia, incluinte brasaletas de identia, per preveni un repete de un fuji manadin en 2015 cual ia mata plu ca 2000 persones.

La peregrina es entre la asemblas relijial la plu grande de mundo.

Pos rituos inisial a la Mascita Grande en Mecca en la parte plu temprana de esta semana, la hadjores va vade oji par bus, tren, o pede a Mina, a sirca 5 cilometres a este, en temperatur de 40°C.

Los fa la mesma viaja como la profeta Muhammad a sirca 1400 anios ante aora.

Saturdi es la dia prima de la hadj, e tradisional la tempo cuando peregrinores acui se animales e repleni se furnis de acua. Doman los va viaja a Monte Arafat, a distantia de alga cilometres, per la parte xef de la peregrina.

A Mina, on ia erije un estende vasta de tendas blanca e secur contra foco, per casi plu ca 2,5 milion peregrinores.

On regarda la fuji manadin en Mina en la setembre pasada como la desastre la plu grave en la istoria de la hadj. Lo ia aveni cuando peregrinores – de ci multe ia es iranis – ia vade a la Ponte Djamaraat per la rituo nomida la Bombarda de la Diablo con Petras. La rituo va comensa a lundi en esta anio.

Arabia Saudi ia desasentua la cuantia de matadas. Lo ia anunsia un investiga, ma ia publici no concluis.

Iran envia no peregrinores en esta anio, car lo ia fali acorda con Arabia Saudi sur la organiza de la hadj. Iran crede ce la saudis no ata sufisinte per serti la securia de la peregrinores, ma la saudis acusa Iran de fa esijes nonpratical.

2016-09-09

Corea Norde fa un proba nucleal sinco

Corea Norde dise ce lo ia esecuta susedosa se proba nucleal sinco. La anunsia ia es fada a alga oras pos cuando on ia deteta un aveni sismica prosima a se loca de probas.

Corea Sude crede ce esta es la proba la plu grande par la Norde, e teme ce la pais ia fa avansas nucleal major. Park Geun-hye, la presidente de Corea Sude, ia nomi lo un ata de "autodestrui" cual mostra la "noncautia manica" de Kim Jong-un.

La SUA ia averti sur "resultas grave".

En Xina, la ministreria de esternas ia dise ce Beijing es firma oposada a la proba, e ia recomenda ce Corea Norde evita plu atas cual ta mali la situa.

La Norde ia dise ce lo ia proba un "ojiva nucleal nova developada" e ce lo es aora capas de instala un bomba nucleal sur rocetos balistical.

Estimas varia sur la cuantia de enerjia emeteda par la esplode resente. La militaria de Corea Sude ia dise ce lo es sirca 10 cilotones, sufisinte per descrive lo como la proba nucleal la plu forte par la Norde. Otra espertas dise ce indicas inisial sujesta 20 cilotones o plu.

La bomba cadeda par la SUA a Hiroxima en 1945 ia emete sirca 15 cilotones de enerjia.

Park, ci corti un visita stranjer, ia comenta ce la proba es "un defia grave" a la comunia internasional cual va "gania sola plu punis e isoli" per Corea Norde. "Tal provoca va aselera plu se via a autodestrui," el ia dise.

La proba ia es prima detetada como un trematera de grado 5,3 a esta matina en la norde-este de Corea Norde, prosima a se proberia suteran a Punggye-ri. Como con probas nucleal pasada, la forma de onda jenerada ia indica ce la trema no ia aveni natural.

La proba presedente, en janero, ia emete sirca 6–8 cilotones. Corea Norde ia dise ce lo ia pertine a un bomba de idrojen, usante fusa nucleal, ma multe analistes duta esta.

On ia espeta longa un proba sinco. En semanas resente, imajes de satelite ia mostra ativia aumentada a Punggye-ri. Ance, la Norde usa comun datas nasional importante per esibi se fortia militar. Oji es se Dia Nasional, selebrante la fundi de la rena presente.

Probable un tempo longa va pasa ante cuando on confirma nondependente la estende e manera de la proba.

Japan ia envia aviones militar per colie samples de aira per monitori radia, e Xinia ia dise ce lo oserva la cuantia de radia prosima a se fronteras con Corea Norde.

