2018-08-31

Astronautas repara un gotea en la stasion orbitante

Astronautas en la Stasion Spasial Internasional (SSI) responde a un gotea de aira cual ia resulta cisa de un colide. On ia trasa la gotea a un buco peti en un capsula usada per trae un ecipo nova en junio.

On crede ce la dana ia es causada par la colpa de un frato de roca volante tra la spasio a rapidia alta – un micrometeorite. La controlores de mision en Houston e Moscva dise ce la ses ecipores de la laboreria orbitante no es en peril.

Tal colpas es sempre un menasa per la SSI. Lo ia es construida per es capas de tolera un bombarda constante de fratos de polvo.

La controlores ia es avertida sur la problem par sensadores de la presa de aira en la stasion. La astronautas ia es alora dorminte, ma cuando los ia leva per sua labora a martedi, los ia debe xerca la gotea.

Los ia trova lo en la veculo Soiuz rusce, en cual on ia trae tre ecipores a la stasion a 8 junio. Entre los ia es Alexander Gerst de Deutxland, ci va prende la posto de comanda.

Gerst ia confirma la presentia de la buco par pasa sua dito supra lo. On ia reali direta un repara, usante un selinte e un banda per covre la buco, sur cual on dise ce lo ave un diametre de du milimetres.

La astronautas labora aora con injeniores sur la tera per evalua esce on nesesa un repara plu durante.

Gerst, como ance Serena Auñón-Chancellor de la SUA e Sergei Prokopiev de Rusia, va usa la mesma veculo Soiuz per revade a la Tera a la fini de la anio.

2018-08-30

Un dirijor beljes de aser rusce mori par cade

Un dirjior beljes ci ia labora per un compania rusce de aser ia mori pos cade de un construida de nove niveles.

Dr Bruno Charles De Cooman ia es la vispresidente per rexerca e developa a NMLK (Aser Novolipetsk). On ia trova sua corpo pos cuando el ia cade de un construida de apartes en la Strada Serafimovitx, prosima a la Cremlin en Moscva.

La razona per la cade es nonclar, ma la polisia investiga.

La compania NLMK ia confirma la mori de De Coonan en un declara formal, e ia envia compatia a sua amadas. La jigante de aser ia esplica ce lo "no va comenta sur la detalias de la trajedia ante clari tota la situa".

NLMK es entre la companias la plu grande de aser en Rusia, e es poseseda par Vladimir Lisin, un oligarca e un de la omes la plu rica en la pais.

Resente, Lisin ia perde $832 en asiones – cisa 4% de sua fortuna – cuando la conselor economial xef de presidente Vladimir Putin ia proposa aumentas de imposta a companias de mina.

La aidores de Putin ia dise ce on va usa la revenu de imposta per finansia un crese prometeda de spende sosial. Lisin es un criticor fote de la projeta.

2018-08-29

Un fem enganada a sposi un om nonconoseda

Un fem de Hongkong ci ave 21 anios dise ce el ia es enganada per sposi un om nonconoseda sur Xina continental, cuando el ia partisipa en un sposi "finjeda".

El dise ce on ia informa el ce el debe fa la rol de un sposa nova en un sposi simulada, como un parte de sua aprendes per deveni un organizor de sposis. En la rituo, el e la om ia suscrive un documento vera de sposi.

La fem ia comprende ce el es vera sposida sola pos revade a Hongkong, do el ia xerca aida legal. La polisia local no ia pote aida, car atestas ia manca ce un crimin ia aveni, donce el ia vade a la Federa de Sindicatos de Hongkong.

En maio, la fem, de ci on no ia publici sua nom, ia vide un anunsia en Facebook per un stajia de artiste de macia. Ma pos presenta se per la rol, la compania ia convinse el a segue un curso de organizor de sposis en loca.

On ia dona a el un semana de instrui sin custa en Hongkong, pos cual on ia dise ce, per susede la curso, el nesesa partisipa en un sposi finjeda en Fuzhou, un provinse xines. En julio, el ia suscrive un documento de solisita de sposi en un sentro de governa local.

La compania ia dise a el ce la sposi va es nonvalida a pos. Ma pos sua reveni a Hongkong, un de la otra persones en sua clase ia convinse el ce la situa es un engana.

La fem resta sposida per la presente, e va debe cisa solisita un divorsa. Lo no es clar ci es la om ci el ia sposi, o esce la om ia vade a Hongkong a pos.

Tong Kamgyiu, dirijor de la Comite de Diretos e Beneficas de la Federa de Sindicatos, ia dise: "Esta es un forma nova de sposi frodosa. Me senti deludeda e no pote crede ce lo aveni an en Hongkong moderna. On ia esplota la fem cuando el ia sabe no cosa sur la situa. Sua perde la plu grande es ave un rejistra de sposi, e lo ia causa un dana psicolojial a el."

En cada anio, la polisia de Hongkong vide, per promedia, mil casos de sposi frodosa cual traversa la frontera. Abitores de Xina ci es sposida a un person de Hongkong pote solisita abita mesma en la site.

2018-08-28

Trump anunsia un acorda comersial con Mexico

La SUA e Mexico ia acorda alga termas major de comersia, en cuando la presa aumenta per completi un renegosia de la Trata de Comersia Libre de America Norde.

