2016-12-31

Un proibi de comersia de ivor en Xina

Xina ia anunsia ce, ante la fini de 2017, lo va proibi tota ativias de comersia e prosede ivor.

Conservores de natur ia saluta la deside como "sin presedente" e "cambiante la jua" per la futur de elefantes.

La anunsia segue un deside a la Confere sur Comersia Internasional de Spesies Perilida en Sudafrica en otobre.

Xina ave la mercato de ivor la plu grande de mundo. Alga estimas sujesta ce 70% de la comersia mundal fini ala, do ivor pote ateni un custa de $1100 per cilogram.

La Consilio de Stato de la pais ia anunsia la detalias ier.

La prosede e vende comersial de ivor va sesa ante 31 marto, e tota comersiores rejistrada va es gradal retirada a pos, intera parante la mercato ante la fini de la anio.

La Funda Mundal de Natur (WWF) ia bonveni la novas, descrivente lo como "un anunsia sin presedente... sinialinte un fini a la mercato legal xef de mundo de ivor, e un aida major a laboras internasional per fronti la crise de xasa nonlegal de elefantes en Africa".

An si la mercato internasional de ivor ia clui en 1989, mercatos legal interna ia continua en multe paises en la mundo.

Un crese en la mata de elefantes en la sete anios pasada ia causa ce la cuantias tra Africa ia diminui par un tri, diseda par la Conta Grande de Elefantes resente publicida.

Xina ia suporta la deside en otobre, surprendente otra partisipores par la fortia de sua acorda per la proibi. Alga delegadas ia dise ce Beijing ia desira un deside an plu forte.

2016-12-30

Suomi prisoni un polisior xef per contrabanda de drogas

Un corte suomi ia condena la xef pasada de la polisia antidroga de Helsinki a des anios en prison per contrabanda de drogas e per multe otra crimines.

On ia judi ce Jari Aarnio ia aida un gang a emporta cuasi 800 cilogrames de haxix de Nederland e a vende lo en Suomi en 2011 e 2012.

On ia condena Aarnio, ci ave 59 anios, sur sinco crimines de droga e 17 otra crimines, incluinte un atenta de produi atestas falsa ce un om nonculpable ia es la xef de la gang de drogas.

Un aidor de la polisior, descriveda como un criminal local major, ia es ance condenada a des anios en prison.

Arnio ia pasa 30 anios en la polisia antidroga e ia es arestada en 2013. El ia nega tota la acusas, disente ce tota sua atas ia es legal e fada como parte de labora polisial.

Sua ecipo de avocatos ia dise ce Aarnio intende vade a la Corte de Apela de Helsinki per apela contra la condena de la corte de distrito.

En un caso separada en setembre, Aarnio ia es ja condenada a tre anios en prison per froda.

Crimines es relativa rara en Suomi en compara con la plu de otra paises european. Suomi es la pais du de la min criminosas, pos Danmarc, en un indise global compilada par Transparentia Internasional.

2016-12-29

Migrores vade recordo de Deutxland a la Balcanes

Un cuantia recordo de migrores – 55 mil – ia parti volente de Deutxland en esta anio – plu ca la duple de la cuantia deportada. La plu ia vade a la Balcanes ueste.

Albanianes ia formi la grupo la plu grande de 15 mil persones. Cada de la cuantias de Serbia, Irac, e Cosovo ia es sirca 5000.

En la anio pasada, 890 mil refujadas ia ariva en Deutxland – un enflue recordo. En esta anio, Deuxtland ia deporta 25 mil migrores. Los ci ariva de la Balcanes ueste ave jeneral no direto de resta en Deutxland.

La Ofisia per Migra e Refujadas dise ance ce cuantias cresente de refujadas revade volente a Irac, Iran, e Afganistan.

Los ci ia revade volente a Afganistan en esta anio ia es plu ca 3200 – sirca la desuple de la cuantia en 2015. Plu temprana en esta mense, 34 afganis ia es deportada pos sua solisitas de refuja ia es rejetada.

La governa deutx ia promete aumenta la taso de migrores revadente, entre criticas jeneral de la politica libriste sur migra de la canselor Angela Merkel.

Ma leges internasional proibi "repuxas" a rejiones do migrores risca gera o persegue. E on debe evalua individua cada solisita de refuja – on no pote es prejudosa contra grupos.

La Uni European no ave un lista acordada de paises de orijina "secur" – statos membros fa sua propre desides sur individuas.

Nonsimil a deportadas, migrores ci parti volente no es detenida par la polisia en la note e pote projeta per sua futur en bon tempo.

An si deportadas reseta un proibi de reentra per multe anios, los ci parti volente reseta alga aida finansial. Plu temprana los deside parti, plu grande es la mone.

La mone inisial per un familia de sinco, si los deside parti ante la rejeta de sua solisita de refuja, pote es €4200 ($4383). Acel es en ajunta a la suporta finansial fundal cual la plu de migrores reseta de la Organiza Internasional de Migra.

En esta anio, Deutxland ia refusa la entra de 20 mil migrores a sua fronteras esterna.

En la temprana de 2017, Deutxland intende inisia un program nova de developa per aida migrores a reintegra en sua propre paises.

La program va es prima dirijeda a migrores orijinante de Magrib, Tunis, Nijeria, Cosovo, Serbia, e Albana. Deuxtland ia asinia €150 milion tra tre anios a projetas de reintegra, per aida los ci revade volente.

La grupos la plu grande ci ia solisita refuja en janero-otobre 2016 ia es suris (38%), afganis (18%), e iracis (13,5%).

2016-12-28

La presidente pasada de Arjentina es acusada de froda

Cristina Fernández de Kirchner, la presidente presedente de Arjentina, ia es acusada sur alegas de froda.

Un judor federal ia aproba acusas de asosias nonlegal e manejas frodosa contra Fernández. Julián Ercolini ia comanda ance la jela de $633 milion de la ativas de el.

En la pasada, Fernández ia nega malcondui.

On alega ce sua governa ia dirije acordas formal a un comersior prosima a sua familia.

Fernández dise ce la caso es political motivada e acusa Mauricio Macri, la presidente presente, de conspira longo el.

Aparente en corte en otobre, Fernández ia presenta documentos de bujeta nasional como parte de sua atesta, asentuante ce la contas ia es aprobada par corpos parlamental e la esaminor jeneral de la pais.

Ercolini ia aproba ance acusas de froda contra du de la aidores pasada de Fernández – Julio Vido, ministro pasada de projetas, e José López, ministro pasada de infrastrutur publica – e ance contra Lázaro Báez, un comersior.

On acusa Fernández de favore la compania de construi de Báez – Austral – en la distribui de acordas formal per projetas publica. La compania ia reseta plu ca 50 tal acordas en la du periodos presidental de Fernández.

En junio, on ia catura López lansante sacos plenida con cuasi $9 milion a traversa de la mures de un monceria, e ia aresta el con suspeta de lava de mone.

Fernández ia fini sua posto en la anio pasada e es un de la xefes major ci oposa la governa de Macri.

2016-12-27

Un siclon matante en Pilipinas

Un siclon potiosa ia mata a la min cuatro persones pos pasa tra Pilipinas.

An pos temes inisial, Manila, la capital multe poplida, no ia es danada par la tempesta, cual ia trae ventas de asta 120 cilometres per ora.

La tempesta, nomida Nok Ten, ia cade arbores e linias eletrical, e ia obliga 380 000 persones a parti de sua casas.

Autoriosas ia averti sur un risca de inondas subita e liscas de fango en la 36 oras veninte.

On ia envia laborores de crise per sutrae detrito de la vias, prometente ce la eletrica va es rapida restorada en locas forte colpada.

Desuples de volas nasional e internasional ia es canselada par causa de la tempesta, e ofisiores ia dise ce plu ca 12 000 persones ia spende natal en portos car navetas ia es proibida de viaja.

La transporta de mar, tera, e aira ia recomensa lenta funsiona.

Un cultivor ia mori cuando un arbor ia cade sur el en la provinse Quezon, e tre otra viletanes ia mori en la provinse Albay, incluinte un duple ci ia es puxada a via par un inonda.

En Albay, ofisiores ia obliga la parti de abitores ci no ia desira abandona sua casas a natal, la vacanse la plu grande en la nasion xef catolica.

La tempesta, conoseda como Nina en Pilipinas, ia ariva a la costa este, prosima a la isola Catanduanes en la tarda de soldi, movente en dirije a la Mar Xines Sude.

En Catanduanes, Albay, e Camarines Sur, ofisiores ia declara un state de desastre per permete un distribui plu rapida de reservas de crise.

En otobre, la pais ia es colpada par supersiclon Haima, cual ia mata a la min cuatro persones. En 2013, supersiclon Haiyan ia prende plu ca 7350 vives.

2016-12-26

Un avion rusce cade en la Mar Negra

Un opera jigante de xerca continua en Rusia pos la cade ier de un avion militar rusce con 92 persones en la Mar Negra.

Sirca 3500 persones en barcones, jetos, elicotores, e sumarinas es envolveda en la xerca prosima a Sotxi.

La avion Tu-154 ia vade en dirije a Suria, portante soldatos, reportores, e membros de un bande famosa de musica militar.

On teme ce tota esta persones ia mori, e on ia declara oji como un dia de lamenta nasional.

11 corpos e 154 fratos es ja trovada. Lampas forte de punto ia es usada per xerca la loca tra la note.

Maksim Sokolov, ministro de transporto, ia dise ce terorisme no es "entre la varias xef" de la causas posible de la cade. El ia clari ce investigores esplora esce un era de pilote o un fali tecnical ia cade la avion.

La avion ia desapare de radar a du minutos pos sua enaira de la airoporto Adler en Sotxi a 05:25 de ora local, en dirije a Latakia en Suria. La vola ia orijina en Moscva e ia atera en Sotxi per prende carburante.

Lo ia porta 64 membros de la grupo Alexandrov ci ia intende presenta musica a soldatos rusce en Suria.

Un rejistra audio, parente de la conversa final entre la avion e controlores de trafica airal conteni no indica ce la ecipo esperia problemes. Voses resta calma asta cuando la avion desapare e la controlores atenta futil regania la contata.

La avion ia comensa opera en 1983. Lo ia es mantenida en setembre, e ia es reparada a grado plu grande en desembre 2014. Sua pilote ia es esperiosa.

2016-12-25

Xicas de Chibok es reunida con sua familias

Plu ca 20 xicas nijerian, librida en otobre par la grupo islamiste Boko Haram, ia es reunida con sua familias per natal.

Esta es la reveni prima a casa per la xicas pos cuando los ia es saisida de sua scola en Chibok en april 2014.

La femes joven ia es librida cuando Suiz e la Crus Roja Internasional ia fa un acorda con Boko Haram. A pos, la 21 xicas ia es tenida en un loca secreta par la governa nijerian.

Un de la xicas, Asabe Goni, ci ave 22 anios, ia dise ce lo es "un miracle" ce el es denova a casa.

Aidante sua madre en prepara per natal, el ia dise ce el es stimulada per vade a eglesa a la dia de natal. "Me ia sabe nunca ce me va reveni," el ia dise simple. "Me ia sede la espera de reveni a casa a cualce tempo."

De la 276 studiantes saisida, 197 manca ancora e negosias per sua libri continua.

Multe de la xicas ia es cristian, ma en sua tempo prisonida on ia coraji los a converti a islam e a sposi sua saisores.

Goni ia dise ce alga xicas ia es flajelida per refusa sposi, ma en otra modos los ia es bon tratada e nurida, a la min asta un manca resente de comedas.

Pos la acorda en otobre, la saisores ia anunsia ce cualce xica ci desira es librida debe sta en filo.

Goni ia es malada e tro fatigada per move en cuando la otras ia formi un filo, ma el ia aprende ce el va es entre la cuantia peti e fortunosa ci va parti.

An tal, sua joia ia es reduida cuando el ia es obligada a lasa sua cusin Margaret, con ci el ia abita de sua enfantia.

Ier, Muhammadu Buhari, la presidente de Nijeria ia dise ce la armada ia puxa la militaristes de Boko Haram de la campa en sua fortresa en la foresta Sambisa.
Tra alga semanas, la armada fa ja un ataca major en la foresta, cual ia es un conserveria jigante de animales savaje en la tempo colonial. On ia divina ce alga de la xicas de Chibok es tenida en la foresta, car un cuantia peti de los ci ia evade ia refere a lo.

Buhari ia dise ce on intensi la labora per trova la xicas restante.

2016-12-24

Un caldia recordo en la Artica

La temperatur presente a la polo norde es plu calda ca promedia par cuasi 20 grados, en un onda recordo de caldia.

Tra novembre e desembre, la temperatur ia ave sinco grados de celsius plu ca promedia, pos un estate cuando la jelo de la Mar Artica ia ateni la estende du de la plu petis de istoria rejistrada par satelites.

