2016-02-28

Un blog major xines es blocida pos critica la presidente

Xina ia clui la contas de microblog de Ren Zhiqiang, un om franca ci ia es un maniate de imobila en pasada, pos cuando el ia critica presidente Xi Jinping.

La Dirijores Siberspasial de Xina ia acusa Ren de publici "mesajes nonlegal cual ia ave un mal efeto".

Ren ia scrive ce la jornalisme nasional es finansiada par paiores de imposta e debe servi estas, no la Partito Comuniste.

Plu temprana en febrero, la presidente ia recomenda forte ce jornalistes nasional segue la opinas de la partito en se reportas.

On ia critica Xina per se regula sever de la interede, incluinte la bloci de alga pajerias major e la sensura de postas. Ma Xi dise ce paises individua ave la direto de eleje se propre manera de developa e regula la rede.

Cuasi 40 jornalistes es aora en prison en Xina per obras cual los ia posta enlinia, diseda par Reportores sin Fronteras, un grupo promovente.

Ren Zhiqiang es un developor major de imobila, jubilada, con plu ca 30 milion seguores enlinia. Se blog a Weibo en la semana pasada ia ataca Xi e ia es criticada par la jornalisme ofisial. Per esemplo on ia descrive lo como comunicante pensas "contra la Partito Comuniste".

Un portavose per la Dirijores Siberspasial de Xina ia comenta ce usores de la rede debe obedi la lege e la fundas de sosialisme.

Xina ia desveli ance regulas nova, cual va reali a 10 marto, per proibi companias jornaliste stranjer e coemprendes stranjer de distribui informas enlinia sin un aproba presedente par ofisiores en Beijing.

Mugabe selebra custosa se aniversario 92

On ia critica la partito governante de Zimbabue per ospita un selebra lusosa de la aniversario 92 de presidente Robert Mugabe, en cuando multe de la popla esperia mancas de comeda.

Lo pare ce la selebra ia custa sirca $800 mil. La partito oposante, la Promove per Cambia Democrata, ia descrive lo como "ofendente".

Mugabe ia domina la politica zimbabuean pos cuando la pais ia deveni autonom de la Rena Unida en 1980.

La selebra ia es televisada, e ia inclui scolores lejente poesias sur tema de la presidente. On ia aveni lo en Masvingo, un site sufrinte de secia en la sude-este.

La presidente vea, acompaniada par se sposa Grace, ia libri 92 balones per inisia la selebra a la monumento nasional en Zimbabue Grande, do desuples de miles de persones ia es presente.

En un parla, Mugabe ia ataca donores ueste, disente ce el no va aseta aidas "putrida e mugrosa" si estas depende de ce Zimbabue aseta sposis omosesal.

Ma la oposores ia dise ce la selebra es "mal consetida", e ce la mone usada ia debe es usada per emporta mais "per evita moris de famia" en Masvingo e otra rejiones.

Eddie Cross, un parlamentor per la Promove per Cambia Democrata, ia comenta: "La ofende de esta eserse presente es no sola ce el fa esta selebra usante mone publica… ma ce el fa lo en un de la partes la plu grave afetada par secia en la pais."

La Program Mundal de Comeda de la NU ia dise ce la cuantia produida de comedas ia es la dui de la cuantia a un anio ante aora, par causa de la secia estrema.

La governa ia dise ce sirca tre milion persones no es serta de reseta comedas. Plu temprana en esta mense, lo ia solisita cuasi $1,6 mil milion de aida.

La oposantes ia dise ce Zanu-PF, la partito governante, "debe vergonia completa" per se ospita de la selebra custosa cuando "plu ca 90% de zimbabueanes luta en povria molente".

An tal, un xef de jovenes per Zanu-PF ia defende la selebra. "Mone no debe es la tema," Pupurai Togarepi ia dise. "On no pote pone un valua a la contribui de presidente Mugabe a la istoria e developa de esta nasion. Tota esta cosas es plu valuada ca mone."

La pais ia fronti defias economial sever en anios resente, per cual oposores culpa politicas cual ia inclui la saisi e redistribui de cultiverias poseseda par persones blanca en la anio 2000.

Un state de iperinfla ia lasa la unia de mone sin valua, nesesante ce on usa mones stranjer per la plu de intercambias.

Mugabe ia culpa interferes ueste per la problemes economial de se pais.

2016-02-27

Gas lacrimojen en la parlamento cosovan

La parlamentores de Cosovo ia eleje la ministro de esternas, Hashim Thaçi, como presidente a la fini de un dia malida par protestas.

El ia gania la majoria simple nesesada en la ronda tre, pos du niveles de vota nonconcluinte en la capital, Pristina.

Plu temprana, alga legores oposante ia es proibida de vota pos relasa gas lacrimojen en la construida de parlamento.

Thaçi, ci ave 47 anios, ia es un xef de gerilias en la gera cual ia provoca Cosovo, un provinse de etnico xef albanian, a declara autonomia de Serbia.

"Me promete construi un Cosovo nova, un Cosovo european, e profondi nos relatas con la SUA," el ia dise pos la vota ier.

El segue Atifete Jahjaga como presidente.

En pasada, Thaçi ia servi ance como ministro xef. El ia disputa con multe grupos oposante pos aida negoisa un acorda con Serbia cual ia dona plu autonomia a la minoria serbsce de Cosovo.

Serbia, como multe otra paises de mundo, no reconose la autonomia cual Cosovo ia declara per se en 2008.

2016-02-26

Un rompejelo encaliada en la Antartica

On ia salva 37 persones trapida sur la rompejelo major de Australia, cual ia encalia en Antartica.

La Aurora Australis ia deveni libre de se ca cordones liante pos un venton de neva a mercurdi.

La Divide Antartica Australian (DAA) dise ce un barcasa ia naveti la membros de la mision a la base de rexerca Mawson, cuando la clima ia boni.

31 ecipores resta sur la barcon per reflota lo.

La DAA ia esplica ce lo esta prosede de reflota, cuando la ecipo va atenta move la barcon de sur la rocas, va ocupa alga oras, e ce on va prende la barcon a un area calma prosima per esamina lo a pos.

La barcon ia gania un fesur peti en se corpo cuando lo ia encalia. La DAA ia comenta ce esta crea no risca a la stablia de la barcon o a la ambiente, ajuntante ce no carburante ia es malversada.

La Aurora Australis ia parti de Hobart en Tasmania a 11 janero e ia fa rexercas de siensa maral sirca la Plano de Kerguelen, un continente sumerjida cual estende tra 2200 cilometres. Lo ia ariva a Mawson a saturdi.

Lo ia sorti de se cordones liante a 09:15 (04:15 de ora global) a mercurdi, en ventas de plul ca 130 cilometres per ora, e ia encalia a West Arm en la porto de Fero de Cavalo (Horseshoe Harbour).

On ia intende ance ce lo colie un plu grupo de rexercores de la base Davis. La DAA ia dise oji ce on va avioni esta grupo a la base Casey, e de ala a casa en la dias veninte.

La Aurora Australis ave 95 metres de longia e lo pesa 3911 tones. Lo ia es enviada a mar en 1989 e es capas de rompe jelo con profondia de asta 1,2 metres.

On ia desinia lo per maneja bon mares turbosa. Lo conteni laborerias usada per rexercas biolojial, oseanografial, e meteorolojial, e lo ave ance un jinasio, biblioteca, e areas recreal.