Donald Trump, presidente de la SUA e un criticor frecuente de la acorda esistente, ia anunsia ier esta avansa parente.

La resulta final resta en duta, e Canada, la pais tre en la trata, va rejunta se a la negosia oji.

Trump ia inisia un anio de discute cuando el ia menasa retira la SUA de la trata. El ia esije ce on renegosia la acorda de 1994, cual el culpa per un declina de empleas fabricante en la SUA, spesial en la industria de autos.

Asiones SUA ia crese e la peso mexican ia forti a la anunsia de la resulta inisial a lundi.

2018-08-27

Uber va consentra a bisicles

La compania Uber dise ce lo intende consentra plu a bisicles e patinetas eletrical, e min a autos, an si esta risca redui sua profita.

La xef, Dara Khosrowshahi, ia dise ce modos de transporta individua conveni plu a viajas en sites. El previde ance ce persones va fa viajas plu frecuente ma plu corta en la futur.

La compania de taxis compartida ia investi a companias diversa de bisicle en la anio pasada. Sua bisicles eletrical es aora disponable en oto sites en la SUA, incluinte York Nova e Washington, e va es lansada a mercato en Berlin pos tempo corta.

Lo ia junta se ance con Lime, un compania de patinetas eletrical, e ia negosia acordas en otra mercatos como la transporta publica e la move de carga.

Khosrowshahi ia confesa ce Uber reseta min mone de un bisicli ca de la mesma viaja par auto, ma ia sujesta ce la difere va es reduida car clientes va usa plu comun la ap per viajas plu corta. El ia aseta ce la taxistes de Uber risca perde par la projeta, ma ia dise ce los va pote benefica futur de viajas plu longa par auto.

Uber, cual ia perde mesma $4,5 mil milion en la anio pasada, senti un presa per boni sua finansia ante ofre sua asiones per compra. La revenu de sua taxis crese, ma lo ia perde ance multe par causa de la custa de estende a mercatos nova, como la comparti de bisicles e ia trae de comedas.

Ance un presa par regulores menasa la crese de la compania. En esta mense, per trata la conjesta, York Nova ia vota per pone un limita tempora a la cuantia de lisensas nova per veculos funsionante como taxis, e la maior de London ia dise ce el vole ajunta restrinjes simil.

2018-08-26

La malsonia la plu mal de contrabandores de ivor

Un tecnica nova permete ce canes deteta la odor de ivor, corno de rinosero e otra cosas simil, ascondeda en contenadores de transporta, usante mera un sample pico de aira. On proba la metodo a la porto Mombasa en Cenia, sur cual on dise ce lo es la sentro la plu ativa per contrabanda de ivor en Africa.

Longo un reporta, on ia saisi plu ca 18 mil cilogrames de ivor a la porto entre 2009 e 2014. Per furni un tal cuantia, la reporta sujesta ce cisa plu ca 2400 elefantes ia mori – e esta pertine sola a la ivor cual on ia deteta.

Ma canes ave un capasia stonante de ole, e los pote deteta an cuantias pico en un contenador enorme de 10 metres.

En la sistem nova, alga aira es sucada de un contenador e pasada tra un filtro. On presenta esta filtro a un can spesial instruida, ci senta se si el ole cualce cosa suspetosa: no sola ivor, ma ance otra produidas nonlegal de animales, plantas e lenio.

La scema permete ance ce la canes esamina plu de la sirca 2000 contenadores cual pasa tra la porto de Mombasa en cada dia. A ante, la canes ia debe visita direta la contenadores, cual ia es un taxe difisil su la sol de Africa este.

An si lo ia consuma tempo, la metodo nova ia resulta 26 saisis susedosa en mera ses menses, furninte informa esensal sur la redes criminal cual gania profitas vasta de la comersia nonlegal.

On trova se ancora en un corsa contra la tempo, car on estima ce no plu ca sirca 25 mil rinoseros negra e blanca resta en esiste. Sola en Sudafrica, plu ca mil rinoseros ia es matada par xasores en la anio pasada. E en cada dia, sirca 55 elefantes african es matada per sua ivor.

2018-08-25

Bemba no pote aspira la presidentia de RD Congo

La comision elejal de la Republica Democrata de Congo ia dise ce Jean Pierre-Bemba, un comandor militar pasada de la pais, no pote aspira deveni la presidente seguente de la pais.

Bemba ia es un de ses aspirores sur ci on ia judi ce los es noncualinte, pos oras de discute. Esta xef pasada de rebelores ia es descondenada de crimines de gera en junio, ma la comision ia dise ce el no es elejable par causa de un otra condena par la Corte Criminal Internasional per sua soborna de atestores.

Bemba, ci ia revade a la pais a la comensa de agosto pos des-un anios como un escluida o prisonida, apela presente contra acel condena.

On intende ce la vota en esta anio va eleje un seguor per presidente Joseph Kabila, de ci sua periodo du e final ia fini ofisial a du anios ante aora. La alia governante ia nomina Emmanuel Ramazani Shadary, un ministro pasada de internas, como sua aspiror.

En soma, 25 persones ia proposa sua nomes, incluinte Antoine Gizenga e Adolphe Muzito, du ministros xef pasada, sur ci on ia judi ce ance los no pote aspira la presidentia.