Dr Friederike Otto, un rexercor a la Instituida de Cambia Ambiental en Oxford ia dise ce en edas preindustrial, "un tal onda de caldia ia ta es estrema rara – nos ta espeta esperia lo a sirca un ves en cada milenio."

El ia ajunta ce siensistes es "multe serta" ce la fenomenos climal es relatada con cambias par umanas.

On previde ce la temperatur masima, cuasi 0°C, va es atenida a la polo norde oji.

Aira calda de la Mar Atlantica norde va flue asta la polo par via de Spitsbergen, creante nubes cual va preveni la relasa de la caldia.

Otto ia esplica ce la redui de jelo de mar contribui a esta "sicle de renuri": "Si la globo caldi, alora la jelo de mar e jelo de tera diminui, e la acua e tera plu oscur es esposada. Alora la lus de la sol es asorbeda e no refletada par la jelo."

La ambiente jelante e dejelante causa ja ce renos no trova fasil comedas, car la mos cual los come es aora covreda par jelo dur, en loca de neva mol e penetrable.

2016-12-23

Un defeta de terorisme intendeda per la dia de natal

La polisia de Australia dise ce los ia aborta un ataca de teror cual ia es projetada per la site Melbourne a la dia de natal.

Sinco omes ia es arestada en la temprana de esta matina.

La menasa ia envolve la "usa de esplodentes" e otra armas incluinte "coteles o un fusil", e ia es dirijeda a locas major incluinte la stasion ferovial de Flinders Street, la plaza Federation Square, e la catedral de San Paulo.

Cuatro de la suspetadas es omes en sua desenio tre, naseda en Australia a familias lubnani. La otra es un australian de orijina misri.

La xef de polisia de la stato Victoria ia dise ce la omes es "autoestremida", inspirada par propaganda de la organiza Daex.

Un otra om e un fem ia es ance arestada e librida sin es acusada.

La stasion Flinders Street, Federation Square, e la catedral ocupa tre angulos de un crusa de vias no multe distante de la criceteria do on previde ce asta 100 mil persones va regarda un max entre Australia e Pacistan a 26 desembre.

La polisia va aumenta sua presentia a la criceteria e otra locas en la site.

2016-12-22

On xerca ancora la atacor de Berlin

Tra Europa, on xerca la om tunisi ci ia fa la ataca de camion en Berlin.

Anis Amri, ci ave 24 anios, ia es ja monitorida en la temprana de esta anio, car on ia suspeta ce el projeta un fura per paia per fusiles. Sua monitori ia es ultima abandonada par causa de un manca de atestas.

Ante entra a Deutxland, el ia spende cuatro anios en prison en Italia per un ensende criminal.

La ataca a la sera de lundi a un mercato de natal ia mata 12 persones e ia feri 49.

On ia comanda la aresta de Amri pos trova sua permete de abita en la comparte de gidor de la camion.

Autoriosas deutx averti ce el es cisa armada e perilosa. On ofre un premio de asta €100 000 per informas cual gida a sua aresta.

Reportas sujesta ce el ia es ferida en un luta con la gidor polsce de la camion, de ci on ia trova sua corpo mor en la comparte de gidor.

Canselor Angela Merkel ia consenta con sua consilio de securia per discute la investiga de la ataca.

En un otra developa, la consilio deutx ia aproba un projeta acordada en novembre per permete plu monitoris video de locas publica.

2016-12-21

Un esplode de focos artal a un mercato en Mexico

Un esplode a un mercato de focos artal estra la Site Mexico ia mata a la min 31 persones.

Plu ca 70 otras ia es ferida par la esplodes a la mercato de San Pablito en Tultepec, a sirca 30 cilometres estra la site.

Eruviel Ávila Villegas, la governor de la stato Mexico, ia dise ce alga enfantes ci ia sufri ardes a plu ca 90% de sua corpos ia es enviada a la site Galveston en Texas en la SUA per reseta tratas spesialida.

Videos mostra un cuantia grande de focos artal cual lansa se a la sielo en cuando los ensende.

On ancora no sabe la causa, ma recomenda ce persones evita la loca e no bloci la stradas prosima.

Focos artal ia continua esplode an pos la pum inisial, e la loca ia emete nubes densa de fuma negra.

Fotos de polisiores e medicistes a la mercato ia mostra persones ferida entre cioscos destruida de mercato e construidas de brice negrida par la caldia.

La presidente de Mexico, Enrique Peña Nieto, ia tuita sua compatia a la familias de la vitimes e ia desira un recovre rapida a la feridas. El ia ajunta ce soldatos aida en la crise.

La mercato de San Pablito ia es forte danada par focos simil en setembre 2005, cuando un cadena de esplodes ia feri desuples de persones, direta ante la selebras de la dia de autonomia de la pais.

2016-12-20

Un ataca de camion a un mercato en Berlin

La polisia deutx investiga "un ataca probable teroriste" pos cuando un om ia gida un camion tra un mercato de natal en la sentro de Berlin, matante 12 persones e ferinte 48.

On reporta ce la camionor es un refujada afgani o pacistani ci ia ariva en Deutxland en febrero, e ce el ia es ja conoseda a la polisia per crimines minor, ma no per lias teroriste.

Politicistes deutx ia evita descrive la ataca como un ata teroriste en la oras direta a pos, ma Thomas de Maizière, la ministro de internas, ia dise: "Multe cosas indica tal."

La mercato es a Breitscheidplatz, prosima a la Kurfürstendamm, la strada xef de botecas en la ueste de Berlin.

La ataca ia aveni prosima a la Eglesa de Memoria de Kaiser Wilhelm, cual ia es danada par un bomba en la Gera Mundal Du e cual on conserva como un simbol de pas.

La camion, cargada con faxones de aser, ia verje a la mercato a 20:14 de ora local, un de la tempos la plu ocupada. Lo ia rompe cabanas de lenio e strutures plen de turistes e persones local.

La polisia crede ce lo ia traversa 50–80 metres de la mercato. On ia saisi la camionor pos cuando el ia sorti de sua veculo e ia fuji par pede.

El ia core longo la strada en dirije a la parce Tiergarten. Un atestor ia segue el tra cuasi du cilometres e ia clama polisiores, ci ia aresta el prosima a la monumento Colona de Vinse.

Un portavose per la polisia ia ipotese ce la camionor ia desira cisa "trova refuja en la oscuria de la parce".

La polisia ia confirma ce on ia trova un pasajor mor en la camion, un polsce. On teme ce el ia es la gidor orijinal de la veculo, e ce sua camion ia es saisida en viaja.

La posesor polsce de la camion ia confirma ce sua gidor manca e es noncontatable de 16:00 a lundi. "Nos no sabe cual ia aveni a el," el ia dise. "El es mea cusin. Me ia conose el de cuando me ia es un enfante. Me pote atesta sua bon carater."

La aveni ia evoca recordas de la ataca par camion en la site Nice en Frans a 14 julio, cuando 86 persones ia es matada. Acel ataca ia es reclamada par la organiza Daex.

Ambos Daex e al-Qa'ida ia recomenda ce sua seguores usa camiones per ataca folas.

2016-12-19

Zsa Zsa Gabor mori

La ator Zsa Zsa Gabor ia mori pos un ataca de cor a eda de 99.

A punto de larmas, sua sposo Frédéric von Anhalt ia informa jornalistes ce Gabor ia mori a sua casa, en ambiente de amis e familia. "Cadun ia es ala. El no ia mori solitar," el ia dise.

Naseda en Magiar, Gabor ia migra a la Statos Unida en la Gera Mundal Du e ia fa sua apare prima en filma de Hollywood en 1952. El ia sposi a nove veses.

El ia apare en plu ca 70 filmas, ma ia es plu famosa per sua modo de vive como fem de mundo.

El ia sposi a la ves prima a eda de 20 anios, e a la ves final (e la plu longa) cuando el ia ave cuasi 70 anios. En sua propre opina, el ia sposi a sola oto veses e un dui – el no ia inclui plen un duxe espaniol en 1982.

El ia nase como Sari Gabor en Budapest a 6 febrero 1917, e ia reseta direta la nometa Zsa Zsa de sua familia.

An si el ia desira prima deveni un dotor veterinar, sua madre ia ave otra projetas, e sua belia ia atrae la mundo de spetaculo.

Gabor ia gania la titulo Senioreta Magiar en 1936, ma on ia descuali el a pos, car el ia menti sur sua eda per entra a la concurso.

Sua atribuis inclui un lista longa de roles en filmas susedosa como Moulin Rouge (1952), Lili (1953), e Rea de Venus (1958). Plu resente, el ia apare en la serie Un malsonia en Elm Street e en la parodias Fusil nuda.

A sua apico, Gabor ia representa la ideal blanca blonde de Hollywood, e ia es conoseda per porta robas formal de lame.

Sua sola enfante ia es Constance Francesca Hilton, sua fia en 1947 con Conrad Hilton, un maniate de oteles.

Sua madre ia dise a el: "Tu no nesesa sposi cada om con ci tu fa la ama." Gabor ia dise ce el ia fa esta car el ia "para nunca es un catolica de cor".

En sua autobiografia de 1993, Un vive no sufisi, el ia scrive ce el ia perde sua virjina a Kemal Atatürk, la fundor de Turcia moderna, cuando el ia ave 15 anios.

La raconta esposante ia refere ance a relatas romantica con Sean Connery e Frank Sinatra, estra sua lista de sposos. El ia reclama ce el ia refusa John F Kennedy e Elvis Presley.

An si el ia pasa sua vive en parla replicas scriveda par otras, Gabor ia es mesma capas de crea dises memorable. Referente a sua bon relatas con sua sposos pasada, el ia dise: "Me ia odia nunca un om a tal grado ce me ta redona sua diamantes."

Gabor ia sufri de mal sania en sua anios tarda, e ia debe usa un seja rolante pos un asidente de auto en 2002 en Los Angeles.

El ia survive atacas serebral en 2005 e 2007 e ia depende forte de sua sposo a pos. En 2011, el ia sufri un infeta cual ia menasa sua vive, e on ia amputa sua gama destra supra la jeno per salva el.

El ia es cisa un de la femes prima "famosa par es famosa" – un cualia comun atribuida a Paris Hilton, sua duneta par sposi.

On ia burleta Gabor per sua pronunsia forte magiar en cual el ia nomi cadun darlink ("cara"). El ia clari: "Me nomi cadun darlink car me no pote recorda sua nomes."

2016-12-18

Pacistan sesa proibi filmas de Bollywood

Sinemas major en Pacistan ia acorda fini un proibi de filmas barati.

La deside de proibi ia es inisiada cuando relatas entre la du paises ia mali en setembre a tema de Caxmir, un teritorio disputada, pos un crese de violentia ala.

Alga filmores barati ia proibi atores pacistani de labora en filmas de Bollywood.

Bollywood es popular en Pacistan, e on reporta ce la probi autoinisiada ia causa un perde notable de revenu.

Distribuores de filma e posesores de sinema en Pacistan ia dise ce los va recomensa mostra filmas barati a lundi.

Pacistan ia introdui un proibi simil pos la gera Indo-Pacistani de 1965. Acel no ia es sutraeda asta 2008.

Caxmir ave un majoria muslim, es ja un loca de enemia tra desenios, e ia provoca du geras entre Barat e Pacistan, de cual ambos controla partes de la teritorio. Oji lo resta un de la zonas la plu militarida de mundo.

En setembre, 18 soldatos ia mori en un ataca contra un base de armada en Uri, en la parte barati de Caxmir. Lo ia es la tal ataca la plu matante de anios.

2016-12-17

Obama implica Putin sur siberatacas

Presidente Barack Obama ia dise ce el ia comanda Vladimir Putin a sesa en un conversa sur pirati de e-postas ante la eleje SUA.

Implicante ce la presidente rusce ia sabe sur la piratis, Obama ia dise: "No multe aveni en Rusia sin Vladimir Putin."

La presidente ia dise ce el ia averti Putin sur resultas grave a un confere en setembre. A un mense plu tarda, la SUA ia acusa Rusia de interfere en sua prosede democrata.

Obama ia promete un responde "a proportio" a la pirati de la Partito Democrata e de e-postas parteninte a la xef de campania de Hillary Clinton, la aspiror presidental ci ia perde.

El ia pare sujesta ce la SUA pote fa propre siberatacas, disente: "Tota cual los fa a nos, nos ave la posiblia de fa lo a los."

La comentas de Obama ia formi un parte de sua confere jornaliste final de la anio.

El no ia critica direta sua seguor, la republiciste Donald Trump, ma ia dise ce alga republicistes fali reconose la seria de la envolve de Rusia en la eleje SUA.