2016-02-25

Apple contrataca sur securia de telefonetas

La xef de Apple, Tim Cook, ia contrataca la FBI sur se trata de un comanda par corte per aida desclavi la iPhone de Syed Rizwan Farook, ci con se sposa ia mata 14 persones en la site San Bernardino en California en desembre 2015.

Cook ia dise ce se compania ia descovre prima ce la comanda controversa esiste cuando jornalistes ia reporta lo.

"Me no crede ce la ferovia debe funsiona en esta modo," el ia comenta. "Me no crede ce on debe maneja un cosa tan importante a esta pais en esta modo."

An tal, un fonte prosima a la investiga ia informa jornalistes ce esta ia es "simple no vera", e ce la ecipo legal de Apple ia es "la prima persones ci ia sabe".

Un portavose per la FBI ia refusa comenta.

On reporta ance ce Apple ia comensa labora a un renovi de se aparatos, pos cual lo ta es nonposible de intrui a un iPhone par la metodo proposada par la FBI en esta caso.

Cook ia defende la refusa par Apple de segue un comanda par la FBI ce lo ta sutrae la blocos securial de la telefoneta de Farook afin on pote asede la datos en lo. El ia dise ce la FBI demanda ce la compania ta crea "la corespondente informatical de canser".

El ia dise: "Me crede ce la securia de la publica es estrema importante. La proteje de la datos de persones es estrema importante. E donce en esta caso la compromete es ce nos sabe ce par fa esta nos ta pote esposa persones a riscas noncredable."

A la demanda esce el es ansiosa ce Apple va impedi investigas cual ta preveni un ataca teroriste futur, Cook ia responde: "Alga cosas es difisil e alga cosas es coreta. E alga cosas es ambos. Esta es un de tal cosas."

La FBI ia razona ce Apple esajera la risca securial a se aparatos. Se dirijor James Comey ia dise ce Apple ave la sabes tecnical per intrui a sola la aparato de Farook en un manera cual no ta crea un "porte retro" en cada aparato de Apple.

Sondas reporta opinas diferente entre la popla de la SUA. Un sujesta ce la majoria de la persones sondada suporta la FBI, ma la rexercores ia nota plu suporta per Apple entre persones ci posese telefonetas intelijente.

Ma un otra sonda ia indica un ansia entre 55% de la respondores ce la FBI ta atenta usa la porte retro per "spia usores de iPhone".

2016-02-24

Trump e Clinton vinse en Nevada

En la Statos Unida de America, la aspiror presidental republiciste Donald Trump ia gania forte la stato Nevada, aumentante se vantaje en la compete per eleje par se partito.

La bilionor ia fa aora tre vinses en segue, pos los en Nova Hampshire e Carolina Sude. Marco Rubio e Ted Cruz, ci ia ataca la un la otra en esta semana, compete per la loca du.

Ofisiores de la partito republiciste dise ce los investiga reportas de votas duple e un manca de paperes de vota a un loca. Alga bonvolores ia porta ance vestes suportante Trump, ma ofisiores ia dise ce esta no rompe la regulas.

En se parla de vinse, Trump ia informa un fola aclamante de suportores: "Nos gania, gania, gania la pais, e pronto la pais va comensa gania, gania, gania."

Nevada, tipal un stato ecuilibrada con un cuantia notable de persones latina, es esensal a la prosede de eleje.

En la corsa de la partito democrata, Hillary Clinton ia gania la stato a saturdi, vinsente Bernie Sanders par sinco persentos. A saturdi veninte, esta du va fronti denova la un la otra en Carolina Sude, do los consentra se campanias a la vota negra.

No min ca 30 delegadas – plu ca 1% de la cuantia intera – es disponable en Nevada, la proba prima per la republicistes en la ueste de la SUA.

Resultas temprana mostra ce Trump gida par 42% ante la otra aspirores republicistes, e ce Rubio ave sola 25% de la votas.

La gol de esta competes tra la menses veninte es deside cual aspirores va representa la du partitos xef en la vota presidental en novembre.

La votas seguente per ambos partitos va es multe importante ante la ronda nomida "Supramartedi" a 1 marto, cuando plu ca des statos va eleje se aspirores e sirca un cuatri de tota delegadas va es ganiable.

Trump ia ataca Cruz a lundi, criticante se taticas de campania e descrivente el como "malada". Plu temprana, Cruz ia desemplea se portavose par causa de un video alterada cual ia desonora la opinas de Rubio sur la Biblia.

Cruz ia contrataca ier, acusante Trump de "vasila" sur la temas e politicas de se campania. Rubio, entretempo, ia recomenda forte ce tota republicistes rejistrada ta vota.

La aspiror republiciste Ben Carson, un neurosirurjiste jubilada, ia apare en multe articles jornaliste pos sujesta ce la presidente Barack Obama ia es "elevada en manera blanca".

En la consentas de vota, cual ia comensa a 17:00 de ora local e ia dura tra tre oras, la suportores republiciste ia fa un discute publica sur la aspirores ante vota secreta.

La campo republiciste, cual ia conteni des-du aspirores a un mense ante aora, ia diminui a sola sinco. Jeb Bush, la fio de la presidente 41 e la frate de la presidente 43, ia resinia de la compete en Carolina Sude a la fini de semana pasada.

2016-02-23

Un malversa de petrolio en Peru

A la min 3000 bariles de petrolio ia es malversada en un rejion de la Amazonas pos goteas de la tubo xef de petrolio peruan.

La petrolio ia contamina du rios de cual a la min oto comunias nativa depende per se acua.

La compania Petroperú ia promete un limpi completa, e furni ance comedas e acua. Lo ia dise ce la gotea prima ia es causada par un lisca de tera, ma la causa de la otra rompe no es clar.

Petrolio ia entra a la rios Chiriaco e Morona en Peru norde-ueste. La malversa afeta la comunia axuar e pluves forte ia impedi la labora per conteni lo.

La ministreria peruan de sania ia declara un crise de cualia de acua en sinco distritos, e ofisiores ia dise ce Petroperú risca multas de asta 17 milion dolares si on trova ce la malversas ia afeta la sania de la popla local.

La Organiza de Evalua e Esamina Ambiental ia dise ce la malversas "no es casos isolida" e ia comanda la compania a recambia partes de la tubo e boni se reparas.

La presidente de Petroperú, Germán Velásquez, ia nega ance reportas ce la compania ia paia a enfantes per limpi la mugre densa. An tal, el ia ajunta ce el considera desemplea cuatro ofisiores de la compania, de ci lo es posible ce un ia permete ce enfantes colie petrolio.

El ia dise ce la compania evalua la tubo, construida en la desenio de 1970, per preveni malversas futur.

La goteas ia bloci la transporta de asta 6000 bariles de petrolio per dia.

2016-02-22

La tempo pos un siclon en Fiji

En Fiji, on ia comensa la taxe de reboni pos la siclon la plu forte recordada, cual ia mata a la min 20 persones.

Laborores de salva dise ce la cuantia de mores pote crese, car on ancora no ia ateni alga de la isolas distante la plu colpada.

Miles de persones es aora en sentros de asembla, e multe partes de la pais resta sin eletrica.

La siclon Winston, cual ia colpa a la fini de semana, ia trae ventas de plu ca 320 cilometres per ora, pluves deluviante, e ondas de asta 12 metres de altia.

La tempesta ia es entre la plu grandes cual ia aveni en la emisfera sude. Lo ia move a ueste pos atera a 18:30 (06:30 de ora global) a saturdi en la norde de Viti Levu, la isola xef.