Partitos oposante ia cexa sur la deside par la comision elejal an ante sua anunsia, acusante "la rena presente" de atenta "supresa la prosede elejal".

La escluidas, incluinte Bemba, ci es un de la oposores la plu temeda de presidente Kabila, pote apela contra la deside nova. On va publici la lista final de aspirores en setembre.

2018-08-24

La ministro xef de Australia es desponeda

Scott Morrison va deveni la ministro xef nova de Australia pos la despone de Malcolm Turnbull par sua oposores en un compete per la posto. Turnbull ia perde la suporta de sondas, e ia esperia lo cual el ia descrive como "un rebela" par otra parlamentores.

En un vota interna, Morrison, la tesoror, ia gania 45 votas contra la 40 per sua oposor la plu forte Peter Dutton, un ministro pasada de internas.

Con un eleje prosima, parlamentores ia es nervosa sur la suporta debil per la governa en sondas de opina, e par causa de defetas resente en elejes partal.

En la semana pasada, un disputa sur politica de enerjia ia ensende un tensa cual esiste ja longa entre la moderada Turnbull e la ala conservaliste de sua partito. A martedi, Dutton, un conservaliste, ia defia el sin susede, ma la marjin peti de sua defeta ia tisa plu la situa.

Morrison ia entra a la compete cuando Turnbull ia perde alga suportores major. Turnbull ia acorda resinia cuando un majoria de parlamentores ia urje la abri de la posto de ministra xef per reeleje – un situa nomida "spill" (malversa) en engles australian.

Multe persones ia descrive esta semana como un de la plu caososas en la istoria political de la pais. En sua confere jornaliste final, Turnbull ia descrive la semana como "fol", ma ia grasia sua colaborores per eleje Morrison e no Dutton.

En la des anios pasada en Australia, tre otra ministros xef ia es ance desponeda par oposores en la mesma partito. An no un ministro xef en la eda resente ia susede completi sua periodo como ministro xef, partal car elejes aveni tan frecuente (a un ves en cada truple de anios) e donce persones nonpopular en la pais o en sua partito es rapida sacrifiada.

En la sistem australian, la ministro xef no es direta elejeda par votores, ma es simple la gidor de la partito o la alia cual ave la majoria de membros de parlamento.

2018-08-23

Un tecnica nova per comunica de su acua

Rexercores a MIT (la Instituida Tecnolojial de Massachusetts) ia developa un metodo par cual sumarinas pote comunica con aviones.

A presente, aviones no pote fasil deteta siniales de sonar de su la mar, car estas refleta de la surfas de la acua e penetra rara. La rexercores ia trova ce radar de frecuentia estrema alta es capas de deteta ondetas pico en la acua, creada par un parlador suacuan comun.

Sumarinas comunica usante ondas de sonar, cual move bon sola su la acua, e aviones comunica par siniales de radio cual no move bon en acua. Per envia mesajes, sumarinas pote veni a la surfas, ma esta risca revela sua loca. A veses, on usa boias per reseta siniales de sonar e tradui los a radio.

La sistem developada a MIT usa un parlador suacuan per dirije sonar direta a la surfas de la acua, creante ondetas pico con altia de sola alga micrometres. Radar supra la acua pote deteta estas e redesifri los a mesajes.

La rexercores ia proba la idea en un pisina e ia susede reseta la mesajes suacuan. An tal, la sistem pote spende un tempo longa en envia un cuantia grande de informa, e lo no funsiona bon si la acua conteni ondas plu alta ca 16 sentimetres.

Lo es ance un sistem de sola un dirije: la avion no pote envia mesajes a la sumarina. Ma on espera developa algoritmos capas de elimina la "ruido" de un mar ondosa per isoli la ondetas de sonar.

En futur, la tecnica va pote aida aviones o avionetas a deteta ance la loca de rejistradores perdeda, de la spesie nomida "caxas negra".

2018-08-22

Venezuela es paraliseda par sua mone nova

Venezuela ia sesa funsiona ier en atenta comprende sua sistem de mone nova introduida. Miles de companias ia clui per ajusta se a la "bolivar suveran", e multe laborores ia resta a casa.

Presidente Nicolás Maduro ia inisia la biletas nova a lundi, revaluante e renominte la bolivar esistente, e declarante la dia como un festa nasional. La governa dise ce la mone nova va doma la problem de infla noncontrolable, ma oposores sujesta ce lo va mali an plu la crise.

La mone nova sutrae sinco zeros de la "bolivar forte" vea. Per esemplo, un taso de cafe cual ia custa 2,5m bolivares forte a ante ave aora la custa de sola 25 bolivares suveran. An tal, persones en la capital, Caracas, cexa ce los pote retira no plu ca 10 bolivares suveran de automatas de banco.

An la mercato negra de dolares ia es parada par la cambia de mone.

La governa ia anunsia alga otra cambias economial per acompania la biletas nova, incluinte un aumenta enorme de la salario minima, un crese de la imposta de valua ajuntada, e un redui de la suporta jenerosa per carburantes.

Maduro ia dise ance ce la bolivar nova va es liada a la petro, un mone virtual sur cual la governa dise ce lo es liada a la reservas de petrolio de la pais. La SUA ia proibi sua sitadanes de comersia con petros, e un pajeria de criptomone descrive la petro como an "frodosa".

