Un nador franses ia parti de Japan con intende de deveni la person prima ci traversa la Mar Pasifica par nada.
Ben Lecomte, ci ave 51 anios, va nada tra oto oras per dia, tra plu ca ses menses, en dirije a la costa ueste de la SUA. La periles cual el risca fronti inclui selacos, tempestas, manadas de medusas, e acua de temperatur intensa basa.
El espera trae consensia a la cambia de clima, e un ecipo de siensistes va fa rexercas en sua nada de 9000 cilometres. Los va studia detrito plastica e la efeto de eserses estrema a la cor. Los va esamina ance como la desastre nucleal de Fukushima ia afeta la mar.
Lecomte, ci abita en la SUA, ia prepara se par oras de nada en acua nonencluida a cada dia. El ia fa ance eserses de "imajina e desasosia" per serti ce sua mente es en state conveninte.
Sua preparas ia ocupa Lecomte tra plu ca ses anios, ma el ia desira fronti la defia tra tempo multe plu longa. En 1998, el ia fa la nada solo prima conoseda de lado a lado de la Mar Atlantica, traversante 6400 cilometres en 73 dias. Cuando el ia ateni final la tera en Frans, sua parolas prima ia es "nunca denova", ma pos corta el ia xerca un defia nova.
Sua costum dial va resta cuasi la mesma tra sua viaja intera. El va nada per oto oras, entra a la barco suportante per come e dormi, e reentra a la acua a pos.
Per manteni un nivel alta de enerjia, el intende consuma 8000 calorias per dia. "Me ave un dieta asoluta sin sucre," el ia comenta. "La plu de mea calorias va veni de un dieta grasosa, incluinte multe comes jelada completa, ris, pastas e sopas diversa."
La barco acompaniante va ave un jeolocalador, e persones interesada pote segue la progresa de Lecomte en sua pajeria.