Corea Norde es proibida par la Nasiones Unida de tota probas de tecnolojia nucleal o de misil. Ma en menses resente, lo ia lansa un serie de misiles balistical – de cual alga ia ateni acuas japanes – e ia menasa atacas nucleal contra se enemis.

La Norde ia es ance colerida par un projeta par la SUA e Corea Sude de instala un sistem de defende contra misiles en la Sude, e par la eserses militar anial de la aliadas, cual es enorme e aveni ancora.

Punis internasional ia es multe fortida en responde a probas presedente de misiles e tecnolojia nucleal, ma esta ia fa poca efeto a la program de armas nucleal de Pyongyang.

2016-09-08

La polisia barati serti ce birianis conteni no bove

En la state Hariana en Barat norde-ueste, la polisia va esamina platos de biriani de ovea per serti ce los no conteni carne de bove.

Un dotor veterinar va aida polisiores a esamina la platos de ris en la distrito Mewat.

La majoria indu de la abitores de Barat regarda boves como bestias santa, ma multe otra baratis come la carne. Carne de bove es proibida en Hariana.

Bhani Ram Mangla, la presidente de la Comision de Boves de Hariani, ia dise: "Nos ia reseta multe cexas ce carne es miscada en la birianis en la distrito Mewat, donce me ia comanda la polisia a proba fisical la birianis vendeda en comerias ala."

On va envia samples de carne a un laboreria per analise.

Mewat es locada a 100 cilometres de la capital Delhi. Lo es un area xef muslim e ia esperia tumultas comunial en la pasada.

On ia institui un unia spesial de polisia en Hariana per preveni la mata e contrabanda de boves. On instrui ance bonvolores a vijila en viletas esce cualcun mata un bove.

Nooruddin Noor, un membro de la Asosia de Avocatos de Mewat e un ativiste sosial major, ia dise ce la idea ce muslimes en la distrito pone bove en biriani de ovea es "un alega sin funda".

"Lo es un atenta de disturba la armonia comunial cual nos ave asi en Mewat," el ia dise. "On vende ja biriani en nos distrito tra longa. On misca nunca carne de bove. An tal, si la polisia desira esamina, nos ave no problem."

2016-09-07

On acusa ce la governa suri cade cloro sur Aleppo

On acusa ce fortes suri governal ia cade bombas de baril, conteninte cloro, de elicotores sur un suburbe de Aleppo, ferinte 80 persones.

Bonvolores de labora de crise dise ce persones ia sufri problemes de respira pos un ataca a la area Sukari.

La reportas no ia es nonpartisan sertida.

Un investiga gidada par la Nasiones Unida en agosto ia trova ce la governa suri ia usa cloro a du veses, cisa plu. Ma la governa ia nega sempre la usa de armas cimical.

Esta aveni en cuando xefes suri oposante prepara consenta oji en London, per inisia un projeta nova de traversa political per atenta fini la gera.

La grupo political xef de la oposante, la Comite Alta de Negosias, va es ospitada par Boris Johnson, la ministro de esternas de la Rena Unida. Ministros de esternas de la grupo Amis de Suria va es presente.

Adel al-Jubeir, la ministro de esternas de Arabia Saudi, ia dise ce el crede ancora ce on pote trova un solve political de la gera, e ce Bashar al-Assad no ocupa "un loca de vantaje o vinse", an pos la avansas resente de se fortes. "Ma si Assad continua es ostinosa e continua ata lenta e continua refusa engrana seria," el ia dise, "alora evidente on va debe ave un Scema B, cual va envolve ativia militar plu aumentada."

Ibrahem Alhaj, un salvor de la Defende Sivil Suri, ia dise ce el ia ariva a la loca de la ataca en Aleppo ier, corta pos la cade par elicotor de bariles conteninte lo cual el ia descrive como cuatro silindres de cloro.

La Defende Sivil Suri es un ecipo de bonvolores ci responde a crises en areas ocupada par la oposante. Lo ia posta video a se paje de Facebook, mostrante enfantes angusada ci respira usante mascas de osijen. La grupo ia acusa la governa de un otra ataca de cloro en agosto.

Rusia, un aliada de la governa suri, ia acusa rebelores de xuta cartuxes conteninte "gas nosiva" a areas de Aleppo ocupada par la governa.

Cloro es un cimical industrial comun, ma se usa en armas es proibida par la Acorda sur Armas Cimical.