Ance ier, Venezuela ia es secuteda par un trematera major longo la rejion de sua costa norde. On ia senti lo en Caracas, do multe de la construidas ia es evacuada. Sismolojistes venezuelan ia rejistra un trema de grado 6,3, con episentro en la este de la pais. On no reporta ce persones ia mori.

2018-08-21

Un aparato radioativa manca en Malaisia

En Malaisia, on xerca un aparato radioativa cual ia desapare de un camioneta en la parte plu temprana de esta mense. On dise ce la sustantia en la aparato radiografial ta sperde un contamina perilosa si on ta desasembla lo en modo nonconveninte.

On teme ance ce persones malvolente ta pote usa lo como un composante de bomba si los ta oteni lo.

La ojeto mancante es usada en radiografia industrial. Lo ia parteni a un organiza cual fa probas, ajustas e esaminas per companias de petrolio e gas.

La tubo grande, con manico, cual pesa 23 cilogrames, ia es usada per deteta fesures en metal. Lo conteni la isotopo radioativa iridio-192, cual pote causa feris permanente si on manipula lo per an alga minutos, e pote mata si on es prosima a lo tra oras o dias.

Un problem simil ia aveni en la anio pasada, e on ave no informa ance sur la loca de acel aparato.

La aparato ia es portada en retro de un camioneta en la capital malaisian, Kuala Lumpur. On ia usa lo a un loca a la borda de la site, ante move lo a un otra loca. Cuando los ia ariva, la gidores de la camioneta ia descovre ce la aparato manca. On ia interoga la du omes ante relibri los.

On divina ce algun ia fura la aparato o ce lo ia cade de sur la camioneta movente. La polisia ia inisia un investiga. La governa ia confirma la aveni ma insiste ce "tota es en controla".

2018-08-20

Reunis per familias separada par la Gera Corean

Un grupo de tehanes vea ia ariva en Txoson per encontra relatadas ci los no ia vide pos la Gera Corean de 1950–53.

La gera ia divide la Penisola Corean, e persones abitante a la lado norde no ia pote parti. La du Coreas, ancora tecnical en gera, ia organiza reunis a ante, ma esta es la prima en tre anios.

Sento persones ia es elejeda par cada lado per partisipa en la reuni. Alga ia renunsia pos descovre ce la relatadas ci los ia espera vide no vive plu. En soma, on va ave 83 persones de la Norde e 89 de la Sude.

La gera ia separa miliones de persones de sua familias, e esta reunis corta va es probable la ves final cuando multe va vide lunlotra.

Tra la anios, a tempos de calmia relativa, la du Coreas ia organiza ce grupos elejeda visita lunlotra. On ia fa esta a 20 veses en la 18 anios pasada. La reunis pasada entre frates e sores, enfantes e jenitores, e sposas e sposos ia es esperias estrema emosiosa.

La tehanes viaja par bus a traversa de la frontera gardada, asta la vacanseria de la montania Kumgang. Los va pasa tre dias en Txoson, ma va es con sua relatadas per sola alga oras en cada dia: sola 11 oras en soma. La plu de sua visita va es forte supravideda.

Multe de los trae donadas como vestes, medisin e comedas per sua relatadas en Corea Norde, un pais multe plu povre. Alga dotores e ospitalores viaja con la grupo per institui un sentro medical per la partisipores vea.

La aveni, fasilida par la Crus Roja, es la resulta de un encontra entre la xefes Kim Jong-un de Txoson e Moon Jae-in de Tehan a la frontera en april. Los ia encontra lunlotra a ves du en maio, cuando los ia acorda recomensa la reunis. On previde ce los va fa un plu encontra en la semanas veninte.

2018-08-19

Un caso de un peso de ceso en un vaso

On ia trova ce un sustantia trovada par arceolojistes en un tomba antica egipsian es un ceso estrema vea.

A alga anios ante aora, un ecipo ia descovre jares rompeda en la tomba de Ptahmes, un ofisial egipsian major. En un de la vasos, los ia trova "un masa blancin e solidida". Los ia suspeta ce lo es un comeda, ma no ia sabe de cual spesie.

Aora un studia ia identifia lo como ceso de 3200 anios ante aora. La descovre es importante car on ia ave no indicas presedente de la produi de ceso en Egipte antica.

La ceso ia es xef composada de lete de ovea e capra, e ia ave probable un sabor multe asida.

La rexercores ia trova ance trasas de un bateria capas de causa un maladia comunicable, nomida bruselose, cual resulta de come produidas nonpasteurida de leteria. La maladia esiste ancora oji, e sua sintomes inclui febres, suis e doles de musculos. Si on confirma la bateria, lo va es la atesta la plu vea de un tal caso.

La tomba, a la necropoli Saqqara prosima a Qahira, ia parteni a un maior de la site antica Memfis. On ia desentera lo a la ves prima en 1885. Pos deveni perdeda su arena, lo ia es redescovreda en 2010.

2018-08-18

Inondas grave en Barat sude

Narendra Modi, la ministro xef de Barat, ia vola supra alga de la inondas en la stato sude Kerala cual ia mata ja 324 persones. El ia discute ance con ofisiores major la metodos de responde a esta inondas, la plu graves en la stato en un sentenio.