Lo ia verje a la momento ultima, librinte la capital Suva de la fortia plen de se ventas.

Imajes airal ia mostra ce alga viletas, spesial en areas distante, ia es completa destruida. Un om en Viti Levu ia comenta ce la dana es tan grande ce "lo aspeta como un otra pais".

La siclon ia rompe linias de eletrica e comunica e ia destrui sentos de casas. Miles de persones abita aora en 750 sentros abrida par la governa, cual coraji persones a comensa vade a casa per limpi.

Sirca 80% de la 900 mil abitores de la nasion ave no eletrica sustada.

La governa ia declara un state de crise e ia demanda ce companias privata aida con transporta e la move de furnis.

Ofisiores ia institui ance un ora de retira, aumentante la potias arestal de la polisia, ma on ia sutrae esta oji. On ia comanda ce scolas clui per un semana, ma la airoporto xef ia reabri per reseta furnis umaniste e permete ce turistes parti.

Australia e Zeland Nova ia permete la relasa de furnis crisal de aida cual on teni en Suva. Los ia furni ance aviones per aida evalua la dana en areas min fasil asedable.

Raijeli Nicole, la dirijor de Oxfam per la rejion pasifica, ia dise ce la estende de la desastre va deveni clar cuando on restora la comunica con la areas distante la plu grave afetada. "La fijianes atenta desperante repara linias rompeda de comunica, ma los ave temes seria ce la novas cual espeta los va es grave."

Frank Bainimarama, la ministro xef, ia descrive la tempesta como "un malesperia de spesie la plu grave", ajuntante: "Cuando nos pote, nos va dona un calendario per la reinstitui de acua e eletrica."

La ministro de turisme, Faiyaz Siddiq Koya, ia dise ce la tempesta ia causa ruinas vasta, ma ia insiste ce "tota visitores es secur e comfortosa", an sin la posible de comunica con alga areas.

2016-02-21

Protestas causa un crise de acua en Delhi

La capital barati Delhi fronti un crise grave de acua par causa de protestas violente sur diretos de casta en Haryana, un stato visina.

Ofisiores de la governa ia dise ce la site ave furnis de acua sola asta la matina de oji, e ia anunsia ce tota scolas va es cluida doman.

Protestores de la comunia jat ia dana aparatos en la canal Munak, un fonte major de acua per la site. A la min nove persones ia es matada en cuando la violentia ia continua ier.

La protestores cexa contra la sistem de cuotas per castas en Barat. Los dise ce esta es un nonvantaje per los en postos governal e en instituidas instrual de la stato.

A presente, la jates es listada como de casta superior, ma la protestores desira cuotas de posto simil a los donada a castas inferior.

A saturdi, protestores ia furia an con proibi de sorti e la usa de la armada, sur ci on reporta ce los ia comensa fusili en dirije a los en la distritos Rohtak e Jhajjar.

La violentia ia obliga ce on clui alga stradas major e autovias nasional, e lo ia paralise la sistem de ferovias en Barat norde.

La governa local en Delhi ia vade a la corte suprema per xerca se interveni en la crise de acua. Ance Rajnath Singh, la ministro barati de internas, ia promete ce la governa va adota "medios urjente".

Manohar Lal Khattar, la ministro xef de Haryana, ia dise ja ce la governa va acorda con la esijes de la protestores "en la limitas de la constitui".

Partitos oposante ia recomenda ce la governa sentral desemplea la governa de Khattar e ce on forsa un rena presidental a la stato.

A venerdi, protestores en Rohtak ia lansa petras a securiores, ia bloci la trafica, ia ataca veculos, e ia atenta ensende la casa de la ministro de finansia.

2016-02-20

Britan oteni un state spesial per se en Europa

David Cameron, la ministro xef de la Rena Unida de Britan Grande e Er Norde, dise ce un acorda fada con otra xefes de la Uni European va dona "un state spesial" a la pais, e ce el va campania "con se cor e spirito" per resta en la uni.

La acorda ia es atenida en la tarda de ier pos du dias de negosias en Bruxelles.

La Rena Unida reseta la potia de limita paias a alga migrores UE, per sete anios. La acorda inclui ance un cambia de constitui, tal ce Britan no resta liada a "un uni sempre plu prosima" con otra statos membros de la UE.

Ma campaniores per sorti de la uni ia descrive la acorda como "vacua", disente ce lo ofre sola "cambias multe minor".

La acorda de renegosia la parteni de la Rena Unida a la UE ia es anunsiada par Donald Tusk, la politiciste polsce ci es la presidente de la Consilio European.

Lo abri la via per un referendo en la RU sur la parteni a Europa. On ia promete ja ce un tal referendo va aveni ante la fini de 2017, ma on previde ce lo va aveni en junio de esta anio.

Puntos de la acorda inclui:

• Un "freno urjente" contra paias aidante a migrores laborante, en situas de cuantias "estracomun" de migra – cual la Comision European reconose como aveninte en Britan aora. On debe relasa la freno pos sete anios, sin eseta.

• Reduis en paias aidante per la enfantes de migrores european ci abita estra se pais. Estas va es aplicada a arivores nova sin pausa, e va comensa en 2020 per la 34 mil persones ci reclama ja tal paias.

• La cambia de tratas de la UE per dise abrida ce referes a la esije per xerca un uni sempre plu prosima "no pertine a la Rena Unida", con la efeto ce Britan "pote nunca es obligada a un integra political".

• La direto ce la Rena Unida pote reali "un restrinje urjente" per proteje la Site de London, per preveni ce companias brites deveni obligada a reloca se en Europa e per serti ce los no fronti "prejudi" par causa de se situa estra la Eurozona.

Angela Merkel, la canselor deutx, ia predise ce la reformis "va provoca suporta en la Rena Unida ce la pais ta resta en la UE".

Tusk ia comenta: "Nos no ia dorsi la table de negosia. Nos ia aseta sacrifia un parte de nos interesas per la bonia comun, per mostra nos unia. Me crede profonda ce Britan nesesa Europa e ce Europa nesesa Britan. Ma la deside final es en la manos de la popla brites."

Pos cuando Cameron ia reporta a se ministros en un consenta spesial de consilio a esta matina, los va pote campania libre o per o contra la parteni european en la referendo.

El ia dise ce el ia reali la reformis cual el ia desira, declarante ce los va pone la pais "en la seja de gidor" de un de la mercatos la plu grande de mundo e ce los va crea un Uni European "plu flexable".

"Nos ia proteje permanente la paund e nos direto de reteni lo," el ia ajunta, disente ce a la ves prima la UE "ia reconose ofisial ce lo ave plu ca un unia de mone".

Cameron ia dise ce el ia proteje la Rena Unida contra plu integra political en la UE: "Ta ce me espresa esta tan simple como me pote: Britan va es nunca un parte de un superstato european."

Contorninte se caso per resta en la Europa nova, el ia dise ce "mostra nos dorso a la UE es tota no solve". El ia ajunta: "Nos debe es suspetosa sur los ci declara ce la sorti de Europa es automata un via rapida a un pais de lete e miel. La popla brites debe aora deside esce los va resta en esta Uni European reformida o parti. Esta va es un momento, unica en nos jenera, per formi la destina de nos pais."

La acorda, realida entre tota 28 statos membros de la uni, ia es fada pos cuando alga xefes ia oposa la reformis projetada par Cameron.

On ia intende orijinal conclui la negosias a un consenta de "come engles de matina" a venerdi, ma esta ia deveni un "come engles de matina tarde", alora un "come engles media", e final un "come engles de sera", a cual tempo on ia anunsia la acorda.