El ia espresa ance confusa sur suportores republiciste ci dise ce los aproba Putin, declarante: "Ronald Reagan ta rola en sua tomba."

La presidente ia recomenda forte ce Trump suporta un investiga par ambos partitos sur siberintruis rusce.

Ma plu temprana en esta semana, Trump ia rejeta alegas par departes de securia SUA ce piratas rusce ia aida move la eleje en dirije favorente el, descrivente los como riable e political motivada.

El ia tuita: "Esce vos pote imajina si la resultas ta es reversada e NOS ta atenta jua la carta de Rusia/CIA. On ta nomi lo un teoria de conspira!"

Ier, John Brennan, la dirijor de la CIA, ia informa empleadas ce la FBI acorda con la conclui par la CIA ce Rusia ia intende aida la vinse de Trump.

La Cremlin nega la alega ce Rusia ia pirati e-postas ofisial, e ia descrive los como "ofendente". Un portavose per Putin ia dise: "Ta ce los o para parla sur esta o presenta final alga spesie de demostra."

A la mesma tempo, Clinton ia atribui sua defeta elejal a pirati rusce, a la ves prima.

El ia dise a donores de partito ce Putin ave "un cexa personal" contra el car el ia descrive la elejes parlamental de Rusia a sinco anios ante aora como frodada.

2016-12-16

Un sesafusili en Halab

La sorti de siviles e rebelores de la este de Halab (Alep/Aleppo) en Suria continua longo un sesafusili.

Plu ca 3000 persones ia parti en buses a la dia prima de la sorti ier, ma la Nasiones Unida dise ce asta 50 mil es ancora trapida.

La armada de Suria, suportada par Rusia, ia saisi cuasi tota distritos ocupada par rebelores.

La Nasiones Unida ia acusa la governa suri de esecuta "un masacra" en la site.

Suria e Rusia ia nega a multe veses ce los ataca siviles. Bashar al-Assad, la presidente suri, ia saluta ier "la libri" de Halab pos plu ca cuatro anios de combate, disente ce un istoria deveni creada.

Multe miles de persones, incluinte multe siviles, ia es matada en la combate ferose.

Vladimir Putin, la presidente rusce, ia dise ce Rusia e Turcia atenta negosia un ronda nova de discutes de pas en Astana en Cazacstan. Estas va es en ajunta a la laboras de la NU en Genève.

En otra developas relatada ier:

– Donald Trump, la presidente elejeda de la SUA, ia repete ce el va institui zonas secur en Suria, partal finansiada par la statos de la Golfo Irani.

– A un confere de la Uni European, Angela Merkel, la canselor deutx, ia descrive la situa en Halab como "crevente la cor" e ia regrete ce la diplomatia european ia fali.

– Donald Tusk, la presidente de la Consilio European ia esije la abri direta de coredores umaniste per permete ce aida entra a Halab.

– Britan ia dise ce lo va furni $25 milion plu de aida, incluinte acua pur e comedas, a miliones de suris.

Rebelores ia esplode sua reservas de muni e ia destrui documentos ante parti de la site.

La Sentro Rusce per la Reconsilia de Partitos Oposante en Suria, un parte de la ministreria rusce de defende, ia dise ce la autorias suri ia garantia la securia de tota membros de la grupos armada ci deside parti de Halab.

Cuando la opera ia comensa, un ofisior en Halab este ia dise ce on ia fusili contra un convoia de ambulansias, ferinte tre persones.

La persones sortida es moveda a areas ocupada par rebelores en la provinse visina Idlib.

La ambasador de la NU a Suria, Staffan de Mistura, ia averti ce on risca esperia plu violentia en Idlib. "Si on ave no acorda political e no sesafusili," el ia dise, "Idlib va deveni la Halab seguente."

Turcia, cual ia aida negosia la sorti, prepara reseta alga de la siviles la min capas de defende se.

En otobre, Assad ia dise ce un vinse en Halab va es "la trampolin per libri otra areas de teroristes". La governa usa la parola "teroriste" per descrive tota rebelores combatente.

El ia indica spesial Idlib, a ueste de Halab, cual es cuasi intera controlada par un alia de partitos islamiste rebelante e Jabhat Fateh al-Sham, un grupo jihadiste conoseda en pasada como la Fronte al-Nusra.

Idlib conteni pasajes de frontera cual rebelores usa per reseta furnis de Turcia, un suportor major.

2016-12-15

La vende recordo de un selo imperal

Un selo imperal xines de la sentenio 18 ia es vendeda per €21 milion euros ($22 milion), plu ca la dudesuple de sua custa estimada.

La vende, a un colior xines anonim, ia aveni ier en la subasteria Drouot en Paris pos un batalia enerjiosa de ofres. On ia previde ce lo va es vendeda per entre 800 mil e milion euros.

La selo ave la grandia de un palma, e es fada de steatite roja e blanca, un spesie de roca mineral.

Lo ia es un de sentos poseseda par Imperor Qianlong, un de la imperores xines la plu longa renante.

La vende la rompe la recordo per subastas de selos: la recordo presedente ia es vendeda per €14 milion en 2011.

La selo ier vendeda ia es orijinal otenida par un dotor marinal joven franses ci ia visita Xina en la tarda de la sentenio 19. Lo ia resta sempre en sua familia a pos.

Imperor Qianlong, un colior zelosa de arte ci ia rena Xina tra multe de la sentenio 18, ia es mesma un artiste ci ia usa selos per suscrive sua obras. El ia comanda la produi de alga de los per sua artisania detaliosa.

La selo mostra nove dragones cual simboli la masia e la autoria imperal.

Drouot ia dise ce plu ca 1800 selos de Qianlong ia es creada, e 700 de los ia desapare. 1000 es retenida par la Museo Palasial en la Site Proibida en Beijing.

2016-12-14

Un turiste mori a la Parador Grande de Coral

Un fem vea de Japan ia mori en nada con airador a la Parador Grande de Coral. Esta es la mori cuatro de un turiste a la atrae australian en sola un mense.

La fem de 75 anios ia es tirada ier de la acua a Moore Reef, a sirca 45 cilometres de Cairns.

El ia es nadante con un grupo de turi. On ia atenta reanima cardiopulmonal el, ma no ia susede revive el.

En la mense pasada, du turistes franses en sua desenio oto ia mori, como ance un sumerjor brites de 60 anios.

La resifes ia esperia des moris en esta anio: la duple de la promedia per la industria de turi maral.

La Asosia de Operores de Parces Maral ia dise ce la plu de la vitimes ia es vea e ia sufri ja de problemes medical.

Un portavose ia dise oji ce on considera ajusta la regulas pos la mori la plu resente. Per esemplo, on va obliga cisa ce visitores vea declara ce los aseta la riscas asosiada con sumerji e nada con airador.

La Parador Grande de Coral es un de la atraes la plu popular con turistes en Australia. Lo es situada longo la costa de Queensland e es composada de miles de resifes indvidua e sentos de isolas.

Plu ca du milion persones visita lo en cada anio, jenerante plu ca du mil milion dolares australian de revenu.

2016-12-13

Un cade rapida en la cuantia de renos

Siensistes averti ce la manada la plu grande de renos savaje ia diminui par 40% de pos la anio 2000.

Los dise ce esta animales, cual abita la Penisola Taimyr en la parte la plu norde de Rusia, es afetada par temperatur altinte e ativia umana. La bestias cambia sua migras anial.

La rexerca ia es presentada a la consenta autonal de la Uni Jeofisical American.

La manada de Taimyr es un de la grupos la plu monitorida de renos en la mundo. On ia segue la animales tra cuasi 50 anios par avion e plu resente par imajes de satelite.

La cuantia ia ateni milion en 2000, ma esta rexerca nova sujesta ce on ave aora sola 600 mil.

Cambia de clima e developa industrial en la rejion cambia la distribui de la bestias.

La rexercores ia descovre ce, en la estate, la renos move a este per evita umanas. Ma los move ance a norde e a locas plu alta, probable per atenta trova tera plu fria e per evita la moscitos cual buma en cuando la rejion deveni plu calda e plu pluvosa.

Esta estende la distantia tra cual la animales debe migra entre inverno e estate, con plu risca a los con bebetas.

En ajunta, rios en la rejion deveni plu grande e plu perilosa per la bestias, ci debe traversa los par nada, en loca de pasea.

E comedas en la rejion de estate deveni min comun, spesial car la animales move a locas plu alta.

Andrey Petrov, ci dirije la Sentro Artica a la Universia de Iowa Norde ia comenta: "Renos es estrema importante per biodiversia – los es un parte de la cadena nural e, sin los, otra spesies ta ave problemes. Ma a contra, en tota la rejiones cual los abita, los es esensal per la survive de persones. Miles e miles de persones depende de renos savaje: lo es la funda de sua economia de susiste. Donce lo es ance un caso de sustablia umana."

2016-12-12

Venezuela cambia biletas a monetas

La governa venezuelan ia anunsia ce lo va sustitui monetas per la biletas la plu valuosa de la pais en min ca 72 oras.

Lo espera ce, par sutrae la biletas de 100 bolivares, lo va aida preveni la contrabanda e maneja mancas de comedas e otra cosas.

Presidente Nicolás Maduro dise ce ganges operante en rejiones de frontera no va ave un tempo sufisinte per redona la biletas.

Sua oposores ia rejeta la idea como mera la plu resente de la atentas desperante par Maduro per maneja la crise economial.

Henrique Capriles, xef de oposa, ia tuita: "Cuando la noncapasia governa! Ci ta pote imajina fa un tal cosa en desembre entre tota nosa problemes?"

Otras ia razona ce lo es nonposible ce on va intercambia tota la biletas esistente de 100 bolivares en la tempo asiniada.

La bileta de 100 ia perde la plu de sua valua en la anios resente e es aora egal a sirca 2 sentimes SUA.

Venezuela, cual esperia un crise grave de economia e politica, ave un de la tasos de infla la plu alta de mundo.

Maduro ia dise televisada: "Me ia dona la comandas per clui tota posibles teral, maral, e airal afin acel biletas no pote es redonada e los estra la pais va resta con sua froda."

Plu temprana en esta mense, la banco sentral ia dise ce ses biletas nova, de 500 a 20 000 bolivares, va comensa sirculi a 15 desembre.

La governa ia publici la statistica de infla a la plu resente en desembre 2015, declarante lo a 180%, ma la Reserva Monal Internasional estima ce custas va alti par plu ca 2000% en la anio veninte.

En Barat en la mense pasada, un politica simil per elimina biletas de valua alta ia causa un disturba grande.

2016-12-11

Un esplode matante a un stadion turces

Du esplodes prosima a un stadion de futbal en Istanbul, la site la plu grande de Turcia, ia mata 29 persones e ia feri 166.

Ofisiores dise ce un bomba de auto e un bomba umana a la sera de ier ia es intendeda contra la polisia.

Los ia aveni a du oras pos un max entre Beşiktaş e Bursaspor, du ecipos de la divide prima, a la stadion de Beşiktaş.

Des persones ia es arestada. Turcia ia comensa un dia de lamenta nasional.

No grupo ia declara se como la atacor, ma un onda de bombis ia es realida en Turcia en esta anio par militaristes curdi e la organiza Daex.

Presidente Recep Tayyip Erdoğan ia confirma la matas ma ia dona no detalias.

Jornalistes local ia reporta ce fanes ia vade ja a via, e Bursaspor ia tuita ce lo no es consensa de fanes ferida.

Süleyman Soylu, la ministro de internas, ia dise: "On crede ce lo ia es un bomba de auto a un punto do nosa polisia de fortia spesial ia es locada, direta pos la max, a la porte do fanes de Bursaspor ia sorti, pos la parti de la fanes."

El ia dise plu tarda ce on crede ce la esplode du, a Parce Maçka, ia es un bomba umana.

Un canal de televide ia reporta ce la blanco de la ataca prima ia es un bus portante polisiores de tumulta. Fotos postada pos la esplode mostra elmos sperdeda sur un strada e veculos danada.

Un elicotor de polisia ia sirculi a supra, e fenetras en construidas prosima ia es rompeda par la fortia de la esplodes.

2016-12-10

On alega ce Rusia ia aida la vinse de Trump

En la SUA, ofisiores ia revela ce departes de securia crede ce Rusia ia ata secreta per aumenta Donald Trump en la corsa presidental.

Un reporta en la jornal New York Times dise ce la departes ave "fida alta" sur un envolve rusce en pirati. Un evalua par la CIA, reportada par la jornal Washington Post, ia trova cosas simil.

Ma la ecipo de Trump ia rejeta la sujesta de la CIA, disente: "Esta persones es la mesmas ci ia dise ce Saddam Hussein ave armas de destrui coletiva."

Ofisiores rusce ia nega a multe veses la acusas de pirati.