Plu ca 200 mil persones es sin casa, e sentos es encaliada sur tetos. Soldatos e elicotores partisipa en un labora enorme de salva.

Semanas de pluve ia causa liscas de tera e inondas, de cual on previde plu. On predise ance ventas forte per oji e soldi. Tra la pais, cuasi mil persones ia es matada en esta saison pluvosa, cual ia comensa en junio.

Elicotores ia trae furnis de crise a multe locas, e on ia envia ance trenes spesial cual porta acua bevable.

Partes de Kochi, la capital comersial de Kerala, es su acua, conjestante la stradas e lasante ferovias en state nonusable. Alga cultiverias ia deveni inondada, perilinte la industrias local de cauxo, te, cafe e spises.

On ia clui scolas en tota 14 distritos de la stato, e alga distritos ia proibi turistes par causa de consernas sur securia.

Lo es normal ce Kerala ave un de la cuantias la plu alta de pluve en la saison de monson, ma la Departe Meteolojial de Barat dise ce lo ia reseta 37% plu pluve ca usual pos un periodo de presa basa supra la rejion.

Siensistes de ambiente culpa ance la desforesti, spesial un fali de proteje montanias ecolojial frajil.

Pinarayi Vijayan, la ministro xef de la stato, ia dise ce la situa ia es malida par governas visina. Plu temprana en esta semana, el e sua corespondente en la stato Tamil Nadu, ia disputa publica sur la relasa de acua de un parario.

Kerala ave 41 rios fluente a la Mar Arabi, e on reporta ce 80 de sua pararios es aora abrida pos deveni supracargada.

2018-08-17

Empleadas critica Google sur un xercador sensurante

Sentos de empleadas de Google ia scrive a la compania per protesta contra la intende de crea un "xercador sensurante" en Xina.

Los dise ce la projeta leva "demandas urjente moral e etical" e ia urje la compania a deveni plu transparente. "A presente, nos no ave la informa nesesada per fa desides etical informada sur nosa labora," los ia ajunta.

Google, cual ia parla nunca publica sur esta projeta, ia refusa comenta.

La compania ia abandona Xina a oto anios ante aora, protestante contra la leges de sensura e alegas de sibercrimines par la governa de la pais. Ma reportas en la mense pasada ia sujesta ce lo ia labora secretosa sur un servi nova de xerca xines, interna nomida Dragonfly ("libela").

La plataforma, cual ancora no ia reseta la aproba de la governa xines, bloci alga locas de rede, como ance xercas sur consetas como diretos umana e relijio.

Esta ia coleri alga empleadas ci teme ce los ia labora nonsabente sur tecnolojia cual va aida Xina a supresa la espresa libre. En sua letera, cual los ia comparti a organizas jornaliste diversa, los dise ance ce la xercador sensurante contradise la frase "no es malvolente" en la codigo de condui de Google.

Lo no es la ves prima cuando empleadas de Google ia oposa publica la desides de la compania. En April, miles de empleadas ia critica sua labora sur un program militar esuan per developa intelijentia artifis per avionetas. A pos, Google ia fini sua acorda con la Pentagon.

La cuantia de usores de interede en Xina es la plu grande de mundo, ma companias esuan de tecnolojia ia encontra difisiles en susede en Xina par causa de restrinjes e blocis de contenida. Facebook, Google, Twitter e Instagram es proibida, ma Google ave ancora tre ofisias en la pais.

2018-08-16

Un campania per jornalisme libre

Plu ca 300 organizas jornaliste en la SUA va inisia oji un campania de jornalisme libre per oposa atacas par presidente Donald Trump.

En la semana pasada, la jornal Boston Globe ia recomenda un denunsia nasional de la "gera susia" par la presidente contra jornalisme, usante la eticeta #EnemyOfNone ("enemi de nun").

Trump ia burla reportas jornaliste como "novas falsa" e ia ataca jornalistes como "enemis de la popla". Espertas en la SUA ia dise ce esta aumenta la risca de violentia contra jornalistes.

Boston Globe ia promete scrive un editorial "sur la periles de la ataca governal a jornalisme" a 16 agosto, e ia solisita ce otra jornales fa simil. Jornales nasional major e locales plu peti ia promete reata, como ance publicis internasional como la jornal Guardian, con base en London.

Acel jornal brites scrive en sua editorial ce Trump es la presidente prima "ci pare ave un politica calculada e coerente de sumina, deslegali e an perili la labora de jornalistes."

Su la titulo "La jornalisme libre nesesa tu", New York Times ia descrive la atacas par Trump como "perilosa per la sangue animante de democratia," e ia ajunta estraedas de desuples de otra publicis a su.

En sua propre editorial, su la titulo "Jornalistes no es la enemi", Boston Globe ia dise ce jornalisme libre ia es un prinsipe esensal de la SUA tra plu ca 200 anios. "Oji lo es su menasa grave," lo ia continua, razonante ce un tal trata de jornalisme par la presidente american "envia un sinial alarmante a despotas" tra la mundo.

La campania de oji segue un serie de avenis e comentas par Trump cual ia alti la presa contra jornalistes.