Nicola Sturgeon, la ministro xef de Scotland, ia dise ce lo es aora "plu importante ca sempre" ce los ci suporta la parteni continuante de Scotland a la Uni European espresa se opina "tan forte como posible".

Euroseticas ia burla la reformis, disente ce los no va permete ce Britan bloci leges european nondesirada o redui la migra. Matthew Elliott, la dirijor xef de la campania Vota per Sorti, ia dise ce Cameron "va declara aora un vinse, ma lo es un vinse intera vacua".

2016-02-19

Delfines arjentin es tirada de la mar

On ia critica visitores a un plaia en Arjentina pos reportas ce los ia prende delfines perilida de la mar per fa selfis con lo.

Fotos postada a redes sosial mostra un fola de persones ci teni e toca un delfin en la site Santa Teresita.

La pitures ia provoca condenas de espertas sur viventes savaje e de otra usores de redes sosial.

Delfines fransiscan risca deveni estinguida, e conservores dise ce no plu ca 30 mil de los vive aora en abitada natural.

Un instituida arjentina sur viventes savaje ia dise ce la du delfines ia es trovada par persones sur la plaia e ce a la min un de los ia es mor.

Un video de la aveni pare mostra un om ci prende un delfin de la mar e pasea de asi a ala portante lo.

En pitures postada a Facebook, desuples de otra persones sta sirca la animal, tocante lo e fante fotos.

Lo no es clar esce la delfin ia es vivente o ja mor, o esce tota imajes mostra la mesma animal.

Delfines fransiscan, ance nomida delfines de la Plata, es entre la plu petis de mundo, con longia entre 1,3 e 1,7 metres. On trova los sola en Arjentina, Brasil, e Uruguai.

Pos la apare de la imajes, la Instituida Vida Silvestre, un grupo conservante, ia publici un avisa ce si on trova un delfin encaliada, on debe aida lo a revade a la acua "afin la istoria no va repete se".

Usores de redes sosial ia condena ance la aveni. Multe ia descrive lo como la resulta de stupidia o nonsabe.

2016-02-18

Du esplodes ataca Turcia en e estra la pais

Turcia ia promete venja se contra la esecutores de un esplode potiosa en la capital, Ankara, cual ia mata a la min 28 persones e ia feri 61.

Presidente Recep Tayyip Erdoğan ia dise: "Turcia no va retira se de usa se direto de defende se a cualce tempo, cualce loca, o cualce ves."

Ofisiores ia dise ce un veculo plen de esplodentes ia es detonada cuando buses militar ia pasa lo ier. Asta aora, no grupo ia dise ce lo ia esecuta la ataca.

La esplode ia aveni a sirca 18:30 (16:30 de ora global) en un area prosima a la parlamento e la xeferia militar.

Plumones grande de fuma levante de la loca ia es vidable, e atestores dise ce la esplode ia es oiada tra la site intera.

Securiores ia fa un esplode controlada a un paco suspetada a pos.

Alga de la vitimes ia es persones nonmilitar. On previde ce funeras va aveni oji.

Plu tarda ier, en un developa separada, un esplode ia dana un construida conteninte un sentro cultural turces prosima a Stockholm, la capital svensce.

Nun ia es ferida, e lo no es clar esce la aveni es relatada con la esplode en Ankara.

En un declara publicida a alga oras pos la ataca prima, Erdoğan ia dise: "La nos determina de venja nos contra esta atacas en Turcia e a estra, puntada a nos unia, juntadia, e futur, es grandida par tal atas."

El ia cansela un viaja intendeda a Azerbaijan a jovedi, e simil la ministro xef Ahmet Davutoğlu ia dise ce el no va vade a Bruxelles, do el ia intende partisipa en consentas sur la crise de refujadas en Europa.

Turcia ia es colpada par un serie de atacas en menses resente, e la ansia ia crese ce la pais pote deveni la blanco de un plu ataca grande.

Lo no es clar ci ia causa la esplode en Ankara. Jornalistes ia reporta ce securiores ia culpa la organiza Daex e ance ativistes de la Partito de Laborores Curdi (PKK), un partito proibida.

Un portavose per la governa ia comenta ce la ataca ia es bon scemida.

La PKK batalia per autonomia de la minoria curdi en Turcia ja tra desenios, e ia fa atacas periodal contra securiores turces.

La esplode en Ankara ia aveni en cuando Turcia aumenta se envolve en la gera en Suria. En la norde de acel pais visina, lo ia lansa cartuxes a la militia curdi, nomida Unia de Proteje la Popla, cual lo regarda como aliada con la PKK.

Turcia ia permete ance la usa de un de se bases avional par un alia, gidada par la SUA, cual bombi Daex.

2016-02-17

Un foto de lansamisiles en la Mar de Xina Sude

Lo pare ce Xina ia posa misiles de tera a aira sur un isola disputada en la Mar de Xina Sude.

Imajes satelital fada a 14 febrero pare mostra du grupos de lansamisiles e un sistem de radar sur la Isola Woody/Yongxing en la Isolas Parasel.

Taiuan, cual reclama ance la isola, ia confirma la developa.

Ma la ministro xines de esternas, Wang Yi, ia dise ce la reportas es inventada par jornalistes ueste.

Parlante a un confere jornaliste en Beijing a lado de se corespondente australian Julie Bishop, Wang ia dise ce jornalistes debe consentra en loca sur faros construida en la Mar de Xina Sude cual "es ja multe usosa en serti la securia de barcones pasante".

La presentia de misiles ta aumenta major la tensa de la disputa amarga sur la Mar de Xina Sude.

Xina ia fa ja laboras estendosa per reprende tera en la rejion, cual lo descrive como legal e per intendes nonmilitar.

Ma la labora ia coleri otra paises cual reclama ance la teritorio, e on ave un conserna cresente sur la implicas de la militari de la rejion.

La imajes la plu resente de la isola mostra un macro de un parte de plaia, de cual se forma sembla la custa norde como lo apare en otra imajes, e los indica du strutures misilal. Cada strutur conteni cuatro lansamisiles e du veculos de controla.

Lo pare ce du de la lansamisiles es ja erijeda. Un imaje de la mesma loca a 3 febrero mostra un plaia vacua.

Un ofisior de defende SUA ia comenta ce la misiles pare es la sistem HQ-9 de defende airal, con estende de sirca 200 cilometres.

La esta reporta aveni en cuando xefes rejional de Asia sude-este fini un consenta de du dias en California, do la Mar de Xina Sude ia es un tema de debate.

2016-02-16

On descovre un spesie estinguida de planta

Biolojistes ia descrive un spesie nova de planta estinguida, fundida sur du flores fosilida cual ia es trapida en pesos de ambar tra 15 milion anios a la min.

Strychnos electri parteni a la jenero de cual se arboretas, arbores, e vites es famosa per produi stricnina, un venena matante.

Rexercores en la SUA ia nomi lo seguente la parola elinica per ambar (elektron), la resina fosilida de arbores antica.

La du flores ia es entre 500 fosiles colieda en 1986 en un esplora par profesor George Poinar de la Universia de la Stato Oregon. Poinar es un entomolojiste famosa e multe de esta esemplos colieda ia es insetos. Ma pos cuasi 30 anios de labora sur estas, el ia comensa esamina la flores.

Los ia es notable completa, no como multe fosiles de plantas en ambar, cual es usual no plu ca fratos.