A venerdi, presidente Barack Obama ia comanda un investiga sur un serie de siberatacas, per cual on ia culpa Rusia, en la periodo de la eleje SUA.

La piratis ia consentra se a epostas de la Partito Democrata e de un aidor major de la nominada Hillary Clinton. En otobre, ofisiores de la governa SUA ia acusa Rusia de interfere en la campania.

Aora, ofisiores major sitada par New York Times dise ce los es serta ce piratas rusce ia infiltra no sola la sistemes de computador de la Partito Democrata, ma ance los de la Comite Nasional Republiciste, ma ce los no ia relasa informas prendeda de la redes republiciste.

Departes de securia dise ce la rusces ia dona la documentos de la Democratas a WikiLeaks.

Democratas ia reata con furia cuando on ia pirati contas epostal de la Comite Nasional Democrata e de John Podesta, la xef de la campania de Clinton. La epostas de Podesta ia es revelada par WikiLeaks enlinia.

Sitante "un ofisior major SUA" anonim, Washington Post ia dise ce "departes de securia ia identifia individuas con lias a la governa rusce ci ia furni a WikiLeaks miles de epostas piratida de la Comite Nasional Democrata e otras, incluinte la xef de campania de Hillary Clinton".

A un punto en sua campania, Trump ia coraji publica Rusia a "trova" la epostas de Clinton, an si el ia dise plu tarda ce el ia parla con sarcasmo.

Democratas ia alega ce la piratis es un atenta intendeda per sumina la campania de Clinton.

Eric Schultz, portavose per la Casa Blanca, ia dise ce Obama desira ce on fa esta investiga cuando el es ancora la presidente "car el regarda lo como multe seria". El ia ajunta: "Nos es dedicada a serti la solidia de nos elejes."

2016-12-09

Legores de Corea Sude vota contra Park Geun-hye

La parlamento de Corea Sude ia vota per acusa presidente Park Geun-hye de malcondui en un scandal de froda.

La proposa en la Asembla Nasional ia es asetada par 234 votas contra 56, indicante ce alga membros de la partito renante de Park ia vota contra el.

La autoria de Park pasa aora a Hwang Kyo-ahn, la ministro xef.

Park ia es profonda envolveda en un scandal political cual ia provoca miles de coreanes a protesta sur la stradas en semanas resente per esije ce on sutrae el de potia.

A la cor de la crise es la relata entre Park e Choi Soon-sil, sua conselor prosima, ci on acusa de usa sua relatas per gania influe e vantajes finansial.

Avocatos prosedente dise ce Park ave un rol "notable" en la froda alegada, cual el ia nega. En la semanas la plu resente, el ia demanda a multe veses ce on pardona el per sua rol en la scandal.

La vota sinifia ce Park es aora suspendeda de sua posto, ma la deside nesesa ancora es aprobada par la nove judores de la corte constitual, ci ave ses menses per discute lo.

Si la corte suporta la deside, sola alora Park ta deveni desempleada. El ta deveni la presidente prima de Corea Sude ci on despone en la eda democrata de la pais.

2016-12-08

Un avion cade en Pacistan

La pilote de un avion cual ia cade ier en Pacistan ia fa un clama per aida, direta ante perde la contata.

El ia informa ance controlores de trafica sur un problem de motor a 16:09 de ora local.

Tota 48 persones en la avion, cual ia vola a Islamabad, ia mori.

Un investiga aveni, ma la airocompania PIA (Pakistan International Airlines) ia insiste ce probas sever ia lasa "no spasio per eras tecnical".

On ia trova un rejistrador de datos de vola. Autoriosas pacistani ia dise ce la problem parente de motor va es un foca de investiga.

La avion ia cade en la rejion Havelian de la provinse Khyber-Pakhtunkhwa, a sirca 70 cilometres de Islamabad.

La polisia ia dise ce on ia prende la restas carbonida de la pasajores a un ospital per identifia par ADN.

Junaid Jamshed, un cantor de pop e prete muslim, ia es en la avion, como ance tre persones stranjer – du de Osteraic e un de Xina.

Relatadas de la vitimes ia es coler cuando los ia asembla a la ospital per reprende la restas de sua amadas. Un de los ia comenta: "Lo es un omiside e me vole sabe ci ia mata mea frate."

Cades de avion no es noncomun en Pacistan, ma la cade major la plu resente de un avion de PIA ia aveni en 2006, cuando 44 persones ia mori.

2016-12-07

Un trematera sever en Aceh, Indonesia

Un trematera su mar, prosima a la provinse Aceh en la norde de Indonesia, ia mata a la min 52 persones.

La trema de mesura 6,5 ia aveni a la costa norde-este de la isola Sumatra, do desuples de construidas ia colasa e on teme ce multe persones es trapida su detrito.

La ajenteria meteorolojial de Indonesia ia dise ce on ave no risca de tsunami. En 2004, Aceh ia es ruinada par un tsunami cual ia mata plu ca 160 mil persones sola en Indonesia.

La trematera nova ia aveni a 05:03 de ora local a profondia de 17,2 cilometres. Alga enfantes es entre la mores e ospitales local es folida.

On usa aparatos pesosa per xerca survivores, ma on nesesa la aida de plu persones, car alga empleadas es ocupada en aida sua propre familias.

La rejion la plu sever colpada es Pidie Jaya a la costa norde de Aceh. Lo ave sirca 150 mil abitores, e es situada a sirca 110 cilometres de Banda Aceh, la capital provinsal.

La trema ia secute Banda Aceh, provocante multe persones tra la rejion a fuji de sua casas. On reporta ce multe esita reentra en cuando replicas sismica aveni ancora.

Indonesia es propensada a tremateras car lo es sur la Anelo de Foco – la linia de tremas e erutas volcanal cual ensirca cuasi la borda intera de la Mar Pasifica.

La isola Sumatra es ja colpada par alga tremateras en esta anio.

2016-12-06

Companias de infotecnolojia va reconose imajes estremiste

Facebook, Microsoft, Twitter, e YouTube colabora per preveni ce on sperde imajes e videos violente e estremiste par sua locas de rede.

La cuatro companias infotecnolojial intende crea un banco de datos cual conteni "impresas de dito dijital" de la contenidas. Estas va es comparada con imajes nova postada per deteta materias violente o estremiste ante cuando on comparti lo.

Ultima, la banco de datos va es disponable a otra companias ci desira garda contra tal contenidas.

Un portavose de Twitter ia dise: "On ave no loca per materias cual promove la terorisme en nos servis de consumor ospitada." El ia dise ance ce la stratejia es dirijeda contra imajes e videos "la plu estrema e xocante".

La banco va es poplida con caturas dijital de imajes e videos conoseda como "axis", cual es un modo normal de identifia unica fixes.

La axis de materias reconoseda como estremiste o violente va es compartida entre la cuatro companias, ci pote usa los per sutrae la mesma imajes de sua propre pajes e servis.

Si cualcun crede ce sua posta ia es noncoreta indicada como promovente grupos de teror, acel va pote apela contra la sutrae.

La portavose de Twitter ia dise ce la projeta juntada va fa ce la companias deveni plu capas de sutrae postas cual viole sua politicas sur cual cosas on pote posta e comparti.

La lia entre la cuatro aveni en cuando la Comision European recomenda ce companias SUA de infotecnolojia reata plu rapida contra parla odiosa.

Věra Jourová, la comisionor de justia de la UE, ia dise ce companias no ia reali sua declara de ses menses ante aora, en cual los ia promete reata en no plu ca 24 oras pos deveni informada sur contenidas odiosa e raziste.

El ia dise ce Bruxelles va introdui leges puninte si companias de infotecnolojia no comensa responde plu rapida.

2016-12-05

Renzi perde la referendo italian

La ministro xef de Italia, Matteo Renzi, ia resinia pos un defeta forte en un referendo sur sua projeta de reformi la constitui.

En un confere jornaliste en la tarda de note, el ia dise ce el aseta la culpablia per la resulta, e ce la campa de "no" debe aora fa proposas clar.

Pos la conta de la plu de votas, la campa de "no" gania con 60% contra 40% per "si".

La partisipa ia es cuasi 70%, en un referendo cual on ia regarda como un momento per rejistra noncontentia con la ministro xef.

La vinse par "no" ia es plu grande ca prevideda par la sonda la plu resente en novembre.

La Promove Sinco Stelas dise ce lo prepara aora per governa Italia. Sua xef, Beppe Grillo, ia proposa ce on fa un vota pos no plu ca un semana.

Entretempo, la eleje presidental en Osteraic ia es ganiada par Alexander Van der Bellen contra la aspiror estrema destriste Norbert Hofer.

Van der Bellen ia descrive la resulta como un vota per un Osteraic proeuropan fundida sur "libria, egalia, e unia".

Referente a la bandera osteraices, el ia dise ce "un sinial roja-blanca-roja de espera e cambia vade oji de Osteraic a tota la capitales de la Uni European".

2016-12-04

Un vota difisil ganiable en Osteraic

En Osteraic, on vota en un refa de la eleje presidental cual pone Norbert Hofer, la xef de la Partito de Libria estrema destriste contra Alexander Van der Bellen, xef pasada de la Partito Verde.

La vota en maio ia es difisil ganiada par Van der Bellen, ma la corte suprema de Osteraic ia cansela la resulta par causa de noncoeres en la conta.

Si Hofer gania, el va deveni la xef de stato estrema destriste prima de la Uni European.

Sondas en novembre no ia es capas de predise la resulta.

An si la rol es apena plu ca ritual, la vota es oservada como un barometre per aspirores popliste en elejes veninte.

En 2017, Frans, Nederland, e Deutxland va fa elejes en cual partitos deveni plu popular ci oposa la corente dominante e la migras.

On atende ance la dirije cual Osteraic va segue en relata con la UE.

Hofer ia campania sur un plataforma antimigra, e ia dise inisial ce Osteraic ta pote fa sua propre referendo per segue la vota par cual Britan ia deside sorti de la UE.

Van der Bellen ia dise ce esta indica ce Hofer favore sorti de la UE. Ma a un consenta de partito a venerdi, Hofer ia dise ce Osteraic deveni danada par oposores ci acusa el de favore esta.

En april, Hofer ia gania la ronda prima de elejes presidental par elimina aspirores sentriste de partitos cual ia domina Osteraic de pos la Gera Mundal Du.

Van der Bellen ia gania la ronda du, ma par sola 31 000 votas. La Partito de Libria ia defia la resulta, cual on ia dejeta par causa de noncoeres trovada.

La campania de eleje ia es longa e amarga, con ce ambos omes intercambia insultas e posteres de ambos es vandalida.

En la debate final televisada a jovedi, Hofer ia nomi Van der Bellen un mentor a 24 veses, e ia reseta la mesma insulta a tre veses.

La vota en Osteraic coaveni con un referendo atendeda en Italia, do Matteo Renzi, la ministro xef sentriste-sinistriste aposta sua futur political a un paco de reformis political cual es oposada par la Promove Sinco Stelas popliste de Beppe Grillo.

2016-12-03

Trump telefoni a la presidente de Taiuan

Donald Trump, la presidente elejeda de la SUA, ia parla direta con la presidente de Taiuan, defiante un politica de la SUA inisiada en 1979 cuando relatas formal ia es rompeda.

La ecipo traversante de Trump ia dise ce el e Tsai Ing-wen ia nota "lias prosima de economia, politica, e securia" entre la SUA e Taiuan en un telefoni.

La ata risca coleri Xina, cual regarda Taiuan como un provinse separadiste. Wang Yi, la ministro xines de esternas, ia descrive la telefoni como "un truco trivial" par Taiuan.

Trump ia tuita ier ce Tsai ia telefoni a el per loda el sur gania la presidentia SUA. La ecipo de Trump ia dise ce el ia loda ance Tsai sur deveni la presidente de Taiuan en janero pasada.

Lo es multe noncomun ce un presidente o presidente elejeda de la SUA parla direta a un xef taiuan.

Pos cuando jornalistes ia scrive sur la riscas de coleri Xina, Trump ia tuita: "Interesante ce la SUA vende biliones de dolares de aparatos militar a Taiuan ma me debe no aseta un telefoni lodante."

La Casa Blanca ia dise ce la conversa no indica un cambia en la politica de la SUA, e un portavose per Trump ia dise ce Trump es "bon consensa" sur la politica esistente sur Taiuan.

Washington ia rompe relatas diplomata formal con Taiuan en 1979, espresante sua suporta per la conseta "Un Xina" de Beijing, cual declara ce Taiuan es un parte de Xina.

Xina ave sentos de misiles puntada a Taiuan e ia menasa usa fortia si Taiuan xerca autonomia.

Tsai, la xef fema prima de Taiuan, ia gida la Partito Progresiste Democrata a un vinse inondante en la vota de janero. La partito ia favore tradisional autonomia de Xina, e la governa de Tsai no aseta la politica Un Xina.