An si la fia de Trump, Ivanka, ia distanti se de esta atacas par sua padre, Sarah Saunders, la Portavose de la Casa Blanca, ia refusa dise ce jornalisme no es un enemi de la popla.

2018-08-15

Un ponte de autovia colasa en Italia

En la site Genoa en Italia norde-ueste, on continua xerca survivores pos la colasa dramosa de un ponte de autovia.

A la min 35 persones ia mori cuando desuples de veculos ia cade tra 45 metres. La colasa ia feri ance sirca 16 persones, e on estima ce entre cuatro e des-du persones manca.

Sirca 250 pompores de tota Italia partisipa en la xerca, usante canes detetante e aparatos de trepa. On ia evacua plu ca 400 persones, temente ce otra partes de la ponte va cade.

La colasa ia aveni en un pluve deluvial. Sua causa no es clar, ma on ia fa ja demandas sur la securia de la strutur. Matteo Salvini, la ministro de internas, ia promete puni cualcun culpable per la cade.

La Ponte Morandi, construida en la desenio de 1960, sta sur la autovia A10, un via importante per trafica de benes de portos local. La autovia servi ance la Riviera Italian e la costa sude de Frans.

Pompores atenta abri fesures peti per trova cualcun cisa trapida en un veculo. On crede ce alga persones vive ancora, ma tre enfantes es entre la mores.

Entre 30 e 35 autos e tre veculos pesosa ia es sur la ponte cuando lo ia colasa. Un tore enorme e partes de la ponte mesma ia cade sur linias de ferovia, un rio e un beneria.

2018-08-14

La site la plu abitable de mundo

Wien, la capital de Osteraic, ia vinse Melbourne en Australia per deveni nomida la site la plu abitable de mundo.

Esta es la ves prima cuando un site european ia ateni la loca prima en la sonda anial, fada par Economist Intelligence Unit. La lista global ordina 140 sites par fatores diversa, incluinte stablia political e sosial, crimin, educa e asede a aida medical.

En la sonda, Manchester ia asende plu ca cualce otra site european, tra 16 puntos a la numero 35. Pos sua asende, lo es plu alta ca London par 13 puntos, la difere la plu grande entre la du pos la comensa de la sonda a du desenios ante aora.

La salta de Manchester tra la lista es la resulta de un gradi bonida per securia. En la anio pasada, on ia critica la sonda car lo ia basi Manchester pos un ataca en stadion cual ia mata 22 persones.

En esta anio, la editor de la sonda ia dise ce Manchester "ia mostra durantia en la recovre de la site pos un ataca resente de terorisme multe reportada, cual ia secute la stablia a ante."

El ia dise ce la securia ia boni ance en "alga sites de Europa ueste" e ce la susede de Wien refleta "un reveni a stablia relativa tra multe de Europa".

Longo la sonda, cuasi un dui de la sites ia reseta un boni de sua grado de abitablia en la anio pasada. Melbourne, cual ave la numero du en la lista de esta anio, ia vinse en cada de la sete anios direta presedente. Du plu sites australian apare ance entre la des plu abitables de esta anio: Sydney e Adelaide.

A la otra estrema de la scala, Dimashq en Suria apare como la site la min abitable, prosima segueda par Dhaka en Bangladex e Lagos en Nijeria. Crimin, turba interna, terorisme e gera ave ave roles forte en deside la des sites la min abitable.

2018-08-13

Turcia atenta evita un crise economial

La banco sentral de Turcia ia dise ce lo es preparada per usa "tota medias nesesada" per serti un stablia finansial pos la colasa de la lira. Lo ia promete furni "tota la licuidia cual la bancos nesesa".

Esta ia aveni pos cuando la lira turces ia ateni un punto basa recordo contra la dolar, en un disputa diplomata grandinte con la SUA.

La valuas en asionerias en Asia ia cade oji car investores ia deveni ansiosa sur la crise de mone en Turcia. A venerdi, la presidente esuan Donald Trump ia dise ce el ia aproba la dupli de tarifas a aser e aluminio turces.

Ante la anunsia de la medias nova, la indise Nikkei 225 de Japan ia cade par cuasi 2% en sua comersia tarda.

Espertas culpa temes ce Turcia desende a un crise economial per la diminui rapida en la valua de la lira. Tra la mundo, investores es consernada par la estende de la dana e esta ia provoca los a vende ativas plu riscosa, incluinte asiones asian e mones de mercatos emerjinte.

Analistes dise ce investores xerca aora un refuja en la ien e la dolar esuan.

2018-08-12

Gralias colie dejetadas en un parce franses

Un parce de divertis en Frans va usa ses avias per colie dejetadas.

On ia instrui la gralias a la parce Puy de Fou en la ueste de la pais a colie restas de sigaretas e otra dejetadas peti. Los depone la pesos en un caxa cual furni alga comeda per recompensa la labora.

La primas de esta limpores plumida labora ja, e la otras va comensa doman.

Nicolas de Villiers, la xef de la parce, ia dise: "La gol no es sola la limpi, car la visitores atende jeneral ce los manteni la limpia." Lo pertine ance a mostra ce "la natur mesma pote instrui nos a cura la ambiente".