La Nasiones Unida ia dise ier ce un periodo corta de lejeri per persones nonmilitar afetada par la gera en Suria, en la parte temprana de esta anio, ia cambia aora a un recomensa de combate an plu savaje.

En se reporta des-du sur Suria, lo ia dise ce la sesa de atas de gera en febrero ia permete ce alga vilas reseta se aida prima de anios, ma ce esta ia dura tra sola un pico de semanas. La reporta dise ce 600 mil suris es aora asejada, e ce 300 mil otras es trapida en la site Aleppo.

A soldi, on ia reporta ce fortes suri governal ia recatura partes de Aleppo cual ia es perdeda a rebelores en la mense pasada. Par esta causa, distritos ocupada par rebelores en la este de site es aora denova asejada.

Oservores ia dise ce fortes governal ia recatura du academias militar en la suburbe Ramouseh a sude de la site e ia rompe un linia de furni resente instituida a la rebelores.

2016-09-06

Un focon en un prison itiopian

A la min 23 prisonidas ia mori pos un focon a un prison en Itiopia do on reporta ce protestores antigoverna es tenida.

Un declara par la governa dise ce 21 ia mori par sofoca en un fuji manadin, e du otras ia es matada cuando los ia atenta evade.

Alga jornalistes local ia disputa la nara ofisial, sitante atestores anonim ci dise ce gardores ia fusili la prisonidas.

On no ia publici la identia de la prisonidas.

La focon ia ensende a saturdi, e on ia oia fusilis continuante de la prison Qilinto, a la borda de la capital Addis Ababa. Imajes televisada e fotos enviada a redes sosial ia mostra plumones de fuma levante de la compleso.

Alga reportas dise ce la focon ia es comensada con intende, como parte de un atenta de evade la prison, ma confirmas nondependente manca de esta.

Un onda de protestas sin presedente ia aveni en Itiopia en menses resente.

De novembre 2015, multe protestas ia es fada en la rejion Oromia par membros de la etnico la plu grande de la pais. Reportas antigoverna dise ce multe ativistes oromo es tenida a la compleso Qilinto.

La organiza Oserva de Diretos Umana, con xeferia en New York, dise ce plu ca 400 persones ia mori en scaramuxas con securiores en Oromia, ma la governa disputa esta.

Hailemariam Desalegn, la ministro xef de Itiopia, ia culpa "fortes antipas" per la violentia.

2016-09-05

Pandas jigante es no plu clasida como perilida

La panda jigante es no plu un spesie perilida, pos desenios de labora par conservores per salva lo.

On ia cambia la state ofisial de esta animal multe amada de "perilida" a "riscada" par causa de un recrese de cuantia en Xina.

La cambia ia es anunsiada como un parte de un refresci de la Lista Roja de la Uni Internasional per Conserva de Natur (UICN). Ma la refresci ia porta ance novas triste. La gorila este, la primate la plu grande de mundo, es aora perilida.

Laboras par Xina, cual reclama la panda jigante como se animal nasional, ia retrae la cuantia de la borda de estingui. La estima la plu resente indica un popla de 1864 de adultes.

On no sabe esata la cuantia de jovenes, ma on estima ce la cuantia intera de pandas jigante es 2060.

Ma la UICN ia averti ce la recrese de cuantia pote es corta. On predise ce la cambia de clima en la 80 anios veninte va elimina plu ca un tri de la bambu do la pandas abita.

La reporta ia dise: "Per proteje esta spesie iconin, lo es esensal ce on continua la medios produosa de proteje de foresta, e ce on dirije se contra menasas emerjinte."

Un crese de xasa nonlegal ia redui la cuantia de gorilas este a no plu ca 5000 tra la mundo. Cuatro de la sete ominidos de la Tera es aora grave perilida – la gorila este, la gorila ueste, la orangutan de Borneo, e la orangutan de Sumatra.

Inger Andersen, la dirijor jeneral de la UICN, ia comenta: "Oji es un dia triste car la Lista Roja mostra ce nos elimina alga de nos relatadas la plu prosima."

La cuantia de gorilas este ia diminui par plu ca 70% en la du desenios la plu resente. La Lista Roja de la UICN inclui 82 954 spesies, no sola animales ma ance plantas. On lista cuasi un tri (23 928) como menasada par estingui.