La ministreria xines de esternas ia dise ce lo oposa tota interatas ofisial o contatas militar entre la SUA e Taiuan, seguente la jornal La Dial de la Popla (cual es un portavose per la Partito Comuniste).

Wang ia dise ce la conversa entre Trump e Tsai es "mera un truco trivial par Taiuan" sur cual el crede ce lo no va cambia la politica de la SUA sur Xina: "La politica Un Xina es la peso major de la developa sana de relatas Xina-SUA, e nos espera ce on no va interfere o dana esta funda political."

An si la relatas formal ia es rompeda a cuasi cuatro desenios ante aora, la SUA manteni ancora nonofisial relatas amin con Taiuan.

Pos la telefoni de Trump, la Casa Blanca ia dise ce la SUA resta firma dedicada a sua politica Un Xina.

Entretempo, on reporta ce Trump ia fa un telefoni "multe interesante e animada" con presidente Rodrigo Duterte de Pilipinas, en cual el ia invita el a la Casa Blanca en la anio veninte.

La xef pilipina ia desacorda con presidente Barack Obama, an insultante el en la pasada. Obama ia cansela un consenta projetada con el en setembre.

2016-12-02

Cuatro sites va proibi veculos de gasolio

La xefes de cuatro sites major dise ce los va proibi la usa de tota autos e camiones de gasolio ante la media de la desenio veninte.

La maiores de Paris, Site Mexico, Madrid, e Atina dise ce los reali la proibi per boni la cualia de aira. Los va motiva la usa de otra spesies de veculo e va promove pasea e bisicli.

La prometes ia es fada en Mexico a un consenta duanial de xefes de site.

La usa de gasolio en transporta ia deveni sempre plu esaminada en anios resente, car un ansia ia crese sur sua efeto a la cualia de aira. La Organiza de Sania Mundal dise ce sirca tre milion moris en cada anio es relatada con esposa a la contamina de aira esterna.

Motores de gasolio contribui a la problem en du modos major: los produi particuletas e osidos de nitrojen. La particuletas pote entra a la pulmones e provoca maladias cardiovascular.

Osidos de nitrojen pote contribui a la formi de ozon a nivel de tera, e esta pote aumenta difisilias de respira, an per persones sin istoria de problemes respiral.

Grupos ambientiste ia usa la cortes per atenta enforsa normas e regulas de aira pur.

Aora, maiores de sites major con problemes bon conoseda de cualia de aira ia deside usa sua autoria per restrinje sever la usa de gasolio.

A la consenta C40 de xefes urban en Mexico, la cuatro maiores ia declara ce los va proibi tota veculos de gasolio ante 2025 e "promete fa tota en sua potia per motiva la usa de veculos eletrical, idrojenal, e ibride."

Paris ia fa ja un serie de pasos per redui la efeto de autos e camiones de gasolio. Veculos rejistrada ante 1997 es ja proibida de entra a la site, e la restrinjes grandi a cada anio asta 2020.

A un ves en cada mense, on clui la Champs-Élysées a trafica. Multe resente, on ia cambia 3 cilometres de la riva destra de la rio Seine afin los es no plu un autovia de du bandas, ma un zona de paseores.

Multe de la medios proposada per redui la contamina de aira ave ance la vantaje de redui la emetes cual mali la caldi global.

En Barcelona, viajas usante bisicles publica disponable ia redui emetes de diosido de carbono par plu ca 9000 tones – corespondente a plu ca 33 milion cilometres traversada par un veculo promedia.

2016-12-01

Carlsen resta la campion mundal de xace

Magnus Carlsen de Noria ia gania la Torneo Mundal de Xace a la ves tre en segue.

El ia vinse sua defior, Sergey Karjakin de Rusia, pos tre semanas de jua e un serie de maxes desidente en New York.

Karjakin ia es egal a Carlsen en 12 rondas ma ia sufri un defeta en la fase final, composada de cuatro juas rapida.

Organizores ia dise ce la torneo ia es segueda par sirca ses milion fanes de xace tra la mundo.

Sentos de oservores ia paia entre $100 e $500 per regarda la maxes a un mercato pasada de pex en Manhattan. Los ia es separada de la du mestres grande par vitro acustical isolida.

Pos sua vinse, la suportores de Carlsen ia saluta el par aclama e canta "Bon aniversario" per onora la aniversario de sua nase.

La premio de $1,1 milion es divideda entre la du juores, tal ce la vinsor prende 60%.

2016-11-30

Ofisiores franses investigada sur la jenoside ruanda

Ruanda ia comensa un investiga formal sur 20 ofisiores franses ci lo suspeta de envolve en la jenoside de 1994.

La avocato prosedente xef, Richard Muhumuza, ia dise ce autoriosas franses ia es contatada e ce on previde un colabora completa.

Relatas entre la du paises es tensada de pos la matas coletiva.

Sirca 800 mil persones, xef tutsis, ia es matada par estremistes hutu en la jenoside ruanda.

A la sentro de la disputa es la rol de Frans como un aliada prosima de la governa nasionaliste hutu de Juvenal Habyarimana ante la matas. La masacra ia es provocada par la tira a tera de sua avion supra Kigali en april 1994.

Ruanda ia acusa Frans de iniora o de no persepi indicas avertinte, e de instrui los ci ia fa la matas.

Frans ia confesa fa eras sur la jenoside, ma nega tota alegas ce lo ia aida.

En un declara, Muhumuza ia dise: "La investiga, per la presente, es focada sur 20 individuas sur ci, seguente informas ja colieda, la autoriosa prosedente esije ce los esplica o furni claria sur alegas contra se."

El ia ajunta ce un deside sur cualce acusas posible va es fada a tempo plu tarda.

Xefes ruanda ia es colerida en otobre cuando Frans ia reabri un investiga sur la tira a tera de la avion de Habyarimana.

Investigores franses ia dise ce los vole oia la atesta de un jeneral pasada, aora escluida e vivente en Sudafrica, ci ia alega ce la presidente ruanda Paul Kagame ia es envolveda.

Kagame ia rejeta la alegas e ia averti sur "un fronti" contra Frans.

2016-11-29

Futbalores brasilera en un cade de avion

Un avion portante 81 persones, incluinte un ecipo major de futbal brasilera, ia cade prosiminte a la site Medellín en Colombia.

On reporta ce ses persones ia survive. La avion ia esperia problemes eletrical.

La avion, volante de Bolivia, ia porta membros de la ecipo Chapecoense ci ia intende jua en la maxes final de la Copa de America Sude contra un ecipo de Medellín.

La gama prima de la finales ia es projetada per mercurdi, ma es aora suspendeda.

La ecipo de la site sude Chapecó ia es levada a la divide prima de Brasil en 2014 e ia ateni la finales en la semana pasada, pos vinse contra un ecipo de Arjentina.

La avion de vola corta ia es de la spesie British Aerospace 146. Lo ia es operada par Lamia, un airocompania bolivian, e ia porta 72 pasajores e nove ecipores.

Lo ia cade sur un montania estra la site, no longa ante medianote de ora local.

Seguente un comunica a jornalistes par la airoporto José María Córdova de Rionegro, lo ia reporta un fali eletrical a la tore de controla.

La airoporto, cual servi Medellín, ia dise ce "on ativi tota aidas posible car ses survivores es reportada".

Par causa de un mal clima, la loca de cade es asedable sola par tera. Ma car la avion no ia ensende, salvores espera ce los va trova cisa plu survivores.

2016-11-28

Un dia de furia contra la proibi de biletas de rupi

En Barat, partitos oposante dise ce miles de persones va partisipa en protestas nasional contra la proibi de du biletas major de mone par la governa.

Plu temprana en esta mense, la biletas de 500 e 1000 rupis ia es subita proibida, causante un caos en cuando on ia fili a bancos per intercambia sua mone vea. En alga casos, la polisia ia debe interveni per controla clientes ansiosa.

La ministro xef Narendra Modi ia defende la deside, descrivente lo como un medio contra la froda.

Ma oposores dise ce la cambia ia es malmanejada. En la semana pasada, los ia retarda la parlamento e ia esije ce Modi espresa regrete per la deside.

Lo no es clar cuanto momento publica va es jenerada par un dia de protestas, car multe baratis ia suporta la cambia, an si lo es nonoportun.

La plu de partitos oposante ia dise ce los va partisipa en lo cual on nomi la "dia de furia".

La stato sude Kerala, governada par comunistes, va esperia probable un sesa de ativia, e on ia projeta un asembla major de protesta en Kolkata, un site este. En la site sude Bengaluru, la partito xef oposante va fa un prosegue protestante, en cual on previde ce alga miles de persones va partisipa.

Sirca 90% de la intercambias finansial en Barat usa mone fisical, e multe persones no ave un conta de banco.

En sua adirije nasional prima pos cuando la governa ia proibi la plu de biletas esistente a soldi, Modi ia recomenda ce on fa paias dijital e usa min mone fisical.

En la semana pasada, Manmohan Singh, la ministro xef presedente, ia dise ce la proibi subita de la biletas multe usada es "un malmaneja monumentin" e ce la produi interna bruta va redui "par sirca 2%" par causa de la cambia.

2016-11-27

Moris par asma de tona

En la site Melbourne en Australia, la cuantia de persones ci ia mori par un fenomeno rara, nomida asma de tona, ia crese a ses.

Tre otras es en un state grave.

Pluves e ventas forte a lundi ia provoca miles de atacas de asma par alerjia de polen en la state Victoria.

Paramedicistes e ospitales ia es masima presada cuando miles ia telefoni per reporta problemes de respira.

Plu ca 8000 persones ia es tratada en ospital.

Asma de tona aveni en la primavera cuando polen deveni moiada, rompe a pesos plu peti, e entra a la pulmones de persones, difisilinte la respira.

Sirca 10 persentos de persones en Australia ave asma, e sirca 80% de los esperia alerjias, spesial a polen de lolio.

La primavera presente ia es plu pluvosa ca usual en Melbourne, creante problemes major per los ci sufri de asma e rinite.

2016-11-26

Fidel Castro mori a eda de 90

Fidel Castro, la presidente pasada de Cuba e gidor de la revolui comuniste, ia mori a la eda de 90 anios.

El ia rena Cuba como un stato de un partito tra cuasi 50 anios ante cuando sua frate Raúl ia continua en 2008.

Sua suportores ia dise ce el ia redona Cuba a la popla. Ma on ia acusa el ance de supresa oposa.

Con fas pal en un televisa nonprevideda en la tarda de sera ier, Raúl Castro ia informa la nasion ce sua frate ia mori e va es senida oji. Alga dias de lamenta va segue sur la isola. El ia fini la anunsia par cria la slogan revoluiste: "A la vinse, sempre!"

Estra articles en jornales de tempo a tempo, Fidel Castro ia retira ja se de la vive political tra alga tempo.

En april, el ia fa un parla rara a la dia final de la congresa de la partito comuniste de la pais. El ia reconose sua eda grande, ma ia dise ce consetas comuniste cuban es ancora valida e ce la popla cuban "va vinse".

"Me va ave pronto 90 anios," el ia dise, ajuntante ce esta es "un cosa cual me ia imajina nunca".

Castro, ci ia survive multe conspiras de asasina, ia es la plu longa renante de la xefes nonreial de la sentenio 20.

El ia dona tempora la potia a sua frate en 2006, cuando el ia recovre de un maladia acuta de intestin. Raúl Castro ia deveni ofisial presidente a du anios plu tarda.

Tra la Gera Fria, Castro ia es un problem per la SUA.

Un taticiste capas a campo de batalia, el e sua armada peti de gerilias ia suverti la xef militar Fulgencio Batista en 1959, ganiante multe suporta de la popla.

Ante la pasa de du anios, el ia declara ce la revolui es de natur marxiste-leniniste, e ia alia firma la nasion-isola a la Uni Soviet.

Ma, an con la menasa constante de un invade par la SUA e con la continua longa de un embargo economial contra Cuba, Castro ia susede manteni un revolui comuniste en un nasion situada a min ca 150 cilometres de la costa de Florida.

Tan despetada par sua oposores como adorada par sua seguores, el ia dura plu longa ca des presidentes SUA e ia defia desuples de atentas par la CIA a mata el.

2016-11-25

Focos savaje en Israel

On ia comanda sirca 80 mil persones a abandona sua casas car focos savaje entra a Haifa, la site tre de la plu grandes de Israel.

La focos segue un secia de du menses e es vanida par ventas forte en la norde de la site. Focos menasa ance casas prosima a Ieruxalim e sur la Riva Ueste.

La xef de polisia israeli ia dise ce on suspeta ensendes criminal en alga casos, e ce on pote suposa un motiva political.

La ministro xef, Benjamin Netanyahu, ia dise ce cualce tal ataca ta es egal a "teror" e ta es sever punida.