Gralias parteni a la familia de corvos, cual inclui ance corvones e monedulas. De Villiers ia ajunta ce los es "spesial intelijente" e ce los "gusta comunica con umanas e construi un relata par jua".

Esta no es la ves prima cuando corvos ia esibi sua intelijentia. En la parte plu temprana de esta anio, siensistes ia crea un vendador cual mostra la capasia de corvos en solve problemes.

La macina ia dona un regala cuando un avia ia presenta a lo un paper de grandia definida. On ia trova ce corvos pote recorda la grandia nesesada, e ia es an capas de corti paperes plu grande per cabe los a la macina.

2018-08-11

Xasada par un scural

La polisia deutx ia aida un om ci ia es xasada par un scural bebe.

Los ia responde a un telefoni per aida en Karlsruhe, un site en la sude-ueste de Deutxland. Cuando los ia ariva, la animal peti ia es ancora asustante la om. Los ia saisi la scural cuando lo ia adormi subita.

La reporta ofisial sur la aveni dise ce la rodente persistente ia deveni la mascote nova de la polisia. On ia nomi el Karl-Friedrich, e el es aora curada en un sentro de salva animales.

Scurales pote xasa persones si los desira reseta comeda o aida. Si un scural perde sua madre, el pote foca sua atende a un person como un sustitua.

Ma atacas par scurales no es sempre tan cortes. En julio de la anio pasada, on ia averti visitores a Prospect Park en New York sur un scural "nonusal coleriosa" ci ia ataca sinco persones en un semana. E en la anio presedente en Cerno, en la sude-ueste de England, un xico de tre anios ia sangui pos deveni mordeda par ses scurales.

2018-08-10

Pilotes de Ryanair greve

Pilotes de Ryanair greve en sinco paises european, obligante la cansela de un sesi de la volas de acel airocompania en media de la saison de vacanses.

La greve de 24 oras envolve empleadas en Deutxland, Sveria, Er, Beljia e Nederland. On ia informa sirca 50 000 pasajores sur la cansela de 400 volas.

La greve es la plu grande en un serie pertinente a paia e situa. Ryanair dise ce lo ia fa la plu bon cual lo pote per solve la disputa.

Esta airocompania eres, cual es la plu grande de los de custa basa en Europa, ia evita un greve ante natal par acorda reconose sindicatos a la ves prima en sua istoria de 30 anios. Ma sempre a pos, on ia protesta sur la negosia de acordas coletiva de labora.

Sirca 300 volas de Ryanair ia es canselada en julio cuando cabinores en Beljia, Portugal e Espania ia greve per 48 oras. E en dias resente, la airocompania ia anunsia la canselas de 250 volas a e de Deutxland, 104 a e de Beljia, e 42 plu cual afeta Sveria e Er.

A la sera de jovedi, un corte nederlandes ia rejeta un caso de Ryanair cual ia atenta preveni pilotes en Nederland de junta se a la greve, afetante sirca 22 volas. Ma a cuasi la mesma tempo, la compania ia anunsia ce on va ave no canselas.

La sindicatos desira ce la contratas de empleadas de Ryanair es governada par la leges de la nasion do los ave sua base, e no par leges eres.

Ryanair ia descrive la greves como "regretable e nonmeritada", disente ce sua pilotes reseta salarios plu alta ca los de otra airocompanias de custa basa.

2018-08-09

Un trematera nova afeta Lombok

La isola indonesian Lombok ia es colpada par un trema forte nova, an cuando lo atenta recovre pos un trematera major a soldi. La trema nova ia ave un grado de 5,9, e on reporta ce lo ia cade alga construidas.

Salvores xerca ancora tra detrito e atenta trae aida a vitimes de la trema plu temprana, cual ia es plu grande e ia mata ofisial 131 persones. Ma alga jornalistes local reporta un cuantia tan alta como 347 persones mor.

Alga viletas ia colasa completa. La governa dise ce plu ca 1400 persones ia es ferida, e plu ca 156 000 ia es deslocada. Alga rejiones en la norde de la isola ia reseta ancora no aida.

Lombok es situada a este de Bali, un isola pico plu grande, e lo ave sirca 4500 cilometres cuadrida. La plu de persones abita casas simple en comunias peti. Deses de miles dormi aora su la sielo o en la ruinas de sua casas. Car ospitales es ance afetada, on trata multe de la persones ferida su la sielo o en clinicas tempora.

La trematera de soldi ia aveni a mera alga dias pos un otra plu peti, cual ia mata a la min 16 persones. On deveni ansiosa ce la industria importante de turisme va es sever danada a un tempo cuando lo ta es normal multe ativa.

Miles de turistes ci visita Lombok, como ance Bali e la Isolas Gill, ia es ja evacuada o ia eleje mesma parti.

Indonesia es propensada a tremateras car lo es locada sur la Anelo de Foco, un linia de tremateras e erutas volcanal cual ensirca cuasi tota la borda de la Mar Pasifica. Supra la nivel de mar, plu ca un dui de la volcanes ativa en la mundo parteni a esta anelo.

2018-08-08

On acusa la ministro xef pasada de Malaisia sur froda

On ia fa tre acusas de lava de mone contra Najib Razak, ministro xef pasada de Malaisia, en relata con un scandal de froda de multe miliones de dolares.