En 2015, el ia envia fotos de densia alta a profesor Lena Struwe a la Universia Rutgers en Nova Jersey.

"Esta flores ia aspeta como si los ia cade resente de un arbor," Poinar ia esplica. "Me ia opina ce los es cisa Strychnos, e me ia envia los a Lena car me sabe ce el es un esperta en esta jenero."

Struwe ia compara la strutur fisical de la flores con tota 200 spesies conoseda de Strychnos, esplorante la colies de multe museos e erberias.

"La cualias la plu usosa per identifia spesies de Strychnos es en la morfolojia de la flores, e fortunosa esta es lo cual nos ave per esta fosil," Struwe ia dise. "Me ia regarda cada esemplo de spesies american, fotografinte e mesurante lo, e ia compara lo a la foto cual George ia envia a me. Me ia demanda a me: 'Como la capeletas sur la petales aspeta? Do es la capelatas situada?' e tal plu."

Per la animales en la tarda de la eda cretasica, S. electri ia es probable estrema nonurinte.

"Cuasi tota spesies de la jenero Strychnos es venenosa en alga modo," Poinar ia comenta. "Cada planta conteni se alcaloides propre con efetos diversa. Alga es plu venenosa ca otras, e cisa los ia susede car se venenas ia furni alga defende contra    erbivores."

La tal alcaloide la plu famoisa, stricnina, ia formi la funda de multe venenas contra ratas en la pasada, e ia es un de la modos de omiside usada par la carater Norman Bates en la filma Psico de Alfred Hitchcock.

Ma esta plantas parteni ance a la familia de asteridos, cual inclui plu ca 80 mil plantas florinte, incluinte multe de los cual umanas come, de patatas e menta asta eliantos e favas de cafe.

La descovre nova es un ajunta importante a la arcivo fosilal de esta familia cual on no comprende ja bon.

2016-02-15

La economia de Japan contrae

La economia de Japan ia contrae en la tre menses final de 2015, ajuntante a un serie de problemes per la politica governal de reformi economial.

La statistica ofisial mostra ce entre otobre e desembre, lo ia diminui par 0,4% en compara con la cuatri presedente. On ia previde un redui de 0,3% per la cuatri.

Un desira min forte per benes en la pais ia contribui a la contrae, como ance un investi min rapida en casas.

Si on aniali la statistica, la economia ia contrae par 1,4% en la periodo, ma on ia previde un contrae anialida de 1,2%. Esta cuantia anialida es la taso a cual la economia ta diminui tra 12 menses, si la cuatri final ta refleta la anio intera.

La projeta de la ministro xef Shinzo Abe per revive la economia – nomida "abenomia" – ia es introduida pos se vinse en la vota de desembre 2013.

Lo ia intende combate la defla, con cual Japan ia luta tra cuasi du desenios, e ance aumenta la desira per benes e la investi. Lo ia vole ance debili la ien per aida ce companias multe esportante como Toyota deveni plu competosa.

Ma la crese ia resta un problem. Analistes dise ce Japan nesesa serti plu esportas per suporta la crese economial futur. Per cada 1% de crese de la economia japanes, entre 0,5 and 0,7% veni de esportas.

La pais depende ance multe de consuma interna, ma se popla es senesente e diminuinte, donce min persones contribui a la economia.

En la tre menses asta setembre, seguente un statistica revisada, Japan ia evita un retrosede tecnical. Ma lo es ja en retrosede a cuatro veses de pos la crise finansial global.

Investores ia pare iniora la statistica nova: la Nikkei 225, regardada como un punto de refere, ia salta par plu ca 4% a un tempo corta pos la publici de la statistica. An tal, lo ia perde plu ca 11% en la semana pasada, cual ia es un semana corta de comersia par causa de un festa nasional a jovedi.

La esportores grande de la pais ia es spesial grave colpada cuando un ien plu forte contra la dolar ia dana la sentis de investores.

En un move surprendente en la mense pasada, la Banco de Japan ia introdui un taso de interesa de -0,1%. Esta taso negativa – la prima de istoria per la pais – es desiniada per aumenta la spende e la investi, cual en se turno debe stimula la crese economial.

Ma alga analistes duta ce la redui de interesa va susede, sujestante en loca ce la investi debil va continua probable tra multe de esta anio.

2016-02-14

La presidente de Pacistan condena la festa de Valentin

La presidente de Pacistan ia denunsia la festa de Valentin, disente ce lo ave no relata con la cultur pacistani e ce on debe evita lo.

Mamnoon Hussain ia informa studiantes ce lo es un tradision ueste cual desacorda con la cultur muslim.

El ia fa se comentas pos cuando un distrito en la norde-ueste de la pais ia proibi selebra la festa.

La festa de Valentin es popular en multe sites en Pacistan, ma grupos relijiosa ia denunsia lo como moral declinante.

Plu temprana en la semana, la governa local en Kohat, en la provinse Khyber Pakhtunkhwa, ia comanda polisiores a proibi botecas de vende cartas de Valentin. La distrito Kohat es manejada par un partito political relijiosa e lo borda la areas conserviste tribal de Pacistan.

Entretempo, la consilio local de Peshawar ia aseta ance un deside de proibi selebras de lo cual lo ia nomi un dia "nonusosa".

Maulana Niaz Muhammad, un dirijor de la distrito Kohat, ia comenta: "La festa de Valentin ave no funda legal, e plu lo es contra nos relijio, donce lo ia deveni proibida."

El ia dise ce an si la dona mesma de cartas e flores no es un mal ata, lo no es conveninte si on lia esta a un dia spesifada. El ia ajunta ce el senti ce tal praticas ta pote coraji conduis ofendente.

An tal, plu tarda, ofisiores en ambos locas ia dise ce on ia dejeta o iniora la proibis car los ia es multe nonpopular.

Jornalistes ia reporta plu temprana en esta semana ce on ia proibi donadas de Valentin en la capital Islamabad, ma la governa ia nega esta a pos.

2016-02-13

Un ofisior espaniol spende anios en asentia de labora

On ia descovre ce un ofisior publica espaniol ia fali apare per se labora tra a la min ses anios.

Joaquín García, ci ave 69 anios, ia es multada per €27 mil ($30 mil) pos cuando un premio per se servi longa ia revela se asentia longa.

La posto de García ia es supravide la construida de un compleso de trata acua de cloaca. Aora el ia jubila ja.

El nega la alegas, e se avocato dise ce el ia asconde se pos sufri un "linxa" par jornalistes.

García ia dise ce el ia deveni un vitim de tormenta political en se labora e ia es moveda a un posto do no labora es nesesada.

El ia reseta un salario de €37 mil per anio (ante imposta) de un compania de acua manejada par un autoriosa local en Cádiz, un site en la sude-ueste de Espania.

Un corte ia suporta la autoriosa e ia comanda ce el paia la multa, cual coresponde a se salario anial pos imposta e es la cuantia la plu grande cual la compania pote reclama legal.

El ia scrive a la maior per solisita ce el no paia la multa, e el intende demanda ce on revisa la judi.

La corte ia oia ce la xef de la compania no ia vide García tra anios, an si el ia ocupa un ofisia a fas de la propre. La compania de acua ia crede ce el es supravideda par la autoriosas local, e la mesma en reversa.

La vismaior ia persepi se asentia cuando García ia deveni conveninte per reseta un placa per se labora de 20 anios.

García dise ce on ia tormenta el par causa de la politica de se familia e ce el ia es enviada a la compania de acua per isoli se. El ia trova ce no labora esiste en se posto nova.