Naftali Bennett, la ministro de instrui e xef de la partito relijial destriste Casa Iudi, ia pare sujesta un envolve arabi o filastini en la focos cuando el ia tuita: "Sola los a ci la pais no parteni es capas de arde lo."

La comentas ia provoca un reata coler de la promove Fatah de la presidente filastini Mahmoud Abbas, cual ia dise ce ofisiores israeli "esplota la foco" per acusa filastinis.

"Lo cual arde es nosa arbores e nosa tera de Filastin istorial," lo ia dise en un declara.

Sentos de reservistes militar ia es clamada per aida batalia la focos cual esiste ja tra tre dias.

En Haifa, la comite de vila ia dise ce alga visinerias va es sin eletrica en la note.

Persones ia carga caretas de supramercato con posesedas, e on ia vacui scolas, jardines de enfantes, universias, e un ospital de persones vea. On ia vacui ance du prisones prosima a Haifa.

Plu ca 130 persones ia es ospitalida con feris minor, xef par causa de enspira de fuma, ma la plu ia es relasada a pos.

Plu sude, la autovia 443 – liante Ieruxalim e Tel Aviv, e traversante la Riva Ueste – ia es cluida oji per la trafica de matina en cuando un otra foco ia ateni la site Modi'in Illit.

Casas e autos ia es danada, e 300 studiantes ia es sortida de un scola en Talmon, un parte de la Riva Ueste abitada par persones israeli.

Pompores batalia ja focos en locas diversa de pos martedi, e meteorolojistes averti ce la state seca e la ventas forte va continua probable asta la temprana de la semana veninte.

Alga paises (entre cual es Cipros, Rusia, Italia, Corvatsca, e Elas) ia envia persones e aparatos, incluinte aviones, per aida maneja la ardes.

2016-11-24

On descovre un site antica misri

En Misre, arceolojistes ia descovre lo cual los descrive como un site vea de plu ca 5000 anios, conteninte casas, utiles, seramicas, e tombas enorme.

Lo es situada a lado de la rio Nil, prosima a la Templo de Seti la Prima en Abydos.

Espertas dise ce la grandia de la 15 tombas nova descovreda indica la grado sosial alta de la enteradas. On crede ce la site ia flori en la eda temprana de Misre antica.

La descovre pote aida la industria de turisme de la pais, cual ia deveni min ativa pos la suverti de presidente Hosni Mubarak en 2011.

Arceolojistes ia fa multe descovres en la site nova trovada, incluinte construidas, pesos de seramica, e utiles fada de metal e petra.

Lo pare ce la loca ia es la abitada de ofisiores major e persones ci ia construi tombas reial en Abydos, un site santa prosima. Abydos conteni multe templos, e ia es un capital en un periodo temprana de Misre.

La descovre ia es fada par un mision arceolojial cual parteni a la ministreria de anticas de la pais, e no par un grupo stranjer.

2016-11-23

Un acorda nova de pas en Colombia

La governa de Colombia dise ce lo va suscrive un acorda nova de pasa con rebelores FARC a jovedi, seguente la rejeta de la acorda presedente par un referendo en la mense pasada.

La acorda nova revisada va es enviada a la Congresa per aproba, en loca de un vota poplal.

Ma grupos oposante dise ce lo ancora no sufisi per puni rebelores per maltratas de diretos umana.

La acorda intende fini plu ca 50 anios de gera armada cual ia mata plu ca 260 mil persones.

En un parla televisada a la nasion ier, presidente Juan Manuel Santos ia dise: "Nos ave un momento unica per clui esta capitol dolosa en nosa istoria cual ia priva e dole miliones de colombianes tra un dui de sentenio."

La acorda orijinal ia es suscriveda a du menses ante aora en un rituo emosiosa ante xefes de mundo, ma un referendo a 2 otobre ia rejeta lo.

Oposores de la governa, gidada par Álvaro Uribe, un presidente pasada, ia dise ce la acorda es tro favorente a la rebelores.

Negosiores de governa e FARC ia labora constante per fa plu ca 50 cambias a la acorda afin lo deveni plu asetable a colombianes conserviste ci despeta la FARC.

Uribe e otra seticas ia continua declara ce la cambias es mera cosmetica.

Santos ia clari ce on ave no plu posible de negosia, an pos cuando Uribe ia demanda per un consenta con la gidores FARC per discute sua consernas.

"Cisa esta acorda nova no va sasia totas," Santos ia dise, "ma acel aveni en acordas de pas. On ave sempre voses critical; lo es comprendable e respetable."

El ia dise ce la validi va aveni en la Congresa, do la alia governal ave un majoria solida.

Uribe ia presa per un plu referendo cual, el ia dise, va vota contra la acorda denova.

Santos ia reseta la Premio Nobel de pas en otobre per sua laboras per fini la gera, provocante divinas ce on va pote ancora salva la acorda.

Negosiores governal dise ce on nesesa suscrive urjente la acorda de pas, car on teme la colsasa de la sesafusili delicata si la acorda no es rapida realida.

En la semana pasada, du combatores suspetada de FARC ia es matada en batalia contra fortes de securia, ci ia dise ce los ia malreconose los como membros de la ELN, la grupo rebelante numero du de la plu grandes en Colombia.

Rebelores FARC ia espresa ance coleria sur la matas de alga ativistes per reasinia de tera e defendores de diretos umana.

2016-11-22

On averti sur tsunami pos un teratrema en Japan

Japan ia cansela avertis de tsunami cual ia es publicida pos cuando un teratrema de mesura 7,4 ia colpa sua costa este.

La trema ia aveni prosima a Fukushima a sirca 06:00 de ora local, provocante avertis inisial de ondas con altia de 3 metres. La ondas cual ia colpa final la costa ia es multe plu peti.

On ia solisita ce miluples de persones sorti de la area, e feris minor ia es reportada.

Un trematera e tsunami ia colpa la area en 2011, matante 18 mil persones. Acel trema ia es un de la plu potiosas cual on ia rejistra, e lo ia causa un fonde a la compleso nucleal de Fukushima, do on fa ancora un labora jigante de limpi.

Ofisiores ia dise ce on ave no indica de dana a la compleso a esta ves.

La Ajenteria Meteorolojial de Japan ia dise ce la trema de oji ia es un replica de lo de 2011.

On ia senti secutes forte an en Tokio, la capital, a 160 cilometres a sude de Fukushima. Construidas en Tokio ia secute tra 30 secondos, a la min.

Obedinte la avertis en Fukushima, barcones ia move a via de portos, e Nissan ia suspende labora a sua fabriceria de motores.

Japan es situada en un rejion con un cuantia nonusual de ativia sismica, representante sirca 20% de tremas de mesura 6 o plu en la mundo.

2016-11-21

Obama va comenta cisa sur presidente Trump

Barack Obama ia dise ce cisa el va parla franca pos sesa es la presidente de la SUA, si el senti ce sua seguor Donald Trump menasa la valuas fundal de la pais.

Par abitua, presidentes pasada tende parti de politica e evita comenta sur sua seguores.

Obama ia dise ce el va dona tempo a Trump per contorni sua ideas, ma ia ajunta ce, como sitadan privata, el va comenta cisa sur alga temas.

Trump ia spende la fini de semana en intervisa aspirores per postos major de sua consilio.

Obama ia descrive se como "un sitadan american ci cura profonda sur nosa pais".

Parlante a un confere jornaliste a la fini de la consenta de la Coopera Economial Asian-Pasifica (APEC), el ia repete ce el va ofre a la governa arivante de Trump la mesma cortesia profesal cual sua propre presedor George W Bush ia mostra a sua ecipo.

Pos parti de la posto, Bush ia asteni de comenta sur la presidentia de Obama. En 2013, el ia dise: "Me no opina ce lo aida. Lo es un posto difisil. El ave multe en sua ajenda. Lo es difisil. Un presidente pasada no nesesa fa ce lo deveni plu difisil. Otra presidentes ia fa desides diferente; acel es la mea."

La disposa de Bush segue la tradision presidental, ma Obama ia fa sua comenta entre consernas cresente de grupos de diretos sivil sur la asinias political cual Trump fa aora.

Steve Bannon, stratejiste xef de la presidente elejeda, ia es la xef de Breitbart, un loca de rede cual on acusa de promove razisme e antisemitisme. E jeneral Michael Flynn, la conselor de Trump sur securia nasional, ia descrive Islam como "un canser" estendente tra la SUA.

La nominada de Trump per avocato jeneral, Jeff Sessions, ia perde la posible de deveni un judor federal en 1986 par causa de comentas raziste alegada.

Obama ia dise ce el crede ce la encarga intensa de la presidentia va obliga Trump a modera alga de la opinas political plu estrema cual el ia promove en sua campania.

Trump ia encontra ance Mitt Romney, sua oposor pasada, ci es aora considerada per deveni la ministro de esternas.

Trump ia dise ce sua sposa Melania e sua fio de 10 anios no va move direta a la Casa Blanca. Los va move "multe pronto, direta pos cuando el fini scola", el ia dise. La anio scolal en la SUA comensa en la tarde de agosto o la temprana de setembre, e fini en la tarda de maio o en junio.

Entretempo, Obama ia dise ce sua conserna prima pos parti de la presidentia es prende sua sposa Michelle en vacanse, "reposa alga, spende tempo con mea fias, e scrive alga, pensa alga".

2016-11-20

Un tren rapida desreli en Barat

En la norde de Barat, a la min 96 persones ia es matada cuando 14 vagones de un tren rapida ia salta de la reles en la stato Uttar Pradesh.

Plu ca 150 persones es reportada como ferida.

La desreli ia aveni corta pos 3:00 de ora local a esta matina, prosima a la site Kanpur. Sua causa no ia es direta clar.

La plu de la vitimes ia es locada en du vagones prosima a la locomotiva cual ia deveni inversada e grave danada.

Laborores de salva a la loca usa macinas pesosa per talia la vagones e ateni survivores. Multe pasajores es ancora trapida.

Un pasajor, de ci sua vagon no ia desreli, ia dise ce la tren ia viaja a rapida normal. Lo ia para subita, ante recomensa corta ante la asidente.

Narendra Modi, ministro xef de Barat, ia tuita: "Angusada ultra parolas sur la perde de vives par la desreli de la tren Patna-Indore. Mea pensas es con la familias privada. Preas con la feridas en la asidente trajedin de tren."

Modi ia dise ance ce el ia parla a Suresh Prabhu, la ministro de ferovias, ci "mesma monitori prosima la situa".

A sua propre conta de Twitter, Prabhu ia averti ce on va reata en modo tan sever como posible contra los ci es culpable per la asidente. El ia dise ce un investiga va comensa direta, e ce on va paia compensa "a pasajores nonfortunosa ci ia mori e a feridas".

Kanpur es un junta major de ferovias, e sentos de trenes pasa tra lo a cada dia.

Asidentes ferovial no es rara en Barat, do multe de la aparatos es vea. Un otra asidente en Uttar Pradesh en marto 2015 ia mata 39 persones e ia feri 150.

A cada dia, sirca 23 milion pasajores usa la rede vasta de ferovias barati, numero cuatro de la plu grandes de mundo.

2016-11-19

Discutes sur la clima apela a la SUA

La xef seguente de la discutes climal de la Nasiones Unida ia apela a la SUA per salva isolas pasifica de la efetos de caldi global.

Frank Bainimarama, ministro xef de Fiji, ia dise ce la isolas nesesa la Statos Unida aora tan multe como en la Gera Mundal Du.

Parlante a la fini de discutes sur la clima global en Maracex en Magrib, el ia dise ce la cambia de clima no es un engana, como alegada par Donald Trump, presidente elejeda de la SUA.

Trump ia promete retira la SUA de la Acorda Climal de Paris e elimina tota paias per projetas NU de caldi global.

En cuando la xef fijian ia aseta la rol de presidente de la Confere de la Partitos per la anio veninte, el la recomenda ce la presidente veninte de la SUA abandona sua seticisme: "La acorda siensal global es ce lo es multe real e nos debe ata plu desidosa per evita desastre."

El ia apela ance direta a la popla de la SUA afin los veni a sua aida en relata con la problem de mares levante, causada par caldi global.

Pos du semanas de discutes en Maracex, la partisipores ia deside la pasos seguente per la acorda major de clima.

Esta asembla ia inclui la abri de CMA1, la Confere de la Partitos consentante como la suscrivores de la Acorda de Paris, cual intende limita la crese de temperatur global.

CMA1 va es la corpo formal de la NU cual va dirije, maneja, e defini la regulas per la funsiona de la trata de Paris.

La cuantia de paises cual ia aseta la acorda ia suprapasa aora 100. La partisipores ia acorda ance la Proclama de Maracex, un declara cual reafirma la intendes de tota 197 suscrivores a la Acorda de Paris.