El es acusada de reseta 42 milion ringites ($10 milion) de la compania 1MDB, poseseda par la governa, en sua conta personal de banco.

On ia aresta Najib en julio e ia acusa el sur rompe de fida e sur malusa de sua posto. La investiga nova sur 1MDB ia comensa pos sua perde surprendente en la vota de maio. El ia nega sempre la culpa e ia es remeteda par autoriosas malaisian cuando el ia es ancora la ministro xef.

Najib, como ance membros de sua familia e alga aliadas, es acusada de froda cuantias vasta de mone, sur cual on alega ce los ia es usada per compra cosas diversa, incluinte obras de arte e imobilas lusosa tra la mundo.

La alegas ia fa un rol sentral en sua vinse par un alia reformiste, gidada par Mahathir Mohamad, un veteran political ci ave 93 anios.

En semanas resente, la polisia ia invade imobilas liada a Najib e sua sposa. La polisia dise ce la saisi de valuosas – incluinte bolsas de moda, joalas e mone fisical – ia es la plu grande en la istoria de Malaisia.

1MDB, instituida par Najib en 2009, ia es intendeda per cambia la capital Kuala Lumpur a un sentro finansial e per aumenta la economia tra investis stratejial.

Lo ia comensa atrae atendes negativa en la temprana de 2015 cuando lo ia fali repaia alga de la 11 mil milion dolares cual lo ia debe a bancos e posesores de obligas finansial.

A pos, un jornal ia reporta ce lo ia vide un serie de documentos sur cual lo alega ce lo trasa cuasi $700 milion de la compania a la contas personal de banco de Najib. Miles de miliones de dolares es ancora nontrasada.

2018-08-07

Brasil clui e reabri sua frontera per venezuelanes

Brasil ia reabri sua frontera norde con Venezuela a persones fujinte de la problemes economial e political ala, pos clui lo per tempo corta. La Corte Suprema ia reversa un comanda plu temprana per clui la frontera asta cuando Brasil ta crea un situa conveninte per reseta la enflue grande de persones.

Persones autoriosa en la stato brasilera Roraima (a media de la rejion de la rio Amazon) dise ce sirca 500 venezuelanes traversa la frontera a cada dia.

La frontera ia es reabrida a migrores venezuelan pos alga oras ier. Un atenta parente de asasina contra Nicolás Maduro, la presidente de Venezuela, en la fini de semana, ia aumenta an plu la tensa en la pais.

Rosa Weber, judor de la Corte Suprema, ia anunsia sua deside corta ante medianote. El ia dise: "Lo no es justable ce on segue la via fasil de 'clui la portes' par causa de difisiles per ospita refujadas."

La comanda tempora par un judor de corte basa ia dise ce la frontera va resta abrida per brasileras e otra nonvenezuelanes. On ia intende ance abri lo per venezuelanes ci reveni de Brasil. Fronteras de mar e aira no ia es afetada par la deside.

En la tre anios pasada, multe miles de venezuelanes ia fuji a paises visina, xef Colombia e Brasil, xercante un situa economial plu bon. La plu de los ci ia traversa a Brasil en menses resente abita aora en state xocante mal sur la stradas de la Boa Vista, la capital povre de la state Roraima.

Tra menses, autoriosas en Roraima ia recomenda ce on clui la frontera. Los dise ce la servis publica ia colasa e ce la migra ia causa un crese notable de crimines.

La governa sentral de Brasil ia oposa tota cluis de frontera, razonante ce venezuelanes comun sufri la resultas de un crise umaniste e ce Brasil debe continua aida.

2018-08-06

Un avion de la Gera Mundal Du cade en Suiz

Dudes persones ia mori cuando un avion vea de la Gera Mundal Du ia cade sur un monte en la este de Suiz.

La avion ia porta 17 pasajores e tre ecipores en un vola turiste cuando lo ia enaira a la posmedia de saturdi.

JU-Air, la compania operante, ia espresa sua tristia sur la aveni e ia institui un numero de telefon per aida relatadas. Lo ia suspende tota volas per la tempo presente.

La pasajores ia es reveninte a Zürich pos un viaja de du dias en Locarno, prosima a la frontera sude de Suiz.

La avion no ia ave un caxa negra, e on ia pote poca monitori lo par radar par causa de sua loca distante alpan. On sabe ce lo ia colpa cuasi vertical la tera, a rapidia relativa alta. On ia elimina ja la posible de un colide con un otra avion o ostaculo.

Un person ci ia es sur la monte a la tempo de la cade ia dise ce la avion ia turna tra 180° a la sude, e ia cade a la tera como un petra.

De la dudes persones volante, des-un ia es omes e nove ia es femes. Los ia ave entre 42 e 84 anios. Des-sete ia es de Suiz e tre ia es osteraices.

La avion ia cade a sirca 2540 metres supra la nivel de mar, a la lado ueste de un monte de 3000 metres, nomida Piz Segnas.

JU-Air organiza turis de atraes en sua scuadron de aviones vea deutx. La turis enaira de la campo avional militar a Dübendorf, prosima a Zürich. La avion cual ia cade ia es mantenal esaminada en julio.

En un plu cade a saturdi, un familia de cuatro persones, incluinte du enfantes joven, ia es matada cuando un avion peti ia cade en Suiz sentral.