Persones prosima a el ia comenta ce el ia esita reporta la situa car el ia debe suporta finansial se familia, e ia es ansiosa ce el no va susede trova un otra emplea a se eda.

Los ia clari ce el ia vade vera a se ofisia, ma no per tota oras de labora a cada dia, e ce el ia dedica se a leje filosofia.

Jornales espaniol ia nomi el "la ofisior-fantasma".

2016-02-12

Un projeta de sesafusili per Suria

La potias major de mundo ia acorda ce un "sesa de enemia" en Suria debe comensa pos un semana, seguente discutes en München, Deuxtland.

La sesafusili no va pertine a la batalia contra la grupos jihadiste Daex e al-Qaida.

Ministros de la Grupo Internasional de Suporta Suria (GISS) ia acorda ance aselera e grandi furnis de aida.

La anunsia aveni en cuando la armada suri, suportada par atacas airal rusce, avansa en la provinse de Aleppo, con risca de ensirca desuples de miles de siviles en partes de la site Aleppo ocupada par rebelores.

La governa suri e la grupos xef oposante no ia dise esce los va reali la sesafusili.

Plu ca un cuatri de milion persones es ja matada en cuasi sinco anios de batalia en Suria.

Un grupo de taxe presideda par la SUA e Rusia va labora per reali la sesafusili par consulta con la grupos oposante en Suria.

On previde ce furnis de aida a comunias suri asejada va comensa tan pronto como venerdi.

John Kerry, la ministro SUA de esternas, ia confesa ce la projeta de sesafusili es "aspirante" e ia dise ce la proba real va es esce la partitos diversa onora se prometes.

El ia fa la anunsia a lado de se corespondente rusce, Sergei Lavrov, e la ambasador spesial de la Nasiones Unida per Suria, Staffan de Mistura.

Lavrov ia comenta ce on ave "razonas per espera ce nos ia fa un labora eselente oji". Un proposa plu temprana de Rusia ia previde un comensa de sesafusili a 1 marto.

A la confere jornaliste, Kerry ia sujesta denova ce atacas airal rusce colpa lo cual la Ueste regarda como soldatos moderada oposante, e no teroristes, como Moscva declara.

La ministro brites de esternas, Philip Hammond, ia comenta ce la sesafusili va funsiona sola si Rusia para se atacas, ma Lavrov ia dise ce los va continua.

La GISS ia acorda ance ce negosias de pas, incluinte la governa suri e la rebelores, debe recomensa tan pronto como posible. Discutes inisial ia es interompeda a mera dias pos comensa en la parte plu temprana de esta mense en Genève, seguente la avansa en Aleppo.

Miles de persones deslocada par la batalia ia deveni encaliada a la frontera con Turcia, e ajenterias de aida ia averti sur un situa rapida malinte.

Un portavose per la oposa suri ia comenta: "Si nos vide atas e realis en pratica, nos va es pronto en Genève."

2016-02-11

La pape envia 1000 "suprapretes"

Pape Fransisco ia envia plu ca mil pretes a un mision global de pardona pecas grave cual es normal sola pardonable par el o un bispo major.

La Misionores de Pardona, con nometa "suprapretes", ia reseta esta permete spesial per la anio aniversarial de la Vatican, cual va fini en novembre.

Pecas grave inclui la viole de pan e vino santida, la rompe de la secretia de confeseria, e la conspira de mata un pape.

La pape ia dise comun ce la Eglesa nesesa es min rijida e criticante. El ia declara la anio presente como un Anio Santa de Pardona, e usa lo per sperde un mesaje de pardona – spesial entre catolicas ci ia vaga a via de se crede ma desira reveni.

A un rituo en la Vatican a martedi, la pape ia parla ia 700 de la pretes elejeda, disente ce on debe bonveni repentores con brasos abrida, en loca de judi los con "un senti de superioria".

"Lo no es con la baston de judi ce nos va susede retrae la oveas perdeda a la ensirca," el ia dise a un asembla en la Palasio Apostolal.

La pretes es elejeda de bispias sirca la mundo, e on previde ce los va fa se mision spesial en paises incluinte Burundi, Misre, Xina, e la Amirias Arabi Unida.

Un de la pretes va viaja entre comunias inuit en la Artica canadian, e un otra intende turi partes distante de Australia en un furgon.

La aborta es en la categoria de pecas grave, ma en la anio pasada, la pape ia anunsia ce el va permete ce cualce prete remete esta peca de femes ci vole repenti, tra la Anio Santa.

La pape ia dise ce el comprende ce alga femes senti ce los ave no otra posible ca la deside "angusante" de fa un aborta.

2016-02-10

Obama legi un projeta per eletrica en Africa

La presidente de la SUA, Barack Obama, ia suscrive a lege un stratejia nova cual intende trae eletrica a 50 milion persones en Africa susaharan ante la fini de 2020.

La Ata de Eletrici Africa de 2015 va dona suporta legal a la projeta major de Obama, Potia per Africa, cual atenta boni la asede a eletrica par asosias publica-privata. Se aseta en ambos salones de la Congresa de la SUA ia dura tra cuasi du anios.

Sirca du-tris de persones en Africa ave no fonte dependable de potia.

Comentores dise ce lo es probable ce la lege nova va serti ce la projeta va continua an pos cuando Obama parti de la Casa Blanca en 2017.

La projeta ia dona a se la gol ultima de dupli la asede a eletrica en Africa susaharan.

Ed Royce, la presidente de la Comite de la Salon Basa sur Situas Esterna e un suportor longa de la stratejia, ia dise ce la lege "va boni la vives de miliones en Africa susaharan par aida redui la depende de carbon de lenio e otra fontes de carburante cual produi fuma nosiva cual mata plu ca aides e malaria en combina."

En se declara ier, el ia ajunta ce lo "va promove ance la developa de enerjia dependable a bon custa".

McKinsey, un compania cual consela sur maneja, estima ce la custa de lia la popla intera de la continente a eletrica ante la fini de 2030 va es 835 mil milion dolares.

En ajunta a la governa SUA, governas african, asosiores de developa, e la campo privata es envolveda en la projeta Potia per Africa.

La governa SUA ia promete 7 mil milion dolares per suporta lo, disente ce esta mesma ia atrae 43 mil milion plu dolares de investis prometeda par otra asosiores publica e privata.

2016-02-09

Du trenes colide en Deutxland

Du trenes de pasajor ia colide en la state Bayern en Deutxland.

La polisia dise ce alga persones ia mori e desuples ia es ferida.

La colide de frontes ia aveni a Bad Aibling, un vila de banieria mineral a sirca 60 cilometres a sude-este de München.

Un de la trenes ia salta de la reles en la colide, e alga vagones ia deveni inversada.

Servis crisal es a la loca de la asidente, con elicotores de salva. Los atenta libri persones ci es ancora trapida en la ruinas.

La cuantia esata de moris e feris es ancora nonclar, ma un tuita par la polisia ia dise: "A state presente, sirca sento feridas, incluinte feris grave e an moris."

On no sabe la causa la colide.

Stradas sirca la loca es aora cluida, e la ferovia entre Holzkirchen e Rosenheim es blocida.

Un portavose per la polisia ia comenta: "Esta es la asidente la plu grande cual ia aveni a nos en esta rejion, e nos ave multe dotores, ambulansias, e elicotores de crise a la loca."

2016-02-08

Un leopardo entra a un scola barati

Un leopardo mas cual ia entra a un scola en la site barati Bengaluru ia feri ses persones ci ia atenta catura el.