Regardada como un mostra de unia sur la tema, en relata con un retira posible par la SUA, la paises ia declara ce los va reali sua prometes de redui emetes. La proclama ia apela ance afin tota nasiones aumenta sua aspiras de redui emetes de carbono.

A esta consenta, alga de la nasiones la plu povre de mundo ia anunsia ce los vade en dirije a la usa de sola enerjia verde.

La Foro de Clima Riscada ia dise ce la 47 paises membros, incluinte Bangladex, Itiopia, e Iaman, va reali esta gol entre 2030 e 2050. Los ia defia paises plu rica a fa la mesma.

An con esta avansas, on ia trova ancora alga puntos de difere major entre la partitos, spesial a tema de mone. La discutes va continua en 2017 con un delega nova de la SUA, elejeda par la governa de Trump.

2016-11-18

Un tancador esplode en Mozambic

A la min 73 persones ia es matada e 110 ferida cuando un tancador de carburante ia esplode en Mosambic ueste.

La esplode ia aveni a la posmedia de jovedi en la vileta Caphiridzange en la provinse Tete, prosima a la frontera de Malaui, ma la contesto es ancora nonclar.

Alga reportas dise ce la gidor de la tancador ia atenta vende carburante a viletanes; otras dise ce el ia deveni embosceda.

La esplode mesma ia es cisa causada par un colpa de lampo o par un focon prosima.

Desuples de corpos carbonida ia es trovada sirca la loca de esplode. Alga de la vitimes grave ardeda ia atenta core a la rio local.

Un otra reporta ia dise ce la veculo ia colide a la posmedia de martedi, e ce viletanes ia es sifoninte la carburante de lo cuando lo ia esplode a jovedi.

La governa ia dise ce lo "deplora la perde de vive" e "furni aora la aida nesesada per salva vives e per comforta la familias de la vitimes".

Tre ministros va ariva en la rejion a venerdi per supravide la labora de salva e per fa un investiga.

La governa mosambican ia alti resente la custa de carburante en responde a la basi de la mone local en relata a la dolar.

Mozambic es un de la paises la plu povre de mundo, e plu ca un dui de sua 24 milion abitores vive su la linia ofisial de povria. Lo ia gania autonomia de Portugal en 1975, ma sufri ancora la efetos de un gera interna de 16 anios cual ia fini en 1992.

2016-11-17

Un piramide matrioxcin es descovreda en Mexico

Espertas ia trova un strutur tre en la piramide famosa Kukulkan en Mexico este.

Un piramide con altia de 10 metres ia es detetada a interna de du otra strutures cual formi la piramide de 30 metres, a Chichen Itza, un compleso de arceolojia maia en la stato Yucatan.

La descovre sujesta ce on ia construi la piramide en tre fases.

La sivilia maia ia ocupa America Sentral e ia ateni sua culmina en la sentenio ses de la eda comun. La piramide tre ia es construida entre la anios 550 e 800.

La strutur media ia es descovreda en la desenio de 1930, e on estima ce lo ia es creada entre 800 e 1000. On crede ce la plu grande ia es finida entre 1050 e 1300.

René Chávez Segura, un rexercor, ia comenta: "Lo sembla un pupa caxida rusce. Su la grande nos ave un plu e un plu."

Piramides ia es construida a interna de lunlotra per razonas diversa, incluinte la dejenera de la strutur o la ariva de un xef nova.

La piramide la plu peti ia es detetada par un tecnica noninvadente en cual on ia lumina la interna de la piramide per vide sua interna sin causa dana.

La descovre ta pote ofre comprendes nova sur la cultur maia orijinal, ante cuando lo ia intermisca con poplas de Mexico sentral.

En la anio pasada, arceolojistes ia trova ce la piramide Kukulkan ia es construida sur un de la rios suteran cual es comun en la rejion e ia es respetada par la maias.

En nosa tempo, Chichen Itza es un loca de erita mundal de Unesco e plu ca milion persones visita lo en cada anio.

2016-11-16

75 000 enfantes nijerian risca mori de famia

La Nasiones Unida dise ce sirca 75 000 enfantes en Nijeria norde-este risca mori de famia en la poca menses veninte.

Peter Lundberg, coordinor umaniste de la NU, ia dise ce intera 14 milion persones nesesa es aidada en un rejion cual ia es la fortres pasada de militaristes de Boko Haram.

El ia averti ce la reservas de la NU no sufisi per averti la crise.

Jihadistes de Boko Haram ia destrui la rejion ante deveni forsada a via par soldatos nijerian en menses resente.

"Presente nosa evalua es ce 14 milion persones es identifiada como nesesante aidas umaniste" ante 2017, Lundberg ia dise ier en Abuja, la capital de Nijeria.

El ia ajunta ce esta cuantia inclui sirca 400 000 enfantes, e ce 75 000 de los "va mori en la poca menses ante nos… si nos no reata rapida e seria".

Desuples de miles de persones ia es matada e plu ca du milion ia deveni deslocada pos cuando Boko Haram ia comensa sua operas militar en 2009 en la stato Borno e otra rejiones.

En julio, la Nasione Inida ia averti ce un cuatri de milion enfantes en partes de Borno sufri grave de malnuri.

2016-11-15

Un supraluna lumina la sielo

La luna ia veni plu prosima a la Tera ca a cualce otra tempo de pos 1948. Persones sirca la mundo ia asembla a locas famosa, sur plaias, o sur construidas alta per regarda lo.

La "supraluna" ia deveni la plu briliante en Asia a la sera de ier.

La luna ia ateni sua punto la plu prosima – a distantia de sola 356 509 cilometres – a 11:21 de ora universal.

Nosa satelite orbita la Tera en un elise, no un sirculo, donce a alga veses lo es plu prosima a la Tera ca a otras. Cuando la perijeo (la punto la plu prosima) e la luna plen coaveni, on nomi esta un supraluna.

La supraluna presente ia es la plu bon vidable en America Norde en la temprana de lundi, ante la leva de sol.

Supralunas pare plu grande par sirca 14% e plu briliante par 30% ca cuando la luna es a sua punto la plu distante en sua orbita.

La luna no va es denova tan prosima ante 25 novembre 2034, cuando lo va veni an plu prosima – a 356 445 cilometres.

On ia recomenda ce, per crea un bon foto de la luna, on inclui un monumento o otra punto de refere en la imaje.

2016-11-14

Du tremateras en Zeland Nova

Un trematera de fortia 6,3 ia colpa la Isola Sude de Zeland Nova, a mera oras pos un trema prima cual ia mata du persones.

La trema du ia aveni a 13:45 de ora local, con profondia de 10 cilometres, a norde-este de Christchurch.

Un trema de fortia 7,5, con la mesma profondia, ia colpa ja la mesma rejion a tempo corta pos medianote, provocante avertis de tsunamis.

Un rio grande, blocida par un lisca de tera, ia supraflue, enviante "un mur grande de acua" con la corente. On ia recomenda ce persones abitante sirca la Rio Clarence – un de la plu grandes sur la Isola Sude – vade direta a terenos plu alta.

Sentos de replicas sismica ia aveni ance, causante rompes de furni de eletrica e acua.

Autoriosas ia spende la note e dia en salva e sorti abitores longo la costa este.

Ondas de sirca 2 metres ia colpa la costa no longa pos la trema prima. On ia sutrae aora la averti de tsunami, ma recomenda ancora ce persones resta distante de la linia de costa.

Abitores de Christchurch e vilas ambiente ia compra rapida furnis fundal. Alga scolas en la rejion afetada ia resta cluida oji.

En Kaikoura, un destina popular per turistes, la strada xef ia deveni blocida par liscas de tera, con rompes de telecomunica, acua e eletrica. La militares e pompores ia envia ecipos en elicotores a la vila, e on sorti alga persones par aira.

Tre boves ia deveni encaliada sur un isola pico cuando la tera ensircante ia colasa prosima a Kaikoura.

La ministro xef, John Key, ia dise ce el crede ce la cuantia de mores va resta basa, e Gerry Brownlee, la ministro de defende sivil, ia comenta ce la problem la plu grande pare es la dana a la infrastrutur.

La trema ia es ance esperiada en Welligton sur la Isola Norde, do la distrito comersial sentral de la site ia es cuieta oji en cuando laborores ia move detrito e ia esamina construidas.

Christchurch recovre ancora pos un trematera en 2011 cual ia mata 186 persones e ia destrui la sentro de la site.

2016-11-13

Protestores oposa la cuantia de turistes en Venezia

Sentos de abitores de Venezia ia protesta contra la despopli rapida de esta site italian.

Protestores ia pende un avisa de la ponte famosa Rialto, e algas ia porta valises per simboli la nesesa de parti.

Persones local dise ce los deveni forsada a via par luas custosa, un manca de casas, e un crese de la cuantia de apartes luada a visitores a custas inflada.

La cuantia de abitores de Venezia ia cade a min ca 55 mil. En 1951, lo ia es sirca 175 mil.

Alga de la protestores ia es asetada par la ofisia de site e ia dise a pos ce los ia es corajida par la consenta.

Venezia es un site depintin sin autos, a lado de un lagon. La cuantia de persones en lo crese enorme en la dia, spesial en la saison presosa cuando 60 mil turistes visita a veses.

Plu temprana en esta anio, persones sur barcos peti ia atenta impedi ce un barcon de turi ariva a doca.

La maior de la site ia proposa imposta la turistes de un dia per aida contra la problem.

"Venezia perde mil abitores per anio," Matteo Secchi ia dise. El es la xef de la asosia cual ia organiza la protesta. "Nos deveni Pompeii, un vila a cual persones veni per visita e dise ce lo es merveliosa, ma nun abita ala."

2016-11-12

Juncker averti ce Trump risca turba relatas con la UE

Jean-Claude Juncker, la presidente de la Comision European, ia averti ce la eleje de Donald Trump risca turba "fundamental e strutural" la relatas entre la Uni European e la SUA.

"Nos va nesesa instrui la presidente elejeda sur lo cual Europa es e como lo funsiona," el ia dise a studiantes en Luxemburg.

El ia predise ce on va peri du anios en cuando Trump "turi un mundo cual el no conose".

Sua comentas ia contrasta con la reatas min forte de otra xefes de la UE.

En New York, Trump ia comensa formi la ecipo ci va gida el asta sua indui a 20 janero, cuando el va emprende la posto presidental en la Casa Blanca.

Juncker ia ofre ja sua lodas formal a Trump a martedi, en un declara juntada con Donald Tusk, la presidente de la Consilio European.

Ma parlante ier, el ia fa comentas como estas:

"Jeneral, la americanes ave no interesa a Europa."

"En la campania, senior Trump ia dise ce Beljia es un vileta a alga loca sur nosa continente."

"El leva demandas cual ta pote ave resultas danante, car el crea duta sur la alia transatlantica e donce la model sur cual la defende de Europa resta."

"El ave un opina sur refujadas e americanes nonblanca cual no refleta credes e sentis european."

En sua campania, Trump ia provoca alarma en la UE par sua critica forte de OTAN, la funda de la strutur defendal de Europa ueste, e par sua recomendas de relatas plu bon con Rusia.

Conserna ia es ance causada par sua promete de "cansela" la Acorda Climal de Paris en sua 100 dias prima de presidentia, par sua disposa protejiste sur comersia, e par sua comentas controversa sur minorias etnical e relijial.

An si xefes UE ia loda la republiciste sur sua vinse xocante contra Hillary Clinton, la canselor deutx Angela Merkel ia asentua en sua mesaje a el ce la SUA e Deutxland comparti "la valuas de democratia, libria, respeta per la rena de lege e dinia umana, sin relata a orijin, color de pel, relijio, jenero, orienta sesal, o crede political".

Deutxland, Frans, e Nederland va ave elejes en la anio veninte. Partitos popliste e estrema destriste atenta esplota la noncontentia sur la problem continuante de migrores en la UE e la recovre lenta par la eurozona de sua crise de deta.

2016-11-11

La taliban ataca un ambasada deutx en Afganistan

En la site Mazar-e-Sharif en Afganistan, un bomba umana ia puxa un camion contra la ambasada deutx, matante a la min du persones.

Reportas ia descrive un esplode enorme a la ambasada, segueda par fusilis.

Un ofisior de ospital ia dise ce plu ca 80 persones ia es ferida en la ataca, cual ia aveni sirca 23:00 de ora local.

La taliban dise ce lo ia esecuta la ataca en responde a colpas airal aliada en la plu temprana de esta mense cual ia mata nonmilitares en Kunduz, un site norde.

OTAN investiga acel, cual ia aveni cuando soldatos afgani ensircada par militaristes taliban ia clama per suporta airal. Tredes nonmilitares ia mori en la combate, multe en atacas airal.

La ambasada deutx es en un compleso murida en la sentro de Mazar-e-Sharif, la capital de la provinse Balkh. Deutxland ave cuasi 1000 soldatos en Afganistan, xef en acel provinse.

Un portavose per OTAN ia dise ce on ave "dana vasta" a la embasada. Soldatos OTAN es en la construida, preparante per sorti sua empleadas.

A la min un auto pacida con esplodentes ia es puxada contra la muron sirca la compleso. On investiga ance esce un plu bomba de auto ia es ance usada.

Reportas en redes sosial dise ce elicotores vola supra la compleso e ambulansias freta tra la site.

La ataca ia aveni a media de un situa malinte de securia en Afganistan. En otobre, militaristes taliban ia prosimi a ocupa Kunduz ante cuando on ia forsa los a via.

2016-11-10

La eleje de Trump provoca protestas

En la SUA, miles de persones ia protesta sur la stradas de sites diversa contra la eleje de Donald Trump. Multe ia cria la slogan "No mea presidente". Otras ia arde pupas de la comersior.

Trump va deveni la presidente 45 de la pais, pos gania un vinse surprendente contra Hillary Clinton.

El va consenta con Barack Obama, la abitor presente de la Casa Blanca, per discutes sur reali un traversa nonproblemosa.

Obama – ci ia descrive Trump como "nonconveninte" per la posto e ci ia campania contra el – ia recomenda forte ce tota persones SUA aseta la resulta de la eleje a martedi. "Tota de nos anela aora sua susede en uni e gida la pais," el ia dise.

Clinton ia informa ance sua suportores ce on debe dona la "posiblia de gida" a Trump.

Iniorante esta, protestores ia asembla tra la pais. En New York, miles ia protesta estra Trump Tower, atacante la politicas de la elejeda sur migra, diretos ge, e diretos reprodual. Des-sinco persones ia es arestada.

En Oakland, California, protestas ia es jeneral pasosa, ma alga persones ia rompe fenetras de botecas e ia lansa misiles a polisiores de tumulta, ci ia responde con gas lacrimojen.

Un asembla contra Trump ia clui un autovia major en Los Angeles, e un otra en Portland, Oregon. En Chicago, folas ia bloci ia entra a Trump Tower, cantante: "No Trump, no KKK, no faxistes SUA".

Protestas ia aveni ance en Philadelphia, Boston, Seattle, e San Francisco, entre otra sites.

En sua parla de vinse en la oras temprana de ier, Trump ia promete "lia la feris de divide" pos un compete amarga per votas, e es "presidente per tota americanes".

La presidente elejeda va es acompaniada a la Casa Blanca a esta matina par sua sposa, Melania, ci va consenta ala con Michelle Obama.

Presidente Obama, ci ia espresa sua bonvole a sua seguor en un telefoni ier, ia dise ce lo es "no secreta" ce el e Trump ave diferes major. Ma el ia ajunta ce "tota de nos desira lo cual es la plu bon per nosa pais" e ce el es "corajida" par lo cual el ia oia en la parla de Trump a la note presedente.

La ecipo traversante per la periodo de des semanas asta la indui de Trump va es dirijeda par Chris Christie, la governor de la stato New Jersey.

Trump, ci ia ocupa nunca un posto elejeda a ante, ia dise ce sua consernas prima va es la restora de la infrastrutur de la pais e la dupli de sua crese economial.

Como presidente elejeda, Trump ave la direto de reseta la mesma reporta dial como Obama, incluinte informas sur operas secreta e otra datos colieda par la 17 departes de securia de la SUA.

2016-11-09

Un vinse xocante per Donald Trump

Donald Trump va deveni la presidente 45 de la SUA pos un vinse nonprevideda contra sua oposor democrata Hillary Clinton.

La vinse de la aspiror republiciste ia es realida par un cuantia peti de statos pivotin, an pos menses de sondas cual ia favore Clinton.

La statos Florida, Ohio, e Carolina Norde ia abri la via per sua vinse surprendente.

Indises asionerial ia cade multe: la Dow Jones ia comensa la dia con un redui de 800 puntos.

La vinse projetada par Trump en la stato Wisconsin ia dona a el plu ca la 270 puntos de vota nesesada per gania la Casa Blanca.

La presidente futur, ci ave 70 anios, ia asende la stadio a sua asembla de vinse en New York, disente: "Me veni de reseta un telefoni de secretor Clinton. El ia loda nos sur nos vinse. Esta es la ora cuando nos debe asembla como un popla unida."

La maniate de imobila, stela pasada de televisa de realia, e politiciste nova – ci ia es vasta burlada cuando el ia declara sua intende de compete en junio de la anio pasada – ia comenta ce sua vinse ia es "difisil".

Clinton, ci ave 69 anios e ia sonia deveni la presidente fema prima de la SUA, no ia apare a la aveni cual on ia prepara como un asembla de vinse en Manhattan.

La democratas ia fali ance prende la controla de la Salon alta de la republicistes, ci ia reteni sua majoria en ambos salones de la Congresa.

A mera oras pos la clui de voterias, Clinton ia sufri ance defetas grande en statos como Pennsylvania e Iowa, do no republiciste ia vinse pos 2004.

En la statos Nova Hampshire e Michigan – cual ia formi un parte de la "parafoco" de Clinton – la resulta es ancora tro difisil per predise.

Trump, un bilionor popliste, ia provoca controversia en sua campania par causa de sua comentas sur femes, muslimes, e un projeta de construi un muron longo la frontera entre la SUA e Mexico.

La campania de Clinton ia es impedida par investigas par la FBI sur esce el ia maltrata informas secreta de governa per opera un servador privata de eposta en sua tempo como ministro de internas.

Trump e Clinton ia compete per segue Barack Obama, un presidente democrata. Pos du periodos de cuatro anios en la Casa Blanca, el ia es proibida par la constitui de la SUA de ofre se per reeleje.

2016-11-08

Un strada japanes cade en un buco

A esta matina, un dolina jigante ia engoli un strada de sinco bandas en la sentro de un de la sites la plu grande de Japan.

La colasa ia comensa a sirca 05:00 de ora local, prosima a la stasion Hakata, la plu ativa en la site Fukuoka sur la isola sude Kyushu.

Lo ia comensa con du bucos plu peti cual ia crese constante asta cuando los ia formi un depresa enorme con largia de sirca 30 metres.

On ave no reportas de feris grave, ma la situa ia disturba eletrica, acua, gas, e transporta en la rejion.

La difusor NHK ia reporta ce un fem vea ia cade sur un scalera par causa de la rompe de eletrica.

Ofisiores ia dise ce la apare subita de la dolina es cisa relatada con laboras per estende un linia prosima de la metro.

2016-11-07

La FBI desculpa Clinton, e Trump protesta

Donald Trump ia acusa la FBI de malcondui pos cuando lo ia desculpa denova sua oposor Hillary Clinton de atas criminal en relata con sua epostas.

La dirijor de la FBI ia dise ce un investiga nova de la comunicas par la aspiror democrata ia trova no cosa cual cambia la conclui ja fada par la departe a esta estate.

La campania de Clinton ia descrive se como "felis" ce la problem persistente ia    es reposada.

Esta verje dramosa ia leva un nube de sur sua campania ante la dia final de la corsa maratonin de la eleje SUA. Ier, la sondas la plu resente de opina, ante la anunsia par la FBI, ia dona un vantaje de cuatro o sinco persentos a Clinton supra Trump.

La nominada republiciste ia protesta forte pos aprende la deside par la departe de securia. A un asembla en la suburbes de Detroit, Trump ia insiste ce lo ta es nonposible ce la FBI revista un cuantia tan grande de epostas (reportada como 650 mil) en tempo tan corta.

"Aora el es protejeda par un sistem frodosa. Lo es un sistem intera frodosa. Me ia dise lo tra tempo longa," el ia dise a suportores en Michigan. "Hillary Clinton es culpable, el sabe lo, la FBI sabe lo, la popla sabe lo, e aora la taxe de la popla american es furni justia a la caxa de vota a 8 novembre."

An si Clinton mesma no ia parla sur la letera de la dirijor de la FBI sur sua curso de campania, sua ecipo ia dise ce lo ia fida sempre ce el va es desculpada.

En Nova Hampshire ier, Clinton ia dise ce la pais fronti "un momento de compete" e ce americanes debe eleje entre "divide e unia".

En julio, la FBI ia dise ce el ia es "estrema nonatendente" en trata informas secreta a un servador privata de eposta cuando el ia es la ministro de internas entre 2009 e 2013, ma lo ia trova no indica ce el ia fa un crimin.

An tal, a 11 dias ante la vota, James Comey, la dirijor de la FBI, ia turba la concurso par anunsia ce on va investiga un grupo nova descovreda de epostas de Clinton.

La malsurprende ia furia la partito de Clinton, ma ia lansa un corda de salva a la campania de Trump cual ia retrosede en la sondas.

En un letera a la Congresa ier, Comey ia dise ce sua investigores ia "labora sirca la orolojo" sur la epostas la plu resente, cual ia es trovada par un investiga separada en la temprana de otobre.

Lo pare ce la mesajes ia es descovreda en un computador portable parteninte a la sposo distantida de un de la conselores la plu prosima de Clinton, la congresor pasada Anthony Weiner, ci on acusa de envia mesajes nonlegal a un xica de 15 anios.

Comey ia dise ce investigores ia trova no razona per cambia la judi plu temprana par la FBI ce Clinton no debe es formal acusada per sua trata de informas secreta.

Ofisiores de governa ia dise ce investigores ia serti ce la epostas nova trovada es o personal o duples de corespondes cual los ia esamina ja a ante.

Harry Reid, la xef democrata en la Salon alta, ia dise ce la conclui par Comey "sulinia la nonfidablia" de la anunsia sur Clinton par la dirijor de la FBI a la Congresa en la tarde de la mense pasada.

Ambos aspirores va fa oji un turi rapida de la statos xef de batalia, ancora corsante per votas a la momento final.

2016-11-06

Bales jigante de neva en Sibir

En Sibir norde-ueste, persones en la Golfo Ob ia vide un vista strana e bela cuando miles de bales de neva ia formi natural sur la plaia.

Un estende de 18 cilometres de costa ia deveni covreda par sferas jelada. La formas varia de la grandia de un bal de tenis asta cuasi un metre de diametre.

Los resulta de un prosede ambiental rara en cual pesos peti de jelo formi, deveni rolada par venta e acua, e fini como bales jigante.

Abitores de la vileta Nyda, a la Penisola Yamal direta a norde de la Sirculo Artica, dise ce los ia vide nunca un cosa comparable.

La Instituida de Rexerca Artica e Antartica ia esplica: "Normal, on comensa con un fenomeno natural prima: jelo partal dejelada. A pos, on ave un combina de la efetos de la venta, la forma de la tereno costal, e la state de temperatur e venta. Lo pote es un combina tan orijinal ce sua resulta es la formi de bales como estas."

On ia vide un fenomeno simil en la Golfo de Suomi en desembre 2014, e sur Lago Michigan en desembre 2015.

Pitures de la bales ia encanta rusces enlinia. Un bromor ia comenta: "Pronto la penisola va es invadeda par nevosauros bebe!"

2016-11-05

Violentia a un asembla en Jakarta

Joko Widodo, la presidente de Indonesia, ia cansela sua visita a Australia pos scaramuxas violente a un asembla en Jakarta en cual miles de muslimes noncomprometente ia partisipa.

Widodo ia culpa "atores political" de esplota la situa en cuando protestores ia protesta contra la governor de Jakarta.

La protestores acusa Basuki Tjahaja Purnama, un cristian, de insulta la Curan, la libro santa de islam.

La violentia ia mata un person e ia feri 12.

"Nos deplora la aveni," Widodo ia dise en cuando el ia demanda per calmia a la stradas de la capital de la pais.

En un declara oji, Malcolm Turnbull, la ministro xef de Australia, ia confirma ce la presidente indonesian ia pospone sua visita.

La polisia indonesian ia usa gas lacrimojen e canones de acua per vinse protestores ci ia refusa parti pos la preas de venerdi, en cuando los ia asembla sirca la palasio presidental.

La polisia ia es ja preparada per la posible ce tensas relijial o razal va eruta a la asembla, a cual on estima ce sirca 50 mil persones ia es presente.

La aveni ia es xef pasosa, ma grupos de protestores coler ia combate la polisia pos la noti, ensendente veculos.

Grupos muslim ia acusa Purnama de insulta islam cuando el ia dise ce sua oposores ia usa un strofe de la Curan per engana votores. La strofe implica ce muslimes debe no eleje nonmuslimes como sua xefes.

On ia aveni la protesta per esije la prosede legal de Purnama per blasfema. El ia demanda per pardona, ma cexas formal ia provoca un investiga par la polisia.