Un siensiste de conserva e un forestor ia es entre la atacadas en esta labora de cuasi des oras per trapi la animal perilosa ier.

La leopardo ia vaga a en la scola Vibgyor Internasional, e ia es final calmida e librida.

Un conta resente de viventes savaje ia estima ce Barat es abitada par entre 12 e 14 mil leopardos.

On ia vide la mas de oto anios cuando el ia vaga casual en la imobila de la scola en la area Kundalahalli.

Video de cameras de securia ia mostra lo atacante un om prosima a un pisina.

Cisa lo ia vaga a en la scola de un parte de foresta relativa prosima a la scola.

On ia move la animal caturada a un parce nasional. La ses persones atacada, ci inclui un filmor per un canal de tv, ia es tratada per feris minor.

On ia esperia ja de tempo a tempo la vaga de leopardos e otra gatos grande a en areas poplida par persones, e conservores de natur ia averti ce tal frontis risca deveni plu comun en cuando umanas intrui sur la abitadas de animales.

En la anio pasada, un leopardo mas ia pasa sinco oras con se testa fisada en un vaso de metal en un vileta en Rajasthan, un state en la norde de la pais.

2016-02-07

Corea Norde lansa un roceto

Corea Norde ia lansa un roceto de distantia longa, sur cual oposores dise ce lo es un proba de tecnolojia proibida de misil.

Un anunsior a televisa nasional ia declara ce la pais ia susede pone un satelite en orbita.

La lansa ia es condenada par Japan, Corea Sude, e la SUA, ci ia solisita un consenta crisal de la Consilio de Securia de la Nasiones Unida en la parte plu tarda de oji.

Corea Sude dise ce lo va comensa discute con la SUA la institui de un sistem de defende par misil.

Ryu Je-Seung, un ofisior major de defende, ia comenta ce si on ta ativi la sistem THAAD – regardada como un de la plu avansadas de mundo – lo ta es sola per oposa la menasa de la Norde.

En un declara formal, la Comite Nasional de Developa Airospasial de Corea Norde ia dise ce Kwangmyŏngsŏng-4 ("Stela Briliante 4"), un satelite de oserva la Tera, ia entra a orbita a sirca 10 minutos pos enaira de la sentro spasial Sohae en la provinse Phyongan Norde.

Anunsiante la lansa a televisa nasional, un lejor de novas ia dise ce lo ia es comandada par la xef de pais, Kim Jong-un, e ia ajunta ce Corea Norde projeta per lansa plu satelites en futur.

On ia descrive la lansa como "la vapor fasinante de satelite de djutxe ("autodepende", la ideolojia political ofisial de Corea Norde) lasante un trasa en la sielo clar e azul en primavera de febrero a borda de la Dia de la Stela Briliante" (16 febrero, la aniversario de nase de Kim Jong-il, la padre de Kim Jong-un).

Un portavose per la Ministreria de Defende de Corea Sude ia dise ce un barcon de gera ia deteta la lansa a 09:31 (00:31 de ora global).

La lansa de roceto ia es forte condenada par la comunia internasional.

John Kerry, la ministro de esternas de la SUA, ia nomi lo "un viole evidente" de desides par la NU e ia averti sur "medios notable per culpabli" Corea Norde.

Desides par la Consilio de Securia proibi la stato de esecuta cualce probas de misil nucleal o balistical.

Xina ia dise ce lo "regrete" la atas de Corea Norde, ma ia recomenda ce "la partitos pertinente freni se de fa atas cual ta alti cisa plu la tensas sur la penisola corean".

La Norde insiste ce se program de spasio es de natur intera siensal, ma la SUA, Corea Sude, e an la aliada Xina dise ce la lansas de roceto ave la gol de developa un misil balistical intercontinental cual ta es capas de colpa la SUA.

A 6 janero de esta anio, Corea Norde ia provoca ja critica internasional con un proba cuatro de bomba nucleal.

2016-02-06

Un trematera en Taiuan

En la sude-ueste de Taiuan, un trematera ia cade construidas en la site Tainan, matante a la min sete persones.

Ecipos salvante atenta ateni persones trapida en detrito de pos la aveni de la trema de mesura 6,4 pronto ante 04:00 de ora local (20:00 de ora global).

Un bebe ia es entre cuatro persones ci ia mori cuando un tore de apartes ia colasa. Plu ca 300 persones ia es ferida.

Presidente  Ma Ying-jeou ia promete ce on va fa tota posible per salva persones. Arivante en la site, el ia dise ce on va crea refujerias per los ci ia perde se casas. La site ave du milion abitores.

Pitures televisada ia mostra salvores usante scalas per traversa montones de detrito.

Un de la construidas la plu afetada ia es la compleso de apartes Wei Kuan, cual ia ave 17 niveles e do a la min 256 persones ia abita.

On ia salva plu ca 200 persones, ma un bebe, xica joven, e du omes adulte no ia survive. On crede ce 30 persones, cisa plu, es ancora trapida a interna.

Chen Wei-jen, la ministro de internas, ia dise ce el teme ce plu persones ia es en la tore ca usual, car familias ia asembla per selebra la anio nova xines. El ia comenta ce investigores va esamina esce la strutur de la construida ia sasia la regulas.

Abitores ia parla sur se modo de sorti de se casas en la tore. Un fem ia dise: "Me ia usa un martel per rompe la porte de me casa, cual ia es torseda e clavida, e ia susede trepa a estra." Un om ia lia vestes per crea un corda cual el ia usa per desende de la nivel nove a la nivel ses.

Taiuan es situada prosima a la junta de du placas tetonical e esperia comun tremas.

Esta ia aveni prosima a la surfas, donce se efetos ia es grandida. On ia senti lo an en la capital, Taipei, a 300 cilometres a norde de Tainan, e a la min sinco replicas sismica ia segue.

Lo pare ce la dana no es vasta, ma alga construidas alta es lasada con apoia perilosa.

On reporta ance rompes de eletrica, e lias transportal ia deveni disturbada a un de la dias la plu viajosa de la anio, ante la festa de anio nova xines.

Beijing ia ofre aida. En 1999, cuando un trema de mesura 7,6 ia mata plu ca 2300 persones en Taiuan sentral, un ofre simil ia deveni maraniada en disputa political, car Taiuan ia acusa ce Xina ia esplota la situa per progresa se intendes propre.

2016-02-05

Furia en Frans sur un simpli de spele

Un controversa ia deveni inisiada par la proposa de speles nova per plu ca 2000 parolas franses.

La Académie Française ia proposa ja la cambias en 1990, incluinte la sutrae de la sircoflexe (^) e ifen (-) en alga parolas, ma los ia es elejable.

Aora companias publicinte dise ce los va inclui la speles nova en libros de scola.

La ministro de instrui de Frans ia dise ce la cambias no va culmina en aboli la sircoflexe, e ce ambos speles va resta coreta.

An tal, la anunsia ia provoca reatas furiosa en redes sosial, do persones ia declara ce la cambias es un move en un dirije tro simplinte.

La coleria ia pare comensa pos cuando un reporta a la pajeria TF1 ia dise ce la reformis va reali en la anio academial veninte.

Lo ia sita un nota de la ministeria instrual de la anio pasada cual ia dise ce on debe adota la speles nova. Lo ia reporta ance ce companias publicinte ia deside ajunta la cambias en libros de aprende per usa en setembre.

Studiantes va pote aora eleje entre usa la speles vea o la novas, e enseniores va debe aseta ambos maneras como coreta.

La cambias proposada ia segue un revisa de la lingua franses per simpli la aprende de lo, ma los no ia es obligante. Los ia fronti ja un oposa forte en la pais.

Los inclui sutrae la sircoflexe en "coût" (custa) e "paraître" (pare), e la ifen en "porte-monnaie" (portamone) e "week-end" (fini de semana). Plu, la parola "oignon" (onion) perde se letera I.

La spele nova afeta sirca 2400 parolas.

Redores sosial ia esprima se coleria sur la cambias, e la parolas grilida #ReformeOrthographe (reformi ortografial) e #JeSuisCirconflexe (me es sircoflexe) ia apare entre la temas de moda a Twitter en Frans ier.

Multe usores ia comparti pitures mostrante se noncontentia con la reformi, e la plu de la furia ia es dirijeda a la mori alegada de la sircoflexe.

2016-02-04

Köln aumenta la securia per se carnaval

En Deutxland ueste, la site Köln ia aumenta se securia per se carnaval anial, pos cuando multe femes ala ia es atacada e rubada a la comensa de la anio.

2500 polisiores va patrulia la stradas tra la carnaval de un semana.

La pais ia es xocada par la atacas a la anio nova, sur cual on ia culpa xef migrores. Desuples de femes ia es vitimes, ma la estende de la problem no ia deveni clar asta pos la pasa de alga dias.

La turba ia nuri un ansia entre deutxes sur un enflue vasta de refujadas. En la anio pasada, migras a Deutxland de estra la Uni European ia ateni 1,1 milion – un cuantia recordo.

La problemes en Köln a la comensa de la anio ia contribui a un colasa en la grado de aproba per la canselor, Angela Merkel.

Polisiores va es presente a un punto nova de securia per femes, prosima a la catedral de Köln, en la area do la plu de atacas ia aveni entre la selebras de la anio nova.

La polisia ia proba ja "cameras de corpo" (portada sur la vestes) cual pote filma suspetadas en tal avenis.

Merkel ia es criticada par se aliadas conserviste – como ance par multe politicistes oposante – per bonveni tan multe persones a Deutxland.

On dona jeneral refuja a los de Suria e Irac, ci esiste en cuantia grande, ma ance multe migrores economial de estra la UE atenta veni a Deutxland per abita.

2016-02-03

Un sena teatral malfunsiona e ospitali un ator

Un ator italian es en un coma pos la malfunsiona de un sena en cual se carater ia es linxada.

On ia ospitali rapida Raphael Schumacher, ci ave 27 anios, a la sera de soldi, cuando un de la vidores ia persepi ce el deveni real pendeda par un corda cual ia streti sirca se colo.

Schumacher ia apare en Mirajes, un teatral esperimental en Pis, cuando la sena ia aveni.

La polisia ia inisia un investiga e ia clui la teatro en cuando los ia intervisa otra atores e ecipores.

On crede ce la problem ia aveni pos cuando on ia move un caxa sur cual on ia intende ce Schumacher va sta. On ia intende ance ce el porta un arnes de securia.

Un ator ia dise: "La laso ia ta debe es falsa e un arnes ia ta debe catura el si el cade. Me no pote esplica como un tal asidente ia aveni."

Mirajes es composada de ses senas presentada en partes diversa de la teatro, e la vidores pasea entre los.

La sena de la linxa, cual on ia fa ja susedosa en un presenta plu temprana de la mesma sera, ia es atada sur un patio.

On reporta ce un de la vidores, un graduada medical resente, ia comprende ce alga cosa ia malfunsiona cuando Schumacher ia comensa trema.

Ier el ia es ancora en state grave en ospital.

Se madre ia rejeta un teoria, cual la polisia ia esplora, ce la ator ia atenta cisa suiside. El ia comenta: "Me fio ia perde resente se padre e ia fini un relata, ma ia trova denova se calmia. El no ia lasa un letera de suiside e ia ave no razona per mata se."

2016-02-02

La olimpiales va aveni an con la virus de Zica

Brasil ia dise ce no posible esiste ce on va cansela la juas olimpial en Rio par causa de la virus de Zica.

La autoriosas ia dise ce on ave no risca per atletas e oservores – estra femes ensinta – a la aveni en agosto.

Plu temprana, la Organiza de Sania Mundal (OSM) ia averti ce un maladia relatada con la virus presenta un crise global de sania publica e esije un responde unida.

On ia lia la infeta a casos de microsefalia, en cual bebes nase con serebros sudevelopada.

Espertas es ansiosa ce la virus, portada par moscitos en America Latina, estende vasta e rapida, con resultas ruinante.

Jaques Wagner, la xef de consilio de presidente Dilma Rousseff, ia dise: "Nos debe esplica a los ci va veni a Brasil, la atletas, ce on ave no risca si on no es un fem ensinta."

Rousseff ia permete ja ce, si nesesada, esaminores sanial usa fortia per entra a construidas privata, como parte de la labora par la governa per elimina locas de reprodui de moscitos, spesial acuas staniante.

Esaminores ave aora la direto de clama la polisia si nesesada, e on ia envia plu ca 200 mil soldatos per fa tal esaminas.

La ministreria brasilera de sania dise ce on ia esamina ja sirca 25% de la 49 milion casas en la pais.

Entretempo, la dirijor jeneral de la OSM, Margaret Chan, ia descrive Zica como "un aveni estracomun" cual nesesa un responde coordinada.

"Me declara aora," el ia dise, "ce la grupo resente de nonormales de microsefalia e otras de neurolojia, reportada en America Latina pos un grupo simil en Polinesia Franses en 2014, composa un crise de sania publica de conserna internasional."

La avisa par OSM pone la virus de Zica en la mesma categoria de problem como Ebola. Lo sinifia ce on va rapidi rexercas e aidas per ataca la infeta.

On ia reporta ja sirca 4000 casos de microsefalia sola en Brasil de pos otobre.

La OSM ia fronti criticas forte ce lo ia pospone tro longa ante declara ce la aveni de Ebola es un crise publica.

2016-02-01

Un barcon de carga risca encalia en Frans

Un barcon de carga vade malfunsionante en dirije a la costa franses, ma on espera ce on va susede tira lo a securia ante cuando lo encalia.

La Espresa Moderna, cual ave 164 metres e ia es rejistrada en Panama, ia comensa apoia a martedi pasada, e on ia move tota 22 ecipores de sur lo par elicotor pos un clama per aida.

Atentas de tira lo no ia susede, ma on va atenta denova oji. Si esta fali, la barcon va colpa la costa sude-ueste de Frans en la oras temprana de la matina doman.

Ier, un clima nonfavorente ia impedi la laboras de salva, a du dias pos la rompe de un cordon de tira liada a la barcon sur mar turbosa.

La barcon porta 3600 tones de lenio e macinas de escava, e apoia aora con angulo de entre 40 e 50 grados.

Un portavose ia dise ce "reti la barcon de carga es completa nonposible" aora.

Sirca 300 tones de carburante es en la barcon, diseda par autoriosas franses. La jornal Sud-Ouest ia reporta ce on va ativi medios de crise si la barcon encalia, per conteni e sutrae la carburante.

En 2002, un tancador de petrolio ia afonda a lado de la costa de Espania norde, malversante 50 mil tones de petrolio e contaminante miles de cilometres de la borda de mar.

A 10:00 de ora universal ier, la Espresa Moderna ia es situada a sirca 100 cilometres de la costa sude-ueste franses, entre Bordeaux e Biarritz.